သေခြင်း နှင့် ရှင်ခြင်း

“မင်းက သေခြင်းတရားကို ရွေးချယ် ခဲ့မှတော့ ငါ မင်းကို သေဆုံးတရား ပေးသနားလိုက်မယ်။” ခီလီယာနာက ချန်လွေ့ကို ထပ်၍ မကြည့်တော့ပေ။ သူက လှုပ်ရှားမှုတစ်ခု ပြုလုပ်တော့မည့် အချိန်တွင် အနောက်မှ ဖြည်းဖြည်းချင်း ထရပ်နေသော စေတန်ကို ရုတ်တရက် ကြည့်ပြီး မျက်မှောင်ကြုတ်လိုက်သည်။

ထိုအချိန် ဖျော့တော့တော့ အနီရောင် မြူခိုးက စေတန်၏ ခန္ဓာကိုယ်တွင် ရစ်ဝဲ၍ နေနေပြီး အန္တရာယ် ရှိသော စွမ်းအင် အရှိန်အဟုန်ဖြင့် စုစည်းစ ပြုလာခဲ့သည်။

“မင်းက ပျက်စီးခြင်း စာအုပ်ကို အသက်သွင်းဖို့ နတ်ဘုရားမျိုးဆက်သွေး အသုံးပြုချင်တာလား။ ကံဆိုးချင်တော့ မင်းရဲ့ နတ်ဘုရားမျိုးဆက်သွေးက အရမ်း ပါးလွန်းတယ်။ အကုန်လုံးကို လောင်ကျွမ်း ပစ်ရင်တောင် အသုံးဝင်မှာ မဟုတ်ဘူး။” ခီလီယာနာက စေတန်၏ ရည်ရွယ်ချက်ကို တစ်ချက်တည်းဖြင့် မြင်ခဲ့ပြီး မထီမဲ့မြင် အမူအရာကို ပြသခဲ့သည်။ “ငါ ပိုင်ဆိုင်ထားတဲ့ စွမ်းအား အရှေ့မှာ အတူတူ သေဆုံးဖို့ ဆိုတာက မသိ နားမလည်တဲ့ လှည့်စားမှု တစ်ခုပဲ။”

ထိုသို့ ပြောပြီးနောက် အဖြူရောင် အလင်းအစုအဝေး တစ်ခု ခီလီယာနာ၏ လက်ထဲတွင် ပေါ်လာခဲ့လေသည်။ ၎င်းမှာ ဖန်တီးခြင်းစာအုပ်ပင်။ သူက စေတန်ကို လက်ယပ်ခေါ်လိုက်သည်။

စေတန်က သူ၏စိတ် တုန်ခါ၍ သွားသည်ကို ခံစားလိုက်ရ၏။ ရူးသွပ်စွာ လောင်ကျွမ်းနေသော သူ၏ သွေးစွမ်းအား ရုတ်တရက် ရပ်တန့်၍ သွားခဲ့သည်။ တစ်ချိန်တည်းမှာပင် သူ၏ဝိ ညာဉ်နှင့် ပေါင်းစပ်ထားသော ပျက်စီးခြင်း စာအုပ်က ကြီးမားသော ဆွဲဆောင်မှု တစ်ခုကြောင့် ခန္ဓာကိုယ်မှ ဆွဲထုတ်ခြင်း ခံလိုက်ရပုံရသည်။

ရုတ်တရက်ပင် ထိုဆွဲဆောင်မှုက ပျောက်ကွယ်သွားသည်။ မဟုတ်ပေ။ အချိန် စီးဆင်းမှု မြန်ဆန်သွားခြင်းသာ ဖြစ်သည်။ အရှိန်မြှင့်ထားသော အချိန်က ခီလီယာနာ၏ စွမ်းအားကို အကာအကွယ် ပေးလိုက်သည်။ ဆိုလိုသည်မှာ ခုနက စွမ်းအားမှာ ပစ်မှတ်သို့ မရောက်ရှိခင် ပျောက်သွားပြီး ပျက်စီးခြင်း စာအုပ်၏ ပေါက်ကွဲမှုလည်း ပိုမိုမြန်ဆန်လာခြင်းပင်။ ထိုအရာမှာ စေတန် အကျွမ်းကျင်ဆုံး အချိန် အရှိန်အဝါ ဖြစ်ပေသည်။

“ကျယ်ပြောလှတဲ့ စကြဝဠာကြီးထဲမှာ အချိန်ဟာ ဒြပ်စင်တွေထဲက တစ်ခုပဲ။ မင်းရဲ့ အရေးမပါတဲ့ လှည့်ကွက်ကို ထားလိုက်ဦး။” ခီလီယာနာက မထီမဲ့မြင် ခေါင်းခါလိုက်သည်။ အလင်းအစုအဝေးကို ကိုင်ထားသော လက်သည်းက ပေါ့ပေါ့တန်တန် လည်ပတ်သွားခဲ့သည်။ လူတိုင်း သူတို့၏စိတ် တုန်ခါသွားကြောင်း ခံစားလိုက်ရပြီး အရာအားလုံး နောက်ပြန် စီးဆင်းသွားခဲ့သည်။ ထိုအရာမှာ အချိန် အရှိန်အဝါ မဟုတ်ဘဲ သန့်စင်သော အန္တိမစွမ်းအား ဖြစ်ပြီး ၎င်းမှာ ခုနက အချိန် အရှိန်မြှင့်တင်ခြင်းကို လုံးဝ အကျုံး မဝင်တော့အောင် ပြုလုပ်လိုက်၏။

စေတန် ပိုင်နိုင်သော အချိန်စွမ်းအားက ချန်လွေ့ထက် ပို၍ပင် သိမ်မွေ့သော်လည်း ထိုသို့သော အကြွင်းမဲ့စွမ်းအား အရှေ့တွင် အတိကျဆုံးသော ကျွမ်းကျင်မှုများပင် စွမ်းအားမဲ့နေသည်။

“ဘုန်း...ဘုန်း...ဘုန်း..” သွေးကြောများ ပေါက်ကွဲထွက် သွားသည်နှင့် ဆူညံသော ပေါက်ကွဲသံများ စေတန်၏ ခန္ဓာကိုယ်မှ ထွက်ပေါ်လာခဲ့သည်။ အမှောင်အလင်း တစ်ခု သူ၏ခန္ဓာကိုယ်မှ ထွက်ခွာသွားပြီး ခီလီယာနာထံသို့ တဖြည်းဖြည်းချင်း ပျံသန်းသွားခဲ့သည်။

ပျက်စီးခြင်းစာအုပ်က ဆွဲထုတ်ခြင်း ခံလိုက်ရသည်မှာ အသေအချာပင်။

ထိုအခိုက်အတန့်တွင် ပျက်စီးခြင်း စာအုပ်နှင့် ဖန်တီးခြင်း စာအုပ်တို့၏ စွမ်းအား ရုတ်တရက် ရပ်တန့်သွားခဲ့သည်။ သူတို့က အမှန်တကယ်ပင် ခီလီယာနာ၏ ထိန်းချုပ်မှုမှ လွတ်မြောက်၍ သွားခဲ့ပြီး တဖြည်းဖြည်းချင်းပင် မြင့်တက်လာကာ လေထဲတွင် မျက်နှာချင်းဆိုင် သွားခဲ့ရင်း ထူးဆန်းသော လှိုင်းဂယက်များ ထွက်ပေါ် လာခဲ့သည်။

လှိုင်းဂယက် နှစ်ခု ရောယှက်သွားပြီး ပြင်းထန်သော ပဲ့တင်ထပ်မှု တစ်ခုကို ဖန်တီးလိုက်၏။

ထိုပဲ့တင်ထပ်မှုအောက်တွင် ခီလီယာနာ အပါအဝင် လူတိုင်းက ခန္ဓာကိုယ်လှုပ်ရှားမှုများကို အားကောင်းသော စွမ်းအား တစ်ခုခုဖြင့် ချည်နှောင် ခံထားရပြီး လေးလံထိုင်းမှိုင်း လာသည်ဟု ခံစားလိုက်ရသည်။

ပဲ့တင်ထပ်မှု၏ ဗဟိုမှာ ချန်လွေ့ပင်...

ခီလီယာနာ ထိတ်လန့် သွားခဲ့သည်။ သူ၏ မျက်လုံးက ချန်လွေ့၏လက်ထဲမှ အရာတစ်ခု အပေါ်သို့ ကျရောက် သွားသည်။ အနီးကပ် ကြည့်လိုက်ရာ ၎င်းမှာ ဖဲချပ်တစ်ခု ဖြစ်နေသည်။ သူ၏ ရှုထောင့်မှနေ၍ ဖဲချပ်၏ နောက်ကျောမှ ပုံစံကွက်ကို မြင်တွေ့နိုင်ပြီး ၎င်းမှာ သော့တစ်ချောင်းကဲ့သို့ အထူးအရာတစ်ခု ဖြစ်လေသည်။

“ဒီလိုပဲ့တင်ထပ်မှုမျိုး...” ခီလီယာနာ၏ မျက်ဆံများ ရုတ်တရက် ကျုံ့သွားပြီး သူ၏ အသံ ထူးဆန်းစွာ တုန်ခါသွားရင်း လွှတ်ခနဲ ပြောလိုက်၏။ “အဲဒါပဲ... အဲဒါပဲ ဖြစ်ရမယ်...”

ခီလီယာနာ၏ တုန်လှုပ်နေသော မျက်နှာအမူအရာက မူလလျစ်လျူရှုမှုနှင့် လုံးဝ ကွဲပြားနေ၏။ သူ၏ မျက်လုံးထဲတွင် ထူးဆန်းသော အလင်းရောင် တစ်ခုက လောင်ကျွမ်းနေသည်။ “မင်း သေခြင်းနဲ့ ရှင်ခြင်း စာအုပ်ကို ပိုင်ဆိုင်ထားမယ်လို့ လုံးဝ မမျှော်လင့်ထားခဲ့ဘူး။ မဟုတ်ဘူး။ ဒါက သေခြင်းနဲ့ ရှင်ခြင်း ချိပ်ပိတ်ကို ဖွင့်ဖို့ သော့ပဲ...”

ထိုအခိုက်တွင် ချန်လွေ့ ရုတ်တရက် နားလည်သွားသည်။ သေခြင်းနဲ့ ရှင်ခြင်း စာအုပ်...

သတ္တမမြောက် ငွေသေတ္တာ...

ဖန်ဆင်းရှင်က လောကကြီးကို ၇ရက် အတွင်း ဖန်တီးခဲ့သည် ဟူသော ဒဏ္ဍာရီ ရှိခဲ့သည်။

သူက အသက်ရှင်ရန် မသင့်တော်သော အရာအားလုံးကို ဖျက်ဆီးပစ်ရန် အချိန် ၃ရက် ယူခဲ့ပြီးနောက် အဓိကကုန်းမြေကို ဗဟိုပြုသော ထိုစကြဝဠာကို ဖန်တီးရန် နောက်ထပ် အချိန် ၃ရက် ယူခဲ့သည်။

ငွေသေတ္တာ ၆လုံးအနက် ဖန်တီးခြင်း စာအုပ်၏ စာမျက်နှာ ၃မျက်နှာနှင့် ပျက်စီးခြင်း စာအုပ်၏ စာမျက်နှာ ၃မျက်နှာ ရှိခဲ့သည်။

သို့သော်လည်း ၎င်းမှာ ၆ရက်သာ ရှိသေးသည်။

အမည်မရှိလျှင် မိုးမြေ၏ ဖန်တီးရှင် ဖြစ်ပြီး အမည်ရှိလျှင် အရာအားလုံး၏ မိခင် ဖြစ်သည်။

မရှိခြင်း နှင့် ရှိခြင်း အကြားတွင် အစွမ်း အထက်ဆုံးနှင့် လျှို့ဝှက် ဆန်းကြယ်ဆုံး နေ့တစ်နေ့ ရှိခဲ့ပြီး ၎င်းမှာ ဖန်တီးခြင်းနှင့် ပျက်စီးခြင်းထက်ကို ကျော်လွန်သော သတ္တမမြောက် ငွေသေတ္တာကို ဖြစ်စေ ခဲ့သည်။ ၎င်းကို ဖိုက်သွန်က တားမြစ်ခြင်း အခံရဆုံးသော စွမ်းအား ဟူ၍လည်း ခေါ်ခဲ့သည်။

သေခြင်းနှင့် ရှင်ခြင်း၊ သို့မဟုတ် မွေးဖွားခြင်းနှင့် သေဆုံးခြင်း၊ သို့မဟုတ် ဖန်တီးခြင်းနှင့် သေဆုံးခြင်း၊ သို့မဟုတ် တည်ရှိခြင်းနှင့် မတည်ရှိခြင်း။

ဖန်တီးခြင်းဖြစ်စေ၊ ပျက်စီးခြင်းဖြစ်စေ တစ်ခုတည်းဖြင့် ပြီးပြည့်စုံသော စကြဝဠာ တစ်ခု မဖွဲ့စည်းနိုင်ပေ။

သေခြင်းနှင့် ရှင်ခြင်း သံသရာက စကြဝဠာ၏ အဓိက အနှစ်သာရပင်။

အဆောင်ပစ္စည်း ၇ခုဖြင့် ဖွဲ့စည်း ထားသော အန္တိမသော့က ထိုငွေသေတ္တာ ချိပ်ပိတ်ကို ဖွင့်ရန် သော့ပင်...

နတ်ဘုရား အားလုံးကို ဖျက်ဆီး ပစ်ခဲ့တဲ့ မျက်လုံးက သေခြင်းနဲ့ ရှင်ခြင်း စာအုပ်လား။

တစ်ခုခုတော့ မှားနေတယ်။ လူစီဖာနဲ့ သဘာဝ သစ်ပင်ရဲ့ စွမ်းအားကြောင့် ဖြစ်လာတဲ့ အိပ်မက်ထဲမှာ မျက်လုံးက နတ်ဘုရားတွေ ဝိုင်းရံထားတဲ့ တည်ရှိမှု ဖြစ်ပြီးတော့ ခီလီယာနာ ခုနက ပြောခဲ့တဲ့ ချိပ်ပိတ်က...

“မလုပ်နဲ့...” ဂေဘရီရယ်၏ အသံ ထွက်ပေါ်လာသည်။ “အဲဒါကို မသုံးနဲ့။”

“မင်း ဘာကို တွန့်ဆုတ်နေတာလဲ။” ခီလီယာနာက ထူးဆန်းစွာ ပြုံးလိုက်ပြီး သူ၏ အသံက သွေးဆောင်မှုများဖြင့် ပြည့်နှက်နေသည်။ “မင်း အန္တိမသော့ကို အသက်သွင်းလိုက်တာနဲ့ သေခြင်းနဲ့ ရှင်ခြင်း စာအုပ်ရဲ့ စွမ်းအားကို အသက် သွင်းနိုင်မယ်။ ငါ ဖန်တီးခြင်း စာအုပ်ကို ကိုင်ထားရင်တောင်မှ... မဟုတ်ဘူး၊ ငါ ပျက်စီးခြင်း စာအုပ် ကိုင်ထားရင်တောင်မှ ခုခံနိုင်မှာ မဟုတ်ဘူး။ မင်း အသူရာ ချောက်နက်ကို လုံးဝ ရှင်းပစ်နိုင်တယ်။”

ချန်လွေ့ အသက်ရှူမဝ ဖြစ်နေသည်။ သူက လက်ထဲမှ အမှောင်ထုဘုရင်ကို မသိစိတ်ဖြင့် ညှစ်လိုက်မိသည်။ လူစီဖာ၏ စကားများက သူ၏နားထဲ နောက်တစ်ခါ ထွက်ပေါ်လာသည်။ အန္တိမသော့ကို အသုံးချဖို့ အခွင့်အရေး တစ်ကြိမ်ပဲ ရှိမယ်။ မင်းမှာ ကိုယ့်ကိုယ်ကိုယ် ဖျက်ဆီးပစ်ဖို့ အသိစိတ် ရှိရုံ မကဘူး။ အရာအားလုံး ပျက်စီးခြင်းကို ခံယူရဲတဲ့ သတ္တိလည်း ရှိရမယ်။

သို့သော် လက်ရှိ အခြေအနေတွင် ၎င်းကို မသုံးခဲ့ပါက အသူရာချောက်နက် သည်လည်း အရာအားလုံးကို ဖျက်ဆီးပစ် လိမ့်မည်။

ချန်လွေ့ အန္တိမသော့ကို အသုံးပြုရန် ဆုံးဖြတ်လိုက်ချိန်တွင် အလင်းတန်း အများအပြား လျှပ်စီးကဲ့သို့ အဝေးမှ ပစ်လာခဲ့သည်။ ၎င်းမှာ ကြယ်သင်္ဘော၏ အမြောက်ကြီး အတွေး ဖြစ်နေသည်။

ယခင် တိုက်ပွဲတွင် မတော်တဆမှု တစ်ခုခု ဖြစ်ခဲ့ပါက လူသားများနှင့် နတ်ဆိုးများ၏ ရေယာဉ်စုနှင့် စစ်တပ်ကို ကြယ်သင်္ဘောထဲတွင် ထိန်းသိမ်းထားရန် သလင်းကျောက် ဇာမဏီအား ချန်လွေ့ အမိန့်ပေးထားခဲ့ပြီး ဖြစ်သည်။ ထိုကဲ့သို့ ကြီးမားသော ပေါက်ကွဲမှုတွင် ကြယ်သင်္ဘောသည် ပြင်းထန်သော သက်ရောက်မှုကို ခံစားခဲ့ရသည်။ အကယ်၍ အကွာအဝေး ဝေးကွာခြင်းနှင့် စည်းမျဉ်း စွမ်းအင် အကာအကွယ်သာ မရှိခဲ့ပါက ပြိုလဲသွားလောက်ပြီ ဖြစ်သည်။

သို့သော် တိုက်ခိုက်မှုများကို ချန်လွေ့၏ အမိန့်အောက်တွင် အသက်သွင်းခဲ့ခြင်း မဟုတ်ပေ။ ထိုကဲ့သို့ ပြုလုပ်ရန် လုံလောက်သော မြင့်မားသည့် အခွင့် အာဏာ ရှိရမည်။ သူ၏ အရင်းနှီးဆုံး အမျိုးသမီးများနှင့် မိတ်ဆွေများသာ ၎င်းကို ပိုင်ဆိုင်ထား၏။

အတွေး၏ အလင်းများသည် အလွန် မြန်ဆန်သော်လည်း သူတို့ ထိုဧရိယာသို့ ဝင်ရောက်လာချိန်တွင် ပဲ့တင်ထပ်မှု စွမ်းအားကြောင့် နှေးကွေးသွားခဲ့သည်။

အလင်းများ၏ ပစ်မှတ်များမှာ ချန်လွေ့၊ ဂေဘရီရယ်၊ စေတန်၊ မိုက်ကယ်နှင့် ဇိုလာတို့ ဖြစ်သည်။

ချန်လွေ့က အလင်းများ၏ ရည်ရွယ်ချက်ကို နားလည်သွားခဲ့သည်။ အကြောင်းမှာ အတွေးတွင် တယ်လီပို့ခြင်း အထူး လုပ်ဆောင်ချက် ရှိနေ၍ပင်။ ထိုတယ်လီပို့ခြင်းကို ထုတ်လွှတ်ရန်သာ မကဘဲ ပြန်လည်ရယူရန်လည်း အသုံးပြု နိုင်သည်။

သို့သော် သူက ကြယ်သင်္ဘောသို့ ပြန်ပြေးခဲ့လျှင်ပင် ခီလီယာနာကဲ့သို့သော အစွမ်းထက် ပုဂ္ဂိုလ်တစ်ဦး၏ လိုက်လံ ဖမ်းဆီးခြင်းမှ မလွတ်မြောက်နိုင်ပေ။

တွန့်ဆုတ်နေစဉ် ပျောက်နေသည်မှာ ကြာပြီဖြစ်သော ရင်းနှီးသည့် အသံတစ်သံ ချန်လွေ့၏ စိတ်ထဲတွင် ထွက်ပေါ်လာ၏။ ဖဲချပ်ကို ကိုင်ထားသောလက် တုန်ခါ၍ သွားခဲ့သည်။ သူက အသံကို နားထောင် လိုက်ပြီး ဖဲချပ်ကို သိမ်းဆည်းလိုက်သည်။ လူတိုင်း ချုပ်တည်းမှု စွမ်းအား ချက်ချင်း ပျောက်သွားကြောင်း ခံစားလိုက်ရ၏။

တစ်ချိန်တည်းမှာပင် အတွေး၏ အလင်းများက လူ ငါးဦးကိုလည်း ထိမှန် သွားခဲ့သည်။

ယခုတစ်ကြိမ်တွင် အလင်း ငါးခုသာ မကဘဲ ခြောက်ခု ရှိနေသည်။

ဆဋ္ဌမမြောက် အလင်း၏ ပစ်မှတ်မှာ လေထဲမှ ပျက်စီးခြင်း စာအုပ်နှင့် ဖန်တီးခြင်း စာအုပ်တို့ ဖြစ်ကြသည်။

ခီလီယာနာ၏ တုံ့ပြန်မှုမှာ အလွန်ပင် မြန်ဆန်လှသည်။ အလင်း၏ ကြိုးပမ်းမှုကို သတိပြုမိပြီးနောက် သူ ကောင်းကင်သို့ ပြေးတက်သွားခဲ့သည်။

ခီလီယာနာက ချုပ်တည်းမှုကြောင့် ထိုအလင်းထက် အနည်းငယ် ပို၍ပင် နှေးကွေးသော်လည်း သူ၏ အရှေ့တွင် လှည့်ကွက်များ ကစားရဲသော ထိုသူကို ချက်ချင်း ရှင်းပစ်ရန်နှင့် အခြားသူများကို အမီလိုက်ရန် အကြွင်းမဲ့ ယုံကြည်ချက် ရှိနေသည်။

ခီလီယာနာ၏ လက်က ထိုသူ၏ လည်ပင်းကို အသေအချာပင် တိကျစွာ ညှစ်လိုက်သည်။ ထိုလှပသော မျက်နှာ၌ မည်သည့် နာကျင်မှုမျှ မရှိနေဘဲ ဂရုမစိုက်ခြင်းသာ ရှိနေခဲ့သည်။

ခီလီယာနာက အံ့အားသင့်သွားသည်။ အကြောင်းမှာ ပျက်စီးခြင်း စာအုပ်နှင့် ဖန်တီးခြင်း စာအုပ်တို့ တစ်ချိန်တည်းပင် တောက်ပစွာ လင်းလက်နေ၍ပင်။ အလွန် အန္တရာယ်ရှိသော ခံစားချက်တစ်ခု သူ၏ စိတ်ထဲသို့ ဝင်ရောက်လာခဲ့သည်။

ဒီမိန်းမ...

သူ ဖန်တီးခြင်း စာအုပ်နှင့် ပျက်စီးခြင်း စာအုပ်တို့ကို ထိမိသည့် အခိုက်တွင် ကြာမြင့်စွာကတည်းက စုစည်းထားသော စွမ်းအားဖြင့် ဖန်တီးခြင်း ဇစ်မြစ်နှင့် ပျက်စီးခြင်း ဇစ်မြစ်တို့၏ ရောယှက် နေသော အားကို လည်ပတ်လိုက်သည်။ စာအုပ် နှစ်အုပ်၏ ရောယှက်နေသော စွမ်းအားကို ပါးနပ်စွာ အသုံးပြုခြင်းမရှိဘဲ သန့်စင်သော ရောနှောခြင်း ဖြစ်သည်။ ထိုရောနှောခြင်းသည် ကြီးမားသော ပေါက်ကွဲစွမ်းအားကို ဖန်တီးလိမ့်မည်။ ၎င်းမှာ သူ ယခင်က မဟာလင်းလက်ဓား အခင်းအကျင်းကို ကိုင်တွယ်ခဲ့သော ကြာပွတ်ထက် များစွာ ကျော်လွန်နေ၏။

ဒီမိန်းမရဲ့ စွမ်းအားမှာလည်း ဖန်တီးခြင်း ဇစ်မြစ်နဲ့ ပျက်စီးခြင်း ဇစ်မြစ် ရှိတယ်။ ဒါက အရမ်း မပြင်းထန်ပေမယ့် ဒါက ကြောက်စရာ အကောင်းဆုံး ပေါက်ကွဲစေတတ်တဲ့ ပစ္စည်းကို လည်ပတ် စေနိုင်တဲ့ မီးညှိကြိုး ဖြစ်နေတဲ့ပုံပဲ...

ခီလီယာနာက မစဉ်းစားဘဲ ထိုမိန်းမကို လွှတ်လိုက်ပြီး ပျက်စီးခြင်း စာအုပ်နှင့် ဖန်တီးခြင်း စာအုပ်တို့ကို ချက်ချင်းပင် ဖမ်းဆုပ်လိုက်သည်။ မည်သို့ပင်ဆိုစေ ကြောက်မက်ဖွယ်ကောင်းသော စွမ်းအား ချက်ချင်း ပေါက်ကွဲထွက်သွားခြင်းကြောင့် အလွန် နောက်ကျသွားခဲ့လေပြီ။

အလင်း၏ အရှိန်မှာ အလွန်ပင် မြန်ဆန်လှသည်။ ထိုသို့ပြောင်းလဲမှုများ ဆက်တိုက်ဖြစ်ပွားမှုက အမှန်တကယ်၌ အချိန်ကိုက်ပင် ဖြစ်သည်။

ကြယ်သင်္ဘောသည် အရှိန် အပြည့်ဖြင့် ရွေ့လျားရန် ကြိုတင် သတ်မှတ်ထား၏။ ထိုပေါက်ကွဲမှုတွင် ၎င်းက ကြောက်စရာ ကောင်းသော သက်ရောက်မှုများကို ခံစားခဲ့ရဆဲ ဖြစ်သည်။ ပျက်စီးမှု ကြီးမားသော်လည်း ထိုသက်ရောက်မှုက ကြယ်သင်္ဘောကို အတိုင်းအတာတစ်ခု အထိ မြှင့်တင်ပေးခဲ့ပြီး ကြယ်သင်္ဘောကို ပျက်စီးခြင်း မတိုင်ခင် ဘေးကင်းရာသို့ လွတ်မြောက်စေခဲ့သည်။

ပေါက်ကွဲမှု မဖြစ်မီ ၁စက္ကန့်အလိုတွင် ချန်လွေ့က အလင်းဖြင့် ကြယ်သင်္ဘော ထဲသို့ ပြန်လည် ပို့ဆောင်ခြင်း ခံခဲ့ရသည်။ သူ၏ရင်ဘတ်က တစ်စုံတစ်ရာကြောင့် ပိတ်ဆို့ ခံထားရသလို ခံစားရပြီးနောက် သူ၏အာရုံ ငါးပါးက လုပ်ဆောင်ချက် ဆုံးရှုံးသွားပုံရ၏။ ပေါက်ကွဲမှုကြောင့် သူ ကြယ်သင်္ဘော၏ တုန်ခါမှုကိုပင် မခံစား နိုင်တော့ပေ။ ဖန်တီးခြင်း စာအုပ်နှင့် ပျက်စီးခြင်း စာအုပ်ထံသို့ ပြေးဝင် သွားခဲ့သော အဖြူရောင် အလင်းသာ သူ၏စိတ်ထဲတွင် ကျန်ရစ်ခဲ့သည်။

အနောက်ဘက် တိုက်မှ လူများသည် ပြင်းထန်သော တုန်ခါမှု တစ်ခုကို နောက်တစ်ကြိမ် ကြုံတွေ့ခဲ့ရပြန်သည်။ ထိုတစ်ကြိမ်တွင် ပြင်းအားက ယခင် အကြိမ်ထက် ၁၀ဆ ပိုအားကောင်းသည်။ မြေကြီး ကွဲအက်သွားပြီး ငလျင်လှုပ် သကဲ့သို့ အဆောက်အအုံများ တစ်ခုပြီး တစ်ခု ပြိုကျသွားခဲ့သည်။ ကမ်းရိုးတန်း တစ်လျှောက်မှ မြို့များက တိုက်ရိုက် ပျက်စီးသွားခဲ့သည်။

ကြယ်သင်္ဘောတွင် ပေါက်ကွဲမှုကြောင့် ဖြစ်ပေါ်လာသော တုန်ခါမှု တဖြည်းဖြည်း ရပ်တန့်၍ သွားခဲ့သည်။ နေရာလွတ်၏ လက်ရှိ အခြေအနေအရ ယခုတစ်ကြိမ် ဖြစ်ပေါ်လာသော ပျက်စီးမှုများမှာ သေချာပေါက် မပေါ့ပေ။ ဂရမ်လင် အဖွဲ့က ပျက်စီးမှုကို လျင်မြန်စွာ ရေတွက်ကာ စက်ပစ္စည်းများကို ပြုပြင်ကြတော့သည်။

“ချန်လွေ့...” ကတ်သရင်းနှင့် အခြား သူများ၏ အသံများက ချန်လွေ့ကို နောက်ဆုံးတွင် နိုးထစေခဲ့သည်။

ခီလီယာနာ၏ ကြာပွတ်စွမ်းအား အောက်တွင် အနောက်မှ အစီအရင်ထဲရှိ အားနည်းသော လူများစွာ နေရာတွင်ပင် ရှင်းလင်းခံလိုက်ရသည်။ ကတ်သရင်း၊ အစ်ဇဘယ်လာနှင့် အခြားသူများလည်း ဒဏ်ရာ အပြင်းအထန် ရရှိခဲ့သည်။ အချိန် အကြာကြီး ပျောက်ဆုံး၍ နေခဲ့သော ထိုအမျိုးသမီးက ရှင်ကျန်ရစ်သူများကို ကယ်ဆယ်ရန် ကြယ်သင်္ဘောကို အသုံးပြု ခဲ့လေသည်။

သူက အခု ဘယ်မှာလဲ။

ချန်လွေ့က လက်သီးများကို ဆုပ်ကိုင် လိုက်၏။ ကြယ်သင်္ဘော၏ ပျက်စီးမှုကို လျစ်လျူရှုလိုက်ပြီးနောက် သူက ယခင် ခုန်ပျံကျော်လွှား ကိုသြဒိနိတ်များသို့ စွမ်းအားအားလုံးဖြင့် ချက်ချင်းပြန်သွားရန် သလင်းကျောက်ဇာမဏီအား အမိန့် ပေးလိုက်သည်။

ခဏကြာပြီးနောက်...

အပြင်းအထန် ပျက်စီးနေသော ကြယ်သင်္ဘောက ပင်လယ်ဖြူ စစ်မြေပြင်သို့ နောက်ဆုံး၌ ပြန်ရောက် လာခဲ့သည်။

ချန်လွေ့က ကြယ်သင်္ဘော အပေါ်မှ အရင်ဦးစွာ ပျံဆင်းသွားပြီး မိုက်ကယ်နှင့် အခြားသူများ နောက်မှ လိုက်သွားခဲ့သည်။

အကယ်၍ ပထမ ပေါက်ကွဲမှုမှာ ပင်လယ်ကို လုံးဝ ပြောင်းလဲပစ်လိုက်ပါက ဒုတိယ ပေါက်ကွဲမှုမှာ ပင်လယ်ဖြူ တစ်ခုလုံးကို လုံးဝဖျက်ဆီးလိုက်ခြင်းပင်။

အသူရာချောက်နက် အုပ်စိုးသူ သုံးဦး၊ ဖန်တီးခြင်း စာအုပ်နှင့် ပျက်စီးခြင်း စာအုပ်တို့ အားလုံး ပျောက်ကွယ်သွားခဲ့ပြီ ဖြစ်သည်။

ပေါက်ကွဲမှု၏ အလယ်ဗဟိုမှ ပုံပျက် နေသော မြေပြင်ပေါ်တွင် ပုံရိပ် တစ်ခုသာ တစ်ယောက်တည်း ရပ်နေခဲ့သည်။

အနီးကပ် ကြည့်လိုက်ရာ ပုံရိပ်သည် အိပ်မက်ဆန်ဆန် ခံစားချက် တစ်ခုကို ပေးနေသည်။ ဖျော့တော့သော အရောင်စုံ အငွေ့များက အချိန်မရွေး ပျောက်ကွယ် နိုင်သည့်အလားပင် ကိုယ်ပတ်လည်တွင် ထွက်ပေါ်နေ၏။

ချန်လွေ့ ပုံရိပ်ဆီသို့ အလျင်အမြန် လျှောက်သွားခဲ့သည်။

ချန်လွေ့က အငွေ့ကို ထိလိုက်သည့် အခိုက်အတန့်တွင် ဝိညာဉ် မှတ်ဉာဏ် အချို့ကို ခံစားလိုက်ရသကဲ့သို့ တုန်လှုပ် သွားခဲ့သည်။ မြင်ကွင်းတစ်ခုက သူ၏ စိတ်ထဲတွင် ပေါ်လာခဲ့သည်။

အမြင်အာရုံထဲတွင် အရပ်ရှည်ရှည်နှင့် ပိန်ပါးသော အမျိုးသား တစ်ဦး၏ ကျောဘက် ရှိနေသည်။ သူ၏မျက်နှာကို ရှင်းရှင်းလင်းလင်း မမြင်ရဘဲ နှင်းကဲ့သို့ ဖြူဖွေးသော အတောင်ပံများသာ ရှိသည်။

“ရှင် တကယ် ဆုံးဖြတ်လိုက်ပြီလား။ ဒီလမ်းက...” သူ မေးလိုက်သည်။

“ကံကြမ္မာလို့ ခေါ်တဲ့အရာမျိုးကို ငါ အရှုံးပေးမှာ မဟုတ်ဘူး။” အမျိုးသားက နောက်မလှည့်ဘဲ ပြောလိုက်သည်။ “ဒါက အမှားပဲ ဖြစ်ဖြစ်၊ နားလည်မှု လွဲတာပဲ ဖြစ်ဖြစ် အရေးမကြီးတော့ဘူး။ အဓိက အချက်က ငါယုံကြည်တဲ့ လမ်းပေါ်မှာ လျှောက်လှမ်းဖို့ပဲ။ အဲဒီအတိုင်းပဲ။ ငါက အကျိုးဆက်တွေကို ကိုယ်တိုင် ခံယူမယ်။ ဘာလို့လဲဆို ဒါက ငါ့ရဲ့ရွေးချယ်မှု မို့လို့ပဲ။”

ထိုသို့ ပြောပြီးနောက် အမျိုးသားက အမှောင်ထုထဲ တဖြည်းဖြည်း ဝင်သွားပြီး အတောင်ပံများ၏ တစ်စိတ်တစ်ပိုင်းက အနက်ရောင် ဆိုးထားသလို ဖြစ်သွား၏။

အမျိုးသား ထွက်ခွာ၍ သွားသည်ကို ကြည့်နေရင်း သူက နောက်ကျောမှ အတောင်ပံများကို ကြည့်ကာ တိုးတိုးလေး ပြောလိုက်သည်။ “ဒါ ငါ့ရဲ့ရွေးချယ်မှုပဲ...”

ထို့နောက် သူက အမှောင်ထုထဲသို့ ဝင်ရောက်သွားသော ပုံရိပ် အနောက်သို့ လိုက်ပါသွားခဲ့၏။