အမြုတေဖွဲ့စည်းခြင်း စိတ်ဝိညာဉ်ရတနာ သုံးခု၊ ရွှေအမြုတေ ဆရာသခင်များ၏ ကြွယ်ဝမှု(၂)။

"ဒုတိယ ဝိညာဉ်သန္ဓေသားအဆင့်ဂိုဏ်းက ဆည်းဆာဂိုဏ်းပဲ.. သူတို့က ဆေးဖော်စပ်တာနဲ့ ပတ်သက်ပြီး နာမည်ကြီးတဲ့ ဂိုဏ်းတစ်ခု.. ဒါပေမဲ့ သူတို့ရဲ့ တိုက်ခိုက်ရေး စွမ်းအားက တန်တိန်ဂိုဏ်းထက် ပိုသန်မာတယ်.. သူတို့က ချန်လန်ပင်လယ်ဒေသရဲ့ အကြီးဆုံးဆေးဂိုဏ်း ဖြစ်ပြီး ဆေးဖော်စပ်ပညာရှင်တွေ အများကြီးကို ပျိုးထောင်ပေးထားတယ်.."

"တတိယတစ်ခုက မြူနှင်းနန်းတော်.. အဖွဲ့ဝင်အများစုက အမျိုးသမီး ကျင့်ကြံသူတွေပဲ.. သူတို့က ကျယ်ပြန့်တဲ့ ပင်လယ်ဧရိယာကို ပိုင်ဆိုင်ထားပြီး သူတို့ရဲ့ အစွမ်းအာဏာကလည်း ထူးထူးခြားခြား ကြောက်စရာ ကောင်းတယ်.. အဲ့ဒီအထဲမှာ ဝိညာဉ်သန္ဓေသားအဆင့် ဘိုးဘေး အယောက် နှစ်ဆယ်ကျော် ရှိတယ်လို့ ဆိုကြတယ်.."

"စတုတ္ထက ကောင်းကင်ဓားဂိုဏ်း.. ဒါက ဓားကျင့်ကြံသူတွေရဲ့ ဂိုဏ်းပဲ.. ဒီဂိုဏ်းကို ဝင်ရောက်လာတဲ့ ကျင့်ကြံသူတိုင်းနီးပါးက ဓားကျင့်ကြံသူတွေ ဖြစ်ကြတယ်.. ဒါကြောင့် သူတို့ရဲ့ တိုက်ခိုက်ရေး စွမ်းရည်တွေက သိသိသာသာ အားကောင်းပြီး ဝိညာဉ်သန္ဓေသားအဆင့် အင်အားစု ငါးခုထဲမှာ အသန်မာဆုံး တစ်ခု ဖြစ်လာတယ်…"

"ပဉ္စမက ဝူကျိမဟာမိတ်အဖွဲ့.. ဒါက ဂိုဏ်းအင်အားစု မဟုတ်ဘူး.. တစ်ကိုယ်တော်ကျင့်ကြံသူတွေရဲ့ မဟာမိတ်အဖွဲ့ပဲ.. ဘယ်တစ်ကိုယ်တော်ကျင့်ကြံသူမဆို ဒီမဟာမိတ်အဖွဲ့ကို ဝင်ရောက်နိုင်တယ်.. လာသမျှလူတိုင်းနီးပါးကို ကြိုဆိုတယ်.."

"တစ်နည်းပြောရရင်.. ဒါက အကြီးဆုံး မဟာမိတ်အဖွဲ့ပဲ.. အထဲမှာ ဝိညာဉ်သန္ဓေသားအဆင့် ဘိုးဘေး အယောက် သုံးဆယ်ကျော် ရှိတယ်.. ဒါပေမဲ့ ကံမကောင်းစွာနဲ့ပဲ ဒါက မဟာမိတ်အဖွဲ့ သက်သက် ဖြစ်နေတော့.. သူတို့က သဲပွင့်တွေလိုပဲ စုစည်းမှု မရှိကြဘူး…"

ကျိုးစွေ့က ချန်လန်ပင်လယ်ဒေသ၏ လက်ရှိ အခြေအနေကို အတိုချုံး ရှင်းပြလိုက်သည်။ အဓိက ဝိညာဉ်သန္ဓေသားအဆင့် အင်အားစု ငါးခု တည်ရှိနေပြီး၊ ဤပင်လယ်ဒေသ၏ ထောင့်အသီးသီးကို သိမ်းပိုက်ကာ အားလုံးကို အုပ်စိုးထားကြသည်။

"ရွှမ်ပေါင်မျှော်စင်.. ဆည်းဆာဂိုဏ်း.. မြူနှင်းနန်းတော်.. ကောင်းကင်ဓားဂိုဏ်း.. ဝူကျိမဟာမိတ်အဖွဲ့... အဓိက ဝိညာဉ်သန္ဓေသားအဆင့် အင်အားစု ငါးခု ဟုတ်လား.. ချန်လန်ပင်လယ်က တကယ်ကို ကျယ်ပြန့်ပြီး အဆုံးအစ မရှိပါလား…" ကျိပင်းယွီက စိတ်လှုပ်ရှားစွာ ပြောလိုက်သည်။

အင်မော်တယ်မြူခိုးကျွန်းတွင် ရွှေအမြုတေဂိုဏ်းတစ်ခုသည် အကြွင်းမဲ့ အုပ်စိုးသူအဖြစ် သတ်မှတ်ခံထားရပြီး ဖြစ်သည်။

သို့သော် ချန်လန်ပင်လယ်ဒေသတွင်မူ လွှမ်းမိုးနိုင်သော အင်အားစုတစ်ခု တည်ထောင်ရန် အနည်းဆုံး ဝိညာဉ်သန္ဓေသားအဆင့် ဘိုးဘေးတစ်ပါး လိုအပ်ပေသည်။

"ယောက်ျား... ဒီအင်အားစုတွေ အားလုံးက လမ်းမှန်ဂိုဏ်းတွေကချည်းပဲလား.. မိစ္ဆာလမ်းစဉ်က အင်အားစုတွေ မရှိဘူးလား…"

မုဇီယန်က စူးစမ်းစွာ မေးလိုက်သည်။

မိစ္ဆာလမ်းစဉ်အင်အားစုများ မရှိစရာ အကြောင်းမရှိဟု သူမ ခံစားမိသည်။ မည်သို့ပင်ဆိုစေကာမူ၊ အလင်းရှိလျှင် အမှောင်ရှိမြဲပင် ဖြစ်သည်။

ယင်းသည် လောက၏ နိယာမတစ်ခုပင် ဖြစ်ချေသည်။

"ဒါပေါ့ ရှိတာပေါ့.. အပေါ်မှာ ပြောခဲ့တာတွေက အဓိက လမ်းမှန်ဂိုဏ်း အင်အားစု ငါးခုပဲ…"

"မိစ္ဆာလမ်းစဉ်အတွက်ကတော့ အဓိက အင်အားစု သုံးခု ရှိတယ်…"

"သူတို့က ကောင်းကင်မိစ္ဆာဂိုဏ်း.. ရွှမ်ယင်ဂိုဏ်းနဲ့ ဟေးရှားနန်းတော်တို့ပဲ…"

"အတိုချုပ် ပြောရရင်.. ဒီဂိုဏ်းတွေက ကျင့်ကြံသူတွေကလည်း ချန်လန်ပင်လယ်ဒေသမှာ တော်တော်လေး နာမည်ဆိုးနဲ့ ကျော်ကြားပြီး အဆုံးမရှိတဲ့ သတ်ဖြတ်မှုတွေ ဖြစ်စေခဲ့တယ်…"

"လမ်းမှန်လမ်းစဉ်နဲ့ မိစ္ဆာလမ်းစဉ်ကြားက တိုက်ပွဲက အမြဲတမ်း ပြင်းထန်ခဲ့ပြီးတော့.. နှစ်ထောင်ပေါင်းများစွာ ကြာအောင် ဆက်လက် ဖြစ်ပွားနေခဲ့တာ.."

"ဒါပေမဲ့ ရလဒ်တွေကို ကြည့်လိုက်ရင် လမ်းမှန်ဂိုဏ်းတွေက အသာစီး ရနေတုန်းပါပဲ.."

ကျိုးစွေ့က လေးနက်စွာ ပြောလိုက်သည်။

ချန်လန်ပင်လယ်ဒေသတွင် အဓိက မိစ္ဆာလမ်းစဉ်အင်အားစု သုံးခု ရှိပြီး၊ သူတို့ထဲမှ တစ်ခုမှာ ကောင်းကင်မိစ္ဆာဂိုဏ်းဖြစ်ကြောင်း သူ သိလိုက်ရသည်။

ထို့အပြင်၊ သူ သင်ယူထားသော ကျင့်ကြံခြင်း နည်းစနစ်တစ်ခုဖြစ်သည် နတ်ဆိုးအသွင်ပြောင်း ပညာရပ်သည် ကောင်းကင်မိစ္ဆာဂိုဏ်းမှ မြစ်ဖျားခံလာခြင်း ဖြစ်သည်။

ရှင်းလင်းစွာပင်၊ ကောင်းကင်မိစ္ဆာဂိုဏ်းမှ တပည့်တစ်ယောက် ဘေးအန္တရာယ်မှ ထွက်ပြေးရင်း အင်မော်တယ်မြူခိုးကျွန်းကို မတော်တဆ ရောက်လာခဲ့ပြီး၊ သူ့ရဲ့ အမွေအနှစ်ကို ချန်ထားခဲ့ခြင်း ဖြစ်ပေသည်။

ချန်လန်ပင်လယ်ဒေသသည် ကျယ်ပြန့်သော်လည်း၊ ကမ္ဘာကြီးက တော်တော်လေး ကျဉ်းမြောင်းသည်ဟုသာ ဆိုရပေမည်။

ထို့ကြောင့် သူ့နှလုံးသား မခုန်ဘဲ မနေနိုင်ချေ။ ကောင်းကင်မိစ္ဆာဂိုဏ်းသာ ၎င်းတို့၏ နည်းစနစ်ကို သူ သင်ယူထားမှန်း သိရှိသွားပါက၊ မည်သို့သော ဘေးဒုက္ခအား ခေါ်ဆောင်မိမည်ကို မည်သူသိနိုင်ပါမည်နည်း။

ကံကောင်းထောက်မစွာဖြင့်၊ သူသည် ဤနည်းစနစ်ကို အသေးစားအောင်မြင်မှုအဆင့်အထိ ကျင့်ကြံပြီး ဖြစ်သည်။ ကောင်းကင်မိစ္ဆာဂိုဏ်းမှ ဝိညာဉ်သန္ဓေသားအဆင့် ဘိုးဘေးတစ်ပါးနှင့် မတွေ့ဆုံသရွေ့၊ လူအများစုသည် သူ့အကြောင်း သံသယဖြစ်ဖွယ် တစ်စုံတစ်ရာကို ရှာတွေ့နိုင်လိမ့်မည် မဟုတ်ဟု သူ ယုံကြည်သည်။

"ဒါတွေ အကုန်လုံးက ဝိညာဉ်သန္ဓေသားအဆင့် အင်အားစုတွေချည်းပဲ… နတ်ဘုရားအသွင်ပြောင်းအဆင့်ရှိတဲ့ ဂိုဏ်းတွေရော မရှိဘူးလား.."

ရှားကျင်းယန်က စူးစမ်းစွာ မေးလိုက်သည်။

ဝိညာဉ်သန္ဓေသားအဆင့်အထက်တွင် နတ်ဘုရားအသွင်ပြောင်းနယ်ပယ် ရှိကြောင်း သူမ သိသော်လည်း၊ နတ်ဘုရားအသွင်ပြောင်း နယ်ပယ် ဆရာသခင်များသည် ရှာဖွေရခက်ခဲပြီး ကြီးမြတ်သော ပုဂ္ဂိုလ်များအဖြစ် ဒဏ္ဍာရီများထဲတွင်သာ ရှိနေပုံရသည်။

"မရှိဘူး…"

"ချန်လန်ပင်လယ်ဒေသက ကျယ်ပြန့်ပေမယ့်.. နတ်ဘုရားအသွင်ပြောင်း ဆရာသခင်တစ်ဦးမှ မရှိဘူး..”

"နတ်ဘုရားအသွင်ပြောင်း ဆရာသခင် တစ်ယောက်သာ တကယ် ရှိခဲ့ရင်.. သူတို့က ချန်လန်ပင်လယ်ဒေသကို ပေါင်းစည်းနိုင်လောက်ပြီပေါ့.."

"ဒါပေါ့… ချန်လန်ပင်လယ်ဒေသက အရမ်း ကျယ်ပြန့်တော့.. နတ်ဘုရားအသွင်ပြောင်း အကြီးအကဲ တစ်ယောက် တစ်နေရာရာမှာ ပုန်းအောင်းနေမလား ဆိုတာတော့ မသေချာဘူး…"

ကျိုးစွေ့က လုံးဝ သေချာပေါက် မပြောခဲ့ပေ။ မည်သို့ပင်ဆိုစေကာမူ၊ လောကကြီးသည် လွန်စွာ ကျယ်ပြန့်ပြီး ပုန်းကွယ်နေသည့် ပါရမီရှင်များ မရေမတွက်နိုင်အောင် ရှိနေနိုင်သည် မဟုတ်ပါလော။

အင်မော်တယ်ရှားဂိုဏ်းမှ သတင်းအချက်အလက်များအရ၊ ချန်လန်ပင်လယ်ဒေသတွင် အသန်မာဆုံး တည်ရှိမှုမှာ ဝိညာဉ်သန္ဓေသားအဆင့် ဘိုးဘေးဖြစ်သည်ဟု ဖော်ပြထားသော်လည်း၊ နက်ရှိုင်းရာတွင် ပုန်းအောင်းနေသော နတ်ဘုရားအသွင်ပြောင်း အကြီးအကဲတစ်ဦး မရှိနိုင်ဟု မည်သူ ပြောနိုင်မည်နည်း။

ကျင့်ကြံခြင်းလောကသည် မယုံနိုင်လောက်အောင် နက်ရှိုင်းလှသည်။ မည်သည့် မမျှော်လင့်ထားသော အရာမဆို ဖြစ်ပျက်နိုင်သည်။

"ယောက်ျား... ဒီလိုဆိုရင် ငါတို့ ဘယ်ကို သွားသင့်လဲ…"

လန်ယွဲ့ရှီက စူးစမ်းစွာ မေးလိုက်သည်။

"အင်း... အများကြီး စဉ်းစားပြီးတဲ့နောက်မှာ ငါတို့ ဝူကျိမဟာမိတ်အဖွဲ့ကို သွားသင့်တယ်လို့ ငါယူဆတယ်…"

"တခြား ဝိညာဉ်သန္ဓေသားအဆင့် အင်အားစုတွေကလည်း လက်အောက်ခံ အင်အားစုတွေကို စုဆောင်းကြပေမယ့်.. ကန့်သတ်ချက်တွေ အရမ်း များတယ်…"

"ဒါပေမဲ့ ဝူကျိမဟာမိတ်အဖွဲ့ကတော့ မတူဘူး… အခြေခံအားဖြင့် တစ်ကိုယ်တော်ကျင့်ကြံသူ မဟာမိတ်အဖွဲ့တစ်ခုပဲလေ.. လာသမျှ လူတိုင်းနီးပါးကို လက်ခံတယ်…"

"အထူးသဖြင့် မင်းတို့အားလုံးက ရွှေအမြုတေ ဆရာသခင်တွေ ဖြစ်နေတော့.. တစ်ကိုယ်တော်ကျင့်ကြံသူ မဟာမိတ်အဖွဲ့က သေချာပေါက် ကြိုဆိုမှာပဲ.. ပြီးတော့ ရွှေအမြုတေအင်အားစုတစ်ခုကို တည်ထောင်နိုင်လိမ့်မယ်…"

"ဝူကျိမဟာမိတ်အဖွဲ့ကို ဝင်ရောက်ပြီးရင် ကျွန်းတွေ ခွဲဝေပေးနိုင်တယ်လို့ ဆိုကြတယ်.. ဒါက ငါတို့ကို ချန်လန်ပင်လယ်ဒေသထဲကို မြန်မြန်ဆန်ဆန် ပေါင်းစည်းနိုင်အောင် ကူညီပေးလိမ့်မယ်…"

ကျိုးစွေ့က လေးနက်စွာ ပြောလိုက်သည်။

ဝူကျိမဟာမိတ်အဖွဲ့ကို ဝင်ရောက်ခြင်းမှာ သတင်းအချက်အလက်များစွာကို စုံစမ်းပြီးနောက်မှသာ ရွေးချယ်ခဲ့သော သူ၏ရွေးချယ်မှုဖြစ်ပေသည်။

မည်သို့ပင်ဆိုစေကာမူ၊ သူသည် လျှို့ဝှက်ချက်များစွာ ရှိထားပြီး ထိုဂိုဏ်းအင်အားစုများနှင့် ပူးပေါင်းရန် လုံးဝ မသင့်တော်ပေ။

တစ်ကိုယ်တော်ကျင့်ကြံသူများ၏ မဟာမိတ်အဖွဲ့ဖြစ်သော ဝူကျိမဟာမိတ်အဖွဲ့သို့ ပူးပေါင်းခြင်းကသာ များစွာ ကောင်းမွန်ပေသည်။

လွတ်လပ်ခွင့် ရရှိနိုင်ရုံသာမက၊ ဝူကျိမဟာမိတ်အဖွဲ့၏ အကာအကွယ်ကိုလည်း ရရှိနိုင်သည်။

ဤသည်မှာ ခဲတစ်လုံးတည်းဖြင့် ငှက်နှစ်ကောင်ပစ်ခြင်းပင် ဖြစ်သည်။

မှန်ပေသည်၊ ဝူကျိမဟာမိတ်အဖွဲ့သို့ ဝင်ရောက်ရန်မှာ လွယ်ကူသောကိစ္စ မဟုတ်ပေ။ သူတို့၏ အာရုံစိုက်မှုကို ရရှိရန် အနည်းဆုံး ရွှေအမြုတေ ဆရာသခင် ဖြစ်ရမည်။

အကယ်၍ တစ်စုံတစ်ယောက်သည် အခြေတည်အဆင့်တွင်သာ ရှိနေပါက၊ ဤကိစ္စတွင် ပြောစရာ များများစားစား ရှိလိမ့်မည် မဟုတ်ပေ။

ကံကောင်းထောက်မစွာဖြင့်၊ လန်ယွဲ့ရှီ၊ လင်းယာကျူနှင့် ရှန်ပိချန်တို့အားလုံးသည် ရွှေအမြုတေ ဆရာသခင်များ ဖြစ်ကြသည်။

၎င်းတို့ကိုယ်တိုင် ရှေ့ထွက်လာသရွေ့၊ သူတို့ ဝူကျိမဟာမိတ်အဖွဲ့သို့ အားစိုက်ထုတ်စရာ မလိုဘဲ သေချာပေါက် ဝင်ရောက်နိုင်လိမ့်မည်ဟု သူ ယုံကြည်သည်။

"ဘာလို့ ငါတို့က ဒီဝိညာဉ်သန္ဓေသားအဆင့် အင်အားစုတွေနဲ့ ပူးပေါင်းရမှာလဲ…"

"ချန်လန်ပင်လယ်ဒေသက အရမ်း ကျယ်ပြန့်ပြီး… ပိုင်ရှင်မဲ့ ကျွန်းတွေ မရေမတွက်နိုင်အောင် ရှိနေတာ ရှင်တို့ သိသားပဲ…"

"ငါတို့ အခြေချဖို့ ကျွန်းတစ်ကျွန်းကို ကြုံသလို ရှာလိုက်ရင် မလုံလောက်ဘူးလား…"

ရှားကျင်းယန်က စိတ်ရှုပ်ထွေးစွာဖြင့် မေးလိုက်သည်။

"အဲ့ဒီလောက် မရိုးရှင်းဘူး.."

"ချန်လန်ပင်လယ်ဒေသက ကျွန်းတွေ ပေါများပြီး ဘယ်ကျွန်းမှာမဆို နေထိုင်နိုင်တယ် ဆိုပေမယ့်..."

"တတိယအဆင့် ဝိညာဉ်ကြော ပိုင်ဆိုင်တဲ့ ကျွန်းတွေက တော်တော်လေး ရှားပါးတယ်…"

"အင်မော်တယ်မြူခိုးကျွန်းလောက် ကြီးမားတဲ့ ကျွန်းတွေက တကယ်တမ်း တော်တော် ရှားပါးတယ်.. အရမ်းကို ကြီးမားတဲ့ကျွန်းစုကြီးလို့တောင် သတ်မှတ်လို့ရတယ်.."

"ဒါ့အပြင် ဝိညာဉ်သန္ဓေသားအဆင့် အင်အားစုတစ်ခုရဲ့ အကာအကွယ် မရှိရင်.. တခြား အင်အားစုတွေက မင်းကို အချိန်မရွေး ဒုက္ခပေးလိမ့်မယ်…"

"အထူးသဖြင့် မင်း ဝိညာဉ်သန္ဓေသားအဆင့် အင်အားစုတစ်ခုနဲ့ ရင်ဆိုင်ရရင်.. မင်း သိမ်းပိုက်ထားတဲ့ တတိယအဆင့် ဝိညာဉ်ကြောကို နာနာခံခံနဲ့ လွှဲပြောင်းပေးရလိမ့်မယ်…"

"ဒါကြောင့် ချန်လန်ပင်လယ်မှာ ရှင်သန်ဖို့ဆိုရင် မင်းတို့ အတူတူပူးပေါင်းဆောင်ရွက်မှပဲ ရမယ်…"

"ဟုတ်ပါတယ် အရေးကြီးဆုံးကတော့.. လန်ယွဲ့ရှီနဲ့ တခြားသူတွေ ဝိညာဉ်သန္ဓေသားအဆင့်ကို ရောက်ချင်ရင်.. သူတို့ အဓိက အင်အားစုတွေနဲ့ ဆက်ဆံမှပဲရမယ်.."

"ဒီနည်းနဲ့ဆို.. သူတို့က အနာဂတ်မှာ ဝိညာဉ်သန္ဓေသားအဆင့် ဆိုင်ရာ စိတ်ဝိညာဉ်ပစ္စည်းတွေကို ရရှိနိုင်လောက်တယ်.."

ကျိုးစွေ့က ရှင်းပြလိုက်သည်။

သူသည် ရှောင်တိမ်းခြင်းတာအိုကို နှစ်သက်သူဖြစ်သော်လည်း၊ ၎င်းသည် လူသူအရောက်အပေါက် နည်းသော တောင်တန်းသစ်တောများ၏ အတွင်းပိုင်းထဲတွင် နေထိုင်ရမည်ဟု ဆိုလိုခြင်း မဟုတ်ပေ။

‘မြင့်မြတ်သောရသေ့သည် မြို့ပေါ်လူထုထဲတွင် ရောနှောနေထိုင်ပြီး၊ သေးနုပ်သော ရသေ့ငယ်သည်မူ တောင်ပေါ်တွင် နေသည်’ ဟူသော ဆိုရိုးစကားရှိသည်။

လောကနှင် စစ်မှန်သော သဟဇာတဖြစ်မှုသည် အခြားသော ကျင့်ကြံသူများနှင့် ရောနှောနေထိုင်ကာ သာမန်လူတစ်ဦးဖြစ်လာခြင်းပင် ဖြစ်သည်။

အခြားကျွန်းများပေါ်တွင် ပုန်းအောင်းနေသည့်အခါ၊ မိစ္ဆာလမ်းစဉ်ကျင့်ကြံသူများ၏ သတ်ဖြတ်ခြင်းကို ခံရရန် လွယ်ကူနိုင်သလို့၊ သားရဲလှိုင်းများနှင့်လည်း ကြုံတွေ့ရနိုင်သည်။

ဝိညာဉ်သန္ဓေသားအဆင့် အင်အားစုတစ်ခုနှင့် ဆက်နွယ်နေခြင်းသည် သူတို့၏ ထောက်ပံ့မှုနှင့် အကာအကွယ်ကို ရရှိနိုင်သည်ဟု ဆိုလိုသည်။