အခွင့်အရေးကောင်းကို စွန့်လွှတ်ချင်တာလား

လုချန်းသည် ဖေးဟုန် နတ်လှေ၏ နန်းဆောင်ခေါင်မိုးပေါ်တွင် ရပ်ကာ ချန်ရန်ကမ္ဘာတစ်ခုလုံးကို အပေါ်စီးမှ ကြည့်ရှုနေချိန် နတ်လှေသည် ချန်ရန်ကမ္ဘာ၏ အပြင်ဘက်တွင် တိတ်ဆိတ်စွာ ပျံဝဲနေသည်။

နန်းကုန်းယွဲ့ဟွာ၏ အစေခံက ချန်ရန်ကမ္ဘာ၏ အခြေအနေအကြောင်း လုချန်းကို ကြိုတင် အသိပေးပြီးဖြစ်သည်။ ဤကမ္ဘာသည် သတ္တုတွင်း အရင်းအမြစ် ကြွယ်ဝသောကြောင့် ကျင့်ကြံသူတိုင်းနီးပါး ဝိညာဉ်ဓားတစ်လက်စီ ပိုင်ဆိုင်ကြသည်။ ဓားကျင့်စဉ် လွှမ်းမိုးထားသော ကမ္ဘာတစ်ခု ဖြစ်သည်။

သို့သော် ဤကမ္ဘာရှိ ဝိညာဉ်ဓားများ၏ အဆင့်အတန်းက မမြင့်ပေ။

ဤအချိန်တွင် လုချန်းက နတ်လှေကို ချန်ရန်ကမ္ဘာထဲသို့ တိုက်ရိုက် မောင်းနှင်ဝင်ရောက်လိုက်သည်။ ဖေးဟုန် နတ်လှေ ဝင်ရောက်လာသည်နှင့် ချန်ရန်ကမ္ဘာ ချက်ချင်း တုန်ခါသွားပြီး ၎င်း၏ စိတ်ဝိညာဉ်စွမ်းအား မူမမှန်မှုများကို ပြသလာသည်။

ချန်ရန်ကမ္ဘာ၏ ကောင်းကင်ဘုံလမ်းစဉ် အသိစိတ်က ကြီးမားသော ခြိမ်းခြောက်မှုတစ်ခု ဝင်ရောက်လာသည်ကို ရှင်းလင်းစွာ အာရုံခံမိသောကြောင့် ဖြစ်သည်။

ကောင်းကင်ဘုံလမ်းစဉ် အသိစိတ်သည် မူလအစစွမ်းအားကို အထူးအာရုံခံစားလွယ်သည်။ စကြဝဠာ မူလအစစွမ်းအားတွင် ပိုမြင့်မားသော ဥပဒေနိယာမများ ပါဝင်နေသဖြင့် ကောင်းကင်ဘုံလမ်းစဉ် အသိစိတ်ကို ပြင်းထန်စွာ ဖိနှိပ်နိုင်သည်။

ချန်ရန်ကမ္ဘာ၏ ကောင်းကင်ဘုံလမ်းစဉ် အသိစိတ်တွင် ဖြစ်ပေါ်နေသော ကြောက်ရွံ့မှုကို လုချန်းလည်း ချက်ချင်း အာရုံခံလိုက်မိသည်။

လုချန်း မျက်လုံးများကို မှိတ်လိုက်ပြီးနောက် ချန်ရန်ကမ္ဘာ၏ ကောင်းကင်ဘုံလမ်းစဉ်ကို ပြောလိုက်သည်။

“ချန်ရန်ကမ္ဘာရဲ့ ကံစွမ်းအား တစ်ဝက်ကိုပဲ ကျုပ် လိုချင်တယ်။ နောက်ဆိုရင် ကံစွမ်းအားကို ဆက်ယူတော့မှာ မဟုတ်ဘူး။”

လုချန်း၏ စကားကို ကြားသောအခါ ချန်ရန်ကမ္ဘာ၏ ကောင်းကင်ဘုံလမ်းစဉ် အသိစိတ်သည် သူ့ထံသို့ ကံစွမ်းအား လွှဲပြောင်းပေးရန် တွန့်ဆုတ်ခြင်း မရှိပေ။

ဤလူသားကျင့်ကြံသူ လိမ်ညာခြင်း မဟုတ်ကြောင်း သူ သိမြင်နိုင်သည်။

သူ့ခန္ဓာကိုယ်အတွင်း ကံစွမ်းအား အဆက်မပြတ် တိုးပွားလာသည်ကို ခံစားရင်း လုချန်း၏ နှုတ်ခမ်းများ အနည်းငယ် ကွေးညွတ်သွားသည်။ ဤအရာက အခြားဇနီးသည်တစ်ဦးကို ရင်သွေးကမ္ဘာ ပဋိသန္ဓေယူစေရန် ကူညီပေးလိမ့်မည်။

ဤကမ္ဘာကို နန်းကုန်းယွဲ့ဟွာနှင့် နန်းကုန်းချင်ရတို့ အတူတကွ အောင်နိုင်ခဲ့ခြင်း ဖြစ်သည်။ ထို့ကြောင့် ရင်သွေးကမ္ဘာ မွေးဖွားခွင့် အခွင့်အရေးကို သူတို့နှစ်ဦးထဲမှ တစ်ဦးဦးအား ပေးအပ်ရန် လုချန်း စီစဉ်ထားသည်။

သို့သော် နှစ်ဦးစလုံးက အတူတူ ကြိုးပမ်းခဲ့ကြသော်လည်း နေရာတစ်ခုသာ ရှိနေသဖြင့် မည်သူ့ကို ပေးအပ်ရမည်နည်းဟု ဆုံးဖြတ်ရန် ခက်ခဲနေသည်။

ရင်သွေးကမ္ဘာ မွေးဖွားခွင့် အခွင့်အရေးကို မည်သူ့အား ပေးအပ်ရမည်နည်းဟု လုချန်း စဉ်းစားနေစဉ် နန်းကုန်းချင်ရနှင့် နန်းကုန်းယွဲ့ဟွာတို့ လုချန်းရှေ့၌ ပြိုင်တူ ပေါ်လာကြသည်။

အမျိုးသမီးနှစ်ဦးစလုံးက သူ့ကို တစ်ပြိုင်နက် ဂါရဝပြုလိုက်ကြသည်။

“ကောင်းကင် ဧကရာဇ်ကို ဂါရဝပြုပါတယ်။”

လုချန်း သတိပြန်ဝင်လာပြီး အမျိုးသမီးနှစ်ဦးကို ကြည့်လိုက်သည်။

“ထုံးစံတွေ ထားလိုက်ပါ”

“မင်းတို့ ပင်ပန်းနေကြပြီ”

နန်းကုန်းယွဲ့ဟွာက

“မင်းကြီး...ချန်ရန်ကမ္ဘာကို ဘယ်လို စီမံခန့်ခွဲဖို့ စီစဉ်ထားပါသလဲ။”

ချန်ရန်ကမ္ဘာတွင် အင်အားကြီးအဖွဲ့အစည်း အမြောက်အမြား ရှိသော်လည်း စုစည်းအုပ်ချုပ်မည့် အင်ပါယာ မရှိပေ။ ချန်ရန်ကမ္ဘာကို ထိန်းချုပ်လိုပါက ရှနိုင်ငံတော်၏ ကိုယ်စားလှယ်တစ်ဦး လိုအပ်မည် ဖြစ်သည်။

ချန်ရန်ကမ္ဘာသည် အဆင့်နိမ့်ကမ္ဘာတစ်ခု ဖြစ်သော်လည်း ဖရိုဖရဲ ကြယ်ပင်လယ်မှ ထွက်ခွာရာ လမ်းကြောင်းပေါ်တွင် တည်ရှိနေသည်။

နောင်အနာဂတ်တွင် လုချန်း နေရာရွှေ့ပြောင်းသည် ဖြစ်စေ ရှနိုင်ငံတော်က ပြင်ပသို့ နယ်မြေချဲ့ထွင်သည် ဖြစ်စေ ချန်ရန်ကမ္ဘာက ကြားစခန်းတစ်ခုအဖြစ် ဆောင်ရွက်နိုင်မည်။

ချန်ရန်ကမ္ဘာသည် ရှနိုင်ငံတော်အတွက် အသုံးဝင်သည်။

လုချန်း ခဏမျှ စဉ်းစားပြီးနောက်

“ချန်ရန်ကမ္ဘာကို ရှနိုင်ငံတော်က တိုက်ရိုက် စီမံခန့်ခွဲဖို့နဲ့ စစ်တပ်တစ်တပ် ချထားမယ်လို့ ကိုယ် စီစဉ်ထားတယ်။”

ချန်ရန်ကမ္ဘာသည် ဖရိုဖရဲ ကြယ်ပင်လယ်မှ ထွက်ခွာရာ လမ်းကြောင်းပေါ်တွင် ရှိနေသောကြောင့် ရှနိုင်ငံတော်၏ ဝင်ပေါက်တစ်ခု ဖြစ်နေသည်။ ဝင်ပေါက်တစ်ခု ဖြစ်သဖြင့်အရေးပါသော စစ်ရေးခံတပ်တစ်ခု စီစဉ်ထားရမည် ဖြစ်သည်။

ချန်ရန်ကမ္ဘာကို စီမံခန့်ခွဲရန် လုချန်း၌ အစီအစဉ် ရှိပြီးသား ဖြစ်ကြောင်း မြင်သောအခါ အမျိုးသမီးနှစ်ဦးလည်း ဆက်မမေးတော့ပေ။ သူတို့၏ တာဝန်မှာ လုချန်း နယ်မြေချဲ့ထွင်ရာတွင် ကူညီရန် ဖြစ်ပြီး အခြားကိစ္စရပ်များကိုတော့ လုချန်း၏ စီစဉ်မှုအတိုင်း လိုက်နာရုံသာ ဖြစ်သည်။

ထို့နောက် နန်းကုန်းယွဲ့ဟွာက

“မင်းကြီးမှာ အစီအစဉ်တွေ ရှိနေပြီဆိုတော့ မင်းကြီးကို ဆက်ပြီး မနှောင့်ယှက်တော့ပါဘူး။ နဂါးတပ်ဖွဲ့က တာဝန်လွှဲပြောင်းယူဖို့ ကိစ္စတွေကို ကျွန်မ ချက်ချင်း စီစဉ်လိုက်ပါ့မယ်။”

သူမ စကားဆုံးသည်နှင့် နန်းကုန်းယွဲ့ဟွာ ထွက်ခွာရန် ပြင်လိုက်သည်။ ထိုအချိန်၌ပင် လုချန်းက လှမ်းပြောလိုက်သည်။

“ယွဲ့ဟွာ... ခဏနေဦး။ ကိုယ် မင်းတို့နှစ်ယောက်နဲ့ ဆွေးနွေးစရာ ရှိသေးတယ်”

ထိုစကားကို ကြားသောအခါ နန်းကုန်းယွဲ့ဟွာ၏ ရင်ထဲအနည်းငယ် တုန်လှုပ်သွားသည်။

သူတို့ကို လုချန်း ဘာကြောင့် တွေ့ချင်သည်ကို ခန့်မှန်းနေစရာ မလိုပေ။

ဒီလူက ချန်ရန်ကမ္ဘာကို ရောက်ကာစပဲ ရှိသေးတယ်။

ချန်ရန်ကမ္ဘာရဲ့ အခြေအနေကို စစ်ဆေးမယ့်အစား ဒီလိုကိစ္စမျိုးအတွက် သူတို့နှစ်ယောက်ကို အရင်ဦးဆုံး လာရှာတယ်ဆိုတော့ တကယ့်ကို ဦးနှောက်မရှိတဲ့ ဧကရာဇ်နဲ့ ပိုတူလာပြီ။

နန်းကုန်းယွဲ့ဟွာစိတ်ထဲ လုချန်းအား ဦးနှောက်မရှိသော ဧကရာဇ်ဟု ကျိန်ဆဲနေသော်လည်း နှုတ်မှမူ

“ဟုတ်ကဲ့ပါ မင်းကြီး”

နန်းကုန်းချင်ရကတော့ နန်းကုန်းယွဲ့ဟွာကဲ့သို့ စိတ်ဆိုးခြင်း မရှိပေ။ မိစ္တာလမ်းစဉ်လိုက်ဖူးသော ကျင့်ကြံသူတစ်ဦး အနေနှင့် လုချန်း၏ ဆုချီးမြှင့်မှုကို သူမ မစောင့်နိုင်တော့ပေ။

ထို့နောက် အမျိုးသမီးနှစ်ဦး နတ်လှေပေါ်ရှိ လုချန်း၏ အိပ်ဆောင်သို့ လိုက်ပါသွားကြသည်။

ရွှေသား ကျောက်စိမ်းသားများဖြင့် တောက်ပနေသော အိပ်ဆောင် ခန်းမအလယ်တွင် အလျားနှင့် အနံ ဆယ်မီတာနီးပါး ရှိသော ကြီးမားသည့် ကုတင်ကြီးတစ်လုံး ရှိပြီး ကုတင်တစ်ခုလုံးကို ဖုံးအုပ်ထားနိုင်သည့် အနီရောင် ကုတင်လိုက်ကာကြီးကလည်း ခေါင်မိုးတန်းမှ တွဲလောင်းကျနေသည်။

ခန်းမထဲသို့ ဝင်ရောက်ပြီးနောက် နန်းကုန်းချင်ရက ကုတင်နားသို့ ချဉ်းကပ်ရန် တုံ့ဆိုင်းခြင်း မရှိသော်လည်း နန်းကုန်းယွဲ့ဟွာကမူ ကုတင်နှင့် မီတာအနည်းငယ် အကွာတွင် ရပ်လျက် အနားကပ်ရန် ဝန်လေးနေသည်။

လုချန်းက ချက်ချင်း လှုပ်ရှားခြင်း မပြုပဲ နန်းကုန်းယွဲ့ဟွာနှင့် နန်းကုန်းချင်ရကို နောက်တစ်ကြိမ် ကြည့်လိုက်သည်။

“ဒီရက်ပိုင်းအတွင်း ကိုယ် ကံစွမ်းအား အလုံအလောက် စုပ်ယူထားပြီးပြီ။ မင်းတို့နှစ်ယောက်ထဲက တစ်ယောက်ကို ရင်သွေးကမ္ဘာ မွေးမြူနိုင်အောင် ကူညီပေးလို့ရတယ်။ မင်းတို့ထဲက ဘယ်သူက ဒီရင်သွေးကမ္ဘာကို လိုချင်လဲ။”

ထိုစကားကို ကြားသောအခါ နန်းကုန်းယွဲ့ဟွာနှင့် နန်းကုန်းချင်ရ အနည်းငယ် အံ့အားသင့်သွားကြသည်။

ရင်သွေးကမ္ဘာ...

အဲဒါ ဘာကြီးလဲ။

ထျန်းချန်ကမ္ဘာရှိ လုချန်း၏ ဇနီးများလို မဟုတ်ပဲ နန်းကုန်းယွဲ့ဟွာနှင့် နန်းကုန်းချင်ရတို့သည် ကျိယန်ကမ္ဘာ၌သာ အချိန်အများစု ကုန်ဆုံးလေ့ ရှိသဖြင့် လုချန်း၏ ကိစ္စများကို သိပ်မသိကြသလို ရင်သွေးကမ္ဘာအကြောင်းကိုလည်း ကြားဖူးနားဝ မရှိကြပေ။

နန်းကုန်းချင်ရက

“မင်းကြီး ပြောတဲ့ ရင်သွေးကမ္ဘာဆိုတာ ပြန်လည်ပျက်စီးခြင်းအဆင့် ကျင့်ကြံသူတွေ ဖွင့်လှစ်နိုင်တဲ့ ကမ္ဘာငယ်လေးနဲ့ တူတူပဲလား။”

ကျင့်ကြံသူများ ပြန်လည်ပျက်စီးခြင်းအဆင့်သို့ ရောက်ရှိသည်နှင့် ကမ္ဘာငယ်တစ်ခု ဖွင့်လှစ်နိုင်ကြသည်။

လုချန်းက

“ဆင်တူတဲ့ အချက်တွေ ရှိပေမယ့် ကွဲပြားတာတွေလည်း ရှိတယ်။”

“ကိုယ်တို့ အတူတူ မွေးမြူမယ့် ရင်သွေးကမ္ဘာက သူ့အလိုလို သက်ရှိတွေကို မွေးဖွားပေးနိုင်ပြီး မွေးဖွားလာတဲ့ သက်ရှိတွေက ထုတ်လွှတ်တဲ့ ကံစွမ်းအားကို ကိုယ်တို့ စုပ်ယူနိုင်တယ်။ အရေးအကြီးဆုံးက ရင်သွေးကမ္ဘာက မူလအစစွမ်းအားကို ထုတ်ပေးနိုင်တယ်။”

“မူလအစစွမ်းအားနဲ့ဆိုရင် ကျင့်စဉ်အဆင့် တိုးတက်မှုက ပိုမြန်လိမ့်မယ်။”

ထိုစကားကို ကြားသောအခါ နန်းကုန်းယွဲ့ဟွာ အနည်းငယ် စိတ်လှုပ်ရှားသွားသည်။ ရင်သွေးကမ္ဘာအကြောင်း နားမလည်သော်လည်း ကျင့်ကြံသူများ၏ ကျင့်စဉ်အတွက် အထောက်အကူ ပြုနိုင်သည်ဟု ကြားလိုက်ရသဖြင့် သူမ ချက်ချင်း စိတ်ဝင်စားသွားသည်။

ရင်သွေးကမ္ဘာတစ်ခု မွေးမြူနိုင်လျှင် သူမ၏ ကျင့်စဉ်အဆင့် ပိုမိုလျင်မြန်စွာ မြင့်တက်လာမည် မဟုတ်ပါလား။

သို့သော် တစ်ယောက်အတွက်သာ ကံစွမ်းအားရှိသည်...

ထိုအတွေးနှင့်အတူ သူမ၏ မျက်လုံးထောင့်မှနေ၍ နန်းကုန်းချင်ရကို လှမ်းကြည့်လိုက်သည်။

သူမနှင့် ယှဉ်လျှင် နန်းကုန်းချင်ရကို လုချန်း ပိုယုံကြည်ကြောင်း သူမ သိသည်။ နန်းကုန်းချင်ရ၏ မူလသွေးအနှစ်က လုချန်း၏ လက်ထဲတွင် ရှိနေ၏။ သူမသည် လုချန်း၏ လူအပြည့်အဝ ဖြစ်နေပြီ ဖြစ်သည်။

ရင်သွေးကမ္ဘာ မွေးမြူရန် လုချန်း ကူညီပေးမည်ဆိုပါက သူမကို မရွေးချယ်ပဲ နန်းကုန်းချင်ရကိုသာ ရွေးချယ်ဖွယ် ရှိသည်။

နန်းကုန်းယွဲ့ဟွာ ထိုသို့ တွေးနေစဉ် နန်းကုန်းချင်ရက

“မင်းကြီး... ဒီတစ်ခါ အခွင့်အရေးကို ကျွန်မအစ်မကို ပေးလိုက်ပါ။”

နန်းကုန်းချင်ရက ဤအခွင့်အရေးကို သူမသဘောဆန္ဒအလျောက် လက်လွှတ်လိုက်သည်ကို မြင်သောအခါ နန်းကုန်းယွဲ့ဟွာ ခဏခန့် ကြောင်အသွားသည်။ နန်းကုန်းချင်ရ ဤမျှ ရက်ရောလိမ့်မည်ဟု သူမ မထင်ထားခဲ့ပေ။

မဟုတ်သေးဘူး...

မကောင်းတဲ့ ဘေးထွက်ဆိုးကျိုး တစ်ခုခု ရှိမှာကြောက်လို့ ငါ့ကို ဒီအခွင့်အရေး ပေးလိုက်တာ နေမှာ။

လုချန်းက နန်းကုန်းယွဲ့ဟွာကို ကြည့်ပြီးနောက် ပြုံးလျက် မေးလိုက်သည်။

“ယွဲ့ဟွာ... မင်း ဒီအခွင့်အရေးကို လိုချင်သလား”

နန်းကုန်းယွဲ့ဟွာက မေးခွန်းပြန်ထုတ်လိုက်သည်။

“ရင်သွေးကမ္ဘာ မွေးမြူတာက ဘေးထွက်ဆိုးကျိုး တစ်စုံတစ်ရာ ရှိပါလား။”

လုချန်းက

“ဘေးထွက်ဆိုးကျိုး မရှိပါဘူး။ ဘေးထွက်ဆိုးကျိုး မရှိတဲ့အပြင် ကမ္ဘာငယ်တစ်ခုကို ကြိုတင်ပိုင်ဆိုင်ထားရသလိုပါပဲ။”

“ နောက်ပြီး ကိုယ့်ရဲ့ ဇနီးမယားအားလုံးကို ရင်သွေးကမ္ဘာ မွေးမြူနိုင်အောင် ကူညီပေးမှာပါ။ အခုလောလောဆယ် ကံစွမ်းအား မလုံလောက်သေးလို့ပါ။”

နန်းကုန်းယွဲ့ဟွာက နန်းကုန်းချင်ရကို တစ်ဖန် ပြန်ကြည့်လိုက်သည်။

“နင်က ဒီလိုအခွင့်အရေးကို ငါ့အတွက် စွန့်လွှတ်ချင်တယ်ပေါ့။”