တခြားတစ်ယောက်ကို အရင်သွားရှာလိုက်ပါ

ကျိယန်ကမ္ဘာတွင် အချိန်ကြာမြင့်စွာ နေထိုင်ရန် လုချန်း မရည်ရွယ်ပေ။ ယခုအခါ ကမ္ဘာနှစ်ခု ပေါင်းစပ်သွားပြီ ဖြစ်သဖြင့် ကျိယန်ကမ္ဘာ၏ ကံစွမ်းအား တစ်စိတ်တစ်ပိုင်းကို စုပ်ယူကာ သူ၏ မိဖုရားတစ်ပါးအား ရင်သွေးကမ္ဘာ မွေးဖွားရာတွင် ကူညီပေးရန် စီစဉ်ထားသည်။

နန်းကုန်းညီအစ်မ နှစ်ဦးနှင့်အတူ လဝက်ခန့် အချိန်ကုန်ဆုံးပြီးနောက် နန်းကုန်းယွဲ့ဟွာလည်း နတ်ဘဝပြောင်းလဲခြင်း နယ်ပယ်သို့ နောက်ဆုံးတွင် ဝင်ရောက်နိုင်ခဲ့သည်။ နန်းကုန်းယွဲ့ဟွာထံမှ စိတ်ဝိညာဉ်စွမ်းအားများ တိုးပွားလာသည်ကို လုချန်း ခံစားလိုက်ရသဖြင့် သူမအား အပြစ်ပေးနေခြင်းကို ချက်ချင်း ရပ်တန့်လိုက်ပြီး ခွာလိုက်သည်။

နန်းကုန်းယွဲ့ဟွာ၏ ဆွဲဆောင်မှုရှိသော မျက်နှာကို စိုက်ကြည့်ရင်း လုချန်းက ပြုံးကာ

“မင်း အခုပဲ အဆင့်တက်သွားတာဆိုတော့ ကျင့်စဉ်အခြေအနေ တည်ငြိမ်အောင် ကောင်းကောင်း လုပ်ထားလိုက်ပါဦး။”

ထိုစကားကို ကြားသောအခါ နန်းကုန်းယွဲ့ဟွာ၏ စိတ်ထဲ အလွန် အံ့အားသင့်သွားမိသည်။ သူမ အဆင့်တက်သွားသည်ကို အမှန်တကယ် ခံစားလိုက်ရ၏။ အထူးသဖြင့် ဤကဲ့သို့သော အခြေအနေမျိုးအောက်တွင် ဖြစ်သောကြောင့် ပို၍ အံ့သြရသည်။

သို့သော် အဆင့်တက်သွားခါနီး ကောင်းကင်ဘုံလမ်းစဉ် ဘေးဒဏ်ကို သူမ ဘာကြောင့် မကြုံတွေ့ရသနည်း။

သူမ၏ ဘေးနားရှိ လူကို နန်းကုန်းယွဲ့ဟွာ ကြည့်လိုက်မိသည်။

သူများ ဖြစ်နေမလား...

လုချန်း တစ်ခုခု လုပ်လိုက်ခြင်း ဖြစ်ရမည်ဟု နန်းကုန်းယွဲ့ဟွာ တွေးတောလိုက်မိသည်။ လွန်ခဲ့သော အချိန်က လနက်မြို့တွင် နန်းကုန်းချင်ရ အဆင့်တက်ရောက်စဉ်ကလည်း မိုးကြိုးဘေးဒဏ်သည် ဆန်းကြယ်စွာ ပျောက်ဆုံးသွားခဲ့ဖူးသည်ကို သတိရလိုက်သည်။

သူမတို့နှစ်ဦးစလုံးတွင် တူညီသော အချက်တစ်ခု ရှိသည်။ ထိုအရာမှာ လုချန်း၏ အမျိုးသမီးများ ဖြစ်နေခြင်းပင်။ လုချန်းက သူမတို့အား ကောင်းကင်ဘုံ လမ်းစဉ် ကပ်ဘေးဒဏ်မှ ရှောင်တိမ်းနိုင်ရန် တစ်စုံတစ်ခု ကူညီလုပ်ဆောင်ပေးခဲ့ခြင်း ဖြစ်နိုင်ခြေ အလွန်များသည်။

ဒီလူက ဘယ်သူလဲ။

ကောင်းကင်ဘုံလမ်းစဉ်ရဲ့ ဟန့်တားမှုကို ရှောင်တိမ်းနိုင်တဲ့ ဒီလိုနည်းလမ်းတွေကို ဘယ်လို ပိုင်ဆိုင်ထားတာလဲ။

လုချန်း၏ ဇစ်မြစ်အစစ်အမှန်ကို နန်းကုန်းယွဲ့ဟွာ ပိုမို သိလိုလာသော်လည်း ဆက်လက် တွေးတောမနေတော့ပေ။ သူမ၏ လက်ရှိ ဦးစားပေးမှာ သူမ၏ ကျင့်စဉ်အဆင့်ကို ခိုင်မာအောင် လုပ်ဆောင်ရန်သာ ဖြစ်သည်။

ထို့နောက် နန်းကုန်းယွဲ့ဟွာ တင်ပျဉ်ခွေ ထိုင်လိုက်ပြီး ခန္ဓာကိုယ်အတွင်းရှိ စိတ်ဝိညာဉ်စွမ်းအားကို လှည့်ပတ်ကာ ကျင့်စဉ်အဆင့် တည်ငြိမ်စေရန် စတင် လုပ်ဆောင်လိုက်သည်။

လုချန်းက သူမနှင့် ခွာလိုက်ပြီးနောက် အချိန်ဖြုန်းမနေခဲ့ပေ။ နန်းကုန်းချင်ရကို ချက်ချင်း ဆွဲယူလိုက်ပြီး တွန့်ဆုတ်နေခြင်း မရှိပဲ လှဲချလိုက်သည်။

နန်းကုန်းယွဲ့ဟွာ ကျင့်စဉ်အဆင့် တည်ငြိမ်စေရန် ကျင့်ကြံနေစဉ် နန်းကုန်းချင်ရ၏ ညည်းညူသံများနှင့် အော်ဟစ်သံများ နန်းကုန်းယွဲ့ဟွာ၏ နားထဲတွင် အဆက်မပြတ် ပဲ့တင်ထပ်နေခဲ့ရာ သူမအား အလွန် စိတ်အနှောင့်အယှက် ဖြစ်စေခဲ့သည်။ သို့သော် နန်းကုန်းယွဲ့ဟွာ၌ ထပ်မံ ဝေဖန်ပြောဆိုနိုင်သည့် အနေအထားတွင် မရှိတော့ပေ။ အဘယ်ကြောင့်ဆိုသော် သူမသည်လည်း ယခင်က နန်းကုန်းချင်ရနှင့် မခြားနားခဲ့သောကြောင့် ဖြစ်သည်။

ခန္ဓာကိုယ်အတွင်းရှိ ဂနာမငြိမ်ဖြစ်နေသော စိတ်ဝိညာဉ်စွမ်းအားကို ငြိမ်သက်စေပြီးနောက် နန်းကုန်းယွဲ့ဟွာ သူမ၏ မျက်လုံးများကို ဖွင့်လိုက်ပြီး လှုပ်ရှားနေသော ပုံရိပ်များကို ကြည့်လိုက်သည်။

သူမ၏ မျက်လုံးထဲတွင် ရှုပ်ထွေးသော ခံစားချက်တစ်ခု လက်ခနဲ ဖြတ်သန်းသွားသည်။ ဤအရာအားလုံးသည် သူမ၏ ဆန္ဒအလျောက် ဖြစ်ပြီး သူမအတွက် အပေးအယူ တစ်ခုသာ ဖြစ်သော်လည်း ဤလူ၏ ကျွန်ပြုခြင်းကို ခံလိုက်ရပြီး သူ၏ ကစားစရာ အရုပ်တစ်ခုအဖြစ် လုံးလုံးလျားလျား ဖြစ်သွားပြီဟု သူမ သဘောပေါက်လိုက်သည်။

ထိုအတွေးဖြင့် နန်းကုန်းယွဲ့ဟွာက သက်ပြင်းတိုးတိုး ချလိုက်သည်။ တစ်ချိန်က ဂုဏ်သိက္ခာ ကြီးမားသော ဧကရီ ဖြစ်သည့် သူမသည် ဤကဲ့သို့သော အခြေအနေမျိုးဖြင့် အဆုံးသတ်ခဲ့ရသည်။

ဒါက ကိစ္စမရှိ‌ဟု သူမ ဆင်ခြင်လိုက်သည်။

မည်သို့ပင်ဖြစ်စေ သူမ နစ်နာမသွားခဲ့ပေ။ လုချန်း မရှိလျှင် နတ်ဘဝပြောင်းလဲခြင်း အဆင့်သို့ မည်သည့်အချိန်တွင် ရောက်ရှိနိုင်မည်မှန်း သူမ မသိနိုင်ပေ။

ထို့ပြင် သူမတွင် ကျင့်ကြံဖော်လည်း မရှိပေ။ နောက်ခံအဖြစ် အမျိုးသားတစ်ဦး ရှိလာခြင်းက မကောင်းသော ကိစ္စတစ်ခု မဟုတ်ပေ။

နန်းကုန်းယွဲ့ဟွာ အတွေးထဲ နစ်မြောနေစဉ် နန်းကုန်းချင်ရ၏ အသံက ရုတ်တရက် ကျယ်လောင်လာပြီး မျက်လုံးများ လန်တက်သွားသည်။ နန်းကုန်းယွဲ့ဟွာ ချက်ချင်း သတိပြန်ဝင်လာပြီး နန်းကုန်းချင်ရကို

“အရှက်မရှိလိုက်တာ”

ဟု မထီမဲ့မြင် ကြည့်ကာ ပြောလိုက်သည်။

နန်းကုန်းချင်ရက အသက်ပြင်းပြင်း ရှူလိုက်ပြီး ခဏအကြာတွင်

“အစ်မ... နင်ငါ့ကို အဲဒီလိုပြောဖို့ နင့်မှာ အခွင့်အရေး ရှိမယ်မထင်ဘူး...”

အမျိုးသမီးနှစ်ဦးကြား စကားများမှုကို လုချန်း ဂရုမစိုက်ခဲ့ပေ။ သူက နန်းကုန်းချင်ရ၏ နှုတ်ခမ်းများကို ညင်သာစွာ နမ်းလိုက်ပြီးနောက် ခွာလိုက်သည်။

“.. ဒီနေ့တော့ ဒီလောက်ပါပဲ။ အခု ကျိယန်ကမ္ဘာလည်း တည်ငြိမ်သွားပြီဆိုတော့ ထျန်းချန်ကမ္ဘာကို ပြန်ပြီး သွားကြည့်သင့်ပြီ။”

ထိုစကားကို ကြားသောအခါ နန်းကုန်းချင်ရက

“မင်းကြီး... ကျိယန်ကမ္ဘာမှာ အရုပ်တစ်ခု ချန်ထားခဲ့မှာလား”

ဟု မောပန်းစွာဖြင့် လျင်မြန်စွာ မေးလိုက်သည်။

လုချန်းက

“အင်း... ချန်ခဲ့မယ်။ အနာဂတ်မှာ ပြဿနာ တစ်ခုခု ရှိရင် အဲဒီအရုပ်ကနေတစ်ဆင့် ကိုယ့်ကို တိုက်ရိုက် အသိပေးလို့ရတယ်။”

လုချန်း၏ စကားဆုံးသည်နှင့် နန်းကုန်းယွဲ့ဟွာက

“မင်းကြီး... အရုပ်တစ်ရုပ်တည်းဆိုရင် မလောက်လောက်ဘူး။”

လုချန်းက

“ဘာလို့လဲ”

ဟု စိတ်ဝင်တစား မေးလိုက်သည်။

နန်းကုန်းယွဲ့ဟွာက

“အရုပ်တစ်ရုပ်တည်း ထားခဲ့ရင် ကျွန်မဘေးနားမှာ ထားရမှာလား။ ဒါမှမဟုတ် ချင်ရ ဘေးနားမှာ ထားရမှာလား”

လုချန်း ချက်ချင်း သဘောပေါက်လိုက်ပြီး ပြုံးကာ

“ထျန်းချန်ကမ္ဘာကို ပြန်ရောက်တာနဲ့ အရုပ်အပိုတွေ ထပ်လုပ်ခိုင်းလိုက်မယ်။ ဒါဆို မင်းတို့တစ်ယောက်ချင်းစီရဲ့ ဘေးနားမှာ တစ်ရုပ်စီ ရှိနေမှာပေါ့။”

“လောလောဆယ် ဒီကိစ္စ ဒီမှာပဲ ထားလိုက်ကြစို့။ အရင် သွားဆေးကြောရအောင်”

ထို့နောက် သူတို့သုံးဦးသည် ကပ်လျက် ရေချိုးဆောင်သို့ သွားကာ လျင်မြန်စွာ ဆေးကြောသန့်စင်လိုက်ကြ၏။ ထို့နောက် လုချန်းလည်း နဂါးစစ်တပ်၏ တစ်စိတ်တစ်ပိုင်းနှင့် စုဆောင်းထားသော စိတ်ဝိညာဉ်ကျောက်တုံးများကို ထျန်းချန်ကမ္ဘာသို့ ပြန်လည် ယူဆောင်သွားခဲ့သည်။

ကျိယန်ကမ္ဘာ၏ နယ်နမိတ် အက်ကြောင်းသို့ လုချန်း ရောက်ရှိသောအခါ ထျန်းချန်ကမ္ဘာသို့ ချက်ချင်း မဝင်ရောက်ခဲ့ပေ။ ထိုအစား ကျိယန်ကမ္ဘာ၏ ကံစွမ်းအားကို အာရုံခံရန် သူ၏ စိတ်အာရုံကို လွှတ်ထုတ်လိုက်သည်။

ကျိယန်ကမ္ဘာ၏ ကံစွမ်းအားသည် ထျန်းချန်ကမ္ဘာထက် များစွာ သာလွန်ကြွယ်ဝနေသည်။ သို့သော် ကံစွမ်းအား အမြောက်အမြား စုပ်ယူရန် လုချန်း မရည်ရွယ်ထားပေ။

အဘယ်ကြောင့်ဆိုသော် ကျိယန်ကမ္ဘာသည် အဆင့်နိမ့် ကျင့်စဉ်ကမ္ဘာတစ်ခု ဖြစ်သောကြောင့် ဖြစ်သည်။ ကံစွမ်းအား အလွန်အကျွံ စုပ်ယူလိုက်ပါက ပြန်လည်ကောင်းမွန်ရန် ခက်ခဲမည် ဖြစ်ပြီး ကျိယန်ကမ္ဘာ တစ်ခုလုံးရှိ ကျင့်ကြံသူများ ဒုက္ခရောက်ကြမည် ဖြစ်သည်။

ကျိယန်ကမ္ဘာ၏ ကံစွမ်းအားကို လုချန်း ချက်ချင်း စတင် စုပ်ယူလိုက်ပြီး အားလုံးကို မိမိ၏ ကိုယ်ပိုင် ကံစွမ်းအားအဖြစ် ပြောင်းလဲလိုက်သည်။ ထို့နောက် ဤကံစွမ်းအားများကို သူ၏ ဝမ်းဗိုက်ထဲတွင် သိမ်းထားလိုက်ပြီး ထျန်းချန်ကမ္ဘာသို့ ပြန်ရောက်သည်နှင့် ထုတ်လွှတ်ရန် စဉ်းစားလိုက်သည်။

ဤအရာအားလုံး ပြီးစီးပြီးနောက် လုချန်းလည်း ထျန်းချန်ကမ္ဘာသို့ နောက်ဆုံးတွင် ဝင်ရောက်ခဲ့သည်။

ကျိယန်ကမ္ဘာ စစ်ပွဲသတင်းသည် ထျန်းချန်ကမ္ဘာ တစ်ခုလုံးသို့ ပျံ့နှံ့ခဲ့သည်မှာ ကြာပြီ ဖြစ်သည်။ နဂါးစစ်တပ် ထျန်းချန်ကမ္ဘာသို့ ပြန်လည်ရောက်ရှိလာချိန်တွင် အဓိက အင်အားစုကြီး အားလုံးနီးပါးမှ ခေါင်းဆောင်များ လာရောက် ကြိုဆိုကြသည်။

ထျန်းချန်ကမ္ဘာသည် ချက်ချင်းဆိုသလို အလွန် စည်ကားသွားပြီး လဝက်ခန့် အဆက်မပြတ် ပွဲလမ်းသဘင်များ ကျင်းပခဲ့ကြသည်။

ထျန်းချန်ကမ္ဘာသို့ ပြန်ရောက်ပြီးနောက် ရန်မြို့နန်းတော်သို့ ဦးစွာ သွားရောက်ခဲ့ပြီး ရန်ခရိုင်ရှိ သူ၏ ဇနီးမယားများကို နှစ်သိမ့်ရန် လဝက်ခန့် နေထိုင်ခဲ့ကာ ထို့နောက်မှ နဂါးနက်မြို့တော် နန်းတော်သို့ သွားရောက်ခဲ့သည်။

အေးစက်ပြီး ခမ်းနားထည်ဝါသော နန်းတော်အတွင်းရှိ ခန်းမတစ်ဖက်တွင် ဆံပင်ဖြူ အမျိုးသမီးတစ်ဦးသည် ကုတင်ပေါ်၌ တင်ပျဉ်ခွေထိုင်ကာ ကျင့်ကြံနေသည်။

ခန်းမအတွင်းရှိ အအေးဓာတ် မြင့်တက်နေပြီး ကြမ်းပြင်ပေါ်တွင် နှင်းခဲလွှာများ ဖုံးလွှမ်းနေသည်။

လုချန်း ထျန်းချန်ကမ္ဘာသို့ ပြန်ရောက်လာကြောင်းကို ယွမ်ရှန်ရှန် သိထားပြီးဖြစ်သည်။ လုချန်းက သူမထံသို့ ချက်ချင်း လာမတွေ့သော်လည်း သူမ လုံးဝ ဂရုမစိုက်ပေ။

လုချန်းတွင် အမျိုးသမီး အများအပြား ရှိပြီး ထိုဇနီးမယားများကို နှစ်သိမ့်ရန် အချိန်အတန်ကြာမည်ကို သူမ သိထားသည်။

လုချန်း၏ သာမန်ဇနီးမယားများအပေါ် ယွမ်ရှန်ရှန် မနာလို ဖြစ်ခဲသည်။ သူမ၏ မနာလိုမှု အများစုမှာ သူမ၏ မူလခန္ဓာကိုယ် ဖြစ်သော ယွမ်ချင်းရှုကြောင့် ဖြစ်သည်။ ယခု ယွမ်ချင်းရှု ထျန်းချန်ကမ္ဘာမှ ထွက်ခွာသွားပြီ ဖြစ်သောကြောင့် ထိုကျဉ်းကျပ်သော ခံစားချက်များ မရှိတော့ပေ။

သူမ၏ စိတ်ထဲတွင် လုချန်း၏ သာမန်ဇနီးမယားများသည် သူမနှင့် လုံးဝ ယှဉ်နိုင်ခြင်း မရှိပေ။ ထိုအမျိုးသမီးများအပေါ် မနာလိုဖြစ်ခြင်းက သူမ၏ သိက္ခာကို ကျဆင်းစေသည်ဟု ခံစားရသည်။

ရှေးဟောင်းခေတ်ကာလ၏ ကြီးမားသော ကပ်ဘေးကြီး အကြောင်းကို သိထားပြီ ဖြစ်၍ သူမ၏ အာရုံစိုက်မှုအား ဧကရာဇ်အဆင့်သို့ အမြန်ဆုံး ရောက်ရှိရန်သာ ဦးတည်ထားသည်။

ကျားမကြား ကိစ္စများကို ပြောပလောက်စရာ မဟုတ်ဟု ယူဆထားသည်။

ထိုအချိန်မှာပင် အေးစက်သော အိပ်ဆောင်ထဲတွင် ပုံရိပ်တစ်ခု ပေါ်လာသည်။

လူရောက်လာသည်ကို အာရုံခံမိသော်လည်း ယွမ်ရှန်ရှန်က မျက်လုံးဖွင့်မကြည့်ဘဲ

“သူတို့ကို ကျေနပ်အောင်လုပ်ပေးတာ မြန်လှချည်လား”

ဟု ခံစားချက်ကင်းမဲ့စွာ ပြောလိုက်သည်။

ထိုစကားကို ကြားသောအခါ လုချန်းက ရယ်မောပြီး

“သူတို့အားလုံး ကျေနပ်ဖို့ အရမ်းလွယ်ပါတယ်”

ယွမ်ရှန်ရှန်က

“ကျွန်မ ကျင့်စဉ်ကျင့်ချင်သေးတယ်။ ရှင် တခြားတစ်ယောက်ကို အရင်သွားရှာလိုက်ပါ”

ဟု အေးစက်စွာ ဆက်ပြောလိုက်သည်။

လုချန်းနှင့် စကားနိုင်လုခြင်းဖြင့် မလွတ်မြောက်နိုင်ကြောင်း ယွမ်ရှန်ရှန် သိသော်လည်း အလှည့်ကို ကျော်နိုင်သည်။ မည်သို့ပင်ဖြစ်စေ နဂါးနက်မြို့တော်တွင် စုဟန်ယန်နှင့် ချန်ဝမ်ရွန်ကဲ့သို့သော အခြား အမျိုးသမီး အများအပြား ရှိသေးသည်။

ယွမ်ရှန်ရှန် စကားဆုံးသည်နှင့် သူမဆီသို့ အင်အားတစ်ခု ရောက်ရှိလာသည်ကို ရုတ်တရက် ခံစားလိုက်ရပြီးနောက် ကုတင်ပေါ်သို့ လှဲချခံလိုက်ရသည်။ နောက်တစ်ခဏတွင် အားကောင်းသော ယောက်ျားရနံ့တစ်ခု သူမ၏ နှာခေါင်းထဲသို့ ဝင်ရောက်လာပြီး သူမ၏ အတွင်းရှိ စိတ်ဝိညာဉ်စွမ်းအားများ လှုပ်ရှားလာသည်။

ယွမ်ရှန်ရှန် သူမ၏ မျက်လုံးများကို ချက်ချင်း ဖွင့်လိုက်ပြီး

“ရှင်....”