ဂုဏ်သရေရှိ အရောင်အဝါ မော်ကြွားသောအရိုးစုများ

ထိုအချိန်တွင် စုဟောက်သည် နီရဲနေသောမျက်လုံးများဖြင့် ဒေါသထွက်နေသော သားရဲတစ်ကောင်ကဲ့သို့ အခန်းထဲတွင် ခေါက်ထုတ် ခေါက်ပြန် လျှောက်နေသည်။

“သူ ထွက်လာတာနဲ့ သူ့ကို အရင်သတ်နိုင်ဖို့ ဘာပဲဖြစ်ဖြစ်လုပ်ရမယ် ” စုဟောက်က ခါးသီးစွာ တွေးလိုက်သည်။

ထိုအချိန်တွင် အိပ်ခန်းတံခါး ပွင့်လာ၍ ရွှယ်အန်းသည် အခန်းထဲမှ ထွက်လာသည်။ စုဟောက်က အနည်းငယ် ထိတ်လန့်သွားသည်။ ပြီးနောက် သူ​၏နှလုံးသားထဲတွင် အလွန်စိတ်လှုပ်ရှားသွားသည်။ သူသည် ဤမျှမြန်မြန် ထွက်လာခြင်းဖြစ်သလော။ ထိုအမျိုးသားသည် သန်မာပုံပေါ်သော်လည်း တကယ်တမ်းတွင် မစွမ်းဆောင်နိုင်သူဖြစ်သည်။

ဤဖြစ်စဉ်သည် သခင်မလေးကို စိတ်မကျေမနပ်ဖြစ်စေမှာ သေချာသည်။ သူ့ဘက်မှ လှုပ်ရှားရန်ပင် မလိုအပ်ဘဲ သခင်မလေးသည် သူ့ကို ဦးစွာသတ်ဖြတ်ပစ်နိုင်သည်။ စုဟောက်က ဝမ်းသာသွားသည်။ ပြီးနောက် အိုက်ရှီသည်လည်း ထွက်လာ၍ ရွှယ်အန်းအနောက်တွင် နာခံစွာ ရပ်နေကြောင်း မြင်တွေ့လိုက်ရသည်။ သူမ၏ အမူအရာသည် အစေခံမိန်းကလေးတစ်ဦးနှင့်ပင် ဆင်တူသည်။ ဤမြင်ကွင်းသည် စုဟောက်ကို အလွန်အံ့အားသင့်စေသည်။ ပြီးနောက် အိုက်ရှီ ပြောလာသော စကားများသည် စုဟောက်ကို လုံးလုံးလျားလျား ထိတ်လန့်သွားစေ​၏။

“အရှင် သူ့ကို ကျွန်မတို့ ဘာလုပ်သင့်လဲ”

'အရှင်တဲ့လား၊ ငါ ကြားတာ ဟုတ်ရော ဟုတ်လို့လား။ သခင်မလေးအိုက်ရှီက ဟိုကောင် အရှင်လို့ပဲ ခေါ်လိုက်တာလား'

စုဟောက်သည် သူ​၏နားများကို မယုံကြည်နိုင်ဖြစ်နေသည်။ သို့သော် သူ ယုံကြည်ရမည်ဖြစ်သည်။ အဘယ်ကြောင့်ဆိုသော် ထိုအချိန်တွင် ရွှယ်အန်းက ခေါင်းမော့လာ၍ သူ့ကို လျစ်လျူရှုကာ လှည့်ကြည့်လိုက်သည်။ ထိုအကြည့်၏ အရောင်အဝါသည် စုဟောက်ကို ချက်ချင်း ဖြူဖျော့သွားစေသည်။

“သတ်လိုက်”

ရွှယ်အန်းသည် ကနဦးကတည်း သူ့ကို ဆန့်ကျင်ရန် ကြံစည်ခဲ့သော စုဟောက်ကို မနှစ်သက်ခဲ့ပေ။ ထိုသို့သောလူသည် ပြဿနာတစ်ခုသာဖြစ်သည်။ ထိုစကားလုံးများ သူ့နှုတ်ခမ်းမှ ထွက်လာသည်နှင့် စုဟောက်သည် အလွန်ထိတ်လန့်တုန်လှုပ်စွာ ထွက်ပြေးလေသည်။ သို့သော် သူသည် ခြေတစ်လှမ်းသာ လှမ်းခဲ့သော်လည်း သူ စလှမ်းခဲ့သည့် ခြေလှမ်းမှစ၍ ခန္ဓာကိုယ်သည် တဖြည်းဖြည်းချင်း ပြိုကွဲပျက်စီးလာသည်။

“မဟုတ်ဘူး။ မှားသွားပါတယ်၊ ကျွန်တော် ထပ်မဝံ့ရဲတော့ပါဘူး”

စုဟောက်သည် သေခြင်းတရား​၏ ခြိမ်းခြောက်မှုကြောင့် ဆိုးရွားစွာ အော်ဟစ်လိုက်သည်။ ဤအခိုက်အတန့်တွင် စုဟောက်သည် သူ မည်မျှမိုက်မဲခဲ့သည်ကို သိရှိသွားသည်။ သူသည် ထိုလူကို လုပ်ကြံရန်ပင် အကြိမ်ကြိမ် ကြိုးစားခဲ့လေသည်။ ကံမကောင်းစွာဖြင့် ကမ္ဘာကြီးတွင် နောင်တတရားအတွက် ဖြေဆေး မရှိပေ။ မျက်စိတစ်မှိတ်အတွင်းမှာပင် စုဟောက်သည် သက်ရှိလူတစ်ဦးမှ ဖုန်မှုန့်များအဖြစ် ပြောင်းလဲသွားသည်။

သို့သော် ဤမြင်ကွင်းသည် အိုက်ရှီကို အလွန်သဘောကျစေသောကြောင့် သူမသည် ထအော်ဟစ်လိုက်သည်။

“သိပ်ကိုလှပတဲ့ အနုပညာမြင်ကွင်းတစ်ခုပါလား၊ ဒါကမှ သတ်ဖြတ်ခြင်းအနုပညာပဲ။ ရှင်နဲ့ နှိုင်းယှဉ်ရင် ကျွန်မတို့သွေးမျိုးနွယ်စုတွေရဲ့ နည်းလမ်းက မိုက်မဲလွန်းတယ်။ အမြဲတမ်း အစွယ်ထုတ်ပြီး သွေးပြန်ကြောကို ကိုက်ဖို့ပဲ စဉ်းစားနေကြတာ၊ လည်ပင်း မဆေးတဲ့လူနဲ့ တွေ့ရင် ဘေးဥပဒ်ဖြစ်ရဦးမယ်”

“ပါးစပ်ပိတ်ထား”

“ဟုတ်ကဲ့ပါ အရှင်”

ညမိုးချုပ်သည်နှင့်အမျှ ဖိုခါနာမိသားစု၏ရှေးဟောင်းရဲတိုက်သည် ပို၍ သက်ဝင်လှုပ်ရှားလာသည်။ ကောင်းကင်ယံတွင် သွေးရောင်အတောင်ပံများ အဆက်မပြတ် ပျံသန်းနေသည်။ ၎င်းတို့သည် မစ်ရှင်များ ပြုလုပ်ပြီးနောက် ပြန်ရောက်လာသည့် ဖိုခါနာမိသားစုဝင်များဖြစ်သည်။ အခြေခံအားဖြင့်၊ ဖိုခါနာမိသားစုတစ်ခုလုံးသည် မျိုးနွယ်စုခေါင်းဆောင်၏နိုးထမှုကို ကြိုဆိုရန်အတွက် ရှေးဟောင်းကောင်စီခန်းမတွင် စုဝေးနေကြသည်။

ဤအခိုက်အတန့်တွင် ဇိမ်ခံပစ္စည်းများ ကြိုက်နှစ်သက်သည့် သွေးမျိုးနွယ်စု၏ ထူးခြားသော သဘာဝကို အပြည့်အဝ ပြသလာပြန်သည်။ ရှေးဟောင်းခန်းမကို စားသောက်ပွဲ အခမ်းအနားတစ်ခုကဲ့သို့ အလှဆင်ထားကြသည်။ လက်ရာမြောက်သော ဟင်းလျာအမျိုးမျိုး ခင်းကျင်းထားကာ သွေးမျိုးနွယ်ဝင်များသည် ခမ်းနားစွာ ၀တ်စားဆင်ယင်၍ စေ့စပ်စွာ ရောစပ်ထားသော သွေးဝိုင်ကို ကိုင်ဆောင်လျက် အုပ်စုလိုက် စကားစမြည်ပြောနေကြသည်။ ဤသည်မှာ ၎င်းတို့အတွက် ရှားပါးသော မိသားစုတွေ့ဆုံပွဲဖြစ်သည်။ ခန်းမ​၏အလယ်တွင် မျိုးနွယ်စုခေါင်းဆောင်နှင့် တစ်ပြိုင်နက်တည်းနီးပါး နိုးထလာသည့် အိုက်ရှီနှင့်ပတ်သက်၍ ဆွေးနွေးနေကြသည်။

“သခင်မလေးအိုက်ရှီက ဘာလို့မပေါ်လာသေးတာလဲ” သွေးမျိုးနွယ်ဝင်တစ်ဦးက ပြောလိုက်သည်။

“ဟားဟား၊ ခင်ဗျား မသိချင်ယောင်ဆောင်နေတာလား။ အိုက်ရှီက ဒီလောက်ကြာကြာ အိပ်ပျော်နေပုံအရ နိုးထလာတဲ့အခါ သူ ပထမဆုံးလုပ်ဆောင်မှာက စိတ်ဆန္ဒကို ဖြည့်ဆည်းဖို့ပေါ့” အခြားသော သွေးမျိုးနွယ်ဝင်တစ်ဦးက ရယ်မော၍ ပြောလိုက်သည်။

“တစ်ခါတော့ သွေးကျွန်အဖြစ် လူငယ်နှစ်ယောက်ကို တစ်ပြိုင်နက်တည်း ရွေးချယ်ခဲ့တာတဲ့။ ကျွတ် ကျွတ်၊ အစားကြူးချက်ကတော့”

သွေးမျိုးနွယ်ဝင်အားလုံးသည် ၎င်းတို့၏မျက်နှာပေါ်တွင် ထူးဆန်းသောအပြုံးများကို ဆင်မြန်းထားကြသည်။ သို့သော် သွေးမျိုးနွယ်ဝင်အမျိုးသမီးများ၏ စကားများသည် ယဉ်ကျေးသိမ်မွေ့မှု မရှိပေ။

“ဟွန်း၊ ဒီအိုက်ရှီက တကယ့်ကို အထိန်းအကွပ်မဲ့တဲ့ မြေခွေးမ” စွဲမက်ဖွယ်ကောင်းသော ၀တ်စုံရှည် ဝတ်ဆင်ထားသည့် အမျိုးသမီးတစ်ဦးက မထီမဲ့မြင်ပြုစွာ ပြောလိုက်သည်။

“ဟားဟား။ စုရှန်၊ ရှင် သူ့ကို သည်းမခံနိုင်ဘူးဆိုရင်တောင် သူက ဖိုခါနာမိသားစုရဲ့ သခင်မလေးနော်” အခြားအမျိုးသမီးတစ်ဦး စစ်မက်ငြိမ်းအေးစေရန် ကြိုးပမ်းလိုက်သည်။

“အဲဒါကြောင့်မို့လို့ ကျွန်မ သူ့ကို သည်းမခံနိုင်တာပေါ့။ သူ့မှာ ဘာရှိလို့လဲ။ မြင့်မြတ်တဲ့မျိုးရိုးနဲ့ မျိုးနွယ်စုခေါင်းဆောင်ရဲ့ မျက်နှာပေးတာကို အားကိုးနေရုံပဲ မဟုတ်ဘူးလား။ ဒီလိုမဖွယ်မရာလုပ်ရပ်တွေကို အမြဲပြုမူနေတာ ကျွန်မတို့သွေးမျိုးနွယ်စုအမျိုးသမီးတွေကို တကယ် အရှက်ရစေတယ်”စုရှန်သည် အလွန်ဒေါသထွက်နေဆဲဖြစ်သည်။

သို့သော်လည်း သူမ၏ မှတ်ချက်များသည် ထိုနေရာရှိ သွေးမျိုးနွယ်ဝင် အများအပြားနှင့် အထူးသဖြင့် အမျိုးသမီးများကို အနည်းငယ် သဘောထားကွဲလွဲစေသည်။

'သူကတော့ ဖြူစင်တဲ့ ကြာပန်းလေးပေါ့လေ' တချို့သည် စိတ်ထဲမှပင် သရော်တိုက်နေကြသည်။

အမှန်တကယ်တွင် စုရှန်​၏ရမ်းကားမှုသည် အိုက်ရှီအောက် နည်းပါးခြင်း မဟုတ်ပေ။ အိုက်ရှီသည် စုရှန်ထက် မြင့်မြတ်သော အဆင့်အတန်းကို ဆုပ်ကိုင်ထားသောကြောင့်သာ သူမ၏ အပြုအမူကို အခွင့်အရေးယူ၍ ရှုံ့ချနေခြင်းဖြစ်သည်။

“ငါ အမုန်းဆုံးအရာက အိုက်ရှီရဲ့ အကြိုက်ကိုပဲ။ မူရာမာယာများပြီး ချောမောလှပတဲ့ ယောက်ျားတွေကို ခဏခဏ ရွေးချယ်နေရတယ်လို့ တကယ်ပဲ အဲလောက်စိတ်ဝင်စားဖို့ကောင်းနေတာလား” စုရှန်က မထီမဲ့မြင်ပြုကာ ပြောလိုက်သည်။

သူမ၏ မှတ်ချက်များသည် အမှန်တကယ် သဘောတူညီမှုများစွာ ရရှိခဲ့သည်။ မည်သို့ပင်ဆိုစေကာမူ သခင်မလေးအိုက်ရှီ​၏ ထူးခြားသော အကြိုက်သည် ကျယ်ပြန့်စွာ ကျော်ကြားနေခဲ့သည်မှာ ကြာမြင့်ပြီဖြစ်သည်။

“ကဲပါ တော်ရုံပဲပြောပါတော့လား။ အချိန်ကိုလည်းကြည့်ဦး ခဏနေရင် အိုက်ရှီ ရောက်လာတော့မယ်”

“သူရောက်လာရင် ဘာဖြစ်လဲ။ သူ ဒီတစ်ခါ ဘယ်လိုအမှိုက်မျိုးကောက်လာလဲဆိုတာ ငါ တကယ်ကြည့်ချင်သေးတယ်” စုရှန်က အထင်အမြင်သေးစွာ ပြောလိုက်သည်။

ထိုအချိန်တွင် ကောင်စီခန်းမအပြင်ဘက်မှ ရိုသေလေးစားသော အော်သံများ ပဲ့တင်ထပ်လာသည်။

“သခင်မလေး”

“သခင်မလေး ရောက်လာပြီ”

ထိုအော်သံများကို ကြားသောအခါ ကောင်စီခန်းမတစ်ခုလုံး အနည်းငယ် ရုတ်ရုတ်သဲသဲဖြစ်လာသည်။ လူတိုင်းသည် ဝင်ပေါက်ဘက်သို့ လှည့်ကြည့်လာကြသည်။ ပြီးနောက် အိုက်ရှီသည် ဘယ်ညာ ဖွင့်ထားသော တံခါးများကြားမှ လှပစွာ လျှောက်လှမ်းလာကြောင်း မြင်တွေ့လိုက်ရသည်။ သွေးမျိုးနွယ်ဝင်များစွာက သူမကို ဦးညွှတ်လိုက်ကြသည်။

“နှုတ်ဆက်ပါတယ် သခင်မလေး”

အိုက်ရှီက ခပ်ဖျော့ဖျော့ ပြုံး၍ ခေါင်းညိတ်ပြလိုက်သည်။ ဤရည်မွန်သော အပြုအမူသည် သွေးမျိုးနွယ်စု​၏ အမျိုးသားများစွာကို အံ့အားသင့်စေသည်။ သို့သော် စုရှန်က ခပ်တိုးတိုး လှောင်ရယ်လိုက်သည်။

“ဟန်လုပ်မနေနဲ့၊ နင် ဒီတစ်ခါ ဘယ်လိုသွေးကျွန်မျိုး ရွေးထားလဲဆို ကြည့်ရအောင်”

သူမ​၏ စကားများ ကျဆင်းလာသည်နှင့် အိုက်ရှီသည် အခြားတစ်ယောက်ကို စောင့်ဆိုင်းနေသကဲ့သို့ ဘေးဘက်သို့ အနည်းငယ် တိုးလိုက်သည်။ ပြီးနောက် အနက်ရောင် ဝတ်စုံ၀တ်ဆင်ထားသည့် အနက်ရောင်မျက်လုံးများ အနက်ရောင်ဆံပင်များနှင့် လူငယ်တစ်ဦးသည် ဖြည်းညှင်းစွာ ဝင်ရောက်လာသည်။ လူငယ်​ ရောက်ရှိလာသည်နှင့် ခန်းမတစ်ခုလုံး ထိန်းမနိုင်သိမ်းမရ ဆူညံလာသည်။

“ဒါက သခင်မလေး ရွေးထားတဲ့ သွေးကျွန်အသစ်လား”

“ဖြစ်ရမယ်၊ ဒါပေမယ့် ပန်းလိုလှပတဲ့ ယောက်ျားတွေကို နှစ်သက်တယ်ဆိုပြီး နားမည်ကြီးတဲ့ သခင်မလေးက ဒီတစ်ခါတော့ ဘာလို့အကြိုက်ပြောင်းသွားရတာလဲ”

“ပြောင်းသွားပေမယ့် လူငယ်က တော်တော် ချောမောသားပဲ။ အထူးသဖြင့် သူ့အရောင်အဝါကိုကြည့်၊ သွေးကျွန်ဖြစ်မှန်းသာ မသိဘူးဆိုရင် ဂုဏ်သရေရှိပုဂ္ဂိုလ်တစ်ယောက်လို့ ထင်ကြမှာ သေချာတယ်”

ဤရေရွတ်သံများကြားတွင် စုရှန်၏ စကားအမူအရာသည် တဖြည်းဖြည်း ထူးဆန်းလာသည်။ အိုက်ရှီသည် မိန်းမလျာကဲ့သို့သော အမျိုးသားတစ်ဦး သွေးကျွန်အဖြစ် ထပ်မံရွေးချယ်လိမ့်မည်ဟု သူမ ယူဆခဲ့သည်။ ဂုဏ်သရေရှိ အရောင်အဝါနှင့် အနက်ရောင်ဝတ်စုံ ဝတ်ဆင်ထားသည့် လူငယ်တစ်ဦးဖြစ်မည်ဟု သူမ မမျှော်လင့်ထားပေ။ ရယ်ဖွယ်ရာကောင်းသည်မှာ ၎င်းသည် စုရှန်​၏ အနှစ်သက်ဆုံးပုံစံမျိုးဖြစ်သည်။ ယင်းကြောင့် စုရှန်သည် ရွှယ်အန်းကို မြင်သည်နှင့် သူမ​၏ စိတ်ဝိညာဉ်တစ်ခုလုံး လွင့်ပျံလုနီးပါး ခံစားလိုက်ရသည်။

သူမသည် အနည်းငယ် တုံ့ဆိုင်းသွားပြီးနောက် နောက်ဆုံးတွင် စိတ်ဆန္ဒကို မထိန်းချုပ်နိုင်သောကြောင့် အရှေ့သို့ တိုးဝင်လာ၍ ပါးစပ်ကို ဖုံးအုပ်လျက် ရယ်မောလိုက်သည်။

“ဝမ်းခွဲအစ်မ အိုက်ရှီ၊ ဒီတစ်ခေါက် မြန်မြန်နိုးထလာတာ တကယ့်ကို အံ့ဩစရာပဲနော်”