မီးလောင်နေသော အရာများ

အရပ်ရှည်ရှည် အမျိုးသား အလောင်းကောင်ကြီးသည် အလွန် ထူးဆန်းပြီး တစ္ဆေကြမ်း အများအပြား ကပ်ငြိနေသဖြင့် ကြောက်မက်ဖွယ် ကောင်းလှသည်။

ယန်ကျန့်သည် ဒီအမျိုးသား အလောင်းကောင်ကြီးနှင့် ပတ်သက်ဆက်နွယ်မှု ရှိနေသည်။ သူ ထိန်းချုပ်ထားသော တစ္ဆေအရိပ်နှင့် ထင်းခုတ်ဓားသည် ဒီအမျိုးသား အလောင်းကောင်ကြီးထံမှ ရရှိခဲ့ခြင်း ဖြစ်သည်။ သို့သော်လည်း ဒီအလောင်းကောင်ကြီးသည် ထူးဆန်းပြီး ကြောက်စရာ ကောင်းနေဆဲ ဖြစ်သည်။

ဒီအလောင်းကောင်ကြီးသည် ဆီဇာဟိုတယ်တွင် လှည့်လည်သွားလာနေသည်မှာ ဘယ်လောက်ကြာပြီလဲ ဆိုတာ ဘယ်သူမှ မသိကြပေ။

သိရသလောက်ကတော့ ဒီအလောင်းကောင်သည် အမြဲတမ်း အဆင့်မြင့် ဆွေးမြေ့နေသော အခြေအနေတွင် ရှိနေသော်လည်း လုံးဝ ပုပ်သိုးပျက်စီးမသွားဘဲ တည်ရှိနေခြင်း ဖြစ်သည်။

ခန္ဓာကိုယ်ပေါ်ရှိ သဘာဝလွန် စွမ်းအားများသည် ဒီအလောင်းကောင်ကို အမြဲတမ်း လှုပ်ရှားနေစေသည်။

ထို့ကြောင့် ယခုလက်ရှိ အမျိုးသား အလောင်းကောင်ကြီးသည် အလွန် ကြောက်မက်ဖွယ် ကောင်းသော တစ္ဆေကြမ်း တစ်ကောင် ဖြစ်နေပြီး ယခင် ယန်ကျန့် တွေ့ခဲ့စဉ်က ပုံစံနှင့် လုံးဝ ကွဲပြားကာ အပြောင်းအလဲ အချို့ ဖြစ်ပေါ်နေပြီ ဖြစ်သည်။

သေဆုံးသွားသော ဝမ်ကန်ချွမ်းသည် အကောင်းဆုံး သက်သေ ဖြစ်သည်/

{ဒီဆွေးမြေ့နေတဲ့ အလောင်းကောင်က မီးရောင်ကြောင့် စိတ်ဝင်စားသွားတာလား ဒါမှမဟုတ် ထိန်းချုပ်မှုမဲ့နေတဲ့ မီးကို လာငြိမ်းသတ်တာလား}

ယန်ကျန့် အဝေးမှ လှမ်းကြည့်နေသည်။ အရပ်ရှည်ရှည် အမျိုးသား အလောင်းကောင်ကြီးသည် မီးတောက်များ ရှိရာသို့ ယုံကြည်ချက်ရှိရှိ လျှောက်သွားနေသည်ကို ကြည့်ရင်း စဉ်းစားနေမိသည်။

{ဘာပဲဖြစ်ဖြစ် အခုအချိန်က ပြဿနာနည်းလေ ကောင်းလေပဲ သူ မီးငြိမ်းသတ်ဖို့ လာတာဆိုရင် ငါ မီးဆက်ရှို့ရမယ် မီးတောက် ပိုကြီးလာအောင် ကြိုးစားရမယ်}

ယန်ကျန့် ပတ်ဝန်းကျင်ကို တစ်ချက်ကြည့်လိုက်သည်။

လက်ရှိ သုံးလွှာတွင် နေရာသုံးခု၌ မီးလောင်ကျွမ်းနေသည်။

တစ်ခုမှာ ယခင်က ထိန်းချုပ်မှုမဲ့သွားသော မီးလောင်ရာနေရာ ဖြစ်ပြီး ကျန်နှစ်ခုမှာ ကျူးကျန့်နှင့် အာနန်တို့၏ အလောင်းကောင်များ ရှိသော နေရာများ ဖြစ်သည်။

ပထမနေရာတွင် မီးတောက် ကြီးမားနေပြီ ဖြစ်သော်လည်း နောက်နှစ်နေရာတွင် မီးစလောင်ကာစသာ ရှိသေးသည်။ သို့သော် ကြီးထွားလာမည့် အလားအလာ ရှိသည်။

ဒီအမျိုးသား အလောင်းကောင်ကြီးသည် တကယ်ပဲ မီးငြိမ်းသတ်ရန် လာခြင်း ဆိုပါက အချိန်တိုအတွင်း မီးလောင်ရာ နေရာအားလုံးကို ငြိမ်းသတ်နိုင်မည် မဟုတ်ပေ။

ယန်ကျန့် တုံ့ဆိုင်းမနေတော့ပေ။

သူသည် မီးကျွမ်းနေသော တစ္ဆေလက်ကို အသုံးပြုပြီး နေရာအနှံ့မှ အလောင်းကောင်များကို စတင် မီးရှို့လိုက်သည်။

စိတ်ချရစေရန်အတွက် ယန်ကျန့်သည် မီးလောင်ရာ နေရာများကို တတ်နိုင်သမျှ များအောင် ဖန်တီးလိုက်ပြီး မမျှော်လင့်သော အရာများ မဖြစ်ပွားစေရန် ကာကွယ်လိုက်သည်။

လုပ်ငန်းစဉ်က ချောမွေ့သည်။

ခဏအတွင်းမှာပင် သုံးလွှာတွင် နောက်ထပ် မီးလောင်ရာ နေရာ ၇၊ ၈ ခု ထပ်တိုးလာသည်။

ယခုအချိန်တွင် မှိန်ဖျော့နေသော သုံးလွှာသည် ထူးခြားစွာ လင်းထိန်လာပြီး ပြင်းထန်သော မီးခိုးနံ့များ လေထဲတွင် ပျံ့နှံ့နေသည်။ မီးရောင်ဟပ်နေသော ယန်ကျန့်၏ အရေပြားသည် စူးရှသော နာကျင်မှုကို ခံစားနေရသည်။

"လီယန် ငါပြောတာ ကြားလား မင်း အသက်ရှင်သေးရင် မြန်မြန် ထွက်ခဲ့ မဟုတ်ရင် ဒီမှာ မီးလောင်သေလိမ့်မယ်"

လီယန် ကြားနိုင်လောက်သည်ဟု မျှော်လင့်ပြီး သူ ထပ်မံ အော်ဟစ်လိုက်သည်။

သို့သော် သူ့အသံသည် အကြိမ်ကြိမ် ပဲ့တင်ထပ်နေသော်လည်း မည်သူမျှ ပြန်မထူးပေ။

မီးတောက်များ ဒီလောက်အထိ ပျံ့နှံ့နေပြီ ဖြစ်သော်လည်း လီယန်၏ အရိပ်အယောင် မတွေ့ရသေးပေ။

"သူ ပြဿနာ တက်နေတာ ဖြစ်မယ် ဆက်အော်နေလည်း ထူးမှာ မဟုတ်ဘူး စောင့်ရုံပဲ ရှိတော့တာပေါ့"

အန္တရာယ်ရှိသော အရာများကို ဆွဲဆောင်မိမည် စိုးသဖြင့် ယန်ကျန့် ဆက်မအော်တော့ပေ။

ထို့နောက် အဝေးမှ အရပ်ရှည်ရှည် အမျိုးသား အလောင်းကောင်ကြီးကို လှမ်းကြည့်လိုက်သည်။

အလောင်းပတ်ပုဆိုး ရစ်ပတ်ထားသော အလောင်းကောင်သည် မီးတောက်များကြားသို့ ဖြည်းညှင်းစွာ ဝင်ရောက်သွားသည်။ ထို့နောက် ထူးဆန်းသော ဖြစ်ရပ်တစ်ခု ပေါ်ပေါက်လာသည်။ လောင်ကျွမ်းနေသော မီးတောက်များသည် အလောင်းကောင်ကို မီးမကူးစက်စေဘဲ သက်ရောက်မှု တစ်ခုခုကြောင့် တိုက်ရိုက် ငြိမ်းသတ်သွားသည်။

သို့သော် ငြိမ်းသွားသော မီးတောက်များသည် တစ်စိတ်တစ်ပိုင်းသာ ဖြစ်သည်။ ပတ်ဝန်းကျင်ရှိ မီးလောင်ကျွမ်းမှု ဧရိယာ ကျယ်ဝန်းလွန်းသဖြင့် အလောင်းကောင် အနီးရှိ မီးတောက်များ ပျောက်ကွယ်သွားသော်လည်း အနည်းငယ် ဝေးသော နေရာများတွင် ဆက်လက် လောင်ကျွမ်းနေဆဲ ဖြစ်သည်။

"ထင်တဲ့အတိုင်းပဲ ဒီအလောင်းကောင်က မီးတောက်တွေကို ကန့်သတ်နိုင်စွမ်း ရှိတာကိုး ကံကောင်းလို့ အခု မီးတောက် ကြီးနေတာ ဒီလောက် ကြောက်စရာကောင်းတဲ့ တစ္ဆေကြမ်းတောင် ဒီက မီးအားလုံးကို မငြိမ်းသတ်နိုင်ဘူး"

ဒီမြင်ကွင်းကို မြင်လိုက်ရသောအခါ ယန်ကျန့် အစပိုင်းတွင် တင်းမာသွားသော်လည်း နောက်ပိုင်းတွင် စိတ်သက်သာရာ ရသွားသည်။

မီးမငြိမ်းသရွေ့ အဆင်ပြေသည်။ မဟုတ်လျှင် အခြေအနေ ရှုပ်ထွေးသွားလိမ့်မည်။

အရပ်ရှည်ရှည် အမျိုးသား အလောင်းကောင်ကြီးသည် ဆက်လက် ရှေ့တိုးသွားသည်။

အလောင်းကောင် ပတ်ဝန်းကျင်ရှိ မီးတောက်များ ငြိမ်းသွားသော်လည်း ရှေ့ဆက်သွားသည်နှင့် နောက်ကျန်ရစ်ခဲ့သော ငြိမ်းသွားသည့် နေရာများတွင် မီးပြန်တောက်လာသည်။

တဖြည်းဖြည်းနှင့် အလောင်းကောင်သည် မီးပင်လယ် အလယ်သို့ နက်ရှိုင်းစွာ ဝင်ရောက်သွားပြီး နောက်ဆုံးတွင် လုံးဝ ဝါးမြိုခံလိုက်ရကာ မမြင်ရတော့ပေ။

ယန်ကျန့်၏ တစ္ဆေမျက်လုံးပင်လျှင် မီးတောက်များကြားမှ မြင်ကွင်းကို မမြင်ရတော့ပေ။

"မီးတောက်တွေကြားထဲမှာ ဘာရှိလို့လဲ မီးဖိုလား၊ သုံးလွှာက တစ္ဆေလား ဒါဆို ဒီအလောင်းကောင်က မီးဖိုဆီ သွားတာလား၊ သုံးလွှာက တစ္ဆေဆီ သွားတာလား"

ယန်ကျန့် နောက်ထပ် အတွေးတစ်ခု တွေးမိလိုက်သည်။

ကံကောင်းသည်မှာ အစီအစဉ် အောင်မြင်သည်။

မီးလောင်ရာ နေရာ ဆယ်ခုထက်မနည်း တပြိုင်နက် လောင်ကျွမ်းနေသဖြင့် သုံးလွှာ တစ်ခုလုံး မီးပင်လယ် ဖြစ်လုနီးပါး ဖြစ်နေပြီ။

"အမျိုးသား အလောင်းကောင်ကြီး မီးထဲ ဝင်သွားပြီ ဆိုတော့ ငါ အဲဒီတံခါးကို စရှာလို့ ရပြီ"

ယခုအချိန်တွင် ယန်ကျန့်သည် မီးပင်လယ်ထဲမှ အရာအားလုံးကို ဂရုစိုက်နေသည်။ ပုံမှန် အခြေအနေအရ ဆိုလျှင် အလောင်းကောင်များ မီးလောင်ကျွမ်းသွားသည်နှင့် သုံးလွှာတွင် ဝှက်ထားသော တံခါး သေချာပေါက် ပေါ်လာမည် ဖြစ်သည်။

ကံကောင်းလျှင် တံခါး၏ တည်နေရာကို အမြန် ရှာတွေ့နိုင်သည်။

သို့သော် အချိန်မီ ဆုတ်ခွာရန်လည်း ပြင်ဆင်ထားရမည်။

ယန်ကျန့်သည် သတိလစ်နေသော ထုံချန်ကို ဓာတ်လှေကား အဝင်ဝ အနီးသို့ ရွှေ့ပြောင်းထားလိုက်သည်။ တံခါးကို ချောချောမွေ့မွေ့ ရှာမတွေ့ပါက ဓာတ်လှေကားစီးပြီး သုံးလွှာမှ ယာယီ ထွက်ခွာရမည်။

သူ့တစ္ဆေမျက်လုံးဖြင့် ပတ်ဝန်းကျင်ကို ကြည့်၍ မရတော့ပေ။

မီးရောင်ဟပ်နေသောကြောင့် တစ္ဆေမျက်လုံး ဖွင့်လိုက်သည်နှင့် ပူလောင်သော နာကျင်မှုကို ခံစားရသည်။ မျက်လုံးကန်းမသွားသော်လည်း ပြင်းထန်သော နာကျင်မှုကို ခံနိုင်ရည် မရှိပေ။

ကံကောင်းသည်မှာ ယခု အလင်းရောင် အလွန် ကောင်းမွန်နေပြီး မြင်ကွင်း ရှင်းလင်းနေသဖြင့် တစ္ဆေမျက်လုံး အထူးတလည် မလိုဘဲ ပတ်ဝန်းကျင် အရာအားလုံးကို ရှင်းလင်းစွာ မြင်နေရသည်။

အလောင်းကောင်များ လောင်ကျွမ်းနေစဉ် အရေအတွက်လည်း ဆက်တိုက် လျော့နည်းလာသည်။

အလောင်းကောင် တောင်ပုံရာပုံကြီးများ ပြိုကျလာပြီး မီးလောင်ပြီးသည်နှင့် မီးကျွမ်းနေသော အလောင်းခြောက်များ အဖြစ် လျင်မြန်စွာ ပြောင်းလဲသွားသည်။ ဆက်လက် လောင်ကျွမ်းပါက ပြာကျသွားမည် ဖြစ်ပြီး ဘာမှ ကျန်ရစ်မည် မဟုတ်ပေ။

ဒီလို ထူးဆန်းသော မီးဖိုမီးအောက်တွင် ကျန်ရစ်နိုင်မည့် အရာများမှာ တစ္ဆေများ၊ သဘာဝလွန် ပစ္စည်းများနှင့် သဘာဝလွန် စွမ်းအား သက်ရောက်မှု မရှိသော ရွှေများသာ ဖြစ်လိမ့်မည်။

ထို့ကြောင့် ယန်ကျန့် သူ့လှံရှည် ပျောက်ဆုံးသွားမည်ကို မပူပန်ပေ။ ဒီနေရာ မီးလောင်ကျွမ်းသွားသည်နှင့် ပျောက်ဆုံးနေသော ပစ္စည်းများ ပေါ်လာမည် ဖြစ်သည်။

"အဲဒီတံခါးက ရွှေနဲ့ လုပ်ထားတာ ဆိုတော့ ပုံသဏ္ဍာန်နဲ့ အရွယ်အစား ပြောင်းလဲမှာ မဟုတ်ဘူး သုံးလွှာက တစ္ဆေတွေ အနေနဲ့ ဒီတံခါးကို ဖုံးကွယ်ထားနိုင်မယ့် တစ်ခုတည်းသော နည်းလမ်းက အလောင်းကောင်တွေနဲ့ ဖုံးအုပ်ထားတာပဲ တံခါးက နှစ်မီတာလောက် မြင့်တယ် နှစ်မီတာ အမြင့်ရှိတဲ့ တံခါးကို လုံးဝ ဖုံးကွယ်ထားဖို့က တော်တော် ခက်ခဲတယ်"

"ဒါပေမဲ့ တံခါးကို လှဲချထားတာမျိုးလည်း ဖြစ်နိုင်တယ်"

ယန်ကျန့် စိတ်ထဲမှ တွေးတောပြီး ကျိုးကြောင်းဆီလျော်သော သုံးသပ်ချက်ဖြင့် တံခါး၏ တည်နေရာကို ဆုံးဖြတ်ရန် ကြိုးစားလိုက်သည်။

သူ မီးတောက်များ မြင့်မားစွာ တက်နေသော နေရာများကို ကြည့်ပြီး တံခါး၏ ခြေရာလက်ရာများကို ရှာဖွေလိုက်သည်။

ဝမ်းနည်းစရာ ကောင်းသည်မှာ မီးတောက်များ ကြီးမားလွန်းသဖြင့် မျက်စိနာအောင် ကြည့်သော်လည်း ဘာမှ မမြင်ရပေ။

"လီယန် မပေါ်လာသေးဘူး ဒီအလောင်းကောင်ပုံတွေကြားထဲမှာ တစ္ဆေ ရိုက်နှက်တာ ခံလိုက်ရပြီလား"

ယန်ကျန့် လီယန်၏ ခြေရာလက်ရာများကိုလည်း ရှာဖွေနေသည်။

သို့သော် ယခုအချိန်အထိ လီယန် ပေါ်မလာသေးပေ။ လီယန်သည် သုံးလွှာရှိ တစ္ဆေများနှင့် တွေ့ဆုံပြီး အသတ်ခံလိုက်ရပြီဟု သံသယ ဝင်စပြုလာသည်။

သူက ထူးခြားသော အခြေအနေ မဟုတ်သဖြင့် သုံးလွှာရှိ တစ္ဆေများ၏ ပစ်မှတ်ထားခြင်း ခံရပြီး အသတ်ခံရနိုင်ခြေ များသည်။

"ခဏလောက် ထပ်စောင့်ကြည့်မယ် တံခါး ရှာမတွေ့ဘူး၊ လီယန်လည်း ပြန်မလာဘူး ဆိုရင် ဒီကနေ ဆုတ်ခွာမှ ရတော့မယ်"

ယန်ကျန့် လက်ပြန်လှမ်းပြီး နောက်ရှိ ဓာတ်လှေကား ခလုတ်ကို နှိပ်လိုက်သည်။

ဓာတ်လှေကား လည်ပတ်သံ ချက်ချင်း ထွက်ပေါ်လာသည်။

ဓာတ်လှေကား ရောက်လာသည်နှင့် ထုံချန်ကို ခေါ်ပြီး ချက်ချင်း ထွက်ခွာမည်။

မီးတောက်များ ဆက်လက် ပျံ့နှံ့နေသည်။ သုံးလွှာ တစ်ဝက်ခန့် မီးလောင်ကျွမ်းနေပြီ ဖြစ်သည်။

သဘာဝလွန် မီးဖိုသည် ကြောက်မက်ဖွယ် ကောင်းသလို အန္တရာယ်လည်း များလှသည်။

တောက်လောင်နေသော မီးတောက်များကြားမှ ထူးဆန်းသော အသံမျိုးစုံ ထွက်ပေါ်လာသည်။ သေဆုံးနေသည်မှာ ကြာမြင့်နေပြီ ဖြစ်သော အလောင်းကောင်များ မီးလောင်ကျွမ်းသောအခါ စူးရှစွာ အော်ဟစ်နေကြသည်။ သို့သော် အော်ဟစ်သံများက တိုတောင်းသည်။ အော်ပြီးသည်နှင့် လုံးဝ တိတ်ဆိတ်သွားပြီး အသံ ထပ်မထွက်တော့ပေ။

အချို့ အလောင်းကောင်များသည် မီးထဲတွင် မျက်လုံးပွင့်လာပြီး နိုးထလာကာ "ငါ မသေချင်ဘူး၊ ကယ်ကြပါဦး" ဟု ပြောဆိုကြသည်။

သဘာဝလွန် ဟန်ချက်ပျက်ပြားသွားသဖြင့် သေဆုံးသူများ၏ မသေခင်က မှတ်ဉာဏ် သို့မဟုတ် အသိစိတ် အချို့ ခေတ္တ ပြန်လည် နိုးထလာခြင်း ဖြစ်ကြောင်း ယန်ကျန့် သိသည်။ သို့သော် ထိုအပြုအမူများသည် အလောင်းကောင်များ အသက်ရှင်နေသည်ဟု မဆိုလိုပေ။ သဘာဝလွန် စွမ်းအားက သူတို့၏ အတိတ်အချို့ကို ထိန်းသိမ်းထားခြင်းသာ ဖြစ်သည်။

သေဆုံးနေသော်လည်း အသက်ရှင်စဉ်က မှတ်ဉာဏ်များ ကျန်ရှိနေသော တစ္ဆေကျွန် အချို့ကဲ့သို့ပင် ဖြစ်၏။

မိနစ်အနည်းငယ် ကြာပြီးနောက် ယန်ကျန့် နေရခက်လာသည်။ မီးတောက်များ ပြင်းထန်လွန်းသဖြင့် သူ့အရေပြား နီရဲလာပြီး ပြင်းထန်သော နာကျင်မှုကို ခံစားနေရသည်။

သူ ကြမ်းပြင်ပေါ်မှ အလောင်းကောင် တစ်ခုကို ကောက်ယူပြီး ရှေ့တွင် ကာလိုက်ရသည်။

ရလဒ်က ထိရောက်သည်။

မီးရောင်၏ သက်ရောက်မှု ပျောက်ကွယ်သွားသော်လည်း လက်ထဲမှ အလောင်းကောင်သည် လျင်မြန်စွာ မီးခိုးထွက်လာပြီး မီးစွဲသွားသဖြင့် မကြာမီ လောင်ကျွမ်းသွားတော့သည်။

"ဒီမှာ ဆက်နေလို့ မဖြစ်တော့ဘူး ချက်ချင်း ထွက်မှ ရမယ်"

ဒီအခြေအနေက သုံးလွှာသည် သက်ရှိများ နေထိုင်ရန် မသင့်တော်တော့ကြောင်း၊ တစ္ဆေဆရာများပင် တောင့်ခံမထားနိုင်တော့ဘဲ ထွက်ခွာရတော့မည် ဖြစ်ကြောင်း ယန်ကျန့်ကို ပြောပြနေသည်။

သို့သော် ယခု ဓာတ်လှေကား မရောက်လာသေး၊ လီယန်ကို ရှာမတွေ့သေး၊ သုံးလွှာရှိ တံခါးကိုလည်း မမြင်ရသေးပေ။

ယန်ကျန့် ထွက်သွားချင်လျှင်တောင် မထွက်နိုင် ဖြစ်နေသည်။

ထို့အပြင် မီးတောက်များ ပျံ့နှံ့နေသဖြင့် ဆက်လက် စောင့်ဆိုင်းရုံမှတစ်ပါး ဘာမှ မလုပ်နိုင်ပေ။

"မိနစ်နည်းနည်းလောက် ထပ်စောင့်မယ် မမျှော်လင့်တာ ဘာမှ မဖြစ်ရင် တစ္ဆေရေကန်ကနေတဆင့် ဒီကနေ ထွက်ခွာရတော့မယ်"

ယန်ကျန့် အသက်ပြင်းပြင်း ရှူလိုက်ပြီး မီးလောင်နေသော အလောင်းကောင်ကို အဝေးသို့ လွှင့်ပစ်လိုက်ကာ နောက်ထပ် အလောင်းကောင် တစ်ခု ကောက်ယူပြီး ရှေ့တွင် ကာလိုက်ပြန်သည်။

အလောင်းကောင်သည် ၁၀ စက္ကန့်ခန့် အပူဒဏ်ခံနိုင်ပြီး နာကျင်မှုကို လျှော့ချပေးနိုင်သော်လည်း ၁၀ စက္ကန့်ကျော်လျှင် မီးစွဲသွားသဖြင့် အဝေးသို့ လွှင့်ပစ်ရပြန်သည်။

ထူးဆန်းသည်မှာ ကြမ်းပြင်ပေါ် လဲနေသော အလောင်းကောင်များသည် မီးအပူရှိန်ကြောင့် မီးမစွဲဘဲ မီးတောက်နှင့် အလွန်နီးကပ်သော အလောင်းကောင်များသာ မီးစွဲခြင်း ဖြစ်သည်။

အချိန် ကုန်ဆုံးလာသည်။

အခြေအနေ ပိုဆိုးလာသည်။

မီးဝါးမြိုနှုန်း မြန်ဆန်လာပြီး ယန်ကျန့်၏ ယခင် နည်းလမ်း အလုပ်မဖြစ်တော့ပေ။ သုံးလွှာ ကြမ်းပြင်ပေါ်ရှိ အလောင်းကောင် အားလုံးသည် ပြင်းထန်သော မီးအပူရှိန်အောက်တွင် နီရဲလာပြီး မည်သူမျှ မလွတ်မြောက်နိုင်တော့ပေ။

အများဆုံး နှစ်မိနစ် အတွင်း ဒီနေရာရှိ အရာအားလုံး မီးဝါးမြိုခံရမည် ဖြစ်ပြီး ရပ်စရာနေရာပင် ရှိတော့မည် မဟုတ်ပေ။

နောက်မှ ဓာတ်လှေကား ရောက်မလာသေးသဖြင့် ယန်ကျန့် စိတ်ပူလာသည်။

ထုံချန် သတိလစ်နေဆဲ ဖြစ်သော်လည်း ခန္ဓာကိုယ်ပေါ်တွင် မီးလောင်ဒဏ်ရာ မတွေ့ရဘဲ နှာခေါင်းမှ သွေးများသာ စီးကျနေသဖြင့် အခြေအနေ ကောင်းမွန်သည်ဟု ယူဆရသည်။

ကျူးကျန့်၏ တိုက်ခိုက်မှုက သူ့ကို အတော်အတန် ထိခိုက်စေခဲ့ပုံ ရသည်။

နောက်ထပ် စက္ကန့် ၃၀ ကြာသွားသည်။

ဓာတ်လှေကား ရောက်မလာသေးပေ။

ယန်ကျန့် ဆက်မစောင့်နိုင်တော့ဟု ခံစားလိုက်ရသည်။ နောက်ဆုံး စက္ကန့်အထိ စောင့်ပြီးမှ ထွက်ခွာလျှင် မမျှော်လင့်သော အရာတစ်ခုခု ဖြစ်လာပါက ကပ်ဘေး ဆိုက်သွားနိုင်သည်။

"နောက် စက္ကန့် ၃၀ နေရင် ငါ ထွက်တော့မယ်"

သူ စိတ်ပိုင်းဆိုင်ရာ ပြင်ဆင်ထားလိုက်သည်။

သို့သော် ထိုအချိန်တွင် ရုတ်တရက် သူနှင့် မလှမ်းမကမ်းရှိ နီရဲနေသော အလောင်းကောင် တစ်ခု လှုပ်ရှားသွားပြီး အောက်မှ လက်တစ်ဖက် ထွက်လာသည်။

"အား…….."

ပေါ်လာသော နေရာတွင် တွင်းနက်ကြီး တစ်ခု ဖြစ်ပေါ်လာပြီး ထိုတွင်းထဲမှ လီယန်၏ အသံ ထွက်ပေါ်လာသည်။

သူ့မျက်နှာ နာကျင်မှုကြောင့် တွန့်လိမ်နေသည်။

အဘယ်ကြောင့်ဆိုသော် သူ့နောက်ကျောဘက်တွင် အေးစက်သော အလောင်းကောင် တစ်ခုက သူ့လည်ပင်းကို တင်းကျပ်စွာ ညှစ်ထားပြီး ကျောကုန်းနှင့် ကပ်ဖိထားသောကြောင့် ဖြစ်သည်။

ထင်ရှားသည်မှာ လီယန် သုံးလွှာရှိ တစ္ဆေ၏ ပစ်မှတ်ထားခြင်း ခံလိုက်ရပြီ ဖြစ်သည်။

သို့သော် သူ့ကို တိုက်ခိုက်နေသော အလောင်းကောင်သည် ယခင်က ယန်ကျန့်ကို တိုက်ခိုက်ခဲ့သော အလောင်းကောင် မဟုတ်သလို အလောင်းကောင် သံချောင်းဖြင့် ရိုက်နှက်ခံထားရသော အလောင်းကောင်လည်း မဟုတ်ပေ။

သုံးလွှာတွင် စတုတ္ထမြောက် တစ္ဆေ ပေါ်လာပြီ ဖြစ်သည်။

လီယန် အလောင်းကောင်များကြားမှ တွားသွားထွက်ရန် ကြိုးစားသော်လည်း တစ္ဆေက လည်ပင်းကို ညှစ်ထားသဖြင့် ခက်ခဲနေသည်။ သို့သော် ခန္ဓာကိုယ်ထဲရှိ သဘာဝလွန် စွမ်းအားများက ပြန်လည် ခုခံနေသဖြင့် အသက်ရှင်နေသေးခြင်း ဖြစ်သည်။

သို့သော် သူ အချိန်ဖြုန်း၍ မရပေ။

အပြင်ဘက် အစီအစဉ်များ ဆက်လက် လုပ်ဆောင်နေကြောင်း၊ အချိန်မီ မလွတ်မြောက်နိုင်ပါက သုံးလွှာရှိ ထိန်းချုပ်မှုမဲ့ မီးတောက်များ သူ့ကို ဝါးမြိုသွားမည် ဖြစ်ကြောင်း လီယန် သိသည်။

"နောက်ကျသွားပြီလား"

လီယန် အလောင်းကောင်ကို တွန်းဖယ်လိုက်ပြီး အပြင်ဘက်ရှိ မီးပင်လယ်ကြီးကို မြင်လိုက်ရသည်။

မီးရောင်ဟပ်လိုက်ရုံဖြင့် တစ်ကိုယ်လုံး မီးစွဲသွားသကဲ့သို့ စူးရှသော နာကျင်မှုကို ခံစားလိုက်ရသည်။

ဒီအခြေအနေတွင် ဘယ်သူမှ မတ်တပ်ရပ်နေနိုင်မည် မဟုတ်ပေ။

"နောက်မကျသေးဘူး မင်း သေပြီ ထင်နေတာ"

နောက်တစ်စက္ကန့်တွင် ယန်ကျန့်၏ အသံ ထွက်ပေါ်လာသည်။

ထို့နောက် မီးကျွမ်းပြီး ပုပ်စော်နံနေသော လက်တစ်ဖက်သည် လီယန် နောက်ကျောရှိ အလောင်းကောင်ကို လှမ်းဆွဲလိုက်သည်။

အနည်းငယ် အားစိုက်လိုက်သည်။

အလောင်းကောင်နှင့် တွယ်ကပ်နေသော လီယန်ပါ ကြွတက်လာသည်။

မြေကြီးနှင့် လွတ်သွားသည်နှင့် ယန်ကျန့် လက်ထဲမှ အလောင်းကောင်သည် ချက်ချင်း လက်လွှတ်လိုက်ပြီး ငြိမ်ကျသွားကာ နီရဲလာပြီး မီးစွဲသွားတော့သည်။

သာမန် အလောင်းကောင် တစ်ခု ဖြစ်သွားပြီး တစ္ဆေ မဟုတ်တော့ပေ။

ယန်ကျန့် ခေတ္တ ရပ်တန့်ပြီး စဉ်းစားလိုက်သည်။

သုံးလွှာရှိ တစ္ဆေ မည်သို့ တည်ရှိနေသလဲ ဆိုတာ သူ နားလည်သွားသလို ရှိသည်။

"အချိန်မရှိတော့ဘူး မြန်မြန် ထွက်ရမယ် ဒီနေရာက အရာအားလုံး မီးလောင်နေပြီ မသွားရင် ငါတို့ပါ မီးလောင်သွားလိမ့်မယ်"

ယန်ကျန့် လီယန်ကို အနားယူချိန် သိပ်မပေးဘဲ ချက်ချင်း ထွက်ခွာရန် ပြင်လိုက်သည်။

လီယန်၏ လည်ပင်း ပေါ်နေပြီး ခန္ဓာကိုယ် တွန့်လိမ်နေကာ တစ္ဆေ၏ နှိပ်စက်မှုကို ခံထားရကြောင်း ထင်ရှားသည်။

"ထုံချန် ဘယ်လိုနေလဲ အဆင်ပြေလား"

လီယန် ရုန်းကန်ပြီး ထရပ်ကာ မေးလိုက်သည်။

"လောလောဆယ် အဆင်ပြေတယ် သဘာဝလွန် တိုက်ခိုက်ခံရပြီး သတိလစ်နေတာ"

ယန်ကျန့် နောက်လှည့်ကြည့်လိုက်ရာ ဓာတ်လှေကား ရောက်မလာသေးပေ။

ဒီသဘာဝလွန် ဓာတ်လှေကားက အရေးကြီးတဲ့ အချိန်ကျမှ ဒုက္ခပေးနေသည်။

စောင့်နေလို့ ရတော့မည် မဟုတ်ဟု သူ ခန့်မှန်းလိုက်သည်။

တစ္ဆေရေကန်၏ သဘာဝလွန် စွမ်းအားကို သုံးပြီး ထွက်ခွာရမလား။

ယန်ကျန့် အခု တစ္ဆေရေကန်ကို အသုံးပြုပြီး အပြင်လောကနှင့် ချိတ်ဆက်ရန် လိုအပ်နေပြီ။

"ခေါင်းဆောင် ငါ တစ္ဆေတိုက်ခိုက်ခံရတုန်းက တံခါးရဲ့ တည်နေရာကို မြင်လိုက်ရတယ် အဲဒီကနေ ထွက်လို့ ရလောက်တယ်"

ရုတ်တရက် လီယန် အရေးကြီးသော သတင်းအချက်အလက် တစ်ခု ပြောပြလိုက်သည်။

"တံခါး ဘယ်မှာလဲ"

ယန်ကျန့် ချက်ချင်း မေးလိုက်သည်။

လီယန် သူ့နောက်ဘက် တစ်နေရာကို ညွှန်ပြလိုက်သည်။

ထိုနေရာတွင် မီးများ တောက်လောင်နေပြီး မီးပင်လယ် ဖြစ်နေပြီ။

ယန်ကျန့်၏ ခန္ဓာကိုယ် စိုရွှဲနေပြီး ရေများ တတောက်တောက် ကျဆင်းနေသော်လည်း မျက်လုံးမှေးပြီး ထိုနေရာကို လှမ်းကြည့်လိုက်သည်။

သို့သော် ဘာမှ မမြင်ရပေ။

"ဘာမှ မရှိပါဘူး"

ယန်ကျန့် မျက်စိမကန်းသေးပေ။ ပတ်ဝန်းကျင် အကုန်လုံးကို ကြည့်ပြီးပြီ။ တံခါးသာ ရှိလျှင် အစောကြီးကတည်းက မြင်နေလောက်ပြီ။ အခုထိ စောင့်နေစရာ မလိုပေ။

"အဲဒီဘက်မှာ သေချာတယ် ငါ တံခါးကို ထိခဲ့ဖူးတယ် ခြေရာလက်ရာတွေ ချန်ခဲ့တယ် ငါ ခံစားမိတယ်"

လီယန် ယုံကြည်ချက်ရှိရှိ အတည်ပြု ပြောကြားလိုက်သည်။

"အခု ရှာတွေ့လည်း သိပ်မထူးတော့ဘူး မီးပင်လယ်ထဲ တိုးဝင်သွားလို့ မဖြစ်ဘူး..."

ယန်ကျန့် ခေါင်းခါလိုက်ပြီး တစ္ဆေရေကန်ကို အသုံးပြုကာ ထွက်ခွာရန် ဆုံးဖြတ်လိုက်သည်။

သို့သော် ထိုအချိန်တွင် မီးတောက်များကြားမှ ပုံရိပ်တစ်ခု ထွက်ပေါ်လာသည်။ မဟုတ်ဘူး၊ လူမဟုတ်ဘူး၊ အရပ်ရှည်ရှည် အမျိုးသား အလောင်းကောင်ကြီး ဖြစ်သည်။

အမျိုးသား အလောင်းကောင်ကြီး နီးကပ်လာသည်နှင့် ပတ်ဝန်းကျင်ရှိ မီးတောက်များ ငြိမ်းသတ်သွားသည်။

မီးတောက်များ ပျောက်ကွယ်သွားသည်နှင့် ခြောက်သွေ့နေသော အလောင်းကောင် ဘေးတွင် ရွှေတံခါး တစ်ချပ် ရှိနေသည်ကို တွေ့လိုက်ရသည်။

အပြင်လောကသို့ ထွက်ခွာနိုင်သော တစ်ခုတည်းသော တံခါး နောက်ဆုံးတွင် ပေါ်လာခဲ့ပြီ။

ဟင်

သို့သော် ထိုအခြေအနေကြောင့် ယန်ကျန့်၏ မျက်ခွံများ လှုပ်ရှားသွားသည်။

အဘယ်ကြောင့်ဆိုသော် တံခါးဘေးတွင် ထိုအရပ်ရှည်ရှည် အမျိုးသား အလောင်းကောင်ကြီး မလှုပ်မယှက် ရပ်နေပြီး သူ့ကို စိုက်ကြည့်နေသကဲ့သို့ ဖြစ်နေသောကြောင့် ဖြစ်သည်။