နဂါးအရိုး ဖွဲ့စည်းခြင်း၊ 'နဂါးဆင်ကူ'၏ ဒုတိယအကြိမ် ဆင့်ကဲပြောင်းလဲမှု(၂)။

"ဒါ..."

ဤစကားကို ကြားပြီးနောက် လန်ယွဲ့ရှီ ဆွံ့အသွားသော်လည်း၊ အမှန်တကယ်ပင် ထိုအတိုင်း ဖြစ်ကြောင်း ဝန်ခံလိုက်ရသည်။

အကယ်၍ အင်မော်တယ်မြူခိုးကျွန်းပေါ်တွင်သာ ဆိုလျှင် ရွှေအမြုတေ ဆရာသခင်သည် ပြိုင်ဘက်ကင်း ဖြစ်ပြီး၊ ကျင့်ကြံသူ အားလုံးကို ချေမှုန်းလျက် ဂိုဏ်းတစ်ခုကို သဘာဝအတိုင်း တည်ထောင်နိုင်ပေလိမ့်မည်။

ရွှေအမြုတေ ဆရာသခင်တစ်ဦးသည် နှစ်ပေါင်းငါးရာတိုင် ဂိုဏ်းတစ်ခုကို တည်ထောင်နိုင်ပြီး ကျယ်ပြန့်သော နယ်မြေတစ်ခုကို လွှမ်းမိုးထားနိုင်သည်။

အခြေတည်အဆင့် ကျင့်ကြံသူတစ်ဦး ဂိုဏ်းတစ်ခု တည်ထောင်သည်ကို မြင်တွေ့ရမည် မဟုတ်ပေ။

မှန်ပေသည်၊ သေမျိုးကမ္ဘာကဲ့သို့သော အချို့သော အားနည်းသည့် နေရာများတွင် အခြေတည်အဆင့် ကျင့်ကြံသူတစ်ဦးသည် ဂိုဏ်းတစ်ခု တည်ထောင်နိုင်ကောင်း တည်ထောင်နိုင်ပေလိမ့်မည်။

အတိုချုပ်ပြောရလျှင်၊ ဤပင်လယ်ပြင်များတွင် ရွှေအမြုတေ ဆရာသခင်များ၏ အာဏာသည် ဂိုဏ်းတစ်ခု တည်ထောင်ရန် လုံလောက်မှု မရှိပေ။

"ဟုတ်ပါတယ်.. ဒီခြိမ်းခြောက်မှုတွေအပြင်..."

"ဒီပင်လယ်ပြင်မှာ အကြီးမားဆုံး ခြိမ်းခြောက်မှုက ရေနက်ပိုင်းက သားရဲတွေဆီက လာတာပဲ…"

"ဒီသားရဲတွေရဲ့ အရေအတွက်က မြူခိုးတိမ်တိုက်တောင်တန်းထက် အဆပေါင်းများစွာ ပိုများတယ်…"

"သားရဲလှိုင်းတစ်ခု ဖွဲ့စည်းလိုက်တာနဲ့.. ကျွန်းတွေကို ကြီးမားတဲ့ ဆုံးရှုံးမှုတွေ ဖြစ်စေနိုင်ပြီး မရေမတွက်နိုင်တဲ့ သေကျေပျက်စီးမှုတွေကို ဖြစ်ပေါ်စေနိုင်တယ်.."

"ဒါပေမဲ့ သားရဲလှိုင်းက ဆယ်စုနှစ် အနည်းငယ်မှာ တစ်ကြိမ်လောက်ပဲ ပေါ်လာတတ်တယ်.. ဒါကြောင့် ငါတို့ လောလောဆယ် အဲ့တာအတွက် စိတ်ပူစရာ မလိုသေးပါဘူး.."

လန်ယွဲ့ရှီက ဆက်ပြောသည်။

သူမသည် အင်မော်တယ်ရှားဂိုဏ်း အနာဂတ်တွင် ရင်ဆိုင်ရနိုင်သော ခြိမ်းခြောက်မှုများကို ရိုးရှင်းစွာ အကြမ်းဖျင်း ဖော်ပြလိုက်သည်။

"ဒီလိုဆိုရင်တော့ အဆင်ပြေလောက်ပါတယ်.."

"ရွှေအမြုတေ ဆရာသခင်တချို့ပဲ ရှိတာလေ.."

"ယုမိသားစု တစ်ခုလုံး တိုက်ခိုက်လာရင်တောင်.. ငါတို့ အင်မော်တယ်ရှားဂိုဏ်းရဲ့ တတိယအဆင့် ထိပ်တန်း အစီအရင်က အလွယ်တကူ ခုခံနိုင်တယ်.."

"ဓားပြအုပ်စု တစ်စု တိုက်ခိုက်လာရင်.. ဒါမှမဟုတ် သားရဲလှိုင်းရောက်လာရင်တောင်.. ငါတို့ ဘေးကင်းမှာပါ.."

ကျိုးစွေ့ ချက်ချင်းပင် စိတ်သက်သာရာ ရသွားသည်။

သူသည် သူ၏ တတိယအဆင့် ထိပ်တန်းအစီအရင်ကို အလွန် ယုံကြည်မှု ရှိသည်။ အထူးသဖြင့်၊ 'အစီအရင်နှလုံးသားကူ'၏ မြှင့်တင်ပေးမှုဖြင့် သူသည် တတိယအဆင့် အစီအရင်၏ စွမ်းအားကို ပြီးပြည့်စုံစွာ ထုတ်သုံးနိုင်သည်။

ဝိညာဉ်သန္ဓေသားအဆင့် အစောပိုင်း ကျင့်ကြံသူတစ်ဦး၏ တိုက်ခိုက်ခြင်းကို ခံရလျှင်ပင် သူတို့ ခုခံနိုင်စွမ်း ရှိသည်။

ထို့ကြောင့် ရွှေအမြုတေ ကျင့်ကြံသူများကို ထည့်ပြောနေစရာပင် မလိုတော့ပေ။

မည်သည့် ရွှေအမြုတေ ဆရာသခင်မျှ တတိယအဆင့် အစီအရင်ပညာရှင်တစ်ဦးကို တတိယအဆင့် အစီအရင်အတွင်းတွင် ထိပ်တိုက် ရင်ဆိုင်ရဲမည် မဟုတ်ဟု ဆိုနိုင်သည်။

သံသယဖြစ်ဖွယ်မလို၊ ဤသည်မှာ သေလမ်းရှာခြင်းသာ ဖြစ်ပေလိမ့်မည်။

"ယောက်ျား... ကျွန်မ အဆိုပြုချင်တာက ချင်မုဂိုဏ်းနဲ့ တန်တိန်ဂိုဏ်းတို့နဲ့ ပူးပေါင်းပြီး ဈေးတစ်ခု ထူထောင်ချင်တယ်.."

"ဒါကို အင်မော်တယ်ရှားမြို့တော်လို့ နာမည်ပေးပြီး ငါတို့ရဲ့ ရေကြယ်ကျွန်းပေါ်မှာ တည်လို့ ရတယ်…"

"ဒီပင်လယ်ပြင်မှာ ရှိတဲ့ တစ်ကိုယ်တော်ကျင့်ကြံသူတွေကို ကုန်သွယ်မှု ပြုလုပ်ဖို့ ဆွဲဆောင်ဖို့လေ.."

"ဘာပဲဖြစ်ဖြစ်.. ကြယ်သုံးပွင့် ကျွန်းစုမှာ အရင်းအမြစ်တွေ ရှားပါးတယ်.. သတ္တုတွင်းတွေလည်း မရှိသလောက်ပဲ…"

"ငါတို့ အင်မော်တယ်မြူခိုးကျွန်းကနေ အရင်းအမြစ်တွေ အများကြီး ယူလာခဲ့ရင်တောင်.. ငါတို့ အကုန် ထိုင်စားနေလို့တော့ မရဘူးလေ.."

"ဝိညာဉ်ကျောက်တုံးတွေ အများကြီး ရဖို့အတွက် ငါတို့ ဈေးတစ်ခု တည်ထောင်သင့်တယ်.."

လန်ယွဲ့ရှီက သူမ၏ အကြံပြုချက်ကို ကမ်းလှမ်းလိုက်သည်။

"ပြဿနာ မရှိဘူး… မင်း သဘောအတိုင်း စီစဉ်လိုက်ပါ.."

ကျိုးစွေ့ ခေါင်းညိတ်လိုက်သည်။

သူ့အနေဖြင့် ဤကိစ္စနှင့် ပတ်သက်ပြီး ပြဿနာ မရှိပေ။ မည်သို့ပင်ဖြစ်စေ၊ သူ့တွင် စီးပွားရေး လုပ်ရန် ပါရမီ မရှိပေ။ ကျွမ်းကျင်သူများကိုသာ လွှဲအပ်ထားလိုက်မည် ဖြစ်ပြီး၊ သူ၏ အဓိက တာဝန်မှာ ကျင့်ကြံခြင်းသာ ဖြစ်သည်။

အကောင်းဆုံးမှာ ရွှေအမြုတေ ဆရာသခင်တစ်ဦး အမြန်ဆုံး ဖြစ်လာပြီး၊ ဂိုဏ်းကြီးသုံးခု၏ လုံခြုံရေးကို အာမခံပေးနိုင်ရန် ဖြစ်သည်။

…

ရက်အနည်းငယ်ကြာပြီးနောက်...။

အင်မော်တယ်ရှားဂိုဏ်း၏ ကိစ္စရပ်များသည် ကောင်းမွန်စွာ လည်ပတ်နေပြီး၊ လူအများက တာဝန်အသီးသီးကို ကိုင်တွယ်ဆောင်ရွက်နေကြသဖြင့် ကျိုးစွေ့ မှာ ထိုတာဝန်များမှ ကင်းလွတ်နေသည်။

တိတ်ဆိတ်သော အခန်းတစ်ခုအတွင်း...။

ကျိုးစွေ့ သည် ကြမ်းပြင်ပေါ်တွင် တင်ပျဉ်ခွေ ထိုင်နေပြီး ကူနတ်ဘုရားကျင့်စဉ်ကို လည်ပတ်နေသည်။ သဘာဝစိတ်ဝိညာဉ်စွမ်းအင်များသည် ပတ်ဝန်းကျင်အရပ်ရပ်မှ သူ့ခန္ဓာကိုယ်ထဲသို့ ဝင်ရောက်လာပြီး၊ ထို့နောက် မှော်စွမ်းအားအရည်စက်များအဖြစ် ပြောင်းလဲသွားကြသည်။

သူ၏ ဒန်တျန် ချီပင်လယ်အနက်ပိုင်းရှိ မှော်စွမ်းအားအရည်များသည်လည်း ဖြည်းညှင်းစွာ တိုးပွားလာနေသည်။

"ဟူး.."

ဤအခိုက်အတန့်တွင် ကျိုးစွေ့ မျက်လုံးများ ဖွင့်လိုက်သည်။ လည်ပတ်မှုစက်ဝန်း (၁၀၈)ကြိမ် ပြီးမြောက်ပြီးနောက်၊ သူ နောက်ဆုံးတွင် ကျင့်ကြံခြင်း အစီအစဉ်ကို အဆုံးသတ်လိုက်သည်။

တတိယအဆင့် အဆင့်မြင့် ဝိညာဉ်ကြောအတွင်း ကျင့်ကြံရခြင်းသည် အမှန်တကယ် ပျော်စရာကောင်းသည်ဟု ဆိုရပေမည်။

လွန်ခဲ့သော ငါးနှစ်တာ ကာလအတွင်း သူသည် လှေပျံပေါ်တွင်သာ ရှိနေခဲ့ပြီး၊ ဝိညာဉ်ကျောက်တုံးများကို အသုံးပြု၍သာ ကျင့်ကြံနိုင်ခဲ့သည်။

ဤအချက်က သူ၏ ဝိညာဉ်ကျောက်တုံးများကို အလွန်တရာ လျင်မြန်စွာ ကုန်ဆုံးစေခဲ့သည်။

တစ်ချိန်တည်းမှာပင် သူသည် ယခုကဲ့သို့ စွမ်းအင်များကို လွတ်လပ်စွာ စုပ်ယူခွင့် မရခဲ့ချေ။

ယခု သူသည် တတိယအဆင့် ဝိညာဉ်ကြောရှိသော နေရာသို့ ရောက်ရှိနေပြီ ဖြစ်သဖြင့်၊ ၎င်း၏ စွမ်းအင်များကို လွတ်လပ်စွာ စုပ်ယူနိုင်ပြီ ဖြစ်သည်။

သူ့ခန္ဓာကိုယ်အတွင်းရှိ မှော်စွမ်းအားသည်လည်း မယုံနိုင်လောက်အောင် လျင်မြန်စွာ ကြီးထွားလာခဲ့သည်။

"အမြုတေ ဖွဲ့စည်းခြင်း အောင်မြင်ဖို့ဆိုရင် အဆင့်သုံးဆင့်ကို ဖြတ်ကျော်ဖို့ လိုအပ်သေးတယ်.."

"ငါ့ရဲ့ နတ်ဘုရားအာရုံက အခု ရွှေအမြုတေ နှောင်းပိုင်းအဆင့်နဲ့ ယှဉ်လို့ရနေပြီဆိုတော့.. နတ်ဘုရားအာရုံ အဆင့်ကို ဖြတ်ကျော်နိုင်မှာ သံသယ ဖြစ်စရာ မရှိဘူး.."

"ငါ့ရဲ့ နတ်ဘုရားအာရုံသာ အဆင့်မဖြတ်ကျော်နိုင်ရင်.. ဘယ်သူမှ ဖြတ်ကျော်နိုင်မှာ မဟုတ်ဘူး…"

"မှော်စွမ်းအားအဆင့်နဲ့ ပတ်သက်ရင်လည်း ပြဿနာ မရှိဘူး.. မှော်စွမ်းအားပြည့်စုံနေသရွေ့.. ငါ သဘာဝအတိုင်း အမြုတေ ဖွဲ့စည်းခြင်းအဆင့်ကို ရောက်နိုင်တယ်.. ဘာမှ စိတ်ပူစရာ မလိုဘူး…"

"အခု အာရုံစိုက်ရမယ့် အရေးကြီးဆုံး အဆင့်က ရုပ်ပိုင်းဆိုင်ရာ အဆင့်ပဲ.."

"ငါ့ခန္ဓာကိုယ်က မယုံနိုင်လောက်အောင် သန်မာပေမယ့်.. ငါ့ရဲ့ မှော်စွမ်းအားနဲ့ တန်းတူဖြစ်နေမယ်လို့ မဆိုလိုဘူး…"

"ငါ့ခန္ဓာကိုယ်က ရွှေအမြုတေအဆင့်မှာ မရှိရင်… ဖောက်ထွက်မှုရဲ့ ဖိအားတွေကို ခံနိုင်ရည်ရှိဖို့ ခက်ခဲနိုင်တယ်.."

"တစ်နည်းပြောရရင်.. ငါ့ရဲ့ ရုပ်ခန္ဓာအတွက် ကျင့်ကြံမှုကို ဦးစားပေးဖို့ လိုအပ်တယ်.."

"ဒါပေမဲ့ ဒါက ပြဿနာ မဟုတ်သေးဘူး.. ဘာလို့လဲဆိုတော့ 'နဂါးဆင်ကူ'က အဆင့်နှစ်ကို တက်လှမ်းသွားပြီ ဖြစ်လို့.. သွေးသစ်လောင်းခြင်း အကျိုးသက်ရောက်မှုက ပိုပြီးတော့တောင် အံ့ဩစရာ ကောင်းလာတယ်.."

"ငါ ဆက်ပြီး သွေးသစ်လောင်း သန့်စင်နေမယ်ဆိုရင်.. အရည်အတွက်ကနေ အရည်အသွေးကို ပြောင်းလဲပေးလိမ့်မယ်…"

ကျိုးစွေ့၏ မျက်လုံးများ ကျဉ်းမြောင်းသွားသည်။

အမှန်တကယ်တွင်၊ 'နဂါးဆင်ကူ'၏ လစဉ် သွေးသစ်လောင်းပေးမှုနှင့်အတူ၊ သူ၏ ကိုယ်ခန္ဓာ ဖွဲ့စည်းပုံသည် တဖြည်းဖြည်း ပိုမိုသန်မာလာပြီး အဆင့်တစ်ခုသို့ ရောက်ရှိနေပြီဟု သူ ခံစားမိသည်။

နောက်ထပ် အချိန်အနည်းငယ်ကြာ သွေးသစ်လောင်းပြီးနောက်တွင်၊ သေချာပေါက် နယ်ပယ်သစ် တစ်ခုသို့ ရောက်ရှိသွားပေလိမ့်မည်။

မှန်ပေသည်၊ ထိုအချိန်သည် သေချာပေါက် အနည်းငယ် ကြာမြင့်ပေမည်။ သို့သော် စောင့်ဆိုင်ရကျိုး နပ်ပေမည်။

…

ငါးနှစ်ကြာပြီးနောက်...။

ကျိုးစွေ့သည် ကြယ်သုံးပွင့် ကျွန်းစုသို့ ရောက်ရှိခဲ့သည်မှာ စုစုပေါင်း ငါးနှစ် ကြာမြင့်ခဲ့ပြီ ဖြစ်သည်။

ဤကာလအတွင်း သူသည် ပြင်ပလောကကို အနည်းငယ်သာ ဂရုစိုက်ပြီး အဆက်မပြတ် ကျင့်ကြံနေခဲ့သည်။

ဘုန်း…။

ဤအခိုက်အတန့်တွင် ကျိုးစွေ့သည် 'နဂါးဆင်ကူ'၏ လစဉ် သွေးသစ်လောင်းခြင်းကို နောက်တစ်ကြိမ် ခံစားလိုက်ရသည်။ လျှို့ဝှက်ဆန်းကြယ်သော သွေးစွမ်းအင်တစ်ခုသည် သူ၏ ခန္ဓာကိုယ် တစ်ခုလုံးကို ပျံ့နှံ့သွားပြီး၊ ခန္ဓာကိုယ် အစိတ်အပိုင်းတိုင်းသို့ ဝင်ရောက်သွားသည်။

နှစ်ပေါင်းများစွာ သွေးသစ်လောင်းပြီးနောက်၊ သူ၏ ခန္ဓာကိုယ်သည် အကန့်အသတ် တစ်ခုသို့ နောက်ဆုံးတွင် ရောက်ရှိသွားသကဲ့သို့ ထင်ရသည်။

ဟူးလား..။

တစ်ဆို့နေသော နောက်ဆုံးကောက်ရိုးမျှင်ကဲ့သို့၊ ဤလျှို့ဝှက်ဆန်းကြယ်သည့် သွေးစွမ်းအင်မျှင်သည် ကျိုးစွေ့၏ ခန္ဓာကိုယ်တွင် ကြီးမားသော အသွင်ပြောင်းလဲမှုတစ်ခုကို လွယ်ကူစွာ ဖြစ်ပေါ်စေခဲ့သည်။

သို့သော် ဤတစ်ကြိမ်တွင်မူ ကြီးမားလှသော သွေးစွမ်းအင်များသည် သူ့အရိုးတွေထဲသို့ စိမ့်ဝင်သွားသည်။

သူ့ခန္ဓာကိုယ်ထဲရှိ အရိုးပေါင်း (၂၀၆)ချောင်းသည် ဤအခိုက်အတန့်တွင် လျှို့ဝှက်ဆန်းကြယ်သော သွေးစွမ်းအင်ဖြင့် သွေးသစ်လောင်းခြင်း ခံနေရသည်။

ဤအချက်က သူ့ခန္ဓာကိုယ်ထဲရှိ အရိုးတိုင်းကို နက်မှောင်သော ရွှေရောင်စွမ်းအားတစ်ခု တိုက်စားစေပြီး၊ တဖြည်းဖြည်း နက်မှောင်သော ရွှေရောင်အရိုးများအဖြစ် ပြောင်းလဲသွားစေကာ၊ မြင့်မြတ်မှု၊ နက်နဲသော လျှို့ဝှက်ဆန်းကြယ်မှု၊ စွမ်းအားနှင့် ရှေးကျသောအရှိန်အဝါများကို ထုတ်လွှတ်နေစေသည်။

အရိုးတစ်ခုချင်းစီ၏ အပေါ်တွင် ထူထပ်သော လျှို့ဝှက်ဆန်းကြယ်သည့် ရုန်းသင်္ကေတများ ပေါ်ထွက်လာသည်။

၎င်းတို့တွင် အင်မော်တယ် အရှိန်အဝါတစ်ခု ပါဝင်နေသကဲ့သို့ပင် ဖြစ်နေသည်။

သံသယဖြစ်ဖွယ်မလို၊ ယခု သူ၏ အရိုးများသည် သွေးသစ်လောင်းခြင်း ခံထားရပြီး မယုံနိုင်လောက်အောင် သန်မာလာကာ၊ ရတနာအရိုးများကဲ့သို့ မှော်လက်နက်တစ်ခုနှင့် ဆင်တူသော နက်မှောင်သည့် ရွှေရောင်အလင်းတန်းကို ထုတ်လွှတ်နေသည်။

"နဂါးအရိုး…"

ချက်ချင်းဆိုသလိုပင် ကျိုးစွေ့သည် သူ၏ သိစိတ်ပင်လယ် အနက်ပိုင်းထဲတွင် 'နဂါးဆင်ကူ'ထံမှ သတင်းစကား တစ်ခု ရရှိလိုက်သည်။

ထင်ရှားသည်မှာ၊ သူ၏ ခန္ဓာကိုယ်သည် ဒုတိယအကြိမ် ဆင့်ကဲပြောင်းလဲမှုကို ကြုံတွေ့ခဲ့ရပြီး နဂါးအရိုးကို ရရှိခဲ့ပြီ ဖြစ်သည်။

ယခု သူ၏ ခန္ဓာကိုယ်ထဲရှိ အရိုးတစ်ချောင်းချင်းစီတိုင်းသည် နဂါးအရိုးအဖြစ် သွေးသစ်လောင်း သန့်စင်ခြင်း ခံနေရသည်။

ဤအချက်က ခန္ဓာကိုယ်တွင် စိတ်ကူးမယဉ်နိုင်သော အသွင်ပြောင်းလဲမှုတစ်ခုကို ဖြစ်ပေါ်စေခဲ့သည်။

နဂါးတစ်ကောင်၏ ကြောက်မက်ဖွယ် အရှိန်အဝါတစ်ခု သူ့ထံမှ ထွက်ပေါ်လာပြီး၊ အစစ်အမှန်နီးပါး ဖြစ်ပေါ်လာသည်။

‘ဂျလွတ်’ ဟူသော အသံနှင့်အတူ၊ တိတ်ဆိတ်သော အခန်း၏ ကြမ်းပြင်သည် ဤဖိအားကို မခံနိုင်တော့ဘဲ၊ မျက်စိတစ်မှိတ်အတွင်း ပင့်ကူအိမ်ကဲ့သို့ အက်ကြောင်းများ အဖြစ် ကြေမွသွားကာ အခန်းတစ်ခုလုံးသို့ ပျံ့နှံ့သွားတော့သည်။