ဒုတိယအုပ်စုစစ်ပွဲတိုက်ပွဲစစ်ဆင်ရေး

အုပ်စုစစ်ပွဲမှာ အရင်အတိုင်းပင် ပြင်းထန်ပြီး ပရမ်းပတာ ဖြစ်နေခဲ့သည်။ ရက်စက် ကြမ်းကြုတ်မှုမှာ ထိတ်လန့်ဖွယ်ပင် ကောင်းလှ၏။ ပက်ထရစ်စတား အဝေးမှ ကြည့်ရှုနေစဉ် သူ၏ မျက်လုံးများတွင် မျက်ရည်များ ဝဲလာပြီး ထာဝရတိုင်းပြည်မှ စစ်သည်တော်များ၏ သူရဲကောင်းဆန်သော လုပ်ရပ်များကို ရေးမှတ် နေခဲ့သည်။ ဤတိုက်ပွဲမှာ ရလဒ်မှာ မည်သို့ပင် ဖြစ်စေ သမိုင်းစာအုပ်များ၏ မှတ်တမ်းများတွင် မှတ်တမ်း တင်ခြင်း ခံရမည်ကို သူ သေချာ နေခဲ့သည်။ ထာဝရတိုင်းပြည်မှ စစ်သည်တော်များကို မြေအောက်လောက နေထိုင်သူများ၏ နှလုံးသားများထဲတွင် သူရဲကောင်းများအဖြစ် သတိရ နေကြ ပေလိမ့်မည်။

ဂိမ်းမာများတွင်တော့ ထိုသို့သော အတွေးများ မရှိနေကြပေ။ သူတို့က ရန်သူကို မည်သို့ အနိုင်ယူပြီး အမှောင်ဝင်ပေါက်ကို ထိန်းချုပ်မှု ရယူ ရမည်ကိုသာ စဉ်းစား နေခဲ့ကြသည်။

ဖြစ်နိုင်ပါက သူတို့ ပိုမို ကောင်းမွန်ပြီး ပိုမို များပြားသော ပစ္စည်း ကိရိယာများ အတွက် လုယက်လိုကြသည်။

ကင်းစခန်း၏ နယ်နိမိတ်တွင် ဗစ်တိုးရီးယား မြို့သားများ နည်းပါး နေခဲ့သည်။ ပြင်းထန်သော တိုက်ပွဲများ ဆက်တိုက်ဆိုသလို ဖြစ်ပွားပြီးနောက်တွင်မူ ထာဝရတိုင်းပြည်မှ စစ်သည်တော်များက ရန်သူကို အနိုင်ယူပြီး ဗစ်တိုးရီးယားမြို့သား အားလုံးကို ပြန်လည် ရှင်သန်ရေး နေရာသို့ ပြန်လည် ပို့ဆောင်နိုင်ခဲ့သည်။ အသက်ရှင် ကျန်ရစ်သော ဗစ်တိုးရီးယား မြို့သားများမှာမူ အမှောင်ဝင်ပေါက်ဆီသို့ ဆုတ်ခွာ ထွက်ပြေးခဲ့ကြသည်။ ထာဝရတိုင်းပြည်မှ စစ်သည်တော်များမှာ အသက်ရှင် ကျန်ရစ်သူများနောက် မလိုက်ခဲ့ကြပေ။ အကြောင်းမှာ သူတို့၌ မြေလျှောက်ငှက် အလုံအလောက် မရှိသောကြောင့်ပင်။ ဒုတိယအချက်မှာ သူတို့က ဗစ်တိုးရီးယား မြို့သားများ ထောင်ချောက် ဆင်ထားမည်ကို သတိထား နေရသောကြောင့်ပင်။

မည်သို့ ပင်ဖြစ်စေ သူတို့ ကင်းစခန်း အပြင်ဘက်ရှိ ဗစ်တိုးရီးယား မြို့သားများကို အနိုင်ယူခြင်းဟူသော သူတို့၏ ပထမရည်မှန်းချက်ကိုတော့ အောင်မြင် ခဲ့လေပြီ။ နောက်တစ်ဆင့်တွင်တော့ သူတို့က ဗစ်တိုးရီးယား မြို့သားများ သူတို့၏ နောက်ကျောဘက်ကို ဝင်တိုက်ခိုက်ခြင်းကို ကာကွယ်ရန် ကင်းစခန်းကို ထိုးစစ် တစ်ခု ဆင်နွှဲ ရပေမည်။

ပထမ အုပ်စုစစ်ပွဲ တိုက်ပွဲစစ်ဆင်ရေး ကဲ့သို့ပင် ကင်းစခန်းရှိ တိုက်ပွဲမှာလည်း အလွန် ရက်စက် ကြမ်းကြုတ် ပေလိမ့်မည်။

...

ကျောက်တုံးကြီးများ ကောင်းကင်မှ ကျဆင်းလာပြီး ကင်းစခန်း၏ ရိုးစင်းသော ကာကွယ်ရေး တံတိုင်း များ ပေါ်သို့ ထိမှန်ခဲ့သည်။ အော့ခ်မှော်ဆရာ တစ်ဦးက သူ၏ မှော်တောင်ဝှေးကို မြှောက်ကာ ကျယ်လောင်စွာ မန္တန်ရွတ်ဖတ် နေခဲ့သည်။ လူသားမြင်းစီးသူရဲ တစ်ဦးက မှော်ဆရာဆီသို့ ပြေးဝင် တိုက်ခိုက် ခဲ့သော်လည်း အော့ခ်အစောင့်များ၏ တားဆီးခြင်း ခံခဲ့ရသည်။

ဧရိယာ အကျိုးသက်ရောက်မှု မန္တန်များ သုံးနိုင်သော ဂိမ်းမာများမှာ ဤတိုက်ခိုက်ရေးတွင် ခေါ်ယူခြင်း ခံခဲ့ရသည်။

တိုက်ပွဲစစ်ဆင်ရေးမှာလည်း အဆုံးသတ်လု နီးပါး ဖြစ်နေလေပြီ။ ဂိမ်းမာများ တည်ဆောက်ခဲ့သော ကာကွယ်ရေး တံတိုင်း များမှာမူ ပြင်းထန်သော ရိုက်ချက်များ အပြီးတွင် မမှတ်မိ နိုင်လောက်အောင် ပျက်စီး နေခဲ့သည်။

အမျိုးမျိုးသော ဧရာမ စစ်လက်နက်ပစ္စည်း ကိရိယာများကို ကာကွယ်ရေး တံတိုင်း များတွင် တပ်ဆင် ထားခဲ့ကြသည်။ ယင်းယန္တရားတို့ကို ဗစ်တိုးရီးယား မြို့သားများက တတ်နိုင်သမျှ ထိခိုက်သေဆုံးမှုများ ပေးနိုင်ရန် ဖြန့်ကျက် ထားခဲ့ကြသည်။ ဗစ်တိုးရီးယား မြို့သားများမှာ ကင်းစခန်းတွင် အရေအတွက် နည်းပါးသောကြောင့် သူတို့ အသာစီး ရရှိနိုင်ရန် ယန္တရားများအပေါ် မှီခိုနေရသည်။ ဗစ်တိုးရီးယားမြို့သား အများစုမှာတော့ ထာဝရတိုင်းပြည်မှ ကျူးကျော်လာသော စစ်သည်တော်များ အပေါ် သူတို့၏ ကာကွယ်ရေး အင်အားစုများကို ပေါင်းစည်းရန် အမှောင်ဝင်ပေါက်တွင် စုစည်းနေခဲ့ကြသည်။

ဗစ်တိုးရီးယား မြို့သားများ အတွက်မူ စစ်ပွဲမှာ ယခုမှသာ စတင်ခဲ့ခြင်း ဖြစ်၏။

...

"မင်းတို့ အနားမယူကြဘူးလား။"

လမ်းဆုံလမ်းခွ ကင်းစခန်း၏ အပျက်အစီးများ ကြားထဲတွင် ပက်ထရစ်စတားက ထာဝရတိုင်းပြည်မှ စစ်သည်တော်များ သူတို့၏ ယခင်တိုက်ပွဲကို တိုက်ခိုက် ပြီးနောက် နောက်တစ်ကြိမ် ထပ်မံစုရုံးနေသည်ကို တွေ့ရှိ ခဲ့သည်။ စစ်သည်တော် အနည်းငယ်သာလျှင် မြေပြင်ပေါ်မှ ပစ္စည်း ကိရိယာများကို သိမ်းယူ နေခဲ့ကြသည်။

ပက်ထရစ်စတားမှာ စစ်သည်တော်များ ဤသို့သော ပြင်းထန်သော တိုက်ပွဲအပြီးတွင် ခဏတဖြုတ် အနားယူ ကြလိမ့်မည်ဟု ထင်ခဲ့သည်။ သူက သူတို့၏ ပစ်မှတ်မှာ အမှောင်ဝင်ပေါက် ဖြစ်ကြောင်း သိရှိသော်လည်း သူတို့က မည်သည့် အနားယူမှုမျှ မရှိဘဲ ပြန်ထွက်ခွာသွားမည်ဟု မမျှော်လင့် ထားပေ။ ပက်ထရစ်စတားက သူ၏ လက်ကို ယခုလေးတင် ဆုံးရှုံးခဲ့ရသော အော့ခ် တစ်ဦးကို လှမ်းမေးလိုက်သည်။ ထိုအော့ခ်မှာ အံ့ဩသွားခဲ့ပုံ ရသော်လည်း သူက ဖြောင့်မတ်စွာ ပြန်ဖြေသည်။ "ဒါက မြေအောက်လောကရဲ့ ငြိမ်းချမ်းရေး အတွက်ပဲ။ ထာဝရတိုင်းပြည် အတွက်။ အရှင်ရှားလော့ခ် အတွက်။"

ထို့နောက် ထိုဂိမ်းမာ သူ၏ ရဲဘော်အား တိုးတိုးလေး ကပ်ပြောလိုက်သည်။ "ဒါက ရယ်စရာ ကြီး။ ဒီစွဲလမ်းစရာဂိမ်းက ငါ့ကို ဒီလောက် ရှက်စရာ ကောင်းတဲ့ စကားမျိုး အော်ပြောခိုင်းတယ်။"

ပက်ထရစ်စတားမှာတော့ ထိုဂိမ်းမာ၏ တိုးညင်းသော ရေရွတ်သံကို မကြားခဲ့ပေ။ သူက စစ်သည်တော်များ၏ ရဲရင့်မှုကို ချီးကျူးခဲ့သည်။ ထိုသို့သော ကြမ်းတမ်းသော အခြေအနေများ အောက်တွင်ပင် ထိုဒုက္ခိတ စစ်သည်တော်မှာ ထရပ်ကာ သူ၏ တိုက်ပွဲကို ဆက်လက် ဆင်နွှဲသေးသည်။ သာမန် အခြေအနေများတွင်မူ ထိုဒုက္ခိတ စစ်သည်တော်ကို နောက်တန်းသို့ ရွှေ့ပြောင်းပေးပြီး သင့်တော်သော အနားယူမှုနှင့် ကုသမှု ပေးအပ်ခြင်း ခံရ ပေလိမ့်မည်။

သို့သော် ထိုဒုက္ခိတ အော့ခ်မှာ ပြုံးပြုံးရွှင်ရွှင်ဖြင့် သူ၏ ရဲဘော်များနှင့် စကားပြောဆို နေစဉ် သူ၏ ပတ်တီးစည်းထားသော လက်မှာတော့ သွေးများ တစက်စက် ယိုစီးကျ နေခဲ့သည်။ သူ၏ အစိမ်းရောင်မျက်နှာမှာ အလွန် ဖျော့တော့နေပြီး သွေးမရှိတော့ဟန် ရသော်လည်း သူ့တွင် အင်အားအပြည့် ရှိနေခဲ့၏။ ထိုရဲရင့်သော စစ်သည်တော်ကို မည်သည့် စွမ်းအားက အသက်ဆက် ရှင်နေစေသည်ကို မည်သူမျှ မသိပေ။

ပက်ထရစ်စတား၏ မျက်လုံးများတွင် မျက်ရည်များ နောက်တစ်ကြိမ် ဝဲ လာခဲ့သည်။ ဤစစ်သည်တော်များကြောင့် သူ စိတ်လှုပ်ရှား ခဲ့ရသည်မှာ ဒါက ပထမဆုံး အကြိမ် မဟုတ် ခဲ့သော်လည်း ဤတစ်ကြိမ်တွင်တော့ သူ အလွန်အမင်း စိတ်ထိခိုက်ခဲ့ရသည်။

ပက်ထရစ်စတား သူ၏ မျက်ရည်များကို သုတ်ပစ်ရင်း ထိုစစ်သည်တော် သူ၏ စစ်ကြောင်းကို အမီလိုက်နေစဉ် သူ၏ နောက်မှ သွေးလမ်းကြောင်း တစ်ခု စီးကျနေသည်ကို ကြည့်နေသည်။ သူက လေးလံသော နှလုံးသားဖြင့် သူ၏ မှတ်တမ်းစာအုပ်တွင် ထိုအကြောင်းအရာကို ထည့်ရေးသားခဲ့သည်။ သူက ထိုအော့ခ်၏ အမည်ကို မသိသလို သူ တိုက်ပွဲကို ရှင်သန်နိုင်၊ မရှင်သန်နိုင်ကိုလည်း မသိပေ။ သို့သော် ထိုဒုက္ခိတအော့ခ်၏ ပုံရိပ်မှာမူ မြေအောက်လောက၏ သမိုင်းတွင် အမှတ်ရ ခံရ ပေလိမ့်မည်။ ထိုသူမှာ မြေအောက်လောက နေထိုင်သူများ အတွက် စံပြပုဂ္ဂိုလ် တစ်ဦး ဖြစ်၏။

...

ရွှေရောင် ဆံပင်ပိုင်ရှင် ဂျော့ခ်ျက သူ၏ မြင်းကို စီးကာ ဗစ်တိုးရီးယား မြို့သားများနောက်မှ လိုက်၍ သစ်တောထဲမှ ပြန်ထွက်ခွာခဲ့သည်။ သူ၏ နောက်တွင်မူ နတ်ဘုရား တိုင်းပြည်၏ အဆုံး မရှိသော စစ်တပ် ရှိနေခဲ့၏။

ဗိုလ်ချုပ်ရှီဒန်က ဗစ်တိုးရီးယား မြို့သားများကို ကူညီရန် သူ၏ စစ်တပ်ကို စေလွှတ်ရန် ချီတုံချတုံ ဖြစ်နေ ခဲ့သော်လည်း သူက ဘုရင်အာလူး ၂၏ အမိန့်အတိုင်း ဗစ်တိုးရီးယား မြို့သားများကို အင်အားဖြည့်တင်းပေးပြီး အမှောင်ဝင်ပေါက်ကို ကာကွယ်ရန် အမိန့်လိုက်နာ ရမည်။

"ဆာဂျော့ခ်ျ၊ အရှင် လမ်းသိလား။ ကျွန်တော်တော့ ဘာအမှောင်ဝင်ပေါက်မှ မမြင်ရပါဘူး။" ဗိုလ်ချုပ် တစ်ဦးက ဂျော့ခ်ျအား လှမ်းမေးလိုက်စဉ် သူက ထူးဆန်းသော ပတ်ဝန်းကျင်ရှိ ကျောက်တုံးများကို စူးစမ်းလေ့လာ နေခဲ့သည်။

သူ၏ ရှေ့တွင်မူ မို့မောက်နေသော တောင်ကုန်းများ ရှိနေခဲ့၏။ ထိုသို့သော မြေမျက်နှာသွင်ပြင် နေရာတွင် ကြီးမားသော အမှောင်ဝင်ပေါက် တစ်ခု မည်သို့ ရှိနေနိုင်မည်နည်း။

သူ အမှောင်ဝင်ပေါက်ကို မမြင်ဖူး ခဲ့သော်လည်း ၎င်းမှာ ကြီးမားပြီး ခန့်ညား ထည်ဝါသော အဆောက်အအုံ တစ်ခု ပုံစံလိုမျိုး ဖြစ်ရမည်ဟု သူ စိတ်ကူးနေခဲ့သည်။

သူ အမှောင်ဝင်ပေါက် ထိုသို့သော မြေမျက်နှာသွင်ပြင်တွင် တည်ရှိနေမည်ကို စိတ်ကူးမယဉ်နိုင်ပေ။ ဂျော့ခ်ျနှင့် ဗစ်တိုးရီးယား မြို့သားများမှာမူ သေချာ နေခဲ့ကြသည်။ မြို့စားပေါက်စီပင်လျှင် ခေါင်းညိတ်ကာ ပြောလိုက်သည်။ "ဆာဂျော့ခ်ျနဲ့ ကျွန်တော် အရင်က မြေအောက်လောက,ကို ရောက်ဖူးပါတယ်။ ကျွန်တော်တို့ ဒါက အမှောင်ဝင်ပေါက်ဆီကို သွားတဲ့ လမ်းဆိုတာ သေချာတယ်။"

တခြား လူများမှာမူ သူတို့က ဂူတစ်ခု အတွင်းထဲရှိ အမှောင်ဝင်ပေါက်ကို ကိုယ်တိုင်ကိုယ်ကျ မမြင်တွေ့ခင်အထိ သံသယ ရှိနေဆဲပင်။