ကြမ်းတမ်းသောသားရဲအသိုက်ကိုထိုးဆွခြင်း၂

"မင်းက သိုင်းသခင်ဖြစ်နေပြီဆိုပေမဲ့ မင်းရဲ့ကျင့်ကြံမှုကတော့ နည်းနည်းလေးချို့တဲ့နေတုန်းပဲ။ မင်းအပေါ် ငါတို့ထားတဲ့ ကြီးမားတဲ့မျှော်လင့်ချက်တွေကို စိတ်ပျက်စေမှာမဟုတ်ဘူးလို့ မျှော်လင့်ရုံနဲ့ပဲ ဒီဆေးလုံးနှစ်လုံးကို ဆုချလိုက်တယ်"

ဒီစာသားက ရှီကျင်းရဲ့မျက်နှာကို ပြောင်းလဲစေခဲ့ပြီးနောက် စိတ်လှုပ်ရှားသောအမူအရာပေါ်လာကာ လက်ထဲကဆေးလုံးတွေကို ပိုပြီးတင်းတင်းကျပ်ကျပ်ဆုပ်ကိုင်လိုက်သည်။

"ဘုရင်မင်းမြတ် ဒီလိုကြီးမားတဲ့ကျေးဇူးအတွက် ကျွန်တော်မျိုး မီးကိုဖြတ်ပြီး ရေကိုသွားဖို့ ဆန္ဒရှိပါတယ်"

"ဒီဆေးလုံးတွေက တန်ဖိုးရှိတယ် မင်းဒီနေရာမှာပဲ သောက်သုံးသင့်တယ် ငါက မင်းရဲ့အကာအကွယ်အဖြစ်လုပ်ပေးတာလည်း သင့်တော်လိမ့်မယ်"

"ဒါဆိုရင်တော့ကျွန်တော်မျိုး မရိုမသေလုပ်မိပါပြီ"

ရှီကျင်းက ငြင်းဆန်ခြင်းသို့မဟုတ်တွန့်ဆုတ်ခြင်းပင်မရှိဘဲ ဆေးလုံးနှစ်လုံးကို ချက်ချင်းမျိုချလိုက်သည်။

ပြတ်ပြတ်သားသားဆေးလုံးတွေကို သောက်သုံးတာကိုမြင်တော့ ကုယန်၏မျက်နှာက နူးညံ့သွားပြီး ပြုံးရယ်ခြင်းတစ်ခု ထပ်ပေါင်းနေခဲ့သည်။

မကြာခင်မှာပဲ ကုယန်၏မျက်နှာအမူအရာက လေးနက်သွားသည်။

သူ့၏သိမှတ်မှုထဲတွင် ရှီကျင်း၏ အရှိန်အဝါက တောက်လျှောက်တက်နေပြီး သူ၏အဆင့်တက်နှုန်းက ကုယန်ကိုယ်တိုင် ဘုရင့်နိုင်ငံကိုထူထောင်တုန်းကနှင့် နှိုင်းယှဉ်နိုင်ခဲ့သည်။

အလယ်အဆင့်သခင်။

နှောင်းပိုင်းအဆင့်သခင်။

အထွတ်အထိပ်သခင်။

သူအထွတ်အထိပ်သခင်အဆင့်ကိုရောက်ရှိတဲ့အခိုက်အတန့်မှာ တစ်စက္ကန့်မှမရပ်နားဘဲ သိုင်းသခင်၏အတားအဆီးကို ဖောက်ထွက်ပြီး သိုင်းအရှင်သခင်နယ်ပယ်ထဲကိုခြေချခဲ့သည်။

အသက်ရှူချိန်အတွင်းမှာ ရှီကျင်းက သိုင်းအရှင်သခင်ရဲ့အထွတ်အထိပ်ကို အောင်မြင်စွာ ဖောက်ထွက်သွားခဲ့သည်။

ဒီလိုကြောက်မက်ဖွယ် ထိတ်လန့်စေတဲ့တည်ရှိမှုကြောင့် ကုယန်တောင်မှ အနည်းငယ်အံ့အားသင့်ခဲ့ရသည်။

သူဆေးလုံးတွေ၏စွမ်းဆောင်ရည်ကို သိထားပေမဲ့ သိုင်းသခင်၏အစောပိုင်းအဆင့်ကနေ သိုင်းအရှင်သခင်၏ထိပ်တန်းအဆင့်ကို အသက်ရှူချိန်အတွင်း သူ့မျက်စိရှေ့မှာပဲ ဖောက်ထွက်သွားတာကို မြင်ရတာ မယုံနိုင်လောက်စရာပင်။

သို့သော်လည်း ဒါကမရပ်တန့်သေးပေ။

သိုင်းအရှင်သခင်၏အထွတ်အထိပ်အဆင့်ကိုရောက်ရှိပြီးနောက် ရှီကျင်းက ပြိုင်ဘက်ကင်းဓားရည်ရွယ်ချက်ဖြာထွက်သွားသည်။ အလောင်းပုံနှင့်သွေးပင်လယ်အဖြစ်ဆင့်ကဲပြောင်းလဲနေပုံရပြီး အကန့်အသတ်မရှိဖျက်ဆီးစွမ်းအားက ရုတ်တရက်ပေါက်ကွဲထွက်လာခဲ့သည်။

ဒီမြင်ကွင်းက မြို့တော်နန်းတော်အတွင်းက လူများစွာကို ထိတ်လန့်စေခဲ့သည်။

ကုယန်၏မျက်နှာအမူအရာအနည်းငယ်ပြောင်းလဲသွားပြီး သတင်းကိုကြားလို့ ရောက်လာကြသည့်အစောင့်တွေကို ချက်ချင်းခိုင်မာသည့် အမိန့်ပေးလိုက်သည်။

"ဧကရာဇ်ဥယျာဉ်တစ်ခုလုံးကိုပိတ်ဆို့ထားလိုက် ငါ့ခွင့်ပြုချက်မရှိဘဲဘယ်သူမှဝင်ခွင့်မပြုရဘူး"

"ဟုတ်ကဲ့"

ကုယန်၏အမိန့်အောက်မှာ ဧကရာဇ်ဥယျာဉ်တစ်ခုလုံးကို အစောင့်တွေက ပိတ်ဆို့လိုက်ပြီးမှသာ သူက ရှီကျင်းဆီကို အာရုံစိုက်လိုက်သည်။

"အဆင့်ကိုးစစ်မှန်သောရည်ရွယ်ချက်"

ကုယန်က တီးတိုးရေရွတ်လိုက်သည်။

သူက သိုင်းသခင်စစ်မှန်သောရည်ရွယ်ချက်ကို နားလည်ပြီးသားဖြစ်ပေမဲ့ အဆင့်ကိုး စစ်မှန်သောရည်ရွယ်ချက်အဆင့်ကိုတော့ မရောက်သေးပေ။

ဒီလိုတွေးပြီးတော့ ကုယန်က အဆင့်ကိုးစစ်မှန်သောရည်ရွယ်ချက်ဆေးလုံးကို သောက်သုံးဖို့ စိတ်ကူးလည်း ပေါ်လာခဲ့သည်။

အဘယ်ကြောင့်ဆိုသော် ကုချင်းဖန်က သူ့ကို သိုင်းအရှင်သခင်ဆေးလုံးတွေမသောက်သုံးဖို့ပဲ ပြောခဲ့တာဆိုပေမဲ့ အဆင့်ကိုးစစ်မှန်သောရည်ရွယ်ချက် ဆေးလုံးတွေမသောက်သုံးဖို့တော့ ဘာမှမပြောခဲ့ပေ။

သို့သော်လည်း ဒီအတွေးကို ကုယန်က ယာယီဖိနှိပ်ထားခဲ့သည်။

မကြာခင်မှာပဲ ဓားရည်ရွယ်ချက်က ပျောက်ကွယ်သွားသည်။

ရှီကျင်းကတင်းတင်းကျပ်ကျပ်မှိတ်ထားသည့် မျက်လုံးတွေကို ဖွင့်လိုက်သည်။ သူ့မျက်နှာပေါ်မှာ အံ့အားသင့်မှုအရိပ်အယောင်တစ်ခုရှိခဲ့ပေမဲ့ ဒါက လေးစားချစ်ခင်မှုအဖြစ်ပြောင်းလဲသွားပြီး သူက ကုယန်ကို ချက်ချင်းလေးလေးနက်နက်ဂါရဝပြုခဲ့သည်။

"ဘုရင်မင်းမြတ်ရဲ့ကျေးဇူးတော်အတွက် ကျေးဇူးတင်ပါတယ် ဒီလိုအခွင့်အရေးက ပြန်လည်ဖန်ဆင်းခြင်းနဲ့တူပါတယ် ကျွန်တော်မျိုး ဒီကျေးဇူးကို ဘယ်တော့မှမမေ့ပါဘူး"

သူ့မျက်နှာအမူအရာက စိတ်လှုပ်ရှားနေပြီး စကားပြောတဲ့အခါ အသံအနည်းငယ်တုန်ယင်နေခဲ့သည်။

သိုင်းအရှင်သခင်၏အထွတ်အထိပ်။

အဆင့်ကိုးစစ်မှန်သောရည်ရွယ်ချက်။

ဒါတွေက ရှီကျင်းအိပ်မက်တောင်မမက်ရဲတဲ့အရာတွေဖြစ်သည်။

သူ့ကျင့်ကြံမှုစွမ်းရည်က တော်တော်ကောင်းတယ်လို့သူယူဆခဲ့ပေမဲ့ နောက်ပိုင်းမှာ သိုင်းသခင်ဖြစ်ဖို့တော့ ယုံကြည်မှုနည်းပါးခဲ့သည်။

ဒါပေမဲ့အခု ဆေးလုံးတစ်လုံးတည်းနှင့် သူ့ကို သိုင်းအရှင်သခင်၏ထိပ်တန်းအဆင့်ကို မြှင့်တင်ပေးခဲ့ပြီး နှစ်ပေါင်းရာနဲ့ချီပင်ပန်းခက်ခဲတဲ့ကျင့်ကြံမှုကို တိုက်ရိုက်သက်သာစေခဲ့သည်။ ရှီကျင်းဘယ်လိုလုပ်ပြီး စိတ်လှုပ်ရှားခြင်းမရှိဘဲနေနိုင်မှာလဲ။

ပြီးတော့ အဆင့်ကိုးစစ်မှန်သောရည်ရွယ်ချက်ဆေးလုံးလည်း ရှိသေးသည်။ ဒါက သူ့ကို အင်မတန်အားကောင်းသည့်စစ်မှန်သောရည်ရွယ်ချက်ကို နားလည်စေခဲ့သည်။

ထိပ်တန်းသိုင်းအရှင်သခင်၏ကျင့်ကြံမှု။

ထိပ်တန်းအဆင့်ကိုးသခင်၏စစ်မှန်သောရည်ရွယ်ချက်။

ဒီနှစ်ခုရဲ့ပေါင်းစပ်မှုနှင့် ရှီကျင်းက ကမ္ဘာပေါ်က ထိပ်တန်းအင်အားကြီးပုဂ္ဂိုလ်တွေထဲက တစ်ယောက်ဖြစ်လာခဲ့ပါပြီ။

"မင်းအခုသွားပြီး မင်းဖောက်ထွက်လာတဲ့ခွန်အားကို ကျင့်သားရအောင်လုပ် ပြီးတော့ ဒီကိစ္စကို လူသိရှင်ကြားမလုပ်ရဘူး"

ကုယန်က ပြောလိုက်သည်။

ဒီအတွက် ရှီကျင်းက ရိုရိုသေသေ အမိန့်နာခံခဲ့သည်။

ရှီကျင်းထွက်ခွာသွားပြီးနောက် ကုယန်က လျှို့ဝှက်အစောင့်အဖွဲ့ဝင်တစ်ဦးကိုခေါ်လိုက်ပြီး ဆေးလုံးနှစ်လုံးကို ကုယီကို ပေးလိုက်သည်။

သူက သိုင်းနတ်ဘုရားမင်းဆက်ကိုထူထောင်ပြီးပြီဖြစ်ပေမဲ့ ကုယန်က လျှို့ဝှက်အစောင့်ကို ဖျက်သိမ်းခြင်းမပြုသေးဘဲ လိုအပ်တဲ့အခါ အရေးပါတဲ့အခန်းကဏ္ဍကနေပါဝင်ဖို့ သူ့ရဲ့လက်ထဲကအင်အားစုအဖြစ် အမြဲသတ်မှတ်ထားခဲ့သည်။

ယခုပင်လျှင် လျှို့ဝှက်အစောင့်က အရာရှိတွေကို လျှို့ဝှက်စောင့်ကြည့်နိုင်ပြီး ပြည်နယ်ကိုးခုကိုလည်း လှည့်လည်စစ်ဆေးနိုင်တာကြောင့် အရေးပါမှုမသေးဘူးလို့ သက်သေပြနေသည်။

လက်ရှိလျှို့ဝှက်အစောင့်ကို ကုချင်းဖန်က လျှို့ဝှက်စွာလူအင်အားကို သုံးထောင်အထိ ချဲ့ထွင်ထားခဲ့ပြီး တစ်ဝက်က ကုယန်၏အမိန့်အောက်မှာရှိနေပြီး ကျန်တစ်ဝက်ကတော့ ယခင်အကြီးအကဲရဲ့အမိန့်ကို ဆက်လက်နာခံနေဆဲဖြစ်သည်။

လျှို့ဝှက်အစောင့်၏အမှန်တကယ်အရေအတွက်ကိုတော့ ကုယန်က သဘာဝအားဖြင့်မသိရှိပေ။

သို့သော်လည်း သူ့အမိန့်အောက်က တစ်ထောင့်ငါးရာသောလျှို့ဝှက်အစောင့်တွေကို လျှို့ဝှက်အစောင့်အတွင်းက ပုဂ္ဂိုလ်ရှားပါးမှုပြဿနာကို ကုယန်အတွက် များစွာလျော့ပါးစေခဲ့သည်။

မူလကကုယန်ဟာ လျှို့ဝှက်အစောင့်ကို နောက်ထပ်ချဲ့ထွင်ဖို့စဉ်းစားခဲ့ပေမဲ့ သူယုံကြည်စိတ်ချရဆုံးအင်အားစုဖြစ်တာကြောင့် လျှို့ဝှက်အစောင့်ကို ပေါ့ဆစွာချဲ့ထွင်လို့မရနိုင်တာ သေချာသည်။

ဒီကိစ္စကိုလုပ်ဆောင်ရမည်။

ပြီးတော့အမြင့်ဆုံးသတိဖြင့်လုပ်ဆောင်ရမည်။

အဲ့ဒီမတိုင်ခင် ကုယန်ပထမဆုံးလုပ်ဆောင်ရမယ့်အရာက ကုယီရဲ့ခွန်အားကို မြှင့်တင်ဖို့ ဖြစ်ပါသည်။

ထိပ်တန်းသိုင်းသခင်နယ်ပယ် သိုင်းပညာရှင်တစ်ဦးကွပ်ကဲမှုနှင့် လျှို့ဝှက်အစောင့်က ပိုကြီးမားသည့် အခန်းကဏ္ဍကနေ ပါဝင်နိုင်သည်။

ယခု သိုင်းအရှင်သခင်နယ်ပယ်ဆေးလုံးနှစ်လုံးကို ရှီကျင်းနဲ့ကုယီကို ပေးပြီးသွားပြီဖြစ်ပြီး ကျန်ရှိတဲ့ဆေးလုံးငါးလုံးအတွက်တော့ ကုယန်မှာစိတ်ကူးအချို့ရှိသည်။

"သင်၏မျိုးဆက် 'ကုယန်က အရာရှိတွေကို ရာထူးများ ပေးအပ်ခဲ့သည်။ လောက၏နိုင်ငံရေးအခြေအနေကို တည်ငြိမ်စေပြီး ပြည်နယ်ကိုးခုကို ကြာရှည်စွာစောင့်ဆိုင်းခဲ့ရတဲ့ငြိမ်းချမ်းရေးကို ယူဆောင်လာခဲ့သည်"

"သင်၏မျိုးဆက် 'ကုယန်'က မင်းဆက်ကချီကံကြမ္မာရဲ့ကောင်းချီးကိုရရှိပြီး သူ့ရဲ့စွမ်းရည်ကို အကြီးအကျယ်မြှင့်တင်ခဲ့သည်"

"သင်၏မျိုးဆက် 'ကုယန်” သိုင်းသခင်နယ်ပယ်က သိုင်းပညာရှင်နှင့် သိုင်းပညာကိုဆွေးနွေးပြီး သူ့ခွန်အားကို တိုးတက်စေခဲ့သည်။"

"သင်၏မျိုးဆက် 'ကုယန်’က ပြည်သူတွေအတွက် အကျိုးရှိတဲ့မူဝါဒတွေ အများအပြားကို အကောင်အထည်ဖော်ခဲ့ပြီး ပြည်သူတွေကြားမှာ သူ့ရဲ့ဂုဏ်သိက္ခာကို မြှင့်တင်ခဲ့သည်"

"သင်၏မျိုးဆက် 'ကုရွှမ်း'က အန္တရာယ်ရှိသည့်နယ်မြေထဲကို လမ်းလွဲဝင်ရောက်သွားသည်။ ကြမ်းတမ်းသောသားရဲ၁၀၃ကောင်၏တိုက်ခိုက်ခံရသည်။"

"သင်၏မျိုးဆက် 'ကုရွှမ်း'က ကောင်းကင်သဘာဝပစ္စည်းတွေကို မတော်တဆသုံးစွဲမိပြီး အရိုးသန့်စင်ခြင်းနယ်ပယ်၏ပြည့်စုံမှုကို ဖောက်ထွက်ခဲ့သည်"

"ဆုကြေးအမှတ်၃၀"

"သင်၏မျိုးဆက်'ကုရွှမ်း'က ကြမ်းတမ်းသောသားရဲ၃၆၁ကောင်၏တိုက်ခိုက်ခံရသည်"

"သင်၏မျိုးဆက်'ကုရွှမ်း'က ကြမ်းတမ်းသောသားရဲ၄၇၆ကောင်၏တိုက်ခိုက်ခံရသည်"

"သင်၏မျိုးဆက်'ကုရွှမ်း'က အင်အားကြီးပြီး ကြမ်းတမ်းသောသားရဲတွေ၏ တိုက်ခိုက်ခံရပြီး အရေးပါသည့်အခိုက်အတန့်မှာ သူ့လျှို့ဝှက်ချက်ကိုအသုံးပြုပြီး သူတို့ကိုသတ်ဖြတ်ခဲ့ရသည်"

"သင်၏မျိုးဆက်'ကုရွှမ်း'က သေစေနိုင်သည့်တိုက်ပွဲတွေကနေတစ်ဆင့် နားလည်မှုရရှိပြီး သူရဲ့ကောင်းကင်ဓားစစ်မှန်သောရည်ရွယ်ချက်ကို ပိုပြီးနက်ရှိုင်းစေခဲ့သည်"

မြို့တော်နန်းတော်ကနေထွက်ခွာပြီး ကွမ်းယန်မင်းသားအိမ်တော်ရဲ့ဟောင်းနွမ်းတဲ့နေရာကို ယာယီပြန်ရောက်လာတဲ့အခါ ကုချင်းဖန်က သတင်းအချက်အလက်ပြဇယားကို လှန်လှောကြည့်လိုက်သည်။ နောက်ပိုင်းသတင်းစကားအချို့ကိုမြင်လိုက်တဲ့အခါ သူ့ရဲ့မျက်နှာအမူအရာက အနည်းငယ်ထူးဆန်းသွားခဲ့သည်။

"ကြမ်းတမ်းတဲ့သားရဲ"

"သူကြမ်းတမ်းတဲ့သားရဲတွေရဲ့ပျားအုံကိုထိုးဆွလိုက်တာလား"

ကြမ်းတမ်းသောသားရဲတွေက ပြည်နယ်ကိုးခုမှာ အများအားဖြင့် မမြင်ရပေ။ သူတို့ပေါ်လာတိုင်းနန်းတော်ကချက်ချင်းနှိမ်နင်းလိုက်တာကြောင့်ဖြစ်သည်။

သို့သော် ထိုက်ရွှမ်းမင်းဆက်ပြိုကွဲပြီးမှသာ ကြမ်းတမ်းသောသားရဲရဲ့ပြဿနာက ပိုပြီးပြင်းထန်လာခဲ့သည်။

ဒါပေမဲ့အနည်းငယ်ပိုပြီးပြင်းထန်လာရုံမျှသာဖြစ်သည်။

ကုရွှမ်းက ကြမ်းတမ်းသောသားရဲတွေ၏ ရာနဲ့ချီတိုက်ခိုက်ခံရတာက အနည်းငယ်စိတ်ကူးမယဉ်နိုင်စရာဖြစ်သည်။

ပုံမှန်အားဖြင့် ပြည်နယ်ကိုးခုအတွင်းမှာ ဒီလောက်များပြားတဲ့ကြမ်းတမ်းသောသားရဲတွေ တည်ရှိဖို့မဖြစ်နိုင်ပေ။

ကုရွှမ်းက ရှေးဟောင်းသားရဲတောင်တန်းထဲကို ဝင်ရောက်သွားတာ ဖြစ်နိုင်သည်။

ကုချင်းဖန်က ဒီလိုတွေးလိုက်ပြီး သူ့ရဲ့နဖူးအနည်းငယ် တွန့်သွားခဲ့သည်။

"ရွှမ်းအာ တကယ်ပဲ ရှေးဟောင်းသားရဲတောင်တန်းထဲကို ဝင်သွားတာလား"

ရှေးဟောင်းသားရဲတောင်တန်းက ခန့်မှန်းလို့မရနိုင်ဘဲ လျှို့ဝှက်ချက်တွေအများကြီးကို ဖုံးကွယ်ထားသည်။ ရှေးခေတ်ကတည်းက ဘယ်သူမှ ရှေးဟောင်းသားရဲတောင်တန်းရဲ့အတွင်းပိုင်းမှာ ဘာတွေရှိတယ်ဆိုတာကို တကယ်စူးစမ်းပြီး နားလည်နိုင်ခြင်းမရှိသေးပေ။

ထို့ကြောင့် ရှေးဟောင်းသားရဲတောင်တန်းတည်ရှိမှုကို သိရှိသူတိုင်းက ပေါ့ဆစွာဝင်ရောက်မှာမဟုတ်ပေ။

ဒါပေမဲ့လက်ရှိအခြေအနေအရ ကုရွှမ်းက ရှေးဟောင်းသားရဲတောင်တန်းထဲကို ဝင်ရောက်သွားတာ ဖြစ်နိုင်ခြေအလွန်မြင့်မားတယ်လို့ ထင်ရသည်။

ရှေးဟောင်းသားရဲတောင်တန်းကလွဲလို့ ကုချင်းဖန်ဒီလောက်များပြားတဲ့ကြမ်းတမ်းသောသားရဲတွေကို ခိုလှုံစေနိုင်တဲ့နေရာ တခြားဘယ်နေရာမှမတွေးနိုင်ခဲ့လို့ဖြစ်သည်။

သို့သော်လည် ကုရွှမ်း၏ကျင့်ကြံမှုအောင်မြင်သွားတာကို မြင်လိုက်ရတော့ ကုချင်းဖန်၏မျက်နှာအမူအရာ နည်းနည်းပျော့ပျောင်းသွားခဲ့သည်။

ထို့နောက်တွင် ကုချင်းဖန်က သူ့ရှေ့က ခြံဝင်းကိုကြည့်လိုက်ပြီး "တစ်ယောက်ယောက်ကိုခေါ်လိုက်"လို့ ပြောလိုက်သည်။

စကားပြောလိုက်တာနှင့်တစ်ပြိုင်နက် ဟုန်ယဲ၏ရုပ်သွင်ပေါ်လာခဲ့သည်။

"အရှင် ဘာအမိန့်ရှိပါသလဲ"

"ချက်ချင်း ဝိညာဉ်ခိုးသူကို ဆက်သွယ်လိုက် ပြီးတော့ရွှမ်းအာရဲ့တည်နေရာကိုလည်း စစ်ဆေးလိုက် ဒီကိစ္စကို အမြန် ကိုင်တွယ်ရမယ်"

ကုချင်းဖန်က အေးစက်သည့်အသံနှင့်ညွှန်ကြားလိုက်သည်။

ဒီအရာကိုကြားတော့ ဟုန်ယဲကရိုသေစွာထွက်သွားခဲ့သည်။

သူမထွက်ခွာသွားတာကိုကြည့်ပြီး ကုချင်းဖန်က ခေါင်းကို အနည်းငယ်ခါလိုက်သည် "မင်းတကယ်ပဲ ရှေးဟောင်းသားရဲတောင်တန်းထဲကို မဝင်ခဲ့ပါစေနဲ့လို့ မျှော်လင့်တယ် မဟုတ်ရင်ကိစ္စတွေက တော်တော်လေးခက်ခဲသွားနိုင်တယ်"

ရှေးဟောင်းသားရဲတောင်တန်းက ကျယ်ပြောသည်။

လူတစ်ယောက်ဝင်ရောက်တာက ပင်လယ်ထဲကအပ်ကိုရှာသလိုဖြစ်ပြီး သူတို့ရဲ့တည်နေရာကို ရှာဖွေဖို့ အလွန်ခက်ခဲပါလိမ့်မည်။

လျှို့ဝှက်အစောင့်အင်အားက ခိုင်မာတယ်လို့ မထင်ပါနှင့်။ ဒါပေမဲ့ရှေးဟောင်းသားရဲတောင်တန်း၏ရှေ့မှာတော့ လုံးဝမလုံလောက်ပေ။

ဒီအချက်ကို ကုချင်းဖန်က ကောင်းစွာသိရှိသည်။

ဘာလို့လဲဆိုတော့ သိုင်းသခင်တစ်ဦးတောင် လုံခြုံစွာပြန်လာနိုင်ဖို့ မသေချာသည့် နေရာတစ်ခုက ဘယ်လိုလုပ်ပြီးရိုးရှင်းနိုင်မှာလဲ။

ဒါကြောင့် ကုရွှမ်းက ရှေးဟောင်းသားရဲတောင်တန်းထဲကို တကယ်ဝင်ရောက်ခဲ့ရင် သူ့ကိုရှာဖွေဖို့က လွယ်ကူတဲ့အလုပ်မဟုတ်တော့ပေ။