မိသားစုပိုင် မြေအောက်အကျဉ်းခန်း

သူ့အရှေ့တွင် အလင်းရောင်များ တဖြည်းဖြည်း ပြန့်ကျဲလာသည်။ ပထမဆုံး မြင်တွေ့လိုက်ရသည့် မြင်ကွင်းသည် အလွန်ကျယ်ဝန်းသော အခန်းတစ်ခုဖြစ်သည်။ မြေပြင်တွင် သွေးနီရင့်ရောင်ဖြင့် နက်နဲစွာ ရေးထွင်းထားသော မှော်ပညာဖွဲ့စည်းပုံများရှိနေ၍ လေထဲတွင် မနှစ်မြို့ဖွယ် သွေးညှိနံ့များဖြင့် ပြည့်နှက်နေသည်။

“ဒါက သွေးနယ်မြေ အပြင်ဘက်ဆုံးအလွှာက ဖိုခါနာမိသားစုအိမ်တော်ပါ အရှင်” ဟော့အာက တီးတိုးပြောလိုက်သည်။

ရွှယ်အန်းက အနည်းငယ် ခေါင်းညိတ်လိုက်သည်။ သူ၏နတ်အာရုံအရ၊ မိုင်တစ်ရာအတွင်းရှိ သွေးမျိုးနွယ်စု၏ ဖြစ်တည်မှုသည် ကြယ်များကဲ့သို့သိပ်သည်းနေကာ ၎င်းအနက် အလွန်အစွမ်းထက်သော ဖြစ်တည်မှုတချို့ပါရှိသည်။ ဤဖြစ်စဉ်သည် ရွှယ်အန်းကို အတော်လေး ပျော်ရွှင်စေသောကြောင့် သူ​၏နှုတ်ခမ်းထောင့်တွင် ခပ်ဖျော့ဖျော့ အပြုံးတစ်ခု ပေါ်ပေါက်လာလေသည်။ သူ​၏အမြင်အရ သွေးမျိုးနွယ်ဝင် တစ်ဦးချင်းစီသည် သွေးပုလဲတစ်ခုချင်းစီကို ကိုယ်စားပြုနေသည်။

သို့သော် ဤအပြုံးသည် ဟော့အာ၏အမြင်တွင် လုံးလုံးလျားလျား ကွဲပြားနေသည်။ ဟော့အာအတွက်မူ ရွှယ်အန်း​၏ နှုတ်ခမ်းတွင် ပေါ်ပေါက်နေသည့် အပြုံးသည် ရက်စက်ကြမ်းကြုတ်မှုများနှင့် ပြည့်နှက်နေပုံပေါ်ကာ သဘာဝအလျောက် ရက်စက်ကြမ်းကြုတ်သော ဟော့အာကိုပင် နှလုံးသားတစ်ခုလုံး အေးစက်သွားစေသည်။ ဤမာရ်နတ်သည် မည်သူဖြစ်သနည်းဟု ဟော့အာက တိတ်တဆိတ် ရေရွတ်လိုက်သည်။

ထိုအချိန်တွင် ၎င်းတို့ဘေးရှိ ဖွဲ့စည်းပုံသည် စွမ်းအင်အတက်အကျများဖြစ်ပေါ်လာ၍ အလင်းရောင်ထဲမှ ပုံရိပ်နှစ်ခု ထွက်ပေါ်လာသည်။ အရှေ့မှ လျှောက်လှမ်းနေသူသည် ကြမ်းကြုတ်သောမျက်နှာနှင့် ပါးစပ်ထောင့်တွင် အစွယ်များရှိနေသည့် သွေးမျိုးနွယ်ဝင်တစ်ဦးဖြစ်သည်။ သူ့အနောက်မှလိုက်ပါလာသူသည် အလွန်ချောမောသော လူငယ်တစ်ဦးဖြစ်၍ အမျိုးသမီးတစ်ဦးကဲ့သို့ နူးညံ့သိမ်မွေ့ပုံရသည်။

ထိုနှစ်ဦးကို မြင်သောအခါ ဟော့အာ​၏ မျက်နှာအမူအရာ ချဉ်စုတ်သွားသည်။

“အရှေ့မှာ လျှောက်လာတဲ့တစ်ယောက်က စိတ်အနှောက်အယှက်ဖြစ်ဖို့ကောင်းတဲ့ တိုရန်ဆိုတဲ့ကောင်ပါ အရှင်"

၎င်းတို့စကားပြောနေချိန်တွင် တိုရန်သည် ဟော့အာနှင့်ရွှယ်အန်းကို သတိထားမိသွားလေသည်။ သူသည် ကနဦးတွင် အနည်းငယ် မှင်သက်သွားပြီးနောက် သူ​၏မျက်နှာပေါ်တွင် လှောင်ပြောင်သော အပြုံးတစ်ခု ပေါ်ပေါက်လာသည်။

“ဒါကဟော့အာ မဟုတ်လား။ ဘာလဲ ဒီလိုအမှိုက်သရိုက်မျိုးကို သွေးမြေအောက်ခန်းထဲကနေ ကောက်လာတာလား” တိုရန်သည် ရွှယ်အန်းကို ဝေဖန်ပိုင်းခြားနေသည့် အကြည့်များဖြင့် စေ့စေ့စပ်စပ် လေ့လာနေသည်။

ရွှယ်အန်းသည် တိတ်ဆိတ်နေသည်။ ဟော့အာသည် မထိန်းချုပ်နိုင်ဘဲ အံကြိတ်လိုက်မိသည်။“တိုရန်၊ မင်း ငါ့ရှေ့မှာလာပြီး သောင်းကျန်းမနေနဲ့”

“ဟား၊ သောင်းကျန်းတယ်တဲ့လား။ သခင်မလေးက ဒီတစ်ခါ သူ့ကို စိတ်ကျေနပ်စေမယ့် သားကောင်မျိုး ရှာပေးသရွေ့ မြို့ဝန်ရာထူးပေးမယ်လို့ ငါ့ကို ပြောထားတယ် ဟော့အာ။ အဲဒီအချိန်ကြရင် မင်းငါ့ကိုတွေ့တာနဲ့ ဒူးထောက်ပြီး နှုတ်ဆက်ရလိမ့်မယ်။ ပြီးတော့ မင်းကများ ငါ့ကို သောင်းကျန်းတယ်လို့ ပြောရဲတယ်ပေါ့လေ” တိုရန်က ဂုဏ်ယူမှုအပြည့်ဖြင့် ပြောလိုက်သည်။

“သခင်မလေးကလေ” ဟော့အာက ထိတ်လန့်သွားသည်။

“အို၊ မင်း မသိသေးဘူးလို့တော့ ငါ့ကို မပြောနဲ့နော် ဟော့အာ။ မဟုတ်ရင် ဘာကိစ္စနဲ့ အမျိုးသားသွေးကျွန်ကို ရွေးလာရတာလဲ”

ဟော့အာသည် အနည်းငယ် တုန်လှုပ်နေဆဲဖြစ်သည်။ တိုရန်က ရွှယ်အန်းကို အထင်အမြင်သေးစွာ ကြည့်လိုက်သည်။

"ဒါပေမယ့် မင်းအကြိုက်က တကယ်ညံ့တယ်လို့ဆိုလို့ရတယ်။ သခင်မလေးက ချောမောလှပတဲ့ အမျိုးသားတွေကို အနှစ်သက်ဆုံးဆိုတာကို မင်း မသိဘူးလား။ ဒီလိုမျိုးလေ”

တိုရန်သည် သူ့အနောက်ဘက်ရှိ လူငယ်ကို လက်ညှိုးထိုးပြလိုက်သည်။ လူငယ်လေး၏ မျက်နှာသည် အနည်းငယ် နီရဲလာပြီးနောက် ခေါင်းကို ရှက်ရွံ့စွာ ငုံ့ချလိုက်သည်။ သူ​၏လှုပ်ရှားမှုတိုင်းတွင် စွဲမက်ဖွယ်ကောင်းသော ဆွဲဆောင်မှုတစ်ခုကို ထုတ်ဖော်ပြသနေဟန်ရှိသည်။ အနည်းဆုံးလျှင် ဟော့အာသည် ထိုလူငယ်ကို ကြည့်၍ ငေးငိုင်လုနီးပါးပင်ဖြစ်နေသည်။

ထိုဖြစ်စဉ်ကို မြင်သောအခါ တိုရန်က ပို၍ပင်ဘဝင်ခိုက်လာသည်။

“မြင်လား ဟော့အာ၊ မင်း ငါ့ကိုပြိုင်နိုင်မယ်လို့ ထင်နေတာလား။ မင်းက ငယ်လွန်းနေပါသေးတယ်”

ဤသို့ဖြင့် တိုရန်သည် အောင်ပွဲခံလျက် လူငယ်ကို အဝေးသို့ ခေါ်ဆောင်သွားသည်။ ၎င်းတို့ ထွက်ခွာသွားချိန်တွင် လူငယ်သည် အနည်းငယ် စိတ်တုန်လှုပ်လျက် ရွှယ်အန်းကို အေးစက်စွာ ကြည့်လိုက်သည်။ အရှင်တိုရန်​၏ စကားများအရ ဤလူသည် သူ၏ပြိုင်ဘက်ဖြစ်လေသလော။ ထိုလူသည် ချောမောသော်လည်း သူ​၏ လှပမှုနှင့်နှိုင်းယှဉ်လျှင် ဝေးကွာနေသေးသည်။

'ဟမ်း၊ ငါ သေချာပေါက် အနိုင်ရတော့မယ် ထင်တယ်' လူငယ်လေးသည် ထိုသို့တွေးလျက် ကျေနပ်နေသော အမူအရာဖြင့် ထွက်ခွာသွားလေသည်။

၎င်းတို့နှစ်ဦး​၏ ပုံရိပ်များ လုံးလုံးလျားလျား ပျောက်ကွယ်သွားသည့်အချိန်ထိ ဟော့အာသည် တံတွေးမျိုချရန် အတော်လေး ခက်ခဲနေခဲ့သည်။

“အရှင်..."

ရွှယ်အန်းသည် ထိုနေရာတွင် မတ်တတ်ရပ်လျက် ဘာသိဘာသာ မေးလိုက်သည်။

“ခုနကပြောတဲ့ သခင်မလေးဆိုတာက ဘယ်သူလဲ”

“အိုက်ရှီလို့ခေါ်တဲ့ သခင်မလေးက ကျွန်တော်တို့ မျိုးနွယ်စုခေါင်းဆောင်ရဲ့ အကြီးဆုံးသမီးပါ။ အခု သူက မြို့ဝန်အထွတ်အထိပ်အဆင့်မှာ အသန်မာဆုံး သွေးမျိုးနွယ်ဝင်တစ်ယောက်ဆိုပေမယ့် လွတ်လပ်တဲ့ သဘောထားရှိတော့ အမျိုးသမီးတွေလို သိမ်သိမ်မွေ့မွေ့ ချောမောလှပတဲ့ အမျိုးသားသွေးကျွန်တွေကို နှစ်သက်တာပါ။ ဒါပေမယ့် အဆင့်ဖြတ်ကျော်မှုကြောင့် ပြီးခဲ့သော နှစ်တွေမှာအိပ်ပျော်နေတာ ကြာပါပြီ။ မမျှော်လင့်ဘဲ၊ ဒီအချိန်မှာ နိုးထလာရတယ်လို့” ဟော့အာက ခြောက်ကပ်ကပ် ပြုံး၍ ပြန်ဖြေလိုက်သည်။

ဟော့အာသည် ထိုသို့ပြောနေချိန် ရွှယ်အန်း ရုတ်တရက် ဒေါသထွက်လာမည်ကို စိုးရိမ်နေသောကြောင့် တိတ်တဆိတ် လှည့်ကြည့်နေသည်။ သူသည် ရွှယ်အန်း​၏ စိတ်နေစိတ်ထားအချို့ကို ယခုအချိန်တွင် သတိထားမိသွားပြီဖြစ်သည်။ မထင်မှတ်ထားသည်မှာ ရွှယ်အန်းသည် ထိုစကားများကို ကြားသည်နှင့် စိတ်မဆိုးရုံသာမကဘဲ အမှန်တကယ် ပြုံးရယ်လိုက်သည်။

“စိတ်ဝင်စားစရာပဲ။ ဒါဆိုရင် ကျုပ်ကိုလည်း ဆက်သလိုက်ပါ၊ ဒီသခင်မလေးကို ကျုပ် ကိုယ်တိုင် မြင်တွေ့ချင်လို့”

“ဟင်” ဟော့အာသည် နားကြားမှားခဲ့သည်ဟု ထင်မှတ်လိုက်သည်။

“မကြားဘူးလား” ရွှယ်အန်းက သူ့ကို လှည့်ကြည့်လိုက်သည်။

“အာ... ကြားပါတယ် ကြားပါတယ်” ဟော့အာ က ကမန်းကတန်း ခေါင်းညိတ်လိုက်သည်။

“ဒါပေမယ့်... အရှင် ဆက်သခံချင်ရင် မိသားစုပိုင် မြေအောက်ထောင်ထဲကို အရင်ဝင်ရပါလိမ့်မယ်၊ ပြီးရင် သခင်မလေးရဲ့ ရွေးချယ်မှုကို စောင့်ရမှာပါ” ဟော့အာက ရုန်းကန်၍ ပြောလိုက်သည်။

“ကောင်းပြီ၊ ဒါဆို မြေအောက်ထောင်ကို သွားကြရအောင်”

“ဒါပေမယ့် အဲဒီနေရာက သွေးကျွန်အမျိုးမျိုးကို အကျဉ်းချထားတာဆိုတော့ အရမ်းညစ်ညမ်းပြီး ဖရိုဖရဲဖြစ်နေတဲ့နေရာပါ” ဟော့အာတွင် စိုးရိမ်မှုအချို့ရှိနေဆဲဖြစ်သည်။

“ပြဿနာမရှိပါဘူး၊ ဒါတွေအားလုံးကို တွေ့ကြုံခံစားဖို့ ကျုပ် ဒီကိုရောက်လာတာ” ရွှယ်အန်းက ဘာသိဘာသာ ပြောလိုက်သည်။

“ကောင်းပါပြီ။ ကောင်းပါပြီ”

ဟော့အာသည် ချွေးစေးများဖြင့် သူ​၏လက်ကို တိတ်တဆိတ် ကျစ်ကျစ်ဆုပ်လိုက်သည်။ ရွှယ်အန်းနှင့် အတူရှိခဲ့ရသောအချိန်သည် တိုတောင်းလှသော်လည်း လျှို့ဝှက်ဆန်းကြယ်၍ အင်အားကြီးမားသော ဤလူသည် ဟော့အာ ကို အလွန်တုန်လှုပ်စေသည်။ အထူးသဖြင့်ရွှယ်အန်း​၏ သမားရိုးကျမဆန်သော နည်းလမ်းများသည် ဟော့အာကို ကြောက်ရွံ့မှုဖြင့် ပြည့်နှက်စေသည်။ ရွှယ်အန်းသည် အသေးအဖွဲကိစ္စတစ်ခုကြောင့် သူ့ကို သတ်ဖြတ်လာမည်ကို ကြောက်ရွံ့နေမိသည်။

မည်သို့ပင်ဆိုစေကာမူ သူ​၏အသက်သည် ယခုအခါ ရွှယ်အန်း၏ ကရုဏာထားမှုအောက်တွင်ရှိနေသည်။ စိတ်ထဲတွင် ညည်းတွားနေမိသော်လည်း ဟော့အာသည် မလေးမစား မပြုမူဝံ့သောကြောင့် ဖိုကာနာမိသားစုပိုင် မြေအောက်ထောင်သို့ ရွှယ်အန်းကို လေးစားစွာ ဦးဆောင်သွားခဲ့သည်။ သူ ပြောခဲ့သည့်အတိုင်း ထိုနေရာသည် အဖွဲ့အစည်းအသီးသီး​၏ သွေးကျွန်များနှင့် ပြည့်နှက်နေသည်။

အချို့သည် ရွှယ်အန်းကဲ့သို့ “ဆက်သရန်" ပြင်ဆင်ထားသော လူသစ်များဖြစ်၍ အခြားလူများသည် စိတ်ပိုင်းဆိုင်ရာ ဆုံးရှုံးသည်အထိ ညှဉ်းပန်းနှိပ်စက်ခံထားရသည့် "စွန့်ပစ်ခံများ" ဖြစ်လေသည်။ ယေဘုယျအားဖြင့်၊ ၎င်းသည် အလွန်ရှုပ်ထွေး၍ စိတ်ပျက်အားငယ်မှုများဖြင့် ပြည့်နှက်နေသည့် နေရာတစ်ခုဖြစ်သည်။ ဟော့အာသည် တုန်လှုပ်လျက် ရွှယ်အန်းကို အထဲသို့ ဦးဆောင်လာချိန် ထောင်ကို စောင့်ကြပ်နေသည့် သွေးမျိုးနွယ် စစ်သားတစ်ဦးက ၎င်းတို့ထံ ချဉ်းကပ်လာသည်။

“အာ၊ အရှင်ဟော့အာ ကုန်ပစ္စည်းအသစ် လာပို့တာလား” အစောင့်သည် ကျယ်ပြန့်သော အပြုံးဖြင့် မေးလိုက်သည်။

ဟော့အာသည် ချွေးစေးများ ထွက်လာသော်လည်း ဟန်လုပ်ပြုံးနေဆဲဖြစ်သည်။

“ဟုတ်တယ်”

“အချိန်ကိုက်ပဲ၊ အရှင်တိုရန်နဲ့ တခြားအကြီးအကဲတွေလည်း သခင်မလေးကို ဆက်သဖို့ အခုလေးတင် သူတို့သွေးကျွန်တွေကို ခေါ်လာတာ၊ သူတို့ကို အတူထားလိုက်ရုံပဲ” အစောင့်က ပြောလာသည်။

ဟော့အာသည်ရွှယ်အန်းကို တစ်ချက်လှည့်ကြည့်လိုက်သည်။ ရွှယ်အန်းသည် အမူအရာကင်းမဲ့နေကြောင်း သူ မြင်တွေ့လိုက်ရသည် သူသည် ကိုးရိုးကားရားဖြင့် ခေါင်းညိတ်ပြလိုက်သည်။

“ကောင်းပါတယ်၊ ကောင်းပါတယ်”

အစောင့်သည် ဟော့အာ၏ စိတ်မသက်မသာဖြစ်မှုကို သတိမထားမိဘဲ စကားစမြည်ပြောလျက် ဦးဆောင်လမ်းပြပေးနေသည်။

“အရှင်ဟော့အာ၊ မြေအောက်ထောင်ထဲမှာ သွေးကျွန်တွေနဲ့ ပိုပြည့်ကျပ်လာတော့ နေရာလွတ်တွေတောင် ကုန်တော့မယ်။ အခွင့်အရေးရတဲ့အခါ အကြီးအကဲတွေနဲ့ စကားပြောပေးပါဦး။ ဟိုစွန့်ပစ်ပစ္စည်းတွေကို နေရာနည်းနည်းလွတ်အောင် လွှင့်ပစ်ဖို့အတွက်လေ”

ထိုစကားများကြားသောအခါ ဟော့အာ​၏ နဖူးရှိ သွေးပြန်ကြောများ တဆတ်ဆတ်တုန်လှုပ်နေသကဲ့သို့ ခံစားလိုက်ရသည်။ ဟော့အာသည် လေပေါသော အစောင့်ကို ထိုနေရာတွင်ပင် လည်ပင်းညှစ်သတ်ချင်နေမိသည်။