အခန်း (၃၇)

လောကရဲ့အထွတ်အထိပ်သို့ အပိုင်း (၃၇)

ထျန်ရှင်းလုက အင်မော်တယ်၏ အပြောအား ဘယ်လိုမှမတုန့်ပြန်ချေ။ အင်မော်တယ်ကလည်း ထျန်ရှင်းလုအား အားကောင်းသောအကြည့်တို့ဖြင့်စိုက်ကြည့်နေသည်။

ခနလောက် တိတ်ဆိတ်သွားပြီး​နောက်တွင် ထျန်ရှင်းလုက ရိုးသားဖော်ရွေစွာပြုံးလိုက်ပြီး အရိုအသေပေးလိုက်သည်။

“ဂျူနီယာ ထျန်ရှင်းလုက စီနီယာမသေမျိုးကို ဂါဝရပြုပါတယ်။”

ချက်ချင်းကြီး မတူညီသည့် လူ ၂ ယောက်လိုဖြစ်သွားသောကြောင့် အင်မော်တယ်က နှာမှုတ်လိုက်၏။

“မသေမျိုးတဲ့လား..ဟမ့်၊ ငါက အဲလိုဂုဏ်ပုဒ်နဲ့မထိုက်တန်ပါဘူးလေ။”

“ငါက ပြိုင်စံရှားဓားသခင် တစ်ယောက်သာသာပါပဲ” ဓားသခင်ကပြောလိုက်ပြီးနောက်တွင် ထျန်ရှင်းလု၏တုန့်ပြန်မှုအားတစ်ချက်ကြည့်လိုက်သည်။

သကောင့်သားမှာတော့ ထူးထူးခြားခြားမရှိပဲ ပြုံးဖြီးလျက် သူ့အားကြည့်နေသည်။ ဓားသခင်က ချောင်းဟန့်လိုက်ပြီးဆက်ပြောလိုက်သည်။

“ငါက မင်ခေတ်တုန်းက ကျော်ကြားခဲ့တဲ့ ဓားသခင်ဇျန်ပဲ”

“ဒါကတော့ ငါရဲဇနီးဖြစ်သူ ဆေဘာဘုရင်မ ယီရွယ်” “ သူမကတော့ ပြိုင်စံရှားသခင်အဆင့် ကျင့်ကြံခြင်းမရှိတာမို့ ငါ့လိုမျိုးဝိညာဉ်အပိုင်းအစကို မချန်ထားနိုင်ခဲ့ဘူး” ပြိုင်စံရှားဓားသခင်ဇျန်က သက်ပျင်းချလိုက်၏။

ဓားသခင်ဇျန်က ခြေတစ်လှမ်း၊ လှမ်းလိုက်သောအခါ ပတ်ဝန်းကျင်ဟာ အလုံစုံပြောင်းလဲသွားလေပြီး ဂိုဏ်းတိုက်ပွဲကြီးတစ်ခုထံသို့ မြင်ကွင်းရောက်ရှိသွားလေသည်။

“မင်ခေတ်၊ လွန်ခဲ့တဲ့ နှစ်ပေါင်း ၅၆၀၀ ကျော်တုန်းက ဓားနဲ့ဆေဘာဂိုဏ်းကို နတ်ဆိုးနန်းတော်ဂိုဏ်းက ကျူးကျော်ခဲ့တယ်” ဓားသခင်ဇျန်၏ အသံက ပတ်ဝန်းကျင်တစ်ခုလုံးကို လွှမ်းခြုံသွားသည်။

မြင်ကွင်းထဲတွင် အလင်းတန်းများနှင့် မှောင်မိုက်သော စွမ်းအင်တို့ တိုက်ခိုက်နေကြသည်။

မိုးကောင်းကင်တစ်ခုလုံးက အက်ကွဲကြောင်းများ ဖြစ်ပေါ်နေပြီး မြေပြင်ပေါ်ရှိ တောင်တန်းကြီးများသည် ကျောက်တုန်းအပိုင်းအစများအဖြစ် ပြိုကွဲပျက်စီးနေကြသည်။

မြစ်များသည် အခိုးအငွေ့များအဖြစ် ပျောက်ကွယ်သွားပြီး၊ သစ်တောများသည်လည်း အမြစ်မှပင်လှန်ကာ လေနှင့်အတူပါသွားလေသည်။

နတ်ဆိုးနန်းတော်ဂိုဏ်းမှ နတ်ဆိုးများသည် အနက်ရောင်ဝတ်ရုံများ ဝတ်ဆင်ထားပြီး မျက်လုံးများက သွေးဆာနေသည့် အသွင်ဖြစ်သည်။

သူတို့သည် ဓားနှင့်ဆေဘာဂိုဏ်းသားများအား အနက်ရောင်စွမ်းအင်များနှင့် တိုက်ခိုက်နေကြသည်။ ဓားနှင့်ဆေဘာဂိုဏ်းသားများသည် မိမိတို့၏ဓားများနှင့် ဆေဘာများဖြင့် ပြန်လည်ခုခံနေကြသော်လည်း နတ်ဆိုးတို့၏ စွမ်းအားက အလွန်ပြင်းထန်နေသည်။

ပြိုင်စံရှားသခင်အဆင့် ကျင့်ကြံသူများ၏ တိုက်ပွဲမှာ အထူးပင် ကြောက်မက်ဖွယ်ကောင်းလှသည်။ ဓားသခင်ဇျန်ကိုယ်တိုင်က အလင်းတန်းများ ပျံဝဲနေသော ဓားတစ်ချောင်းကို ကိုင်ဆောင်ထားပြီး မိုးကောင်းကင်တွင် ပျံသန်းနေသည်။

သူ၏ဓားချက်များသည် လျှပ်စီးများကဲ့သို့ လျင်မြန်ပြီး တောင်တန်းများကို ထက်ပိုင်းဖြတ်တောက်နိုင်စွမ်းရှိသည်။ သူ၏ပြိုင်ဘက်မှာ နတ်ဆိုးနန်းတော်ဂိုဏ်းမှ နတ်ဆိုးသခင်ကြီးတစ်ပါး ဖြစ်ပြီး ခန္ဓာကိုယ်တစ်ခုလုံးသည် အနက်ရောင်မီးလျှံများဖြင့် ဖုံးလွှမ်းနေသည်။

ထိုနတ်ဆိုးသခင်ကြီး၏ လက်ချက်တိုင်းသည် ကမ္ဘာမြေကို တုန်ခါစေပြီး ပတ်ဝန်းကျင်ရှိအရာအားလုံးကို ပြာအဖြစ်ပြောင်းလဲပစ်နိုင်စွမ်းရှိသည်။

ဆေဘာဘုရင်မ ယီရွယ်သည်လည်း သူမ၏ဆေဘာဖြင့် ရဲရင့်စွာ တိုက်ခိုက်နေသည်။ သူမ၏ဆေဘာချက်များသည် လေထဲတွင် လှပသော လှိုင်းလုံးများကို ဖန်တီးကာ နတ်ဆိုးများကို ခုတ်ပိုင်းနေသည်။

သူမ၏မျက်နှာတွင်မူ စိုးရိမ်ပူပန်မှု အရိပ်အယောင်များ ပေါ်ထွက်နေပြီး၊ သူမ၏ဘေးနားမှ ဂိုဏ်းသားများ တစ်ဦးပြီးတစ်ဦး မြေပြင်ပေါ်သို့ ပြိုလဲကျသည်ကို မြင်နေရသည်။

တိုက်ပွဲသည် မိနစ်တိုင်း ပိုမိုပြင်းထန်လာသည်။ ဓားနှင့်ဆေဘာဂိုဏ်းသားရာပေါင်းများစွာသည် နတ်ဆိုးတို့၏ ရက်စက်သော တိုက်ခိုက်မှုအောက်တွင် အသက်ဆုံးရှုံးနေကြရသည်။

သူတို့၏ခန္ဓာကိုယ်များသည် မြေပြင်ပေါ်တွင် ပြန့်ကျဲနေပြီး သွေးများသည် မြစ်ချောင်းများကဲ့သို့ စီးဆင်းနေသည်။ ကောင်းကင်ယံမှ သွေးမိုးများ ရွာချနေသယောင်ပင်။

အဆောက်အအုံများ၊ ဘုရားကျောင်းများ၊ ကျောင်းတော်များသည်လည်း အစအနမကျန် ပျက်စီးနေကြပြီ။ လှပသောဥယျာဉ်များသည် မီးလောင်တိုက်သွင်းခံထားရပြီး သစ်ပင်များသည် မီးခိုးငွေ့များအဖြစ် ပျောက်ကွယ်နေသည်။ တိုက်ပွဲ၏ အနံ့သည် သွေးနှင့် မီးခိုးနံ့တို့ဖြင့် လေထုတစ်ခုလုံးကို ပြည့်နှက်နေသည်။

ပြိုင်စံရှားအဆင့် ကျင့်ကြံသူများ၏ တိုက်ခိုက်မှုတိုင်းသည် ကမ္ဘာမြေကို ထက်ခြမ်းခွဲနိုင်စွမ်းရှိသည်။ ဓားသခင်ဇျန်၏ ဓားချက်တစ်ချက်သည် နတ်ဆိုးသခင်ကြီး၏ ခန္ဓာကိုယ်အား ထိမှန်သွားသောအခါ နတ်ဆိုးသခင်ကြီးသည် အော်ဟစ်မြည်ဟီးရင်း မြေပြင်ပေါ်သို့ ပြိုလဲကျသွားသည်။

သို့သော် နတ်ဆိုးသခင်ကြီးသည် မသေဆုံးဘဲ ပိုမိုကြီးမားသော နတ်ဆိုးတစ်ကောင်အဖြစ် ပြန်လည်ပုံစံပြောင်းလဲကာ ကောင်းကင်ယံသို့ ပြန်လည်ပျံတက်လာသည်။

ဓားသခင်ဇျန်သည် ထျန်ရှင်းလုအား ကြည့်လိုက်ပြီး သူ၏မျက်နှာတွင် နာကျင်မှုအရိပ်အယောင်များ ပေါ်ထွက်လာသည်။

“အဲဒီတုန်းက ငါတို့ရှုံးခဲ့တယ်... ငါတို့ရဲ့ဂိုဏ်းလည်း ပျက်စီးခဲ့ရတယ်... ငါ့ဇနီး ယီရွယ်လည်း ဒါဏ်ရာအပြင်းအထန်ရခဲ့တယ်။...” ဓားသခင်ဇျန်၏အသံသည် နာကျင်မှုများဖြင့် ပြည့်နှက်နေသည်။

ထျန်ရှင်းလုကတော့ တောက်ပနေသော မျက်ဝန်းတို့ဖြင့်တိုက်ပွဲအားစိုက်ကြည့်နေသည်။ သတိမထားမိလိုက်သည့်အချိန်မှာပင် သူ၏မျက်ဝန်းတို့ဟာ နီရဲလာပြီး နာကျင်လာသလို ပူပြင်းလာသောကြောင့် သူကမျက်လုံးကိုပိတ်လိုက်ရပြီး ပွတ်သပ်လိုက်ရလေသည်။

ရန်သူများအား ဆေဘာတစ်လက်ဖြင့် ခက်ထန်စွာတိုက်ခိုက်နေသည့် သူ၏ဇနီးချောလေး ယီရွယ်အားကြည့်ကာ ဓားသခင်ဇျန်သက်ပျင်းချလိုက်သည်။

ပြီးနောက်တွင် လက်အားယမ်းလိုက်ပြီး ပုံရိပ်များအားပြန်ဖယ်လိုက်သောအခါ ပတ်ဝန်းကျင်ဟာလည်း မြေအောက်ဂူထံသို့ပြန်ရောက်လာလေသည်။

လောကရဲ့အထွတ်အထိပ်သို့ အပိုင်း (၃၇) ပြီး