ပုံမှန်မဟုတ်တဲ့ ဧည့်သည်

"ဘုန်း"

ယန်ကျန့်က လမ်းဘေးက ဆိုင်သေးသေးလေးထဲ ပြန်ရောက်လာပြီး မီးပုံဘေးမှာ ထိုင်နေတဲ့ ချောင်ယန်ရှေ့ကို အလောင်းထည့်အိတ် ပစ်ချလိုက်သည်။

ချောင်ယန် အံ့သြဝမ်းသာ ဖြစ်သွားပြီး ပြောလိုက်သည်။

"ဒီလောက် မြန်မြန် ဖြေရှင်းပြီးပြီလား"

သူ အလောင်းထည့်အိတ်ကို စိုက်ကြည့်နေသည်။ အထဲမှာ ဘာရှိလဲ ဆိုတာ အာရုံခံစားလို့ မရပေမယ့် သေချာပေါက် အလောင်းကောင် တစ်ခု ရှိနေမှာပါ။

"အရမ်း မဝမ်းသာနဲ့ဦး ဒီက အခြေအနေက ရှုပ်ထွေးတယ် ငါ နှစ်ခါ ကိုင်တွယ်ပြီးပြီ ဒါပေမဲ့ တစ္ဆေတွေက ရှိနေတုန်းပဲ ဒီလို အခြေအနေမျိုး ငါ ပထမဆုံး ကြုံဖူးတာပဲ"

ယန်ကျန့်က မကြာသေးမီက ဖြစ်ပျက်ခဲ့တာတွေကို အကျဉ်းချုပ် ပြောပြလိုက်သည်။

နားထောင်ပြီးနောက် ချောင်ယန် သံသယ ဝင်သွားသည်။

"သတ်ဖြတ်မှု စည်းမျဉ်းက 'တစ္ဆေ' လို့ မပြောရဘူးတဲ့လား အံ့သြစရာ မရှိပါဘူး ဒီသဘာဝလွန် ဖြစ်ရပ်ကို 'တိတ်ဆိတ်ခြင်း' လို့ နာမည်ပေးထားတာကိုး တိတ်တိတ်နေပြီး စကားမပြောသရွေ့ မတော်တဆ ပြောမိမှာကို ကာကွယ်နိုင်တယ် ဆိုတဲ့ သဘောပေါ့"

"ဒါပေမဲ့ သတ်ဖြတ်မှု စည်းမျဉ်းကို သိရင်တောင် တစ္ဆေတွေကို ကိုင်တွယ်လို့ မရဘူး ငါ့ရဲ့ အရင် အတွေ့အကြုံတွေလည်း အလားတူပဲ တစ္ဆေကို အောင်မြင်စွာ ဖမ်းချုပ်နိုင်ခဲ့တယ်လို့ ထင်ရပေမယ့် နောက်ဆုံးကျတော့ ထွက်ပြေးလွတ်မြောက်သွားတာပဲ အခု ပြန်စဉ်းစားကြည့်တော့ ငါ ကျရှုံးခဲ့တာ မဟုတ်ဘဲ ဘယ်တုန်းကမှ မအောင်မြင်ခဲ့တာ ဖြစ်မယ်"

"အခု အခြေအနေက ခက်ခဲသွားပြီ မင်းပြောတဲ့ အတိုင်းဆိုရင် ဒီက တစ္ဆေတွေကို ကိုင်တွယ်ဖို့ မဖြစ်နိုင်ဘူး ဒီမြို့နယ်ထဲကို ရောက်လာတဲ့ ဘယ်သူမဆို သော့ချက် စကားလုံးကို ပြောမိတာနဲ့ တစ္ဆေ ပေါ်လာလိမ့်မယ် ဘယ်နှခါပဲ ရှင်းရှင်း အလကားပဲ"

သူ ခေါင်းကိုက်သွားသည်။

အစတုန်းက ဒီသဘာဝလွန် ဖြစ်ရပ်ရဲ့ အန္တရာယ် အဆင့်က မမြင့်ဘူး၊ အလွယ်တကူ ဖြေရှင်းလို့ ရမယ်လို့ ထင်ထားတာ။ ကြောက်စရာ မကောင်းဘူးလို့ ထင်ရတဲ့ ဖြစ်ရပ်က အရှုပ်ထွေးဆုံး ဖြစ်နေလိမ့်မယ်လို့ ဘယ်သူ ထင်မှာလဲ။

"နည်းလမ်းတော့ ရှိပါတယ် ငါ မစဉ်းစားမိသေးတာပါ ပြီးတော့ ငါတို့မှာ အချိန်ဖြုန်းနေစရာ အဖြစ်အပျက်တွေ အများကြီး မရှိပါဘူး ဒါကြောင့် ဒီသဘာဝလွန် ဖြစ်ရပ်ကို လောလောဆယ် လက်လျှော့လိုက်တာ အကောင်းဆုံးပဲ ဖြစ်မယ် ဒါမှမဟုတ် ငါတို့ နှစ်ယောက် ပေါင်းပြီး နောက်ထပ် တစ္ဆေတစ်ကောင်ကို ကိုင်တွယ်ကြတာပေါ့ အဲဒါမှ မင်းလည်း တခြား တစ္ဆေအကြမ်းစားရဲ့ တိုက်ခိုက်တာ မခံရမှာ"

ယန်ကျန့် နောက်ထပ် ရွေးချယ်စရာ တစ်ခု အကြံပြုလိုက်သည်။

ချောင်ယန်က ပြောလိုက်သည်။

"အဲဒီ တစ္ဆေက အရမ်း ကြမ်းတယ် အခု လောလောဆယ် ငါ့နောက် လိုက်နေရုံပဲ ရှိသေးတယ် တိုက်ခိုက်တာ မစသေးဘူး တကယ်လို့ မျှခြေ တစ်ခုခု ပျက်သွားရင် ကပ်ဘေး အကြီးကြီး ဖြစ်သွားနိုင်တယ် ငါ အဲဒီလို မလုပ်ချင်ဘူး"

"ဘယ်လို တစ္ဆေမို့လို့ မင်း ဒီလောက်တောင် တွန့်ဆုတ်နေရတာလဲ အရင်တုန်းက တစ္ဆေပန်းချီကား တို့ တစ္ဆေတမန်တော် တို့ထက် ပိုကြောက်စရာ ကောင်းနေလို့လား"

ယန်ကျန့် မေးလိုက်သည်။

"နှိုင်းယှဉ်လို့ မရဘူး ငါ အဲဒီ တစ္ဆေနဲ့ တစ်ခါမှ ထိပ်တိုက် မရင်ဆိုင်ဖူးဘူး ဘာလို့လဲဆိုတော့ ရင်ဆိုင်လိုက်တာနဲ့ ငါ သေချာပေါက် သေမယ်ဆိုတာ သိလို့ပဲ"

ချောင်ယန် အလေးအနက် ပြန်ဖြေလိုက်သည်။

ဘာပဲဖြစ်ဖြစ် ခေါင်းဆောင်အဆင့် ရှိတဲ့သူ တစ်ယောက်ရဲ့ ဆုံးဖြတ်ချက်က မှားယွင်းမှာ မဟုတ်ဘူး။

ချောင်ယန်က အဲဒီ တစ္ဆေလက်ချက်နဲ့ သေမယ်လို့ ယုံကြည်နေရင် သူ သေချာပေါက် သေမှာပဲ။

တကယ်လို့ သူ့မှာ ယုံကြည်မှု ရှိခဲ့ရင် အခုထိ တစ္ဆေခြောက်ခံနေရပြီး အချိန်ဆွဲနေမယ့်အစား စောစောကတည်းက လှုပ်ရှားပြီးလောက်ပြီ။

"နှစ်ယောက် ပေါင်းတိုက်ရင်တောင် ယုံကြည်မှု မရှိဘူးလား ဒါဆို ငါ အကြံပေးမယ် ခေါင်းဆောင် ရာထူးကနေ နှုတ်ထွက်လိုက်ပါ အဲဒါဆို အစားထိုး ခေါင်းဆောင် တစ်ယောက် တာဝန်ယူလိမ့်မယ် မင်းလည်း ခေါင်းဆောင် အစည်းအဝေး တက်စရာ မလိုတော့ဘူး"

ယန်ကျန့် ပြောလိုက်သည်။

ချောင်ယန် ခါးသီးစွာ ပြုံးလိုက်သည်။

"ယန်ကျန့်... အဲဒီလောက်လည်း မဆိုးပါဘူး ရက်နည်းနည်းလောက်ဆိုရင် ငါ ဒီကိစ္စကို ရှင်းနိုင်ပြီ ငါ ပျောက်ဆုံးနေတာ မဟုတ်သလို သေလည်း မသေပါဘူး ဒီကိစ္စလေးနဲ့ ခေါင်းဆောင် ရာထူးကနေ နှုတ်ထွက်ရမယ် ဆိုရင် သိပ်တန်ဖိုး မရှိသလို ဖြစ်သွားမှာပေါ့"

"အဲဒါလည်း မရ၊ ဟိုဟာလည်း မရ ဆိုရင်တော့ အဲဒီ တစ္ဆေရဲ့ ကြောက်မက်ဖွယ် ကောင်းပုံကို ငါ ကိုယ်တိုင် မြင်ချင်တယ်"

ယန်ကျန့် အေးစက်စွာ ပြောလိုက်သည်။

"အခွင့်အရေး ရရင် ငါ ဝင်ပါဖို့ ကြိုးစားမယ်"

သူ့ရည်ရွယ်ချက်က ရှင်းလင်းသည်။ သူ ထွက်သွားဖို့ စီစဉ်နေပြီး ဒီမှာ အချိန်ထပ်မဖြုန်းချင်တော့ပေ။

"တိတ်ဆိတ်ခြင်း" တစ္ဆေက စိတ်ကူးယဉ်ဆန်တဲ့ ဖြစ်တည်မှု တစ်ခု ဖြစ်ပြီး ဖော်ပြလို့ မရတာ မဟုတ်ပေမယ့် ဖမ်းချုပ်လို့ မရနိုင်ပေ။

ချောင်ယန် နောက်ကပ်နေတဲ့ တစ္ဆေကလည်း စိတ်ကူးယဉ်ဆန်တဲ့ ဖြစ်တည်မှု တစ်ခုပါပဲ။ မဟုတ်ရင် ဖမ်းချုပ်ဖို့ ကြိုးစားလို့ ရနိုင်မှာ ဖြစ်သည်။

"နေပါဦး နေပါဦး"

ချောင်ယန် ယန်ကျန့်ကို အမြန် လှမ်းတားလိုက်သည်။

ဒါပေမဲ့ ယန်ကျန့်က လှုပ်ရှားဖို့ ဆုံးဖြတ်လိုက်ပြီ ဖြစ်လို့ ပြန်လှည့်လာဖို့ မဖြစ်နိုင်တော့သလို တံခါးကို တွန်းဖွင့်ပြီးသား ဖြစ်နေပြီ။

ချောင်ယန်ရဲ့ တစ္ဆေနယ်မြေက ယန်ကျန့်ကို မပိတ်လှောင်နိုင်သလို သူ့လှုပ်ရှားမှုတွေကိုလည်း နှောင့်ယှက်လို့ မရနိုင်ပေ။

ဒီအချိန်မှာ သူ အရေးတကြီး ဖြစ်သွားသည်။

ဘာလို့လဲဆိုတော့ ယန်ကျန့်က အကြမ်းနည်း သုံးပြီး ပုံစံကို တိုက်ရိုက် ဖျက်ဆီးပစ်ဖို့ ရည်ရွယ်နေလို့ ဖြစ်သည်။

"နောက်ထပ် နည်းလမ်း တစ်ခု ရှိသေးတယ်"

ဒီအဆင့် ရောက်မှတော့ ချောင်ယန် ငြိမ်ငြိမ် မနေနိုင်တော့ပေ။ ကြမ်းပြင်ပေါ်က အလောင်းထည့်အိတ်ကို အမြန် ကောက်ယူပြီး အပြင်ကို ပြေးထွက်လိုက်သည်။

တံခါးဝမှာ သူ ခဏ တွန့်ဆုတ်သွားသည်။

ဘာလို့လဲဆိုတော့ သူ ဒီဆိုင်ကို ပိတ်ဆို့ထားခဲ့တာ ဖြစ်ပြီး အပြင်ထွက်လိုက်တာနဲ့ တစ္ဆေအကြမ်းစားက သူ့ကို သေချာပေါက် ပြန်ရှာတွေ့မှာ ဖြစ်လို့ ဖြစ်သည်။

ဒါပေမဲ့ ရှေ့က ယန်ကျန့်ကို ကြည့်ပြီး ချောင်ယန် ဆက်မပုန်းတော့ဘဲ သတ္တိမွေးပြီး ဆိုင်ထဲကနေ ပြေးထွက်လိုက်သည်။

ချက်ချင်းပင်...

အတွင်းထဲက မီးပုံက လေအေးတစ်ချက် တိုက်ခတ်ခံလိုက်ရပြီး ချက်ချင်း ငြိမ်းသွားသည်။ မြို့နယ် တစ်ခုလုံးမှာလည်း မခန့်မှန်းနိုင်တဲ့ ထူးဆန်းသော အပြောင်းအလဲ တချို့ ဖြစ်ပေါ်လာသည်။

ဒီအရာအားလုံးက ချောင်ယန် တစ်ယောက်တည်းကြောင့် ဖြစ်ပေါ်လာတာ ဖြစ်သည်။

"မင်း ထွက်လာဖို့ ဆုံးဖြတ်လိုက်ပြီလား"

ယန်ကျန့် ခြေလှမ်း ရပ်တန့်လိုက်ပြီး နောက်လှည့်ကြည့်လိုက်သည်။

ချောင်ယန်က ပြောလိုက်သည်။

"ဒီအဆင့်ထိ ရောက်လာမှတော့ ငါ ဘယ်လိုလုပ် ဆက်ထိုင်နေလို့ ရမှာလဲ"

"မင်းက သတိထားလွန်းနေတယ် သဘာဝလွန် ထိပ်တိုက်တွေ့ဆုံမှု ဆိုတာ ရှောင်လွှဲလို့ မရဘူး ဒီတစ်ခေါက် လွတ်သွားရင် နောက်တစ်ခေါက်ရော လွတ်နိုင်ပါ့မလား"

ယန်ကျန့်က ပြောလိုက်သည်။

"မင်း ဒီတစ်ခေါက် ကံကောင်းတယ် ငါက ကူညီချင်စိတ် ရှိနေလို့ နောက်တစ်ခေါက် အဲဒီကောင် ရောက်လာရင် တစ်ယောက်တည်း ရင်ဆိုင်ရမှာ ဆိုတော့ အန္တရာယ်က နှစ်ဆ ဖြစ်သွားလိမ့်မယ်"

"မင်းပြောတာ မှန်တယ်"

ချောင်ယန် သဘောပေါက်လိုက်သည်။

"ဒီတစ်ခေါက် ရှောင်လွှဲနိုင်ပေမယ့် နောက်တစ်ခေါက် ရှောင်လွှဲနိုင်မယ်လို့ အာမ မခံနိုင်ဘူး မင်းနဲ့အတူ လိုက်သွားပြီး အဲဒီကောင် ဘာလိုချင်လဲ ဆိုတာ ကြည့်တာ ပိုကောင်းမယ်"

ခေါင်းဆောင် တစ်ယောက် အနေနဲ့ သူ့မှာ ဆုံးဖြတ်ချက် ခိုင်မာမှု ရှိပေမယ့် အများအားဖြင့် သူက သတိထားတတ်သည်။ ဘာလို့လဲဆိုတော့ ဒါက ဂိမ်းကစားနေတာ မဟုတ်ဘူးလေ။ အသက်နဲ့ ရင်းရတာ... ရှုံးရင် သေမှာ။

မကြာမီ...

သူတို့နှစ်ယောက် အဖွဲ့ဖွဲ့ပြီး ဒီတိတ်ဆိတ်နေတဲ့ မြို့နယ်လေးထဲက ဒုတိယ တစ္ဆေကို ရင်ဆိုင်ဖို့ ပြင်ဆင်လိုက်ကြသည်။

"တမင် လိုက်ရှာနေစရာ မလိုပါဘူး သူ ငါ့ဆီ ရောက်လာလိမ့်မယ် ဒါပေမဲ့ ငါတို့ စကားပြောရင် သတိထားရမယ် 'တိတ်ဆိတ်ခြင်း' ကို မဆင့်ခေါ်မိဖို့နဲ့ အပြောင်းအလဲတွေ မဖြစ်ပေါ်စေဖို့ ဂရုစိုက်ရမယ်"

ချောင်ယန်က ပြောလိုက်သည်။

"ဒါပေါ့... ဒီကောင်တွေကို တစ်ကောင်ချင်းစီ ရှင်းရမှာ အစုလိုက်အပြုံလိုက် ရှင်းရင် မမျှော်လင့်ထားတဲ့ အပြောင်းအလဲတွေ ဖြစ်လာနိုင်တယ်"

ယန်ကျန့်က ပြောလိုက်သည်။

နှစ်ယောက်စလုံးက သော့ချက် စကားလုံးကို တမင် ရှောင်ရှားနေကြသည်။ သတ်ဖြတ်မှု စည်းမျဉ်းကို သိထားတော့ စိုးရိမ်စရာ နည်းသွားသည်။

မြို့ပြင်က ဟာလာဟင်းလင်း ဖြစ်နေတဲ့ လမ်းမပေါ် ရောက်တော့ တိတ်ဆိတ်စွာ စောင့်ဆိုင်းနေလိုက်ကြသည်။

ယန်ကျန့်လည်း ပြင်ဆင်ထားသည်။ အလောင်းကောင်ဆီ မီးခွက်ကို ထွန်းလိုက်သည်။ မှိတ်တုတ်မှိတ်တုတ် အဝါရောင် အလင်းတန်းက အနီးနားမှာ ပုန်းအောင်းနေတဲ့ တစ္ဆေတွေကို ဖော်ထုတ်ပေးနိုင်သည်။ တခါတလေကျရင် သူ့ရဲ့ တစ္ဆေမျက်လုံးတွေထက်တောင် ပိုအသုံးဝင်သေးသည်။

"ဖြစ်နိုင်ရင် မလိုအပ်ဘဲ မတိုက်ခိုက်ဖို့ ကြိုးစားကြတာပေါ့"

ချောင်ယန် တိုးတိုးလေး ပြောလိုက်သည်။

"ငါ သေမှာ ကြောက်လို့ မဟုတ်ဘူး ဒါပေမဲ့ ဒီမှာ ပိတ်မိပြီး အစည်းအဝေး မတက်နိုင်မှာ စိုးလို့"

ယန်ကျန့် သူ့ကို နက်နက်ရှိုင်းရှိုင်း ကြည့်လိုက်သည်။

"ငါ ယုံမယ်လို့ မင်း ထင်နေလား"

"ဝေါ"

လေစတင် တိုက်ခတ်လာသည်။

ရုတ်တရက် အေးစက်မှု တစ်ခု တိတ်ဆိတ်နေတဲ့ မြို့ငယ်လေးကို လွှမ်းခြုံသွားသည်။ ချောင်ယန်ကြောင့် ဖြစ်တာ မဟုတ်ဘဲ တစ္ဆေ ဖြစ်ရပ်ဆန်း တစ်ခုက ပတ်ဝန်းကျင်ကို ဝင်ရောက် စွက်ဖက်နေပြီး အရာအားလုံးကို ပုံမှန် မဟုတ်အောင် လုပ်နေတာ ဖြစ်သည်။

ယန်ကျန့် တစ်စုံတစ်ရာကို အာရုံခံမိသလို လမ်းမကြီးရဲ့ အဆုံးကို လှမ်းကြည့်လိုက်သည်။

တစ်ခုခု အမြန် ချဉ်းကပ်လာနေသည်။

တစ္ဆေမျက်လုံးနဲ့ ကြည့်လိုက်ပေမယ့် တစ္ဆေပုံရိပ် အစစ်အမှန် ပေါ်လာတာ မတွေ့ရပေ။

"လာနေပြီ"

ချောင်ယန်လည်း အာရုံခံမိပြီး တိုးတိုးလေး ပြောလိုက်သည်။

"ဒလင်... ဒလင်"

တစ္ဆေ မပေါ်လာသေးပေမယ့် ထူးဆန်းတဲ့ ခေါင်းလောင်းသံ တစ်ခု တိတ်ဆိတ်နေတဲ့ မြို့ထဲမှာ ပဲ့တင်ထပ်နေသည်။ လေတိုက်လို့ လှုပ်ခါနေတဲ့ လေတိုက်ခေါင်းလောင်းသံလိုမျိုး ဖြစ်သည်။

ဒီအချိန်မှာ...

မြို့ထဲက လမ်းသွယ်လေးရဲ့ အဆုံးမှာ ထူးဆန်းတဲ့ လူတစ်ယောက် ပေါ်လာသည်။ တစ္ဆေ ထူးထူးဆန်းဆန်း တစ်ကောင် ဖြစ်နိုင်သည်။

အဲဒီလူက မီးခိုးပြာရောင် အဝတ်အစား ဝတ်ဆင်ထားသည်။ ညိုမောင်းနေတဲ့ အသားအရည်က ကြွက်သားတွေနဲ့ ကပ်နေပြီး ခြောက်သွေ့နေတဲ့ အလောင်းကောင် တစ်ခုလို ဖြစ်နေသည်။ အထူးဆန်းဆုံး အချက်ကတော့ သူက ထမ်းပိုး တစ်ခု ထမ်းထားပြီး ထမ်းပိုးရဲ့ ဟိုဘက်ဒီဘက်မှာ သစ်သားသေတ္တာ နှစ်လုံး ချိတ်ဆွဲထားသည်။ အရှေ့ဘက် သေတ္တာမှာ ချိတ်ထားတဲ့ လေတိုက်ခေါင်းလောင်းက အသံမြည်နေခြင်း ဖြစ်သည်။

ကြည့်ရတာ တရုတ်သမ္မတနိုင်ငံခေတ်က လှည့်လည်ဈေးသည် တစ်ယောက်နဲ့ တူနေသည်။

ဒါပေမဲ့ ဒီဈေးသည်က အသက်ရှင်နေတာ မဟုတ်တော့ဘဲ သေဆုံးနေပြီ ဖြစ်သည်။ ဘာလို့လဲဆိုတော့ ယန်ကျန့်ရဲ့ တစ္ဆေမျက်လုံးက ရှင်းရှင်းလင်းလင်း မြင်နေရလို့ ဖြစ်သည်။ ထမ်းပိုးသည်ရဲ့ မျက်နှာကို အနက်ရောင် အဝတ်နဲ့ တင်းတင်းကျပ်ကျပ် စည်းနှောင်ထားပြီး မျက်နှာ အစိတ်အပိုင်းတွေကို မမြင်ရဘဲ ခေါင်းပုံသဏ္ဍာန်ကိုသာ ခွဲခြားလို့ ရသည်။

"ဒီအကောင်က အရမ်း ထူးဆန်းတယ်"

ယန်ကျန့် အက်ကွဲနေတဲ့ လှံရှည်ကို တင်းတင်းကျပ်ကျပ် ဆုပ်ကိုင်ထားလိုက်သည်။ လှုပ်ရှားချင်ပေမယ့် တွန့်ဆုတ်နေသည်။

"တာဝန်ခံ ဖြစ်ပြီးနောက်ပိုင်း သဘာဝလွန် ဖြစ်ရပ်တွေ ကိုင်တွယ်ရင်း မတော်တဆ ဒီအကောင်နဲ့ တွေ့ဖူးတယ် သူက ငါ့အနားမှာ မကြာခဏ ပေါ်လာတတ်တယ်..."

ချောင်ယန်က ပြောလိုက်သည်။

"ဘာရည်ရွယ်ချက်နဲ့လဲ"

ယန်ကျန့် မေးလိုက်သည်။

ချောင်ယန် ပြောပြသည်။

"ငါ ဖမ်းချုပ်ထားတဲ့ တစ္ဆေတွေကို ဝယ်ဖို့လေ"

စကားပြောရင်း သူ တစ္ဆေနယ်မြေကို သုံးပြီး သဘာဝလွန် လွှမ်းမိုးမှုတွေကို ခွဲခြားထားလိုက်သည်။ "တိတ်ဆိတ်ခြင်း" ရဲ့ သတ်ဖြတ်မှု စည်းမျဉ်းကို မချိုးဖောက်မိအောင် ကာကွယ်လိုက်ခြင်း ဖြစ်သည်။

"မင်း ဖမ်းချုပ်ထားတဲ့ တစ္ဆေတွေကို ဝယ်မယ် ဟုတ်လား"

ယန်ကျန့်၏ မျက်နှာထား အနည်းငယ် ပြောင်းလဲသွားသည်။

"အရောင်းအဝယ် လုပ်သလိုမျိုးလား"

"အတိအကျပဲ... ငါ သူနဲ့ စီးပွားရေး စလုပ်နေပြီ ဒါပေမဲ့ သူ ဝယ်တဲ့ တစ္ဆေတွေက ကြုံရာကျပန်း မဟုတ်ဘူး သတ်မှတ်ထားတဲ့ စာရင်း ရှိတယ် အဲဒီ စာရင်းထဲက တစ္ဆေတွေကသာ သူ့ကို ဆွဲဆောင်နိုင်တာ 'တိတ်ဆိတ်ခြင်း' ဖြစ်ရပ်ထဲက တစ္ဆေက စာရင်းထဲမှာ ပါတယ် ငါ ဒီကို လာပြီး တစ္ဆေကို ဖမ်းချုပ်ဖို့ ကြိုးစားရင်း သူ့ကို ဆင့်ခေါ်လိုက်တာ"

ချောင်ယန်က ပြောလိုက်သည်။

"ဒါပေမဲ့ 'တိတ်ဆိတ်ခြင်း' တစ္ဆေက လွတ်သွားတယ် ဖမ်းချုပ်တာ မအောင်မြင်ဘူး ဒါပေမဲ့ ဒီတစ္ဆေ ရောက်လာပြီ မင်းမှာ ပေးစရာ ပစ္စည်း မရှိတော့ဘူး ဒါကြောင့် မင်း ပုန်းနေတာပေါ့"

ယန်ကျန့် မေးလိုက်သည်။

ချောင်ယန် ခေါင်းညိတ်လိုက်သည်။

"အဲဒီလိုပဲ"

"တစ္ဆေတွေနဲ့ အရောင်းအဝယ် လုပ်တာ မင်း လိုချင်တာ ရခဲ့ရဲ့လား"

ယန်ကျန့် မျက်လုံးမှေးပြီး မေးလိုက်သည်။

သူ့မှာလည်း အလားတူ ပစ္စည်းတစ်ခု ရှိသည်။

တစ္ဆေဗီရို…..

ဒါပေမဲ့ တစ္ဆေဗီရိုနဲ့ အရောင်းအဝယ် လုပ်တာက မျှတမှု မရှိသလို အလွန် အန္တရာယ် များသည်။ နောက်ဆုံးမှာ သူ ကတိဖျက်ပြီး တစ္ဆေဗီရိုကို ထင်းခုတ်ဓားနဲ့ ရိုက်ခွဲပစ်လိုက်သည်။

ဒါပေမဲ့ တစ္ဆေဗီရိုက သူ့နောက် အမြဲ လိုက်နေတဲ့ ကျိန်စာ တစ်ခုလို ဖြစ်နေသည်။

သို့သော် ယန်ကျန့်က ကျိန်စာသင့် ဆုတောင်းပြည့် တစ္ဆေကို အသုံးပြုပြီး တစ္ဆေဗီရိုရဲ့ အရောင်းအဝယ် ကျိန်စာကို ချေဖျက်နိုင်ခဲ့သည်။ အခုထိတော့ တစ္ဆေဗီရိုရဲ့ ကျိန်စာကို အောင်မြင်စွာ ဖြေရှင်းထားနိုင်ဆဲ ဖြစ်သည်။

ဒါပေမဲ့ ချောင်ယန်ရဲ့ စီးပွားရေးက ပိုကြောက်စရာ ကောင်းသည်။

ဘာလို့လဲဆိုတော့ တစ္ဆေ ကိုယ်တိုင် ရောက်လာတာလေ။

"ငါ ပစ္စည်းတချို့ ရခဲ့တယ်"

ချောင်ယန်က ပြောလိုက်သည်။

"ဒါပေမဲ့ အခုက ဒါတွေ ဆွေးနွေးရမယ့် အချိန် မဟုတ်သေးဘူး ထင်တယ်"

"သဘောတူတယ်"

ယန်ကျန့် ဆက်မမေးတော့ပေ။ ဒီချောင်ယန် ခေါင်းဆောင် ဖြစ်လာနိုင်တာ၊ တစ္ဆေရေကန်ထဲ ကျသွားတာတောင် မသေတာတွေက ဒီတစ္ဆေနဲ့ သေချာပေါက် သက်ဆိုင်နေသည်။ အရောင်းအဝယ်ကနေ အကျိုးအမြတ် အကြီးကြီး ရထားပြီး အသက်ရှင်ဖို့ အထောက်အကူ ဖြစ်စေခဲ့တာ ဖြစ်မည်။

ဒါပေမဲ့ ဒီလို အရောင်းအဝယ်တွေက အန္တရာယ်တွေနဲ့ ပြည့်နှက်နေသည်။

ချောင်ယန်ရဲ့ အရောင်းအဝယ် စာရင်းထဲက တစ္ဆေတွေက ကိုင်တွယ်ရ ပိုခက်လာပုံ ရသည်။ မဟုတ်ရင် သူ ဒီလို အန္တရာယ်များတဲ့ သဘာဝလွန် ဖြစ်ရပ်တွေကို ရွေးချယ်မှာ မဟုတ်ပေ။

သစ်သားသေတ္တာတွေ ထမ်းထားတဲ့ ထူးဆန်းတဲ့ လူက ပိုနီးကပ်လာသည်။

ခေါင်းလောင်းသံက ပိုရှင်းလင်းလာပြီး နားထောင်လို့ ကောင်းလာသည်။

"ငါ အရင်ဆုံး အရောင်းအဝယ် လုပ်ကြည့်လိုက်မယ် မအောင်မြင်ရင် ဘာဖြစ်မလဲ ကြည့်ကြတာပေါ့"

ချောင်ယန် အသက်ပြင်းပြင်း ရှူလိုက်သည်။ အလောင်းထည့်အိတ်ကို ဆွဲပြီး ရှေ့တိုးသွားလိုက်သည်။

"စွန့်စားဖို့က မင်းရွေးချယ်မှုပဲ ငါကတော့ ဘာပြဿနာမှ မရှိဘူး"

ယန်ကျန့်က ပြောလိုက်သည်။

"တိတ်ဆိတ်ခြင်း" တစ္ဆေက အပြီးတိုင် ဖမ်းချုပ်ခံထားရတာ မဟုတ်ဘူး။ တစ်စိတ်တစ်ပိုင်းပဲ ဖမ်းချုပ်ခံထားရတာ။ ထင်ရှားတာကတော့ ချောင်ယန်က ဒီတစ္ဆေကို အတုအယောင် ပစ္စည်းတွေနဲ့ လှည့်စားဖို့ ကြံစည်နေခြင်း ဖြစ်သည်။

လှည့်စားတာ အောင်မြင်ရင် အဆင်ပြေသွားလိမ့်မည်။

မအောင်မြင်ရင်တော့ သေချာပေါက် ထိပ်တိုက် ရင်ဆိုင်ရပြီး တိုက်ပွဲ ဖြစ်လာလိမ့်မည်။

ယန်ကျန့် တည်ငြိမ်စွာ နေပြီး အက်ကွဲနေတဲ့ လှံရှည်ကို ကိုင်ကာ အချိန်မရွေး လှုပ်ရှားဖို့ အသင့်ပြင်ထားလိုက်သည်။

ဒီကောင့်ကို အလောင်းကောင် သံချောင်းနဲ့ ရိုက်ထည့်လို့ ရပါစေလို့ မျှော်လင့်ရတာပဲ။

အလောင်းကောင် သံချောင်းနဲ့ ရိုက်ထားနိုင်သရွေ့ အကြောက်မက်ဖွယ် အကောင်းဆုံး တစ္ဆေတောင် ငြိမ်သက်သွားမယ်လို့ သူ ယုံကြည်သည်။

ဒါပေမဲ့ အခု အစိုးရိမ်ရဆုံး လူကတော့ ချောင်ယန် ဖြစ်သည်။

ဘာလို့လဲဆိုတော့ သူက တစ္ဆေနဲ့ ပိုနီးကပ်နေပြီး ပုံမှန်မဟုတ်တာ တစ်ခုခု ဖြစ်လာရင် အန္တရာယ် အများဆုံး ခံစားရမယ့်သူက သူ ဖြစ်သောကြောင့် ဖြစ်သည်။