သွေးတမန်တော် ရောက်ရှိလာခြင်း

ခန်းမတစ်ခုလုံး တိတ်ဆိတ်ငြိမ်သက်သွားလေသည်။ လူအများအပြားသည် ၎င်းတို့​၏မျက်လုံးများကို မယုံကြည်နိုင်ဖြစ်နေသည်။ အဘယ်ကြောင့်ဆိုသော် ရွှယ်အန်းသည် အစမှအဆုံးအထိ အနည်းငယ်မျှ မလှုပ်ရှားခဲ့သောကြောင့်ဖြစ်သည်။ သို့သော် ဘစ်စ်သည် နှစ်ကြိမ်ဆက်တိုက် ရှုံးနိမ့်ခဲ့ပြီးနောက် အကြောင်းအရင်းမရှိဘဲ နောက်ပြန်လွင့်ထွက်သွားကာ သတိလစ်သွားလေသည်။ မှော်ပညာ တတ်မြောက်ထားသောကြောင့်ဖြစ်လျှင်ပင် သဲလွန်စအချို့ရှိနေသင့်သည်။

ဤဖြစ်စဉ်သည် စုန်းအတတ်နှင့်ပင် ဆင်တူသည်။ ယခုအခါ လူများစွာသည် ရွှယ်အန်းကို ယခင်ကနှင့် မတူညီသည့် အမူအရာဖြင့် ကြည့်နေကြသည်၊ တချို့သည် ကြောက်ရွံ့နေကြ၍ တချို့သည့် အံ့ဩနေကြသည်။ လီနာလျှင်ပင် ရွှယ်အန်းကို အံ့အားသင့်မှုအပြည့်ဖြင့် ကြည့်နေသည်။

ရွှယ်အန်းက ခေါင်းခါ၍ သက်ပြင်းချလိုက်သည်။

"ခင်ဗျားက လက်သီးချက်ကို တကယ် ခံနိုင်ရည်မရှိတာပဲ၊ ကျုပ် ထိန်းချုပ်ထားတာတောင် ခင်ဗျားက မရှောင်နိုင်သေးပါလား”

ပြီးနောက် ရွှယ်အန်းသည် ထိုနေရာတွင်ရှိနေသည့် အထက်တန်းလွှာပုဂ္ဂိုလ်များအားလုံးကို လှည့်ပတ်ကြည့်ရှုလိုက်သည်။ ရွှယ်အန်း​၏ အကြည့်ကို မည်သူမျှ ရင်မဆိုင်ရဲကြရာ၊ သူ​၏အကြည့်များ ကျရောက်လာသည့်နေရာတိုင်းရှိ လူတိုင်း ခေါင်းငုံ့သွားကြသည်။ ထိုအချိန်တွင် တံခါးဝတွင် ရုန်းရင်းဆန်ခတ်မှုများ ဖြစ်ပေါ်လာသည်။

ထိုမှတစ်ဆင့် စိတ်လှုပ်ရှားသော အသံတစ်ခု ထွက်ပေါ်လာသည်။

“အရှင်မင်းကြီး ပြန်ရောက်လာပြီ၊ အရှင်မင်းကြီး ပြန်ရောက်လာပြီ”

အတန်ငယ် လေးနက်နေသော လေထုအခြေအနေသည် ချက်ချင်းပင် လောင်မြိုက်သွားလေသည်။ အထက်တန်းလွှာ အမျိုးကောင်းသားတို့သည် တံခါးဝဆီသို့ အပြေးနှင့်၍ ဦးညွှတ်လျက် ရပ်တန့်နေကြသည်။ မင်းသမီးလိုယာနှင့် ယာ့ကောတို့ ဦးစွာ ဝင်ရောက်လာကြသည်။ အထဲဝင်လာပြီးနောက် ၎င်းတို့သည်လည်း ဘေးဘက်တွင် ရပ်တန့်နေကြသည်။ ပြီးနောက် ဩဇာကြီးသော အရောင်အဝါနှင့် ခမ်းနားထည်ဝါသော မျက်နှာအမူအရာမျိုးရှိသည့် သက်လတ်ပိုင်း အမျိုးသားတစ်ဦး ဝင်ရောက်လာသည်။

သူ​၏အသွင်အပြင်သည် ခန်းမတစ်ခုလုံးကို အနည်းငယ် ရုန်းရင်းဆန်ခတ်ဖြစ်သွားစေသည်။

“လီကျွင်း ပြန်ရောက်လာပြီ”

“ဟားဟား၊ အခုတော့ ပွဲကောင်းပြီပေါ့”

လူအများအပြားသည် ဘဝင်ခိုက်နေသော အမူအရာဖြင့် ရွှယ်အန်းကို လှည့်ကြည့်လိုက်ကြသည်။ သို့သော် ရွှယ်အန်းသည် မတုန်မလှုပ်ဘဲ တိတ်တဆိတ်သာ ကြည့်နေခဲ့သည်။

ထိုလူများဝင်ရောက်လာပြီးနောက် လေထုထဲတွင် ဗုံတီးသံများ ပြည့်နှက်လာကာ ဖော်လံဖားနေသော ရယ်သံနှင့် စကားသံများထွက်ပေါ်လာသည်။

“ကျွန်တော်တို့ရဲ့ သေးငယ်တဲ့ ကျဲ့တိုင်းပြည်က ဧည့်ဝတ်ပြုရာမှာ ချို့ယွင်းချက်တွေရှိနေတဲ့အတွက် ကျေးဇူးပြုပြီး ခွင့်လွှတ်ပေးပါ နတ်တမန်တော်”

ထိုအသံကို ကြားလိုက်ရသောအခါ လူအုပ်ကြားတွင် အနည်းငယ် ဆူပွက်လာသည်။ အဘယ်ကြောင့်ဆိုသော် ဤဖော်လံဖားနေသော လေသံသည် ၎င်းတို့၏ အမြင့်မြတ်ဆုံးသော အရှင်ဘုရင်မှလွဲ၍ အခြားလူမဟုတ်သောကြောင့်ဖြစ်သည်။ ဘုရင်လျှင်ပင် နှိမ့်ချ၍ ရိုကျိုးနေပါက၊ ဤဧည့်သည်သည် မည်သူဖြစ်သနည်း။

ပြီးနောက် မာနကြီးသောအသံတစ်ခုက ပြန်ဖြေလာသည်။

“ကောင်းပြီ၊ ထားလိုက်ပါ။ ကျုပ် ဒီကိုလာတာ ခင်ဗျားတို့ရဲ့သေးငယ်တဲ့ ကျဲ့တိုင်းပြည်အတွက်မှ မဟုတ်တာ"

“ဟုတ်ကဲ့ပါ၊ ဟုတ်ကဲ့ပါ”

၎င်းတို့အဖွဲ့သည် ထိုစကားစမြည်သံများနှင့်အတူ ဝင်ရောက်လာသည်။ အဖွဲ့ကို ဦးညွှတ်၍ လမ်းညွှန်လာသူသည် ခမ်းနားထည်ဝါသော ၀တ်စုံမျိုး ဝတ်ဆင်ထားသည့် သက်လတ်ပိုင်း အမျိုးသားတစ်ဦးဖြစ်၍ သူသည် ဂရုတစိုက် ဖီးလိမ်းထားသည့် နှုတ်ခမ်းမွေးများနှင့် ပြည့်ဖောင်းသော ခန္ဓာကိုယ်အရွယ်အစားရှိနေသည်။ သူ​၏အနောက်တွင် အေးဆေးတည်ငြိမ်သော အမူအရာဖြင့် ကြက်သွေးရောင် ၀တ်စုံဝတ်ထားသော လူငယ်သည် မကျန်းမာသော ဖြူဖျော့ဖျော့ အသားအရေနှင့် အလွန်စွဲမက်ဖွယ်ကောင်းလှသည်။

ဤလူကိုမြင်သောအခါ သတင်းအချက်အလက်ကြွယ်ဝသော အထက်တန်းလွှာ ပုဂ္ဂိုလ်များစွာတို့ ထိတ်လန့်တုန်လှုပ်သွားကာ မော်မကြည့်ဝံ့ဘဲ ကြောက်လန့်တကြား ခေါင်းငုံ့လိုက်ကြသည်။ ၎င်းတို့၏ဘုရင်သည် အဘယ်ကြောင့် ဤမျှနှိမ့်ချ၍ ကျိုးနွံနေရသည်ကို ၎င်းတို့နောက်ဆုံးတွင် နားလည်သွားကြသည်။ အဘယ်ကြောင့်ဆိုသော် ဤဧည့်သည်သည် တိုင်းပြည်တစ်ပြည်၏ ရှင်သန်ခြင်းနှင့် ကျဆုံးခြင်းတို့ကို စကားလုံးတစ်လုံးတည်းဖြင့် ဆုံးဖြတ်နိုင်သည့် နတ်တမန်တော်မှလွဲ၍ အခြားလူမဟုတ်သောကြောင့်ဖြစ်သည်။

ဤနတ်တမန်တော်နှင့် နှိုင်းယှဉ်ပါက ဘုရင်များနှင့် အထက်တန်းလွှာမိသားစုများသည် ပုရွက်ဆိတ်များသာဖြစ်ကြသည်။ ထို့ကြောင့် အခန်းတွင်းရှိ လေထုသည် ပို၍ပင် တင်းမာကာ လေးနက်လာသည်။ ကျဲ့ဘုရင်သည် နတ်တမန်တော်ကို အထက်တွင် ဂုဏ်အရှိဆုံးဧည့်သည်များအတွက် ပြင်ဆင်ထားသည့် ထိုင်ခုံဆီသို့ ဂရုတစိုက် လမ်းညွှန်ပေးနေသည်။

သို့သော် ကံမကောင်းစွာဖြင့် ရွှယ်အန်း​၏ တိုက်ခိုက်မှုကို ခံခဲ့ရသော ဘစ်စ်သည် ၎င်းတို့​၏ လမ်းကြောင်းတွင် လဲလျောင်းနေခဲ့သည်။ ထိုသို့မြင်သောအခါ ဘုရင်ကြီး​၏ အမူအရာ နက်မှောင်သွားသည်။ သူသည် အမှားအယွင်းဖြစ်လာလျှင် နတ်တမန်တော် စိတ်အနှောင့်အယှက်ဖြစ်သွားမည်ကို စိုးရိမ်သောကြောင့် ဤဧည့်ခံပွဲအတွက် အလွန်ကြိုးစားအားထုတ်ခဲ့ရသည်။ ထိုသို့ဖြစ်ခဲ့ပါက၊ ကျဲ့တိုင်းပြည်တစ်ခုလုံး ပျက်စီးသွားနိုင်သည်။ ဤအချိန်တွင် ဤသို့အကူးအပြောင်းများ ဖြစ်ပေါ်လာလိမ့်မည်ဟု သူ မမျှော်လင့်ထားခဲ့ပေ။ ကျဲ့တိုင်းပြည်၏ဘုရင်သည် အလွန်ဒေါသထွက်နေသည်။

ထိုအချိန်၌ သိုင်းသူတော်စင်လီကျွင်းသည် အရှေ့သို့ တိုးလာပြီးနောက် မြေပြင်ပေါ်တွင် သတိလစ်နေသော ဘစ်စ်ကို လက်ဖြင့် ညင်သာစွာ ဝှေ့ယမ်း၍ မြှောက်တင်ကာ ထောင့်တစ်နေရာသို့ တိတ်တဆိတ် ပို့ဆောင်လိုက်သည်။ လုပ်ငန်းစဉ်တစ်ခုလုံးသည် လုံးလုံးလျားလျား အသံမထွက်ခဲ့ရာ၊ သူ၏လှုပ်ရှားမှုများသည် အလွန်သဘာဝကျ၍ ကျက်သရေရှိလှသည်။ ကြည့်ရှုသူအများအပြားသည် ၎င်းတို့၏စိတ်ထဲတွင် အလွန် အံ့အားသင့်နေမိသည်။

မှန်သည်၊ မြင့်မား၍ အင်အားကြီးမားသော သိုင်းသူတော်စင်သည် သူ၏ကျွမ်းကျင်မှုကို ပြသချိန်၌ပင် အလွန်ရင်သပ်ရှုမောဖွယ်ကောင်းနေသည်။ ကျဲ့တိုင်းပြည်ဘုရင်၏မျက်နှာသည် အဆုံးတွင် အနည်းငယ် ပြေလျော့လာသည်၊ ပြီးနောက် ဖော်လံဖားသော အပြုံးမျိုးဖြင့် နတ်တမန်တော်ကို လှည့်ကြည့်လိုက်သည်။

“နတ်တမန်တော်၊ ကျေးဇူးပြု၍ ဂုဏ်သရေရှိပလ္လင်ကို ကြွမြန်းပေးပါ”

ငယ်ရွယ်သော နတ်တမန်တော်သည် နှာမှုတ်ပြီးနောက် စင်မြင့်ပေါ်သို့ ဂုဏ်ယူစွာ တက်လှမ်း၍ ပလ္လင်တော်အထက်တွင် ထိုင်လိုက်သည်။ ရွှယ်အန်းသည် ဤနတ်တမန်တော်ကို ကနဦးမှ နိဂုံးအထိ စိတ်ဝင်တစား စူးစမ်းလေ့နေခဲ့၍ အခြေအနေကို အလွန်နှစ်သက်နေသကဲ့သို့ ပြုံးနေခဲ့သည်။ သို့သော် သူ့နံဘေးရှိ လီနာကမူ စိတ်အခြေအနေကောင်းပုံမပေါ်ပေ။

သူမ၏ မျက်နှာသည် ထိတ်လန့်မှုများဖြင့် ပြည့်နှက်နေကာ ခန္ဓာကိုယ်တစ်ခုလုံး တုန်လှုပ်နေသည်။

“လူကြီးမင်းရွှယ် မလေးစားရာကျပေမယ့် ရှင် ဒီကနေ အမြန်ထွက်သွားတာက ပိုကောင်းမယ်ထင်ပါတယ်” လီနာက တုန်လှုပ်ချောက်ချားသော လေသံဖြင့် တတ်နိုင်သမျှ တီးတိုးပြောလိုက်သည်။

“အိုး ဘာလို့များလဲ” ရွှယ်အန်းက ဘာသိဘာသာ မေးမြန်းလိုက်သည်။

“ဘာလို့လဲဆိုတော့ အခုရောက်လာတဲ့လူက နတ်တမန်တော် အစစ်အမှန်မို့လို့ပါ။ သူတို့ကို ဘယ်သူမျှ မယှဉ်ပြိုင်နိုင်ဘူး။ ရှင် ဒီကနေ မြန်မြန်ထွက်သွားတာ ပိုကောင်းပါတယ် မဟုတ်ရင် နောက်ကျသွားတာနဲ့ ရှင် ထွက်သွားနိုင်တော့ မဟုတ်ဘူး”

ရွှယ်အန်းက ရယ်မောလိုက်သည်။

“နတ်တမန်တော်တဲ့လား ဒီလိုဆိုတော့ ကျုပ် ကြည့်ချင်သေးတယ်”

ထိုသို့ကြားသောအခါ လီနာသည် လုံးလုံးလျားလျား စိတ်ပျက်အားလျော့သွားသကဲ့သို့ ခံစားလိုက်ရသည်။ မည်သို့ဆိုသော် တစ်စုံတစ်ယောက်သည် ယာ့ကောနှင့် သူမ၏အစ်မတော်လိုယာတို့ကို တီးတိုးပြောနေကြောင်း မြင်တွေ့လိုက်ရသောကြောင့်ဖြစ်သည်။ ပြီးနောက် ယာ့ကောသည် လေးနက်သော အမူအရာဖြင့် ဤနေရာသို့ လှည့်ကြည့်လာသည်။ သူ​၏အကြည့်များသည် နက်မှောင်သော သတ်ဖြတ်ချင်စိတ်များဖြင့် ပြည့်နေသည်။ ရွှယ်အန်းသည် ယခုအချိန် ထွက်သွားချင်လျှင် ထွက်သွားနိုင်တော့မည်မဟုတ်ကြောင်း လီနာ သဘောပေါက်သွားသည်။ ဘစ်စ်သည် ယာ့ကော၏တပည့်ဖြစ်၍ ယာ့ကောသည် သိုင်းသူတော်စင်၏ ချစ်လှစွာသောတပည့်ဖြစ်သည်။

ဤအခြေအနေသည် လူကြီးမင်းရွှယ်​အတွက် ပို၍ အခြေအနေ ဆိုရွားလာစေသည်။ လီနာက ထိုကဲ့သို့ငေးငိုင်နေစဉ် အထက်တန်းလွှာ အမျိုးသမီးငယ်အများအပြားသည် နတ်တမန်တော်ကို တောက်ပသော မျက်လုံးများဖြင့် ကြည့်နေကြသည်။

“ဘုရားရေ၊ ဒါကထာဝရနုပျိုမှုတွေ ပေးစွမ်းနိုင်တယ်ဆိုတဲ့ ကောလဟာလတွေထဲက တမန်တော်လား"

"သူ တကယ် ရောက်လာတာပဲ၊ မဟုတ်မှလွဲရော သွေးကျွန် ရွေးချယ်ဖို့များလား”

“သူက အရိုင်းဆန်အောင် အရမ်းချောမောတာပဲ ကျွန်မတော့ မူးမေ့ချင်လာပြီ”

ယခုအချိန်တွင် ဤအထက်တန်းလွှာ မိန်းမပျိုများသည် နတ်တမန်တော်၏ လက်ထဲသို့ ပြေးဝင်ရန်ပင် ဆန္ဒရှိနေကြသည်။ နတ်တမန်တော်သည် ၎င်းတို့ကို အလွန်မိုက်မဲသည်ဟု ယူဆနေသော်လည်း ဤစိတ်အားထက်သန်သော အကြည့်များကြောင့် စိတ်ကျေနပ်စွာ ပြုံးလိုက်သည်။ ၎င်းတို့သည် အမှန်တကယ်မိုက်မဲသော သာမန်လူများဖြစ်ကြသည်။ ထိုအချိန်တွင် ဧည့်ခံပွဲ တရားဝင်စတင်လာသည်။ ဝိုင်နှင့် အရသာရှိ အစားအသောက်များသည် ဧည့်သည်တော်များအရှေ့တွင် ရေများကဲ့သို့ စီးဆင်းလာသည်။

အမြင့်တွင် ထိုင်နေသော နတ်တမန်တော်အရှေ့သို့ ယူဆောင်လာသော သောက်သုံးဖွယ်သည် အနီရင့်ရောင် အရည်တစ်ခွက်ဖြစ်သည်။

ကျဲ့တိုင်းပြည်ဘုရင်သည် ဖော်လံဖားသော အမူအရာဖြင့် ပြောလာသည်။

“နတ်တမန်တော်ရဲ့အကြိုက်ကို မသိတာနဲ့၊ အရှင့် မြည်းစမ်းကြည့်ဖို့ အသက်၂၈နှစ်ဝန်းကျင် မိန်းကလေးတွေကို စုဆောင်းပြီး နှလုံးသား သွေးထုတ်ယူထားတာပါ။ ဒီတစ်ခွက်ရလာအောင် မိန်းကလေးအယောက်ငါးဆယ်လောက် အသုံးပြုထားတာပါ”

နတ်တမန်တော်သည် ဤစကားများကို အလွန်ကျေနပ်အားရနေပုံပေါ်သည်။

“ကြိုးစားအားထုတ်ထားသားပဲ”

ကျဲ့တိုင်းပြည်ဘုရင်သည် စိတ်လှုပ်ရှားမှုများဖြင့် တုန်လှုပ်နေသည်။

“ဒါက ကျွန်တော်တို့ တာဝန်ပါ”

နတ်တမန်တော်သည် ခွက်ကိုကောက်ကိုင်ကာ အနည်းငယ် မြည်းစမ်းကြည့်ပြီးနောက် ယစ်မူးသောအကြည့်ဖြင့် သောက်သုံးနေသည်။ သို့သော် သိပ်မကြာမီတွင် မျက်မှောင်ကြုတ်၍ သွေးများကို ထွေးထုတ်လိုက်သည်။

“နတ်တမန်တော်။ ဘာအမှားအယွင်းများရှိလိုလဲ” ကျဲ့တိုင်းပြည်ဘုရင်က ထိတ်လန့်တကြား မေးမြန်းလိုက်သည်။

နတ်တမန်တော်သည် စက်ဆုပ်ရွံရှာနေသော အကြည့်ဖြင့် ပြောလိုက်သည်။

“အနှစ်သာရ မသန့်စင်ဘူး၊ ဒီအမျိုးသမီးတွေရဲ့ ထက်ဝက်လောက်က အပျိုစင် မဟုတ်တဲ့လူတွေပဲ"