အမုန်းတရား လက်စားချေသူ

အလွန်ကြမ်းတမ်းသော မဟာလင်းလက်ဓား အခင်းအကျင်းနှင့် မတူဘဲ ကောင်းကင်သုတ်သင်သူ အခင်းအကျင်းသည် တိုက်စစ်နှင့် ခံစစ်ကို ပေါင်းစပ်ထားသည့် ကြီးမားသော အခင်းအကျင်းတစ်ခု ဖြစ်ပြီး အလွန်ပင် နက်ရှိုင်းလှသည်။

ဆိုစဘတ်နှင့် ဒီလော့စ်ရိုတို့ စွမ်းအား ဖိနှိပ်မှုကို တစ်ချိန်တည်းတွင် ခံစားလိုက်ရ သော်လည်း အမှန်တကယ်တွင် အုပ်စိုးသူ နှစ်ဦး၏ စွမ်းအားဖြင့် သူတို့ အပြည့်အဝ ပြန်မကောင်းမွန်လျှင်ပင် သူတို့သည် ဆက်ခ်ရက်တောင် အခင်းအကျင်းထဲမှ လူတိုင်းထက် များစွာ သာလွန်နေ၏။ ပြိုင်ဘက်ကို အမှန်တကယ် ဖိနှိပ်ရန် သို့မဟုတ် ကိုယ်တိုင် တူညီသောအဆင့်သို့ မြှင့်တင်ရန် အလွန် ခက်ခဲ၏။ ကောင်းကင် သုတ်သင်သူ အခင်းအကျင်း၏ တကယ့် လျှို့ဝှက်ချက်မှာ ဖိနှိပ်ခြင်း သို့မဟုတ် မြှင့်တင်ခြင်း မဟုတ်ဘဲ ဟန်ချက်ညီခြင်း ပင်။

ငါးထောင့်ကြယ် အခင်းအကျင်းမှ ဖွဲ့စည်းထားသော အထူးတိုင်းပြည် စွမ်းအားမှ တစ်ဆင့် ဆိုစဘတ်နှင့် ဒီလော့စ်ရိုတို့၏ ခွန်အားကို စေတန်၊ မိုက်ကယ်နှင့် ဖိုက်သွန်တို့ထံ လွှဲပြောင်း ပေးလိုက်ရာ သိမ်မွေ့သော ဟန်ချက်ညီမှု တစ်ခုကို ဖြစ်သွားစေသည်။

မည်သို့ပင် ဆိုစေကာမူ အုပ်စိုးသူ နှစ်ဦး၏ စွမ်းအားမှာ SSSS+++ အဆင့် ရှိနေသည်။ ထိုကဲ့သို့ ဟန်ချက်ညီမှုက အချိန် အကြာကြီး တည်တံ့နေလိမ့်မည် မဟုတ်သည်မှာ သေချာသော်လည်း ဟန်ချက်ညီခြင်း စွမ်းအားဖြင့် ချန်လွေ့နှင့် ဇိုလာတို့ ထိုနေရာတွင် မရှိလျှင်ပင် စေတန်နှင့် အခြား နှစ်ဦးက ထိုကာလ အတွင်း အုပ်စိုးသူ နှစ်ဦးကို ယှဉ်ပြိုင်ရန် အဆင့်တူ စွမ်းအား ရှိနေနိုင်သေးသည်။

စစ်မြေပြင်က အမြဲ ပြောင်းလဲနေ၏။ အောင်ပွဲအတွက် မျှော်လင့်ချက် တစ်ခု ရှိနိုင်လောက်ပေသည်။

ဆိုစဘတ်က လက်ရှိတွင် ဖိုက်သွန်၏ လုံးဝ ဖိနှိပ်ခြင်းကို ခံနေရသည်။ သူ မူလ ရွေးချယ်ခဲ့သော နတ်သူငယ် တစ်ပိုင်း ခန္ဓာကိုယ်က မြားပစ်ရာ အကောင်းဆုံး ဖြစ်သည်။ မီးလျှံနီလေးက လက်ထဲတွင် ရှိနေခြင်းဖြင့် ပို၍ အားကောင်းသော်လည်း အနီးကပ် တိုက်ခိုက်ရေး စွမ်းရည်မှာလည်း အားမနည်းပေ။ သူက ကောင်းကင်တမန် သုံးပါး ပူးပေါင်းထားသော [နတ်ဝင်သည် အခင်းအကျင်း]ကို လက်သီးများ သုံး၍ တိုက်ရိုက် ချိုးဖျက်ခဲ့ဖူးသည်။ သို့သော် ယခု ဆိုစဘတ်က အလွန်ပင် စိတ်ဓာတ် ကျနေသည်။ သူက မီးလျှံနီလေးကို သိမ်းဆည်းပြီး ဖိုက်သွန်ကို တိုက်ရိုက် ကိုင်တွယ်ရန် သူ၏ လက်သီးများကို အသုံးပြုချင်ခဲ့သည်။ သို့သော် ဖိုက်သွန်၏ ပျော့ပျောင်းပြီး ထူးခြားသော တိုက်ခိုက်မှု ပုံစံများက သူ့ကို အကူအညီမဲ့ ဖြစ်စေ၏။ သူ၏ အားကောင်းသော တိုက်ခိုက်မှုက ဝါဂွမ်းကို ရိုက်နှက်နေသကဲ့သို့ ဖြစ်နေပြီး အင်အားထုတ်စရာ နေရာ မရှိပေ။ တစ်ခါတစ်ရံတွင် ပြိုင်ဘက်က သူ၏ စွမ်းအားဖြင့်ပင် တန်ပြန် တိုက်ခိုက်၏။

ဖိုက်သွန်သည် မူလက မီးအိမ်ဝိညာဉ် မန်လေ့စ်၏ အနီးကပ် တိုက်ခိုက်ရေး ကျွမ်းကျင်မှုကို ပိုင်ဆိုင်ထားသော်လည်း ဂေဘရီရယ် ပေးခဲ့သော သူတော်စင် တိုက်ခိုက်ရေး နှလုံးသားက သူ့ကို သေခြင်းမှ ကယ်တင်ခဲ့သည်။ သူ၏ ခန္ဓာကိုယ်နှင့် ဝိညာဉ်ကိုလည်း ပြန်လည် ပုံဖော်ခဲ့သည်။ သူတော်စင် တိုက်ခိုက်ရေး နှလုံးသားကို ပိုင်နိုင်ပြီး နောက်တွင် သူက ဂေဘရီရယ်၏ “ကိုယ်ခံပညာ ကျွမ်းကျင်မှု အပြည့်အစုံ” အထူးဂုဏ်သတ္တိ ရရှိခဲ့သည်။ သူ့ကို အနီးကပ် တိုက်ခိုက်ရေးတွင် ထိပ်တန်းဟု ခေါ်ဆိုနိုင်၏။

သူ၏ ထိုးစစ်က ရေလှိုင်းလုံးများကဲ့သို့ ဆက်တိုက် ဖြစ်ပေါ်နေပြီး ဆိုစဘတ်ကို အသက်ရှူမဝလုနီးပါး ဖြစ်စေခဲ့သည်။

“ဖြောင်း...” ဖိုက်သွန်က သူ၏လက်ကို လှုပ်ခါလိုက်ပြီး ဆိုစဘတ်၏ လည်ပင်းကို နောက်တစ်ကြိမ် ရိုက်နှက်လိုက်သည်။ ထိုထိုးနှက်မှုက ဆိုစဘတ်၏ ကိုယ်ပိုင် စွမ်းအားနှင့် ပေါင်းစပ်သွားရာ ဒဏ်ရာများ ထင်းခနဲ ကျန်ရစ်ခဲ့လေသည်။ သူ၏ ကော်လာက အားကောင်းသော ကြာပွတ်ဖြင့် ရိုက်နှက် ခံရသကဲ့သို့ပင် အစိမ်းရောင် ထင်းနေ၏။

အကယ်၍ ချန်လွေ့သာ ရှိနေခဲ့လျှင် အံ့ဩသွားပေလိမ့်မည်။ ဖိုက်သွန်၏ တိုက်ခိုက်မှု ပုံစံမှာ သူ၏ [ရေနက်နဲ ဆန်းကြယ်မှု] ပင်။

မဟုတ်ပေ။ ၎င်းက [ရေနက်နဲ ဆန်းကြယ်မှု]ထက် ပိုမို၍ သန့်စင်ပြီး လက်တွေ့ကျသည်။ ထို့ပြင် တခြား လောကမှ ထိုက်ကျိနှင့် ပိုနီးစပ်နိုင်၏။ ထိုအရာကက ကျင့်ကြံခြင်း သို့မဟုတ် ဖျော်ဖြေ တင်ဆက်ခြင်းမျိုး မဟုတ်ဘဲ တိုက်ခိုက်ခြင်းနှင့် သတ်ဖြတ်ခြင်း၏ စစ်မှန်သော အနုပညာပင်။

“ချီးပဲ...” ဆိုစဘတ်က ဖိုက်သွန် တစ်ယောက်တည်းကြောင့် ထိုကဲ့သို့ အတိုင်းအတာအထိ ဖိအားပေးခြင်း ခံရလိမ့်မည်ဟု မမျှော်လင့်ထားခဲ့ပေ။ ဟိန်းသံနှင့်အတူ သူသည် အသူရာ ချောက်နက် ပုံစံအဖြစ် ပြောင်းလဲသွားပြီ ဖြစ်သည်။ သူ၏စွမ်းအားက လျင်မြန်စွာ မြင့်တက် လာခဲ့သည်။ လွှမ်းမိုးထားသော လက်သီးအင်အား တစ်ခုက ဖိုက်သွန်ကို ဝန်းရံထားလိုက်၏။

ဖိုက်သွန်က ရုတ်တရက် ဖိအားတိုး လာသည်ကို ခံစားလိုက်ရသော်လည်း ငွေနှင့် အနီရောင် မျက်ဆံများသည် တည်ငြိမ်နေပြီး စွမ်းအား အကုန်လုံးဖြင့် ဆိုစဘတ်နှင့် တိုက်ခိုက်ခဲ့သည်။

ဒီလော့စ်ရို၏ ပြိုင်ဘက်မှာ မိုက်ကယ် ဖြစ်သည်။ သိဒ္ဓိလက်ဝါးကပ်တိုင်ဓားသည် တလက်လက် အလင်းရောင်ဖြင့် အမုန်းတရား အရှင်သခင်ကို ခုတ်ပိုင်း လိုက်သည်။ ဒီလော့စ်ရိုက အသူရာ ချောက်နက် ပုံစံကို အသက်သွင်းပြီး ဖြစ်သည်။ သူက လက်များကို ဆန့်တန်း လိုက်ပြီး သိဒ္ဓိလက်ဝါးကပ်တိုင်ဓားကို လက်ဗလာဖြင့် ဆုပ်ကိုင်လိုက်၏။

ချွန်ထက်သော သိဒ္ဓိလက်ဝါးကပ်တိုင်ဓားက ဒီလော့စ်ရို၏ လက်သည်းများကို မဖြတ်နိုင်ခဲ့ပေ။ ဒီလော့စ်ရို၏ လက်သည်းများ တင်းကျပ် လာသောအခါ ဓားက တင်းကျပ်စွာ ချုပ်ကိုင်ခြင်း ခံလိုက်ရသည်။ မိုက်ကယ်၏ မျက်လုံးများက ရွှေရောင် အလင်းဖြင့် လောင်ကျွမ်းနေပြီးနောက် သူ၏ဓားသည် ထက်မြက်သော စွမ်းအားဖြင့် ပြည့်နှက် နေသော်လည်း ဒီလော့စ်ရို၏ ထိန်းချုပ်မှုမှ မလွတ်မြောက်နိုင်သေးပေ။

ဒီလော့စ်ရိုက လှောင်ရယ်လိုက်သည်။ “ဒီဓားက အဲဒီတုန်းက ကောင်းကင်တမန် မြို့တော်ရဲ့ ကျက်သရေရှိ အဆောင် ပစ္စည်းပဲ။ အရင်တစ်ခါ ခီလီယာနာကြောင့် မကျိုးသွားတာကိုပဲ ငါ အံ့ဩမိတယ်။ ကံဆိုးချင်တော့ ဒီလိုမျိုး အမှောင်ဒြပ်စင် ပတ်ဝန်းကျင်မှာ ဒါက စွမ်းအား တစ်ဝက် ကိုတောင် မထုတ်နိုင်ဘူး...”

စကား မဆုံးခင်မှာပင် မိုက်ကယ်၏ မျက်လုံးများထဲမှ ရွှေရောင် အလင်းက ရုတ်တရက် အရောင်စုံ ပြောင်းသွားသည်။ သိဒ္ဓိလက်ဝါးကပ်တိုင်ဓား လှည့်သွားရာ ဒီလော့စ်ရိုက သူ၏လက်ထဲမှ စွမ်းအား ကွဲပြားနေသည်ကို ချက်ချင်း ခံစားလိုက် ရသော်လည်း လွှတ်လိုက်ရန် အလွန်ပင် နောက်ကျသွားပြီ ဖြစ်သည်။ စူးရှသော နာကျင်မှုတစ်ခု ဖြစ်လာခဲ့သည်။ ဓားကို ဆုပ်ကိုင်ထားသော သူ၏ လက်ချောင်း အားလုံး ပြတ်တောက်သွား၏။

“ဒါက...” ဒီလော့စ်ရိုက အရောင်စုံ အလင်း စီးဆင်းနေသော ဓားရှည်ကို ကြည့်ရင်း ထိတ်လန့်သွား၏။ နောက်ထပ် တိုက်ခိုက်တော့မည့် အချိန်တွင် သူက ရုတ်တရက် ဝေဝါးမှု တစ်ခုကို ခံစားလိုက် ရသည်။ သူ၏အာရုံများ ရှင်းလင်းလာရာ ဓားထိပ်ဖျားက သူ၏ ရင်ဘတ်ထဲမှ ထိုးထွက်လာသည်။ ကတ္တရာစေးကဲ့သို့ မည်းနက်နေသော ဓားထိပ်ဖျားပင်။

စေတန်၏ဓား...

ဘေးတွင် ရှိနေခဲ့သော စေတန်က ဒီလော့စ်ရို အာရုံပျံ့လွင့် နေသည့် အခိုက်အတန့်ကို အခွင့်ကောင်း ယူပြီး သေစေနိုင်သော ထိုးနှက်မှုကို စတင် လိုက်သည်။

အရှိန် မြှင့်ထားသော အချိန်စွမ်းအား အောက်တွင် လုပ်ငန်းစဉ် ကျော်သွားပြီး ရလဒ်က တိုက်ရိုက် ပေါ်လာခဲ့သည်။ ဒီလော့စ်ရို၏ ခံစားချက်က အချိန်အရှိန် မြှင့်တင်မှုကြောင့် တားဆီးခံလိုက်ရသည်။ အချိန် ပုံမှန်အတိုင်း ပြန်ဖြစ်လာချိန်တွင် သူ ပင်ကိုအသိစိတ်ဖြင့် ခုခံကာကွယ်ရန်၊ ရှောင်တိမ်းရန် ဆန္ဒရှိသော်လည်း သူက အရေးကြီးသော နေရာတွင် အထိုးခံလိုက် ရပြီဖြစ်သည်။

စေတန်တွင် အချိန်ကို တစ်ချိန်တည်း အရှိန်မြှင့်တင်ခြင်းနှင့် နှေးကွေးစေခြင်း စွမ်းအား ရှိသည်။ ကျွမ်းကျင်မှုအရ သူက ချန်လွေ့ထက် ပိုသာသည်။

ဒီလော့စ်ရိုက သူတို့၏ ညှပ်ပူးညှပ်ပိတ် တိုက်ခိုက်မှုမှ လျင်မြန်စွာ လွတ်မြောက် လာပြီး အဝေးတွင် ပေါ်လာခဲ့သည်။ သူက ပြတ်သွားသော လက်ချောင်းများနှင့် သူ၏ ရင်ဘတ်ပေါ်မှ သွေးထွက်နေသော အပေါက်ကို ကြည့်ပြီး လှောင်ရယ် လိုက်သည်။ ပြင်းထန်သော ဒဏ်ရာ နှစ်ခုက မျက်စိဖြင့် မြင်နိုင်သော အရှိန်ဖြင့် လျင်မြန်စွာ ပြန်ကောင်းမွန်လာခဲ့သည်။

ဒီလော့စ်ရိုတွင် ရာဖယ်ရယ်နှင့် ဆာရီရယ်တို့နှင့် ဆင်တူသည့် မသေနိုင်သော ခန္ဓာကိုယ် ရှိသည်။ သူ့တွင် လုံလောက်သော စွမ်းအား ရှိနေသ၍ မည်သည့် ဒဏ်ရာမဆို အဆုံးမဲ့ လျင်မြန်စွာဖြင့် ကုသနိုင်သည်။

“ဖိုက်သွန်ကို သွားကူလိုက်။ သူ့ကို ငါ့ဆီ ထားခဲ့။” မိုက်ကယ်က ပြောလိုက်သည်။ မူလ အစီအစဉ်မှာ အစွမ်းအထက်ဆုံး ဆိုစဘတ်ကို ထိန်းထားရန် ဖြစ်ပြီး အားအနည်းဆုံး ဖြစ်သော ဒီလော့စ်ရိုကို ရှင်းပစ်ရန် အတူတကွ လုပ်ဆောင်ကာ ထို့နောက် သူတို့က အကြောက်တရား အရှင်သခင်ကို ထပ်မံ၍ ကိုင်တွယ်မည် ဖြစ်သည်။

သို့သော် ခုနက တိုက်ပွဲမှ ကြည့်လျှင် ကောင်းကင်သုတ်သင်သူ အခင်းအကျင်း၏ စွမ်းအားက ဒီလော့စ်ရို၏ မသေနိုင်ခြင်းကို မထိန်းချုပ် နိုင်ခဲ့ပေ။ အကယ်၍ ထိုအတိုင်းသာ ဆက်သွားနေပါက အုပ်စိုးသူ နှစ်ဦးက ကောင်းကင်သုတ်သင်သူ အခင်းအကျင်း၏ ဟန်ချက်ညီ စွမ်းအားမှ လွတ်မြောက်သွားခဲ့ပါက ဒီလော့စ်ရိုကို သူတို့ အမှန်တကယ် မသတ်နိုင်မည်ကို စိုးရိမ်ရ၏။

ထို့ကြောင့် မိုက်ကယ် ပြတ်သားသော ဆုံးဖြတ်ချက်တစ်ခုကို ချပြီး ဗျူဟာကို ပြောင်းလဲလိုက်သည်။ သူ ကိုယ်တိုင်က ဒီလော့စ်ရိုကို ထိန်းထားမည်။ ထို့နောက် စေတန်နှင့် ဖိုက်သွန်တို့က ကောင်းကင် သုတ်သင်သူ အခင်းအကျင်း သက်တမ်း မကုန်ဆုံးမီ ဆိုစဘတ်ကို ပူးပေါင်းကာ သတ်ပစ်မည် ဖြစ်သည်။

စေတန်က ချက်ချင်းပင် ဖိုက်သွန်နှင့် ပူးပေါင်းရန် သွားရောက်ခဲ့သည်။ ထိုအချိန် ဖိုက်သွန်က ဆိုစဘတ်နှင့် တိုက်ခိုက် နေသည်။ ဆိုစဘတ်တွင် ရေတွက်၍ မရနိုင်သော နှစ်ပေါင်းများစွာ ဉာဏ်နှင့် အတွေ့အကြုံများလည်း ရှိနေသည်။ ဖိုက်သွန်၏ အင်အားကို ငှားရမ်းသည့် တိုက်ခိုက်မှုပုံစံနှင့် လိုက်လျောညီထွေ ဖြစ်အောင် ပြုလုပ်ပြီး နောက်တွင် ဆိုစဘတ်က ယခင်လို တုံ့ပြန်မှုမရှိဘဲ အရိုက်ခံရသော အခြေအနေမှ လျင်မြန်စွာ ပြောင်းလဲပစ်နိုင်ခဲ့ပြီးနောက် ဖိုက်သွန်ကို ဖိနှိပ်ထားခဲ့သည်။

စေတန်ရောက်ရှိလာခြင်းက ဆိုစဘတ်ကို သတိပေးလိုက်သည်။ ဖိုက်သွန်၏ တိုက်ခိုက်မှုများ ဆက်လက်၍ ဖြစ်နေသော်လည်း စေတန်က ဝင်ရောက် စွက်ဖက်ရန် အကောင်းဆုံး အခွင့်အရေးကို ခဏတာ မတွေ့ရှိခဲ့ပေ။ ထိုအစား သူက ဘေးတွင် ရပ်နေရုံသာ ရှိသော်လည်း ၎င်းမှာ ဆိုစဘတ်အား ဖိအားကို ခံစားစေခဲ့ပြီး ဖြစ်သည်။

“မင်း ငါ့ကို တစ်ယောက်တည်း ရင်ဆိုင် ချင်တာ သေချာလား။” ဒီလော့စ်ရိုက တစ်ယောက်တည်း ရင်ဆိုင်နေသော မိုက်ကယ်ကို ကြည့်ရင်း ထူးဆန်းသော အပြုံးတစ်ခုကို ပြသလိုက်လေသည်။ “ဝမ်းနည်းစရာပဲ။ ငါ အကြိုက်ဆုံးက အနည်းနဲ့ အများကို တိုက်ခိုက်ရတာပဲ။”

မိုက်ကယ် အပိုစကားများ မပြောခဲ့ပေ။ သိဒ္ဓိလက်ဝါးကပ်တိုင်ဓားကို ဒီလော့စ်ရိုထံ ခုတ်ပိုင်းလိုက်စဉ် မရေမတွက်နိုင်သော အရောင်စုံ သက်တန့်များ ဖြစ်စေခဲ့၏။ ထိုတစ်ကြိမ် ဒီလော့စ်ရိုက ဓားကို မဖမ်းခဲ့ပေ။ ပုံရိပ်က ပျံသန်းနေသော သက်တန့်ကို ရှောင်တိမ်းရင်း အရှိန်မြင့် ဆက်တိုက် ရွေ့လျား နေခဲ့သော်လည်း ပျံသန်းနေသော သက်တန့်၏ စွမ်းအားမှာ အတော်လေး အံ့ဩဖွယ် ကောင်းလှသည်။ ပွတ်တိုက်မိရုံသာ ရှိလျှင်ပင် ကြီးမားသော ပျက်စီးမှုကို ဖြစ်ပေါ်စေနိုင်၏။

“ဒီအခင်းအကျင်းစုတ်တော့...” ဒီလော့စ်ရို အရေးကြီးသော နေရာများကို ရှောင်ရှား၍ နိုင်ခဲ့သော်လည်း ဒဏ်ရာ များစွာက သူ၏မျက်နှာနှင့် ကိုယ်ပေါ်တွင် ပေါ်လာခဲ့သည်။ သူက လက်များကို ဝှေ့ယမ်းလိုက်‌ရာ သတ်ဖြတ်ချင်စိတ် အရိပ်အယောင် တစ်ခု ပျံ့နှံ့သွားခဲ့သည်။ သွေးမြူခိုးများ ထွက်ပေါ်လာပြီး ရေတွက် မရနိုင်သော အသူရာချောက်နက် မကောင်းဆိုးဝါးများ နောက်တစ်ကြိမ် ပေါ်လာခဲ့ပြန်သည်။

ထိုမကောင်းဆိုးဝါးများ အားလုံးသည် ခေါင်းဆောင်များနှင့် လက်ရွေးစင်များ ဖြစ်ကြသည်။ သူတို့၏ စွမ်းအားမှာ သာမန် အဆင့်များထက် ပိုသန်မာသည်။ သူတို့၏ အတော်များများက နတ်ဘုရား တစ်ပိုင်း အဆင့်တွင် ရှိနေကြသည်။ သူတို့က ဒီလော့စ်ရို၏ လက်ရွေးစင် တပ်ဖွဲ့များ ဖြစ်သည်။ သူတို့က အခင်းအကျင်းကို ဖျက်ဆီးရန် ကြိုးစားနေကြသည်။

ကောင်းကင်သုတ်သင်သူ အခင်းအကျင်းကို စေတန်၏ စိတ်ဖြင့် ထိန်းချုပ်ထား၏။ မကောင်းဆိုးဝါးများက ငါးထောင့်ကြယ် အခင်းအကျင်းထဲမှ ပြင်ပလူများ ကဲ့သို့ပင်။ သူတို့ ဟန်ချက် ညီခြင်း မရှိသေးသော်လည်း သူတို့က အခင်းအကျင်း၏ စွမ်းအားကြောင့် အဆက်မပြတ် ဝါးမျိုခြင်းခံနေရသည်။

ဒီလော့စ်ရိုက အလုပ် မဖြစ်သည်ကို မြင်ရာ ဗျူဟာကို ချက်ချင်းပင် ပြောင်းလဲလိုက်သည်။ ထိုလက်ရွေးစင် တပ်ဖွဲ့များ အားလုံးက မိုက်ကယ်ထံသို့ ပြေးဝင်သွားကြပြီး တိုက်ခိုက်မှု တစ်ခု စတင်ရန် အခွင့်အရေးကို စောင့်ဆိုင်း နေခဲ့သည်။

မိုက်ကယ် နှာခေါင်းရှုံ့ပြီး မြေပေါ်သို့ ဆင်းသက်လိုက်၏။ သိဒ္ဓိလက်ဝါးကပ်တိုင် ဓားက မြေပြင်ဘက်သို့ ထိုးစိုက်လိုက်ပြီး ဖောက်ထွင်းမြင်ရသော အလင်းတန်းများ ပျံ့နှံ့သွားခဲ့လေသည်။ ချဉ်းကပ်လာသော အသူရာချောက်နက် မကောင်းဆိုးဝါးများ တစ်ကောင်ပြီး တစ်ကောင် ခဲသွားပြီး သူတို့ ၏ခန္ဓာကိုယ်များက လျင်မြန်စွာ ပြိုကွဲသွားကာ ပျောက်ကွယ်သွားခဲ့သည်။ ထိုလုပ်ငန်းစဉ် အတွင်း၌ မိုက်ကယ်၏ အာရုံက ဒီလော့စ်ရိုကို အသေအချာ ချုပ်ကိုင်ထားနေသည်။ သူ့ကို အလစ် တိုက်ခိုက်ရန် အခွင့်အရေး အနည်းငယ်မျှ မပေးခဲ့ပေ။

ရုတ်တရက်ပင် ရုတ်ခြည်း ပြောင်းလဲမှု တစ်ခု ဖြစ်ပွားခဲ့သည်။

မိုက်ကယ်ထံသို့ ပြေးဝင်လာနေသော အသူရာချောက်နက် သခင်များစွာထဲမှ တစ်ဦးက သိဒ္ဓိလက်ဝါးကပ်တိုင်ဓား၏ တိုက်ခိုက်မှုကို ရုတ်တရက် ဖောက်ပြီး သွေးရောင်အလင်းစီးကြောင်းတစ်ခုအဖြစ် ပြောင်းလဲကာ မိုက်ကယ်၏ နောက်ဘက် ပြေးဝင်သွားခဲ့သည်။

ပြင်းထန်သော သတိပေးချက် တစ်ခု မိုက်ကယ်၏ စိတ်ထဲတွင် ရှိနေခဲ့သည်။ နှစ်ပေါင်းများစွာ တိုက်ခိုက်ရေး ပင်ကို အသိစိတ်များက သူ့ကို ချက်ချင်းပင် တုံ့ပြန်စေခဲ့သည်။ သူ၏ ဘယ်လက်က ဓားတစ်ချောင်းအဖြစ် ပြောင်းလဲသွားပြီး ရန်သူကို နောက်ပြန် ခုတ်လိုက်၏။

“ဘုန်း...”

ထိုးနှက်ချက်က မျှော်လင့်မထားဘဲ ပြိုင်ဘက်၏ ခုခံခြင်းကို ခံလိုက်ရပြီး မိုက်ကယ်က အသူရာချောက်နက် သခင် ပြသခဲ့သော စွမ်အားက ဒီလော့စ်ရိုထက် အားနည်းသော်လည်း သူနှင့် သိပ်ပြီး မကွာကြောင်း ချက်ချင်း ခံစားမိသွား၏။

ဒါက ဒီလော့စ်ရို မဟုတ်ဘူး။ တခြား တစ်ယောက်ပဲ။

စိတ်ဆန္ဒ အဆင့်ကြောင့် အသူရာ ချောက်နက်သည် အုပ်စိုးသူ သုံးဦးမှလွဲ၍ နတ်ဘုရား-ယောင် မကောင်းဆိုးဝါးများ မဖန်တီးနိုင်ခဲ့သော်လည်း ယခု ထိုသို့သော ရန်သူတစ်ဦး ရှိနေလေသည်။

တစ်ချိန်တည်းမှာပင် ဒီလော့စ်ရိုလည်း လှုပ်ရှားလိုက်၏။ သူသည် သွေးရောင် အလင်းတစ်ခုအဖြစ်သို့ ပြောင်းလဲသွားပြီး မိုက်ကယ်ထံသို့ ပြေးဝင် သွားခဲ့သည်။ မိုက်ကယ်က အရှေ့နှင့် အနောက်မှ တိုက်ခိုက်ခံရ၍ အော်ဟစ်လိုက်သည်။ လက်ထဲမှ သိဒ္ဓိလက်ဝါးကပ်တိုင်ဓားက တောက်ပစွာ လင်းလက်လာနေခဲ့ပြီး ဒီလော့စ်ရိုကို ခုတ်ပိုင်းလိုက်ကာ သူ့ကို နောက်ဆုတ်ရန် အတင်းအကျပ် ဖိအား ပေးလိုက်သော်လည်း သူက ရန်သူ၏ နောက်ထပ် လှုပ်ရှားမှုကို မခံနိုင်တော့။ သူ၏ နောက်ကျောက ချွန်ထက်သော လက်နက်တစ်ခုကြောင့် ထိုးဖောက်ခြင်း ခံလိုက်ရလေသည်။ အသူရာချောက်နက် စွမ်းအား လှိုင်းဂယက်များ စိမ့်ဝင်လာပြီး ခန္ဓာကိုယ်တစ်ခုလုံးသို့ ပျံ့နှံ့သွားခဲ့သည်။

မိုက်ကယ် အံကြိတ်လိုက်သည်နှင့် ဒြပ်စင်လက်မောင်း နောက်တစ်ကြိမ် လင်းလက်၍ သွားခဲ့သည်။ ခရမ်းရောင် တုန်ခါမှုတစ်ခုသည် ခန္ဓာကိုယ်မှ ပေါက်ကွဲ ထွက်လာပြီး နောက်မှ မကောင်းဆိုးဝါးကို လွင့်စင်သွားစေခဲ့သည်။ ဒီလော့စ်ရိုက ကောင်းကင်သုတ်သင်သူ အခင်းအကျင်းကို ဖျက်ဆီးရန် ရည်ရွယ်ချက်ဖြင့် လက်ရွေးစင် တပ်ဖွဲ့များကို လွှတ်ပေးခဲ့ခြင်း မဟုတ်ဘဲ အလစ်တိုက်ခိုက်ရန် ထိုရန်သူကို လွှတ်ပေးခဲ့ခြင်းဖြစ်ကြောင်း နောက်ဆုံး သူ နားလည်သွားခဲ့သည်။

ခုနက ပြောင်းလဲမှုမှာ ချက်ချင်း ဖြစ်ပွားခဲ့ခြင်းပင်။ အဝေးမှ စေတန်ပင် သူ့ကို ကယ်တင်ရန် အချိန် မရှိခဲ့ပေ။ မျက်စိတစ်မှိတ် အတွင်းတွင် မိုက်ကယ်ကို ထိမှန်သွားခဲ့သည်။ စေတန်သည် အချိန် အရှိန်အဝါ အသက်သွင်းလိုက်သော်လည်း မိုက်ကယ်၏ ဘေးသို့ ရောက်ရှိသွားသော အခါတွင် ရလဒ်ကို မပြောင်းလဲနိုင်ခဲ့ပေ။

စေတန်၏ မျက်လုံးက မိုက်ကယ်ကို အလစ် တိုက်ခိုက်ခဲ့သော အသူရာ ချောက်နက် သတ္တဝါ အပေါ်တွင် စူးစိုက် နေခဲ့သည်။ သူက နာမည် တစ်ခုကို တစ်လုံးချင်း ပြောလိုက်၏။

“အက်...ဘတ်...ဒွန်”

အသူရာချောက်နက်၏ ကြောက်မက်ဖွယ် သတ္တဝါမှာ အမှန် တကယ်တွင် အမှောင်မီးဖိုထဲ စေတန်နှင့် အတူ ဖိုက်သွန်ကို ဝိုင်းရံတိုက်ခိုက် ခဲ့ပြီးနောက် ချန်လွေ့ကြောင့် ရှုံးနိမ့်ခဲ့သော နတ်ဆိုးဘုံ နတ်ဘုရား-ယောင် အထွတ်အထိပ်အဆင့် အက်ဘက်ဒွန် ဖြစ်နေ၏။

“မင်းရဲ့ ခန္ဓာကိုယ်ပေါ်မှာ အမုန်းတရား အငွေ့အသက် ရှိနေတယ်။” စေတန်က အနက်ရောင် ဓားရှည်ကို ခပ်တင်းတင်း ဆုပ်ကိုင်ထားလိုက်သည်။ “မင်း တကယ် ခီလီယာနာဘက် ပြောင်းသွားတာပဲ...”

“တကယ်တော့ ငါ ခီလီယာနာကို အရင် သွားရှာခဲ့တာ။” အက်ဘက်ဒွန်၏ သွေးဆာနေသော မျက်လုံးများက တောက်ပနေခဲ့ပြီး စေတန်ကို ကြည့်နေခဲ့သည်။ “သူ့ကို နာခံဖို့ ငါ့မှာ အခြေအနေ တစ်ခုပဲ ရှိတယ်။ အဲဒါက မင်းနဲ့ မင်းနဲ့ ပတ်သက်တဲ့ အရာအားလုံးကို ဖျက်ဆီးဖို့ပဲ။ ငါ့စိတ်ထဲက အမုန်းတရားကို ခံစားမိပြီးတော့ သူ ငါ့ကို အမုန်းတရားရဲ့ စစ်မှန်တဲ့ စွမ်းအားတွေ ပေးခဲ့တယ်။”

အက်ဘက်ဒွန်က အမှောင်မီးဖိုထဲတွင် ချန်လွေ့ကြောင့် ရှုံးနိမ့်ခဲ့၏။ နောက်ပိုင်း အကျိုးအမြတ်ကြောင့် စေတန်က အက်ဘက်ဒွန်ကို ဖယ်ရှားရန် စီစဉ်ခဲ့ပြီး အက်ဘက်ဒွန်က နတ်ဘုရား-ယောင် ဘဝကို ဖောက်ခွဲပစ်ရန် အတင်းအကျပ် ဖိအားပေးခံခဲ့ရသည်။ နောက်ဆုံး သူ၏ ဝိညာဉ် အစအနတစ်ခုက ကံကောင်း ထောက်မစွာ လွတ်မြောက်သွားခဲ့သည်။

ချန်လွေ့နှင့် ဖိုက်သွန်နှင့် နှိုင်းယှဉ်လျှင် အက်ဘက်ဒွန်က သူ၏ မဟာမိတ်ဟောင်း စေတန်ကို ပို၍ပင် မုန်းတီးနေခဲ့သည်၊ ထို့ကြောင့် ယခုတစ်ကြိမ်တွင် သူသည် လက်စားချေရန် အသူရာ ချောက်နက် မကောင်းဆိုးဝါး ပုံစံဖြင့် ပေါ်လာခဲ့သည်။

အကယ်၍ သာမန် အခြေအနေသာ ဖြစ်ခဲ့ပါက စေတန်က အက်ဘက်ဒွန်ကို ကြောက်ရွံ့မည် မဟုတ်ပေ။ သို့သော် ထိုသို့အရေးကြီးသော အခိုက်အတန့်တွင် ပြန်မွေးဖွားလာသော အက်ဘက်ဒွန်သည် အသူရာချောက်နက်ဘက်တွင် ရပ်တည် နေခဲ့သည်။ မနည်းမနော ထိန်းသိမ်း ထားသော ဟန်ချက်ညီမှုက ရုတ်တရက် ပျက်စီးသွားခဲ့သည်။ အကယ်၍ သုံးယောက်ချင်း တိုက်ပွဲ ဖြစ်ခဲ့ပါက မဟာမိတ် စစ်တပ် ရှုံးနိမ့်ရန် သေချာ လုနီးပါး ဖြစ်နေပြီ ဖြစ်သည်။

အက်ဘက်ဒွန် ပေါ်လာခြင်းက သေစေနိုင်သော ပြောင်းလဲနိုင်သည့် အချက် တစ်ခုထက် မနိမ့်ပေ။ ၎င်းက တိုက်ပွဲ အခြေအနေ တစ်ခုလုံးကို သက်ရောက်နိုင်လောက်သည်။

“ခီလီယာနာ မလာဘူးလို့ပဲ ပြောခဲ့တာ။ တခြားဘယ်သူမှ မရှိဘူးလို့ မပြောခဲ့ဘူး။” ဒီလော့စ်ရိုက သူ၏ လက်သည်းများကို ဖြန့်လိုက်သည်။ “အက်ဘက်ဒွန်။ အဓိက ယဇ်ပလ္လင်အတွက် ငါ စေတန်နဲ့ စာရင်းဟောင်းကို ရှင်းချင်ပေမယ့် အမုန်းတရားအတွက် ငါ သူ့ကို မင်းဆီ ထားခဲ့လိုက်မယ်။”

အက်ဘက်ဒွန် ခေါင်းညိတ်ပြီး ပြုံးဖြီးဖြီး လုပ်လိုက်သည်။ “စေတန်။ ငါ ဒီမှာ ရှိနေတာ ဆိုတော့ကာ မင်းရဲ့ အခင်းအကျင်းက အသူရာချောက်နက်ရဲ့ စွမ်းအားကို လုံးဝ မဖိနှိပ်နိုင်တော့ဘူး။ အသူရာချောက်နက် သတ္တဝါအများကြီးက လောက နှစ်ခု ကြားမှာရှိတဲ့ တံခါးကနေ ထွက်လာခဲ့ပြီ။ မင်းနဲ့ မင်းထိန်းချုပ်ချင်တဲ့ လောကကြီး တပြိုင်တည်း ပျက်စီးသွား တာကို မြင်ရဖို့ ငါ မျှော်လင့်နေတယ်။”