ဒီနေ့ စိတ်မပျော်မရွှင် ဖြစ်နေသလိုပဲ

အင်ပါယာ မြို့တော်အတွက် သူမနှင့် ယှဉ်ပြိုင်ရန် လေဝမ်တယ် အမှန်တကယ် ရည်ရွယ်ထားသည်ကို မြင်သောအခါ နန်းကုန်းယွဲ့ဟွာ၏ မျက်ခုံးအစုံ အနည်းငယ် တွန့်သွားသည်။

ထိုသို့တော့ အဖြစ်ခံ၍ မဖြစ်ပေ။

အင်ပါယာ မြို့တော်သာ ထိုကမ္ဘာတွင် တည်ရှိပါက ထိုကမ္ဘာ၏ ကံစွမ်းအားသည် သေချာပေါက် သိသိသာသာ ထူထပ်လာပေလိမ့်မည်။

လေရန်ကမ္ဘာကို အခွင့်အရေး အပိုင်စီးခွင့် မပေးနိုင်သော်လည်း နန်းကုန်းယွဲ့ဟွာ၏ ရင်ထဲတွင် စိုးရိမ်မှုအချို့ ရှိနေဆဲပင်။

အဘယ်ကြောင့်ဆိုသော် လေရန်ကမ္ဘာသည် အလယ်အလတ်အဆင့် ကျင့်စဉ်ကမ္ဘာ ဖြစ်နေသောကြောင့်ဖြစ်သည်။ အဆင့်နိမ့် ကျင့်စဉ်ကမ္ဘာဖြစ်သော ကျိယန်ကမ္ဘာနှင့် ယှဉ်လျှင် အင်ပါယာ မြို့တော်အဖြစ် တာဝန်ယူရန် လေရန်ကမ္ဘာက ပိုမိုသင့်လျော်ကြောင်း သူမ နားလည်ထားသည်။

အင်ပါယာ မြို့တော်ကို ကျိယန်ကမ္ဘာတွင် တည်ထောင်ရန် လုချန်းအား မည်သို့ ပြောဆိုရမည်နည်း။ နန်းကုန်းယွဲ့ဟွာ တွေးတောနေစဉ်မှာပင် လုချန်းက ခပ်အေးအေး ပြောလိုက်သည်။

“အင်ပါယာ မြို့တော်ကို ထျန်းချန်ကမ္ဘာမှာ သတ်မှတ်ဖို့ ကျွန်တော် စဉ်စားထားတယ်။”

ထိုစကားကို ကြားသောအခါ နန်းကုန်းယွဲ့ဟွာက ချက်ချင်း တုံ့ပြန်ပြောဆိုလိုက်သည်။

“မင်းကြီး... ထျန်းချန်ကမ္ဘာက စိတ်ဝိညာဉ်စွမ်းအား ရှားပါးပြီး ဥပဒေနိယာမတွေ မပြည့်စုံတဲ့အတွက် အင်ပါယာ မြို့တော်အဖြစ် တာဝန်ယူဖို့ မသင့်လျော်ပါဘူး။”

လုချန်းက ပြန်လည်ရှင်းပြလိုက်သည်။

“ထျန်းချန်ကမ္ဘာရဲ့ ဥပဒေနိယာမတွေ မကြာခင် ပြန်လည်ကောင်းလာတော့မှာပါ။ ဒီကိစ္စအတွက် မင်း စိုးရိမ်စရာ မလိုပါဘူး။”

အင်ပါယာ မြို့တော်ကို ထျန်းချန်ကမ္ဘာတွင် တည်ဆောက်ရန် လုချန်း ဆုံးဖြတ်ပြီးပုံရသည်။ ထို့ကြောင့် ထပ်မံပြောဆိုရန် မသင့်လျော်ကြောင်း နန်းကုန်းယွဲ့ဟွာ သဘောပေါက်လိုက်သည်။

ထိုအချိန်တွင် လုချန်းက ဆက်လက်၍

“အင်ပါယာ တည်ထောင်ပြီးရင် ဖရိုဖရဲ ကြယ်ပင်လယ် ဝန်းကျင်က သက်ရှိကမ္ဘာအားလုံးကို ရှနိုင်ငံတော် အုပ်ချုပ်မှုအောက် ခေါ်သွင်းဖို့ စဉ်စားထားတယ်။”

ထိုစကားကို ကြားသော်လည်း လူအများ အံ့အားမသင့်ကြပေ။ အင်ပါယာတစ်ခု တည်ထောင်ပြီး ဖြစ်သောကြောင့် ကြယ်နယ်မြေတစ်ခုကို ထိန်းချုပ်ရန် လိုအပ်ပေမည်။

မဟုတ်ပါက မည်ကဲ့သို့သော အင်ပါယာ ဖြစ်နေမည်နည်း။

ထိုအချိန်တွင် လေဝမ်တယ်က လျှောက်တင်လိုက်သည်။

“မင်းကြီး... လေရန်ကမ္ဘာက မင်းကြီးအတွက် နယ်မြေချဲ့ထွင်ပေးဖို့ ဆန္ဒရှိပါတယ်”

လုချန်း ထောက်ပံ့ထားသော ရုပ်သေးဧကရာဇ်တစ်ပါး ဖြစ်သည့်အလျောက် လေဝမ်တယ်က လုချန်းဘက်တွင် ခိုင်မာစွာ ရပ်တည်နေသည်။ လုချန်း၏ စကားတစ်ခွန်းဖြင့် လေရန်ကမ္ဘာရှိ အရာအားလုံးက သူ့အတွက် အမှုတော်ထမ်းကြမည် ဖြစ်သည်။

ထိုစဉ် နန်းကုန်းယွဲ့ဟွာကလည်း သူမ၏ ရပ်တည်ချက်ကို ရှင်းလင်းစွာ ပြောလိုက်သည်။

“ကျိရှောင်နိုင်ငံတော်က မင်းကြီးရဲ့ အမိန့်ကို နာခံပါတယ်။”

လေဝမ်တယ်နှင့် မတူပဲ နန်းကုန်းယွဲ့ဟွာသည် ကျိရှောင်နိုင်ငံတော်၏ ဧကရာဇ်တစ်ပါးသာ ဖြစ်ရာ ကျိယန်ကမ္ဘာတစ်ခုလုံးကို ကိုယ်စားမပြုနိုင်ပေ။

သို့သော် နန်းကုန်းယွဲ့ဟွာ ပြောပြီးနောက် နန်းကုန်းချင်ရကလည်း ပြောလိုက်သည်။

“နတ်မဟာမိတ်အဖွဲ့က မင်းကြီးရဲ့ အမိန့်ကို နာခံပါတယ်”

လုချန်းက ဆက်ပြောလိုက်သည်။

“လွန်ခဲ့တဲ့ နှစ်နှစ်အတွင်း ဖရိုဖရဲ ကြယ်ပင်လယ် ဝန်းကျင်က ကမ္ဘာတွေကို ကျွန်တော် လေ့လာကြည့်ခဲ့တယ်။ အများစုက ဥပဒေနိယာမ မပြည့်စုံတဲ့ အဆင့်နိမ့်ကမ္ဘာတွေ ဖြစ်ပြီး စွမ်းအားကြီးပုဂ္ဂိုလ်တွေ ရှိဖို့ မဖြစ်နိုင်ပါဘူး။ ဒါပေမဲ့ အခြေအနေတစ်ခုခု ဖြစ်လာခဲ့ရင် ပြင်ဆင်နိုင်အောင် စူးစမ်းလေ့လာဖို့ လူလွှတ်ဖို့ စီစဉ်ထားတယ်”

“အစည်းအဝေးကြီး ပြီးသွားရင် လေရန်နဲ့ ကျိယန်ကမ္ဘာက ကိုယ်စားလှယ်တွေ ကျွန်တော့်စာကြည့်ခန်းကို လာပြီး ကြယ်မြေပုံတွေကို လာကြည့်ကြပါ။ ပြီးရင် သက်ရှိကမ္ဘာတွေကို စူးစမ်းလေ့လာဖို့ ခင်ဗျားတို့ လူတွေလွှတ်ရမယ်။”

“နောက်ပြီး ဖရိုဖရဲ ကြယ်ပင်လယ်ထဲက အာကာသက လုံးဝမတည်ငြိမ်ဘူး။ အာကာသ မုန်တိုင်းတွေ မကြာခဏ ကြုံတွေ့ရတာကို ကျွန်တော် တွေ့ရှိခဲ့တယ်။ နောင်မှာ အာကာသ မုန်တိုင်းတွေကို ဘယ်အဖွဲ့အစည်းကပဲ တွေ့ရှိသည်ဖြစ်စေ ချက်ချင်း သတင်းပို့ရမယ်။”

အာကာသ မုန်တိုင်းများက ဖရိုဖရဲ ကြယ်ပင်လယ်အတွက် ကောင်းမွန်သော အရာမဟုတ်ပေ။ ရန်သူအချို့ကို အလွယ်တကူ ခေါ်ဆောင်လာနိုင်သည်။ အစောပိုင်းက ထျန်းချန်ကမ္ဘာ၏ မြူခိုးဒေသမှ လူများကို အာကာသ မုန်တိုင်းက ခေါ်ဆောင်လာခဲ့ခြင်း ဖြစ်သည်။

လုချန်းကို ဒုက္ခအပေးဆုံး အရာမှာ ထိုမုန်တိုင်းများ ဖြစ်သည်။ အကယ်၍ စွမ်းအားနိမ့်ပါးသော ကျင့်ကြံသူများကို ခေါ်ဆောင်လာလျှင် ကိုင်တွယ်ဖြေရှင်းနိုင်သော်လည်း သူ ကိုင်တွယ်မဖြေရှင်းနိုင်သော ပြဿနာများကို မုန်တိုင်းက ခေါ်ဆောင်လာမည်ကို သူ စိုးရိမ်မိသည်။

လက်ရှိတွင် အာကာသ မုန်တိုင်းနှင့် ပတ်သက်သော ပြဿနာများကို ဖြေရှင်းရန် သူ့၌ အင်အားမရှိသေးပေ။ ကြိုတင်ကာကွယ်မှုများကိုသာ အားဖြည့်နိုင်သည်။

အာကာသ မုန်တိုင်း ကိစ္စ ဆွေးနွေးပြီးနောက် နိုင်ငံတော် တည်ထောင်ခြင်းနှင့် ပတ်သက်သည့် ကိစ္စအဝဝကို လုချန်း ပြောကြားခဲ့သည်။ ကမ္ဘာသုံးခု ကျင့်ကြံသူများ အစည်းအဝေး ပြီးဆုံးသည်နှင့် ရှနိုင်ငံတော်က ကြေညာချက်တစ်စောင် ထုတ်ပြန်လိုက်ပြီး အင်ပါယာ တည်ထောင်ခြင်းအကြောင်း ကမ္ဘာသုံးခုလုံးကို အသိပေးလိုက်သည်။

အင်ပါယာ တည်ထောင်ခြင်းအကြောင်း ကြားသောအခါ သာမန်ပြည်သူများ၏ ပထမဆုံး တုံ့ပြန်မှုမှာ ဇဝေဇဝါ ဖြစ်ခြင်းပင်။

အများစုက အင်ပါယာတစ်ခု၏ သဘောသဘာဝကို နားမလည်ကြပေ။ သူတို့အတွက် အင်ပါယာနှင့် ကမ္ဘာတစ်ခုမှာ ကွာခြားပုံ မရချေ။

ကမ္ဘာတစ်ခု၏ အုပ်ချုပ်သူမှာ ဧကရာဇ်ဖြစ်ပြီး အင်ပါယာတစ်ခု၏ အုပ်ချုပ်သူမှာလည်း ကောင်းကင် ဧကရာဇ် ဖြစ်သည်။ စကားလုံးတစ်လုံးသာ ပြောင်းလဲသွားပုံရသည်။

သို့သော် အင်ပါယာတစ်ခု၏ အဓိပ္ပာယ်ကို နားလည်သူများကတော့ အလွန်တုန်လှုပ်သွားကြသည်။ ဖရိုဖရဲ ကြယ်ပင်လယ်ကဲ့သို့ နေရာမျိုးတွင် ဆွမ်ဧကရာဇ်က သတ္တိရှိစွာဖြင့် အင်ပါယာတစ်ခု တည်ထောင်ရဲသည်။

ဆွမ်ဧကရာဇ် အနည်းငယ် ယုံကြည်မှု လွန်ကဲနေသည်ဟု အားလုံးက ထင်မြင်သော်လည်း သူ၏ ကြောက်မက်ဖွယ် စွမ်းအားကြောင့် မည်သူမှ တစ်စုံတစ်ရာ မပြောရဲကြပေ။ အထူးသဖြင့် ဖရိုဖရဲ ကြယ်ပင်လယ်မှာ ဝေးလံခေါင်ဖျားသော နေရာတစ်ခု ဖြစ်နေသည့်အတွက် သူ အင်ပါယာ တည်ထောင်လိုလျှင်လည်း လုပ်ပါစေဟု သဘောထားလိုက်ကြသည်။

ဤကဲ့သို့သော အရိုင်းဆန်သည့် ကြယ်နယ်မြေတွင် အင်ပါယာတစ်ခု ဖွဲ့စည်းခြင်းကို မည်သူမှ သတိထားမိမည် မဟုတ်ပေ။

ပုံမှန်အားဖြင့် ကျင့်စဉ်အရင်းအမြစ်များ ပေါကြွယ်ဝသော ကြယ်နယ်မြေများတွင်သာ အင်ပါယာများကို တည်ထောင်လေ့ရှိသည်။ ထိုအခါမှသာ အင်ပါယာ၏ အင်အားက တောင့်တင်းခိုင်မာမည် ဖြစ်သည်။ ဤနေရာ၌ အင်ပါယာတစ်ခု တည်ထောင်ခြင်းမှာ ကလေးကစားစရာ သက်သက်သာ ဖြစ်သည်။

ကျင့်ကြံသူများ အစည်းအဝေး ပြီးနောက် ယွမ်ရှန်ရှန်၏ အဆောင်သို့ သွားရောက်ကာ သူမ၏ ကြင်နာယုယမှုများကို ခံယူရန် ရည်ရွယ်လျက် နဂါးနက်မြို့သို့ လုချန်း ပြန်လာခဲ့သည်။ သို့သော် ယွမ်ရှန်ရှန်၏ အဆောင်သို့ သွားရာလမ်းတွင် လျှိုချင်းချို၏ ဆောင်ကို လုချန်း ဖြတ်သန်းသွားမိသည်။

ထိုအချိန်တွင် အပြာရောင်ဝတ်စုံ ဝတ်ဆင်ထားသော လျှိုချင်းချိုသည် ရေကန်ထဲမှ ရွှေငါးများကို ငေးကြည့်ရင်း အတွေးထဲ နစ်မြောနေသည့်ပုံဖြင့် အဆောင်ငယ်ထဲတွင် ရပ်နေသည်။

လျှိုချင်းချို၏ ကိုယ်လုံးကိုယ်ပေါက်မှာ ကျော့ရှင်းပြီး သူမတစ်ကိုယ်လုံးမှ သိက္ခာရှိပြီး မြင့်မြတ်သော အငွေ့အသက်တစ်ခု ထွက်ပေါ်နေသည်။ သူမ၏ ပုံရိပ်ကို မြင်ရုံဖြင့် လုချန်း ချက်ချင်း စိတ်ဆန္ဒ ဖြစ်ပေါ်လာသည်။

လျှိုချင်းချို ဘာကြောင့် ငူငူငိုင်ငိုင် ဖြစ်နေသည်ကိုလည်း သူ သိချင်နေသည်။ သူမ၏ အမျိုးသား ဖြစ်သည့်အတွက် သူမ စိတ်ဓာတ်ကျနေသည်ကို မြင်သောအခါ သူ သဘာဝကျကျပင် နှစ်သိမ့်ပေးချင်မိသည်။

လုချန်း တုံ့ဆိုင်းခြင်းမရှိပဲ အဆောင်ငယ်ထဲသို့ ဝင်သွားသည်။ လျှိုချင်းချိုက သူ ရောက်လာသည်ကို ချက်ချင်း အာရုံခံမိပြီး လှည့်ကြည့်လိုက်သည်။

“မင်းကြီး... ဒီနေ့ အရေးကြီးကိစ္စတွေနဲ့ အလုပ်ရှုပ်မနေဘူးလား။ ဘာကိစ္စနဲ့ ဒီကို ရောက်လာတာလဲ။”

ယခုတွင် လျှိုချင်းချို၌ လုချန်းအပေါ် ခုခံလိုစိတ် မရှိတော့ပေ။ သူမကို အတင်းအဓမ္မ သိမ်းပိုက်ခဲ့သော်လည်း ယခုအချိန်၌ သူတို့သည် လက်ထပ်တာ ကြာပြီဖြစ်သော လင်မယားစုံတွဲနှင့် တူနေပြီ ဖြစ်သည်။ ထို့ပြင် လုချန်းက သူမအပေါ် ကောင်းမွန်စွာ ဆက်ဆံသဖြင့် သူမတွင် အငြိုးအတေး မရှိတော့ချေ။

လုချန်းက လျှိုချင်းချို၏ အနောက်သို့ လျှောက်သွားပြီး သူမ၏ ခါးကို သိုင်းဖက်ကာ ပူးကပ်လျက် ပြောလိုက်သည်။

“ဒီနေ့ မင်းနည်းနည်း စိတ်မပျော်မရွှင် ဖြစ်နေသလိုပဲ”

“ဘာဖြစ်လို့လဲ”

လုချန်း၏ မေးခွန်းကို ကြားသောအခါ လျှိုချင်းချို အနည်းငယ် အံ့အားသင့်သွားသည်။ ပုံမှန်အားဖြင့် လုချန်း ဤနေရာသို့ လာလျှင် သူမနှင့် ပျော်ပါးရန်အတွက်သာ လာခြင်း ဖြစ်သည်။ အခြားကိစ္စများကို သူ ဂရုစိုက်ခဲသည်။

သူမ စိတ်ဒုက္ခရောက်နေသည်ကို လုချန်း တစ်ချက်ကြည့်ရုံဖြင့် သတိထားမိလိမ့်မည်ဟု သူမ မထင်ထားပေ။

လျှိုချင်းချို ချက်ချင်း ပြန်မဖြေသည်ကို မြင်သောအခါ လုချန်းက မေးလိုက်သည်။

“မင်းနဲ့ မုယန်စီ စကားများပြန်ပြီလား”

ထျန်းချန်ကမ္ဘာတွင် သူမ၏ မဟာမိတ်ဟောင်း မုယန်စီတစ်ယောက်သာ လျှိုချင်းချိုကို ဒေါသထွက်အောင် လုပ်နိုင်သည်။

လုချန်း၏ နှိပ်စက်မှုကို တစ်ဖက်လူ အလူးအလဲ ခံနေရသည်ကို ကြည့်ရသည်မှာ နှစ်ယောက်လုံးအတွက် ပျော်စရာဖြစ်ပြီး ထိုကိစ္စနှင့် ပတ်သက်၍ အချင်းချင်း မကြာခဏ လှောင်ပြောင်လေ့ရှိကြသည်။

လုချန်းက ပြုံးပြီး ပြောလိုက်သည်။

“သူ တကယ်ပဲ မင်းကို ရန်စပြီး စိတ်ညစ်အောင် လုပ်တယ်ဆိုရင် ကိုယ် အခုချက်ချင်း သူ့ကို ဆင့်ခေါ်ပြီး မင်းရှေ့မှာတင် ပြင်းပြင်းထန်ထန် ဆုံးမလိုက်မယ်”

လုချန်း ဆိုလိုသည့် ဆုံးမခြင်းက မည်သည့်အရာဖြစ်ကြောင်း လျှိုချင်းချို ကောင်းကောင်း သိသည်။ သို့သော် ထိုအချိန်တွင် သူမ ပြောလိုက်သည်။

“မင်းကြီး... ဒီတစ်ခါ သူနဲ့ မဆိုင်ပါဘူး”

ထိုစကားကို ကြားသောအခါ လုချန်း အနည်းငယ် ကြောင်အသွားသည်။

မုယန်စီနှင့် မဆိုင်ဘူးဟုတ်လား။

လျှိုချင်းချိုကို ဤမျှ မှိုင်တွေသွားအောင် အခြား ဘာကိစ္စများ ရှိနိုင်မည်နည်း။ လျှိုချင်းချိုနှင့် သံယောဇဉ် အတိုင်းအတာတစ်ခုအထိ တည်ဆောက်ပြီးကတည်းက သူမ၏ မျက်နှာပေါ်တွင် ဤမျှ လေးလံသော အမူအရာမျိုး သူ တစ်ခါမှ မမြင်ဖူးပေ။

လုချန်း အရာတစ်ခုကို လျင်မြန်စွာ သဘောပေါက်လိုက်သည်။

သူက အကဲခတ်သည့်သဘောဖြင့် မေးလိုက်သည်။

“မင်းရဲ့ ပင်မခန္ဓာကိုယ်က မင်းကို ရှာတွေ့သွားတာလား”

လျှိုချင်းချိုသည် စွမ်းအားကြီး ပုဂ္ဂိုလ်တစ်ဦး၏ ကိုယ်ပွားတစ်ခုသာ ဖြစ်ကြောင်း လုချန်း သိထားသည်မှာ ကြာပြီဖြစ်သည်။ မုယန်စီကြောင့် မဟုတ်လျှင် သူမ၏ မူလခန္ဓာကိုယ်ကြောင့်သာ ဖြစ်နိုင်သည်။

အခုတလော သူမဆီ သူ မလာရောက်ဖြစ်တာကြောင့်တော့ မဖြစ်နိုင်ပေ။ ယွမ်ရှန်ရှန်ကဲ့သို့ပင် လျှိုချင်းချိုသည် ကျင့်စဉ်ကို အာရုံစိုက်သူ ဖြစ်ပြီး ယေဘုယျအားဖြင့် တစ်နှစ်လျှင် တစ်ကြိမ်သာ ကိုယ်လက်နှီးနှောရသည်ကို ကျေနပ်သူ ဖြစ်သည်။ သူ မရှိသောကြောင့် လျှိုချင်းချို ဤမျှ စိတ်မပျော်မရွှင် ဖြစ်နေသည်ဟု လုချန်း မယုံကြည်ပေ။