ဒီနေ့ကစပြီး မင်းက ငါ့ရဲ့ အချစ်ဆုံး ဂျူနီယာ ညီလေးပဲ

အိပ်မွေ့ချနည်းနဲ့ ပေါင်းစပ်ပြီး စောစောက စစ်ဆေးမေးမြန်းခဲ့တာကြောင့် သရဲမွေးမြူခြင်း ဆိုတာ ထျန်ကော လုပ်သလို သွေးထွက်သံယိုနဲ့ ရက်စက်ဖို့ မလိုမှန်း ကျန်းပေရန် သိခဲ့ရသည်။

သွေးကန်တွေ၊ အလောင်းတောင်ပုံတွေနဲ့ နာကြည်းနေတဲ့ ဝိညာဉ်တွေက သရဲကြီးထွားမှုကို အရှိန်မြှင့်ပေးနိုင်ပေမယ့် သရဲကို ယဉ်ပါးအောင် လုပ်ဖို့ ခက်ခဲစေသလို ကြီးထွားနိုင်စွမ်းကိုလည်း သိသိသာသာ လျော့ကျစေသည်။

ထျန်ကော က ကိုယ့်ကိုယ်ကို ကာကွယ်ဖို့အတွက် အစွမ်းထက်တဲ့ သရဲတချို့ အမြန်လိုချင်လို့ ဒီလို အစွန်းရောက် နည်းလမ်းတွေ သုံးခဲ့တာ။

ယေဘုယျအားဖြင့် ပြောရရင် သရဲတွေ ကြီးထွားဖို့ အလိုအပ်ဆုံး အရာက ယင် ချီ ပါ။

သရဲတွေအတွက် ယင် ချီ ဆိုတာ ကျင့်ကြံသူတွေအတွက် ဝိညာဉ်စွမ်းအင် နဲ့ အတူတူပဲ မရှိမဖြစ် လိုအပ်ချက် တစ်ခုပေါ့။

ယင် ချီ အပြင် လူသတ်ငွေ့၊ ရက်စက်ကြမ်းကြုတ်မှု၊ အရိုင်းဆန်မှု တွေကလည်း သရဲတွေ အကြိုက်ဆုံး အရာတွေပါ အထူးသဖြင့် စစ်မြေပြင်တွေမှာ ဒီ အငွေ့အသက်တွေက ပိုသန်မာတယ်။

ဒါ့အပြင် သေဆုံးသွားတဲ့ ကျွမ်းကျင်သူတွေရဲ့ ဝိညာဉ်စွမ်းအားကို စုပ်ယူတာ၊ အနှစ်သာရ ချီ ကို စားသုံးတာ၊ ကိုယ်တိုင် ကျင့်ကြံတာတွေကလည်း သရဲရဲ့ အင်အားကို တိုးပွားစေနိုင်တယ်။

သရဲတွေကို သန်မာစေဖို့ နည်းလမ်းပေါင်းစုံ ရှိပါလျက်နဲ့ ထျန်ကော က သူ့ရည်မှန်းချက် အတွက် အစွန်းရောက်ဆုံး နည်းလမ်းကို ရွေးချယ်ခဲ့တယ်။

ဒါကြောင့်လည်း ကျန်းပေရန် က သူ့ကို ဘာအခွင့်အရေးမှ ပေးဖို့ စိတ်ကူးမရှိခဲ့တာ ဘာလို့လဲဆိုတော့ ဒီလူက တခြားသူတွေရဲ့ အသက်ကို တန်ဖိုးထားရမယ့် အရာလို့ လုံးဝ သဘောမထားလို့ပဲ။

တစ်ရက်တာ ကာလအတွင်း ကျန်းပေရန် ဒီ သရဲမွေးမြူခြင်း ဗဟုသုတ အားလုံးကို မော့ရှာ ကို သင်ပေးလိုက်သည်။

မော့ရှာ ရဲ့ သင်ယူနိုင်စွမ်းက သူ ထင်ထားတာထက် ပိုကောင်းနေတယ် သင်လိုက်တာနဲ့ ချက်ချင်း တတ်မြောက်သွားတာမို့လို့ ကျန်းပေရန် အတွက် အလုပ်အများကြီး သက်သာသွားသည်။

မော့ရှာ တကယ် နားလည်သွားပြီ ဆိုတာ သေချာဖို့ နောက်ဆုံး အကြိမ် စစ်ဆေးပြီးနောက် ကျန်းပေရန် စိတ်သက်သာရာ ရသွားသည်။

မော့ရှာ နဲ့ ချင်းချင်း ရင်းနှီးအောင် လုပ်နေကြစဉ် ကျန်းပေရန် ဝူချင်းစစ် ကို ကြည့်ပြီး ပြောလိုက်သည်။

"မင်းမှာ တပည့်တစ်ယောက်ကို ခွင့်ရှည် ပေးနိုင်တဲ့ လုပ်ပိုင်ခွင့် ရှိတယ် မဟုတ်လား"

"စိတ်ချပါ စီနီယာ အစ်ကိုကြီး ကျွန်တော့်တာဝန် ထားလိုက်ပါ"

ဝူချင်းစစ် လက်နှစ်ဖက်ယှက်ပြီး ချက်ချင်း ဖြေလိုက်သည်။

ခေါင်းညိတ်ပြလိုက်ပြီး ကျန်းပေရန် ထျန်ကော အလောင်းဆီ လျှောက်သွားလိုက်သည်။

အဆောင်လက်ဖွဲ့ စာရွက်တွေကို ထျန်ကော အလောင်းပေါ် တစ်ရွက်ပြီးတစ်ရွက် ကပ်လိုက်သည်။

ဒါတွေက သူ့ရဲ့ ရက်စက်ကြမ်းကြုတ်မှုတွေကို ဖိနှိပ်ဖို့နဲ့ ဝိညာဉ်ကို အတိုင်းအတာ တစ်ခုအထိ ချုပ်တည်းထားနိုင်ဖို့ ဖြစ်သည်။

ပြီးတော့ ဝိညာဉ် ချိပ်ပိတ် အစီအရင် တည်ဆောက်ပြီးနောက် ကျန်းပေရန် ခေါင်းလောင်းဓား တစ်ချောင်းကို မော့ရှာ ဆီ ကမ်းပေးလိုက်သည်။

သံကွင်းတွေ တွဲလောင်းကျနေတဲ့ ကြေးဝါရောင် ဓားကို ကြည့်ပြီး မော့ရှာ ဇဝေဇဝါနဲ့ ယူလိုက်သည်။

"ထျန်ကော ရဲ့ ဝိညာဉ် နိုးလာရင် ဒီ ခေါင်းလောင်းဓား ကို လှုပ်လိုက် ဝိညာဉ်ငြိမ်သက်စေတဲ့ အသံက သူ့ကို လိမ္မာသွားစေလိမ့်မယ်"

"နားလည်ပါပြီ"

ပြောပြီးသည်နှင့် မော့ရှာ ခေါင်းလောင်းဓား ကို စမ်းလှုပ်ကြည့်လိုက်ရာ ဂလောင် ဂလောင် မြည်သံ ထွက်ပေါ်လာသည်။

"ကောင်းပြီ ဒီနေ့ကစပြီး မင်း ဒီနေရာမှာ သရဲထိန်းချုပ်တဲ့ ပညာကို အေးအေးဆေးဆေး လေ့လာလိုက်တော့"

ပြောပြီးနောက် ကျန်းပေရန် စစ်တုရင် ကျမ်းစာအုပ် နှစ်အုပ်ကို သိုလှောင်လက်စွပ်ထဲက ထုတ်ပြီး မော့ရှာ ဆီ ကမ်းပေးလိုက်သည်။

"ဒါက ငါ့ရဲ့ ပွဲစဉ် ၁၂၇ ပွဲကို မှတ်တမ်းတင်ထားတာ မင်းအတွက်ပဲ"

"ကျေးဇူးတင်ပါတယ် စီနီယာ အစ်ကိုကြီး"

ကမ္ဘာပေါ်မှာ တစ်ယောက်တည်းသာ တတ်ကျွမ်းတဲ့ သရဲထိန်းချုပ်တဲ့ ပညာနဲ့ ယှဉ်ရင် မော့ရှာ က ဒီ စစ်တုရင် ကျမ်းစာအုပ် နှစ်အုပ်ကို ပိုစိတ်ဝင်စားနေတာ ထင်ရှားနေသည်။

"နောက်ကျရင် ငါ လူလွှတ်ပြီး အစားအသောက် လာပို့ခိုင်းလိုက်မယ် တကယ်လို့ ဆက်မနေနိုင်တော့ဘူးလို့ ခံစားရရင်လည်း ပြောလို့ ရပါတယ်"

"ဟုတ်ကဲ့ပါ"

"ဒါဆို ကောင်းကောင်း ကျင့်ကြံတော့ ငါ သွားတော့မယ်"

ပြောပြီးသည်နှင့် ကျန်းပေရန် လှည့်ထွက်သွားပြီး တဲအိမ်လေးထဲကနေ ပျောက်ကွယ်သွားသည်။

"ဟင်"

စီနီယာ အစ်ကိုကြီး ရုတ်တရက် ပျောက်သွားတာ မြင်တော့ ဘေးနားမှာ ရပ်နေတဲ့ ဝူချင်းစစ် ကြောင်သွားသည်။

သူ နောက်က လိုက်သွားရမလား ဒါမှမဟုတ် ဒီမှာ ကျန်ခဲ့ပြီး ဂျူနီယာ ညီလေး အသစ်စက်စက် ကို "စည်းကမ်း" တချို့ သင်ပေးရမလား ဆိုတာ မသေချာ မရေရာ ဖြစ်နေသည်။

"အဟွတ်"

ချောင်းအသာဟန့်လိုက်ပြီး ဝူချင်းစစ် မော့ရှာ ဆီ လျှောက်သွားလိုက်သည်။

အရာရှိ ဝူ ရဲ့ ချောင်းဟန့်သံ ကြားလိုက်ရတော့ စစ်တုရင် ကျမ်းစာအုပ် နှစ်အုပ် ရလိုက်လို့ ပျော်ရွှင်နေတဲ့ မော့ရှာ စာအုပ်တွေကို ခဏ ချထားလိုက်ပြီး ရိုရိုသေသေ ဦးညွှတ်လိုက်ရသည်။

"ခုနက ကူညီပေးခဲ့တာတွေ အတွက် အရာရှိ ဝူ ကို ထပ်ပြီး ကျေးဇူးတင်ပါတယ်"

ခေါင်းခါလိုက်ပြီး ဝူချင်းစစ် ပြန်ဖြေလိုက်သည်။

"စီနီယာ အစ်ကိုကြီးကိုပဲ ကျေးဇူးတင်သင့်တာပါ မဟုတ်ရင် ငါ မင်းကို လာရှာဖြစ်မှာ မဟုတ်ဘူး"

"သေချာတာပေါ့ စီနီယာ အစ်ကိုကြီးကို ကျေးဇူးတင်ရမှာပါ ဒါပေမဲ့ အရာရှိ ဝူ ကိုလည်း ကျေးဇူးတင်ရမှာပါပဲ"

"အင်း"

ကျေနပ်အားရစွာ ခေါင်းညိတ်လိုက်ပြီး ဝူချင်းစစ် ခဏ စဉ်းစားကာ ဆက်ပြောလိုက်သည်။

"ငါ အရင်က ပြောခဲ့သလိုပဲ ဒီနေ့ကစပြီး ငါတို့က စီနီယာ အစ်ကိုကြီး တစ်ယောက်တည်းရဲ့ လက်အောက်က ညီအစ်ကိုတွေ ဖြစ်သွားကြပြီ ငါက စောစော ဝင်ခဲ့တာဆိုတော့ မင်း ဆန္ဒရှိရင် ငါ့ကို အစ်ကိုကြီး လို့ ခေါ်နိုင်ပါတယ်"

မော့ရှာ သိသိသာသာ အံ့သြသွားသည်။

အရာရှိ ဝူ ရဲ့ သဘောထားကို ကြည့်ပြီး ရိပ်မိနေပေမယ့် အရာရှိ ဝူ ကိုယ်တိုင်က သူဟာ စီနီယာ အစ်ကိုကြီးရဲ့ အကြီးဆုံး တပည့်ပါလို့ ထုတ်ပြောလာတဲ့အခါ မော့ရှာ တုန်လှုပ်သွားရသည်။

ဝူချင်းစစ် ဆိုတာ ဂိုဏ်းချုပ်ရဲ့ ကိုယ်ပိုင် တပည့် ဆိုတာ ဂိုဏ်းတစ်ခုလုံး သိကြတာပဲ။

အခု သူက စီနီယာ အစ်ကိုကြီးရဲ့ အကြီးဆုံး တပည့်ပါလို့ ပြောလာတော့... သူ့စွမ်းရည်တွေက ဘယ်က ရလာတာလဲ။

သူက လက်ရှိ ရှန့်တိုင်းပြည် တစ်ခုလုံးရဲ့ မျိုးဆက်သစ်တွေထဲမှာ အတောက်ပဆုံး တပည့် ဆိုတာ သိထားရမယ်။

အဲဒီလို တပည့်မျိုးကို သင်ပေးနိုင်တဲ့ ဆရာက ဘယ်လိုလုပ် သာမန်လူ ဖြစ်နိုင်မှာလဲ။

{ပြဿနာက... စီနီယာ အစ်ကိုကြီးရဲ့ ကျင့်ကြံခြင်းက ချီသန့်စင်ခြင်း ပဉ္စမအဆင့် မဟုတ်ဘူးလား}

ဒါပေမဲ့ မော့ရှာ ဒီမေးခွန်းတွေကို အကြာကြီး စဉ်းစားမနေတော့ပေ။

အဲဒီအစား သူ ရိုရိုသေသေ ဦးညွှတ်လိုက်ပြီး ပြောလိုက်သည်။

"မော့ရှာ က အစ်ကိုကြီး ကို ဂါရဝပြုပါတယ်"

ပြုံးပြီး ခေါင်းညိတ်လိုက်ကာ ဝူချင်းစစ် ပြန်ဖြေလိုက်သည်။

"သေချာတာပေါ့ ပြင်ပလူတွေ ရှိနေရင်တော့ အရာရှိ ဝူ လို့ပဲ ခေါ်သင့်တယ်"

သူ့ရဲ့ အမည်းနဲ့အဖြူ ဝတ်ရုံရှည်ကို ပြန်ပြင်လိုက်ပြီး ဆက်ပြောသည်။

"ခုနက ကြည့်ရတာ မင်း စီနီယာ အစ်ကိုကြီး အကြောင်း သိပ်မသိသလိုပဲ ဒါမှမဟုတ်ရင် မေးခွန်းတွေ အများကြီး ရှိနေပေမယ့် မမေးရဲတာ ဖြစ်မယ် ဟုတ်တယ်မလား"

ဒါကို ကြားတော့ မော့ရှာ ငရုတ်ဆုံ ထောင်းသလို ခေါင်းတငြိမ့်ငြိမ့် လုပ်လိုက်ပြီး ပြန်ဖြေလိုက်သည်။

"ဟုတ်ပါတယ် ကျေးဇူးပြုပြီး ရှင်းပြပေးပါ အစ်ကိုကြီး"

"အရင်ဆုံး မင်း သိထားတာတွေ ပြောပြပါဦး"

"ကျွန်တော် သိထားတာက..."

မော့ရှာ လက်ချောင်းတွေ ချိုးပြီး စတင် ရေတွက်လိုက်သည်။

"စီနီယာ အစ်ကိုကြီးရဲ့ စစ်တုရင် စွမ်းရည်က အရမ်းကောင်းတယ်၊ စီနီယာ အစ်ကိုကြီးက ဧကရာဇ် ဖြစ်တယ်၊ စီနီယာ အစ်ကိုကြီးက ခန်းမထဲမှာ သိပ်မနေဘူး၊ စီနီယာ အစ်ကိုကြီးက... စီနီယာ အစ်ကိုကြီးက..."

မော့ရှာ စကားစ ပျောက်သွားတာ မြင်တော့ ဒီ ဂျူနီယာ ညီလေး အသစ်စက်စက် က သူတို့ စီနီယာ အစ်ကိုကြီး အကြောင်း ဘာမှ မသိဘူး ဆိုတာ ဝူချင်းစစ် ချက်ချင်း နားလည်လိုက်သည်။

ဒါက ဝူချင်းစစ် ကို အကျပ်ရိုက်စေသည်။

ယုတ္တိအရ ကြည့်မယ် ဆိုရင် စီနီယာ အစ်ကိုကြီးက မော့ရှာ ကို ဒီခေါ်လာပြီး သရဲထိန်းချုပ်တဲ့ ပညာ မသင်ပေးခင် အဲဒီစကားတွေ ပြောခဲ့တယ် ဆိုကတည်းက သူ့ကို ကိုယ်ပိုင် တပည့် အဖြစ် သတ်မှတ်ထားတာ သေချာတယ်။

ဒါကြောင့် စီနီယာ အစ်ကိုကြီးက သူ့အကြောင်း ပုံပြင်တွေ ပြောပြဖို့ ဝူချင်းစစ် ကို ချန်ထားခဲ့တာလို့ သူ ခံစားမိတယ်။

ဒါပေမဲ့ ဝူချင်းစစ် နားလည်မှု လွဲမှာကိုလည်း ကြောက်နေသည်။

တကယ်လို့ သူ မှားပြောမိရင် နောက်ဆက်တွဲ ဆိုးကျိုးတွေက ပြင်းထန်လိမ့်မယ်။

ဝူချင်းစစ် တွန့်ဆုတ်နေတုန်း သူတို့ စီနီယာ အစ်ကိုကြီး အကြောင်း ဘာမှ ထပ်စဉ်းစားလို့ မရတော့တဲ့ မော့ရှာ လက်နှစ်ဖက်ယှက်ပြီး ပြောလိုက်သည်။

"အစ်ကိုကြီး ကျေးဇူးပြုပြီး ရှင်းပြပေးပါ"

မော့ရှာ ရဲ့ ရိုးသားတဲ့ မျက်လုံးတွေနဲ့ "အစ်ကိုကြီး" လို့ နားထောင်ကောင်းအောင် ခေါ်လိုက်သံကို ကြားလိုက်ရတော့ ဝူချင်းစစ် ဆုံးဖြတ်ချက် ချလိုက်သည်။

{စီနီယာ အစ်ကိုကြီး ငါ့ကို ဒီအတွက် ချန်ထားခဲ့တာ ဖြစ်ရမယ်}

"ကောင်းပြီ ဒါဆို သေချာ နားထောင်ထား စီနီယာ အစ်ကိုကြီးရဲ့ ကြီးမြတ်မှုကို စကားလုံး နည်းနည်းလေးနဲ့ ရှင်းပြလို့ မရဘူး"

"ဟုတ်ကဲ့ ကျေးဇူးတင်ပါတယ် အစ်ကိုကြီး"

နောက် နာရီဝက် အတွင်းမှာ ဝူချင်းစစ် က စီနီယာ အစ်ကိုကြီးရဲ့ စွမ်းဆောင်ချက် တချို့ကို မဟုတ်ဘူး အံ့ဖွယ် ဖြစ်ရပ်တွေလို့ ခေါ်သင့်တယ် မော့ရှာ ကို ပြောပြလိုက်သည်။

သူ မပြောပြဘဲ ချန်ထားခဲ့တဲ့ အပိုင်းတွေကတော့ နောင်တစ်ချိန် အပြစ်ပေးခံရရင်တောင် ဂျူနီယာ ညီလေးကို အကုန် ပြောမပြခဲ့ပါဘူးလို့ ဆင်ခြေပေးလို့ ရအောင်လို့ပါ။

မော့ရှာ က အရည်အချင်း ပြည့်မီတဲ့ နားထောင်သူ တစ်ယောက်လို့ ပြောလို့ ရပါတယ်။

ဝူချင်းစစ် က စီနီယာ အစ်ကိုကြီးရဲ့ ကြီးမြတ်မှုကို ဖော်ပြလိုက်တိုင်း သူက တက်တက်ကြွကြွ လက်ခုပ်တီး အားပေးလေ့ ရှိသည်။

"အစ်ကိုကြီး... အစ်ကိုကြီးက စီနီယာ အစ်ကိုကြီး နောက်လိုက်နေတာ ကြာပြီ မဟုတ်လား"

ဝူချင်းစစ် လက်ဖက်ရည် သောက်ဖို့ နားနေတုန်း မော့ရှာ စပ်စုချင်စိတ်နဲ့ မေးလိုက်သည်။

"အင်း တော်တော်လေး ကြာနေပြီ"

ဝူချင်းစစ် ခေါင်းညိတ်လိုက်သည်။

"အံ့သြစရာပဲ စီနီယာ အစ်ကိုကြီးရဲ့ ရွေးချယ်ခံရဖို့ ဆိုရင် အစ်ကိုကြီးမှာ ထူးခြားတဲ့ စွမ်းရည်တွေ ရှိနေလို့ ဖြစ်ရမယ် ပြီးတော့ သူ့ဆီကနေ ဒီလောက် ကြာကြာ သင်ယူခွင့် ရထားတာ ဆိုတော့ မျိုးဆက်သစ်တွေကြားမှာ ပါရမီရှင် ဖြစ်လာတာ မဆန်းပါဘူး မော့ရှာ တကယ် လေးစားပါတယ်"

ဒီစကားတွေက ဝူချင်းစစ် ရဲ့ ယားနေတဲ့ နေရာကို တည့်တည့် ကုတ်ပေးလိုက်သလိုပါပဲ။

အခုချိန်မှာ သူ့ခေါင်းထဲမှာ စကားလုံး တစ်လုံးတည်းပဲ ရှိတော့သည်။

{မိုက်တယ်}

စီနီယာ အစ်ကိုကြီးရဲ့ ပထမဆုံးနဲ့ အကြီးဆုံး တပည့် အနေနဲ့ ဝူချင်းစစ် အမြဲတမ်း ဂုဏ်ယူခဲ့ရသည်။

အထူးသဖြင့် စီနီယာ အစ်ကိုကြီးရဲ့ လျှို့ဝှက်ဆန်းကြယ်မှုနဲ့ စွမ်းအားတွေကို ပိုသိလာလေလေ သူဟာ ကောင်းကင်ဘုံရဲ့ ရွေးချယ်ခံရတဲ့ ကံကောင်းသူ တစ်ယောက် ဆိုတာ ပိုသေချာလေလေ ဖြစ်လာခဲ့သည်။

ဒါပေမဲ့ ကံဆိုးစွာနဲ့ ဒီဂုဏ်ယူမှုကို သူတစ်ယောက်တည်းပဲ ခံစားလို့ ရတယ်။

ပြင်ပလူတွေကို... သူ ပြောပြလို့ မရဘူး။

ဂိုဏ်းထဲက တပည့်တွေ အကုန်လုံး သူ့ကို လေးစားအားကျ ကြပေမယ့် ဝူချင်းစစ် သိတယ် သူတို့ရဲ့ လေးစားအားကျမှုတွေက လမ်းကြောင်းလွဲနေတယ် ဆိုတာ။

ရှန့်တိုင်းပြည် ရဲ့ နံပါတ်တစ် လူငယ် တပည့် ဟုတ်လား ဝူချင်းစစ် အဲဒီ ဂုဏ်ပုဒ်ကို ဂရုမစိုက်ဘူး။

စီနီယာ အစ်ကိုကြီးရဲ့ ပထမဆုံး တပည့် ဖြစ်ရတာက သူ့ရဲ့ အကြီးမားဆုံး ဂုဏ်ဒြပ်ပဲ။

ပြင်ပလူတွေကို ပြောပြလို့ မရတော့ သူ့ရဲ့ ဂျူနီယာ ညီလေး အနည်းငယ်က သူ့ကို အစ်ကိုကြီး တစ်ယောက်လို ခံစားရအောင် လုပ်ပေးဖို့ ခက်ခဲနေသည်။

ဒုတိယ ဂျူနီယာ ညီလေး ကူချင်းဟွမ်း က အရမ်း တော်လွန်းတယ် အုပ်စုလိုက် လှုပ်ရှားရင် ဝူချင်းစစ် ကတောင် ကိုယ့်ကိုယ်ကို ဂျူနီယာ ညီလေးလို့ ခံစားရလောက်တယ်။

ပြီးတော့ စီနီယာ အစ်ကိုကြီးက ဂျူနီယာ ညီလေး ကူ ကို သူ့ထက် ပိုတန်ဖိုးထားတယ်လို့လည်း သူ ခံစားရလေ့ ရှိသည်။

တတိယ ဂျူနီယာ ညီလေး လော့ဝမ်ကျိုး ကလည်း အရမ်း တော်ပြီး ကိစ္စတွေကို တစ်ယောက်တည်း ဖြေရှင်းနိုင်လေ့ ရှိတယ် သူ့အကူအညီ လုံးဝ မလိုဘူး။

ဝူချင်းစစ် က ဒီနှစ်ယောက် သူ့ကို မလေးစားဘူးလို့ ခံစားရတာ မဟုတ်ပါဘူး။

ဆန့်ကျင်ဘက် အနေနဲ့ သူတို့နှစ်ယောက်လုံးက အပြောအဆိုရော အပြုအမူပါ သူ့ကို စီနီယာ အစ်ကိုကြီး တစ်ယောက်လို အလွန် လေးစားကြပါတယ်။

တစ်ခုပဲ ရှိတယ် ဝူချင်းစစ် ပိုလိုချင်တာက ဂျူနီယာ ညီလေး တစ်ယောက်က စီနီယာ အစ်ကိုကြီး အပေါ် ထားရှိတဲ့ အားကိုးမှုနဲ့ လေးစားအားကျမှုမျိုး။

ဝူချင်းစစ် က ဒီဘဝမှာ အဲဒီ အခွင့်အရေး ရတော့မှာ မဟုတ်ဘူးလို့ ထင်ခဲ့တာ။

ဘာပဲပြောပြော စီနီယာ အစ်ကိုကြီး လက်ခံလိုက်တဲ့ တပည့်တွေ အကုန်လုံးက ကောင်းကင်ဘုံရဲ့ အချစ်တော်တွေ ချည်းပဲ ပါရမီရော စွမ်းရည်ပါ ထိပ်တန်းအဆင့်တွေ။

ဒါပေမဲ့ ဒီနေ့တော့ ဂျူနီယာ ညီလေး အသစ်စက်စက် အစစ်အမှန် တစ်ယောက် နောက်ဆုံးတော့ ပေါ်လာခဲ့ပြီ။

မော့ရှာ ရဲ့ အသွင်အပြင်က ဂျူနီယာ ညီလေး တစ်ယောက် လိုချင်တဲ့ ဝူချင်းစစ် ရဲ့ စိတ်ကူးယဉ် အိပ်မက်တွေ အားလုံးကို ဖြည့်ဆည်းပေးလိုက်သလိုပါပဲ။

{ဟုတ်တယ် ဒါကမှ လေးစားအားကျတဲ့ ခံစားချက် စီနီယာ အစ်ကိုကြီးရဲ့ တပည့် ဖြစ်ခွင့်ရတာ ဘယ်လောက် အံ့သြစရာ ကောင်းလဲ ဆိုတာ နားလည်တဲ့ သူတစ်ယောက်ဆီက ရလာတဲ့ လေးစားအားကျမှု}

မော့ရှာ ရဲ့ တောက်ပနေတဲ့ မျက်လုံးတွေကို ကြည့်ပြီး ဝူချင်းစစ် ချက်ချင်း တစ်ဖက်သတ် ဆုံးဖြတ်လိုက်သည်။

{ဒီနေ့ကစပြီး သူက ငါ့ရဲ့ အချစ်ဆုံး ဂျူနီယာ ညီလေးပဲ}

...

တစ်ဖက်တွင်မူ ကျန်းပေရန် စိတ်နှလုံးပြန်ဂိုဏ်း သို့ ပြန်ရောက်နေပြီ ဖြစ်သည်။

ဝူချင်းစစ် ကို မခေါ်လာခဲ့ရတဲ့ အကြောင်းရင်းက တကယ်တမ်းတော့ မော့ရှာ ကို "ပညာပေး" စေချင်လို့ပါပဲ။

ဘာပဲပြောပြော ကိုယ့်အကြောင်း ကိုယ်ပြန်ကြွားရတာ အနေခက်တယ်လေ ဒါကြောင့် ဝူချင်းစစ် ကို လုပ်ခိုင်းလိုက်တာ အကောင်းဆုံးပဲ။

{သူ ငါ့သဘောထားကို နားလည်လိမ့်မယ်လို့ မျှော်လင့်ပါတယ်}

တောင်ထွတ် ကို ရောက်တော့ ခန်းမသခင်တွေကို သွားနှုတ်ဆက်ဖို့ ကျန်းပေရန် ပြင်လိုက်ပေမယ့် ကျောက်စိမ်း ငှက်ပိတုန်းလေး တစ်ကောင် သူ့ဆီ အမြန် ပျံသန်းလာတာ ရုတ်တရက် တွေ့လိုက်ရသည်။

လက်ညှိုးထောင်ပြီး ငှက်ကလေးကို ဖမ်းလိုက်ကာ အတောင်ပံအောက်က စာကို ယူလိုက်သည်။

ဖြန့်ခင်း ဖတ်ရှုလိုက်ရာ လော့ဝမ်ကျိုး ဆီက စာဖြစ်နေတာ တွေ့လိုက်ရသည်။

{သူ့ရဲ့ စွမ်းဆောင်ရည်က တကယ် မဆိုးဘူးပဲ}

စာတစ်စောင်လုံး ဖတ်ပြီးနောက် ကျန်းပေရန် မင်္ဂလာတိမ်တိုက် တစ်ခု ချက်ချင်း ဖန်တီးလိုက်ပြီး စိတ်နှလုံးပြန်ဂိုဏ်း ထဲကနေ ထွက်ခွာသွားလိုက်သည်။

ရေကန်ကြီး တစ်ခုဘေးကို ပျံသန်းသွားပြီး တိမ်တိုက်ပေါ်ကနေ ဖြည်းဖြည်းချင်း ဆင်းသက်လိုက်သည်။

"ဆရာ"

တိမ်တိုက်ပေါ်က ဆင်းဆင်းချင်းမှာပဲ အဝေးကနေ အံ့သြဝမ်းသာ အော်ဟစ်သံ တစ်ခု ကြားလိုက်ရသည်။

လှည့်ကြည့်လိုက်တော့ လော့ဝမ်ကျိုး သူ့ဆီ အမြန်ဆုံး အရှိန်နဲ့ ပြေးလာနေတာ တွေ့လိုက်ရသည်။

"ဒီကာလအတွင်း မင်း ပင်ပန်းသွားပြီ"

လော့ဝမ်ကျိုး ရပ်တန့်သွားတော့ ကျန်းပေရန် နှစ်သိမ့်စကား ပြောလိုက်သည်။

"လုံးဝ မပင်ပန်းပါဘူး ကိစ္စ သေးသေးလေးတွေပါ"

ပြောပြီးတာနဲ့ လော့ဝမ်ကျိုး သူ့သိုလှောင်လက်စွပ်ထဲက မြေပုံ အများအပြားကို ချက်ချင်း ထုတ်ယူပြီး ကျန်းပေရန်ကို ကမ်းပေးလိုက်သည်။

"ဆရာ ဒါတွေက ဆရာ ဆွဲခိုင်းထားတဲ့ မြေပုံတွေပါ ကြည့်ရှုပေးပါ ကျေနပ်ရဲ့လား"

လွန်ခဲ့တဲ့ နှစ်နှစ်တုန်းက ကျန်းပေရန် လော့ဝမ်ကျိုး ကို တာဝန် နှစ်ခု ပေးခဲ့သည်။

တစ်ခုက တခြားနိုင်ငံတွေကို သွားပြီး အပင်မျိုးစေ့ အမျိုးမျိုး ရှာဖွေ သယ်ဆောင်လာဖို့ အရင်တုန်းက အာလူးတွေက ရလဒ် တစ်ခု ဖြစ်သည်။

ဒုတိယ တစ်ခုကတော့ မျိုးစေ့ ရှာဖွေနေရင်း နိုင်ငံအသီးသီးရဲ့ နယ်မြေတွေကို မှတ်သားပြီး မြေပုံ ရေးဆွဲဖို့ ဖြစ်သည်။

ဒီအတွက် ကျန်းပေရန် သူ့ကို မြေပုံရေးဆွဲနည်း အတတ်ပညာ တစ်ခုလုံး သင်ပေးထားခဲ့သည်။

အခု နှစ်နှစ် ကြာပြီးနောက် လော့ဝမ်ကျိုး သူ့အိမ်စာတွေကို နောက်ဆုံးတော့ လာအပ်ပါပြီ။

ရှင်းလင်းပြတ်သားတဲ့ နိုင်ငံ မြေပုံတွေကို ကြည့်ပြီး ကျန်းပေရန် ကျေနပ်စွာ ပြောလိုက်သည်။

"မဆိုးဘူး ငါ ထင်ထားတာထက်တောင် ပိုကောင်းသေးတယ်"

"ချီးကျူးတဲ့အတွက် ကျေးဇူးတင်ပါတယ် ဆရာ"

လော့ဝမ်ကျိုး လက်နှစ်ဖက်ယှက်ပြီး ပြောလိုက်သည်။

မြေပုံတွေကို သိမ်းဆည်းလိုက်ပြီး ကျန်းပေရန် လော့ဝမ်ကျိုး ကို ဝိညာဉ်အာရုံနဲ့ ပေါ့ပေါ့ပါးပါး စစ်ဆေးလိုက်ရာ သူ့ကျင့်ကြံခြင်းကလည်း အနက်ရောင် ဝိညာဉ်အဆင့် ရောက်နေတာ တွေ့ရှိလိုက်ရသည်။

{သူတို့အားလုံး ဘယ်လိုလုပ် အံ့သြစရာတွေ ဖန်တီးတတ်နေကြတာလဲ}

အရင်က ကျင့်ကြံခြင်း ထိုးတက်သွားတဲ့ နှစ်ယောက်က ကျန်းပေရန်ကို အံ့သြစေခဲ့ပြီးသား ဖြစ်ပေမယ့် ဒီ လော့ဝမ်ကျိုး နဲ့ ယှဉ်ရင် အံ့သြမှုက ဘာမှ မဟုတ်တော့ဘူး။

ဘာလို့လဲဆိုတော့ လော့ဝမ်ကျိုး က ကျင့်ကြံခြင်း အပေါ် လုံးဝ အာရုံမစိုက်ခဲ့လို့ပဲ။

သူ့အတွက်က ဆေးဖော်တာက ထိပ်တန်း ဦးစားပေးပဲ ဒါကြောင့်လည်း ကျန်းပေရန် သူ့ကို မြေပုံဆွဲတဲ့ တာဝန် ပေးခဲ့တာ။

ပထမအချက် - သူက သတင်းအချက်အလက် စုဆောင်းတာ တော်ပြီး ရောက်လေရာ အရပ်မှာ အလွယ်တကူ ရောနှောဝင်ရောက်နိုင်တယ်။

ဒုတိယအချက် - သူက ကျင့်ကြံခြင်းကို စိတ်မဝင်စားဘူး ပျင်းစရာကောင်းတဲ့ လေ့ကျင့်မှုတွေနဲ့ ယှဉ်ရင် ဒီလို ခရီးသွား ပုံစံ တာဝန်က သူ့အတွက် ပိုသင့်တော်တာ ထင်ရှားနေတယ်။

ဒါပေမဲ့ မထင်မှတ်ထားဘဲ ဒီကောင်လေးက ခရီးစဉ်မှာ ပျော်ရွှင်ခဲ့ရုံတင် မကဘူး ကျင့်ကြံခြင်းလည်း နောက်ကျ မကျန်ခဲ့ဘူး သူ့စီနီယာ အစ်ကိုကြီး နှစ်ယောက်ထက် တစ်စက်မှ မလျော့ဘူး။

"မင်း ဘယ်တုန်းက အနက်ရောင် ဝိညာဉ်အဆင့် ရောက်သွားတာလဲ ကံကောင်းခြင်း တစ်ခုခု ကြုံခဲ့လို့လား"

ကျန်းပေရန် တိုက်ရိုက် မေးလိုက်သည်။

သူ့ဆရာနဲ့ ရင်ဆိုင်ရတော့ လော့ဝမ်ကျိုး သဘာဝကျကျ ဘာမှ ဖုံးကွယ်မထားရဲပေ။

သူ လက်နှစ်ဖက်ယှက်ပြီး တိုက်ရိုက် ပြန်ဖြေလိုက်သည်။

"ဆရာ့ကို သတင်းပို့ပါရစေ ကျွန်တော် ချူတိုင်းပြည် ကို ဖြတ်သွားတုန်းက မျိုးနွယ်စု ခေါင်းဆောင် တစ်ယောက်ရဲ့ သားကြီးကို ကယ်တင်ခဲ့ဖူးပါတယ် ကျေးဇူးဆပ်တဲ့ အနေနဲ့ အဲဒီ မျိုးနွယ်စု ခေါင်းဆောင်က သူတို့မိသားစုရဲ့ လျှို့ဝှက် နည်းစနစ်ကို သုံးပြီး အတွင်းအား ပမာဏ အများကြီးကို ကျွန်တော့် ခန္ဓာကိုယ်ထဲ လွှဲပြောင်းပေးခဲ့လို့ အဆင့်နှစ်ဆင့် တက်သွားတာပါ"

{အဲဒီလို လျှို့ဝှက် နည်းစနစ်မျိုး ရှိသေးတာလား}

စွမ်းအားကို တိုက်ရိုက် ထိုးထည့်ပေးတဲ့ လုပ်ရပ်မျိုး ကျန်းပေရန် တစ်ခါမှ မမြင်ဖူးဘူး။

ဒါပေမဲ့ နက်နက်နဲနဲ မစဉ်းစားခင် သူ အရင် မေးလိုက်သည်။

"ဒီ လျှို့ဝှက် နည်းစနစ် မှာ ကန့်သတ်ချက်တွေ ရှိလား"

"ဆရာက ဉာဏ်ပညာ ကြီးမားပါတယ် အဲဒီ မျိုးနွယ်စု ခေါင်းဆောင် ပြောပြချက်အရ ဒီ လျှို့ဝှက် နည်းစနစ် ကို သုံးဖို့ ပြင်ဆင်စရာတွေ အများကြီး လိုအပ်တယ်လို့ ပြောပါတယ် ဒါပေမဲ့ ဘာတွေလဲ ဆိုတာတော့ အတိအကျ မပြောပါဘူး"

လျှို့ဝှက် နည်းစနစ် ဆိုမှတော့ ပြင်ပလူကို လက်ဆင့်ကမ်းမှာ မဟုတ်တာ သေချာတာပေါ့။

ဒါပေမဲ့ မျိုးနွယ်စု ခေါင်းဆောင် မပြောပြရင်တောင် ဒီလို နည်းစနစ်မျိုး သုံးဖို့ ဘယ်လောက် ခက်ခဲမလဲ ဆိုတာ ကျန်းပေရန် ခန့်မှန်းလို့ ရသည်။

ဘာပဲပြောပြော မခက်ခဲဘူး ဆိုရင် သူတို့ အနက်ရောင် ဝိညာဉ်အဆင့် ကျွမ်းကျင်သူတွေကို အစုလိုက်အပြုံလိုက် မွေးထုတ်ပေးနိုင်မှာပေါ့ အဲဒီကျရင် ကောင်းကင်ဘုံကိုတောင် အနိုင်ယူနိုင်တော့မှာ မဟုတ်ဘူးလား။

ဒါပေမဲ့ ဘယ်လောက်ပဲ ရှုပ်ထွေးပါစေ အတွင်းအားကို တိုက်ရိုက် ထိုးထည့်ပေးနိုင်တဲ့ နည်းစနစ်က တော်တော်လေး လွှမ်းမိုးနိုင်စွမ်း ရှိပြီး ကျန်းပေရန်ရဲ့ စပ်စုချင်စိတ်ကို နှိုးဆွပေးလိုက်သည်။

"ချူတိုင်းပြည် က ဘယ်မိသားစုလဲ"

"ချူ မိသားစု ပါ မျိုးနွယ်စု ခေါင်းဆောင် နာမည်က ချူကျိဇယ် ပါ အနက်ရောင် ဧကရာဇ် အဆင့် ကျွမ်းကျင်သူပါ"

သူ့ဆရာ စိတ်ဝင်စားသွားတဲ့ မျက်နှာထားကို ကြည့်ပြီး လော့ဝမ်ကျိုး လက်နှစ်ဖက်ယှက်ကာ ပြောလိုက်သည်။

"ဆရာ ဒီတပည့် လမ်းခရီးမှာ ထူးဆန်းအံ့သြဖွယ် ကိစ္စတွေ အများကြီး ကြုံတွေ့ခဲ့ရပါတယ် ဆရာ နားထောင်ချင်မလား မသိဘူး"

"ပြောပြလေ"

ကျန်းပေရန် ခေါင်းညိတ်လိုက်သည်။

ဆရာ စိတ်ဝင်စားတာ မြင်တော့ လော့ဝမ်ကျိုး ရေတံခါး ပွင့်သွားသလိုမျိုး မရပ်မနား စတင် ပြောပြတော့သည်။

လော့ဝမ်ကျိုး ပြောလို့ ပြီးတဲ့အချိန်မှာ နေမင်းကြီးက တောင်တန်းတွေ နောက်ကို ဖြည်းဖြည်းချင်း ဝင်ရောက်သွားပြီ ဖြစ်ပြီး နေဝင်ဆည်းဆာ အရောင်တွေက ကောင်းကင် တစ်ဝက်ကို အနီရောင် ဆိုးထားသည်။

"ဒီခရီးစဉ်မှာ မင်း အများကြီး ရလာခဲ့ပုံပဲ"

ကျန်းပေရန် ပြုံးပြီး ပြောလိုက်သည်။

လော့ဝမ်ကျိုး ပြောပြတဲ့ ဇာတ်လမ်းတွေက ကျန်းပေရန်ကိုတောင် ကမ္ဘာကြီးက ကျယ်ဝန်းပြီး အံ့ဖွယ်တွေနဲ့ ပြည့်နှက်နေတယ်လို့ ခံစားရစေသည်။

ဒီတိုက်ကြီးပေါ်မှာ သူ ရှာဖွေတွေ့ရှိဖို့ စောင့်ကြိုနေတဲ့ အံ့သြဖွယ်ရာတွေနဲ့ ခမ်းနားထည်ဝါမှုတွေ အများကြီး ကျန်ရှိနေသေးတာ အမှန်ပါပဲ။

"ဆရာ့ရဲ့ ကောင်းချီးပေးမှုကြောင့်ပါ"

လော့ဝမ်ကျိုး ပခုံးကို ပုတ်လိုက်ပြီး ကျန်းပေရန် မင်္ဂလာတိမ်တိုက် တစ်ခု ဖန်တီးလိုက်ကာ လော့ဝမ်ကျိုး ကို လက်ယပ်ခေါ်လိုက်သည်။

"တက်လာခဲ့ ဆရာ မင်းကို နေရာကောင်း တစ်ခု ခေါ်သွားမယ်"