ကောင်းကင်နဲ့ မြေကြီးလောက်က ငါ့ကို ဘာလုပ်နိုင်မှာလဲ

ဂေးလ်စ်မျိုးနွယ်၏ အကျော်ကြားဆုံး အရာမှာ ဖျက်ဆီး၍မရနိုင်သော လက်သည်းများ ဖြစ်သည်။

Vladimir သည်လည်း ထိုအရာကြောင့် ကျော်ကြားလာခဲ့ခြင်းဖြစ်သည်။

သို့သော် ပထမမျိုးဆက် ဂေးလ်စ်သည် ထိုတိုက်ခိုက်မှုကို ထုတ်ဖော်လိုက်သောအခါ Vladimir ထက် အဆပေါင်းထောင်ချီ၍ ပိုသန်မာသည်။

ကျွတ်...

ပြတ်သားသော အသံတစ်သံ ထွက်ပေါ်လာသည်။

ဤသွေးလက်သည်းကြီးသည် အချိန်များကိုပင် ထိုးဖောက်သွားဟန်တူပြီး ရွှယ်အန်း၏ ရှေ့မှောက်သို့ တမဟုတ်ချင်း ရောက်ရှိလာသည်။

သို့သော် ရွှယ်အန်းက ကြောက်ရွံ့သည့် အရိပ်အယောင် အနည်းငယ်မျှပင် မပြခဲ့ပေ။ သူသည် ပေါ့ပေါ့ပါးပါးပင် ပြောလိုက်သည်။

"အဘိုးကြီး... ခင်ဗျားလက်သည်းတွေ ညှပ်ဖို့ လိုနေပြီ၊ ထားလိုက်ပါတော့... ကျွန်တော် ကူညှပ်ပေးမယ်"

ထိုသို့ပြောကယ ရွှယ်အန်သည် လက်တစ်ဖက်ဖြင့် ခုတ်ပိုင်းလိုက်ရာ မျက်စိကျိန်းမတတ် စူးရှသော ဓားအလင်းတန်းတစ်ခု ဖြတ်သန်းသွားသည်။

နားညီးဖွယ် သတ္တုချင်းပွတ်တိုက်သံနှင့်အတူ ပထမမျိုးဆက် ဂေးလ်စ်၏ သွေးလက်သည်းကြီးမှာ တိတိပပ ထက်ပိုင်းပြတ်သွားတော့သည်။

ကံဆိုးရှာသော ပထမမျိုးဆက် ဂေးလ်စ်သည် နာကျင်စွာ အော်ဟစ်လိုက်ပြီး မိုင်ဆယ်ဂဏန်းခန့် နောက်သို့ဆုတ်သွားကာ သူ့လက်ကို နာကျင်စွာဖြင့် ကြည့်လိုက်သည်။

သူ၏ သွေးလက်သည်းများကို ဤကဲ့သို့ သန့်စင်သော အခြေအနေသို့ ရောက်အောင် လေ့ကျင့်ရန်အတွက် သူ့လက်သည်းများကို စေ့စပ်သေချာစွာ ဂရုစိုက်ခဲ့ရသည်။

သူ အိပ်နေစဉ်၌ပင် သူ၏ သွေးစွမ်းအင် အများစုကို ဤသွေးလက်သည်းများအား ကာကွယ်ရန်အတွက် အသုံးပြုခဲ့သည်။

သို့သော် သူ မမျှော်လင့်ထားခဲ့သည့်အရာမှာ သူ၏ ခေတ်အဆက်ဆက် ကြိုးပမ်းအားထုတ်မှုများသည် ယနေ့ ရွှယ်အန်း၏ လက်ချက်ဖြင့် ပျက်စီးသွားရခြင်းပင်ဖြစ်သည်။

သဘာဝကျစွာပင် သူသည် ဤအရာကို သည်းမခံနိုင်ပေ။

သို့သော် ရွှယ်အန်းက သူ့ကို လွှတ်ပေးရန် လုံးဝဆန္ဒမရှိကြောင်း ထင်ရှားသည်။

အမှန်တွင် ယခုအချိန်အထိ ရွှယ်အန်းသည် ပထမမျိုးဆက် သွေးမျိုးနွယ်ဝင်တစ်ဦးကိုမှ မသန့်စင်ဖူးပေ။

ထို့ကြောင့် ယခုအချိန်တွင် ရွှယ်အန်း၏ မျက်လုံးထဲတွင် ဤပထမမျိုးဆက် ဂေးလ်စ်သည် လမ်းလျှောက်နေသော ဆေးလုံး တစ်လုံးနှင့်တူသည်။

ရွှယ်အန်း အနည်းငယ် ပြုံးလိုက်သည်။

"လက်သည်းတွေ ဘယ်လိုနေလဲ၊ ကြည့်ကောင်းသွားတယ် မဟုတ်လား၊ ကျေးဇူးတင်စရာ မလိုပါဘူး၊ သူများတွေကို ကူညီတာက ကျွန်တော့် တာဝန်ပဲလေ"

"သွားသေလိုက်စမ်း!" ပထမမျိုးဆက် ဂေးလ်စ်၏ မျက်နှာသည် စိမ်းပုပ်သွားပြီး ဒေါသတကြီး ဟိန်းဟောက်လိုက်သည်။

သူ့ကို ဗဟိုပြု၍ မိုင်တစ်ထောင်ပတ်လည် ကောင်းကင်ပြင်ကို ဖုံးလွှမ်းသွားသော သွေးပင်လယ်ကြီးတစ်ခု ရုတ်တရက် ဖြစ်ပေါ်လာပြီး ပတ်ဝန်းကျင်ရှိ ကောင်းကင်နှင့် မြေကြီးကို ပြင်ပကမ္ဘာမှ လုံးဝ ဖြတ်တောက်လိုက်သည်။

"လူသားမျိုးနွယ် အစွမ်းထက်ပုဂ္ဂိုလ်... ငါ့ရဲ့ အဆုံးမဲ့ သွေးပင်လယ်ကြီး အုပ်မိုးထားတဲ့အောက်မှာ မင်းက ကောင်းကင်နဲ့ မြေကြီး စွန့်ပစ်ထားတဲ့ ကလေးတစ်ယောက် ဖြစ်သွားပြီ၊ ပြင်ပကမ္ဘာကနေ စွမ်းအား အနည်းငယ်လေးတောင် မင်း ရနိုင်မှာ မဟုတ်တော့ဘူး၊ ငါက... ဒီနယ်မြေရဲ့ သခင်ပဲ"

ပထမမျိုးဆက် ဂေးလ်စ်သည် လက်ကိုမြှောက်ကာ ရူးသွပ်စွာ ရယ်မောလိုက်သည်။

မိုးထိအောင် မြင့်မားနေသော သွေးဒီရေလှိုင်းကြီးသည် ဧရာမလက်ကြီးတစ်ဖက်အဖြစ် ပြောင်းလဲသွားပြီး လေထဲတွင်ရှိနေသော ရွှယ်အန်းထံသို့ တည့်တည့် ဆန့်တန်းလာသည်။

ရွှယ်အန်းသည် ပတ်ဝန်းကျင်ရှိ သွေးပင်လယ်ကြီးကို လေ့လာလိုက်သည်။ သူ၏ မျက်လုံးများ တဖြည်းဖြည်း ပိုမိုအေးစက်လာသည်။

ဤသွေးပင်လယ်ကြီးသည် မရေမတွက်နိုင်သော သတ္တဝါများ၏ ဝိညာဉ်များဖြင့် ဖွဲ့စည်းထားခြင်း ဖြစ်ကြောင်း သိသာထင်ရှားလှသည်။ ဤပထမမျိုးဆက် ဂေးလ်စ်၏ လက်ချက်ဖြင့် သေဆုံးခဲ့ရသော သတ္တဝါပေါင်း မရေမတွက်နိုင်အောင် ရှိခဲ့သည်မှာ ထင်ရှားသည်။

"ကောင်းကင်နဲ့ မြေကြီး စွန့်ပစ်ထားတဲ့ ကလေး ဟုတ်လား၊ စွမ်းအား မယူနိုင်ဘူးတဲ့လား"

ရွှယ်အန်း အေးစက်စွာ ပြုံးလိုက်သည်။

"မင်းကို သတ်ဖို့အတွက် ကောင်းကင်နဲ့ မြေကြီးက ငါ့ကို ဘာလုပ်နိုင်မှာလဲ"

ထိုသို့ပြောပြီးနောက် ရွှယ်အန်း ခြေတစ်လှမ်း တိုးလိုက်သည်။

ဤခြေလှမ်းအောက်တွင် လေဟာနယ်ပင် တုန်ခါသွားသည်။

ဒုတိယခြေလှမ်းနှင့်အတူ သွေးရောင်ဖုံးနေသော ကောင်းကင်ပြင်တစ်ခုလုံးတွင် ကြာပန်းများမှလွဲ၍ အခြားဘာမျှ မရှိတော့ပေ။

ထို့နောက် ရွှယ်အန်းက လက်ဖြင့် ညွှန်ပြလိုက်သည်။

"ပွင့်လန်းစေ"

အမိန့်တစ်ချက် ပေးသံနှင့်အတူ ကောင်းကင်အပြည့် ကြာပန်းများ ပွင့်လန်းလာသည်။

အံ့သြဖွယ် ကောင်းလိုက်တဲ့ မြင်ကွင်းပဲ

တချိန်က သွေးများဖြင့် ပြည့်နှက်နေသော ကောင်းကင်သည် ယခုအခါ အဆုံးမဲ့ ပွင့်လန်းနေသော ကြာပန်းများဖြင့် ပြည့်နှက်နေပြီ ဖြစ်သည်။

ရွှယ်အန်း အမိန့်ပေးလိုက်၍ ကြာပန်းများ ပွင့်လန်းလာချိန်တွင် ကြယ်ပင်လယ်ကြီးပမာ ဖြစ်နေသည်။

ကောင်းကင်နှင့် မြေကြီးကို ပိတ်ဆို့ထားခဲ့သော တစ်ချိန်က ကြီးကျယ်ခမ်းနားသည့် သွေးပင်လယ်ကြီးသည် ဤပန်းပင်လယ်ကြီး၏ ရှေ့မှောက်တွင် မည်သည့် ခုခံမှုမျှ မပြုနိုင်ဘဲ ချက်ချင်းပင် ပျောက်ကွယ်သွားတော့သည်။

"ဒါ ဘယ်လိုလုပ် ဖြစ်နိုင်မှာလဲ"

ပထမမျိုးဆက် ဂေးလ်စ်သည် သူ့မျက်စိရှေ့တွင် ဖြစ်ပျက်နေသည်များကို မယုံကြည်နိုင်ဘဲ ရူးသွပ်မတတ် အော်ဟစ်လိုက်သည်။

ဒါက သန်းပေါင်းများစွာ သတ္တဝါတွေရဲ့ ဝိညာဉ်တွေနဲ့ ဖွဲ့စည်းထားတဲ့ သွေးပင်လယ်ကြီးလေ...

သွေးမျိုးနွယ် အကြီးအကဲတွေတောင် ဒီအစွမ်းရဲ့ အနားသတ်ကို အလွယ်တကူ မထိရဲကြဘူး...

ဒါပေမဲ့ ဒီလူငယ်လေးရဲ့ ပန်းပင်လယ်ကြီးရှေ့မှာတော့ အဲဒါက ဘာမှမဟုတ်သလို ဖြစ်သွားခဲ့တာပဲ...

သဘာဝကျစွာပင် ဤအရာသည် ပထမမျိုးဆက်Gillsအတွက် လက်ခံရန် ခက်ခဲနေသည်။

သို့သော် ခေတ်အဆက်ဆက် နေထိုင်လာခဲ့ဖူးသူ ဖြစ်သည့်အားလျော်စွာ ဤအချိန်တွင် အမှန်တရားတစ်ခုကို သူ နားလည်လိုက်သည်။

ထိုအရာမှာ ဤလူငယ်လေးသည် သာမန် အစွမ်းထက်ပုဂ္ဂိုလ်မဟုတ်ကြောင်း ထင်ရှားနေခြင်းဖြစ်သည်။

သူသည် ဤလူငယ်လေး၏ ပြိုင်ဘက် ဖြစ်လောက်မည် မဟုတ်ပေ။

ထို့ကြောင့် ချက်ချင်းဆိုသလိုပင် အသက်ရှင်လိုသောဆန္ဒကြောင့် ပထမမျိုးဆက် ဂေးလ်စ်သည် လှည့်ပြေးရန် ပြင်လိုက်သည်။

သူ၏ သွေးမျိုးဆက်အစွမ်းဖြင့် သူလှည့်လိုက်သည့် ခဏမှာပင် သူ၏ အမြန်နှုန်းသည် အသံထက် အဆ ၂၀ ပိုမြန်သော ကြောက်မက်ဖွယ် အမြန်နှုန်းသို့ ရောက်ရှိသွားသည်။

သူ တွေးလိုက်သည့် အချိန်အတွင်းမှာပင် ဤနယ်ပယ်မှ ပျောက်ကွယ်သွားတော့မည် ဖြစ်သည်။

သို့သော် သူ့အမြန်နှုန်းသည် မြန်ဆန်သော်လည်း ရွှယ်အန်းက ပိုမြန်သည်။

သူ ထွက်ခွာခါနီး ဆဲဆဲမှာပင် ရွှယ်အန်းက လေဟာနယ်ထဲသို့ လက်လှမ်းလိုက်ပြီး အေးစက်သော မျက်နှာထားဖြင့် ပြေ။လိုက်သည်။

"ထွက်ပြေးဖို့ စဉ်းစားနေတာလာ?"

ထို့နောက် ရွှယ်အန်းသည် ၎င်းကို ဆွဲထုတ်လိုက်သည်။

ဘုန်း...

လေဟာနယ်ထဲသို့ တစ်ဝက်ခန့် ဝင်ရောက်နေပြီးဖြစ်သော ဂေးလ်စ်သည် ရွှယ်အန်း၏ အတင်းအဓမ္မ ပြန်ဆွဲထုတ်ခြင်းကို ခံလိုက်ရသည်။

"မလုပ်နဲ့..."

သူ စကားမဆုံးခင်မှာပင် ရွှယ်အန်း၏ လက်များသည် အပေါ်မှ ဖိချလာသည်။

ကျွတ်... ဂလွတ်

အရိုးများ ကျိုးပဲ့သံများ ဆက်တိုက် ထွက်ပေါ်လာပြီးနောက် ဂေးလ်စ်သည် ရွှယ်အန်း၏ လက်ဗလာသက်သက်ဖြင့် သတ်ဖြတ်ခြင်း ခံလိုက်ရသည်။

"အစွမ်းထက်တဲ့ မင်းလို လူတစ်ယောက်က အရမ်း မောက်မာလွန်းရင် နတ်ဘုရားတွေရဲ့ ပြစ်ဒဏ်ကိုခံရမှာ မကြောက်ဘူးလား"

ဂေးလ်စ်သည် ပြင်းထန်သော နာကျင်မှုကို ကြိတ်မှိတ်ခံစားရင်း ဒေါသတကြီး အော်ဟစ်လိုက်သည်။

"ဘာ နတ်ဘုရားရဲ့ ပြစ်ဒဏ်ခတ်မှုလဲ၊ ငါက မင်းတို့ သွေးမျိုးနွယ်စုအတွက် နတ်ဘုရားရဲ့ အပြစ်ဒဏ်ပဲ"

ထိုသို့ပြောပြီးနောက် ရွှယ်အန်း၏ လက်ထဲတွင် မီးများ တောက်လောင်လာပြီး နှစ်ထောင်ချီ သက်တမ်းရှိသော ဤပထမမျိုးဆက် သွေးမျိုးနွယ်ကို အတင်းအဓမ္မ သန့်စင်ခြင်း စတင်လိုက်သည်။

ဂေးလ်စ်၏ အော်ဟစ်သံများသည် ကောင်းကင်နှင့် မြေကြီးအနှံ့ ပဲ့တင်ထပ်သွားသည်။

"လူသား... မင်းရဲ့ တောင်းဆိုမှု မှန်သမျှကို ကျုပ်သဘောတူပါ့မယ်၊ ကျုပ် မင်းရဲ့ သွေးကျွန်လုပ်ခိုင်းရင်တောင် လုပ်ပါ့မယ်၊ ကျွန်တော့်ကို အသက်ချမ်းသာပေးပါ"

ရွှယ်အန်း မည်သို့မျှ မတုံပြန်ပေ။

"အစွမ်းထက်တဲ့လူကြီးမင်း... ကျွန်တော်က ခင်ဗျားကို မရေမတွက်နိုင်တဲ့ လျှို့ဝှက်ချက်တွေ ပြောပြနိုင်ပါတယ်"

ရွှယ်အန်းက ဘာမှ မကြားသည့်အလား ပြုမူနေသည်။

အဆုံးတွင် ဂေးလ်စ်သည် သေခြင်းတရား၏ ကြောက်ရွံ့မှုကို ခံစားလိုက်ရပြီး အလွန်ပြင်းထန်သော ဒေါသနှင့် နာကြည်းမှုများ ပြည့်နှက်လာသည်။

"အောက်တန်းကျတဲ့ လူသားမျိုးနွယ်၊ မင်းငါ့ကို သတ်လိုက်ရင်တောင် ဘာလုပ်နိုင်မှာလဲ၊ ငါ့မှာ မကြာခင် နိုးထလာမယ့် မိတ်ဆွေဟောင်း နှစ်ယောက် ရှိသေးတယ်၊ အဲဒီအချိန်ကျ မင်းရဲ့ သင်္ဂြိုဟ်တဲ့နေ့ ဖြစ်လာလိမ့်မယ်"

ရွှယ်အန်း ပေါ့ပါးစွာ ရယ်မောလိုက်ပြီး ယဇ်ပလ္လင်ကို ညွှန်ပြလိုက်သည်။

"ယဇ်ပလ္လင်အောက်က အဘိုးအိုကြီး နှစ်ယောက်ကို ပြောနေတာလား"

"သူတို့ နိုးလာဖို့ စောင့်စရာ မလိုပါဘူး၊ ငါ အခုပဲ သူတို့ကို သတ်ပစ်တော့မှာ"

ထိုသို့ပြောပြီးသည်နှင့် ရွှယ်အန်း၏ ပုံရိပ်သည် လက်ခနဲ ဖြစ်သွားပြီး ခမ်းနားထည်ဝါသော ယဇ်ပလ္လင်အထက်တွင် ပေါ်လာကာ ခြေတစ်လှမ်းလှမ်းပြီး အောက်သို့ လက်သီးဖြင့် ထိုးချလိုက်သည်။

အသံမထွက်သလို လှုပ်ရှားမှုလည်းမရှိပဲ ပုံမှန်မဟုတ်သည့် အရိပ်အယောင် အနည်းငယ်မျှပင် မရှိချေ။

ရွှယ်အန်း၏ လက်သီးချက်သည် ငှက်မွေးပမာ ပေါ့ပါးပြီး မည်သည့် ဖိအားမှ မရှိသလိုထင်ရသည်။

သို့သော် မီးတောက်များထဲမှ ဂေးလ်စ်၏ ရယ်မောသံသည် သူ့ပါးစပ်မှ မထွက်လာခင်မှာပဲ သွေးရောင်မိုးကြိုးများဖြင့် ဗုံးကြဲခံရစဉ်ကပင် ကြံ့ကြံ့ခံနိုင်ခဲ့သော ယဇ်ပလ္လင်သည် ပြင်းထန်စွာ တုန်လာသည်။

ထို့နောက် ရွှယ်အန်း ထိုးလိုက်သော နေရာမှ အက်ကွဲကြောင်းများ စတင်ပြန့်နှံ့လာသည်။

ခဏအတွင်းမှာပင်...

ယဇ်ပလ္လင်သည် ပေါက်ကွဲထွက်သွားသည်။

ယဇ်ပလ္လင်အောက်တွင် ကြီးမားလှသော ခေါင်းတလားကြီး နှစ်လုံး ရှိနေသည်။

၎င်းတို့သည် ပြင်ပကမ္ဘာမှ အပြောင်းအလဲများကို အာရုံခံမိပုံရသည်။

ခေါင်းတလားနှစ်လုံးသည် ယခုအခါ သွေးရောင်အလင်းတန်းများ ထုတ်လွှတ်နေပြီး အဆုံးတွင် ဘုန်း ခနဲ အသံနှင့်အတူ ကွဲကြေသွားသည်။

ထို့နောက် သွေးရိပ်နှစ်ခု ပျံထွက်လာသည်။

အမှန်စင်စစ်တွင် ၎င်းတို့သည် အမျိုးသားတစ်ဦးနှင့် အမျိုးသမီးတစ်ဦးဖြစ်ပြီး ရှေးဟောင်းသွေးမျိုးနွယ်ဝင် နှစ်ဦးဖြစ်သည်။

သူတို့သည် Inor မိသားစု နှင့် Hilary မျိုးနွယ်စုတို့၏ ဘိုးဘေးများ ဖြစ်ကြသည်။

ဤအစွမ်းထက်သော ပထမမျိုးဆက် သွေးမျိုးနွယ်ဝင် နှစ်ယောက်သည် လေထဲတွင် ရပ်တန့်နေပြီး အောက်ဘက်ရှိ သွေးမျိုးနွယ်များကို ကြည့်ကာ စကားပြောရန် ပြင်လိုက်ကြသည်။

သို့သော် ရွှယ်အန်းသည် တားလိုက်သည်။

"တော်ပြီ၊ ခင်ဗျားတို့အတွက် ထပ်အချိန်မဖြုန်းချင်တော့ဘူး"

ထို့နောက် သူသည် ကောင်းကင်ကို ဖြတ်ကျော်ကာ သွေးမျိုးနွယ်ဝင် နှစ်ယောက် မတုံ့ပြန်နိုင်မီမှာပင် သူတို့၏ လည်ပင်းများကို တစ်ဖက်စီ ဖမ်းဆုပ်လိုက်သည်။

ဤသွေးမျိုးနွယ်ဝင် နှစ်ယောင်သည် နှစ်ခြိုက်စွာ အိပ်ပျော်နေခြင်းမှ နိုးထလာခါစဖြစ်ပြီး ဘာတွေဖြစ်ပျက်နေသည်ကို သတိမပြုမိကြသေးပေ။

ရွှယ်အန်းသည် သူတို့ကို မီးတောက်များထဲသို့ ဆွဲထည့်လိုက်သည်။

မီးတောက်များ ၎င်းတို့ကို ထိတွေ့လိုက်သည်နှင့် သူတို့သည် ရုန်းကန်ပြီး ရူးသွပ်စွာ အော်ဟစ်လာကြသည်။

သို့သော် သူတို့၏ ရုန်းကန်မှုများအားလုံးသည် သူတို့၏ ကံကြမ္မာကို ပြောင်းလဲနိုင်မည် မဟုတ်ပဲ အချိန်ပိုင်း ကိစ္စမျှသာ အချိန်ဆွဲနိုင်သည်။

သူတို့သည် အတင်းအဓမ္မ သန့်စင်ခြင်း ခံလိုက်ရပြီး သွေးပုလဲများ ဖြစ်သွားကြသည်။

ထို့နောက် ရွှယ်အန်းသည် ရင်ထဲတွင် ကြောက်ရွံ့မှုများ ပြည့်နှက်နေသော ဂေးလ်စ်ကို လှည့်ကြည့်လိုက်ပြီး ပေါ့ပါးစွာ ပြောလိုက်သည်။

"နှုတ်ဆက်ပါတယ်"

ဤစကားများနှင့်အတူ မီးတောက်များလည်း ပိုလို့ပင်ပြင်းထန်စွာ တောက်လောင်လာသည်။

ဂေးလ်စ်လည်း အော်ဟစ်လိုက်သည်။ သူ့ကို ကာကွယ်ထားသော သွေးအလင်းရောင်သည် အဆုံးတွင် လုံးဝ ပျက်စီးသွားပြီး သူသည်လည်း အတင်းအဓမ္မ သန့်စင်ခြင်း ခံလိုက်ရကာ သွေးပုလဲ တစ်လုံး ဖြစ်သွားတော့သည်။