ဝိညာဉ်သန္ဓေသားအဆင့် ဆရာသခင်မက်မွန်ပွင့်၊ ယောက်ျားသားအားလုံး၏ စိတ်ကူးယဉ်အိပ်မက်များကို ဖြည့်ဆည်းပေးနိုင်သော အမျိုးသမီး(၁)။

တစ်ရက်ကြာပြီးနောက်...။

ဝူကျိမဟာမိတ်အဖွဲ့၏ ပင်လယ်ပြင်နယ်မြေ အနီး၊ လူသူကင်းမဲ့သော ကျွန်းတစ်ကျွန်းပေါ်တွင်။

အင်မော်တယ်ရှားဂိုဏ်းနှင့် အခြား အဓိက ဂိုဏ်းကြီးနှစ်ခုမှ ကျင့်ကြံသူများသည် ဤနေရာတွင် ခေတ္တ အနားယူနေကြသည်။

မည်သို့ပင်ဆိုစေကာမူ၊ သူတို့သည် အနားမယူဘဲ ဆက်တိုက် ပျံသန်းနေနိုင်ရန် မဖြစ်နိုင်ပေ။ ရေ၊ အစားအစာနှင့် ထောက်ပံ့ရေး ပစ္စည်းအမျိုးမျိုးကို ပြန်လည်ဖြည့်တင်းရန်အတွက် တစ်ခါတစ်ရံ ကျွန်းတစ်ကျွန်းပေါ်တွင် ရပ်နားရန် လိုအပ်သည်။

အထူးသဖြင့်၊ ၎င်းတို့သည် ဝူကျိမဟာမိတ်အဖွဲ့နှင့် နီးကပ်လာသည်နှင့်အမျှ၊ သူတို့သည် အကောင်းဆုံး အခြေအနေကို ထိန်းသိမ်းထားနိုင်ရန် သေချာပေါက် လိုအပ်သည်။

မည်သို့ဆက်ဖြစ်လာမည်အား မည်သူမျှ အတိအကျမသိနိုင်ပေ။

ဤအခိုက်အတန့်တွင် လူသူကင်းမဲ့သော ကျွန်းတစ်ကျွန်းရှိ တောင်ထိပ်တစ်ခုပေါ်တွင် လူအများအပြားသည် ဓားသိုင်းပညာကို လေ့ကျင့်နေကြသည်။

၎င်းတို့သည် ကျိပင်းယွီ၊ မုဇီယန်၊ ရှားကျင်းယန်၊ လန်ယွဲ့ရှီ၊ ရှန်ပိချန်နှင့် ကျိုးစွေ့တို့ ဖြစ်ကြသည်။

ဘုန်း…။

ဤအခိုက်အတန့်တွင် ကျိုးစွေ့၏ ဦးဆောင်မှုအောက်တွင်၊ သူတို့သည် လူငါးယောက် ဖြစ်သော်လည်း တက်ခြင်း၊ ဆုတ်ခြင်း၊ ဘယ်ညာရွေ့လျားခြင်း မည်သို့ပင် ဖြစ်စေကာမူ တစ်သားတည်း လှုပ်ရှားနေကြသည်။

သူတို့သည် စိတ်ချင်း ဆက်နွယ်မှု တစ်ခု ရှိနေသကဲ့သို့ ဖြစ်ပြီး မမြင်နိုင်သော နှလုံးသား စွမ်းအားတစ်ခုဖြင့် ပေါင်းစည်းထားသကဲ့သို့ပင် ဖြစ်နေတော့သည်။

၎င်းတို့အား ဗဟိုပြု၍ ကြီးမားသော ဓားသိုင်းအစီအရင်တစ်ခု ဖွဲ့စည်းထားပြီး၊ ကီလိုမီတာများစွာသော အချင်းဝက်ကို ဤဓားသိုင်းအစီအရင်ဖြင့် လွှမ်းခြုံထားသည်။

ဘန်း…။

နောက်တစ်စက္ကန့်တွင် ဓားတစ်ချက် ထိုးထုတ်လိုက်ပြီး၊ ခြောက်ယောက်စလုံး တပြိုင်နက်တည်း တိုက်ခိုက်လိုက်ကြကာ၊ သူတို့၏ ဓားချီများကို ကြောက်မက်ဖွယ် ဓားအလင်းတန်းတစ်ခုအဖြစ် ပေါင်းစပ်လိုက်ပြီး အဝေးရှိ ပင်လယ်ပြင်ကို ပြင်းထန်စွာ ခုတ်ပိုင်းလိုက်သည်။

ချက်ချင်းပင် ပင်လယ်ပြင် တစ်ခုလုံးသည် နှစ်ပိုင်း ကွဲသွားသကဲ့သို့ ဖြစ်သွားပြီး၊ ဧရာမ လှိုင်းလုံးကြီးများ မြင့်တက်လာကာ မုန်တိုင်းတစ်ခုအလား အရာအားလုံးကို ဝါးမျိုသွားသည်။

ဤဓားချက်၏ စွမ်းအားသည် ထင်ရှားနေသည်။ ရွှေအမြုတေ နှောင်းပိုင်းအဆင့် ကျင့်ကြံသူတစ်ဦးပင်လျှင် ချက်ချင်း အသတ်ခံရပြီး စိတ်ဝိညာဉ် ပျက်သုဉ်းသွားရပေမည်။

"ဒါ ဝိညာဉ်ကြံ့ဓားသိုင်းလား.. ငါတို့ ခြောက်ယောက်ရဲ့ ဓားချီတွေကို ပေါင်းစပ်နိုင်ပြီး တစ်သားတည်း လှုပ်ရှားနိုင်လို့.. ဒီလို စွမ်းအားမျိုး ပိုင်ဆိုင်ထားတာပဲ…"

လန်ယွဲ့ရှီက အံ့အားသင့်စွာ ရေရွတ်လိုက်သည်။

ဝူညီအစ်ကို သုံးယောက်သည် ပါရမီ နည်းပါးသော်လည်း၊ ဤပင်လယ်ပြင်နယ်မြေကို ဝိညာဉ်ကြံ့ဓားသိုင်းဖြင့် အဘယ်ကြောင့် လွှမ်းမိုးထားနိုင်ခဲ့သည်ကို ယခုအခါ သူမ နားလည်သွားပြီ ဖြစ်သည်။

ဤဓားသိုင်းပညာသည် နက်နဲပြီး ခန့်မှန်းရ ခက်ခဲလှသည်။ ၎င်းတို့သုံးဦး တိုက်ခိုက်သောအခါ တစ်ဦးတည်းမှ တိုက်ခိုက်သည့်အလား ပေါင်းစပ်သွားသည်။

တိုက်ကွက်တစ်ခုတည်းဖြင့်၊ သူတို့သည် အတွင်းရှိ မှော်စွမ်းအားနှင့် ဓားချီတို့ကို ပေါင်းစပ်နိုင်ပြီး ဓားချီ၏ စွမ်းအားကို အဆုံးစွန်အဆင့်အထိ မြှင့်တင်ကာ ကြောက်မက်ဖွယ် အင်အားတစ်ခုကို ထုတ်လွှတ်နိုင်သည်။

ယခု၊ သူတို့ ခြောက်ယောက် တစ်သားတည်း လှုပ်ရှားလိုက်သောအခါ ဝူညီအစ်ကိုများထက်ပင် ပိုမို ကြီးမားသော အင်အားကို ထုတ်လွှတ်နိုင်ခဲ့သည်။

အကယ်၍ သူတို့အားလုံးသည်သာ ရွှေအမြုတေ ဆရာသခင်များ ဖြစ်ခဲ့ပါက၊ တိုက်ခိုက်မှု တစ်ခုတည်းကပင် ဝိညာဉ်သန္ဓေသားအဆင့် ဘိုးဘေးတစ်ပါးကို ခြိမ်းခြောက်နိုင်ပေလိမ့်မည်။

"ဒါက ဓားချီပေါင်းစပ်မှု တစ်ခုတည်းတင် မဟုတ်ဘူး… ပိုအရေးကြီးတာက တစ်ယောက်နဲ့တစ်ယောက်ရဲ့ ဓားသိုင်းပညာအပေါ် နားလည်မှုကိုပါ လက်ခံရရှိတာပဲ…"

"ငါက ဆေးဖော်စပ်ပညာမှာ ကျွမ်းကျင်ပေမယ့်.. ဓားသိုင်းပညာအပေါ် ငါ့ရဲ့ နားလည်မှုက သာမန်ပဲ…"

"ငါ ဒီအကြောင်း ဘာမှ နားမလည်ဘူးလို့တောင် ပြောလို့ရတယ်.."

"ဒါပေမဲ့ အခု ငါ့ခင်ပွန်းရဲ့ ဓားသိုင်းပညာအပေါ် နားလည်မှုကို ရရှိလိုက်တော့.. ငါ ဒုတိယအဆင့် ဓားသိုင်းပညာကို ပိုင်နိုင်သွားပြီ.."

"ငါ့ကို အခု ဓားကျင့်ကြံသူတစ်ယောက်လို့ သတ်မှတ်လို့ ရနေပြီ…"

ရှန်ပိချန် အလွန် ပျော်ရွှင်နေသည်။ ရိုးရိုးသားသားဆိုရလျှင်၊ မည်သည့်အလုပ်မျှ မလုပ်ဘဲ တစ်ခုခု ရရှိလိုက်ခြင်းထက် ပိုပြီး ပျော်စရာကောင်းတာ ဘာမှ မရှိတော့ပေ။

သူမသည် ဓားသိုင်းပညာကို များများစားစား မလေ့ကျင့်ဖူးပေ။

သို့သော် ဝိညာဉ်ကြံ့ဓားသိုင်းကို လေ့ကျင့်ပြီးနောက်၊ သူမခင်ပွန်း၏ ဓားသိုင်းပညာအပေါ် နားလည်မှုကို ရရှိလိုက်ရာ၊ သူမ၏ ဓားသိုင်းပညာ နားလည်မှုသည် လျင်မြန်စွာ တိုးတက်လာပြီး ဒုတိယအဆင့် ဓားသိုင်းပညာကို လျင်မြန်စွာ တတ်မြောက်သွားခဲ့သည်။

သူမ ချက်ချင်းပင် ဓားသိုင်းပညာ ပါရမီရှင်တစ်ဦး အဖြစ် ပြောင်းလဲသွားသကဲ့သို့ ခံစားလိုက်ရသည်။

ဤအချက်တစ်ခုတည်းကပင် ဝိညာဉ်ကြံ့ဓားသိုင်းသည် မည်မျှ အံ့ဩဖွယ် ကောင်းကြောင်း၊ သာမန် နားလည်မှုထက် ကျော်လွန်ပြီး မည်မျှ ထူးကဲကြောင်း သက်သေပြရန် လုံလောက်နေပြီ ဖြစ်သည်။

"ဒါတင် မကသေးဘူး.."

"ဝိညာဉ်ကြံ့ဓားသိုင်းကို လေ့ကျင့်ပြီးတဲ့နောက်.. ငါ့ရဲ့ နတ်ဘုရားအာရုံကလည်း ပိုပြီး အစွမ်းထက်လာသလိုပဲ…"

"ရန်သူရဲ့ လှုပ်ရှားမှုတိုင်းကို ပိုင်းခြားသိမြင်နိုင်ပြီး.. သူ့ရဲ့ အားနည်းချက်တွေကို သိနိုင်သလိုပဲ…"

"ရန်သူ ဘာလုပ်မလဲဆိုတာ ငါ ကြိုသိနိုင်တယ်… ဒါက ဝိညာဉ်ကြံ့ဓားသိုင်းရဲ့ လျှို့ဝှက်ဆန်းကြယ်မှုတွေထဲက တစ်ခု ဖြစ်ကောင်း ဖြစ်နိုင်တယ်…"

ဓားသိုင်းပညာ ပါရမီရှင်တစ်ဦး ဖြစ်သည့်အလျောက် ကျိပင်းယွီသည် ဤအချက်ကို ပိုမို သိရှိနားလည်နိုင်သည်။ ဤဓားသိုင်းပညာကို လေ့ကျင့်လေလေ၊ ၎င်း၏ အံ့မခန်းဖြစ်မှုကို ခံစားရလေလေ ဖြစ်ကာ၊ အမြင့်မြတ်ဆုံး ဓားသိုင်းပညာ အခြေခံ သဘောတရားများနှင့် ပြည့်နှက်နေသည်ကို တွေ့ရှိရသည်။

ဤဓားသိုင်းပညာနှင့် နှိုင်းယှဉ်လိုက်လျှင်၊ သူမ၏ ကျိမိသားစု လက်ဆင့်ကမ်းလာခဲ့သော ဓားသိုင်းပညာသည် ဘာမျှ မဟုတ်ပေ။

သို့သော် စဉ်းစားကြည့်လျှင် ဤသည်မှာ သဘာဝကျပေသည်။

ကျိမိသားစု၏ ဓားသိုင်းပညာသည် တတိယအဆင့်မျှသာ ရှိသည်။

သို့သော် ဝိညာဉ်ကြံ့ဓားသိုင်းသည် ပဉ္စမအဆင့်တွင် ရှိနေပြီး၊ နတ်ဘုရားအသွင်ပြောင်းအဆင့် သို့ပင် ဦးတည်နေသဖြင့်၊ သူမ မိသားစု၏ ဓားသိုင်းပညာအနေဖြင့် ယှဉ်ပြိုင်ရန် မဖြစ်နိုင်ပေ။

ဤနှစ်ခုသည် တူညီသောအဆင့်တွင်ပင် မရှိချေ။

"ဟားဟား... ဘာပဲဖြစ်ဖြစ် ငါတို့က အခု ဓားကျင့်ကြံသူတွေ ဖြစ်သွားပြီ.."

"ငါ့ရဲ့ လက်ရှိ တိုက်ခိုက်ရေး စွမ်းအားက အရမ်း ကြောက်စရာ ကောင်းနေသလို ခံစားရတယ်… အဆင့်ပိုမြင့်တဲ့သူကိုတောင် စိန်ခေါ်လို့ ရလောက်တယ်…"

မုဇီယန်နှင့် ရှားကျင်းယန်တို့သည့် ပို၍ပင် ဝမ်းမြောက်နေကြသည်။

မူလကတည်းက၊ မုဇီယန်သည် အဆောင်ပညာရှင်တစ်ဦး ဖြစ်ပြီး၊ ရှားကျင်းယန်သည် အစီအရင်ပညာရှင်တစ်ဦး ဖြစ်ရာ၊ သူတို့၏ တိုက်ခိုက်ရေး စွမ်းအားများမှာ အတော်လေး အားနည်းခဲ့သည်။

သို့သော် ယခု ဓားကျင့်ကြံသူ အတွေ့အကြုံကို ရရှိပြီးနောက်၊ သူတို့သည် ဓားသိုင်းပညာတွင် ကျွမ်းကျင်လာကြပြီ ဖြစ်သည်။

အကယ်၍ ရန်သူက သူတို့ကို တိုက်ခိုက်ဝံ့ပါက၊ တစ်ဖက်လူကို သူမတို့ အပြင်းအထန် ဒုက္ခရောက်စေနိုင်ပြီ ဖြစ်သည်။

"အရမ်းကောင်းတယ်.. အခု ဝိညာဉ်ကြံ့ဓားသိုင်းကို လေ့ကျင့်ပြီးပြီဆိုတော့.. မင်းတို့မှာ အနည်းဆုံးတော့ ကိုယ့်ကိုယ်ကိုယ် ကာကွယ်နိုင်စွမ်း ရှိသွားပြီ…"

"ငါတို့ ဝူကျိမဟာမိတ်အဖွဲ့ထဲ ရောက်ပြီးလို့ မတော်တဆမှု တစ်စုံတစ်ရာ ကြုံရရင်တောင်.. မင်းတို့ ဖြေရှင်းနိုင်ကြမှာပါ…"

ကျိုးစွေ့ လွန်စွာ ကျေနပ်သွားသည်။

တစ်နေ့တာလုံး လမ်းညွှန်ပေးခဲ့ရသည်မှာ အလဟဿ မဖြစ်ခဲ့ဘဲ ရလဒ် အချို့ ထွက်ပေါ်လာခဲ့သည်။

သူ၏ ဇနီးမယားများသည် ကြီးမားသော တိုးတက်မှုများ ရရှိခဲ့ကြသည်။

ရွှေအမြုတေ ဆရာသခင်တစ်ဦးအတွက်ပင် ဓားသိုင်းပညာတစ်ခု သင်ယူခြင်းသည် တိုက်ခိုက်ရေး စွမ်းအားကို သိသိသာသာ မြှင့်တင်ပေးနိုင်သည်။

"ယောက်ျား... ဝူကျိမဟာမိတ်အဖွဲ့ရဲ့ ပင်လယ်ပြင်နယ်မြေကို ရောက်ဖို့ ဘယ်လောက် ကြာဦးမလဲ…" ကျိပင်းယွီက စူးစမ်းစွာ မေးလိုက်သည်။

"အဲ့ဒါက... နောက်ထပ် သုံးရက်လောက်ဆို ငါတို့ ရောက်တော့မှာ.." ကျိုးစွေ့က စဉ်းစားပြီး ပြန်ဖြေလိုက်သည်။

"ကောင်းလိုက်တာ…"

အမျိုးသမီးများ အားလုံး အလွန် ဝမ်းသာသွားကြသည်။ နောက်ဆုံးတွင် သူတို့၏ ရှည်လျားလှသော ငါးနှစ်တာ ခရီးစဉ်သည် ပြီးဆုံးတော့မည် ဖြစ်သည်။

မည်သို့ပင်ဆိုစေကာမူ၊ လှေပျံပေါ်တွင် တစ်ချိန်လုံး နေထိုင်ရသည်မှာ အဆင်မပြေလှပေ။

…

သုံးရက်ကြာပြီးနောက်၊ ဝူကျိမဟာမိတ်အဖွဲ့၏ ပင်လယ်ပြင်နယ်မြေ…။

နာမည်ကျော် ဝူညီအစ်ကို သုံးဦး အသတ်ခံလိုက်ရပြီး၊ သူတို့၏ ခေါင်းများကို ဝူကျိမဟာမိတ်အဖွဲ့သို့ ယူဆောင်လာခဲ့ပြီ ဖြစ်ကြောင်း ဝူကျိမဟာမိတ်အဖွဲ့မှ ကျင့်ကြံသူ အများအပြား ချက်ချင်း သတင်းရရှိလိုက်ကြသည်။

"ဘာ... ဝူမျိုးနွယ် သိမ်းငှက်သုံးကောင်သေပြီ ဟုတ်လား.. တစ်ယောက်ယောက်က သတ်လိုက်တာလား… ဘယ်သူ လုပ်လိုက်တာလဲ…"

ကျင့်ကြံသူတစ်ဦးက မယုံကြည်နိုင်စွာ မေးလိုက်သည်။

အကြောင်းမှာ ဝူမျိုးနွယ် သိမ်းငှက်သုံးကောင်သည် ဤပင်လယ်ပြင် နယ်မြေကို အနည်းဆုံး ရာစုနှစ် နှစ်ခုခန့် ကြီးစိုးလာခဲ့သောကြောင့် ဖြစ်သည်။ မရေမတွက်နိုင်သော ကျင့်ကြံသူများ သူတို့၏ သားကောင် ဖြစ်ခဲ့ရပြီး၊ သူတို့အပေါ် နက်ရှိုင်းသော နာကျည်းမုန်းတီးမှုများ ရှိနေခဲ့သည်။

သို့သော် သူတို့သည် ဝူမျိုးနွယ် သိမ်းငှက်သုံးကောင်ကို ဆန့်ကျင်ရန် အကူအညီမဲ့နေခဲ့ကြသည်။

အတိုင်းအတာတစ်ခုအထိ ပြောရလျှင် သူတို့သည် ဤ ပင်လယ်ပြင် နယ်မြေတွင် နာမည်အကြီးဆုံး ဓားပြအဖွဲ့များထဲမှ တစ်ခု ဖြစ်သည်။

မည်သို့ပင်ဆိုစေကာမူ၊ တစ်စုံတစ်ယောက်သည် ဝိညာဉ်သန္ဓေသားအဆင့်သို့ ရောက်ရှိပါက၊ ၎င်းတို့ ဓားပြလုပ်စရာ မလိုတော့ပေ။ ထို့အပြင် မည်သည့်အင်အားစုတွင်မဆို အဆင့်မြင့်အဖွဲ့ဝင်တစ်ဦးပင် ဖြစ်လာနိုင်သေးသည်။

သူတို့သည် အတိတ်က အပြစ်များကိုပင် ဆေးကြောနိုင်ပြီး၊ ကုန်းပေါ်တွင် သက်သောင့်သက်သာ အခြေချနိုင်ကာ အတိတ်က လုပ်ရပ်များအတွက် မည်သည့်အကျိုးဆက်ကိုမဆို ရှောင်ရှားနိုင်ကြသည်။

ထို့ကြောင့် ရွှေအမြုတေနယ်ပယ်သည် ပင်လယ်ဓားပြများထဲတွင် အသန်မာဆုံး အဆင့် ဖြစ်သည်။

ထိုများပြားလှသော ပင်လယ်ဓားပြများထဲတွင် ဝူမျိုးနွယ် သိမ်းငှက်သုံးကောင်သည် အကြောက်ရဆုံး ဓားပြအဖွဲ့များထဲမှ တစ်ခု ဖြစ်သည်။

မမျှော်လင့်ဘဲ၊ အချိန်အကြာကြီး သောင်းကျန်းနေခဲ့သော ဤဓားပြ ကျင့်ကြံသူများသည် ယခုအခါ အသတ်ခံလိုက်ရပြီ ဖြစ်၏။

သံသယဖြစ်ဖွယ်မလို၊ ဤသည်မှာ မကြာသေးမီက ဝူကျိမဟာမိတ်အဖွဲ့ရှိ စိတ်လှုပ်ရှားစရာအကောင်းဆုံး သတင်းများထဲမှ တစ်ခု ဖြစ်သည်။

"ပြောကြတာတော့... လှုပ်ရှားခဲ့တဲ့သူတွေက ဝေးလံခေါင်သီတဲ့ ပင်လယ်ဒေသက ရွှေအမြုတေ အမျိုးသမီး ကျင့်ကြံသူ သုံးယောက်တဲ့…"

"သူတို့က ဝေးလံခေါင်သီတဲ့ ပင်လယ်ဒေသကနေ ပြောင်းရွှေ့လာကြတာ.. ဝူမျိုးနွယ် သိမ်းငှက်သုံးကောင်နဲ့ မတော်တဆ တိုးမိသွားကြတာ.."

"ဝူမျိုးနွယ် သိမ်းငှက်သုံးကောင်က ဒီလိုကြောက်စရာကောင်းတဲ့ ပြိုင်ဘက်နဲ့ ပက်ပင်းတိုးမိမယ်လို့ ဘယ်သူ ထင်ထားမှာလဲ.."

"အဲ့ဒီ ရွှေအမြုတေ အမျိုးသမီး ကျင့်ကြံသူ သုံးယောက်က အရမ်းအစွမ်းထက်ပြီး သူတို့ကို ချက်ချင်းဆိုသလို ခေါင်းဖြတ်သတ်ပစ်လိုက်ကြတာတဲ့…"

"အဲ့ဒီအချိန်ကစပြီး ဝူမျိုးနွယ် သိမ်းငှက်သုံးကောင်က သမိုင်းကြောင်းတစ်ခု ဖြစ်သွားပြီ.."

ဤအဖြစ်အပျက်၏ အသေးစိတ်ကို သိရှိသူများ ရှိပြီး၊ သူတို့က ဇာတ်လမ်းကို ကွက်ကွက်ကွင်းကွင်း ပြန်လည် ပြောပြကြသည်။

"ဒီလို ဖြစ်သွားတာကိုး.. ဒီတစ်ခါ ဝူမျိုးနွယ် သိမ်းငှက်သုံးကောင် ကံဆိုးသွားတာပဲပေါ့.. ပင်လယ်ဖြတ်ကူးလာတဲ့ နဂါးမ သုံးကောင်နဲ့ တိုးမိပြီး အသတ်ခံလိုက်ရတာပဲ.. ခရီးသွားဖန်များရင် ခြေချော်တတ်တယ်ဆိုတာ ဒါမျိုးပေါ့ကွာ.."

ကျင့်ကြံသူတစ်ဦးက ဝမ်းသာသောလေသံဖြင့် ပြောလိုက်သည်။

အမှန်အတိုင်းဆိုရလျှင်၊ ထိုကဲ့သို့သော ပင်လယ်ဓားပြများသည် လူတိုင်းသတ်ဖြတ်လိုသော ဘုံရန်သူပင် ဖြစ်သည်။

မည်သို့ပင်ဆိုစေကာမူ၊ ပင်လယ်ပြင် ခရီးသွားနေစဉ် ဓားပြများနှင့်တွေ့ရမည်ကို မည်သူက မကြောက်ဘဲ နေမည်နည်း။