အခန်း (၆၀၉-၆၁၀)

အခန်း (၆၀၉) နယ်မြေအသစ်၊ အင်ပါယာကိုယ်စားလှယ်

ဟန်ရှောင်းနှင့် အခြားသူများသည် ရဲတိုက်ထဲတွင် ရက်အနည်းငယ်ဆက်တိုက် စောင့်ဆိုင်းနေသည်။

အရာအားလုံး အေးချမ်းနေ၏။ သွေးစွန်းကုန်းမြေ၏ လူများသည် နောက်ထပ် ပဋိပက္ခ မဖန်တီးကြပေ၊ အာဏာရှင်၏ ရှေ့ပြေးအရာရှိရှစ်ဦးလည်း ပြန်ပေါ်မလာတော့ပေ။

တားမြစ်ထားသော ဧရိယာများတွင် ခွင့်မပြုသည်မှလွဲ၍ ဧည့်သည်များသည် သွေးစွန်းကုန်းမြေတွင် လွတ်လပ်စွာ သွားလာနိုင်ပြီး စစ်သားများသည် ဦးဆောင်၍ လှည့်လည်ပြသမည်ဖြစ်သည်။

ဟန်ရှောင်း ရံဖန်ရံခါ သွေးစွန်းကုန်းမြေသို့ သွားလေ့ရှိသည်။

ဟီဘာဂြိုဟ်၏ ဌာနချုပ်ရှိ ပုံမှန်စစ်သားများသည် အဆင့်နိမ့် စူပါများဖြစ်ကြပြီး သာမန်လူ မရှိသလောက်ပင်။ အာဏာရှင်အောက်ရှိ လူအများစုမှာ တိုက်ခိုက်သူများဖြစ်သောကြောင့် ကြွက်သားအဖုအထစ်များနှင့် လူကောင်ကြီးများကို နေရာတိုင်းတွင် တွေ့မြင်နိုင်၏။

စစ်သားများသည် မီးခိုးရောင်၊ အထူးပြုလုပ်ထားသော လေးလံသည့် သံချပ်ကာကို ဝတ်ဆင်ထားပြီး ၎င်းတို့၏ ခန္ဓာကိုယ် ကြံ့ခိုင်မှုနှင့် ‘စစ်သည်တော်’ စွမ်းအင်၏ အကျိုးသက်ရောက်မှုကို တိုးမြင့်စေသည်။

သာမန်စစ်သားများအပြင် သွေးစွန်းကုန်းမြေတွင် လက်ရွေးစင် စစ်သည်အချို့လည်း ရှိနေသည်ကို ဟန်ရှောင်း သတိထားမိသည်။ သူတို့၏ တစ်ကိုယ်ရည် ကာယကြံ့ခိုင်မှု ပိုမိုအားကောင်းပြီး ပိုမိုကောင်းမွန်သည့် သံချပ်ကာကို ဝတ်ဆင်ထားသည်။ ၎င်းတို့၏ သံချပ်ကာတွင် အမြီးများ၊ အတောင်ပံများ၊ ကြီးမားသည့် ခြေသည်းများ စသည်တို့ကဲ့သို့ ပြင်ပ ခြေတုလက်တုများစွာ ပါရှိသည်။ လမ်းပြသော စစ်သားပြောသည့်အတိုင်း ထိုစစ်သားများကို သွေးစွန်းကုန်းမြေ၏ လက်ရွေးစင် တပ်များထဲမှ တစ်ခုဖြစ်သည့် သားရဲတစ်ထောင် စစ်သည်များဟု ခေါ်ဆိုကြသည်။

သွေးစွန်းကုန်းမြေ၏ လက်နက်များနှင့် သယ်ယူပို့ဆောင်ရေးယာဉ်များကို ဟန်ရှောင်း ပိုမိုစိတ်ဝင်စားသည်။ ၎င်းတို့အားလုံးသည် မယုံနိုင်လောက်အောင် ထူးခြားပြီး သွေးစွန်းကုန်းမြေအတွက် သီးသန့်ဖြစ်သည်။ ထင်ရှားသည်မှာ အာဏာရှင်တွင် အထူးစက်ပစ္စည်းများကို ဒီဇိုင်းထုတ်သည့် ယန္တရားပညာရှင်အဖွဲ့ တစ်ခုရှိသည်။

သွေးစွန်းကုန်းမြေသည် ဧည့်သည်များအား သူတို့၏ စွမ်းအားကို ပျော်ပျော်ကြီး ပြသနေသော်လည်း သူတို့ပြသနေသည်မှာ ရေခဲတောင်၏ အစွန်အဖျားမျှသာ ဖြစ်သည်။

ဟန်ရှောင်းသည် ဖိအားတစ်ခုကို မခံစားရဘဲ မနေနိုင်ပေ။ သူသည် သူ၏ကိုယ်ပိုင် အဖွဲ့အစည်းကို တည်ဆောက်နေပြီး ၎င်းတို့သည် အလွန်လျင်မြန်စွာ တက်လာသော်လည်း နှစ်ပေါင်းများစွာ တည်ရှိပြီး အရင်းအမြစ်များစွာ စုဆောင်းထားသည့် ဤကဲ့သို့သော ကြီးမားသည့် အဖွဲ့အစည်းများနှင့် အလွန်ကြီးမားသည့် ကွာခြားချက် ရှိနေဆဲဖြစ်သည်။

ဘလက်စတား စစ်တပ်အတွက် ခရီးရှည်ကြီး ကျန်နေသေးသည်။

လွန်ခဲ့သည့် ရက်အနည်းငယ်အတွင်း ဧည့်သည်များသည် ရဲတိုက်များထဲသို့ ဆက်တိုက် ဝင်ရောက်လာကြသည်။

အေးမီစ်က ပါတီပွဲ တက်ရောက်ရန် လာခဲ့သော်လည်း သူမသည် ထိုကဲ့သို့သော ကိစ္စရပ်များနှင့်ပတ်သက်၍ စိုးရိမ်ပူပန်မှုမရှိသည်မှာ ရှင်းပါသည်။ သူမသည် ဟီလာနှင့် အော်ရိုရာတို့ကို သင်ကြားပေးရန် အခန်းထဲတွင် နေခဲ့ပြီး ဟန်ရှောင်းက သူမကို ကိုယ်စားပြု၍ လူမှုဆက်ဆံရေး ပြုလုပ်နေသည်။

သွေးစွန်းကုန်းမြေသို့ လှည့်လည်မကြည့်သည့်အချိန်တွင် ဟန်ရှောင်းသည် ဧည့်သည်များနှင့် စကားပြောဆိုခဲ့သည်။ ဧည့်သည်များအားလုံးသည် ကွဲအက်ကြယ်စင်ကွင်းတွင် လူသိများသည့် အဖွဲ့အစည်းများကို ကိုယ်စားပြုကြသောကြောင့် ၎င်းသည် သူ၏အဆက်အသွယ်များကို ချဲ့ထွင်ရန်နှင့် အခြားလူများကို သိကျွမ်းရန် ကောင်းမွန်သည့် အခွင့်အရေးဖြစ်သည်။

ကြီးမားသည့် ဘဏ္ဍာရေးအုပ်စု ခေါင်းဆောင်များ၊ ကြယ်စုတန်းအဆင့် လူမှုအဖွဲ့အစည်း ကိုယ်စားလှယ်များနှင့် ထောက်လှမ်းရေး အဖွဲ့အစည်းများနှင့် ခဲယမ်းမီးကျောက် အဖွဲ့အစည်းများကဲ့သို့ လုပ်ငန်းအမျိုးမျိုးတွင် အအောင်မြင်ဆုံး လူများရှိသည်။ ဟန်ရှောင်းသည် ကွဲအက်ကြယ်စင်ကွင်း၏ တာဝန်ခံ ကြေးစားစစ်သား မဟာမိတ်အဖွဲ့မှ လူကိုပင် တွေ့ခဲ့ရပြီး သူသည် အလွန်ဖော်ရွေပြီး ဟန်ရှောင်းနှင့် ကောင်းမွန်စွာ စကားပြောဆိုခဲ့သည်။

ဖိတ်ကြားထားသည့် ဧည့်သည်များ၏ ရာထူး၊ အထောက်အထားနှင့် သြဇာလွှမ်းမိုးမှုများသည် ကွဲအက်ကြယ်စင်ကွင်းရှိ ပိရမစ်၏ ထိပ်ဆုံးတွင် ရှိနေကြသည်။

အဖွဲ့အစည်းအများစုသည် ဘလက်စတားအကြောင်း ကြားဖူးကြသည်။ သူတို့က သူ့ကို သိပ်အာရုံမစိုက်သော်လည်း သူက မျောလွင့်နဂါးကျွန်းကို ကိုယ်စားပြုပြီး ဘလက်စတား စစ်တပ်သည် မကြာသေးမီက အတော်လေး ကျော်ကြားလာသည်။

ဟန်ရှောင်း၏ လက်ရှိ နာမည်ကျော်ကြားမှုနှင့် ဒဏ္ဍာရီ အမှတ်များသည် အဆင့်တစ်ခုသို့ ရောက်ရှိနေပြီဖြစ်သောကြောင့် ဧည့်သည်အများစုက ဟန်ရှောင်းသည် စက်ဝိုင်း၏ အစိတ်အပိုင်းတစ်ခု ဖြစ်နိုင်ကြောင်း အသိအမှတ်ပြုခဲ့ကြသည်။

ယခုအချိန်အထိ ဟန်ရှောင်းသည် အမျိုးမျိုးသော ကြယ်စနစ်များတစ်ဝိုက်တွင်သာ လှုပ်ရှားခဲ့ပြီး ၎င်းတို့သည် ကွဲအက်ကြယ်စင်ကွင်း၏ ရေခဲတောင်ထိပ်ဖျားမျှသာဖြစ်သောကြောင့် သူ၏သြဇာလွှမ်းမိုးမှု အကန့်အသတ်ရှိခဲ့သည်။ ယခုတွင်မူ သူသည် နောက်ဆုံး၌ ပိုမိုမြင့်မားသည့် အဆင့်သို့ တက်လှမ်းလာပြီး ကွဲအက်ကြယ်စင်ကွင်း၏ ‘အူတိုင်’ ကို ဖွဲ့စည်းသည့် လူများနှင့် တွေ့ဆုံနေသည်။

အခြားဧည့်သည်များကို အဆင့်များစွာ ခွဲခြားထားသည်။ နှိုင်းယှဉ်ချက်အရ အနိမ့်ဆုံးအဆင့်တွင် ကြီးမားသည့် ဘဏ္ဍာရေးအုပ်စုများ ပါဝင်ပြီး အလယ်တွင် ကြီးမားသည့် အဖွဲ့အစည်းများ ရှိသည်။ မျောလွင့်နဂါးကျွန်းသည် အနိမ့်နှင့် အလယ်အလတ် အဆင့်ကြားတွင် ရှိသည်။

အမြင့်ဆုံးအဆင့်တွင် သွေးစွန်းကုန်းမြေကဲ့သို့ ဧရာမ အဖွဲ့အစည်းများအပြင် ကွဲအက်ကြယ်စင်ကွင်း၏ ကြယ်စုတန်းအဆင့် လူမှုအဖွဲ့အစည်း ၇ခုမှ ကိုယ်စားလှယ်များ ပါဝင်သည်။ သူတို့၏အဆင့် မြင့်တက်လာသည်နှင့်အမျှ ဟန်ရှောင်းအတွက် အသိအမှတ်ပြုမှု အတိုင်းအတာ လျော့နည်းသွားသည်။

ဟန်ရှောင်းအပေါ် ကြယ်စုတန်းအဆင့် လူမှုအဖွဲ့အစည်း ကိုယ်စားလှယ်များ၏ သဘောထားသည် ပိုမိုဖော်ရွေသော လူမှုအဖွဲ့အစည်း နှစ်ခုဖြစ်သည့် ခရမ်းရောင်သလင်းကျောက် လူမှုအဖွဲ့အစည်းနှင့် ကလင့်နိုင်ငံမှလွဲ၍ အများစုမှာ ပုံမှန်တန်းသာဖြစ်သည်။

ကောလ်တန်သည် ခရမ်းရောင်သလင်းကျောက်၏ နယ်မြေဖြစ်သည်။ ထို့အပြင် နဂါးဧကရီသည် ကောလ်တန် ကြယ်စုတန်း တစ်ဝိုက်တွင် ရှိနေ၏။ ခရမ်းရောင်သလင်းကျောက် လူမှုအဖွဲ့အစည်း၏ ကိုယ်စားလှယ်အတွက် ဟန်ရှောင်းသည် ၎င်းတို့၏ မဟာမိတ်တစ်ဝက်အဖြစ် သတ်မှတ်ခံရသည်။ ခရမ်းရောင်သလင်းကျောက် လူမှုအဖွဲ့အစည်း၏ သဘောထားသည် နူးညံ့သိမ်မွေ့ပြီး ဖော်ရွေသည်။

ကလင့်နိုင်ငံ၏ အဆင့်မြင့်အရာရှိများသည် ပို၍ စိတ်အားထက်သန်ကြသည်။ သူတို့သည် ဆက်ဆံရေးထူထောင်ရန် ရည်ရွယ်ချက်ကို ရှင်းရှင်းလင်းလင်းပြသပြီး စကားပြောရန် ဟန်ရှောင်းထံ တက်ကြွစွာ ချဉ်းကပ်လာသည်။ သေချာပါသည်၊ ဟန်ရှောင်းက ငြင်းဆန်စရာ အကြောင်းမရှိပေ။

သို့သော် သူသည် ကလင့်များနှင့် မည်သည့်အခါမျှ အဆက်အသွယ်မရှိခဲ့ဖူးသောကြောင့် ဤလူသည် အပူရှိန်တက်နေသည့် တိရစ္ဆာန်ကဲ့သို့ အဘယ်ကြောင့် စိတ်အားထက်သန်နေရသည်ကို အတော်လေး စိတ်ရှုပ်ထွေးနေသည်...

ရက်အနည်းငယ်ကြာပြီးနောက် ဟန်ရှောင်း၏ ဆက်သွယ်ရေးစက်သည် လူရာပေါင်းများစွာ၏ အဆက်အသွယ်များကို ရရှိခဲ့ပြီး သူတို့အားလုံးသည် သူတို့၏လုပ်ငန်းနယ်ပယ်များတွင် အကောင်းဆုံးများဖြစ်သည်။ ဤအဆက်အသွယ်များက ဤခရီးစဉ်ကို တန်ဖိုးရှိစေခဲ့သည်။

သူ မျောလွင့်နဂါးကျွန်းသို့ ပြန်သွားပြီး ဤအဆက်အသွယ်များကို ဂျန်နီနှင့် မျှဝေလိုက်သောအခါ သူမသည် သေချာပေါက် ရင်ထဲထိသွားလိမ့်မည်။

...

နောက်ဆုံးတွင် ပါတီပွဲမတိုင်မီ နောက်ဆုံးနေ့ ရောက်ရှိလာသည်။

ထိုနေ့တွင် သူတို့၏ အံ့အားသင့်စရာကောင်းလောက်အောင် အာဏာရှင်သည် ဟန်ရှောင်းနှင့် အခြားသူများထံ လူတစ်ဦးကို စေလွှတ်ခဲ့ပြီး ဟီဘာ နန်းတော်တွင် ကျင်းပသည့် သီးသန့်အစည်းအဝေးသို့ တက်ရောက်ရန် ဖိတ်ကြားလာသည်။

“ဟီဘာက သီးသန့်တွေ့ချင်တာလား။ သူ့ရည်မှန်းချက်က ဘာလဲ” ဟန်ရှောင်း စူးစမ်းလိုစိတ်ဖြစ်နေသည်။

“မသိဘူး။” အေးမီစ် ခေါင်းခါလိုက်သည်။ “ငါတို့ အဲဒီရောက်ရင် သိရလိမ့်မယ်။”

သူမသည် ဟီဘာ၏ ရပ်တည်ချက်ကို သိလိုသောကြောင့် ဖိတ်ကြားချက်ကို လက်ခံခဲ့သည်။

သူတို့သည် ဟီဘာ နန်းတော်ထဲသို့ ဝင်သွားပြီး ကြီးမားသည့် ညီလာခံခန်းမသို့ ရောက်ရှိလာကြသည်။ ရာဇပလ္လင်သုံးခုသည် တြိဂံပုံသဏ္ဌာန်ဖြင့် မြေပြင်အထက် သုံးမီတာတွင် ပျံဝဲနေသည်။

ရာဇပလ္လင်များထဲမှ တစ်ခုပေါ်တွင် ခုနစ်မီတာအရပ်ရှိသည့် ဧရာမကြီးတစ်ဦး ထိုင်နေပြီး အလွန်အားကောင်းသည့် စွမ်းအင်အငွေ့အသက်ကို ထုတ်လွှတ်နေသည်။ သူတို့ အခန်းထဲသို့ ဝင်ရောက်လာသည်နှင့် မသိစိတ်ဖြင့် လှမ်းကြည့်မိကြသည်။ ဟီဘာ၏ တည်ရှိမှုသည် လွှမ်းမိုးထားသောကြောင့် သူသည် အခြားသူများ၏ အာရုံကို ချက်ချင်း ဆွဲဆောင်နိုင်သည်။

ဤသည်မှာ ဟန်ရှောင်း ဟီဘာကို လူကိုယ်တိုင် ပထမဆုံးအကြိမ် တွေ့ဆုံခြင်းဖြစ်ပြီး ဝပ်နေသည့် ခြင်္သေ့ကို ချက်ချင်း သတိရစေသည်။

ကြီးမားခြင်း။ ၎င်းသည် ဟီဘာအပေါ် ဟန်ရှောင်း၏ ပထမဆုံး အထင်အမြင်ဖြစ်သည်။

“ထိုင်ပါ။” ဟီဘာ လှမ်းကြည့်လိုက်သည်။ သူ၏မျက်လုံးများသည် တည်ငြိမ်ပြီး သူ၏လေသံသည် အေးဆေးသော်လည်း လွှမ်းမိုးမှုသည် သူ၏အရိုးများထဲတွင် နက်ရှိုင်းစွာ စွဲမြဲနေသကဲ့သို့ သဘာဝကျသည့် ဖိအားကို ပိုင်ဆိုင်ထားသည်။ သူဘာလုပ်လုပ် လူများကို ထိုခံစားချက်ကို ပေးလိမ့်မည်။

အေးမီစ် နှာမှုတ်လိုက်သည်။ သူမ ပျံတက်သွားပြီး ရာဇပလ္လင်တစ်ခုပေါ်တွင် ထိုင်လိုက်သည်။ ဟန်ရှောင်းနှင့် ညီအစ်မနှစ်ယောက်သည် ရာဇပလ္လင်ဘေးတွင် ရပ်နေကြသည်။

“ဘာကိစ္စနဲ့ ကျွန်မကို ဒီကို ခေါ်တာလဲ” အေးမီစ်က လေးနက်သည့် အသံဖြင့် မေးလိုက်သည်။

ဟီဘာသည် လွတ်နေသည့် တတိယ ရာဇပလ္လင်ကို ကြည့်ပြီး “နောက်ထပ် လူတစ်ယောက် လိုသေးတယ်။ လူတိုင်း ရောက်လာရင် ငါတို့ပြောကြမယ်”

ထို့နောက် အာဏာရှင်သည် သူ၏မျက်လုံးများကို မှိတ်ပြီး အေးမီစ်ကို ဘေးနားထားကာ အနားယူလိုက်သည်။

‘ငါသိ ငါတတ်ကောင်ကြီး...’ ဟန်ရှောင်း၏ နှုတ်ခမ်းများ မထိန်းနိုင်ဘဲ တွန့်သွားသည်။

အေးမီစ် နှာမှုတ်လိုက်ပြီး ယင်းကို အသားကျနေပြီဖြစ်သည်။ ဒါက ဟီဘာ၏ လုပ်ဆောင်ပုံဖြစ်သည်။ ဖြောင့်ဖြောင့်တန်းတန်းနှင့် အင်အားသုံးတတ်ပြီး သူသည် အေးချမ်းသည့် စကားဝိုင်းများကို မကြိုက်ပေ။

ခဏကြာတော့ ဂိတ်တံခါး ထပ်ပွင့်လာသည်။

ကြီးမားသည့် မှော်ဆရာဝတ်ရုံကို ဝတ်ဆင်ထားသည့် ကလေးတစ်ဦးသည် ယိမ်းယိုင်ကာ ပျံဝဲဝင်လာပြီး သေးငယ်သည့် မှော်နဂါးအချို့သည် သူ၏ခန္ဓာကိုယ်တစ်ဝိုက်တွင် နာခံမှုရှိစွာ ကူးခတ်နေကြသည်။

ဤကလေး၏ မျက်နှာသည် ပြည့်ဖောင်းပြီး ဝိုင်းစက်ကာ သူ၏နားရွက်များ ချွန်နေသည်။ သူသည် ခြောက်နှစ် သို့မဟုတ် ခုနစ်နှစ်သာ ရှိသေးသည်ဟု ထင်ရသည်။ အနီနှင့် အဖြူရောင် မှော်ဆရာဝတ်ရုံသည် လက်ရာမြောက်သည့် ဇိမ်ခံစောင်ကဲ့သို့ သူ၏သေးငယ်သည့် ခန္ဓာကိုယ်ပေါ်တွင် ချိတ်ဆွဲထားသည်။ သူက မှော်ဆရာဝတ်ရုံကို ဝတ်ဆင်မည့်အစား ဝတ်ရုံက သူ့ကို ပတ်ထားသကဲ့သို့ ဖြစ်နေပြီး အမြီးပိုင်းသည် ကြမ်းပြင်ကို ထိလုနီးပါးဖြစ်သည်။

ကလေး၏အောက်တွင် အနက်ရောင် ခေါင်းစွပ်ဝတ်ရုံ ဝတ်ဆင်ထားသည့် မျက်နှာဖုံးစွပ် အမျိုးသားအချို့ ရှိသည်။ သူတို့သည် လမ်းလျှောက်ရင်း အောက်ကို ငုံ့ကြည့်နေကြပြီး လျှို့ဝှက်ဆန်းကြယ်ပုံ ပေါက်နေသည်။

“မင်းလည်း ဒီရောက်နေတာလား” အေးမီစ်၏ လေသံ မြင့်တက်လာသည်။

“ဒီတစ်ခါ အကြီးကြီးတစ်ခုခုရှိတယ်လို့ ကြားလို့ ငါ ဒီကို လာကြည့်တာ” ကလေးသည် လွတ်နေသည့် ရာဇပလ္လင်ပေါ်တွင် ထိုင်လိုက်သည်။ ထူးထူးခြားခြား နူးညံ့ပြီး ကလေးဆန်သည့် အသံဖြင့် သူက အခြားနှစ်ဦးကို ခေါင်းညိတ်ပြပြီး “အေးမီစ်၊ ဟီဘာ၊ ငါတို့ နောက်ဆုံးတွေ့ပြီးကတည်းက အချိန်နည်းနည်း ကြာသွားပြီ”

ထိုအခါ ဟန်ရှောင်းသည် ဤကလေးသည် ကွဲအက်ကြယ်စင်ကွင်းရှိ အခြား အဆင့် အေ အထက်ဆင့်တစ်ဦး — [မှော်ပညာရှင်] အော်စတင် ဖြစ်ကြောင်း သဘောပေါက်သွားသည်။ နားလည်ရန်ခက်ခဲသည့် မှော်ဆရာတစ်ဦး။

အော်စတင်သည် အလွန်ငယ်ရွယ်ပုံ ပေါက်သော်လည်း သူသည် အမှန်တကယ်တွင် အသက်ရှည်သည့် မျိုးနွယ်စုမှဖြစ်သည်။ သူသည် နှိုင်းယှဉ်၍မရသည့် မှော်ပညာရင်းနှီးမှုဖြင့် မွေးဖွားလာခဲ့သည်။ အခြားသူများကဲ့သို့ပင် သူ၌ ‘စည်းမျဉ်းများကို ကွေးညွှတ်သူ’၊ ‘တားမြစ်ထားသည့် မန္တန်များ ဖန်တီးသူ’၊ ‘မန္တန်တစ်ဝက် ခန္ဓာကိုယ်’၊ ‘အာကိန်း၏ အုပ်စိုးသူ’ နှင့် အခြားဘွဲ့အမည်များစွာ ရှိသည်။

ဟန်ရှောင်းသည် အော်စတင်အောက်ရှိ ခေါင်းစွပ်အနက်ရောင်ဝတ်ရုံ ဝတ်ဆင်ထားသည့် မျက်နှာဖုံးစွပ် မှော်ဆရာများကို ကြည့်လိုက်သည်။ မှော်ဆရာတိုင်းသည် သူတို့၏လက်များကို ကြီးမားသည့် အင်္ကျီလက်များတွင် ဝှက်ထားကာ လက်များကို သူတို့ရှေ့တွင် ပိုက်ထားပြီး တိတ်ဆိတ်သည့် ရုပ်တုများကဲ့သို့ မြေပြင်ကို စိုက်ကြည့်နေကြသည်။

“ဒါဆို ဒါတွေက တားမြစ်မှော်ဆရာတွေပဲ။” ဟန်ရှောင်း မျက်လုံးမှေးလိုက်သည်။

[မှော်ပညာရှင်] အော်စတင်၏ အဖွဲ့အစည်းကို ကွဲအက်ကြယ်စင်ကွင်းရှိ မှော်ဆရာများ၏ မြင့်မြတ်သည့် နယ်မြေများထဲမှ တစ်ခုဖြစ်သည့် လျှို့ဝှက်ဝတ်ရုံနီ ကျောင်းတိုက်ဟု ခေါ်သည်။ သူတို့သည် မှော်ပညာကို လေ့လာခြင်းနှင့် ဆွေးနွေးခြင်းအပေါ် အာရုံစိုက်ပြီး ရံဖန်ရံခါတွင် အချို့လူမှုအဖွဲ့အစည်းများအတွက် မှော်ပညာဆိုင်ရာ စုံစမ်းစစ်ဆေးမှုများကို ကိုင်တွယ်ဖြေရှင်းကြသည်။ ကွဲအက်ကြယ်စင်ကွင်းတွင် မှော်ဆရာဖြစ်သရွေ့ အများစုသည် လျှို့ဝှက်ဝတ်ရုံနီ ကျောင်းတိုက်သို့ ဝင်ရောက်ရန် ဆန္ဒရှိကြသည်။ ထိုအဖွဲ့အစည်း၌ အသင်းအဖွဲ့တစ်ခု၏ လက္ခဏာများ ရှိသည်။

လျှို့ဝှက်ဝတ်ရုံနီ ကျောင်းတိုက်ကို ပြင်ပအဖွဲ့ဝင်များနှင့် အတွင်းပိုင်းအဖွဲ့ဝင်များဟူ၍ ခွဲခြားထားသည်။ ပြင်ပအဖွဲ့ဝင်များအားလုံးသည် တာဝန်ယူမှု များများစားစား မရှိရသည့် လွတ်လပ်သည့် လူများဖြစ်သည်။ နက်နဲသည့် မှော်ပညာကို သင်ယူလိုပါက စမ်းသပ်မှုများကို ဖြေဆိုပြီး အမိန့်များကို လိုက်နာကာ လျှို့ဝှက်ဝတ်ရုံနီ ကျောင်းတိုက်၏ အတွင်းပိုင်းအဖွဲ့ဝင်များ ဖြစ်လာစေရန် မှော်စာချုပ် ချုပ်ဆိုရမည်ဖြစ်သည်။

အတွင်းပိုင်းအဖွဲ့ဝင်များကိုသာ အော်စတင်၏ ကွပ်ကဲမှုအောက်တွင် ရှိသည်ဟု ယူဆကြသည်။ တားမြစ်မှော်ဆရာများသည် လျှို့ဝှက်ဝတ်ရုံနီ ကျောင်းတိုက်၏ လက်ရွေးစင်များဖြစ်သည်။ မတူညီသည့် ဖွဲ့စည်းပုံအဆောက်အအုံများကြောင့် ၎င်းတို့၏ စစ်ဘက်ဆိုင်ရာ အင်အားသည် သွေးစွန်းကုန်းမြေ၏ အင်အားကဲ့သို့ မသန်မာသော်လည်း ပြင်ပအဖွဲ့ဝင်များ ပါဝင်ပါက ၎င်းတို့၏အရေအတွက်သည် သွေးစွန်းကုန်းမြေထက် များစွာ ပိုများနိုင်သည်။

အေးမီစ်အပြင် ဟီဘာသည် အခြား အဆင့် အေ အထက်ဆင့်တစ်ဦးကို ဖိတ်ကြားခဲ့သည်။ ကွဲအက်ကြယ်စင်ကွင်းတွင် အဆင့် အေ အထက်ဆင့် လေးဦးရှိပြီး သုံးဦးသည် ထိုနေရာတွင် စုရုံးနေကြသည်။

ဟီဘာသည် သူ၏မျက်လုံးများကို ဖွင့်ကာ “လူတိုင်း ရောက်နေပြီ။ အလုပ်ကိစ္စ ပြောကြရအောင်”

“နေဦး၊ နောက်တစ်ယောက် ဘယ်မှာလဲ” အေးမီစ်က မေးသည်။ သူမသည် ထိုနေရာတွင် မရှိသည့် နောက်ဆုံး အဆင့် အေ အထက်ဆင့်အကြောင်း ပြောနေခြင်းဖြစ်သည်။

“သူက ဝေးလွန်းတယ်၊ လာဖို့ ပျင်းတယ်လို့ ပြောတယ်”

“တကယ်ပဲ သူအဲလိုပြောမှာ။” အော်စတင် ရယ်မောလိုက်သည်။

ဟီဘာသည် အချိန်ဖြုန်းကာ စကားပြောမနေချင်ပေ။ သူသည် လိုရင်းကို တန်းပြောပြီး ဖြည်းညှင်းစွာဖြင့် “ဒီအစည်းအဝေးရဲ့ ရည်ရွယ်ချက်က မင်းတို့ကို လူတစ်ယောက်နဲ့ မိတ်ဆက်ပေးဖို့ပဲ”

ဂိတ်၏ အခြားတစ်ဖက် ပွင့်သွားပြီး လူတစ်ဦး ဝင်လာသည်။ ဟီဘာက အခြား အဆင့် အေ အထက်ဆင့်နှစ်ဦးနှင့် မိတ်ဆက်ပေးလိုသည့် ဤလူသည် မည်သူဖြစ်သည်ကို သိလို၍ လူတိုင်း စူးစမ်းလိုစိတ်ဖြင့် ကြည့်နေကြသည်။

ဤလူသည် ၂.၅ မီတာခန့် အရပ်ရှည်သည့် လူသားမျိုးစိတ်ဖြစ်သည်။ သူ၏အသားအရေသည် အနီဖျော့ရောင်၊ ဆံပင်တိုတိုနှင့် သူ၏မျက်နှာသည် ထူးခြားသော်လည်း အာကာသလူသားများ၏ အလှတရားနှင့် အသင့်တော်ဆုံးဖြစ်သည်။ သူသည် ပျော့ပျောင်းပြီး တွေ့ရခဲသည့် ဝတ်ရုံကို ဝတ်ဆင်ထားကာ အလွန်ရှုပ်ထွေးပြီး တန်ဖိုးကြီးပုံ ပေါက်နေသည်။ ဘာပစ္စည်းလဲဆိုတာ မဆုံးဖြတ်နိုင်ပေ။ ဝတ်ရုံပေါ်ရှိ ပုံစံများသည် လက်ရာမြောက်ပြီး အောက်ခြေသည် ကြက်သွေးနီရောင် ဖြစ်သည်။

အဆင့် အေ အထက်ဆင့် သုံးဦးကို ရင်ဆိုင်ရချိန်တွင် ဤလူသည် တည်ငြိမ်နေသည်။ သူသည် ရာဇပလ္လင်သုံးခုကြားတွင် ရပ်ပြီး သူတို့သုံးဦးကို ညင်သာစွာ နှုတ်ဆက်လိုက်သည်။

“မိတ်ဆက်ပေးပါရစေ” ဟီဘာက ဖြည်းညှင်းစွာ ပြောလိုက်သည်။ “ကြက်သွေးနီအင်ပါယာရဲ့ ကိုယ်စားလှယ် ဇိုအယ်။”

(‘ခရင်မ်ဆွန်အင်ပါယာ’ ကို ဖတ်ရပိုလွယ်အောင် ‘ကြက်သွေးနီအင်ပါယာ’ လို့ ပြောင်းလဲပြန်ဆိုပါမယ်။)

လူတိုင်း၏ မျက်လုံးအိမ်များ ချက်ချင်း ကျဉ်းမြောင်းသွားသည်။

ဟန်ရှောင်း၏ မျက်နှာသည် အတူတူပင် ဖြစ်နေသော်လည်း သူ၏စိတ်ထဲတွင် မုန်တိုင်းတစ်ခု ရှိနေသည်။

‘စကြဝဠာ လူမှုအဖွဲ့အစည်း သုံးခုထဲမှ တစ်ခုဖြစ်သည့် ကြက်သွေးနီအင်ပါယာ။’

‘အဆင့်အမြင့်ဆုံး လူမှုအဖွဲ့အစည်းက အာဏာရှင်၏ ပါတီပွဲကို တက်ရောက်ရန် ကိုယ်စားလှယ်တစ်ဦး စေလွှတ်လိုက်တာလား။’

‘ဟီဘာက စကြဝဠာ လူမှုအဖွဲ့အစည်း သုံးခုနဲ့ အဆက်အသွယ်တွေ လုပ်ပြီးပြီလား။’

‘ခဏနေပါဦး…’ ဟန်ရှောင်း ပြဿနာတစ်ခုကို ရုတ်တရက် သဘောပေါက်လိုက်သည်။

စာရွက်ပေါ်တွင် ကွဲအက်ကြယ်စင်ကွင်းသည် အလင်းအဖွဲ့ချုပ်၏ နယ်မြေပိုင်ဖြစ်သည်။ သို့သော် ကြက်သွေးနီအင်ပါယာသည် အရေးကြီးသည့် လူအားလုံး တက်ရောက်မည့် အာဏာရှင်၏ ပါတီပွဲသို့ ကိုယ်စားလှယ်တစ်ဦးကို လျှို့ဝှက်စွာ စေလွှတ်ခဲ့သည်။ ဤအဓိပ္ပာယ်သည် ထူးခြားသည်။

(‘အလင်းအဖွဲ့ချုပ်’ နဲ့ ‘အလင်း ဖက်ဒရေးရှင်း’ အတူတူပါပဲ။)

ဟန်ရှောင်း၏ စိတ်သည် လျင်မြန်စွာ အလုပ်လုပ်သည်။ ရုတ်တရက် သူသည် တစ်စုံတစ်ခုကို သတိရလိုက်ပြီး သူ၏မျက်လုံးထဲမှ အကြည့်များ အနည်းငယ် ပြောင်းလဲသွားသည်။

ဗားရှင်း ၃.၀ [ကြက်သွေးရောင် ဒီရေ] ၏ နောက်ခံသည် ကြက်သွေးနီအင်ပါယာ၏ ချဲ့ထွင်မှုဖြစ်ပြီး အမျိုးမျိုးသော ကြယ်နယ်မြေများကို ထိခိုက်စေကြောင်း သူ မှတ်မိသည်။

နိမိတ်လက္ခဏာတစ်ခု ပေါ်လာနှင့်ပြီ ဖြစ်သည်။

ဟန်ရှောင်း အသက်ပြင်းပြင်းရှူလိုက်ပြီး သူ၏စိတ်ခံစားချက်များကို ငြိမ်သက်အောင် လုပ်လိုက်သည်။ အာဏာရှင်၏ ပါတီပွဲသည် ခြုံခိုတိုက်ခိုက်မှုတစ်ခု ဖြစ်နိုင်သည်။

အေးမီစ် မျက်မှောင်အနည်းငယ် ကြုတ်လိုက်ပြီး မထွက်ခွာမီ အေးမီစ်၏ ဟောကိန်းကို ပြန်သတိရလိုက်သည်။

‘ဒီပါတီပွဲက တကယ် မရိုးရှင်းဘူး…’

အခန်းထဲတွင် တိတ်ဆိတ်သွားသည်။

ဇိုအယ်က အနည်းငယ် ပတ်ပတ်လည် ကြည့်လိုက်ပြီး အေးစက်နေမှု ချိုးဖျက်လိုက်သည်။ “ကွဲအက်ကြယ်စင်ကွင်းရဲ့ အဆင့် အေ အထက်ဆင့် သုံးဦးနဲ့ တွေ့ဆုံရတာ ကျွန်တော် ဂုဏ်ယူပါတယ်”

“ကျွန်တော်တို့လည်း ဂုဏ်ယူပါတယ်” အော်စတင်က ပြန်ဖြေပြီး ဟီဘာကို စူးစမ်းလိုစိတ်ဖြင့် ကြည့်လိုက်သည်။

ကြက်သွေးနီအင်ပါယာ ကိုယ်စားလှယ်ကို မိတ်ဆက်ပေးခြင်းသည် ဘာကို ဆိုလိုသနည်း။

“ငါတို့ နောက်ထပ် ပြောမယ့်အကြောင်းအရာက ဒီပါတီပွဲရဲ့ အဓိကအကြောင်းအရာပဲ။ မင်းတို့ကို အခုပဲ ကြိုပြောပြမယ်” ဟီဘာက လေးနက်သည့် အသံဖြင့် ပြောလိုက်သည်။ “မကြာသေးမီက ကွဲအက်ကြယ်စင်ကွင်းအပြင်ဘက်မှာ အလင်းအဖွဲ့ချုပ် ထားရှိတဲ့ ပြင်ပစကြဝဠာ စူးစမ်းလေ့လာရေး ကိရိယာက အစီရင်ခံစာတစ်စောင် ပြန်ပို့ခဲ့တယ်။ အဲဒါက ကြီးမားသည့် စွန့်ပစ်စကြဝဠာ ဧရိယာကို ဖြတ်ကျော်ပြီး အစွန်းဘက်က ကြယ်စုတန်း ဧရိယာအသစ်တစ်ခုပတ်ပတ်လည်တွင် လှည့်ပတ်နေခဲ့သည်။ ဒါက ပိုင်ရှင်မဲ့ ကြယ်စုတန်းတစ်ခုဖြစ်ပြီး အဲဒါကို စူးစမ်းလေ့လာကာ ကွဲအက်ကြယ်စင်ကွင်းရဲ့ မြေပုံထဲထည့်ဖို့ လိုအပ်တယ်”

အခြားသူများသည် သူတို့၏မျက်နှာပေါ်တွင် မတူညီသည့် အမူအရာများ ရှိနေကြသည်။

‘ကြယ်စုတန်းအဆင့် လူမှုအဖွဲ့အစည်း ၇ခုလုံးက ဒီပါတီပွဲကို တက်ရောက်ဖို့ ကိုယ်စားလှယ်တစ်ဦးစီ စေလွှတ်လိုက်တာ အံ့သြစရာ မရှိဘူး’ ဟန်ရှောင်း သဘောပေါက်လိုက်သည်။

ငြိမ်းချမ်းရေးစာချုပ် ချုပ်ဆိုပြီးကတည်းက စကြဝဠာ လူမှုအဖွဲ့အစည်း ၃ခုလုံးသည် မစူးစမ်းရသေးသည့် စကြဝဠာကို စူးစမ်းလေ့လာရန်နှင့် လူသိများသည့် စကြဝဠာကို ချဲ့ထွင်ရန် ကြိုးစားနေခဲ့ကြသည်။

နယ်မြေသစ်တစ်ခု ပေါ်လာတိုင်း တိုက်ပွဲအသစ်များ ဖြစ်ပွားကြသည်။

ကွဲအက်ကြယ်စင်ကွင်း၏ ကြယ်စုတန်းများအားလုံးသည် ကြယ်စုတန်းအဆင့် လူမှုအဖွဲ့အစည်း ခုနစ်ခုပိုင်ဆိုင်သောကြောင့် ကြယ်စုတန်းအသစ်သည် လူတိုင်းက တစ်ပိုင်းလိုချင်သည့် ကိတ်မုန့်တစ်ခု ဖြစ်သည်၊ ကိတ်မုန့်တစ်ခုလုံး မဟုတ်လျှင်တောင်မှပေါ့။

“အလင်းအဖွဲ့ချုပ်က ကြယ်စုတန်းအသစ်ကို ကွဲအက်ကြယ်စင်ကွင်းထဲ ထည့်ချင်တယ်။ ဒါပေမယ့် ငါတို့ကတော့ ကြယ်နယ်မြေအသစ်တစ်ခုရဲ့ အစမှတ်အဖြစ် သတ်မှတ်ချင်တယ်” ဇိုအယ်က ပြောသည်။

သူသည် အသေးစိတ်ကို မပြောသော်လည်း သူဆိုလိုသည့်အရာကို လူတိုင်း နားလည်ကြသည်။

ကွဲအက်ကြယ်စင်ကွင်းသည် အလင်းအဖွဲ့ချုပ်၏ နယ်မြေပိုင်ဖြစ်သော်လည်း ကြယ်နယ်မြေအသစ်သည် မည်သူ့ပိုင်မျှ မဟုတ်ပေ။ ကြက်သွေးနီအင်ပါယာ၏ ရည်မှန်းချက်သည် ကြီးမားသည် - သူတို့လိုချင်သည်မှာ ကြယ်စုတန်းတစ်ခုတည်း မဟုတ်ပေ။

စူးစမ်းထားသည့် စကြဝဠာတွင် ဗဟို ကြယ်နယ်မြေများသည် စည်ကားနေပြီး အစွန်းရှိ ကြယ်နယ်မြေများသည် ပို၍ ရှုပ်ထွေးပြီး နောက်ကျကျန်နေသည်။ ကွဲအက်ကြယ်စင်ကွင်းကဲ့သို့ နယ်စပ်ရှိ ကြယ်နယ်မြေများသည် ပြိုင်ဆိုင်မှု အပြင်းထန်ဆုံး နေရာများဖြစ်သည် - ဤနေရာများတွင်သာ ဆက်လက်စူးစမ်းလေ့လာရန်နှင့် ထပ်မံချဲ့ထွင်ရန် အခွင့်အလမ်းများ ရှိသည်။

“ဒါကြောင့် ကြက်သွေးနီအင်ပါယာကိုယ်စား ခင်ဗျားတို့ဆီက အကူအညီရရှိဖို့ ကျွန်တော် မျှော်လင့်ပါတယ်” ဇိုအယ်က သူ၏ရည်မှန်းချက်ကို ပြောသည်။

ဟီဘာ တိတ်ဆိတ်နေသည်။ သူသည် ကြက်သွေးနီအင်ပါယာ ကိုယ်စားလှယ်ကို အခြားသူများနှင့် မိတ်ဆက်ပေးခဲ့သောကြောင့် သွေးစွန်းကုန်းမြေသည် သူ၏ ဆုံးဖြတ်ချက်ကို ချပြီးပြီဖြစ်ကြောင်း ရှင်းနေသည်။

ဒါဆို အလင်းအဖွဲ့ချုပ်လား၊ ဒါမှမဟုတ် ကြက်သွေးနီအင်ပါယာလား။

အော်စတင်နှင့် အေးမီစ် အကြည့်ချင်း ဖလှယ်ပြီး တိတ်ဆိတ်နေကြသည်။

ဟန်ရှောင်း၏ မျက်လုံးများ တည်ကြည်သွားသည်။ ‘သူတို့ ကြီးကြီးမားမား လှုပ်ရှားနေကြပြီ။’

စာစဉ် (၃၉)၊ အခန်း (၆၀၉) ပြီး၏။

လင်းဆက်

+++++

အခန်း (၆၁၀) ပေါ်တင်ဆွဲဆောင်စည်းရုံးခြင်း

ပလ္လင်သုံးခုသည် ကြက်သွေးနီအင်ပါယာ၏ ကိုယ်စားလှယ်ကို အလယ်တွင်ထားလျက် လေထဲတွင်မျောလွင့်နေကြသည်။

“မင်းတို့ကိုကူညီရင် ငါတို့ ဘာရမလဲ”

ခဏလောက် စဉ်းစားပြီးနောက် အော်စတင်က ပထမဆုံးတုံ့ပြန်လိုက်သည်။

ရှိနေသူအားလုံးတွင် တိကျသောအဆင့်အတန်းတစ်ခုရှိကြပြီး ကြက်သွေးနီအင်ပါယာ၏ ကိုယ်စားလှယ်သည်ပင် သူတို့ကိုအလကားအလုပ်လုပ်ခိုင်းရန် မျှော်လင့်၍မရနိုင်ပေ။

မည်သည့်အခြေအနေမှမကမ်းလှမ်းဘဲ အဆင့် အေ အထက်ဆင့်စူပါများကိုသူ့အား ကူညီစေလိုခြင်းသည် စိတ်ကူးယဉ်အိပ်မက်တစ်ခုမျှသာဖြစ်သည်။

“နယ်မြေအသစ်တစ်ခုက အခွင့်အလမ်းအသစ်တွေကိုကိုယ်စားပြုတယ်။ စက္ကူဖြူတစ်ရွက်ကိုမှ အရောင်ခြယ်ရလွယ်ကူတာပါ။ အကယ်၍ ကျွန်တော်တို့က ဒီအသစ်တွေ့ရှိထားတဲ့ ကြယ်စုတန်းကို ကြယ်နယ်မြေအသစ်တစ်ခုရဲ့အစအဖြစ် ပြောင်းလဲနိုင်ခဲ့ရင်၊ သူတို့ရဲ့နယ်မြေကို စူးစမ်းလိုသူတွေ ဒါမှမဟုတ် ချဲ့ထွင်လိုသူတွေဟာ ကြယ်နယ်မြေအသစ်ရဲ့ နယ်မြေထဲကို ဝင်ရောက်ရပါလိမ့်မယ်။ အဲဒီအချိန်ကျရင် ကြယ်နယ်မြေအသစ်ဟာ ကွဲအက်ကြယ်စင်ကွင်းနဲ့ အလေးချိန်တူညီတဲ့ ကြယ်နယ်မြေတစ်ခုဖြစ်လာနိုင်ပါတယ်။ အဲဒါရဲ့ အထဲမှာဖုံးကွယ်ထားတဲ့ အကျိုးကျေးဇူးတွေက ကြောက်စရာကောင်းတယ်” ဇိုအယ်က ရှင်းပြရင်း လက်ဝှေ့ယမ်းကာ နယ်မြေအသစ်အမှတ်အသားပြုထားသော ဟော်လိုဂရမ်ကြယ်မြေပုံကို သူ၏ဆက်သွယ်ရေးစက်မှ ထုတ်ပြလိုက်သည်။

၎င်းသည် ကွဲအက်ကြယ်စင်ကွင်း၏ နယ်နိမိတ်အပြင်ဘက်တွင်ရှိပြီး မှောင်မိုက်သော မစူးစမ်းရသေးသည့် အာကာသဒေသတစ်ခုကို ၎င်းပေါ်မှာအမှတ်အသားပြုထားသည်။

ရှည်လျားပြီး လူသူကင်းမဲ့သော အာကာသခါးပတ်တစ်ခုကိုဖြတ်ကျော်ပြီးနောက်၊ မှောင်မိုက်သော အာကာသဒေသအတွင်းမှ တောက်ပသောဒေသတစ်ခု ထွက်ပေါ်လာသည်။ ၎င်းသည် အလင်းအဖွဲ့ချုပ်မှ ရှာဖွေတွေ့ရှိခဲ့သော ကြယ်စုတန်းအသစ်ဖြစ်သည်။

အသေးဆုံးမှအကြီးဆုံးအထိ၊ ဂလက်ဆီ၏ဒေသများကို ဂြိုလ်၊ ကြယ်ဇုန်၊ ကြယ်စနစ်၊ ကြယ်စုတန်းနှင့် နောက်ဆုံးတွင် ကြယ်နယ်မြေဟူ၍ ခွဲခြားသတ်မှတ်ထားသည်။

ကြက်သွေးနီအင်ပါယာသည် ဤကြယ်စုတန်းအသစ်ကို ၎င်းတို့ရဲ့နယ်မြေကိုချဲ့ထွင်ရန်အတွက်သာမက အနာဂတ်စူးစမ်းရှာဖွေမှုများအတွက် ခြေကုပ်စခန်းတစ်ခုအဖြစ် ဖွဲ့စည်းလိုသောကြောင့် ရယူလိုသည်။ ထို့နောက် ကြက်သွေးနီအင်ပါယာသည် ၎င်းတို့၏ နယ်မြေအသစ်ကို စူးစမ်းရှာဖွေမှုအစမှတ်အဖြစ် အသုံးချနိုင်ပြီး နယ်မြေကို ဆက်လက်ချဲ့ထွင်နိုင်မည်ဖြစ်သည်။ နောက်ပိုင်းတွင် သူတို့တွေ့ရှိခဲ့သော ဒေသအသစ်အားလုံးသည် ကြက်သွေးနီအင်ပါယာ၏အစိတ်အပိုင်းဖြစ်သော ကြယ်နယ်မြေအသစ်တွင် ပါဝင်မည်ဖြစ်သည်။

အလင်းအဖွဲ့ချုပ်သည် ကွဲအက်ကြယ်စင်ကွင်းကို ထိန်းချုပ်ထားပြီး ကြက်သွေးနီအင်ပါယာသည် အခြားအိမ်နီးချင်း ကြယ်နယ်မြေတစ်ခုကို ရယူလိုသည်။ သူတို့သည် ဤစူးစမ်းရှာဖွေမှုလမ်းကြောင်းကို အလင်းအဖွဲ့ချုပ်နှင့် မျှဝေရန် ဆန္ဒမရှိကြပေ။

ဇိုအယ်က သူ့ကိုထောက်ခံခြင်း၏ ကောင်းကျိုးဆိုးကျိုးများကို ခွဲခြမ်းစိတ်ဖြာနေစဉ် အော်စတင်နှင့် အေးမီစ်တို့သည် ဘေးမှတိတ်တဆိတ် နားထောင်နေကြသည်။

ဟန်ရှောင်းအတွက်မူ၊ ၎င်းရဲ့အာရုံစိုက်မှုသည် ဇိုအယ်ပြသခဲ့သော ကြယ်မြေပုံဆီသို့ ရောက်သွားသည်။

သူ ဘယ်လိုပဲကြည့်ကြည့်၊ ကြယ်စုတန်း၏ တည်နေရာသည် အလွန်ရင်းနှီးနေသည်ဟု ခံစားရသည်။

သေချာကြည့်ပြီးနောက် တစ်စုံတစ်ခုက သူ့ခေါင်းထဲတွင်ပေါ်လာပြီး စိတ်လှုပ်ရှားမှုများဖြင့် ပြည့်နှက်သွားသည်။

‘ဘုရားရေ၊ ဒါက ကြယ်ရောင်တောက်ပကမ္ဘာရဲ့ အစိတ်အပိုင်းမဟုတ်ဘူးလား။’

[ကြယ်ရောင်တောက်ပကမ္ဘာ] သည် နောက်ပိုင်းဗားရှင်း၏ ပင်မဇာတ်ကြောင်းဖြစ်ပြီး ၎င်းသည် လုံးဝကြယ်နယ်မြေအသစ်တစ်ခုဖြစ်သည်။ ဘီလီယံနှင့်ချီသော ကြယ်များသည် မှောင်မိုက်သောစကြဝဠာကို လင်းလက်စေရန် တောက်ပစွာထွန်းလင်းနေသည်။

ကြယ်နယ်မြေတစ်ခု ရှာဖွေတွေ့ရှိမှုကို ဦးဆောင်ခြင်းသည် သေချာပေါက် အကျိုးကျေးဇူးများစွာကို ဆောင်ကြဉ်းပေးမည်ဖြစ်သည်။

ဂလက်ဆီတစ်ခုလုံးရှိ ကစားသမားများအားလုံးသည် ကြယ်နယ်မြေအသစ်တစ်ခု ရှာဖွေတွေ့ရှိမှုကို ဦးဆောင်ရန် ဤပင်မဇာတ်ကြောင်းမစ်ရှင်တွင် ပါဝင်ကြမည်ဖြစ်သည်။ ကြယ်ရောင်တောက်ပကမ္ဘာသို့ ဝင်ရောက်ခဲ့သော မရေမတွက်နိုင်သော မျိုးနွယ်များနှင့် လူမှုအဖွဲ့အစည်းများလည်း ရှိခဲ့သည်။ ဤသည်မှာ အဖွဲ့အစည်းအားလုံးကြားတွင် အာဏာပြန်လည်ဖွဲ့စည်းမှုကြီး ဖြစ်ပေါ်စေပြီး နေရာတိုင်းတွင် တိုက်ပွဲများဖြစ်ပွားစေသည့် ဖြစ်ရပ်တစ်ခု ဖြစ်လာခဲ့သည်။

ဇိုအယ်ပြသနေသော ကြယ်စုတန်းအသစ်သည် ကြယ်ရောင်တောက်ပကမ္ဘာ၏ အစိတ်အပိုင်းတစ်ခုဖြစ်သည်။ ၎င်းသည် ရေခဲတောင်ကြီး၏ ထိပ်ဖျားမျှသာဖြစ်သည်။

နောက်ပိုင်းဗားရှင်းများ၏ အဖြစ်အပျက်များသည် စတင်ဖြစ်ပေါ်နေပြီဟု ဘယ်သူက ထင်ခဲ့မိမည်နည်း။

ဒေသ၏ ထောင့်ငယ်လေးတစ်ခုသာ ရှာဖွေတွေ့ရှိရသေးသည်။ ဒေသသစ်ကိုအပြည့်အဝစူးစမ်းရှာဖွေရန် နှစ်ပေါင်းများစွာလိုအပ်လိမ့်မည်။ ၎င်းသည် လက်ရှိဗားရှင်းနှင့် ဝေးကွာနေဆဲပင်...

အတိတ်တွင် ကစားသမားများသည် အဖွဲ့အစည်းအမျိုးမျိုးအတွက် မစ်ရှင်များလုပ်ဆောင်ခဲ့ကြသော်လည်း ဤတစ်ကြိမ်တွင် သူတို့သည် ထိန်းချုပ်သူများဖြစ်လာရန် အခွင့်အရေးရှိကောင်းရှိနိုင်သည်။ ကိုယ်စားလှယ် ပြောခဲ့သကဲ့သို့ပင်၊ နယ်မြေအသစ်တစ်ခုသည် အခွင့်အလမ်းအသစ်များကိုကိုယ်စားပြုသည်။ ဖြစ်နိုင်သည်မှာ ဤသည်မှာ သူအဆင့်တက်ရန်အတွက် အကောင်းဆုံးအခွင့်အရေးဖြစ်နိုင်သည်။

ဘလက်စတားစစ်တပ်သည် လုံလောက်အောင်အစွမ်းမထက်သေးဘဲ သွေးစွန်းကုန်းမြေကဲ့သို့သော အဖွဲ့အစည်းကြီးများနှင့် အလှမ်းဝေးနေသေးသော်လည်း ဟန်ရှောင်းတွင် ကြီးမားသော အားသာချက်တစ်ခုရှိသည်။ သူက အခြေအနေများမည်သို့တိုးတက်လာမည်ကို သိထားသည်။

သူသည် ထိန်းချုပ်ခွင့်ရရှိလိုပါက၊ ပိုမိုအားကောင်းသော အဖွဲ့အစည်းတစ်ခုလိုအပ်သည်။ သူပိုသန်မာလေ၊ အကျိုးကျေးဇူးများ ပိုမိုရရှိနိုင်လေဖြစ်သည်။ သူ၏လက်ရှိအခြေအနေမှာ လုံလောက်ရန် ဝေးကွာနေသေးသည်။ ကံကောင်းထောက်မစွာဖြင့် နောက်ထပ်ဗားရှင်း အနည်းငယ် ရှိသေးသည်။

ဟန်ရှောင်းသည် တိတ်တဆိတ်တွေးတောရင်း စိုးရိမ်ပူပန်လာ၏။

ကြယ်ရောင်တောက်ပကမ္ဘာမွေးဖွားလာခြင်းသည် အရာတစ်ခုကိုဆိုလိုသည်။ ကြက်သွေးနီအင်ပါယာသည် အဆုံးတွင်အောင်မြင်ခဲ့ပြီး ကြယ်စုတန်းအသစ်ကို အလင်းအဖွဲ့ချုပ်ထံမှ လုယူနိုင်ခဲ့ကာ ကြယ်နယ်မြေအသစ်အဖြစ် ပြောင်းလဲနိုင်ခဲ့သည်။

သူ အတွေးနက်နေစဉ် ဇိုအယ်သည် သူ၏အခြေအနေများကို ရှင်းပြပြီးသွားပြီ။ အနှစ်ချုပ်အားဖြင့် ကြက်သွေးနီအင်ပါယာသည် သူတို့ကို တိတ်တဆိတ် အကူအညီပေးမည် ဖြစ်သည်။

စကြဝဠာလူမှုအဖွဲ့အစည်းတစ်ခု၏ ပံ့ပိုးမှုသည် အလွန်ဆွဲဆောင်မှုရှိသောအခြေအနေတစ်ခုဖြစ်သည်။ အလင်းအဖွဲ့ချုပ်သည် ကွဲအက်ကြယ်စင်ကွင်းကို ထိန်းချုပ်ထားသော်လည်း သူတို့သည် ကွဲအက်ကြယ်စင်ကွင်းရှိ အဖွဲ့အစည်းအမျိုးမျိုးနှင့် ကြုံတောင့်ကြုံခဲသာဆက်ဆံကြပြီး အထက်စီးဆန်နေပုံရသည်။

အော်စတင် မျက်မှောင်ကြုတ်လိုက်ပြီး လေးနက်သောအမူအရာဖြစ်ပေါ်လာသည်။ သို့သော် သူ၏ကလေးဆန်သော ပုံပန်းသဏ္ဍာန်နှင့်တွဲဖက်လိုက်သောအခါ အလွန်ရယ်စရာကောင်းပြီး ချစ်စရာကောင်းနေသည်။

“ကျွန်တော်က ဒီလိုကိစ္စမျိုးကို သိပ်စိတ်မဝင်စားဘူး၊ အိမ်မှာပဲ ကျိန်စာတွေကိုလေ့လာရတာ ပိုကြိုက်တယ်။ ဒါကြောင့်တောင်းပန်ပါတယ်၊ ဒါပေမယ့် ကျွန်တော်က ကြားနေအဖြစ်ပဲနေချင်တယ်။ အလင်းအဖွဲ့ချုပ်ကို မကူညီဘူးလို့ပဲ ကတိပေးနိုင်ပါတယ်”

ခဏလောက်စဉ်းစားပြီးနောက် အော်စတင်က တုံ့ပြန်လိုက်သည်။ သူသည် ဤကိစ္စတွင်မပါဝင်ဘဲ ကြားနေအဖြစ်နေချင်သည်။

“နားလည်ပါတယ်” ဇိုအယ်က သိပ်မအံ့သြပေ။ သူတို့အားလုံးသည် အဆင့် အေ အထက်ဆင့်များဖြစ်ကြသဖြင့်၊ သူသည် တစ်ဖက်သားကိုအတင်းအကျပ်မခိုင်းစေနိုင်ပေ။ တစ်ဖက်သား ကြားနေအဖြစ် ကျန်ရှိနေခြင်းရလဒ်သည် သိပ်မဆိုးလှပေ။ ဇိုအယ်သည် အားထုတ်မှုများစွာပြုလုပ်ပြီးမှသာ ဟီဘာကိုကူညီရန် စည်းရုံးနိုင်ခဲ့ခြင်းဖြစ်သည်။ ယနေ့အစည်းအဝေး၏ အဓိကရည်ရွယ်ချက်မှာ ၎င်းတို့ရဲ့အင်ပါယာရပ်တည်ချက်ကို အသိပေးရန်နှင့် အလင်းအဖွဲ့ချုပ်အတွက် ကူညီမည့်သူအရေအတွက်ကို လျှော့ချရန်ဖြစ်သည်။

“မင်းရော ဘယ်လိုလဲ၊ အေးမီစ်” ဟီဘာက မေးလိုက်သည်။

အေးမီစ်သည် ထိုကိစ္စကိုစိတ်မဝင်စားဘဲ အော်စတင်နောက်လိုက်ကာ ကမ်းလှမ်းချက်ကို ငြင်းပယ်တော့မည်ပြင်သည်။ သို့သော် သူမခဏရပ်တန့်လိုက်ပြီး ဟန်ရှောင်းကို ကြည့်လိုက်သည်။

“ဘလက်စတား၊ မင်း ဘယ်လိုထင်လဲ”

“ဟမ်”

ဟန်ရှောင်းသည် လောလောဆယ် အတွေးနက်နေပြီး၊ ခေါ်လိုက်သောအခါ ခဏတာ ကြောင်အမ်းသွားသည်။

လူတိုင်း၏အကြည့်များ သူ့အပေါ်ရောက်နေသည်ကို မြင်လိုက်ရသောအခါ၊ ဟန်ရှောင်း ခဏစဉ်းစားပြီးနောက် ခေါင်းညိတ်လိုက်သည်။ “ကြက်သွေးနီအင်ပါယာရဲ့ ဂုဏ်သတင်းကို သဘာဝကျကျ ယုံကြည်လို့ရပါတယ်။ လေးစားရတဲ့ ကိုယ်စားလှယ်ပြောတာ မှန်ပါတယ်၊ ဒါက ကြီးမားတဲ့အကျိုးကျေးဇူးတွေ ဖုံးကွယ်ပါရှိတဲ့ တစ်သက်မှာ တစ်ခါရတဲ့အခွင့်အရေးပါ။ ကြက်သွေးနီအင်ပါယာ အောင်မြင်ဖို့အခွင့်အလမ်း အနည်းဆုံး ၆၀ရာခိုင်နှုန်းရှိတယ်လို့ ကျွန်တော်ကိုယ်တိုင် ခံစားရပါတယ်”

ဇိုအယ်၏မျက်လုံးများတောက်ပလာပြီး အပြုံးတစ်ခုပေါ်လာသည်။ ဤလူကိုသူ ဘယ်တုန်းက အောင်မြင်စွာစည်းရုံးနိုင်ခဲ့သလဲဟု တွေးတောရင်း ဟန်ရှောင်းကိုခေါင်းညိတ်ပြကာ ပြောလိုက်သည်၊ "အမြင်ကောင်းတယ်"

ဟန်ရှောင်းကလည်း ပြန်လည်ခေါင်းညိတ်ပြလိုက်သည်။ “ဒါကြောင့်၊ မင်းအနေနဲ့ ငြင်းပယ်ဖို့ အလျင်မလိုသင့်ဘူးလို့ ကျွန်တော်ထင်တယ်၊ ဒါက မကောင်းတဲ့အရာမဟုတ်ဘူး”

ထိုစကားကို ကြားလိုက်သောအခါ၊ အေးမီစ် ခဏစဉ်းစားလိုက်ပြီး ဇိုအယ်ကို တိုက်ရိုက်မငြင်းပယ်ဘဲ ပြောလိုက်သည်၊ “ငါ စဉ်းစားပါရစေ”

အော်စတင်နှင့် ဟီဘာတို့၏ အမူအရာများ ချက်ချင်းပြောင်းလဲသွားသည်။

သူတို့နှစ်ယောက်စလုံး အေးမီစ်ကို နှစ်ပေါင်းများစွာသိကျွမ်းခဲ့ကြပြီး အေးမီစ်သည် ကမ်းလှမ်းချက်ကို ငြင်းပယ်ရန် အမှန်တကယ် ရည်ရွယ်ခဲ့ကြောင်း သိကြသည်။ သို့သော် သူမသည် ဟန်ရှောင်း၏ အကြံဉာဏ်ကို နားထောင်ပြီးနောက် ချက်ချင်းစိတ်ပြောင်းသွား၏။

နဂါးဧကရီအတွက် ဘလက်စတား၏ အရေးပါမှုသည် သူတို့၏ မျှော်လင့်ချက်များကို များစွာကျော်လွန်သွားသည်။

‘ငှားရမ်းထားတဲ့လူမိုက်တစ်ယောက်တင်မကဘဲ အကြံပေးပုဂ္ဂိုလ်လား။ အော်စတင် မေးစေ့ကိုပွတ်သပ်ရင်း အတွေးနက်သွားသည်။ ဟုတ်တယ်၊ အေးမီစ်ရဲ့ စရိုက်နဲ့ဆိုရင်၊ သူမချဲ့ထွင်ချင်တယ်ဆိုရင် ယုံကြည်ရတဲ့ မဟာဗျူဟာမှူးတစ်ယောက် လိုအပ်လိမ့်မယ်၊ ပြီးတော့ ဘလက်စတားက တော်တော်အစွမ်းအစရှိပုံရတယ်။’

“ဘလက်စတား၊ မယ်လီကစ်က မင်းကိုစည်းရုံးဖို့ကြိုးစားပေမယ့် ငြင်းပယ်ခံရတယ်လို့ ငါ ကြားတယ်” ဟီဘာက ပြောသည်။

ဟန်ရှောင်း၏ မျက်လုံးများတောက်ပလာပြီး သူဖြည်းညှင်းစွာ ခေါင်းညိတ်လိုက်သည်။

“ငါ ဒုတိယအကြိမ်ကြိုးစားတာရှားတယ်၊ ဒါပေမယ့် ငါမင်းကို ကိုယ်တိုင်ထပ်မေးချင်တယ်”

ဟီဘာသည် ဟန်ရှောင်းဆီသို့ လက်မြှောက်လိုက်ပြီး လေးနက်သောလေသံဖြင့် ပြောလိုက်သည်၊ “ဘလက်စတား၊ ငါနဲ့ ပူးပေါင်းပါ”

ဘုန်း

အေးမီစ်၏အရှိန်အဝါ ပေါက်ကွဲထွက်လာပြီး ကြီးမားသောဖိအားတစ်ခု ထွက်ပေါ်လာသည်။

သူမ၏လေသံမှာ အေးစက်နေသည်။

“ငါ့ရှေ့မှာ ငါ့လူတစ်ယောက်ကို စည်းရုံးဖို့ကြိုးစားနေတာ၊ မင်း ငါ့ကိုလုံးဝ မလေးစားတာလား။”

ကြောက်မက်ဖွယ်ကောင်းသောဖိအားသည် ဟီဘာကိုအရပ်ရပ်မှ တိုက်ခိုက်နေသော်လည်း သူ မခံစားရသကဲ့သို့ပင်။ သူသည် အေးမီစ်ကိုလျစ်လျူရှုပြီး ဟန်ရှောင်းကိုစူးစိုက်ကြည့်နေသည်။ “မင်း သဘောတူလား မတူဘူးလား”

ဟန်ရှောင်း၏မျက်နှာ ရှုံ့မဲ့လာသည်။

‘ဘုရားရေ၊ တစ်ယောက်ယောက်ကို ဒီလောက်ပေါ်တင်စည်းရုံးနေတာ၊ သူက တကယ့်ကိုအာဏာရှင်ဆန်တာပဲ။’

ဟီဘာ ကိုယ်တိုင် ဒီအချိန်မှာ ဖိတ်ခေါ်လိမ့်မယ်လို့ သူ ဘယ်တုန်းကမှ မမျှော်လင့်ထားပေ။ ‘ဒီကောင်က အချိန်အခါကို ဂရုမစိုက်ဘဲ သူ့လက်သီးဘယ်လောက်မာလဲဆိုတာကိုပဲ ဂရုစိုက်တာပဲ။’

“တောင်းပန်ပါတယ်၊ ဒါပေမယ့် ကျွန်တော့်အဖြေက အတူတူပါပဲ” ဟန်ရှောင်းသည် ခေါင်းယမ်းပြီး မတတ်သာသည့်ပုံစံဖြင့် ပြောလိုက်သည်။

ဟီဘာ ခေါင်းညိတ်လိုက်ပြီး ငြင်းပယ်ခံရမှုကြောင့် ဒေါသမထွက်ပေ။ ဤအကြောင်းအရာကိုသူ လုံးဝမပြောခဲ့သလိုပင်။

သူသည် အရည်အချင်းရှိသူများကို နှစ်သက်သော်လည်း အညံ့မခံလိုသူကို အတင်းအကျပ်မလုပ်လိုပေ။

တွန်းအားနယ်မြေသည် အင်အားကြီးထွားနေဆဲဖြစ်ပြီး ဟီဘာ လှည့်ကြည့်ကာ အေးမီစ်ကိုကြည့်လိုက်သည်။ “မင်းရဲ့တွန်းအားနယ်မြေကို မရပ်တန့်ဘူးလား။ မင်း တိုက်ချင်လို့လား”

အေးမီစ်သည် အမူအရာကင်းမဲ့နေဆဲဖြစ်ပြီး ၎င်းရဲ့အရှိန်အဝါ ဆက်လက်ကြီးထွားနေသည်။ အီဆော့ ပေးခဲ့သော အကြံဉာဏ်ကို လုံးဝလျစ်လျူရှုချင်သလို ဖြစ်နေသည်။

သူတို့ တိုက်ခိုက်မိမည်စိုးသဖြင့် အော်စတင် ဝင်ရောက်စွက်ဖက်လိုက်ရသည်။ လက်ဖျောက်တစ်ချက် တီးလိုက်ပြီး သူသည် အေးမီစ်အပေါ် စိတ်ငြိမ်စေသော မန္တာန်တစ်ခု သုံးလိုက်သည်။

“ကဲပါ ကဲပါ၊ မင်း သူမကိုသိတာ ပထမဆုံးနေ့ မဟုတ်ပါလေ။ သိပ်စိတ်လိုက်မာန်ပါ မလုပ်ပါနဲ့”

စာစဉ် (၃၉)၊ အခန်း (၆၁၀) ပြီး၏။

လင်းဆက်

+++++