ဝိညာဉ်သန္ဓေသားအဆင့်ဘိုးဘေး၏ စုဆောင်းမှု၊ အနာဂတ်မဟာမိတ်အဖွဲ့၏ ခေါင်းဆောင်။

မှန်ပေသည်၊ ဆရာသခင် မက်မွန်ပွင့်သည် မယုံနိုင်လောက်အောင် လှပရုံသာမက၊ သူမ၏ ကျင့်ကြံမှုသည်လည်း ခန့်မှန်းရ ခက်ခဲလောက်အောင် မြင့်မားလှသော အစွမ်းထက် ဝိညာဉ်သန္ဓေသားအဆင့် ဘိုးဘေးတစ်ပါးလည်း ဖြစ်သည်။

သူမသည် သူမ၏ ကိုယ်ပိုင်အရှိန်အဝါကို ဖိနှိပ်ထားရန် ပြင်းပြင်းထန်ထန် ကြိုးစားထားသော်လည်း၊ အနည်းငယ် ထုတ်လွှတ်လိုက်သော သူမ၏ ဝိညာဉ်သန္ဓေသားအဆင့် နယ်ပယ်သည် ရှိနေသော ကျင့်ကြံသူအားလုံးအပေါ် ကြီးမားသော တောင်ကြီးတစ်လုံး လိမ့်ဆင်းလာသကဲ့သို့ အသက်ရှူကျပ်စေသော ဖိအားတစ်ခု သက်ရောက်စေခဲ့သည်။

ရိုးရှင်းသော လှုပ်ရှားမှု တစ်ခုတည်းဖြင့် ကောင်းကင်နှင့် မြေကြီး ကွဲအက်သွားနိုင်သကဲ့သို့ ခံစားရပြီး၊ နတ်ဘုရားတစ်ပါးကဲ့သို့ပင် သူမ၏ တည်ရှိမှုသည် စိတ်ကူးနိုင်စွမ်းထက် ကျော်လွန်နေသည်။

ရွှေအမြုတေ ဆရာသခင်တစ်ဦးသည် ကျွန်းတစ်ကျွန်းကို အုပ်စိုးနိုင်ပါက၊ ဝိညာဉ်သန္ဓေသားအဆင့် အကြီးအကဲတစ်ဦးသည် ပင်လယ်ပြင်ဧရိယာတစ်ခုလုံးကို အုပ်စိုးနိုင်ပြီး၊ အင်အားစုတစ်ခု၏ အုပ်ချုပ်မှုကို နှစ်တစ်ထောင်တိုင်တိုင် ထိန်းသိမ်းထားနိုင်သည်။ သူမ၏ ဟန့်တားနိုင်စွမ်း အာဏာကို စိတ်ကူး၍ပင် ကြည့်နိုင်ပေသည်။

တစ်နည်းဆိုရလျှင်၊ သူမသည် လက်တွေ့ကမ္ဘာရှိ အင်မော်တယ်တစ်ပါးဟုပင် ဆိုရနိုင်ပေသည်။

"မဆိုးဘူး... မင်းတို့က ငါတို့ ဝူကျိမဟာမိတ်အဖွဲ့ကို ဝင်ချင်တဲ့ ရွှေအမြုတေ အမျိုးသမီး ကျင့်ကြံသူတွေလား.."

ဆရာသခင် မက်မွန်ပွင့်၏ လှပသော မျက်လုံးများက လန်ယွဲ့ရှီ၊ လင်းယာကျူနှင့် ရှန်ပိချန်တို့အပေါ်သို့ ကျရောက်သွားသည်။ သူမ မြင်လိုက်ရသော မြင်ကွင်းကို အတော်လေး ကျေနပ်သွားသည်။

အဘယ်ကြောင့်ဆိုသော် သူမသည် အလှအပကို မြတ်နိုးသူ တစ်ဦး ဖြစ်သဖြင့်၊ သူမ စုဆောင်းသော အမျိုးသမီးများကို လှပစေချင်သည်မှာ သဘာဝအတိုင်းပင် ဖြစ်၏။

တစ်ချက်ကြည့်လိုက်ရုံဖြင့်၊ ဤရွှေအမြုတေ အမျိုးသမီး ကျင့်ကြံသူ သုံးဦးသည် အမှန်တကယ်ပင် ထူးခြားပြီး၊ ပြီးပြည့်စုံသော ခန္ဓာကိုယ် အချိုးအစားများ ရှိကြကာ၊ သူတို့၏ အလှတရားသည် သူမနှင့် လုံးဝ ယှဉ်နိုင်စွမ်း ရှိသည်။

သူတို့သည် သူမ၏ စိတ်ကြိုက်ရွေးချယ်မှုများနှင့် ပြည့်စုံစွာ ကိုက်ညီနေသည်။

"ဟုတ်ပါတယ်.. ဆရာသခင်.."

လန်ယွဲ့ရှီ၊ လင်းယာကျူနှင့် ရှန်ပိချန်တို့အားလုံး ရိုသေလေးစားစွာဖြင့် ပြန်လည် ဖြေကြားလိုက်ကြသည်။ မည်သို့ပင်ဆိုစေကာမူ၊ တစ်ဖက်လူမှာ ဝိညာဉ်သန္ဓေသားအဆင့် ဘိုးဘေးတစ်ပါး ဖြစ်ပြီး၊ အင်မော်တယ်မြူခိုးကျွန်းတွင် သူမတို့ တွေ့ဆုံခွင့်မရှိခဲ့သော ပုဂ္ဂိုလ်မျိုးပင် ဖြစ်သည် မဟုတ်လော။

ဝူကျိမဟာမိတ်အဖွဲ့သို့ ရောက်ရောက်ချင်း ဤမျှ အစွမ်းထက်သော ပုဂ္ဂိုလ်မျိုးနှင့် တွေ့ဆုံရလိမ့်မည်ဟု မမျှော်လင့်ထားခဲ့ပေ။

သူမတို့ ကိုယ်တိုင်က ရွှေအမြုတေ ဆရာသခင်များ ဖြစ်နေသည့်တိုင်၊ သူမတို့ ဖိအား တစ်ခုကို ခံစားနေရဆဲ ဖြစ်သည်။

"မင်းတို့ ငါ့ရဲ့မက်မွန်ပွင့်ကျွန်းကို ဝင်ချင်ကြလား.."

ဆရာသခင် မက်မွန်ပွင့်က မေးမြန်းလိုက်သည်။

မက်မွန်ပွင့်ကျွန်းဆိုသည်မှာ သေချာပေါက် သူမ ထိန်းချုပ်ထားသော ကျွန်းတစ်ကျွန်း ဖြစ်ပြီး၊ စတုတ္တအဆင့် ဝိညာဉ်ကြောရှိကာ ဝူကျိမဟာမိတ်အဖွဲ့မှ ထိန်းချုပ်ထားသော အရေးကြီးဆုံး ကျွန်းများထဲမှ တစ်ကျွန်းဖြစ်ပြီး အရင်းအမြစ်များ ကြွယ်ဝသည်။

သူမ တည်ထောင်ခဲ့သော အင်အားစုသည် အခြေခံအားဖြင့် မက်မွန်ပွင့်ကျွန်းပေါ်တွင် အခြေစိုက်သည်။

မှန်ပေသည်၊ ၎င်းက အဓိကမဟုတ်ချေ။

အရေးကြီးဆုံး အချက်မှာ မက်မွန်ပွင့်ကျွန်းသို့ ဝင်ရောက်ရန် သဘောတူလိုက်သည်နှင့်၊ သူတို့သည် အခြေခံအားဖြင့် ဝူကျိမဟာမိတ်အဖွဲ့၏ အသည်းနှလုံး အမာခံအဖွဲ့ထဲသို့ ဝင်ရောက်သွားပြီး အဓိက အဖွဲ့ဝင်များ ဖြစ်လာကြပေလိမ့်မည်။ သူတို့ ရရှိမည့် အကျိုးကျေးဇူးများမှာ စိတ်ကူးမယဉ်နိုင်အောင် များပြားလှသည်။

သို့သော် ထိုသို့ လုပ်ဆောင်ခြင်းဖြင့်၊ သူတို့သည် ကိုယ်ပိုင်အုပ်ချုပ်ခွင့်ကို ဆုံးရှုံးရမည် ဖြစ်ပြီး သူတို့၏ ကိုယ်ပိုင် အင်အားစုကို ပိုင်ဆိုင်နိုင်တော့မည် မဟုတ်ပေ။

"ကျွန်မတို့သာ မက်မွန်ပွင့်ကျွန်းကို ဝင်လိုက်ရင်.. ကျွန်မတို့နဲ့အတူ လိုက်လာတဲ့ လူတွေကို ဘယ်လို လုပ်ရမလဲ…"

လန်ယွဲ့ရှီက မေးလိုက်သည်။

"အင်း... ဒါပေါ့.. မင်းတို့ သူတို့ကို ဝူကျိမဟာမိတ်အဖွဲ့ လက်ထဲ အပ်ခဲ့လိုက်ပေါ့…"

"မင်းတို့ကလွဲရင်.. ကြုံရာကျပန်း လူတွေက မက်မွန်ပွင့်ကျွန်းပေါ်ကို ထုံးစံအတိုင်း ခြေချခွင့် မရှိဘူး.."

ဆရာသခင် မက်မွန်ပွင့်က အမှန်အတိုင်း ပြန်ဖြေလိုက်သည်။

မည်သို့ပင်ဖြစ်စေ၊ မက်မွန်ပွင့်ကျွန်းသည် သူမ၏ နေအိမ် ဖြစ်ရာ၊ ဆူညံသော လူအုပ်စုတစ်စုကို သူမ၏ ကျွန်းပေါ်သို့ လာခွင့်ပြုမည် မဟုတ်သည်မှာ သဘာဝကျပါသည်။

မက်မွန်ပွင့်ကျွန်းသို့ ဝင်ရောက်နိုင်သော ကျင့်ကြံသူများသည် ယေဘုယျအားဖြင့် သူမနှင့် ရင်းနှီးသော ယုံကြည်ရသည့် လက်အောက်ငယ်သားများသာ ဖြစ်ကြသည်။

"ဒီလိုဆိုရင်တော့... ကျွန်မတို့ တကယ်ကို တောင်းပန်ပါတယ်.."

"ကျွန်မတို့က သက်ဆိုင်ရာဂိုဏ်းအသီးသီးရဲ့ ဂိုဏ်းချုပ်တွေပါ.. ဂိုဏ်းရဲ့ အမွေအနှစ်တွေကို သယ်ဆောင်ထားရတာဖြစ်လို့ ဒီဂိုဏ်းသား တပည့်တွေကို လွယ်လွယ် စွန့်ပစ်လို့ မရပါဘူး.. စေတနာကို ငြင်းပယ်လိုက်ရတဲ့အတွက် တောင်းပန်ရုံပဲ ရှိတော့တယ်…"

လန်ယွဲ့ရှီက လေးနက်စွာ ပြောလိုက်သည်။

"ကျွန်မတို့လည်း အတူတူပါပဲ…"

လင်းယာကျူနှင့် ရှန်ပိချန်တို့လည်း ခေါင်းညိတ်လိုက်ကြသည်။ သူတို့လည်း သူတို့၏ ကိုယ်ပိုင် ဂိုဏ်းများကို စွန့်ပစ်လိုခြင်း မရှိကြသည်မှာ သဘာဝကျပါသည်။

မည်သို့ပင်ဆိုစေကာမူ၊ ဤအကြီးအကဲများနှင့် တပည့်များသည် ဝူကျိမဟာမိတ်အဖွဲ့ကို ဝင်ရောက်ရန်အတွက် သူမတို့နောက် မိုင်ထောင်ပေါင်းများစွာ လိုက်ပါလာခဲ့ကြသည်။ ၎င်းတို့အား ဒီအတိုင်း စွန့်ပစ်ထားခဲ့၍ မဖြစ်နိုင်ပေ။ သူမတို့သည် ထိုသို့သော လူစားမျိုး မဟုတ်ကြချေ။

ရှိနေကြသော ဝူကျိမဟာမိတ်အဖွဲ့၏ ရွှေအမြုတေ စီမံခန့်ခွဲရေးမှုးများသည် လန်ယွဲ့ရှီနှင့် အခြားသူများကို မယုံနိုင်သလို မျက်လုံးအပြူးသားဖြင့် ကြည့်နေကြသည်။ ဤရွှေအမြုတေ အမျိုးသမီး ကျင့်ကြံသူများ ဤကဲ့သို့ ရွေးချယ်လိမ့်မည်ဟု သူတို့ မမျှော်လင့်ထားခဲ့ကြပေ။

သိထားရမည်မှာ၊ ဆရာသခင် မက်မွန်ပွင့်သည် ဝိညာဉ်သန္ဓေသားအဆင့် ဘိုးဘေးတစ်ပါး ဖြစ်ပြီး၊ ဝူကျိမဟာမိတ်အဖွဲ့၏ အနာဂတ်ခေါင်းဆောင် ဖြစ်သည်။

အကယ်၍ သူတို့သာ ဆရာသခင် မက်မွန်ပွင့်နောက်သို့ လိုက်ပါခဲ့လျှင်၊ အနာဂတ်တွင် ဝိညာဉ်သန္ဓေသားအဆင့် ဖွဲ့စည်းရန် အခွင့်အရေးပင် ရရှိကောင်း ရရှိပေလိမ့်မည်။

သို့သော် ကိုယ့်ကိုယ်ကိုယ်သာ အားကိုးပါက၊ ဝိညာဉ်သန္ဓေသားအဆင့် ဖွဲ့စည်းရန် နည်းလမ်း ရှိမည် မဟုတ်ပေ။

ဝိညာဉ်သန္ဓေသားအဆင့် ဖွဲ့စည်းရန် လိုအပ်သော ပစ္စည်းများကို ရယူရန် ကြိုးစားခြင်းသက်သက်ကပင် ခက်ခဲသော အလုပ်တစ်ခု ဖြစ်သည်။

ဤငြင်းပယ်မှုသည် ဝိညာဉ်သန္ဓေသားအဆင့် ဖွဲ့စည်းရန်ပစ္စည်းများ ရယူနိုင်မည့်အခွင့်အရေးကို စွန့်လွှတ်လိုက်ခြင်းနှင့် ညီမျှသည်ဟု ဆိုနိုင်သည်။

လက်လွတ်ဆုံးရှုံးလိုက်ရသည့် အခွင့်အရေးသည် မည်မျှကြီးမားသည်အား ၎င်းတို့ အမှန်တကယ် သိရှိပါ၏လော။

"ကောင်းပြီလေ... မင်းတို့က သစ္စာရှိပြီး ဖြောင့်မတ်ကြတာပဲ.."

"ဒီလိုဆိုရင်လည်း... အနာဂတ်မှာ မင်းတို့ စိတ်ပြောင်းသွားရင် ငါ့ကို လာရှာလို့ ရတယ်…"

ဤစကားကို ကြားလိုက်ရသောအခါ ဆရာသခင် မက်မွန်ပွင့် အနည်းငယ် ပြုံးလိုက်ပြီး၊ ဒေါသထွက်ပုံ မရပေ။

ဆန့်ကျင်ဘက်အနေဖြင့်၊ သူမသည် ဤအမျိုးသမီးများကို ပို၍ပင် လေးစားသွားသည်။ သစ္စာရှိပြီး ဖြောင့်မတ်သော သူများသည် အမြဲတမ်း လေးစားထိုက်သူများ ဖြစ်ကြသည်။

ထို့အပြင် သူမသည် ငြင်းပယ်ခံရ၍ ဒေါသတကြီး ဖြစ်တတ်သော အမျိုးသမီးမျိုး မဟုတ်ချေ။

မှန်ပေသည်၊ တစ်ကြိမ် ငြင်းပယ်ခံရပြီးနောက်၊ သူမ နောက်ထပ် အခွင့်အရေး ပေးတော့မည် မဟုတ်ပေ။

မည်သို့ပင်ဆိုစေကာမူ၊ အခွင့်အရေးဆိုသည်မှာ တစ်ခါသာ လာသည်မဟုတ်လော။ လွဲချော်သွားပါက နောက်တစ်ကြိမ်ဟူ၍ မရှိပေ။

ဝှစ်…။

သူမ စကားဆုံးသည်နှင့်တပြိုင်နက်၊ ဆရာသခင် မက်မွန်ပွင့်၏ ပုံရိပ်သည် လက်ခနဲ ဖြစ်သွားပြီး၊ ရှိနေသော ရွှေအမြုတေ စီမံခန့်ခွဲရေးမှုးများကိုပင် ယဉ်ကျေးမှုအရ နှုတ်မဆက်ဘဲ ထိုနေရာမှ ချက်ချင်း ထွက်ခွာသွားလေသည်။ သူမသည် သူမ၏ ကိုယ်ပိုင် နည်းလမ်းအတိုင်းသာ လုပ်ဆောင်လေ့ ရှိသည်။

ဆရာသခင် မက်မွန်ပွင့် ထွက်ခွာသွားသည်ကို မြင်လိုက်ရသောအခါ ရွှေအမြုတေ စီမံခန့်ခွဲရေးမှုးများသည်လည်း သက်ပြင်းချလိုက်ကြသည်။ သူတို့၏ မျက်နှာအမူအရာများ သိသိသာသာ ပြေလျော့သွားကြသည်။

မည်သို့ပင်ဆိုစေကာမူ၊ ဝိညာဉ်သန္ဓေသားအဆင့် ဘိုးဘေး၏ ဖိအားသည် ကြီးမားလွန်းလှသည်။ တစ်ဖက်လူတွင် မကောင်းသော ရည်ရွယ်ချက် နည်းပါးလျှင်ပင်၊ သူတို့ အသက်ရှူကျပ်သလို ခံစားနေရဆဲ ဖြစ်သည်။

၎င်းသည် ကျားတစ်ကောင်၏ ဘေးတွင် ယုန်တစ်ကောင် နေနေရသကဲ့သို့ပင် ဖြစ်သည်။ ဗိုက်ဝနေမှန်း သိသည့်တိုင်၊ ကျားက ရုတ်တရက် ရူးသွပ်သွားပြီး သူတို့ကို သတ်ဖြတ်ပစ်မည်လားအား မည်သူမျှ မသိနိုင်ချေ။

အကောင်းဆုံးနည်းလမ်းသည် သဘာဝအတိုင်း ကျားနှင့် ဝေးဝေးနေခြင်းသာ ဖြစ်သည်။

"နှမြောစရာပဲ…"

ကျိုးစွေ့သည် ဆရာသခင် မက်မွန်ပွင့် ထွက်ခွာသွားသည့် ဆွဲဆောင်မှုရှိသော ပုံရိပ်ကို ကြည့်ရင်း အနည်းငယ် နောင်တရမိသည်။

သူသာ ဆရာသခင် မက်မွန်ပွင့်ကို လက်ထပ်နိုင်ခဲ့ပါက၊ ဝူကျိမဟာမိတ်အဖွဲ့အား လက်ခုပ်ထဲကရေအဖြစ် သဘောထားနိုင်မည် ဖြစ်သည်။

ဝိညာဉ်သန္ဓေသားအဆင့် ဘိုးဘေးတစ်ပါးသည်သာ အကာအကွယ်ပေးထားပါက ငရဲတွင်ဖြစ်စေ၊ နတ်ပြည်တွင်ဖြစ်စေ မည်သူမျှ သူ့အား ထိပါးရဲမည် မဟုတ်ပေ။

သို့သော်၊ သူ၏ 'ချစ်ခြင်းမေတ္တာကူ'သည် အဆင့်သုံးတွင်သာ ရှိနေသေးသည်။ ယင်းသည် ဝိညာဉ်သန္ဓေသားအဆင့် ဘိုးဘေးတစ်ပါးအား ကိုင်တွယ်နိုင်ရန် လုံလောက်မည် မဟုတ်ပေ။

ထိုအခြေအနေတွင် လောလောဆယ် လက်လျှော့ရုံသာ တတ်နိုင်သည်။

"ခင်ဗျားတို့က ဆရာသခင်ကို ငြင်းပယ်ဖို့ ဆန္ဒရှိလိမ့်မယ်လို့ ကျွန်တော် မထင်ထားခဲ့ဘူး.. ခင်ဗျားတို့ ဘယ်လောက် ကြီးမားတဲ့ အခွင့်အရေးကို လက်လွှတ်လိုက်သလဲဆိုတာ သိရဲ့လား.."

စီမံခန့်ခွဲရေးမှုး ဖန်ဟောင်က နောင်တရစွာဖြင့် ပြောလိုက်သည်။

ဤရွှေအမြုတေ အမျိုးသမီး ကျင့်ကြံသူများသည် ဆရာသခင် မက်မွန်ပွင့်၏ ကမ်းလှမ်းမှုကို ငြင်းပယ်လိမ့်မည်ဟု သူ မထင်ထားခဲ့ပေ။ အကယ်၍ အခြား ရွှေအမြုတေ ဆရာသခင်များသာ ဖြစ်ပါက၊ ကြာမြင့်စွာကတည်းက သဘောတူပြီးလောက်ပြီ ဖြစ်သည်။

"လူတိုင်းမှာ ကိုယ်ပိုင်ရည်မှန်းချက် ရှိကြတာပဲလေ…"

လန်ယွဲ့ရှီက ရှင်းပြရန် ရည်ရွယ်ချက်မရှိဘဲ အနည်းငယ် ပြုံးလိုက်သည်။

"မှန်ပါတယ်.. လူတိုင်းမှာ ကိုယ်ပိုင်ရည်မှန်းချက် ရှိကြတာပဲ.."

"ခင်ဗျားတို့က ဆရာသခင်ရဲ့ ကမ်းလှမ်းမှုကို ငြင်းပယ်လိုက်ပြီ ဆိုတော့… ခင်ဗျားတို့က ဝူကျိမဟာမိတ်အဖွဲ့ရဲ့ အဓိကအဖွဲ့ဝင်တွေ ဖြစ်လာနိုင်မှာ မဟုတ်တော့ဘူး…"

"ခင်ဗျားတို့က ပြင်ပအဖွဲ့ဝင်တွေပဲ ဖြစ်လာနိုင်တော့မယ်…"

"ဒါပေါ့.. ဒီလိုဆိုပေမယ့်လည်း.. ခင်ဗျားတို့မှာ ဝူကျိမဟာမိတ်အဖွဲ့ထဲက ခင်ဗျားတို့ရဲ့ အနာဂတ် အခြေစိုက်စခန်းအဖြစ် ကျွန်းသုံးကျွန်းကို ရွေးချယ်ပိုင်ခွင့် ရှိပါသေးတယ်…"

"ခင်ဗျားတို့ ဝူကျိမဟာမိတ်အဖွဲ့ကို သစ္စာမဖောက်သရွေ့.. ဒီကျွန်းတွေက အနာဂတ်မှာ ခင်ဗျားတို့ရဲ့ ဌာနချုပ်တွေ ဖြစ်လာလိမ့်မယ်.. နှစ်စဉ် စီမံခန့်ခွဲကြေး အနည်းငယ် ပေးဆောင်နေသမျှ ကာလပတ်လုံး.. ခင်ဗျားတို့ အဲ့ဒီမှာ ထာဝရ နေထိုင်နိုင်ပါတယ်…"

စီမံခန့်ခွဲရေးမှုး ဖန်ဟောင်က ဝူကျိမဟာမိတ်အဖွဲ့သို့ ဝင်ရောက်ခြင်း၏ များပြားလှသော အကျိုးကျေးဇူးများကို အကြမ်းဖျင်း ပြောပြလိုက်သည်။

အကြီးမားဆုံး အကျိုးကျေးဇူးမှာ သူတို့သည် တတိယအဆင့် ဝိညာဉ်ကြောရှိသော ကျွန်းတစ်ကျွန်းကို အခမဲ့ ရရှိနိုင်ခြင်း ဖြစ်သည်။

အကယ်၍ သူတို့သည် ဝူကျိမဟာမိတ်အဖွဲ့၏ အဓိက အဖွဲ့ဝင်များ၊ သို့မဟုတ် တရားဝင်မျိုးဆက်များ ဖြစ်ပါက၊ သူတို့သည် တတိယအဆင့် အဆင့်မြင့် ဝိညာဉ်ကြောရှိသော ကျွန်းတစ်ကျွန်းကို အလိုလို ပိုင်ဆိုင်နိုင်ပေလိမ့်မည်။

သို့သော် အကယ်၍ သူတို့သည် အာဏာအနည်းငယ်နှင့် တာဝန်အနည်းငယ်သာ ရှိသော ပြင်ပ အဖွဲ့ဝင်များ ဖြစ်ပါက၊ သူတို့သည် ကျန်ရစ်နေသော ကျွန်းများထဲမှသာ ရွေးချယ်နိုင်မည် ဖြစ်ပြီး၊ အများစုမှာ တတိယအဆင့် အဆင့်နိမ့် ဝိညာဉ်ကြောသာ ရှိကြသည်။

ရွှေအမြုတေ ဆရာသခင်တစ်ဦးအတွက်၊ ၎င်းသည် မဆိုးဘူး ဆိုရုံလောက်သာ ရှိမည်ဖြစ်ပြီး၊ ပတ်ဝန်းကျင်အနေအထားမှာ တတိယအဆင့် အဆင့်မြင့် ဝိညာဉ်ကြောတစ်ခုလောက် သေချာပေါက် ကောင်းမွန်မည် မဟုတ်ပေ။