စစ်မှန်သော နဂါးဓားဆန္ဒကို နားလည်ခြင်း၊ တတိယအဆင့် ဓားသိုင်းပညာ နယ်ပယ်(၁)။

"ဒီရွှေအမြုတေ ကျင့်ကြံသူတွေကို ဖယ်ရှားဖို့ဆိုရင် လေးနက်တဲ့ အစီအမံတွေ လိုအပ်ပုံပဲ…"

အတွေးတစ်ချက်ဖြင့် ကျိုးစွေ့သည် ‘အစီအရင်နှလုံးသားကူ’ကို ချက်ချင်း အသုံးချလိုက်ပြီး၊ သစ်သားကြယ်ကျွန်းကို လွှမ်းခြုံထားသော တတိယအဆင့် ထိပ်တန်း ကြည်လင်သစ်သား နတ်ဘုရားမိုးကြိုး အစီအရင်ကို အသက်သွင်းလိုက်သည်။

ဘုန်း..။

တစ်ခဏချင်းမှာပင်၊ မူလက ချင်မုဂိုဏ်းကိုသာ လွှမ်းခြုံထားသော ကြည်လင်သစ်သား နတ်ဘုရားမိုးကြိုး အစီအရင်သည် ၎င်း၏ နယ်ပယ်ကို နှစ်ဆတိုးချဲ့လိုက်ပြီး၊ ယုဖုန်း အပါအဝင် ရွှေအမြုတေ ကျင့်ကြံသူများကို ချက်ချင်း လွှမ်းခြုံပိတ်လှောင်ထားလိုက်သည်။

ကောင်းကင်ထက်တွင် မဲမှောင်သော တိမ်တိုက်များ စုဝေးလာပြီး၊ မိုးကြိုး စွမ်းအားများ စုစည်းလာတော့သည်။

ထိတ်လန့်ဖွယ် အငွေ့အသက်တစ်ခု လေထုထဲတွင် လွှမ်းခြုံနေပြီး၊ မရေမတွက်နိုင်သော မိုးကြိုးသွားများ အချိန်မရွေး ကျဆင်းလာတော့မည့်အလား ဖြစ်နေတော့သည်။

ယင်းက ရွှေအမြုတေကျင့်ကြံသူ အများအပြား၏ ကျောရိုးထဲသို့ စိမ့်တက်သွားစေသည်။

"သေစမ်းကွာ... ငါတို့ အရူးလုပ်ခံလိုက်ရပြီ…"

"တစ္ဆေအိုကြီးယု.. ခင်ဗျားက သစ္စာဖောက် မဟုတ်ဘူးလို့ ပြောချင်နေတုန်းလား.."

"တကယ်တမ်းကျတော့.. ခင်ဗျားက ငါတို့ကို သုတ်သင်ဖို့ အင်မော်တယ်ရှား မြို့တော်နဲ့ ပူးပေါင်းထားတာပဲ…"

"ငါ တစ္ဆေ ဖြစ်သွားရင်တောင်… မင်းကို အလွတ်မပေးဘူး…"

ပတ်ဝန်းကျင်ကို လွှမ်းခြုံထားသော မဟာ အစီအရင်၏ ပြင်းထန်သော အစွမ်းသတ္တိကို ခံစားလိုက်ရပြီး၊ လေဟာနယ်ကို သီးခြားခွဲထုတ်ကာ အဆုံးအစ မရှိသော အစီအရင်နယ်မြေတစ်ခု ဖြစ်ပေါ်စေသည်ကို တွေ့လိုက်ရသောအခါ၊ ရွှေအမြုတေ ကျင့်ကြံသူများ၏ မျက်နှာများ အရောင်ပြောင်းသွားကြပြီး၊ ထိတ်လန့် တုန်လှုပ်သွားကြသည်။

သူတို့သည် ဘေးတွင် ရပ်နေသော ယုမိသားစု၏ မြင့်မြတ်အကြီးအကဲ ယုဖုန်းကို ဒေါသတကြီး စိုက်ကြည့်နေကြသည်။

ယုမိသားစုသည် သူတို့၊ ရွှေအမြုတေ ဆရာသခင်များကို သုတ်သင်ရန် အင်မော်တယ်ရှား မြို့တော်နှင့် ပူးပေါင်းကြံစည်ခဲ့သည်ဟု သူတို့ အခိုင်အမာ ယုံကြည်နေကြသည်။

သို့မဟုတ်ပါက၊ သူတို့သည် ရန်သူ၏ ထောင်ချောက်ထဲသို့ မည်သို့ ဝင်ရောက်လာမိမည်နည်း။

"ပါးစပ်ပိတ်ထားကြစမ်း.. ငါ အင်မော်တယ်ရှား မြို့တော်နဲ့ မပူးပေါင်းခဲ့ဘူး.."

"မင်းတို့ သဘောမပေါက်သေးဘူးလား.. ငါတို့ ယုမိသားစုလည်း ထောင်ချောက်ထဲ ကျသွားတာကွ…"

"သူတို့က မင်းတို့နဲ့အတူ ငါတို့ကိုပါ သတ်ပစ်ဖို့ ကြံစည်နေကြတာလေ.."

"အခု အပြစ်တင်နေရမယ့် အချိန် မဟုတ်ဘူး… အင်အားတွေ ပေါင်းစည်းပြီး ဒီအစီအရင်ကို ဖောက်ထွက်ကြစို့… အန္တရာယ်ကနေ လွတ်မှ ကိစ္စတွေကို ရှင်းကြတာပေါ့…"

ယုမိသားစု၏ မြင့်မြတ်အကြီးအကဲ ယုဖုန်းက လေးနက်သော လေသံဖြင့် ညိုးငယ်စွာ ပြောလိုက်သည်။

ဤစကားများကို ကြားလိုက်ရသောအခါ ပတ်ဝန်းကျင်ရှိ ရွှေအမြုတေ ဆရာသခင်များ ဒေါသထွက်နေကြသော်လည်း၊ အခြေအနေ၏ လေးနက်မှုကို နားလည်လိုက်ကြသည်။

အကယ်၍ ဤနေရာတွင် အတွင်းပဋိပက္ခ ဖြစ်ပွားနေပါက၊ သူတို့ သေချာပေါက် သေဆုံးကြရပေလိမ့်မည်။

ဘုန်း…။

စကားသံဆုံးသည်နှင့် တပြိုင်နက်၊ တွန့်ဆုတ်မနေတော့ဘဲ ယုဖုန်းသည် သူ၏ ကိုယ်ပေါ်မှ တတိယအဆင့် ထိပ်တန်း တားမြစ်ချက် ဖျက်ဆီးခြင်းအဆောင်တစ်ခုကို ထုတ်ယူလိုက်သည်။ သူ၏ မျက်နှာပေါ်တွင် နှမြောတသသော အမူအရာတစ်ခု ပေါ်လာသည်။

သို့သော် တွန့်ဆုတ်နေရမည့် အချိန် မဟုတ်ကြောင်း သူ သိသည်။

အကယ်၍ သူသည် မဟာအစီအရင်၏ အစွမ်းကုန် ထုတ်လွှတ်မှုကို စောင့်ဆိုင်းနေပါက၊ သူနှင့်အတူ ရှိနေသော ရွှေအမြုတေ ကျင့်ကြံသူများအားလုံး အမှန်တကယ်ပင် သေရေးရှင်ရေး ဖြစ်သွားပေလိမ့်မည်။

လက်နှစ်ဖက်ဖြင့် သင်္ကေတတစ်ခု ဖော်လိုက်ပြီး၊ သူသည် အဆောင်ကို ချက်ချင်း အသက်သွင်းလိုက်သည်။

ရုတ်တရက်၊ ဤတတိယအဆင့် ထိပ်တန်း တားမြစ်ချက် ဖျက်ဆီးခြင်းအဆောင်သည် ငွေရောင် အလင်းတန်းတစ်ခုအဖြစ် ပြောင်းလဲသွားပြီး အစီအရင် ထဲသို့ ချက်ချင်း ဝင်ရောက်သွားသည်။

ချက်ချင်းဆိုသလိုပင်၊ တတိယအဆင့် ကြည်လင်သစ်သား နတ်ဘုရားမိုးကြိုး အစီအရင်သည် မှိန်ဖျော့သွားပြီး၊ ၎င်း၏ အစီအရင်နယ်မြေ စွမ်းအားသည်လည်း ပျောက်ကွယ်သွားသည်။

"ဘာတွေ ဖြစ်နေတာလဲ…"

ကျိုးစွေ့လည်း အဝေးမှနေ၍ အံ့အားသင့်သွားသည်။ အကြောင်းမှာ ‘အစီအရင်နှလုံးသားကူ’၏ စွမ်းအားမှတစ်ဆင့်၊ တတိယအဆင့် အစီအရင်တစ်ခုလုံးကို အမည်မသိ စွမ်းအားတစ်မျိုးက တားဆီးနေသကဲ့သို့ ဖြစ်နေသောကြောင့် ဖြစ်သည်။

ဤလျှို့ဝှက်ဆန်းကြယ်သော စွမ်းအားသည် အစီအရင်ဗဟိုချက်အချို့ကို နှောင့်ယှက်လိုက်သည်။

ရလဒ်အနေဖြင့် ကြည်လင်သစ်သား နတ်ဘုရားမိုးကြိုး အစီအရင်သည် ယာယီအားဖြင့် စွမ်းအားမဲ့သွားသည်။

ဤစွမ်းအားကို ဖယ်ရှားရန် အချိန်အတိုင်းအတာတစ်ခု လိုအပ်နေသေးသည်။

တတိယအဆင့် အစီအရင်တစ်ခုကို ယာယီအားဖြင့် ချိုးဖြတ်နိုင်သည့် အဆောင်များ လောကတွင် ရှိနေနိုင်လိမ့်မည်ဟု သူ မမျှော်လင့်ထားခဲ့ပေ။

"ဟားဟား... ထင်ထားတဲ့အတိုင်း… တတိယအဆင့် တားမြစ်ချက် ဖျက်ဆီးခြင်းအဆောင်က တကယ့်ကို အံ့မခန်းပဲ…"

"ဒီတတိယအဆင့် အစီအရင်က ယာယီ အလုပ်မလုပ်တော့ဘူး…"

"ငါတို့ မြန်မြန် ထွက်သွားကြစို့…"

ယုမိသားစု၏ မြင့်မြတ်အကြီးအကဲ ယုဖုန်းက အားပါးတရ ရယ်မောလိုက်ပြီး အလွန် ဝမ်းသာသွားသည်။ ချင်မုဂိုဏ်းကို တိုက်ခိုက်ပြီး ချင်မုဂိုဏ်း၏ ရွှေအမြုတေ ဆရာသခင် များကို အမြစ်ပြတ် သုတ်သင်ပစ်ချင်စိတ် ပြင်းပြနေသော်လည်း၊ လက်ရှိ အခြေအနေသည် ရှင်းပြ၍ မရနိုင်လောက်အောင် ထူးဆန်းနေပြီး၊ သူ၏ လှုပ်ရှားမှုများ မည်သို့ ပေါက်ကြားသွားသည်ကိုပင် သူ မသိပေ။

ထို့ကြောင့် အကောင်းဆုံးဗျူဟာမှာ ယာယီ ဆုတ်ခွာပြီး၊ အခြေအနေ ရှင်းလင်းသွားမှ တန်ပြန်တိုက်ခိုက်ရန် ဖြစ်သည်။ ထိုအခါမှလည်း နောက်မကျသေးပေ။

"ပြေးချင်တာလား.. အဲ့ဒီလောက် မလွယ်ဘူး…"

ကျိုးစွေ့ အေးစက်စက် နှာခေါင်းရှုံ့လိုက်သည်။ သူ၏ အတွေးတစ်ချက်ဖြင့် ‘ကိုယ်ပွားကူ’ကို ချက်ချင်း ထိန်းချုပ်လိုက်သည်။

ရုတ်တရက်၊ ဓားရှည် ကိုင်ဆောင်ထားသော ကိုယ်ပွား (၁၈)ခု ပေါ်ထွက်လာပြီး ရွှေအမြုတေ ကျင့်ကြံသူအုပ်စုရှေ့သို့ ချက်ချင်း ရောက်ရှိသွားသည်။

၎င်းတို့သည် နတ်ဆိုးအသွင်ပြောင်း ပညာရပ်ကို အသုံးပြုလိုက်ပြီး၊ ကျင့်ကြံသူ အမျိုးမျိုး၏ ပုံသဏ္ဍာန်အဖြစ် ပြောင်းလဲလိုက်ကြသည်။

ကိုယ်ပွားတစ်ခုစီသည် မူရင်း ခွန်အားနှင့် မှော်စွမ်းအား၏ ထက်ဝက်ခန့်သာ ရှိသော်လည်း၊ ယင်းတို့သည် ကြောက်မက်ဖွယ် ကောင်းနေဆဲ ဖြစ်ပြီး သာမန် ရွှေအမြုတေ အစောပိုင်းအဆင့် ကျင့်ကြံသူများ ယှဉ်ပြိုင်နိုင်သည့် အရာ မဟုတ်ပေ။

၎င်းတို့ တစ်ဦးချင်းစီသည် ကြောက်မက်ဖွယ် အရှိန်အဝါကို ထုတ်လွှတ်နေပြီး၊ နဂါးတစ်ကောင်ကဲ့သို့သော အရှိန်အဝါအား ထုတ်ဖော်ပြသနေသည်။

စစ်မှန်သော နဂါး (၁၈)ကောင် လူ့လောကသို့ ဆင်းသက်လာသကဲ့သို့ပင် ဖြစ်နေချေသည်။

ကိုယ်ပွား (၁၈)ခု လှုပ်ရှားလာသောအခါ ရွှေအမြုတေ အစောပိုင်းအဆင့် ကျင့်ကြံသူ (၁၈)ဦး ဝိုင်းရံ တိုက်ခိုက်နေသကဲ့သို့ ဖြစ်သည်ဟု ဆိုနိုင်သည်။

၎င်း၏ ခြိမ်းခြောက်မှုကို အလွယ်တကူ စိတ်ကူးကြည့်နိုင်သည်။

ချက်ချင်းဆိုသလိုပင်၊ ယုမိသားစု၏ မြင့်မြတ်အကြီးအကဲ ယုဖုန်းနှင့် အခြားသူများ အံ့အားသင့်သွားကြသည်။ သူတို့ မည်မျှပင် ကြိုးစား စဉ်းစားစေကာမူ၊ ဤကဲ့သို့သော အခြေအနေကို နားမလည်နိုင်ကြပေ။ ၎င်းသည် လုံးဝ ယုံကြည်နိုင်စရာ မရှိပေ။

"ဘာတွေ ဖြစ်နေတာလဲ… အင်မော်တယ်ရှား မြို့တော်မှာ ဘယ်တုန်းက ရွှေအမြုတေ ဆရာသခင်တွေ ဒီလောက် များသွားတာလဲ…"

"လာနောက်နေတာလား… ဝူကျိမဟာမိတ်အဖွဲ့ရဲ့ အစွန်အဖျား ပင်လယ်ပြင်နယ်မြေမှာ ရွှေအမြုတေ ဆရာသခင်တွေ ဒီလောက် အများကြီး ရှိနေတာလား…"

"အင်မော်တယ်ရှား မြို့တော်ရဲ့ တကယ့်နောက်ခံက ဘာလဲ…"

"ဒါ တော်တော်လေး တရားလွန်လွန်းတယ်… ရွှေအမြုတေ ကျင့်ကြံသူတွေ ဒီလောက် အများကြီး ရှိနေတာတောင်မှ နှိမ့်ချနေသေးတာ… အင်မော်တယ်ရှား မြို့တော်က ဘာတွေ ကြံနေတာလဲ…"

ဤမြင်ကွင်းကို မြင်လိုက်ရသောအခါ ထိုသူများ၏ မျက်နှာများ လုံးဝစိမ်းဖန်သွားပြီး၊ နောင်တရလွန်း၍ အူများ ကျိန်းနေသကဲ့သို့ ခံစားလိုက်ရသည်။

သံသယဖြစ်ဖွယ် မလို၊ အင်မော်တယ်ရှား မြို့တော်တွင် ရွှေအမြုတေ ကျင့်ကြံသူ ဤမျှများပြားကြောင်း စောစောကတည်းက သိခဲ့လျှင်၊ သူတို့ အင်မော်တယ်ရှား မြို့တော်ကို ထိပါးရဲမည် မဟုတ်ပေ။ ယင်းသည် ကိုယ့်သေတွင်း ကိုယ်တူးတာနှင့် အတူတူပင်။

ယခုအခါ သူတို့ သံပြားကို ကန်မိသွားကြပြီ ဖြစ်သည်။ ရွှေအမြုတေ အစောပိုင်းအဆင့် ကျင့်ကြံသူ (၁၈)ဦးက ဤနေရာတွင် ချုံခိုစောင့်ဆိုင်းနေခြင်းသည် အမှန်တကယ်ပင် ကြောက်မက်ဖွယ် ကောင်းလှသည်။

သူတို့၏ ဘဝတစ်လျှောက်လုံးတွင် ဤမျှများပြားသော ရွှေအမြုတေ ကျင့်ကြံသူများ၏ ချုံခိုတိုက်ခိုက်ခြင်းကို မည်သည့်အခါကမျှ မကြုံဖူးခဲ့ကြပေ။

"နဂါးလက်သည်း…."

သို့သော် ကျိုးစွေ့သည် ဤရွှေအမြုတေ ကျင့်ကြံသူများနှင့် စကားပြော အချိန်ဖြုန်းရန် ရည်ရွယ်ချက် မရှိပေ။ အတွေး ပေါ်လာသည်နှင့် တပြိုင်နက်၊ ကိုယ်ပွား (၁၈)ခုသည် တပြိုင်နက်တည်း လှုပ်ရှားလိုက်ကြပြီး အစစ်အမှန် နဂါးဓားသိုင်း၏ ပထမဆုံးလှုပ်ရှားမှု ဖြစ်သော နဂါးလက်သည်းကို ထုတ်ဖော်လိုက်ကြသည်။

ရွှေအမြုတေအဆင့် ရုပ်ခန္ဓာကျင့်ကြံခြင်း နယ်ပယ်သို့ တက်လှမ်းပြီးနောက်၊ အစစ်အမှန် နဂါးဓားသိုင်း၏ စွမ်းအားသည် ပိုမို ကြီးမားသော စွမ်းအားကို ထုတ်ဖော်နိုင်သည်။

သူတို့သည် ကိုယ်ပွား များသာ ဖြစ်သော်လည်း၊ ပေါင်ချိန် ငါးသိန်းရှိသော ကြီးမားသည့် ခွန်အားကို ပိုင်ဆိုင်ထားဆဲ ဖြစ်သည်။

သူတို့သည် ဓားရှည်များကို ကိုင်ဆောင်လျက် ရွှေအမြုတေ ကျင့်ကြံသူများထံသို့ တစ်ချက်စီ ခုတ်ပိုင်းလိုက်ကြသည်။

လေထဲတွင် ဓားချီတန်းများသည် ရွှေရောင် နဂါးလက်သည်း ပုံစံများအဖြစ် ပြောင်းလဲသွားသည်။ ကြောက်မက်ဖွယ် ဖျက်ဆီးစွမ်းအားကို သယ်ဆောင်လျက်၊ ဧရာမ နဂါးကြီး (၁၈)ကောင် တပြိုင်နက်တည်း တိုက်ခိုက်နေသကဲ့သို့၊ သူတို့၏ လက်သည်းများကို ဆန့်တန်းလျက် ရွှေအမြုတေ ကျင့်ကြံသူအုပ်စုကို ရက်စက်စွာ ကုတ်ဖဲ့လိုက်တော့သည်။

"ရွှေစက်ကွင်းဒိုင်း…"

ဤမြင်ကွင်းကို မြင်လိုက်ရသောအခါ၊ ယုမိသားစု၏ အကြီးအကဲ ယုဖုန်းသည် မရေမတွက်နိုင်သော ရွှေရောင် ရုန်းသင်္ကေတများ ပေါ်ထွက်နေသည့် အဆင့်နိမ့် မှော်ရတနာ ရွှေစက်ကွင်းဒိုင်းကို အလျင်အမြန် ထုတ်ယူလိုက်သည်။

သူသည် သူ၏ ရွှေအမြုတေ ကျင့်ကြံမှုစွမ်းအားကို အဆင့်နိမ့် မှော်ရတနာဖြစ်သော ရွှေစက်ကွင်းဒိုင်းထဲသို့ ထည့်သွင်းလိုက်ရာ၊ ဧရာမ ရွှေရောင်စွမ်းအင် ဒိုင်းတစ်ခု ချက်ချင်း အသက်ဝင်လာပြီး ဧရိယာကို လွှမ်းခြုံကာ ရွှေအမြုတေ ကျင့်ကြံသူအားလုံးကို အထဲတွင် အပြည့်အဝဖုံးအုပ်လိုက်ကာ အတားအဆီးတစ်ခု ဖွဲ့စည်းလိုက်သည်။

ဘန်း…။

ဓားချီလှိုင်းများသည် ဧရာမနဂါး အများအပြားက ၎င်းတို့၏ လက်သည်းများကို ဆန့်တန်းပြီး ပြင်းထန်စွာ ရိုက်နှက်နေသကဲ့သို့ ဤရွှေရောင်အတားအဆီးကို အဆက်မပြတ် တိုက်ခိုက်လိုက်ကြသည်။ ပေါင်ချိန် ငါးသိန်း အပြည့်ရှိသော အင်အား ပေါက်ကွဲထွက်လာပြီး တောင်ပြို၊ကမ်းပြိုသကဲ့သို့ အကျိုးသက်ရောက်မှုကို ဖြစ်ပေါ်စေသည်။

ရိုက်ခတ်မှုကြောင့် အတားအဆီးသည် ချက်ချင်း တုန်ခါသွားပြီး မီတာပေါင်းများစွာ ဆုတ်ခွာသွားရတော့သည်။

ဤတိုက်ခိုက်မှုသည် ကာကွယ်ရေးအတားအဆီးကို မဖြိုခွင်းနိုင်သော်လည်း၊ ယုမိသားစုအကြီးအကဲ ယုဖုန်း၏ မှော်စွမ်းအားကို ထိတ်လန့်ဖွယ်နှုန်းဖြင့် ကုန်ဆုံးစေခဲ့ပြီး၊ သူ၏မျက်နှာကို ဖြူဖျော့သွားစေသည်။

"တကယ့်ကို ချမ်းသာတာပဲ…"

ကျိုးစွေ့ အနည်းငယ် အံ့အားသင့်သွားသည်။ မမျှော်လင့်ဘဲ ပြိုင်ဘက်သည် အဆင့်နိမ့် မှော်ရတနာ ကာကွယ်ရေးပစ္စည်းတစ်ခုကို ထုတ်သုံးနိုင်ခဲ့သည်။ ဤအချက်က သူ၏ ပြိုင်ဘက်သည် မယုံနိုင်လောက်အောင် ချမ်းသာကြွယ်ဝကြောင်း ညွှန်ပြနေသည်။

သို့မဟုတ်ပါက၊ အဆင့်နိမ့် ကာကွယ်ရေးမှော်ရတနာတစ်ခုအား ဤသို့ အလွယ်တကူ မည်သူက ထုတ်သုံးနိုင်ပါမည်နည်း။

ချင်မုဂိုဏ်းနှင့် အခြား အဓိကဂိုဏ်းကြီးနှစ်ခုမှ သူများပင်လျှင် ယခုအချိန်အထိ ရတနာ နှစ်ခု၊ သုံးခုသာ ရှိသေးပြီး၊ ထိုအထဲတွင် ကာကွယ်ရေး ရတနာများ မပါရှိပေ။

ဤပင်လယ်ပြင်ရှိ မိသားစု ကျင့်ကြံသူများသည် အင်မော်တယ်မြူခိုးကျွန်းမှ ရွှေအမြုတေ ကျင့်ကြံသူများထက် အမှန်တကယ်ပင် ပိုမို ချမ်းသာကြွယ်ဝကြသည်ဟု ဆိုနိုင်သည်။