အခန်း (၅၉၅−၅၉၆)

အခန်း (၅၉၅) မယ်လီကစ်၏ ခြုံခိုတိုက်ခိုက်မှု (၂)

ဘုန်း ... ဘုန်း ... ဘုန်း ...

သူတို့နှစ်ယောက်၏ ပုံရိပ်များသည် နဂါးနှင့်မြွေ တိုက်ခိုက်နေသကဲ့သို့ အကြိမ်ကြိမ် ထိပ်တိုက်တွေ့နေကြသည်။ ဂြိုလ်၏ အညိုရောင်မျက်နှာပြင်ကို ဖြတ်ကျော်ပြီး အပြန်အလှန် တိုက်ခိုက်နေကြခြင်း ဖြစ်သည်။ ပြင်းထန်သော ရိုက်ချက်များသည် သူတို့နှစ်ယောက်လုံး၏ ခန္ဓာကိုယ်များပေါ် ကျရောက်နေပြီး စွမ်းအားကြီးသော လေဖိအားလှိုင်းများသည် စစ်မြေပြင်တစ်ခုလုံး ပဲ့တင်ထပ်နေသည်။

တိုက်ပွဲ၏ လေဖိအားလှိုင်းများကြောင့် ဂြိုလ်၏ မူလမျက်နှာပြင် ပျက်စီးသွားပြီး ဂြိုလ်မျက်နှာပြင် နေရာအနှံ့တွင် ချိုင့်ခွက်များကို မြင်တွေ့နေရသည်။

မယ်လီကစ်၏ စုစုပေါင်းအဆင့်သည် အလွန်မြင့်မားပြီး အလွန်အစွမ်းထက်သည်။ ထိပ်တိုက်ရင်ဆိုင်တိုက်ခိုက်ခြင်းမှာ ဟန်ရှောင်း၏ အားသာချက် မဟုတ်သော်လည်း ကျေးဇူးတင်စရာကောင်းသည်မှာ မယ်လီကစ်ကို ဘောလုံးတစ်လုံးလို ပစ်ပေါက်ပြီး သူ၏ စစ်သည်တော် ကွန်ဘိုတိုက်ကွက်များကို ဖျက်စီးရန်အတွက် [ဘာစာကာ ပစ်ပေါက်ခြင်း] စကေး ရှိနေခြင်းပင်။

ဟန်ရှောင်းသည် ရှပ်တယ်မုဒ်အဖြစ် ပြောင်းလဲပြီး အချိန်မရွေး ထွက်ပြေးရန် ရွေးချယ်နိုင်သည်။ သို့သော် သူသည် မယ်လီကစ်၏ ဇာစ်မြစ်ကို အလွန်စိတ်ဝင်စားနေပြီး သူနှင့် ကောင်းကောင်း တိုက်ခိုက်ရန် ဆုံးဖြတ်လိုက်သည်။ မည်သို့ပင်ဆိုစေကာမူ မဟူရာအလင်း လျှို့ဝှက်ယာဉ်သည် ကောင်းကင်ပေါ်တွင် ပျံဝဲနေပြီးဖြစ်၍ ဟန်ရှောင်းသည် အချိန်မရွေး ထွက်ပြေးနိုင်သည်။

ထို့နောက် ဟန်ရှောင်းသည် ဘာစာကာ လူဝံ ယန္တရားဝတ်စုံ၏ နာနိုပြောင်းလဲနိုင်စွမ်းကို အသက်သွင်းလိုက်ပြီး [ဧရာမလူဝံပုံစံ] အဖြစ် ပြောင်းလဲလိုက်သည်။ ယန္တရားဝတ်စုံသည် လျင်မြန်စွာ ကြီးထွားလာပြီး ရှိရင်းစွဲ ဝတ်စုံပေါ်တွင် အလွှာထူကြီးများ ဖွဲ့စည်းရန်အတွက် အစိတ်အပိုင်းအမျိုးမျိုးက ဘယ်နေရာကမှန်းမသိ ပေါ်ထွက်လာပုံရသည်။ ဟန်ရှောင်းသည် မယ်လီကစ်ထက် ခေါင်းတစ်လုံးပိုမြင့်သော ဧရာမလူကြီး ဖြစ်လာသည်အထိ လျင်မြန်စွာ ကြီးထွားလာ၏။ သူ၏ ခွန်အားပင်ကိုယ်အရည်အသွေးသည် မိုးထိအောင် မြင့်တက်လာပြီး [ဘာစာကာ ပစ်ပေါက်ခြင်း] ၏ စွမ်းအားလည်း တိုးလာသည်။

နှစ်ဖက်စလုံးသည် စွမ်းအားကြီးသော ကာကွယ်မှုနှင့် ပြန်လည်သက်သာခြင်းများ ရှိကြသည့် ကပ်ဘေးအဆင့် စူပါများ ဖြစ်ကြသည်။ ထို့ကြောင့် တိုက်ပွဲမှာ မတင်မကျ အခြေအနေ ဖြစ်နေသည်။

ဟန်ရှောင်းနှင့် အချိန်အကြာကြီး တိုက်ခိုက်ပြီးနောက် မယ်လီကစ်၏ မျက်လုံးများ အရောင်တောက်လာပြီး စိတ်လှုပ်ရှားမှုအပြည့်ဖြင့် ပြောလိုက်သည်။ "မင်းက ကောလာဟလတွေထဲကထက်တောင် ပိုသန်မာတာပဲ။ ငါအခု အတည်တိုက်တော့မယ်။ ကျေးဇူးပြုပြီး လွယ်လွယ်နဲ့ မသေလိုက်နဲ့နော်"

မယ်လီကစ်သည် တိုက်ပွဲရူးတစ်ယောက်ဖြစ်ပြီး လန်းဆန်းတက်ကြွစေမည့် တိုက်ပွဲတစ်ခု ဖန်တီးရန် ပါတနာတစ်ယောက် ရှာတွေ့ခြင်းက မိတ်လိုက်ခြင်းထက်ပင် ပို၍ ပျော်စရာကောင်းနေသေးသည်။

နောက်တစ်ခဏတွင် မယ်လီကစ်သည် နတ်ဆိုး ဂါထာမန္တန်တစ်ခု ရွတ်ဆိုလိုက်ပြီး သူ့ခန္ဓာကိုယ်ပေါ်ရှိ မီးတောက်များသည် ပိုမိုတောက်ပပြီး ကြီးမားစွာ လောင်ကျွမ်းလာသည်။ သူ့မျက်လုံးများသည် မီးတောက်များဖြင့် လောင်ကျွမ်းနေပုံရပြီး သူ့သံချပ်ကာ အဟများကြားမှ အနီရင့်ရောင် မီးတောက်တစ်ခု ပေါက်ကွဲထွက်ပေါ်လာသည်။ သူ၏ အရှိန်အဝါသည် အဆင့်တစ်ဆင့် မြင့်တက်သွားပြီး ပတ်ဝန်းကျင် အပူချိန် လျင်မြန်စွာ မြင့်တက်လာကာ လေထုမှာ အပူကြောင့် တွန့်လိမ်နေသည်။

"နတ်ဆိုးမျိုးနွယ်ရဲ့ အရည်အချင်း၊ အဆင့်မြင့် စစ်မှန်သော လွတ်မြောက်ခြင်းပဲ" ဟန်ရှောင်း မျက်လုံးများ ကျဉ်းမြောင်းသွားသည်။ သူတို့က ဤကဲ့သို့ အခြေအနေမျိုးတွင် ရှိနေသောအခါ နတ်ဆိုးမျိုးနွယ်၏ တိုက်ခိုက်ရေးစွမ်းအားသည် အကြီးအကျယ် တိုးတက်လာလိမ့်မည်။ မယ်လီကစ်၏ ကပ်ဘေးအဆင့် စွမ်းအားနှင့်ဆိုလျှင် သူ၏အင်အား တိုးလာပုံမှာ ကြောက်စရာကောင်းသည်။

ဘုန်း

ဟန်ရှောင်းသည် သူ့အောက်မှ မြေပြင် လျင်မြန်စွာ ဖြတ်သန်းသွားသည်ကို မြင်လိုက်ရပြီး ဧရာမလူဝံပုံစံ ဖြစ်နေတာတောင်မှ လွင့်ထွက်သွား၏။ နောက်တစ်စက္ကန့်တွင်ပင် မယ်လီကစ်သည် သူတို့နှစ်ယောက်ကြားရှိ အကွာအဝေးကို ချက်ချင်း ကျဉ်းမြောင်းလိုက်ပြီး မယ်လီကစ်ကို ဝန်းရံထားသော ခရမ်းရင့်ရောင် မီးတောက်များသည် ဓားသွားတစ်ချောင်းလို ဟန်ရှောင်း၏ လည်ပင်းဆီ ရိုက်ခတ်လာသည်။

ဟန်ရှောင်းသာ ထိုရိုက်ချက် ထိမှန်သွားပါက သူ့လည်ပင်းရိုး ကျိုးသွားနိုင်ပြီး တစ်ကိုယ်လုံး လေဖြတ်သွားလိမ့်မည်။ ထိုရိုက်ချက်မှ ပြန်သက်သာရန် စက္ကန့်ဝက်ခန့် လိုအပ်မည်ဖြစ်ပြီး ဤစက္ကန့်ဝက်သည် မယ်လီကစ်လို စစ်သည်တော်တစ်ယောက်အတွက် ရိုးရှင်းသော ကွန်ဘိုတစ်ခု ပြုလုပ်ရန် လုံလောက်သည်။

ဟန်ရှောင်းသည် ဧရာမလူဝံပုံစံကို ပိတ်လိုက်ပြီး သူ၏တစ်ကိုယ်လုံး ကျုံ့ဝင်သွားသည်။ တိုက်ခိုက်မှုသည် သူ၏ဦးထုပ်အပေါ်ပိုင်းကို မီလီမီတာအနည်းငယ်ခန့်သာ ကပ်ပြီး ဖြတ်ကျော်သွားသည်။

သူ့တိုက်ခိုက်မှု လွဲချော်သွားသဖြင့် မယ်လီကစ်သည် သူ့လက်ချောင်းများကို ယှက်လိုက်ပြီး ဟန်ရှောင်းကို မြေကြီးထဲ ရောက်အောင် ထုချတော့မလို လုပ်လိုက်သည်။

ဤအချိန်တွင် ဟန်ရှောင်း၏ ဦးထုပ် ရုတ်တရက် ပွင့်သွားပြီး သူ့မျက်လုံးထဲတွင် မီးတောက်လေပွေနှစ်ခုကို မြင်လိုက်ရသည်။ နောက်တစ်ခဏ၌ပင် အဖြူရောင် မီးတောက်ဘောလုံးနှစ်ခုသည် သူ့မျက်လုံးထဲမှနေ၍ မယ်လီကစ်ဆီ ပစ်လွှတ်လိုက်သည်။

ဘုန်း

မယ်လီကစ်၏ တိုက်ခိုက်မှု ထပ်မံ ပြတ်တောက်သွားသည်။

နတ်ဆိုးမျိုးနွယ်ထဲတွင် မတူညီသော နတ်ဆိုးအမျိုးအစားများ ရှိသည်။ သူတို့သည် စစ်မှန်သော လွတ်မြောက်ခြင်း ပါရမီကို ထုတ်သုံးလိုက်သောအခါ မျိုးနွယ်စု မတူညီမှုများသည် သိသာထင်ရှားလာသည်။ ဥပမာ - မီးမှုတ်သော နတ်ဆိုးများသည် မီးနတ်ဆိုးများဖြစ်ပြီး ရေခဲမှုတ်သော နတ်ဆိုးများသည် ရေခဲနတ်ဆိုးများဖြစ်ကြသည်။ မယ်လီကစ်သည် သိသာထင်ရှားစွာပင် မီးနတ်ဆိုးတစ်ကောင်ဖြစ်ပြီး သူ၏ မီးခုခံနိုင်စွမ်းသည် အလွန်မြင့်မားလိမ့်မည်။ ထို့ကြောင့် ဟန်ရှောင်း၏ တိုက်ခိုက်မှုသည် ထိခိုက်မှု အများကြီး မပေးနိုင်သော်လည်း သူ့ကို အောင်မြင်စွာ နောက်ဆုတ်သွားစေနိုင်ခဲ့သည်။

ဟန်ရှောင်းသည် သူ့ယန္တရားဝတ်စုံထဲတွင် မျိုးရိုးဗီဇဆေးဝါး အချို့ ထည့်ထားပြီး သူ၏ တစ်ကြိမ်သုံး ဇာတ်ကောင်ဆင့်ခေါ်ကတ်ကို အသုံးပြုရန်အတွက် ယခင်ကတည်းက ဘီဖူလီ၏ မျိုးရိုးဗီဇဆေးဝါးကို ထိုးသွင်းထားပြီး ဖြစ်သည်။

ဟန်ရှောင်းသည် သူ့အတွက်သူ ဖန်တီးလိုက်သော အခွင့်အရေးအနည်းငယ်လေးနှင့်အတူ တွန့်ဆုတ်မနေဘဲ သူ့ယန္တရားဝတ်စုံ၏ ဘာစာကာ ဝန်ပိုပုံစံကို အသက်သွင်းလိုက်သည်။

သူ့ယန္တရားဝတ်စုံ၏ နျူကလီးယား ဓာတ်ပေါင်းဖိုသည် စွမ်းအားအပြည့် လည်ပတ်လာပြီး သူ၏ အမြန်နှုန်း၊ ခွန်အားနှင့် လက်နက်များအားလုံး၏ ပင်ကိုယ်အရည်အသွေးများ တိုးမြင့်လာသည်။

ဟန်ရှောင်းသည် လက်နှစ်ဖက်ကို ပူးလိုက်ပြီး နာနိုလက်နက် မော်ဂျူးကို အသက်သွင်းလိုက်သည်။ သူ့လက်မောင်းသည် ကြီးမားသော အမြောက်ပြောင်းတစ်ခုအဖြစ် ပြောင်းလဲသွားပြီး တောက်ပသော အလင်းတန်းတစ်ခု မယ်လီကစ်ဆီ ပစ်လွှတ်လိုက်သည်။

ဘုန်း

မယ်လီကစ်သည် အမြောက်ဒဏ်ကို ခံနိုင်ရည်ရှိပြီး ဆက်လက် ဝင်ဆောင့်ကာ လေဖိအားလှိုင်းပေါက်ကွဲမှု ဘောလုံးများ ပစ်လွှတ်ရန် လက်ကို မြှောက်လိုက်သည်။

သူတို့နှစ်ယောက် အပြန်အလှန် ပစ်ခတ်လိုက်ကြရာ ပေါက်ကွဲမှုများသည် သူတို့နှစ်ယောက်ကို ဝန်းရံသွားပြီး တစ်ယောက်က ရှေ့တိုးကာ နောက်တစ်ယောက်က နောက်ဆုတ်သွားသည်။ မယ်လီကစ်၏ အမြန်နှုန်းသည် စစ်မှန်သော လွတ်မြောက်ခြင်း အရည်အချင်းကို ထုတ်သုံးပြီးနောက် လျင်မြန်စွာ မြင့်တက်လာပြီး သူတို့နှစ်ယောက်ကြားရှိ အကွာအဝေး ချက်ချင်း ကျဉ်းမြောင်းသွားသည်။ မကြာမီတွင်ပင် မယ်လီကစ်သည် ဟန်ရှောင်းရှေ့သို့ ပြန်ရောက်လာသည်။

မီးတောက်များဖြင့် ဖုံးအုပ်ထားသော သူ၏လက်သီးက ဟန်ရှောင်း၏ ရင်ဘတ်တည့်တည့်ကို ချိန်ရွယ်ထားသည်။

ဟမ်

ဤအချိန်တွင်ပင် ဟန်ရှောင်း၏ ခန္ဓာကိုယ်သည် မျက်စိကျိန်းမတတ် လျှပ်စီးတန်းတစ်ခုအဖြစ် ပေါက်ကွဲထွက်ပေါ်လာပြီး သူ့လက်သီးများသည် လျှပ်စီးတန်းတစ်ခုလို မယ်လီကစ်၏ မျက်နှာပေါ် အရင် ကျရောက်သွားသည်။

ဘုန်း

သူ့လက်သီးများသည် ကြမ်းတမ်းသော လျှပ်စီးတန်းတစ်ခုလို လေထဲတွင် ပေါက်ကွဲသွားသည်။

တိုက်ခိုက်မှု၏ လေဖိအားလှိုင်းသည် ဟန်ရှောင်း ခြေထောက်အောက်မှနေ၍ အရပ်မျက်နှာ အနှံ့အပြားသို့ ပျံ့နှံ့သွားပြီး အချင်း မီတာတစ်ရာရှိသော ချိုင့်ခွက်ကြီးတစ်ခု ဖြစ်ပေါ်လာသည်။

မယ်လီကစ်ကတော့ မိုးကုပ်စက်ဝိုင်းဆီက ကြယ်တံခွန်တစ်ခု ဖြစ်သွားပြီး မြင်ကွင်းထဲမှ လျင်မြန်စွာ ပျောက်ကွယ်သွားသည်။

[စွမ်းအားပေါက်ကွဲခြင်း]

အကယ်၍ တိုက်ခိုက်မှုသည် အနီးကပ်တိုက်ခိုက်မှု ဖြစ်ပါက ထိုတိုက်ခိုက်မှုသည် ၆၅၀ မှ ၇၀၀ ရာခိုင်နှုန်း ထပ်ဆောင်းထိခိုက်မှု၊ စွမ်းအားပေါက်ကွဲထိခိုက်မှုနှင့် ဖွာထွက်ထိခိုက်မှုတို့ကို ရရှိစေမည်ဖြစ်သည်။ ထို့အပြင် ၆၅ ရာခိုင်နှုန်း အပြင်းစားထိခိုက်စေမှု ရနိုင်ခြေ ရှိသလို ပင့်တင်ခံရခြင်း၊ နောက်သို့လွင့်စင်ခြင်း၊ ဖိနှိပ်ခံရခြင်းနှင့် မူးဝေခြင်း ကဲ့သို့သော မကောင်းသော အကျိုးသက်ရောက်မှုများကို ပေးစွမ်းနိုင်သည်။

သူသည် ဤစကေးကို သုံးရုံတင်မကဘဲ [မျိုးဗီဇ လွတ်မြောက်ခြင်း] ကိုပါ အသက်သွင်းလိုက်ခြင်း ဖြစ်သည်။ ၎င်းသည် [မီးလျှံအလိုတော်] ကို စကေးအဆင့်မြှင့်ကတ်နှင့် အားဖြည့်ထားခြင်း ဖြစ်သည်။

ဤတိုက်ခိုက်မှု၏ စုစည်းထားသော စွမ်းအားသည် တကယ်ကို ကြောက်စရာကောင်းသည်။

မယ်လီကစ်သည် အနည်းဆုံး ကီလိုမီတာ တစ်ဒါဇင်လောက် လွင့်ထွက်သွားခဲ့သည်။

သူသည် မြေကြီးပေါ် ပြန်မကျမီ ကောင်းကင်ပေါ်တွင် တစ်ရက်လောက် ပျံသန်းနေရလိမ့်မည်။

"ဟူး ... ဟူး ..."

ဟန်ရှောင်း အသက်ကို ဖြည်းညှင်းစွာ ရှူလိုက်သည်။ လက်သီးချင်းယှဉ်ထိုးရခြင်းသည် သူ့၏ ခံနိုင်ရည် သက်လုံကို အကုန်ဆုံးစေဆုံးပင်။ သူ့၏ သွေးအမှတ်နှင့် စွမ်းအင်က ကျန်းမာသော အဆင့်တွင် ရှိနေသေးသော်လည်း သူ့သက်လုံကတော့ အကြီးအကျယ် ကုန်ဆုံးသွားချေပြီ။

ကျေးဇူးတင်စရာကောင်းသည်မှာ သက်လုံများလေလေ ပြန်လည်သက်သာနှုန်း မြန်လေလေပင်။

"ဒီကောင်က တကယ်ကို အစွမ်းထက်တာပဲ။ သူက ဒီဂူလစ်ရှ်နဲ့ နာဂါကင်တို့ထက် အများကြီး ပိုသန်မာတယ်။ ငါ့ရဲ့ စောစောက ရိုက်ချက်က သူ့ကို ဒဏ်ရာအနည်းငယ်လောက်ပဲ ဖြစ်စေမှာ"

ဟန်ရှောင်းသည် တိုက်ပွဲကို ဆက်တိုက်သင့်မတိုက်သင့် စဉ်းစားနေစဉ် ရုတ်တရက် မယ်လီကစ်၏ ဇာစ်မြစ်ကို သတိရသွားသည်။

"သွေးစွန်းကုန်းမြေရဲ့ အဓိကအရာရှိ၊ ဟီဘာရဲ့ လက်အောက်ခံ ရှေ့ပြေးအရာရှိ ၈ ဦးထဲက တစ်ယောက်။ သူက အဆင့် အေ အထက်ဆင့် စူပါတစ်ယောက်ရဲ့ လက်အောက်ခံပဲ။"

ဟန်ရှောင်း ချက်ချင်း သတိထားလိုက်မိသည်။ အခြား အဆင့် အေ အထက်ဆင့် စူပါတစ်ယောက်၏ အရာရှိက ဘာကြောင့် သူ့ကို လာတိုက်ရသနည်း။

ထိုအချိန်တွင် တောရိုင်းမြေပြင်ဆီမှ ကြီးမားသော ဖုန်လုံးကြီး လိပ်တက်လာသည်ကို မြင်လိုက်ရပြီး ၎င်းသည် အဝေးကနေ ပြန်ပြေးလာသော မယ်လီကစ် ဖြစ်သည်။ ဤတစ်ကြိမ်တွင် သူသည် ရှေ့သို့ ဝင်မဆောင့်ဘဲ ဟန်ရှောင်းနှင့် မီတာအနည်းငယ်အကွာတွင် ရပ်လိုက်သည်။ သူသည် စစ်မှန်သော လွတ်မြောက်ခြင်း အခြေအနေကို ပိတ်လိုက်ပြီဖြစ်ပြီး သူ့မျက်နှာပေါ်တွင် အနီရောင် လက်သီးရာတစ်ခု ရှိနေသည်။

"ကောင်းတယ် ဘလက်စတား။ မင်းက ငါ့ရဲ့ အစွမ်းကုန်ထုတ်သုံးဖို့ ထိုက်တန်တဲ့ ပြိုင်ဘက်ပဲ။ ငါတို့ရဲ့ တိုက်ပွဲကို ငါ တကယ် သဘောကျတယ်" မယ်လီကစ်က လေးစားမှုပါသော အပြုံးတစ်ခုကို ထုတ်ဖော်ပြသလိုက်သည်။

စစ်မှန်သော လွတ်မြောက်ခြင်း အခြေအနေ၌တောင်မှ သူသည် ပြိုင်ဘက်ကို လုံးလုံးလျားလျား ဖိနှိပ်ထားနိုင်ခြင်း မရှိခဲ့ဘဲ အနည်းငယ်တောင် အရေးနိမ့်ခဲ့သည်။ ဘလက်စတားသည် အလွန်အစွမ်းထက်ပြီး လူတွေ ထင်ထားသည်ထက် ပို၍ပင် အစွမ်းထက်နေသေးသည်။

သူလာရသည့် ရည်ရွယ်ချက် ပြည့်မြောက်သွားပြီ။

"ငါ မင်းရဲ့ အဆင့်အတန်းကို သိပြီးသားပါ။ မယ်လီကစ်၊ သွေးစွန်းကုန်းမြေရဲ့ အဖွဲ့ဝင်တစ်ယောက်" ဟန်ရှောင်းက ဆက်မတိုက်ချင်တော့ဘဲ မယ်လီကစ်၏ ရည်ရွယ်ချက်ကိုသာ သိချင်တော့သည်။ "ဘာလို့ ငါ့ကို ခြုံခိုတိုက်ခိုက်တာလဲ။ ဘာလို့ ဒီမှာ ပေါ်လာရတာလဲ"

"ငါက မင်းအတွက် သီးသန့်လာတာ"

ဘလက်စတားသည် နဂါးဧကရီ၏ ယုံကြည်ရသော လက်ထောက်များထဲမှ တစ်ယောက်ဖြစ်ပြီး ဘလက်စတား စစ်တပ်သည် မကြာသေးမီက အလွန်နာမည်ကြီးလာခဲ့သည်။ ဘလက်စတားကို စောင့်ကြည့်ရန်နှင့် သူ့ကို စမ်းသပ်ဖို့ အခွင့်အရေးရှာရန် သူ့ကို ညွှန်ကြားထားခြင်း ဖြစ်သည်။

ခရမ်းရောင်မြွေ အာကာသပင်လယ်ဓားပြများက ဘလက်စတား စစ်တပ်၏ ကြေးစားစစ်သည်များကို ပြန်ပေးဆွဲစဉ်က သွေးစွန်းကုန်းမြေ၏ ထောက်လှမ်းရေးကွန်ရက်က ဤသတင်းကို ရရှိခဲ့သည်။ မယ်လီကစ်သည် အနီးအနားတွင် ရှိနေသောကြောင့် ပင်လယ်ဓားပြများ၏ အာကာသယာဉ်ကို လုယူပြီး ဘလက်စတားသူ့ကို လာရှာမည့်အချိန်ကို စောင့်ရန် ဆုံးဖြတ်လိုက်သည်။ သို့မှသာ ဘယ်သူမှ နှောင့်ယှက်ခြင်းမရှိဘဲ ဘလက်စတား၏ အင်အားကို သူ စမ်းသပ်နိုင်မည် ဖြစ်သည်။

အကယ်၍ သူသာ လုံလောက်အောင် စွမ်းအားကြီးမည်ဆိုလျှင် ...

"မျောလွင့်နဂါးကျွန်းမှာဆို မင်းလို ပါရမီရှင်တစ်ယောက်ကို တိမ်မြုပ်သွားရုံပဲ ရှိမှာပါ။ မင်းမှာ ပိုကြီးမားတဲ့ ရည်မှန်းချက် ရှိသင့်တယ်။ မင်းရဲ့ အင်အားနဲ့ဆိုရင် ငါနဲ့ တန်းတူဖြစ်ဖို့နဲ့ ကိုးယောက်မြောက် ရှေ့ပြေးအရာရှိ ဖြစ်လာဖို့ လုံလောက်တယ်။" မယ်လီကစ်က သူ့ရည်ရွယ်ချက်ကို ထုတ်ဖော်ပြောကြားပြီး သံလွင်ခက် ကမ်းလိုက်သည်။ "ဒါဆို ... မင်း သွေးစွန်းကုန်းမြေကို ဝင်ရောက်ဖို့ ဆန္ဒရှိလား"

စာစဉ် (၃၈)၊ အခန်း (၅၉၅) ပြီး၏။

လင်းဆက်

+++++

အခန်း (၅၉၆) အချိန်ဆွဲခြင်းနှင့် မျှားခေါ်ခြင်း

ဟန်ရှောင်းသည် အံ့အားသင့်စွာဖြင့် မယ်လီကစ်ကို ခေါင်းအစခြေအဆုံး အကဲခတ်ကြည့်လိုက်သည်။

"ခင်ဗျားက လူလာဆွဲတာလား"

ဟန်ရှောင်း ဤအရာကို လုံးဝ မမျှော်လင့်ထားပေ။ မည်သို့ပင်ဆိုစေကာမူ သူသည် မျောလွင့်နဂါးကျွန်း၏ အရာရှိတစ်ဦးဖြစ်ပြီး သာမန်တပ်ဖွဲ့များသည် ဤမျှ မဆင်မခြင် လုပ်လိမ့်မည်မဟုတ်ပေ။ ယခုတွင် သွေးစွန်းကုန်းမြေမှ အမာခံအရာရှိတစ်ဦး ရောက်လာပြီး သူ့ကို ဖိတ်ခေါ်ကာ သူဝင်ရောက်လာသည်နှင့် ရှေ့ပြေးအရာရှိများထဲမှ တစ်ဦးအဖြစ် အလွန်မြင့်မားသော ရာထူးပေးမည်ဟု ကမ်းလှမ်းလာခဲ့သည်။

သွေးစွန်းကုန်းမြေနှင့် မျောလွင့်နဂါးကျွန်းသည် အဆင့်အတန်းချင်း ကွာခြားသည်။ မျောလွင့်နဂါးကျွန်းသည် အေးမီစ်၏ ဂုဏ်သတင်းတစ်ခုတည်းဖြင့်သာ အမြဲတမ်း ရပ်တည်ခဲ့သည်။ သို့သော် 'အာဏာရှင်' ဟီဘာသည် အဆင့် အေ အထက်ဆင့်ရုံသာမက ကွဲအက်ကြယ်စင်ကွင်းရှိ အဆင့် အေ အထက်ဆင့် စူပါလေးယောက်တွင် ဝါအရင့်ဆုံးလည်း ဖြစ်သည်။ ‘စစ်သည်တော်’အတန်းအစားသည် ခန္ဓာကိုယ်ကို လေ့ကျင့်ပေးပြီး အသက်ကို ရှည်စေသဖြင့် သူ၏ သက်တမ်းမှာ အလွန်ရှည်လျားသည်။ ထို့ကြောင့် မျောလွင့်နဂါးကျွန်း၏ အကြီးမားဆုံး အားသာချက်ဖြစ်သော အရာကို သွေးစွန်းကုန်းမြေကလည်း ပိုင်ဆိုင်ထားသည်။

ထို့အပြင် သွေးစွန်းကုန်းမြေသည် ကြယ်စုတန်းအဆင့် လူမှုအဖွဲ့အစည်းတစ်ခု၏ အရေးပါသော မဟာမိတ်ဖြစ်သည်။ သူတို့တွင် ကြွယ်ဝသော အရင်းအမြစ်များ၊ ကျယ်ပြန့်သော အဆက်အသွယ်များနှင့် အလွန်အင်အားကြီးမားသော စစ်ဘက်ဆိုင်ရာ အင်အားရှိသည်။ သူတို့သည် အခြားကြယ်အစုအဝေးရှိ ကြယ်စနစ်အမျိုးမျိုးတွင် တပ်ဖွဲ့ခွဲများစွာကို ဖန်တီးထားသည်။ ၎င်း၏ အရွယ်အစားတစ်ခုတည်းဖြင့်ပင် ကွဲအက်ကြယ်စင်ကွင်းတွင် ဧရာမအဖွဲ့အစည်းကြီး ဖြစ်နေပြီဖြစ်သည်။ ထို့အပြင် ပြိုင်ဆိုင်လိုစိတ်မရှိသော မျောလွင့်နဂါးကျွန်းနှင့် မတူဘဲ သူတို့သည် တက်ကြွစွာ နယ်မြေချဲ့ထွင်နေဆဲဖြစ်သည်။

ဥပမာအားဖြင့် ယခင်ထုတ်ဝေခဲ့သော ဝိန်းကဒ်၏ ကွဲအက်ကြယ်စင်ကွင်း ကဒ်အစုံလိုက်တွင် မျောလွင့်နဂါးကျွန်းစခန်းအောက်၌ ကဒ်သုံးကဒ်သာ ရှိသည် - စွမ်းအားကဒ် [မျောလွင့်နဂါးကျွန်း]၊ တစ်ကိုယ်တော်ကဒ် ['နဂါးဧကရီ' အေးမီစ်] နှင့် ကြေးစားစစ်သည်ကဒ် [ဘလက်စတား စစ်တပ်] တို့ဖြစ်သည်။ သွေးစွန်းကုန်းမြေအတွက်မူ သူတို့စခန်းအောက်တွင် ကဒ်ပေါင်း တစ်ဆယ့်လေးကဒ် ရှိနေသည်။

‘ငါ ဒီရက်ပိုင်း အာရုံစိုက်ခံရမှု တော်တော်များနေပြီး ငါ့စွမ်းရည်တွေကို ပြသခဲ့လို့ ပိုသန်မာတဲ့လူတွေက သတိထားမိလာတာ ဖြစ်လောက်တယ်။’

ဤကဲ့သို့သော အရာများမှာ ရှားပါးသော်လည်း မကြုံစဖူးတော့ မဟုတ်ပေ။ ဂုဏ်သတင်းကျော်ကြားမှုနှင့် ဒဏ္ဍာရီအမှတ်များ အဆင့်တစ်ခုသို့ ရောက်ရှိသွားသည်နှင့် အလားတူဖြစ်ရပ်များ ဖြစ်ပွားရန် အခွင့်အလမ်းရှိသည်။ နာမည်ကြီးလာသောအခါ လူပေါင်းစုံ ချဉ်းကပ်လာတတ်သည်။

သွေးစွန်းကုန်းမြေက သူ့ကို လာရောက်ကမ်းလှမ်းခြင်းက သူ့ရာထူး တဖြည်းဖြည်း မြင့်တက်လာကြောင်း သက်သေပြနေသည်။

"ကျွန်တော် နည်းနည်း သိချင်တာက၊ ဒါက အေးမီစ်ကို ဒေါသထွက်စေမယ်လို့ ခင်ဗျားတို့ မကြောက်ကြဘူးလား" ဟန်ရှောင်းက ပြုံးလိုက်သည်။

မယ်လီကစ်သည် သူ့၏ အကြွင်းမဲ့ ယုံကြည်မှုကို ပြသရင်း ဖျော့တော့စွာ ပြုံးလိုက်သည်။ "အရှင် တိုင်းရန်က အေးမီစ်ကို ကြောက်မယ်လို့ မင်းထင်နေတာလား။ ပြီးတော့ ဒါက ပထမဆုံးအကြိမ်လည်း မဟုတ်ဘူး"

ဟန်ရှောင်း ချက်ချင်း စူးစမ်းချင်စိတ် ဖြစ်သွားသည်။ "ခင်ဗျားတို့ အရင်က မျောလွင့်နဂါးကျွန်းက လူကို ဆွဲဖူးတယ်ပေါ့။ အဲဒီလူ အသက်ရှင်သေးလား"

"ဒါပေါ့ ရှင်တာပေါ့၊ အခု သူ့ရာထူးက အရမ်းမြင့်တယ်"

"အေးမီစ်က အဲဒီကိစ္စကို ဘာမှမလုပ်ဘူးလား"

"အင်း... မင်း သူမအကြောင်း တော်တော်သိတာပဲ။ တကယ်ပဲ သူမ လုပ်ခဲ့တယ်။ အဲဒီတုန်းက သူမက မျောလွင့်နဂါးကျွန်းကို ဆွဲခေါ်လာပြီး ငါတို့ဌာနချုပ်အထိ တိုက်ခိုက်ခဲ့တာ။ ပြီးတော့ အရှင် တိုင်းရန်က ပြန်တိုက်ခိုက်ခဲ့တယ်"

"ဘယ်လို အဆုံးသတ်သွားလဲ" ဟန်ရှောင်း မျက်ခုံးပင့်လိုက်သည်။

မယ်လီကစ်သည် ကြီးစွာသော လေးစားမှုဖြင့် ပြုံးလိုက်ပြီး ပြောသည်။ "မူလ မျောလွင့်နဂါးကျွန်းက အခုလက်ရှိအရွယ်အစားရဲ့ နှစ်ဆရှိခဲ့ဖူးတယ်"

အေးမီစ် အရေးနိမ့်ခဲ့တာပဲ...

ဒါက ယခင်ဘဝတုန်းက ကစားသမားတွေ မသိခဲ့ကြတဲ့ လျှို့ဝှက်သတင်းအချက်အလက် တစ်ခုဖြစ်သည်။ မျောလွင့်နဂါးကျွန်းနှင့် သွေးစွန်းကုန်းမြေတို့ကြားတွင် ရန်ငြိုးရှိနေသည်ကိုး။ အေးမီစ်ဆီကနေ လူလာဆွဲတာ မဆန်းတော့ပါဘူး။

နေပါဦး၊ ငါသာ ကမ်းလှမ်းမှုကို ငြင်းလိုက်ရင် သွေးစွန်းကုန်းမြေက ငါ့ကို ရန်သူအဖြစ် သတ်မှတ်သွားမလား။

ဟန်ရှောင်း သတိဝင်သွားပြီး လေးနက်သောလေသံဖြင့် မေးလိုက်သည်။ "ဖိတ်ခေါ်တဲ့အတွက် ကျေးဇူးတင်ပါတယ်၊ ဒါပေမဲ့ ကျွန်တော် ငြင်းမယ်ဆိုရင်ရော"

မယ်လီကစ်သည် သူ့အပြုံးကို ဖယ်ရှားလိုက်ပြီး ဟန်ရှောင်းကို စိုက်ကြည့်လိုက်သည်။ သူ့လေသံမှာ ပြတ်သားသွားပြီး ဖြည်းညှင်းစွာ ပြောလိုက်သည်။ "ပြန်စဉ်းစားပါဦး"

ဘလက်စတားလက်အောက်ရှိ သိန်းနှင့်ချီသော မသေမျိုးများသည် သွေးစွန်းကုန်းမြေ၏ အာရုံစိုက်မှုကို ဆွဲဆောင်နိုင်ခဲ့သော်လည်း ဟီဘာက သူတို့ကို တစ်ယောက်ပြီးတစ်ယောက် ဖြည်းဖြည်းချင်း သိမ်းသွင်းရန် ငြင်းဆန်ခဲ့ပြီး သူတို့၏ခေါင်းဆောင် ဟန်ရှောင်းကို ပစ်မှတ်ထားလာခဲ့သည်။

မယ်လီကစ်သည် တိုင်းရန် ကိုယ်တိုင်ပေးအပ်လိုက်သော မစ်ရှင်နှင့်အတူ လက်ဗလာဖြင့် ပြန်မသွားချင်ပေ။

‘အခုက ခြိမ်းခြောက်နေတာပဲ...’

ဟန်ရှောင်း မျက်မှောင်ကြုတ်လိုက်ပြီး ကောင်းကျိုးဆိုးကျိုးများကို ဖြည်းညှင်းစွာ ချိန်ဆလိုက်သည်။

သူ သွေးစွန်းကုန်းမြေဘက်သို့ ကူးပြောင်းလိုက်လျှင် မျောလွင့်နဂါးကျွန်း၏ ဒေါသကို ရင်ဆိုင်ရမည်ဖြစ်သည်။ မျောလွင့်နဂါးကျွန်းကြောင့် သူရရှိထားသော အဆက်အသွယ်အားလုံး ပျောက်ကွယ်သွားမည်ဖြစ်ပြီး ဘလက်စတား စစ်တပ် နှင့် ရေပင်လယ်ဂြိုလ်တို့သည်လည်း မျောလွင့်နဂါးကျွန်းနှင့် ရရှိထားသော အထူးအခွင့်အရေးများ ဆုံးရှုံးသွားမည်ဖြစ်သည်။ အေးမီစ်အတွက် သူက အတော်လေး အရေးပါသည်။ သူ သစ္စာဖောက်လိုက်သည်နှင့် သူမ ပို၍ပင် ဒေါသထွက်လိမ့်မည်ဖြစ်ပြီး နောက်ဆက်တွဲဆိုးကျိုးများမှာ ဆိုးရွားလှပေလိမ့်မည်။

ကောင်းကျိုးများကလည်း... အတော်လေး မြင့်မားပုံရသည်။ စွန့်စားရမှုနှင့်အတူ အကျိုးအမြတ် ပါလာတတ်သည်။ သွေးစွန်းကုန်းမြေ၏ တပ်ဖွဲ့များသည် မျောလွင့်နဂါးကျွန်းထက် ပိုမိုအားကောင်းသည်။ သူသည် ပိုမိုကျယ်ပြန့်သော အဆက်အသွယ်များကို တည်ဆောက်နိုင်မည်ဖြစ်ပြီး သွေးစွန်းကုန်းမြေသည် သူတို့၏ အရင်းအမြစ်များဖြင့် ဘလက်စတား စစ်တပ် ကို ပိုမိုကောင်းမွန်စွာ ထောက်ပံ့ပေးနိုင်မည်ဖြစ်ရာ သူဆုံးရှုံးခဲ့သမျှကို ပြန်လည်ရယူနိုင်လိမ့်မည်။ တစ်ခုတည်းသော ပြဿနာမှာ သူသည် နယ်မြေချဲ့ထွင်ရန်နှင့် ဖွံ့ဖြိုးတိုးတက်ရန် သွေးစွန်းကုန်းမြေရှိရာ ကြယ်အစုအဝေးသို့ ပြောင်းရွှေ့ရပေမည်။

ဟီဘာက ငါ့ကို ဖိတ်ရဲမှတော့ အေးမီစ်ရဲ့ လက်စားချေမှုသာ အောင်မြင်သွားရင် ဟီဘာ ဂုဏ်သတင်းအများကြီး ကျဆင်းသွားလိမ့်မယ်။ ဒါကြောင့် ဟီဘာက ငါ့ကို ဘယ်နည်းနဲ့မဆို ကာကွယ်ပေးလောက်တယ်...

အနည်းငယ် စဉ်းစားပြီးနောက် ဟန်ရှောင်းက ပြောလိုက်သည်။ "ကျွန်တော် စဉ်းစားပြီးပါပြီ"

သူ့မျက်ခုံးများ ပြေလျော့သွားပြီး မယ်လီကစ်ကို ပြုံးပြလိုက်သည်။

"ကျွန်တော် ငြင်းပါတယ်"

သူသည် အကျင့်ပါနေသဖြင့် ကောင်းကျိုးဆိုးကျိုးများကို ခွဲခြမ်းစိတ်ဖြာခဲ့သော်လည်း ၎င်းသည် အကျင့်တစ်ခုထက် မပိုပေ။ ဟန်ရှောင်းသည် အစကတည်းက မျောလွင့်နဂါးကျွန်းမှ ထွက်ခွာရန် မည်သည့်အခါကမျှ အစီအစဉ်မရှိခဲ့သလို သူသည် အလွယ်တကူ စည်းရုံး၍ရသူ တစ်ဦးလည်း မဟုတ်ပေ။

အေးမီစ်သည် သူ့ကို အကူအညီများစွာ ပေးခဲ့ပြီး မျက်နှာသာပေးမှုများနှင့် သူတို့၏ ဆက်ဆံရေးသည် နှေးကွေးသော်လည်း ခိုင်မာစွာ တည်ဆောက်ထားပြီးဖြစ်သည်။ ဟီဘာဘက်သို့ ပြောင်းလိုက်လျှင် သူ၏ သူဌေးနှင့် ဆက်ဆံရေးကို တစ်ဖန်ပြန်လည် တည်ဆောက်ရဦးမည်။ ထို့အပြင် 'အာဏာရှင်' ဟူသော ဘွဲ့သည် သိပ်ပြီး ဖော်ရွေပုံမရပေ။ သွေးစွန်းကုန်းမြေတွင် မျောလွင့်နဂါးကျွန်းထက် စည်းကမ်းများစွာ ပိုများသဖြင့် အေးမီစ်က သူ့ကို သည်းခံသကဲ့သို့ သူတို့က သည်းခံရန် မဖြစ်နိုင်ပေ။

‘အရေးအကြီးဆုံးကတော့... ငါက မျောလွင့်နဂါးကျွန်း ကွင်းဆင်းအဖွဲ့ရဲ့ တစ်ဦးတည်းသော ခေါင်းဆောင်ပဲ။ ခင်ဗျားတို့ဆီသွားပြီး နံပါတ်ကိုး နေရာဝင်လုပ်ရအောင် ငါရူးနေလို့လား။’

မယ်လီကစ်၏ အပြုံး လုံးဝ ပျောက်ကွယ်သွားပြီး အေးစက်သော အမူအရာဖြင့် ဟန်ရှောင်းကို တည့်တည့်စိုက်ကြည့်လိုက်သည်။

ဟန်ရှောင်း နောက်မဆုတ်ဘဲ တိုက်ခိုက်ရန် တိတ်တဆိတ် ပြင်ဆင်ထားရင်း ပြန်လည်စိုက်ကြည့်လိုက်သည်။

လေထုမှာ တင်းမာလာသည်။

သူတို့ တိုက်ပွဲဖြစ်တော့မည်ဟု ဟန်ရှောင်း ထင်လိုက်ချိန်တွင် မယ်လီကစ်သည် ရုတ်တရက် ပြင်းပြင်းထန်ထန် နှာခေါင်းရှုံ့လိုက်ပြီး ထွက်ခွာသွားသည်။

ဟန်ရှောင်း လျှော့ချလိုက်ပြီး ပါးစပ်မှတစ်ဆင့် လေမှုတ်ထုတ်လိုက်သည်။

တိုက်ပွဲဖြစ်မည့်ပုံ မပေါ်ပေ။ ဘလက်စတား စစ်တပ် သည် ဖွံ့ဖြိုးတိုးတက်မှု၏ အလွန်အရေးကြီးသော အဆင့်ကို ဖြတ်သန်းနေရသဖြင့် သွေးစွန်းကုန်းမြေနှင့် ဆက်ဆံရေးမပျက်ခြင်းက အကောင်းဆုံးဖြစ်သည်။

ဤအချိန်တွင် သွေးစွန်းကုန်းမြေ အမှတ်အသားပါသော အာကာသယာဉ်တစ်စင်း ကောင်းကင်မှ ပျံသန်းလာသည်။ ဒါက ဂြိုလ်၏ အခြားတစ်ဖက်တွင် ဝှက်ထားသော မယ်လီကစ်၏ တကယ့်ယာဉ်ဖြစ်သည်။

မယ်လီကစ် လှေကားထစ်များအတိုင်း လျှောက်တက်သွားသည်။ ရုတ်တရက် ပိတ်တော့မည့် ယာဉ်တံခါးကို တားလိုက်ပြီး ဟန်ရှောင်းကို ကြည့်ကာ လေးနက်သောအသံဖြင့် ပြောလိုက်သည်။ "ဘလက်စတား၊ ငါတို့ မကြာခင် ပြန်တွေ့ကြတာပေါ့"

ထို့နောက် ဟန်ရှောင်း၏ တုံ့ပြန်မှုကို ဂရုမစိုက်ဘဲ ယာဉ်တံခါးကို လွှတ်လိုက်ပြီး ပိတ်ခိုင်းလိုက်သည်။ သွေးစွန်းကုန်းမြေ၏ အာကာသယာဉ်သည် လျင်မြန်စွာ မြင့်တက်သွားပြီး ပျောက်ကွယ်သွားသည်။

‘မကြာခင် ပြန်တွေ့မယ်... ဘာကို ဆိုလိုတာလဲ။ ငါ့ကို ကိုင်တွယ်ဖို့ အခွင့်အရေး ရှာတော့မယ်လို့ ပြောတာလား။ ဒါမှမဟုတ် တခြားတစ်ခုခုကို ဆိုလိုတာလား။’

"ထားလိုက်ပါတော့၊ သွေးစွန်းကုန်းမြေရဲ့ နယ်မြေက ကော်လ်တန်ကြယ်စုတန်းထဲမှာမှ မဟုတ်တာ၊ ဒီတော့ သူတို့ ငါ့အတွက်နဲ့ ဒီကို လာဖို့ဆိုတာ သိပ်မဖြစ်နိုင်ပါဘူး။ မျောလွင့်နဂါးကျွန်းနဲ့ သွေးစွန်းကုန်းမြေက ငြိမ်းငြိမ်းချမ်းချမ်း ယှဉ်တွဲနေထိုင်ကြတာဆိုတော့ ငါ့ကြောင့်နဲ့ သူတို့ ကြီးကြီးမားမား လှုပ်ရှားမှာ မဟုတ်ပါဘူး"

ဟန်ရှောင်း ခေါင်းခါလိုက်သည်။ သေချာစဉ်းစားပြီးနောက် သူ သိပ်စိတ်မပူတော့ပေ။

"ဟုတ်သားပဲ၊ ငါ ဒီကို လာတာ ဓားစာခံ လွှဲပေးဖို့ပဲ" သူ ဒီနေရာရောက်နေရသည့် မူလအကြောင်းရင်းကို ရုတ်တရက် သတိရသွားသည်။

မယ်လီကစ်နှင့် ထိပ်တိုက်တွေ့ပြီးနောက် သူ ဒီခရီးစဉ်၏ ရည်ရွယ်ချက်ကို မေ့လုနီးပါး ဖြစ်သွားသည်။

ဟန်ရှောင်း ဂလက်စီပင်လယ်ဓားပြ အာကာသယာဉ်အနီးသို့ ပြန်သွားလိုက်သည်။ ဘီဖူလီသည် မလှုပ်မယှက်ဖြင့် မြေပြင်ပေါ်တွင် လဲလျောင်းနေပြီး ဒဏ်ရာအနည်းငယ်ရထားသော ဂလက်စီပင်လယ်ဓားပြ အနည်းငယ်က ဝိုင်းရံထားသည်။ သူတို့သည် အပေါ်တွင် ပျံဝဲနေသော မဟူရာအလင်း လျှို့ဝှက်ယာဉ်ကို လှမ်းကြည့်လိုက်ကြသည်။ ဘီဖူလီကို ခေါ်သွားသင့် မသွားသင့် မသေချာဖြစ်နေသည့်ပုံပင်။

ခြေသံကြားလိုက်ရသောအခါ ဤဂလက်စီပင်လယ်ဓားပြများ လှည့်ကြည့်လိုက်ရာ ဟန်ရှောင်း သူတို့ဆီသို့ လျှောက်လာသည်ကို တွေ့လိုက်ရသည်။ သူတို့၏ မျက်လုံးများတွင် ကြောက်ရွံ့မှုများ ပေါ်လာပြီး တုန်လှုပ်သွားကြသည်။ သူတို့ ခန္ဓာကိုယ်များမှာ နေရာမှာပင် တောင့်တင်းသွားပြီး တစ်လက်မပင် မရွေ့ရဲကြပေ။

မူလက သူတို့ တွေ့ဆုံရန် မလိုသဖြင့် သူတို့၏ ဘေးကင်းရေး အာမခံချက် ရှိသော်လည်း ယခု ဟန်ရှောင်းက သူတို့ရှေ့တည့်တည့် ရောက်နေသဖြင့် သူတို့အသက်များ ဤနေရာတွင် ကုန်ဆုံးသွားမည်ကို ကြောက်ရွံ့နေကြသည်။ ထို့အပြင် ဘီဖူလီ၏ အရိုးပေါ်အရေတင်နေသည့် ပုံစံက သူတို့ကို ထိတ်လန့်စေသည်။ ဘီဖူလီ ဤကဲ့သို့ဖြစ်သွားရန် မည်သည့် နှိပ်စက်မှုကို ခံစားခဲ့ရသည်ကို သူတို့မသိသော်လည်း ထိုကဲ့သို့ အဖြစ်မျိုး သူတို့ မကြုံတွေ့လိုသည်မှာ သေချာသည်။

ဟန်ရှောင်း သူတို့ကို တစ်ချက်ကြည့်လိုက်ပြီး ဂလက်စီပင်လယ်ဓားပြတစ်ဦးကို ပေါ့ပေါ့ပါးပါး ဖမ်းဆွဲလိုက်သည်။ သူတို့ လုယက်ရေးယာဉ်ပေါ်သို့ တက်သွားကြသည်။ ဂလက်စီပင်လယ်ဓားပြက တုန်တုန်ယင်ယင်ဖြင့် လမ်းပြပြီး မကြာမီ အချုပ်ခန်းသို့ ရောက်ရှိသွားကြသည်။

သို့သော် အချုပ်ခန်းမှာ ဗလာဖြစ်နေသည်။

"ငါ့လူတွေ ဘယ်မှာလဲ" ဟန်ရှောင်းက ဂလက်စီပင်လယ်ဓားပြ၏ ဦးခေါင်းခွံကို ဖိလိုက်ပြီး လက်ချောင်းများကို ဖြည်းညှင်းစွာ တင်းကျပ်ရင်း ခြိမ်းခြောက်သည့် လေသံဖြင့် မေးလိုက်သည်။

"ကျွန်... ကျွန်တော် မသိဘူး... သူတို့ ပျောက်သွားတာ တစ်ရက်ခွဲလောက် ရှိပြီ!"

သူ့ခေါင်း ပေါက်ကွဲထွက်တော့မတတ် ခံစားလိုက်ရပြီး ဂလက်စီပင်လယ်ဓားပြက အမြန်ရှင်းပြသည်။

‘ပျောက်သွားတယ်’ ဟန်ရှောင်း မျက်ခုံးပင့်လိုက်သည်။ ထို့နောက်မှ သူသတိရသွားသည်။ ‘ကျစ်၊ ဒီကလေးတွေ ဂိမ်းထဲက ထွက်သွားကြတာပဲ’ သူ ဂလက်စီပင်လယ်ဓားပြကို လွှတ်ပေးလိုက်သည်။

သူတို့ အိပ်သွားကြတာ ဖြစ်လောက်တယ်။

"လွန်ခဲ့တဲ့ တစ်ရက်ခွဲဆိုတော့ သူတို့ မကြာခင် ပြန်ဝင်လာတော့မယ်။ ငါ ခဏလောက် စောင့်လို့ရပါတယ်..."

ဟန်ရှောင်း ပြဿနာတစ်ခုကို သတိပြုမိလိုက်ပြီး ဂလက်စီပင်လယ်ဓားပြ၏ ခေါင်းကို နောက်တစ်ကြိမ် ပြန်ဆွဲလိုက်သည်။

"ဓားစာခံတွေ မရှိတော့ဘူး၊ ဒါပေမဲ့ မင်းတို့က အပေးအယူ ဆက်လုပ်ချင်နေတုန်းပဲလား။ မင်း ငါ့ကို လာနောက်နေတာလား"

ဂလက်စီပင်လယ်ဓားပြမှာ ငိုခါနီးဖြစ်နေပြီ။

ကျွန်တော်တို့အကုန်လုံး အဲဒီမိစ္ဆာကောင်ရဲ့ ထိန်းချုပ်မှုကို ခံထားရတာလေ။ ခင်ဗျားကို ဘယ်လိုပြောရမလဲ။

ဤအချိန်တွင် အချုပ်ခန်းထဲ၌ အလင်းဖြူရောင် လင်းလက်မှုများ ပေါ်လာသည်။ နတ်ဘုရားများအသင်းမှ ကစားသမားအနည်းငယ် ဂိမ်းထဲသို့ ဝင်ရောက်လာပြီး ဘလက်စတားကို ချက်ချင်း မြင်လိုက်ရသဖြင့် အလွန်ဝမ်းသာသွားကြသည်။

"မြန်မြန်၊ ခေါင်းဆောင်ကို ပြောလိုက်။ လျှို့ဝှက်ဇာတ်လမ်းကြောင်းက နောက်ဆုံးတော့ ရောက်လာပြီလို့"

စက္ကန့်နှစ်ဆယ်မပြည့်မီ နောက်ထပ် အလင်းဖြူရောင်များ လင်းလက်လာသည်။ ဂျူပီတာနှင့် အခြားသူများ တစ်ချိန်တည်း ဝင်ရောက်လာကြသည်။ သူတို့အားလုံး ဟန်ရှောင်းကို တွေ့ရသဖြင့် စိတ်လှုပ်ရှားနေကြသည်။

"ဘာ" ဂလက်စီပင်လယ်ဓားပြသည် သူ ကယောင်ကတမ်း ဖြစ်မနေကြောင်း သေချာစေရန် မျက်လုံးများကို ပွတ်သပ်ကြည့်လိုက်သည်။

ဟန်ရှောင်း အချုပ်ခန်းကို ဖွင့်လိုက်ပြီး အခြားသူများကို အာကာသယာဉ်ထဲမှ ခေါ်ထုတ်လာကာ သူ့လက်ထဲမှ ဂလက်စီပင်လယ်ဓားပြကို မြေကြီးပေါ်သို့ ပစ်ချလိုက်သည်။

"ဆိုက်စ်ကို ဆက်သွယ်လိုက်၊ ငါတို့အပေးအယူ အတိုင်းပဲ"

ဤဂလက်စီပင်လယ်ဓားပြ၏ မျက်နှာပေါ်မှ တုန်လှုပ်မှုသည် အံ့သြမှုအဖြစ် ပြောင်းလဲသွားသည်။ ဓားစာခံများကို ပြန်လုယူပြီးဖြစ်ကာ ဘလက်စတားလက်ထဲ ရောက်နေပြီ။ သူ့ကို ခြိမ်းခြောက်စရာ ဘာမှမရှိတော့။ သို့တိုင် ဘလက်စတားက သူတို့ကို လွှတ်ပေးပြီး ဘီဖူလီကို ပေးချင်နေတုန်းလား။

"ခင်... ခင်ဗျား အပေးအယူ လုပ်ချင်သေးတာလား" ဂလက်စီပင်လယ်ဓားပြတစ်ဦး မမေးဘဲ မနေနိုင်တော့ပေ။ ယုံရခက်နေသည်။

"ဘာလဲ၊ မင်းတို့က မလုပ်ချင်ဘူးလား" ဟန်ရှောင်းက ပြန်မေးလိုက်သည်။

"မဟုတ်ပါဘူး မဟုတ်ပါဘူး၊ ခင်ဗျား နားလည်မှုလွဲနေပြီ၊ အပေးအယူအတိုင်းပဲ သွားကြတာပေါ့" ဂလက်စီပင်လယ်ဓားပြများ ကပျာကယာ ငြင်းလိုက်ကြသည်။ သူတို့သည် သေဘေးမှ လွတ်မြောက်ရသည့် ဝမ်းသာပီတိဖြင့် ပြည့်နှက်နေကြသည်။

ဂလက်စီပင်လယ်ဓားပြတစ်ဦးသည် ဆိုက်စ်ကို အမြန်ဆက်သွယ်ပြီး အခြေအနေကို ရှင်းပြလိုက်သည်။

ဆိုက်စ် ကြောင်အသွားသည်။ သွေးစွန်းကုန်းမြေမှ လူများ ဝင်ရောက်စွက်ဖက်လိမ့်မည်ဟု သူ လုံးဝမမျှော်လင့်ထားခဲ့ပေ။

သို့သော် အပေးအယူကိစ္စ ထိခိုက်သွားသော်လည်း ဘလက်စတားက အံ့သြစရာကောင်းလောက်အောင် စိတ်မပြောင်းလဲခဲ့ပေ...

ငါ့ခြိမ်းခြောက်မှုတွေက ထိရောက်တာလား။

ဆိုက်စ် ဤအကြောင်းပြချက်ကိုသာ စဉ်းစားနိုင်သည်။

သူ ရုတ်တရက် သူ့ကိုယ်သူ ပိုကျေနပ်သွားသည်။ ဟားဟား၊ ဒီလောက်နာမည်ကြီးတဲ့ လူတစ်ယောက်ကို ငါ ခြိမ်းခြောက်နိုင်ခဲ့တာပဲ။

ဂလက်စီပင်လယ်ဓားပြများအကြား ပြောဆိုဆက်သွယ်နေမှုကို ဂရုမစိုက်ဘဲ ဟန်ရှောင်းသည် ဂျူပီတာနှင့် အခြားသူများကို ဘေးသို့ ခေါ်ထုတ်သွားကာ မဟူရာအလင်း လျှို့ဝှက်ယာဉ်ကို ဆင်းသက်စေပြီး ယာဉ်တံခါးကို ဖွင့်လိုက်သည်။

"မင်းတို့ ကောင်တွေ ယာဉ်ထဲ ဝင်လိုက်ကြ။ ရစ်စ်ဒါက မင်းတို့ကို အနီးဆုံး မြို့တော်ဂြိုလ်ဆီ ခေါ်သွားပေးလိမ့်မယ်"

ဂျူပီတာ၏ မျက်လုံးများ အရောင်တောက်လာပြီး စိတ်အားထက်သန်စွာ ပြောလိုက်သည်။ "ကျွန်တော်တို့ ခင်ဗျားကိုကူပြီး ရန်သူတွေကို တိုက်ချင်တယ်။ ကျေးဇူးပြုပြီး ခင်ဗျားကို ကူညီခွင့်ပြုပါ"

ဒါက ရှားပါးတဲ့ အခွင့်အရေးတစ်ခုပဲ။ သူ လျှို့ဝှက်မစ်ရှင်ကို သေချာပေါက် ရယူနိုင်မည်ဟု ခံစားနေရသည်။

ဂျူပီတာ၏ ရည်ရွယ်ချက်များကို ဟန်ရှောင်း အကဲခတ်မိသည်။ ပြောစရာစကားမဲ့သွားပြီး နေရာမှာပင် မစ်ရှင်တစ်ခု ရေးကာ ဤကစားသမားများကို ပေးလိုက်သည်။

________________________________________

သင်သည် လျှို့ဝှက်မစ်ရှင် [ဆုတ်ခွာခြင်း] ကို စတင်လိုက်ပါပြီ။

မစ်ရှင် မိတ်ဆက် - သင်သည် မုန်တိုင်းတစ်ခုထဲသို့ ဆွဲခေါ်ခံလိုက်ရသော်လည်း သင့်လက်ရှိအင်အားဖြင့် ဝင်ရောက်စွက်ဖက်နိုင်ခြင်း မရှိသေးပါ။ သင် ယခုလုပ်ဆောင်ရမည့်အရာမှာ ဤနေရာမှ အမြန်ဆုံး ဆုတ်ခွာရန်ဖြစ်သည်။

မစ်ရှင် လိုအပ်ချက်များ - မဟူရာအလင်း လျှို့ဝှက်ယာဉ်ဖြင့် ထွက်ခွာပါ။

ဆုလာဘ် - အတွေ့အကြုံ ၃၅၀,၀၀၀ ၊ +၂၀၀ ဘလက်စတား စစ်တပ် မျက်နှာသာပေးမှု

________________________________________

"သွားကြစို့" ဂျူပီတာ လှည့်ထွက်လိုက်ပြီး တုံ့ဆိုင်းမနေဘဲ မဟူရာအလင်း လျှို့ဝှက်ယာဉ်ထဲသို့ ဝင်သွားသည်။

နတ်ဘုရားများအသင်းမှ ကစားသမားများ နောက်မှလိုက်ပါကာ အားလုံး တက်ရောက်သွားကြသည်။

ပိုစီဒွန်က ဂျူပီတာကို လက်မထောင်ပြလိုက်သည်။ "ငါတို့သာ ဘာမှမပြောဘဲ ယာဉ်ပေါ်တက်လိုက်ရင် ဒီမစ်ရှင်ကို ရမှာမဟုတ်ဘူး။ ကျေးဇူးပဲ ခေါင်းဆောင်"

ဂျူပီတာက ကျေနပ်စွာ ပြုံးလိုက်ပြီး သူ့နားထင်ကို လက်ညှိုးထိုးပြလိုက်သည်။ "ဒါက အတွေ့အကြုံပဲ။ မှတ်သားထားကြ"

ဤမစ်ရှင်သည် သူထင်ထားသည်နှင့် အတော်လေး ကွဲပြားသော်လည်း မစ်ရှင်မိတ်ဆက်ကို ဖတ်ပြီးနောက် အဆင့်မြင့်ဖြစ်ရပ်တစ်ခု ဖြစ်နိုင်သော်လည်း သူတို့ဘက်က စတင်ရန် လိုအပ်ချက်များ မပြည့်မီခြင်း ဖြစ်နိုင်သည်ဟု ဂျူပီတာ ခံစားမိသည်။ ထို့ကြောင့် ၎င်းသည် [ဆုတ်ခွာခြင်း] ဖြစ်လာခဲ့သည်။ ထိုသို့ဖြစ်ရသည်မှာ နှမြောစရာကောင်းသော်လည်း သူတို့ မစ်ရှင်အတိုင်းသာ လိုက်လုပ်ရပေမည်။ ဘာမှမရတာထက်တော့ ပိုကောင်းသည် မဟုတ်ပါလား။

ဟန်ရှောင်းသည် အပြင်ဘက်တွင် ရပ်လျက် ဂလက်စီပင်လယ်ဓားပြ၏ အဖြေကို စောင့်နေဆဲဖြစ်သည်။

ခဏကြာပြီးနောက် ဂလက်စီပင်လယ်ဓားပြတစ်ဦး အပြေးလေး ရောက်လာပြီး သတိထားကာ ပြောလိုက်သည်။ "အရှင် ဘလက်စတား၊ တခြားကိစ္စ မရှိတော့ရင် ကျွန်တော်တို့ ဘီဖူလီကို ခေါ်သွားပါတော့မယ်"

"သွားကြ၊ ငါ့ကို နောက်တစ်ခါ လာမရှုပ်နဲ့။ နောက်တစ်ကြိမ်ဆို ငါလွှတ်ပေးမှာ မဟုတ်ဘူး" ဟန်ရှောင်း လက်ဝှေ့ယမ်းပြလိုက်ပြီး သူ့အာကာသယာဉ်ပေါ် တက်လိုက်သည်။

ထိုအခါမှသာ ဂလက်စီပင်လယ်ဓားပြသည် သက်ပြင်းချနိုင်တော့သည်။ သူ အမြန်ပြန်သွားပြီး သူ့သူငယ်ချင်းများကို အသိပေးလိုက်သည်။ သူတို့သည် လုယက်ရေးယာဉ်ကို စက်နှိုးပြီး မြေပြင်အထက်တွင် ပျံဝဲလိုက်သည်။

လုယက်ရေးယာဉ် အရှိန်တင်ပြီး ပျံတက်တော့မည့်အချိန်တွင် မဟူရာအလင်း လျှို့ဝှက်ယာဉ် တံခါးပေါက်အနောက်၌ ဟန်ရှောင်း၏ မျက်လုံးများတွင် မီးခိုးရောင်အလင်း ပေါ်လာသည်။ သူသည် သူ့မျိုးနွယ်စု ပင်ကိုယ်စွမ်းရည်ကို အသက်သွင်းလိုက်ပြီး ဖရိုဖရဲခန္ဓာအဖြစ် ပြောင်းလဲလိုက်သည်။ သူ့ရုပ်ပိုင်းဆိုင်ရာ ပုံသဏ္ဌာန် ပျောက်ကွယ်သွားပြီး မီးခိုးရောင် မြူခိုးအဖြစ် ပြောင်းလဲသွားသည်။

အဆင့်မြင့် ဟင်းလင်းပြင်ခရီးနှင်ခြင်း

ဟင်းလင်းပြင်အမြင်အာရုံထဲသို့ ဝင်ရောက်လိုက်သောအခါ အချိန်ရပ်တန့်သွားသကဲ့သို့ ဖြစ်နေသည်။ ဟန်ရှောင်းသည် သူ့ဖရိုဖရဲခန္ဓာကို ထိန်းချုပ်ပြီး မဟူရာအလင်း လျှို့ဝှက်ယာဉ်မှ ထွက်ခွာလိုက်သည်။ [အဆင့်မြင့် ဟင်းလင်းပြင်ခရီးနှင်ခြင်း] ကြာချိန် ပိုရှည်သဖြင့် ကြီးမားသော အကွာအဝေးကို ဖြတ်ကျော်ပြီး လုယက်ရေးယာဉ်အနီးသို့ သွားရောက်ရန် အချိန်အလုံအလောက် ရှိသည်။

ဟင်းလင်းပြင်ခရီးနှင်ခြင်းသည် သူ့ကို နံရံများ ဖောက်ဝင်ခွင့်ပြုသည်။ သူ့ဖရိုဖရဲခန္ဓာသည် လုယက်ရေးယာဉ်တံခါးကို တိုက်ရိုက်ဖောက်ဝင်သွားပြီးနောက် ပုန်းအောင်းရန် အဝေးရှိ အခန်းတစ်ခုကို ရှာဖွေလိုက်သည်။ သူသည် အချက်ပေးသံ မမြည်စေဘဲ၊ ဂလက်စီပင်လယ်ဓားပြများ သတိမထားမိစေဘဲ ဟင်းလင်းပြင်ခရီးနှင်ခြင်းကို ပိတ်လိုက်သည်။

ဟူး

နောက်တစ်ခဏတွင် လုယက်ရေးယာဉ်သည် ကောင်းကင်ပေါ်သို့ လျင်မြန်စွာ မြင့်တက်သွားပြီး ပျံသန်းထွက်ခွာသွားသည်။

စာစဉ် (၃၈)၊ အခန်း (၅၉၆) ပြီး၏။

လင်းဆက်

+++++