စိတ်ဝိညာဉ်အဆင့်၊ ထူးဆန်းသောမီးလျှံ

“ဘုန်း...”

ဟွာကျင်းယန်၏ အသံဆုံးသည်နှင့် အလွန်ကြောက်မက်ဖွယ်ကောင်းသော အရှိန်အဟုန် တစ်ခုသည် ကောင်းကင်ထက်သို့ ထိုးတက် လာသည်။ အရပ်ရှစ်မျက်နှာကို ဖုံးအုပ် လိုက်ရာ ကျင်းယူတောင်ထိပ် တစ်ခုလုံးတွင် ပူပြင်းသော လေလှိုင်းများ တိုက်ခတ်သွားတော့သည်။

သူ၏ နောက်ကျောတွင် အိမ်တစ်လုံး အရွယ်အစားရှိပြီး ခန္ဓာကိုယ်တစ်ခုလုံး မီးတောက်များ တဝုန်းဝုန်း တောက်လောင်နေသော ရွှေဖား တစ်ကောင် ပေါ်ထွက်လာသည်။

မီးလျှံရွှေဖား၏ ခန္ဓာကိုယ်အတွင်းတွင် ကြယ်ဆယ်ပွင့်သည် တလက်လက် တောက်ပနေသည်။ အင်အားကြီးမားသော စွမ်းအင်နယ်ပယ်ကြောင့် ပတ်ဝန်းကျင်မှ လေထုသည်ပင် တဝုန်းဝုန်း တုန်ခါလျက်ရှိသည်။

“ဒါက ဟွာကျင်းယန်ရဲ့ ကြယ်ဆယ်ပွင့် စိတ်ဝိညာဉ်အဆင့် သိုင်းဝိညာဉ်ပဲ”

“အရမ်းကို သန်မာတဲ့ အရှိန်အဟုန်ပဲ... အနည်းဆုံး နှစ်ဆ၊ သုံးဆလောက်ကို စွမ်းအား တိုးတက်စေတာ... ယန်ချင်းရှုံးရဲ့ ကြယ်ကိုးပွင့်ဓားသိုင်းဝိညာဉ်ထက် အများကြီး သာလွန်တယ်”

“အဲ့ဒါက သဘာဝပဲ... ကြယ်ဆယ်ပွင့်သိုင်းဝိညာဉ်ဆိုတာ စိတ်ဝိညာဉ်အဆင့်သိုင်းဝိညာဉ် ဖြစ်ပြီး ကောင်းကင်က ပေးထားတဲ့ စိတ်စွမ်းအင်ပဲ... ဘုရင်အဖြစ် ရပ်တည်ပြီး ဘုန်းတန်ခိုးကြီးသူအဖြစ် အောင်မြင်နိုင်တဲ့ အလားအလာ ရှိတယ်။ သိုင်းဝိညာဉ် သက်သက်ကိုပဲ ပြောမယ်ဆိုရင် သာမန်သိုင်းဝိညာဉ်တွေနဲ့ လုံးဝ နှိုင်းယှဉ်လို့မရဘူး... ယန်ချင်းရှုံးရဲ့ ဓားသိုင်းဝိညာဉ်က ကြယ်ဆယ်ပွင့် စိတ်ဝိညာဉ်အဆင့်သိုင်းဝိညာဉ်အဖြစ် မပြောင်းလဲနိုင်ရင် မယှဉ်နိုင်ဘူး”

လူများသည် ဟွာကျင်းယန်၏ နောက်ကျောရှိ မီးလျှံရွှေဖားကို ကြည့်ရင်း မျက်လုံးများ တောက်ပ နေကြသည်။ အံ့သြမှု၊ တုန်လှုပ်မှုများအပြင် မနာလိုခြင်းနှင့် အားကျခြင်း များစွာ ပါဝင်နေသည်။

ကြယ်ဆယ်ပွင့် စိတ်ဝိညာဉ်အဆင့် နိုးကြားသူများသည် အလွန်ရှားပါး လှရာ တစ်သန်းတွင်မှ တစ်ဦးသာ ရှိတတ်သည်။

ဤလူများသည် တကယ့် ပါရမီရှင်များ ဖြစ်ကြပြီး အောင်မြင်စွာ ဆက်သွားနိုင်ပါက နောင်တွင် ကြီးမားသော အောင်မြင်မှုများ ရရှိကြမည်မှာ ဧကန်မလွဲပေ။

“စီနီယာယွမ်မန်လီရဲ့ ချင်းလွမ်သိုင်းဝိညာဉ်ကလည်း ကြယ်ဆယ်ပွင့် စိတ်ဝိညာဉ်အဆင့်သိုင်းဝိညာဉ် ပဲ...”

လော့ချန်သည် ဟွာကျင်းယန်၏ နောက်ကျောရှိ မီးလျှံရွှေဖားကို ကြည့်ရင်း မျက်လုံးများ ကျုံ့သွားသည်။ သေသေချာချာ အကဲခတ် ကြည့်ပြီးနောက် ကြယ်ဆယ်ပွင့် စိတ်ဝိညာဉ်အဆင့်သိုင်းဝိညာဉ် အတူတူ ဖြစ်သော်လည်း ဤ မီးလျှံရွှေဖားသည် ယွမ်မန်လီ၏ ချင်းလွမ်သိုင်းဝိညာဉ်ကို လုံးဝ မယှဉ်နိုင်ကြောင်း တွေ့ရှိရသည်။

“ကြယ်ဆယ်ပွင့် စိတ်ဝိညာဉ်အဆင့်သိုင်းဝိညာဉ် မှာလည်း အဆင့်အတန်းခွဲခြားမှု ရှိနေတာပဲ...”

“ချင်းရှုံး... ဆက်ပြီးတော့ တိုက်ခိုက်ဦးမှာလား”

သိုင်းဝိညာဉ်ကို ထုတ်ဖော်လိုက်သည်နှင့် ဟွာကျင်းယန်၏ ခန္ဓာကိုယ်အတွင်းမှ ချီစွမ်းအင်များ အင်အားကြီးမားစွာ ထွက်ပေါ် လာသည်။ ပြင်းထန်သော အရှိန်အဟုန်သည် ပင်လယ်လှိုင်းလုံးများပမာ ယန်ချင်းရှုံးထံသို့ ထိုးနှက် လာပြီး အဆင့်ဆင့် မြင့်တက် လျက်ရှိသည်။

“မင်းရဲ့ ကြယ်ဆယ်ပွင့် စိတ်ဝိညာဉ်အဆင့်သိုင်းဝိညာဉ်ကို စမ်းသပ်ချင်နေတာ ကြာပြီ...”

ယန်ချင်းရှုံးသည် ဓားရှည်ကို ကိုင်ဆောင်ထားပြီး ခန္ဓာကိုယ်မှ ဓားအရှိန်အဟုန်သည် စုစည်းနေကာ ပြန့်လွင့်ခြင်း မရှိချေ။

“ကောင်းပြီ... ဒါဆိုရင် လက်ခံလိုက်တော့...”

ဟွာကျင်းယန်သည် စကားများစွာ မပြောတော့ပေ။ လက်ငါးချောင်းတွင် တောက်ပသော မီးလျှံအလင်းများ ထွက်ပေါ်လာသည်။ လက်ဖဝါးတစ်ချက်ဖြင့် ရှေ့သို့ တည့်တည့် ရိုက်ချ လိုက်၏။

အလေးအနက်ထားလာသည့် ဟွာကျင်းယန်သည် လုံးဝ ကြောက်မက်ဖွယ်ကောင်းလာ၏။

သူ၏ လက်ျာလက်ဖဝါးကို လေထဲတွင် ရိုက်ချ လိုက်သည်နှင့် အိမ်အရွယ်အစားခန့်ရှိသော မီးလျှံလက်ဖဝါးစွမ်းအင်တစ်ခုသည် ယန်ချင်းရှုံးကို ချက်ချင်း ဖုံးလွှမ်း လာကာ မည်းညစ်သော တိမ်တိုက်ကြီးတစ်ခု ဖိနှိပ် လာသကဲ့သို့ ဖြစ်နေသည်။

“ကြာပန်းတစ်ပွင့်...”

ယန်ချင်းရှုံးသည် ဓားတစ်ချက်ဖြင့် ထောင့်ချိုး ပိုင်းဖြတ်လိုက်ရာ ကြာပန်းပွင့်ချပ်သဏ္ဌာန် အပြာရောင်ဓားစွမ်းအင်သည် ပြင်းထန်စွာ ခုတ်ချ ထွက်ပေါ်လာ၏။

“ဘုန်း...”

ယခင်က အရာရာကို ဖြတ်တောက်နိုင်ခဲ့သော ကြာပန်းဓားစွမ်းအင်သည် ဤတစ်ကြိမ်တွင် ပိတ်ဆို့ခံရသည်။

ဟွာကျင်းယန်၏ လက်ဖဝါးစွမ်းအင်သည် အလွန်မာကျော နေပြီး ကြာပန်းဓားစွမ်းအင်၏ ဆယ်ကြိမ်၊ ရာကြိမ် ခုတ်ထစ်မှုဒဏ်ကို ခံနေရသော်လည်း ဆက်လက်ခိုင်မာ နေသည်။

နောက်ဆုံးတွင် ကြာပန်းဓားစွမ်းအင် ပျက်စီးသွားသည်။ နောက်သို့ လှိမ့်ပြန်သွားသော တိုက်ခိုက်မှုလှိုင်းကြောင့် ယန်ချင်းရှုံး ဆက်တိုက် နောက်ဆုတ် သွားခဲ့ရသည်။

“မီးလျှံလေဟာနယ် ခွဲဖြတ်ခြင်း...”

ဟွာကျင်းယန်သည် အခွင့်အရေးကို မြင်သည်နှင့် ချက်ချင်း သတ်ဖြတ်နည်းတစ်ချက် ထုတ်သုံး လိုက်သည်။

သံချောင်းပူကဲ့သို့ ဖြစ်နေသော လက်ျာလက်ဖဝါးကို လေထဲတွင် ဖိနှိပ် လိုက်ရာ စင်မြင့်တစ်ဝက်၏ လေဟာနယ်သည် ချက်ချင်း တည်ငြိမ် သွားသည်။ ပြင်းထန်သော မီးလျှံချီစွမ်းအင်သည် ယန်ချင်းရှုံးရှိရာ နေရာဆီသို့ စုစည်းသွားပြီး ပေါက်ကွဲ ထွက်ပေါ်လာသည်။

“ဘုန်း...”

ကြီးမားသောအသံတစ်ခု ပေါက်ကွဲ ထွက်လာသည်။ မယှဉ်နိုင်သော တိုက်ခိုက်မှုလှိုင်းသည် နေရာတစ်ခုလုံးကို ဖြတ်ကျော်သွားရာ ချီစွမ်းအင်မုန်တိုင်း များကို ဖြစ်ပေါ်စေသည်။ စင်မြင့်တွင် ပင့်ကူအိမ်သဏ္ဌာန် ကြောက်မက်ဖွယ်ရာ အက်ကွဲရာများ ဖြစ်ပေါ်လာတော့သည်။

ယန်ချင်းရှုံးသည် ပေါက်ကွဲမှု ဗဟိုမှ အစွမ်းကုန် ရှောင်ကွင်း ခဲ့သော်လည်း ထိခိုက်မှုဒဏ်ကို ခံလိုက်ရဆဲ ဖြစ်သည်။ မျက်နှာတွင် ဖြူဖျော့သောအသွင် ပေါ်လာပြီး အနည်းငယ် ဒဏ်ရာရသွားခဲ့သည်။

သူမသည် ထိုတိုက်ခိုက်မှုလှိုင်းကို အခွင့်ကောင်းယူပြီး ဟွာကျင်းယန်၏ အထက်သို့ အမှတ်မထင် ပျံတက် သွားသည်။

“ကြာပန်းပွင့်ချပ် ကောင်းကင်ဖုံးလွှမ်းခြင်း...”

ဓားတစ်ချက် ဝှေ့ယမ်းလိုက်ရာ လေထုသည် ရေလှိုင်းပမာ တုန်ခါ လာသည်။ ကြီးမားသော အပြာရောင်ဓားစွမ်းအင်များသည် ဟွာကျင်းယန်ဆီသို့ အလျင်အမြန် ထိုးထွင်း ကျသွားသည်။

“ရှစ်... ရှစ်... ရှစ်... ရှစ်...”

ဤ အပြာရောင်ဓားစွမ်းအင်များသည် လေထဲတွင် ကွဲထွက်သွားရာ ပွင့်လန်းသော ကြာပန်းများ ကဲ့သို့ ဖြစ်နေသည်။

ခဏတာအတွင်း ကောင်းကင်တစ်ခုလုံး အပြာရောင်ဓားစွမ်းအင်များ ပြန့်ကျဲလာပြီး လေထုတွင် မရေမတွက်နိုင်သော အက်ကွဲရာများ ဖြစ်ပေါ်လာကာ ကောင်းကင်ပင် ကွဲအက် သွားသလို ဖြစ်နေသည်။

“ခရမ်းရောင်မီးလျှံ ကျောက်သလင်းချီစွမ်းအင်”

ဟွာကျင်းယန်၏ မျက်နှာသည် တည်ငြိမ်အေးဆေး နေသည်။ လက်ဖဝါးတစ်ချက်ဖြင့် လေကို ဆန့်ကျင်ကာ တက်လာ၏။ ကြီးမားသော မီးလျှံကာကွယ်ရေးအလွှာတစ်ခု သူ၏ အပေါ်ဘက်တွင် စုစည်း သွားသည်။

“ဘုန်း... ဘုန်း... ဘုန်း... ဘုန်း...”

စွမ်းအားနှစ်ခု ထိတွေ့လိုက်သည်နှင့် ချက်ချင်းပင် ကြီးမားသော တုန်ခါမှုလှိုင်းများ ပေါက်ကွဲထွက်ပေါ်လာသည်။

“ကလပ်...”

စင်မြင့်သည် တိုက်ခိုက်မှုဒဏ်ကို မခံနိုင်တော့ဘဲ တစ်ပေခန့် ကျယ်ဝန်းသော ကြောက်မက်ဖွယ်ရာ အက်ကွဲကြောင်းများ ဆက်တိုက် ပေါ်ထွက်လာပြီး အပိုင်းပိုင်း ကွဲကြေ သွားတော့သည်။

“သိပ်ကို ကြောက်စရာကောင်းတဲ့ လက်ဖဝါးစွမ်းအင်ပဲ... အရမ်းကို ကြောက်စရာကောင်းတဲ့ ဓားအကွက်ပဲ... သူတို့က ထုံရွှမ်နယ်ပယ် သိုင်းပညာရှင်တွေ ဟုတ်သေးရဲ့လား... သွေးကြောနိုးကြားမှု နယ်ပယ် အဆင့်တစ် အင်အားရှိသူတွေတောင် ဒီလောက် မသန်မာဘူး ထင်ပါတယ်”

“ဒါတင်မကဘူး... သာမန် သွေးကြောနိုးကြားမှု နယ်ပယ် အဆင့်တစ် အင်အားရှိသူတွေတောင် သူတို့ကို ရင်ဆိုင်နိုင်ဖို့ ခက်ခဲ လိမ့်မယ်။ ဒီတိုက်ပွဲက သွေးကြောနိုးကြားမှု နယ်ပယ် အဆင့်နှစ် သိုင်းပညာရှင်တွေရဲ့ အဆင့်နီးပါး ရောက်နေပြီ”

“ဟာ... အရမ်းကြောက်စရာကောင်းတာပဲ... သူတို့က ထုံရွှမ်နယ်ပယ် သိုင်းပညာရှင်အဆင့် မှာပဲ ရှိသေးတာ... သွေးကြောနိုးကြားမှု နယ်ပယ်ကိုသာ ထိုးဖောက်ပြီးသွားခဲ့ရင် ဘယ်လောက်တောင် ကြောက်မက်ဖွယ်ကောင်းလိုက်မလဲ”

“ဒီနှစ်ယောက်က ဂိုဏ်းသုံးဂိုဏ်း အပြင်စည်း လူငယ်မျိုးဆက်ရဲ့ ဘုရင်နှစ်ပါးပဲ။ အခြားသူတွေက လုံးဝ ယှဉ်လို့မရဘူး... အနည်းဆုံး အဆင့်နှစ်ဆင့် ကွာနေတယ်”

“မှန်တယ်...”

လူများသည် စင်မြင့်ပေါ်မှ အံ့မခန်းမြင်ကွင်း ကို ကြည့်ရင်း အလွန် တုန်လှုပ် ကုန်ကြသည်။

ဤတိုက်ပွဲသည် လူအများစု၏ စိတ်ကူးထက်ကို ကျော်လွန် နေခဲ့သည်။

ဟွာကျင်းယန်သည် ကောင်းကင်ကို ဖုံးလွှမ်းသော ဓားစွမ်းအင်ကို ကာကွယ်တားဆီး လိုက်သည်။ ခေါင်းမော့ကာ ယန်ချင်းရှုံးကို ကြည့်လိုက်ရာ မျက်လုံးများတွင် ကြီးမားသော ယုံကြည်မှု ထင်ဟပ်နေပြီး ပြုံးလျက် ဆိုသည်။

“ချင်းရှုံး... မင်းရဲ့ ကြာပန်းဓားကျင့်စဉ်က တကယ်ပဲ တော်တော်သန်မာတယ်။ စိတ်မကောင်းစရာက ငါ့ကို မထိခိုက်စေနိုင်သေးဘူး။ အရှုံးပေးလိုက်ပါတော့... ကိုယ့်ကိုယ်ကိုယ် ဒဏ်ရာမရအောင် ရှောင်လိုက်ပါ...”

“မင်း ငါ့ရဲ့ ဓားချက်တစ်ချက်ကို ကာကွယ်နိုင်ရင်တော့ ငါ ရှုံးတယ်လို့ မှတ်ယူလိုက်မယ်”

ယန်ချင်းရှုံးသည် ကြည်လင်အေးစက်သော အကြည့်ဖြင့် စူးရှစွာ တစ်ချက်ကြည့်လိုက်သည်။

“ရွှီ...”

အပြာရောင်ရတနာဓား တုန်ခါလာပြီး မရေမတွက်နိုင်သော ဓားစွမ်းအင်များ ထွက်ပေါ်လာသည်။ ယန်ချင်းရှုံး၏ ပုံရိပ်သည် ရုတ်တရက် လေထဲတွင် စက်ဝိုင်းသဏ္ဌာန် လည်ပတ် လာသည်။ ပတ်ဝန်းကျင်ရှိ ဓားစွမ်းအင်အားလုံးသည် သူမဆီသို့ စုစည်း လာလေ၏။

“ရှစ်... ရှစ်... ရှစ်... ရှစ်...”

မရေမတွက်နိုင်သော ထက်မြက်သည့် ဓားစွမ်းအင်များသည် နောက်ဆုံးတွင် ဧရာမကြာပန်းပွင့်ကြီး တစ်ပွင့်အဖြစ် ပေါင်းစည်းသွားသည်။ လေထဲတွင် ပျံဝဲ နေစဉ် လေထုကို အပိုင်းပိုင်း ဆုတ်ဖြဲ လိုက်ရာ လေဟာနယ်အက်ကွဲရာများကို ဖြစ်ပေါ်စေခဲ့သည်။

“ကြာပန်းပွင့်ချပ် စုစည်းခြင်း”

ယန်ချင်းရှုံးသည် ဟွာကျင်းယန်ကို ပစ်မှတ်ထား လိုက်သည်။ သူမတစ်ကိုယ်လုံး ဓားပမာ ဖြစ်သွားပြီး စိတ်ဆန္ဒက ဓားပမာ ဖြစ်သွားရာ လူတစ်ကိုယ်လုံး ဧရာမကြာပန်းပွင့်ကြီးနှင့် တစ်သားတည်း ပေါင်းစည်းသွားပြီး ဓားတစ်ချက်ဖြင့် ထိုးထွင်း လိုက်သည်။

“ကလပ်...”

ကာကွယ်ရေးစွမ်းအား အလွန်သန်မာသော မီးလျှံကျောက်သလင်းချီစွမ်းအင်သည် တစ်ချက်တည်းဖြင့် ဆုတ်ဖြဲခံလိုက်ရသည်။ အပိုင်းပိုင်း ကွဲကြေ သွားသော စင်မြင့်သည် ဤထက်မြက်မှုကို မခံနိုင်တော့ဘဲ အလယ်တည့်တည့်မှ ထပ်မံ ကွဲအက် သွားတော့သည်။

ပတ်ဝန်းကျင်မှ ကြည့်ရှုနေသူများသည် နှုတ်ခမ်းများ ခြောက်သွေ့ နေကြပြီး အသက်ပင် မရှူရဲ ကြချေ။

ဤ ဓားစွမ်းအင်ကြာပန်းပွင့်ကြီးသည် အရှိန်အဟုန်ကို တစ်နေရာတည်း စုစည်း ထားရာ အင်အားကြီးမား လှသည်။

အကယ်၍ ဟွာကျင်းယန်၏ ခန္ဓာကိုယ်ပေါ် ကျရောက် ခဲ့ပါက ဟွာကျင်းယန် မဆိုထားနှင့် သွေးကြောနိုးကြားမှု နယ်ပယ် အဆင့်တစ် သိုင်းပညာရှင်ပင် ခံနိုင်မည်မဟုတ်ချေ။

“ဘုန်း... ဘုန်း... ဘုန်း...”

ဓားစွမ်းအင်ကြာပန်းပွင့်ကြီးသည် ဖုံးလွှမ်းသည့် ဧရိယာကျယ်ပြန့်လွန်းသဖြင့် ဟွာကျင်းယန်သည် အခြေအနေမကောင်းသည်ကို သတိထားမိ သော်လည်း ရှောင်ရှားရန် ခက်ခဲနေပြီ ဖြစ်သည်။

ဟွာကျင်းယန်သည် ကြီးမားသော ဒုက္ခနှင့် ကြုံတွေ့ရတော့မည်ဟု လူအများ ယူဆနေချိန်တွင် သူ၏ မျက်ခုံးများသည် ရုတ်တရက် တင်းမာ သွားသည်။

ထိုစဉ် ရုတ်တရက် သူ၏လက်ဖဝါးပေါ်တွင် လက်ညှိုးအရွယ်အစားရှိသော မည်းနက်သည့် မီးလျှံတစ်စ ထွက်ပေါ်လာသည်။

မည်းနက်သော မီးလျှံသည် အမျှင်ငယ်များအဖြစ် ပြောင်းလဲသွားပြီး ဟွာကျင်းယန်၏ လက်ဖဝါးပေါ်တွင် တွယ်ကပ်သွားရာ သူ၏ အရှိန်အဟုန်သည် ချက်ချင်း မြင့်တက် လာလေသည်။ ထို့နောက် သူသည် လက်ဖဝါးတစ်ချက်ကို တိုက်ရိုက်ထုတ်ကာ လေထဲတွင် ဖိနှိပ် လိုက်သည်။

“ဘုန်း...”

ကြောက်မက်ဖွယ်ကောင်းပြီး အာဏာရှင်ဆန်သော ပူပြင်းသည့် အငွေ့အသက်သည် ကျင်းယူတောင်ထိပ်တစ်ခုလုံးကို လွှမ်းခြုံ သွားသည်။ မီးလျှံလက်ဝါးစွမ်းအင်တစ်ခု ကောင်းကင်သို့ ထိုးတက်လာပြီး ဓားစွမ်းအင်ကြာပန်းပွင့်ကြီးကို တိကျစွာ ပိတ်ဆို့ ထားသည်။

ဓားစွမ်းအင်ကြာပန်းပွင့်ကြီးသည် အလွန်မာကျော နေ၏။ တိုက်ခိုက်မှုလှိုင်းသည် တစ်လှိုင်းပြီးတစ်လှိုင်း ထွက်ပေါ်လာရာ လက်ဖဝါးစွမ်းအင်ကို ဆုတ်ဖြဲလုနီးပါး ဖြစ်နေသည့် မယုံနိုင်စရာ မြင်ကွင်းတစ်ခု ပေါ်ထွက်လာသည်။

“ကလပ်... ကလပ်...”

လက်ဖဝါးစွမ်းအင်နှင့် ထိတွေ့သော ဓားစွမ်းအင်များသည် မည်သည့် လက္ခဏာမျှ မပြဘဲ ရုတ်တရက် မီးလောင်ကျွမ်းလာသည်။ ထို့နောက်တွင် ဆက်တိုက် ပျက်စီး လာ၏။

ဆက်လက်၍...

“ဘုန်း...”

ယခင်က အရှိန်အဟုန် ပြင်းထန်ခဲ့သော ဓားစွမ်းအင်ကြာပန်းပွင့်ကြီးသည် ချက်ချင်း ပေါက်ကွဲ ပြိုကျသွားပြီး ချီစွမ်းအင်များ အရပ်လေးမျက်နှာသို့ ပျံ့နှံ့ သွားသည်။

“ဖူး...”

ယန်ချင်းရှုံးသည် ထိုအရှိန်ကြောင့် သွေးတစ်လုတ် အန်လိုက်ရပြီးနောက် ခန္ဓာကိုယ်သည် မြေပြင်ပေါ်သို့ တရွတ်ဆွဲကာ ဆင်းသက် လာ၏။

“ဟင်... ချီစွမ်းအင်ကိုတောင် မီးရှို့ပစ်နိုင်တယ်... ဒါ ဘာလဲ...”

လော့ရှာဂိုဏ်း၏ အကြီးအကဲ ပိကျိုးရွှေသည် မျက်ခုံးနက်နက် တွန့်ချိုးသွားသည်။

“ဘာဖြစ်တာလဲ...”

လော့ချန်သည်လည်း မျက်လုံးများ တုန်လှုပ် သွားပြီး အလွန် အံ့အားသင့် သွားသည်။

လူအများစုသည် ထို မည်းနက်သော မီးလျှံကို သတိမထားမိ ခဲ့ကြသော်လည်း သူကမူ သတိပြုမိ ခဲ့သည်။

ထို မည်းနက်သောမီးလျှံသည် အလွန် အာဏာရှင်ဆန်ပြီး ယန်ချင်းရှုံး၏ ဓားစွမ်းအင်ကို မီးရှို့ဖျက်ဆီးပစ်နိုင် ခဲ့သည်။

မဟုတ်ပါက ဤတိုက်ပွဲ၏ အနိုင်အရှုံးသည် ဆက်လက် စဉ်းစားစရာ ဖြစ်နေဦးမည်။

ဤသည်က လော့ချန်ကို အတွင်းစိတ်မှ သတိထား စေခဲ့သည်။

ထို မည်းနက်သောမီးလျှံသည် ယန်ချင်းရှုံးကိုပင် ဆိုးရွားစွာ အနိုင်ယူစေခဲ့သည်ဖြစ်ရာ သူ့ကိုလည်း အန္တရာယ်ဖြစ်စေနိုင်ပေလိမ့်မည်။

သို့သော် ဤဖြစ်နိုင်ခြေသည် အလွန်အင်မတန် နည်းပါးလှ၏။

အခန်း (၃၇၃) ပြီးပါပြီ။