လောင်ကျွမ်းနေသော ခံတပ်

ကျုပ်မှာ အိပ်မက်တစ်ခု ရှိတယ် မှာ အမှန်တကယ်တွင် အိပ်မက်တစ်ခုမျှသာ ဖြစ်သည်။ ၎င်းက အချို့လူများကို ရင်ထဲ ထိစေနိုင်သော်လည်း စွမ်းအား အဓိက ဖြစ်သော ထိုစစ်မှန်သော လောကတွင် အိပ်မက်က အိပ်မက်သာ ဖြစ်သည်။ ၎င်းမှာ ခမ်းနားပြီး စိတ်လှုပ်ရှားစရာ ကောင်းသော်လည်း ၎င်းမှာ ထိလိုက်ရုံဖြင့် ပေါက်ကွဲသွားမည့် ပူဖောင်းတစ်ခုသာ ဖြစ်သည်။ သို့သော် အချို့အရာများမှာ စစ်မှန်ပြီး ပူဖောင်းများမဟုတ်ပေ။

မှတ်တမ်း တစ်ခုလုံး၊ နောက်ပိုင်းမှ ဧကရီ အရှင်မများ၏ မိန့်ခွန်းအပါအဝင်၊ အမှန်တကယ်တွင် အချက် တစ်ချက်ကို သွယ်ဝိုက်၍ အလေးထား ပြောနေခဲ့သည်။

နတ်ဆိုးဘုံက ထိုလူသား၏ ထိန်းချုပ်မှု အောက်တွင် ရှိနေခြင်းပင်။

မှတ်တမ်းရုပ်ရှင် မည်မျှပင် ရင်ထဲထိ စေကာမူ၊ ကျုပ်မှာ အိပ်မက်တစ်ခု ရှိတယ် ၏ စာသား မည်မျှပင် ရင်ထဲထိ စေကာမူ ၎င်းမှာ အမှန်တကယ်တွင် နတ်ဆိုးဘုံ လက်ခံသဘောတူရန် ခြေလှမ်းတစ်ခုသာ ဖြစ်သည်။

၎င်းမှာ ခြေလှမ်းတစ်ခုမျှသာ ဖြစ်၏။

ကျုပ်မှာ အိပ်မက်တစ်ခု ရှိတယ် ကို ထုတ်ပြန်သည့် တချိန်တည်းမှာပင် ဧရာမ ခံတပ်ကြီးတစ်ခု သွေးရောင်အင်ပါယာ၏ သွေးလက်သည်း နယ်မြေ အထက်တွင် ပေါ်လာခဲ့ပြီး ရှေးအစောင့်အရှောက်များ စစ်တပ်တစ်ခု ခံတပ်ထဲမှ အဆက်မပြတ် ထွက်ပေါ်လာခဲ့သည်။ ထိုစစ်တပ်များ၏ ဦးတည်ရာမှာ တံခါး ဖြစ်သည်။ ၎င်းမှာ လူသား လောကသို့ စေလွှတ်လိုက်သော စစ်ကူများဖြစ်သည်မှာ အသေအချာပင်။

ကြမ်းတမ်းသော သလင်းကျောက် သားရဲများ၊ လှပသော မီးအိမ်ဝိညာဉ်များ၊ ညီညီညာညာ သွားနေကြသော စုစည်း ရုပ်သေးများ၊ ဧရာမ သလင်းကျောက် သားရဲများနှင့် တိုင်တန်များ...

တခြားဘာမှ ပြောစရာမလိုဘဲ စုစည်း ရုပ်သေး ဗိုလ်ခြေ တစ်ခုတည်း၏ အရေအတွက်သည်ကပင် နှစ်သောင်းခန့် အထိ ရောက်ရှိခဲ့သည်။ နတ်ဆိုး မဟာမိတ် စစ်တပ်က လူသား မဟာမိတ်စစ်တပ်နှင့် တိုက်ခိုက်ခဲ့စဉ်က သူတို့သည် စုစည်း ရုပ်သေး ထောင်နှင့်ချီ စေလွှတ်ခဲ့ရာ ၎င်းမှာ လူတိုင်းကို တုန်လှုပ်သွားစေ ခဲ့သော်လည်း သူတို့ အရှေ့မှ စုစည်း ရုပ်သေးများ၏ ပမာဏမှာ ထိုအချိန်က နတ်ဆိုး မဟာမိတ် စစ်တပ်ထက် အဆ၂၀ ဖြစ်နေသည်။

အကယ်၍ ထိုသို့သော စစ်ကူများကို နတ်ဆိုး မဟာမိတ်စစ်တပ်နှင့် ယှဉ်ပါက နတ်ဆိုး မဟာမိတ်စစ်တပ်မှာ ပြိုင်ဘက် မဟုတ်ကြောင်း လူအများက ဝမ်းနည်းစွာ သိရှိသွားကြသည်။

ထိုတပ်ဖွဲ့များက ချန်လွေ့ လက်ဝယ်၌ ရှိနေသည့် အရာ၏ ထိပ်ဖျားမျှသာ ဖြစ်နိုင်ပေသည်။

မှတ်တမ်းရုပ်ရှင်၏ အဆုံးတွင် မျက်စိ တစ်ဆုံး ရှည်လျား ကျယ်ပြန့်သော ထိုရှေးဟောင်းဗိုလ်ခြေများက မည်သည့် နည်းလမ်းဖြင့်မျှ လုပ်ကြံဖန်တီးထားခြင်း မဟုတ်ဘဲ စစ်မှန်သော တည်ရှိခြင်းပင်။

ချန်လွေ့ အတွက် နတ်ဆိုးဘုံကို အောင်နိုင်ရန် သို့မဟုတ် မျိုးသုဉ်းစေရန် မခက်ခဲလှပေ။ ထိုအရာမှာ စစ်မှန်သော ရက်စက်သည့် တကယ့်လက်တွေ့ပင်။

အမှောင်လ၏ အစမှ လက်ရှိ အင်ပါယာ သုံးခု၏ မဟာမိတ်အဖွဲ့အထိ နတ်ဆိုးဘုံ တစ်ခုလုံးသည် ချန်လွေ့၏ လက်ဗွေဖြင့် ခိုင်မာစွာ အမှတ်အသားပြုခြင်း ခံရပြီး မဖျောက်ဖျက်နိုင်တော့ပေ။ ထိုလူသား၌ မနှိုင်းယှဉ်နိုင်သော အင်အားကြီးသည့် အာဏာနှင့် တကိုယ်တော် စွမ်းအားလည်း ရှိသည်။ ခုခံတွန်းလှန်ခြင်းမှာ အချည်းနှီး ဖြစ်၏။

သူ့နောက်သို့ လိုက်ပါသူများ သာယာ ဝပြောမည် ဖြစ်ပြီး သူ့ကို ဆန့်ကျင်သူများ ပျက်စီးသွားမည် ဖြစ်သည်။

ဒါပဲ...

စိတ်ခံစားမှု လွှမ်းမိုးမှုနှင့် ခြိမ်းခြောက် ဟန့်တားမှု၏ စွမ်းအားအောက်တွင် နတ်ဆိုးဘုံ၏ အုတ်အော်သောင်းတင်း အခြေအနေသည် တဖြည်းဖြည်း ငြိမ်သက် သွားခဲ့သည်။ အင်ပါယာများက သူတို့၏ အစွမ်းကုန်ဖြင့် ကာကွယ်ရေး လုပ်ငန်းစဉ် တစ်ခုကို ဆောင်ရွက်ရန် လိုအပ်ချက်များ လိုက်နာခဲ့ကြသည်။ မဟာမိတ်စစ်တပ်က ပြန်လည်၍ စတင် နေရာချ ထားခဲ့ပြီး လူသားလောကကို ထောက်ပံ့ရန် အသင့် ဖြစ်နေကာ ဧကရီအရှင်မ သုံးပါးနှင့်... ကြင်ရာတော် မင်းသား ချန်လွေ့၏ အမိန့်ကို တက်ကြွစွာ လိုက်နာခဲ့ကြသည်။

.....

လူသားလောကမှ လူသားများက နတ်ဆိုးဘုံတွင် ဖြစ်ခဲ့သော အခြေအနေ အကြောင်းကို မသိခဲ့ကြပေ။ သူတို့ စိုးရိမ် ပူပန်နေခဲ့သည်မှာ အခြားတစ်ခု ဖြစ်သည်။

ကျက်သရေပြာအင်ပါယာ၊ ဆူးခံတပ်...

ခံတပ်၏ မြို့ရိုးပေါ်တွင် စစ်သည် အတန်းလိုက်သည် မှော်ရိုင်ဖယ်များနှင့် လေးများကို လက်ထဲတွင် ကိုင်ဆောင် ထား၏။ မှော်သလင်းကျောက် အမြောက် တစ်ဒါဇင်ကျော် အမြောက်မျှော်စင်တွင် အသင့်ဖြစ်နေပြီး နောက်မှ လောက်လေး များကိုလည်း ထောင်ထားပြီး ဖြစ်သည်။

စစ်သည်များ အားလုံးက ရှေ့သို့ အာရုံစိုက်ထားကြပြီး စိုးရိမ်နေကြသော အမူအရာများကို ပြသနေကြ၏။

စစ်သည်တစ်ဦး အောက်သို့ ကြည့်လိုက်ရာ သူကိုင်ထားသော ရိုင်ဖယ်က အနည်းငယ် တုန်ခါနေသလို ခံစားမိလိုက်ရသည်။ ၎င်းမှာ စိုးရိမ်နေ၍ မဟုတ်ဘဲ ခံတပ်ပတ်လည်မှ မြေပြင် တစ်ခုလုံး အနည်းငယ် စတင်၍ တုန်ခါ လာသောကြောင့်ပင်။ လူများစွာသည် လက်နက်များကို တင်းတင်းကျပ်ကျပ် ဆုပ်ကိုင်ထားပြီး သူတို့၏ နှလုံးသားများ အနည်းငယ် တုန်ခါနေသည်ကို ခံစားမိ နေကြသည်။

တိုက်ပွဲ မစခင်မှာပင် သူတို့၏ သည်းခြေများ အေးစက်နေပြီ ဖြစ်သည်။

စစ်သည်များ ထိုသို့ ဖြစ်နေသည်မှာ အံ့သြစရာ မရှိပေ။ ထိုကဲ့သို့သော မကောင်းဆိုးဝါးများမှာ အလွန်ပင် ကြမ်းတမ်းပြီး မရပ်တန့်နိုင်ပေ။ သံတံခါး အင်ပါယာ ကျဆုံးပြီးနောက် ကျက်သရေပြာ အင်ပါယာ၏ အခြား ပဏ္ဏာဆက် နယ်မြေ နှစ်ခု ဖြစ်သည့် လျိုရေကန် အင်ပါယာနှင့် ပန်းပွားနီ အင်ပါယာတို့ကလည်း အလျင်အမြန် ဖျက်ဆီးခြင်း ခံခဲ့ရသည်။

မကောင်းဆိုးဝါးများ၏ ခြေလှမ်းများ မရပ်တန့်ဘဲ ကျက်သရေပြာအင်ပါယာသို့ ရှေ့တိုးလာခဲ့သည်။ ဆူးခံတပ် အရှေ့မှ မြို့သုံးမြို့သည် တစ်ညအတွင်း နီးပါးပင် မြေလှန်ခံလိုက်ရပြီး အပျက်အစီးများ အဖြစ်သို့ ပြောင်းလဲသွားခဲ့သည်။

ယခု ဆူးခံတပ်က ထိုကြောက်မက်ဖွယ် ကောင်းသော ရန်သူများကို ရင်ဆိုင်ရမည် ဖြစ်မည်။ သူတို့ ခုခံကာကွယ်နိုင်ပါ့မလား။ သူတို့ အသက်ရှင် နိုင်ပါ့မလား။

လူတိုင်း၏ နှလုံးသားက တင်းတင်း ကျပ်ကျပ် ဖြစ်သွားခဲ့သည်။

အနောက်မှ တပ်မှူး၏ အသံက ထွက်လာ၏။ “ညီအစ်ကိုနှင့် စစ်သည်တို့၊ ဆူးခံတပ်က ဖန်စီဒီယန်မြို့တော်အတွက် နောက်ဆုံး အတားအဆီးပဲ။ ဒီလိုမျိုး အန္တရာယ်ကို ရင်ဆိုင်နေရတာတောင် ဧကရီအရှင်မ လန်ဘိစ်က တော်ဝင် မျိုးနွယ်တွေလို ထွက်ပြေးတာမျိုး မလုပ်ခဲ့ဘူး။ သူ မြို့တော်မှာ ခိုင်ခိုင်မာမာ ရပ်တည်နေခဲ့တယ်။ ငါတို့ရဲ့ ဧကရီ၊ ငါတို့ရဲ့ မိဘတွေ၊ ဇနီးနှင့် ကလေးတွေ၊ ငါတို့ရဲ့ မိတ်ဆွေတွေ ငါတို့ အနောက်မှာ ရှိနေကြတယ်။ ငါတို့ သေတဲ့အထိ ခုခံ ကာကွယ်ရမယ်...”

ထိုစကားအနည်းငယ် ပြောပြီးနောက် စစ်သည်များက စိတ်ဓာတ် အနည်းငယ် ပြန်တက်ကြွလာခဲ့သည်။

စစ်သည်များနောက် အမျိုးမျိုးသော ချပ်ကာများကို ဝတ်ပြီး လက်နက်များကို ကိုင်ဆောင်ထားသော အမျိုးသားများနှင့် အမျိုးသမီးများ တစ်တန်း ရှိနေသည်။ သူတို့ အားလုံးက လေးနက်နေပုံရသည်။ ထိုအရာမှာ ကျက်သရေပြာ အင်ပါယာ၏ သိဒ္ဓိခိုလှုံရာမှ အစွမ်းထက် ပုဂ္ဂိုလ်များ ဖြစ်သည်။ အနိမ့်ဆုံးသော စွမ်းအားမှာ အနည်းဆုံး သူတော်စင်-ယောင် အဆင့် (နတ်ဆိုးဧကရာဇ်) ဖြစ်သည်။ တိုင်းပြည် အဆင့်သို့ ရောက်ရှိနေသူ နောက်ထပ် သုံးဦးလည်း ရှိနေသည်။

နောက်ဆုံး တံခါး ပြီးနောက်တွင် သိဒ္ဓိအလင်းတောင်သည် အထူးအဆင့် အစွမ်းထက်ပုဂ္ဂိုလ်များကို ထပ်မံ၍ ဆင့်ခေါ်ခဲ့သည်။ ပစ်မှတ်များမှာ လူသား လောက၏ အဓိက အထူးအဆင့် အစွမ်းထက်ပုဂ္ဂိုလ်များ ဖြစ်သော်လည်း အရေအတွက်အရ တုံ့ပြန်သူများမှာ နောက်ဆုံးတံခါးထက် များစွာ နည်းပါး၏။

တံခါး ပွင့်လာချိန် စာချုပ်အတွက် လူတိုင်းက ရပ်စောင့်ရန်သာ လိုအပ်သည်။ မူလက အထူးအဆင့် အစွမ်းထက် ပုဂ္ဂိုလ်များသည် သာမန်လူများအကြား စစ်ပွဲတွင် ပါဝင်လိုစိတ် မရှိသောကြောင့် သူတို့က ၎င်းအပြင်ဘက်တွင် နေရန် အခွင့်ကောင်းယူခဲ့ကြသည်။

ထိုတစ်ကြိမ် ဆင့်ခေါ်မှုမှာ ရုတ်တရက် ပေါ်လာသော မကောင်းဆိုးဝါးများကို တိုက်ခိုက်ရန် အသေအချာပင် ဖြစ်သည်။ သူတို့ သိရသည်မှာ ကောင်းကင်တမန် သုံးပါးပင် ပြဿနာကို သူတို့ကိုယ်တိုင် မဖြေရှင်းနိုင်ခဲ့ပေ။ နတ်ဆိုးဘုံနှင့် လူသား လောကအကြား စစ်ပွဲက ၎င်းကြောင့်ပင် ရပ်တန့်သွားခဲ့သည်။ ထိုအခြေအနေတွင် လူ့သဘာဝမှာ တစ်ကိုယ်ကောင်းဆန်၏။ မည်သူက အမြောက်စာ ဖြစ်ချင်မည်နည်း။

ကမ္ဘာပျက် အန္တရာယ် ဆိုတာက အထိတ်တလန့် ဖြစ်အောင် လုပ်တာထက် မပိုဘူး။ သိဒ္ဓိကျောင်းတော်က ပုံမှန်ဆို သာမန်ပြည်သူတွေကို အထင်သေးပြီး အရာ အားလုံးကို ထိန်းချုပ်ထားတာ မဟုတ်ဘူးလား။ မင်းတို့ သိဒ္ဓိအလင်းတောင်မှာ နတ်ဘုရား-ယောင် ကောင်းကင်တမန် သုံးပါး ရှိနေတာပဲ။ အဲဒါကို လောကကို ကာကွယ်ဖို့အတွက် ငါတို့လို တိုင်းပြည် အဆင့် ဒါမှမဟုတ် နတ်ဘုရားတစ်ပိုင်း အဆင့်ရဲ့ အလှည့် ဘယ်လို ဖြစ်ရမှာလဲ။ ငါတို့ ဒါကို ဘယ်လို ဖြစ်လာမလဲ ကြည့်ရုံပဲ ကြည့်နေမယ်။

ထိုအကျပ်အတည်းမှာ သူတို့နှင့် မသက်ဆိုင်ဟု သူတို့ ထင်မြင်ခဲ့ကြသည်။ ထိုရှုထောင့်မှ ကြည့်လျှင် မှားယွင်းသော အရာ မဟုတ်သော်လည်း ထိုလူများသည် ထိုအကျပ်အတည်း... သို့မဟုတ် ကပ်ဘေး၏ လေးနက်မှုကို လျှော့တွက် ခဲ့ကြသည်။ နေထိုင်ရန် အခြေခံအုတ်မြစ် မရှိဘဲ သူတို့က သူတို့၏ စွမ်းအားဖြင့် အသက်ရှင် နိုင်လျှင်ပင် ထာဝရ မလွတ်မြောက်နိုင်ပေ။

မြို့ရိုး တုန်ခါမှုက ပို၍ပို၍ ပြင်းထန် လာခဲ့သည်။ မြေပြင် တစ်ခုလုံးသည် မြင်းအကောင်ရေ ထောင်ပေါင်းများစွာ ရှေ့သို့ ပြေးလွှားနေသည့် အလားပင် တုန်ခါနေခဲ့သည်။

ခဏအကြာ ကြက်သွေးရောင် မြစ်တစ်စင်းက အဝေးမှ ကောင်းကင်တွင် ပေါ်ထွက်လာခဲ့သည်။ အဝေးမှ ကြည့်လျှင် ၎င်းမှာ ရေစီးကြောင်းတစ်ခုနှင့် တူ၏။ ၎င်းက အမြန် ချဉ်းကပ်လာနေခဲ့သည်။

အဆုံးမဲ့ မကောင်းဆိုးဝါးများပင်....

မွန်းကြပ်သော ဖိအားသည် မျက်နှာသို့ ပြေးဝင်လာခဲ့သည်။ ဟိန်းသံများသည် နှလုံးသားကို ထုနှက်နေသော မမြင် နိုင်သည့် တူကြီးတစ်လက် ကဲ့သို့ အတူတကွ စုစည်းသွားခဲ့သည်။ နောက်မှ လောက်လေးများ၏ စက်သံများလည်း တစ်ခုပြီးတစ်ခု ထွက်လာပြီး ဖြစ်သည်။ မီးညှိထားသော ကျောက်တုံးကြီးများက မကောင်းဆိုးဝါး ရေစီးကြောင်းထံသို့ အလျင်အမြန် ပစ်လွှတ်ခြင်း ခံလိုက်ရပြီး မကောင်းဆိုးဝါးများ၏ ထူထဲသော အုပ်စုများ ပွင့်ထွက်သွားခဲ့သည်။

တစ်ချိန်တည်းပင် မှော်သလင်းကျောက် အမြောက်များက တောက်လောင်နေသော အဖြူရောင် သေခြင်းတရားကို ထုတ်လွှတ်လိုက်သည်။ ပေါက်ကွဲ ထွက်နေသော အလင်းရောင် စက်ဝိုင်းများ မကောင်းဆိုးဝါး အုပ်စုတွင် ပျံ့နှံ့သွားခဲ့သည်။ သက်ရောက်မှု ရှိသော ဧရိယာအတွင်းမှ မကောင်းဆိုးဝါးအားလုံး ဗလာနတ္ထိအဖြစ် ပြောင်းသွားခဲ့သည်။

အကယ်၍ ၎င်းမှာ သာမန်စစ်တပ် တစ်ခုသာ ဖြစ်ခဲ့ပါက သူတို့ မည်မျှပင် ရဲရင့်စေကာမူ ထိုသို့သော သေဆုံး ထိခိုက်မှုများက စစ်သည်များ စိတ်ထဲတွင် ကြောက်ရွံ့မှုနှင့် တုန်လှုပ်မှု အချို့ကို သေချာပေါက် နှိုးဆော်ပေလိမ့်မည်။

သို့သော် မကောင်းဆိုးဝါးများသည် ကြောက်ရွံ့မှု ဆိုသည်ကို လုံးဝမသိကြဘဲ သူတို့၏အရှိန် လုံးဝ မနှေးကွေးသွားခဲ့ပေ။ သူတို့က ရှေ့သို့ ပြေးဝင်လာစဉ် မူလ ကြောက်မက်ဖွယ်ရာ စည်းချက်ကို ထိန်းသိမ်းထားနေဆဲ ဖြစ်သည်။

အအေးခံရန် လိုအပ်သောကြောင့် မှော်သလင်းကျောက် အမြောက်များသည် ခဏတာ ပစ်လွှတ်ပြီးနောက် ရပ်တန့်၍ သွားခဲ့သည်။ လောက်လေးများဖြင့်သာ ဆက်လက် တိုက်ခိုက်သည်။ သို့သော် လောက်လေးများများ၏ စွမ်းအားမှာ များစွာ နိမ့်ကျသည်။ ၎င်းက ပုံသေ အကွာအဝေးတစ်ခုကိုသာ တိုက်ခိုက်နိုင်၏။

“ရိုင်ဖယ်အဖွဲ့။ ပစ်...” တပ်မှူးက အမိန့် ပေးလိုက်ရာ မကောင်းဆိုးဝါးများကို ချိန်ထားပြီး ဖြစ်သော ရိုင်ဖယ်သမားများ တစ်ယောက်ပြီး တစ်ယောက် ပစ်ခတ် လိုက်ကြသည်။ ရှေ့တွင် ချွန်ထက်သော လက်သည်းများနှင့် မျက်နှာတစ်ဝက်ကို သိမ်းပိုက်ထားသော ချဲ့ကားထားသည့် ပါးစပ်ရှိသည့် မကောင်းဆိုးဝါး ပိန်ပိန် တစ်မျိုး ရှိနေသည်။ ထိုးထွက်နေသော အစွယ်နှစ်တန်းမှာ အထူးသဖြင့် ကြောက်စရာ ကောင်းလှသည်။

ကျည်ဆန်မိုးသီးများထဲတွင် မကောင်းဆိုးဝါးငယ်များ မြေပြင်ပေါ်သို့ တစ်ယောက်ပြီးတစ်ယောက် လဲကျ၍ သွားသော်လည်း စစ်သည်များက သေးငယ်ပုံရသော မကောင်းဆိုးဝါးများ၏ ခန္ဓာကိုယ်များမှာ ထင်ထားသည်ထက် ပိုမာကျောကြောင်း တွေ့ရှိလိုက်ရသည်။ မှော်သေနတ်များက သူတို့အပေါ်တွင် ထင်ထားသည်ထက် ထိခိုက်မှု နည်းပါး စေခဲ့သည်။ မကောင်းဆိုးဝါးငယ်များစွာက အကြိမ်များစွာ ဆက်တိုက် ပစ်ခတ်ခံရပြီး မှသာ မြေပြင်ပေါ်သို့ လဲကျသွားခဲ့သည်။ ထိုသို့သော ခွန်အားမျိုးက အနည်းဆုံး စစ်သည်တော် (အမြင့်ဆင့် နတ်ဆိုး) အထွတ်အထိပ် အဆင့်နှင့် ဆရာသခင် (နတ်ဆိုးဘုရင်) အဆင့် ဖြစ်သည်။

ထိုသို့ စွမ်းအားဖြင့် သာမန်အင်ပါယာ တစ်ခုတွင်ပင် သူတို့က ခေါင်းဆောင်ငယ် တစ်ဦး သို့မဟုတ် တပ်မှူးတစ်ဦး ဖြစ်လာ နိုင်သော်လည်း ထိုမကောင်းဆိုးဝါးများ အကြားတွင် သူတို့က အနိမ့်ဆုံးအဆင့် အမြောက်စာများမျှသာ ဖြစ်သည်။

“ထိန်းထား။ ထိန်းထား။ ခေါင်းကိုပစ်။” တပ်မှူးက အော်ပြောလိုက်လေသည်။ “လေးသမားတွေ၊ ပစ်ကြ။ မှော်ပညာရှင် အဖွဲ့၊ အသင့်ပြင်ထား..”

မှော်ဂိမ်းတွင် ထိုသို့ မကောင်းဆိုးဝါးက ဂူသင်္ချိုင်းမှ အနိမ့်ဆုံး စစ်သည်လည်း ဖြစ်သည်။ နောက်ဆုံးသော ဗားရှင်းက ဂူသင်္ချိုင်း မကောင်းဆိုးဝါး၏ အမည်နှင့် အထူး အရည်အချင်းကို ထုတ်ပြခဲ့သည်။

ထိုသို့သော မကောင်းဆိုးဝါးငယ်ကို ပါးစပ်ကြီး နတ်ဆိုးဟု ခေါ်ကြသည်။ တစ်ခါတစ်ရံ ၎င်းသည် ဧရာမ ခန္ဓာကိုယ်နှင့် မီးလုံး တစ်လုံးဖြင့် ဗီဇပြောင်းလဲထားသော ခန္ဓာကိုယ်တစ်ခု ဖြစ်လာနိုင်၏။ အားအနည်းဆုံး နေရာမှာ ခေါင်းပင်။

ရိုင်ဖယ်နှင့် မြှားများ၏ ပစ်ခတ်အားမှာ အလွန် ပြင်းထန်လှပြီး ပါးစပ်ကြီး နတ်ဆိုးများစွာကို သတ်နိုင်သော်လည်း မကောင်းဆိုးဝါးများက မျက်စိမှိတ် တိုက်စစ် ဆင်နေကြသည် မဟုတ်ပေ။ ချွန်ထက်သော အရာများ၏ အတန်းလိုက် ရေစီးကြောင်းထဲမှ ပျံထွက်လာခဲ့သည်။ ၎င်းတို့မှာ အလွန်ပင် ငအားကောင်းပြီး အစီအရင် ခင်းကျင်းထားသော မြို့ရိုးကို တိုက်ရိုက် ထိုးဖောက်သွားခဲ့သည်။ ၎င်းမှာ အရိုးဆူးများ ဖြစ်သည်။

“သတိထား။ ဒါ ဒေါသအိုး နတ်ဆိုးပဲ။ အကာအကွယ် သေချာယူထားကြ။”

ဒေါသအိုး နတ်ဆိုးများက ပါးစပ်ကြီး နတ်ဆိုးများထက် ပို၍ အားကောင်းပြီး အဝေးမှ အရိုးဆူးများကို ပစ်ခတ်နိုင်သည်။ မြို့ရိုးပေါ်မှ လေးသမားများနှင့် သေနတ် သမား များစွာက အရိုးဆူးများကြောင့် ပစ်ခတ်ခြင်း ခံရပြီး နေရာတွင်ပင် သေဆုံးသွားသည်။ အချို့မှာ မြို့ရိုးပေါ်မှ ပြုတ်ကျသွားခဲ့သည်။

အရိုးဆူး တိုက်ခိုက်မှုများက ပို၍ပို၍ ပြင်းထန်လာခဲ့သည်။ မြို့ထိပ်မှ အဝေးပစ် စစ်သည်များ တန်ပြန် တိုက်ခိုက်နိုင်ခြင်း မရှိခဲ့ပေ။ ပစ်ခတ်အား များစွာ အားနည်း သွားသည်နှင့် အောက်မှ မကောင်းဆိုးဝါး များ၏ ရေစီးကြောင်းက ခံတပ်သို့ အလျင်အမြန် ချဉ်းကပ်လာနေခဲ့သည်။

ထိုအချိန်တွင် မှော်ပညာရှင် အဖွဲ့က နောက်ဆုံး အဆင်သင့် ဖြစ်သွားပြီ ဖြစ်သည်။ မန္တာန် အဆုံးသတ်သည့် အခိုက်အတန့်တွင် မရေမတွက်နိုင်သော မီးလောင်နေသော ဥက္ကာပျံများက ကောင်းကင်မှ ကျဆင်းလာခဲ့သည်။ ၎င်းမှာ ပါးစပ်ကြီး နတ်ဆိုးဖြစ်စေ၊ ဒေါသအိုး နတ်ဆိုးဖြစ်စေ သူတို့အားလုံး ထို[ဥက္ကာပျံမိုး]အောက်တွင် ပျက်စီးသွား ခဲ့ကြသည်။ သူတို့၏ ထိုးစစ်မှာ အတော် အားနည်းသွားခဲ့သည်။

ခုခံကာကွယ်နေသော စစ်သည်များ အသက်ရှူလိုက်စဉ်မှာပင် ပုံရိပ်များ ဒါဇင် ပေါင်းများစွာက [ဥက္ကာပျံမိုး] အထဲတွင် ပေါ်လာခဲ့သည်။ ကောင်းကင်တစ်ခွင်လုံးမှ မီးလောင်သော ဥက္ကာခဲများ ရုတ်တရက် လားရာပြောင်းလိုက်ပြီး ခံတပ်ဘက်သို့ ပြန်လည် ပျံသန်းလာခဲ့သည်။

ခုခံကာကွယ်နေသော စစ်သည်အားလုံး တုန်လှုပ် သွားကြသော်လည်း ထိုကဲ့သို့ မီးလောင်နေသော ဥက္ကာခဲများ အလျင်အမြန် ပျောက်ကွယ် သွားခဲ့သည်။ လက်နက် အပြည့်အစုံ တပ်ဆင်ထားသော လူများ၏ အတန်းလိုက် မြို့ရိုးပေါ်တွင် ပေါ်လာပြီး အားကောင်းသော အငွေ့ အသက်ကို ထုတ်လွှတ်နေသည်။ သိဒ္ဓိခိုလှုံရာမှ သူတော်စင် အဆင့် အစွမ်းထက်ပုဂ္ဂိုလ်များကို စေလွှတ်လိုက်ခြင်း ဖြစ်သည်။

အရှေ့တွင် ရွှေရောင် ချပ်ကာ အပေါ့ကို ဝတ်ဆင်ထားသော အမျိုးသမီးများ ရှိပြီး လေထဲတွင် လွင့်မျောနေကာ သူတို့၏ လက်ထဲတွင် လောင်ကျွမ်းနေသော ကြာပွတ်တစ်ချောင်းကို ကိုင်ထားသည်။ ထိုသို့ ကြာပွတ်မျိုးက [ဥက္ကာပျံမိုး] ကို မှော်ပညာရှင် အဖွဲ့ထံသို့ ပြန်လည်၍ သွေဖည်စေခဲ့ခြင်းပင်။

မီးလျှံ စုန်းမများပေတည်း...

အနည်းငယ်မျှ တွန့်ဆုတ်ခြင်း မရှိဘဲ သိဒ္ဓိခိုလှုံရာမှ အစွမ်းထက် ပုဂ္ဂိုလ်များ အားလုံး ပျံတက်သွားကြပြီး လေထဲမှ မီးလျှံစုန်းမများထံသို့ ပြေးဝင်သွားခဲ့သည်။ မီးတောက်များနှင့် အလင်းရောင်များ ဖြတ်သန်းသွားသည်။ တစ်ခါတစ်ရံ တစ်စုံတစ်ယောက်က အော်ဟစ်ရင်း လေထဲမှ ပြုတ်ကျလာခဲ့သည်။

အောက်ဘက်မှ မကောင်းဆိုးဝါးများက မြို့ရိုးနှင့် နီးကပ်နေပြီ ဖြစ်သည်။ ဝိုင်းရံ တိုက်ခိုက်ခြင်း သို့မဟုတ် တောင်တက် ပစ္စည်းများ မလိုအပ်ဘဲ ထပ်ဆင့်နေသော မကောင်းဆိုးဝါးများက မြို့ရိုးဆီသို့ တစ်ယောက်ပြီး တစ်ယောက် တိုက်ရိုက် ပျံ့နှံ့သွားခဲ့သည်။ အချို့မှာ အမြင့် တစ်နေရာသို့ ရောက်သွားပြီး မြို့ရိုးပေါ်သို့ တိုက်ရိုက် ခုန်တက်သွားခဲ့သည်။ ခုခံ၍ ကာကွယ်နေသော စစ်သည်များစွာက အဝေးပစ် တိုက်ခိုက်မှုများမှ အနီးကပ် တိုက်ခိုက်မှုသို့ အတင်းအကျပ် ပြောင်းလဲ ခဲ့ရသည်။ မီးလျှံ စုန်းမများကို တိုက်ခိုက် နေသော သိဒ္ဓိခိုလှုံရာမှ စစ်သည်များ၏ အရေအတွက်များကလည်း အလျင်အမြန် ထိုးကျသွားခဲ့သည်။ အခြေအနေ ပို၍ပို၍ မရေမရာ ဖြစ်လာသည်။

လေထဲမှ မီးလျှံ စုန်းမများ ရုတ်တရက် ရပ်တန့်သွားပြီး သူတို့အားလုံး ပြာမှုန့် အဖြစ်သို့ ပြောင်းလဲသွားခဲ့သည်။ ဧရာမ ကွက်လပ်တစ်ခုသည် မြို့ရိုး အရှေ့မှ ရေစီးကြောင်းထဲတွင် ပေါ်လာခဲ့သည်။ ကွက်လပ်က အလျင်အမြန် ပျံ့နှံ့သွားပြီး တိုက်ခိုက်နေသော မကောင်းဆိုးဝါးများ တစ်ယောက်ပြီး တစ်ယောက် နောက်သို့ ပြန်လိမ့် သွားကြသည်။ တိုင်းပြည်အဆင့် အစွမ်းထက်ပုဂ္ဂိုလ်များ နောက်ဆုံးတွင် လှုပ်ရှားလာကြလေပြီ။

အထူးအဆင့် အစွမ်းထက် ပုဂ္ဂိုလ်များ စွမ်းအားမှာ အသေအချာပင် ထူးကဲ၏။ တိုက်ခိုက်မှု အနည်းငယ်ဖြင့် ပျံ့နှံ့နေသော တိုင်းပြည်စွမ်းအားက မကောင်းဆိုးဝါး ရေစီးကြောင်းကို တားဆီးပြီး သူတို့ကို ချေမှုန်းပစ်လိုက်သည်။ စစ်သည်များက တစ်ယောက်ပြီးတစ်ယောက် သြဘာသံ ပေးလိုက်ကြသည်။

သို့သော် တိုင်းပြည်အဆင့် အစွမ်းထက် ပုဂ္ဂိုလ် သုံးဦးသည် စိတ်သက်သာရာ မရခဲ့ကြပေ။ အကြောင်းမှာ သူတို့က မကောင်းဆိုးဝါး အုပ်စု တစ်ခုလုံး၏ ပို၍ အားကောင်းသော ထိခိုက်မှုကို ခံစားနိုင်၍ပင်။ အကယ်၍ မကောင်းဆိုးဝါး ရာနှင့်ချီ သို့မဟုတ် ထောင်နှင့်ချီသာ ရှိခဲ့ပါက မကောင်းဆိုးဝါးများကို ရှင်းပစ်ရန် သူတို့ ယုံကြည်မှု ရှိကြသည်။ သို့သော် ထိုကဲ့သို့ မကောင်းဆိုးဝါးများက ရာနှင့်ချီ၊ ထောင်နှင့်ချီ၊ သောင်းနှင့်ချီ သို့မဟုတ် သိန်းနှင့်ချီ မဟုတ်ပေ။ ၎င်းကို စကားလုံး တစ်လုံးတည်းဖြင့်သာ ဖော်ပြ၍ ရနိုင်၏။ အဆုံးမဲ့ပင်...

တိုင်းပြည်အဆင့် အစွမ်းထက်ပုဂ္ဂိုလ် သုံးဦးက ရုတ်တရက် တုန်လှုပ်သွားသည်။ သူတို့ အတူတကွ အသက်သွင်းခဲ့သော တိုင်းပြည်က အလွန် ထက်မြက်လှသော အင်အား တစ်မျိုးမျိုးကြောင့် စုတ်ပြဲ သွားသလို ခံစားလိုက်ရပြီး မကောင်းဆိုးဝါး ရေစီးကြောင်း၏ ရှေ့ဆုံးတွင် ပုံရိပ်နှစ်ခု ပေါ်လာသည်ကို တွေ့လိုက်ရသည်။

ကြမ်းတမ်းသော အသွင်အပြင်များဖြင့် မနှိုင်းယှဉ်နိုင်သော အင်အားကြီးမားသည့် ခန္ဓာကိုယ်များ။ တင်းမာနေသော ကြွက်သားများက သဘာဝ ချပ်ကာ၏ အသွင်အပြင် ရှိနေပုံရသည်။ ကျောတွင် အရိုးတောင်ပံတစ်စုံ ရှိနေသည်။ ၎င်းတို့၏ လက်ထဲတွင် မဟာဓားများကို ကိုင်ဆောင် ထားသည်။

မြို့ရိုး ဘက်ခြမ်းမှ အားပေးသံများ တိတ်ဆိတ်သွားခဲ့၏။ ၎င်းမှာ တိတ်ဆိတ် သွားသည်ဟု ပြောဆိုခြင်းထက် ၎င်းမှာ မွန်းကြပ်သော လေထုကြောင့် လည်ပင်း ညှစ်ခံလိုက်ရသကဲ့သို့ပင်။

ထိုအရာ အားလုံး၏ ဇစ်မြစ်မှာ ထိုမဟာဓားများ ကိုင်ထား‌သော မကောင်းဆိုးဝါး နှစ်ကောင်ကြောင့်ပင်။

အသူရာချောက်နက် သခင်တွေ...

မကောင်းဆိုးဝါး ရေစီးကြောင်းက နောက်တစ်ကြိမ် လှိမ့်တက်လာနေသည်။

တိုင်းပြည်အဆင့် အစွမ်းထက်ပုဂ္ဂိုလ် သုံးဦးက ထိုသာမန်မကောင်းဆိုးဝါးများကို တိုက်ခိုက်ပြီး အာရုံလွှဲ၍ ရနိုင်တော့မည် မဟုတ်ပေ။ အကြောင်းမှာ သူတို့သည် အသူရာချောက်နက် သခင် နှစ်ပါး၏ အသေမှတ်ခြင်းကို ခံထားရ၍ပင်။ သူတို့ သုံးဦးလုံးက သေခြင်း ခြိမ်းခြောက်မှုကို တစ်ချိန်တည်းတွင် အာရုံခံမိလိုက်ကြပြီး အချင်းချင်း ကြည့်လိုက်သည်။ “တိုက်...”

ပုံရိပ် သုံးခုက လျှပ်စီးကဲ့သို့ပင် အသူရာချောက်နက် သခင်များထံသို့ ပြေးဝင်သွားခဲ့သည်။ သူတို့ဖြ တ်သွားစဉ် မကောင်းဆိုးဝါး ရေစီးကြောင်းကြားတွင် ဧရာမ ကွပ်လပ်သုံးခု စုတ်ပြဲသွားခဲ့သည်။ တစ်ချိန်တည်းမှာပင် ဓားအလင်းရောင် လင်းလက်လာပြီး သေခြင်း လမ်းကြောင်း တစ်ခုကို ဝှေ့ယမ်းလိုက်၏။

ကွက်လပ် သုံးခုက အလျင်အမြန် ပြန်ပြည့်သွားပြီးနောက်တွင် နောက်ထပ် လှုပ်ရှားမှု မရှိတော့ပေ။

ကောင်းကင်မှ သွေးရောင်တိမ်များက အောက်မှ လောင်ကျွမ်းနေသော ခံတပ်ကို ရောင်ပြန်ဟပ်နေခဲ့သည်။