ပစ်မှတ်: ရွှေရောင် ဆံပင်ပိုင်ရှင် ဂျော့ခ်ျ

ဗစ်တိုးရီးယား မြို့သားများ ဂိုးလ်ရှိုင်းယားမြို့မှ ရွှေရောင် ဆံပင်ပိုင်ရှင် ဂျော့ခ်ျ နှင့်အတူ ထွက်ခွာကာ ဗစ်တိုးရီးယားမြို့ဆီသို့ ခရီးဆက် ခဲ့ကြသည်။

သူတို့ ခရီးသွားနေစဉ် ဖိုးဉာဏ်ကျယ်မှာတော့ စီနီယာ ဗိုလ်ကြီး ချယ်ရီ၊ ပက်ထရစ်စတားနှင့် ထာဝရတိုင်းပြည်မှ ဂိမ်းမာများကို လမ်းဆုံလမ်းခွ ကင်းစခန်းသို့ ခေါ်သွားခဲ့သည်။

ကင်းစခန်းတွင် တိုက်ပွဲများ ဖြစ်ပွား နေခဲ့သည်။ သို့သော် ၎င်းမှာ ဂိမ်းမာများ၏ အုပ်စုနှစ်စု အချင်းချင်း ဆန့်ကျင် နေသောကြောင့်သာ မဟုတ်ပေ။ သူတို့က ဒုတိယ အုပ်စုစစ်ပွဲကို ဖြစ်ပေါ် စေလိုခဲ့ကြသည်။ အထူးသဖြင့် ထာဝရတိုင်းပြည်မှ ဂိမ်းမာများမှာ သူတို့၏ မစ်ရှင်များ ပြီးမြောက်ပြီးနောက် ရလာမည့် ဆုများကို ဗစ်တိုးရီးယား မြို့သားများအား ခွဲပေးရခြင်းအား မလိုလားခဲ့ကြပေ။ ထို့အပြင် ထာဝရတိုင်းပြည်မှ ဂိမ်းမာများမှာလည်း ဗစ်တိုးရီးယားမြို့မှ ဂိမ်းမာများထက် ပိုအားကောင်း နေသင့်သည် မဟုတ်ပါလား။

ဆောင်းတောင်ကုန်းမြို့နှင့် နတ်ဘုရား တိုင်းပြည် အတွက်မူ ၎င်းမှာ မြေပေါ်ကမ္ဘာနှင့် မြေအောက်လောက ပါဝင်သော စစ်ပွဲ တစ်ခု ဖြစ်၏။ ၎င်းမှာ သမိုင်းကို ပြန်လည် ရေးသားနိုင်သော ကြီးကျယ်သော စစ်ပွဲ တစ်ခု ဖြစ်နိုင်ပေသည်။ သူတို့က ဆန့်ကျင်ဘက် အုပ်စုကို ကျူးကျော်သူများ အဖြစ်သာ ယူဆကြသည်။

စီနီယာ ဗိုလ်ကြီး ချယ်ရီနှင့် ပက်ထရစ်စတားတို့က ဖိုးဉာဏ်ကျယ်နှင့် ထာဝရတိုင်းပြည်မှ ဂိမ်းမာများ နောက်သို့ လိုက်ပါကာ မြေပေါ်ကမ္ဘာနှင့် မြေအောက်လောက လူမျိုးစုများ ငြိမ်းချမ်းစွာ အတူတကွ တည်ရှိနိုင်သော ကင်းစခန်းသို့ ရောက်သွားခဲ့ကြသည်။

"ဒါက အရှင် ရှားလော့ခ် ထွက်ခွာမသွားခင် တည်ဆောက်ခဲ့တဲ့ ကင်းစခန်းပဲ။ ဒါကို သတ္တုတူးဖော်ရေးနဲ့ စက်ရုံထုတ်လုပ်ရေး အတွက် အသုံးပြုဖို့ ရည်ရွယ်ခဲ့တာ။ ဒီအနီးအနားမှာ မြေပေါ်ကမ္ဘာနဲ့ ချိတ်ဆက်ထားတဲ့ နေရာရွှေ့ပြောင်း ဝင်ပေါက် ရှိနေတယ်။ ဗစ်တိုးရီးယားမြို့က မွန်းစတားတွေက နေရာရွှေ့ပြောင်း ဝင်ပေါက်ကနေ တစ်ဆင့် မြေအောက်လောက,ကို ရောက်လာခဲ့ကြတာ။ အရှင်ရှားလော့ခ်က ငါတို့ကို ဒီကင်းစခန်းကို စောင့်ကြပ်ပြီး မြေပေါ်ကမ္ဘာက အဲ့ဒီ မွန်းစတားတွေ မြေအောက်လောက,ကို ကျူးကျော်လာတာကို ကာကွယ်ဖို့ အမိန့်ပေး ခဲ့တယ်။"

ဖိုးဉာဏ်ကျယ် စကားပြောဆို နေစဉ်မှာပင် လူသားများ၊ အက်လ်ဖ်များနှင့် ဖယ်ရီ အဖွဲ့တစ်ဖွဲ့ ကင်းစခန်းမှ မောက်မာစွာ ထွက်လာပြီး အချင်းချင်း အော်ဟစ် နေခဲ့ကြသည်။

စီနီယာ ဗိုလ်ကြီး ချယ်ရီနှင့် ပက်ထရစ်စတားတို့မှာတော့ ဤမြေပေါ်ကမ္ဘာမှ မွန်းစတားများ၏ ဘာသာစကားကို နားမလည် ခဲ့ကြပေ။ သူတို့၏ အသံများနှင့် အကြည့်များမှာ ကြောက်မက်ဖွယ် ကောင်းလှ၏။ စီနီယာ ဗိုလ်ကြီး ချယ်ရီမှာ သူတို့က သူ့ကို မည်သို့ စားသောက်ရမည်ကို ဆွေးနွေး နေကြသည်ဟုပင် ခံစားခဲ့ရသည်။

ဖိုးဉာဏ်ကျယ်မှာတော့ စိုးရိမ်နေခြင်း မရှိခဲ့ပေ။ သူက ထိုအရာနှင့် အကျွမ်းတဝင် ရှိနေခဲ့သည်။ သူ ချယ်ရီ၏ ကြောက်ရွံ့နေမှုကို သတိပြု မိသောအခါ ပြောလိုက်သည်။ "ငါတို့ ရန်သူတွေကို ကင်းစခန်းကနေ ထွက်ခွာတာကို တားဆီးလို့ မရဘူး။ စိတ်မပူနဲ့၊ ငါတို့ နယ်နိမိတ်မှာ အားကောင်းတဲ့ ကာကွယ်ရေးတပ်တွေ ဖြန့်ကျက်ထားပါတယ်။"

ကင်းစခန်းမှ ထွက်ခွာသွားသော မြေပေါ်ကမ္ဘာမှ မွန်းစတားများမှာ ချောင်းမြောင်း တိုက်ခိုက်နေသော အော့ခ်များနှင့် ပက်ပင်း တိုးမိခဲ့ကြသည်။

"သောက်ကျိုးနည်းပဲ။ မင်းတို့ နောက်ဆုံးတော့ ငါတို့ကို တိုက်ခိုက် ရဲပြီပေါ့။ မင်းတို့ တစ်သက်လုံး ပုန်းနေကြမယ်လို့ ငါ ထင်ခဲ့တာ။"

"ဘရားသား၊ တိုက်ခိုက်ကြစို့။ သူတို့က ငါ့ ပစ္စည်း ကိရိယာတွေကို လုယက်ခဲ့တဲ့ ကောင်တွေပဲ။"

"သူတို့ကို သတ်ပစ်လိုက်ပါ။ တိုက်ခိုက်ကြ။"

အော့ခ်များနှင့် ဂနိုမ်းများက ဗစ်တိုးရီးယား မြို့သားများဆီသို့ ရမ်းကားစွာ ပြေးဝင် တိုက်ခိုက်ခဲ့ကြပြီး သွေးထွက်သံယို တိုက်ပွဲ တစ်ခု ဖြစ်ပွားခဲ့သည်။ တိုက်ခိုက်သူ များများစားစား မရှိခဲ့သော်လည်း တိုက်ပွဲမှာ တခြား မည်သည့် တိုက်ပွဲထက်မဆို ပိုမို ကြမ်းတမ်းပြီး ကြောက်မက်ဖွယ် ကောင်းလှ၏။

စစ်ပွဲအတွေ့အကြုံ ရှိသော စီနီယာ ဗိုလ်ကြီး ချယ်ရီပင်လျှင် ထိုကြောက်မက်ဖွယ် တိုက်ပွဲ မြင်ကွင်းကြောင့် ထိတ်လန့် သွားခဲ့ရသည်။

ထိုသို့သော ကြောက်မက်ဖွယ် တိုက်ပွဲများ ကင်းစခန်းတွင် မကြာခဏ ဖြစ်ပွားနေခဲ့သလော။ သူ ထာဝရတိုင်းပြည်မှ စစ်သည်တော်များ အပေါ် မလေးစားဘဲ မနေနိုင်ပေ။ ဤရဲရင့်သော စစ်သည်တော်များက သူတို့၏ အသက်များဖြင့် မြေအောက်လောက၏ လုံခြုံရေးကို ကာကွယ်ပေး နေခဲ့ကြသည်။

ချယ်ရီ စိတ်လှုပ်ရှား နေခဲ့သော်လည်း သူ ထိုအရာကို ထုတ်ဖော် မပြသခဲ့ပေ။

"အရှင်ဖိုးဉာဏ်ကျယ်၊ မြေအောက်လောက,ကို ဘေးကင်း လုံခြုံအောင် ထိန်းသိမ်းရာမှာ အရှင့်ရဲ့ ပံ့ပိုးကူညီမှုတွေ အတွက် ကျွန်တော်တို့ ကျေးဇူးတင်ပါတယ်၊ ပြီးတော့ အရှင်ရှားလော့ခ် လုပ်ဆောင်ခဲ့တဲ့ အရာတွေ အတွက်လည်း စိတ်လှုပ်ရှား မိပါတယ်။ ဒါပေမဲ့ ဒါက အကောင်းဆုံး ဖြေရှင်းချက်တော့ မဟုတ်ပါဘူး။ ကျွန်တော်တို့ နေရာရွှေ့ပြောင်း ဝင်ပေါက်ကို ချိတ်ပိတ်ဖို့ အတူတကွ လက်တွဲ လုပ်ဆောင် ရပါမယ်။ ဒါကသာ မြေပေါ်ကမ္ဘာက မွန်းစတားတွေ ထွက်ပေါ်လာတာကို တားဆီးနိုင်ပါလိမ့်မယ်။"

ချယ်ရီ စကားပြောဆို နေစဉ် အနီးအနားမှ လူသားများက ကြည့်ရှုရန် ရောက်ရှိလာ ခဲ့ကြသည်။ ချယ်ရီမှာ လူသားများက သူ့စကားကို နားမလည်ကြောင်း သိထားသော်လည်း သူ သူတို့ကို လှမ်းမကြည့်ဘဲ မနေနိုင်ခဲ့ပေ။ အကယ်၍ လူသားများသာ သူ့ စကားကို နားလည်ခဲ့ပါက သူ့ အပေါ် လက်တုံ့ပြန်မည်ကို ကြောက်ရွံ့ နေခဲ့သည်။

"ငါတို့လည်း အဲ့လိုပဲ ထင်ခဲ့တာ၊ ဒါပေမဲ့ လက်တွေ့က ငါတို့ကို အဲ့လို လုပ်ခွင့် မပေးထားဘူး။ အရှင်ရှားလော့ခ်က ဒီဆုံးဖြတ်ချက်ကို အများကြီး စဉ်းစားပြီးမှ ချမှတ်ခဲ့တာ။ ကင်းစခန်းကို စောင့်ကြပ်နေခြင်း အားဖြင့်သာ မွန်းစတားတွေကို တားဆီး ထားနိုင်လိမ့်မယ်။ ဒါက မြေအောက်လောကရဲ့ ငြိမ်းချမ်းရေးနဲ့ လုံခြုံရေးကို အာမခံ ပေးပါလိမ့်မယ်။ ကုန်သည် မဟာမိတ် အဖွဲ့က ပစ္စည်း အထောက်အပံ့ပေးဖို့ ဆန္ဒရှိရင် ငါတို့ဘက်က ဝမ်းမြောက်ဝမ်းသာ လက်ခံပါ့မယ်။" ဖိုးဉာဏ်ကျယ် ရှင်းပြ လိုက်သည်။

ပက်ထရစ်စတားက သတင်း အချက်အလက်များကို မှတ်တမ်း တင်နေရင်း ဖိုးဉာဏ်ကျယ်အား ပြောလိုက်သည်။ "အရှင်ဖိုးဉာဏ်ကျယ်၊ ကျွန်တော် တောင်းဆိုချက် တစ်ခု ပြုလုပ်လို့ ရမလား။ ကျွန်တော် မြေပေါ်ကမ္ဘာရဲ့ ကျူးကျော်မှု သတင်းကို သတင်းပို့ပြီးနောက် စာဖတ်သူတွေက ဒီကိစ္စရပ်အပေါ် အရမ်း စိုးရိမ် လာကြပါတယ်။ စာဖတ်သူ များစွာက မြေပေါ်ကမ္ဘာနဲ့ ချိတ်ဆက်ထားတဲ့ နေရာရွှေ့ပြောင်း ဝင်ပေါက်အကြောင်း မေးမြန်းဖို့ သတင်းစာတိုက်ကို စာပို့ခဲ့ကြပါတယ်။ ကျွန်တော့်ရဲ့ ဒီတောင်းဆိုချက်က မသင့်တော်ဘူးဆိုတာတော့ သိပါတယ်၊ ဒါပေမဲ့ ကျွန်တော် နေရာရွှေ့ပြောင်း ဝင်ပေါက်ကို ခဏလောက် ကြည့်ရှုလို့ ရမလား။ ကျွန်တော်တို့ အခြေအနေ ဘယ်လောက် ဆိုးရွားလဲ ဆိုတာ မြင်ချင်ပါတယ်။"

"ဟုတ်ပါတယ်။"

စီနီယာ ဗိုလ်ကြီး ချယ်ရီလည်း သဘောတူညီစွာ ခေါင်းညိတ် လိုက်သည်။ သူတို့ နှစ်ဦးလုံးက ဖိုးဉာဏ်ကျယ် သူတို့၏ တောင်းဆိုချက်ကို လက်ခံမည် မဟုတ်ကြောင်း သိနေခဲ့သည်။ ဖိုးဉာဏ်ကျယ်အတွက် သူတို့ကို လမ်းဆုံလမ်းခွ ကင်းစခန်းသို့ ခေါ်ဆောင်သွားရန်မှာပင် ခက်ခဲနေပြီ ဖြစ်သောကြောင့် သူ သူတို့၏ တောင်းဆိုချက်ကို ငြင်းပယ်နိုင်ခြေ များ၏။

ဖိုးဉာဏ်ကျယ် ခဏမျှ ချီတုံချတုံ ဖြစ်ပြီးနောက် သူတို့၏ တောင်းဆိုချက်ကို လက်ခံပေးလိုက် လိမ့်မည်ဟု မမျှော်လင့် ထားခဲ့ကြပေ။ သို့သော် ဖိုးဉာဏ်ကျယ်တွင် တောင်းဆိုချက် တစ်ခုတော့ ရှိသည်။

ပက်ထရစ်စတားနှင့် စီနီယာ ဗိုလ်ကြီး ချယ်ရီတို့၏ လုံခြုံရေးကို အာမခံ ပေးနိုင်ရန် သူတို့ နှစ်ဦးလုံး ဖိုးဉာဏ်ကျယ်၏ ဘေးမှ မထွက်ခွာ သွားရပေ။ ထို့အပြင် ထာဝရတိုင်းပြည်နှင့် ဗစ်တိုးရီးယားမြို့မှ စစ်သည်တော်များ သူတို့ကို မမှတ်မိနိုင်စေရန် သူတို့ ပုံဖျက်ထား ရပေမည်။

ပုံဖျက်ခြင်းမှာ ရိုးရှင်းလှ၏။ ၎င်းမှာ သူတို့ကို ကိုယ်ပျောက်ဖြစ်အောင် ပြုလုပ်ခြင်း ကိစ္စရပ် တစ်ခုသာ ဖြစ်၏။ ဂိမ်းမာများတွင် ကိုယ်ပျောက်အစွမ်းကို ရှာတွေ့ရန် မည်သည့် နည်းလမ်းမျှ မရှိခဲ့ကြပေ။

သူတို့ နှစ်ဦးလုံး ဖိုးဉာဏ်ကျယ်၏ တောင်းဆိုချက်ကို သဘောတူခဲ့ကြသည်။ သူတို့က မြေပေါ်ကမ္ဘာမှ မွန်းစတားများအကြောင်းကို စူးစမ်းလိုစိတ် ရှိနေသော်လည်း သူတို့က သူတို့နှင့် တိုက်ခိုက်ပြီး အသက်စတေးရန်တော့ ဆန္ဒ မရှိပေ။

သူတို့က ကိစ္စရပ်များကို စုံစမ်းစစ်ဆေးရန်သာ လာရောက်ခဲ့ကြခြင်း ဖြစ်သောကြောင့် သူတို့၏ အသက်များကို အဆုံးရှုံးခံရန် မထိုက်တန်ပေ။

ဖိုးဉာဏ်ကျယ်က သူတို့ နှစ်ဦးလုံးကို နေရာရွှေ့ပြောင်း ဝင်ပေါက် ဆီသို့ ခေါ်ဆောင် သွားခဲ့သည်။

ထာဝရတိုင်းပြည်မှ ဂိမ်းမာများက စုရုံးကာ ဗစ်တိုးရီးယားမြို့မှ ဂိမ်းမာများကို စတင် တိုက်ခိုက် ခဲ့သည်။ နေရာရွှေ့ပြောင်း ဝင်ပေါက် ဧရိယာ ပတ်ပတ်လည်တွင် ကြောက်မက်ဖွယ် တိုက်ပွဲမြင်ကွင်း တစ်ခု ဖြစ်နေခဲ့၏။ နှစ်ဖက်စလုံး အချင်းချင်း ခုတ်ပိုင်း သတ်ဖြတ်နေကြရာ သူတို့၏ ပစ္စည်း ကိရိယာများ အကြောင်းကိုပင်လျှင် မေ့လျော့သွား ခဲ့ကြသည်။ နေရာအနှံ့တွင် ပစ္စည်း ကိရိယာ အပိုင်းအစများ ရှိနေ ခဲ့သော်လည်း မည်သူမျှ ကောက်ယူနေခြင်း မရှိခဲ့ကြပေ။ တိုက်ပွဲမှာ အလွန် ခက်ထန် ကြမ်းတမ်းပြီး တိုက်ခိုက်သူများမှာ သူတို့၏ ရန်လိုမှုကြောင့် ပစ္စည်း ကိရိယာများကို ဂရုမစိုက် နိုင်လောက်အောင် ဖြစ်နေ ခဲ့ကြသည်။

နေရာရွှေ့ပြောင်း ဝင်ပေါက်မှာ ထာဝရတိုင်းပြည်၏ ထိန်းချုပ်မှု အောက်တွင် ရှိနေဆဲ ဖြစ်သော်လည်း ၎င်းမှာ ယာယီမျှသာ ဖြစ်၏။

ဗစ်တိုးရီးယားမြို့တွင်။

"မင်းတို့ မြင်တဲ့ အတိုင်းပဲ၊ တိုက်ပွဲက အကောင်းမြင်စရာကို မရှိဘူး။ ထာဝရဝက်တွေ၊ အိုး၊ ထာဝရတိုင်းပြည်က အဲ့ဒီ မွန်းစတားတွေက ငါတို့ကို နေရာတိုင်းမှာ အဆက်မပြတ် တိုက်ခိုက် နေကြတယ်။" ဖျံခေါင်းလင်ချောင်းက ရွှေရောင် ဆံပင်ပိုင်ရှင် ဂျော့ခ်ျအား ပြောလိုက်သည်။

ဂျော့ခ်ျ ဘေးတွင်မူ ပေါက်ကွဲသံများ၊ အော်ဟစ်သံများ၊ ရယ်မောသံများနှင့် တခြား ပရမ်းပတာဖြစ်သော ဆူညံသံများ ရှိနေခဲ့၏။ လမ်းတစ်လျှောက်တွင် အော့ခ်များ၊ ဂနိုမ်းများ၊ ဂိုဘလင်များနှင့် ခွေးခေါင်းလူသားများက ဗစ်တိုးရီးယား မြို့သားများကို တိုက်ခိုက်ရန် ထွက်ပေါ်လာ ခဲ့ကြသည်။ ဂျော့ခ်ျမှာ မွန်းစတားများ၏ စကားကို နားမလည်သော်လည်း သူတို့၏ စိတ်လှုပ်ရှား နေသော မျက်နှာအမူအရာများအရ သူတို့က သူ့ အတွက် လာနေကြကြောင်းတော့ သူ သိသည်။

ထိုမွန်းစတားများက သူ့ကို သတ်ဖြတ်ရန် ကြိုးစား နေကြသည်ပင်။