စစ်မှန်သော တုန်ခါမှု

တောက်လောင်သော အလင်းတန်း တစ်ခုက လက်ခနဲ ဖြစ်သွားသည်။ ထိုကဲ့သို့ စူးရှတောက်မှုက သေခြင်းနှင့် ပျက်စီးခြင်းများကို ယူဆောင်လာခဲ့သည်။ ချပ်ကာအပြည့်အစုံ ဝတ်ပြီး ထူထဲသော ဒိုင်းများ ကိုင်ဆောင်ထားသော ခြေလျင် တပ်သားများပင်လျှင် အသက်ချမ်းသာရာ မရခဲ့ပေ။ သူတို့ ချက်ချင်းပင် အငွေ့ပျံ သွားခဲ့သည်။ သတ္တု အပျက်အစီးများ တစ်စိတ်တစ်ပိုင်းသာ မြေပြင်ပေါ်တွင် ကျန်ရစ်ခဲ့၏။

တောက်လောင်နေသော အလင်းက တလက်လက် လင်းလက်နေခဲ့သည်။ ကောင်းကင်မှ ကျဆင်းလာသော မီးကျောက်တုံးကြီးများမှာမူ မရပ်မနား တစ်လုံးပြီးတစ်လုံး ကြဲချတိုက်ခိုက်နေရင်း နောက်တစ်ကြိမ် ပစ်ခတ်ရန် အချိန် အနည်းငယ် ယူရပေမည်။ ကျောက်တုံး မြေပြင်ပေါ်သို့ ကျသွားရာ ၎င်းတို့သည် ပေါက်ကွဲသွားကြ၏။ အလယ်ဗဟို အနီးမှ စစ်သည်များမှာ လေလှိုင်းများကြောင့် တစ်ယောက်ပြီး တစ်ယောက် လွင့်စင်၍ သွားခဲ့ကြသည်။ စစ်သည်များ အသက်ရှင် ကျန်ရစ်ခဲ့လျှင်ပင် သူတို့၏ အရွတ်များနှင့် အရိုးများ ကျိုးပဲ့သွားပေလိမ့်မည်။

အကယ်၍ မှော်သလင်းကျောက် အမြောက် တစ်လက်၏ အလင်းက လျှပ်စီးကဲ့သို့ ဖြစ်နေပြီး လောက်လေး၏ မီးကျောက်တုံးကြီးများမှာ မိုးကြိုးကဲ့သို့ ဖြစ်ခဲ့ပါက လောက်လေးမှာ သံမဏိဒိုင်းကို ထိုးဖောက်နိုင်အောင် အားကောင်းသော မိုးသီးမုန်တိုင်း တစ်ခုကဲ့သို့ ဖြစ်နေသည်။ ပေါက်ကွဲပြီးနောက်တွင် အဆိပ်ပြင်းသော ဓားအကျိုးအပဲ့က ပိုမို၍ ပြင်းထန်သော သေစေနိုင်စွမ်းဖြင့် ပတ်ပတ်လည်ကို ပစ်လွှတ်သွားခဲ့သည်။

လျှပ်စီး၊ မိုးကြိုးနှင့် မိုးသီးတို့က ရေတွက်၍ပင် မရနိုင်သော မြှားများနှင့် ကျည်ဆန်များနှင့်အတူ ရောနှောသွားပြီး လူသား မဟာမိတ်စစ်တပ်၏ အသက်ကို အလျင်အမြန် ရိတ်သိမ်းနေခဲ့၏။

အဝေးပစ် တိုက်ခိုက်မှု အပြီးတွင် ချပ်ကာ အပြည့်အစုံ ဝတ်ဆင်ထားသော ချပ်ကာယန္တရားတပ် အဖွဲ့များ မိုးကုတ်စက်ဝိုင်းတွင် ပေါ်လာခဲ့သည်။ မြေမျက်နှာသွင်ပြင်က လွင်ပြင်တစ်ခု လုံးဝ မဟုတ်သော်လည်း နတ်ဆိုး ချပ်ကာယန္တရားတပ်များက သာမန် မြင်းများကို စီးနင်းနေကြသည် မဟုတ်ဘဲ ဝံပုလွေများ၊ ကျားများလို ကြမ်းတမ်းသော သားရဲများပင် ဖြစ်လေသည်။ သူတို့က ထိုကဲ့သို့ ကြမ်းတမ်းသော မြေမျက်နှာ သွင်ပြင်ပေါ်တွင် လွင်ပြင်တစ်ခု အပေါ် ရှိနေသည့်အလား ပြေးလွှားနေကြ၏။ ချပ်ကာယန္တရားတပ်သားများနှင့် သားရဲများက ခေတ်မီပြီး ခိုင်မာသော ချပ်ကာများ ဝတ်ဆင်ထားကြသည်။ အနက်ရောင် ချပ်ကာဆင်တူနှင့် အနက်ရောင် ဓားကွေးက တုန်လှုပ်ဖွယ်ရာ မြင်ကွင်းကို ပေးစွမ်းနေ၏။ သူတို့က တုန်ခါနေသော မြေကြီးအပေါ်၌ ရှေ့သို့ လိမ့်ဝင်လာသော အနက်ရောင် ရေစီးကြောင်း တစ်ခုကဲ့သို့ နင်းချေ၍ သွားခဲ့သည်။

လူသား မဟာမိတ် စစ်တပ်၏ မှော်သေနတ်များ၊ လေးများနှင့် မြှားများက ချပ်ကာယန္တရားတပ်သားများနှင့် သားရဲများ အပေါ်မှ ချပ်ကာကို လုံးဝ မထိုးဖောက်နိုင်ခဲ့ပေ။ ရေစီးကြောင်း ဖြတ်သွားရာ နေရာတိုင်း နင်းချေခံရပြီး ပြားချပ်သွားခဲ့သော အလောင်းများသာ ရှိနေခဲ့သည်။

လူသား မဟာမိတ်စစ်တပ်၏ ရှေ့တန်း တပ်မှူး ဗိုလ်ချုပ် ရိုင်လီက ခံစစ်ပုံစံကို ကွပ်ကဲရန် အစွမ်းကုန် ကြိုးစားနေခဲ့သည်။ သူ၏ ခန္ဓာကိုယ်ပေါ်တွင် ဒဏ်ရာများစွာ ရှိနေ၏။ အထင်ရှားဆုံးမှာ သေနတ် ဒဏ်ရာပင်။ ထိုအရာမှာ လက်ရွေးစင် အစောင့်များ၏ အသည်းအသန် ကာကွယ်မှုအောက်မှ ရလဒ်ပင် ဖြစ်သည်။ နတ်ဆိုး လက်ဖြောင့် တပ်သားများမှာ အလွန် ကြောက်မက်ဖွယ် ကောင်းသည်။ သူတို့က မဟာမိတ်စစ်တပ်မှ အဖွဲ့ငယ် ခေါင်းဆောင်များစွာကို ပစ်မှတ်ထားခဲ့ရာ ပို၍ပင် ထိန်းချုပ်မှု လွတ်သွားစေသည်။

ထူးချွန်သော တပ်မှူးတစ်ဦး အနေဖြင့် ရိုင်လီက နတ်ဆိုးများ၏ အဓိက အင်အားစုနှင့် တိုက်ခိုက်ရမည့် ထိုးစစ်နှင့် ခံစစ် မြင်ကွင်းများကို သူ၏စိတ်ထဲတွင် တစ်ကြိမ်မက ကောက်ချက်ချ ခဲ့ဖူးသည်။ သို့သော် နတ်ဆိုးများ၏ စစ်တပ် တကယ် ရောက်ရှိလာချိန် တိုက်ပွဲအခြေအနေက သူ ကောက်ချက်ချမှုကို ကျော်လွန်သွားပြီ ဖြစ်ကြောင်း သိရှိသွား၏။ နတ်ဆိုးများ၏ တိုက်ခိုက်ရေး စွမ်းအားက သူ မျှော်လင့် ထားသည်ထက် များစွာ ကျော်လွန် နေသည်ဟူ၍ ဆိုနိုင်ပေသည်။

ထိုအရာမှာ မညီမျှသော တိုက်ပွဲတစ်ခု ဖြစ်သည်။ ပိုကောင်းသော နည်းဗျူဟာ၊ ပိုမို၍ အဆင့်မြင့်ပြီး အားကောင်းသော လက်နက်များနှင့် ပိုမို၍ ပြင်းထန်သော တိုက်ခိုက်ရေးစွမ်းအားက တစ်ဖက်သတ် အခြေအနေကို အဆုံးအဖြတ် ပေးခဲ့သည်။ အသည်းအသန် ခုခံနေမှု ရှိသော်လည်း လူသား မဟာမိတ် စစ်တပ်က အသတ်ခံရခြင်းနှင့် အကြိတ်ခံရခြင်းမှ မလွတ်မြောက် နိုင်သေးပေ။ ရိုင်လီကို အကြောက်ရွံ့ဆုံး ဖြစ်စေသည်မှာ နတ်ဆိုးများက အံ့ဩဖွယ်ကောင်းသော အဖွဲ့လိုက် တိုက်ခိုက်နိုင်စွမ်းကို ပြသခဲ့ပြီး ၎င်းမှာ လူသားများ အားအကိုးဆုံးသော မှော်အစီအရင် အခင်းအကျင်းထက် အမှန်တကယ် မနိမ့်ကျခြင်းပင်။

ထိုမျှသာ မကဘဲ ထိုဧရာမ ရင်းနှီးသော ပုံရိပ်များကလည်း ကောင်းကင်ပေါ်တွင် ပေါ်လာခဲ့ပြီး မှော်ဗုံးများကို ပစ်ချရင်း ပျံသန်းကာ ထိုးဆင်းနေ၏။ သူတို့က လုံးဝနီးပါးကို အရာရာ စွမ်းနေသည်။ တစ်စုံတစ်ယောက်က စုစည်းရုပ်သေးများ အမည်ကို အော်ပြောခဲ့သည်။ ၎င်းမှာ မှော်ဂိမ်းတွင်သာ တည်ရှိသော ယူနစ် တစ်ခုပင်။ နတ်ဆိုးဘုံတွင် တူညီသော မှော်ဂိမ်း ရှိသည်မှာ အံ့ဩစရာ မဟုတ်ပေ။ နဂါးများက အစပိုင်းတွင် ၎င်းကို ရှင်းပြခဲ့ပြီး ဖြစ်သည်။ ကြောက်မက်ဖွယ် ကောင်းသည်မှာ နတ်ဆိုးများက စိတ်ကူးယဉ်ထဲတွင်သာ ရှိနေခဲ့သော သတ်ဖြတ် လက်နက်ကို အမှန်တကယ် ဖန်တီးခဲ့ကြသည်။ ထို့အပြင် ၎င်းမှာ ကစားပွဲထဲမှ စွမ်းအားနှင့် လုံးဝနီးပါး တူညီနေသည်။

“ပုံစံအတိုင်းနေ။ တောင့်ထား။” ရိုင်လီ ကျယ်လောင်စွာ အော်လိုက်ပြီးနောက် မူးဝေသွားကာ မထိန်းနိုင်တော့ သကဲ့သို့ ခံစားမိလိုက်ရသည်။ သူ့ဒဏ်ရာများသာ မကဘဲ လူသား မဟာမိတ်စစ်တပ် တစ်ခုလုံးပင်။

“ဒိုင်း...”

ဒါက အဲဒီသောက်စနိုက်ပါပဲ။ သူ့ဘေးမှ နောက်ဆုံး လက်ရွေးစင် အစောင့်လည်း လဲကျသွားခဲ့သည်။

“ဒိုင်း ဒိုင်း ဒိုင်း...”

ရိုင်လီက သူ၏ဓားကို မြှောက်လိုက်ပြီး ဆက်လက် ကွပ်ကဲလိုခဲ့သော်လည်း သူ၏ နောက်ဆုံး ခွန်အားကို ဆုံးရှုံးသွားသည်ကို တွေ့လိုက်ရသည်။ သူ၏ ခန္ဓာကိုယ်က ပို၍ပို၍ ပေါ့ပါးလာပြီး သူ၏ပတ်လည်တွင် လောကကြီး လည်ပတ်နေ သကဲ့သို့ပင် ခံစားမိလိုက်ရသည်။

လူသား မဟာမိတ်စစ်တပ် ကွပ်ကဲရေး ဌာန၌ ဖြစ်သည်။

“ဘာပြောတယ်။ ရိုင်လီတို့ တပ်ဖွဲ့က ရှင်းပစ်ခံလိုက်ရပြီလား။ မြန်လိုက်တာ။” အမြဲ တည်ငြိမ်ခဲ့သော ဧကရာဇ် လက်ဇ် မှင်တက်သွားခဲ့သည်။ ကျန်ရှိနေကြသော ဗိုလ်ချုပ်များ အားလုံးလည်း ဖြူဖျော့၍ နေကြသည်။

ရိုင်လီ၏ စစ်တပ်က အပြင်းအထန် ထိခိုက်ခံရမည်ဟု ထင်ထားသော်လည်း လုံးဝ ရှင်းပစ်ခံရမည်ဟု ဘယ်တုန်းကမှ မမျှော်လင့်ထားခဲ့ပေ။ ထို့အပြင် ၎င်းမှာ အချိန်တိုလေး အတွင်း၌သာ ဖြစ်သည်။

ဗိုလ်ချုပ် ဆန်ဒရို ထင်ထားသည့် အတိုင်းပင် နတ်ဆိုးများ၏ စွမ်းအားမှာ စိတ်ကူးထားသည်ထက် ပိုအားကောင်း၍ နေခဲ့သည်။ အများကြီး ပိုအားကောင်း နေသည်။

“ဗဟိုစစ်တပ်က အခုလက်ရှိမှာ ဝိုင်းရံ တိုက်ခိုက်ခံနေရတယ်။ ပြီးတော့ ဗိုလ်ချုပ် ဟော့စ်က စစ်တူတွေ တောင်းနေတယ်။” အော့စ်ဝိန်းက အလျင်စလို ပြောသည်။ “တပ်တွေကို တိုးမြှင့်ပြီး ဗဟိုစစ်တပ်ကို အမြန်ဆုံး စစ်ကူပေးသင့်လား။”

“စစ်ကူတွေ မပို့လိုက်နဲ့။” ဆန်ဒရိုက ပြောသည်။ “နတ်ဆိုးတွေက ဒီတန်ပြန် တိုက်ခိုက်မှုမှာ သေချာပေါက် အစွမ်းကုန် ထုတ်သုံးလိမ့်မယ်။ တကယ်လို့ ငါတို့ရဲ့ တပ်တွေကို ပိုပို့ခဲ့ရင် ဒါက မလိုအပ်တဲ့ အသေကြေတွေကိုပဲ တိုးစေလိမ့်မယ်။ တစ်ခုတည်းသော နည်းလမ်းက ဗဟို စစ်တပ်ကို စွန့်လွှတ်ဖို့ပဲ။ အကူစစ်တပ်က တံခါးကနေ ချက်ချင်း ဆုတ်ခွာရမယ်။ အသေအကြေတွေ ပိုပြီး မများအောင် လုပ်ရမယ်။”

ထိုသို့ ပြောပြီးနောက် ဆန်ဒရိုက လက်သီးများကို တင်းတင်းကျပ်ကျပ် ဆုပ်ကိုင်လိုက်ပြီး သူ၏ မျက်လုံးများတွင် ဝေဒနာ အရိပ်အယောင်တစ်ခု ရှိနေသည်။ အကြောင်းမှာ ဟော့စ်က ကျက်သရေပြာ အင်ပါယာ၏ ဗိုလ်ချုပ် ဖြစ်နေ၍ပင်။ သူက သူနှင့်အတူ သေရေးရှင်ရေးကို ဖြတ်သန်း ခဲ့ကြသည့် ရင်းနှီးသော မိတ်ဆွေ တစ်ဦးလည်း ဖြစ်သည်။ သို့တိုင်အောင် မဟာမိတ်စစ်တပ် တစ်ခုလုံးကို ထိန်းချုပ် ထားသော ကွပ်ကဲရေးဌာန၏ အဖွဲ့ဝင် တစ်ဦးအနေဖြင့် ထိုဆုံးဖြတ်ချက်ကိုသာ သူ ချနိုင်ခဲ့သည်။

“ဒါပေမဲ့...”

“ဒါပေမဲ့ မရှိဘူး။” ဧကရာဇ် လက်ဇ် ထရပ်လိုက်သည်။ “ဘယ်လိုမျိုး အခြေအနေမှာပဲဖြစ်ဖြစ် ရဲဘော်ရဲဘက်တွေကို စွန့်လွှတ်တာက နာကျင်စရာ ဆုံးဖြတ်ချက်တစ်ခု ဖြစ်ပဲ။ အရှက်ရစရာလည်း ဟုတ်တယ်။ ဒါပေမဲ့ ငါတို့ ဒါကို လုပ်ရမယ်။ မဟုတ်ရင် ငါတို့ ရဲဘော်ရဲဘက်တွေ ပိုပြီး ဆုံးရှုံးလိမ့်မယ်။ ဒီတစ်ခါ ငါ့ရဲ့ ညံ့ဖျင်းတဲ့ ဆုံးဖြတ်ချက် အတွက် အပြည့်အဝ တာဝန်ယူမယ်။”

“မဟုတ်ဘူး။ ကျုပ်မှာ လည်း တာဝန် ရှိတယ်။” ဆန်ဒရို သက်ပြင်းချလိုက်သည်။ “ဒီမှာ ရှိနေတဲ့လူတိုင်း တာဝန်ရှိတယ်လို့ ပြောလို့ရတယ်။ ဒါပေမဲ့ ကျုပ် အရင်က ပြောခဲ့သလို ဒီစစ်ပွဲက အစပဲ ရှိသေးတာ။”

လူတိုင်းက ခေါင်းညိတ်လိုက်ကြသည်။ ဧကရာဇ်လက်ဇ်က ဆန်ဒရို လူတိုင်းကို တာဝန်ယူရန် တက်ကြွစွာ ဦးဆောင်၍ နေသည်ကို မြင်ရာ ခေါင်းညိတ်လိုက်၏။ သူက ဆုတ်ခွာရန် အမိန့်ကို ချက်ချင်း ပေးပြီးနောက် လေသံ ပြောင်းလိုက်သည်၊ “ဒီတိုက်ပွဲက ငါတို့ကို နာကျင်စရာ ကောင်းတဲ့ သင်ခန်းစာ သင်ပေးခဲ့တယ်။ ဒါပေမဲ့ ဒါက အလဟဿ မဖြစ်ခဲ့ဘူး။ အနည်းဆုံးတော့ ငါတို့က နတ်ဆိုးတွေရဲ့ တိုက်ခိုက်ရေး စွမ်းအားကို အကဲဖြတ်ပြီး ဖြစ်နေပြီ။ ဒီတိုက်ခိုက်ရေး စွမ်းအားက ငါတို့ရဲ့ စိတ်ကူးထားတာထက် အများကြီး ကျော်လွန်နေတယ်။ ဒါပေမဲ့ သူတို့က မရှုံးနိမ့်နိုင်တဲ့သူတွေ မဟုတ်ဘူး။ လူသား သမိုင်းမှာ ငါတို့ထက် ပိုပြီးအားကောင်းတဲ့ ရန်သူတွေကို တစ်ကြိမ်မက အနိုင်ယူခဲ့ ဖူးတယ်။ နတ်ဆိုးတွေလည်း အပါအဝင်ပဲ။ ပြီးတော့ အရင်နှစ်တွေမှာ နတ်ဆိုးတွေက စစ်မှန်တဲ့ အောင်ပွဲတစ်ခုကို မရရှိခဲ့ဘူး။ ငါတို့ ဒီနေ့က အရှက်တရားကို နတ်ဆိုး သွေးနဲ့ ဆေးပစ်မယ်။ ဒီအချိန်အတွက် အကြာကြီး စောင့်ရမှာ မဟုတ်ဘူးလို့ ယုံကြည်တယ်။”

ဧကရာဇ် လက်ဇ်က သိဒ္ဓိအုပ်ချုပ်သူ နှစ်ဦးထဲမှ တစ်ဦး ဖြစ်ထိုက်ပေသည်။ သူက လူတိုင်း၏ တိုက်ခိုက်ချင်စိတ်ကို စကားလုံး အနည်းငယ်မျှဖြင့် မြှင့်တင် ပေးလိုက်၏။

ဆန်ဒရိုက သဘောတူသည်။ “အမှန်ပဲ။ အရေးအကြီးဆုံးက တံခါးပတ်လည်မှာ ချုံခိုတိုက်ခိုက်ဖို့အတွက် အစွမ်းထက်ဆုံး တပ်တွေကို ချက်ချင်း စုစည်းထားဖို့ပဲ။ တစ်ချိန်တည်းမှာပဲ ရွှေရောင်နယ်မြေရဲ့ ခံစစ်ကြောင်းကို အမြန် တည်ဆောက် ရမယ်။ နတ်ဆိုးတွေက ရှုံးနိမ့်သွားတဲ့ စစ်သည်တွေကို လမ်းတစ်လျှောက်လုံး မောင်းထုတ်ရင်းနဲ့ လက်ရှိအရှိန်အဟုန်ကို အခွင့်ကောင်းယူပြီး ရှေ့တိုးလာနိုင်တယ်။ ကျုပ်တို့က သူတို့ ရောက်ရှိတာကို စောင့်ပြီးတော့ လက်ဆောင်ကြီး တစ်ခု ပေးလို့ရတယ်။”

လူတိုင်းက သဘောတူခဲ့ကြသည်။ ဧကရာဇ် လက်ဇ် တိတ်တဆိတ် သက်ပြင်းချလိုက်သည်။ မူလက သူသည် ဦးစွာ တိုက်ခိုက်ရန် ရွေးချယ်ခဲ့သည်။ အဓိကအားဖြင့် သူက ပြိုင်ဘက်ကို အံ့အားသင့်စေလို၍ ဖြစ်သော်လည်း ရွှေရောင်နယ်မြေအား အဓိက စစ်မြေပြင် ဖြစ်လာခြင်းမှ ကာကွယ်ချင်စိတ်လည်း ရှိနေခဲ့သည်။ ယခုတွင် နတ်ဆိုးများက အားကောင်းနေသောကြောင့် သူတို့သည် ရွှေရောင်နယ်မြေသို့သာ ဆုတ်ခွာနိုင်၏။ ရီယိုဒီရှာက ထိခိုက်မှုမှ သေချာပေါက် မလွတ်မြောက်နိုင်။ သူတို့ နောက်ဆုံးတွင် နတ်ဆိုးများကို အနိုင်ယူနိုင်ခဲ့လျှင်ပင် နဂါးလင်းလက် အင်ပါယာ တစ်ခုလုံးက ကြီးမားသော ဆုံးရှုံးမှုများကို ခံစားရ ပေလိမ့်မည်။ ယခင် သိဒ္ဓိအင်ပါယာ၏ စွမ်းအားကို ပြန်ရမရနိုင်ကိုမူ ပြောရန် ခက်ခဲလှသည်။ အကျိုးဆက် အနေဖြင့် သိဒ္ဓိကျောင်းတော် ဘာသာရေးဂိုဏ်းက ထိုအခွင့်အရေးကို လက်လွှတ်၍မခံဘဲ သေချာပေါက် “ကူညီ”လိမ့်မည်။ ထိုအချိန် သွေးထွက်သံယို မရှိသော်လည်း ပိုမို၍ ခက်ခဲသော စစ်ပွဲတစ်ခု ဖြစ်ပွားနိုင်၏။

မျှော်လင့်ထားသလိုပင် နတ်ဆိုးဘုံသို့ ဝင်ခဲ့သော ဗဟိုစစ်တပ်၏ ရှေ့ပြေး တပ်ဖွဲ့က ရှင်းလင်းခြင်း ခံလိုက်ရသည်။ ဗိုလ်ချုပ်ဟော့စ် အသတ်ခံရပြီးနောက် အကူစစ်တပ်ကလည်း ပြင်းထန်သော တိုက်ခိုက်မှု ခံခဲ့ရသည်။ ကံကောင်းစွာပင် သူတို့က စောစောစီးစီး ဆုတ်ခွာခဲ့ကြရာ စစ်သည် အနည်းငယ်က သူတို့အားလုံး နတ်ဆိုးဘုံမှ ထွက်ခွာ၍သွားသည်အထိ အသက်ရှင်ခဲ့ကြလေသည်။ အသက်ရှင်၍ ကျန်ရစ်သူများအားလုံး မျက်နှာပေါ်တွင် အမူအရာ တစ်ခုတည်းသာ ရှိနေသည်။ ၎င်းမှာ အကြောက်တရားပင်။

သို့သော် အကူစစ်တပ် အများစုကို ရှင်းလင်းပြီးနောက်တွင် နတ်ဆိုးများက အားသာချက်ရှိနေစဉ် တံခါးမှ တစ်ဆင့် လူသား လောကသို့ ပြေးဝင်မလာခဲ့ကြ။ ထိုအစား သူတို့က စနစ်တကျ ပြန်လည် ဆုတ်ခွာသွားခဲ့ပြီး ရွှေရောင်နယ်မြေ၏ အရေးတကြီး ပြင်ဆင်ထားသော ချုံခို တိုက်ခိုက်မှုကို အလဟဿ ဖြစ်စေခဲ့၏။

လူသား လောက တိုင်းပြည်အသီးသီးမှ လူများက မဟာမိတ်စစ်တပ် ရှေ့ပြေး တပ်ဖွဲ့များမှာ ရှုံးနိမ့်ခဲ့ကြောင်း သိခဲ့သော်လည်း သေဆုံးမှု အရေအတွက် အတိအကျကို သေသေချာချာ မသိခဲ့ပေ။ ဧကရာဇ် လက်ဇ်လည်း အများပြည်သူကို မိန့်ခွန်း တစ်ခုကို ပြောကြားခဲ့သည်။ “ငါတို့ ပြိုင်ဘက်က ဒီတစ်ခေါက် အတော် ရက်စက်ပြီး ကောက်ကျစ်ရုံတင် မကဘူး။ အတွေ့အကြုံရှိတဲ့ မုဆိုးတစ်ယောက်လိုပဲ အတော်လေး စိတ်ရှည်တယ်။ ဒါကြောင့် ငါတို့ အတူ လက်တွဲပြီး တိုက်ပွဲအသစ် တစ်ခုအတွက် ပြင်ဆင်ရမယ်။ ဒီအမဲလိုက် ကစားပွဲက အစပဲ ရှိသေးတယ်။ ဘယ်သူ မုဆိုးလဲ၊ ဘယ်သူ သားကောင်လဲ ပြောဖို့ စောလွန်းနေသေးတယ်...”

ထို့အပြင် အော့ခ်တပ်ဖွဲ့တစ်စု လူသား မဟာမိတ် စစ်တပ်သို့ ပူးပေါင်းခဲ့သည့် မမျှော်လင့်ထားသော သတင်း တစ်ခု ရှိနေသည်။ အော့ခ်များသည် မူလက အိပ်မက်ဆိုး တောနက်၌ နေထိုင်ခဲ့သည်။ လွန်ခဲ့သောနှစ်များက သိဒ္ဓိကျောင်းတော် အဖွဲ့အစည်းသည် အယူမှားအ မည်ဖြင့် အင်ပါယာအမျိုးမျိုး၏ ပူးပေါင်းစစ်တပ် တစ်ခုကို ဖွဲ့စည်းခဲ့ပြီး အော့ခ်များကို ဝိုင်းရံတိုက်ခိုက်ခဲ့ရာ သူတို့၏မျိုးနွယ်စုကို လုံးဝနီးပါး မျိုးသုဉ်းစေခဲ့သည်။

ထိုအော့ခ်များက ဘယ်ကလာသည်ကို မည်သူမှမသိဘဲ သူတို့ သွေးကြွေးရှိသော လူသား မဟာမိတ် စစ်တပ်သို့ အမှန်ပင် ပူးပေါင်းခဲ့ကြသည်။ အကယ်၍ ထိုကဲ့သို့ ကြမ်းတမ်းရက်စက်သော အော့ခ်များက အမှန်တရားကို နားလည်သည် သို့မဟုတ် တစ်ခုခုဟု ရှင်းပြခဲ့ပါက အော့ခ်များ ကိုယ်တိုင်ပင် ယုံကြည်မည် မဟုတ်ပေ။

သို့သော်လည်း ယခုမှာ ထူးခြားသော ကာလဖြစ်ပြီး အော့ခ်များကို လူသား လောက၏ အစိတ်အပိုင်း တစ်ခုအဖြစ် မှတ်ယူနိုင်လေသည်။ ယခုတစ်ကြိမ်တွင် လူသား မဟာမိတ်စစ်တပ်က လူသား အင်ပါယာများဖြင့်သာ ဖွဲ့စည်းထားသည် မဟုတ်ဘဲ နတ်သူငယ်များ၊ နဂါးများနှင့် လူပုများလည်း ပါဝင်သည်။ အကယ်၍ သူတို့က အော့ခ်များကို မဆင်မခြင် တိုက်ခိုက်ခဲ့ပါက လူသားမျိုးနွယ်စုမှလွဲ၍ ထိုမျိုးနွယ်စုများက သေချာပေါက် စိုးရိမ်မှုများ ရှိပေလိမ့်မည်။ နတ်သူငယ် မျိုးနွယ်စု မင်းသမီးဖီလီက အော့ခ်များကို ကြိုဆိုကြောင်း ဖော်ပြရာတွင် ဦးဆောင်ခဲ့သည်။ နဂါးများနှင့် လူပုများ ကန့်ကွက်မှု မရှိခဲ့ပေ။ ထိုကဲ့သို့ နောက်ခံအောက်တွင် အော့ခ်များက နောက်ဆုံးတွင် လူသား မဟာမိတ် စစ်တပ်သို့ အောင်မြင်စွာ ပူးပေါင်းနိုင် ခဲ့ကြသည်။

မဟာမိတ်စစ်တပ် ဌာနချုပ်မှ တပ်မှူးနှင့် ဗိုလ်ချုပ်များကလည်း သူတို့၏ ကြိုဆိုမှုကို ဖော်ပြခဲ့သည်။ အမျိုးမျိုးသော ထည့်သွင်းစဉ်းစားမှုများကြောင့် ဧကရာဇ် လက်ဇ်နှင့် အခြားသူများက နဂါးများ၊ နတ်သူငယ်နှင့် လူပုများကို နတ်ဆိုးဘုံသို့ ဝင်ရောက်ခဲ့သော ရှေ့ပြေးတပ်ဖွဲ့များတွင် ပူးပေါင်းရန် မတောင်းဆိုခဲ့ပေ။ ယခု ထိုအော့ခ်များက ကြမ်းတမ်း ရဲရင့်သည်။ သူတို့က နတ်ဆိုးများကို မျက်နှာချင်းဆိုင် ရင်ဆိုင်ရန် အသင့်တော်ဆုံးဖြစ်ပြီး ၎င်းမှာ အလိုအပ်ဆုံး အမြောက်စာများ ဖြစ်၏။ သူတို့ အဘယ်ကြောင့် ငြင်းရမည်နည်း။

အော့ခ်များ ပေါင်းထည့်လိုက်ခြင်းက ကြားဖြတ် ဇာတ်လမ်းလေး တစ်ခုမျှသာ ဖြစ်သည်။ လူတိုင်း၏ အာရုံစူးစိုက်သော အဓိကအချက်မှာ လောက နှစ်ခုအကြားမှ တံခါးပေါ်တွင် ရှိနေဆဲပင်။

ယခင်တိုက်ပွဲ အပြီးတွင် တံခါးသည် တိတ်ဆိတ်သော အခြေအနေသို့ ထပ်မံ၍ ရောက်သွားခဲ့သော်လည်း နတ်ဆိုးဘုံနှင့် လူသားလောက နှစ်ခုစလုံး အသေအချာ သိသည်မှာ ထိုကဲ့သို့ တိတ်ဆိတ်မှုက ပိုကြီးမားသော စွမ်းအားကို ဖြည့်တင်းရန် အချိန်နှင့်အမျှ ပြိုင်ဆိုင်မှု တစ်ခုမျှသာ ဖြစ်ကြောင်းပင်။ နောက်ထပ်တိုက်ပွဲက နှစ်ဖက်အကြား စစ်မှန်သော ထိတွေ့မှု တစ်ခု ဖြစ်ပေလိမ့်မည်။ ၎င်းမှာ လောက နှစ်ခုကို လုံးဝ တုန်လှုပ် သွားစေနိုင်၏။ ထိုအခိုက်အတန့်က သေချာပေါက် လုံးဝ ကြာမြင့်မည် မဟုတ်ပေ။

ထိုအချိန် နှစ်ပေါင်းများစွာ တိတ်ဆိတ် နေခဲ့သော အခြားသော နေရာတစ်ခုက နောက်ဆုံးတွင် စတင် တုန်ခါလာခဲ့သည်။

အိပ်မက်ဆိုး မီးတောင်၏ မြေကြီး တုန်ခါသွား၏။

မြေမျက်နှာသွင်ပြင် တစ်ခုလုံးသည် တစ်စုံတစ်ခု စတင်၍ ကျယ်ပြန့်လာသည့် အလား တဖြည်းဖြည်း လှိုင်းထလာသည်။

ထိုအချိန် မြေပြင်ပေါ် ဝှက်ထားသော ဧရာမ မှော်စာများမှာ အစိမ်းရောင် ထွန်းလင်းလျက် စတင်၍ ပေါ်လာ၏။

ကျယ်ပြန့်နေသော စွမ်းအားက အစိမ်းရောင်အလင်းဖြင့် လင်းထိန်သွားပြီး နောက်တွင် အနည်းငယ် တုန်ခါသွားပြီး တဖြည်းဖြည်း ပြန်လည် ကျုံ့ဝင်သွား၏။ သို့သော် ၎င်းမှာ လုံးဝကို ငြိမ်သက်၍ မသွားသေးပေ။ ထို့နောက် ၎င်းသည် နောက်တစ်ကြိမ် ကျယ်ပြန့်လာခဲ့သည်။ လုံးဝကို ကွဲပြားသော ကျုံ့ဝင်ခြင်းနှင့် ကျယ်ပြန့်ခြင်း အင်အား နှစ်ခုတို့သည် အဆက်မပြတ် ယှဉ်ပြိုင် တိုက်ခိုက်နေ၏။

ဝတ်ရုံနှင့် ယောက်ျားက လက်ထဲတွင် လက်ကိုင်တုတ် တစ်ခုဖြင့် ရပ်နေပြီး ထိုအရာများ အားလုံးကို တိတ်ဆိတ်စွာ ကြည့်ရှုနေခဲ့သည်။

အနီးအနားမှ အရာအားလုံးတို့သည် ထိုဧရာမ အင်အားအောက်တွင် တုန်ခါ၍ နေခဲ့သည်။ ကောင်းကင်မှ တိမ်များပင် အက်ကြောင်းများ ရှိနေပြီး အက်ကြောင်း အကြား သွေးယိုစီးနေသော အနီရောင် တစ်ခု ရှိနေ၏။

တုန်ခါမှုက နောက်ဆုံးတွင် ငြိမ်သက် သွားသော်လည်း ဝတ်ရုံနှင့် ယောက်ျား၏ အကြည့်က အနည်းငယ်မျှ မလျော့ပါးခဲ့။ ထိုစစ်ပွဲကဲ့သို့ပင် တုန်ခါမှုက အခုမှသာ စတင်ခဲ့ခြင်း ဖြစ်လေသည်။ စစ်မှန်သော တုန်ခါမှုပင်...