ဝိညာဉ်သန္ဓေသားအဆင့်သို့ တက်လှမ်းခြင်း၏အတိဒုက္ခ၊ စိတ်မိစ္ဆာကပ်ဘေးနှင့် ကောင်းကင်မိုးကြိုး ကပ်ဘေး(၂)။

ရက်အနည်းငယ်ကြာပြီးနောက်...။

သစ်သားကြယ်ကျွန်း၊ ချင်မုဂိုဏ်း ပင်မတောင်ထွတ်၊ ဂိုဏ်းချုပ်၏ အိပ်ခန်းဆောင်။

"ယောက်ျား.."

လင်းယာကျူသည် ကျိုးစွေ့ပေါ်တွင် ပျင်းရိစွာ လှဲလျောင်းနေသည်။ သူမ၏ ပါးပြင်များ နီရဲနေပြီး၊ ထင်ရှားစွာပင် သူမ လုံးဝ အားအင်ကုန်ခမ်းနေပြီ ဖြစ်သည်။

"မင်းရဲ့ ကျင့်ကြံခြင်း တိုးတက်မှုက မကြာသေးမီက တော်တော် ကောင်းပုံပဲ.. ရွှေအမြုတေ ပြီးပြည့်စုံမှုအဆင့်ကို ရောက်သွားပြီလား.."

ကျိုးစွေ့သည် ဤမြင့်မြတ်သော အမျိုးသမီးကို ဖက်ထားရင်း စူးစမ်းစွာ မေးလိုက်သည်။

မကြာသေးမီ ကာလအတွင်း၊ သူသည် လင်းယာကျူ၏ အိပ်ခန်းဆောင်သို့ မကြာခဏ လာရောက်ပြီး၊ တာအိုလက်တွဲဖော်များကြားမှ ပျော်ရွှင်မှုကို ခံစားခဲ့သည်။

မည်သို့ပင်ဆိုစေကာမူ၊ လင်းယာကျူသည် ယခုအခါ သူ၏ တာအိုလက်တွဲဖော် ဖြစ်နေပြီဖြစ်ရာ၊ သဘာဝအတိုင်း သူ မျက်နှာလိုက်၍ မရချေ။ သူမအား ရံဖန်ရံခါ သွားရောက် ဖြည့်ဆည်းပေးရန် လိုအပ်ပေသည်။

"ဟုတ်တယ်.."

"ယောက်ျားနဲ့ တူနှစ်ကိုယ်ကျင့်ကြံခြင်း လုပ်ပြီးတဲ့နောက်.. ကျွန်မရဲ့ ကျင့်ကြံမှုက သိသိသာသာ တိုးတက်မှုတွေ ရခဲ့တယ်…"

"ကျွန်မ ကိုယ်ထဲက ရွှေအမြုတေ ကျင့်ကြံမှုစွမ်းအားက အခု ရွှေအမြုတေ ပြီးပြည့်စုံမှုနဲ့ နီးကပ်နေပြီ.."

"ဒါပေမဲ့ ဝိညာဉ်သန္ဓေသားအဆင့် အောင်မြင်စွာ ဖွဲ့စည်းနိုင်ဖို့အတွက် ကြီးမားတဲ့ ကွာဟချက် ရှိနေတုန်းပဲ.."

လင်းယာကျူ စိတ်လှုပ်ရှားစွာ ပြောလိုက်သည်။

ထင်ရှားသည်မှာ၊ ကျိုးစွေ့နှင့် တူနှစ်ကိုယ်ကျင့်ကြံခြင်းမှ ရရှိသော အကျိုးကျေးဇူးများသည် သူမ၏ မျှော်လင့်ချက်များထက် ကျော်လွန်ခဲ့သည်။

သူမ၏ အတွင်းမှော်စွမ်းအား လျင်မြန်စွာ တိုးတက်လာရုံသာမက၊ ချင်မု အသက်ရှည်ခြင်း ပညာရပ်၏ ဘေးထွက်ဆိုးကျိုးများကိုလည်း ဖြေရှင်းနိုင်ခဲ့သည်။

သူမ၏ ရုပ်ခန္ဓာကိုယ်သည်လည်း လျှို့ဝှက်ဆန်းကြယ်သော စွမ်းအားတစ်ခု၏ သွေးသစ်လောင်း သန့်စင်ပေးခြင်းကို ခံယူခဲ့ရသည်ဟု သူမ ခံစားလိုက်ရသည်။

မူလက သူမ၏ ရုပ်ပိုင်းဆိုင်ရာ ဖွဲ့စည်းပုံမှာ သာမန်မျှသာ ဖြစ်ပြီး၊ ရုပ်ခန္ဓာ သန့်စင်ခြင်း နည်းစနစ်မျာကို မလေ့ကျင့်ခဲ့ပေ။

သို့သော် ယခုအခါ၊ သူမ၏ ရုပ်ပိုင်းဆိုင်ရာ ဖွဲ့စည်းပုံသည် တဖြည်းဖြည်း သန်မာလာနေပြီး၊ ပျမ်းမျှ အခြေတည်အဆင့် ရုပ်ခန္ဓာကျင့်ကြံသူတစ်ဦးနှင့် နှိုင်းယှဉ်နိုင်နေပြီ ဖြစ်သည်။

ဤနည်းအတိုင်း ဆက်လက် လေ့ကျင့်ပါက၊ သူမသည် ရွှေအမြုတေ ရုပ်ခန္ဓာကျင့်ကြံသူတစ်ဦးနှင့် နှိုင်းယှဉ်နိုင်ကောင်း နှိုင်းယှဉ်နိုင်ပေလိမ့်မည်။

ရှန်ပိချန် သည် ခန္ဓာကိုယ်နှင့် ဥပဒေသ နှစ်မျိုးလုံး ကျင့်ကြံသူ ဖြစ်ပြီး၊ သူမ၏ တိုက်ခိုက်ရေး စွမ်းအား အလွန် အစွမ်းထက်နေခြင်းမှာ အံ့ဩစရာ မရှိတော့ပေ။

ထိုအမျိုးသမီးတွင် ရုပ်ခန္ဓာ သန့်စင်ခြင်းအတွက် ပါရမီ ပါလာခြင်း မဟုတ်ကြောင်း သူမ ယခု သဘောပေါက်သွားပြီ ဖြစ်သည်။

ယင်းသည် သူမ၏ ယောက်ျားကြောင့် သက်သက်ပင် ဖြစ်ချေသည်။

သို့မဟုတ်ပါက၊ ထိုမိန်းမသည် ထိုက်ယင် စိတ်ဝိညာဉ်မီးကြောင့် မီးလောင်သေဆုံးသွားသည်မှာ ကြာလှပြီ ဖြစ်ပြီး၊ ယနေ့အထိ အသက်ရှင်နေမည် မဟုတ်ချေ။

"ဝိညာဉ်သန္ဓေသားအဆင့် ဖွဲ့စည်းရတာ အဲ့ဒီလောက် ခက်ခဲတာလား.."

ကျိုးစွေ့က စူးစမ်းစိတ်ဖြင့် မေးလိုက်သည်။

သူသည် ဝိညာဉ်သန္ဓေသားအဆင့် ဖွဲ့စည်းရန် ဝေးကွာနေသေးသော်လည်း၊ ၎င်းနှင့် ပတ်သက်ပြီး စူးစမ်းချင်စိတ်ကို မတားဆီးနိုင်ပေ။

မည်သို့ပင်ဆိုစေကာမူ၊ သူသည်လည်း ဝိညာဉ်သန္ဓေသားအဆင့်သို့ အနှေးအမြန်ဆိုသလို ရောက်လာမည်သာ ဖြစ်သည်။ ထိုကြောင့် မည်သည့်အကြောင်းအရာများ ရှိသည်အား သူသိလိုပေသည်။

"ဒါပေါ့ အရမ်း ခက်တယ်.. ရွှေအမြုတေ ဖွဲ့စည်းတာထက် အဆပေါင်းများစွာ ပိုခက်တယ်…"

"ဒီပင်လယ်ပြင် နယ်မြေမှာ ရွှေအမြုတေ ဆရာသခင်တွေ အများကြီး ရှိတယ်.."

"ဒါပေမဲ့ ဝိညာဉ်သန္ဓေသားအဆင့် ဘိုးဘေးတွေကတော့ အရမ်းနည်းပါးပြီး လက်ချိုးရေလို့တောင် ရတယ်.."

“ကောင်းကင်အဆင့် စိတ်ဝိညာဉ်အမြစ်ရှိတဲ့ ကျင့်ကြံသူတွေတောင် ဝိညာဉ်သန္ဓေသားအဆင့်ကို ၁၀၀% ကျင့်ကြံနိုင်မယ်လို့ မပြောရဲကြဘူး.."

"ဒါက ဝိညာဉ်သန္ဓေသားအဆင့် ဖွဲ့စည်းခြင်းက စိတ်ကူးမယဉ်နိုင်လောက်အောင် ခက်ခဲလို့ပဲ.."

လင်းယာကျူက စိတ်ခံစားမှု အပြည့်ဖြင့် ပြောလိုက်သည်။

သူမတွင် ကိုယ့်ကိုယ်ကို ယုံကြည်မှုများစွာ ရှိသော်လည်း၊ ဝိညာဉ်သန္ဓေသားအဆင့် ဖွဲ့စည်းခြင်းသည် အလွန်တရာ စိန်ခေါ်မှုကြီးမားကြောင်း သူမ တွေ့ရှိခဲ့ရသည်။

အကယ်၍ သူမတွင် အခွင့်အလမ်း မရှိခဲ့ပါက၊ ဤဘဝတွင် ဝိညာဉ်သန္ဓေသားအဆင့်ကို ဖွဲ့စည်းနိုင်မည် မဟုတ်ပေ။

မှန်ပေသည်၊ ယခုအခါ ချင်မု အသက်ရှည်ခြင်းနည်းစနစ်၏ အားနည်းချက်များနှင့် အကျိုးသက်ရောက်မှုများအား ဖြေရှင်းပြီးပြီ ဖြစ်သဖြင့်၊ သူမရဲ့ ဝိညာဉ်သန္ဓေသားအဆင့် အောင်မြင်စွာ ဖွဲ့စည်းနိုင်ခြေသည် အနည်းဆုံး ၃၀% တိုးလာပြီဖြစ်သည်။

"ဘာက အဲ့ဒီလောက် ခက်ခဲနေတာလဲ.."

ကျိုးစွေ့က ထပ်မံ မေးမြန်းလိုက်သည်။

"ဝိညာဉ်သန္ဓေသားအဆင့်ကို တက်လှမ်းဖို့အတွက်… ရွှေအမြုတေ ပြီးပြည့်စုံမှုအဆင့် ရောက်ရှိထားတဲ့ ကျင့်ကြံသူတစ်ယောက်က ဝိညာဉ်ဖွဲ့စည်းဖို့ သူတို့ရဲ့ ရွှေအမြုတေကို ဖြိုခွဲပစ်ရမယ်…"

"အခြေခံအုတ်မြစ်က လုံလောက်အောင် မခိုင်မာရင်.. ဒီအဆင့်က လုံးဝကျရှုံးမှုနဲ့ အဆုံးသတ်သွားပြီး ကျင့်ကြံခြင်း လမ်းကြောင်းလည်း ပြီးဆုံးသွားလိမ့်မယ်.."

"အောင်မြင်ရင်တောင်မှ ဒါက ပထမအဆင့်ပဲ ရှိသေးတယ်.. နောက်တစ်ဆင့်က စိတ်မိစ္ဆာကပ်ဘေး ရောက်လာမယ်.."

"ဝိညာဉ်သန္ဓေသားအဆင့် ဖွဲ့စည်းတဲ့အခါ.. မရေမတွက်နိုင်တဲ့ စိတ်မိစ္ဆာတွေ ထွက်ပေါ်လာမယ်လို့ ဆိုကြတယ်.."

"အဲ့ဒါကို မကျော်လွှားနိုင်ရင်.. သူတို့ရဲ့ ဝိညာဉ်ကို စိတ်မိစ္ဆာတွေက ဝါးမျိုပစ်ပြီး သေခြင်းတရားဆီကို ဦးတည်သွားလိမ့်မယ်…"

"ဝိညာဉ်သန္ဓေသားကို အောင်အောင်မြင်မြင် ဖွဲ့စည်းနိုင်ရင်တောင်မှ.. သူတို့ တတိယကပ်ဘေးကို ရင်ဆိုင်ရဦးမယ်.. အဲ့ဒါက ကောင်းကင်မိုးကြိုး ကပ်ဘေးပဲ…"

"သူတို့ရဲ့ ကျင့်ကြံမှုက လုံလောက်အောင် မသန်မာရင်… လုံလောက်အောင် ပြင်ဆင်မထားရင်.. သူတို့ ကောင်းကင်ကပ်ဘေးအောက်မှာ သေဆုံးသွားရလိမ့်မယ်.."

လင်းယာကျူက လေးနက်စွာ ဆိုလိုက်သည်။

ဝိညာဉ်သန္ဓေသားအဆင့် ဘိုးဘေးအရေအတွက် ဤမျှ နည်းပါးရခြင်းမှာ၊ ဤအဓိက ကပ်ဘေးကြီး နှစ်ခုကြောင့်ပင် ဖြစ်သည်။

အရင်းအမြစ် ပေါကြွယ်ဝသော ချန်လန်ပင်လယ်တွင်ပင် ဝိညာဉ်သန္ဓေသားအဆင့် ဘိုးဘေးများသည် သနားစဖွယ် နည်းပါးလှသည်။

"စိတ်မိစ္ဆာကပ်ဘေး.. ကောင်းကင်မိုးကြိုး ကပ်ဘေး…"

"ဒါဆို ဝိညာဉ်သန္ဓေသားအဆင့်ကို တက်လှမ်းတာက အဲ့ဒီလောက် မရိုးရှင်းဘူးပေါ့.."

ကျိုးစွေ့ သက်ပြင်းချလိုက်သည်။

ဝိညာဉ်သန္ဓေသားအဆင့် ဘိုးဘေးတစ်ပါး ဖြစ်လာရန် အလွန် ခက်ခဲကြောင်း သူ ယခင်က သိထားသော်လည်း၊ ဤမျှလောက်ထိ ခက်ခဲလိမ့်မည်ဟု သူ မမျှော်လင့်ထားခဲ့ပေ။

ရှေ့တစ်လှမ်း တိုးလိုက်တိုင်း၊ သေရေးရှင်ရေး ကပ်ဘေးနှင့် ရင်ဆိုင်ရပေမည်။

ဤသည်မှာ ကျင့်ကြံသူများ၏ ဘဝပင် ဖြစ်သည်။ အသက်ရှင်ရပ်တည်ရေးအတွက် ကောင်းကင်ဘုံကို ဆန့်ကျင်တိုက်ခိုက်နေရသဖြင့် ၎င်းတို့ လှမ်းလိုက်သော ခြေလှမ်းတိုင်းသည် စမ်းသပ်မှုများ၊ ကပ်ဘေးများဖြင့် ပြည့်နှက်နေသည်။

"ဟုတ်တယ်.. မဖြတ်ကျော်နိုင်ရင် သူတို့ ပြာအဖြစ် ပြောင်းလဲသွားရလိမ့်မယ်.."

"ရာစုနှစ်များစွာကြာ ကျင့်ကြံမှုတွေက တစ်ခဏအတွင်း ပျက်သုဉ်းသွားရလိမ့်မယ်.."

သူမ ဤစကားကို ပြောလိုက်သောအခါ၊ လင်းယာကျူ၏ မျက်လုံးလှလှများတွင် ကြောက်ရွံ့မှု အရိပ်အယောင်တစ်ခု ပေါ်လာသည်။

သူမသည် ရွှေအမြုတေ ပြီးပြည့်စုံမှုအဆင့် ကျင့်ကြံသူတစ်ဦး ဖြစ်သော်လည်း၊ မသိနိုင်သော ကပ်ဘေးများကို ကြောက်ရွံ့ခြင်းသည် ရှောင်လွှဲ၍ မရနိုင်ပေ။

"စိတ်မပူပါနဲ့.. ကိုယ့် တာဝန်ထားလိုက်ပါ.."

"ကိုယ့် အကူအညီနဲ့.. မင်း ဝိညာဉ်သန္ဓေသားအဆင့် ဖွဲ့စည်းခြင်းကို သေချာပေါက် အောင်မြင်စေရမယ်.."

"စိတ်မိစ္ဆာကပ်ဘေးနဲ့ ကောင်းကင်မိုးကြိုး ကပ်ဘေးဆိုတာ ဘာမှ မဟုတ်ပါဘူး…"

"အဲ့ဒါတွေကို ဖြတ်ကျော်တာက လက်ဖဝါး လှန်လိုက်သလို လွယ်ကူစေရမယ်…"

ကျိုးစွေ့က လင်းယာကျူကို အလွန် နူးညံ့စွာ ကြည့်လိုက်သည်။

"ကောင်းပါပြီ.."

လင်းယာကျူ၏ လှပသော မျက်လုံးများ မျက်ရည်ဝဲလာပြီး၊ ကျိုးစွေ့ကို ကြည့်လိုက်သောအခါ၊ သူမ၏ နှလုံးသားသည် အချစ်များဖြင့် ပြည့်နှက်သွားသည်။

သူမ ခွန်အားများ ပြန်လည် ရရှိလိုက်သကဲ့သို့ ခံစားလိုက်ရသည်။

"စိတ်ဝင်စားစရာပဲ.. မဖိတ်ခေါ်ထားတဲ့ ဧည့်သည်တချို့ ရောက်လာပုံပဲ…"

ဤအခိုက်အတန့်တွင် ကျိုးစွေ့ တစ်စုံတစ်ခုကို အာရုံခံမိလိုက်သည်။ သူ၏ နှလုံးသားမျက်လုံး စွမ်းအားသည် တိတ်တဆိတ် ဖြန့်ကျက်သွားပြီး၊ မိုင်ထောင်ပေါင်းများစွာ ကျယ်ဝန်းသော ဧရိယာကို လွှမ်းခြုံကာ ချင်မုဂိုဏ်းတစ်ခုလုံးကို ဖုံးအုပ်သွားသည်။

ဤဧရိယာအတွင်းရှိ သက်ရှိတိုင်း၊ အရာဝတ္ထုတိုင်းသည် သူ၏ နှလုံးသားမျက်လုံးရှေ့တွင် ရုပ်ရှင်တစ်ကားကဲ့သို့ ပေါ်လာပြီး၊ မည်သည့် အသေးစိတ်အချက်အလက်မျှ ကျန်ရစ်ခဲ့ခြင်း မရှိပေ။

"မဖိတ်ခေါ်ထားတဲ့ ဧည့်သည်တွေ ဟုတ်လား.. ကျူးကျော်သူတွေလား.."

ဤစကားကို ကြားလိုက်ရသောအခါ လင်းယာကျူ၏ အတွေးများ ပြတ်တောက်သွားသည်။ သူမ၏ ယောက်ျားသည် အကြောင်းပြချက် မရှိဘဲ ဤစကားကို ပြောမည် မဟုတ်ကြောင်း၊ တစ်စုံတစ်ခုကို အာရုံခံမိခြင်း ဖြစ်ရမည်ဟု သူမ သိသည်။

ထို့ကြောင့်သာ သူ ဤကဲ့သို့ ပြောဆိုလိုက်ခြင်း ဖြစ်ရပေမည်။

"ဟုတ်တယ်.. ရွှေအမြုတေ ဆရာသခင်ဆယ်ယောက်.."

"ရွှေအမြုတေ နှောင်းပိုင်းအဆင့် တစ်ယောက်.. အလယ်အလတ်အဆင့် နှစ်ယောက်.. ရွှေအမြုတေ အစောပိုင်းအဆင့် ခုနစ်ယောက်.."

"အတော်လေး အထင်ကြီးစရာကောင်းတဲ့ လူစာရင်းပဲ.."

ကျိုးစွေ့၏ မျက်လုံးများ ကျဉ်းမြောင်းသွားသည်။ ရွှေအမြုတေ ဆရာသခင်ဆယ်ဦးသည် ပင်လယ်၏ အနက်ပိုင်းထဲမှ ပျံသန်းလာပြီး သစ်သားကြယ်ကျွန်းပေါ်သို့ တိတ်တဆိတ် ဆင်းသက်လာသည်ကို သူ အာရုံခံမိလိုက်သည်။

သူတို့သည် အရှိန်အဝါကို ဖုံးကွယ်ထားကြပြီး၊ ချင်မုဂိုဏ်းမှ ကျင့်ကြံသူ အများအပြားသည် သူတို့၏ တည်ရှိနေမှုကို သတိမပြုမိကြပေ။

ထင်ရှားသည်မှာ၊ ဤမဖိတ်ခေါ်ထားသော ဧည့်သည်များသည် ရည်ရွယ်ချက်ကောင်းဖြင့် လာကြခြင်း မဟုတ်ပေ။

"ရွှေအမြုတေ ဆရာသခင် ဆယ်ယောက်တောင်လား.. ဘယ်လိုလုပ် ရန်သူတွေ ဒီလောက် အများကြီး ပေါ်လာရတာလဲ…"

"သူတို့က ပင်လယ်ထဲက ဓားပြကျင့်ကြံသူတွေများလား…"

"ဒါပေမဲ့ ငါတို့ ချင်မုဂိုဏ်းမှာ ဘာမှ သိပ်မရှိပါဘူး.. သူတို့ တကယ်ပဲ ဓားပြတိုက်ချင်ရင် ဘာလို့ အင်မော်တယ်ရှား မြို့တော်ကို မသွားကြတာလဲ…"

လင်းယာကျူ အံ့အားသင့်သွားသည်။

ဤပင်လယ်ပြင် ဧရိယာသည် အလွန် ပရမ်းပတာဖြစ်နေပြီး၊ နေရာတိုင်းတွင် ဓားပြ ကျင့်ကြံသူများဖြင့် ပြည့်နှက်နေကာ၊ ပတ်ဝန်းကျင် အနှံ့အပြားတွင် သတ်ဖြတ်မှုများ ဖြစ်ပွားနေကြောင်း သူမ သိသည်။

သို့သော်၊ လွန်ခဲ့သော ငါးနှစ်တာ ကာလအတွင်း အဓိကဂိုဏ်းကြီးသုံးခုသည် သူတို့၏ အင်အားကို ပြသခဲ့ပြီး ဤဓားပြ ကျင့်ကြံသူများကို ဟန့်တားနိုင်ခဲ့သည်။

ရလဒ်အနေဖြင့်၊ ဓားပြကျင့်ကြံသူ အများအပြားသည် ကြယ်သုံးပွင့် ကျွန်းစုအနီးသို့ မကပ်ရဲကြပေ။

ဤကာလအတွင်း အဓိကဂိုဏ်းကြီးသုံးခုလုံး အလွန် လုံခြုံခဲ့သည်။

သို့သော်၊ ရွှေအမြုတေ ဓားပြကျင့်ကြံသူများက ချင်မုဂိုဏ်းကို ပစ်မှတ်ထားနေဆဲဖြစ်မည်ဟု သူမ မမျှော်လင့်ထားခဲ့ပေ။

"မေးစရာ လိုသေးလို့လား.. သူတို့က ပိုအားနည်းတဲ့ ပစ်မှတ်ကို အခွင့်ကောင်း ယူနေတာ ထင်ရှားတာပဲ.."

"ချင်မုဂိုဏ်းကို သူတို့က အားနည်းတဲ့ပစ်မှတ်လို့ မြင်ခဲ့ကြတာ သေချာတယ်.."

"ဒါကြောင့် သူတို့က မင်းကိုအရင် ဖြေရှင်းချင်ကြတာ…"

ကျိုးစွေ့က အမှန်အတိုင်း ပြောလိုက်သည်။