ချီပင်လယ်ကို ဖျက်ဆီးခြင်း

~"နန်းကုန်းကျန့်"

ဖုန်းဝူချန်က သူ၏ နှုတ်ခမ်းများကို အေးစက်သော အပြုံးတစ်ခုအဖြစ် အနည်းငယ် ကွေးညွှတ်လိုက်သည်။

သူ စားသောက်ဆိုင်က စားပွဲထိုးလေးဆီကနေ နန်းကုန်းမိသားစု၏ နံပါတ်တစ် ပါရမီရှင်အကြောင်း ကြားသိခဲ့ပြီး ဖြစ်သည်။

ဖုန်းမိသားစုတွင် ရှိနေစဉ်ကလည်း၊ ဖုန်းဝူချန်သည် လိန်ချင်းဖုန်း ပြောပြသော နန်းကုန်းမိသားစု၏ ထိပ်တန်း ပါရမီရှင်အကြောင်းကို ကြားခဲ့ဖူးသည်။

နန်းကုန်းကျန့်နှင့် စန်းဟွမ်တို့၏ တိုက်ပွဲမှာ ကျိုကျိုးတစ်ခွင်လုံး သိပ်သည်းသွားခဲ့ပြီး၊ ဤဒေသ၏ အထွတ်အထိပ် တိုက်ပွဲကြီးအဖြစ် သတ်မှတ်ခံခဲ့ရ၏။

နန်းကုန်းကျန့်သည် နန်းတော်အတွင်းမှ လျှပ်တပြက် ပေါ်ထွက်လာသည်။ သူ၏ ကြောက်မက်ဖွယ် တည်ရှိမှု အရှိန်အဝါက သိပ်သည်းထွက်လာပြီး၊ နန်းကုန်းလီထက်ပင် သိသိသာသာ ပို၍ သန်မာနေကြောင်း သက်သေပြနေသည်။

"သခင်လေး"

နန်းကုန်းကျန့် ပေါ်ထွက်လာသည်ကို မြင်သောအခါ၊ နန်းကုန်းမိသားစုဝင်များ ဝမ်းသာအားရ အော်ဟစ်လိုက်ကြသည်။

ဖုန်းဝူချန်က နန်းကုန်းကျန့်ကို တည်ငြိမ်စွာ အကဲဖြတ်လိုက်သည်။ ဤမျှ ငယ်ရွယ်သော အသက်အရွယ်ဖြင့် ထျန်းယွမ်ဘုံ ဆဌမအလွှာသို့ ခြေချနိုင်ခဲ့သော နန်းကုန်းကျန့်ကို သူ ပထမဆုံးအကြိမ် မြင်တွေ့ဖူးခြင်း ဖြစ်ရာ၊ ၎င်းက ဖုန်းဝူချန်ကို အတော်လေး အံ့အားသင့်သွားစေသည်။

"သခင်လေး ဖုန်းဝူချန်ကို မြန်မြန် သတ်ပစ်လိုက်ပါ။ သူ သူ မိသားစုခေါင်းဆောင်ကို ဒဏ်ရာရအောင် လုပ်သွားတယ်။ ပြီးတော့ ကျွန်တော်တို့ နန်းကုန်းမိသားစုကိုတောင် မျိုးဖြုတ်ပစ်မလို့တဲ့"

"ဟွန့် အခု သခင်လေး ဝင်ပါလာမှတော့ ဖုန်းဝူချန် သေရွာ ရောက်သွားပြီ။ သူ ဘယ်လောက် သန်မာသန်မာ သူက ကျွန်တော်တို့ သခင်လေးရဲ့ ပြိုင်ဘက် မဟုတ်ဘူး"

"သခင်လေး.. ဖုန်းဝူချန်ကို သတ်ပါ။ ဖုန်းဝူချန်ကို သတ်ပါ"

နန်းကုန်းမိသားစုဝင်များက ဖြောင့်မတ်သော ဒေါသများဖြင့် ဟိန်းဟောက်လိုက်ကြသည်။ ဖုန်းဝူချန်အပေါ် သူတို့၏ မုန်းတီးမှုမှာ အရိုးထဲထိ စိမ့်ဝင်နေသည်။

သူတို့အားလုံးသည် သူ၏ အသားကို စား သူ၏ သွေးကို သောက်ရန် ဆန္ဒပြင်းပြနေကြလေ၏။

'နန်းကုန်းကျန့်ရဲ့ အစွမ်းက နန်းကုန်းလီထက်တော့ နည်းနည်း ပိုမြင့်တယ်'

ဖုန်းဝူချန်က စိတ်ထဲမှ တွေးလိုက်သည်။ သူ နန်းကုန်းလီ၏ စွမ်းအားကို အလွယ်တကူ ပိုင်းဖြတ်နိုင်ခဲ့သည်။

သို့သော် နန်းကုန်းကျန့် ပိုသန်မာနေလျှင်ပင်၊ ဖုန်းဝူချန်သည် လုံးဝ ကြောက်ရွံ့ခြင်းမရှိပေ။

"ကျန့်အာ သတိထား"

ပြင်းထန်စွာ ဒဏ်ရာရနေသော နန်းကုန်းလီက စိုးရိမ်တကြီး ဆို၏။ ဖုန်းဝူချန်ထံမှ ထိုဓားချက်က နန်းကုန်းလီ၏ စိတ်ထဲတွင် နက်ရှိုင်းသော ကြောက်ရွံ့မှုတစ်ခုကို ဖြစ်ပေါ်စေခဲ့သည်။

"နန်းကုန်းကျန့်။ နန်းကုန်းမိသားစုရဲ့ နံပါတ်တစ် ပါရမီရှင်။ သူတို့ရဲ့ အသန်မာဆုံးပေါ့"

ဖုန်းဝူချန်က ခပ်ပေါ့ပေါ့ ဆိုလိုက်၏။

နန်းကုန်းကျန့်သည် လေထဲသို့ ညင်သာစွာ တက်လာပြီး၊ အစွမ်းထက်သော ပုဂ္ဂိုလ်တစ်ဦး၏ အရှိန်အဝါကို ထုတ်လွှတ်လျက်၊ ခံစားချက်ကင်းမဲ့စွာ ဆိုသည်။

"ဖုန်းဝူချန် မင်းနာမည်က ကျိုကျိုးတစ်ခွင်လုံး ပဲ့တင်ထပ်နေတာ။ မင်းရဲ့ စွမ်းဆောင်ရည်တွေကို ငါ ကြားသိရတာ ကြာပါပြီ။ မင်း ငါ့အဘိုးကို အနိုင်ယူနိုင်ခဲ့တာက မင်းဟာ ငါ့ရဲ့ ပြိုင်ဘက်အဖြစ် ထိုက်တန်ကြောင်း သက်သေပြနေတာပဲ"

ဒါ ဒါ နန်းကုန်းမိသားစု၏ ထိပ်တန်းပုဂ္ဂိုလ်တစ်ဦး၏ ယုံကြည်မှုပင်။

နန်းကုန်းကျန့်၏ အထွတ်အထိပ် စွမ်းအားသည် ထျန်းယွမ်ဘုံ ဆဌမအလွှာ၏ အမြင့်ဆုံးအဆင့်နှင့် နှိုင်းယှဉ်နိုင်ပြီး သူ၏ စွမ်းအားမှာ ကြောက်မက်ဖွယ် ကောင်းလှ၏။

"မင်း ဒဏ်ရာရနေတယ်။ မင်း ငါ့ပြိုင်ဘက် မဟုတ်ဘူး"

ဖုန်းဝူချန်က ခပ်ပြတ်ပြတ် ဆိုလိုက်သည်။ သူ၏ အမူအရာမှာ ညင်သာသော လေပြေလေးနှင့် မျောလွင့်နေသော တိမ်တိုက်များကဲ့သို့ တည်ငြိမ်နေသည်။ သူ ရင်ဆိုင်နေရသည်မှာ နန်းကုန်းမိသားစု၏ ထိပ်တန်း ပါရမီရှင် တစ်ဦး မဟုတ်သကဲ့သို့ပင်။

လုံးဝ ယုံကြည်မှု ရှိလွန်းခြင်း။

အဆုံးစွန်ထိ အလွန်အမင်း ယုံကြည်မှု ရှိလွန်းခြင်းပင်။

ဖုန်းဝူချန်က နန်းကုန်းမိသားစု၏ နံပါတ်တစ် ပါရမီရှင်သည် သူ၏ ပြိုင်ဘက် မဟုတ်ဟု ကြေညာရဲသည်။

နန်းကုန်းမိသားစုဝင်များ၏ မျက်နှာများမှာ တုန်လှုပ်ခြင်း မှင်တက်ခြင်းများ ရောနှောနေပြီး ဖုန်းဝူချန်ကို စိုက်ကြည့်နေကြ၏။

"ဖုန်းဝူချန် ဘာ ဘာပြောလိုက်တယ်။ သူ သူက ငါတို့ သခင်လေးက သူ့ပြိုင်ဘက် မဟုတ်ဘူးလို့ ပြောရဲတယ်"

"ဒီလောက် အရှက်မရှိတဲ့ မောက်မာမှု။ သူ သူ အဆုံးစွန်ထိ ထင်တိုင်းကြဲနေတာပဲ"

"ဒီကောင်စုတ်လေးက ငါတို့ သခင်လေးကို အထင်သေးနေတာ"

ခဏတာ တုန်လှုပ်သွားပြီးနောက်၊ နန်းကုန်းမိသားစုဝင်များ ဒေါသတကြီး ပေါက်ကွဲထွက်လာကြသည်။ တစ်ဦးချင်းစီမှာ ဖုန်းဝူချန်၏ ရဲတင်းမှုကြောင့် ဒေါသများ ဆူပွက်နေကြ၏။

သို့သော် ဖုန်းဝူချန်၏ စကားလုံးများက နန်းကုန်းကျန့်ကိုလည်း မှင်တက်သွားစေပြီး ခေတ္တမျှ မယုံနိုင်စွာ ရပ်တန့်သွားစေသည်။

သူ၏ တည်ငြိမ်မှုကို ပြန်လည် ရယူလိုက်ပြီးနောက်၊ နန်းကုန်းကျန့်၏ မျက်နှာ မည်းမှောင်သွားပြီး ဖုန်းဝူချန်ကို အေးစက်စွာ ကြည့်လိုက်၏။ ဘယ်တုန်းကမှ သူ့ကို ဒီလောက် အထင်သေးခံခဲ့ရခြင်း မရှိခဲ့ဖူးပေ။

ဆယ်စုနှစ်ပေါင်းများစွာ သူ၏ နာမည်ဖြင့် ကျိုကျိုးကို တုန်လှုပ်စေခဲ့သော စန်းဟွမ်ပင်လျှင် သူ့အား ဤကဲ့သို့ မောက်မာသော စကားလုံးများ ပြောဆိုရဲခဲ့ခြင်း မရှိပေ။

"ဖုန်းဝူချန် မင်းမှာ မောက်မာပိုင်ခွင့် သတ္တိ ရှိတာတော့ အမှန်ပဲ။ ဒါပေမဲ့ မင်း အဲ့ဒီ မောက်မာမှုကို မကြွားလုံးထုတ်ခင် မင်းရဲ့ ပြိုင်ဘက်က ဘယ်သူလဲဆိုတာ စဉ်းစားကြည့်သင့်တယ်"

နန်းကုန်းကျန့်၏ အတွင်းစိတ်ထဲတွင် ဒေါသမီးတောက် တစ်ခု စတင် လောင်ကျွမ်းလာသည်။

ဖုန်းဝူချန်က ခပ်ယဲ့ယဲ့ အေးစက်စွာ ရယ်မောရင်း

"မင်းကို သတ်ဖို့က 'ငါ့လက်ဖဝါးကို လှန်လိုက်သလို လွယ်ကူ'ပြီး နန်းကုန်းမိသားစုကို မျိုးဖြုတ်ဖို့က 'အားစိုက်စရာမလို'ဘူး"

ဆိုလိုက်သည်။

'ဒီ ဒီကောင်' ဖုန်းဝူချန်၏ မောက်မာမှုက ပြန်ဆုတ်မသွားသည့်အပြင် ပိုမို ပြင်းထန်လာသည်။

"မဖြစ်နိုင်ဘူး"

နန်းကုန်းကျန့်၏ မျက်နှာသွင်ပြင်များ လုံးဝ ရှုံ့မဲ့သွားသည်။ ဖုန်းဝူချန်ကဲ့သို့ ရိုင်းစိုင်းသောသူကို သူ တစ်ခါမှ မကြုံတွေ့ဖူးခဲ့ပေ။

"ရိုင်းစိုင်းလိုက်တာ"

နန်းကုန်းလီက ဒေါသတကြီး ဟိန်းဟောက်လိုက်သည်။

ဖုန်းဝူချန် ဤမျှ ဗြောင်ကျကျ အရှက်မရှိလိမ့်မည်ဟု သူတို့ ဘယ်တုန်းကမှ ထင်မထားခဲ့မိပေ။ နန်းကုန်းမိသားစု၏ ဩဇာအာဏာသည် သူတို့ ခြေတစ်ချက် ဆောင့်လိုက်ရုံမျှဖြင့် ကျိုကျိုးကို တုန်လှုပ်သွားစေနိုင်သည်။ သို့သော် ယခု ဖုန်းဝူချန်က သူတို့ကို ပုရွက်ဆိတ်များထက်ပင် အရေးမပါသူများအဖြစ် သတ်မှတ်နေလေ၏။

"မင်းကို ပြောလိုက်ရတာ ငါ စိတ်မဝင်စားပါဘူး။ ငါ မင်းအဘိုးကို အစောက သုံးခဲ့တဲ့ ဓားချက်က ငါ့အစွမ်းအပြည့်ရဲ့ (၈၀) ရာခိုင်နှုန်းပဲ ရှိသေးတယ်"

နန်းကုန်းကျန့်နှင့် အခြားသူများ၏ ဒေါသတကြီး ကြမ်းတမ်းသော မျက်နှာအမူအရာများကို လျစ်လျူရှုလျက် ဖုန်းဝူချန်က အေးစက်သော အပြုံးဖြင့် ဆက်ပြောလိုက်သည်။

"ဒါဆို မင်းရဲ့ အစွမ်းအပြည့်က ဘယ်လောက် သန်မာလဲဆိုတာ ကြည့်ကြသေးတာပေါ့"

နန်းကုန်းကျန့်က ဒေါသတကြီး ဟိန်းဟောက်လိုက်သည်။

"ဝုန်း..ဝုန်း"

နန်းကုန်းကျန့်၏ ပတ်ဝန်းကျင်မှ အရှိန်အဝါ ရုတ်တရက် ပြောင်းလဲသွားပြီး အရူးအမူး တဟုန်ထိုး မြင့်တက်လာသည်။ သူ၏ လွှမ်းမိုးနိုင်သော စွမ်းအင်များ သူ၏ ခန္ဓာကိုယ်မှ ရေလွှမ်းမိုးသကဲ့သို့ ပေါက်ကွဲထွက်လာပြီး မျက်စိတစ်မှိတ်အတွင်း သူ၏ ကြောက်မက်ဖွယ် တည်ရှိမှုက နန်းကုန်းလီကို ကျော်လွန်သွားသည်။

အပြည့်အဝ နာလန်မထူသေးသော်လည်း၊ နန်းကုန်းကျန့်၏ အစွမ်းသည် သူ၏ အထွတ်အထိပ် အခြေအနေနှင့် များစွာ မကွာခြားတော့ပေ။

သို့သော် နောက်တစ်စက္ကန့်တွင် နန်းကုန်းကျန့်၏ မျက်နှာအမူအရာ ချက်ချင်း ပြောင်းလဲသွား၏။

"ဝှစ်"

နန်းကုန်းကျန့် သူ၏ ကြောက်မက်ဖွယ် စွမ်းအားကို ထုတ်လွှတ်လိုက်သည့် ထိုအခိုက်အတန့်မှာပင် အနက်ရောင် အရိပ်တစ်ခု သူ၏ ရှေ့မှောက်သို့ လျှို့ဝှက်ဆန်းကြယ်စွာ ထူးဆန်းစွာ ပေါ်ထွက်လာ၏။ တချိန်တည်း၌၊ ထက်ရှသော ဓားစိတ်ဆန္ဒများ ဝန်းရံနေသည့် ဓားရှည် တစ်လက် နန်းကုန်းကျန့်၏ လည်ပင်းနားသို့ ရောက်ရှိနေခဲ့သည်။

အေးစက်သော ခံစားမှု တစ်ခု ချက်ချင်းပင် နန်းကုန်းကျန့်၏ ခန္ဓာကိုယ် တစ်ခုလုံးသို့ သိပ်သည်းသွားသည်။

နန်းကုန်းကျန့်၏ မျက်နှာ တုန်လှုပ်မှုသို့ ပြောင်းလဲသွား၏။ သူ၏ အမူအရာ တောင့်တင်းသွားပြီး ကျောက်ရုပ်တစ်ရုပ်ကဲ့သို့ မလှုပ်မယှက် ဖြစ်သွားသည်။

နန်းကုန်းလီ နန်းကုန်းထျန်းဟန် နှင့် အခြား အကြီးတန်း အဖွဲ့ဝင်များ အားလုံး မှင်တက်သွားကြရသည်။

မြင်ကွင်းတစ်ခုလုံး သေမတတ် တိတ်ဆိတ်သွားပြီး ပုံရိပ်များ အေးခဲသွားသကဲ့သို့ပင်။

'ဒါ ဒါ ဘယ်လို နတ်ဘုရား ကျွမ်းကျင်မှုမျိုးလဲ'

ဖုန်းဝူချန် အသုံးပြုလိုက်သည်မှာ အဘယ်နည်း။ သူ မည်သို့ တိတ်ဆိတ်စွာ သတိပေးခြင်းမရှိဘဲ ပေါ်ထွက်လာနိုင်ခဲ့ပြီး နန်းကုန်းကျန့်ကို လုံးဝ သတိမထားမိစေခဲ့သနည်း။

နန်းကုန်းလီနှင့် အခြားသူများ လုံးဝ တုံ့ပြန်နိုင်ခြင်း မရှိခဲ့ပေ။

သူတို့ အသိစိတ် ပြန်ဝင်လာချိန်တွင် ဖုန်းဝူချန်၏ ရှည်လျားသော ဓားမှာ နန်းကုန်းကျန့်၏ လည်ပင်းနားတွင် ရှိနေခဲ့ပြီ ဖြစ်၏။

"ဖုန်းဝူချန် လက်ကို ရပ်လိုက်"

နန်းကုန်းလီ၏ မျက်နှာ ချက်ချင်း ပြောင်းလဲသွားပြီး ထိတ်လန့်တကြား ဟိန်းဟောက်လိုက်သည်။ အလျင်အမြန် အော်ဟစ်လိုက်သည်။

"ဖုန်းဝူချန် ရပ်လိုက်။ လွှတ်ပေးပါ"

နန်းကုန်းလီနှင့် အခြား ခေါင်းဆောင်ပိုင်း အဖွဲ့ဝင်များ၏ စိတ်ထဲတွင် ကျန့်လင်တောင်ကြားမှ တပည့်များ အသတ်ခံနေရသည့် ပုံရိပ်များ ချက်ချင်း ပေါ်ထွက်လာသည်။

ကောင်းကင်အရိပ် မြင်းသည်တော်တပ်ဖွဲ့နှင့် အလံနက်တပ်မတော်တို့ ပြသခဲ့သော အံ့ဖွယ်ကောင်းပြီး ကြောက်မက်ဖွယ် လှုပ်ရှားမှု ပညာရပ်။

ကျန့်လင်တောင်ကြားမှ တပည့်များကို အရူးအမူး သတ်ဖြတ်နေကြပုံများ။

စစ်သည်များ ပြသခဲ့သော လှုပ်ရှားမှု ပညာရပ်မှာ အံ့အားသင့်ဖွယ် လုံလောက်နေပြီ ဖြစ်သော်လည်း ဖုန်းဝူချန် အသုံးပြုလိုက်သော ပညာရပ်မှာ ပို၍ပင် ကြောက်မက်ဖွယ်ကောင်းလှသည်။

သို့သော် နန်းကုန်းကျန့် ၎င်းကို တစ်ခါမှ မမြင်တွေ့ခဲ့ဖူးပေ။

သူ့ကို သတ်ရန် ဖုန်းဝူချန် အတွေး တစ်ချက်မျှသာ လိုအပ်သည်။

သူ၏ မကြာသေးမီက ထျန်းယွမ်ဘုံ တတိယအလွှာသို့ တက်လှမ်းမှုနှင့်အတူ ဆဌမအလွှာနှင့် နှိုင်းယှဉ်နိုင်သော အစွမ်းဖြင့် ဖုန်းဝူချန် မျက်တောင်တစ်ခတ် လှုပ်ရှားခြင်းကို အသုံးပြုလိုက်သောအခါ သူ၏ အမြန်နှုန်းသည် မည်မျှ ကြောက်မက်ဖွယ် ကောင်းလိုက်မည်နည်း။

နန်းကုန်းကျန့် လုံးဝ မှင်သက်သွားသည်။

နန်းကုန်းကျန့်သည် ဖုန်းဝူချန်ကို ကြောက်ရွံ့မှုများ ပြည့်နှက်နေသော မျက်လုံးများဖြင့် ကြည့်လိုက်၏။

သူ၏ မာန ၊ သူ၏ အောင်မြင်မှုအားလုံး ဖုန်းဝူချန်၏ ခြေအောက်တွင် ရက်စက်စွာ နင်းခြေခံလိုက်ရပြီး လုံးဝ တန်ဖိုးမရှိ ဖြစ်သွားသည်ဟု ခံစားလိုက်ရသည်။

"လွှတ်ပေးပါ ဟုတ်လား"

ဖုန်းဝူချန်က သူ၏ နှုတ်ခမ်းများကို မထီမဲ့မြင် ကွေးညွှတ်လိုက်ပြီး လှောင်ရယ်လိုက်သည်။

"ခင်ဗျားတို့ နန်းကုန်းမိသားစုက ကိုယ့်ကိုယ်ကိုယ် သိပ် အစွမ်းထက်တယ်လို့ ထင်နေတာ မဟုတ်ဘူးလား"

"ဖုန်းဝူချန် ကျေးဇူးပြုပြီး ချက်ချင်း ရပ်လိုက်ပါ။ ကျန့်အာက ငါ့ နန်းကုန်းမိသားစုရဲ့ အနာဂတ်ပဲ။ သူက ငါတို့ မိသားစုရဲ့ သွေးကြောအတွက် အရေးကြီးတယ်။ ကျေးဇူးပြုပြီး သနားညှာတာပါ"

နန်းကုန်းထျန်းဟန်က အလျင်အမြန် အသိစိတ် ပြန်ဝင်လာပြီး ထိတ်လန့်တကြား တောင်းပန်လိုက်သည်။

"ဖုန်းဝူချန် ၊ ငါတို့ စကားပြောကြရအောင်။ မင်း ကိုးထပ် ချန်ခွန်း မျှော်စင်ကို ပြန်လိုချင်တာ မဟုတ်လား။ ငါ ငါ အခု ချက်ချင်း မင်းကို ပေးမယ်"

နန်းကုန်းလီက ကိုးထပ် ချန်ခွန်း မျှော်စင်ကို အလျင်အမြန် ထုတ်ယူလိုက်ပြီး တံဆိပ်ကို ဖြေကာ ချက်ချင်း ပစ်ပေးလိုက်သည်။

ဤအခြေအနေတွင် နန်းကုန်းမိသားစုသည် ခေါင်းမာနေရန် လုံးဝ မတတ်နိုင်တော့ဘဲ နောင်တတရားများဖြင့် လွှမ်းမိုးသွားရ၏။

နန်းကုန်းကျန့်သည် နန်းကုန်းမိသားစုတွင် ရှားပါးသော ပါရမီရှင် တစ်ဦး ဖြစ်ပြီး သူတို့ စွန့်စားနိုင်သော သူ မဟုတ်ပေ။

နန်းကုန်းကျန့်ကို အေးစက်စွာ ခံစားချက်ကင်းမဲ့စွာ တစ်ချက် ကြည့်လိုက်ပြီး ဖုန်းဝူချန်က လှောင်ရယ်သံဖြင့် မေးလိုက်၏။

"နန်းကုန်းမိသားစုက မင်းကို ဒီလောက် တန်ဖိုးထားတာဆိုတော့ မင်း ရွေးလိုက်လေ။ တစ်၊ ငါ မင်းကို သတ်မယ် ဒါပေမဲ့ နန်းကုန်းမိသားစုကို ချမ်းသာပေးမယ်။ နှစ်၊ ငါ နန်းကုန်းမိသားစုကို မျိုးဖြုတ်မယ် ဒါပေမဲ့ မင်းအသက်ကို ချမ်းသာပေးမယ်"

"လူယုတ်မာ"

နန်းကုန်းကျန့်၏ မျက်နှာ ကြမ်းတမ်းစွာ ရှုံ့မဲ့သွားသည်။

"ဖုန်းဝူချန် မလုပ်ပါနဲ့။ နန်းကုန်းမိသားစု မှားသွားပါတယ်။ ငါတို့ မှားသွားပါတယ်။ ကျေးဇူးပြုပြီး … ကျန့်အာကို ချမ်းသာပေးပါ"

နန်းကုန်းလီက အလွန်အမင်း ထိတ်လန့်တကြားဖြင့် အော်ဟစ်လိုက်သည်။

ဖုန်းဝူချန်အပေါ် သူ ခံစားရသော ကြောက်ရွံ့မှုသည် သူ၏ စိတ်ကူးနိုင်စွမ်းကို ကျော်လွန်သွားခဲ့လေပြီ။

နန်းကုန်းမိသားစုကလကိုးထပ် ချန်ခွန်း မျှော်စင်ကို ဝင်ရောက် စွက်ဖက်မိခြင်းသည် သေလမ်းကို ကိုယ်တိုင် ရှာဖွေခြင်းပင်။

"မှားတယ် ဟုတ်လား။ 'ငါတို့ မှားသွားတယ်' ဆိုတဲ့ စကားတစ်ခွန်းတည်းက အရာအားလုံးကို ပျက်ပြယ်သွားစေမလား။ ခင်ဗျားတို့က ကျုပ်ဆိုတဲ့ ဖုန်းဝူချန်ကို ဘာ ထင်နေတာလဲ။ လှည့်စားလို့ အရမ်း လွယ်တယ် ထင်နေတာလား"

ဖုန်းဝူချန်က ပြင်းထန်စွာ ဟိန်းဟောက်လိုက်သည်။

"မဟုတ် မဟုတ်ပါဘူး။ ကျွန်တော်တို့ အဲ့ဒီလို ဆိုလိုတာ မဟုတ်ပါဘူး။ ဖုန်းဝူချန် ခင်ဗျား ကျန့်အာကိုသာ ချမ်းသာပေးမယ်ဆိုရင် ခင်ဗျား ပြောသမျှ အကုန် ဖြစ်စေရပါမယ်။ ခင်ဗျား ဘာပဲ လိုချင် ကျွန်တော့် နန်းကုန်းမိသားစုက အားလုံး ကြိုးစား ဖြည့်ဆည်းပေးပါ့မယ်"

နန်းကုန်းထျန်းဟန်က ထိတ်လန့်တကြား ဆိုသည်။ နန်းကုန်းကျန့်သည် သူ၏ တစ်ဦးတည်းသော သား။

နန်းကုန်းမိသားစု၏ တစ်ဦးတည်းသော မီးရှူးတိုင်ကို ဆက်ခံသူပင်။

"ငါ ပြောသမျှ အကုန် ဖြစ်စေရမယ် ဟုတ်လား"

ဖုန်းဝူချန်က မျက်ခုံးပင့်လိုက်ပြီး ထို့နောက် အေးစက်စွာ လှောင်ရယ်လိုက်သည်။

"ဒါ မင်းတို့ စကားပဲနော်"

"ဟုတ် ဟုတ်ပါတယ်။ ကျွန်တော့် စကားပါ"

နန်းကုန်းထျန်းဟန်က လေးပင်စွာ ခေါင်းညိတ်လိုက်သည်။

"ကောင်းပြီလေ။ ဒါဆို ငါ သူ့ရဲ့ ချီပင်လယ်ကို ဖျက်ဆီးပြီး သူ့အသက်ကို ချမ်းသာပေးမယ်"

ဖုန်းဝူချန်က ရက်စက်စွာ ကြေညာလိုက်ပြီး၊ သူ၏ ဘယ်ဘက်လက်ဝါးတွင် အစစ်အမှန်ယွမ်စွမ်းအင်များ စုစည်းလာကာ နန်းကုန်းကျန့်ထံသို့ တုံ့ဆိုင်းခြင်းမရှိ ပြင်းထန်စွာ ရိုက်ချလိုက်သည်။

ဖုန်းဝူချန်သည် ပြတ်သား ရက်စက်စွာ လှုပ်ရှားလိုက်ပြီး နန်းကုန်းလီနှင့် အခြားသူများကို မည်သည့် တုံ့ပြန်ခွင့် အခွင့်အရေးမျှ မပေးခဲ့ပေ။

"အုန်း.."

“အွတ်”

ဖုန်းဝူချန်၏ လက်ဝါး ရိုက်ချက်နှင့်အတူ၊ နန်းကုန်းကျန့် သွေးတစ်လုတ် အန်ထုတ်လိုက်ရပြီး သူ၏ ခန္ဓာကိုယ်မှာ နောက်ပြန် လွင့်စင်ထွက်သွားသည်။

ဤအချိန်တွင်၊ နန်းကုန်းလီနှင့် အခြားသူများမှာ ဖုန်းဝူချန် ပြောလိုက်သော စကားကြောင့် တုန်လှုပ်နေကြဆဲ ဖြစ်ပြီး လုံးဝ အသိစိတ် ပြန်မဝင်သေးပေ။

"ကျန့်အာ"

သူတို့ ပြန်လည် သတိဝင်လာချိန်တွင်တော့ နောက်ကျသွားခဲ့ချေပြီ။

နန်းကုန်းကျန့်၏ ချီပင်လယ် ဖျက်ဆီးခံလိုက်ရပြီ။ သူတို့ တားဆီးနိုင်ခြင်း မရှိခဲ့ပေ။

နန်းကုန်းထျန်းဟန်သည် နန်းကုန်းကျန့်ကို ဖမ်းယူရန် ချက်ချင်း နေရာရွှေ့ပြောင်းလိုက်ပြီး သူ၏ ခန္ဓာကိုယ်မှာ ထိတ်လန့်တကြား တုန်ယင်နေကာ မျက်နှာမှာ သေမတတ် ဖြူဖျော့နေသည်။

"ကျန့်အာ ကျန့်အာ"

နန်းကုန်းထျန်းဟန်က တုန်ယင်စွာ ခေါ်လိုက်ပြီး ဝမ်းနည်းပူဆွေးစွာ အော်ဟစ်လိုက်သည်။

"ကျန့်အာ"

နန်းကုန်းလီ၏ မျက်ရည်များ အသံမထွက်ဘဲ ကျဆင်းလာပြီး နောင်တတရားများဖြင့် လွှမ်းမိုးသွားသည်။

နန်းကုန်းမိသားစုသည် သူတို့၏ ကြီးစိုးမှုကို ဆက်လက် မထိန်းသိမ်းနိုင်တော့ပေ။ နန်းကုန်းလီ ဖုန်းဝူချန်၏ လက်ချက်ဖြင့် ပြင်းထန်စွာ ဒဏ်ရာရခဲ့သည်။ နန်းကုန်းကျန့်၏ ချီပင်လယ် ဖျက်ဆီးခံလိုက်ရလေပြီ။

ပြီးတော့ နန်းကုန်းမိသားစုတွင် ဖုန်းဝူချန်ကို ရပ်တည် ရင်ဆိုင်နိုင်မည့် မည်သူ တစ်ဦးတစ်ယောက်မျှ မရှိတော့ပေ။

ဖုန်းဝူချန်၏ အစွမ်းအစ ရှေ့မှောက်တွင် သူတို့၏ ကြောက်ရွံ့မှုများ ပိုမို နက်ရှိုင်းလာသည်။

သူတို့၏ ဒေါသများကြားမှပင် နန်းကုန်းမိသားစုသည် ဖုန်းဝူချန်ကို နောက်တစ်ကြိမ် ပြန်လည် မတိုက်ခိုက်ရဲကြတော့ပေ။

အကယ်၍ ကိုးထပ် ချန်ခွန်း မျှော်စင် ကြောင့်သာ မဟုတ်ခဲ့လျှင်။ နန်းကုန်းမိသားစု ဖုန်းဝူချန်ကို စော်ကားမိမည် မဟုတ်သလို ဒီလို အခြေအနေမျိုးနဲ့ အဆုံးသတ်ရမည် မဟုတ်ပေ။

ဖုန်းဝူချန်သည် သတ်ဖြတ်ခြင်း နတ်ဘုရား ဟု လူသိများပြီး နန်းကုန်းမိသားစု အသက်ရှင် ကျန်ရစ်ခဲ့ခြင်းသည်ပင် ကံကောင်းလှပြီ ဖြစ်သည်။

နန်းကုန်းမိသားစုသည် နောက်ထပ် တိုက်ခိုက်မှုများကို မခံနိုင်တော့ဘဲ တစ်ချိန်က ကြီးကျယ်ခမ်းနားခဲ့သော မိသားစုကြီး ယခု ကျဆင်းသွားမည်ကို စိုးရိမ်ရတော့၏။

"ဒါ ခင်ဗျားတို့ နန်းကုန်းမိသားစု ကိုယ်တိုင် ဖန်တီးလိုက်တဲ့ ကံကြမ္မာပဲ။ ကျုပ်က ခင်ဗျားတို့ မိသားစုကို ဖျက်ဆီးပစ်ဖို့ စီစဉ်ခဲ့တာ။ ဒါပေမဲ့ ကျုပ် နန်းကုန်းကျန့်ရဲ့ ချီပင်လယ်ကို ဖျက်ဆီးခဲ့ပြီးပြီ။ ပြီးတော့ ခင်ဗျားတို့က မျှော်စင်ကို ပြန်ပေးခဲ့ပြီ။ ဒါကြောင့် ဒီကိစ္စကို ဆက်ပြီး အရေးမလုပ်တော့ဘူး။ ဒါပေမဲ့ မှတ်ထား။ နောက်တစ်ခါ ဆိုတာ ရှိလာရင် နန်းကုန်းမိသားစုကို ကျိုကျိုးကနေ ပျောက်ကွယ်သွားအောင် သေချာပေါက် လုပ်ပစ်မယ်"

ဖုန်းဝူချန်က အေးစက်စွာ ကြေညာလိုက်သည်။

"မိသားစုခေါင်းဆောင် နန်းကုန်း"

ထိုအချိန်တွင် အလွန် တုန်လှုပ်ခြောက်ခြားနေသော အော်သံတစ်ခု အထက်ကောင်းကင်ယံမှ ထွက်ပေါ်လာသည်။

"ဝှစ် ဝှစ် ဝှစ်"

ပုံရိပ်တစ်ခုပြီးတစ်ခု အလျင်အမြန် ဆက်တိုက် ပေါက်ကွဲထွက်လာသည်။ အသစ်ရောက်ရှိလာသူများမှာ အခြားသူများ မဟုတ်ကြပေ။

ရှောင်ရန် ကျန်းကျွင့်လန် နှင့် အခြားသူများတည်း။ သူတို့နောက်တွင် လေလံပွဲနှင့် ဖုန်းလန်ဂိုဏ်းမှ အစွမ်းထက် အဖွဲ့ဝင်များ လိုက်ပါလာကြလေသည်။

"နန်းကုန်းလီ ပြင်းပြင်းထန်ထန် ဒဏ်ရာရသွားတယ်"

လိန်ဝူယဲ့နှင့် စန်းဟွမ် အဖွဲ့ဝင်များ မျက်နှာများ ပြောင်းလဲသွားပြီး အံ့အားသင့်မှုများဖြင့် ပြည့်နှက်သွားသည်။

'နန်းကုန်းလီက ဘယ်လောက် အစွမ်းထက်သလဲ။ ဒါတောင် သူ ပြင်းပြင်းထန်ထန် ဒဏ်ရာရသွားတယ်'

"နန်းကုန်းကျန့်ရဲ့ ချီပင်လယ် ဖျက်ဆီးခံလိုက်ရတယ်"

ရှောင်ရန်တစ်ယောက် ထိတ်လန့်တကြား အသက်ရှူမှားသွားပြီး ထိန်းချုပ်မရနိုင်ဘဲ အော်ဟစ်လိုက်မိသည်။ သူ၏ မျက်လုံးများ တုန်လှုပ်မှုဖြင့် ပြူးကျယ်ထွက်လာသည်။

'နန်းကုန်းကျန့် တကယ်ကြီး မသန်စွမ်း ဖြစ်သွားပြီ။ သူက စန်းဟွမ်နဲ့ တစ်တန်းတည်း ရပ်တည်နိုင်တဲ့ ကြောက်စရာ ပုဂ္ဂိုလ်ကြီးလေ'

လိန်ဝူယဲ့နှင့် ာခုလေးတင် ရောက်ရှိလာသော အခြား အစွမ်းထက် ပုဂ္ဂိုလ်ကြီးများ ထိန်းချုပ်မရနိုင်ဘဲ တုန်လှုပ်သွားကြသည်။

ခဏတာမျှ ကြောက်ရွံ့မှု တုန်လှုပ်မှုများဖြင့် ပြည့်နှက်နေသော မျက်လုံး အစုံလိုက် .. တစ်ညီတစ်ညွတ်တည်း ဖုန်းဝူချန်ထံသို့ လှည့်သွားကြလေ၏။

ထို ရင်းနှီးသော်လည်း ကြောက်မက်ဖွယ်ကောင်းသော လူငယ်လေး၏ ပုံရိပ်ထံသို့……။