သူတော်စင်အဆင့်လား

မိမိတို့၏ အင်အားများ အတင်းအကျပ် ဖိနှိပ်ခံလိုက်ရကာ နတ်ဘဝပြောင်းလဲခြင်းနယ်ပယ်သို့ ကျဆင်းသွားသည်ကို ကျိုဖေးအန်တို့ မြင်လိုက်ကြပြီးနောက် သူတို့၏ မျက်နှာများ ဖြူဖပ်ဖြူရော် ဖြစ်သွားကြသည်။

ကျင့်ကြံခြင်းအဆင့်ကို ဖိနှိပ်နိုင်သည့် နည်းဗျူဟာ ပုံစံများစွာကို သူတို့ မြင်ဖူးသော်လည်း ထိုကဲ့သို့သော နည်းဗျူဟာ ပုံစံများသည် အချိန်ယူ ပြင်ဆင်ရန် လိုအပ်သလို လူအမြောက်အမြား၏ အကူအညီလည်း လိုအပ်သည်။

သူတော်စင်အဆင့်ရှိ ကျင့်ကြံသူများပင်လျှင် ကျင့်စဉ်အဆင့်ကို ဖိနှိပ်သည့် နည်းဗျူဟာ ပုံစံတစ်ခုကို ဤမျှတိုတောင်းသော အချိန်ကာလအတွင်း တည်ဆောက်ရန် မစွမ်းပေ။

သို့သော် ဆွမ်ဧကရာဇ်က ဤမျှတိုတောင်းသော အချိန်အတွင်း သူတို့၏ ကျင့်စဉ်အဆင့်ကို ဖိနှိပ်သည့် နည်းဗျူဟာ ပုံစံတစ်ခုကို တည်ဆောက်နိုင်ခဲ့သည်။ အဓိကအားဖြင့် ဆွမ်ဧကရာဇ်သည် သူတို့၏ ကျင့်စဉ်အဆင့်ကိုသာ ပစ်မှတ်ထားပုံရသည်။

ထို့ပြင် ဤနည်းဗျူဟာ ပုံစံအတွင်း၌ သူတို့၏ ကျင့်စဉ်အဆင့် ဖိနှိပ်ခံရရုံသာမက သူတို့၏ အင်အားကို ထုတ်ဖော်ရန်လည်း ခက်ခဲနေသည်။ နည်းဗျူဟာ ပုံစံမှ ထွက်ပေါ်လာသော အေးစက်သည့် စွမ်းအားသည် သူတို့ခန္ဓာကိုယ်အတွင်းရှိ စိတ်ဝိညာဉ် စွမ်းအားများကို ခဲသွားစေသကဲ့သို့ ဖြစ်နေကာ လည်ပတ်ရန် အလွန် ခက်ခဲစေသည်။

ဤအခိုက်အတန့်တွင် ကျိုဖေးအန်တို့စိတ်များထဲ ကြောက်ရွံ့မှုများ စတင်ဝင်ရောက်လာသည်။ အကယ်၍ ဤအတိုင်းသာ ဆက်သွားပါက သူတို့၏ ကိုယ်ပွားများ ဤနေရာ၌ပင် ပျက်စီးသွားရလိမ့်မည်ဟု စိုးရိမ်လာကြသည်။

သူတို့တစ်ဦးစီသည် ကိုယ်ပွားများ ဖြစ်ကြသော်လည်း သေဆုံးရမည်ကို အလွန် ဝန်လေးနေကြသည်။ ပင်မခန္ဓာကိုယ်၏ အတင်းအကျပ် ထိန်းချုပ်မှုမရှိပါက ဤကိုယ်ပွားများကို သီးခြားလွတ်လပ်သော သက်ရှိများအဖြစ် သတ်မှတ်နိုင်သည်။

သူတို့ ဤနေရာတွင် မသေဆုံးလိုကြပေ။

ထို့နောက် ကျိုဖေးအန်က လျန်အန်းယိနှင့် အခြားနှစ်ဦးကို ပြောလိုက်သည်။

“ခင်ဗျားတို့ရဲ့ အင်အားတွေကို ကျွန်တော့်ဆီ လွှဲပြောင်းပေးကြပါ။ ဒီနည်းဗျူဟာ ပုံစံကို ကျွန်တော် ဖြိုခွင်းလိုက်မယ်။”

ထိုစကားကို ကြားသောအခါ လျန်အန်းယိတို့လည်း တုံ့ဆိုင်းမနေပဲ ကျိုဖေးအန်၏ ဘေးသို့ ရွှေ့လိုက်ကြကာ သူတို့၏ စွမ်းအားများကို ကျိုဖေးအန်၏ ခန္ဓာကိုယ်ထဲသို့ ထည့်သွင်းပေးလိုက်ကြသည်။

ချက်ချင်းပင် ကျိုဖေးအန်၏ ခန္ဓာကိုယ်အတွင်း၌ စိတ်ဝိညာဉ် စွမ်းအားများ မြင့်တက်လာပြီး သူ၏ အငွေ့အသက်သည်လည်း သိသိသာသာ ပို အားကောင်းလာသည်။ သို့သော် သူ၏ အဆင့် ပြန်လည်ပျက်စီးခြင်းအဆင့်သို့ ပြန်လည်ရောက်ရှိတော့မည့်ဆဲဆဲတွင် အတွင်းပိုင်း ကန့်သတ်ချက်များ ရုတ်တရက် ပြင်းထန်လာကာ သူတို့၏ ပါးစပ်များမှ သွေးများ နောက်တစ်ကြိမ် အန်ထွက်လာကြသည်။

ပေါ့ပေါ့ပါးပါး တည်ဆောက်ထားပုံရသည့် ဤနည်းဗျူဟာ ပုံစံ၏ တားမြစ်ချက်များက ဘယ်လိုလုပ် ဤမျှပြင်းထန်နေရသနည်းဟု တွေးကာ ကျိုဖေးအန် ယုံကြည်နိုင်ရန် ခက်ခဲနေသည်။

ထိုအချိန်တွင် နည်းဗျူဟာ ပုံစံ အပြင်ဘက်မှ လုချန်း၏ အသံထွက်ပေါ်လာသည်။

“လူကြီးမင်းတို့... ဖရိုဖရဲကြယ်ပင်လယ်ထဲကို ဝင်ဖို့ဆိုရင် ခင်ဗျားတို့ရဲ့ အင်အားက လုံလောက်ပုံ မရဘူး။”

ထိုသို့ပြောပြီးနောက် လုချန်းက နှင်းပွင့် နည်းဗျူဟာ ပုံစံကို ထိန်းချုပ်လိုက်ရာ အရိုးထဲထိ စိမ့်ဝင်သွားသော အအေးဒဏ်ကို ကျိုဖေးအန်နှင့် အခြားသူများ နောက်တစ်ကြိမ် ခံစားလိုက်ရသည်။ အပ်ပေါင်းများစွာဖြင့် သူတို့၏ အသားကို ထိုးဆွနေသကဲ့သို့ ဖြစ်နေသည်။

ကျိုဖေးအန်က အံကြိတ်ကာ ခန္ဓာကိုယ်ကို မပြိုလဲအောင် ကြိုးစားထိန်းထားရင်း ပြောလိုက်သည်။

“ဆွမ်ဧကရာဇ်... ကျွန်တော်တို့က ချန်ဟိုင်ဂိုဏ်းရဲ့ အကြီးအကဲတွေပါ။ ခင်ဗျားသာ ကျွန်တော်တို့ကို တစ်ခုခုလုပ်မယ်ဆိုရင် ချန်ဟိုင်ဂိုဏ်းက ခင်ဗျားကို အလွတ်ပေးမှာ မဟုတ်ဘူး။”

“ဒီနေ့ကိစ္စကို ဒီမှာတင် အဆုံးသတ်ကြတာပေါ့။ ဖရိုဖရဲကြယ်ပင်လယ်ရဲ့ ကိစ္စတွေကို ကျွန်တော်တို့ ပြန်မပြောပါဘူး။”

ကျိုဖေးအန်၏ ခြိမ်းခြောက်မှုကို ကြားသောအခါ လုချန်း နှာခေါင်းရှုံ့လိုက်သည်။

“ခြိမ်းခြောက်ခံရတာကို ကျုပ် အမုန်းဆုံးပဲ”

“ဒါတွေက ခင်ဗျားတို့ရဲ့ ကိုယ်ပွားတွေပဲ ရှိသေးတယ်ဆိုတာ ကျုပ် သိပါတယ်။ ခင်ဗျားတို့ကို သတ်လိုက်ရင် ခင်ဗျားတို့ရဲ့ ချန်ဟိုင်ဂိုဏ်းက သိသွားလိမ့်မယ်။ ဒါပေမဲ့ ခင်ဗျားတို့ရဲ့ ချန်ဟိုင်ဂိုဏ်း ဘယ်တော့လာမလဲဆိုတာ ကြည့်ဖို့ ကျုပ် ဒီမှာပဲ စောင့်နေလိုက်မယ်။”

စကားပြောနေစဉ် လုချန်း၏ ခန္ဓာကိုယ်မှ ကြောက်မက်ဖွယ်ကောင်းသော လွှမ်းမိုးမှု အငွေ့အသက်များ ချက်ချင်း ထွက်ပေါ်လာသည်။ ထိုဖိအားကို ခံစားလိုက်ရပြီးနောက် ကျိုဖေးအန်တို့လူစု၏ မျက်နှာထားများ သိသိသာသာ ပြောင်းလဲသွားသည်။

သူတော်စင်... သူတော်စင်အဆင့်...

ဒါ ဘယ်လိုလုပ် ဖြစ်နိုင်မှာလဲ။

ဆွမ်ဧကရာဇ်က သူတော်စင်အဆင့်မှာ ရှိနေတာပဲ။

လေဟောင်ရန်ပင်လျှင် အံ့အားသင့်သွားခဲ့သည်။ သူသည် လုချန်း လွှမ်းမိုးထားသော အရှိန်အဝါအောက်တွင် လုံးဝ ဖိနှိပ်ခံထားရကာ နတ်လှေပေါ်မှ မထနိုင်တော့ချေ။

လုချန်း၏ သူတော်စင်အဆင့် အငွေ့အသက်က မတည်ငြိမ်ကြောင်း ကျိုဖေးအန်တို့လူစု ခံစားမိကြသည်။ သို့သော် သူသည် ကျင့်ကြံခြင်းကို ဖိနှိပ်သည့် နည်းဗျူဟာ ပုံစံကို လွယ်ကူစွာ တည်ဆောက်နိုင်ခဲ့ခြင်းနှင့် ဤအငွေ့အသက်သည် သူတော်စင်တစ်ပိုင်းအဆင့်ရှိသော သူတို့၏ ဂိုဏ်းချုပ်ထက်ပင် ပို အားကောင်းနေခြင်းတို့ကြောင့် သူတို့၏ ရင်ထဲအသည်းထဲထိ ကြောက်လန့်သွားကြတော့သည်။

ဆွမ်ဧကရာဇ်သည် သူတော်စင်အစစ်တစ်ပါး မဟုတ်လျှင်ပင် သူတော်စင်တစ်ပိုင်း ဖြစ်နေခြင်းကပင် လုံလောက်နေပြီဖြစ်သည်။ သူတော်စင်တစ်ပိုင်းနှင့် သူတော်စင်အကြား ကွာခြားချက် ကြီးမားသော်လည်း ပြန်လည်ပျက်စီးခြင်းအဆင့် ကျင့်ကြံသူ အနည်းငယ်ကို ဖြေရှင်းရန်မှာ သူ့အတွက် အခက်အခဲ မရှိပေ။

ဖရိုဖရဲကြယ်ပင်လယ်သို့ လာခဲ့မိသည်ကို ကျိုဖေးအန် ချက်ချင်း နောင်တရသွားသည်။ ကျိုဖေးအန်နောက်သို့ လိုက်ပါလာကြသော လျန်အန်းယိနှင့် အပြင်စည်း ဂိုဏ်းအကြီးအကဲ သုံးဦးတို့ကတော့ ပို၍ပင် နောင်တရနေကြသည်။

ကျိုဖေးအန်၏ လှည့်ဖြားသော စကားများကို သူတို့ အဘယ်ကြောင့် နားထောင်ခဲ့မိပါသနည်း။

ယခု သူတို့၏ ကိုယ်ပွားခန္ဓာကိုယ်များကို စတေးရတော့မည် ဖြစ်သည်။

ဤကိုယ်ပွားခန္ဓာကိုယ် ပျက်စီးသွားပါက သူတို့၏ အင်အားပြန်လည်ရရှိရန် နှစ်ပေါင်းမည်မျှ ကြာမည်ကို သူတို့ မသိနိုင်ပေ။

ဤအချိန်တွင် ကျိုဖေးအန်သည် သူ၏ ဂုဏ်သိက္ခာကို ဂရုမစိုက်တော့ပဲ အလျင်အမြန် အသနားခံလိုက်သည်။

“ဝါစဉ်ကြီး ပုဂ္ဂိုလ်ခင်ဗျား... ကျွန်တော်တို့ရဲ့ အသက်ကို ချမ်းသာပေးပါ။ ဖရိုဖရဲကြယ်ပင်လယ်ထဲကို ကျူးကျော်ဝင်ရောက်မိတာက လေဟောင်ရန်ရဲ့ လှည့်စားမှုကြောင့်ပါ။”

ကျိုဖေးအန်၏ စကားကို ကြားသောအခါ လေဟောင်ရန်၏ ခန္ဓာကိုယ်တစ်ခုလုံးတွင် ချွေးစေးများ ရုတ်တရက် ပြန်လာသည်။ သူ၏ ဆရာက သူ့ကို ဤမျှ ရက်စက်စွာ သစ္စာဖောက်လိမ့်မည်ဟု သူ ထင်မထားခဲ့ချေ။

လုချန်းက နှာခေါင်းရှုံ့လိုက်ပြီး စကားပို မပြောတော့ပေ။ ဤလူများကို သူ အလွတ်ပေးသည်ဖြစ်စေ မပေးသည်ဖြစ်စေ သူတို့သည် ချန်ဟိုင်ဂိုဏ်းနှင့်အတူ ဖရိုဖရဲကြယ်ပင်လယ်သို့ နောက်ဆုံးတွင် ရောက်လာကြမည်သာ ဖြစ်သည်။ ထို့ကြောင့် သူတို့ကို ယခုပင် သတ်ဖြတ်ပြီး ခြိမ်းခြောက်လိုက်ခြင်းက ပို ကောင်းပေမည်။

ချန်ဟိုင်ဂိုဏ်းတွင် သူတော်စင်အဆင့် ကျင့်ကြံသူ မရှိတာလည်း ဖြစ်နိုင်သေးသည်။ ထိုသို့ဆိုလျှင် သူ့ကို သူတော်စင်အဆင့် ကျင့်ကြံသူဟု ယုံကြည်သွားပါက ဖရိုဖရဲကြယ်ပင်လယ်ကို ချန်ဟိုင်ဂိုဏ်းလာရောက်နှောင့်ယှက်ရဲတော့မည် မဟုတ်ပေ။

ထိုသို့ တွေးပြီးနောက် လုချန်းက နတ်သတ်ဓားကို ထုတ်ကာ ဝှေ့ယမ်းလိုက်သည်။ ကျိုဖေးအန်တို့လူစု ဆက်လက် အသနားခံလိုကြသော်လည်း တောင်တစ်လုံးကဲ့သို့ ကြီးမားသော ဓားစွမ်းအား လှိုင်းလုံးကြီးက သူတို့ဆီသို့ ဝင်ရောက်လာသည်။ သူတို့ ရှောင်တိမ်းလိုကြသော်လည်း ခန္ဓာကိုယ်များမှာ ခဲနေပြီး မလှုပ်ရှားနိုင်ကြချေ။

ဓားစွမ်းအားနှင့် ထိတွေ့လိုက်သည့် ခဏ၌ပင် ကျိုဖေးအန်တို့၏ ခန္ဓာကိုယ်များနှင့် နတ်လှေတို့သည် ဖုန်မှုန့်အဖြစ် ပြောင်းလဲသွားကြတော့သည်။

လေဟောင်ရန်လည်း လုချန်း၏ ဓားချက်ဖြင့် ပေါ့ပေါ့ပါးပါးပင် သုတ်သင်ခံလိုက်ရသည်။

လုချန်း၏ ဓားစွမ်းအားကို မြင်လိုက်ရသောအခါ နန်းကုန်းယွဲ့ဟွာနှင့် နန်းကုန်းချင်ရတို့ နှစ်ဦးစလုံး၏ မျက်လုံးများထဲတွင် ဖော်ပြရခက်သော အရိပ်အယောင်များ ဖြတ်သန်းသွားသည်။

ဤလူက တကယ်ကို အစွမ်းထက်လှသည်။ ဤလူ၏ အမျိုးသမီးများ ဖြစ်ခွင့်ရသည်က သူတို့အတွက် ကံကောင်းခြင်း တစ်ရပ်ပင် ဖြစ်သည်။

တစ်ချိန်တည်းမှာပင် လုချန်း၏ နောက်ခံ ရိုးရှင်းမည် မဟုတ်ကြောင်း အမျိုးသမီးနှစ်ဦး ထပ်မံ သဘောပေါက်သွားကြသည်။ လုချန်း၏ ဘေးနားတွင် ဆက်ရှိနေချင်ပါက သူတို့ ပို သန်မာလာရန် လိုအပ်ပေသည်။

ကျိုဖေးအန်နှင့် အခြားသူများကို လုချန်းက ဓားချက်တစ်ချက်တည်းဖြင့် သုတ်သင်လိုက်ချိန်၌ပင် ချန်ဟိုင်ဂိုဏ်း အပြင်စည်းရှိ လှိုဏ် ဂူလေးခုအတွင်းမှ သူတို့၏ ပင်မခန္ဓာကိုယ်များ နိုးလာကြတော့သည်။ သူတို့၏ အငွေ့အသက်များလည်း သိသိသာသာ လျော့နည်းသွားကာ အင်အားများစွာ ကျဆင်းသွားကြသည်။

ကျိုဖေးအန်က ရင်ဘတ်ကို ဖိထားပြီး သွေးတစ်ပွက် အန်ထုတ်လိုက်သည်။ သူက လက်သီးကို တင်းတင်းဆုပ်ကာ အေးစက်စွာ ပြောလိုက်သည်။

“တောက်... အဲဒီ သစ္စာဖောက်ကောင်ကြောင့် ဒါတွေဖြစ်ရတာ။”

ယခုတော့ ကျိုဖေးအန်သည် အရာအားလုံးကို လေဟောင်ရန်အပေါ် အပြစ်ပုံချလိုက်သည်။ လေဟောင်ရန်သာ ဖရိုဖရဲကြယ်ပင်လယ်အကြောင်း သူ့ကို မပြောခဲ့လျှင် သူ ဤမျှ ပြင်းထန်စွာ ဒဏ်ရာရခဲ့မည် မဟုတ်ပေ။ အရေးကြီးဆုံးမှာ ဖရိုဖရဲကြယ်ပင်လယ်၌ သူတော်စင်တစ်ပါး ရှိနေကြောင်း လေဟောင်ရန် မပြောခဲ့ခြင်း ဖြစ်သည်။

ထိုဓားချက်၏ စွမ်းအားကို တွေးမိရုံဖြင့် ကျိုဖေးအန်၏ မျက်နှာသည် လူသေကောင်ကဲ့သို့ ဖြူဖပ်ဖြူရော် ဖြစ်သွားသည်။

ခဏကြာပြီးနောက် ကျိုဖေးအန်က သွေးတစ်ပွက် ထပ်အန်လိုက်ပြီး အေးစက်စွာ ပြောလိုက်သည်။

“ဒီကိစ္စက ဒီမှာတင် မပြီးသေးဘူး။ သူက သူတော်စင် ဖြစ်နေရင်ရော ဘာဖြစ်လဲ။ အမြင့်ဆုံး အကြီးအကဲသာ သူတော်စင်အဆင့် ပထမအလွှာကို ရောက်နိုင်ခဲ့ရင် အဲ့ဒီလူ ယှဉ်နိုင်မယ့် ပြိုင်ဘက် မဟုတ်တော့ဘူး။”

ထိုအတွေးနှင့်အတူ ကျိုဖေးအန်က ထရပ်လိုက်ပြီး အတွင်းစည်းဂိုဏ်းသို့ ဦးတည်သွားလိုက်သည်။

အတွင်းစည်းဂိုဏ်းရှိ ဂိုဏ်းချုပ်၏ ခန်းမဆောင်တွင် ကျိုဖေးအန် ရောက်လာသောအခါ လျန်အန်းယိတို့လည်း ရောက်ရှိနေသည်ကို တွေ့လိုက်ရသည်။ ကျိုဖေးအန်ကို မြင်လိုက်ရသည့် ခဏတွင် သူတို့၏ မျက်နှာပေါ်၌ မကျေနပ်သည့် အရိပ်အယောင်များ ပေါ်လာကြသည်။

ကျိုဖေးအန်သာ သူတို့ကို ဖရိုဖရဲကြယ်ပင်လယ်သို့ သွေးဆောင်ခေါ်ယူခြင်း မပြုခဲ့လျှင် သူတို့၏ ကိုယ်ပွားခန္ဓာကိုယ်များ ဆုံးရှုံးရမည် မဟုတ်သလို အင်အား မည်သည့်အချိန်တွင် ပြန်လည်ရရှိမည်မှန်း မရေမရာ ဖြစ်နေရမည့် အခြေအနေမျိုးနှင့် လည်း ကြုံတွေ့နေရမည် မဟုတ်ပေ။

ဤအချိန်တွင် ချန်ဟိုင်ဂိုဏ်း၏ ဂိုဏ်းချုပ်ဖြစ်သူ လျှိုထင်ကျန်းသည် ခန်းမရှိ ပလ္လင်ပေါ်တွင် ထိုင်နေပြီး ကျိုဖေးအန်တို့ကို အေးစက်သော မျက်နှာထားဖြင့် ကြည့်နေသည်။

ဖြစ်ပျက်ခဲ့သည့် ကိစ္စရပ်များကို လျှိုထင်ကျန်း ကြားသိပြီးဖြစ်သည်။ မဟာဧကရာဇ်ဂူသင်္ချိုင်းအကြောင်းကို ဂိုဏ်းသို့ ချက်ချင်း အစီရင်ခံခြင်း မပြုခဲ့သည့် ကျိုဖေးအန်ကို အနည်းငယ် ဒေါသထွက်မိသော်လည်း ယခု သူ၏ အာရုံမှာ ထိုကိစ္စအပေါ်တွင် မဟုတ်ပဲ ဖရိုဖရဲကြယ်ပင်လယ်၌ မဟာဧကရာဇ်ဂူသင်္ချိုင်း တကယ် ရှိမရှိ ဆိုသည့်အချက်အပေါ်တွင်သာ ရှိနေသည်။

ကြယ်တာယာမြေပုံများမှ အဖျက်ခံထားရသည့် ကြယ်နယ်မြေ။

ထို့ပြင် သေမင်း ကြယ်နယ်မြေ တစ်ခုကို သူတော်စင်အဆင့် ကျင့်ကြံသူတစ်ဦးက စောင့်ကြပ်နေသည်။ ထိုနေရာတွင် ရတနာများ မရှိဟု လျှိုထင်ကျန်း မယုံကြည်ပေ။

ဧကရာဇ်ဂူသင်္ချိုင်း မရှိလျှင်ပင် ရတနာများ ရှိနေမည်မှာ အသေအချာပင်။

သို့သော် သူတော်စင်အဆင့်ရှိသော ပြိုင်ဘက်တစ်ဦး ဖြစ်နေသဖြင့် သူတို့ကို ကိုင်တွယ်ဖြေရှင်းရန် ခက်ခဲပေလိမ့်မည်။