ပေမင်ခုံနှင့် တိုက်ပွဲ

~မျက်စိတစ်မှိတ်အတွင်း ပေါ်ထွက်လာသော ထိုလူငယ်မှာ အခြားသူမဟုတ်ပေ။ သူကား ကျန့်လင်တောင်ကြား၏ တောင်ကြားသခင်လေး ပေမင်ခုံ ပင် ဖြစ်ပြီး သူ၏ ကျင့်ကြံခြင်းအဆင့်မှာ ထျန်းယွမ်ဘုံ တတိယအလွှာ၌ ရှိနေ၏။

လက်ဝါးတစ်ချက်တည်းဖြင့် သူသည် ကိုးထပ် ချန်ခွန်း မျှော်စင်၏ တိုက်ခိုက်မှုကို တားဆီးနိုင်ခဲ့သည် ဖြစ်ရာ ပေမင်ခုံ၏ အစွမ်း မည်မျှ ကြောက်မက်ဖွယ်ကောင်းသည်ကို ပြသနေလေသည်။

"တောင်ကြားသခင်လေး။ ဖုန်းဝူချန်ကို သတ်လိုက်ပါ"

"ဖုန်းဝူချန်ကို သတ်လိုက်ပါ"

ပေမင်ခုံ ဝင်ရောက်လာသည်နှင့် တပည့်များအားလုံး စိတ်သက်သာရာ ရသွားကြပြီး ဒေါသတကြီး အော်ဟစ် ကြွေးကြော်လိုက်ကြသည်။

"ဘုန်း"

"ဝုန်း...ဝုန်း"

ပေမင်ခုံ၏ လက်ဝါးသည် နောက်တစ်ကြိမ် ရိုက်ထုတ်လိုက်ပြန်ရာ မိုးခြိမ်းသံကဲ့သို့ ပေါက်ကွဲသံကြီး ထွက်ပေါ်လာ၏။ ကြေးဝါရောင် ဧရာမ ပုံရိပ်ကြီးသည် နားကွဲမတတ် မြည်ဟည်းသွားပြီး ကြောက်မက်ဖွယ် စွမ်းအားများက ကိုးထပ် ချန်ခွန်း မျှော်စင်အား ကောင်းကင်ယံဆီသို့ တိုက်ရိုက် လွင့်စင်သွားစေတော့သည်။

ပေမင်ခုံက အနည်းငယ် အေးစက်စွာ မဲ့ပြုံး ပြုံးလိုက်သည်။

"ကိုးထပ် ချန်ခွန်း မျှော်စင်ရဲ့ စွမ်းအားက တကယ်ပဲ အစွမ်းထက်လှတာပဲ။ မဆန်းပါဘူး။ အင်ပါယာကြီး လေးခုနဲ့ အဓိက အင်အားစုတွေက ဒါကိုရဖို့ ဘာပဲပေးဆပ်ရ ပေးဆပ်ရ တိုက်ခိုက်နေကြတာ"

ပေမင်ခုံသည် သူ၏ လက်များကို နောက်သို့ ပစ်လိုက်ပြီး ဆက်လက် ကြွေးကြော်လိုက်သည်။

"ကျိုကျိုးကို ခြေချရဲတယ်။ ကျန့်လင်တောင်ကြားက လူတွေကို သတ်ရဲတယ်။ ပြီးတော့ ကျန့်လင်တောင်ကြားထဲကိုတောင် ကျူးကျော်ဝင်ရောက်ရဲသေးတယ်။ ဖုန်းဝူချန်။ မင်းက သာမန် မောက်မာတာ မဟုတ်ဘူးပဲ ဟုတ်လား။ မင်းကိုယ်မင်း ဒီလောကမှာ ပြိုင်ဘက်ကင်းလို့ ထင်နေတာလား"

'ဒီလူ့အစွမ်း သိပ်သန်မာတယ်။'

ဖုန်းဝူချန်က မျက်မှောင်ကြုတ်ရင်း စိတ်ထဲမှ မှတ်ချက်ချလိုက်၏။ သူ၏ မျက်နှာထားမှာ လေးနက်နေသည်။

'ဒီလိုဆိုမှတော့ ဒီအခွင့်အရေးကို အသုံးချပြီး အဖေ့ကို ကယ်ထုတ်ဖို့က မဖြစ်နိုင်တော့ဘူး ထင်တယ်။’

ကျန့်လင်တောင်ကြားတွင် ပေမင်ခုံလည်း အစောင့်အဖြစ် ရှိနေလိမ့်မည်ဟု ဖုန်းဝူချန် မမျှော်လင့်ထားခဲ့ပေ။

ထိုစဉ်၊ လင်ရှောင်ရှောင်က မျက်မှောင်ကြုတ်ရင်း ပြောလာသည်။

"အစ်ကိုကြဖုန်း။ ကျန့်လင်တောင်ကြားက အစကတည်းက ပြင်ဆင်ထားပြီးသားပဲ နေမှာ။ ကျွန်မတို့ ထောင်ချောက်ထဲ လာကျမယ့်အချိန်ကို စောင့်နေကြတာ"

"ချန်အာ။ သတိထားနော်"

ရှောင်ချင်းချင်းက တိုက်တွန်းလိုက်သည်။

"ရှောင်ရှောင်။ မေမေ့ကို သေချာ ကာကွယ်ထားပါ"

ဖုန်းဝူချန်က မှာကြားလိုက်သည်။ ထျန်းယွမ်ဘုံ တတိယအလွှာ၏ စွမ်းအားသည် ဖုန်းဝူချန်အား သတိထားသွားစေရန် မလုံလောက်

သေးပေ။

ပေမင်ခုံ၏ အစွမ်းသည် ထျန်းယွမ်ဘုံ စတုတ္ထအလွှာနှင့် ယှဉ်နိုင်စေကာမူ ကိုးထပ် ချန်ခွန်း မျှော်စင်၏ အကူအညီဖြင့် ဖုန်းဝူချန်တွင်လည်း တိုက်ခိုက်ရန် စွမ်းအား ရှိနေ၏။

"ဖုန်းဝူချန်။ ကိုးထပ် ချန်ခွန်း မျှော်စင်ကို ထုတ်ပေး။ မင်းအဖေကို မင်း ပြန်ခေါ်သွားလို့ ရတယ်။ ငါ ဒီသခင်လေးက ကတိ မဖျက်ဘူး"

ပေမင်ခုံက အေးစက်စွာ ကဲ့ရဲ့လိုက်သည်။ သူ၏ အမူအရာမှာ ဖုန်းဝူချန်အား သူ၏ ထိန်းချုပ်မှုအောက်တွင် လုံးဝ ရှိနေသကဲ့သို့ ပေါ်နေ၏။

'ဒီလို အနှစ်မရှိတဲ့ ကတိစကားမျိုးတွေ ငါ ဘယ်လောက် ကြားခဲ့ရပေါင်း များနေပြီလဲ။'

ဖုန်းဝူချန်သည် ဤသို့သော အချည်းနှီး ကတိစကားများကို ယုံကြည်ရန် အကြိမ်များစွာ ကြားခဲ့ရပြီး ဖြစ်သည်။

"ဝုန်း...ဝုန်း"

ရုတ်တရက်၊ အထွတ်အထိပ် ခန္ဓာ ဒုတိယအဆင့်၏ စွမ်းအားများ တိုးထွက်လာပြီး သွေးစွမ်းအင် အမျှင်တန်းများသည် ဖုန်းဝူချန်၏ ခန္ဓာကိုယ်မှ ထွက်ပေါ်လာသည်။ ကြောက်မက်ဖွယ် စွမ်းအားများ ရူးသွပ်မတတ် ပေါက်ကွဲထွက်လာ၏။ ထို့နောက် သူ၏ သွေးမျိုးဆက် စွမ်းအားကိုပါ နှိုးဆော်လိုက်ရာ စွမ်းအားများမှာ ပေါက်ကွဲထွက်မတတ် တိုးပွားလာပြီး ရင်ပြင်ကြီးတစ်ခုလုံး ပြင်းထန်စွာ တုန်ခါသွားစေသည်။

"အိုး။ လုံးဝ မရိုးရှင်းဘူးပဲ။ ဒီလောက် ကြီးမားတဲ့ စွမ်းအားတွေကို တိုးမြှင့်နိုင်တယ် ဟုတ်လား"

ပေမင်ခုံက အံ့ဩတကြီး ကြွေးကြော်လိုက်သည်။ သို့သော် ထိုမျှသာ ဖြစ်၏။

ပေမင်ခုံက ခေါင်းခါလိုက်ပြီး မဲ့ပြုံး ပြုံးလိုက်သည်။

"ဖုန်းဝူချန်။ မင်းမှာ အခွင့်အရေး မရှိတော့ဘူး။ မင်းအဖေက ငါ့လက်ထဲမှာ။ အချိန်မရွေး အသက်ပျောက်သွားနိုင်တယ်"

"ချီလင် ချပ်ဝတ်"

ဖုန်းဝူချန်က အသံတိုးတိုးဖြင့် အမိန့်ပေးလိုက်ပြီး ချီလင် ချပ်ဝတ်ကို ဆင့်ခေါ်လိုက်သည်။ ကြောက်မက်ဖွယ် အရှိန်အဝါများမှာ တစ်ဖန် တိုးထွက်လာပြန်သည်။

ချီလင် ချပ်ဝတ်၏ ကြမ်းတမ်းပြီး သွေးဆာနေသော အရှိန်အဝါများက ပတ်ဝန်းကျင်သို့ ရူးသွပ်မတတ် ပျံ့နှံ့သွားပြီး တပည့်များစွာမှာ ကြောက်လန့်တကြားဖြင့် နန်းတော်များထဲသို့ ဆုတ်ခွာ ဝင်ရောက်သွားကြသည်။

'ဒီတောင်ပံတွေက သူ့ရဲ့ အရှိန်အဝါကို တိုးမြှင့်ပေးလိုက်တာပဲ။'

ပေမင်ခုံ၏ မျက်ခုံးများ တင်းကြပ်စွာ တွန့်ချိုးသွားသည်။ ချီလင် ချပ်ဝတ်၏ ကြောက်မက်ဖွယ် အရှိန်အဝါက သူ့အား အကြီးအကျယ် တုန်လှုပ်သွားစေခဲ့သည်။

သို့သော် ဖုန်းဝူချန်၏ စွမ်းအားများ ပေါက်ကွဲထွက်မတတ် တိုးပွားလာသည်နှင့်အမျှ ကိုးထပ် ချန်ခွန်း မျှော်စင်မှ ထုတ်လွှတ်နေသော ဖိနှိပ်မှု စွမ်းအားမှာ ပို၍ပင် ကြောက်မက်ဖွယ် ကောင်းလာတော့သည်။

ပေမင်ခုံ၏ မျက်နှာအမူအရာ အနည်းငယ် ပြောင်းလဲသွားပြီး ကိုးထပ် ချန်ခွန်း မျှော်စင်အား မော့ကြည့်လိုက်ကာ ထိတ်လန့်တကြား အာမေဋိတ်ပြုလိုက်သည်။

"ဒီဖိနှိပ်မှု စွမ်းအားက သိပ်ကို လွှမ်းမိုးနိုင်လွန်းတာပဲ"

ပေမင်ခုံသည် သူ၏ ခန္ဓာကိုယ်အတွင်းမှ အစစ်အမှန်ယွမ်များ ပြင်းထန်စွာ ဖိနှိပ်ခံနေရသည်ကို ရှင်းလင်းစွာ ခံစားမိလိုက်ပြီး ကိုးထပ် ချန်ခွန်း မျှော်စင်၏ စွမ်းအားကို သဘောပေါက်သွားစေခဲ့သည်။

'ဒါ ဒါ ငါ့ရဲ့ ကျင့်ကြံခြင် းအဆင့် တစ်လွှာစာကို ဖိနှိပ်လိုက်တာပဲ။'

ပေမင်ခုံသည် သူ၏ နှလုံးသားထဲတွင် အကြီးအကျယ် စိတ်ပျက်သွားရသည်။ ကိုးထပ် ချန်ခွန်း မျှော်စင်မှ လွှမ်းမိုးနိုင်သော ဖိနှိပ်မှုသည် သူ၏ စွမ်းအား အဆင့်တစ်လွှာကို အတင်းအကျပ် ချုပ်တည်းထားလိုက်၏။

ဖုန်းဝူချန်ထံမှ ပေါက်ကွဲထွက်လာသော ကြောက်မက်ဖွယ် စွမ်းအားကို ခံစားမိသောအခါ တိုးထွက်လာသော ကြီးမားသည့် စွမ်းအားများက ကျန့်လင်တောင်ကြားမှ တပည့်များအားလုံးကို ကြောက်လန့်သွားစေသည်။ သူတို့သည် ကြောက်ရွံ့မှုဖြင့် တုန်ယင်လာကြပြီး ချွေးအေးများပင် စို့ထွက်လာကြ၏။

ဖုန်းဝူချန်၏ အရှိန်အဝါ တိုးပွားမှု ရပ်တန့်သွားသောအခါ သူ၏ ကြောက်မက်ဖွယ် ခွန်အားသည် ထျန်းယွမ်ဘုံ တတိယအလွှာကို ကျော်လွန်သွားခဲ့လေပြီ။

'သူ သူ တကယ်ပဲ ကျင့်ကြံခြင်း အဆင့် နှစ်လွှာစာကို တိုးမြှင့်လိုက်တာ။'

ပေမင်ခုံ၏ မျက်နှာတွင် နောက်ဆုံး၌ တုန်လှုပ်မှု အရိပ်အယောင်တစ်ခု ထင်ဟပ်လာတော့သည်။ ဖုန်းဝူချန်၏ ကြောက်မက်ဖွယ် ကောင်းမှုသည် သူ၏ စိတ်ကူးထက်ပင် ကျော်လွန်နေခဲ့သည်။

ကျန့်လင်တောင်ကြားရှိ လေထုမှာ အလွန်အမင်း ခြောက်ခြားမှုဖြင့် ပြည့်နှက်နေပြီး သူတို့အားလုံးသည် ဖုန်းဝူချန်အား မိစ္ဆာတစ်ကောင်ကို တွေ့မြင်နေရသည့်အလား ကြည့်ရှုနေကြသည်။

ဖုန်းဝူချန် မုရုန်ထျန်းလီအား သတ်ဖြတ်နိုင်ခဲ့စဉ်က သူ၏ အစွမ်းသည် ထျန်းယွမ်ဘုံ တတိယအလွှာ အဆင့်သို့ ရောက်ရှိနေခဲ့ပြီး ဖြစ်သည်။ လွှမ်းမိုးနိုင်သော အစွမ်းထက် ဓားသိုင်းပညာ၏ တိုက်ခိုက်မှုများအောက်တွင် မုရုန်ထျန်းလီ၌ ခုခံနိုင်စွမ်း မရှိခဲ့ပေ။

ဤမျှ ပြင်းထန်သော အစွမ်းဖြင့် ဖုန်းဝူချန်သည် ပေမင်ခုံအား ကြောက်ရွံ့နေမည် မဟုတ်ပေ။

ဖုန်းဝူချန်သည် သူ၏ အမြင့်ဆုံး ပုံစံသို့ ပေါက်ကွဲထွက်လာပြီး သူ၏ တိုက်ခိုက်ရေး စွမ်းအားမှာ အလွန်တရာ ကြောက်မက်ဖွယ်ကောင်းလှသည်။

ပေမင်ခုံက မျက်မှောင်ကြုတ်ရင်း ဆိုလိုက်သည်။ သူ၏ တိုက်ခိုက်လိုစိတ်များ ထကြွလာပြီး သူ၏ ခန္ဓာကိုယ်အတွင်းမှ အစစ်အမှန်ယွမ်များကို အပြည့်အဝ နှိုးဆော်လိုက်၏။

"မောက်မာရဲတဲ့ အစွမ်းတော့ ရှိသားပဲ။ လာစမ်း။ မင်းမှာ ဘယ်လို အရည်အချင်းတွေ ရှိလဲ ငါ ကြည့်ရသေးတာပေါ့။ ကျန့်လင်တောင်ကြားထဲကို ကျူးကျော်ဝင်ရောက်ရဲတဲ့ သတ္တိ ရှိနေမှတော့"

"ဘုန်း"

"ရှီး ရှီး"

ဖုန်းဝူချန်၏ ခြေထောက်များက မြေပြင်ကို ဆောင့်နင်းလိုက်ပြီး သူ၏ တောင်ပံများ ခတ်လိုက်သည်။ သူသည် ချက်ချင်းဆိုသလို ကြောက်မက်ဖွယ် အမြန်နှုန်းဖြင့် ပေါက်ကွဲထွက်သွားပြီး ကျယ်လောင်သော မြည်ဟည်းသံကြီး ထွက်ပေါ်လာသည်။ သူ သယ်ဆောင်လာသော ကြောက်မက်ဖွယ် စွမ်းအားများက လက်မောင်းတစ်လုံးစာ ကျယ်သော အက်ကွဲကြောင်းများကို ဖြစ်ပေါ်စေ၏။ သူ၏ အရှိန်မှာ အလွန် မြန်ဆန်လှသဖြင့် မျက်စိတစ်မှိတ်အတွင်း ရောက်ရှိသွားသည်။

ပေမင်ခုံသည်လည်း အားနည်းမှု မပြလိုဘဲ ရင်ဆိုင်ရန် တိုးတက်သွားသည်။ သူ၏ ကြောက်မက်ဖွယ် စွမ်းအားများက လက်သီးထဲတွင် စုစည်းသွားပြီး စူးရှတောက်ပသော အပြာရောင် အလင်းတန်းများ လင်းလက်နေ၏။

"ဘုန်း"

"ဝုန်း...ဝုန်း"

မျက်စိတစ်မှိတ်အတွင်းမှာပင် သူတို့နှစ်ဦး လက်သီးချင်း ထိပ်တိုက် တွေ့ဆုံသွားကြပြီး မိုးခြိမ်းသံကဲ့သို့ ပေါက်ကွဲထွက်သွားကာ ဖျက်ဆီးခြင်း စွမ်းအင်များ ရူးသွပ်မတတ် စီးဆင်းသွားသည်။ ကျယ်ပြန့်လှသော ရင်ပြင်ကြီးမှာ လုံးဝ ပြိုကျသွားပြီး ဖုန်မှုန့်များနှင့် အပျက်အစီး တိမ်တိုက်များ အရပ်မျက်နှာပေါင်းစုံသို့ လွင့်စင်သွားကာ ကျန့်လင်တောင်ကြားရှိ နန်းတော်များမှာ တုန်ခါသွားကြသည်။

ထိုပြင်းထန်သော ထိပ်တိုက် တွေ့ဆုံမှုတွင် နှစ်ဦးစလုံး အင်အားတူညီနေခဲ့သည်။

ပေမင်ခုံက အေးစက်စွာ မှတ်ချက်ချသည်။

"ကျန့်လင်တောင်ကြားကို လာရဲတဲ့ သတ္တိရှိမှတော့ မင်းမှာ အရည်အချင်း ရှိတာ အမှန်ပဲ"

"ဒါပေမဲ့ မင်းရဲ့ အစွမ်းသက်သက်နဲ့တော့ နေ့ခင်း ကြောင်တောင်ကြီး မင်းအဖေကို ကယ်ဖို့ အိပ်မက် မက်နေတာကတော့ အပိုသက်သက်ပဲ"

"မင်း စကား သိပ် များ တယ်"

ဖုန်းဝူချန်က အေးစက်စွာ တုံ့ပြန်လိုက်သည်။

"ဟွန့်"

ပေမင်ခုံက လှောင်ပြောင်သရော်သည့် အအေးစက်ဆုံး ရယ်သံတစ်ခု ပြုလိုက်သည်။

ထိုလက်သီးချက် အပြီးတွင် ပေမင်ခုံသည် ရုတ်တရက် အစွမ်းကုန် ထုတ်သုံးလိုက်ပြီး ကောင်းကင်ယံဆီသို့ တဟုန်ထိုး တက်သွားသည်။

"ဝှစ်"

ဖုန်းဝူချန်သည် သူ၏ ခန္ဓာကိုယ်ကို ထူးဆန်းစွာ လှုပ်ယမ်းလိုက်ပြီး ရုတ်တရက် ပေါ်ထွက်လာသည်။ သူ၏ လျှပ်တပြက်နေရာ ရွှေ့ပြောင်းခြင်း အမြန်နှုန်းသည် ပေမင်ခုံထက် မနိမ့်ကျပေ။ ရုတ်တရက် ပေါ်ထွက်လာသည်နှင့် ဖုန်းဝူချန်သည် ချက်ချင်း တိုက်ခိုက်မှုကို စတင်လိုက်သည်။

"ဘုန်း ဘုန်း ဘုန်း"

"ဝုန်း...ဝုန်း"

ပြင်းထန်သော တိုက်ပွဲကြီး စတင်သွားပြီး တိုက်ခိုက်သူ နှစ်ဦးစလုံး ပြင်းထန်စွာ ထိပ်တိုက် တွေ့ဆုံကြကာ အဆက်မပြတ် တိုက်ခိုက်နေကြ၏။ ထိုအသံများမှာ နက်ရှိုင်းသော တောင်တန်းများတစ်လျှောက် ပဲ့တင်ထပ်နေတော့သည်။

"ဂလု"

ကျန့်လင်တောင်ကြားမှ တပည့်များမှာ မျက်နှာများ ဖြူဖျော့လျက် ထိတ်လန့်တကြား တံတွေးများကို မျိုချနေမိကြပြီး စကားတစ်ခွန်းမှ မဆိုနိုင်ကြတော့ပေ။

ပေမင်ခုံသည် ကျန့်လင်တောင်ကြား၏ နံပါတ်တစ် ပါရမီရှင် ဖြစ်ပြီး တုန်လှုပ်ဖွယ် ကျင့်ကြံခြင်းအဆင့် ရှိကာ ကျိုကျိုးတွင် နာမည်ကြီး တစ်ဦး ဖြစ်သည်။ ထို့ပြင် ဂုဏ်ယူဝံ့ကြွားဖွယ် မျိုးဆက်သစ်များထဲမှ တစ်ဦးလည်း ဖြစ်၏။

ဤသို့သော ဂုဏ်ယူဝံ့ကြွားဖွယ် မျိုးဆက်သစ်တစ်ဦးနှင့် ရင်ဆိုင်ရာတွင် ဖုန်းဝူချန်သည် သူ့အား ရင်ဆိုင်နိုင်သော လွှမ်းမိုးသည့် အစွမ်းကို အမှန်တကယ် ပိုင်ဆိုင်ထားခဲ့သည်။

"ဖုန်း ဖုန်းဝူချန်က တကယ်ပဲ ဒီလောက် ကြောက်ဖို့ကောင်းတဲ့ အစွမ်း ရှိနေတာလား"

တာဝန်ခံ အကြီးအကဲမှာ ကြောင်ငေးသွားသည်။ ဖုန်းဝူချန်က သူ့အား လက်တစ်ဖက် ဝှေ့ယမ်းလိုက်ရုံမျှဖြင့် ပြင်းထန်စွာ ဒဏ်ရာရရှိသွားစေနိုင်သည်မှာ မဆန်းတော့ပေ။

ဤမျှ ပြင်းထန်လှသော ခွန်အားဖြင့် အကယ်၍သာ အစောက ဖုန်းဝူချန်သည် သူ၏ စွမ်းအား အပြည့်ကို ထုတ်သုံးခဲ့မည် ဆိုပါက မိမိမှာ တစ်ချက်တည်းဖြင့် သေဆုံးသွားမည်မှာ သေချာလှသည်။

"ဝုန်း...ဝုန်း"

ပြင်းထန်သည့် စွမ်းအားများက လှိုင်းလုံးများအသွင် တစ်ခုပြီးတစ်ခု ရုန်းကြွလာပြီး ကျန့်လင်တောင်ကြား၏ ပတ်ဝန်းကျင်ရှိ တောင်တန်းများမှာ အနည်းငယ် တုန်ခါလာကာ မရေမတွက်နိုင်သော ငှက်များနှင့် သားရဲ အုပ်ကြီးများ.. ထိတ်လန့်တကြား ထွက်ပြေးသွားကြသည်။

ဖုန်းဝူချန်၏ နဂါးမျိုးနွယ် သွေးမျိုးဆက်မှာ အပြည့်အဝ နိုးထလာခဲ့ပြီး သူ၏ စွမ်းအားမှာ ပို၍ပင် တုန်လှုပ်ဖွယ် ကောင်းလာ၏။

"ဘုန်း"

"ဝုန်း...ဝုန်း"

ပြင်းထန်သော လက်ချင်းယှဉ် တိုက်ပွဲတွင် နှစ်ဖက်စလုံး အသာစီး မရရှိကြပေ။ ထိပ်တိုက် လက်သီးချင်း ဆုံပြီးနောက် တိုက်ခိုက်သူ နှစ်ဦးစလုံး နောက်သို့ ဆုတ်ခွာသွားကြသည်။ ကြောက်မက်ဖွယ် စွမ်းအင် 'ချီ' လှိုင်းများက မုန်တိုင်းသဖွယ် တိုက်ခတ်သွားပြီး မျက်စိဖြင့် မြင်နိုင်သော လေဓားသွားများကို ဖြစ်ပေါ်စေကာ ဟင်းလင်းပြင်ကို ဆုတ်ဖြဲပစ်သည့်အလား ထင်ရသည်။

ပေမင်ခုံက အေးစက်စွာ မဲ့ပြုံး ပြုံးလိုက်သည်။ သူတို့ တိုက်ခိုက်လေလေ ပို၍ တုန်လှုပ်လေလေ ဖြစ်လာပြီး ဖုန်းဝူချန်၏ ရုပ်ခန္ဓာကိုယ်မှာ အလွန်အမင်း ကြောက်မက်ဖွယ်ကောင်းသည်ကို သဘောပေါက်သွားသည်။

"ဒီလောက် သန်မာတဲ့ အစွမ်းပဲ။ ထိုက်ရွှီဂိုဏ်းကို ချေမှုန်းပစ်နိုင်ခဲ့တာ မဆန်းပါဘူး"

ဖုန်းဝူချန်၏ ရုပ်ခန္ဓာ သန်မာမှုသည် သူ ကိုယ်တိုင်ပင် မယှဉ်နိုင်ကြောင်း ဝန်ခံရမည့် အရာ ဖြစ်သည်။

"ဝုန်း...ဝုန်း"

ကြောက်မက်ဖွယ် စွမ်းအားများကို ထုတ်လွှတ်လိုက်ရာ အပြာရောင် အလင်းတန်း တစ်ခု ပေါက်ကွဲထွက်လာပြီး ပေမင်ခုံက အေးစက်စွာ စိန်ခေါ်လိုက်သည်။

"မင်းရဲ့ သိုင်းပညာက တော်တော် ကြောက်ဖို့ ကောင်းတယ်လို့ ငါ ကြားတယ်။ ဒီသခင်လေးက အဲ့ဒါကို မြည်းစမ်းကြည့်ချင်သေးတယ်"

တဆက်တည်း၌ ပေမင်ခုံက "မြေကမ္ဘာ အဆင့် အဆင့်မြင့် သိုင်းပညာ။ အဇူရာ ကောင်းကင် ချေမှုန်းခြင်း ခုတ်ချက်" ဟု ပြင်းထန်စွာ ကြွေးကြော်လိုက်ပြီး ကြောက်မက်ဖွယ် စွမ်းအားများက သူ၏ ညာဘက် လက်တွင် စုစည်းလိုက်၏။

ထို့နောက် ဖုန်းဝူချန်ထံသို့ ဝှေ့ယမ်း ပစ်လွှတ်လိုက်၏။

"ဝှစ်"

"ဝုန်း...ဝုန်း"

လခြမ်းသဏ္ဌာန်ရှိသော ပေပေါင်း ဆယ်ချီ ကြီးမားသည့် အပြာရောင် စွမ်းအင်တစ်ခု ပစ်လွှတ် ထွက်ပေါ်လာသည်။ ၎င်းတွင် လွှမ်းမိုးနိုင်သော အရှိန်အဟုန်နှင့် ကြမ်းတမ်းသော စွမ်းအားများ ပါဝင်ပြီး ဖြတ်သန်းသွားရာ ဟင်းလင်းပြင်တစ်ခုလုံးကို တုန်ခါသွားစေသည်။

"ဒါဆိုရင်တော့ မင်းကို ပြရတာပေါ့။ မင်းရဲ့ သိုင်းပညာက ဘယ်လောက်တောင် အမှိုက်ဆန်လဲ ကြည့်ကြသေးတာပေါ့"

ဖုန်းဝူချန်က အေးစက်စွာ တုံ့ပြန်လိုက်သည်။ မြန်ဆန်စွာပင် သူ၏ သွေးမျိုးဆက် စွမ်းအားများ ရှေ့သို့ တိုးထွက်လာပြီး သွေးရောင် အလင်းတန်းများ ယှက်ဖြာသွား၏။ သူ၏ အရှိန်အဝါမှာ သိသိသာသာ တိုးမြင့်တက်လာသည်။

" လောကပျက် ကောင်းကင်ဘုံ ပြစ်ဒဏ် ခုတ်ချက်"

ဖုန်းဝူချန်က ဟိန်းဟောက်လိုက်ပြီး သူ၏ ညာဘက် လက်တွင် အလွန်တရာ သည်းထန်သော သွေးမျိုးဆက် စွမ်းအားများအား စုစည်းလိုက်သည်။

"ဝှစ်"

"ဝုန်း...ဝုန်း"

ပေပေါင်း ဆယ်ချီ ကြီးမားသော သွေးနီရောင် ဓားချီက လေထုကို ဆုတ်ဖြဲ ထွက်ခွာသွားသည်။ ၎င်းမှာ အလွန်အမင်း လွှမ်းမိုးနိုင်စွမ်း ရှိပြီး လျှပ်စီးကဲ့သို့ လျင်မြန်လှကာ ဟင်းလင်းပြင်တွင် မြေငလျင် လှုပ်သကဲ့သို့ သိမ့်ခါ‌စေသည်။

"မြေကမ္ဘာအဆင့် သိုင်းပညာ"

ပေမင်ခုံ၏ မျက်နှာထားမှာ ညိုမှောင်သွားပြီး ယခုအခါ စိုးရိမ်ပူပန်မှုများဖြင့် ပြည့်နှက်နေတော့သည်။

"ဒုန်း ဒုန်း ဒုန်း"

"ဝေါ့"

မျက်စိတစ်မှိတ်အတွင်းမှာပင် ကြောက်မက်ဖွယ် စွမ်းအင်ကြီး နှစ်ခုသည် ကျန့်လင်တောင်ကြားမှ တပည့်များအားလုံး၏ ကြောက်ရွံ့တကြား စောင့်ကြည့်မှုအောက်တွင် ထိပ်တိုက် ဝင်တိုက်မိကြပြီး ထိခတ်မိသည်နှင့် ပေါက်ကွဲထွက်သွားသည်။ ပေမင်ခုံ၏ မျက်နှာမှာ သိသိသာသာ ပြောင်းလဲသွားပြီးနောက် သူ သွေးတစ်လုပ် အန်ထုတ်လိုက်ရကာ လွင့်စင် ထွက်သွားတော့သည်။ နားကွဲမတတ် ကျယ်လောင်သော ပေါက်ကွဲသံကြီးမှာ တောင်တန်းများတစ်လျှောက် ပဲ့တင်ထပ်သွားပြီး တပည့်များမှာ သူတို့၏ နားများကို လက်ဖြင့် အုပ်ထားကြရကာ မျက်နှာများမှာ နာကျင်မှုများ ထင်ဟပ်နေသည်။

"တောင်ကြားသခင်လေး"

တာဝန်ခံ အကြီးအကဲမှာ တုန်လှုပ်သွားပြီး ဖုန်းဝူချန်က ပေမင်ခုံအား အမှန်တကယ် ဒဏ်ရာရရှိသွားစေနိုင်သည်ကို မယုံကြည်နိုင် ဖြစ်သွားသည်။

"ဖုန်းဝူချန်ရဲ့ အစွမ်းက သိပ် ကြောက်ဖို့ကောင်းတာပဲ"

ကျန့်လင်တောင်ကြားမှ တပည့်များမှာ ပို၍ပို၍ ကြောက်ရွံ့ ထိတ်လန့်လာကြသည်။

ဤမျှ ပြင်းထန်သော ခွန်အားဖြင့် ပေမင်ခုံသည် ကျိုကျိုးမှ မျိုးဆက်သစ် ပါရမီရှင်များထဲတွင် ထိပ်ဆုံး ငါးယောက်စာရင်း၌ သေချာပေါက် ပါဝင်ပေသည်။

သို့သော် ဤမျှ ကြောက်မက်ဖွယ် အစွမ်းသည် ထျန်းယွမ်ဘုံ ပထမအလွှာသာ ရှိသေးသော ဖုန်းဝူချန်၏ လက်ချက်ဖြင့် ဒဏ်ရာရရှိသွားခဲ့၏။

ဆန့်ကျင်ဘက်အားဖြင့် ချီလင် ချပ်ဝတ်၏ အကာအကွယ်ကို ရရှိထားသော ဖုန်းဝူချန်မှာမူ ထိခိုက်ဒဏ်ရာ ရရှိခြင်း မရှိဘဲ မီတာ ဆယ်ဂဏန်းအနည်းငယ်မျှသာ နောက်သို့ လွင့်စင်သွားခဲ့သည်။

ဤသည်မှာ အလွန်တရာပင် ထေ့ငေါ့ဖွယ် ကောင်းလှသည်။

ပေမင်ခုံသည်လည်း သူ၏ စိတ်နှလုံးထဲတွင် အလွန်အမင်း တုန်လှုပ်နေမိသည်။ သူ မြေကမ္ဘာ အဆင့် သိုင်းပညာများကို ယခင်က တွေ့မြင်ဖူးခဲ့သော်လည်း ဖုန်းဝူချန် အသုံးပြုလိုက်သော ဤသိုင်းပညာမျိုးကို တစ်ခါမျှ မမြင်ဖူးခဲ့ပေ။ ထို လွှမ်းမိုးနိုင်ပြီး ခုခံနိုင်စွမ်း မရှိသော မြေကမ္ဘာ အဆင့် သိုင်းပညာသည် သူ့အား ကာကွယ်နိုင်စွမ်း မရှိအောင် ပြုလုပ်သွားခဲ့သည်။

ကိုးထပ် ချန်ခွန်း မျှော်စင်၏ ဖိနှိပ်မှုအောက်တွင် ပေမင်ခုံ၏ အစွမ်းသည် ဖုန်းဝူချန်၏ အစွမ်းနှင့် တန်းတူနီးပါး ရှိနေသော်လည်း သိုင်းပညာ အပိုင်းတွင်မူ ဖုန်းဝူချန်၏ အစွမ်းက လုံးဝ အသာစီး ရရှိထားသည်။ ထိပ်တိုက် တွေ့ဆုံမှုတွင် ပေမင်ခုံအား လွှမ်းမိုး အနိုင်ယူသွားနိုင်သည်မှာ သဘာဝကျလှပေသည်။

'ဒီလူရဲ့ အစွမ်းက ငါ ထင်ထားတာထက် ပိုသန်မာနေတယ်။'

ပေမင်ခုံသည် မျက်မှောင်ကို တင်းကြပ်စွာ ကြုတ်လိုက်ပြီး ဖုန်းဝူချန်အား စိုက်ကြည့်လိုက်သည်။

ကံကောင်းစွာပင် ပေမင်ခုံ၏ ကျင့်ကြံခြင်းအဆင့်မှာ အစွမ်းထက်လှသဖြင့် သို့မဟုတ်ပါက သူသည် ဖုန်းဝူချန်၏ လက်ချက်ဖြင့် ပြင်းထန်စွာ ဒဏ်ရာရရှိသွားမည်မှာ သေချာလှသည်။

"ဒါ မင်းပြောတဲ့ ငါ့မှာ အခွင့်အရေး မရှိဘူး ဆိုတဲ့ အစွမ်း ပဲ လား။ ကြည့်ရတာ သိပ် မဟုတ် ပါ လား"

ဖုန်းဝူချန်သည် ပေမင်ခုံအား အေးစက်စွာ စိုက်ကြည့်ရင်း မေးမြန်းလိုက်သည်။

ဤစကားကို ကြားသောအခါ ပေမင်ခုံ၏ မျက်နှာသည် ညိုမှောင်သွားပြီး ပြင်းထန်သော သတ်ဖြတ်လိုစိတ်များ ပျံ့နှံ့လာတော့သည်။

သူက အေးစက်စွာ ဆိုလိုက်သည်။

"သိပ် မောက်မာ မနေနဲ့။ မင်းကို ဘယ်သူ ပြောလဲ။ ဒီသခင်လေးရဲ့ အစွမ်းအစ အကုန် ပြပြီးပြီလို့၊ ကိုးထပ် ချန်ခွန်း မျှော်စင်သာ မရှိရင် မင်း ငါ့ရှေ့မှာ ဒီလောက် မောက်မာရဲလား။"

"မင်းမှာ အရည်အချင်းရှိရင်လည်း တန်ဖိုးရှိတဲ့ ရတနာတချို့ ထုတ်ပြလေ။ မင်း အစွမ်း မလုံလောက်ရင် တခြားလူတွေကို အပြစ် မတင်နဲ့။"

ဖုန်းဝူချန်က အေးစက်စွာ ပြန်လည် ချေပလိုက်သည်။

ထိုအခိုက်အတန့်၌၊

"ဝုန်း.. ဝုန်း.."

ကြောက်မက်ဖွယ် စွမ်းအားများ ပေမင်ခုံထံမှ ပေါက်ကွဲထွက်လာသည်။

အပြာရောင် အလင်းတန်းများ ပေါက်ကွဲကာ ဟင်းလင်းပြင်သည် တစ်ဖန် တုန်ခါသွားပြန်၏။ ပေမင်ခုံ၏ မျက်လုံးများမှာ လုံးဝ ပြောင်းလဲသွားပြီး သူ၏ တိုးထွက်လာသော စွမ်းအားများသည် ရူးသွပ်မတတ် ပျံ့နှံ့လာကာ သူ၏ အရှိန်အဝါမှာ ပို၍ပင် ကြောက်မက်ဖွယ် ကောင်းလာလေသည်။

ထိုစဉ်၊ ပေမင်ခုံက ကြမ်းကြုတ်စွာ ကြိမ်းဝါးလိုက်၏။

"ဖုန်းဝူချန်။ ငါ့ရဲ့ တကယ့် အစွမ်းအစ အစစ်အမှန်ကို မင်း မြင်စေရမယ်။"

"ပုရွက်ဆိတ်ဆိုတာ ဘာအဓိပ္ပာယ်လဲဆိုတာ မင်း နားလည်သွားစေရမယ်။"

ရပ်တန့်၍မရသော ကြောက်မက်ဖွယ် စွမ်းအားများ သူ့ပတ်ပတ်လည်၌ ရစ်ဝဲနေပြီး သူ၏ စွမ်းအင်များမှာ လျင်မြန်စွာ တိုးမြင့်တက်လာတော့သည်။