အခန်း (၁၅၈၃)

မဟာပန်သွန်ကျောက်တုံးများသည် မဟာပန်သွန်ဘုံ၏ အခြေခံငွေကြေး ဖြစ်သည်။ ထို့ပြင် ယင်းတို့က ကျင့်ကြံခြင်းစွမ်းအား၏ အရင်းအမြစ်လည်း ဖြစ်ကြသည်။

ကျင့်ကြံသူများဖြစ်စေ၊ မိစ္ဆာသားရဲများဖြစ်စေ သို့မဟုတ် နတ်သားရဲများဖြစ်စေ ၎င်းတို့သေဆုံးသွားကြသည့်အခါ ၎င်းတို့၏ ခန္ဓာကိုယ်က မိုးမြေအတွက် အာဟာရဓာတ်အဖြစ် ပြောင်းလဲသွားလိမ့်မည်။

ထို့နောက် စွမ်းအင်အလွှာတစ်ခုက မြေကြီး၏ အနက်ပိုင်းထဲသို့ ထိုးဖောက်သွားပြီး မဟာပန်သွန်ကျောက်တုံးများအဖြစ် ဖွဲ့စည်းသွားလိမ့်မည်။

မဟာပန်သွန်ကျောက်တုံးများသည် စွမ်းအင်စုစည်းမှု၏ ဒြပ်ထည်ပုံစံ ဖြစ်သည်။

သို့သော်လည်း ဟန်မူယဲ့ပိုင်ဆိုင်ထားသော မဟာပန်သွန်ကျောက်တုံးများက ထိုနည်းလမ်းဖြင့် ရရှိလာခဲ့ခြင်း မဟုတ်ပေ။

သူက ထိုမဟာပန်သွန်ကျောက်တုံးများကို သွမ့်ဟူရေကန်ထဲမှာ ရှာဖွေတွေ့ရှိခဲ့ခြင်း ဖြစ်သည်။

ကမ္ဘာဦးလောကဆီသို့ ကျူးကျော်ဝင်ရောက်လာကြသူများသည် အနည်းဆုံး သေခြင်းရှင်ခြင်းအဆင့်မှာ ဖြစ်ကြသည်။

ထိုပုဂ္ဂိုလ်များ၏ သေဆုံးမှုမှ ဖွဲ့စည်းသွားသော မဟာပန်သွန်ကျောက်တုံးများကို မဟာပန်သွန်ဘုံ၏ အခေါ်အဝေါ်အရ သေခြင်းရှင်ခြင်းမဟာပန်သွန်ကျောက်တုံးများဟု ခေါ်ကြသည်။ သို့မဟုတ် ယင်းတို့ကို သေခြင်းရှင်ခြင်းကျောက်တုံးများဟုလည်း အလွယ်ခေါ်နိုင်သည်။

သေခြင်းရှင်ခြင်းအဆင့် ကျင့်ကြံခြင်းစွမ်းအားကို ပိုင်ဆိုင်ထားသော မည်သူမဆို မဟာပန်သွန်ဘုံထဲတွင် အဓိကအင်အားစုအဖြစ် သတ်မှတ်ခံရလိမ့်မည်။

ထိုသို့ခန္ဓာကိုယ်များ ပြိုကွဲပျက်စီးသွားသည့်အခါ အစွမ်းထက် သွေးအနှစ်သာရနှင့် မူလစွမ်းအားက မဟာပန်သွန်ကျောက်တုံးများအဖြစ် ဖွဲ့စည်းသွားလိမ့်မည်။

အတိတ်မှာ ကောင်းကင်အသင်္ချေဓားဂိုဏ်းသည် ကော့ဟွား၏ ဓားအရိုးကို သယ်ဆောင်၍ ပြန်ရောက်လာကြသော လစန္ဒာတောင်ထွတ်မှ တပည့်များကို လုပ်ကြံသတ်ဖြတ်ရန် အဆင့်နိမ့် မဟာပန်သွန်ကျောက်တုံးတစ်ထောင်ကို ဆုလာဘ်အဖြစ် သတ်မှတ်ခဲ့သည်။

တစ်နည်းဆိုရလျှင် လစန္ဒာတောင်ထွတ်မှ တပည့်ရှစ်ယောက်၏ အသက်များက အဆင့်နိမ့် မဟာပန်သွန်ကျောက်တုံးတစ်ထောင်သာ တန်ကြေးရှိသည်။

ယင်းက အဆင့်နိမ့် မဟာပန်သွန်ကျောက်တုံးတစ်ထောင်သာ ဖြစ်သော်လည်း အလွန်မြင့်မားသော ပမာဏဖြစ်သည်။

ထိုအဆင့်နိမ့် မဟာပန်သွန်ကျောက်တုံးများက တာအိုငြိမ်းသတ်ခြင်းအဆင့် ကျင့်ကြံသူတစ်ယောက်၏ တာအိုသစ်သီး ပြိုကွဲသွားခြင်းမှ ဖွဲ့စည်းသွားသော မဟာပန်သွန်ကျောက်တုံးများ ဖြစ်ကြသည်။

မဟာပန်သွန်ဘုံတွင် တစ်စုံတစ်ယောက်က တာအိုငြိမ်းသတ်ခြင်းအဆင့်သို့ မရောက်ရှိသေးလျှင် သူတို့သေဆုံးသွားသည့်အခါ မဟာပန်သွန်ကျောက်တုံးများကို ဖွဲ့စည်းနိုင်ကြလိမ့်မည် မဟုတ်ချေ။

ဤအခိုက်အတန့်မှာ ဟန်မူယဲ့ သာမန်ကာလျှံကာ ထုတ်လိုက်သော မဟာပန်သွန်ကျောက်တုံးများက သေခြင်းရှင်ခြင်းအဆင့် ကျင့်ကြံသူများထံမှ ဖြစ်ကြသည်။

အဆင့်အတန်းအရဆိုလျှင် သေခြင်းရှင်ခြင်းမဟာပန်သွန်ကျောက်တုံးတစ်တုံးက အဆင့်နိမ့် မဟာပန်သွန်ကျောက်တုံးတစ်သိန်းနှင့် ညီမျှသည်။

ဉာဏ်အလင်းရအဆင့်သည် ကျင့်ကြံခြင်းအဆင့်သတ်မှတ်ချက်တွင် အနိမ့်ဆုံး ဖြစ်သည်။

ဉာဏ်အလင်းရအဆင့်၏ အထက်က တာအိုအဆင့်ဖြစ်ပြီး တာအိုအဆင့်ကို အဆင့်ငါးဆင့် ခွဲခြားထားသည်။

ယင်းတို့က တာအိုရှာဖွေခြင်း၊ တာအိုဝင်ရောက်ခြင်း၊ တာအိုချိုးဖြတ်ခြင်း၊ တာအိုငြိမ်းသတ်ခြင်းနှင့် အန္တိမတာအို ဖြစ်ကြသည်။ မဟာပန်သွန်ဘုံတွင် တာအိုအဆင့်ကို ကျင့်ကြံခြင်းအစဟု သတ်မှတ်ကြသည်။

တာအိုအဆင့်၏ အထက်မှာ ကနဦးမူလအဆင့်၊ စကြာဝဠာအဆင့်၊ ယင်ယန်အဆင့်၊ သေခြင်းရှင်ခြင်းအဆင့်၊ ကောင်းကင်လျှို့ဝှက်ချက်အဆင့်၊ ကမ္မအဆင့်၊ ပြန်လည်မွေးဖွားခြင်းအဆင့်နှင့် အာဏာရှင်အဆင့်ဟူ၍ ထပ်ရှိသေးသည်။

တစ်စုံတစ်ယောက်သည် အဆင့်တစ်ဆင့် ချိုးဖြတ်သွားတိုင်း ယခင်ထက် အဆပေါင်းများစွာ သာလွန်သော စွမ်းအားကို ပိုင်ဆိုင်သွားလိမ့်မည်။

မဟာပန်သွန်ကျောက်တုံးများထဲမှာ ကိန်းအောင်းနေသော စွမ်းအားပမာဏသည် သေဆုံးသွားသော ကျင့်ကြံသူများ၏ ကျင့်ကြံခြင်းအဆင့်ပေါ်မှာ မူတည်၍ ကွဲပြားခြားနားသည်။

သေခြင်းရှင်ခြင်းမဟာပန်သွန်ကျောက်တုံးတစ်တုံး၏ အစိတ်အပိုင်းထဲမှာ ကိန်းအောင်းနေသော မူလစွမ်းအားနှင့် သွေးအနှစ်သာရပမာဏက အဆင့်နိမ့် မဟာပန်သွန်ကျောက်တုံးတစ်သိန်းကဲ့သို့ မပေါများသော်လည်း အရည်အသွေးက လုံလောက်ပေသည်။

ဟန်မူယဲ့က ကနဦးမူလအဆင့်ဆီသို့ ဝင်ရောက်သွားသည့်အခါ သူ၏ ယခင်ပိုင်ဆိုင်မှုများကို ထုတ်သုံးနိုင်သွားသည်။ ယင်းက သူ၏ ကျင့်ကြံခြင်းကို အဆပေါင်းများစွာ ပိုပြီးမြန်ဆန်စေလိမ့်မည်။

“ ခရက် ”

သေခြင်းရှင်ခြင်းမဟာပန်သွန်ကျောက်တုံးက အက်ကွဲသွားပြီး သွေးချီအနှစ်သာရက မြူခိုးအဖြစ် ပြိုကွဲသွားသည်။ ကျောက်တုံးထဲမှ သေခြင်းရှင်ခြင်းအဆင့် မူလစွမ်းအားက လှုံ့ဆော်ခံလိုက်ရပြီး မီးခိုးရောင်အလင်းလွှာတစ်ခုအဖြစ် ပြောင်းလဲသွားသည်။

မီးခိုးရောင်အလင်းလွှာက အစိမ်းရောင်ကျောက်တုံးခန်းဆောင်တစ်ခုလုံးကို ဖုံးလွှမ်းသွားသည်။

ထို့နောက် အလင်းစီးကြောင်းများ ပေါ်လျှိုးလာပြီး အစိမ်းရောင်ကျောက်တိုင်များပေါ်သို့ စီးဆင်းသွားသည်။

“ ဝီး ”

ထျန်းလေတောင်တန်းပေါ်တွင် အလင်းတိုင်လုံးတစ်ခုက ကောင်းကင်ပေါ်သို့ မြှောက်တတ်သွားသည်။

ထိုတိုင်လုံးက မီတာသုံးရာကျော် မြင့်မားပြီး ထွန်းလင်းတောက်ပသော ရွှေရောင်အလင်းကို ထုတ်လွှတ်နေသည်။ ရွှေရောင်တိုင်လုံး၏ အလင်းပေးမှုအောက်မှာ အချင်းမိုင်သုံးရာကျယ်ဝန်းသော ဧရိယာက လင်းထိန်သွားသည်။

ရွှေရောင်အလင်းက လစန္ဒာတောင်ထွတ်မှ တပည့်များပေါ်သို့ ကျရောက်သွားသည့်အခါ သူတို့၏ အလျင်နှင့် သွေးလည်ပတ်မှုက ယခင်ကထက် နှစ်ဆပိုမြန်သွားသည်။

ဆန့်ကျင်ဘက်အနေဖြင့် လစန္ဒာတောင်ထွတ်၏ အမွေအနှစ်များကို မကျင့်ကြံဖူးသော တခြားဂိုဏ်းများမှ တပည့်များက ထိုရွှေရောင်အလင်းအောက်မှာ ပေါင်တစ်ထောင်လေးလံမှုကို ခံစားမိသွားကြသည်။ ဤသည်မှာ ကျောက်တုံးကြီးက သူတို့၏ ကျောပေါ်မှာ တည်ရှိနေသည့်အလားပင်။

“ ကောင်းကင်အသင်္ချေဓားဂိုဏ်းက ရူးသွားပြီလား… ထျန်းလေတောင်တန်းရဲ့ အကာအကွယ်ဝင်္ကပါကို တကယ်ကြီး အသက်သွင်းလိုက်တယ် ”

“ သေစမ်း… အဲ့ဒီဝင်္ကပါကို အသက်သွင်းဖို့ဆိုရင် တစ်နာရီကို အဆင့်နိမ့် မဟာပန်သွန်ကျောက်တုံးဆယ်တုံး ကုန်ကျလိမ့်မယ်… ကောင်းကင်အသင်္ချေဓားဂိုဏ်းက ဒီလောက် အကုန်အကျခံဖို့ တကယ် ဆန္ဒရှိတာလား ”

ရွှေရောင်အလင်းအောက်တွင် တခြားဂိုဏ်းများမှ တပည့်များက အံတင်းတင်းကြိတ်လိုက်ကြသည်။ သူတို့က သုန်မှုန်သော အမူအရာဖြင့် အဝေးမှ ရွှေရောင်အလင်းတိုင်လုံးကို လှမ်းကြည့်လိုက်ကြသည်။

အဝေးတစ်နေရာတွင် ပုံရိပ်အများအပြားက ထွက်ပေါ်လာကြသည်။ သူတို့က ရွှေရောင်အလင်းတိုင်လုံးထံသို့ လှမ်းကြည့်လိုက်ကြသည်။

“ ကောင်းကင်အသင်္ချေဓားဂိုဏ်းက ဘာလုပ်ဖို့ ကြိုးစားနေတာလဲ ”

မုတ်ဆိတ်ဖြူအကြီးအကဲတစ်ယောက်က မျက်မှောင်ကြုတ်လိုက်ပြီး တီးတိုးရေရွတ်လိုက်သည်။

“ မဟုတ်မှ သူတို့က ဟန်ဆောင်နေတာလား ”

အခြားတစ်ဖက်တွင် အနက်ရောင်သံချပ်ကာ ဝတ်ဆင်ထားသော လူထွားကြီးတစ်ယောက်က လက်သီးဆုပ်လိုက်ပြီး တင်းမာခက်ထန်စွာ ပြောသည်။

“ ငါတို့စမ်းသပ်ကြည့်ကြမလား ”

မည်သူမှ ပြန်မဖြေပေ။

အကာအကွယ်ဝင်္ကပါကို သူတို့၏ မျက်စိအရှေ့မှာ မြင်နေရလေရာ မည်သူမှ မဆင်မခြင် မလှုပ်ရှားဝံ့ကြချေ။

သာမန်တပည့်များအတွက်တော့ ထိုဝင်္ကပါက သူတို့ကို ဖိအားအနည်းငယ်သာ ပေးနိုင်သည်။ သို့သော်လည်း တာအိုအဆင့် ကျင့်ကြံသူများအတွက်တော့ ထိုအလင်းတိုင်လုံးက အမြစ်ဖြတ်သုတ်သင်ခြင်းစွမ်းအားကို စုစည်းပေးနိုင်သည်။

ထိုအတွက် ကုန်ကျမည့်စရိတ်က အလွန်ကြီးမားလေရာ ကောင်းကင်အသင်္ချေဓားဂိုဏ်းက ယင်းကို ပေးချေဝံ့လိမ့်မည်ဟု မည်သူမှ မယုံကြည်ကြချေ။

သို့သော် အကယ်၍ ကောင်းကင်အသင်္ချေဓားဂိုဏ်းက ရူးမိုက်သောအရာကို လုပ်ဆောင်လိုက်မည်ဆိုလျှင်ရော… ။

“ သတ္ထုတွင်းရှာတဲ့ တပည့်တွေကို ပိုပြီးဂရုစိုက်ခိုင်းလိုက်ပါ… တကယ်လို့ ရန်သူတွေနဲ့ တွေ့ဆုံမယ်ဆိုရင် မိုင်သုံးရာအကွာကို ချက်ချင်း ပြန်ဆုတ်ခိုင်းလိုက်ပါ ”

“ ငါ့အမြင်မှာတော့ သူတို့က အချိန်ဆွဲဖို့ ကြိုးစားနေတာဖြစ်မယ်… ပြီးတော့ ငါတို့ကလည်း အချိန်ဆွဲချင်နေတာ မဟုတ်ဘူးလား ”

ယင်းကို ကြားသောအခါ အနက်ရောင်သံချပ်ကာ ဝတ်ဆင်ထားသော လူထွားကြီးက ပေါ့ပါးစွာ ရယ်လိုက်သည်။ သူက ခန္ဓာကိုယ်ကို တစ်ချက်လှုပ်ရှားလိုက်ပြီး တောအုပ်ထဲသို့ မြန်ဆန်စွာ ဝင်ရောက်သွားသည်။

တခြားလူများက တစ်ယောက်ကိုတစ်ယောက် ကြည့်လိုက်ကြသည်။ ထို့နောက် သူတို့က ပြန်ထွက်ခွာသွားကြသည်။

မဟာမိတ်ဂိုဏ်းဝင်များက အချင်းချင်း စည်းလုံးညီညွတ်မှု မရှိကြသည်မှာ ထူးဆန်းသောအရာ မဟုတ်ပေ။

သူတို့က အကြံအစည်ကိုယ်စီဖြင့် ယာယီမဟာမိတ်ဖွဲ့ထားကြခြင်းသာ ဖြစ်၏။

…..

သက်တံ့တောင်… ။

ယင်းက ထျန်းလေတောင်တန်းထဲမှ တောင်ထွတ်များအနက် တစ်ခုဖြစ်ပြီး ထိုနေရာတွင် ထျန်းလေသတ္ထုတွင်း အများအပြားတည်ရှိသည်။

ယုရှောက်ကုန်းသည် လစန္ဒာတောင်ထွတ်မှ တပည့်ဆယ်ယောက်ကို ဦးဆောင်၍ မြန်ဆန်စွာ ရွေ့လျားနေသည်။ သူတို့ရွေ့လျားနေစဉ် ဓားအလင်းက သက်တံ့ရှည်တစ်ခုအဖြစ် အသွင်ပြောင်းလဲသွားသည်။

“ ကောင်းကင်အသင်္ချေဓားဂိုဏ်းက တပည့်တွေ ရောက်လာကြပြီ ”

“ မြန်မြန် ဒီသတ္ထုတွင်းဥမင်ကို ဖျက်ဆီးပြီး အနောက်ဆုတ်ကြရအောင် ”

“ သူတို့က လူနည်းနည်းလေးပါ… ငါတို့ တိုက်ခိုက်ကြမယ် ”

အော်သံများက အရှေ့မှ သတ္ထုတွင်းဥမင်ထဲမှ ထွက်ပေါ်လာသည်။ ပုံရိပ်အများအပြားက ဥမင်ထဲမှာ မြန်ဆန်စွာ ရွေ့လျားနေကြသည်။

သူတို့ထဲမှ တချို့က အရပ်ရှည်ပြီး သိုင်းဝတ်စုံကို ဝတ်ဆင်ထားကြသည်။ သူတို့၏ ကျောပေါ်တွင် ခြင်းတောင်းကြီးများကို သယ်ဆောင်ထားကြပြီး လက်ထဲမှာ တူရွင်းနှင့် ပေါက်ချွန်းများကို ကိုင်ဆောင်ထားကြသည်။ သူတို့က ကောင်းကင်အသင်္ချေဓားဂိုဏ်းမှ တပည့်များကို မြင်သွားသောအခါ သူတို့၏ အမူအရာက တင်းမာခက်ထန်သွားသည်။

“ သတ် ”

ခန္ဓာကိုယ်ထွားကြိုင်းပြီး အရပ်ရှည်သော လူတစ်ယောက်က သူ၏ လက်ထဲမှ ပေါက်ချွန်းဖြင့် ယုရှောက်ကုန်းကို တိုက်ခိုက်လိုက်သည်။

ထိုတိုက်ခိုက်မှုက အလွန်အားကောင်းပြီး မြန်ဆန်သည်။ ရှင်းလင်းစွာပင် ထိုလူက တာအိုအဆင့် အစွမ်းထက် ကျင့်ကြံသူတစ်ယောက်ဖြစ်သည်။

“ ကျား ”

ယုရှောက်ကုန်းက ကြုံးဝါးလိုက်ပြီး သူ၏ ဓားကို အရှေ့သို့ ထိုးသွင်းလိုက်သည်။

ဓားထိုးသွင်းလိုက်သည့်အခိုက် ရွှေရောင်အလင်းက ကောင်းကင်ပေါ်မှ ကျဆင်းလာပြီး ဓားအလင်းကို ဆယ်ပေအထိ ရှည်လျားသွားစေသည်။

ဆယ်ပေရှည်လျားသော ဓားအလင်းကို မြင်သွားသောအခါ ပေါက်ချွန်းကိုင်ထားသော အမျိုးသားက မျက်နှာပျက်ယွင်းသွားသည်။

“ ထန် ”

ဓားသွားနှင့် ပေါက်ချွန်းတို့ ထိပ်တိုက် တွေ့ဆုံသွားသည့်အခါ ပေါက်ချွန်းက လုံးဝ ပျက်စီးအက်ကွဲသွားသည်။

လူထွားကြီး၏ လက်ဖဝါးက ထုံကျင်သွားပြီး သူ၏ ခန္ဓာကိုယ်က အနောက်သို့ တွန်းထုတ်ခံလိုက်ရသည်။ သူက ကျောက်ဆောင်တစ်ခုပေါ်သို့ ပြုတ်ကျသွားသည့်အခါ ကျောက်ဆောင်က အစိတ်စိတ်အမွှာမွှာ အက်ကွဲသွားသည်။

“ ပြေးကြ… သူက တာအိုဝင်ရောက်ခြင်းအဆင့် ကျင့်ကြံသူ ”

လူထွားကြီးက သွေးတစ်ပွက်အန်လိုက်ပြီး ကြောက်လန့်တကြား အော်ပြောလိုက်သည်။

တာအိုဝင်ရောက်ခြင်းအဆင့်… ။

လွန်ခဲ့သော ခြောက်လတွင် ယုရှောက်ကုန်း၏ ကျင့်ကြံခြင်းက ဉာဏ်အလင်းရအဆင့်၏ အထွတ်အထိပ်မှာသာ ရှိသေးသည်။ သူက ဤအတောအတွင်းမှာ အပတ်တကုတ် ကြိုးစားကျင့်ကြံခဲ့လေရာ နောက်ဆုံးမှာ တာအိုဝင်ရောက်ခြင်းအဆင့်သို့ တတ်လှမ်းနိုင်သွားခဲ့သည်။

ဤအခိုက်အတန့်မှာ အကာအကွယ်ဝင်္ကပါစွမ်းအား၏ ပံ့ပိုးမှုအောက်တွင် ယုရှောက်ကုန်းက တာအိုရှာဖွေခြင်းအဆင့် အစွမ်းထက်ကျင့်ကြံသူတစ်ယောက်ကို ဓားတစ်ချက်တည်းဖြင့် ဒဏ်ရာအပြင်းအထန်ရသွားစေသည်။

“ အကာအကွယ်ဝင်္ကပါက အရမ်းအစွမ်းထက်တာပဲ ”

ယုရှောက်ကုန်းက တီးတိုးရေရွတ်လိုက်လေရာ အပြုံးက သူ၏ မျက်နှာပေါ်မှာ ထွက်ပေါ်လာသည်။

သူက စွမ်းအားသုံးဆယ်ရာခိုင်နှုန်းကိုသာ အသုံးပြုရသေးသော်လည်း တာအိုရှာဖွေခြင်းအဆင့် ကျင့်ကြံသူတစ်ယောက်ကို အလွယ်တကူ သတ်ဖြတ်နိုင်ခဲ့သည်။ အကယ်၍ သူသာ အစွမ်းကုန် ထုတ်လွှတ်လိုက်မည်ဆိုလျှင် သူ၏ တိုက်ပွဲစွမ်းအားက မည်မျှသန်မာသွားလိမ့်မည်နည်း။

ထိုသို့ဝင်္ကပါစွမ်းအား၏ ထောက်ပံ့မှုအောက်မှာဆိုလျှင် တိုက်ပွဲအကျိုးပြုမှုများကို ရရှိရန် ခဲယဉ်းတော့လိမ့်မည် မဟုတ်ချေ။

“ တိုက်ကြ ”

သူက တုံ့ဆိုင်းမနေဘဲ ဓားကို ထပ်မံ ဝှေ့ယမ်းလိုက်သည်။

နာရီဝက်ကြာပြီးနောက် ဤသတ္ထုတွင်းထဲမှ တခြားဂိုဏ်းသားအားလုံးက သုတ်သင်ရှင်းလင်းခံလိုက်ကြရသည်။

ပြင်ပဂိုဏ်းသားဆယ်ဦးက အသတ်ခံလိုက်ကြရသည်။ သူတို့ထဲမှာ တာအိုအဆင့် ကျင့်ကြံသူတစ်ဦးပင် ပါဝင်သည်။

ထို့ပြင် သူတို့က သတ္ထုတွင်းထဲမှာ ထျန်းလေကျောက်တုံးငါးထောင်ကို ရှာဖွေတွေ့ရှိခဲ့ကြသည်။

ထိုပြင်ပဂိုဏ်းသားများသည် သတ္ထုကြော ပျက်စီးသွားမည်ကို ဂရုမစိုက်ဘဲ ထျန်းလေကျောက်တုံးများကိုသာ အဓိက စုဆောင်းခဲ့ကြသည်။ ထို့ကြောင့် သူတို့က ထျန်းလေကျောက်တုံးငါးထောင်ကို တူးဖော်နိုင်ခဲ့ကြသည်။

ယုရှောက်ကုန်းတို့အဖွဲ့က ထျန်းလေတောင်တန်းဆီသို့ အောင်ပွဲနှင့်အတူ ပြန်ရောက်လာသည့်အခါ ဟန်မူယဲ့က သူ၏ ကတိအတိုင်း သူတို့ကို ဆုလာဘ်ချီးမြှင့်လိုက်သည်။

ဆုလာဘ်များက သွေးချီအနှစ်သာရကို အားဖြည့်ပေးနိုင်သော ဆေးလုံးများနှင့် တိုက်ပွဲစွမ်းအားကို မြှင့်တင်ပေးနိုင်သော သံချပ်ကာများ ဖြစ်ကြသည်။

ထို့ပြင် ဓားသိုင်းများကို ဆင်ခြင်နားလည်နိုင်မည့် အခွင့်အရေးနှင့် ထျန်းလေတောင်တန်းပေါ်မှာ ကျင့်ကြံနိုင်မည့် အခွင့်အရေးလည်း ပါဝင်ကြသည်။

လက်ရှိအချိန်တွင် ထျန်းလေတောင်တန်းကို အကာအကွယ်ဝင်္ကပါက ဖုံးလွှမ်းထားသည်။ ထိုအကာအကွယ်ဝင်္ကပါအတွင်းမှာ သေခြင်းရှင်ခြင်းမဟာပန်သွန်ကျောက်တုံး၏ မြူခိုးအလွှာပါးက လွင့်မျောနေသည်။

သို့ဖြစ်၍ ဤနေရာမှာ ဆယ့်ငါးမိနစ်ကျင့်ကြံမည်ဆိုလျှင်ပင် အလွန်အကျိုးရှိသည်။

ယုရှောက်ကုန်းက တာအိုအဆင့် ကျင့်ကြံသူတစ်ယောက်ကို သတ်ဖြတ်ခဲ့သောကြောင့် သေခြင်းရှင်ခြင်းသွေးအနှစ်သာရနယ်မြေထဲမှာ ဆယ့်ငါးမိနစ်ကျင့်ကြံနိုင်သော အခွင့်အရေးတစ်ခုကို ရရှိသွားသည်။

ယုရှောက်ကုန်း၏ ကံကြမ္မာကောင်းကို မြင်သောအခါ တခြားတပည့်များက မနာလိုဖြစ်သွားကြသည်။

နောက်အခိုက်အတန့်မှာ သူတို့က ပြင်ပဂိုဏ်းသားများကို သတ်ဖြတ်ရန် အသည်းအသန် လိုက်လံရှာဖွေကြသည်။

ထိုအဖြစ်အပျက်က မဟာမိတ်အင်အားစုကို အံ့ဩသွားစေသည်။

ကောင်းကင်အသင်္ချေဓားဂိုဏ်းက လူတွေ ရူးသွားကြပြီလား… ။

သူတို့က ဂိုဏ်းဆယ်ဂိုဏ်း၏ ပူးပေါင်းတိုက်ခိုက်မှုကို ရင်ဆိုင်နေရသော်လည်း သူတို့ဘက်မှ အရင်ဦးစွာ စတင်တိုက်ခိုက်ဝံ့သည်လော။