မဟာအောင်မြင်မှု ပြီးပြည့်စုံခြင်း၊ အဆင့် (၉) အစီအရင် ပညာရှင်။

ဝိညာဉ်စိုက်ခင်းဂူ အတွင်း၌ ဝိညာဉ်အရည်များ ပေါများကြွယ်ဝနေပြီး စုရှင်းသည် ပုံမှန်အတိုင်း အနှစ်သာရ အားဖြည့်ဆေးများနှင့် အခြားဆေးများကို ၎င်းအား တိုက်ကျွေးနေခဲ့သည်။

သည်အချက်က ရုပ်သေးကျင့်ကြံသူ ရှောင်မေ၏ ကျင့်ကြံခြင်းအဆင့် တိုးတက်နှုန်းကို ထိုစဉ်က စုရှင်းထက်ပင် များစွာ သာလွန်မြန်ဆန်စေခဲ့သည်။

စုရှင်း ခန့်မှန်းကြည့်ရသလောက် ဤနှုန်းထားအတိုင်းသာဆိုလျှင် ရှောင်မေသည် အလွန်ဆုံး နှစ်ဝက်အတွင်း၌ပင် သန္ဓေတည် ဝိညာဉ်အဆင့်သို့ ချိုးဖျက်ဝင်ရောက်နိုင်လိမ့်မည် ဖြစ်သည်။

"ကျွတ်... ကျွတ်... ရုပ်သေးရုပ်တစ်ရုပ်က ငါ့တုန်းကထက်တောင် အခြေအနေ ပိုကောင်းနေသေးတယ်...ထိပ်တန်း ဝိညာဉ်သွေးကြောနီးပါးလောက် ကျင့်ကြံနှုန်းမြန်နေမှတော့ ကိုးပတ်လည် ရွှေအမြုတေနဲ့ အဆင့်မြင့် သန္ဓေတည်ဝိညာဉ်ကို စုစည်းဖို့ဆိုတာ မခက်ခဲလောက်ပါဘူး..."

စုရှင်း စိတ်ထဲမှ သက်ပြင်းမချဘဲ မနေနိုင်တော့ပေ။

ရုပ်သေးကျင့်ကြံသူ ရှောင်မေအတွက် အသေးစား ဝိညာဉ်စုဆောင်းခြင်း အစီအရင်တစ်ခု ခင်းကျင်းပေးပြီးနောက် စုရှင်းသည် နာရီအနည်းငယ်မျှ အနားယူလိုက်ပြီး သူ့အတွက် အဆင့် (၇) အသေးစား ဝိညာဉ်စုဆောင်းခြင်း အစီအရင်ကို စတင်ခင်းကျင်းလေတော့သည်။

နာရီအနည်းငယ် ကြာပြီးနောက်…

စုရှင်းသည် သူ၏ နားထင်ကြောများကို ဖိနှိပ်ရင်း နှုတ်ခမ်းထောင့်တွင် အပြုံးတစ်ခု ဖြစ်ပေါ်လာသည်။

"အဆင့် (၇) အသေးစား ဝိညာဉ်စုဆောင်းခြင်း အစီအရင်၊ ပြီးသွားပြီ"

"ငါ့ရဲ့ ကျင့်ကြံနှုန်းက အရင်ကထက် ၆၀ ရာခိုင်နှုန်း ပိုမြန်လာပြီပဲ"

စုရှင်း ကျေနပ်စွာ ခေါင်းညိတ်လိုက်သည်။ သို့သော်လည်း အသေးစား ဝိညာဉ်စုဆောင်းခြင်း အစီအရင်ကို ခင်းကျင်းနေစဉ် ပြဿနာတစ်ခုကို ရှာတွေ့သွားခဲ့သည်။

နတ်အာရုံ မလုံလောက်ခြင်းပင်။

သူ၏ အသေးစားအဆင့် နတ်အာရုံမှာ နတ်ဘုရား အသွင်ပြောင်းခြင်းအဆင့်၌ အကြွင်းမဲ့ ဖိနှိပ်နိုင်စွမ်း ရှိခဲ့သည်။

သို့သော် ယခု မဟာယာနအဆင့်သို့ ရောက်ရှိလာချိန်တွင် ပေပေါင်း နှစ်သောင်းခန့် ဖြန့်ကျက်နိုင်သော စုရှင်း၏ နတ်အာရုံမှာ သာမန်အဆင့်သာ ဖြစ်နေချေပြီ။ အဆင့် (၇) အသေးစား ဝိညာဉ်စုဆောင်းခြင်း အစီအရင်ကို ခင်းကျင်းရာ၌ပင် အနည်းငယ် ခက်ခဲနေခဲ့သည်။

"ကြည့်ရတာ... ငါ့ရဲ့ နတ်အာရုံကို မြှင့်တင်ဖို့ အချိန်တန်ပြီပဲ။"

စုရှင်း ရေရွတ်လိုက်မိသည်။ နတ်အာရုံဟူသည် ကျင့်ကြံခြင်း စွမ်းအား၏ မရှိမဖြစ် လိုအပ်သော အစိတ်အပိုင်းတစ်ခု ဖြစ်ပေသည်။

စုရှင်းအတွက်မူ စွမ်းအားကြီးမားသော နတ်အာရုံက ဆေးဖော်ခြင်း၊ လက်နက်သွန်းလုပ်ခြင်း၊ အဆောင်လက်ဖွဲ့ ရေးဆွဲခြင်းနှင့် အစီအရင် ခင်းကျင်းခြင်းတို့၌ အားသာချက်များကို ပေးစွမ်းနိုင်လေသည်။

"ပြီးတော့ ငါစေလွှတ်ထားတဲ့ ရုပ်သေးတွေ... အကယ်၍သာ ငါ့ရဲ့ နတ်အာရုံက ရှားတိုင်းပြည် တစ်ခုလုံးကို လွှမ်းခြုံနိုင်လောက်အောင် စွမ်းအားကြီးမယ်ဆိုရင် အဲဒီအချိန်ကျရင် မမျှော်လင့်ထားတဲ့ ကိစ္စတွေ ဖြစ်လာမှာကို ပူပန်နေစရာတောင် လိုတော့မှာ မဟုတ်ဘူး။"

စုရှင်း ဆုံးဖြတ်ချက်တစ်ခု ချလိုက်သည်။

လာမည့် သရုပ်ပြခြင်းများတွင် နတ်အာရုံကို ဦးစားပေး မြှင့်တင်ရပေမည်။

လက်ရှိ လိုအပ်ချက်အပြင် နတ်အာရုံကို မြှင့်တင်ရမည့် နောက်ထပ် ခိုင်လုံသော အကြောင်းပြချက် တစ်ခုလည်း ရှိနေသေးသည်။

ကပ်ဘေးကျော်ဖြတ်ခြင်း စမ်းသပ်မှုကြီး ငါးခုအနက် တစ်ခုမှာ နတ်အာရုံ စမ်းသပ်ခြင်း ဟူ၍ ပါဝင်လေသည်။

ကပ်ဘေးကျော်ဖြတ်စဉ်အတွင်း စိန်ခေါ်မှုများကို ကျော်လွှားနိုင်ရန် အတွက် စုရှင်း၏ နတ်အာရုံမှာ လုံလောက်သော စွမ်းအားရှိနေရန် လိုအပ်ပေသည်။

…

ခေတ္တမျှ အနားယူပြီးနောက် စုရှင်းသည် ဝိညာဉ်စိုက်ခင်းဂူ အတွင်းရှိ အစီအရင်များကို စတင် ပြုပြင်မွမ်းမံလေသည်။

မူလ အဆင့် (၇) ဝိညာဉ်စုဆောင်းခြင်း အစီအရင်ကို စုရှင်းက အဆင့် (၉) ဝိညာဉ်စုဆောင်းခြင်း အစီအရင်အဖြစ် ပြောင်းလဲလိုက်သည်။

နှစ်ခုစလုံးမှာ အလယ်အလတ်အဆင့် ပေါင်းစပ် ဝိညာဉ်စုဆောင်းခြင်း အစီအရင်များ ဖြစ်ကြသော်လည်း ဝိညာဉ်စွမ်းအင် စုဆောင်းနိုင်စွမ်းမှာမူ များစွာ တိုးတက်သွားခဲ့သည်။

ဆိုလိုသည်မှာ ဝိညာဉ်စိုက်ခင်းဂူအတွင်း ဝိညာဉ်အရည်များ သိုလှောင်နိုင်မှု နှုန်းထားသည်လည်း အနည်းငယ် တိုးလာမည် ဖြစ်သည်။

ဝိညာဉ်စုဆောင်းခြင်း အစီအရင်ကို ပြုပြင်မွမ်းမံခြင်းအပြင် စုရှင်းသည် ကောင်းကင်လျှို့ဝှက်ချက်များကို ဖုံးကွယ်နိုင်စွမ်း သိသိသာသာ တိုးတက်လာစေရန် အတွက် ဖုံးကွယ်ခြင်း အစီအရင်ကို ရွှမ်ယွမ် ဖုံးကွယ်ခြင်း အစီအရင်သို့ အဆင့်မြှင့်လိုက်သည်။

ထို့အပြင် စုရှင်းသည် မီးစွမ်းအင် စုဆောင်းမှု အစီအရင်နှင့် မီးဓာတ်ပြု အစီအရင် ကဲ့သို့သော မီးစွမ်းအင်သုံး အစီအရင် အများအပြားကိုလည်း သူ၏ ဆေးဖော်သည့်နေရာတွင် ခင်းကျင်းလိုက်သည်။

ဤအရာများက မီးတောက်ကို ပိုမိုတည်ငြိမ်စေပြီး စွမ်းအားအနည်းငယ် ပိုလာစေကာ ဆေးဖော်ခြင်းနှင့် လက်နက်သွန်းလုပ်ခြင်း လုပ်ငန်းစဉ်များ၏ စွမ်းဆောင်ရည်ကို တိုးတက်စေသည်။

နောက်ဆုံးတွင် စုရှင်းသည် ဝိညာဉ်အရည်များ စုဆောင်းရာတွင် အသုံးပြုသည့် ရေစုဆောင်းမှု အစီအရင်ကိုလည်း မေ့လျော့မနေခဲ့ပေ။

ထပ်မံ မွမ်းမံမှုများ ပြုလုပ်ပြီးနောက် ရေစုဆောင်းမှု အစီအရင်၏ စွမ်းဆောင်ရည်မှာ မြင့်တက်လာပြီး ဝိညာဉ်အရည် ဖွဲ့စည်းစဉ် ဆုံးရှုံးမှုနှုန်းမှာလည်း လျော့ကျသွားသည်။

စုရှင်းသည် ရေခွဲအစီအရင် တစ်ခုကိုပင် အထူးတလည် ခင်းကျင်းကာ တဲအိမ်ရှေ့ရှိ ဝိညာဉ်ရေတွင်းနှင့် ချိတ်ဆက်လိုက်သည်။

ထို့ကြောင့် စမ်းရေတွင် ပါဝင်သော ဝိညာဉ်စွမ်းအင် ပမာဏမှာ ပိုမိုမြင့်တက်လာပြီး ရေအရသာမှာလည်း ချိုမြိန်ကာ သောက်သုံး၍ ကောင်းလာလေသည်။

ထိုအရာများ ပြီးစီးသွားချိန်တွင် သူ၏ ဒါဇင်နှင့်ချီသော ဆေးဖော်ရုပ်သေးများကို စတင်မွမ်းမံလေတော့သည်။

အဆာခံဆေးလုံးများ ဖော်စပ်ခြင်းအပြင် စုရှင်းသည် ၎င်းတို့တွင် လုပ်ဆောင်ချက် အသစ်များကို ထည့်သွင်းလိုက်သည်။ မျက်နှာအာဟာရပြုဆေး ဖော်စပ်ခြင်း။

ရှေ့ဖြစ်ဟော အသင်း၏ အနာဂတ် ပင်လယ်ရပ်ခြား ဈေးကွက်ချဲ့ထွင်မှုကို ထည့်သွင်းစဉ်းစားပါက မျက်နှာအာဟာရပြုဆေးသည် အရေးပါသော ထုတ်ကုန်တစ်ခု ဖြစ်လာမည်မှာ မလွဲဧကန်ပင်။

ထို့အပြင် ဤအဆင့်နိမ့် ဆေးလုံးများကို ဆေးဖော်ရုပ်သေးများက လွယ်ကူစွာ ဖော်စပ်နိုင်ပေသည်။

စုရှင်းသည် ဝိညာဉ်စိုက်ခင်းဂူအတွင်း၌ အရာရာကို စေ့စပ်သေချာစွာ စီစဉ်လိုက်သည်။ ထိုအချိန်တွင် လေးရက်ခန့် ကုန်ဆုံးသွားပြီ ဖြစ်သည်။

သုံးရက်အောက်သာ လိုတော့သည့်အချိန်တွင် စုရှင်းသည် အချိန်ဖြုန်းမနေဘဲ ရှားပါးသတ္တုကြောတစ်ခုရှိရာသို့ သွားရောက်ကာ အဆင့် (၄) အထူးသတ္တု ကုဗမီတာ နှစ်ထောင်ခန့်ကို တူးဖော်ရယူခဲ့သည်။

သန့်စင်ပြီးနောက် ဤရှားပါးသတ္တုများက စုရှင်းအား သရုပ်ပြစွမ်းအင် ဘီလီယံ ၂၀ နီးပါး ပေးစွမ်းနိုင်မည် ဖြစ်သည်။

…

အချိန်များ လျင်မြန်စွာ ကုန်ဆုံးသွားပြီး ၂၀၂၅ ခုနှစ်၊ ဧပြီလ ၂၁ ရက်နေ့သို့ ရောက်ရှိလာခဲ့သည်။ စုရှင်းသည် နတ်ဘုရားစစ်သည်ခေတ် အကျဉ်းခန်းမှ ထွက်ခွာလာပြီး ချိန်းဆိုထားသည့်အတိုင်း ကျင်းချုံးရွှယ်နှင့် တွေ့ဆုံရန် ဗီလာသို့ သွားရောက်ခဲ့သည်။

ဒီနေ့တွင် ကျင်းချုံးရွှယ်မှာ ဆွဲဆောင်မှုရှိသော အနက်ရောင် ဝမ်းဆက်ဂါဝန်ကို ဝတ်ဆင်ထားသဖြင့် စုရှင်းကို ရင်ခုန်သွားစေသည်။

"ဒီမှာ ဒီတစ်ပတ်စာ ရှားပါးသတ္တုတွေနဲ့ ကုန်ပစ္စည်းတွေ..."

ကျင်းချုံးရွှယ်က သိုလှောင်လက်စွပ်အချို့ကို ကမ်းပေးလိုက်သည်။

စုရှင်း ခေါင်းညိတ်လိုက်ပြီး ကျင်းချုံးရွှယ်အား လွန်ခဲ့သည့် ရက်သတ္တပတ် အနည်းငယ်က စုဆောင်းထားသော အဆာခံဆေးလုံးများနှင့် အသစ်တူးဖော်ထားသော ရှားပါးသတ္တုရိုင်းများကို ပေးအပ်လိုက်သည်။

"ဟုတ်သားပဲ... ပြီးတော့ ဒီမှာ ငါ အရင်က စုဆောင်းထားတဲ့ မျက်နှာအာဟာရပြုဆေးတွေရောပဲ။ မင်း ပင်လယ်ရပ်ခြားကို ဈေးကွက်ချဲ့ထွင်တော့မယ် မဟုတ်လား။ ဒီလောက်ဆိုရင် လောလောဆယ်တော့ လုံလောက်မယ် ထင်ပါတယ်..."

စုရှင်းက မျက်မှာအာဟာရပြုဆေး ထောင်ပေါင်းများစွာကို လွှဲပြောင်းပေးလိုက်သည်။

ကျင်းချုံးရွှယ်သည် အနည်းငယ် ခေါင်းညိတ်ကာ ပြောလိုက်သည်။

"နောက်ရက်အနည်းငယ်အတွင်း အမေရိကကို ကျွန်မ ကိုယ်တိုင် သွားတော့မှာပါ... အဲဒီမှာ မျက်နှာအာဟာရပြုဆေးတွေက သေချာပေါက် လူကြိုက်များလာလိမ့်မယ်"

စုရှင်း ခေါင်းညိတ်ကာ ပြောလိုက်သည်။ "အင်း။ ပြီးတော့ ပင်လယ်ရပ်ခြားက ထူးခြားတဲ့ ပစ္စည်းတချို့ရှိရင်လည်း ငါကြည့်ရအောင် ပြန်သယ်လာပေးပါဦး..."

စုရှင်းက ပေါ့ပေါ့ပါးပါး ပြောလိုက်ရာ ကျင်းချုံးရွှယ်က ခေါင်းညိတ်၍ တုံ့ပြန်လိုက်သည်။

စုရှင်းတွင် တည်ငြိမ်သော စွမ်းအင်အရင်းအမြစ် ရှိနေပြီ ဖြစ်သော်လည်း၊ အခြားနိုင်ငံများရှိ အကျဉ်းခန်းများတွင် သူ မသိသေးသော၊ စွမ်းအင်အမြောက်အမြား ပေးစွမ်းနိုင်သည့် ပစ္စည်းများ ရှိကောင်း ရှိနေနိုင်ပေသည်။

…

ကျင်းချုံးရွှယ်ကို နှုတ်ဆက်ပြီးနောက် စုရှင်းသည် ဝိညာဉ်စိုက်ခင်းဂူသို့ ပြန်လာပြီး သရုပ်ပြခြင်း အသစ်တစ်ကျော့ကို စတင်ရန် ပြင်ဆင်လိုက်သည်။

ဤတစ်ပတ် ကျင်းချုံးရွှယ်ဆီမှ ရသော ကုန်ပစ္စည်းများနှင့် ရှားပါးသတ္တုများက စုရှင်းအား စွမ်းအင် ၄၅ ဘီလီယံနီးပါး ရရှိစေခဲ့ပြီး လုယွမ်ဝူ ပေးသော စွမ်းအင် ၄၀ ဘီလီယံနှင့် ပေါင်းလိုက်လျှင်…

စုရှင်း၏ စုစုပေါင်းစွမ်းအင်မှာ ၁၆၅ ဘီလီယံနီးပါး ရောက်ရှိသွားပြီ ဖြစ်သည်။

"သရုပ်ပြခြင်းကို စတင်မယ်။"

[ဒင်၊ ဤသရုပ်ပြခြင်းသည် စွမ်းအင်အမှတ် ၈၄၀၀ ကုန်ကျပါမည်။ လက်ကျန်စွမ်းအင် - ၁၆.၅၁၀၃၃ ဘီလီယံ၊ လက်ကျန် သရုပ်ပြနိုင်သည့် အကြိမ်အရေအတွက် - အကန့်အသတ်မရှိ။]

[သရုပ်ပြခြင်း စတင်ပါပြီ။]

[ခရမ်းရောင် စွမ်းရည်ကို ရယူရန် စွမ်းအင်အမှတ် ၁ သိန်း ကုန်ကျပါမည်၊ ရွှေရောင် ဒဏ္ဍာရီလာ စွမ်းရည်ကို ရယူရန် စွမ်းအင်အမှတ် ၁ သန်း ကုန်ကျပါမည်။ သင် ရယူလိုပါသလား။]