ကြက်ကို သတ်၍ မျောက်ကို ခြောက်ခြင်း

~ပေတိုမိသားစုက တကယ့်ကို အာဏာရှင်ဆန်လှသည်။

'ဘေးကင်းလုံခြုံမှုကို အာမခံတယ်' ဆိုတာ ဘာအဓိပ္ပာယ်လဲ။ လက်ဆောင်မဆက်သရင် သတ်ပစ်မည်လား။

ပေတိုမိသားစုကို မှီခိုရမည် ဆိုတာကရော။ လက်အောက်မခံရင် သေရမည်လား။

တကယ့်ကို အကြွင်းမဲ့ အာဏာရှင်ဆန်ခြင်း။ မောက်မာထောင်လွှားခြင်း။ ရက်စက်ကြမ်းကြုတ်ခြင်းပင်။

ပေတိုရွှမ်းက သူ၏ ရည်ရွယ်ချက်များကို ကြေညာလိုက်သည့်အခါ ၎င်းမှာ အမှန်တကယ်တွင် အင်အားကြီးငယ် အားလုံးကို အတင်းအကျပ် လက်အောက်ခံစေသည့် အမိန့်ပေးသော လေသံဖြင့် ပြောကြားလိုက်ခြင်း ဖြစ်သည်။ ပေတိုမိသားစုက 'ကျိုကျိုး' ကိုးပြည်ထောင်ကို အင်ပါယာတစ်ခုအဖြစ် ပြောင်းလဲရန် ကြံစည်နေခြင်းတည်း။

ပေတိုရွှမ်းက ဧကရာဇ် ဖြစ်လာမည်ဖြစ်ပြီး 'ကျိုကျိုး' ကိုးပြည်ထောင်မှ အင်အားစုများအားလုံးမှာ သူ၏ လက်အောက်ခံများ ဖြစ်လာကြရမည် ဖြစ်သည်။

လူအုပ်ကြီးကို တစ်ချက် အကဲခတ်ကြည့်လိုက်ပြီး ပေတိုရွှမ်းက ကျေနပ်စွာ ပြုံးရယ်လျက် မေးလိုက်သည်။

“ဒါကို ကန့်ကွက်မယ့်သူ ရှိသေးလား”

“ကျိုးမိသားစုက ပေတိုမိသားစုနဲ့ မဟာမိတ်ပြုဖို့ ဆန္ဒရှိပါတယ်”

“ပေတိုမိသားစုက အင်အားကြီးမားပြီး ကျွန်တော်တို့ကို ပိုပြီး အင်အားကြီးလာအောင် ဦးဆောင်နိုင်မှာ သေချာပါတယ်။ ကျွန်တော့် ချင်မိသားစုကလည်း ဆန္ဒရှိပါတယ်”

“ကျွန်တော်တို့ ဝေမိသားစုလည်း အတူတူပါပဲ”

ပေတိုရွှမ်း၏ အသံ ကုန်ဆုံးသွားသည်နှင့် မိသားစု ဆယ်ခုထက်မနည်းက လက်အောက်ခံရန် သဘောတူလိုက်ကြသည်။ သူတို့၏ အင်အားမှာ ပေတိုမိသားစုကို ရင်ဆိုင်ရန် အလွန် အားနည်းလှသည်။ အသက်ရှင်သန်လိုပါက သူတို့ လက်အောက် ခိုဝင်ရပေမည်။

သို့သော် အင်အားစု အများစုမှာ သူတို့၏ သဘောထားကို ထုတ်ဖော် ပြောကြားခြင်း မရှိသေးပေ။

ဖုန်းလန်ဂိုဏ်း နန်းကုန်းမိသားစု ရှီဟွမ်ဂိုဏ်းနှင့် လေလံရုံတို့မှာလည်း သဘောထား မပေးသေးချေ။

“ပေတို မိသားစုခေါင်းဆောင် ပေတိုမိသားစုက အရှင်သခင် နေရာကို ပြန်လည် ရယူတာကို ကျွန်တော်တို့ စူးမိသားစုက ငြင်းခုံစရာ မရှိပါဘူး။ ဒါပေမဲ့ ကျွန်တော်တို့က ဘယ်အင်အားစုရဲ့ လက်အောက်ကိုမှ မဝင်ချင်သလို ဘယ်အင်အားစုနဲ့မှလည်း ရန်သူ မဖြစ်ချင်ပါဘူး" စူးမိသားစု ခေါင်းဆောင်က ဖြည်းညှင်းစွာ ဆိုလိုက်သည်။

“ယန်မိသားစုလည်း သဘောထား အတူတူပါပဲ။ ကျွန်တော်တို့ ဘယ်အငြင်းပွားမှုထဲမှာမှ ဝင်မပါချင်ပါဘူး။ မိသားစုခေါင်းဆောင် ပေတို တောင်းပန်ပါတယ်" ယန်မိသားစု ခေါင်းဆောင်က ဆိုသည်။

“ပေတို မိသားစုခေါင်းဆောင် ကျွန်တော်တို့ အင်အားစုတွေက အားနည်းပါတယ်။ အေးအေးချမ်းချမ်းပဲ နေထိုင်ချင်တာပါ။ ပေတို မိသားစုခေါင်းဆောင် နားလည်ပေးနိုင်မယ်လို့ မျှော်လင့်ပါတယ်”

အင်အားစုများနှင့် မိသားစုများက တစ်ဖွဲ့ပြီးတစ်ဖွဲ့ သူတို့သည် မည်သည့် အငြင်းပွားမှုတွင်မှ ဝင်မပါလိုကြောင်း 'ကျိုကျိုး' ကိုးပြည်ထောင်၏ ကိစ္စများတွင် ဝင်မစွက်လိုကြောင်း ဖော်ပြကြသည်။

သူတို့၏ ဆိုလိုရင်းမှာ ရှင်းလင်းလှသည်။ ပေတိုမိသားစု၏ လက်အောက်သို့ ခိုဝင်ရန် သွယ်ဝိုက်သောအားဖြင့် ငြင်းဆန်လိုက်ခြင်း ဖြစ်သည်။

ပေတိုရွှမ်းက ခေါင်းညိတ်လိုက်ပြီး နှစ်လိုဖွယ် အပြုံးဖြင့် ဆိုသည်။ “ရပါတယ်။ မင်းတို့က ပေတိုမိသားစုနဲ့ မပူးပေါင်းချင်ဘူး ဆိုရင်တောင် ပေတိုမိသားစုက ဆန့်ကျင်သူ အားလုံးကို ရှင်းလင်းပစ်မှာပဲ။ လက်အောက်မခံတဲ့သူ မှန်သမျှ တစ်ယောက်မကျန် သုတ်သင်ရှင်းလင်းခြင်း ခံရလိမ့်မယ်”

ဤစကားကို ကြားလိုက်ရသောအခါ ခန်းမဆောင်အတွင်းရှိ လူတိုင်း၏ မျက်နှာများမှာ သုန်မှုန်သွားကြသည်။

လက်အောက်မခံလျှင် သေရမည်။

ထိုစဉ်၊ “ပေတိုမိသားစု လက်အောက်ကို ခိုဝင်။ ငါတို့ အရာအားလုံးကို ဆွေးနွေးလို့ရတယ်။ မဝင်တဲ့ကောင်တွေ သေ" ဟု ပေတိုမိသားစု၏ ဒုတိယ အကြီးအကဲ ပေတိုယန့်ဖုန်းက အေးစက်စွာ ဆိုလိုက်သည်။

သူ၏ ကြောက်မက်ဖွယ် အရှိန်အဝါက အပြင်သို့ ဖိနှိပ်ရိုက်ခတ်သွား၏။

ပေတိုမိသားစုသည် 'ကျိုကျိုး' ကိုးပြည်ထောင်မှ အင်အားကြီးငယ် အားလုံးကို လွှမ်းမိုးချုပ်ကိုင်နိုင်သော အင်အားဖြင့် ချေမှုန်းရန်နှင့် အတင်းအကျပ် လက်အောက်ခံစေရန် ရည်ရွယ်နေသည်။

“ပေတိုမိသားစုက အရှင်သခင် နေရာအတွက် တိုက်ခိုက်တာကို ကျွန်တော်တို့ ဘာမှ မပြောလိုပါဘူး။ ဒါပေမဲ့ လက်ဆောင်တွေ ဆက်သခိုင်းပြီး လက်အောက်ခံခိုင်းတာကတော့ အရမ်း မလွန်လွန်းဘူးလား”

“လက်ဆောင်မဆက်သရင် သေရမယ်။ လက်အောက်မခံရင်လည်း သေရမယ်။ ဒါက တရားလွန်တာထက် ပိုမနေဘူးလား။ ပေတိုမိသားစုက တကယ့်ကို အာဏာရှင်ဆန်ပြီး အကြောင်းပြချက် မရှိဘူး”

“ပေတိုမိသားစုက အရှင်သခင် နေရာကို ယှဉ်ပြိုင်ချင်တာ ကျွန်တော်တို့ မတားပါဘူး။ ဒါပေမဲ့ ဘာလို့ လက်ဆောင်တွေ ဆက်သရမှာလဲ။ ဒါက 'ကျိုကျိုး' ကိုးပြည်ထောင် အင်ပါယာ မဟုတ်ဘူး”

ဤအချိန်တွင် ပိုမို အင်အားကြီးသော အင်အားစုများနှင့် မိသားစုအချို့က သူတို့၏ သဘောထားကို စတင် ဖော်ပြလာကြသည်။ သူတို့သည် ပေတိုမိသားစု လက်အောက်သို့ ခိုဝင်ရန် ဆန္ဒမရှိကြပေ။

ပေတိုမိသားစု၏ လုပ်ရပ်မှာ အမှန်တကယ်ပင် အလွန်အကျွံ ဖြစ်နေ၏။

မိသားစုက ပြန်လည် ထွက်ပေါ်လာသည်နှင့် အင်အားစု အားလုံးကို လက်အောက်ခံရန်နှင့် လက်ဆောင်များ ဆက်သရန် အင်အားသုံး နည်းလမ်းများကို အသုံးပြုနေသည်။ မည်သူမဆို သူတို့ နေရာတွင် ရှိပါက ဆန္ဒရှိကြမည် မဟုတ်ပေ။

“ကျွန်တော်က ဝမ်ယွင်ဂိုဏ်းက ရှရှယွီ ပါ။ ပေတို မိသားစုခေါင်းဆောင် အကယ်၍သာ ခင်ဗျား နေရာမှာ ဆိုရင် ခင်ဗျားက တခြား အင်အားစုတွေ လက်အောက်ကို ခိုဝင်မှာလား။ တခြား အင်အားစုတွေကို လက်ဆောင်တွေ ဆက်သဖို့ ဆန္ဒရှိမှာလား။ လက်အောက်ခံဖို့နဲ့ လက်ဆောင် ဆက်သဖို့ ကိစ္စကိုတော့ ဝမ်ယွင်ဂိုဏ်းက လုံးဝ ငြင်းဆိုပါတယ်" ဝမ်ယွင်ဂိုဏ်း၏ ဂိုဏ်းချုပ်ငယ် ရှရှယွီ က မနှိမ့်ချ မမြင့်မားဘဲ အင်အားကြီးသော ပြိုင်ဘက်များကို မကြောက်ရွံ့သော မာန်ဖြင့် ဆိုလိုက်သည်။

“ဝမ်ယွင်ဂိုဏ်းကကိုး။ မင်းရဲ့ ထျန်းယွမ်ဘုံ ပထမလွှာ အစွမ်းက တကယ် မဆိုးဘူး။ ဒါပေမဲ့ ဝမ်ယွင်ဂိုဏ်းက အဓိက အင်အားစု ငါးခုထဲမှာတောင် မပါဘူး။ မင်း ဘယ်အခြေခံနဲ့ ဒီလို စကားတွေ ပြောရဲတာလဲ ဆိုတာ ငါ သိချင်သေးတယ်" ပေတိုမိသားစုမှ လူငယ် အဖွဲ့ဝင်တစ်ဦးက အေးစက်စွာ ဆိုရင်း ရှေ့သို့ ထွက်လာသည်။

ဤလူမှာ ပေတိုမိသားစု၏ ပါရမီရှင် လူငယ် ပေတိုရှန် ဖြစ်ပြီး သူသည်လည်း ထျန်းယွမ်ဘုံ ပထမလွှာ၌ ရှိနေသည်။

ဤအခြေအနေကို မြင်သောအခါ အင်အားစု အသီးသီးမှ အဆင့်မြင့် ပုဂ္ဂိုလ်များမှာ နောက်သို့ ဆုတ်သွားကြသည်။

ထိုစကားကို ကြားသောအခါ ရှရှယွီ ၏ မျက်မှောင်များ ကြုတ်သွားပြီး သူက လေးနက်စွာ ပြန်ပြောလိုက်သည်။

“ပေတိုမိသားစုက အင်အားကြီးတာ သံသယမရှိပါဘူး။ ဒါပေမဲ့ ကျွန်တော့် ဝမ်ယွင်ဂိုဏ်းကလည်း ဘယ်သူ့ရဲ့ အနိုင်ကျင့်မှုကိုမှ ခံရမယ့် ဂိုဏ်း မဟုတ်ဘူး။ ခင်ဗျားတို့က အင်အားသုံးပြီး အတင်းအကျပ် လက်အောက်ခံခိုင်းချင်တယ် ဆိုရင်တော့ အဲ့ဒါ တကယ် လွဲနေပြီ”

“ဒါဆိုရင်တော့ မင်းမှာ ငါနဲ့ ယှဉ်ပြိုင်ဖို့ အစွမ်းအစ ရှိမရှိ ကြည့်ကြသေးတာပေါ့။ စလိုက်လေ"

ပေတိုရှန်က အရာအားလုံးကို သူ့အောက်၌ ထားသည့်ဟန်ဖြင့် မောက်မာထောင်လွှားစွာ ဆိုလိုက်သည်။

“ဟွန့်" ရှရှယွီ က ပြင်းထန်စွာ အေးစက်စက် နှာခေါင်းရှုံ့လိုက်ပြီး သူ၏ အရှိန်အဝါက အရိုင်းအစိုင်း ပေါက်ကွဲ ထွက်ပေါ်လာသည်။ သူ၏ အစစ်အမှန်ယွမ်စွမ်းအင်ကို အစွမ်းကုန် လှုံ့ဆော်လိုက်၏။

“ယွမ်အာ သတိထား" ဝမ်ယွင်ဂိုဏ်း၏ ဂိုဏ်းချုပ်က မျက်မှောင်ကြုတ်ရင်း အကြံပေးလိုက်သည်။

“ဘုန်း”

ရှရှယွီ က ပထမဆုံး စတင် တိုက်ခိုက်လိုက်သည်။ ပေါက်ကွဲထွက်သော အင်အားဖြင့် ရှေ့သို့ တိုးဝင်သွားရာ သူ၏ အစွမ်းထက်သော အင်အားကြောင့် မြေပြင်မှာ ချိုင့်ဝင်ကာ အက်ကွဲသွားသည်။

ရှရှယွီ ၏ အမြန်နှုန်းမှာ အံ့ဩစရာ ကောင်းလှသည်။ မျက်စိ တစ်မှိတ် နှစ်မှိတ် အတွင်းမှာပင် သူသည် ပေတိုရှန်၏ အနားသို့ ရောက်ရှိသွားခဲ့ပြီ ဖြစ်သည်။

“နက်နဲခြင်းအဆင့် အဆင့်မြင့် သိုင်းပညာ ”

ရှရှယွီ က သူ၏ အပြင်းထန်ဆုံး သိုင်းပညာကို အသုံးပြု၍ တိုက်ခိုက်ရန် ပြင်းထန်စွာ အော်ဟစ်လိုက်သည်။ သို့သော် သူ လှုပ်ရှားလိုက်သည့် ထိုအခိုက်အတန့်မှာပင် သူ၏ မျက်နှာအမူအရာမှာ ကွက်ခနဲ ပျက်သွားသည်။

ရှရှယွီ ရှေ့သို့ တိုးဝင်လာသည့် အခိုက်အတန့်မှာပင် ပေတိုရှန်က ကြောက်မက်ဖွယ် စွမ်းအင်တစ်ခုကို ထုတ်လွှတ်လိုက်ပြီး ဖြစ်သည်။ ရှရှယွီ က သူ၏ သိုင်းပညာကို အသုံးမပြုနိုင်မီမှာပင် ပေတိုရှန်က ပို၍ ကြောက်မက်ဖွယ်ကောင်းသော အမြန်နှုန်းဖြင့် တိုက်ခိုက်လိုက်ပြီး ရှရှယွီ ၏ ဝမ်းဗိုက်ကို လက်သီးတစ်လုံး ပစ်ထုတ်လိုက်သည်။

မိုးကြိုးပစ်သံကဲ့သို့ ပေါက်ကွဲသံနှင့်အတူ ကြောက်မက်ဖွယ် စွမ်းအင်ကြောင့် ရှရှယွီ တစ်ယောက် ချက်ချင်း သွေးများ ဝေါ့ခနဲ အန်ချလိုက်ရပြီး နောက်သို့ လွင့်စင်သွားတော့သည်။

နှစ်ဦးစလုံး ထျန်းယွမ်ဘုံ ပထမလွှာချင်း တူညီသော်လည်း ရှရှယွီ မှာ ပေတိုရှန်၏ ရှေ့တွင် ပြန်လည် တိုက်ခိုက်ရန် အခွင့်အရေးပင် မရလိုက်ပေ။

“မင်းမှာ ဒီလောက်ပဲ အရည်အချင်း ရှိတာလား" ပေတိုရှန်က မထီမဲ့မြင် ဆိုလိုက်သည်။

ထိုလက်တစ်သီးတစ်ချက်တည်းဖြင့် ပေတိုရှန်က ရှရှယွီ ကို အပြင်းအထန် ဒဏ်ရာရစေခဲ့သည်။

ထျန်းယွမ်ဘုံ ပထမလွှာမှ တစ်ယောက်ကို လက်သီးတစ်ချက်တည်းဖြင့် အပြင်းအထန် ဒဏ်ရာရစေသည်။ ဤသည်မှာ ဘယ်လောက် ကြောက်မက်ဖွယ်ကောင်းသော အစွမ်းမျိုးပါနည်း။

ရှရှယွီ သည် ဝမ်ယွင်ဂိုဏ်း၏ ဂိုဏ်းချုပ်ငယ် တစ်ယောက်အနေဖြင့် ငယ်ရွယ်စဉ်မှာပင် ထျန်းယွမ်ဘုံ ပထမလွှာသို့ ဝင်ရောက်နိုင်ခဲ့သူ ပါရမီရှင်တစ်ဦးဟု သတ်မှတ်ခံရသူ ဖြစ်သည်။ သူသည် အချို့သော မိသားစုကြီးများမှ ပါရမီရှင်များထက် များစွာ ပိုမို အစွမ်းထက်သော်လည်း ယခုမူ သူ တိုက်ခိုက်ရန် အခွင့်အရေးပင် မရလိုက်ချေ။

ပေတိုရှန်၏ အစွမ်းမှာ ထျန်းယွမ်ဘုံ ဒုတိယလွှာနှင့်ပင် ယှဉ်ပြိုင်နိုင်လောက်အောင် အင်အားကြီးမားလာဖွယ် ရှိသည်။ ထို့ကြောင့် ရှရှယွီ က သူ၏ ပြိုင်ဘက် မည်သို့ ဖြစ်နိုင်မည်နည်း။

ဝမ်ယွင်ဂိုဏ်း၏ ဂိုဏ်းချုပ်ငယ်ကို လက်သီးတစ်ချက်တည်းဖြင့် အနိုင်ယူလိုက်သည်။ ဤသည်မှာ မည်မျှ ကြီးကျယ်သော စွမ်းပကားပါနည်း။

နေရာတစ်ခုလုံးမှာ သေမတတ် တိတ်ဆိတ်သွားပြီး လူတိုင်းက ပေတိုရှန်ကို ကြောက်ရွံ့တုန်လှုပ်စွာ စိုက်ကြည့်နေကြသည်။

“ဝမ်ယွင်ဂိုဏ်းက ကိုယ့်ကိုယ်ကိုယ် အထင်ကြီးပြီး ငါ့ ပေတိုမိသားစုကို ရန်သူအဖြစ် လာလုပ်တာ။ သူတို့ကို သတ်လိုက်တာက ကိစ္စမရှိပါဘူး" ပေတိုရွှမ်းက အလွန် ပျော်ရွှင်နေသည့်အလား တဟဲဟဲ ရယ်မောရင်း ဆိုလိုက်သည်။

“ဘာ" ဝမ်ယွင်ဂိုဏ်း ဂိုဏ်းချုပ်၏ မျက်နှာ ကွက်ခနဲ ပျက်သွားပြီး ဒေါသဖြင့် ရှုံ့မဲ့ကာ အော်ဟစ်လိုက်သည်။

“ပေတိုရွှမ်း မင်း အရမ်း မလွန်လွန်းနဲ့”

မေးခွန်းပင် မမေးဘဲ သတ်ဖြတ်ခြင်း…။

နေရာအတွင်းမှ အင်အားကြီး ပုဂ္ဂိုလ်တိုင်း သွေးပျက်မတတ် ကြောက်လန့်သွားကြသည်။

ပေတိုမိသားစုက ဝမ်ယွင်ဂိုဏ်းကို နမူနာ ပြလိုက်ခြင်း ဖြစ်သည်။ ဤသည်မှာ ကြက်ကိုသတ်၍ မျောက်ကို ခြောက်ခြင်း ပါတကား။

“သတ်" ပေတိုရွှမ်းက ပျော်ရွှင်စွာ ရယ်မောရင်း အမိန့်ပေးလိုက်သည်။

“ဝှီး”

“ချွင် ချွင် ချွင်”

ပေတိုရွှမ်း၏ အသံ ထွက်ပေါ်လာသည်နှင့် ထျန်းယွမ်ဘုံ ပဉ္စမ အဆင့်ရှိ လူလတ်ပိုင်းတစ်ဦးက ရိပ်ခနဲ ပြေးထွက်လာသည်။ ကြောက်မက်ဖွယ် အမြန်နှုန်းဖြင့် သူက ဝမ်ယွင်ဂိုဏ်း၏ ဂိုဏ်းချုပ် အကြီးအကဲ သုံးဦးနှင့် ရှရှယွီ တို့ကို ချက်ချင်း သတ်ဖြတ်ပစ်လိုက်သည်။

မျက်စိတစ်မှိတ်အတွင်းမှာပင် ဝမ်ယွင်ဂိုဏ်း၏ အဆင့်မြင့် ပုဂ္ဂိုလ်များအားလုံး သေဆုံးသွားခဲ့လေပြီ။

လူအုပ်ကြီးမှာ ပြန်လည် မတုံ့ပြန်နိုင်မီမှာပင် ထိုလူမှာ သူ၏ မူလနေရာသို့ ပြန်လည် ရောက်ရှိနေလေပြီ။

အစွမ်းထက်လှသည်။ မဖြစ်နိုင်လောက်အောင် အစွမ်းထက်လှသည်။

နေရာတစ်ခုလုံးကို သေမတတ် တိတ်ဆိတ်ခြင်းက နောက်တစ်ကြိမ် လွှမ်းခြုံသွားပြန်သည်။ သေခြင်းအငွေ့အသက်တို့က လေထုထဲတွင် ထူထပ်နေ၏။

လူတိုင်း၏ မျက်နှာပေါ်တွင် ကြောက်ရွံ့ခြင်းများ အထင်းသား ပေါ်လွင်နေသည်။

“ကန့်ကွက်မယ့်သူ ရှိသေးလား။ ထွက်ခဲ့လေ။ ငါ့ ပေတိုမိသားစုက ကန့်ကွက်သူ အားလုံးဆီက စိန်ခေါ်မှုကို လက်ခံမှာပါ" ပေတိုရွှမ်းက သူ၏ မျက်နှာအိုကြီးထက်တွင် အပြုံးတစ်ခုကို ချိတ်ဆွဲရင်း မေးလိုက်သည်။

“ဝမ်မိသားစုက လက်အောက်ခံဖို့ ဆန္ဒရှိပါတယ်။ ဆန္ဒရှိပါတယ်”

“ယွီမိသားစုလည်း ဆန္ဒရှိပါတယ်”

“ခိုင်ထျန်းမြို့ကလည်း လက်အောက်ခံပါ့မယ်”

“ထျန်းတောက် စံအိမ်ကလည်း လက်အောက်ခံဖို့ ဆန္ဒရှိပါတယ်”

'ကျိုကျိုး' ကိုးပြည်ထောင်တစ်ဝှမ်းမှ အင်အားစုများနှင့် မိသားစုများစွာတို့မှာ တစ်ဖွဲ့ပြီးတစ်ဖွဲ့ လက်အောက်ခံလိုက်ကြသည်။ ပေတိုမိသားစု၏ နည်းလမ်းများမှာ အမှန်တကယ် ကြောက်မက်ဖွယ်ကောင်းပြီး အလွန်အမင်း ရက်စက် ကြမ်းကြုတ်လှသည်။

ဝမ်ယွင်ဂိုဏ်းကို ပုံစံပြ သတ်ဖြတ်လိုက်ခြင်းဖြင့် ပေတိုမိသားစုသည် များစွာသော အင်အားစုများနှင့် မိသားစုများ၏ ခုခံကာကွယ်လိုစိတ်ကို ထိထိရောက်ရောက် ချိုးဖျက်ပစ်လိုက်နိုင်ခဲ့၏။

အင်အားစုများနှင့် မိသားစုများစွာ လက်အောက်ခံလာသည်နှင့် ပေတိုရွှမ်း၏ မျက်နှာထက်မှ အပြုံးမှာ ပို၍ပင် တောက်ပလာပြီး အလွန် ကျေနပ်နေပုံ ပေါက်နေသည်။

“ပေတိုမိသားစုကို လက်အောက်ခံပါ။ ငါတို့က မင်းတို့ကို တရားမျှတမှု မရှိဘဲ ဆက်ဆံမှာ မဟုတ်ဘူး" ပေတိုယန့်ခုံက ခံစားချက်ကင်းမဲ့စွာ ဆို၏။

ဤအချိန်တွင် ရှောင်မိသားစုမှ ရှောင်ချင်းရှန်က ရုတ်တရက် ထပြောလိုက်သည်။

“ပေတို မိသားစုခေါင်းဆောင်၊ ရှောင်မိသားစုကလည်း လက်အောက်ခံဖို့ ဆန္ဒရှိပါတယ်”

ထိုစကားကို ကြားသော် ပေတိုရွှမ်း တစ်ယောက် တစ်ခဏမျှ တုံ့ခနဲ ရပ်လိုက်သည်။

“ကောင်းတယ်။ ကောင်းတယ်"

သူက ရှောင်မိသားစုကို အနည်းငယ် အံ့အားသင့်ဟန်ဖြင့် ကြည့်လိုက်ပြီးနောက် အားပါးတရ ရယ်မောလိုက်တော့၏။

ရှောင်မိသားစုသည် ကြောက်မက်ဖွယ် အင်အားဖြင့် 'ကျိုကျိုး' ကိုးပြည်ထောင်၏ အဓိက အင်အားစုကြီး ငါးခုထဲမှ တစ်ခု ဖြစ်သည်။ ရှောင်မိသားစု၏ လက်အောက်ခံခြင်းက ပေတိုမိသားစုကို သံသယမရှိဘဲ များစွာ အင်အား ဖြည့်တင်းပေးလိုက်သည်။

ပေတိုယန့်ခုံမှာလည်း ပျော်ရွှင်စွာ ရယ်မောလိုက်သည်။ “အချိန်ရရင်တော့ ငါ ရှောင်မိသားစုရဲ့ ဂုဏ်သရေရှိ ခေါင်းဆောင်ဆီကို ကိုယ်တိုင် လာလည်ရမယ်”

ရှောင်မိသားစု၏ လက်အောက်ခံခြင်းမှာ လူတိုင်း၏ မျှော်လင့်ချက်ထက် ကျော်လွန်သွားပြီး အံ့အားသင့်နေသော မျက်လုံးများစွာမှာ ရှောင်မိသားစု၏ ထိပ်တန်း ပုဂ္ဂိုလ်များထံသို့ လှည့်သွားကြသည်။

“ရှောင်ချင်းရှန် ၊အသုံးမကျတဲ့ အမှိုက်ကောင်" မော့ယန်က မျက်မှောင်ကြုတ်ကာ ဒေါသတကြီး ရှုံ့ချလိုက်သည်။

“ဒါ ရှောင်ထျန်းချန်ရဲ့ ရည်ရွယ်ချက်လား" လိန်ဝူယဲ့တစ်ယောက် မယုံကြည်နိုင်လောက်အောင် တုန်လှုပ်သွားသည်။ ဤသည်မှာ ရှောင်ချင်းရှန်၏ ကိုယ်ပိုင် ဆုံးဖြတ်ချက်လား သို့မဟုတ် ရှောင်ထျန်းချန်၏ ဆုံးဖြတ်ချက်လား ဆိုသည်ကို သူ မသေချာခဲ့ပေ။

'ကျိုကျိုး' ကိုးပြည်ထောင်၏ အဓိက အင်အားစုကြီး ငါးခုထဲမှ တစ်ခု ဖြစ်သော ရှောင်မိသားစုက အမှန်တကယ် လက်အောက်ခံလိုက်သည်ကို လူတိုင်း မယုံကြည်နိုင်အောင် ဖြစ်သွားကြသည်။

ယခု အခြေအနေအရ လေလံရုံ နန်းကုန်းမိသားစု ရှီဟွမ်ဂိုဏ်း ဖုန်းလန်ဂိုဏ်းနှင့် အခြား အင်အားကြီးသော အဖွဲ့အစည်း အနည်းငယ်မှလွဲ၍ အခြား အင်အားစုများနှင့် မိသားစုများအားလုံးမှာ အတင်းအကျပ် လက်အောက်ခံလိုက်ကြရပြီ ဖြစ်သည်။

“ငါ မေးစရာတစ်ခု ရှိတယ်"

ပေတိုရွှမ်းက လူအုပ်ကို ဝေ့ကြည့်ပြီးနောက် ရုတ်တရက် မေးလိုက်သည်။

“ဘာလို့ ငါ ပေမင် ဘိုးဘေးကို မတွေ့ရတာလဲ။ ကျန်းလင်တောင်ကြားက လူတွေ မလာကြဘူးလား”

ထိုအခါ၊ တစ်စုံတစ်ယောက်က ထပြောလိုက်သည်။

“ပေတို မိသားစုခေါင်းဆောင် ကျန်းလင်တောင်ကြားက ချေမှုန်းခံလိုက်ရပါပြီ။ တောင်ကြားတစ်ခုလုံးက တပည့်တွေ အသတ်ခံလိုက်ရတယ်”

“ပေမင် ဘိုးဘေး ပေမင်မြစ်နဲ့ ကျန်းလင်တောင်ကြားက ထိပ်သီးပညာရှင်တွေ အားလုံး အသတ်ခံလိုက်ရတယ်။ တောင်ကြားသခင်လေး ပေမင်ခုံ တစ်ယောက်တည်းပဲ အသက်ပြန်ရှင်လာခဲ့တာပါ" နောက်တစ်ယောက်က ထပ်ပြောလိုက်သည်။

“ဟေ။ ဟုတ်လား" ပေတိုရွှမ်း တစ်ယောက် အလွန်အမင်း အံ့အားသင့်သွားသည်။

ပေတိုမိသားစု၏ အဆင့်မြင့် ပုဂ္ဂိုလ်များမှာလည်း တုန်လှုပ်သွားကြသည်။ အဓိက အင်အားစုကြီး ငါးခုထဲမှ တစ်ခု ဖြစ်သော ကျန်းလင်တောင်ကြား ချေမှုန်းခံလိုက်ရသည်တဲ့။

ပေမင်ခုံက အသက်ပြန်ရှင်လာခဲ့သည်။

“ပေတို မိသားစုခေါင်းဆောင်၊ ဒါကို ဖုန်းဝူချန်က လုပ်ခဲ့တာပါ" ရှောင်ချင်းရှန်က လေးစားစွာ ဆိုလိုက်ပြီး အဖြစ်အပျက်များကို ပြန်လည် ပြောပြလိုက်သည်။

“ဖုန်းဝူချန်" ပေတိုရွှမ်းက မျက်မှောင် အနည်းငယ် ကြုတ်လိုက်ပြီး မေးသည်။

“ဒီလူက တကယ် အဲ့လောက် စွမ်းလို့လား။ ယန်ဟော် အင်ပါယာလို သေးငယ်တဲ့ နိုင်ငံလေးက လာတာ။ သူတို့ဆီမှာ ဒီလို ပါရမီရှင်မျိုး ရှိနိုင်လို့လား”

ရှောင်ချင်းရှန်က ဖုန်းဝူချန်၏ စွမ်းဆောင်ရည်များကို အကြမ်းဖျင်း ရှင်းပြလိုက်ရာ ပေတိုမိသားစုမှာ တုန်လှုပ်သွားသလို မယုံကြည်နိုင်လည်း ဖြစ်သွားသည်။

ပဉ္စမ အဆင့် "တစ်ချက်တည်းသော အတွေးဖြင့် " လက်နက်သန့်စင်သူ။

အစွမ်းထက်သော "တစ်ချက်တည်းသော အတွေးဖြင့် “ ဆေးဖော်စပ်ခြင်း" ဆေးပညာရှင်။

ယန်ဟော် အင်ပါယာ၏ နံပါတ်တစ် ပါရမီရှင်။

'ကျိုကျိုး' ကိုးပြည်ထောင်၏ ထိပ်သီး ပါရမီရှင်ကို အနိုင်ယူခဲ့သည်ဟု ကောလာဟလ ထွက်နေသူ။

ဤ အထင်ကြီးဖွယ် စွမ်းဆောင်ရည်များအားလုံးက ပေတိုမိသားစုကို လှုပ်ခါသွားစေသည်။

ဤလောကတွင် ဤသို့ ထူးကဲသော ပါရမီရှင်မျိုး အမှန်တကယ် တည်ရှိနိုင်ပါမည်လော။

ရှောင်ချင်းရှန်က ခေါင်းညိတ်လိုက်ပြီး "ဒီကောင်စုတ်လေးက မကြာသေးခင်က လေလံရုံမှာ ရှိနေခဲ့တာပါ။ သူ့အစွမ်းက တကယ် ကြောက်ဖို့ကောင်းတာ မှန်ပါတယ်။ ဒါပေမဲ့ ပေတိုမိသားစု ဝင်ပါလာမှတော့ သူ့သေလမ်းက သေချာနေပါပြီ" ဟု သွေးထိုးပေးလိုက်သည်။

"လေလံရုံ"

ပေတိုယန့်ခုံ၏ မျက်နှာ ကွက်ခနဲ ပျက်သွားသည်။

သူ ချက်ချင်းပင် ဖုန်းဝူချန်ကို တွေးလိုက်မိသည်။ သူ မျက်မှောင်ကြုတ်လိုက်ပြီး

"သူ သူ ဖြစ်နိုင်မလား။ အစွမ်းထက်တဲ့ 'တစ်ချက်တည်းတွေး ဆေးဖော်စပ်ခြင်း' ဆေးပညာရှင်ဆိုတာ အဲ့ဒီ သူတောင်းစားလေး ဖြစ်ရမယ်။ မှားစရာ မရှိဘူး။ အမှောင်ထဲကနေ ဒုက္ခပေးနေတာ သူ သူပဲ ဖြစ်ရမယ်" ဟု ရေရွတ်လိုက်မိသည်။

ဤသို့ ပြောလိုက်စဉ် ပေတိုယန့်ခုံ၏ အကြည့်များက လေလံရုံဘက်သို့ အလိုအလျောက် ရောက်ရှိသွားပြီး ချူချန်ခုံးကို သွေးဆာနေသည့် အကြည့်ဖြင့် စူးစိုက်ကြည့်လိုက်သည်။

“ချူချန်ခုံး။ အဲ့ဒီကောင်လေးက ဖုန်းဝူချန် ဟုတ်မဟုတ် ပြောစမ်း"

ပေတိုယန့်ခုံက မေးခွန်းထုတ်သလို ဟိန်းဟောက်လိုက်လေသည်။