အခန်း (၁၆၂၁)

မရေမတွက်နိုင်သော မိုးကြိုးသွားများက မိုင်ထောင်ပေါင်းများစွာ ကျယ်ပြောသော ပင်လယ်တစ်စင်းအဖြစ် ဖွဲ့စည်းသွားသည်။

မိုးမြေမူလစွမ်းအားက ထိုမိုးကြိုးသွားများဖြင့် ရင်ဆိုင်ရသောအခါ တိုက်ရိုက် အက်ကွဲသွားကြပြီး အဆုံးမဲ့သော အလင်းစီးကြောင်းများအဖြစ် အရပ်ရှစ်မျက်နှာဆီသို့ ပြန့်ကျဲသွားကြသည်။

အစောနက ဟန်မူယဲ့ပေါ်သို့ ကျဆင်းလာနေသော ရွှေရောင်မိုးကြိုးသွားက မိုးကြိုးပင်လယ်ထဲမှာ နစ်မြုပ်သွားပြီး ဝါးမျိုခံလိုက်ရသည်။

ကမ္ဘာဦးလောကထဲမှာ ရှိနေခဲ့ချိန်တွင် ဟန်မူယဲ့က မိုးမြေကြားမှ မိုးကြိုးနှင့် လျှပ်စီးစွမ်းအားကို ဆင်ခြင်နားလည်ခဲ့သည်။ သူ၏ မိုးကြိုးတာအိုသည်ပင် ဘိုးဘေးပြန်ရောက်ခြင်းအဆင့်ထိ ရောက်ရှိနေပြီး သူက ခွေသားရဲ၏ မိုးကြိုးသွေးမျိုးဆက်ကိုလည်း ပိုင်ဆိုင်ထားသည်။

ယင်းက ဘုံတစ်ခုမှ မိုးကြိုးနှင့် လျှပ်စီးတာအို၏ မူလဇစ်မြစ် ဖြစ်သည်။

ဟန်မူယဲ့က ကမ္ဘာဦးလောကထဲမှာ သူ့ကိုယ်ပိုင်မိုးကြိုးစွမ်းအားကို အသုံးပြု၍ သားရဲများအတွက် ကပ်ဘေးဒုက္ခများကိုပင် ဖန်တီးပေးခဲ့သည်။

မဟာပန်သွန်ဘုံ သို့မဟုတ် တခြားဘုံများတွင် မိုးမြေစွမ်းအားက အလွန်အုတ်မြစ်ခိုင်မာသောကြောင့် ထိုဘုံများထဲမှ သက်ရှိများက မိုးကြိုးနှင့် လျှပ်စီးစွမ်းအားကို အကြမ်းဖျဉ်းမျှသာ ထိန်းချုပ်နိုင်ကြသည်။

မဟာတာအိုက မူလဇစ်မြစ်သို့ ပြန်ရောက်ပြီးသော ကမ္ဘာဦးလောကတွင်သာ တာအိုကျင့်ကြံသူများက အထွတ်အမြတ် နတ်ဘုရားစွမ်းအင်များကို အသုံးပြုနိုင်ကြသည်။

“ ဂျိန်း ဂျိန်း ဂျိန်း ”

မရေမတွက်နိုင်သော မိုးကြိုးသွားများ ကျဆင်းလာသည့်အခါ အချင်းမိုင်တစ်ထောင်ကျယ်ဝန်းသော မိုးကြိုးပင်လယ်က ပွက်ပွက်ဆူသွားသည်။

တောင်တန်းများနှင့် မြစ်ချောင်းများက မိုးကြိုးပင်လယ်နှင့် တွေ့ဆုံသွားသည့်အခါ ချက်ချင်း အရည်ပျော်သွားကြသည်။ ထိုဧရိယာအတွင်းမှ သက်ရှိအားလုံးသည်လည်း တိုက်ရိုက် အသတ်ခံလိုက်ကြရသည်။

ရွှေရောင်တုတ်ချောင်းကိုင်ထားသော တိုက်တန်က ကြောက်လန့်တုန်လှုပ်သွားပြီး ၎င်း၏ မျက်လုံးက ပြူးကျယ်သွားသည်။

“ မင်း… မင်းက လျှပ်စီးအရှင်သခင်… ”

တိုက်တန်က အသက်ပြင်းပြင်းရှူသွင်းလိုက်သည်။ ထို့နောက် ၎င်း၏ ဧရာမခန္ဓာကိုယ်က လျှပ်စီးများကြားတွင် ချက်ချင်း ဒူးထောက်လိုက်ပြီး ဟန်မူယဲ့ကို ဦးချလိုက်သည်။

“ တပည့်စန်းလင်က အရှင်သခင်ကို ဂါရဝပြုပါတယ် ”

သူစကားပြောလိုက်သည်နှင့် သူ၏ ခန္ဓာကိုယ်ပေါ်မှ လျှပ်စီးတန်းများက ပျောက်ကွယ်သွားသည်။ နောက်အခိုက်အတန့်မှာ ဟန်မူယဲ့ထိန်းချုပ်ထားသော မိုးကြိုးပင်လယ်က သူ၏ ခန္ဓာကိုယ်ကို တိုက်ရိုက် ဝါးမျိုသွားသည်။

အဆုံးမဲ့သော မိုးကြိုးသွားများကြားတွင် သူ၏ ခန္ဓာကိုယ်က တုန်ယင်သွားပြီး ဗလာနတ္ထိအဖြစ် ပျောက်ကွယ်သွားသည်။

သို့သော်လည်း နောက်အခိုက်အတန့်မှာ ရွှေရောင်အလင်းတန်းတစ်ခုက သူပျောက်ကွယ်သွားသောနေရာမှာ ထွက်ပေါ်လာပြီး ပုံရိပ်ယောင်ခန္ဓာကိုယ်တစ်ခုကို ဖွဲ့စည်းလိုက်သည်။

သူက ရွှေရောင်ဝတ်စုံကို ဝတ်ဆင်ထားပြီး လက်ထဲမှာ ရွှေရောင်တုတ်ချောင်းကို ကိုင်ထားသည်။ သူ၏ အသွင်သဏ္ဍာန်သည်လည်း လူသားတစ်ယောက်နှင့် ဆင်တူသွားသည်။

ယင်းက ဟန်မူယဲ့ ဆင့်ခေါ်ထားသော မိုးကြိုးစွမ်းအား ဖြစ်သည်။ စန်းလင်အမည်ရသော မဟာမူလကလန်မှ တိုက်တန်သည် ဟန်မူယဲ့၏ နောက်လိုက်တစ်ယောက် ဖြစ်လာသည်။

သူက ဟန်မူယဲ့၏ မိုးကြိုးတာအိုအပေါ် အညံ့ခံလိုက်သည်။

ယင်းက မူလစွမ်းအားတိုက်ပွဲတွင် ကြောက်မက်ဖွယ်ကောင်းသော အချက်တစ်ချက်ဖြစ်သည်။ တစ်စုံတစ်ယောက်၏ စိတ်ဝိညာဉ်က တစ်ဖက်လူ၏ ဖမ်းယူခံလိုက်ရမည်ဆိုလျှင် ၎င်းက ကိုယ်ပိုင်တာအိုကို ဆက်ပြီး ထိန်းချုပ်နိုင်တော့မည် မဟုတ်ချေ။ ၎င်းက အညံ့ခံရုံသာ တတ်စွမ်းလိမ့်မည်။

“ ဝီး ”

အဝေးတွင် မိုးကြိုးသွားတစ်စင်းက ကောင်းကင်နှင့် မြေပြင်ကြားမှာ ထွက်ပေါ်လာသည်။ မိုးကြိုးက ပေတစ်ရာရှည်လျားသော ကျားနက်တစ်ကောင်၏ ခန္ဓာကိုယ်ကို လွှမ်းခြုံထားသည်။

ဟန်မူယဲ့ထံမှ မိုးကြိုးစွမ်းအား၏ ဖိနှိပ်မှုအောက်မှာ ကျားနက်က ပေသုံးရာရှည်လျားသော စစ်ဗိုလ်ချုပ်တစ်ဦးအဖြစ် အသွင်ပြောင်းလဲသွားသည်။

“ ကျားဝိညာဉ်သားပေါက်က သခင်ကို အရိုအသေပေးပါတယ် ”

စစ်ဗိုလ်ချုပ်က ဟန်မူယဲ့ကို ဦးညွတ်လိုက်ပြီး အရှေ့သို့ လျှောက်သွားသည်။ ၎င်းက ဟန်မူယဲ့၏ အရှေ့မှာ ရပ်လိုက်သည်။

ဟန်မူယဲ့က ခေါင်းညိတ်လိုက်သည်။ မီတာတစ်သောင်းရှည်လျားသော သူ၏ ဘီလူးခန္ဓာကိုယ်က ပြန်ကျုံ့သွားပြီး ကိုးပေရှည်လျားသော လူသားအရွယ်အစားသို့ ပြန်ပြောင်းလဲသွားသည်။ ထို့နောက် သူက ကျားဝိညာဉ်သားပေါက်၏ ပခုံးပေါ်မှာ ရပ်လိုက်သည်။

ကျားဝိညာဉ်သားပေါက်က အရှေ့သို့ ပြေးသွားသည်။

ဟန်မူယဲ့၏ အနောက်မှ စကြာဝဠာနယ်မြေက ဝုန်းခနဲ မြည်ဟိန်းသွားပြီး ဘေးပတ်ဝန်းကျင်၌ ပြန့်ကျဲနေသော တောင်တန်းများနှင့် မြစ်ချောင်းများကို ဝါးမျိုလိုက်သည်။ တစ်ချိန်တည်းမှာ စကြာဝဠာနယ်မြေက မိုးကြိုးသွားများကြောင့် အသတ်ခံလိုက်ရသော သန္ဓေပြောင်းသားရဲများ၏ အလောင်းများကိုလည်း စုဆောင်းလိုက်သည်။

ကျားဝိညာဉ်သားပေါက်က မိုးကြိုးကပ်ဘေးဒုက္ခကို အောင်မြင်စွာ ဖြတ်ကျော်ပြီး လူသားအသွင်သို့ ပြောင်းလဲသွားသည်နှင့် တခြားသက်ရှိများသည်လည်း မိုးကြိုးကပ်ဘေးကို ဖြတ်ကျော်လိုက်ကြသည်။

မကြာမီ ပိုမိုများပြားသော သက်ရှိများက မိုးကြိုးကပ်ဘေးကို ဖြတ်ကျော်နိုင်သွားကြပြီး လူသားအသွင်သို့ ပြောင်းလဲသွားကြသည်။

ထိုသန္ဓေပြောင်းသားရဲများသည် လူသားအသွင်သို့ ပြောင်းလဲသွားသည်နှင့် ဟန်မူယဲ့ဆီသို့ ပြေးသွားကြပြီး လေးနက်စွာ ဦးညွတ်လိုက်ကြသည်။

မိုးမြေ၏ မိုးကြိုးစွမ်းအားမှာ ဖျက်ဆီးခြင်းဂုဏ်သတ္တိရှိသော်လည်း ယင်းက မူလစွမ်းအားကို သန့်စင်ပေးနိုင်သည်။

အညံ့ခံရန် ဆန္ဒရှိကြသူများက မိုးကြိုးတာအို၏ ကောင်းချီးပေးမှုကို ရရှိကြပြီး မိုးကြိုးကပ်ဘေးဒုက္ခကို ရင်ဆိုင်ကျော်လွှားရန် အခွင့်အရေးတစ်ခု ရရှိကြလိမ့်မည်။ မိုးကြိုးကပ်ဘေးဒုက္ခကို ဖြတ်ကျော်နိုင်မည်ဆိုလျှင် ၎င်းတို့၏ မူလစွမ်းအားက သန့်စင်သွားပြီး ၎င်းတို့က လူသားအသွင်သို့ ပြောင်းလဲနိုင်ကြလိမ့်မည်။

ထိုအခါ ၎င်းတို့၏ တိုက်ပွဲစွမ်းအားက ယခင်ကထက် အဆပေါင်းများစွာ ပိုပြီးအားကောင်းသွားလိမ့်မည်။

အဓိကအရေးကြီးဆုံးမှာ ၎င်းတို့၏ မူလစွမ်းအားက မိုးကြိုးကပ်ဘေးဒုက္ခကြောင့် သန့်စင်သွားလေရာ ၎င်းတို့က အနာဂတ်မှာ ပိုပြီးမြင့်မားသော အဆင့်များဆီသို့ တတ်လှမ်းနိုင်ရန် အခွင့်အရေးရရှိသွားကြသည်။

ထိုသို့အကျိုးအမြတ်ကို မည်သူမှ ငြင်းဆန်ချင်လိမ့်မည် မဟုတ်ချေ။

ပုံရိပ်တစ်ခုပြီးတစ်ခုက ဟန်မူယဲ့၏ အရှေ့သို့ ပျံသန်းလာကြသည်။ ရွှေရောင်တုတ်ချောင်းကိုင်ထားသော စန်းလင်က ကိုးပေရှည်လျားသော လူသားအသွင်သို့ ပြောင်းလဲလိုက်ပြီး ဟန်မူယဲ့နှင့် မနီးမဝေးမှာ ရပ်လိုက်သည်။

စန်းလင်၏ ခန္ဓာကိုယ်ပေါ်မှ မိုးကြိုးမူလစွမ်းအားက မိုးကြိုးပင်လယ်၏ စွမ်းအားနှင့် ပေါင်းစပ်သွားသည်။ သူက ရွှေရောင်တုတ်ချောင်းကို ကိုင်မြှောက်လိုက်ပြီး မိုးကြိုးပင်လယ်ထဲမှ စွမ်းအားကို ဟန်မူယဲ့ကိုယ်စား ကူညီထိန်းချုပ်ပေးလိုက်သည်။ ထို့ကြောင့် မိုးကြိုးပင်လယ်ကို ဟန်မူယဲ့ကိုယ်တိုင် ထိန်းချုပ်ပေးရန် မလိုတော့ပေ။

ကျန်းချန်းသေမင်းတပ်စခန်းမှ ကျန်းကန်းနှင့် တခြားလူများက ဟန်မူယဲ့အနောက်သို့ လိုက်သွားကြစဉ် သူတို့၏ မျက်နှာပေါ်မှာ စိတ်လှုပ်ရှားမှုဖြင့် ပြည့်နှက်နေသည်။ သူတို့၏ ဘေးပတ်ဝန်းကျင်တွင် မိုးကြိုးစွမ်းအင်လှိုင်းများက တအိအိလှုပ်ခတ်နေသည်။

ဟန်မူယဲ့၏ စွမ်းအားက သူတို့စိတ်ကူးထားသည်ထက် အများကြီး ကျော်လွန်နေသည်။

ထိုသို့မိုးကြိုးစွမ်းအားက သူတို့ရင်ဆိုင်နိုင်သောအရာ မဟုတ်ပေ။ ဟန်မူယဲ့၏ အနောက်သို့ သူတို့လိုက်သွားမှသာလျှင် မိုးကြိုးပင်လယ်ထဲမှ လွတ်မြောက်နိုင်ကြလိမ့်မည်။

လက်ရှိအခြေအနေအရ သူတို့က နောင်လာမည့် တိုက်ပွဲများတွင် သေခြင်းရှင်ခြင်းကို စိတ်ပူစရာမလိုဘဲ သူတို့၏ ကိုယ်ပိုင်စွမ်းအားကိုသာ မြှင့်တင်နိုင်ကြတော့မည့်ဟန် ရ၏။

ထို့ပြင် အကယ်၍ သူတို့သာ စစ်ရေးအကျိုးပြုမှုတုံကင်အများအပြားကို စုဆောင်းနိုင်မည်ဆိုလျှင် ကောင်းကင်ဘုံအစောင့်တပ်သားဖြစ်လာရန် ဟူသော အိမ်မက်က လက်တွေ့မှာ အမှန်တကယ် ဖြစ်လာနိုင်လိမ့်မည်။

“ သခင်လု ခင်ဗျားဘယ်လိုထင်လဲ… ဒီဟာကို ခင်ဗျားမမျှော်လင့်ထားဘူးမလား ”

ကျန်းကန်းက သူ့ဘေးမှ လုယန်ဖုန်းကို ကြည့်လိုက်ပြီး နူးညံ့စွာ ပြောသည်။

လုယန်ဖုန်းက စကားပြန်မပြောသော်လည်း အပြုံးက သူ၏ မျက်နှာပေါ်မှာ ထွက်ပေါ်နေသည်။ စိတ်လှုပ်ရှားသော အလင်းက သူ၏ မျက်လုံးထဲမှာ ဖုံးဖိမရအောင် ထွက်ပေါ်နေသည်။

ထိုမျှသာ မဟုတ်ပေ။ သူ၏ ခန္ဓာကိုယ်သည်လည်း တုန်ယင်နေသည်။

“ ဗုန်း ”

ကောင်းကင်နှင့် မြေပြင်ကြားတွင် သုံးပေရှည်လျားသော ဓားမော့တစ်ချောင်း ဆင်းသက်လာသည်။

ဓားမော့က ကောင်းကင်ပေါ်မှ မိုးကြိုးသွားကို ဖျက်ဆီးလိုက်ပြီး မိုးကြိုးကပ်ဘေးဒုက္ခ မဖြတ်ကျော်ရသေးသော သန္ဓေပြောင်းသားရဲတစ်ကောင်ကို ပိုင်းဖြတ်သွားသည်။

“ ဟား ဟား… ဒီနေရာမှာ သန္ဓေပြောင်းသားရဲတွေ များလှချည်လား ”

ကျယ်လောင်သော ရယ်မောသံက မီတာတစ်ရာရှည်လျားသော ဘီလူးတစ်ကောင်ထံမှ ထွက်ပေါ်လာသည်။

ထိုဘီလူး၏ ခန္ဓာကိုယ်ပေါ်မှ အမှတ်အသားအရ သူက မဟာပန်သွန်ဘုံမှ ကျင့်ကြံသူတစ်ယောက် ဖြစ်သည်။

ထိုသူက ဟန်မူယဲ့နှင့် သူ့အဖွဲ့သားများကို ကြည့်လိုက်သည်။ ထို့နောက် သူ၏ အကြည့်က မီတာသုံးရာရှည်လျားသော ကျားဝိညာဉ်သားပေါက်ပေါ်သို့ ကျရောက်သွားသည်။

“ ဘယ်လောက်အားကောင်းလိုက်တဲ့ သန္ဓေပြောင်းသားရဲလဲ ”

သူက ဟန်မူယဲ့နှင့် စန်းလင်၏ ကျင့်ကြံခြင်းစွမ်းအားကို ထွင်းဖောက်မမြင်နိုင်ခဲ့ပေ။ ထို့ကြောင့် သူက ဤနေရာမှာ အသန်မာဆုံးက ကျားဝိညာဉ်သားပေါက်ဖြစ်မည်ဟု အထင်မှားသွားသည်။

“ ကျန်းချန်းသေမင်းတပ်စခန်းက လူတွေလား ”

ကျန်းကန်းနှင့် တခြားလူများကို ကြည့်လိုက်ပြီးနောက် သူက နှာခေါင်းရှုံ့လိုက်သည်။

“ ထွက်သွားကြစမ်း… ဒီနေရာက ငါ့ရဲ့ ပိုင်နက်ပဲ ”

စကားဆုံးသည်နှင့် သူက အရှေ့သို့ ခြေတစ်လှမ်း လှမ်းလိုက်ပြီး သူ၏ ဓားမော့ကို အောက်သို့ ခုတ်ပိုင်းလိုက်သည်။

ထိုဓားချက်က မိုးကြိုးကပ်ဘေးဒုက္ခကို ကျော်လွှားပြီး လူသားအသွင်သို့ ပြောင်းလဲတော့မည့် တခြားသန္ဓေပြောင်းသားရဲတစ်ကောင်ကို သုတ်သင်လိုက်သည်။

ထို့နောက် သူက ခေါင်းလှည့်လိုက်ပြီး ကျန်းကန်းနှင့် သူ့အုပ်စုကို တိုက်ခိုက်လိုက်သည်။

“ သေစမ်း ”

ကျားဝိညာဉ်သားပေါက်က တိုးညင်းစွာ ဟိန်းဟောက်လိုက်ပြီး ၎င်း၏ လက်ထဲမှ လှံရှည်ကို အရှေ့သို့ ထိုးသွင်းလိုက်သည်။

“ ဘန်း ”

ထိုလှံထံမှာ ကိန်းအောင်းနေသော စွမ်းအားက ဘေးပတ်ဝန်းကျင်မှ မိုးမြေကို တုန်ယင်သွားစေသည်။ ဤသည်မှာ မိုးမြေကြားထဲမှ မရေမတွက်နိုင်သော မူလစွမ်းအားများက တိုက်ရိုက် အက်ကွဲသွားကြတော့မည့်အလားပင်။

ဓားမော့ကိုင်ထားသော ဘီလူး၏ မျက်နှာက သိသာစွာ ပျက်ယွင်းသွားသည်။ သူက ဓားမော့အလင်းကို ထုတ်လွှတ်လိုက်ပြီး ကျားဝိညာဉ်သားပေါက်၏ လှံထိုးချက်ကို ခုခံတားဆီးလိုက်သည်။

ကံမကောင်းစွာပင် သူ၏ စွမ်းအားက ကျားဝိညာဉ်သားပေါက်၏ လှံထိုးချက်ကို ခုခံကာကွယ်ရန် မလုံလောက်ခဲ့ပေ။ လှံထိုးချက်အရှေ့မှာ သူ၏ ခန္ဓာကိုယ်က ပေါက်ကွဲထွက်သွားသည်။

ဟန်မူယဲ့က အဝေးသို့ လှမ်းကြည့်လိုက်သည်။ သူက မထူးမခြားနား အမူအရာဖြင့် အဝေးမှ တောင်ထွတ်များကို လက်ညှိုးညွှန်လိုက်သည်။

“ အဲ့ဒီကို သွား ”

ကျားဝိညာဉ်သားပေါက်က အရှေ့သို့ အမြန်ပြေးသွားသည်။

ထိုအမြန်နှုန်းသည် မီတာတစ်သောင်းရှည်လျားသော အစောနက ဟန်မူယဲ့၏ ခန္ဓာကိုယ်ထက် ပိုမြန်ဆန်သည်။ ကျန်းကန်းနှင့် တခြားလူများသည် သူ့အနောက်သို့ လိုက်ရန် အစွမ်းကုန် ထုတ်လွှတ်လိုက်ကြသည်။

စန်းလင်က သူ၏ ရွှေရောင်တုတ်ချောင်းကို ဝှေ့ယမ်းလိုက်သည်။ ထိုအခါ ကောင်းကင်ပေါ်မှ မိုးကြိုးပင်လယ်က သူနှင့်အတူ ရွေ့လျားသွားသည်။

မိုးကြိုးပင်လယ် ဖြတ်သန်းသွားသည့်နေရာတိုင်း မိုးမြေကြားထဲမှ အရာအားလုံးက သန့်စင်ခံလိုက်ရသည်။

မိုင်တစ်သိန်းရွေ့လျားပြီးနောက် ထိုမိုင်တစ်သိန်းဧရိယာထဲမှ မိုးမြေက သန့်စင်ခံလိုက်ရသည့်အခါ ပိုမိုများပြားသော သန္ဓေပြောင်းသားရဲများက ဟန်မူယဲ့၏ စကြာဝဠာနယ်မြေထဲသို့ ပြောင်းရွှေ့သွားကြသည်။ ၎င်းတို့ထဲမှ တချို့က မိုးကြိုးကပ်ဘေးဒုက္ခကို အောင်မြင်စွာ ဖြတ်ကျော်နိုင်သွားကြပြီး လူသားအသွင်သို့ ပြောင်းလဲသွားကြသည်။

ထို့နောက် ၎င်းတို့က ဟန်မူယဲ့၏ နောက်လိုက်များ ဖြစ်လာကြသည်။

သုံးရက်ကြာပြီးနောက် ဟန်မူယဲ့၏ အနောက်တွင် လူသားအသွင်ပြောင်းလဲပြီးသော သန္ဓေပြောင်းသားရဲများက စုစုပေါင်း တစ်ထောင့်သုံးရာကျော်သွားသည်။ ၎င်းတို့ထဲမှ အသန်မာဆုံး သန္ဓေပြောင်းသားရဲများက ကျားဝိညာဉ်သားပေါက်နှင့် နှိုင်းယှဉ်နိုင်သော ကျင့်ကြံခြင်းစွမ်းအားကို ပိုင်ဆိုင်ထားကြသည်။

ကျားဝိညာဉ်သားပေါက်သည် ကနဦးမူလအဆင့်၏ အထွတ်အထိပ်မှာဖြစ်ပြီး မီတာသုံးရာရှည်လျားသော ဘီလူးခန္ဓာကိုယ်အဖြစ် အသွင်ပြောင်းလဲနိုင်သည်။

တခြားသန္ဓေပြောင်းသားရဲများက ကနဦးမူလအဆင့်မှာ ဖြစ်ကြသည်။

ကနဦးမူလအဆင့်သို့ မရောက်ရှိသေးသော သန္ဓေပြောင်းသားရဲများက မိုးကြိုးကပ်ဘေးဒုက္ခအတွင်းမှာ အမြစ်ဖြတ်ဖျက်ဆီးခံလိုက်ကြရသည်။

ထို့ကြောင့် ကျန်းကန်းနှင့် တခြားလူများက မဟာပန်သွန်ကျောက်တုံးများကို အမှိုက်များသဖွယ် ကောက်နေကြရသည်။

“ ဝီး ”

မှိန်ဖျော့သော နတ်ဘုရားအလင်းက ဟန်မူယဲ့၏ အရှေ့မှာ တုန်ယင်သွားသည်။

တောက်ပသော ရွှေရောင်အလင်းက သူ၏ ဦးခေါင်းပေါ်မှာ ထွက်ပေါ်လာသည်။ ထို့နောက် သူ၏ ခန္ဓာကိုယ်က ကျုံ့သွားပြီး နေရာမှ ပျောက်ကွယ်သွားသည်။

ရှည်လျားသော အပြာရောင်ဓားတစ်လက်က ကျားဝိညာဉ်သားပေါက်၏ ပခုံးပေါ်မှာ ထွက်ပေါ်လာသည်။

ထိုဓားရှည် ထွက်ပေါ်လာသည်နှင့်ချက်ချင်း အချင်းမိုင်တစ်သောင်းအတွင်းမှ မိုးမြေက ဓားအကျဉ်းထောင်အဖြစ် တိုက်ရိုက် ပြောင်းလဲသွားသည်။

အဆုံးမဲ့သော ဓားအလင်းက ပြိုးပြိုးပြက်ပြက် ဝင်းလက်သွားပြီး မိုးကြိုးတိမ်တိုက်များနှင့် ပေါင်းစပ်သွားသည်။

ထိုနေရာနှင့် မိုင်သန်းတစ်ထောင်ဝေးကွာသော တခြားနေရာတွင် ဟန်မူယဲ့၏ ပုံရိပ်က မျက်နှာတည်ကြည်နေသော ကျောက်မင်ယွင်၏ ဘေးမှာ ထွက်ပေါ်လာသည်။

သူက မူလဝိညာဉ်ဓားခန္ဓာကိုယ်နှင့် နေရာလဲလိုက်ခြင်း ဖြစ်သည်။

“ တပ်စခန်း(၉၅၂၈)က လူတွေ… ငါမင်းတို့ကို အသက်ဆယ်ခါရှူချိန် အချိန်ပေးမယ်… မင်းတို့အညံ့မခံဘူးဆိုရင် ငါမင်းတို့ကို အမြစ်ဖြတ်သုတ်သင်ပစ်မယ် ”

“ ဒီနေရာက မဟာမူလဘုံ… ဒီနေရာမှာ မင်းတို့မသေချင်ကြဘူးမလား… မဟုတ်ရင် မင်းတို့ရဲ့ ခန္ဓာကိုယ်က မဟာပန်သွန်ကျောက်တုံးတွေအဖြစ် ပြောင်းလဲသွားလိမ့်မယ်… မင်းတို့တွေ အဲ့လိုမဖြစ်ချင်ကြဘူးမလား ”