စုဆောင်း တာဝန်ပေးခြင်း

မြေခွေးဖြူ နတ်ဘုရားရုပ်တုသည် ပထမဆုံးအကြိမ်အဖြစ် တက်ကြွစွာ ပြန်လည် တိုက်ခိုက်မှုကို စတင်လိုက်၏။

လီချန် ထည့်သွင်းပေးသော ဝိညာဉ်စွမ်းအားအောက်တွင်၊ မြေခွေးဖြူ နတ်ဘုရားရုပ်တု သည် လျင်မြန် ဖျတ်လတ်ပြီး တဟုန်ထိုး တိုက်ခိုက်လေသည်။

တန်ခိုးရှင်ကမ္ဘာစည်းမျဉ်းများ၏ ဖိနှိပ်မှုအောက်တွင် သူသည် ဗလာသို့ပြန်ခြင်း ၄၉ လှမ်း၏ အစွမ်းကိုသာ ထုတ်ဖော်နိုင်သော်လည်း ဖြစ်၏။

သို့သော် သူနှင့် မြေခွေးဖြူ ကိုယ်ပွားတို့၏ ပူးပေါင်း လုပ်ဆောင်မှုမှာ အခြား မဟာအစီအရင် ကျွမ်းကျင်သူများ နှင့် ဓမ္မစောင့်ရှောက်သူများ နှိုင်းယှဉ်နိုင်သည် မဟုတ်ပေ။

မည်မျှပင် ရင်းနှီးသော မဟာအစီအရင် ကျွမ်းကျင်သူနှင့် ဓမ္မစောင့်ရှောက်သူ ဖြစ်စေကာမူ အဆုံးစွန်ထိ လူနှစ်ဦး ဖြစ်ကြသည်။ မိမိကိုယ်ပိုင် အသိစိတ်၊ တွေးခေါ်ပုံ၊ စရိုက်လက္ခဏာများ ရှိကြသည်။ အလွန်အမင်း ရင်းနှီးစွာ ပူးပေါင်း လုပ်ဆောင်နိုင်လျှင်ပင် လုံးဝ မျှတ ညီညွတ်သည့် အခြေအနေသို့ မရောက်ရှိနိုင်ပေ။

သို့သော် လီချန်မှာမူ မတူညီပေ။ မြေခွေးဖြူကိုယ်ပွားသည် သူပင် ဖြစ်၏။ သို့ဖြစ်၍ သူ၏ မြေခွေးဖြူ နတ်ဘုရားရုပ်တု မဟာအစီအရင်ကြီးအပေါ် ထိန်းချုပ်မှုသည် အပြည့်စုံဆုံး အကောင်းမွန်ဆုံး အခြေအနေသို့ ရောက်ရှိနေ၏။

ထို့အပြင်၊ ယခင်က အဆက်မပြတ် တိုက်ခိုက်ရင်ဆိုင်မှုများမှတစ်ဆင့် သူသည် အခြား နတ်ဘုရားရုပ်တု လေးရုပ်၏ အားနည်းချက်ဟာကွက်များကို သိရှိထားပြီး ဖြစ်၏။

လီချန်၏ ပထမဆုံး ပစ်မှတ်မှာ ရွှေလင်းယုန် နတ်ဘုရားရုပ်တု ဖြစ်၏။ နတ်ဘုရားရုပ်တု လေးရုပ်ထဲတွင် ၎င်းသည် အပျော့ညံ့ဆုံး တစ်ရုပ်ဖြစ်ကြောင်း ပြသခဲ့သည်။

နတ်ဘုရားရုပ်တု နှစ်ရုပ် အတူတကွ တိုက်မိသွားသည်နှင့် မြေခွေးဖြူ နတ်ဘုရားရုပ်တုသည် လုံးဝ အသာစီး ရရှိသွား၏။

တစ်ချိန်တည်းတွင်၊ အစွမ်းထက်သော မဟာအစီအရင် လှိုင်းများသည် ဟာကွက်မှတစ်ဆင့် ပြင်းထန်စွာ ဝင်ရောက် တိုက်ခိုက်သွားပြီး၊ ဝါးခြမ်းသကဲ့သို့ အဟန့်အတားမရှိ၊ ရွှေလင်းယုန် နတ်ဘုရားရုပ်တု၏ ကာကွယ်ရေးကို အလွယ်တကူ ချိုးဖျက်လိုက်လေသည်။

ဝိညာဉ်အငွေ့အသက်ထည့်သွင်းပေးနေသော ဓမ္မစောင့်ရှောက်သူ သည် တစ်ကိုယ်လုံး တုန်ခါသွားပြီး၊ နောက်ပြန် ကန်ထွက်အားအောက်တွင် သူ သွေးတစ်ပွက်ကို ပြင်းထန်စွာ အန်ထုတ်လိုက်မိ၏။

နတ်ဘုရားရုပ်တု မဟာအစီအရင်ကြီး ကို ထိန်းချုပ်နေသော မဟာအစီအရင် ကျွမ်းကျင်သူသည်လည်း အလားတူ မျက်နှာ ဖြူဖျော့သွားပြီး ဝိညာဉ်အာရုံ တုန်ခါသွား၏။

ရုတ်တရက်၊ ပြင်းထန်သော ဓားချီတစ်ခု လျင်မြန်စွာ ထိုးစိုက်လာရာ ဓမ္မစောင့်ရှောက်သူ သည် ခဏမျှသာ တောင့်ခံနိုင်ပြီး သူ၏ကာကွယ်ရေးမှာ စုတ်ဖြဲခြင်း ခံလိုက်ရ၏။

"အမြန် ထွက်တော့" ဓမ္မစောင့်ရှောက်သူက ကျယ်လောင်စွာ အော်ဟစ်လိုက်သည်။

ဓမ္မစောင့်ရှောက်သူ၏ အကာအကွယ်ပေးခြင်း ခံထားရသော မဟာအစီအရင် ကျွမ်းကျင်သူသည် ကျောက်စိမ်းအဆောင်ကို အလျင်အမြန် ချေမွလိုက်ရာ ချက်ချင်းပင် သူတို့နှစ်ဦး၏ ကိုယ်လုံးများ တွန့်လိမ်သွားပြီး၊ ပျောက်ကွယ်သွားလေသည်။

လီချန် ဓားချီကို ပြန်လည် ရုတ်သိမ်းလိုက်၏။

အမှန်စင်စစ်၊ သူသာ ဤနှစ်ဦးကို အမှန်တကယ် သတ်ဖြတ်လိုပါက သူ၏ ကောင်းကင်ခွင်းဓား၏ စွမ်းအားဖြင့် တစ်ဖက်လူ ကျောက်စိမ်းအဆောင်ကို အသုံးပြု၍ တန်ခိုးရှင်ကမ္ဘာ၏ နေရာကူးပြောင်းခြင်း စွမ်းအားကို လှုံ့ဆော်လိုက်လျှင်ပင်၊ သူသည် ထိုမျက်စိတစ်မှိတ်အတွင်း အခွင့်အရေးကို ဆုပ်ကိုင်နိုင်ပြီး ဟင်းလင်းပြင်ကို စုတ်ဖြဲကာ သတ်ဖြတ်နိုင်စွမ်း ရှိ၏။

သို့သော် ဤသို့ ပြုလုပ်ရန် မလိုအပ်ပေ။

ရွှေလင်းယုန် နတ်ဘုရားရုပ်တုကို အနိုင်ယူပြီးနောက် မမြင်နိုင်သော စွမ်းအားတစ်ရပ်သည် မြေခွေးဖြူ နတ်ဘုရားရုပ်တုအတွင်းသို့ စီးဝင်လာပြီး ယခုလေးတင်က ကုန်ဆုံးသွားမှုများကို ပြန်လည် ဖြည့်တင်းပေး၏။

ဤသည်မှာ တန်ခိုးရှင်ကမ္ဘာအတွင်းမှ စစ်တုရင်စနစ် ဖြစ်လောက်၏။ အနိုင်ရသူသည် အတိုင်းအတာတစ်ခုအထိ ပြန်လည် ဖြည့်တင်းမှုများကို ရရှိနိုင်၏။

မည်သို့ပင်ဆိုစေ ဤ အဆင့်ရှိ တိုက်ပွဲ ယှဉ်ပြိုင်မှုသည် ဝိညာဉ်အာရုံနှင့် ဝိညာဉ်စွမ်းအင်များ ကုန်ဆုံးမှု အလွန် ကြီးမား၏။ သတ်ဖြတ်ခြင်းမှတစ်ဆင့် ဝိညာဉ်အာရုံနှင့် ဝိညာဉ်စွမ်းအားများကို ပြန်လည် ဖြည့်တင်းနိုင်မှသာ အလှည့်ကျ တိုက်ပွဲကို ဆက်လက် ပြုလုပ်နိုင်မည် ဖြစ်၏။

ဤမျှ လျင်မြန်စွာ ရွှေလင်းယုန် နတ်ဘုရားရုပ်တုကို အနိုင်ယူလိုက်သဖြင့် အခြား နတ်ဘုရားရုပ်တု သုံးရုပ်မှ မဟာအစီအရင် ကျွမ်းကျင်သူများ အလွန်အမင်း တုန်လှုပ်သွားကြ၏။

နတ်ဘုရားရုပ်တု လေးရုပ်၏ အလှည့်ကျ တိုက်ခိုက်မှုအောက်တွင် တောင့်ခံထားနိုင်ရုံသာမက ပြန်လည် တိုက်ခိုက်နိုင်ခဲ့သေး၏။

၎င်းတို့ အနည်းငယ် ဦးရေပြား ထုံကျင်သွားကြ၏။ ဒီလီပိုင် သူ့ရဲ့ဓမ္မစောင့်ရှောက်သူကို ဘယ်ကနေများ သွားရှာလာတာလဲ။

ကျားခုံပေါ်မှ နတ်ဘုရားရုပ်တုများ၏ တိုက်ပွဲသည် မဟာအစီအရင်ကျွမ်းကျင်သူ၏ မဟာအစီအရင် ကျွမ်းကျင်မှုအပေါ်တွင်သာ မူတည်နေသည် မဟုတ်ဘဲ၊ ဓမ္မစောင့်ရှောက်သူ၏ အစွမ်းသည်လည်း လုံလောက်စွာ အစွမ်းထက်ရန် လိုအပ်၏။

"နောက်တစ်ယောက်၊ ဘယ်သူ တက်မလဲ" မြေခွေးဖြူကိုယ်ပွားက ပြောလိုက်သည်။

တန်ခိုးရှင်ကမ္ဘာတိုက်ပွဲ၏ စည်းမျဉ်းမှာ တစ်ယောက်ချင်းသာ တိုက်ခိုက်နိုင်သည်။ သို့မဟုတ် အလှည့်ကျ တိုက်ခိုက်၍ ရသည်။ သို့သော် တိုက်ပွဲ ထိတွေ့သည့် အကြိမ်တိုင်းတွင်၊ တစ်ဦးချင်းစီသာ ဖြစ်ရမည်။

"ငါ လာမယ်" ဝက်ဝံဖြူ နတ်ဘုရားရုပ်တုသည် ဟိန်းဟောက်သံ ပြုလိုက်ပြီး၊ တဟုန်ထိုး ဝင်တိုက်လာရာ ကြောက်မက်ဖွယ် ကြီးမားသော စွမ်းအားသည် မြေခွေးဖြူ နတ်ဘုရားရုပ်တု ၏ အပေါ်သို့ ပြင်းထန်စွာ ကျရောက်လာ၏။

သို့သော် မြေခွေးဖြူ နတ်ဘုရားရုပ်တု မှာမူ တောင်ကြီးတစ်လုံးကဲ့သို့ မလှုပ်မယှက် တည်ငြိမ်နေ၏။

ပြင်းထန်သော မဟာအစီအရင် ယှဉ်ပြိုင်မှုအောက်တွင် တဖြည်းဖြည်း အနိုင်အရှုံး ပေါ်လာ၏။

ဝက်ဝံဖြူ နတ်ဘုရားရုပ်တုသည် သိသိသာသာပင် နောက်ပိုင်းတွင် အားမတန်တော့ဘဲ၊ ထို့အပြင် လီချန်က မဟာအစီအရင် ဟာကွက်ကို ဖမ်းမိသွားသဖြင့် တစ်ချက်တည်းဖြင့် အနိုင်ယူ သတ်ဖြတ်လိုက်၏။

ဝက်ဝံဖြူ နတ်ဘုရားရုပ်တုသည် ပြင်းထန်စွာ ပြိုလဲသွား၏။ ချီကူတောင်ထွတ်၏ အကြီးဆုံးဆရာတူအစ်ကိုသည် သက်ပြင်းတစ်ချက် ချလိုက်ပြီး၊ တန်ခိုးရှင်ကမ္ဘာမှ ထွက်ခွာရန် ရွေးချယ်လိုက်သည်။

အတန်ကြာပြီးနောက်၊ ကြွက်နီ နတ်ဘုရားရုပ်တုသည်လည်း မြေခွေးဖြူ နတ်ဘုရားရုပ်တု ၏ ချေမှုန်းခြင်းကို ခံလိုက်ရ၏။

နောက်ဆုံးတွင်၊ တန်ခိုးရှင်ကမ္ဘာအတွင်း၌ မြေခွေးဖြူ နတ်ဘုရားရုပ်တု နှင့် သိုးနက် နတ်ဘုရားရုပ်တု နှစ်ရုပ်သာ ကျန်တော့၏။

သိုးနက် နတ်ဘုရားရုပ်တုထဲမှ မဟာအစီအရင်ကြီးကို ဦးစီးနေသော ဆရာတူအစ်ကိုယန်၏မျက်နှာသည် အလွန်အမင်း လေးနက်နေ၏။

"သူ့ရဲ့ မဟာအစီအရင်က ဘယ်လိုလုပ် ဒီလောက် အစွမ်းထက်နေရတာလဲ" ဤမျှ အကြိမ်များစွာ အလှည့်ကျ တိုက်ခိုက်ခဲ့သော်လည်း သူသည် လီပိုင်၏ မဟာအစီအရင်ပေါ်မှ မဟာအစီအရင် ဟာကွက်ကို ရှာမတွေ့ခဲ့ပေ။

မဟာအစီအရင် ဟာကွက် မရှိခြင်း မဟုတ်ဘဲ သူ၏ မဟာအစီအရင် ကျွမ်းကျင်မှု မလုံလောက်သေးကြောင်းသာ ဖော်ပြနေ၏။

မဟာအစီအရင် ကျွမ်းကျင်မှုတွင်၊ လီပိုင်သည် ၎င်းတို့ အားလုံးကို အပြည့်အဝ ကျော်လွန်သွားခဲ့ပြီ ဖြစ်၏။

ဆရာသခင်သည် လီပိုင်ကို အဘယ်ကြောင့် ဤမျှ အလေးထားသည်မှာ အံ့ဩစရာ မရှိတော့ပေ။

"လီပိုင်ရဲ့ ဓမ္မစောင့်ရှောက်သူက၊ ဆရာသခင်က အထူး ပံ့ပိုးပေးထားတာများ ဖြစ်နေမလား" သူ့စိတ်ထဲတွင် ရုတ်တရက် အတွေးတစ်ချက် ဝင်လာ၏။

သို့မဟုတ်ပါက လီပိုင်သည် ယခင်က အင်အားစုများစွာ၏ ဆွဲဆောင်မှုကို ငြင်းပယ်ခဲ့ရာ ဘယ်လိုလုပ် ဒီလောက် အစွမ်းထက်တဲ့ ဓမ္မစောင့်ရှောက်သူကို ရှာဖွေနိုင်မှာလဲ။

ထို့ထက်ပင် လီပိုင်နှင့် ဓမ္မစောင့်ရှောက်သူ ကြားမှ ပူးပေါင်း လုပ်ဆောင်မှုမှာ ဤမျှ ပြီးပြည့်စုံနေသည်။ ၎င်းမှာ တစ်နေ့တစ်ညတည်းဖြင့် လုပ်ဆောင်နိုင်သည် မဟုတ်ဘဲ အချိန်ကြာမြင့်စွာ အတူတကွ နေထိုင်ခဲ့ပြီးမှ ဖြစ်နိုင်သည်မှာ ထင်ရှား၏။

သို့သော် ဤမတိုင်မီက လီပိုင်၏ဘေးတွင် ဓမ္မစောင့်ရှောက်သူ လုံးဝ ရှိမနေခဲ့ပေ။

"ဆရာ၊ ဆရာ ဘာလို့ ဒီလောက်တောင် မျက်နှာလိုက်ရတာလဲ" ဆရာတူအစ်ကိုယန်၏ စိတ်ထဲတွင် အလွန်မကျေမနပ်ဖြစ်သွား၏။

အကယ်၍ လီပိုင်ထံတွင် ဤဓမ္မစောင့်ရှောက်သူ သာ မရှိပါက မဟာအစီအရင်တွင် သာလွန်လျှင်ပင် တန်ခိုးရှင်ကမ္ဘာစမ်းသပ်ပွဲထဲတွင် နောက်ဆုံးအချိန်အထိ တောင့်ခံထားနိုင်မည်မှာ လုံးဝ မဟုတ်ပေ။

"ဆရာတူအစ်ကိုယန်၊ ခင်ဗျား အလိုအလျောက် အရှုံးပေးမှာလား ဒါမှမဟုတ် ကျွန်တော်က နတ်ဘုရားရုပ်တု မဟာအစီအရင်ကြီ‌ေကို ချိုးဖျက်ပြီးမှ အရှုံးပေးမှာလား" မြေခွေးဖြူ ကိုယ်ပွားက ပြုံးလျက် ပြောလိုက်သည်။

"အပိုစကားတွေ ပြောမနေနဲ့" ဆရာတူအစ်ကိုယန်က အေးစက်စွာ နှာမှုတ်လိုက်ပြီး၊ ချက်ချင်းသိုးနက် နတ်ဘုရားရုပ်တုကို လှုံ့ဆော်ကာ တက်ကြွစွာ တိုက်ခိုက်လိုက်၏။

သို့သော် အဆုံးသတ်မှာမူ သတ်မှတ်ပြီးသား ဖြစ်၏။ မကျေမနပ်မှုများ အလယ်တွင်၊ သိုးနက် ရုပ်တုသည် ပြိုကွဲ ပျက်စီးသွားပြီး ဆရာတူအစ်ကိုယန်သည် တန်ခိုးရှင်ကမ္ဘာအတွင်းမှ ပျောက်ကွယ်သွားလေသည်။

ဤအချိန်တွင်၊ ပုံရိပ်တစ်ခုသည် တန်ခိုးရှင်ကမ္ဘာအတွင်း၌ ပေါ်ပေါက်လာသည်။ ၎င်းမှာ ရှီးရှန်းတန်ခိုးရှင်သခင် ဖြစ်၏။

"လီပိုင်၊ ဆရာ့နောက် လိုက်ခဲ့" ရှီးရှန်းတန်ခိုးရှင်သခင်သည်ပြောရင်း တန်ခိုးရှင်ကမ္ဘာ၏ အနက်ရှိုင်းဆုံး အရပ်သို့ ပျံသန်းသွား၏။

မြေခွေးဖြူကိုယ်ပွားသည် အလျင်အမြန် လိုက်ပါသွား၏။ လီချန်၏ပင်မခန္ဓာကိုယ်မှာမူ ထူးဆန်းသော ဟင်းလင်းပြင် စွမ်းအားတစ်ရပ်၏ ဖုံးအုပ်မှုအောက်တွင် တန်ခိုးရှင်ကမ္ဘာမှ ထွက်ခွာသွားခဲ့ပြီ ဖြစ်၏။

တန်ခိုးရှင်ကမ္ဘာ၏ အလယ်ဗဟိုတွင် ထူးဆန်းသော စင်မြင့်တစ်ခု ထင်ရှားစွာ တည်ရှိနေပြီး ထူးဆန်းသော တန်ခိုးရှင်ပုလဲ တစ်လုံး လွင့်မျောနေ၏။

"ဒီ တန်ခိုးရှင်ပုလဲက ငါတို့ တုထျန်းအစီအရင်ဂိုဏ်းရဲ့ အမြင့်မားဆုံး မဟာအစီအရင် အောင်မြင်မှုကို ကိုယ်စားပြုတယ်။ တန်ခိုးရှင်ကမ္ဘာတစ်ခုလုံးရဲ့ မဟာအစီအရင် တွက်ချက် ပြောင်းလဲမှုတွေ အားလုံးက သူ့ဆီကနေ အရင်းခံတာပဲ" ရှီးရှန်းတန်ခိုးရှင်သခင်က ပြောလိုက်သည်။ "အခု မင်း ဒီ တန်ခိုးရှင်ပုလဲကနေတစ်ဆင့် တန်ခိုးရှင်ကမ္ဘာတစ်ခုလုံးရဲ့ မဟာအစီအရင် တွက်ချက် ပြောင်းလဲမှုတွေကို လေ့လာကြည့်ရှုနိုင်ပြီ။ ဘယ်လောက် စုပ်ယူနိုင်မလဲ ဆိုတာကတော့ မင်းရဲ့ ကံကြမ္မာအခွင့်အရေးပေါ်မှာပဲ မူတည်တယ်"

"ဆရာသခင်၊ ဒါဆို ကျွန်တော်တို့ တုထျန်းအစီအရင်ဂိုဏ်းမှာ မဟာအစီအရင် မျိုးဆက်ဆိုပြီး ခွဲခြားထားတာ မရှိဘူးလား" မြေခွေးဖြူကိုယ်ပွား အံ့အားသင့်သွားပြီး ချက်ချင်း ပြောလိုက်၏။

"မဟာအစီအရင် မျိုးဆက်ဆိုပြီး ခွဲခြားထားတာ မရှိပါဘူး။ မဟာအစီအရင် မျိုးဆက်လို့ ခေါ်နေကြတာက မဟာအစီအရင် ကျွမ်းကျင်သူတစ်ယောက်နဲ့တစ်ယောက် နားလည် သဘောပေါက်ပုံ မတူညီကြလို့ပဲ။ 'ဆယ့်လေးအခြေခံ' အထက်ကို ရောက်ရှိနိုင်တဲ့ မဟာအစီအရင် ကျွမ်းကျင်သူတိုင်းကို ကိုယ်ပိုင်မျိုးဆက်တစ်ခု တည်ထောင်နိုင်တယ်လို့ ခေါ်ဆိုနိုင်တယ်" ရှီးရှန်းတန်ခိုးရှင်သခင်က ညင်သာစွာ ရယ်မောလိုက်သည်။

မြေခွေးဖြူကိုယ်ပွား ချက်ချင်းနားလည်သဘောပေါက်သွား၏။

"ကောင်းကောင်း သဘောပေါက် နားလည်အောင် ကြိုးစားလိုက်ဦး" ရှီးရှန်းတန်ခိုးရှင်သခင်က ပြောလိုက်သည်။

မြေခွေးဖြူ ကိုယ်ပွား ခေါင်းညိတ်လိုက်ပြီး ချက်ချင်း အသက် ပြင်းပြင်းတစ်ချက် ရှူလိုက်ကာ ဝိညာဉ်အာရုံဖြင့် တန်ခိုးရှင်ပုလဲကို ဆက်သွယ်လိုက်ရာ မျက်စိတစ်မှိတ်အတွင်း ထူးဆန်းသော မဟာအစီအရင် နယ်ပယ်တစ်ခုထဲသို့ ဝင်ရောက်သွားလေသည်။

ဤသည်မှသာလျှင် အာရုံခံမှုထဲမှ စစ်မှန်သော အမတနယ်မြေ ဖြစ်ပြီး၊ မရေမတွက်နိုင်သော တန်ခိုးရှင်စစ်တုရင်များသည် အတွင်း၌ တွက်ချက် ပြောင်းလဲနေကြကာ တုထျန်းအစီအရင်ဂိုဏ်း၏ အမြင့်မားဆုံး မဟာအစီအရင်ကို ကိုယ်စားပြုနေ၏။

.......

ထိုအချိန်တွင်၊ အချိန်ခေါင်းလောင်းလှိုင်ဂူကောင်းကင်ဘုံအတွင်း၌ ဖြစ်၏။

နတ်ဘုရားဓားဂိုဏ်း၏ ကောင်းကင်ယံထက်တွင် ကြီးမားသော တိမ်တိုက်နဂါးတစ်ကောင် လူးလွန့် ကူးလူးနေ၏။

ဤသည်မှာ လီချန်၏ ယွင်လုံကိုယ်ပွား ဖြစ်၏။ ၎င်းသည်လည်း မြေခွေးဖြူ ကိုယ်ပွားကဲ့သို့ပင်၊ ထာဝရအသက်ရှင်ခြင်းလျှို့ဝှက်နယ်ပယ်သို့ စောစောစီးစီး တက်လှမ်းထားပြီး ဖြစ်သည်။

ဤအခိုက်တွင်၊ ယွင်လုံကိုယ်ပွား၏ ကိုယ်ပေါ်တွင် ထူးဆန်းသော လှိုင်းတစ်ခု ပေါ်ထွက်လာ၏။ ၎င်းမှာ ဉာဏ်အလင်းပွင့်ခြင်းအခြေအနေသို့ ဝင်ရောက်သွားခြင်း ဖြစ်သည်။

အချိန်ခေါင်းလောင်းသည် တာအိုလက်နက်အဖြစ်သို့ အဆင့်မြှင့်တင်ပြီးသည့်နောက်ပိုင်း၊ လီချန်သည် လှိုင်ဂူကောင်းကင်ဘုံအတွင်း၌ ရှိနေသရွေ့ အချိန်တိုင်း ဉာဏ်အလင်းပွင့်ခြင်း အခြေအနေတွင် ရှိနေနိုင်၏။

သူသည် လှိုင်ဂူကောင်းကင်ဘုံမှ ထွက်ခွာသွားလျှင်ပင် သူ၏ကိုယ်ပွား နှစ်ခုသည် လှိုင်ဂူကောင်းကင်ဘုံ အတွင်း၌ ရှိနေသရွေ့ ဤ ဉာဏ်အလင်းပွင့်ခြင်း အခြေအနေကို ဆက်လက် ထိန်းသိမ်းထားနိုင်၏။

ဤအခိုက်တွင်၊ ယွင်လုံကိုယ်ပွားသည် ဉာဏ်အလင်းပွင့်ခြင်း အခြေအနေသို့ ဝင်ရောက်သွားပြီး မြေခွေးဖြူကိုယ်ပွားထံမှ ပေးပို့လာသော မဟာအစီအရင် ပညာရပ်များကို စတင် နားလည် သဘောပေါက်အောင် ကြိုးစားလေသည်။

မည်သို့ပင်ဆိုစေ ဤသည်မှာ ပိုမို အဆင့်မြင့်သော မဟာအစီအရင် ပညာရပ်များနှင့် သက်ဆိုင်နေသဖြင့်၊ မြေခွေးဖြူကိုယ်ပွားတစ်ဦးတည်းဖြင့် နားလည် သဘောပေါက်ရန် အလွန် ခက်ခဲ၏။ ဉာဏ်အလင်းပွင့်ခြင်း အခြေအနေကို အသုံးပြုမှသာ ဖြစ်နိုင်ပေမည်။

......

တန်ခိုးရှင်ကမ္ဘာ၏ အပြင်ဘက်တွင်။

လီချန်သည် စနစ်မျက်နှာပြင်ကို ခေါ်ထုတ်လိုက်ပြီး ချန်ယွမ်အစီအရင်ကျမ်း ဟူသော နေရာတွင် တိုးတက်မှုနှုန်းသည် လျင်မြန်စွာ တိုးပွားလာသည်ကို ကြည့်ရင်း အလွန်အမင်း အံ့ဩသွားမိသည်။ တုထျန်းအစီအရင်ဂိုဏ်း၏ တာအိုအမွေဆက်ခံမှုပင် ဖြစ်ပေသည်။ တကယ်ကိုထူးခြားလှပါပေတယ်။

ဤသည်မှာ သာမန် မဟာအစီအရင် ပညာရပ်များ မဟုတ်ဘဲ အလွန် ထူးခြားသော ခေါင်းထဲသို့လောင်းထည့်လိုက်သည့် နည်းလမ်းတစ်မျိုး ဖြစ်၏။

ဤသည်မှာလည်း 'ချန်ယွမ်အစီအရင်ကျမ်း' ၏ ပြည့်စုံမှု တိုးတက်နှုန်း ဤမျှ လျင်မြန်ရခြင်း၏ အကြောင်းရင်း ဖြစ်၏။

အချိန် မည်မျှ ကြာမြင့်သွားသည် မသိ၊ လီချန်၏မျက်လုံးများသည် ရုတ်တရက် အရောင် လက်သွားပြီး၊ ပြောမပြတတ်သော အပြုံးတစ်ချက်ကို မထိန်းနိုင်ဘဲ ပြုံးလိုက်မိ၏။

အဘယ်ကြောင့်ဆိုသော် သူ၏ မဟာအစီအရင် ကျွမ်းကျင်မှု သည် 'ဆယ့်လေးအခြေခံ' သို့ အောင်မြင်စွာ ထိုးဖောက် တက်လှမ်းသွားခဲ့ပြီ ဖြစ်သောကြောင့်ပင်။ သူသည် ဤမျှ အဆင်ပြေ ချောမွေ့လိမ့်မည်ဟု မထင်ထားခဲ့ပေ။

.......

ထိုအချိန်တွင်၊ တန်ခိုးရှင်ကမ္ဘာအတွင်း၌။

တန်ခိုးရှင်ပုလဲ ကို ဆက်သွယ်နေပြီး၊ အမတနယ်မြေ တစ်ခုလုံးနှင့် ဆက်သွယ်နေသော မြေခွေးဖြူကိုယ်ပွား၏ကိုယ်ပေါ်တွင် ရုတ်တရက် ထူးဆန်းသော မဟာအစီအရင် ပုံရိပ်ယောင် တစ်ခု ပေါ်ထွက်လာပြီး၊ နောက်ဆုံးတွင် ကျုံ့ဝင်သွားကာ ထူးဆန်းသော တန်ခိုးရှင်ပုလဲတစ်လုံးအဖြစ်သို့ ဖွဲ့စည်းသွား၏။

ဤ တန်ခိုးရှင်ပုလဲသည် ရုတ်တရက် လှုပ်ရှားသွားပြီး မြေခွေးဖြူကိုယ်ပွား၏ခန္ဓာကိုယ် အတွင်းသို့ ထိုးဖောက် ဝင်ရောက်သွား၏။

ဤ မြင်ကွင်းကို အစကတည်းက စောင့်ကြည့်နေခဲ့သော ရှီးရှန်းတန်ခိုးရှင်သခင်သည် ဤ မြင်ကွင်းကို မြင်သောအခါ သူ့မျက်နှာထက်တွင် တုန်လှုပ်သော အရိပ်အယောင်တစ်ခု ပေါ်လာ၏။

"ဒါ၊ ဒါ 'ဆယ့်လေးအခြေခံ' ကို ထိုးဖောက်သွားတာလား" မူလက သူသည် လီပိုင်၏ပါရမီကို လုံလောက်စွာ အလေးထားခဲ့ပြီး ဖြစ်သော်လည်း ယခု ကြည့်ရသည်မှာ သူ ထင်ထားသည်ထက်ပင် ပို၍ အစွမ်းထက်နေသေး၏။

မဟုတ်ပါက တုထျန်းအစီအရင်ဂိုဏ်း၏ အမြင့်မားဆုံး တာအိုအမွေဆက်ခံမှုကို လက်ခံစဉ်တွင် 'ဆယ့်လေးအခြေခံ' မဟာအစီအရင် ကျွမ်းကျင်သူအဖြစ်သို့ တိုက်ရိုက် ထိုးဖောက် တက်လှမ်းသွားနိုင်မည် မဟုတ်ပေ။ ဤသို့သော အခြေအနေမျိုးသည် တုထျန်းအစီအရင်ဂိုဏ်း၏ သမိုင်းတွင် တစ်ကြိမ်သာ ပေါ်ပေါက်ခဲ့ဖူးသည်ကို သိရှိရမည်။

ထို တစ်ကြိမ်မှာပင် တုထျန်းအစီအရင်ဂိုဏ်း၏ တန်ခိုးရှင်ကမ္ဘာတွက်ချက်မှုကို 'ဆယ့်ခြောက်အခြေခံ' အဆင့်သို့ တက်လှမ်းစေခဲ့၏။

တုထျန်းအစီအရင်ဂိုဏ်းတွင် မဟာအစီအရင်ကို ရှေ့သို့ တစ်လှမ်း တိုးတက်စေမည့် ရတနာအဆင့် မဟာအစီအရင် ကျွမ်းကျင်သူတစ်ဦး ထပ်မံ ပေါ်ပေါက်လာတော့မှာလား။

ဤအခိုက်အတန့်တွင် ရှီးရှန်းတန်ခိုးရှင်သခင်သည် အလွန်အမင်း စိတ်လှုပ်ရှားနေမိ၏။

အချိန်အတော်ကြာပြီးနောက်၊ မြေခွေးဖြူကိုယ်ပွား မျက်လုံး ဖွင့်လိုက်၏။ တုထျန်းအစီအရင်ဂိုဏ်း၏ တာအိုအမွေဆက်ခံမှုကို၊ ၎င်း အားလုံး လက်ခံ ရရှိခဲ့ပြီး ဖြစ်၏။

ဉာဏ်အလင်းပွင့်ခြင်း အခြေအနေမှတစ်ဆင့် များစွာ နားလည် သဘောပေါက်ခဲ့သော်လည်း များပြားလွန်းလှသေးသည်။ ၎င်းမှာ ကာလတိုအတွင်း နားလည် သဘောပေါက်နိုင်သည် မဟုတ်ဘဲ နောင်တွင် တဖြည်းဖြည်း နားလည် သဘောပေါက်အောင် ကြိုးစားမှသာ ရမည် ဖြစ်၏။

"ကောင်းတယ်၊ ကောင်းတယ်၊ ကောင်းတယ်၊ မင်း 'ဆယ့်လေးအခြေခံ' ကြီးမြတ်တဲ့ မဟာအစီအရင် ကျွမ်းကျင်သူအဖြစ်ကို ရောက်ရှိသွားပြီ။ နောင်အနာဂတ်မှာ ငါ့ရဲ့ ချီကူတောင်ထွတ်က မင်းကို အားကိုးပြီး တိုးတက် ကြီးပွားရတော့မယ်" ရှီးရှန်းတန်ခိုးရှင်သခင်က ကျေနပ်စွာ ခေါင်းညိတ်ရင်း ပြောလိုက်သည်။

........

သူတို့နှစ်ဦး တန်ခိုးရှင်ကမ္ဘာမှ ထွက်လာသောအခါ။

ထိုနေရာတွင် ရှိနေသော တုထျန်းအစီအရင်ဂိုဏ်း၏ အခြား အကြီးအကဲများသည် မြေခွေးဖြူ ကိုယ်ပွား၏ အရှိန်အဝါကို အာရုံခံမိကြပြီး အားလုံး အံ့အားသင့်သွားကြကာ ချက်ချင်းပင် ဝိုင်းဝန်း ဂုဏ်ပြုစကား ဆိုကြလေသည်။

၎င်းတို့အားလုံးသည် မြေခွေးဖြူကိုယ်ပွား၏ ခန္ဓာကိုယ်အတွင်းမှ တန်ခိုးရှင်ပုလဲ၏ အရှိန်အဝါကို အာရုံခံမိကြပြီး၊ ထို့ကြောင့် ခွဲခြား ဆုံးဖြတ်နိုင်ခဲ့ခြင်း ဖြစ်၏။

ရှီးရှန်းတန်ခိုးရှင်သခင်၏ တိုက်ရိုက်တပည့် ဆယ်ယောက်ကျော်သည် ဤ အကြီးအကဲများ၏ ဂုဏ်ပြုစကားများကို ကြားပြီးနောက် အားလုံး ပါးစပ် အဟောင်းသား ဖြစ်သွားကြ၏။

"ဒါ၊ ဒါ ဘယ်လိုလုပ် ဖြစ်နိုင်မှာလဲ" ဆရာတူအစ်ကိုယန်၏မျက်နှာသည် မယုံကြည်နိုင်မှုများဖြင့် ပြည့်နှက်နေ၏။

ဤလီပိုင်သည် တာအိုအမွေဆက်ခံမှုကို လက်ခံစဉ်တွင် 'ဆယ့်လေးအခြေခံ' ကြီးမြတ်တဲ့ မဟာအစီအရင် ကျွမ်းကျင်သူအဖြစ်သို့ တိုက်ရိုက် ထိုးဖောက် တက်လှမ်းသွားနိုင်ခဲ့တာလား။

နောက်ဆက်တွဲအနေဖြင့်၊ တုထျန်းအစီအရင်ဂိုဏ်းသည် မြေခွေးဖြူကိုယ်ပွား 'ဆယ့်လေးအခြေခံ' ကြီးမြတ်တဲ့ မဟာအစီအရင် ကျွမ်းကျင်သူအဖြစ်သို့ ရောက်ရှိခြင်းအတွက် အဆင့်တက်ပွဲ အခမ်းအနားတစ်ခု ကျင်းပပေးခဲ့၏။

မည်သို့ပင်ဆိုစေ တုထျန်းအစီအရင်ဂိုဏ်း တစ်ခုလုံးတွင် 'ဆယ့်လေးအခြေခံ' ကြီးမြတ်တဲ့ မဟာအစီအရင် ကျွမ်းကျင်သူသည် လက်ဆယ်ချောင်း မပြည့်သော အရေအတွက်မျှသာ ရှိ၏။

ယခု မြေခွေးဖြူကိုယ်ပွားသည် 'ဆယ့်လေးအခြေခံ' ကြီးမြတ်တဲ့ မဟာအစီအရင် ကျွမ်းကျင်သူအဖြစ်သို့ ရောက်ရှိသွားပြီး၊ ထို့အပြင် တာအိုအမွေဆက်ခံမှုကို လက်ခံစဉ်တွင် ထိုးဖောက် တက်လှမ်းနိုင်ခဲ့ခြင်း ဖြစ်ရာ ထိုအဓိပ္ပာယ်မှာ သာမန်နှင့် မတူတော့ပေ။

သို့ဖြစ်၍၊ မြေခွေးဖြူကိုယ်ပွား၏ အဆင့်တက်ပွဲ အခမ်းအနားသို့ ထာဝရမင်းဆက်၊ ရွှေရောင်သားရဲနန်းတော်၊ မဟာလအင်ပါယာ စသော သာလွန်သည့် အင်အားစုများပင်လျှင်၊ အရေးပါသော သံတမန်များကို စေလွှတ်၍ ဂုဏ်ပြုစကား ဆိုကြပြီး အမျိုးမျိုးသော အဖိုးတန် လက်ဆောင်များကို ပေးအပ်ကြ၏။

ထို့ထက်ပင် ဤအင်အားစုများသည် အထူးဖိတ်ခေါ် ဆွဲဆောင်ကြပြီး မြေခွေးဖြူ ကိုယ်ပွားသည် ၎င်းတို့ အင်အားစု၏ အချိန်ပြည့် မဟာအစီအရင် ကျွမ်းကျင်သူဖြစ်လာစေရန် မျှော်လင့်ကြ၏။

အမှန်တော့၊ တုထျန်းအစီအရင်ဂိုဏ်း၏ အကြီးအကဲများသည် ဤ အင်အားစုများနှင့် အမျိုးမျိုးသော အဆက်အသွယ်များ ရှိကြသော်လည်း တုထျန်းအစီအရင်ဂိုဏ်း၏ ထူးခြားမှုကြောင့် အမြဲတမ်း ကြားနေအဖြစ် ရပ်တည်သဖြင့် မဟာအစီအရင် နည်းပညာ အထောက်အပံ့ကိုသာ ပံ့ပိုးပေးပြီး အင်အားစု အသီးသီး၏ ပဋိပက္ခများထဲသို့မူ လုံးဝဝင်ရောက် ပါဝင်ခြင်း မရှိပေ။

ဤသည်မှာလည်း တုထျန်းအစီအရင်ဂိုဏ်းသည် အမတနယ်မြေတွင် အချိန်ကြာမြင့်စွာ ရှင်သန် ရပ်တည်နိုင်ခဲ့ခြင်း၏ အဓိကအကြောင်းရင်း ဖြစ်၏။

မြေခွေးဖြူကိုယ်ပွားသည် တစ်ခုချင်းစီကို ငြင်းပယ်ခဲ့၏။ အင်အားစုတစ်ခုခုထံ ခိုလှုံခြင်း၊ ၎င်းမှာ မဖြစ်နိုင်ပေ။ ဤ အင်အားစုများနှင့် မည်သို့မျှ ပတ်သက်မှု ရှိနိုင်မည် မဟုတ်ပေ။

မည်သို့ပင်ဆိုစေ ၎င်းသည် ကိုယ်ပွားတစ်ခု ဖြစ်သည့်အလျောက် အဓိကတာဝန်မှာ တုထျန်းအစီအရင်ဂိုဏ်းထဲတွင် နေထိုင်ပြီး မဟာအစီအရင် ပညာရပ်များကို သင်ယူကာ ပင်မခန္ဓာကိုယ် ၏ မဟာအစီအရင် ကျွမ်းကျင်မှုအတွက် ပညာရပ် အထောက်အပံ့ ပေးရန် ဖြစ်၏။

"လီပိုင်၊ အမှန်တော့ မင်း သူတို့ရဲ့ ဖိတ်ခေါ်မှုကို တစ်ခုချင်းစီ လက်ခံလို့ ရပါတယ်။ ဘာပဲဖြစ်ဖြစ် ငါတို့ တုထျန်းအစီအရင်ဂိုဏ်းရဲ့ အခြေခိုင်မှုနဲ့ဆိုရင် သူတို့ကြားက အငြင်းပွားမှုတွေထဲ ပါဝင်သွားရမှာကို စိုးရိမ်စရာ မလိုပါဘူး" ရှီးရှန်းတန်ခိုးရှင်သခင်က ညင်သာစွာ ရယ်မောလိုက်သည်။

ဤအင်အားစုများ၏ဖိတ်ခေါ်မှုကို လက်ခံလိုက်သည်နှင့် နှစ်စဉ် များပြားလှသော အရင်းအမြစ် များကို ရရှိနိုင်၏။

မဟာအစီအရင်အဆင့် ပိုမြင့်မားလေ၊ မဟာအစီအရင်အရင်းအမြစ်များအပေါ် ကုန်ဆုံးမှုသည်လည်း ပို၍ ကြီးမားလာလေ ဖြစ်၏။

"ဆရာသခင်၊ တပည့် အမတနယ်မြေထဲက မဟာအစီအရင် ပညာရပ်တွေကို တွေ့မြင်ပြီးတဲ့နောက်မှာ ရည်မှန်းချက် တစ်ခုတည်းပဲ ရှိပါတော့တယ်။ အဲ့ဒါကတော့ ကျွန်တော်တို့ တုထျန်းအစီအရင်ဂိုဏ်းက မျိုးဆက်အဆက်ဆက် ရှေးပညာရှိကြီးတွေ ကြိုးပမ်း ရှာဖွေခဲ့ကြတဲ့ အမြင့်မားဆုံး မဟာအစီအရင် နယ်ပယ်ကို နားလည် သဘောပေါက်ဖို့ပါပဲ" မြေခွေးဖြူ ကိုယ်ပွား၏ အသံသည် ခိုင်မာနေပြီး၊ အမူအရာမှာ လေးနက်တည်ကြည်နေ၏။

"ကောင်းတယ်၊ ကောင်းတယ်၊ ကောင်းတယ်" ရှီးရှန်းတန်ခိုးရှင်သခင်သည် ကြားပြီးနောက်၊ အလွန်အမင်း ဝမ်းမြောက် ကျေနပ်သွား၏။

ထိုအချိန်တွင်၊ လီချန်သည် ယန်ဖန်းနှင့် ဝမ်ဝမ်တို့ နှစ်ဦးကို ခေါ်ဆောင်ကာ တုထျန်းအစီအရင်ဂိုဏ်းမှ ထွက်ခွာခဲ့ပြီ ဖြစ်၏။

မည်သို့ပင်ဆိုစေ မြေခွေးဖြူကိုယ်ပွားသည် တာအိုအမွေဆက်ခံမှုကို ရရှိခဲ့ပြီး နောက်ပိုင်း စိုးရိမ်စရာများ အားလုံးကို ဖြေရှင်းနိုင်ခဲ့ပြီ ဖြစ်၏။

မြေခွေးဖြူကိုယ်ပွားသည် တုထျန်းအစီအရင်ဂိုဏ်းအတွင်း၌ အမြဲနေထိုင်နေသရွေ့ အခြေခံအားဖြင့် မည်သည့် အန္တရာယ်မျှ ရှိနိုင်မည် မဟုတ်ပေ။

အကယ်၍ မတော်တဆမှု တစ်စုံတစ်ရာ မရှိပါက၊ မြေခွေးဖြူကိုယ်ပွားသည် နောင်တွင် တုထျန်းအစီအရင်ဂိုဏ်း၌ အချိန်ကြာမြင့်စွာ နေထိုင်သွားမည် ဖြစ်၏။ တစ်နေ့နေ့တွင်၊ တုထျန်းအစီအရင်ဂိုဏ်း၏ မဟာအစီအရင် ပညာရပ်များသည် သူ့ကို အကူအညီ မပေးနိုင်တော့သည့် အချိန်မှလွဲ၍ပေါ့။

...........

ယီလင်မြို့သို့ ပြန်ရောက်သောအခါ။

ဤနေရာမှ ပြောင်းလဲမှုများသည် ဝမ်ဝမ်နှင့် ယန်ဖန်းတို့ နှစ်ဦးကို အလွန်အမင်း တုန်လှုပ် အံ့အားသင့်စေ၏။

လီချန်သည် တာအိုကျောင်းတော်အတွင်းသို့ ပြန်လည် ရောက်ရှိသွားပြီး၊ စိန်ပွင့်ပုံ သလင်းကျောက်တုံးကို အသုံးပြု၍၊ ဟေးကျွယ်နန်းတော် နတ်ဘုရားရုပ်တုနှင့် ဆက်သွယ်ကာ ဟေးကျွယ်နန်းတော်အတွင်းမှ ပြောင်းလဲမှုများကို အာရုံခံလိုက်၏။

စနစ် မျက်နှာပြင်ပေါ်တွင်၊ ဗလာသို့ပြန်ခြင်းဟူသော စကားလုံး နှစ်လုံး၏ မှိတ်တုတ် မှိတ်တုတ် ဖြစ်နေမှုကို ကြည့်ရင်း လီချန် ချက်ချင်း မျက်လုံး မှိတ်လိုက်ပြီး ဗလာသို့ပြန်ခြင်း အခြေအနေသို့ ဝင်ရောက်သွား၏။

သူ၏ ယခု ဗလာသို့ပြန်ခြင်း အချိန်သည် ယခင်ကကဲ့သို့ ပုံသေ သတ်မှတ်ထားရန် မလိုအပ်တော့ပေ။

မည်သို့ပင်ဆိုစေ သူသည် ယခု အိုအေစစ်စခန်းထဲတွင် သူ၏ အဆင့်အတန်းမှာ ကောင်းကင်နှင့် မြေကြီးကဲ့သို့ ပြောင်းလဲသွားခဲ့ပြီ ဖြစ်၏။

သို့သော် အလားတူပင်၊ သူ့ပခုံးပေါ်မှ တာဝန်မှာလည်း ပို၍ လေးလံလာခဲ့၏။

......

ကန္တာရကမ္ဘာ။

အိုအေစစ်စခန်းမှ သစ်သားအိမ်ထဲတွင်။

လီချန် မျက်လုံး ဖွင့်လိုက်သည်။ သူ အမဲခြောက် အနည်းငယ် စားလိုက်ပြီး ရေတစ်ငုံ ထပ်မံ သောက်လိုက်ကာ ခန္ဓာကိုယ်အတွင်း၌ ပျံ့နှံ့နေသော ဝိညာဉ်စွမ်းအင်ကို ခံစားမိပြီး၊ ချက်ချင်း ကျင့်ကြလေသည်။

ကျင့်ကြံမှု ပြီးဆုံးသွားပြီးနောက် သူ သစ်သားအိမ်ထဲမှ ထွက်လာခဲ့၏။

"တာအိုရောင်းရင်းလီချန်၊ ဒီတလော ကောင်းကင်ပေါ်ကနေ ထူးဆန်းတဲ့ ပျံသန်းနေတဲ့ အရာတစ်ခု ဖြတ်သွားတယ်။ ငါတို့ စခန်းပေါ်မှာ ခဏလောက် ရပ်တန့်သွားသလိုပဲ" ထော့ပေါသည် လီချန် ထွက်လာသည်ကို မြင်သောအခါ အလျင်အမြန် ပြောလိုက်၏။

"ပျံသန်းနေတဲ့ အရာ ဟုတ်လား။ မင်း ဘာပစ္စည်းလဲဆိုတာ မြင်လိုက်လား" လီချန် အလျင်အမြန် မေးလိုက်သည်။

"ပျံတာ နည်းနည်း မြင့်တယ်။ ညနေစောင်းအချိန်နဲ့ တိုက်ဆိုင်နေပြီး အလင်းရောင်က နည်းနည်း မှောင်နေတော့ ပုံသဏ္ဌာန် အကြမ်းလောက်ပဲ မြင်ရတယ်။ ပျံသန်းတဲ့ ငှက်အမျိုးအစားတော့ မဟုတ်ဘူးထင်တယ်" ထော့ပေါက ခေါင်းခါလျက် ပြောလိုက်သည်။

"အင်း၊ နည်းနည်း ပိုပြီး သတိထားဦး" လီချန် ခေါင်းညိတ်လိုက်၏။

ဤကမ္ဘာ၏ အန္တရာယ်များမှာ အလွန် များပြားလှ၏။ ဗလာသို့ပြန်ခြင်းအခြေအနေ ရှိသူများအတွက် အသက်အန္တရာယ် ခြိမ်းခြောက်မှု မည်သို့မျှ မရှိသော်လည်း၊ အများဆုံး သေဆုံးပြီး ဗလာသို့ပြန်ခြင်း အခြေအနေမှ ထွက်ခွာသွားရုံသာ ဖြစ်၏။

သို့သော် အိုအေစစ်စခန်းကို ဆုံးရှုံးသွားပါက၊ ဖြစ်ပေါ်လာမည့် အကျိုးဆက်မှာ အလွန် ဆိုးရွားလှ၏။

ဤသို့ဖြင့် ဗလာသို့ပြန်ခြင်း အခြေအနေ အကြိမ်အနည်းငယ် ထပ်မံ ဖြတ်သန်းခဲ့ပြီး အိုအေစစ်စခန်းမှာမူ အားလုံး ဘေးကင်းလုံခြုံနေ၏။

.......

ဤကိစ္စသည် ဤသို့ဖြင့် ပြီးဆုံးသွားပြီဟု ထင်မှတ်ခဲ့သော်လည်း၊ ဆယ်နှစ်ကျော် ကြာပြီးနောက် ဗလာသို့ပြန်ခြင်းအခြေအနေ တစ်ကြိမ်တွင် လီချန် မျက်လုံး ဖွင့်လိုက်သည်နှင့် စခန်းတွင် ပုံမှန်မဟုတ်သော ပြောင်းလဲမှုတစ်ခု ဖြစ်ပေါ်နေသည်ကို တွေ့ရှိလိုက်၏။

သူ သစ်သားအိမ်ထဲမှ ထွက်လာသောအခါ စခန်းမှ လူ အားလုံး ရှိနေသည်ကို တွေ့လိုက်ရပြီး၊ လူတစ်ဦးပင် ပိုနေသေး၏။

ထို့အပြင်၊ စခန်း၏အပေါ်ဘက် ကောင်းကင်ယံတွင် ကိုယ်ထည် အတော်အတန် ကြီးမားသော ယာဉ်ပျံတစ်စီး ရပ်တန့်ထား၏။

လီချန်သည် လွန်ခဲ့သော ဆယ်နှစ်ကျော်က ထော့ပေါ ပြောခဲ့သော ပျံသန်းသည့် အရာသည် ဤယာဉ်ပျံပင် ဖြစ်နိုင်ကြောင်း ရုတ်တရက် တွေးမိလိုက်၏။

ထို မရင်းနှီးသော လူပုံသဏ္ဌာန် သတ္တဝါမှာမူ၊ သံချပ်ကာအပြည့် ဝတ်ဆင်ထားပြီး အရှိန်အဝါ အလွန် အစွမ်းထက်ကာ သူ့ကို အလွန် ကြီးမားသော ခြိမ်းခြောက်မှု ခံစားချက်ကို ပေးနေ၏။

"အခု အချိန်ကစပြီး၊ မင်းတို့ ဒီ ဗလာသို့ပြန်ခြင်းအခြေအနေရှိသူတွေကို စုဆောင်း တာဝန်ပေးလိုက်ပြီ" ထို မရင်းနှီးသော လူပုံသဏ္ဌာန် သတ္တဝါသည် လီချန်သည် အိုအေစစ်စခန်းတွင် နောက်ဆုံး ပေါ်ထွက်လာသော ဗလာသို့ပြန်ခြင်း အခြေအနေရှိသူဖြစ်ကြောင်း သိနေသကဲ့သို့ ရုတ်တရက် ပြောလိုက်၏။

လီချန် အနည်းငယ် ကြောင်သွား၏၊ ဒါ ဘာအခြေအနေကြီးလဲ။

***