အခန်း (၅၇၅-၅၇၆)

အခန်း (၅၇၅) မစ်ရှင်ဆုလာဘ်၊ အစီအစဉ် ပြင်ဆင်မှုများ

အကြောင်းကြားစာများ ဆက်တိုက် ဟန်ရှောင်း၏ အင်တာဖေ့စ်ပေါ်တွင် ပေါ်လာသည်။

[ရေပင်လယ်ဂြိုလ် အကျပ်အတည်း] ပြီးမြောက်ပါပြီ။

သင်သည် အတွေ့အကြုံအမှတ် ၆၂၀,၀၀၀ ရရှိခဲ့သည်။

+၂ ဂါတွန်နဂါးငွေ့တန်း ဂုဏ်သတင်း

+၁,၅၀၀ ရေပင်လယ်ဂြိုလ် : နိုင်ငံ၆နိုင်ငံ အဖွဲ့အစည်း၏ အလေးပေးမှု

[လုပ်ကြံသတ်ဖြတ်ခြင်း ပစ်မှတ်] ပြီးမြောက်ပါပြီ။

သင်သည် အတွေ့အကြုံအမှတ် ၁၂,၁၀၀,၀၀၀ ရရှိခဲ့သည်။

+၃၀ ဂါတွန်နဂါးငွေ့တန်း ဂုဏ်သတင်း

+၁,၀၀၀ ဂိုဒိုရာ အဖွဲ့အစည်း၏ အလေးပေးမှု

ဒဏ္ဍာရီ အမှတ် ၁ မှတ် ရရှိခဲ့သည်။

တာဝန်နှစ်ရပ်စလုံးကို တစ်ကြိမ်တည်းဖြင့် ပြီးမြောက်သွားသည်။ ဟန်ရှောင်းသည် အကြောင်းကြားစာများကို ကြည့်လိုက်သည်။ ဂါတွန်နဂါးငွေ့တန်းရှိ သူ၏ကျော်ကြားမှုသည် အစကတည်းက နိမ့်ကျမနေခဲ့ပေ။ သတင်းတွေ ပျံ့နှံ့လာသည့်အခါ နာမည်ဂုဏ်သတင်း ပိုတိုးလာလိမ့်မည်။ ဤတိုက်ပွဲပြီးနောက်၊ သူ၏ကျော်ကြားမှုသည် နောက်တစ်ဆင့်တက်လှမ်းနိုင်ပြီး [အကြီးအကျယ် ကျော်ကြားသော] အဆင့်ကို ရရှိနိုင်မည်ဖြစ်ပြီး ကြယ်စနစ်ရှိ ထင်ရှားသောဇာတ်ကောင်များစာရင်းတွင် ပါဝင်ခွင့်ရရှိမည်ဖြစ်သည်။

သူသည် ဒဏ္ဍာရီအမှတ် အသစ်တစ်ခုပင် ရရှိခဲ့သည်။

ကြယ်စနစ် ဒဏ္ဍာရီအမှတ် (ဂါတွန်နဂါးငွေ့တန်း) - ကပ်ဘေးအဆင့် ၃ယောက်ကို တိုက်ခိုက်ခြင်း - အဆင့် အေ စူပါ သုံးဦး၏ ဝိုင်းရံခြင်းကို ခံခဲ့ရပြီး သူတို့ကို တစ်ယောက်တည်း ရင်ဆိုင်ခဲ့ရသော်လည်း နောက်ဆုံးတွင် သင် ရှုံးနိမ့်ခြင်း မရှိခဲ့ပေ။ ဒါက သင်၏အင်အားကို သက်သေပြနေတယ်။ ဤသည်မှာ ဒဏ္ဍာရီဆန်ဆန် လုပ်ရပ်တစ်ခုဖြစ်ပြီး ဒီအကြောင်းကြားတဲ့သူတိုင်းကို အံ့သြစေပြီး စိတ်ဝင်စားစရာ ဖြစ်စေဖို့ လုံလောက်နေသည်။ သင့်ကိုသိတဲ့သူတွေက မင်းရဲ့စွမ်းရည်ကို အသိအမှတ်ပြုလိမ့်မယ်၊ မင်းရဲ့လုပ်ရပ်တွေကို ဂလက်ဆီတစ်ခွင်လုံး သီဆိုကြလိမ့်မယ်။

ကြယ်စနစ်၏ ဒဏ္ဍာရီအမှတ်သည် ဂြိုလ်ကမ္ဘာ ဒဏ္ဍာရီအမှတ်များထက် ပိုမိုကျယ်ပြန့်သည်။ ၎င်းသည် သူ၏ ဆုလာဘ်များကို တိုးမြှင့်ရန် ကူညီပေး၏။ ဂြိုလ်ကမ္ဘာ ဒဏ္ဍာရီအမှတ်သည် ဆုလာဘ်ကို ၅ရာခိုင်နှုန်း တိုးလာစေပြီး ကြယ်စနစ် ဒဏ္ဍာရီအမှတ်သည် ၁၂ရာခိုင်နှုန်း တိုးပေးနိုင်သည်။ ဤသည်မှာ ဟန်ရှောင်း၏ ပထမဆုံး ကြယ်စနစ် ဒဏ္ဍာရီအမှတ်လည်း ဖြစ်သည်။

မစ်ရှင်ဆုလာဘ်အပြင်၊ ကွန်ပျူတာဇာတ်ကောင် ပုံစံကို ခေါင်းစဉ်တစ်ခုနှင့်အတူ ဒန်ဂျင်အသစ်တစ်ခုဖြင့် မွမ်းမံထားသည်။

[စစ်ပွဲ : ရေပင်လယ်ဂြိုလ် ကာကွယ်ရေး]

မမျှော်လင့်ထားတဲ့ ပျော်ရွှင်မှုပါလား။ ဟန်ရှောင်း၏ မျက်လုံးများ အရောင်လက်သွားသည်။

အံ့ဩဖွယ်ကောင်းသော တိုက်ပွဲများသာလျှင် ဒန်ဂျင်မိတ္တူ ထွက်ပေါ်လာမည်ဖြစ်သည်။ ဤဒန်ဂျင်နှင့် ဆင်တူသော တစ်ခုသည် [စစ်ပွဲ : နဂါးဧကရီ၏စွမ်းအား] ဖြစ်သည်။ ဆိုလိုသည်မှာ သူ၏တိုက်ပွဲသည် မိတ္တူအဖြစ် သိမ်းဆည်းထားရန် ထိုက်တန်သည်ဟု ယူဆရသည့် အဆင့်သို့ ရောက်ရှိသွားခြင်း ဖြစ်သည်။

ဆုလာဘ်များကို လွယ်ကူစွာ ကိုင်တွယ်ဖြေရှင်းလိုက်သည်။ ထိုအချိန်တွင် ဂိုဒိုရန် အာကာသယာဉ်များသည် ကောင်းကင်မှ ဖြည်းညှင်းစွာ ဆင်းသက်လာပြီး တပ်မှူးသည် လက်အောက်ငယ်သား အများအပြားကို ခေါ်ဆောင်လာပြီး သွက်လက်စွာ လျှောက်လာသည်။

"အမှောင်ကြယ်က အာကာသ နှောင့်ယှက်ရေးစက်ကို ဆင်ခဲ့တယ်။ အဲဒါကြောင့် ငါတို့ နောက်ကျပြီး သူတို့ကို ထွက်ပြေးခွင့် ပေးလိုက်ရတယ်။ ဒီမှာ အခြေအနေ ဘယ်လိုလဲ"

စကားပြောနေရင်း တပ်မှူး၏ အကြည့်များသည် ပင်မအမြောက် ပေါက်ကွဲသွားသော တွင်းနက်ကြီးဆီသို့ ဖြည်းညှင်းစွာ ရောက်ရှိသွားသည်။ မစ်ရှင်မှာ ကျရှုံးသွားပြီး ရေပင်လယ်ဂြိုလ်သည် ကုစား၍မရသော ပျက်စီးဆုံးရှုံးမှုများ ခံစားခဲ့ရသည်ဟု ထင်ကာ စိတ်ပျက်လက်ပျက်ဖြစ်သွားသည်။

"ရန်သူတွေ မအောင်မြင်ဘူး..." နာဂါကင်သည် ဟန်ရှောင်း၏ လုပ်ရပ်များအပါအဝင် ဖြစ်ပျက်မှုများကို အတိုချုံး ပြောပြလိုက်၏။ ဟန်ရှောင်းနှင့် အမှောင်ကြယ်တို့ကြား တိုက်ပွဲကို အလေးအနက်ထား၍ ပြောပြခဲ့သည်။

သူနားထောင်နေစဉ်တွင် ဂိုဒိုရန်တပ်မှူးသည် သူ၏လက်အောက်ငယ်သားများနှင့်အတူ ဟန်ရှောင်းကို ကြည့်ရှုပုံ ပြောင်းလဲသွားသည်။ သူတို့ မျက်နှာပေါ်က မယုံကြည်နိုင်မှုတွေကို ရှင်းရှင်းလင်းလင်း မြင်နေရသည်။

ကပ်ဘေးအဆင့် ၃ယောက်ကို ခုခံရန်နှင့် မိခင်ယာဉ်၏ ပင်မအမြောက် ပေါက်ကွဲမှုကိုပင် ခံနိုင်ရည်ရှိရန်၊ ဤသည်မှာ စွမ်းအားကြီးလွန်းသည်။ ပတ်ဝန်းကျင်ရှိ တိုက်ပွဲအမာရွတ် အကြွင်းအကျန်များကို ကြည့်ရုံဖြင့် ဂိုဒိုရန်များသည် တိုက်ပွဲမည်မျှ ပြင်းထန်ခဲ့သည်ကို ပြောနိုင်သည်။

ဂိုဒိုရာ၏ အထက်အရာရှိများသည် ရလဒ်ကို စိုးရိမ်တကြီး စောင့်ဆိုင်းနေကြဆဲဖြစ်သည်။ သူတို့သည် ရေပင်လယ်ဂြိုလ်ကို ဂရုမစိုက်ကြသော်လည်း ဟန်ရှောင်း၏ လုံခြုံရေးကို ဂရုစိုက်ကြသည်။ ဟန်ရှောင်း အသက်ရှင်နေသရွေ့ သူတို့၏ ထောက်လှမ်းရေး အချက်အလက် အရောင်းအဝယ်သည် ဆက်လက်ရှိနေနိုင်သည်။

အမှောင်ကြယ်မှ အဆင့်မြင့် တိုက်ခိုက်ရေးသမား သုံးဦးကို စေလွှတ်လိုက်ကြောင်း သတင်းရရှိသောအခါ အထက်အရာရှိများသည် ဘလက်စတားကို သတင်းအချက်အလက် ခိုးယူမှုဖြင့် ဖမ်းမိကာ သုတ်သင်ခံလိုက်ရသည်ဟု ထင်ပြီး နှလုံးသားများ အေးစက်သွားသလို ခံစားခဲ့ရသည်။ သို့သော် နာဂါကင်ထံမှ အစီရင်ခံစာက သူတို့ကို အံ့အားသင့်သွားစေသည်။

ဘလက်စတားက မရှုံးနိမ့်ဘဲ ၃ယောက်ကို တကယ်ဆန့်ကျင်နိုင်တယ်လို့ တွေးကြည့်ရင်။ သူသည် အားနည်းသူများနှင့် ရင်ဆိုင်နေရခြင်းမဟုတ်ဘဲ ကပ်ဘေးအဆင့် စူပါများနှင့် ရင်ဆိုင်နေရသည်ကို သိထားရမည်။ ပင်မအမြောက်ဒဏ်ကို ခံနိုင်ရည်ရှိမှုအတွက်၊ ထိုကဲ့သို့သော အစွမ်းသတ္တိအဆင့်သည် တတ်သိနားလည်သော ဂိုဒိုရန် အထက်လူကြီးများကိုပင် ထိတ်လန့်သွားစေသည်။

ဘလက်စတား၏ စွမ်းဆောင်ရည်သည် သူ့ကို ပထမတန်းစား တိုက်ခိုက်ရေးသမားအဖြစ် သတ်မှတ်ရန် လုံလောက်နေသည်။

ခိုလှုံရေးစခန်း နှင့် နိုင်ငံ၆နိုင်ငံသည် အနည်းနဲ့အများ ပျက်စီးသွားသောကြောင့် ၎င်းကို ဖြေရှင်းရန် လူများကို စုစည်းထားသည်။ ဂိုဒိုရန်များ ရောက်ရှိလာပြီး၊ အကယ်၍ အမှောင်ကြယ်က ပြန်လာရန် ဆုံးဖြတ်ခဲ့သည်ရှိသော်ဟုတွေးပြီး ခေတ္တစခန်းချရန် လိုအပ်နေသည်။ ထို့ကြောင့် သူတို့သည် အပျက်အစီးများကို ရှင်းလင်းရန် ကူညီပေးနေကြသည်။

နေရာတိုင်းတွင် ပျက်စီးနေသော အဆောက်အဦများ ရှိပြီး မီးတောက်များနှင့် မီးခိုးငွေ့များ ရှိနေဆဲဖြစ်သည်။ ဒဏ်ရာရသူ အများအပြားကို အစောင့်များက အပျက်အစီးများကြားမှ တူးထုတ်နေကြဆဲဖြစ်ပြီး သနားစဖွယ် အော်ဟစ်နေကြသည်။ မိသားစုကို ဆုံးရှုံးလိုက်ရ၍ ငိုကြွေးနေသူများလည်း ရှိတယ်။ ဝမ်းနည်းစရာ မြင်ကွင်းတစ်ခုပင်။ အမှောင်ကြယ်ကို ခုခံနိုင်ခဲ့သော်လည်း မရေမတွက်နိုင်သော သေဆုံးမှုများကို ဖြစ်စေခဲ့ပြီး အသက်ရှင်ကျန်ရစ်သူများ၏ နှလုံးသားတွင် ဒဏ်ရာများ ထာဝရတည်ရှိနေမည်ဖြစ်သည်။

ကံကောင်းထောက်မစွာဖြင့်၊ အသက်ရှင်ကျန်ရစ်သော ဒေသခံအများအပြားသည် ဝမ်းနည်းရန် အချိန်မရှိကြဘဲ ဘေးအန္တရာယ် ကယ်ဆယ်ရေး လုပ်ငန်းများတွင် ပါဝင်ရန် ဦးဆောင်ကာ သူတို့၏ အင်အားကို ပံ့ပိုးပေးခဲ့ကြသည်။

ဟန်ရှောင်းသည် အခြေစိုက်စခန်းဘက်သို့ မလျှောက်မီ ခေတ္တ အနားယူလိုက်သည်။ လမ်းတစ်လျှောက်တွင် ဘေးအန္တရာယ် ကယ်ဆယ်ရေးတွင် ပါဝင်သူများသည် လူများကို ကယ်တင်ရန် သူ့ကို ဖြတ်ကျော်ပြီး ပြေးလွှားနေကြသည်။ သူ့ရှေ့တွင် မည်သူမျှ ရပ်မနေကြသော်လည်း၊ အားလုံးက လေးစားမှု အမှတ်အသားအဖြစ် ဟန်ရှောင်းဘက်သို့ ခေါင်းညိတ်ပြကြပြီး၊ ဖော်ပြရန်ခက်ခဲသော ကျေးဇူးတင်သည့် အမူအရာများ ရှိနေသည်။

အခြေစိုက်စခန်းထဲသို့ ဝင်ပြီးနောက်၊ ဟီလာ ရောက်လာပြီး သူ့ကို တစ်ချက်ကြည့်လိုက်သည်။ သူမ ခဏရပ်ပြီး မရေမရာဖြင့် မေး၏။ "နင် တကယ် ဒဏ်ရာမရဘူးလား"

"ရှင်ဒဏ်ရာရရင် ကျွန်မကိုပြောပြလို့ရတယ်။ ကျွန်မ ကုပေးနိုင်ပါတယ်" အော်ရိုရာ က အလျင်စလို ဖြည့်စွက်ပြောသည်။

"ငါ ဒီလိုမျိုး အများကြီး ကြုံဖူးတယ်" ဟန်ရှောင်းသည် တည်ငြိမ်သော မျက်နှာဖြင့် ကြွားလုံးထုတ်ရင်း လက်ကို ဝှေ့ယမ်းလိုက်သည်။

"... မင်းသဘောပဲ" ဟီလာ ခဏလောက် ရပ်ပြီး ဘာမှ ထပ်မပြောဖို့ ဆုံးဖြတ်လိုက်သည်။

"ဟီးဟီး၊ အစ်မက အခုနက ရှင့်အတွက် အရမ်း စိတ်ပူနေတာ" အော်ရိုရာက ရယ်လိုက်သည်။

ဟန်ရှောင်း လှည့်ကြည့်လာမှာကို မစောင့်ဘဲ ဟီလာက အလျင်စလို ရှင်းပြသည် "နင်သေရင် ငါတို့လည်း သေနိုင်တယ်"

ဟန်ရှောင်းသည် မျက်လုံးများကို လှိမ့်ကာ တုံ့ပြန်လိုက်ပြီး မှတ်ချက်ပေးလိုက်သည်။ "ဘာမှပြောတာထက် ငါ့ကို ကူညီပေးနိုင်တာက ပိုကောင်းတယ်"

ဟီလာသည် ဟန်ရှောင်း၏ ဖိတ်ကြားချက်ကို တိုက်ရိုက် လက်မခံဖူးသော်လည်း ယခုတစ်ကြိမ်တွင် သူမ ဘာကိုမှ ငြင်းဆိုခြင်းမရှိပေ။ သူမက ဖြည်းညှင်းစွာ ပြောသည် "ငါ နဂါးဧကရီနဲ့ ပြင်းပြင်းထန်ထန် လေ့ကျင့်ပြီး တတ်နိုင်သမျှ မြန်မြန် သန်မာလာမယ်"

"သမီးရောပဲ" အော်ရိုရာ လက်မြှောက်လိုက်သည်။

ထိုအချိန်တွင် ဘန်းနက်သည် ဘေးဘက်မှ လျှောက်လာပြီး ဝမ်းနည်းပူဆွေးသော အမူအရာဖြင့်။

"ခိုလှုံရေးစခန်းရဲ့ အပြင်ဘက် ဧရိယာတွေဟာ လုံးဝပျက်စီးလုနီးပါး ဖြစ်နေပြီ၊ ပြန်လည်တည်ဆောက်လို့ပဲ ရတော့မယ်။ နိုင်ငံ၆နိုင်ငံရဲ့ ဆုံးရှုံးမှုက ပိုတောင်ကြီးသေးတယ်၊ မြို့တွေ လုံးဝ ပျက်စီးသွားတယ်။”

“သူတို့က လောလောဆယ် ဘေးအန္တရာယ် ကယ်ဆယ်ရေး လုပ်ငန်းတွေနဲ့ အလုပ်ရှုပ်နေတော့ စစ်ကူတွေ ပို့ပေးတဲ့အတွက် သူတို့ ကိုယ်စား ကျေးဇူးတင်ပါရစေ။ မဟုတ်ရင် ဆုံးရှုံးမှုတွေက ဒီထက်ပိုပြီး ဆိုးသွားလိမ့်မယ်။ ရေပင်လယ်ဂြိုလ်မှာ စုစုပေါင်း လူ ၁၂ သန်း သေဆုံးခဲ့ပြီး ဒဏ်ရာရသူနှင့် မသန်စွမ်းသူ အရေအတွက်မှာ ဒီအရေအတွက်ထက် အဆပေါင်းများစွာ ရှိနိုင်တယ်လို့ ခန့်မှန်းထားတယ်"

"အဲဒါက မျှော်လင့်ထားတာထက် ပိုကောင်းပါတယ်" ဟန်ရှောင်း ခေါင်းညိတ်လိုက်သည်။

အမှောင်ကြယ်၏ တိုက်ခိုက်မှုသည် ၁၀မိနစ်ခန့်သာ ကြာမြင့်သော်လည်း သန်းပေါင်းများစွာ ပျက်စီးစေခဲ့ပြီဖြစ်သည်။ ၎င်းတို့၏ စွမ်းဆောင်ရည်မှာ ထိတ်လန့်စရာကောင်းပြီး ကြေးစားစစ်သားများ၊ နာဂါကင်နှင့် ကစားသမားများသာ မရှိလျှင် ထိခိုက်သေဆုံးမှုမှာ ပိုမိုများပြားမည်ဖြစ်သည်။

ဂိုဒိုရန် စစ်ကူများအတွက်မူ ဂိုဒိုရာမှ အစောပိုင်းက တပ်ဆင်ထားသော ဟိုက်ပါဒရိုက် စခန်းကြောင့် အမှန်တကယ် လျင်မြန်စွာ ရောက်ရှိလာခဲ့သည်။ အမှောင်ကြယ်ကို အချိန်ပိုပေးမည်ဆိုပါက သေဆုံးမှုနှင့် ဒဏ်ရာရမှု ပြဿနာ မဟုတ်တော့ဘဲ အသက်ရှင်သော လူသားများ ကျန်ရှိတော့မည် မဟုတ်ပေ။

မြို့ကြီးများ ပျက်စီးမှုသည် ပို၍ပင် ပြင်းထန်ပြီး အခြေခံအားဖြင့် အပိုင်းအစများ ဖြစ်သွားကာ ပြန်လည်တည်ဆောက်ရမည်ဖြစ်သည်။

"အဲဒီ တိုက်ခိုက်သူတွေက အမှောင်ကြယ် ကလား" ဘန်းနက်မေးလိုက်သည်။

ဟန်ရှောင်း ခေါင်းညိတ်ပြလိုက်သည်။

"စက်ဆုပ်ဖို့ကောင်းလိုက်တာ..." ဘန်းနက်၏ အမူအရာသည် အကူအညီမဲ့ခြင်းနှင့် ဒေါသတို့ဖြင့် ပြည့်နှက်နေသည်။ ရန်သူဘယ်သူလဲဆိုတာ ရှင်းရှင်းလင်းလင်း သိရင်တောင် သူတို့ကို ကိုင်တွယ်ဖြေရှင်းဖို့ နည်းလမ်းမရှိပေ။ သူတို့နှင့် စကားပြောရန် အရည်အချင်းပင် မရှိသဖြင့် ဆေးခါးကြီးကိုသာ မျိုချနိုင်သည်။ သူ့မျက်လုံးများသည် လက်စားချေခြင်း နှင့် အမုန်းတရားများ ပြည့်နှက်နေ၏။

"စိတ်အေးအေးထားပါ။ အမှောင်ကြယ် ပြဿနာကို မကြာခင် ကျွန်တော်ဖြေရှင်းပေးမယ်။ စိတ်ပူစရာ မလိုဘူး" ဟန်ရှောင်း ပြုံးလိုက်သည်။

ဘန်းနက်၏ ပခုံးကိုပုတ်ရင်း၊ ဟန်ရှောင်းသည် လူအများအပြားကို ကျော်ဖြတ်ကာ အခြေစိုက်စခန်းအတွင်းသို့ လျှောက်သွားသည်။ သူသည် ဟီလာနှင့် ကျန်လူများ၏ မျက်လုံးထဲတွင် တဖြည်းဖြည်း ပျောက်ကွယ်သွား၏။

ထိုလူအနည်းငယ်သည် ကမ္ဘာဂြိုဟ်မှ ထွက်ခွာသွားသော ဟန်ရှောင်း၏ အရိပ်နှင့် သူ၏ လက်ရှိ ထွက်ခွာသွားသော အရိပ်တို့ အချင်းချင်းဖြတ်သွားသလို မြင်ယောင်လာသည်။ သူတို့ မသိလိုက်ခင်မှာပဲ ဒီမိတ်ဆွေဟောင်းသည် သူတို့ မော့ကြည့်ရုံသာ တတ်နိုင်တဲ့ အဆင့်အထိ ကြီးပြင်းလာခဲ့လေပြီ။

...

အခန်းသို့ပြန်ရောက်သောအခါ ဟန်ရှောင်းသည် ရေချိုးပြီး အဝတ်အစားအသစ် လဲလိုက်သည်။ တိုက်ပွဲသည် သူ၏ သက်လုံကို အလွန်အမင်း သုံးစွဲခဲ့ပြီး သူအနားယူလိုက်သည့်အချိန်တွင် ဆာလောင်မှုကြောင့် ဗိုက်က အသံမြည်လာ၏။ သက်လုံအချို့ ပြန်လည်ရောက်ရှိလာသည်ဟု မခံစားရမီ ပြင်းအားမြင့် အာဟာရဘား အခု ၂၀ကျော်ကို ကုန်အောင် စားလိုက်သည်။

ဒေါက် ဒေါက် ဒေါက်။

တံခါးခေါက်သံ ကြားလိုက်ရသည်။ ဟားလပ်စ်သည် သူ၏ အရာရှိတစ်စုနှင့် အပြင်ဘက်တွင် ရပ်နေသည်။

အများစုက နိုင်ငံ၆နိုင်ငံကို ထောက်ပံ့ဖို့ သွားကြတာကြောင့် လွန်ခဲ့တဲ့ ခဏကမှ ပြန်ရောက်လာကြသည်။ ဟန်ရှောင်း၏ တိုက်ပွဲရလဒ်များကို ကြားလိုက်ရသောအခါ အဖွဲ့သားများသည် အံ့အားသင့်သွားကြပြီး သူတို့၏ခေါင်းဆောင်ကို တစ်စုံတစ်ယောက်နှင့် မှားနေသည်ဟုပင် ထင်ခဲ့ကြသည်။ ဤအချက်ကို အတည်ပြုပြီးမှသာ သူတို့ လက်ခံသွားပြီး ဟန်ရှောင်းကို ရှာရန် ချက်ချင်း ပြေးသွားကြသည်။

တံခါးပွင့်လာသည်နှင့် တပြိုင်နက် လူတိုင်း အခန်းထဲသို့ ဝင်ရောက်လာကြသည်။

"မင်း ကပ်ဘေးအဆင့် သုံးခုကို တွန်းလှန်ခဲ့တယ်လို့ ကြားတယ်၊ ပင်မအမြောက်တောင် မင်းကို မထိခိုက်စေနိုင်ဘူးတဲ့" ဟားလပ်စ်သည် ဟန်ရှောင်းကို သေချာကြည့်ကာ အံ့သြသော အမူအရာဖြင့် ရှုပ်ထွေးစွာ မေးလိုက်သည်။ "မင်း ဘယ်တုန်းက ဒီလောက် စွမ်းအားကြီးလာတာလဲ။ ငါ ဘာလို့ သတိမထားမိတာလဲ"

"ငါတို့ အချိန်ရရင် တစ်ပွဲလောက် တိုက်လို့ရတယ်။ အဲဒီအခါကျရင် မင်း သိလိမ့်မယ်"

"ဒါ... မလုပ်တာ ပိုကောင်းမယ်" ဟားလပ်စ် အလိုအလျောက် တုန်လှုပ်သွားသည်။

သူတို့၏ ယခင်တိုက်ပွဲသည် လေ့ကျင့်ရေးပွဲအဖြစ် သတ်မှတ်နိုင်သော်လည်း ယခုအခါ ၎င်းသည် တစ်ဖက်သတ် ရိုက်နှက်မှုတစ်ခုသာ ဖြစ်တော့မည်ဖြစ်သည်။ ဟားလပ်စ်သည် အနိုင်ကျင့်ခံရခြင်းကို ဝါသနာမပါဘဲ ဖဲချပ်ကစားခြင်းဖြင့်သာ သူ့ခေါင်းဆောင်ကို အနိုင်ယူနိုင်ပုံရသည်။

ဟန်ရှောင်း ပြုံးလိုက်ပြီး လှည့်ကြည့်လိုက်တော့ ဆေးလ်ဗီးယားက တောက်ပနေသည့် မျက်လုံးများဖြင့် သူ့ကို စိုက်ကြည့်နေတာကို တွေ့လိုက်ရသည်။

"ဆရာ၊ သမီး ဒါကို သင်ချင်တယ်"

"သွားစမ်းပါ၊ မင်းက ဘာလို့ အရာအားလုံးကို သင်ချင်နေရတာလဲ"

"မဟုတ်ဘူး... သမီး တကယ် သင်ချင်လို့ပါ"

"မင်း အဲဒါကို တွေးတာ ရပ်လိုက်လို့ရတယ်။ အဲဒါ သင်ယူလို့ မရနိုင်တဲ့ အရာတစ်ခုပဲ"

ဆေးလ်ဗီးယား၏ မျက်နှာလေး ညှိုးကျသွားပြီး သက်ပြင်းချလိုက်သည်။ "မတရားလိုက်တာ။ ဘာလို့ ဒီလိုဖြစ်ရတာလဲ"

ဘေးတွင် ဂျီနက်က မျက်တောင်ခတ်ပြီး နှုတ်ခမ်းကို သပ်လိုက်သည်။ "ခေါင်းဆောင်၊ ရှင်က ဒီလောက်သန်မာမယ်လို့ မထင်ထားဘူး။ တစ်နေ့ကျရင်... စမ်းကြည့်ကြမလား"

"အဲဒါအတွက် ဟာမွန်ကို ရှာနိုင်တယ်။ ငါ စိတ်မဝင်စားဘူး" ဟန်ရှောင်း၏ နှုတ်ခမ်းများ တွန့်သွားသည်။

ဟာမွန်က အရိပ်အမြွက် ရလိုက်သလို ခေါင်းကိုကုတ်ပြီး ဂျီနက်ကို လှည့်ကြည့်ကာ နှာခေါင်းရှုံ့လိုက်သည် "မင်း တိုက်ချင်လား။ ငါ မင်းနဲ့ အချိန်မရွေး လိုက်ခဲ့ပေးမယ်"

"ငါက တိုက်ခိုက်ဖို့ ပြောနေတာ မဟုတ်ဘူး" ဂျီနက်၏ မျက်နှာ အေးခဲသွားသည်။

အသက်အကြီးဆုံး ဗော်ဂါက နှုတ်ခမ်းကို ကွေးညွတ်လိုက်ပြီး တွေးလိုက်သည်၊ သောက်ကျိုးနည်း၊ ဒါကို တိုက်ခိုက်တယ်လို့ ဘယ်လို မယူဆနိုင်ရတာလဲ။

အရာရှိများအားလုံး တတွတ်တွတ် ပြောနေကြပြီး ဖေဒင် တစ်ဦးတည်းသာ နွေးထွေးစွာ ပြုံးကာ "ဘလက်စတား၊ မင်း ဒဏ်ရာမရဘူး မဟုတ်လား"

"သိပ်မပြင်းထန်ပါဘူး" ဟန်ရှောင်း ခေါင်းညိတ်ပြီး အခန်းကို တစ်ချက်ကြည့်လိုက်ကာ မေးလိုက်သည်။ "အေရိုရှီးယား ဘယ်မှာလဲ"

အေရိုရှီးယားသည် ကျန်အရာရှိများနှင့်အတူ သူ့ကို လာတွေ့ရန် လိုက်မလာပေ။

"သူမက ကိုယ့်ကိုယ်ကို အလွန်အမင်း အားစိုက်ထုတ်လိုက်ရလို့ အားပြန်သွင်းဖို့ ဓာတ်ပေါင်းဖိုဆီ သွားတယ်"

ဟန်ရှောင်း နားလည်စွာ ခေါင်းညိတ်လိုက်သည်။ အေရိုရှီးယားသည် စွမ်းအင်ကိုယ်ထည်ဖြစ်သောကြောင့် ဓာတ်ပေါင်းဖိုသည် သူမ၏ အကောင်းဆုံး ထောက်ပံ့ရေးစခန်းဖြစ်သည်။

အရာရှိအဖွဲ့သည် ခဏတာ စကားစမြည်ပြောနေကြရာ ဟန်ရှောင်း ခေါင်းကိုက်လာသည်။ ထို့ကြောင့် နောက်ဆုံးတွင် ဘေးအန္တရာယ် ကယ်ဆယ်ရေးတွင် ကူညီရန် သူတို့ကို မောင်းထုတ်လိုက်ပြီး သူက အခန်းထဲတွင် အနားယူရန် ကျန်ခဲ့သည်။

ပိုအရေးကြီးသည့် ကိစ္စများ ရှိနေတာကြောင့် ဘေးအန္တရာယ် ကယ်ဆယ်ရေး လုပ်ငန်းတွေမှာ ဝင်ပါစရာ မလိုပေ။

တိုက်ပွဲကြောင့် သူ့စက်ကိရိယာ အများစု ဆုံးရှုံးခဲ့ရသည်။ ပထမဆုံး လုပ်ဆောင်ရမည့် တာဝန်မှာ သူ၏ ယန္တရားတပ်မတော်ကို ယခင်ပမာဏအတိုင်း ပြန်လည်တည်ဆောက်ရန် ဖြစ်သည်။ ဒုတိယကိစ္စမှာ ကပ်ဘေးအဆင့်သို့ တတ်နိုင်သမျှ အမြန်ဆုံး ထိုးဖောက်ဝင်ရောက်ရန် ဖြစ်သည်။ သူသည် အဆင့် ၁၃၆ တွင် ရှိနေပြီဖြစ်ပြီး သူ၏ တိုက်ခိုက်ရေးစွမ်းရည်သည် အဆင့် အေ ၏ ကွာဟချက်နှင့် နီးစပ်နေသည်။ ဖြစ်နိုင်ချေ အများဆုံးမှာ၊ သူသည် အဆင့် ၁၄၀ ကျော်လွန်သောအခါ၊ သူသည် ကပ်ဘေးအဆင့် နယ်ပယ်သို့ ဝင်ရောက်နိုင်လိမ့်မည်။

အဆင့် ၁၄၀ တိုးတက်မှုသည် နောက်ထပ် မျိုးနွယ်စုဆင့်ကဲပြောင်းလဲမှု ဖြစ်လာပြီး ၎င်းသည် ကြီးမားသော ရာထူးတိုးခြင်းကို ဖြစ်ပေါ်စေမည်ဖြစ်သည်။

သူ၏ အဆင့်မြင့်အတန်းအစား [ပုံရိပ်ယောင် ယန္တရားပညာရှင်] သည် လက်ရှိတွင် အဆင့် ၁၁ တွင်ရှိပြီး အမြင့်ဆုံးကန့်သတ်ချက်မှာ အဆင့် ၂၀ ဖြစ်သည်။ ဆိုလိုသည်မှာ သူ၏ စုစုပေါင်းအဆင့် ၁၄၀ သို့ရောက်ရှိသွားလျှင်ပင် အတန်းအစား မစ်ရှင်များ ရှိမည်မဟုတ်ဘဲ ရာထူးတိုးမစ်ရှင် သာရှိမည်ဖြစ်သည်။ ထို့အပြင်၊ သူသည် ရာထူးတိုးခြင်းကို ချက်ချင်းလုပ်ဆောင်နိုင်သည့် [မစ်ရှင် ပြီးဆုံးစေခြင်းကတ်] လက်ကျန်တစ်ခု ရှိနေသေးသည်။

သို့သော်၊ သူသည် အဆင့်လေးဆင့်ဖြင့်သာ ကွာခြားနေသော်လည်း၊ ဤအချိန်တွင် အဆင့်တိုးမြှင့်မှုတိုင်းသည် သမုဒ္ဒရာပမာဏမျှ အတွေ့အကြုံအမှတ်များ လိုအပ်သည်။ အဆင့် ၁၃၆ မှ အဆင့် ၁၄၀ အထိ၊ သူသည် အတွေ့အကြုံအမှတ် ၃ဘီလီယံကျော် လိုအပ်သည်။

ဗားရှင်း ၁.၀ ၏ အမြင့်ဆုံးကန့်သတ်ချက်မှာ အဆင့် ၆၀ ဖြစ်ပြီး၊ ဗားရှင်း ၂.၀ အတွက် ကန့်သတ်ချက်မှာ အဆင့် ၉၀ ဖြစ်သည်။ သို့သော်၊ အဆင့်မြှင့်ရန် လိုအပ်သော အတွေ့အကြုံအမှတ်များသာ တိုးလာမည်ဖြစ်သည်။ အနာဂတ်တွင်၊ ဗားရှင်းအပ်ဒိတ်တစ်ခုစီအတွင်း အမြင့်ဆုံးကန့်သတ်ချက် တိုးလာမှုသည် ကစားသမားများ အဆင့်မြှင့်ရန် အချိန်ပိုလိုအပ်သဖြင့် တဖြည်းဖြည်း လျော့နည်းသွားမည်ဖြစ်သည်။

တိုက်ပွဲအစတွင် ဟန်ရှောင်းသည် သူ့ကိုယ်သူ အဆင့်မြှင့်တင်ရန် သူ၏သိမ်းဆည်းထားသော အတွေ့အကြုံအမှတ်အားလုံးကို ခွဲဝေပေးခဲ့သည်။ အချိန်တိုအတွင်း နောက်ထပ် အတွေ့အကြုံအမှတ် ၃ဘီလီယံ ရလိုလျှင် ကစားသမားများဘက်ကို လှည့်ဖို့သာ ရှိတော့တယ်။

ဂိုဒိုရာသည် နောက်ဆုံးတိုက်ပွဲအတွက် တိတ်တဆိတ် ပြင်ဆင်နေပြီဖြစ်သော်လည်း အမှောင်ကြယ်သည် လုံးဝ အဆင်သင့်မဖြစ်သေးပေ။ ပါဝင်ခွင့်ရရန် သူ၏ တိုက်ခိုက်ရေးအင်အားကို အမြန်ပြန်လည်ရယူရမည်ဖြစ်သည်။ တကယ်တော့ [ဂိုဒိုရာ၏ မဟာမိတ်] သည် အဓိက ဇာတ်လမ်းဇာတ်ကွက် တစ်ခုလည်း ဖြစ်သည်။

‘ကစားသမားတွေအတွက် အသိပညာနဲ့ ကျွမ်းကျင်မှုအသစ်တွေကို ပြန်လည်ဆန်းသစ်ဖို့ လိုအပ်ပုံရတယ်။ ငါ့အကောင့်ထဲမှာ ရန်ပုံငွေအလုံအလောက် ရှိနေတယ်ဆိုတော့ ‘စစ်သည်တော်’ နဲ့ 'အက်စ်ပါ' အတန်းအစားတွေအတွက် ပရော်ဖက်ရှင်နယ် အသိပညာကို လွတ်လွတ်လပ်လပ် ရွေးနိုင်တယ်။ ပြီးရင် ကော်ပီကူးပြီး ရောင်းချနိုင်တယ်။ ငါ စျေးနှုန်းတွေကို ငွေကနေ အတွေ့အကြုံအမှတ်လို့ ပြောင်းဖို့ပဲ လိုတယ်။ အို... ဟုတ်သားပဲ။ ငါ့မှာ ဒန်ဂျင်မိတ္တူလည်း ရှိတယ်၊ အဲဒါကို တော်တော်များများ ရဖို့အတွက် အသုံးချလို့ ရတယ်။’

ဟန်ရှောင်းသည် ထိုကဲ့သို့သော နည်းလမ်းများကို ကြာမြင့်စွာကတည်းက ကျင့်သားရနေပြီး ကစားသမားများ၏ လက်ရှိအခြေအနေကို ကြည့်ရှုရန် ဖိုရမ်များကို ဖွင့်လိုက်သည်။

ဖိုရမ်ရှိ ပို့စ်အမျိုးမျိုး မြင်ကွင်းထဲသို့ ရောက်လာသည်။ ရေပင်လယ်ဂြိုလ်၏ ဘုတ်အဖွဲ့တွင်၊ ပို့စ်အများစုသည် အခြေခံအားဖြင့် သူ့အကြောင်းဖြစ်ပြီး ဖိုရမ်သည် သူ၏တိုက်ပွဲအကြောင်း ပြောဆိုမှုများဖြင့် ပေါက်ကွဲသွားခဲ့သည်။ စခရင်ရှော့များနှင့် ဗီဒီယိုအများအပြားသည် သူ ပင်မအမြောက်ကို ထိပ်တိုက်တွေ့ခဲ့သည့် သမိုင်းဝင်မြင်ကွင်းကို သရုပ်ဖော်ထားသည်။ ကစားသမားများ စိတ်လှုပ်ရှားမှုဖြင့် ပေါက်ကွဲနေကြသည်။

ခေတ်စားနေသော ပို့စ်များအားလုံးကို သူက နောက်တစ်ကြိမ် လွှမ်းမိုးထားပြန်သည်။

ထိုပို့စ်အချို့ကို ပေါ့ပေါ့ပါးပါး ဖွင့်ကြည့်လိုက်ရာ ဗီဒီယိုထဲတွင် သူ့ကိုယ်သူ မြင်လိုက်ရသဖြင့် ကြက်သီးထသွားသည်။

ကစားသမားများ တင်ထားသော ပို့စ်များအားလုံးကို စကားစုအနည်းငယ် အသုံးပြု၍ အကျဉ်းချုံးနိုင်သည်။

သန်မာလိုက်တာ။ အံ့ဩစရာပဲ။ ကမ္ဘာမြေ တုန်လှုပ်စရာ။ ပေါက်ကွဲစေတယ်။ ငါချစ်နေပြီ။

ဘလက်စတား ကြေးစားတပ်ဖွဲ့ သို့ ဝင်ရောက်ပြီးသူများအတွက်၊ သူတို့သည် အပျော်ရွှင်ဆုံးဖြစ်သည်။ အဘယ်ကြောင့်ဆိုသော် သူတို့ရဲ့ ခေါင်းဆောင်က ပိုသန်မာလေ၊ လူတွေက သူတို့ကို ပိုပြီး အကောင်းမြင်လေ ဖြစ်သည်။ ထို့အပြင်၊ အပေါ်တွင် နဂါးဧကရီ အေးမီစ် ရှိနေသေးပြီး၊ စဉ်းစားကြည့်ရုံဖြင့် သူတို့၏ အဖွဲ့အစည်း အနာဂတ်သည် အလွန်တောက်ပနေပုံရသည်။

ဒီပွဲက ရေပင်လယ်ဂြိုလ် အတွက် ဇာတ်လမ်းဇာတ်ကွက် ပြီးဆုံးသွားပြီလို့ ကစားသမားတွေ ခံစားရစေဖို့ အခွင့်အလမ်းတစ်ခုလို့ ယူဆနိုင်ပြီး ဂလက်ဆီထဲကို ခေါ်ဆောင်သွားဖို့ ပိုမိုမြင့်မားတဲ့ အဆင့်ကို ဝင်ရောက်ရမယ့် အချိန်ပင်...

ထို့အပြင် ဂိုဒိုရာနှင့် ဂလက်ဆီ သတင်းထောက်များ၏ လိုအပ်ချက်အရ ရေပင်လယ်ဂြိုလ်တွင် ဖြစ်ပျက်ခဲ့သည်များကို ပြင်းပြင်းထန်ထန် လူသိရှင်ကြား ထုတ်ပြန်မည်ဖြစ်သည်။ သူ ခန့်မှန်းတာမမှန်းလျှင် မကြာမီ ဂြိုလ်ဆီသို့ ဖိတ်ခေါ်မထားသော ဧည့်သည်များစွာ ဦးတည်လာကြလိမ့်မည်။

ဟန်ရှောင်း၏ မျက်လုံးများ အရောင်လက်သွားသည်။ ဒါက သူ့အစီအစဉ်ရဲ့ နောက်တစ်ဆင့်ကို ဆက်လုပ်ဖို့ အခွင့်ကောင်းတစ်ခုပဲ။

စာစဉ် (၃၇)၊ အခန်း (၅၇၅) ပြီး၏။

လင်းဆက်

+++++

အခန်း (၅၇၆) အမြဲတမ်း ဟိုးလေးတကျော်သတင်းများ ဖြစ်ပေါ်စေခြင်း

ဂိုဒိုရာ၏ လှုပ်ရှားမှုများကို မီဒီယာများက အမြဲစောင့်ကြည့်လေ့လာခဲ့ကြသည်။ အထူးသဖြင့် ရွှေတံခါးဂြိုလ်တိုက်ပွဲပြီးနောက် သတင်းအများစုသည် ဂိုဒိုရာ၏အောင်ပွဲကို ချီးကျူးခဲ့ကြသည်။ ထို့ကြောင့် ဂလက်စီနေထိုင်သူအများအပြားသည် ဂိုဒိုရာနှင့်ပတ်သက်သည့် နောက်ထပ်သတင်းများကို စောင့်မျှော်နေကြသည်။

သို့သော်လည်း နောက်ထပ်အောင်ပွဲသတင်းသည် ဤမျှလျင်မြန်စွာ ရောက်ရှိလာမည်ဟု သူတို့အများစု မမျှော်လင့်ထားကြပေ။

ယခုတစ်ကြိမ် စစ်မြေပြင်သည် ရေပင်လယ်ဂြိုလ်ဟုခေါ်သော ခေတ်နောက်ကျနေသည့် ဂြိုလ်တစ်လုံးဖြစ်နေသည်။

လူအများအပြားသည် ဇဝေဇဝါမဖြစ်ဘဲ မနေနိုင်ကြပေ။ ဂိုဒိုရာက အမှောင်ကြယ်ကို တွန်းလှန်ခြင်းသည် အလွန်ကျိုးကြောင်းဆီလျော်သော်လည်း ခေတ်နောက်ကျသော ဂြိုလ်တစ်လုံးသည် အမှောင်ကြယ်ကို မည်သို့ပြန်တိုက်ထုတ်နိုင်ခဲ့သနည်း။

ဘာဖြစ်ခဲ့လဲဆိုတာ အတိအကျ ဘယ်သူမှမသိကြဘဲ အဖြစ်အပျက်၏ အကြမ်းဖျင်း အချက်အလက်များကိုသာ သိရှိကြသည်။

ဂလက်စီ၏ အများစုအတွက် ရေပင်လယ်ဂြိုလ်သည် အဆင့်နိမ့်ဂြိုလ်တစ်ခုထက် မပိုပေ။ ကပ်ဘေးဂြိုလ်များထဲမှ တစ်ခုမဟုတ်လျှင် ၎င်းတို့ထဲမှ အများစုသည် ထိုသို့သောဂြိုလ်မျိုး တည်ရှိနေကြောင်းကိုပင် သိရှိကြမည်မဟုတ်ပေ။

ဘလက်စတား၏ ဂုဏ်သတင်းနှင့် ပတ်သက်၍ ဂလက်စီနိုင်ငံသား အများစုသည် သူနှင့် မရင်းနှီးကြပေ။ ဟန်ရှောင်းသည် ဤဖြစ်ရပ်သည် ဘလက်စတားနှင့် ဆက်စပ်နေနိုင်ကြောင်း ခန့်မှန်းနိုင်သော အဖွဲ့အစည်းကြီးအသီးသီး၏ မျက်လုံးထဲတွင် အလေးအနက်ထားရမည့် ပုဂ္ဂိုလ်တစ်ဦးဖြစ်သော်လည်း၊ သာမန်အရပ်သားများအတွက်မူ ဟန်ရှောင်းသည် ကြေးစားစစ်သားတစ်ဦးထက် မပိုပေ။ ကြေးစားစစ်သားတစ်ဦးသည် စူပါစတားတစ်ဦးမဟုတ်သည့်အတွက် ကြေးစားစစ်သားတစ်ဦး၏ အမည်ကို ၎င်းတို့ မှတ်သားထားမည် မဟုတ်ပေ။ ဟန်ရှောင်းသည် အထက်တန်းလွှာများကြားတွင်သာ နာမည်ကြီးသည်။

ဂလက်စီဝဘ်ပေါ်တွင် လူများစွာသည် ဖြစ်ရပ်တစ်ခုလုံး၏ အသေးစိတ်အချက်အလက်များကို အလွန်စိတ်ဝင်စားနေကြသည်။ မျက်မြင်သက်သေ အများအပြားမရှိသဖြင့် ဤသည်မှာ ဂလက်စီသတင်းဌာနအားလုံး လက်ဦးမှုရယူလိုကြသော အရည်ရွှမ်းသည့် သတင်းတစ်ပုဒ် ဖြစ်သည်။

ရက်အနည်းငယ်ကြာပြီးနောက် ကြယ်စနစ်အနှံ့အပြားမှ ဂလက်စီသတင်းဌာနများသည် အင်တာဗျူးများပြုလုပ်ရန်နှင့် အမှန်တရားကို စုံစမ်းရန် သူတို့၏ အာကာသယာဉ်များကို စေလွှတ်လိုက်ကြသည်။ ရေပင်လယ်ဂြိုလ်သည် အမှောင်ကြယ်ကို မည်သို့ တိုက်ထုတ်ခဲ့သနည်း။

ဂလက်စီတစ်ခုလုံးက လျစ်လျူရှုလေ့ရှိသော ခေတ်နောက်ကျသည့် ရေပင်လယ်ဂြိုလ်သည် တစ်ကြိမ်တစ်ခါမျှ ဂလက်စီနေထိုင်သူများ၏ အာရုံစိုက်မှုဗဟိုချက် ဖြစ်လာတော့သည်။ ဤသည်မှာ ဂလက်စီမှ သာမန်အရပ်သားများ ဧည့်သည်များကို ကြိုဆိုခဲ့သည့် ပထမဆုံးအကြိမ်ဖြစ်သည်။

…

ရေပင်လယ်ဂြိုလ်သည်လည်း လှုပ်ရှားမှုများဖြင့် စည်ကားနေသည်။

ဂိုဒိုရာ၏ အကူအညီဖြင့် ခိုလှုံရေးစခန်းနှင့် နိုင်ငံ၆နိုင်ငံသည် တိုက်ပွဲမှ အပျက်အစီးများကို ရှင်းလင်းခဲ့ပြီး သူတို့လုပ်ဆောင်ရန် စောင့်ဆိုင်းနေသော အရာများစွာရှိသည်။ သတင်းဌာနအသီးသီးမှ အာကာသယာဉ်များအားလုံးကို ဂိုဒိုရန်ယာဉ်တန်းက လေထုအပြင်ဘက်တွင် ပိတ်ဆို့ထားသည်။

ဂိုဒိုရာသည် ထိုသတင်းထောက်များကို ရေပင်လယ်ဂြိုလ်သို့ ဝင်ရောက်ခွင့်ပြုရန် အစီအစဉ်မရှိပေ။ ဘေးကင်းရေးအတွက် ထည့်သွင်းစဉ်းစားမှုများ ရှိနေသော်လည်း ၎င်းတို့၏ ဆုံးဖြတ်ချက်နောက်ကွယ်တွင် ပိုမိုနက်ရှိုင်းသော အဓိပ္ပါယ်လည်း ရှိနေသည်။

နိုင်ငံ၆နိုင်ငံ၏ အစိုးရသည် ဂလက်စီမှ ဧည့်သည်များနှင့် ပတ်သက်၍ လုံးဝ သဲလွန်စမရှိပေ။ အဆုံးတွင်တော့ သူတို့၌ ဂလက်စီကို ဆက်သွယ်ရန် နည်းလမ်းမရှိပေ။

သတင်းထောက်များသည် ရေပင်လယ်ဂြိုလ်၏ အစိုးရကို မဆက်သွယ်နိုင်သောကြောင့် ယခင်သတင်းများတွင် ဘလက်စတား ကြေးစားတပ်ဖွဲ့ကို ဖော်ပြခဲ့သည်ကို ချက်ချင်း သတိရသွားကြသည်။ ထို့ကြောင့် ၎င်းတို့သည် ဘလက်စတား ကြေးစားတပ်ဖွဲ့ကို အစားထိုး ဆက်သွယ်ရန် ဆုံးဖြတ်လိုက်ကြသည်။

"သူတို့ နောက်ဆုံးတော့ ရောက်လာပြီပဲ"

ဖီးလစ်သည် သတင်းစကားကို ဟန်ရှောင်းထံ ပေးပို့လိုက်သည်။ ထိုသတင်းထောက်များသည် သူ၏အစီအစဉ်၏ အဓိကအစိတ်အပိုင်းတစ်ခုဖြစ်သောကြောင့် ယာဉ်တန်းကို လမ်းဖယ်ပေးရန် အမိန့်ပေးဖို့ နာဂါကင်ကို ဆက်သွယ်လိုက်သည်။

ယာဉ်တန်းမှူးသည် နာဂါကင်ထံမှ အမိန့်ကို လက်ခံရရှိခဲ့သည်။ သူသည် သတင်းထောက်များကို ဝင်ခွင့်မပေးချင်သော်လည်း ရေပင်လယ်ဂြိုလ်ပေါ်တွင် ရှိနေစဉ် နာဂါကင်၏ အမိန့်ကို နာခံရန် အထက်လူကြီးများထံမှ အမိန့်ရရှိထားသည်။ ထို့အပြင် သေချာစဉ်းစားပြီးနောက်၊ အထူးသဖြင့် ဘလက်စတား၏ အင်အားပြသမှုကို မြင်တွေ့ပြီးနောက်၊ သူသည် ဘလက်စတားကို ရန်စလိုခြင်းမရှိကြောင်း နားလည်လိုက်သည်။ ထို့ကြောင့် သူသည် မလိုလားဘဲ ယာဉ်တန်းကို လမ်းဖယ်ပေးလိုက်ရသည်။

သတင်းထောက်များအားလုံး စိတ်လှုပ်ရှားစွာဖြင့် ရေပင်လယ်ဂြိုလ်ထဲသို့ ဝင်ရောက်လာကြသည်။ သတင်းထောက် အများအပြားသည် ဤနယ်ပယ်တွင် ဝါရင့်အတွေ့အကြုံရှိသူများဖြစ်ကြပြီး တစ်ခုခုမှားယွင်းနေကြောင်း ချက်ချင်းသိလိုက်ကြသည်။ သူတို့က ဘလက်စတား ကြေးစားတပ်ဖွဲ့နှင့် တွေ့ဆုံလိုကြပြီး ဂိုဒိုရန်ယာဉ်တန်းက နာခံမှုရှိရှိ လမ်းဖယ်ပေးခဲ့ရသည်။ ဤရိုးရှင်းသော လုပ်ရပ်နောက်ကွယ်တွင် အရိပ်အမြွက်များစွာ ရှိနေသည်။

ဂိုဒိုရာသည် ဘလက်စတား ကြေးစားတပ်ဖွဲ့ကို မျက်နှာသာပေးခဲ့ရသည်။

ဘလက်စတားသည် ဂိုဒိုရန်များ၏ မျက်လုံးထဲတွင် သာမန်ကြေးစားစစ်သားတစ်ဦးထက် မပိုသော်လည်း အမှောင်ကြယ်ကို တိုက်ထုတ်ရာတွင် ဘလက်စတားသည် အဓိကအခန်းကဏ္ဍမှ ပါဝင်ခဲ့သည်မှာ အလွန်ဖြစ်နိုင်ချေများကြောင်း သတင်းထောက်များက အလိုအလျောက် သဘောပေါက်သွားကြသည်။

ဤသတင်းထောက်အုပ်စုသည် ရေပင်လယ်ဂြိုလ်၏ အစိုးရကို လေးစားမှုပြသပြီး အားလုံး နိုင်ငံ၆နိုင်ငံတွင် ဆင်းသက်လာကြသည်။ ထိုအခါမှသာ နိုင်ငံ၆နိုင်ငံသည် ဂလက်စီမှ ဧည့်သည်များအကြောင်း သိရှိသွားကြသည်။ နိုင်ငံ၆နိုင်ငံသည် သူတို့၏ ဧည့်သည်များကို ကြိုဆိုရင်း စိတ်လှုပ်ရှားမှုနှင့် စိုးရိမ်ပူပန်မှု နှစ်မျိုးစလုံးဖြင့် ပြည့်နှက်နေသည်။

ဤသည်မှာ နိုင်ငံ၆နိုင်ငံနှင့် ရေပင်လယ်ဂြိုလ်မှလူများက မတူကွဲပြားသော မျိုးနွယ်စုများမှ ဂြိုလ်သားအများအပြားကို ပထမဆုံးအကြိမ် မြင်တွေ့ဖူးခြင်း ဖြစ်သည်။ သတင်းထောက်များက ၎င်းတို့ လာရောက်ရသည့် အကြောင်းရင်းကို ပြောပြသောအခါ နိုင်ငံ၆နိုင်ငံ၏ အထက်တန်းလွှာများသည် ဤအရာသည် အလွန်ကောင်းမွန်သော အခွင့်အရေးတစ်ခုဖြစ်ကြောင်း လျင်မြန်စွာ သဘောပေါက်လိုက်ကြသည်။

ဤသည်မှာ ဂလက်စီနှင့် ဆက်ဆံရေးတည်ဆောက်ရန် အခွင့်ကောင်းတစ်ခု ဖြစ်သည်။

ဤအချိန်အတောအတွင်း နိုင်ငံ၆နိုင်ငံသည် ဂိုဒိုရာကို တစ်ဖက်သတ်သာ ဆက်သွယ်နိုင်ခဲ့ပြီး ဂလက်စီအကြောင်းသိသည်မှာ အလွန်နည်း၏။ ဤအခြေအနေသည် ဘလက်စတား ပြန်လည်ရောက်ရှိလာပြီးနောက်မှသာ အနည်းငယ် တိုးတက်လာသည်။

ရေပင်လယ်ဂြိုလ်အပေါ် အမှောင်ကြယ်၏ တိုက်ခိုက်မှုသည် ဂြိုလ်ဆီသို့ ဂလက်စီ၏ အာရုံစိုက်မှုကို ဆွဲဆောင်နိုင်ခဲ့သည်။ ရေပင်လယ်ဂြိုလ်ကဲ့သို့ ခေတ်နောက်ကျသော ဂြိုလ်တစ်ခုအတွက် ဤသည်မှာ ထူးခြားသော ဖြစ်ရပ်တစ်ခုဖြစ်သည်။ နိုင်ငံ၆နိုင်ငံ၏ အထက်တန်းလွှာများသည် သတင်းထောက်များကို ၎င်းတို့ ပေးစွမ်းနိုင်သော အကောင်းဆုံး ဧည့်ဝတ်ပြုမှုဖြင့် ကြိုဆိုခဲ့ကြပြီး သူတို့အားလုံးသည် ကံဆိုးမိုးမှောင်ကျရာမှ ကောင်းကျိုးရလာသည်ဟု ခံစားခဲ့ကြရသည်။

နိုင်ငံ၆နိုင်ငံသည် ဂလက်စီ၏ ဓလေ့ထုံးတမ်းများနှင့် မရင်းနှီးသော်လည်း ဧည့်ဝတ်ပြုရာတွင် အလွန်နှိမ့်ချခဲ့ကြသည်။ တစ်ချိန်တည်းမှာပင် ၎င်းတို့သည် သတင်းထောက်များကို မေးခွန်းများ မဆုံးနိုင်အောင် မေးမြန်းခဲ့ကြပြီး သတင်းထောက်များကလည်း မောက်မာခြင်းမရှိဘဲ ဖြေဆိုနိုင်သမျှ ဖြေကြားပေးခဲ့ကြသည်။ သူတို့သည် ရေပင်လယ်ဂြိုလ်ကို အထင်သေးကြမည်မဟုတ်ပေ။ အဆုံးတွင်တော့ ဤဂြိုလ်သည် အမှောင်ကြယ်ကို တိုက်ထုတ်ခဲ့ပြီးဖြစ်ရာ အခြေခံအကျဆုံး လေးစားမှုကို ပြသရန် လိုအပ်ပေသည်။

သတင်းထောက်များသည် ကနဦးတွင် လေထုအပြင်ဘက်၌ ပိတ်ဆို့ခံထားရပြီး ဟန်ရှောင်း၏ ကြားဝင်ဆောင်ရွက်မှုပြီးနောက်မှသာ ဝင်ရောက်ခွင့်ရခဲ့ကြောင်း နိုင်ငံ၆နိုင်ငံ၏ အထက်တန်းလွှာများ လျင်မြန်စွာ သိရှိသွားကြသည်။ သူတို့သည် ဟန်ရှောင်းအပေါ် ကြီးမားသော ကျေးဇူးတင်ရှိမှုဖြင့် ချက်ချင်း ပြည့်နှက်သွားကြသည်။ ဘလက်စတားကြောင့် ဤဂြိုလ်သည် ပျက်စီးခြင်းမရှိခဲ့ဘဲ ယခုတွင် ဘလက်စတားသည် ဂလက်စီနှင့် ဆက်သွယ်ရန် အခွင့်အလမ်းကို သူတို့အား ပေးအပ်ခဲ့သည်။

ဟန်ရှောင်း၏ ပေါင်ကို ဖက်တွယ်ထားခြင်းသည် တကယ်ကို မှန်ကန်ပေသည်။ တစ်ဖက်လူသည် ၎င်းတို့ ဖွံ့ဖြိုးတိုးတက်စေရန် ကူညီပေးမည့် ကတိကဝတ်ကို စတင်ဖြည့်ဆည်းပေးနေပြီဖြစ်သည်။

အခြားတစ်ဖက်တွင် သတင်းထောက်များသည် ဂြိုလ်က အမှောင်ကြယ်ကို တိုက်ထုတ်နိုင်ခဲ့သည့် အဓိကအကြောင်းရင်းမှာ ဘလက်စတား ကြေးစားတပ်ဖွဲ့ကြောင့်ဖြစ်ကြောင်း သိရှိသွားကြပြီး ၎င်းတို့၏ ခန့်မှန်းချက်များ မှန်ကန်ကြောင်း အတည်ပြုနိုင်ခဲ့သည်။

ဂိုဒိုရာက ဘလက်စတားကို မျက်နှာသာပေးခဲ့ရခြင်းမှာ အံ့သြစရာ မဟုတ်ပေ။

သို့သော် နိုင်ငံ၆နိုင်ငံသည် ဖြစ်ရပ်တစ်ခုလုံး၏ အသေးစိတ်အချက်အလက်များကို နားမလည်ခဲ့ကြပေ။ သူတို့သည် ကိုယ့်ကိုယ်ကိုယ် ကာကွယ်ရန်ပင် မနည်းကြိုးစားခဲ့ရပြီး ဖြစ်ရပ်တစ်ခုလုံးပြီးမှသာ သိရှိခဲ့ရခြင်းဖြစ်သည်။

ထို့နောက် သတင်းထောက်များသည် ပျက်စီးသွားသော မြို့ပြများ၏ ဓာတ်ပုံများကို ရိုက်ကူးခဲ့ကြသည်။ ၎င်းတို့အားလုံးသည် တန်ဖိုးရှိသော သတင်းမှတ်တမ်းများဖြစ်သည်။ ၎င်းနောက် သတင်းထောက်များသည် ဟန်ရှောင်းကို အင်တာဗျူးရန် ခိုလှုံရေးစခန်းသို့ အပြေးအလွှားသွားချင်စိတ်ကို မထိန်းနိုင်တော့ပေ။

အာကာသယာဉ်များ ခိုလှုံရေးစခန်းသို့ မရောက်ရှိမီမှာပင် တိုက်ပွဲ၏ ရလဒ်ဖြစ်ကြောင်း သိသာထင်ရှားသော ကြီးမားသည့် စက်ဝိုင်းပုံတောင်တန်းကြီးနှစ်ခုကို တွေ့မြင်နိုင်သည်။

သူတို့သည် နေရာမှန်သို့ အမှန်တကယ် ရောက်ရှိလာလေပြီ။ သတင်းထောက်များသည် အားတက်လာကြပြီး တိုက်ပွဲမှတ်တမ်းကို ရိုက်ကူးရန် ကင်မရာများကို ထုတ်ယူလိုက်ကြသည်။

အာကာသယာဉ်များသည် တစ်စင်းပြီးတစ်စင်း ဆင်းသက်လာပြီး သတင်းထောက်များ ထွက်လာကြသည်။ ဟားလပ်စ်သည် ၎င်းတို့အား စောင့်ဆိုင်းနေပြီး တည်ငြိမ်စွာ ပြောလိုက်သည်၊ "ကျွန်တော့်နောက် လိုက်ခဲ့ပြီး အစည်းအဝေးခန်းမကို လိုက်လာပါ။ ဘလက်စတားက ခင်ဗျားတို့ရဲ့ အင်တာဗျူးကို လက်ခံပါလိမ့်မယ်။"

သတင်းထောက်များအားလုံး ခေါင်းညိတ်ကာ သူ့နောက်သို့ လျင်မြန်စွာ လိုက်ပါသွားကြသည်။ သူတို့၏ သဘောထားသည် နိုင်ငံ၆နိုင်ငံနှင့် တွေ့ဆုံစဉ်ကနှင့် နှိုင်းယှဉ်ပါက လုံးဝ ကွဲပြားခြားနားနေသည်။

ဤသတင်းထောက်များသည် မောက်မာခြင်းမရှိဘဲ နိုင်ငံ၆နိုင်ငံကို တန်းတူဆက်ဆံခဲ့သော်လည်း ခေတ်နောက်ကျသော ဂြိုလ်မှ နေထိုင်သူများသည် ကွာခြားပြီး ၎င်းတို့ကြားတွင် ဘုံတူညီသော ခေါင်းစဉ်များ မရှိပေ။

သို့သော် ဘလက်စတား ကြေးစားတပ်ဖွဲ့ ရှေ့တွင် ဤသတင်းထောက်များသည် ကိုယ့်ကိုယ်ကိုယ် ပို၍ပင် နှိမ့်ချကြသည်။ ဘလက်စတား ကြေးစားတပ်ဖွဲ့သည် ပိုမိုမြင့်မားသော အဆင့်အတန်းရှိသည့် တည်ရှိမှုတစ်ခုဖြစ်ပြီး ဤလေးစားမှုသည် သူတို့၏ နှလုံးသားထဲမှ လာခြင်းဖြစ်သည်။

သူတို့ အစည်းအဝေးခန်းမသို့ ရောက်သောအခါ ဟန်ရှောင်း ရောက်မလာသေးသဖြင့် သတင်းထောက်များ စောင့်ဆိုင်းနေရသည်။ သို့သော် သူတို့သည် အချိန်မဖြုန်းဘဲ ဟားလပ်စ်ကို စတင် အင်တာဗျူးကြသည်။

ဟားလပ်စ်သည် ဟန်ရှောင်း၏ အမိန့်များကို ရရှိထားပြီးဖြစ်ရာ သတင်းထောက်များ သူ့ကို အင်တာဗျူးနိုင်စေရန် တမင်တကာ နေရစ်ခဲ့ခြင်းဖြစ်သည်။ ထို့နောက် သူသည် ဖြစ်ရပ်တစ်ခုလုံးကို ရိုးသားစွာ စတင် ပုံဖော်ပြောပြလေသည်။

"အမှောင်ကြယ်က နိုင်ငံ၆နိုင်ငံနဲ့ ကျွန်တော်တို့ကို တိုက်ခိုက်ဖို့ အာကာသယာဉ် အများအပြား စေလွှတ်ခဲ့တယ်။ ကျွန်တော်တို့ရဲ့ ခေါင်းဆောင်က အမှောင်ကြယ်ရဲ့ ပစ်မှတ်ဖြစ်ပြီး ရန်သူက သူ့ကို ဝိုင်းရံဖို့ ကပ်ဘေးအဆင့် စူပါ ၃ယောက်ကို စေလွှတ်ခဲ့တယ်။"

ဘလက်စတားက ကပ်ဘေးအဆင့် စူပါ ၃ယောက်ကို တစ်ယောက်တည်း ရင်ဆိုင်ခဲ့တာလား။ သူ အသက်ရှင်နေသေးသည့်အတွက် တိုက်ပွဲ၏ရလဒ်က သူ့အလိုလို သက်သေပြနေသည်။

သတင်းထောက်များအားလုံး ကြက်သေ သေသွားကြပြီး မှတ်စုများထုတ်ကာ စတင်ရေးမှတ်ကြတော့သည်။

"အမှောင်ကြယ်က ဘလက်စတားကို ဝိုင်းရံဖို့ ကပ်ဘေးအဆင့် စူပါ သုံးယောက် စေလွှတ်ခဲ့တယ်"

ဟားလပ်စ်က ဆက်ပြောသည်။ "ကျွန်တော်တို့ ခေါင်းဆောင်က ကြောက်စရာအကောင်းဆုံး ရန်သူ၃ယောက်ကို တစ်ယောက်တည်း ထိန်းထားပြီး အကြီးမားဆုံး အန္တရာယ်ရဲ့ ဝန်ကို ထမ်းပေးခဲ့တယ်။ ကပ်ဘေးအဆင့် စူပါ ၃ယောက်က ကျွန်တော်တို့ ခေါင်းဆောင်ရဲ့ ခံစစ်ကို မဖျက်ဆီးနိုင်ခဲ့ဘဲ အမှောင်ကြယ်က ကျွန်တော်တို့ ခေါင်းဆောင်ကို တိုက်ခိုက်ဖို့ သူတို့မိခင်ယာဉ်ကြီးရဲ့ ပင်မအမြောက်ကို အသုံးပြုဖို့ ဖိအားပေးခံခဲ့ရတယ်..."

သတင်းထောက်များသည် ထိတ်လန့်တုန်လှုပ်စွာဖြင့် အသက်ရှူမှားသွားကြပြီး ဆက်လက် ရေးမှတ်ကြသည်။

"ကပ်ဘေးအဆင့် စူပါ သုံးယောက် အရိုက်ခံရပြီး သူတို့ အာကာသယာဉ်ရဲ့ ပင်မအမြောက်ကို အသုံးပြုဖို့ ဖိအားပေးခံခဲ့ရသည်။"

"အပြင်ဘက်က စက်ဝိုင်းပုံ တောင်နှစ်လုံးက ပင်မအမြောက်ရဲ့ ရလဒ်တွေပဲ။ ကျွန်တော်တို့ ခေါင်းဆောင်က အမြောက်ဒဏ်ကို ခံနိုင်ဖို့ သူ့ခန္ဓာကိုယ်ကို အသုံးပြုခဲ့ပြီး ဒဏ်ရာမရဘဲ ပြန်ထွက်လာခဲ့တယ်။ အဲဒီနောက် အမှောင်ကြယ်က နောက်တစ်ချက် ပစ်ခတ်ခဲ့ပေမယ့် သူတို့က ကျွန်တော်တို့ ခေါင်းဆောင်ရဲ့ ထောင်ချောက်ထဲ ကျသွားပြီး သူတို့ရဲ့ ကပ်ဘေးအဆင့် ရဲဘော်တစ်ယောက်ကို သေလုနီးပါး ဖြစ်စေခဲ့တယ်။ ဒါကြောင့် သူတို့ နောက်ထပ်တစ်ချက် မပစ်ရဲတော့ဘူး..."

ဤသည်မှာ တကယ်ကို အရည်ရွှမ်းသော သတင်းကောင်း ဖြစ်သည်!

သတင်းထောက်များအားလုံး ကြက်သေ သေသွားကြပြီး အလျင်အမြန် ရေးမှတ်ကြသည်။

"ပင်မအမြောက်ကို ခန္ဓာကိုယ်ဖြင့် ခံယူပြီး ဘလက်စတားက နောက်တစ်ချက်ပစ်ရန် မောက်မာစွာ စိန်ခေါ်ခဲ့သည်။"

"နောက်ဆုံးမှာ ဂိုဒိုရန် စစ်ကူတွေ ရောက်လာပြီး အမှောင်ကြယ်က ဂိုဒိုရာကို ထပ်မတိုက်ချင်တော့ဘူး။ ဒါကြောင့် သူတို့ ဆုတ်ခွာဖို့ ဖိအားပေးခံခဲ့ရတယ်။ အဲဒါ ဖြစ်ပျက်ခဲ့တာတွေပဲ။" ဟားလပ်စ်က ပါးစပ်ပိတ်လိုက်သည်။

သတင်းထောက်များသည် လှိုက်လှိုက်လှဲလှဲ လက်ခုပ်တီးကြပြီး သဲကြီးမဲကြီး ရေးမှတ်ကြသည်။

"ဘလက်စတား၏ ဘုရားပေးစွမ်းအား၊ အမှောင်ကြယ်၏ သနားစဖွယ် ထွက်ပြေးမှု။"

…

ဟားလပ်စ်၏ အင်တာဗျူး ပြီးဆုံးလောက်ပြီဟု ခန့်မှန်းပြီးနောက် ဟန်ရှောင်းသည် အစည်းအဝေးခန်းမထဲသို့ ဝင်ရောက်လာသည်။

သတင်းထောက်များအားလုံး လေးစားမှုအပြည့်ရှိသော မျက်နှာများဖြင့် ချက်ချင်း ထခုန်ကာ အော်ဟစ်လိုက်ကြသည်။ "ဆရာ ဘလက်စတား"

ဟန်ရှောင်းသည် ကျောင်းအတွင်း လှည့်လည်စစ်ဆေးနေသော စည်းကမ်းထိန်းသိမ်းရေး ဆရာတစ်ဦးခို ချက်ချင်း ခံစားလိုက်ရသည်။

ဟန်ရှောင်း ထိုင်လိုက်ပြီး သတင်းထောက်များက အင်တာဗျူး စတင်ကြသည်။ ဟန်ရှောင်းကို အခြားမေးခွန်းများစွာဖြင့် မမေးမြန်းမီ ဟားလပ်စ် ပြောပြခဲ့သည်များမှာ အမှန်တရား ဟုတ်မဟုတ် ဦးစွာ အတည်ပြုခဲ့ကြသည်။

"ကပ်ဘေးအဆင့် စူပါ သုံးယောက်ကို ရင်ဆိုင်ရတာ ဖိအား တစ်စုံတစ်ရာ ခံစားရပါသလား"

"ပင်မအမြောက်ကို ခံယူရတာ ဘယ်လိုခံစားရလဲ"

"အမှောင်ကြယ်ရဲ့ လုပ်ရပ်တွေအပေါ် ဘယ်လိုခံစားရလဲ"

မဆုံးနိုင်သော မေးခွန်းများက ဟန်ရှောင်းအား သတင်းစာရှင်းလင်းပွဲ ပြုလုပ်နေသကဲ့သို့ ခံစားရစေသည်။

ဟန်ရှောင်းသည် သူ၏နာမည်ကို ဖြန့်ကျက်ရန် ၎င်းတို့ကို အားကိုးရမည်ဖြစ်သဖြင့် သတင်းထောက်၏ မေးခွန်းအားလုံးကို စိတ်ရှည်စွာ ဖြေကြားခဲ့သည်။ ဤသည်မှာ အပိုဆောင်း ဂုဏ်သတင်း ဆုလာဘ်ဖြစ်သည်။ အဆုံးတွင်တော့ သူ့ကို ဒဏ္ဍာရီအမှတ်များ ပေးနိုင်သော ဖြစ်ရပ်တစ်ခု၌ လျှို့ဝှက်ဆုလာဘ်များစွာ သေချာပေါက် ရှိနေမည်ဖြစ်သည်။

အင်တာဗျူး ပြီးဆုံးခါနီးတွင် သတင်းထောက်တစ်ဦးက နောက်ဆုံးမေးခွန်းတစ်ခု မေးလိုက်သည်။

"ဆရာ ဘလက်စတား၊ ခင်ဗျား ရေပင်လယ်ဂြိုလ်မှာ နေရစ်ပြီး ကပ်ဘေးကို တိုက်ဖျက်ရာမှာနဲ့ ရန်သူတွေကို ကာကွယ်ရာမှာ ကူညီပေးတာက ဒါ ခင်ဗျားရဲ့ မွေးရပ်ဂြိုလ် ဖြစ်နေလို့လား"

ထိုစကားကို ကြားသောအခါ ဟန်ရှောင်း၏ မျက်လုံးများ အရောင်လက်သွားပြီး သူ့စိတ်ထဲတွင် အကြံတစ်ခု ပေါ်လာသည်။ "အဲဒါက အကြောင်းရင်းတစ်ခုပါပဲ..."

"တခြားအကြောင်းရင်းတွေကို ပြောပြပေးနိုင်မလား" သတင်းထောက်က မေးသည်။

ဟန်ရှောင်းက ရယ်မောလိုက်ပြီး ပြောသည်။ "ရတာပေါ့။ ရေပင်လယ်ဂြိုလ်က ကျွန်တော့်မွေးရပ်ဂြိုလ်တစ်ခုတည်း မဟုတ်ပါဘူး။ ဘလက်စတား ကြေးစားတပ်ဖွဲ့က ရေပင်လယ်ဂြိုလ်အထိ တိုးချဲ့ဖို့နဲ့ ဂြိုလ်ပေါ်မှာ ဌာနခွဲတစ်ခု တည်ထောင်ဖို့လည်း စီစဉ်ထားပါတယ်။ ဒါက မျောလွင့်နဂါးကျွန်း လက်နက်ကိုင်တပ်ဖွဲ့ရဲ့ စခန်းတွေထဲက တစ်ခုလည်း ဖြစ်လာပါလိမ့်မယ်။ လွန်ခဲ့တဲ့ရက်ပိုင်းက နဂါးဧကရီ နေရာဒေသကို အကဲဖြတ်ဖို့ ရေပင်လယ်ဂြိုလ်ကို လာခဲ့သေးတယ်၊ ကျွန်တော့်အလုပ်က ဝင်လာသမျှ ရန်သူအားလုံးကို တိုက်ထုတ်ဖို့ပါပဲ။"

သတင်းထောက်အားလုံး၏ မျက်လုံးများ အရောင်လက်သွားပြီး အလွန်ဝမ်းမြောက်သွားကြသည်! ဤသည်မှာ နောက်ထပ် အရည်ရွှမ်းသော သတင်းတစ်ပုဒ် ဖြစ်သည်။

‘ရေပင်လယ်ဂြိုလ်သည် ဘလက်စတားနှင့် မျောလွင့်နဂါးကျွန်း၏ ကာကွယ်မှုအောက်တွင် ရှိသော ဂြိုလ်တစ်လုံး ဖြစ်နေသည်ကိုး။’

ထိုနေ့မှစ၍ ရေပင်လယ်ဂြိုလ်သည် ဘာမှထူးခြားမှုမရှိသော အဆင့်နိမ့်ဂြိုလ်တစ်ခု ဖြစ်တော့မည်မဟုတ်ပေ။ မျောလွင့်နဂါးကျွန်း၏ တံဆိပ်ကို ၎င်းပေါ်တွင် မှတ်သားထားမည်ဖြစ်ပြီး ဤတံဆိပ်သည် ဂြိုလ်အတွက် အကာအကွယ် အဆောင်တစ်ခု ဖြစ်လာမည်ဖြစ်သည်။ အနည်းဆုံးတော့ မကောင်းသောရည်ရွယ်ချက်ရှိသူ ၉၀ရာခိုင်နှုန်းကို ဟန့်တားနိုင်လိမ့်မည်။

အဆုံးတွင်တော့ သူသည် ရေပင်လယ်ဂြိုလ်တွင် ထာဝရ နေထိုင်မည်မဟုတ်ဘဲ ဤအရာသည် ရေပင်လယ်ဂြိုလ်နှင့် သူ၏ကိုယ်ပိုင်စခန်း နှစ်ခုစလုံးအတွက် အကျိုးရှိသည်။

လုံခြုံရေးအဆင့် မြှင့်တင်ခြင်းအပြင် မျောလွင့်နဂါးကျွန်း၏ ကျော်ကြားမှုသည် ကုန်သည်များနှင့် ရင်းနှီးမြှုပ်နှံမှုများကို ဂြိုလ်ဆီသို့ ဆွဲဆောင်နိုင်မည်ဖြစ်သည်။ ငွေကြေးအဖွဲ့အစည်းအချို့သည် ဂြိုလ်တွင် ရင်းနှီးမြှုပ်နှံကြမည်ဖြစ်ပြီး ဤအရာသည် ရေပင်လယ်ဂြိုလ် ဂလက်စီနှင့် ချိတ်ဆက်မိစေမည့် လုပ်ငန်းစဉ်ကို အရှိန်မြှင့်ပေးလိမ့်မည်။

ရေပင်လယ်ဂြိုလ်သည် မျောလွင့်နဂါးကျွန်း၏ နယ်မြေဖြစ်သောကြောင့် လောလောဆယ်တွင် ခေတ်နောက်ကျသော ဂြိုလ်တစ်ခု ဖြစ်နေသော်လည်း ငွေကြေးအဖွဲ့အစည်းများသည် ရင်းနှီးမြှုပ်နှံမှုအချို့ ပြုလုပ်ရန်နှင့် နိုင်ငံ၆နိုင်ငံ ဖွံ့ဖြိုးတိုးတက်မှုတွင် အထောက်အကူဖြစ်စေရန် နည်းပညာဆိုင်ရာ အသိပညာအချို့ကို လွှဲပြောင်းပေးရန် ဆန္ဒရှိကြပေလိမ့်မည်။ ဤနည်းအားဖြင့် သူသည် နိုင်ငံ၆နိုင်ငံအပေါ်ထားရှိသော ကတိကို ဖြည့်ဆည်းနိုင်မည်ဖြစ်သည်။

တစ်ချိန်တည်းမှာပင် ရေပင်လယ်ဂြိုလ်ကို မျောလွင့်နဂါးကျွန်း၏ တံဆိပ်ရိုက်နှိပ်ခြင်းသည် ကြိုတင်ကာကွယ်မှု အစီအမံတစ်ခုဖြစ်သည်။ အနာဂတ်တွင် နိုင်ငံ၆နိုင်ငံ ဖွံ့ဖြိုးတိုးတက်လာပြီး လွတ်လပ်ရေးရလာလျှင်ပင် သူတို့သည် သူနှင့်ချုပ်ဆိုထားသော စာချုပ်ကို ဆန့်ကျင်ရဲမည် မဟုတ်ပေ။ မျောလွင့်နဂါးကျွန်း၏ တံဆိပ်ကို ဆုံးရှုံးရမည့် ရလဒ်နှင့် ပတ်သက်၍ သူတို့ အလွန်ရှင်းလင်းကြပေလိမ့်မည်။

ထို့ကြောင့် ရေပင်လယ်ဂြိုလ်ကို ထိန်းချုပ်ထားသော အစိုးရသည် မျက်နှာပြင်ပေါ်တွင် နိုင်ငံ၆နိုင်ငံ ဖြစ်သော်လည်း ဂြိုလ်၏ စစ်မှန်သော အုပ်စိုးသူမှာ တကယ်တမ်းတွင်…

အေးမီစ် ဖြစ်သည်။

သေချာပေါက် သူ မဟုတ်ပေ။

သို့သော် အေးမီစ်၏ ပျင်းရိသော သဘာဝနှင့်ဆိုလျှင် သူ့တွင် အလွန်ကြီးမားသော ပြောရေးဆိုခွင့် ရှိလာမည်ဖြစ်သည်။

‘သေချာတာပေါ့၊ အေးမီစ်က ငြင်းမှာ မဟုတ်ဘူး။ လုပ်ငန်းလည်ပတ်မှုတွေကို တာဝန်ယူရတဲ့ အိမ်တော်ထိန်းခေါင်းဆောင် ဂျန်နီအတွက်ကတော့…’

‘ဟား၊ သူတို့လို ချစ်ခင်ရတဲ့ လုပ်ဖော်ကိုင်ဖက်တွေက တစ်ယောက်ကိုတစ်ယောက် ကူညီပေးသင့်တာပေါ့။’

…

သူတို့၏ ဤခရီးစဉ်သည် ဆုလာဘ်များဖြင့် ပြည့်နှက်နေပြီး အားလုံး ကျေနပ်မှုဖြင့် ပြန်သွားခဲ့ကြသည်။

နောက်တစ်နေ့တွင် ဂါတွန်ကြယ်စနစ်၏ သတင်းဌာနအသီးသီးသည် ရေပင်လယ်ဂြိုလ်ပေါ်မှ တိုက်ပွဲ၏ 'အဖြစ်မှန်' အသေးစိတ် ဖော်ပြချက်ကို ထုတ်ပြန်ခဲ့သည်။ စက်ဝိုင်းပုံ တောင်တန်းများ၏ ဓာတ်ပုံများနှင့် တွဲဖက်၍ ပင်မခေါင်းစီးအဖြစ် ဖော်ပြခဲ့သည်။

ဆောင်းပါးကို တစ်ချက်ကြည့်ပြီးနောက် ဟန်ရှောင်းသည် သွေးအန်လုနီးပါး ဖြစ်သွားပြီး ဟားလပ်စ်ကို လည်ပင်းညှစ်ကာ ဒေါသတကြီး ဟိန်းဟောက်လိုက်သည်၊ "ငါတို့ အမှန်တရားကို ပြောဖို့ သဘောတူခဲ့ကြတယ် မဟုတ်ဘူးလား၊ မင်း သတင်းထောက်တွေကို ဘာတွေ ပြောလိုက်တာလဲ၊ ငါမင်းကို ကြွားခိုင်းလို့လား။ ဟမ်"

ဟားလပ်စ်သည် ဝမ်းနည်းပက်လက် ဖြစ်သွားသည်။ "ငါ တကယ်ပဲ အမှန်တရားကို ပြောခဲ့တာပါ။ သတင်းထောက်တွေက ကိစ္စတွေကို ပုံကြီးချဲ့ရာမှာ ဒီလောက်တော်မယ်လို့ ဘယ်သူက သိမှာလဲ။"

ဤဖြစ်ရပ်သည် ဂလက်စီအတွင်း ကျယ်ကျယ်ပြန့်ပြန့် ပြန့်နှံ့သွားခဲ့သည်။ ဂါတွန်ကြယ်စနစ် သာမက အမှောင်ကြယ်ကြောင့် ဖြစ်ပေါ်လာသော ဖရိုဖရဲအခြေအနေကို အာရုံစိုက်နေကြသည့် ကွဲအက်ကြယ်စင်ကွင်းမှ အခြားကြယ်စနစ်များပင်လျှင် ကပ်ဘေးအဆင့် စူပါ ၃ယောက်ကို တစ်ယောက်တည်း တိုက်ခိုက်ခဲ့ပြီး အမှောင်ကြယ် မိခင်ယာဉ်ကြီး၏ ပင်မအမြောက်ဒဏ်ကို ခံနိုင်ခဲ့သော ဘလက်စတားဟုခေါ်သည့် ဇာတ်ကောင်အကြောင်း သိရှိသွားကြသည်။

ကြယ်စုတန်း အဆင့် လူမှုအဖွဲ့အစည်းတစ်ခုပင်လျှင် ဘလက်စတား၏ နာမည်ကို မှတ်မိသွား၏။

ကွဲအက်ကြယ်စင်ကွင်း တစ်ခုလုံး တုန်လှုပ်သွားတော့သည်။

စာစဉ် (၃၇)၊ အခန်း (၅၇၆) ပြီး၏။

လင်းဆက်

+++++