လော့ချန်၊ ယန်ချင်းရှုံး

“ဒုန်း... ဒုန်း... ဒုန်း...”

စင်မြင့်ပေါ်တွင် ယန်ချင်းရှုံးသည် ဆယ်လှမ်းကျော်မျှ နောက်ဆုတ်လိုက်ပြီးမှ ခန္ဓာကိုယ်ကို တည်ငြိမ်အောင် ထိန်းထားနိုင်ခဲ့သည်။

“ချင်းရှုံး... မင်းမှာ ဒီလိုသတ်ဖြတ်နည်းတစ်ကွက် ကျန်နေသေးလိမ့်မယ်လို့ ငါ မထင်ထားခဲ့ဘူး... ကိုယ့်ခန္ဓာကိုယ်ကို ဓားအဖြစ် ပြောင်းလဲပြီး အခြေအနေဆိုးထဲက ရုတ်တရက် ပေါက်ကွဲထွက်လာတာပဲ...”

ဟွာကျင်းယန်သည် ယန်ချင်းရှုံးကို ကြည့်နေသည်။ မျက်လုံးအလင်းသည် ကျောက်စိမ်းပမာ နူးညံ့ နေ၏။ စကားပြောနေရင်း သူသည် လက်ျာလက်ကို မသိမသာ နောက်သို့ ဖုံးကွယ် လိုက်သည်။

သူ၏ လက်ျာလက်ဝတ်ရုံစွန်းတွင် ပြတ်သားသော ဓားရာတစ်ခု ရှိနေသည်။

ယခုတင်က ဓားချက်သည် ပျက်စီးအားနှင့် အရှိန်အဟုန်သည် စိတ်ကူးထက်ကို ကျော်လွန် ခဲ့သည်။

သူသာ လျင်မြန်စွာ မတုံ့ပြန်နိုင်ခဲ့ဘဲ စွမ်းအားကြီးမားသော လျှို့ဝှက်လက်နက် မရှိခဲ့ပါက ရလဒ်ကို မှန်းဆရခက်ခဲ့လိမ့်မည်။

“ဒါက သတ်ဖြတ်ရေးဓားချက်ပဲ... ဂိုဏ်းသုံးဂိုဏ်း အပြင်စည်း လူငယ်မျိုးဆက်ထဲမှာ ငါကလွဲပြီး ဘယ်သူမှ မင်းရဲ့ ဒီဓားချက်စွမ်းအားကို ကာကွယ်နိုင်မှာ မဟုတ်ဘူး။ ပထမအဆင့် ထူးချွန်ဓားသမား ဆိုတဲ့ ဂုဏ်ပုဒ်က မင်းနဲ့ လုံးဝ ထိုက်တန်ပါတယ်”

ဟွာကျင်းယန်၏ အပြုံးသည် နူးညံ့သိမ်မွေ့ နေ၏။ အနိုင်ရရှိမှုအပေါ် လုံးဝ ဂရုမစိုက် သကဲ့သို့ အရာရာကို သူ၏ ထိန်းချုပ်မှုအောက်တွင် ရှိနေသည့် အမူအရာမျိုး ပြသနေသည်။ နှိုင်းယှဉ်၍မရသော အာဏာရှင်ဆန်မှုကို ပြသနေပြီး ယန်ချင်းရှုံးကိုလည်း နှစ်သက်နေသည့် အမူအရာမျိုး ရှိနေသည်။

သို့သော် ယန်ချင်းရှုံးသည် ဟွာကျင်းယန်၏ စကားကို ဂရုမစိုက်ချေ။ မျက်လုံးထဲတွင် နက်နက်ရှိုင်းရှိုင်း အံ့သြ နေမှုသာ ထင်ရှားနေသည်။

ကြာပန်းပွင့်ချပ် စုစည်းခြင်းသည် သူမ၏ အသန်မာဆုံးသော သတ်ဖြတ်နည်း ဖြစ်သည်။ သူမ ယခင်က စမ်းသပ် ခဲ့ရာ ဤဓားချက်သည် သွေးကြောနိုးကြားမှုနယ်ပယ် အဆင့်နှစ် သန်မာသူ၏ ကာကွယ်မှုကိုပင် ထိုးဖောက်နိုင် လိမ့်မည်ဟု တွက်ဆခဲ့သည်။ သို့သော် ဟွာကျင်းယန်က တစ်ချက်တည်းဖြင့် ချေမှုန်း ပစ်လိုက်သည်။

ယခုတင်က ဟွာကျင်းယန်၏ ရုတ်တရက် မြင့်တက်လာသော အငွေ့အသက်ကို တွေးလိုက်မိသည်။ ယန်ချင်းရှုံး မျက်ခုံးနှစ်ဖက် နက်ရှိုင်းစွာ တွန့်ချိုး သွားသည်။

ထိုအငွေ့အသက်သည် အလွန်အင်အားကြီးမား ပြီး အာဏာရှင်ဆန် လှသည်။ သို့ရာတွင် ထိုအရာက ဟွာကျင်းယန် ကိုယ်တိုင်မှ ထွက်ပေါ်လာခြင်း မဟုတ်ချေ။ သူ အမြင်မမှားပါက ဤအရာသည် ပြင်ပအင်အားတစ်ခုကို အသုံးပြုခဲ့ခြင်း ဖြစ်ရမည်။

“ငါ ရှုံးတယ်... ဒီတစ်ခေါက်ပြိုင်ပွဲရဲ့ ပထမနေရာအတွက် ဂုဏ်ပြုပါတယ်”

ယန်ချင်းရှုံးသည် အသက်တစ်ချက် ဖြည်းညင်းစွာ မှုတ်ထုတ် လိုက်သည်။ ထိုအချက်ပေါ်တွင် ဆက်လက် မငြင်းခုံ တော့ပေ။

ရှုံးသည်က ရှုံးသည်ပင်... အကြောင်းပြချက် မည်မျှပင် ပေးပေး အသုံးမဝင် ချေ။

စကားတစ်ခွန်းသာ ချန်ထားခဲ့ပြီး ယန်ချင်းရှုံးသည် လှည့်ကာ စင်မြင့်ထက်မှ ထွက်ခွာသွားသည်။

ရှေ့ဆုံးသုံးနေရာ...

ပွဲကြည့်ပရိသတ်များသည် မှင်တက်မိနေကြရာမှ ယခုမှပင် တုံ့ပြန် နိုင်ကြသည်။

ယန်ချင်းရှုံး၏ နောက်ဆုံးဓားချက်သည် ဤမျှ အံ့မခန်း သန်မာလှပြီး တားဆီး၍မရ ခဲ့ပေ။ အင်အားကြီးမားသော လူအချို့ပင် အသက်ပင် မရှူရဲ ခဲ့ကြချေ။ အနိုင်အရှုံး ဆုံးဖြတ်ပြီးပြီဟု ယူဆ ခဲ့ကြသည်။

မမျှော်လင့်ခဲ့သည်မှာ နောက်ဆုံးအချိန်တွင် ဟွာကျင်းယန်က အံ့မခန်း အောင်ပွဲခံ နိုင်ခဲ့သည်။ အနိုင်ရရှိခဲ့သည်မှာလည်း အလွန် အာဏာရှင်ဆန် ခဲ့သည်။

“တကယ်ကို ကြောက်စရာကောင်းတယ်... ယန်ချင်းရှုံးရဲ့ ဒီလောက် သန်မာတဲ့ ဓားအကွက်ကို လက်ဖဝါးတစ်ချက်တည်းနဲ့ ချေမှုန်းပစ် လိုက်တာ”

“ကြယ်ဆယ်ပွင့် စိတ်ဝိညာဉ်အဆင့် နိုးကြားခဲ့တဲ့ ပါရမီရှင်ဟာ တကယ်ပဲ ထူးချွန်လွန်းတယ်... ယန်ချင်းရှုံးကိုတောင် ရှင်းရှင်းလင်းလင်း အနိုင်ယူပစ် လိုက်နိုင်တာ... ဒီတစ်ခေါက် ဂိုဏ်းသုံးဂိုဏ်း စုပေါင်းသိုင်းပညာပြိုင်ပွဲရဲ့ ပထမနေရာကို ဟွာကျင်းယန်ကပဲ ရမှာ သေချာပြီ”

“ဟုတ်တယ်... အခုဆိုရင် ရွှမ်ယွမ်ဂိုဏ်းက လော့ချန်တစ်ယောက်ပဲ ဟွာကျင်းယန်နဲ့ ယန်ချင်းရှုံးကို မတိုက်ခိုက်ရသေးတာ... ဒါပေမဲ့ လော့ချန်က သူတို့နဲ့ တစ်ဆင့်တည်း မဟုတ်ဘူး... တတိယနေရာပဲ ရနိုင် လိမ့်မယ်”

ဟွာကျင်းယန်နှင့် ယန်ချင်းရှုံးတို့ တိုက်ပွဲပြီးဆုံးသည်နှင့် လူများ၏ စိတ်ထဲတွင် ဤပြိုင်ပွဲ၏ ရှေ့ဆုံးသုံးနေရာကို အတည်ပြုပြီး ဖြစ်နေသည်။

ပထမနေရာ - ဟွာကျင်းယန်

ဒုတိယနေရာ - ယန်ချင်းရှုံး

တတိယနေရာ - လော့ချန်

ဟွာကျင်းယန်နှင့် ယန်ချင်းရှုံးတို့၏ ကြောက်မက်ဖွယ်ကောင်းသော တိုက်ပွဲကို ကိုယ်တိုင် မြင်တွေ့ ခဲ့ကြပြီးနောက် လော့ချန်က သူတို့နှစ်ဦးကို ယှဉ်ပြိုင်နိုင်မည့် စွမ်းအားရှိသည်ဟု မည်သူမျှ မယူဆ တော့ချေ။

မျှော်လင့်ချက် တစ်စက်မှ မရှိတော့ပေ။

ရွှမ်ယွမ်ဂိုဏ်းသားများပင် ထိုသို့ ယူဆကြသည်။

နဝမအကြီးအကဲနှင့် အကြီးအကဲချန်ရွှမ်တို့သည်ပင် သက်ပြင်းချကာ စိတ်အေးသွားကြသည်။

ဤတိုက်ပွဲသည် လော့ချန်ကို စင်မြင့်ပေါ် တက်ရောက် စိန်ခေါ်ရန် စိတ်ကူးကို ဖျောက်စေလိမ့်မည်ဟု ယူဆကြသည်။

ရွှမ်ယွမ်ဂိုဏ်းသည် တတိယနေရာတွင် ရပ်တည်နေပြီး နောက်ဆုံးသို့ ရောက်ရှိ ခဲ့ရသဖြင့် စိတ်ပျက်ဖွယ် ဖြစ်သော်လည်း ဤအရာထက် လော့ချန် တစ်စုံတစ်ခု ဖြစ်သွားမည်ကို ပိုမို စိုးရိမ်ကြသည်။

ဤပြိုင်ပွဲတွင် လော့ချန်သည် သူတို့ ရွှမ်ယွမ်ဂိုဏ်းအတွက် မျက်နှာပန်းလှမှုကို လုံလောက်စွာ ရယူပေးခဲ့ပြီး ဖြစ်သည်။

“ဆရာမ... ကျွန်မကြောင့် စိတ်ပျက်ရပါပြီ...”

ယန်ချင်းရှုံးသည် လော့ရှာဂိုဏ်းရှိရာသို့ ပြန်ရောက်လာသည်။ လော့ရှာဂိုဏ်း၏ အပြင်စည်း အကြီးအကဲ ပိကျိုးရွှေကို အားနာသောလေသံဖြင့် ဆိုသည်။

သိုင်းဝိညာဉ်ပေါ် ရှုံးနိမ့်ခြင်း...

အကြီးအကဲပိကျိုးရွှေ ပြုံးလျက် ခေါင်းခါ လိုက်သည်။

“ချင်းရှုံး... ဒီတိုက်ပွဲမှာ မင်း အစွမ်းကုန် ကြိုးစားခဲ့ပြီးပြီ။ ကိုယ့်ကိုယ်ကိုယ် အပြစ်မတင်ပါနဲ့။ မင်း ဘာ့ကြောင့် ရှုံးခဲ့ရတယ်ဆိုတာ သံသယ ဖြစ်နေတာလား...”

“ဟုတ်ပါတယ်...”

အကြီးအကဲပိကျိုးရွှေက ဟွာကျင်းယန်ဘက်သို့ လှမ်းကြည့်သည်။

“မင်း စွမ်းအားကြောင့် ရှုံးနိမ့်တာ မဟုတ်ဘဲ သိုင်းဝိညာဉ်ကြောင့် ရှုံးခဲ့ရတာ ဖြစ်တယ်”

“သိုင်းဝိညာဉ်ကြောင့်...”

ယန်ချင်းရှုံး အံ့အားသင့် သွားသည်။

အကြီးအကဲပိကျိုးရွှေ ခေါင်းညိတ်သည်။

“မင်းရဲ့ ဓားချက်တစ်ချက်က ဟွာကျင်းယန်ကို တကယ်ပဲ အခြေအနေဆိုးထဲသို့ တွန်းပို့ ခဲ့ပြီးပြီ။ မင်းတို့ရဲ့ အနိုင်အရှုံးက ငါးဆယ်-ငါးဆယ် လောက် ရှိခဲ့တာ ဖြစ်တယ်။ စိတ်မကောင်းစရာက ဟွာကျင်းယန်က နောက်ဆုံးအချိန်မှာ မြေကမ္ဘာမီးလျှံစွမ်းအင်ကို ထုတ်သုံးခဲ့တယ်။ တိုက်ပွဲစွမ်းအားကို မြှင့်တင်ခဲ့ရုံမက မြေကမ္ဘာမီးလျှံစစ်စွမ်းအင်မှာ ချီစွမ်းအင်ကို မီးရှို့ပစ်နိုင်တဲ့ စွမ်းအားလည်း ရှိတယ်။ ဒါကြောင့် မင်း အရှုံးပေးလိုက်ရတာ...”

“မြေကမ္ဘာမီးလျှံစစ်စွမ်းအင်လား... အဲ့ဒါက သူ့ရဲ့ ကိုယ်ပိုင်စွမ်းအား မဟုတ်ဘူး မဟုတ်လား...”

ယန်ချင်းရှုံး မျက်မှောင်ကြုတ် လိုက်သည်။

မြေကမ္ဘာမီးလျှံစစ်စွမ်းအင်တွင် ပါဝင်သော မြေကမ္ဘာချီစွမ်းအင်သည် သာမန်မဟုတ်ချေ။ သွေးကြောနိုးကြားမှုနယ်ပယ် အင်အားရှိသူများပင် အလွယ်တကူ မထိရဲ ကြဘဲ ဒဏ်ရာအပြင်းအထန် ရနိုင်သလို စိတ်နှလုံးပင် ရူးသွပ်သွားနိုင်သည်။

“မှန်တယ်... သူ အသုံးပြုနိုင်ခဲ့တာက သူ့သိုင်းဝိညာဉ်နဲ့ ဆက်စပ်နေတာ ဖြစ်နိုင်တယ်။ သူ မင်းနဲ့ တိုက်ခိုက်ပြီးနောက်မှာ စိတ်ဝိညာဉ်အခြေအနေ နိမ့်ကျ သွားတာကို ငါ မြင်ခဲ့တယ်။ မြေကမ္ဘာမီးလျှံစစ်စွမ်းအင်ကို ထုတ်သုံးတာက သူ့အတွက်လည်း ဝန်ထုပ်ဝန်ပိုး ဖြစ်ပုံရတယ်”

အကြီးအကဲပိကျိုးရွှေသည် ထိုသို့ ရှင်းပြလိုက်၏။ ယန်ချင်းရှုံး စကားမပြောသည်ကို မြင်သောအခါ ပြုံးလျက် ဆိုသည်။

“ပြင်ပအကူအညီကို အသုံးပြုတာက ရေရှည်အတွက် ကောင်းတဲ့ နည်းလမ်း မဟုတ်ဘူး။ မင်းလည်း သူ့ကို အားကျဖို့ မလိုဘူး။ မင်းသာ ဓားဆန္ဒကို နားလည်ပြီး သွေးကြောနိုးကြားမှုနယ်ပယ်ကို ထိုးဖောက် နိုင်ခဲ့ရင် မင်းရဲ့ ဓားသိုင်းဝိညာဉ်က ကြယ်ဆယ်ပွင့် စိတ်ဝိညာဉ်အဆင့်ကို တက်လှမ်းဖို့ အခွင့်အရေးများစွာ ရှိတယ်။ ပိုပြီးမြင့်မားတဲ့ နယ်ပယ်ကို ခြေချဖို့ အခွင့်အရေးရှိလိမ့်မယ်”

“မှတ်ထားပါ... သိုင်းပညာလမ်းစဉ်ဆိုတာ ခက်ခဲကြမ်းတမ်းတဲ့ လမ်းပဲ... အနည်းငယ်မျှ နောက်ဆုတ်ဖို့ မသင့်ဘူး။ ဓားသမားတွေဆိုရင်တော့ ပိုပြီး အရေးကြီးတယ်... ရင်ထဲက စူးရှတဲ့ ဆန္ဒပျောက်သွားရင် ဓားကလည်း ထက်မြက်တော့မှာ မဟုတ်ဘူး”

ယန်ချင်းရှုံး ခေါင်းခါ လိုက်သည်။

“ကျွန်မ သူ့ကို အားမကျပါဘူး... ကိုယ့်ကိုယ်ကိုယ်လည်း အားမလျှော့ပါဘူး။ ဒီတစ်ခေါက် ရှုံးနိမ့်မှုက ကျွန်မရဲ့ ဓားကို ဆက်လက်ထက်မြက်စေဖို့် လိုအပ်တယ် ဆိုတာကို သက်သေပြတာပဲ”

“အရမ်းကောင်းတယ်... မင်းရဲ့ ဒီလိုစိတ်ဓာတ်ကို ဆက်လက် ထိန်းထားနိုင်ရင် နောင်မှာ မင်းရဲ့ အောင်မြင်မှုက ဟွာကျင်းယန်ထက် ကျိန်းသေပေါက် မြင့်မားသွားလိမ့်မယ်”

အကြီးအကဲပိကျိုးရွှေ ရယ်မောလျက် ချီးကျူးလိုက်သည်။ ထို့နောက် ဆက်လက်၍ ဆိုသည်။

“ဒုတိယနေရာ ရရှိတာလည်း မဆိုးပါဘူး။ လျှပ်ယွမ်ဂိုဏ်းက ပထမနေရာကို ရရှိခဲ့ပေမဲ့ ဒီပြိုင်ပွဲမှာ ပေးဆပ်ရတဲ့ တန်ဖိုးကလည်း ကြီးမားတယ်။ ထူးချွန်တဲ့ တပည့်သုံးဦး အသက်ဆုံးရှုံးခဲ့ရပြီး ဆွန်ယင်ယန်ရဲ့ သားတောင် သတ်ဖြတ်ခံခဲ့ရတယ်”

“သူတို့လည်း လော့ချန်လက်ထဲ ဒီလိုဖြစ်သွားလိမ့်မယ်လို့ ထင်မထားခဲ့ဘူး ထင်တယ်”

ထိုစကားကို ကြားသောအခါ ယန်ချင်းရှုံး၏ အကြည့်သည် ချက်ချင်း လော့ချန်ရှိရာသို့ ရောက်ရှိသွားသည်။

လော့ချန်၏ တည်ငြိမ်အေးဆေးသော အမူအရာကို သတိထားမိလိုက်သည်။ ယန်ချင်းရှုံး၏ စိတ်ထဲတွင် ရုတ်တရက် အတွေးတစ်ခု ပေါ်လာသည်။

‘ဒီတစ်ခါပြိုင်ပွဲက ဒီလောက်နဲ့ ပြီးဆုံးမှာ မဟုတ်ဘူး ထင်တယ်...’

လူအများ၏ ဆွေးနွေးသံများ အလယ်တွင် ၁၄ ကြိမ်မြောက် ပွဲစဉ်လည်း နိဂုံးချုပ်လုနီးပါး ဖြစ်လာသည်။

ခဏမျှ အနားယူ ပြီးနောက် နောက်ဆုံးအကျော့ ပြိုင်ပွဲများ စတင်တော့မည်။

လေထုသည် မျှော်လင့်ထားသည့်အတိုင်း ပူပြင်းခြင်းမရှိဘဲ လူအများ တိုက်ပွဲစာရင်းကို အေးဆေးစွာ စောင့်ဆိုင်း နေကြသည်။

ဂိုဏ်းကြီးသုံးခုမှ အပြင်စည်းတပည့်ကြီးများထဲတွင် ဟွာကျင်းယန်နှင့် ယန်ချင်းရှုံးတို့ တိုက်ခိုက်ပြီး ဖြစ်သည်။

အမှားအယွင်း မရှိပါက ဤတိုက်ပွဲသည် လော့ချန်နှင့် သူတို့နှစ်ဦးထဲမှ တစ်ဦးဦး တိုက်ခိုက်ခြင်း ဖြစ်ရမည်။

သို့သော် လော့ချန် စင်မြင့်ပေါ် တက်ရောက်ပြီး တိုက်ခိုက်လိမ့်မည်ဟု မည်သူမျှ မယူဆ ကြချေ။

ဟွာကျင်းယန်နှင့် ယန်ချင်းရှုံးတို့၏ ယခုတင်က တိုက်ပွဲကို မြင်ပြီးနောက် မည်သူက စင်မြင့်ပေါ် တက်ရောက်ရဲ မည်နည်း။ ဤသည်က ဒုက္ခရှာခြင်းနှင့် ဘာကွာခြားတော့မည်နည်း။

ဟွာကျင်းယန်နှင့် တွေ့ဆုံရပါက သေခြင်းတရား တစ်ခုတည်းသာ ရှိသည်။

လူအများ၏ အမြင်တွင် ဤ ဂိုဏ်းသုံးဂိုဏ်း စုပေါင်းသိုင်းပညာပြိုင်ပွဲသည် ဟွာကျင်းယန်နှင့် ယန်ချင်းရှုံးတို့ တိုက်ခိုက်ပြီးချိန်ကတည်းက ပြီးဆုံး သွားခဲ့ပြီး ဖြစ်သည်။

ထိုစဉ် လော့ရှာဂိုဏ်းအကြီးအကဲက တိုက်ပွဲစာရင်းကို ကြေညာလိုက်သည်။

လော့ချန်၊ ယန်ချင်းရှုံး...။

“ဝှစ်...”

လော့ရှာဂိုဏ်းအကြီးအကဲ၏ စကားဆုံးသည်နှင့် တပြိုင်နက် လော့ချန်သည် စင်မြင့်ပေါ်သို့ ရောက်ရှိ သွားပြီးဖြစ်သည်။ အကြီးအကဲချန်ရွှမ်တို့ပင် တုံ့ပြန်ရန် အချိန်မမီ ခဲ့ချေ။

ဘုန်း...

ခဏမျှ တိတ်ဆိတ် နေပြီးနောက် ကျင်ယူတောင်ထိပ်တစ်ခုလုံး၏ လေထုသည် ချက်ချင်း ပွက်လောရိုက် သွားသည်။

လော့ချန်က တကယ်ပင် ရင်ဆိုင်တိုက်ခိုက်ရဲမည်ဟု မည်သူကမျှ မထင်မှတ် ထားခဲ့ကြချေ။

“လော့ချန်က ယန်ချင်းရှုံးနဲ့ တိုက်ခိုက် တော့မယ်”

နဝမအကြီးအကဲပင် မထိန်းနိုင်ဘဲ အံ့အားသင့်စွာ အော်ဟစ် လိုက်သည်။

ချန်လင်းယူနှင့် အခြားသူများလည်း အလွန် တုန်လှုပ်နေကြသည်။

ရှဲ့ယန်အကြီးအကဲသည် စင်မြင့်ပေါ်ရှိ လော့ချန်ကို စိုက်ကြည့် နေသည်။ နှုတ်ခမ်းထောင့်တွင် အပြုံးတစ်စ ရှိနေသည်။

လော့ချန် စင်မြင့်ပေါ် တက်ရောက်ပြီး တိုက်ခိုက်သောအခါ ပြင်းပြင်းထန်ထန် တိုက်ခိုက်နေစဉ် ချင်းယွမ်သွေးရွှင်ဆေးလုံး၏ အာနိသင်သည် အပြည့်အဝ ပေါက်ကွဲထွက်ပေါ် လိမ့်မည်။

ထိုအချိန်သည် မကြာမီ ရောက်ရှိလာတော့မည်ဟု ယူဆရသည်။

အခန်း (၃၇၄) ပြီးပါပြီ။