ကောင်းကင်နှင့်မြေကြီးဟူသော ဤနေရာသည် ထောင်နှင့်ဆင်တူသည်

"ကျွန်တော့်နာမည်က ဟော့အာပါ အရှင်၊ ရှေးဟောင်းဖိုခါနာမိသားစုကပါ။ ကျွန်တော်တို့နေထိုင်ရာနေရာက...” ထိုအချိန်တွင် ဟော့အာက တုံ့ဆိုင်းသွားသည်။

“ဟင်”

ဟော့အာ​၏ ခန္ဓာကိုယ် တုန်လှုပ်သွားပြီးနောက် လျင်မြန်စွာ ပြောလိုက်သည်။

“တင်ပြရမယ်ဆိုရင် ဒီတိုက်ကြီးက အရည်အသွေးမြင့် သွေးကျွန်တွေ ပြုစုပျိုးထောင်ဖို့ ဖိုခါနာမိသားစု အထူးအသုံးပြုတဲ့ လျှို့ဝှက်နယ်မြေတစ်ခုပါ အရှင်။ ကျွန်တော်တို့မိသားစုက ဒီနေရာမှာ မဟုတ်ဘဲ လျှို့ဝှက်နယ်ပယ်ရဲ့အပြင်ဘက်မှာ ရှိတာပါ”

ထိုစကားကိုကြားသောအခါ ခန်းမထဲရှိ အထက်တန်းလွှာမိသားစုဝင်များအားလုံး ဖြူဖျော့သွားကြသည်။ ထိုအခိုက်အတန့်မှသာ ၎င်းတို့သဘောပေါက်သွားကြသည်။ ၎င်းတို့နေထိုင်ရာ၊ ဤနယ်မြေသည် အခြားမျိုးနွယ်​၏ သွေးကျွန် မွေးထုတ်ရာ ခြံတစ်ခုသာဖြစ်လေသည်။ ၎င်းတို့သည် သွေးမျိုးနွယ်စု၏အမြင်တွင် တိရစ္ဆာန်များနှင့် ထူးမခြားနားပေ။ ဤအခိုက်အတန့်တွင် တစ်ချိန်က ၎င်းတို့ဂုဏ်ယူခဲ့ရသည့် အရာများအားလုံး ပျက်စီးသွားကာ ထိတ်လန့်ခြင်းနှင့် စိတ်ပျက်အားငယ်ခြင်းတို့သာ ပြည့်နှက်သွားစေသည်။

ရွှယ်အန်းသည် ထိုအကြောင်းအရာကို မျှော်လင့်ပြီးသားဖြစ်သည်။ အကြောင်းမူကား၊ ဤလောကထဲသို့ ဝင်ရောက်လာချိန်မှစ၍ ဤနေရာရှိ ကောင်းကင်ဘုံတာအို၏ စည်းမျဉ်းများသည် အတုပြုလုပ်ထားသည့် လက္ခဏာများဖြင့် အလွန်ရိုးရှင်း၍ အရင်းအမြစ်မလုံလောက်ကြောင်း သူ သတိပြုလိုက်မိသည်။ ထို့ကြောင့် ဤနေရာသည် သွေးမျိုးနွယ်စုရှိ အထက်တန်းလွှာမိသားစုများ​​၏ ကျင့်ကြံရာနေရာ မဟုတ်လျှင် သွေးကျွန်များ ပြုစုပျိုးထောင်ရာနေရာဖြစ်နိုင်သည်ဟု သူ သံသယရှိခဲ့သည်။

ဤဖြစ်စဉ်သည် လက်ခံရ ခက်ခဲပုံပေါ်သော်လည်း အပြိုင်စကြဝဠာတွင် ပုံမှန်ဖြစ်စဉ်တစ်ခုသာဖြစ်သည်။ အချို့သော ရှေးဟောင်းနတ်ဆိုးမျိုးနွယ်များသည် ကမ္ဘာတစ်ခုလုံးကိုပင် မွေးမြူထားကြ၍ ထိုကမ္ဘာအတွင်းမှ သဘာဝအတိုင်း မွေးဖွားလာသည့် ဝိညာဉ်များကို ၎င်းတို့၏နတ်ဆိုးစစ်သားများထံ ကျွေးမွေးလေ့ရှိသည်။ ဤကျယ်ပြောလှသောစကြဝဠာ၏ထာဝရအမှန်တရားနှင့် နိယာမသဘောတရားများသည် တောတွင်နိယာမ၌ အသင့်လျော်ဆုံး ရှင်သန်ခြင်းမျိုးဖြစ်ကြသည်။

“ကျွန်တော် ပြောသမျှက အမှန်တရားတွေပါ အရှင်။ ကျွန်တော့်ကို... လွှတ်ပေးနိုင်မလား” ဟော့အာသည် ခြောက်ကပ်နေသော နှုတ်ခမ်းများကို လျှာနှင့်ယက်၍ ကြောက်ရွံ့ရိုသေစွာ ပြောလိုက်သည်။

ယခုအချိန်တွင် သူ​၏စိတ်ထဲတွင် ကြောက်ရွံ့မှုနှင့် ကြီးမားသောနောင်တမှလွဲ၍ မည်သည်မျှမရှိပေ။ လွယ်ကူသောခရီးစဉ်ဟု ထင်ခဲ့သော်လည်းရွှယ်အန်းကဲ့သို့ အစွမ်းထက်ပုဂ္ဂိုလ်မျိုးနှင့် တွေ့ဆုံရန် သူ မမျှော်လင့်ထားပေ။ ဟော့အာသည် ယခုအချိန်အထိ ဤလျှို့ဝှက်နယ်မြေထဲသို့ ရွှယ်အန်း မည်သို့ဝင်ရောက်နိုင်ခဲ့သည်ကို နားမလည်သေးပေ။ ထိုလူသည် ၎င်းတို့၏ ဖိုခါနာမိသားစုအတွက် ပြင်ဆင်၍ ရောက်လာခဲ့ခြင်းဖြစ်သလော။ ထိုအတွေးသည် ဟော့အာ​၏ ဆံပင်များကို အဆုံးထိ ထောင်မတ်သွားစေသောကြောင့် နောက်ထပ် မတွေးဝံ့တော့ပေ။

ရွှယ်အန်းက ထိုသို့ကြားသောအခါ ရယ်မောလိုက်သည်။

“သွေးနယ်မြေထဲမှာ ခင်ဗျားတို့ ဖိုခါနာမိသားစုအပြင် တခြားအင်အားကြီးမိသားစုတွေရော ရှိသေးလား”

“ဒါက...” ဟော့အာသည် ထိုအချိန်တွင် တုံ့ဆိုင်းသွားသည်။

“ထားလိုက်ပါတော့ ကိုယ့်ဘာသာပဲ ကြည့်တော့မယ်” ဤသို့ဖြင့် ရွှယ်အန်း​၏ မျက်လုံးများ လင်းလက်တောက်ပလာကာ သူ၏ အင်အားကြီးနတ်အာရုံသည် ဆွေးမြေ့နေသော သစ်သားကို ဖြိုဖျက်နေသကဲ့သို့ ဟော့အာ၏ ဝိညာဉ်ပင်လယ်ထဲရှိ အသုံးဝင်သော အချက်အလက်အားလုံးကို စတင်ရှာဖွေလိုက်သည်။

ခဏကြာပြီးနောက် ရွှယ်အန်းသည် ဟော့အာ​၏ ဝိညာဉ်ပင်လယ်မှ ထွက်လာခဲ့ရာ၊ သူ​၏အမူအရာသည် ရေသေကဲ့သို့ သုန်မှုန်နေသည်။ သူသည် အသုံးဝင်သော အချက်အလက်များစွာကို တွေ့ရှိခဲ့သည်။ သို့သော် တစ်ချိန်တည်းမှာပင် အလွန်ကြောက်မက်ဖွယ်ကောင်းသည့် မြင်ကွင်းများစွာကို မြင်တွေ့ခဲ့ရသည်။ ဥပမာအားဖြင့် ဤနေရာမှ ရွေးချယ်ခံရသော သွေးကျွန်များ၏ ကံကြမ္မာသည် အလွန်ဝမ်းနည်းဖွယ်ကောင်းလှသည်။ အဘယ်ကြောင့်ဆိုသော် သွေးမျိုးနွယ်စု၏အမြင်တွင် ဤသွေးကျွန်များသည် စိတ်ဆန္ဒများ ဖြည့်ဆည်းပေးကာ သွေးများ ထောက်ပံ့ပေးသည့် အရာဝတ္ထုများထက် မပိုခဲ့ပေ။

သွေးနယ်မြေ​၏ ဖွဲ့စည်းပုံသည် အလွန်ထူးခြားသည်။ ၎င်းသည် ကြက်သွန်နီကဲ့သို့ အလွှာလိုက်ရှိနေသည်။ အလွှာ​၏အထဲသို့ ပိုမိုဝင်ရောက်လေ ပို၍သန်မာလေဖြစ်သည်။ စစ်မှန်သော သွေးနယ်မြေသည် ဤအလွှာများဖြင့် ရစ်ပတ်ခံထားရသည့် အလယ်အူတိုင်တွင် ဖြစ်နိုင်သည်ဟု ရွှယ်အန်း ခန့်မှန်းလိုက်သည်။ ပြီးနောက် ဤဖိုခါနာမိသားစုသည် ၎င်းကမ္ဘာ​၏ အပြင်ဘက်ဆုံးအလွှာတွင် နေထိုင်ကြသည်။ သို့ပါလျက် ၎င်းတို့သည် သွေးကျွန်များကို ဤသို့အထိန်းအကွပ်မဲ့စွာ ပြုစုပျိုးထောင်နိုင်ခြင်းအရ ဤသွေးမျိုးနွယ်ဝင်များ၏ မောက်မာ၍ ရက်စက်ကြမ်းကြုတ်မှုကို ပြသနေသည်။

“အရှင်... ဟို” ဟော့အာက တစ်ခုခုပြောရန် ဟန်ပြင်လိုက်ချိန် ရွှယ်အန်းက ဟော့အာ​၏နဖူးကို သူ​၏လက်ညှိုးဖြင့် တိုက်ရိုက်ညွှန်ပြလိုက်သည်။

ဟော့အာ​၏ ခန္ဓာကိုယ်သည် ပြင်းထန်စွာ တုန်ခါ၍ သူ​၏မျက်လုံးများ မှိတ်သွားကာ လည်ချောင်းမှ ထိတ်လန့်တကြား အော်ဟစ်သံများပင် ထွက်ပေါ်လာသည်။ ရွှယ်အန်းသည် သူ့ကို သတ်ဖြတ်တော့မည်ဟုပင် သူ ထင်မှတ်လိုက်သည်။ သို့သော် ခဏအကြာတွင် မျှော်လင့်ထားသော နာကျင်မှုများမရှိတော့သောကြောင့် ဟော့အာက သူ​၏မျက်လုံးများကို ဖြည်းညှင်းစွာ ဖွင့်ကြည့်လိုက်သည်။

'ငါ မသေဘူးလား' ဤသည်မှာ ဟော့အာ​၏ ပထမအတွေးဖြစ်သည်။

“ခင်ဗျား လုပ်ခဲ့တဲ့လုပ်ရပ်တွေအရ ဆယ်ကြိမ်လောက် သတ်ပစ်လို့ရပေမယ့် ရိုးရိုးသားသား ပြောခဲ့တာကြောင့် ခင်ဗျား အသက်ကို ကျုပ် အခုလောလောဆယ် ချမ်းသာပေးလိုက်မယ်။ ကောင်းကောင်းမွန်မွန် နေထိုင်ရမယ်၊ ခင်ဗျား နားလည်လား” ရွှယ်အန်းက ဘာသိဘာသာ ပြောလိုက်သည်။

ဟော့အာသည် အလွန်စိတ်လှုပ်ရှားနေသည်။ အသက်မဆုံးရှုံးရပါက၊ ကောင်းမွန်ပေလိမ့်မည်။ ဤနေရာမှ ထွက်သွားနိုင်သည်နှင့် မျိုးနွယ်စုခေါင်းဆောင်သည် သူ့ကို ကျောထောက်နောက်ခံပြုပေလိမ့်မည်။ ထိုအတွေးများ ပေါ်ပေါက်လာသည်နှင့် သူ​၏စိတ်ဝိညာဉ်အတွင်းမှ ထွက်ပေါ်လာသည့် ပြင်းထန်သော နာကျင်မှုများကို ခံစားလိုက်ရသည်။ နာကျင်မှုသည် အလွန်ပြင်းထန်သောကြောင့် မြေပြင်ပေါ်သို့ လူးလှိမ့်ကာ ကြွက်သားများပင် ထိန်းမနိုင်သိမ်းမရ တုန်ယင်နေသည်။

“ကလဲ့စားချေဖို့ မစဉ်းစားနဲ့၊ ခင်ဗျားရဲ့စိတ်ဝိညာဉ်ထဲမှာ ကျိန်စာအမှတ်တစ်ခု ထည့်သွင်းထားလို့ပဲ။ တကယ်လို့ သစ္စာမဲ့မှု အနည်းအကျဉ်းလောက် တွေးမိရင်တောင် ကျိန်စာအမှတ်က သေဖို့ဆုတောင်းရတဲ့အထိ နာကျင်အောင် ပြုလုပ်လိမ့်မယ်။ သုံးကြိမ်ပြည့်တာနဲ့ ခင်ဗျားရဲ့ နတ်ဝိညာဉ်ရော ခန္ဓာကိုယ်ရော ဘန်းဆိုပြီး ပေါက်ကွဲသွားလိမ့်မယ်။ နားလည်လား” ရွှယ်အန်းသည် သူ့ကို အေးစက်စွာ စိုက်ကြည့်၍ ပြောလိုက်သည်။

ရွှယ်အန်း​၏ လေသံသည် ခံစားချက်ကင်းမဲ့နေသော်လည်း ဟော့အာအတွက်မူ မာရ်နတ်၏ တီးတိုးသံကဲ့သို့ ခံစားရစေသည်။

“တကယ်ပဲ... ဘာလုပ်ချင်နေတာလဲ” ဟော့အာ သည် သူ့နှလုံးသားထဲရှိ ထိတ်လန့်မှုများကို ဖိနှိပ်၍ တုန်ယင်နေသော လေသံဖြင့် မေးလိုက်သည်။

"ကျုပ် ပြောတယ်လေ၊ ခင်ဗျားတို့သွေးမျိုးနွယ်စုတွေ စုဝေးရာနေရာကို ကျုပ် သွားမယ်လို့” ရွှယ်အန်းက ရယ်မောလိုက်သည်။

ဟော့အာသည် မည်သည့် စကားမျှ မပြောဝံ့ပေ။ သူသည် ရွှယ်အန်း၏ ဆုံးဖြတ်ချက်ကို စောင့်ဆိုင်းလျက် ကြောက်ရွံ့မှုအပြည့်ဖြင့်သာ ဦးညွှတ်နိုင်ခဲ့သည်။ ယခုအချိန်တွင် ရွှယ်အန်းသည် ခန်းမထဲရှိလူတိုင်းကို လှည့်ကြည့်လိုက်သည်။

“စိတ်မရှိပါနဲ့၊ ခင်ဗျားတို့ညစာစားပွဲကို ဖျက်ဆီးသလိုဖြစ်သွားတယ်”

မည်သူမျှ စကားမပြောဝံ့ကြပေ။

'ဟာသပဲ'

သွေးမျိုးနွယ်စု၏ အလွန်မြင့်မြတ်သော သံတမန်လျှင်ပင် သူနှင့် မယှဉ်ပြိုင်နိုင်ဘဲ သူ​၏ ထိန်းချုပ်မှုအောက်သို့ လုံးလုံးလျားလျား ရောက်ရှိနေသည်။ ထိုအခါ ၎င်းတို့အားလုံး မည်သို့မျှ စကားပြောဝံ့မည်နည်း။

ရွှယ်အန်းသည် ထောင့်တစ်နေရာတွင် တုန်ယင်စွာ ဒူးထောက်လျက်ရှိနေသော ကျဲ့ဘုရင်ကို ဘာသိဘာသာ ပြောလိုက်သည်။

“ဘုရင်တစ်ပါးအနေနဲ့ အထက်က လူတွေကို ဆန္ဒဖြည့်ဆည်းဖို့ မိမိလူမျိုးကို အန္တရာယ်ပြုပြီး အမျိုးသမီးအယောက်ငါးဆယ်ရဲ့ နှလုံးသွေးကိုတောင် ထုတ်ယူခဲ့တယ်။ ဒီအတွက် ခင်ဗျား ဘယ်လိုပြန်ပေးဆပ်မှာလဲ ပြောမှာလဲ”

ကျဲ့ဘုရင်သည် အလွန်ထိတ်လန့်ကာ ရွှံ့ဗွက်အိုင်ကဲ့သို့ မြေပြင်ပေါ်သို့ လဲကျသွားပြီးနောက် ရွှယ်အန်းကို တောင်းဆိုနေသော မျက်လုံးများဖြင့် ကြည့်နေသည်။ ရွှယ်အန်းသည် မတုန်မလှုပ် ရပ်တန့်နေသည်။

သို့သော် လီနာသည် အရှေ့သို့ ပြေးလာ၍ တောင်းဆိုလိုက်သည်။

"လူကြီးမင်းရွှယ်... အရှင် ကျွန်မခမည်းတော်လည်း မရည်ရွယ်ဘဲ လုပ်မိသွားတာပါ။ သွေးမျိုးနွယ်စုရဲ့ တမန်တော်တွေက ကျွန်မတို့ရဲ့သေရေး ရှင်ရေးကို ခြယ်လှယ်နိုင်တာကြောင့် ဒီနည်းအတိုင်း လုပ်ဆောင်လိုက်ရတာပါ။ ဒါ့ပြင် ဟိုအမျိုးသမီးတွေ မသေပါဘူး၊ သူတို့တွေ ဒဏ်ရာပဲရခဲ့တာပါ ဒါကြောင့် ခမည်းတော်ကို ကျေးဇူးပြုပြီး သက်ညှာပေးပါ”

ရွှယ်အန်းသည် ထိုစကားကိုကြားသောအခါ အနည်းငယ် မှင်သက်သွားပြီးနောက် ညင်သာစွာ သက်ပြင်းချလိုက်သည်။ မှန်သည်၊ ထိုသို့သော လုပ်ရပ်များသည် သူ​၏မျက်လုံးထဲတွင် ခွင့်မလွှတ်နိုင်သော်လည်း အိမ်မွေးတိရစ္ဆာန်များကဲ့သို့ နေထိုင်နေရသော ၎င်းတို့သည် အင်အားကြီး သွေးမျိုးနွယ်စုနှင့် ရင်ဆိုင်ရသောအခါ မည်သို့ပြုမူနိုင်မည်နည်း။

“ကောင်းပြီ၊ ဒီကိစ္စကို ခွင့်လွှတ်ပေးလိုက်မယ်”

ရွှယ်အန်းသည် သူ​၏လက်ကို ပေါ့လျော့စွာ ဝှေ့ယမ်းလိုက်သည်။ လီနာသည် ရှုပ်ထွေးသော အချက်အလက်များစွာပါရှိသော ကြီးမားသော နတ်အာရုံတစ်ခု သူမ၏စိတ်ထဲတွင် ပေါ်ပေါက်လာကြောင်း ခံစားလိုက်ရသည်။

“ဒါက...”

“စဉ့်တိတုံးပေါ်က ငါးတစ်ကောင်မဖြစ်ချင်ဘူးဆိုရင် အရင်ဆုံး ခွန်အားအလုံအလောက်ရှိရမယ်။ ဒီသိုင်းပညာတွေက ခင်ဗျားကို ကူညီပေးနိုင်လိမ့်မယ်”ရွှယ်အန်းက ဘာသိဘာသာ ပြောလိုက်သည်။

လီနာက အံ့အားသင့်သွားသည်။ ရွှယ်အန်း ပေးအပ်ခဲ့သော သိုင်းပညာများကို သူမ မကြားဖူးသော်လည်း ၎င်းတို့၏ လေးနက်သောစာသားများမှတစ်ဆင့် အလွန်အစွမ်းထက်သော သိုင်းပညာများဖြစ်ကြောင်း တပ်အပ်ပြောနိုင်သည်။

လီနာက ကျေးဇူးတင်ကြောင်း ဆိုတော့မည့်အချိန်တွင် ရွှယ်အန်းက ခပ်ဖျော့ဖျော့ ပြုံး၍ ပြောလိုက်သည်။

“ကျေးဇူးတင်စရာ မလိုပါဘူး။ ဘာပဲဖြစ်ဖြစ် ကျုပ်တို့က မိတ်ဆွေတွေလေ မဟုတ်ဘူးလား”

လီနာက ခေတ္တမှင်သက်သွားပြီးနောက် အလျင်အမြန် ခေါင်းညိတ်လိုက်သည်။

“ဟုတ်ပါတယ် ဟုတ်ပါတယ်။ ကျွန်မတို့က သေချာပေါက် မိတ်ဆွေတွေပါ”

“ကောင်းပြီ၊ သွားကြရအောင်” ရွှယ်အန်းက ပြုံးရယ်ပြီးနောက် ပြောလိုက်သည်။

“ဟုတ်ကဲ့” ဟော့အာက အလျင်အမြန် ပြန်ဖြေလိုက်သည်။

ပြီးနောက် သူ သယ်ဆောင်လာသော စာလိပ်ကို အလျင်အမြန် အသက်သွင်း၍ လျှို့ဝှက်နယ်မြေ​၏ တံခါးကို ဖွင့်လိုက်သည်။

“ဒါက လျှို့ဝှက်နယ်မြေကနေ ထွက်ခွာတဲ့ လမ်းကြောင်းပါ အရှင်"

ရွှယ်အန်းက ခေါင်းညိတ်လိုက်သည်။ ပြီးနောက် ၎င်းတို့နှစ်ဦးသည် လျှို့ဝှက်နယ်မြေမှ ထွက်ခွာသွားကြသည်။