လူသတ်ပွဲကြီး အစ

~အင်ပါယာ အသီးသီးမှ တော်ဝင်မိသားစုဝင် အဆင့်မြင့် ပုဂ္ဂိုလ်များ၊ နိုင်ငံအသီးသီးမှ အဓိက အင်အားစုများမှ ပညာရှင်များအပြင်၊ များပြားလှသော သီးခြား ကျင့်ကြံသူများ အားလုံးသည် လော့ယွင်အင်ပါယာ၏ ကျီးရှင်းဂိုဏ်းထံသို့ အလုအယက် ချီတက်လာခဲ့ကြသည်။

ပိုင်ရှန်း သေဆုံးမှုမှ သက်ရောက်လာသော တုန်လှုပ်မှုမှာ အလွန်တရာ ကြီးမားလှ၏။ မရေမတွက်နိုင်သော ခွန်အားထက် ပုဂ္ဂိုလ်များသည် ဖုန်းဝူချန်၏ စွမ်းအားမှာ ကောလာဟလများအတိုင်း အမှန်တကယ် ကြောက်မက်ဖွယ်ကောင်းခြင်း ရှိ၊ မရှိကို ကိုယ်တိုင် မျက်မြင် လာရောက် ကြည့်ရှုလိုကြသည်။

ထိုက်ရွှီဂိုဏ်း၊ ဖုန်းလေဂိုဏ်း၊ ဟွမ်ယွင်ဂိုဏ်းတို့မှ ဂိုဏ်းချုပ်များနှင့် အခြား ထျန်းယွမ်ဘုံ ပညာရှင်များပင် လှုပ်ရှားလာခဲ့ကြသည်။

ဖုန်းဝူချန်က ကျီးရှင်းဂိုဏ်းကို အမြစ်ပြတ် ချေမှုန်းမည်ဟူသော သတင်းသည် အမှန်တကယ်ပင် မရေမတွက်နိုင်သော ခွန်အားထက် ပုဂ္ဂိုလ်များကို ဆွဲဆောင်လိုက်နိုင်ခဲ့လေသည်။

အင်ပါယာ၏ သံမဏိမြင်းသည်တော် တပ်ဖွဲ့၏ တပ်ချီသံများမှာ စိတ်ဓာတ်တက်ကြွဖွယ် ကောင်းပြီး လှုပ်ရှားတက်ကြွနေ၏။

ကောင်းကင်အရိပ် မြင်းသည်တော်တပ်ဖွဲ့နှင့် အလံနက်တပ်မတော်တို့သည် အင်ပါယာ နယ်စပ်သို့ ရောက်ရှိပြီးနောက်၊ စစ်သည်များ တစ်ယောက်ပြီးတစ်ယောက် မြင်းပေါ်မှ ဆင်းလိုက်ကြပြီး၊ သူတို့၏ လှုပ်ရှားမှု သိုင်းကွက်များကို အသုံးပြုကာ ဖုန်းဝူချန်၏ နောက်မှ လော့ယွင်အင်ပါယာ၏ နယ်နိမိတ်အတွင်းသို့ ဝင်ရောက်သွားကြသည်။

နယ်စပ်ကို စောင့်ကြပ်နေသော လော့ယွင်အင်ပါယာမှ စစ်သူကြီးများနှင့် စစ်သည်များ၏ မျက်နှာများတွင် ထိတ်လန့်တုန်လှုပ်မှုများ ထင်ဟပ်နေပြီး သူတို့၏ လမ်းကို ပိတ်ဆို့ရန် မဝံ့ရဲကြပေ။

ဖုန်းဝူချန်၏ ကြောက်မက်ဖွယ် စွမ်းအားမှာ ပဉ္စမမြောက် ဧကရာဇ်တစ်ပါးနှင့်ပင် တူလှသည်။

လော့ယွင်အင်ပါယာ အတွင်းသို့ ခွန်အားထက် ပုဂ္ဂိုလ်များစွာ စီးဝင်ရောက်ရှိနေခဲ့ပြီး ဖြစ်သည်။ လော့ယွင်အင်ပါယာ၏ နယ်စပ်တွင်ပင် ပညာရှင် အနည်းငယ်ကို တွေ့ရှိနေရသည်။

'ဖုန်းဝူချန်က သူ့ရဲ့ အရှိန်အဝါကို ဖုံးကွယ်ထားတာပဲ။ သူ့ကျင့်ကြံမှုအဆင့် ဘယ်လောက် နက်ရှိုင်းလဲ ဆိုတာ ခန့်မှန်းလို့ မရဘူး။ ဒါပေမဲ့ ကောလာဟလတွေကတော့ မှားနိုင်မှာ မဟုတ်ဘူး။'

'ယန်ဟော်အင်ပါယာက ကောင်းကင်အရိပ် မြင်းသည်တော်တပ်ဖွဲ့နဲ့ အလံနက်တပ်မတော်က အင်အား အရမ်းကြီးမားတာပဲ။ ဒီလောက် ကြောက်မက်ဖွယ်ကောင်းတဲ့ စစ်သည်မျိုး ငါ တစ်ခါမှ မမြင်ဖူးဘူး။'

'ရွှေယွဲ့အင်ပါယာမှာတောင် ဒီလို ကြောက်မက်ဖွယ်ကောင်းတဲ့ စစ်သည်မျိုး မပိုင်ဆိုင်ဘူး။ သူတို့က ယန်ဟော်အင်ပါယာရဲ့ ထိပ်တန်းဆုံး စစ်သည်တွေ အမှန်ပဲ။'

ကြည့်ရှုနေကြသော ခွန်အားထက် ပုဂ္ဂိုလ်များစွာသည် ကောင်းကင်အရိပ် မြင်းသည်တော်တပ်ဖွဲ့နှင့် အလံနက်တပ်မတော်တို့၏ စွမ်းအားကြောင့် အကြီးအကျယ် တုန်လှုပ်သွားကြသည်။

ကောင်းကင်အရိပ် မြင်းသည်တော်တပ်ဖွဲ့နှင့် အလံနက်တပ်မတော်တို့၏ တည်ရှိမှုသည် နိုင်ငံလေးခု အလယ်တွင် အခိုင်အမာဆုံး ဖြစ်သည်မှာ သံသယဖြစ်ဖွယ် မရှိချေ။

ဤအချိန်တွင်၊ ကျီးရှင်းဂိုဏ်း အနီးရှိ တောင်တန်းများတွင် နိုင်ငံအသီးသီးမှ ပညာရှင်များစွာ စုရုံးရောက်ရှိနေကြပြီး၊ အားလုံးက ဖုန်းဝူချန်၏ ရောက်ရှိလာမှုကို တိတ်ဆိတ်စွာ စောင့်ဆိုင်းနေကြသည်။

ကျီးရှင်းဂိုဏ်း အတွင်း၌မူ၊ ပိုင်ရှန်းနှင့် အကြီးအကဲများ အသတ်ခံလိုက်ရပြီး၊ ဖုန်းဝူချန်က သုံးရက်အတွင်း ကျီးရှင်းဂိုဏ်းကို လာရောက် ချေမှုန်းမည်ဟု သိရှိပြီးနောက် ထိတ်လန့်တုန်လှုပ်နေကြသော တပည့်များသည် သူတို့၏ အသက်ကို ကယ်တင်ရန် ထွက်ပြေးသွားခဲ့ကြပြီး ဖြစ်သည်။

မိသားစု အသီးသီးမှ သခင်လေးများကိုလည်း သူတို့၏ မိသားစုများက ပြန်လည် ခေါ်ဆောင်သွားခဲ့ကြသည်။

"ဒုက္ခကြီးနှင့် ကြုံတွေ့ရသောအခါ၊ တစ်ဦးစီ မိမိလမ်းကို ရှာရမည်" ဟူသော ဆိုရိုးစကားအတိုင်းပင် ဖြစ်သည်။

ယခုအချိန်အထိ၊ ထွက်ပြေးရန် စဉ်းစားရင်း ရုန်းကန်နေရဆဲ တပည့်များစွာ ရှိနေသေးသည်။ သူတို့ ထွက်ပြေးချင်သော်လည်း ကျီးရှင်းဂိုဏ်းကို စွန့်ခွာရန် မခဲယဉ်းနိုင် ဖြစ်နေကြသည်။ အကယ်၍ ထွက်ပြေးသွားပါက၊ သူတို့၏ အနာဂတ် ကျင့်ကြံရေးလမ်းစဉ်မှာ အဘယ်သို့ ဖြစ်သွားမည်နည်း။

သို့သော် မထွက်ပြေးပါကလည်း၊ မည်သူက ဖုန်းဝူချန်ကို အနိုင်ယူနိုင်မည်နည်း။ နေရစ်ခဲ့ခြင်းသည် အချည်းနှီး သေဆုံးခြင်းမျှသာ ဖြစ်ပေလိမ့်မည်။

'ငါတို့ အခု ထွက်ပြေးရင်တောင် နောက်မကျသေးဘူး။ ဖုန်းဝူချန်နဲ့ အင်ပါယာရဲ့ ထိပ်တန်း စစ်သည်တွေက ဂိုဏ်းကို ဝိုင်းထားလိုက်တာနဲ့၊ ငါတို့ ထွက်ပြေးဖို့ အခွင့်အရေး လုံးဝ ရှိတော့မှာ မဟုတ်ဘူး။'

ကျီးရှင်းဂိုဏ်းတွင် တပည့် ထောင်ပေါင်းများစွာ ကျန်ရှိနေသေးသော်လည်း၊ သူတို့၏ မျက်နှာများတွင် ထိတ်လန့်မှုနှင့် ဖြူဖျော့မှုမှလွဲ၍ အခြား မည်သည့်အရာမျှ မတွေ့ရပေ။

"ငါ ငါတို့လည်း အသက်လု ထွက်ပြေးသင့်ပြီ ထင်တယ်။ ဒီကြောက်ရွံ့မှုကို ငါ ဘယ်လိုမှ မခံနိုင်တော့ဘူး။" တပည့်တစ်ဦးက တုန်ယင်လျက် ထိတ်လန့်တကြား ပြောလိုက်သည်။

"အကြီးအကဲ၊ ကျွန်တော်တို့ ဖုန်းဝူချန်ကို မယှဉ်နိုင်ပါဘူး။ ဘာလို့ သေမင်းကို စောင့်နေရမှာလဲ။"

"မြန်မြန် ပြေးကြတော့။"

နောက်ထပ် တပည့် ဒါဇင် အနည်းငယ်သည် တောင်အောက်သို့ ထွက်ပြေးသွားကြပြန်သည်။ ကျီးရှင်းဂိုဏ်း၏ အထက်ပိုင်း လူကြီးများထဲမှ မည်သူမျှ သူတို့ကို တားဆီးခြင်း မပြုခဲ့ပေ။

ကျီးရှင်းဂိုဏ်းသည် လော့ယွင်အင်ပါယာ၏ တော်ဝင်မိသားစုနှင့် နီးကပ်သော ဆက်ဆံရေး ရှိခဲ့သော်လည်း၊ ယခု ကျီးရှင်းဂိုဏ်း ဒုက္ခရောက်သောအခါ၊ လော့ယွင်အင်ပါယာမှ ခွန်အားထက် ပုဂ္ဂိုလ် တစ်ဦးတစ်ယောက်မျှ အကူအညီပေးရန် ရောက်မလာခဲ့ပေ။

ပိုင်ရှန်း သေဆုံးသွားသည်နှင့်၊ ကျီးရှင်းဂိုဏ်းသည် အင်ပါယာနှင့် တန်းတူ ရပ်တည်နိုင်ခွင့် အရည်အချင်းကို ဆုံးရှုံးသွားခဲ့ပြီး ဖြစ်သည်။

'ကျီးရှင်းဂိုဏ်းက ဒီတစ်ခါတော့ တကယ် ပြီးသွားပြီ။ အခု မပြေးရင်၊ ဖုန်းဝူချန် ရောက်လာတာနဲ့ သူတို့ သေမှာ သေချာတယ်။'

'ဖုန်းဝူချန်လို သားရဲလို ပါရမီရှင်မျိုးကို အင်ပါယာကြီးတွေက ပိုပြီး အင်အားကြီးလာတာကို မြင်ချင်ကြမှာ မဟုတ်တာ။ သူက သူတို့ရဲ့ အကျိုးစီးပွားကို ခြိမ်းခြောက်လာတာနဲ့၊ သူ့ကို ရှင်းပစ်ဖို့ တွန့်ဆုတ်နေမှာ မဟုတ်ဘူး။'

'ဖုန်းဝူချန်က လော့ယွင်အင်ပါယာထဲ ခြေချလိုက်တဲ့ အခိုက်အတန့်ကစပြီး ကျားခံတွင်းထဲ သိုးဝင်သွားသလိုပဲ။ နိုင်ငံအသီးသီးက အဓိက အင်အားစုတွေက ပညာရှင်တွေ လက်တွဲပြီး သူ့ကို သတ်ဖို့ဆိုတာ ခက်ခဲတဲ့ ကိစ္စ မဟုတ်ဘူး လေ။'

ကျီးရှင်းဂိုဏ်း အနီးတစ်ဝိုက်မှ တောင်ထိပ်များတွင် ဝန်းရံနေသော ပညာရှင်များစွာသည် ဤကိစ္စများကို တိုးညင်းသော အသံများဖြင့် တီးတိုး ပြောဆိုနေကြသည်။

----

လျှို့ဝှက်သော နေရာ တစ်ခုတွင်မူ၊ သွမ့်ထျန်းဟွမ်၊ ယန်ထျန်းရှန်နှင့် စစ်ထူကျန့်ထျန်းတို့သည် ကျီးရှင်းဂိုဏ်း အနီးသို့ ရောက်ရှိနေကြပြီး ဖြစ်သည်။

သူတို့အပြင်၊ နိုင်ငံအသီးသီးမှ ဧကရာဇ်များနှင့် အဓိက အင်အားစုများ၏ ခေါင်းဆောင်များလည်း ရောက်ရှိနေကြသော်လည်း၊ သူတို့ ကိုယ်တိုင် ထုတ်ဖော် ပြသခြင်း မရှိသေးပေ။

ဤတောင်တန်းကြီးမှာ ခြောက်ခြားစရာ ကောင်းလောက်အောင် တိတ်ဆိတ်ငြိမ်သက်နေသည်။ လေထုထဲတွင် သေမင်း၏ အငွေ့အသက်များ ရစ်သိုင်းနေသကဲ့သို့ပင်၊ လူတိုင်းသည် ဖုန်းဝူချန်၏ ရောက်ရှိလာမှုကို စောင့်ဆိုင်းနေကြ၏။

“ဝှစ်..”

မည်မျှ အချိန်ကြာသွားသည်မသိ၊ ရုတ်တရက် အဝေးမှ ကောင်းကင်ယံတွင် ရွှေရောင် အလင်းတန်းတစ်ခု ပေါ်ထွက်လာပြီး၊ ၎င်းနှင့်အတူ လွှမ်းမိုးချုပ်ကိုင်နိုင်သော အရှိန်အဝါတစ်ခု၊ လေခွင်းသံကြီးနှင့်အတူ လျင်မြန်စွာ ချဉ်းကပ်လာသည်။ ရွှေရောင် အလင်းတန်းမှာ တဖြည်းဖြည်း ပိုမို အားကောင်းလာပြီး ပိုမို ကျယ်ပြန့်လာလေသည်။

"သူ လာပြီ။"

ထိုအရှိန်အဝါကို အာရုံခံမိသော သိုင်းပညာရှင်များသည် ချက်ချင်းပင် တင်းမာသွားကြပြီး၊ သူတို့၏ မျက်နှာအမူအရာများမှာ ထိုလွှမ်းမိုးနိုင်သော အရှိန်အဝါ၏ ခြောက်လှန့်မှုအောက်တွင် ချုပ်တည်းထားရသည်။

ဤအခိုက်အတန့်တွင်၊ မျက်လုံးအားလုံးသည် အာရုံစူးစိုက်လာကြပြီး၊ အကြည့်တိုင်းသည် ကောင်းကင်ယံသို့ လှည့်သွားကြသည်။

ခေတ္တအကြာတွင်၊ ပေတစ်ဒါဇင်ခန့် မြင့်မားသော ကြီးမားလှသည့် ရွှေရောင် မျှော်စင်ကြီးတစ်ခု ကျီးရှင်းဂိုဏ်း၏ အထက်တွင် ပေါ်ထွက်လာသည်။ ကြောက်မက်ဖွယ် ဖိနှိပ်မှု စွမ်းအားတစ်ခု အောက်သို့ သက်ဆင်းလာရာ၊ ဂိုဏ်း၏ အထက်ပိုင်း လူကြီးများနှင့် တပည့်များ၏ မျက်နှာများမှာ သိသိသာသာ ပြောင်းလဲသွားကြသည်။

ဤမျှော်စင်မှာ အခြားမဟုတ်၊ ကိုးထပ် ချန်ခွန်း မျှော်စင် ပင်တည်း။

ကိုးထပ် ချန်ခွန်း မျှော်စင်၏ တည်ရှိမှုကို အင်ပါယာကြီး လေးခုမှ လူတိုင်း သိရှိကြသော်လည်း၊ လူအများစုမှာ ၎င်းကို ပထမဆုံးအကြိမ် မျက်မြင် တွေ့မြင်ရခြင်း ဖြစ်ပြီး၊ သူတို့၏ မျက်လုံးများမှာ အကြောက်တရား ကြီးစိုးနေသည်။

ထိုလွှမ်းမိုးနိုင်သော အရှိန်အဝါနှင့် ဖိနှိပ်မှု စွမ်းအားကို ကျီးရှင်းဂိုဏ်း၏ ပတ်ဝန်းကျင် တောင်တန်းများမှ ကြည့်ရှုနေသူများပင် ခံစားမိနိုင်ပြီး၊ သူတို့၏ အစစ်အမှန်ယွမ်များပင် ပိတ်ဆို့ခံထားရသည်။

ဤသို့ ခြိမ်းခြောက်သည့် လက်နက်ရတနာမျိုးကို လူအများစုအတွက် ပထမဆုံးအကြိမ် တွေ့မြင်ဖူးခြင်း ဖြစ်သည်။

'ဒါက ကိုးထပ် ချန်ခွန်း မျှော်စင်လား။ ဟူး..ဒီလောက် လွှမ်းမိုးနိုင်တဲ့ ဖိနှိပ်မှု စွမ်းအားမျိုး၊ ထျန်းယွမ်ဘုံ ကျင့်ကြံသူတွေတောင် ခုခံဖို့ ခက်ခဲလိမ့်မယ်။'

ထိုက်ရွှီဂိုဏ်းချုပ်သည် သူ၏ လျှို့ဝှက်နေရာမှ အလွန်အမင်း တုန်လှုပ်စွာ တွေးလိုက်မိသည်။

'ဒီလောက် ကြောက်ဖို့ကောင်းတဲ့ အရှိန်အဝါ၊ ဒါက ဒဏ္ဍာရီလာ တစ်ပိုင်းလက်နက် အဆင့်လား။ ဒီလို စွမ်းအားမျိုး ရှိနေမှတော့ ပိုင်ရှန်းက ဖုန်းဝူချန် လက်ထဲ သေသွားတာ အံ့ဩစရာ မရှိတော့ဘူး။' ဟွမ်ယွင်ဂိုဏ်းချုပ်သည်လည်း အလားတူ အံ့အားသင့်နေသည်။

'ဒဏ္ဍာရီလာ တစ်ပိုင်းလက်နက် အဆင့်က တကယ်ပဲ ကြောက်ဖို့ကောင်းတာပဲ။ ဧကရာဇ် သုံးပါးက သွမ့်ထျန်းဟွမ်ကို ဖိအားပေးပြီး ဖုန်းဝူချန်ကို ကိုးထပ် ချန်ခွန်း မျှော်စင် လက်လွှဲခိုင်းတာ မဆန်းတော့ဘူး။' ဖုန်းလေဂိုဏ်းချုပ်က တုန်လှုပ်စွာ ရေရွတ်လိုက်သည်။

အရိပ်ထဲတွင် ပုန်းကွယ်နေသော ဧကရာဇ် သုံးပါး၏ မျက်နှာများမှာ ခက်ထန်တင်းမာနေသော်လည်း၊ သွမ့်ထျန်းဟွမ် တစ်ဦးတည်းသာ ပြုံးရွှင်နေသည်။

ဖုန်းဝူချန်သည် ကျီးရှင်းဂိုဏ်းကို အလွန် ကြောက်မက်ဖွယ်ကောင်းသော နည်းလမ်းများဖြင့် နှိမ်နင်းနေသည်ကို သွမ့်ထျန်းဟွမ်က မြင်တွေ့လိုနေပြီး၊ နိုင်ငံအသီးသီးမှ အဓိက အင်အားစုများ ခြောက်လှန့်ခံရကာ ယန်ဟော်အင်ပါယာ၏ ဩဇာအာဏာကို သိရှိသွားစေရန်လည်း မျှော်လင့်နေသည်။

"အရှင်၊ ကျွန်တော်မျိုးတို့ တကယ် ဝင်မစွက်ဖက်ဘဲ နေတော့မှာလား။" အရိပ်ထဲတွင် နန်းတွင်းအကြံပေးက လော့ယွင် ဧကရာဇ်အား မေးလိုက်သည်။

လော့ယွင် ဧကရာဇ်၏ မျက်နှာမှာ အလွန်တရာ အရုပ်ဆိုး အကျည်းတန်နေသည်။ ဖုန်းဝူချန်သည် ပိုင်ရှန်းနှင့် ကျီးရှင်းဂိုဏ်း အကြီးအကဲများကို သတ်ဖြတ်ခဲ့ပြီး၊ သူ့ကို လုံးဝ အလေးမထားခဲ့ပေ။ ယခုမူ၊ သူသည် လော့ယွင်အင်ပါယာ၏ နယ်နိမိတ်အတွင်းသို့ စစ်တပ်များ ဦးဆောင်ကာ လူသတ်ရန် ဝင်ရောက်လာခဲ့သည်။ လော့ယွင် ဧကရာဇ်သည် မည်သို့ မဒေါသထွက်ဘဲ နေနိုင်မည်နည်း။

သို့သော် ဖုန်းဝူချန်သည် ကြောက်မက်ဖွယ် ကောင်းလောက်အောင် ခွန်အားထက်လှရာ လော့ယွင် ဧကရာဇ်သည် သူ့ကို မည်သို့မျှ မတတ်နိုင်ခဲ့ပေ။

"အခြေအနေကို စောင့်ကြည့်ကြမယ်။" လော့ယွင် ဧကရာဇ်သည် နက်မှောင်ပြီး ဒေါသထွက်နေသော လေသံဖြင့် အမိန့်ပေးလိုက်သည်။

"ဝှစ်..ဝှစ်"

ကိုးထပ် ချန်ခွန်း မျှော်စင်သည် ကျီးရှင်းဂိုဏ်း၏ ကောင်းကင်ယံတွင် ပေါ်ထွက်လာပြီး၊ မရေမတွက်နိုင်သော ပညာရှင်များ ကြောက်ရွံ့တကြား ကြည့်ရှုနေစဉ်၊ အဝေးမှ ကောင်းကင်ယံ မြင့်မြင့်ဆီမှ ပိုမို ပြင်းထန်သော လေခွင်းသံကြီးတစ်ခု ထွက်ပေါ်လာ၏။ တဆက်တည်း၌ ရွှေရောင် အလင်းတန်းတစ်ခု အဝေး ကောင်းကင်ယံမှ ပျံသန်းလာသည်။

"ယွမ်တန်ဘုံ သတ္တမ အလွှာ အထွတ်အထိပ်။ ဖုန်းဝူချန် ရောက်လာပြီ။" တစ်စုံတစ်ယောက်က ပိုမို ကြောက်ရွံ့ထိတ်လန့်နေသော မျက်နှာဖြင့် တုန်လှုပ်စွာ အော်ဟစ်လိုက်သည်။

ပညာရှင် အားလုံးသည် တိုးတက်လာပြီး အရမ်းကာရော ကြမ်းတမ်းသော အရှိန်အဝါ တစ်ခုကို ခံစားလိုက်ကြရသည်။

ဒါ အမှန်ပင် ဖုန်းဝူချန်၏ အရှိန်အဝါ ဖြစ်သည်။ လော့ယွင်အင်ပါယာ၏ နယ်နိမိတ်အတွင်းသို့ ဝင်ရောက်ပြီးနောက်၊ သူသည် သူ၏ ကျင့်ကြံမှုအဆင့်ကို မဖုံးကွယ်တော့ပေ။

သူသည် နိုင်ငံအသီးသီးမှ အင်အားစုများ၏ ပညာရှင်များကို ခြိမ်းခြောက်ရန် ရည်ရွယ်ထားမှတော့၊ သူ၏ ကျင့်ကြံမှု အဆင့်ကို ဖုံးကွယ်ထားရန် မလိုအပ်တော့ပေ။

၎င်းအပြင်၊ သူတို့ကို ပိုမို ထိတ်လန့်စေသော အရာမှာ၊ သူ၏ ကျင့်ကြံမှု အရှိန်အဝါအပြင်၊ ဖုန်းဝူချန်သည် ကြောက်မက်ဖွယ် ကောင်းသော အရိုင်းဆန်မှုနှင့် သွေးဆာမှု အရှိန်အဝါကိုလည်း ထုတ်လွှတ်နေခြင်း ဖြစ်ပြီး၊ မရေမတွက်နိုင်သော လူများကို သူတို့၏ ဝိညာဉ်များ လွင့်စဉ်သွားမတတ် ကြောက်ရွံ့သွားစေသည်။

ကျီးရှင်းဂိုဏ်း၏ အထက်ပိုင်း လူကြီးများနှင့် တပည့်များသည် ဤ ကြောက်မက်ဖွယ် အရှိန်အဝါကို ခံစားမိသောအခါ၊ သူတို့၏ မျက်လုံးများတွင် မျှော်လင့်ချက် ကင်းမဲ့သော အရိပ်အယောင်များ ထင်ဟပ်လာတော့သည်။

'ဒီ ကြောက်ဖို့ကောင်းတဲ့ အရှိန်အဝါက ဘာလဲ။ ငါ့ရဲ့ ဝိညာဉ်ခန္ဓာကိုယ်တောင် တုန်ယင်နေသလို ခံစားနေရတယ်။'

'ဒါက ဖုန်းဝူချန်ရဲ့ ချပ်ဝတ် ပဲ။ ဘာပစ္စည်းနဲ့ လုပ်ထားလဲ ဘယ်သူမှ မသိဘူး။ ဖုန်းဝူချန်က စိတ်ဖြင့်လက်နက်ဖန်ဆင်းခြင်း ပညာကို လုပ်နိုင်တဲ့ ပဉ္စမအလွှာ လက်နက်ပညာရှင်လို့ ပြောကြတယ်။ ဒီချပ်ဝတ် က သူကိုယ်တိုင် သန့်စင်ထားတဲ့ ရတနာတစ်ခု ဖြစ်ဖို့များတယ်။'

မြင်ကွင်းတစ်ခုလုံး မရေမတွက်နိုင်သော ထိတ်လန့်တုန်လှုပ်နေသည့် ပညာရှင်များဖြင့် ပြည့်နှက်သွားသည်။ မူလက တိတ်ဆိတ်နေသော တောင်တန်းကြီးသည် ချက်ချင်း ပေါက်ကွဲထွက်သွားတော့သည်။

"ဝှစ်..ဝှစ်"

မျက်စိတစ်မှိတ်အတွင်း လှစ်ခနဲ လှုပ်ရှားမှု အနည်းငယ် ပြုလုပ်ပြီးနောက်၊ ဖုန်းဝူချန်သည် ကျီးရှင်းဂိုဏ်း အထက်မှ ကောင်းကင်ယံတွင် ရုတ်တရက် ထွက်ပေါ်လာလေ၏။၊ မျှော်စင်၏ ထိပ်ဖျားပေါ်တွင် တည်ငြိမ်စွာ ဆင်းသက်လိုက်ကာ ကျီးရှင်းဂိုဏ်းကို အပေါ်မှ မိုး၍ ကြည့်လိုက်သည်။

ကျောဘက်၌ ကြောက်မက်ဖွယ်ကောင်းသည့် လျှို့ဝှက်ဆန်းကြယ် အနက်ရောင် တောင်ပံတစ်စုံကို ထုတ်ဖော်ရင်း လေထဲတွင် ပျံဝဲနေသည်။ သူသည် ခမ်းနားထည်ဝါပြီး လွှမ်းမိုးနိုင်စွမ်း အပြည့်ရှိကာ၊ ကောင်းကင်ဘုံမှ နတ်ဘုရားတစ်ပါး သက်ဆင်းလာသည့်အလားပင်။

ဖုန်းဝူချန် ရောက်ရှိလာသည်နှင့်၊ မရေမတွက်နိုင်သော ထိတ်လန့်တုန်လှုပ်နေသည့် ပညာရှင်များသည် ချက်ချင်း တိတ်ဆိတ်ငြိမ်သက်သွားကြပြီး၊ သူတို့၏ ကြောက်ရွံ့နေသော အကြည့်များ အားလုံးသည် ထို တစ်ဆယ့်ခုနစ်၊ တစ်ဆယ့်ရှစ်နှစ်အရွယ် လူငယ်လေးထံသို့ ကျရောက်သွားကြသည်။

'ယွမ်တန်ဘုံ သတ္တမ အလွှာ အထွတ်အထိပ်နဲ့ ထျန်းယွမ်ဘုံ ပညာရှင်တစ်ယောက်ကို သူ တကယ် သတ်နိုင်ခဲ့တာလား။' အမှောင်ထဲတွင် လေကျွယ်သည် ဖုန်းဝူချန်ကို ကြည့်ရင်း သူ၏ စိတ်ထဲတွင် ယခုတိုင် မယုံနိုင်သေးပေ။

ဖုန်းဝူချန်၏ စွမ်းအားနှင့် ပတ်သက်၍ လေကျွယ်သည် အနည်းဆုံးတော့ လူအများစုထက် ပိုမို ရှင်းလင်းစွာ သိရှိထားသည်။ ဖုန်းဝူချန်သည် ယွမ်တန်ဘုံ သတ္တမ အလွှာ အထွတ်အထိပ်သို့ ခြေချနိုင်ခဲ့သည် ဆိုဦးတောင်မှ၊ လေကျွယ်သည် သူ ပိုင်ရှန်းကို သတ်နိုင်ခဲ့သည်ကို မယုံကြည်ခဲ့ပေ။

ဖုန်းဝူချန် ပေါ်လာပြီး မကြာမီပင်၊ နောက်ထပ် လေခွင်းသံတစ်ခု ထွက်ပေါ်လာပြီး၊ ခရမ်းရောင် အလင်းတန်းတစ်ခု ပျံသန်းလာကာ၊ အားကောင်းသော အရှိန်အဝါဖြင့် ဖုန်းဝူချန်၏ ဘေးတွင် ဆင်းသက်လိုက်သည်။

ရောက်ရှိလာသူမှာ ယွမ်တန်ဘုံ သတ္တမ အလွှာ အထွတ်အထိပ်ရှိ လင်ရှောင်ရှောင် ပင်တည်း။

နောက်ထပ် စွမ်းအားကြီးသော ပါရမီရှင်တစ်ဦး၊ ထို့ထက် ပိုသည်မှာ သွယ်လျသော မေးစေ့၊ နီစွေးသော နှုတ်ခမ်း၊ မည်းနက်သောဆံပင်ရှည်၊ ကျောက်စိမ်းရောင် အသားအရေနှင့် ရုပ်ဆင်းရူပကာ အလွန် လှပသော မိန်းကလေးတစ်ဦး ဖြစ်လေသည်။

'အလိုလေး၊ ဟို ကောင်မလေးကတောင် ယွမ်တန်ဘုံ သတ္တမ အလွှာ အထွတ်အထိပ်မှာ ရှိနေတာပဲ။' မရေမတွက်နိုင်သော ပညာရှင်များ တုန်လှုပ်သွားကြသည်။

“ဝူး.. ဝူး…”

လင်ရှောင်ရှောင် ခုန်ပျံဝင်လာသည်နှင့်၊ ကျီးရှင်းဂိုဏ်း၏ တောင်ခြေမှ စစ်သည် ရာပေါင်းများစွာသည် လျင်မြန်စွာ လှုပ်ရှားလာကြသည်။ သူတို့သည် လျင်မြန်ဖျတ်လတ်သော မျောက်အုပ်ကြီး တစ်အုပ်ကဲ့သို့၊ အံ့အားသင့်ဖွယ် အမြန်နှုန်း ရှိ၏။

ခဏလေးအတွင်းမှာပင်၊ စစ်သည် ရာပေါင်းများစွာသည် ကျီးရှင်းဂိုဏ်း ရင်ပြင်၏ အရပ်မျက်နှာ အသီးသီးမှ ပေါ်ထွက်လာကြသည်။

သွေးဆာသော သတ်ဖြတ်လိုသည့် အရှိန်အဝါတစ်ခု တဟုန်ထိုး ပေါက်ကွဲလာပြီး ရင်ပြင် တစ်ခုလုံးကို ဖုံးလွှမ်းသွားသည်။

"တစ်ယောက်မှ အရှင်မထားနဲ့။ သတ်။" ဖုန်းဝူချန်သည် မလိုအပ်သော စကားတစ်ခွန်းမျှ မဆိုဘဲ အေးစက်စွာ အမိန့်ပေးလိုက်သည်။

"အညှာအတာမရှိ သတ်ဖြတ်ကြ။"

ဟွမ်ယန်နှင့် ခွမ်းထူတို့သည် အလျှံငြီးငြီး လူသတ် အရှိန်အဝါများ ပေါက်ကွဲထွက်လာလျက် အော်ဟစ်လိုက်ကြသည်။

"သတ်ကြ.. ။"

စစ်သည်များသည် ချက်ချင်းပင် ဟိန်းဟောက် အော်ဟစ်လိုက်ကြပြီး၊ ကြောက်မက်ဖွယ် သတ်ဖြတ်လိုစိတ်များ ကောင်းကင်သို့ အစီအရီ ထိုးတက်သွားသည်။ ရှေ့သို့ တိုးဝင်သွားကြပြီး၊ အားကောင်းသော စွမ်းအားလှိုင်းများကို ထုတ်လွှတ်လိုက်ကြသည်။

"ပြန်တိုက်ကြ"

အကြီးအကဲ တစ်ဦးက ဒေါသတကြီး ဟိန်းဟောက်လိုက်သည်။ သူတို့တွင် ဆုတ်ခွာရန် လမ်းမရှိတော့ဘဲ သေသည်အထိ တိုက်ခိုက်ရန်သာ ရှိတော့သည်။

ကျီးရှင်းဂိုဏ်း၏ အထက်ပိုင်း လူကြီးများနှင့် တပည့်များသည် ထွက်ပြေးရန် ဖြစ်နိုင်ပါက စောစောကတည်းက ထွက်ပြေးသွားကြပြီး ဖြစ်ပေမည်။ အဘယ်ကြောင့် နေရစ်ခဲ့ကြမည်နည်း။

သို့သော်၊ ကျီးရှင်းဂိုဏ်း၏ ဂုဏ်သိက္ခာနှင့် သူတို့၏ ကိုယ်ပိုင် ဂုဏ်သိက္ခာအတွက်၊ သူတို့သည် သူရဲဘောကြောင်သူ ဟူသော အမည်းစက်ကို အတင်ခံရမည့်အစား တိုက်ပွဲဝင်ရင်း သေဆုံးသွားရန်ကိုသာ ရွေးချယ်လိုက်ကြသည်။

"ဝီ...ဝီ.."

"ရွှတ်...ရွှတ်..ရွှတ်.."

ကောင်းကင်အရိပ် မြင်းသည်တော်တပ်ဖွဲ့နှင့် အလံနက်တပ်မတော်တို့သည် လျှပ်တပြက် နေရာရွှေ့ပြောင်းသိုင်းကွက်များကို အသုံးပြုကာ၊ ကျီးရှင်းဂိုဏ်း တပည့် ထောင်ပေါင်းများစွာကို အရူးအမူး သတ်ဖြတ်နေကြသည်။

သူတို့၏ အရှိန်မှာ ကြောက်မက်ဖွယ် ကောင်းလှသည်။ သူတို့ ဖြတ်သန်းသွားရာ နေရာတိုင်းတွင် ဂိုဏ်းသားများ အစုလိုက် အပြုံလိုက် သေဆုံးသွားကြလေသည်။

ယန်ဟော်အင်ပါယာ၏ အလံနက်တပ်မတော်နှင့် ကောင်းကင်အရိပ် မြင်းသည်တော်တပ်ဖွဲ့တို့၏ ရူးသွပ်သော သတ်ဖြတ်မှုများကြောင့် ကြည့်ရှုနေကြသော ပညာရှင်များအားလုံး အလွန်အမင်း ကြောက်ရွံ့ထိတ်လန့်သွားကြပြီး၊ စကားတစ်ခွန်းမျှ မဆိုနိုင်ကြတော့ပေ။

'ဒါက ယန်ဟော်အင်ပါယာရဲ့ ထိပ်တန်း စစ်သည်တွေလား။ သူတို့ ဘယ်လို လှုပ်ရှားမှု သိုင်းကွက်မျိုး လေ့ကျင့်ထားကြတာလဲ။'

'ဒါ ဘယ်လို ဖြစ်နိုင်မှာလဲ သူတို့ရဲ့ စွမ်းအားက အရမ်း ကြောက်ဖို့ကောင်းတာပဲ။'

များပြားလှသော ပညာရှင်များ မဆိုထားနှင့်၊ ဧကရာဇ်များနှင့် နိုင်ငံအသီးသီးမှ အင်အားစုများ၏ ခေါင်းဆောင်များပင်လျှင် သူတို့၏ မျက်နှာများတွင် တုန်လှုပ်မှုနှင့် ထိတ်လန့်မှုများဖြင့် ပြည့်နှက်နေသည်။

ယန်ဟော်အင်ပါယာ၏ ထိပ်တန်း စစ်သည်များ ဤမျှ ကြောက်မက်ဖွယ် ကောင်းလိမ့်မည်ဟု သူတို့ တစ်ခါမျှ မသိခဲ့ကြပေ။

ကျီးရှင်းဂိုဏ်း တပည့် ထောင်ပေါင်းများစွာသည် မှော်ဆန်သော အရှိန်အဟုန်ဖြင့် သေဆုံးနေကြသည်။ ယွမ်တန်ဘုံ စတုတ္ထလွှာ သို့မဟုတ် ပဉ္စမလွှာရှိ တပည့်များပင်လျှင် ချီဟွမ်နှင့် အခြားသူများကို မယှဉ်နိုင်ဘဲ လွယ်ကူစွာပင် ကြေမွသွားကြသည်။

'ကောင်းကင်အရိပ် မြင်းသည်တော်တပ်ဖွဲ့နဲ့ အလံနက်တပ်မတော်က ဘယ်တုန်းက ဒီလောက် ကြောက်ဖို့ကောင်းသွားတာလဲ။' လျှို့ဝှက်နေရာမှ လေကျန့်ဖုန်းသည် ကျီးရှင်းဂိုဏ်းကို အံ့အားသင့်စွာ ကြည့်ရင်း သူ၏ မျက်နှာမှာ မယုံနိုင်မှုများဖြင့် ပြည့်နှက်နေသည်။

'သူတို့က တစ္ဆေတွေ ကျနေတာပဲ၊ ပေါ်လာလိုက် ပျောက်သွားလိုက်နဲ့ ဘယ်လိုမှ ကြိုတင်ခန့်မှန်းလို့ မရဘူး။' ထျန်းဝူ ဧကရာဇ်နှင့် လော့ယွင် ဧကရာဇ် နှစ်ဦးစလုံး ကြောက်လန့်၍ ချွေးစေးများပင် ပြန်လာကြသည်။