အခန်း (၁၁၄၇-၁၁၄၉)

အခန်း ၁၁၄၇ ငွေပေးချေမှု ဆော့ဖ်ဝဲလ်ကိုလည်း ပြုလုပ်ခြင်း

"ကျွန်တော်တို့ ဖုန်းရဲ့အခြေအနေကို လက်ခံလို့ မဖြစ်ဘူး။ သူတို့ရဲ့ Alipayကို ကျွန်တော်တို့ရဲ့ ဘဏ်ကတ်တွေနဲ့ ချိတ်ဆက်ခွင့် ပေးလိုက်တာနဲ့ နောင်မှာ ကျွန်တော်တို့ဟာ Alipayကနေ ပေးတဲ့ စာရင်းဇယား တွေကိုသာ ရတော့မယ်။ အဲဒီ သုံးစွဲသူတွေရဲ့ စာရင်းဇယား တွေကို ကျွန်တော်တို့ ဘာမှ သိရတော့မှာ မဟုတ်ဘူး"

"လက်ခံလို့ မဖြစ်ဘူးလို့ ခင်ဗျား ပြောတယ်။ ဒါဆို အခြားဘဏ်တွေက သဘောတူရင် ဘယ်လိုလုပ်မလဲ"

"ကျွန်တော်တို့ အခြားဘဏ်တွေနဲ့ ပူးပေါင်း ပြီး ဒီAlipayကို ကျွန်တော်တို့ အားလုံး စုပေါင်း ရှယ်ယာဝင်ခွင့် ပေးဖို့ တောင်းဆိုနိုင်တယ်"

"အခြားဘဏ်တွေက ခင်ဗျားကို သဘောတူမတူ မပြောခင် ဖုန်းကိုပဲ ပြောရအောင်။ ခြိမ်းခြောက်တာကို အလွယ်တကူ ခံမဲ့သူလို့ ခင်ဗျား ထင်သလား"

"ဒါဆို ခင်ဗျား ဘာပြောချင်လဲ။ ဒီ အကျိုးအမြတ် အစိတ်အပိုင်းကို ဖုန်းကို ပေးလိုက်ရမလား။ စာရင်းဇယား ဒေတာမှာ ဘယ်လောက် ကြီးမားတဲ့ အကျိုးအမြတ်တွေ ပါဝင်တယ်ဆိုတာ ခင်ဗျားတို့ မသိဘူး မဟုတ်ပါဘူးနော်။ ဖုန်းကို ဒီ အမြတ်ကို ယူခွင့် ပေးဖို့ ခင်ဗျားတို့ သဘောကျနေလား"

"ဒါဆို ကျွန်တော် ခင်ဗျားကို မေးမယ်။ PayPalတောင် ဖုန်းရဲ့ ကုမ္ပဏီ ဖြစ်နေတာပဲ။ PayPalကပါ ကျွန်တော်တို့နဲ့ ပူးပေါင်းဆောင်ရွက်ဖို့ ရပ်ဆိုင်းလိုက်ရင် ဘယ်လိုလုပ်မလဲ"

"ဒါဆို ပိုကောင်းတာပေါ့။ သူတို့ နောက်ပိုင်း အွန်လိုင်းဘဏ်ကနေ ငွေပေးချေရင် ကျွန်တော်တို့ ကိုယ်ပိုင်ဘဏ်တွေရဲ့ ငွေပေးချေမှု ဆော့ဖ်ဝဲလ် ကိုပဲ အသုံးပြုနိုင်တော့မယ်"

...

ဘဏ်ကြီးလေးခု၏ အကြီးတန်း အရာရှိများသည် အချင်းချင်း အငြင်းပွား နေကြပြီး တစ်ယောက်ကိုတစ်ယောက် လက်ခံအောင် ပြောနိုင်ခြင်း မရှိကြပေ။ အချို့က ဖုန်း၏ အခြေအနေကို လက်ခံသင့်သည်ဟု ပြောကြပြီး ထိုသို့ဆိုလျှင် နောင်တွင် ဤAlipay ကုမ္ပဏီတွင် ရှယ်ယာဝင်ရန် အခွင့်အရေး ရှိလာနိုင်သည်ဟု ဆိုသည်။ အချို့ကမူ ဖုန်းက ၎င်းတို့၏ အခြေအနေကို လက်မခံမချင်း လုံးဝ မလက်ခံသင့် ဟု ပြောကြသည်။

သို့သော် ၎င်းတို့အားလုံး သိကြသည်မှာ ယခုအခါ လူများစွာသည် ဘဏ်တစ်ခုထက်မက အကောင့်များ ရှိကြသည်။ အကယ်၍ ၎င်းတို့သည် တစ်ဦးချင်းစီ စစ်ပွဲဆင်နွှဲ ပါက ၎င်းတို့သည် ပြိုင်ဘက်များ ဖြစ်လာကြမည် ဖြစ်သည်။

၎င်းတို့သည် ဝန်ဆောင်ခ အမျိုးမျိုးတွင် ညီညွတ်စွာ ထိန်းသိမ်းထားသော်လည်း မည်သည့် ဘဏ်က အခကြေးငွေကို ဦးစွာ လျှော့ချ၍ သုံးစွဲသူများကို လုယူမည်ကို မည်သူမျှ အာမခံနိုင်ခြင်း မရှိပေ။

သုံးစွဲသူများတွင် အလေ့အထ ရှိသည်။ ဘဏ်တစ်ခု၏ ငွေပေးချေမှု ဆော့ဖ်ဝဲလ်ကို အသုံးပြုရန် အလေ့အကျင့် ရသွားပါက အခြားဘဏ်တစ်ခုကို ရွေးချယ်ခဲသည်။ ဤသည်မှာ ၎င်းတို့အား ဆန့်ကျင်ဘက် အနေအထား တွင် ရောက်ရှိစေသည်။

အရေးအကြီးဆုံးမှာ ဤသို့ဆိုလျှင် ၎င်းတို့သည် ၎င်းတို့၏ ငွေပေးချေမှု ဆော့ဖ်ဝဲလ်ကို တပ်ဆင်စေရန် အကြီးစား အွန်လိုင်း စျေးဆိုင် ကုမ္ပဏီများနှင့် စဉ်ဆက်မပြတ် တိုက်ပွဲဝင် ရမည်ဖြစ်ပြီး ငွေပေးချေမှု ဆော့ဖ်ဝဲလ် စစ်ပွဲ အဖြစ်သို့ ပြောင်းလဲသွားမည် ဖြစ်သည်။

သူတို့သည် အချက်တစ်ခုကို ရုတ်တရက် သတိရလိုက်ကြသည်။ သူတို့ကိုယ်တိုင် ငွေပေးချေမှု ဆော့ဖ်ဝဲလ်ကို အဘယ်ကြောင့် မပြုလုပ်နိုင်ရသနည်း။

ဖုန်း လုပ်နိုင်သည်ဆိုလျှင် သူတို့လည်း လုပ်နိုင်သည် မဟုတ်လား။ ထို့အပြင် သူတို့သည် ကုမ္ပဏီများအားလုံးနီးပါးနှင့် ပူးပေါင်းဆောင်ရွက်နေသောကြောင့် ဤငွေပေးချေမှု ဆော့ဖ်ဝဲလ်ကို မြှင့်တင်ရန် ပိုမို လွယ်ကူ မည် ဖြစ်သည်။

ဤစိတ်ကူးသည် အခြားဘဏ်များ၏ ထောက်ခံမှုကို ရရှိမည်ဟု ယုံကြည်သည်။ သို့သော် ဤသို့ဆိုလျှင် ဘဏ်များကြားရှိ အကျိုးအမြတ်များသည် ဆက်စပ် နေပြီ ဖြစ်သည်။ ဤအကျိုးအမြတ် ခွဲဝေမှုကို ကောင်းစွာ လေ့လာ ဆန်းစစ် ရဦးမည် ဖြစ်သည်။

...

"ခင်ဗျား ဘာပြောလိုက်တာလဲ။ သူတို့ သဘောတူလိုက်ပြီလား။ ကျွန်တော်တို့ရဲ့ Alipayနဲ့ PayPalကို ပိုမို နက်ရှိုင်းတဲ့ မြှင့်တင်ရေး ပူးပေါင်းဆောင်ရွက်မှု လုပ်ဖို့ သဘောတူလိုက်ပြီလား" ဖုန်းယွီသည် အနည်းငယ် အံ့အားသင့် သွားသည်။ ထိုဘဏ်များသည် တကယ်ပဲ သဘောတူလိုက်ပြီလား။

မူလက ဖုန်းယွီသည် ဗြိတိန်၏ HSBC အပါအဝင် ကမ္ဘာ့အဆင့်မီ ဘဏ်အချို့နှင့် ဆက်သွယ်ခဲ့သော်လည်း ဤဘဏ်လေးခု၏ ခွန်အားသည်လည်း အလွန် ကြီးမားသည်။ ဖုန်းယွီသည် ၎င်းတို့ ဤမျှ လျင်မြန်စွာ သဘောတူလိမ့်မည်ဟု မမျှော်လင့်ခဲ့ပေ။

"သူတို့ ဘာအခြေအနေတွေ ထုတ်ဖော်ခဲ့သလဲ" ဖုန်းယွီသည် စဉ်းစားလိုက်သည်။ ပြန်ဖြေသည်ဆိုလျှင် အခြား အခြေအနေများ ရှိရမည်မှာ သေချာသည်။

"သူတို့က ဒီတစ်ကြိမ် Amazon ရန်ပုံငွေ ရှာဖွေမှုမှာ ဖူမိသားစုနဲ့ တူညီတဲ့ အခြေအနေ တွေကို တောင်းဆိုပါတယ်"

ဖုန်းယွီသည် ခေါင်းညိတ်လိုက်သည်။ "ကောင်းပြီ၊ ဒါကို စဉ်းစားလို့ ရတယ်။ တခြားရော"

"နောက်တစ်ခုက ခင်ဗျား အနာဂတ်မှာ Alipayမှာ သူတို့ကို ရှယ်ယာဝင်ခွင့် ပေးမယ်လို့ ပြောခဲ့တာ။ အဲဒါ PayPalကိုပါ ပါဝင် ရမယ်လို့ တောင်းဆိုတယ်။ ပြီးတော့ ဒီအချိန်က အရမ်း မကြာသင့်ဘူး၊ ဆယ်နှစ် က သင့်တော်တယ်လို့ သူတို့ ယူဆပါတယ်" ဟု ရဲလ်ဖ်က ဆက်ပြောသည်။

ဆယ်နှစ်လား။ ဆယ်နှစ်ဆိုသည်မှာ PayPalနှင့် Alipayတို့၏ ဖွံ့ဖြိုးတိုးတက်မှုသည် တည်ငြိမ်သော အဆင့်သို့ ရောက်ရှိမည့် အချိန်နှင့် ကိုက်ညီသည်။ ၎င်းတို့သည် ကောင်းမွန်စွာ တွက်ချက် ထားကြသည်။

ထိုအချိန်တွင် Alipayနှင့် PayPalတို့၏ အမြတ်အစွန်း ရရှိနိုင်မှုသည် ရှင်းလင်းစွာ သိရှိနိုင်ပြီ ဖြစ်သည်။ ထိုအချိန်တွင် ရင်းနှီးမြှုပ်နှံလိုသူများသည် စီယက်တယ်လ်မှ နယူးယောက်အထိ တန်းစီရမည့် အနေအထား ဖြစ်ပေလိမ့်မည်။

သို့သော် ၎င်းသည် ကတိ တစ်ခုသာ ဖြစ်သည်။ ဤအချက်ကို ဖုန်းယွီ လက်ခံနိုင်သည်။ ဖုန်းယွီ ကတိပေးခဲ့သော အရာကို အမြဲတမ်း လုပ်ဆောင် မည် ဖြစ်သည်။ သို့သော် ထိုဘဏ်များကို ရှယ်ယာဝင်ခွင့် ပေးမည်ဟု ကတိပေးခဲ့သော်လည်း ရှယ်ယာမည်မျှ ရောင်းချမည် ကို ကတိမပေးခဲ့ပေ။ ၁ ရာခိုင်နှုန်းသည် များလောက်ပြီ။ အများဆုံး ၂ ရာခိုင်နှုန်း ဖြစ်ပြီး ထိုထက် ပိုမဖြစ်နိုင်။ ဘဏ်လေးခု ခွဲဝေယူရမည်။

"တခြားရော"

"မရှိတော့ဘူး"

ဖုန်းယွီသည် အံ့အားသင့်သွားသည်။ မဖြစ်နိုင်ဘူး။ ဒီမျှ နည်းတဲ့ အခြေအနေတွေပဲလား။ သူတို့ အရင်က ဒီလောက် ပြင်းပြင်းထန်ထန် ကန့်ကွက်ခဲ့ကြတာ၊ ဒီမျှ နည်းတဲ့ အခြေအနေတွေပဲ ထုတ်ဖော်ခဲ့တာလား။

ဖုန်းယွီ၏ မယုံသင်္ကာ အကြည့်ကို မြင်သောအခါ ရဲလ်ဖ်သည် အမြန် ရှင်းပြသည်။ "သူဌေး၊ တကယ်ပဲ မရှိတော့ပါဘူး"

တကယ်တော့ ရဲလ်ဖ်လည်း အလွန်ထူးဆန်းနေသည်။ အရင်က ဘဏ်ကြီးလေးခု၏ သဘောထားသည် အထူး ပြင်းထန်ခြင်း မရှိသော်လည်း ပြတ်ပြတ်သားသား လမ်းခွဲ မည့် အနေအထားကို ပြသခဲ့သည်။ ယခု ရုတ်တရက် သဘောထား ပြောင်းလဲလာခြင်းသည် ကြည့်ရတာ အနည်းငယ် ထူးဆန်း သည်။

ဤတစ်ကြိမ် ရန်ပုံငွေ ရှာဖွေမှု၏ ဈေးနှုန်းကို လျှော့ချရန်အတွက်သာ ဆိုပါက ၎င်းတို့ ထိုသို့ လုပ်ဆောင်ရန် တန်ဖိုးရှိမည် မဟုတ် ဟု ထင်ရသည်။ ၎င်းတို့သည် Alipay၏ ခြိမ်းခြောက်မှုကို သိရှိပြီး ဖြစ်သော်လည်း သဘောတူနေသေးသည်။ Alipayကို ကြီးထွားခိုင်မာလာသည်ကို မျက်စိစုံမှိတ် ကြည့်နေ တော့မည်လား။

ဖုန်းယွီသည် ခေါင်းငုံ့၍ စဉ်းစားနေသည်။ ဘဏ်ကြီးလေးခုကို အလျှော့ပေးစေခဲ့သော အကြောင်းရင်း သည် ဘာလဲ။ ဟုတ်တယ်၊ ဖုန်းယွီနှင့် ကီရီလင်ကိုတို့သည် ဘဏ်အချို့နှင့် သီးခြားစီ ဆွေးနွေးပြီး ပူးပေါင်းဆောင်ရွက်မှု သဘောတူညီချက်များ ရရှိခဲ့ပြီး ထိုဘဏ်များတွင် နှစ်စဉ် ငွေသား လည်ပတ်မှုသည် သတ်မှတ်ပမာဏအောက် မနည်းစေရန် ကတိပြုခဲ့သည်။

သို့သော် ဤအရာများသည် ထိုဘဏ်ကြီးလေးခုကို အလျှော့ပေးစေ သင့်ပါသလား။ ဤတွင် သူ မသိသော အကြောင်းရင်း တစ်ခု ရှိရမည်မှာ သေချာသည်။

ဖုန်းယွီသည် ရဲလ်ဖ်အား အဘယ်ကြောင့် ဖြစ်သည်ကို သွားရောက် မေးမြန်းစေခဲ့ပြီး တစ်ချိန်တည်းမှာပင် ရဲလ်ဖ်အား ထိုဘဏ်ကြီးလေးခုကို ထပ်မံ စမ်းသပ်စေခဲ့သည်။ ဥပမာအားဖြင့် Amazon၏ ရှယ်ယာဈေးနှုန်းသည် သူ အရင်ပြောခဲ့သည့်အတိုင်း ဖြစ်နေပါက ၎င်းတို့ ဆက်လက် သဘောတူနိုင်ပါ့မလား။

ဘဏ်လေးခု လျော့နည်းသွားခြင်းသည် အနည်းငယ်ဟု ထင်ရသော်လည်း ဤဘဏ်လေးခု၏ ဖောက်သည်များသည် အလွန်များပြားသည်။ မသိမသာအားဖြင့် Alipayသည် သုံးစွဲသူ အများအပြားကို ဆုံးရှုံးနေရသည်။ ပူးပေါင်းဆောင်ရွက်နိုင်ပါက ပူးပေါင်းဆောင်ရွက်ခြင်း သည် ပို၍ တန်ဖိုးရှိသည်။

ဤဘဏ်လေးခု ပူးပေါင်းဆောင်ရွက်ရန် ငြင်းဆန်ခြင်းကြောင့် အခြားဘဏ်များ၏ ပူးပေါင်းဆောင်ရွက်မှုကို ငြင်းဆန်စေပါက Alipayအပေါ် သက်ရောက်မှုမှာ ပို၍ကြီးမားသွားမည်ဖြစ်သည်။

ပူးပေါင်းဆောင်ရွက်ခြင်းသည် နှစ်ဦးနှစ်ဖက် အနိုင်ရခြင်းဖြစ်သည်၊ သို့သော် ဖုန်းယွီက ပို၍အမြတ်ရသည်။ မပူးပေါင်းဆောင်ရွက်ပါက အားလုံး နစ်နာ မည်ဖြစ်ပြီး အချင်းချင်း နာကျင်အောင် ပြုလုပ် ခြင်းနှင့် တူညီသည်။

ယခု ၎င်းတို့သည် ပူးပေါင်းဆောင်ရွက်ရန် ရွေးချယ်ခဲ့သည်။ ပြဿနာ မရှိသယောင် ထင်ရသည်။ သို့သော် ဖုန်းယွီသာဆိုလျှင် ပိုမိုသော အကျိုးအမြတ်များကို သေချာပေါက် တောင်းဆိုမည် ဖြစ်သည်။ ဤမျှ ရိုးရှင်းစွာ မည်သို့ သဘောတူနိုင်မည်နည်း။

နှစ်ရက်ကြာပြီးနောက် ရဲလ်ဖ်သည် ဖုန်းပြန်ဆက်၍ အရေးကြီးသော သတင်း တစ်ခုကို ဖုန်းယွီအား ပြောပြခဲ့သည်။ ထိုဘဏ်များသည် ပူးပေါင်းဆောင်ရွက်ခဲ့ပုံရပြီး ၎င်းတို့အားလုံး အသုံးပြုနိုင်သည့် ငွေပေးချေမှု ဆော့ဖ်ဝဲလ်တစ်ခုကို ပြုလုပ်ရန် မိုက်ခရိုဆော့ဖ်ကို တာဝန်ပေးခဲ့သည်။

ဖုန်းယွီသည် အံ့အားသင့်သွားသည်။ ဤသည်မှာ ဘဏ်များ၏ ပေါင်းစည်းရေး အဖွဲ့တစ်ခုနှင့် ဆင်တူသည်။ ဆိုလိုသည်မှာ ဤဘဏ်များ၏ ဖောက်သည်များအားလုံးသည် အွန်လိုင်း ငွေပေးချေမှုအတွက် ဆော့ဖ်ဝဲလ်တစ်ခုကို အသုံးပြုနိုင်မည် ဖြစ်သည်။ ထို့ကြောင့် ဖောက်သည်များသည် ဘဏ်များစွာ၏ ငွေပေးချေမှု ဆော့ဖ်ဝဲလ်များကို ဒေါင်းလုဒ်ဆွဲရန် အခက်အခဲကို လျှော့ချနိုင်ပြီး အားကောင်းသော ငွေပေးချေမှု မဟာမိတ် တစ်ခုကိုလည်း ဖွဲ့စည်းနိုင်မည် ဖြစ်သည်။

သို့သော် ဖုန်းယွီသည် ဤဆော့ဖ်ဝဲလ်တွင် ကြီးမားသော အားနည်းချက်တစ်ခုကို တွေ့ရှိခဲ့သည်။ ဤဘဏ်များ ပူးပေါင်းခြင်းသည် တရုတ်၏ UnionPay နှင့် မတူပေ။ တရုတ်နိုင်ငံတွင် နိုင်ငံတော်မှ စီမံခန့်ခွဲသော်လည်း ၎င်းတို့၏ စနစ်သည် ကုမ္ပဏီ စီမံခန့်ခွဲမှု ဖြစ်သည်။ ဤတွင် အကျိုးအမြတ် ချိန်ခွင်လျှာကို ညှိရန်မှာ မလွယ်ကူပေ။ မည်သူမျှ ခွဲဝေရမည့် အစိတ်အပိုင်း နည်းသွားခြင်းကို မလိုချင်ပေ။

ထို့အပြင် ဘဏ်များစွာကို ထောက်ပံ့ရန်အတွက် အခကြေးငွေ ကောက်ခံရမည်မှာ သေချာသည်။ ဤဆော့ဖ်ဝဲလ်တွင် အားနည်းချက်များ အလွန်များပြားသည်။

အထူးသဖြင့် ငွေပေးချေမှု ဆော့ဖ်ဝဲလ် သို့မဟုတ် ပလက်ဖောင်းတစ်ခု လူကြိုက်များလာရန်အတွက် ဝန်ဆောင်မှု၏ကောင်းမကောင်းအပြင် အခြား အရေးကြီးသော အချက်တစ်ခု ရှိသည်။ ၎င်းမှာ ဤဆော့ဖ်ဝဲလ်ကို အသုံးပြုသော ကုမ္ပဏီ မည်မျှ ရှိသလဲဆိုသည့် အချက်ပင် ဖြစ်သည်။ ဒါဆိုရင် ဘယ်သူက ဆော့ဖ်ဝဲလ်ကို ပိုမြန်မြန် မြှင့်တင်နိုင်မလဲဆိုတာကို ၎င်းတို့ ကြည့်ကြပါစေ။

...

******

အခန်း ၁၁၄၈ အီးမေးလ် ကြော်ငြာ

ယခင်ဘဝတွင် တရုတ်နိုင်ငံတွင်သာ ငွေပေးချေမှု ဆော့ဖ်ဝဲလ် ရာပေါင်းများစွာ ရှိခဲ့သော်လည်း နောက်ဆုံးတွင် ရေစစ်စစ်ဆေးပြီး ကျန်ရှိနိုင်သည့် အရေအတွက်မှာ အနည်းငယ်သာ ဖြစ်သည်။

ထိုငွေပေးချေမှု ဆော့ဖ်ဝဲလ်များ၏ ကောင်းကျိုးနှင့်ဆိုးကျိုးများကို လူများက အကျဉ်းချုပ် ဖော်ပြခဲ့ပြီး ဖြစ်သည်။ ဖုန်းယွီသည် အသေးစိတ် အကုန်သိသည် ဟု မပြောဝံ့သော်လည်း အနည်းဆုံးတော့ ဤလုပ်ငန်းကို တစ်ခါမှ မလုပ်ဖူးသူများထက် ပိုမိုသိသည်။

ဤငွေပေးချေမှု ဆော့ဖ်ဝဲလ်ကို မြှင့်တင်သည့် နည်းလမ်းတစ်ခုတည်းကပင် သူတို့ကို လုံးဝ အံ့အားသင့် သွားစေနိုင်သည်။

ယခုအချိန်တွင် PayPalကို မည်သို့ မြှင့်တင်နေသနည်း။ ပထမတစ်ခုမှာ eBay ကုမ္ပဏီ၏ဝက်ဘ်စာမျက်နှာ ကြော်ငြာမြှင့်တင်မှု ဖြစ်သည်။ eBay ၏ စာမျက်နှာသို့ ဝင်ရောက်လိုက်သည်နှင့် PayPal၏ ကြီးမားသော ကြော်ငြာကို မြင်တွေ့ရမည် ဖြစ်သည်။ ဟုတ်ပါတယ်၊ ၎င်းအတွက် ကြော်ငြာခ ပေးထားရသည်။

နောက်တစ်ခုမှာ PayPal၏ အီးမေးလ် ကြော်ငြာ မြှင့်တင်မှု ဖြစ်ပြီး ၎င်းသည် အဓိက အကျဆုံး ဖြစ်သည်။

PayPal၏ ငွေပေးချေမှု စနစ်အတွက် သင်သည် အီးမေးလ် အကောင့်တစ်ခုကို ချန်ထားရန် လိုအပ်သည်။ ဝယ်သူက ငွေပေးချေပြီးနောက် ရောင်းသူအား အီးမေးလ်ဖြင့် အကြောင်းကြားမည် ဖြစ်သည်။

ရောင်းသူသည် ထိုငွေကို ထုတ်ယူလိုပါက PayPal အကောင့်ကို မှတ်ပုံတင်ရန် လိုအပ်သည်။ ငွေထုတ်ရန်အတွက် အကောင့် မှတ်ပုံတင်ချိန်သည် တစ်မိနစ်တောင် မကြာသောကြောင့် ၎င်းတို့သည် လုံးဝငြင်းပယ်မည် မဟုတ်ပေ။

ဤနည်းဖြင့် PayPal၏ သုံးစွဲသူများသည် အလွန်လျင်မြန်သော တိုးတက်နှုန်းကို ရရှိနိုင်မည် ဖြစ်သည်။

မူလက eBay တွင် ၎င်း၏ ကိုယ်ပိုင် ငွေပေးချေမှု လုပ်ငန်း ရှိသော်လည်း PayPalကို ပါဝင်ခွင့် ပြုပြီးနောက် ၎င်း၏ ကိုယ်ပိုင် ငွေပေးချေမှု လုပ်ငန်းသည် တဖြည်းဖြည်း ကျုံ့ဝင်သွားခဲ့ပြီး PayPalကမူ လျင်မြန်စွာ ဖွံ့ဖြိုးတိုးတက်ခဲ့သည်။

ယခုအခါ eBay ၏ ငွေပေးချေမှု လုပ်ငန်းကို သီးခြားခွဲထုတ်၍ PayPalနှင့် ပေါင်းစည်း ရန် စီစဉ်နေပြီး PayPalသည် eBay ၏ တစ်ခုတည်းသော တရားဝင် ငွေပေးချေမှု ပလက်ဖောင်း ဖြစ်လာမည် ဖြစ်သည်။

ဤသို့ဆိုလျှင် PayPal၏ အကျိုးအမြတ်များသည် eBay နှင့် ခိုင်မြဲစွာ ချိတ်ဆက် သွားပြီ ဖြစ်သည်။ သို့သော် PayPalဘက်မှ ခေါင်းဆောင်မှာ ဖုန်းယွီ ဖြစ်ပြီး eBayဘက်မှ ခေါင်းဆောင်မှာ ကီရီလင်ကို ဖြစ်သည်။

မူလ PayPal၏ အီးမေးလ် မြှင့်တင်ရေး နည်းလမ်းတွင် ဖုန်းယွီ၏ အမြင်အရ ပြင်းထန်သော အားနည်းချက်များ ရှိနေသေးသည်။ အီးမေးလ် ကြော်ငြာသည် သုံးစွဲသူကို တစ်ချက်ကြည့်ဖြင့် သတိပြုမိစေရန် လိုအပ်ပြီး သတင်းအချက်အလက် အများဆုံးကို အတိုဆုံး စကားလုံးများ ဖြင့် ဖော်ပြရန် လိုအပ်သည်။

အရင်က PayPalသည် ရောင်းသူက ငွေထုတ်ယူရန် လိုအပ်သောကြောင့် PayPalကို အသုံးပြုရန် မဖြစ်မနေ လိုအပ်ခဲ့ပြီး ထို့ကြောင့် PayPal၏ သုံးစွဲသူ တိုးလာခဲ့သည်။ သို့သော် ဤနည်းလမ်းသည် အလွန်တုံ့ပြန်မှုသာ ရှိသည်။

ကောင်းတာက eBay သည် လေလံပွဲ ဝက်ဘ်ဆိုဒ် ဖြစ်သောကြောင့် ရောင်းသူနှင့် ဝယ်သူ အထောက်အထားများသည် အဆက်မပြတ် အပြန်အလှန် ပြောင်းလဲ နေသည်။ ထို့ကြောင့် PayPal၏ မြှင့်တင်မှုသည် အတော်အတန် ချောမွေ့ခဲ့သည်။

သို့သော် ယခုအခါ eBay သည် အမေရိကတိုက်ရှိ အခြားနိုင်ငံများသို့ စတင် ဝင်ရောက်နေပြီး eBay၏ လုပ်ငန်းနယ်ပယ်ကို တိုးချဲ့ရန် အခြားလေလံ ဝက်ဘ်ဆိုဒ်များကို ဝယ်ယူရန် စီစဉ်နေသည်။ ထိုအခါ eBay ၏ တရားဝင် ငွေပေးချေမှု ပလက်ဖောင်းဖြစ်သော PayPalကိုလည်း ထိုနိုင်ငံများသို့ မြှင့်တင် ရဦးမည် ဖြစ်သည်။

ပထမဦးဆုံး အချက်မှာ နိုင်ငံအသီးသီး အသုံးပြုသော ငွေကြေးများ မတူညီ ခြင်း ဖြစ်သည်။

၎င်းသည် အမေရိကန် ကုမ္ပဏီ ဖြစ်သောကြောင့် ဝယ်သူများသည် ဒေါ်လာဖြင့် ရှင်းပေးရမည်ဟု မပြောနိုင်ပေ။ နိုင်ငံခြား သုံးစွဲသူ အများစု၏ အကောင့်ထဲတွင် ဒေါ်လာ မရှိပေ။

ဤပြဿနာကို PayPalသည် ကနေဒါသို့ စတင် မြှင့်တင်သောအခါ ဖုန်းယွီက ကြိုတင်သတိပေးခဲ့သည်။ ငွေကြေးမျိုးစုံဖြင့် ရှင်းလင်းမှုကို အကောင်အထည် ဖော်ရမည်ဖြစ်ပြီး ငွေကြေး အသီးသီးသည် သက်ဆိုင်ရာ နိုင်ငံ၏ ငွေကြေးသို့ ပြောင်းလဲနိုင်ရန်အတွက် ဘဏ်များနှင့်အသေးစိတ် ပူးပေါင်းဆောင်ရွက်မှု လိုအပ်သည်။

ဤငွေလဲလှယ်မှုအတွက်လည်း ဝန်ဆောင်ခ ကောက်ခံရမည် ဖြစ်ပြီး ဤမှနေ၍ PayPalသည် အမြတ် ရရှိနိုင်မည် ဖြစ်သည်။

ဝန်ဆောင်ခသည် မမြင့်လွန်းစေရန် လိုအပ်သည်။ မဟုတ်ပါက သုံးစွဲသူများက မတန်တဆ ဖြစ်သည်ဟု ထင်ကြမည်။ သို့သော် အလွန်နည်းလွန်းပါကလည်း မဖြစ်နိုင်ပေ။ ၎င်းသည် PayPal၏ အမြတ်ကို လျှော့ချသွားမည် ဖြစ်သည်။ ဤတွင် မျှတသော အမှတ်ကို ထိန်းထားရန် ခက်ခဲသည်။ နိုင်ငံအသီးသီးတွင် အနာဂတ်၌ မတူညီသော နှုန်းထားများကို အသုံးပြုမည် ဖြစ်သော်လည်း အလုံးစုံအားဖြင့် ၁ ရာခိုင်နှုန်းထက် မပိုစေရန် ဖြစ်သည်။ ၎င်းသည် အဓိကအားဖြင့် နိုင်ငံအသီးသီးရှိ ဘဏ်များနှင့် ပူးပေါင်းဆောင်ရွက်မှု အသေးစိတ်ပေါ်တွင် မူတည်သည်။ သူတို့က များများ တောင်းလျှင် PayPalကလည်း များများ တောင်းရမည်မှာ သဘာဝ ဖြစ်သည်။

PayPal၏ ဤအချက်သည် အွန်လိုင်းဘဏ်ထက် ပိုမိုအဆင်ပြေစေပြီး eBay ကိုလည်း နိုင်ငံဖြတ်ကျော် ကုန်သွယ်မှု ပိုမို ကောင်းမွန်စွာ လုပ်ဆောင်နိုင်စေမည် ဖြစ်သည်။ သို့သော် ရိုးရာ အီးမေးလ် မြှင့်တင်ရေး နည်းလမ်းဖြင့်မူ မလွယ်ကူ လှပေ။

အီးမေးလ် မြှင့်တင်ရေးသည် PayPalအတွက် အသင့်တော်ဆုံး ဖြစ်သည်။ အဘယ်ကြောင့်ဆိုသော် PayPal မှတ်ပုံတင်ရန်အတွက် အီးမေးလ် အကောင့် ကို ချိတ်ဆက်ရန် လိုအပ်သောကြောင့် ဖြစ်သည်။ ထို့ကြောင့် ဖုန်းယွီသည် PayPal၏ မြှင့်တင်ရေး ဌာနအား ပိုမိုသော လိုအပ်ချက်များကို ပေးခဲ့သည်။

အီးမေးလ် မြှင့်တင်ရေးသည် စံနှုန်းအချို့နှင့် ကိုက်ညီရန် လိုအပ်သည်။ ဥပမာအားဖြင့် လှုံ့ဆော်မှုသည် စာဖတ်သူကို ပြင်းပြင်းထန်ထန် လှုံ့ဆော်မှု ခံစားရစေရန် လိုအပ်ပြီး ၎င်းတို့အား လင့်ခ်ကို နှိပ်ရန် လှုံ့ဆော်သည်။ အရင်က အသုံးပြုခဲ့သော ငွေထုတ်ယူခြင်းသည် လှုံ့ဆော်မှု နည်းလမ်းတစ်ခု ဖြစ်သော်လည်း eBay သုံးစွဲသူ မဟုတ်သူများအတွက်မူ မလုံလောက်ပေ။ ဤအချိန်တွင် လှုံ့ဆော်မှု အသစ်များ လိုအပ်သည်။

ထို့အပြင် ရှင်းလင်း ပြတ်သား ရမည်။ စာဖတ်သူကို စာလုံး အနည်းဆုံး ဖြင့် သင် ဖော်ပြလိုသည့်အရာ၊ သင်၏ ရည်ရွယ်ချက်နှင့် ရည်မှန်းချက်ကို နားလည်စေရန် လိုအပ်သည်။ စာဖတ်သူကို မှန်းဆစေရန် မပြုလုပ်သင့်ပေ။ လူများတွင် သိချင်စိတ် ရှိသော်လည်း လူအများစုသည် ၎င်းကို spam အဖြစ် သတ်မှတ်ပြီး တိုက်ရိုက် ပိတ်ပစ် ကြမည် ဖြစ်သည်။

နောက်ထပ် အရေးကြီးသော အချက်တစ်ချက်မှာ လေထုကို ဖန်တီးရမည်။ ဤအီးမေးလ်မှ အရာများသည် သုံးစွဲသူအတွက် ကောင်းသော အခွင့်အရေး ဖြစ်သည်ဟု ခံစားရစေရန် ဖန်တီးပေးရမည်။

အီးမေးလ်သည် ထင်ရှားရမည်။ ဤရည်ရွယ်ချက်အတွက် တောက်ပသော အရောင်များနှင့် ရုပ်ပုံများကို အသုံးပြုနိုင်သည်။ အကယ်၍ GIF အန်နီမေးရှင်းကို အသုံးပြုပါက အမှန်တကယ် ပိုမိုကောင်းမွန်သော သက်ရောက်မှုကို ရရှိမည် ဖြစ်သည်။ ဤအချိန်တွင် GIF ဖော်မတ်သည် ဆယ်နှစ်ကျော် ဖွံ့ဖြိုးလာပြီ ဖြစ်သော်လည်း လက်ရှိ အင်တာနက် အမြန်နှုန်း၏ ကန့်သတ်ချက်ကြောင့် ပုံ၏ ကြည်လင်မှုသည် မမြင့်မားဘဲ အရောင်များသည်လည်း ၂၅၆ ရောင်သာ အများအားဖြင့် ရှိသဖြင့် မမှန်ကန်ဟု ခံစားရသည်။ သို့သော် ၎င်းသည် သာမန် ပုံသေ ရုပ်ပုံများထက် အကျိုးသက်ရောက်မှု အများကြီး ကောင်းမွန်သည်။ ရွေ့လျားနေသော ပုံများသည် လူများကို အမြဲတမ်း ပိုမို ဆွဲဆောင်လေ့ရှိသည်။

အနာဂတ်တွင် အင်တာနက် ပိုမိုဖွံ့ဖြိုးလာပါက ဗီဒီယိုလင့်ခ်ကို တိုက်ရိုက် ဖန်တီးနိုင်ပြီး ၎င်းကို နှိပ်လိုက်သည်နှင့် ဗီဒီယိုကို တိုက်ရိုက် ဖွင့်နိုင်ကာ အကျိုးသက်ရောက်မှု ပိုကောင်းစေမည် ဖြစ်သည်။

နောက်ထပ် အချက်တစ်ခုမှာ PayPalသည် eBay ၏ အီးမေးလ် မြှင့်တင်ရေးနှင့် ပေါင်းစပ်ပြီး ချည်နှောင်မှုပုံစံကို ဖန်တီးရမည်။ သုံးစွဲသူသည် eBay ကို မှတ်ပုံတင်သောအခါ PayPal၏ ကလိုင်းရန့်ကို ချည်နှောင်သွားမည် ဖြစ်သည်။ အလားတူပင် PayPalကို မှတ်ပုံတင်သောအခါ eBay ၏ အရောင်းမြှင့်တင်ရေး ကြော်ငြာကို မြင်တွေ့ရမည် ဖြစ်ပြီး အထက်ပါ လျှော့စျေး အချက်အလက် ကို တစ်ချက်ကြည့်လိုက်ရုံဖြင့် မြင်တွေ့စေမည် ဖြစ်သည်။

တစ်ချိန်တည်းမှာပင် PayPalသည် ပိုမိုသော အင်တာနက် ကုမ္ပဏီများနှင့် ငွေပေးချေမှု ပလက်ဖောင်း ပူးပေါင်းဆောင်ရွက်မှု သဘောတူညီချက်များကို လက်မှတ်ရေးထိုးနေသည်။ သုံးစွဲသူများက PayPal ရှိနေပါက ဝက်ဘ်ဆိုဒ် အသီးသီးတွင် အသုံးပြုနိုင်ပြီး ဝက်ဘ်ဆိုဒ်အားလုံးတွင် အသုံးပြုနိုင်သည်ဟူသော ထင်ယောင်ထင်မှား ကိုပင် ခံစားရစေသည်။

၎င်းသည် ပန်းတိုင်တစ်ခု ဖြစ်သော်လည်း အကောင်အထည် ပေါ်ရန် မဖြစ်နိုင်ပေ။ မည်သည့် ငွေပေးချေမှု ဆော့ဖ်ဝဲလ်မျှ ဤမျှ ဈေးကွက်ကို မရရှိနိုင်ပေ။ PayPalသည် အခကြေးငွေ မယူပါက မရရှိနိုင်ဘဲ ထိုသို့ဆိုလျှင် PayPalသည် ၎င်း၏ အကြီးမားဆုံး အမြတ်ရင်းမြစ်ကို ဆုံးရှုံးသွားမည် ဖြစ်သည်။

...

ထိုအချိန်တွင် Alipayသည်လည်း မွေးဖွား လာခဲ့ပြီး Amazon၏ ဝက်ဘ်ဆိုဒ်တွင် ငွေပေးချေမှု ရွေးချယ်မှုအဖြစ် ပေါ်လာကာ ပထမဆုံးအဖြစ် သတ်မှတ်ထားသည်။ Alipay၏ မြှင့်တင်မှုကိုလည်း အီးမေးလ် ပုံစံ မြှင့်တင်မှု ကို အသုံးပြုခဲ့သည်။ PayPalထံမှ အီးမေးလ် အကောင့် စာရင်းကို ရယူပြီး ထိုစာရင်းအတိုင်း ကြော်ငြာများကို ပေးပို့ ခဲ့သည်။

ဤတွင် အရေးအကြီးဆုံး အချက်မှာ လျှော့စျေး လှုံ့ဆော်မှုဖြစ်ပြီးအချိန် ကန့်သတ်ချက်လည်း ပါဝင်သည်။ ဖောက်သည်များအား ရေတွက်သည့် အချိန်ပြကွက်ကို မြင်စေခြင်းဖြင့် အမြန်မဝယ်ပါက အခွင့်အရေး လွတ်သွားမည် ဟု ချက်ချင်း တွေးမိစေသည်။

၎င်းတို့သည် ကြော်ငြာ လင့်ခ်ကို နှိပ်ပြီး Amazon စာမျက်နှာသို့ ဝင်ရောက်သောအခါ ညာဘက်တွင် ရွေ့လျားနေသော ပြတင်းပေါက်တစ်ခု ပေါ်လာပြီး ၎င်းတို့ကို ဖွင့်ရန် ဆွဲဆောင်သည်။ ၎င်းသည် Alipay၏ မှတ်ပုံတင် လင့်ခ် ဖြစ်သည်။

၎င်းတွင် Alipay၏ ကောင်းကျိုးများ၊ ခရက်ဒစ် အာမခံချက် တို့ကို သုံးစွဲသူအား ပြောပြထားပြီး ဖုန်းယွီနှင့် ကီရီလင်ကိုတို့၏ ပူးပေါင်း လက်မှတ လည်း ပါဝင်သည်။ ကြော်ငြာ စကားလုံးမှာ "သင် စျေးဝယ်ပါ၊ ကျွန်တော် အာမခံပါသည်၊ လုံခြုံ၊ ရိုးရှင်း၊ မြန်ဆန်သည်" ဖြစ်သည်။

ဖုန်းယွီနှင့် ကီရီလင်ကိုတို့၏ပုံရိပ်များလည်း ပါဝင်သည်။ နှစ်ဦးစလုံး လက်ဆွဲနှုတ်ဆက်နေပြီး ပူးပေါင်းဆောင်ရွက်မှု အဆင်ပြေပုံ ပေါ်သော်လည်း ကီရီလင်ကိုသည် မျက်နှာချင်းဆိုင် ဖြစ်ပြီး ဖုန်းယွီသည် နောက်ကျော ပုံရိပ် ဖြစ်သည်။

ဤအီးမေးလ်ကို သုံးစွဲသူ အများအပြား လက်ခံရရှိပြီးနောက် အားလုံးသည် Alipayကို သတိထားမိလာကြသည်။ ကမ္ဘာ့ ဒုတိယ အချမ်းသာဆုံး နှင့် အရှေ့ဥရောပ အချမ်းသာဆုံးတို့ ပူးပေါင်း အာမခံသည်ဆိုလျှင် ပိုမိုလုံခြုံ သည်မှာ သေချာသည်။ ထို့ကြောင့် Alipay၏ မှတ်ပုံတင် သုံးစွဲသူများသည် အလွန်လျင်မြန်သောနှုန်းဖြင့် တိုးတက်လာခဲ့သည်။

...

******

အခန်း ၁၁၄၉ အားလုံး ရင်းနှီးမြှုပ်နှံလိုခြင်း

PayPalနှင့် Alipayတို့သည် အရှိန်အဟုန်ဖြင့် မြှင့်တင်နေချိန်တွင် ရဲလ်ဖ်သည် ဖုန်းယွီထံ ထပ်မံ ဖုန်းခေါ်ဆိုလာသည်။ ဘဏ်လေးခုသည် ဖူမိသားစု၏ ရန်ပုံငွေ ဈေးနှုန်းအတိုင်း တင်းတင်းမာမာ တောင်းဆို နေကြောင်း၊ ၎င်းတို့သည် ဒေါ်လာ သန်း ၈၀၀ ပေးနိုင်သည်ဆိုလျှင် ဖူမိသားစုနှင့် တူညီသော ရှယ်ယာပမာဏ ကို လိုချင်ကြောင်း ပြောကြားခဲ့သည်။

ဆွေးနွေးမှု မအောင်မြင်သောကြောင့် ရဲလ်ဖ်သည် အနည်းငယ် ရှက်ရွံ့နေသည်။ သူဌေး ပေးအပ်သော တာဝန်ကို ပြီးမြောက်အောင် မလုပ်နိုင်ခဲ့ပေ။ ဤတာဝန်သည် အလွန် အခက်အခဲ ကြီးမားသော်လည်း ဖြစ်သည်။

"ကိစ္စမရှိဘူး ရဲလ်ဖ်၊ ရန်ပုံငွေ ရှာဖွေဖို့က အရမ်းရိုးရှင်းပါတယ်။ ကျွန်တော်တို့ စာရင်းမသွင်းဘဲ ရန်ပုံငွေ ရှာဖွေမယ်လို့ သတင်းလွှင့်လိုက်တာနဲ့ လူတွေ အများကြီး လာပြီး ဆက်သွယ်လာမှာ သေချာတယ်။ ဖူရုန်ချီ ရင်းနှီးမြှုပ်နှံခြင်း မတိုင်မီနှင့် ပြီးနောက် ကုမ္ပဏီရဲ့အရွယ်အစားက သိသိသာသာ ပြောင်းလဲသွားတယ်။ ဈေးကွက် ပိုကြီးလာတယ်၊ သုံးစွဲသူ ပိုများလာတယ်။ ရှယ်ယာဈေးနှုန်း ဘာလို့ မတက်နိုင်ရမှာလဲ"

ဖုန်းယွီ ပြောသည်မှာ မှန်သည်။ အဓိကအားဖြင့် ဖူမိသားစု ရန်ပုံငွေ ရှာဖွေမှုသည် လဝက်ပင် မပြည့်သေးပါ။ ရှယ်ယာဈေးနှုန်း နှစ်ဆ တက်သွားပါက မည်သူက အရှုံးပေါ်သည်ဟု မခံစားရဘဲ ရှိမည်နည်း။

ဖူရုန်ချီသည် ဤအပေါ်တွင် ဖုန်းယွီအား အလွန်ကျေးဇူးတင်သည်။ ဖုန်းယွီသည် ဤမျှ စိတ်ရင်းကောင်းသောကြောင့် ဖုန်းယွီကို ၎င်းတို့ ဖူမိသားစု၏ ရေရှည်ပူးပေါင်းဖက်အဖြစ် ရွေးချယ်ခဲ့ခြင်းသည် မှန်ကန်သောလမ်းကြောင်းကို လျှောက်လှမ်းခဲ့ခြင်း ဖြစ်သည်။

ဖူမိသားစုသည်လည်း နှစ်ပေါင်းများစွာ တည်ရှိခဲ့သော မိသားစုဖြစ်သည်။ ထိုအချိန်က စာချုပ်များ သိပ်မခေတ်စား သေးသောအခါ သူတို့သည် စကားဖြင့် ကတိပေးမှု၊ ယုံကြည်မှု ဟူသော စကားလုံးဖြင့် စီးပွားရေး လုပ်ခဲ့ကြသည်။

ထို့နောက် တဖြည်းဖြည်း လူမှုဆက်ဆံရေးဘက်သို့ ပြောင်းလဲလာခဲ့သည်။ တစ်စုံတစ်ယောက်က သင့်ကို ကူညီဖူးပါက နောက်တစ်ကြိမ် ပူးပေါင်းဆောင်ရွက်သည့်အခါ ဤကျေးဇူးတရားကို ပြန်ဆပ်ရမည် ဖြစ်ပြီး စီးပွားရေးတွင် သူတို့အား အထူးလျှော့စျေး အချို့ ပေးရမည် ဖြစ်သည်။

သင်က သူတို့အား လျှော့စျေး ပေးပါက နောက်တစ်ကြိမ် ပူးပေါင်းဆောင်ရွက်သည့်အခါ သူတို့က သင့်အား အကျိုးအမြတ် ပြန်ပေးမည်။ ဤသို့ အပြန်အလှန်ဖြင့် ပူးပေါင်းဆောင်ရွက်မှု ဆက်ဆံရေးသည် ပို၍ခိုင်မာ လာသည်။

ဥပမာအားဖြင့် ယခုအချိန်တွင် ဟောင်ကောင်ရှိ မိသားစုကြီးအချို့၏ ပူးပေါင်းဆောင်ရွက်မှုတွင် ဤအချက်များ ပါဝင်သည်။ သူတို့သည် မိတ်ဆွေဟောင်းများ ဖြစ်ကြသည်။ ပူးပေါင်းဆောင်ရွက်မှု အများစုသည် ဖုန်းခေါ်ဆိုမှု တစ်ခုဖြင့် ပြီးစီးသည်။ ‘ကျွန်ုပ် အကူအညီ လိုအပ်ပါက သင့်ကို အရှုံးမခံစေရပါ။ သင့်တွင် ကျွန်ုပ်၏ အကူအညီ လိုအပ်ပါက ဖုန်းခေါ်ဆိုလိုက်ရုံသာ ဖြစ်သည်။’

ဤလူမှုဆက်ဆံရေးသည် တရုတ်လူမျိုးများကြားတွင်သာ ရှိသည်ဟု မထင်လိုက်ပါနှင့်။ ကမ္ဘာပေါ်ရှိ နိုင်ငံတိုင်းတွင် ဤကဲ့သို့သော ပူးပေါင်းဆောင်ရွက်မှု ဆက်ဆံရေးမျိုး ရှိသည်။ အဝေးမှ မကြည့်ဘဲ လော့စ်အိန်ဂျယ်လိစ် ဖုန်းယွီအဖွဲ့၏ မူရင်း ကလစ်ပါစ် အဖွဲ့ပိုင်ရှင် ဒေါ်နယ်လ်သည် လေကာစ် အဖွဲ့ပိုင်ရှင် ဘပ်စ်နှင့် ရင်းနှီးသော ဆက်ဆံရေး ရှိသည်။ ဘပ်စ်သည် လေကာစ်ကို ဝယ်ယူရန် ပိုက်ဆံကို ဒေါ်နယ်လ်ထံမှ ချေးယူခဲ့ခြင်း ဖြစ်သည်။

သို့သော် ဒေါ်နယ်လ်သည် လော့စ်အိန်ဂျယ်လိစ် အိမ်ခြံမြေတွင် ရင်းနှီးမြှုပ်နှံသောအခါ ငွေကြေး အခက်အခဲနှင့် ကြုံတွေ့ရသည်။ ဖုန်းခေါ်ဆိုမှု တစ်ခုဖြင့် ဘပ်စ်သည် ၎င်းအတွက် ပိုက်ဆံကို အသင့်ပြင်ဆင်ပေးမည် ဖြစ်သည်။ ဤသည်မှာ လူများစွာက စာချုပ်ကိုသာ အသိအမှတ်ပြုသည်ဟု ယူဆသော အမေရိကန်များကြားတွင်ပင် ဤကဲ့သို့သော မိတ်ဆွေဟောင်းများကြား ယုံကြည်မှု ရှိခြင်း ဖြစ်သည်။

ဖူရုန်ချီက ဖုန်းယွီကို စိတ်ရင်းကောင်းသည်ဟု ယူဆသလို ဖုန်းယွီကလည်း ဖူမိသားစုကို ကောင်းမွန်သည် ဟု ယူဆသည်။ သူသည် ဖူမိသားစု၏ အကူအညီ လိုအပ်သောအခါ ဖုန်းခေါ်ဆိုမှု တစ်ခုဖြင့် ဖူမိသားစုက အမြဲတမ်း ကြီးမားသော ထောက်ခံမှု ပေးခဲ့သည်။ အမှန်တကယ်တွင် ဖုန်းယွီ မရှိလျှင်ပင် ဖူမိသားစုသည် ဟောင်ကောင်၏ထိပ်တန်း မိသားစုကြီးများထဲမှ တစ်ခုဖြစ်နေဆဲ ဖြစ်သည်။ ဖူရုန်ချီ၏ စီးပွားရေး အတွေ့အကြုံ ကြွယ်ဝမှုအရ ဖူမိသားစု၏ လက်ရှိ ဖွံ့ဖြိုးတိုးတက်မှုသည် အနည်းငယ် နိမ့်ကျနေလျှင်ပင် အလွန်အမင်း ကွာခြားမည် မဟုတ်ပေ။

ဖူကွမ်းကျန့်နှင့်သူငယ်ချင်း ဖြစ်ခြင်းသည်လည်း အလွန်အရေးကြီးသည်။ ကီရီလင်ကိုနှင့် ဖူကွမ်းကျန့်တို့သည် ဖုန်းယွီ၏အကောင်းဆုံး သူငယ်ချင်းများထဲမှ တစ်ဦး ဖြစ်သည်။ ဖုန်းယွီ၏စိတ်ထဲတွင် ကလေးဘဝ သူငယ်ချင်း ဝမ်တုန်းကျွန်းနှင့်ပင် အဆင့်အတန်း တူညီ နေပေမည်။

သူတို့သည် ယခုအခါ ဖုန်းခေါ်ဆိုမှု တစ်ခုဖြင့် ပူးပေါင်းဆောင်ရွက်မှု ဆွေးနွေးနိုင်သော မိတ်ဆွေများ ဖြစ်ကြသည်။ သူတို့သည် တစ်ဦးနှင့်တစ်ဦး လှည့်ဖြားမည် မဟုတ်ကြောင်း ယုံကြည်ကြသည်။ လီဇီခိုင်နှင့် အခြားသူများနှင့်မူ အသေးစိတ် ဆွေးနွေးရန် လိုအပ်သည်။

...

ရဲလ်ဖ်သည် ဖုန်းယွီ၏တောင်းဆိုချက်အရ Amazonသည် ဒုတိယအဆင့် ပုဂ္ဂလိက ရန်ပုံငွေ ရှာဖွေမှုကို လုပ်ဆောင်တော့မည်ဟူသော သတင်းကို ထုတ်လွှင့်ခဲ့သည်။ ထိုအခါတွင် များစွာသော လူများ စိတ်ဝင်စားလာကြသည်။ ၎င်းတို့တွင် Goldman Sachs ကဲ့သို့ ကမ္ဘာကျော် ရင်းနှီးမြှုပ်နှံမှု အဖွဲ့အစည်းများစွာ ပါဝင်သည်။

ဖုန်းယွီ မမျှော်လင့်ထားသည်မှာ လီဇီခိုင်ပင် ဖုန်းခေါ်ဆိုလာပြီး လီမိသားစုသည် Amazon၏ ရှယ်ယာများကို ဝယ်ယူလိုကြောင်း ပြောကြားခဲ့ခြင်း ဖြစ်သည်။

ဤအချက်သည် ဖုန်းယွီအား အနည်းငယ် စိတ်မသက်မသာ ဖြစ်စေခဲ့သည်။

ပြောရမည်ဆိုလျှင် ဖုန်းယွီသည် လီဇီခိုင်နှင့် ရင်းနှီးသော မိတ်ဆွေ မဟုတ်သော်လည်း ဆက်ဆံရေးမှာ မဆိုးပေ။ အနည်းဆုံးတော့ ပူးပေါင်းဆောင်ရွက်ရာတွင် အငြင်းပွားမှုများ မရှိခဲ့ပေ။

သို့သော် ဖုန်းယွီသည် ဒုတိယအဆင့် ရန်ပုံငွေ ရှာဖွေမှုတွင် ပိုမိုသော ရန်ပုံငွေ ရရှိလိုသည်။ သူသည် ဖူမိသားစုကို ဈေးတစ်ခု ပေးပြီး လီမိသားစုကို အခြား ဈေးတစ်ခု ပေးပါက ၎င်းသည် ခွဲခြားဆက်ဆံ သည်ဟု ထင်ရမည် မဟုတ်လား။

လီမိသားစုသည် ဖုန်းယွီနှင့် ဖူမိသားစုတို့၏ ဆက်ဆံရေး ပိုမို ကောင်းမွန်သည်ကို သိသင့်သော်လည်း ဖုန်းယွီက လီမိသားစုအား နှစ်ဆ ဈေးပေးပါက အနည်းငယ် စော်ကားရာ ရောက်သွားမည် ဖြစ်သည်။

လီဇီခိုင်သည် ဂရုမစိုက်သော်လည်း လီဇီခိုင်နောက်ကွယ်ရှိ လီချောင်ရိမ် နှင့်မူ ဖုန်းယွီသည် အလွန်ခင်မင်ရင်းနှီး ချင်နေသည်။

လီချောင်ရိမ်၏ ကမ္ဘာ့ဆိပ်ကမ်းများ၏ ဘုရင်ဘွဲ့သည် အလကားရခဲ့ခြင်း မဟုတ်ပေ။ ပင်လယ်ရေကြောင်း သယ်ယူပို့ဆောင်ရေးသည် အဓိက နိုင်ငံတကာ သယ်ယူပို့ဆောင်ရေး နည်းလမ်း ဖြစ်သည့် ဤခေတ်တွင် ဆိပ်ကမ်းများကို ထိန်းချုပ်ခြင်းသည် ကြီးမားသော အကျိုးအမြတ်နှင့် ကြီးမားသော အာဏာကို ထိန်းချုပ်ခြင်း ဖြစ်သည်။

ဂျပန်ကုမ္ပဏီများကို ပစ်မှတ်ထားသော အကြိမ်တွင် လီချောင်ရိမ်သည် ဆိပ်ကမ်းများတွင် ဂျပန်ကုမ္ပဏီများ၏ ကုန်ပစ္စည်းများကို ပုံမထားရန် တားမြစ် ခြင်းဖြင့် ထိုဂျပန်ကုမ္ပဏီများကို ကြီးမားစွာ ထိခိုက် စေခဲ့ပြီး ထိုကုမ္ပဏီများ၏ ရှယ်ယာဈေးနှုန်းကို ပြင်းထန်စွာ ကျဆင်းစေခဲ့သည်။

နောက်တစ်ခုမှာ လီချောင်ရိမ်၏ နိုင်ငံရေး အဆင့်အတန်းသည် အလွန် မြင့်မားသည်။ ဤသည်မှာ ဖုန်းယွီ အနည်းငယ် စိုးရိမ်သော အချက်လည်း ဖြစ်သည်။

နောက်ထပ် တစ်ဦးမှာ ဒေါ်နယ်လ် ထရမ့် ဖြစ်သည်။ ဤ အိမ်ခြံမြေ သူဌေး ၏ နယူးယောက်ရှိ အိမ်ခြံမြေ တန်ဖိုးသည် ဆက်လက် မြင့်တက်နေပြီး ယခုအခါ အကြွေးများကို လုံးဝနီးပါး ဆပ်ပြီး ဖြစ်သည်။ သူ့တွင် ချေးငွေ အချို့ ရှိနေသေးသော်လည်း ဘဏ်များသည် အလျင်စလို ပြန်တောင်းခြင်း မပြုတော့ပေ။ အဘယ်ကြောင့်ဆိုသော် ထရမ့်၏အိမ်ခြံမြေ ပိုင်ဆိုင်မှုများ ရှိနေသောကြောင့် ဖြစ်သည်။

ထရမ့်သည် အင်တာနက် ကုမ္ပဏီများတွင် ရင်းနှီးမြှုပ်နှံခဲသော်လည်း ဤကုမ္ပဏီမှာ မတူညီပေ။ ဤကုမ္ပဏီ၏ အဓိက ရှယ်ယာရှင်မှာ ဖုန်းယွီ ဖြစ်သည်။ အင်တာနက် ပူဖောင်း ကာလတွင် အခြားကုမ္ပဏီများ ရှုံးနေချိန်၌ အမြတ်ရနိုင်ခြင်းသည် ဤကုမ္ပဏီ၏ တန်ဖိုးကို ပြသနေသည်။

နောက်ထပ် ခါမဲဒါ မာဆာအို၊ ယာဂူ ဟာဂျီမဲ၊ ကျုံးချင်းရှန် စသည်တို့ကိုလည်း ဖုန်းယွီ ငြင်းပယ်ရန် မလွယ်ပေ။

ဖုန်းယွီသည် အနည်းငယ် အံ့အားသင့်သွားသည်။ သူသည် ဤမျှ မြင့်မားသော ဈေးနှုန်းကို ဖွင့်ပေးခဲ့သော်လည်း ဤမျှ လူများစွာ စိတ်ဝင်စားနေကြသည်။ အထူးသဖြင့် ခါမဲဒါ မာဆာအိုနှင့် အခြားသူများသည် အရင်က Amazonကို စိတ်ဝင်စားကြောင်း တစ်ခါမှ ထုတ်ဖော် ပြောဆိုခြင်း မရှိခဲ့ပေ။ ပိုဆိုးသည်မှာ ခါမဲဒါ မာဆာအိုနှင့် အခြားသူများသည် Amazon၏ ပထမအဆင့် ပုဂ္ဂလိက ရန်ပုံငွေ ရှာဖွေမှု၏ ဈေးနှုန်းကို ကောင်းစွာ သိနေကြသည်။ ဒုတိယအဆင့် ဈေးနှုန်း နှစ်ဆ တက်လာသော်လည်း သူတို့ ပါဝင်လိုသေးသည်လား။

လူတိုင်း ပါဝင်လိုသောကြောင့် ဒုတိယအဆင့်ကို အတွင်းလူများဖြင့်သာ ရှင်းလင်းလိုက်လျှင် ပိုကောင်းမည်။ လူများစွာ ရှိသောကြောင့် လီမိသားစု အထင်လွဲမည်ကို စိုးရိမ်စရာ မလိုတော့ပေ။ ဒုတိယအဆင့် ဈေးနှုန်းသည် ပထမအဆင့်နှင့် မတူညီ ရမည်သာ ဖြစ်သည်။

ဖုန်းယွီသည် ထိုက်ဟွာ ဟိုးလ်ဒင်း အုပ်စုနှင့် ဖုန်းယွီ ဟိုးလ်ဒင်း အုပ်စု၏ အတွင်းပိုင်းတွင် ဤပုဂ္ဂလိက ရန်ပုံငွေ ရှာဖွေမှု၏ အခြေအနေများကို ထုတ်လွှင့်သောအခါ ရှယ်ယာ ဝယ်ယူလိုသော ပမာဏသည် Amazonက ထုတ်ပြန်ရန် စီစဉ်ထားသော ပမာဏထက် လုံးဝကျော်လွန် နေသည်ကို တွေ့ရှိခဲ့သည်။

ဖုန်းယွီသည် ထိုမျှ များပြားစွာ ထုတ်ပြန်ရန် အစီအစဉ် မရှိပေ။ ဤပိုက်ဆံပမာဏသည် Amazonကို တိုးချဲ့ရန် လုံလောက်နေပြီ ဖြစ်သည်။ အနာဂတ်တွင် ငွေကြေး မလုံလောက်သေးပါက ထိုအချိန်သည် Amazon တကယ်တမ်း စာရင်းသွင်း ရန်ပုံငွေရှာဖွေ ရမည့် အချိန် ရောက်လာပေလိမ့်မည်။

ထို့ကြောင့် ဖုန်းယွီသည် သူတို့အား ဤတစ်ကြိမ် ထုတ်ပြန်သော ရှယ်ယာပမာဏသည် ကန့်သတ်ထားကြောင်း ပြောကြားခဲ့သည်။ လူတိုင်း ဤမျှ စိတ်အားထက်သန်ပါက ခွဲဝေပေးရန် မလုံလောက်ပေ။ ထို့ကြောင့် လူတိုင်းနှင့် ပြန်လည် ဆွေးနွေး ခဲ့ပြီး လူတိုင်း ဝယ်ယူမည့် ပမာဏကို တစ်ဝက်နီးပါး လျှော့ချ ခဲ့သည်။ ထိုအခါမှသာ အတော်အတန် နီးစပ်လာသည်။

၎င်းတို့သည် ပုဂ္ဂိုလ်ရေး အမည် ဖြင့် ဖြစ်စေ၊ ကုမ္ပဏီ အမည် ဖြင့် ဖြစ်စေ၊ ဖုန်းယွီ၏ ဤထုတ်ပြန်သည့် ဈေးနှုန်းကို အားလုံး သဘောတူခဲ့ကြသည်။ ဖုန်းယွီသည် ခါမဲဒါ မာဆာအိုကို အရင်က အဘယ်ကြောင့် ဝယ်ယူရန် မတောင်းဆိုခဲ့ကြောင်း မေးမြန်းခဲ့သည်။

ခါမဲဒါ မာဆာအိုသည် ဖုန်းယွီအား ဤသို့ ပြောပြခဲ့သည်။ အရင်က ဖုန်းယွီသည် ဤအရာကို အမေရိကန်ရှိ ထိုဘဏ်များနှင့် ပူးပေါင်းဆောင်ရွက်ရန် အသုံးပြုမည်ဟု ထင်ခဲ့သောကြောင့် မတောင်းဆိုဝံ့ခဲ့ပေ။ ယခု ပူးပေါင်းဆောင်ရွက်ခြင်း မရှိတော့ကြောင်း သိသောအခါ အခွင့်အရေး ရသည်နှင့် ဝယ်ယူ ရမည်မှာ သေချာသည်။

ဤအကြောင်းပြချက်သည် ဖုန်းယွီအား အနည်းငယ် ရှက်ရွံ့စေခဲ့သည်။ ငွေရှာရန် ကောင်းသော အခွင့်အရေးကို အဘယ်ကြောင့် အတွင်းလူများကို အရင် မစဉ်းစားခဲ့မိသနည်း။ ဤသူများအားလုံးသည် ယခုအခါ ချမ်းသာကြွယ်ဝ နေကြပြီ ဖြစ်သည်။

နောက်တစ်ကြိမ် ဤကဲ့သို့ဆိုလျှင် အတွင်းလူများကို အရင် အသိပေးသင့်သည်ဟု ထင်သည်။ ၎င်းတို့သည် ဖုန်းယွီနောက်လိုက်လျှင် ငွေရှာနိုင်သည်ကို သိစေရန် ဖြစ်သည်။

...

******