ယန်ကျန့် လှုပ်ရှားခြင်း

"ဌာနချုပ်မှာ ဂိုဒေါင် နှစ်ခုရှိပါတယ် တစ်ခုကတော့ လျှို့ဝှက်ပစ္စည်းတွေ ထားတဲ့ ဂိုဒေါင်ပေါ့ ခေါင်းဆောင်ယန် အဲဒီကို ရောက်ဖူးမယ်လို့ ထင်ပါတယ် နောက်တစ်ခုကတော့ အထူးပစ္စည်းတွေကို သိမ်းဆည်းထားတဲ့ နေရာပါ ခေါင်းဆောင်ယန် ဘယ်တစ်ခုကို အရင်သွားကြည့်ချင်လဲ"

ရှန်လျန်က ယဉ်ကျေးစွာ မေးလိုက်သည်။

"ပထမ ဂိုဒေါင်ကို ငါ ရောက်ဖူးတယ်လို့ မင်းပဲ ပြောပြီးပြီလေ"

"သဘောပေါက်ပါပြီ"

ရှန်လျန်သည် ယန်ကျန့်ကို ဒုတိယ ဂိုဒေါင်သို့ ခေါ်ဆောင်သွားသည်။

ဒီနေရာရှိ လုံခြုံရေး အစီအမံများသည် ထင်သလောက် တင်းကျပ်မနေပေ။ လှည့်လည်ကင်းလှည့်နေသော အစောင့်များမှလွဲ၍ သာမန် လုံခြုံရေးအိမ် တစ်ခုကဲ့သို့သာ ဖြစ်သည်။

သို့သော် ဌာနချုပ်ရှိ ဒီလုံခြုံရေးအိမ်သည် တော်တော် ကြီးမားကျယ်ဝန်းပြီး လိုအပ်လျှင် ခိုလှုံရာစခန်း အဖြစ်ပင် အသုံးပြုလို့ ရနိုင်သည့် အနေအထား ရှိသည်။

"ဒုတိယ ဂိုဒေါင်ကို ဖွင့်ဖို့အတွက် လျှောက်လွှာတင်ဖို့ လိုပါတယ် ခေါင်းဆောင်ယန် ခဏလောက် စောင့်ပေးပါ"

ရှန်လျန်က ဖုန်းကို ထုတ်ပြီး ဒုတိယ ဂိုဒေါင် ဖွင့်ခွင့်ရရန် လျှောက်လွှာတင်လိုက်သည်။

ယန်ကျန့် ပေါ့ပေါ့ပါးပါး တစ်ချက် လှမ်းကြည့်လိုက်သည်။

တစ္ဆေမျက်လုံးက ဖောက်ထွင်းမမြင်နိုင်ပေ။

ဒီအိမ်ကြီးတွင် ကွယ်ဝှက်ထားသော နေရာ မရှိပေ။ နေရာတိုင်းကို ရွှေဆိုင်းများနှင့် ကာရံထားသည်။ မည်သည့် သဘာဝလွန် အရာကမျှ ကျူးကျော်ဝင်ရောက်၍ မရနိုင်သလို ဝင်ချင်လျှင် အကြမ်းနည်း သုံးပြီး ဖျက်ဆီးဝင်ရောက်မှသာ ရနိုင်မည် ဖြစ်သည်။

ဒါပေမဲ့ ဒီနေရာက ဌာနချုပ် ဖြစ်သည်။

ဘယ်သူကများ ဒီလောက် အရေးကြီးတဲ့ နေရာကို အတင်းဝင်ရောက်ပြီး ရိုက်ချိုးဖျက်ဆီးရဲမှာလဲ။

တစ္ဆေဆရာ တစ်ယောက် ဝင်ရောက်လာနိုင်လျှင်တောင် အဲဒီလူကို တွေ့သည်နှင့် ဝေ့ကျင်း၊ လီကျွင်းတို့လို ခေါင်းဆောင်များက ချက်ချင်း ရောက်လာမည်မှာ သေချာသည်။

မကြာမီ...လျှောက်လွှာတင်ပြီးနောက် ရှန်လျန် ခွင့်ပြုချက် ရရှိသွားသည်။ ဝန်ထမ်းတစ်ဦး ရောက်လာပြီး ဒီဂိုဒေါင် တံခါးကို ဖွင့်ပေးရန် သော့ယူလာသည်။

တံခါးက တစ်ချပ်တည်း မဟုတ်ပေ။

ဖွင့်ပြီးသွားသောအခါ အတွင်းဘက်တွင် နောက်ထပ် တံခါးတစ်ချပ် ရှိနေသေးသည်။

မကြာခင် ဒုတိယ ဝန်ထမ်းတစ်ဦး ရောက်လာပြီး ဒုတိယ သော့ကို ယူလာကာ နောက်ဆုံး တံခါးကို ဖွင့်ပေးလိုက်သည်။ ကြားထဲတွင် ၅ မိနစ်ခန့် ခြားထားသည်။

"ကြာသွားလို့ တောင်းပန်ပါတယ် ခေါင်းဆောင်ယန်... ဒါက စည်းမျဉ်းပါ ပထမ အမိန့်ပေးမှုမှာ အမှားအယွင်း မရှိအောင် ကာကွယ်ဖို့အတွက် သတိပေး တုံ့ပြန်ချိန် ၅ မိနစ် ချန်ထားရတာပါ"

ရှန်လျန်က တောင်းပန်သည့် အပြုံးဖြင့် ပြောလိုက်သည်။

"ပထမ တံခါး ပွင့်ပြီးနောက် အချက်ပေးသံ မြည်လာရင် ပထမ တံခါးက ချက်ချင်း ပြန်ပိတ်သွားပြီး လူကို ဒီကျဉ်းမြောင်းတဲ့ စင်္ကြံလမ်းထဲ ပိတ်မိသွားအောင် လုပ်ထားတာ မလား"

ယန်ကျန့် တစ်စုံတစ်ရာကို သတိထားမိပြီး ပြောလိုက်သည်။

ရှန်လျန်က တိုက်ရိုက် ပြန်မဖြေဘဲ ပြုံးရုံသာ ပြုံးလိုက်သည်။ ဒီကိစ္စက လုံခြုံရေးဌာန၏ လျှို့ဝှက်ချက် ဖြစ်ပြီး ပေါ့ပေါ့တန်တန် ထုတ်ပြော၍ မရသောကြောင့် ဖြစ်သည်။

ခဏကြာပြီးနောက် ယန်ကျန့်သည် သိပ်မကျယ်ဝန်းလှသော ဒီဂိုဒေါင်ထဲသို့ ဝင်ရောက်လာခဲ့သည်။

ရှေ့တွင် သေတ္တာအကြီးကြီးများ တစ်လုံးပြီးတစ်လုံး စီစီရီရီ ရှိနေသည်။ သေတ္တာများကို ပိတ်ထားပြီး သော့ခတ်ထားသလို ကြမ်းပြင်နှင့်ပါ တွဲထား၍ ရွှေ့၍ မရနိုင်ပေ။

ရှန်လျန်က သော့ထုတ်ပြီး သေတ္တာတစ်လုံးကို ဖွင့်လိုက်သည်။

အတွင်းထဲတွင် အနီရောင် တစ္ဆေဖယောင်းတိုင်များ စီစီရီရီ ထည့်ထားသည်။ တစ်တန်းလျှင် ၁၀ တိုင်၊ စုစုပေါင်း အနည်းဆုံး အတိုင် ၁၀၀ လောက် ပါဝင်သည်။

ယန်ကျန့်၏ မျက်လုံးများ အနည်းငယ် လှုပ်ရှားသွားသည်။

"ဒီလောက် တစ္ဆေဖယောင်းတိုင်တွေ အများကြီး ရှိနေတာကို ချောင်ယန်ဟွာက ဘာလို့ ဆင်းရဲချင်ယောင်ဆောင်ပြီး အမြဲ ငြီးတွားနေရတာလဲ"

"သဘာဝလွန် တိုက်ပွဲဆိုတာ ရေရှည်တိုက်ပွဲပါ ဘယ်တော့မှ လုံးဝ ပြီးဆုံးသွားမလဲ ဆိုတာ ဘယ်သူမှ မသိနိုင်ဘူး ချွေတာမသုံးရင် ဒီတစ္ဆေဖယောင်းတိုင်တွေ ကုန်သွားတာ ကြာပြီ ပြီးတော့ ဌာနချုပ်မှာ အရင်းအမြစ် ပြတ်လပ်သွားရင် လက်ရှိ အခြေအနေကို ထိန်းသိမ်းထားနိုင်မှာ မဟုတ်တော့ဘူး တချို့လူတွေကို လစာတောင် ပေးနိုင်တော့မှာ မဟုတ်ဘူး ခေါင်းဆောင်ယန် နားလည်ပေးပါဗျာ"

ရှန်လျန်က လေသံကို လျှော့ပြီး ပြောလိုက်သည်။

"ပြီးတော့ ဒါက ဌာနချုပ်ရဲ့ နောက်ဆုံး လက်ကျန်ပါပဲ ကြည့်ရတာ များတယ် ထင်ရပေမယ့် ဖြန့်ဝေလိုက်ရင် မြို့တာဝန်ခံ တစ်ယောက်ကို ဘယ်လောက်မှ ရမှာ မဟုတ်ဘူး တစ္ဆေဖယောင်းတိုင်တွေကို ဆက်တိုက် ထုတ်လုပ်လို့ ရပေမယ့် သုံးစွဲတဲ့နှုန်းကို မမီဘူးလေ"

"တကယ့် အန္တရာယ်များတဲ့ သဘာဝလွန် ဖြစ်ရပ်တွေနဲ့ တွေ့ရင် တစ္ဆေဖယောင်းတိုင်က သိပ်အသုံးမဝင်ပေမယ့် ခြိမ်းခြောက်မှု နည်းတဲ့ ဖြစ်ရပ်တွေမှာတော့ ဒါက တကယ်ကို အသက်ကယ်ဆေးပါပဲ"

ယန်ကျန့်၏ လက်ချောင်းများက သေသေသပ်သပ် ထုပ်ပိုးထားသော တစ္ဆေဖယောင်းတိုင်များကို ခပ်ဖွဖွလေး ပွတ်သပ်လိုက်သည်။

ထုပ်ပိုးထားသော်လည်း ရင်းနှီးနေသော အေးစက်သည့် အထိအတွေ့ကို သူ ခံစားမိသည်။

ဒီတစ္ဆေဖယောင်းတိုင်တွေက အစစ်တွေ ဆိုတာ သံသယ ဖြစ်စရာ မလိုပေ။

ပြီးတော့ တစ်သေတ္တာတည်း မဟုတ်ပေ။

ယန်ကျန့် ရှေ့နားရှိ သေတ္တာကြီးများကို လှမ်းကြည့်လိုက်သည်။

ပိန်နေတဲ့ ကုလားအုတ်က မြင်းထက် ကြီးတယ် ဆိုသလိုပါပဲ။ တစ္ဆေဆရာ ဌာနချုပ် အနေနဲ့ သူတို့မှာ ဓနအင်အား တောင့်တင်းနေဆဲ ဖြစ်သည်။

"ဒီမှာ တစ္ဆေဖယောင်းတိုင် ဘယ်နှသေတ္တာ ရှိလဲ"

"စုစုပေါင်း ၁၅ သေတ္တာပါ အတိုင်ရေ ၁၅၀၀ ရှိပါတယ် ဒါပေမဲ့ လက်ထောက်ဝန်ကြီးဆီမှာလည်း တချို့ ရှိသေးတယ် ဒါတွေကတော့ လက်ကျန်စာရင်းပါ ပုံမှန်ဆိုရင် ပေါ့ပေါ့တန်တန် ထုတ်မသုံးပါဘူး"

"ဌာနချုပ်က တော်တော် စုဆောင်းတတ်တာပဲ ငါ မှတ်မိသေးတယ် ဟွမ်ကန်ရွာတုန်းက ငါ ယူလာတဲ့ တစ္ဆေခေါင်းတလားကို ဝမ်ရှောင်မင်က တစ္ဆေဖယောင်းတိုင် တစ်တိုင်တည်းနဲ့ လဲခဲ့တာလေ အခု ပြန်တွေးကြည့်မှ အဲဒီကောင်က တကယ့်ကို ခေါင်းပုံဖြတ်တဲ့ ကုန်သည်ပဲ မင်းတို့ဆီက မတရား စီးပွားရှာလွန်းလို့ အခုလို ရောဂါရတာ ဖြစ်မယ်"

ရှန်လျန်က ပြန်ရှင်းပြသည်။

"ခေါင်းဆောင်ယန်... အဲဒီတုန်းက တစ္ဆေဖယောင်းတိုင်ကို အသစ် တီထွင်ထားခါစလေ အရေအတွက်က အရမ်းနည်းသလို အာနိသင်ကိုလည်း အပြည့်အဝ နားမလည်သေးဘူး အခု အချိန်အကြာကြီး ပြီးသွားတော့ သူ့တန်ဖိုးက အရင်ကနဲ့ ဘယ်တူတော့မလဲ"

ဒီသဘောတရားကို ယန်ကျန့် နားလည်သည်။

ရှားပါးမှုက တန်ဖိုးကို တက်စေသည်။ အခု တစ္ဆေဖယောင်းတိုင်တွေကို အမြောက်အမြား ထုတ်လုပ်လာနိုင်ပြီ ဆိုတော့ ထုတ်လုပ်မှု နည်းရင်တောင် အချိန်ကြာလာတာနဲ့အမျှ တန်ဖိုးက တဖြည်းဖြည်း ကျလာမည် ဖြစ်သည်။

အထက်တန်းကျောင်းတုန်းက ဖုန်းတစ်လုံးကို ယွမ် ၃၀၀၀ ပေးဝယ်ခဲ့ဖူးပြီး တစ်နှစ်ကြာတော့ ၁၄၀၀ အထိ ဈေးကျသွားဖူးသည်။ ထက်ဝက်တိတိ ကျသွားတာ ဖြစ်သည်။ ဒါကို အရှုံးခံပြီး ဝယ်တယ်လို့ ပြောလို့ရမလား။

"ဒီမှာ ၁၅ သေတ္တာမက ရှိတယ် ဟိုဘက်က သေတ္တာတွေထဲမှာ ဘာတွေ ရှိလဲ"

ယန်ကျန့် တခြားတစ်ဖက်ကို လျှောက်သွားပြီး သေတ္တာဖွင့်ပြရန် ရှန်လျန်ကို ခိုင်းလိုက်သည်။

ဖွင့်လိုက်သောအခါ အတွင်းဘက်တွင် မှန်သေတ္တာ လေးများ ရှိနေသည်။ တစ်လွှာလျှင် ၁၀ ခု၊ ၅ လွှာ ပါဝင်သဖြင့် စုစုပေါင်း အခု ၅၀ ရှိသည်။

ယန်ကျန့် တစ်ခုကို ထုတ်ကြည့်လိုက်ရာ အတွင်းထဲတွင် ဟောင်းနွမ်းပြီး ကြောက်စရာကောင်းသော အဝတ်အရုပ် တစ်ရုပ် ရှိနေသည်။

"အစားထိုးအရုပ်လား ဒါတွေ ကုန်သွားပြီ မဟုတ်ဘူးလား"

"ကုန်သွားပါပြီ... ဒီသေတ္တာက နောက်ဆုံး လက်ကျန်ပါပဲ အထူး လိုအပ်တဲ့ အချိန်ကျမှပဲ ထုတ်သုံးတာပါ"

"ထပ်လုပ်လို့ မရတော့ဘူးလား"

"အစားထိုးအရုပ်ကို ချုပ်ပေးတဲ့သူ ဆုံးသွားပြီလေ ဒါကြောင့် ထပ်မထုတ်လုပ်နိုင်တော့ဘူး အဲဒီလူ ရှိတုန်းကဆိုရင် ထုတ်လုပ်မှုက တစ္ဆေဖယောင်းတိုင်ထက်တောင် များသေးတယ် ဒါကြောင့် တစ်ချိန်တုန်းက တစ္ဆေဆရာတွေကို အစားထိုးအရုပ်တွေ မကြာခဏ ဆုချခဲ့တာပေါ့ နောက်ပိုင်းတော့ မရတော့လို့ ရပ်လိုက်ရတာပါ"

"ဒါတွေက တော်တော်ကောင်းတယ် တစ္ဆေဖယောင်းတိုင်ထက် အများကြီး ပိုကောင်းတယ်"

ယန်ကျန့် အားမနာတော့ဘဲ ဈေးဝယ်ထွက်သကဲ့သို့ အစားထိုးအရုပ် ၅ ခုကို ယူလိုက်ပြီး ကြမ်းပြင်ပေါ် ပေါ့ပေါ့ပါးပါး ပစ်ချလိုက်သည်။

ကြမ်းပြင်ပေါ်တွင် ဘယ်အချိန်ကတည်းက ရောက်နေမှန်း မသိသော ရေအိုင်ငယ် တစ်အိုင် ရှိနေသည်။

မှန်သေတ္တာ ၅ ခု ရေအိုင်ပေါ် ကျသွားသည်နှင့် ချက်ချင်း ဝါးမြိုခြင်း ခံလိုက်ရပြီး အမြင်အာရုံထဲမှ ပျောက်ကွယ်သွားသည်။

"ငါ လောဘမကြီးပါဘူး ၅ ခုပဲ အရင်ယူမယ်"

ယန်ကျန့်က ဆက်ပြောသည်။

"မင်းမှာ ကန့်ကွက်စရာ မရှိဘူး မလား"

"ကန့်ကွက်စရာ မရှိပါဘူး ခေါင်းဆောင်ယန်... ကြိုက်သလောက် ယူပါ ဒါတွေက ခင်ဗျား ရသင့်ရထိုက်တာတွေပါ"

"ငါသာ ဒီက လက်ကျန်တွေ အကုန်လုံး သိမ်းကျုံးယူသွားရင် ဌာနချုပ် မီတာခ မဆောင်နိုင်လို့ မီးဖြတ်ခံရတဲ့အခါ မင်း ငါ့ဆီလာပြီး ပိုက်ဆံ တောင်းနေဦးမယ် မင်းတို့စိတ်ထဲမှာ စာရင်းရှိသလို ငါ့စိတ်ထဲမှာလည်း စာရင်း ရှိပါတယ် ရသင့်တာကို ယူပြီး လုပ်သင့်တာကို လုပ်မယ် လောဘကြီးရင် ဇာတ်သိမ်း မကောင်းတတ်ဘူး"

"ဟိုသေတ္တာကို ဖွင့်လိုက်ပါဦး"

ရှန်လျန် ဘာမှ ဆက်မပြောတော့ဘဲ တခြား သေတ္တာတစ်လုံးကို ဖွင့်ပေးလိုက်သည်။

သေတ္တာထဲတွင် ကောက်ရိုးဖြင့် ပြုလုပ်ထားသော ကြိုးများ ရှိနေသည်။ အဝိုင်းပုံစံ ပြုလုပ်ထားပြီး ကောက်ရိုးကွင်း ပုံစံ ဖြစ်သည်။

"ဒါက ဘာလုပ်တာလဲ ငါ တစ်ခါမှ မမြင်ဖူးဘူး"

ယန်ကျန့် ကောက်ရိုးကွင်း တစ်ခုကို ယူကြည့်ရင်း မေးလိုက်သည်။

"ပါမောက္ခဝမ်ရဲ့ ဓာတ်ခွဲခန်းကနေ မကြာသေးခင်ကမှ ပို့လာတာပါ ကောက်ရိုးကွင်းတဲ့... တစ္ဆေတစ်ကောင်က ဒီကွင်းထဲ ဝင်မိရင် ပိတ်မိသွားပြီး လှုပ်ရှားလို့ မရတော့ဘူးလို့ ပြောတယ်"

"တစ္ဆေဖယောင်းတိုင်နဲ့ တွဲသုံးရတာလား"

ယန်ကျန့် မျက်လုံးအိမ်များ ကျဉ်းမြောင်းသွားသည်။

"မဟုတ်ပါဘူး တစ္ဆေဖယောင်းတိုင်နဲ့ တွဲသုံးလို့ မရပါဘူး ကောက်ရိုးကွင်းက သဘာဝလွန် အရာတွေကို ပိတ်လှောင်ထားနိုင်ပေမယ့် အဖြူရောင် တစ္ဆေဖယောင်းတိုင်ရဲ့ အလင်းရောင်ကိုလည်း ကန့်သတ်ထားတယ် ဒါကြောင့် အဖြူရောင် တစ္ဆေဖယောင်းတိုင်ကို ကွင်းထဲမှာ ထွန်းလိုက်ရင် တစ္ဆေတွေကို ဆွဲဆောင်တဲ့ အလင်းရောင်က အပြင်ကို ပျံ့ထွက်မှာ မဟုတ်ဘူး"

ရှန်လျန်သည် တစ္ဆေဆရာ မဟုတ်သော်လည်း ဌာနချုပ်တွင် အချိန်ကြာမြင့်စွာ လုပ်ကိုင်ခဲ့သဖြင့် သတင်းအချက်အလက် အများအပြားကို သိရှိထားသည်။

"သဘောပေါက်ပြီ ဒါပေမဲ့ ဒီပစ္စည်းက တစ္ဆေအကြမ်းစားတွေကို လုံးဝ ပိတ်လှောင်ထားနိုင်မှာ မဟုတ်ဘူး ထင်တယ်"

ယန်ကျန့် ကောက်ရိုးကြိုးကို စမ်းပြီး ဆွဲကြည့်လိုက်သည်။

ကောက်ရိုးကြိုးက မခိုင်ခံ့ဘဲ နည်းနည်းတောင် လျော့ရဲနေသေးသည်။

"တစ္ဆေရဲ့ အကြမ်းပတမ်း အဆင့်ပေါ် မူတည်ပါတယ် တစ္ဆေက ပိုကြမ်းလေ ကောက်ရိုးကွင်းထဲမှာ ပိတ်မိနေမယ့် အချိန် ပိုတိုလေပဲ ကောက်ရိုးကွင်း ပြတ်သွားတာနဲ့ တစ္ဆေက ထွက်လာနိုင်ပါတယ်"

"မဆိုးပါဘူး တစ္ဆေအကြမ်းစားတွေကို အချိန်ဆွဲဖို့ အသုံးဝင်တယ် အသက်သွင်းရတာ နည်းနည်း လက်ဝင်ပေမယ့် အခြေအနေ တချို့မှာတော့ တော်တော် အသုံးဝင်မယ့် ပစ္စည်းပဲ"

ယန်ကျန့် ဟိုကြည့်ဒီကြည့် လုပ်ရင်း ကောက်ရိုးကွင်း ၁၀ ခုကို ယူကာ သူ့နောက်ဘက်သို့ ပစ်ချလိုက်သည်။

ရှန်လျန် ဘာမှမပြောပေ။ ယန်ကျန့် ဒီလိုလုပ်တာကို သူ မတားသည့်အပြင် ယန်ကျန့် ပိုယူလေ ကောင်းလေဟု စိတ်ထဲက ကျိတ်ပြီး ဆုတောင်းနေသည်။

သူ များများယူလေ ဌာနချုပ်က ယန်ကျန့်ကို ပိုပြီး ခိုင်းလို့ကောင်းလေ ဖြစ်မည်။

"တခြား ဘာရှိသေးလဲ"

"ဒါတွေက တစ္ဆေနှင် ခရာတွေပါ အတွင်းထဲမှာ ထူးဆန်းတဲ့ အသံတွေကို သိုလှောင်ထားတယ် ဖွင့်လိုက်ရင် အဲဒီ အသံဆိုးကြီး ထွက်လာပြီး ပတ်ဝန်းကျင်က သဘာဝလွန် ဖြစ်ရပ် အားလုံးကို ဝင်ရောက်စွက်ဖက်တယ် ဒါပေမဲ့ ဒီပစ္စည်းက အရမ်း မတည်ငြိမ်ဘူး ကံကောင်းရင် တစ္ဆေတွေကို နှောင့်ယှက်နိုင်တယ် ဒါမှမဟုတ် အနီးနားက တစ္ဆေတွေကို မောင်းထုတ်နိုင်တယ် ဒါပေမဲ့ ကံဆိုးရင်တော့ တစ္ဆေရဲ့ အာရုံစိုက်မှုကို ဆွဲဆောင်မိပြီး စောစောစီးစီး အသတ်ခံရနိုင်တယ်"

"သူက ၁၀ မိနစ်ပဲ ခံတယ် ၁၀ မိနစ်ပြည့်ရင် ခရာက ကွဲသွားလိမ့်မယ်"

"အဲဒီလောက် အန္တရာယ်များတာလား ဒါကြောင့် ဌာနချုပ်က မသုံးတာကိုး"

ယန်ကျန့်က ဆက်ပြောသည်။

"ဒါပေမဲ့ တစ္ဆေတွေ ပြည့်နှက်နေတဲ့ နေရာမျိုးအတွက်တော့ ကွက်တိပဲ အရေးကြီးတဲ့ အချိန်ကျရင် လောင်းကြေးထပ်လို့ ရတယ် အောင်မြင်ရင် ၁၀ မိနစ်လောက် အသက်ဘေးကနေ လွတ်ကင်းနိုင်တယ် တစ္ဆေဖယောင်းတိုင်ထက် ပိုကောင်းတယ်"

"ဟုတ်ပါတယ် ဒါပေမဲ့ ဘေးထွက်ဆိုးကျိုးက များလွန်းတယ် တစ္ဆေဆရာတွေရဲ့ အသက်နဲ့ ရင်းရတာလေ ဒါကြောင့် ဌာနချုပ်က ဖြန့်ဝေဖို့ မရဲတာပါ"

ရှန်လျန်က ပြောလိုက်သည်။

"ဌာနချုပ်ကတော့ ပိုပြီး တည်ငြိမ်တဲ့ တစ္ဆေဖယောင်းတိုင်ကိုပဲ ပိုသဘောကျပါတယ်"

"ကောက်ရိုးကွင်းနဲ့ တစ္ဆေနှင်ခရာ အပြင် တခြား သဘာဝလွန် ကိရိယာတွေ ရှိပါသေးတယ် ဒါပေမဲ့ အားလုံးမှာ အားနည်းချက် ကိုယ်စီ ရှိသလို ထုတ်လုပ်မှုကလည်း နည်းပါတယ် ခေါင်းဆောင်ယန် လိုချင်ရင် ကျွန်တော် အချက်အလက်တွေကို စုစည်းပြီး နောက်မှ ပို့ပေးပါ့မယ်"

"သဘာဝလွန် ကိရိယာတွေတင် မကဘူး သဘာဝလွန် ပစ္စည်းတွေရဲ့ အချက်အလက်တွေကိုပါ ငါ့ကို ပေးရမယ် အချိန်တွေ ဒီလောက် ကြာသွားပြီဆိုတော့ ဌာနချုပ်က သဘာဝလွန် ပစ္စည်းတွေ တော်တော်များများ စုဆောင်းမိနေလောက်ပြီလို့ ငါ ယုံတယ်"

"ရပါတယ်... ပြဿနာ မရှိပါဘူး ဒါပေမဲ့ ဒီသတင်းအချက်အလက်တွေ မပေါက်ကြားဖို့တော့ ခေါင်းဆောင်ယန် အာမခံရပါမယ်"

ရှန်လျန် အသံတိုးတိုးဖြင့် ပြောလိုက်သည်။

"ဒီအချက်အလက် တချို့က အရမ်း အရေးကြီးပါတယ် ဌာနချုပ်မှာ စာရွက်စာတမ်း မှတ်တမ်းတောင် မရှိဘူး လူနည်းစုလောက်ပဲ သိကြတာ"

"မပူပါနဲ့ သတင်းပေါက်ကြားလောက်အောင် ငါ မအပါဘူး"

"ခေါင်းဆောင်ယန်က အဲဒီလို ပြောမှတော့ ရပါပြီ"

ယန်ကျန့်က ပြောလိုက်သည်။

"ဒါဆို ငါ ဆက်မကြည့်တော့ဘူး ခေါင်းဆောင် အစည်းအဝေး ပြီးမှပဲ ဌာနချုပ်ရဲ့ စုဆောင်းထားရှိမှုတွေကို ဖြည်းဖြည်းချင်း လာလေ့လာတော့မယ် အခုတော့ အစည်းအဝေးတက်ဖို့ ငြင်းဆန်နေတဲ့ ကောင်တွေကို သွားခေါ်လိုက်ဦးမယ် ငါက အခကြေးငွေ ယူထားပြီးပြီ ဆိုတော့ အလုပ်လုပ်ပေးရမယ်လေ မဟုတ်ရင် မင်းတို့က ငါ့ကို ဖိတ်ဖို့ ဒီလောက် အကုန်အကျခံမှာ မဟုတ်ဘူး"

သူ ဒီမှာ ဆက်မနေတော့ဘဲ ဂိုဒေါင်ထဲမှ ထွက်ခွာလာခဲ့သည်။

"ခေါင်းဆောင်တွေရဲ့ နောက်ဆုံးရ လိပ်စာနဲ့ ဆက်သွယ်ရန် အချက်အလက်တွေကို ငါ့ဖုန်းထဲ ပို့လိုက်ပါ"

"ခေါင်းဆောင်ယန်က သူတို့ကို ဘယ်လို ဆင့်ခေါ်ဖို့ စီစဉ်ထားလဲ ဖုန်းဆက်မှာလား"

"ဖုန်းဆက်မယ် ဟုတ်လား ဖုန်းတစ်ချက် ဆက်ရုံနဲ့ ကိစ္စအားလုံး ပြီးသွားအောင် လုပ်နိုင်တဲ့ ဂုဏ်ပုဒ်မျိုး ငါ့မှာ မရှိသေးပါဘူး တစ်ယောက်ချင်းစီဆီ ကိုယ်တိုင် သွားတွေ့ရမှာပေါ့"

"ဒါဆို ခေါင်းဆောင်ယန်က ဘယ်လို သွားမှာလဲ ဌာနချုပ်မှာ ကိုယ်ပိုင် လေယာဉ်တွေနဲ့ ရဟတ်ယာဉ်တွေ ရှိပါတယ်..."

"မင်းမေးတာက အပိုတွေပါကွာ ဝမ်ရှောင်မင်က ငါ့ကို ၃ ရက်ပဲ အချိန်ပေးတာလေ လေယာဉ်စီးသွားလို့ လောက်မယ် ထင်နေလား"

ယန်ကျန့်က ဆက်ပြောသည်။

"ဒီလောက်တိုတောင်းတဲ့ အချိန်အတွင်း လူတိုင်းဆီ ရောက်ဖို့ဆိုရင် တစ္ဆေနယ်မြေကို သုံးမှပဲ ရမှာ"

"ငါ့ကို စည်းကမ်းထိန်းသိမ်းရေး ခေါင်းဆောင်အဖြစ် ရာထူးတိုးပေးတာက ဒီစွမ်းရည်ကို ထည့်တွက်ထားလို့ ဖြစ်မယ်"

တစ္ဆေနယ်မြေ၏ စွမ်းအားသည် အလွန်ကောင်းမွန်သော အထောက်အပံ့ ဖြစ်သည်။

ယန်ကျန့် တာချန်းမြို့မှာ ရှိနေပေမယ့် အရေးပေါ် အခြေအနေ ဖြစ်လာရင် တစ်မိနစ်အတွင်း နိုင်ငံရဲ့ ဘယ်နေရာကိုမဆို ရောက်ရှိသွားနိုင်သည်။

ဒါက တခြား ခေါင်းဆောင်တွေ မလုပ်နိုင်တဲ့ အရာဖြစ်သည်။

တကယ်လို့ ယန်ကျန့်က နေရာတစ်ခုမှာ တစ္ဆေရေကန်ထဲက ရေကို ကြိုတင် ချန်ထားခဲ့မယ် ဆိုရင် အချိန်ကို ဒီထက်ပိုပြီး လျှော့ချလို့ ရနိုင်သည်။

၁၀ စက္ကန့်လောက်ဆို ရလောက်သည်။

ဒါ့အပြင် ယန်ကျန့်သာ ကြိုတင် ပြင်ဆင်ထားရင် ၁၀ စက္ကန့်တောင် မလိုဘဲ ၃ စက္ကန့်အတွင်း ရောက်သွားနိုင်သည်။

ဒါက သဘာဝလွန် အရာတွေရဲ့ ကျိုးကြောင်းဆီလျော်မှု မရှိတဲ့ သဘောသဘာဝပင် ဖြစ်သည်။

"ငါ လှုပ်ရှားပြီလို့ ချောင်ယန်ဟွာကို ပြောလိုက်ပါ ငါ့သတင်းကို ဒီကနေပဲ စောင့်နေလိုက်တော့"

ယန်ကျန့် ရှေ့ကို ခြေလှမ်းအနည်းငယ် လှမ်းလိုက်သည်။ သူ့ပုံရိပ်က တဖြည်းဖြည်း ဝေဝါးသွားပြီး နောက်ဆုံးတွင် ပျောက်ကွယ်သွားသည်။

ရှန်လျန်က ယန်ကျန့် ပျောက်ကွယ်သွားသည်ကို ကြည့်ပြီး တွေးလိုက်သည်။

"သူက တကယ်ပဲ တခြားသူတွေထက် စည်းကမ်းထိန်းသိမ်းရေး ခေါင်းဆောင် နေရာနဲ့ ပိုသင့်တော်ပါတယ် ဒါပေမဲ့ သူ ဘယ်သူ့ကို အရင်ဆုံး ဖိတ်မလဲဆိုတာ သိချင်မိတယ်"

စဉ်းစားကြည့်လိုက်တော့...

ဖိတ်ရမယ့် ခေါင်းဆောင်တွေက တော်တော် များသားပဲ။ လျိုစန်း၊ လီလဲ့ဖိန်၊ ဝမ်ချာလင်း၊ ချောင်ယန်၊ ဟယ်ယင်အာ၊ ရှန်လင်း၊ ကျန်းကျွင်း။

လီကျွင်းနဲ့ ဝေ့ကျင်းပဲ ဖိတ်စရာ မလိုတာ။

ခေါင်းဆောင် ၁၁ ယောက်ထဲမှာ အများစုက ပြဿနာကောင်တွေချည်းပဲ။ ကျန်တဲ့ ခေါင်းဆောင် တစ်ယောက်ကတော့ ဘယ်သူမှန်း မသိရဘူး။ ကောလာဟလတွေ အရဆိုရင် အရေးကြီး ပုဂ္ဂိုလ်တွေကို ကာကွယ်ဖို့ အမြဲတမ်း ပုန်းအောင်းနေတယ်လို့ ဆိုကြတယ်။

ဒါပေမဲ့ ဒီတစ်ခေါက် ခေါင်းဆောင် အစည်းအဝေးက ခေါင်းဆောင်တွေကို ဆင့်ခေါ်ရုံ သက်သက် မဟုတ်ဘဲ ကျန်ရှိနေတဲ့ ခေါင်းဆောင် နေရာတွေကိုပါ အပြီးသတ် ရွေးချယ်ပြီး ခေါင်းဆောင် ၁၂ ယောက်လုံး ပြည့်မီအောင် လုပ်ဖို့ ဖြစ်သည်။

လူအပြောင်းအလဲတွေလည်း ရှိကောင်း ရှိနိုင်သည်။

ဥပမာအားဖြင့် ဟယ်ယင်အာ ဆိုရင် ပျောက်သွားတာ နှစ်ဝက်ကျော်နေပြီ။ တစ္ဆေရေကန် ဖြစ်ရပ်နောက်ပိုင်း ပြန်ပေါ်မလာခဲ့ရင် သူ သေချာပေါက် အထုတ်ခံရမှာ ဖြစ်သည်။

နောက်ဆုံးတော့လည်း ဒီလောက် အရေးကြီးတဲ့ ရာထူးကို အကြာကြီး လစ်လပ်ထားလို့ မရဘူးလေ။