အကျဉ်းသားများ" ဆုလာဘ်များ

လမ်းဆုံလမ်းခွ ကင်းစခန်းတွင်။

"မြန်မြန် လုပ်၊ မြန်မြန် လုပ်။ ဒီကို လာခဲ့။"

ထာဝရတိုင်းပြည်မှ ဂိမ်းမာများက အမ်ပီစီများကို ဘီးတယ်လ်မွန်များဖြင့် တင်နေခဲ့ကြသည်။

၎င်းတို့မှာ အမှောင်ဝင်ပေါက်တွင် ဖမ်းဆီးခံခဲ့ရသော နတ်ဘုရား တိုင်းပြည်မှ စစ်သားများပင်။ ဂိမ်းမာများမှာ စနစ်မှ ပေးအပ်သော မစ်ရှင်ကြောင့် ထိုနေရာတွင် ရှိနေကြခြင်း ဖြစ်၏။

[မစ်ရှင်ခေါင်းစဉ်: အရှင်ရှားလော့ခ်၏ အကျဉ်းသားများ

မစ်ရှင်ဖော်ပြချက်: ဒုတိယ အုပ်စုစစ်ပွဲအတွင်း ထာဝရတိုင်းပြည်မှ ဂိမ်းမာများက နောက်ဆုံး အောင်ပွဲကို ရရှိခဲ့ပြီး ကြီးမားသော ထူးဆန်းသော တွေ့ကြုံမှု မစ်ရှင် တစ်ခုကို ဖြစ်ပေါ် စေခဲ့သည်။ ဂိမ်းမာများက အကျဉ်းသားများကို ထာဝရတိုင်းပြည်သို့ ပို့ဆောင်ကာ အမျိုးမျိုးသော ဆုများဖြင့် လဲလှယ် နိုင်ပေမည်။

မစ်ရှင်ဆု: ဆုမှာ ဖမ်းဆီး ခံထားရသော အကျဉ်းသား အရေအတွက်နှင့် အချိုးကျပြီး ရှားပါးသော အတွဲလိုက်ပစ္စည်းများ၊ ပစ္စည်း ကိရိယာများ၊ ဘွဲ့အမည်များ၊ ရွှေဒင်္ဂါးများ၊ ဂုဏ်သတင်း ရမှတ်များနှင့် အုပ်စုအကျိုးကျေးဇူးများ ပါဝင်သည်။ အသေးစိတ် ဖော်ပြချက်များ အတွက် တရားဝင် ဝက်ဘ်ဆိုက်ကို ကျေးဇူးပြု၍ ရှာဖွေကြည့်ရှုပါ။

မစ်ရှင်မှတ်စုများ : ကောက်ကျစ်သော လူသားများက သင့်ကို သူတို့ကို လွှတ်ပေးရန် တောင်းဆိုပြီး ရက်ရောသောဆုများ ပေးအပ်မည်ဟု ဆိုလာကြလိမ့်မည်။ ထိုအရာများမှာ မုသားစကားများသာ ဖြစ်၏။ သူတို့က မည်သည့် ဆုမျှ မပေးအပ်နိုင်ပေ။ အရှင်ရှားလော့ခ်သာ ဆုများ ပေးအပ် နိုင်ပေသည်။]

...

"သူတို့က ဘယ်လို အမ်ပီစီတွေလဲဟ။ ဒီညံ့ဖျင်းတဲ့ အေအိုင် ယုတ္တိဗေဒကို ဘယ်ကောင် ရေးခဲ့တာလဲ။ အကျဉ်းသားတွေက အော်ဟစ်ငိုယိုပြီး ငါ့ကို ကျိန်ဆဲခဲ့ရင်တောင် ငါ နားလည်ပေးနိုင်တယ်၊ ဒါက သာမန် အပြုအမူပဲလေ။ ဒါပေမဲ့ အကျဉ်းသား တစ်ယောက် သူ့ တင်ပါးကြီး ငါ့ ဘက် လှည့်ကုန်းပြီး ငါ့ကို လွှတ်ပေးဖို့ တောင်းပန်နေတာကိုတော့ ဒါပထမဆုံး အကြိမ် မြင်ဖူးတာပဲဟေ။"

ဂနိုင်သား ဘီးတယ်လ်မွန် တစ်ကောင်ဘေးမှ လျှောက်သွားရင်း တခြား ဂိမ်းမာများအား မကျေမနပ် ပြောလိုက်သည်။ သူ စိတ်ပျက် နေခဲ့သည်။

"မင်း ဘယ်အချိန်ကတည်းက ဗစ်တိုးရီးယား မြို့သားတွေရဲ့ စကားကို ပြောတတ်သွားတာလဲ။" ဂိမ်းမာများမှာ မြေပေါ်ကမ္ဘာ ဘုံဘာသာစကားကို ဗစ်တိုးရီးယား ဘာသာစကားဟုသာ ရည်ညွှန်း ကြသည်။ ဖမ်းဆီး ခံထားရသော နတ်ဘုရား တိုင်းပြည်မှ စစ်သားများမှာလည်း ဤဘာသာစကားကိုသာ ပြောကြသော်လည်း ထာဝရတိုင်းပြည်မှ ဂိမ်းမာများမှာမူ ယင်းတို့ကို နားမလည်နိုင်ပေ။

"မင်း သင်ယူဖို့ လိုလို့လား။ သူတို့ရဲ့ မျက်နှာအမူအရာတွေနဲ့ အပြုအမူတွေ ကြည့်လိုက်တာနဲ့ သူတို့ကို လွှတ်ပေးစေချင်နေကြတာ အသိသာကြီးလေကွာ။" ဂနိုင်သား ကူကယ်ရာမဲ့စွာ ပြောလိုက်သည်။ တခြား ဂိမ်းမာများမှာလည်း သူတို့၏ အမ်ပီစီများ လွတ်မြောက်ရေး အတွက် တောင်းပန်ခြင်းနှင့် ထွက်ပြေးရန် ကြိုးပမ်းခြင်း အတွေ့အကြုံများကို မျှဝေ ပေးခဲ့ကြသည်။

အမ်ပီစီများကို ထာဝရတိုင်းပြည်သို့ ပို့ဆောင်ခြင်းမှ လွဲ၍ ဂိမ်းမာများမှာ အကျဉ်းသားများအပေါ် ဘာမှ မပြုလုပ်ခဲ့ကြပေ။ သူတို့ စစ်သားများ၏ ပစ္စည်း ကိရိယာများကို ချွတ်ယူပြီး လုယူပစ္စည်းများကို ဖြန့်ဝေ ခဲ့ကြသည်။ သူတို့ ဖမ်းဆီးခံထားရသော စစ်သားများအပေါ်တွင် မည်သည့် ရန်လိုမှုမျှ မပြသခဲ့ကြပေ။

သူတို့က စစ်သားများကို တိုက်ခိုက်လိုခဲ့လျှင်ပင် ဂိမ်းမာများမှာ ထိုသို့ မပြုလုပ်နိုင်ကြပေ။ ဘရုမှာ နတ်ဘုရား တိုင်းပြည်မှ စစ်သားများ၏ အခြေအနေကို အစိမ်းရောင်သို့ ပြောင်းလဲခဲ့ပြီး သူတို့ကို ခင်မင်ရင်းနှီးသော ယူနစ်ဇာတ်ကောင်များ ဖြစ်စေခဲ့သည်။

စစ်သားများမှာ ရှားလော့ခ်၏ ကိုယ်ပိုင်ပစ္စည်းများသာ ဖြစ်သောကြောင့် ဂိမ်းမာများ သူတို့ကို မည်သို့ ထိတွေ့ နိုင်မည်နည်း။

ဂျော့ခ်ျမှာ ဂနိုင်သား လမ်းလျှောက်နေသော ဘေးရှိ ဘီးတယ်လ်မွန် ပေါ်တွင် ထိုင်နေခဲ့သည်။ သူ၏ လက်များ နှင့် ခြေထောက်များမှာ အထူးပင့်ကူမျှင်ဖြင့် ပြုလုပ်ထားသော သံကြိုးများဖြင့် ချည်နှောင် ထားသဖြင့် သူ မည်သည့် အင်အားမျှ မထုတ်သုံးနိုင်ပေ။

ဂျော့ခ်ျမှာ အထူးအမ်ပီစီ တစ်ဦး ဖြစ်သော်လည်း သူ၏ ပစ္စည်း ကိရိယာများမှာ အလွန် ဆွဲဆောင်မှု ရှိနေသည်။ ယခင်တစ်ကြိမ် သူ၏ ပစ္စည်း ကိရိယာများ ချွတ်ယူခြင်း ခံခဲ့ရစဉ်က အပြာရောင်အထက်တန်းစား ပစ္စည်း ကိရိယာ အများအပြားနှင့် ခရမ်းရောင် ဒဏ္ဍာရီပစ္စည်း ကိရိယာ အချို့ ရှိနေခဲ့သည်။

ဤတစ်ကြိမ်တွင်လည်း ဂျော့ခ်ျတွင် အံ့ဩဖွယ်ပစ္စည်း ကိရိယာများ ရှိနေခဲ့၏။ ဂိမ်းမာများ ထိုဆွဲဆောင်မှုကို မည်သို့ ခုခံနိုင်မည်နည်း။ ၎င်းမှာ သဲကန္တာရထဲမှ လူတစ်ဦးအား ရေတွင်း တစ်ခု ပေးအပ်နေခြင်း ကဲ့သို့ပင်။

ဂျော့ခ်ျ ဖမ်းဆီး ခံရပြီးနောက် သူ၏ အဝတ်အစားများနှင့် ပစ္စည်း ကိရိယာများ အကုန်လုံး ချွတ်ယူခြင်း ခံခဲ့ရသည်။ သူ့၌ အတွင်းခံဘောင်းဘီသာ ကျန်ခဲ့သည်။ မည်သို့ပြောပြော သူ ကိုယ်လုံးတီး လမ်းလျှောက်နေ၍တော့ မဖြစ်ပေ။

ရွှေရောင် ဆံပင်ပိုင်ရှင် ဂျော့ခ်ျမှာ အလွယ်တကူဖြင့် လက်လျှော့မည် မဟုတ်ပေ။ သူ အရင်တစ်ခေါက် အကျဉ်းသား တစ်ဦး ဖြစ်ခဲ့စဉ်က ထာဝရတိုင်းပြည်မှ ဂိမ်းမာများ နှင့်ဆက်ဆံဖူးသည့် အတွေ့အကြုံ ရှိနေခဲ့သည်။ ယခုအခေါက် သူ သူတို့နှင့် မည်သို့ ဆက်ဆံ ရမည်ကို သိနေလေပြီ။

ထွက်ပြေးလွတ်မြောက်ရန် တစ်ခု တည်းသော နည်းလမ်းမှာ ထာဝရတိုင်းပြည်မှ သတ္တဝါများအား သူ့ကို ကူညီပေးရန် ဆွဲဆောင် သိမ်သွင်းရန်ပင်။ နည်းလမ်းမှာလည်း ရိုးရှင်းသည်၊ ရက်ရောသော ဆုများဖြင့် ဆွဲဆောင်ရန်ပင်။

သို့သော် ဂျော့ခ်ျ၏ အစီအစဉ်မှာ အောင်မြင်ခြင်း မရှိခဲ့ပေ။

ဂျော့ခ်ျက သံတိုင်များ နောက်ကွယ်မှ အော့ခ်အစောင့်အား ရတနာနှင့် ပစ္စည်း ကိရိယာများဖြင့် လဲလှယ်ကာ သူ့ကို လွှတ်ပေးရန် အဆိုပြုခဲ့သည့်အခါ အော့ခ်အစောင့်မှာ စိတ်အနှောင့်အယှက် ဖြစ်စွာ ပြန်ပြောလိုက်သည်။ "မင်းက အဲ့ဒါကို အရင်တစ်ကြိမ်တုန်းလည်း ပြောခဲ့တယ်။ မင်းကို လွှတ်ပေးပြီးတော့ ငါ ဘာမှလည်း မရခဲ့ဘူး။ အခုလည်း မင်း ငါ့ကို နောက်တစ်ကြိမ် လာလိမ်ဖို့ ကြိုးစားနေပြန်ပြီ။ မင်း ငါ့ကို အရူးတစ်ယောက်လို့ ထင်နေတာလား။ မင်း ငါ့ကို အရင်ဆုံး ပစ္စည်းကောင်းတွေ ကြိုပေးမှရမယ်။"

ရွှေရောင် ဆံပင်ပိုင်ရှင် ဂျော့ခ်ျမှာ မည်သည့် အရာမျှ မပေးအပ်နိုင်ပေ။ သူ့တွင် အတွင်းခံဘောင်းဘီသာလျှင် ကျန်တော့သည်။ သူ၏ အဝတ်အစားများနှင့် ပစ္စည်း ကိရိယာများ အားလုံးက လုယက်ခြင်း ခံခဲ့ရသည် မဟုတ်ပါလော။

ဂျော့ခ်ျမှာ မကောင်းတဲ့ နိမိတ် တစ်ခု ခံစားခဲ့ရသည်။ သူက အရင်တစ်ကြိမ်ကဲ့သို့ ကံကောင်းမည် မဟုတ်ကြောင်း သိနေသည်။

ဘီးတယ်လ်မွန်က လမ်းဆုံလမ်းခွ ကင်းစခန်းသို့ ရောက်ရှိသည့်အခါ ဗစ်တိုးရီးယားမြို့မှ အသက်ရှင်ကျန်ရစ်သော ဂိမ်းမာများ သူတို့ကို ဝင်ကယ်တင်ရန် ကြိုးစား ခဲ့ကြသေးသည်။ ဂျော့ခ်ျက စုတ်ပြတ်နေသော အဝတ်အစားများ ဝတ်ဆင်ထားသော ဗစ်တိုးရီးယား မြို့သားများကို လှမ်းကြည့်လိုက်သည်။ ကိုယ်လုံးတီး ဗစ်တိုးရီးယား မြို့သား အချို့ပင်လျှင် ပြေးဝင် လာခဲ့ကြ၏။ သူတို့က သူတို့ သေဆုံးရမည်ကို သိနေကြသော်လည်း ပျော်ရွှင်နေပုံ ရ၏။ တခြား တစ်ဖက်တွင်မူ ထာဝရတိုင်းပြည်မှ သတ္တဝါများမှာ အထင်သေးမှုများဖြင့် ပြည့်နှက် နေခဲ့ကြသည်။ သူတို့ ဗစ်တိုးရီးယား မြို့သားများကို ထပ်ခါထပ်ခါ ကျိန်ဆဲခဲ့ကြသည်။

ဂျော့ခ်ျမှာ မြေအောက်လောက ဘာသာစကားကို နားမလည်သော်လည်း သူ အဓိပ္ပာယ်ကိုတော့ ခန့်မှန်းကြည့်နိုင်သည်။ သူတို့က ဗစ်တိုးရီးယား မြို့သားများ၏ အကြောက်အရွံ့ကင်းမှုကြောင့် ထိတ်လန့်နေကြခြင်း ဖြစ်ရမည်။

...

ထာဝရတိုင်းပြည် ဒန်ဂျင်တွင်။

"အဲ့ဒီ စစ်ရှုံးဗစ်တိုးရီးယား မြို့သားတွေက အကျဉ်းသားတွေကို ပြန်ကယ်တင်ဖို့ ကြိုးစားနေကြတယ်။ သူတို့ ဆန္ဒရှိရင်တောင်မှ သူတို့မှာ သင့်တော်တဲ့ ပစ္စည်း ကိရိယာတွေတော့ ပါလာသင့်တယ် လေဟာ။ သူတို့ကို ကြည့်လိုက်စမ်းပါဦး၊ သူတို့က ငါတို့ကို လာစော်ကားနေကြတာလား။" ရင်မွှေးမီးလောင် အာသာအား ဒေါသတကြီး ပြောလိုက်သည်။ သူတို့က အကျဉ်းသားများကို ထာဝရတိုင်းပြည်သို့ ပြန်လည် လိုက်ပါ ပို့ဆောင်နေစဉ် သေကြောင်းကြံနေသော ဗစ်တိုးရီးယား မြို့သားများနှင့် အကြိမ် များစွာ ကြုံတွေ့ ခဲ့ရသည်။

"ဒါက ငါတို့အတွက် ဆုံးရှုံးမှု မဟုတ်ပါဘူးလေ။ အကျဉ်းသားတွေကို ထာဝရတိုင်းပြည်ကို လိုက်ပို့ကြရအောင်။ ပြီးတော့ ငါတို့က လိုက်ပါပို့ဆောင်တဲ့ အကျဉ်းသားအရေအတွက် အများဆုံး ရှိတဲ့ အစည်းအရုံးတောင် ဖြစ်နိုင်တယ်။ အစည်းအရုံး အတွက်လည်း ဆုတွေ ရှိလိမ့်မယ်။" အာသာက ရင်မွှေးမီးလောင်အား ပြန်ပြောလိုက်သည်။

အုပ်စုစစ်ပွဲ ပြီးဆုံးပြီး နောက်တွင်တော့ ဂန်ဒမ်မှာ စနစ်၏ တောင်းဆိုချက်အရ ထာဝရတိုင်းပြည်သို့ ပြန်လည် ရောက်ရှိ သွားခဲ့သည်။ သူက ဤထူးဆန်းသော တွေ့ကြုံမှု မစ်ရှင်ကို ပြီးမြောက်အောင် လုပ်ဆောင် ရမည် ဖြစ်သောကြောင့် တိုက်ပွဲတွင် အစည်းအရုံးဝင်များနှင့် မပူးပေါင်းခဲ့ရပေ။

တိုက်ပွဲတွင် ဂန်ဒမ်ကို မောင်းနှင်ရမည့် အတွေးမှာ အာသာကိုပင် စိတ်လှုပ်ရှား စေခဲ့သည်။

"အာသာ၊ မင်းက အမိုက်စားပဲ။"

ဘောင်းဘီမဝတ်သူက လေးစားစွာ ပြောလိုက်သည်။ "မင်းသာ မရှိရင် ငါတို့ ဒီပွဲမှာ ရှုံးခဲ့ရလိမ့်မယ်။"

"ဘရို၊ နောက်ထပ် ဘာမှ မပြောနဲ့တော့။ ငါတို့ ဆုတွေ သွားယူကြစို့။"

ဂနိုင်သားသာ သူ၏ လက်ဖဝါးများကို စိတ်လှုပ်ရှားစွာ ပွတ်သပ် နေခဲ့သည်။ သူတို့ အကျဉ်းသားများကို ပို့ဆောင်ပြီးနောက် သူတို့၏ ဆုများကို ရတော့မည်။