အခန်း (၃၄၆−၃၄၈)

အခန်း (၃၄၆) ချီသွေးအသွင်ပြောင်းခြင်းအဆင့်တစ်ဆယ် ချီသွေးမီးပြင်းဖိုအဆင့်။ ကောင်းကင်နှင့် မြေကြီးဓားစွမ်းအား။ (၁)

“လမ်းညွန်ခြင်း(တောက်ယင်) ဆိုသည်မှာ ‘အသက်ရှူခြင်းကို သဟဇာတဖြစ်အောင် ဦးတည်ပေးခြင်း၊ ခန္ဓာကိုယ်၏ လှုပ်ရှားမှုတို့အား လမ်းညွှန်ပေးခြင်းကို ဆိုလိုသည်။ လူတစ်ယောက်၏ အသက်ရှူခြင်းကို ပို၍ မျှတစေပြီး ခန္ဓာကိုယ်ကို ပြောင်းလွယ်ပြင်လွယ်ဖြစ်အောင် လမ်းညွှန်ပေးဖြစ်သည်။”

တောက်ယင်နည်းပညာသည် ရှေးခေတ်ကတည်းက အလွန်ရှေးကျသော ကျန်းမာရေးကို ထိန်းသိမ်းသည့် နည်းစနစ်တစ်ခုဖြစ်သည်။

ဦးတည်ပေးခြင်းဆိုသည်မှာ အသက်ရှူခြင်းအတွက်ဖြစ်ပြီး လမ်းညွှန်ပေးခြင်းကို ဆိုသည်မှာ ခန္ဓာကိုယ် လှုပ်ရှားမှုကို အတွက်ဖြစ်သည်။ လမ်းညွှန်ခြင်းဟာ အသက်ရှူခြင်းကို ကောင်းမွန်၊ မျှတ၊ နက်ရှိုင်းစွာနှင့် ဝမ်းဗိုက်ဖြင့် ရှည်လျားစွာ အသက်ရှူခြင်းသို့ လမ်းညွှန်ပေးခြင်းဖြစ်သည်။ အဆက်မပြတ် လေ့ကျင့်ခြင်းဖြင့် လူတစ်ဦး၏ အသက်ရှူမှုကို ရှည်လျားချောမွေ့စေပြီး ခန္ဓာကိုယ်ကို အားကောင်းစေကာ ရောဂါအမျိုးမျိုးကို ကာကွယ်ပေးနိုင်သည်။”

စူးချန်ခုန်းသည် တောက်ယင်နည်းပညာတစ်ခုလုံးကို ဖတ်ရှုပြီး လေ့ကျင့်ရန်အတွက် ပုံစံ ၁၂ ခုလုံးကို မှတ်သားလိုက်သည်။

နောက်တစ်ဆင့်က အမှန်တကယ် လေ့ကျင့်ဖို့ပင်။

“ဝိညာဉ်ဖြာနည်းစနစ်။”

စူးချန်ခုန်းသည် ခါးထောက်ထားပြီး ခြေထောက်များကို ပူး၍ရပ်နေ၏။ ထို့နောက် လက်ကောက်ဝတ်များကို လှည့်နေစဉ် လက်များကို ရင်ဘတ်မှတစ်ဆင့် ခေါင်းသို့ ရွှေ့ကာ လက်များကို ပြန်ယူလိုက်သည်။

“ကျားလက် နည်းစနစ်။”

ခြေထောက်များကို ပူးထားလျက် စူးချန်ခုန်းသည် ဘယ်ဘက်ပခုံးကို တွန်းတင်ပြီး ညာဘက်ကို ဖြေလျှော့လိုက်သည်။ ထို့နောက် ညာဘက်ပခုံးဖြင့် တွန်းတင်ပြီး ဘယ်ဘက်ကို ဖြေလျှော့လိုက်သည်။

“ဒီတောက်ယင်နည်းပညာ… ဒါက ကိုယ်လက်လှုပ်ရှားမှုလေ့ကျင့်ခန်းလိုမျိုးပဲ။”

တောက်ယင်နည်းပညာကို လေ့ကျင့်နေစဉ် စူးချန်ခုန်းသည် ၎င်းသည် အမှန်တကယ်ပင် ရိုးရှင်းပုံရသည်ဟု သူ့ကိုယ်သူ တွေးလိုက်သည်။ လေ့ကျင့်ခန်း၏ လှုပ်ရှားမှုများနှင့် အနေအထားအမျိုးမျိုးသည် ကိုယ်လက်လှုပ်ရှားမှုလေ့ကျင့်ခန်းများနှင့် မကွာခြားပါ။

ဤလှုပ်ရှားမှုများအားလုံးသည် အလွန်ညီညွတ်မျှတပြီး အချို့အကွက်တွေကို လေ့ကျင့်ဖို့ ပျော့ပြောင်းဖို့ လိုအပ်ရာ သိုင်းပညာရှင်တစ်ဦးအနေဖြင့် စူးချန်ခုန်းသည် အခက်ခဲဆုံးအကွက်များကိုပင် အလွယ်တကူ လုပ်ဆောင်ဖို့ အခက်အခဲမရှိပါ။

“တောက်ယင်နည်းပညာက လှုပ်ရှားမှုသာမက အသက်ရှူတာနဲ့လည်း ညှိဖို့ လိုတယ်။”

စူးချန်ခုန်းသည် တဖြည်းဖြည်း ဈာန်ဝင်လာပြီး အသက်ရှူတာ ပိုပြီး သိမ်မွေ့ကာ ဝင်သက်ထွက်သက်မျှတပြီး ပိုမိုနက်ရှိုင်းကာ ရှည်လျားလာသည်။ သူသည် အဓိကအားဖြင့် သူ၏ဝမ်းဗိုက်ကို အသုံးပြု၍ အသက်ရှူနေတာဖြစ်သည်။။

“တောက်ယင်နည်းပညာရဲ့ အခက်ခဲဆုံးအပိုင်းက အသက်ရှူတာလည်း မဟုတ်ဘူး။ ခန္ဓာကိုယ်ကို လှုပ်ရှားတာလဲ မဟုတ်ဘူး။ ‘စိတ်အာရုံစူးစိုက်မှု’ ကို ပြောင်းရတာပဲ။”

စူးချန်ခုန်း သူ့ကိုယ်သူ တွေးလိုက်သည်။

တောက်ယင်နည်းပညာသည် အသက်ရှူလေ့ကျင့်ခန်းများ၊ ရုပ်ပိုင်းဆိုင်ရာ လှုပ်ရှားမှုများနှင့် စိတ်ပိုင်းဆိုင်ရာ အာရုံစူးစိုက်မှု၏ လှုပ်ရှားမှုများကို ပေါင်းစပ်ထားပြီး ကျန်းမာရေး ထိန်းသိမ်းဖို့ ရည်ရွယ်ချက်အတွက် အပြန်အလှန် သန့်စင်ခြင်းဖြစ်သည်။

သာမန်လူတစ်ယောက်ဆိုရင် အသက်ရှူခြင်းနှင့် ရုပ်ပိုင်းဆိုင်ရာ လှုပ်ရှားမှုများကို အများဆုံး ပြီးမြောက်အောင်မြင်နိုင်သည်။ စိတ်ပိုင်းဆိုင်ရာ အာရုံစူးစိုက်မှုကို တစ်နေရာနှင့် တစ်နေရာ ကူးလူးဖို့အတွက်က နက်နဲလှပြီး စကားလုံးများဖြင့် ဖော်ပြရန် ခက်ခဲသည်။ လူတစ်ဦးသည် ၎င်းကို နားလည်ရန် သူတို့၏ မွေးရာပါ စွမ်းရည်နှင့် နားလည်နိုင်စွမ်းကို အားကိုးရမည်ဖြစ်သည်။

တောက်ယင်နည်းပညာသည် အချိန်ကာလစီးကြောင်းနှင့်အမျှ ပျောက်ကွယ်လာရခြင်းမှာ အံ့သြစရာမဟုတ်တော့ပေ။ ၎င်းကို လေ့ကျင့်ရန် ခက်ခဲသည်။ အောင်မြင်မှုအချို့ ရရှိလျှင်ပင် အကျိုးကျေးဇူးများက ကြီးမားလှသည်မဟုတ်ပါ။ ပါရမီရှင်များသည် ၎င်းကို လေ့ကျင့်ဖို့ အထင်သေးကြပြီး သာမန်လူတစ်ဦးသည် ၎င်းကို ကျွမ်းကျင်စွာ မလုပ်ဆောင်နိုင်ပါ။ ကြိုးစားအားထုတ်မှုက အကျိုးအမြတ်နှင့် မညီမျှပါ။

လိပ်အသက်ရှူနည်းပညာနှင့်မတူတာက သာမန်လူများသည် လေ့ကျင့်ဖို့ အချိန်ပေးသရွေ့ ရလဒ်များ ရရှိနိုင်သည်။

စွမ်းရည်အမှတ် ၃၃ မှတ်ဖြင့် စူးချန်ခုန်းသည် အလွန်ခက်ခဲသော တောက်ယင်နည်းပညာကို သိပ်မခက်ခဲဟု ယူဆပြီး ၎င်း၏အနှစ်သာရကို လျင်မြန်စွာ သဘောပေါက်ခဲ့သည်။

“စိတ်အာရုံရွေ့လျားမှုဆိုတဲ့အရာက အတွေးတွေကို သဘာဝအတိုင်း စီးဆင်းစေပြီး ‘ဦးဆောင်မှု’ နဲ့ ‘လမ်းညွှန်မှု’ ကို သဘာဝအတိုင်း ကိုက်ညီစေဖို့ လူတစ်ယောက်ရဲ့ စိတ်ကို ရှင်းအောင်လုပ်တာပဲ။”

မကြာမီတွင် စူးချန်ခုန်းသည် သူ၏ကိုယ်ပိုင်တည်ရှိမှုကို မေ့လျော့နေပုံရသည့် အလွန်တရာ နူးညံ့သိမ်မွေ့သော အခြေအနေသို့ ရောက်ရှိသွားသည်။ သို့သော် သူ၏အသက်ရှူခြင်းနှင့် ရုပ်ပိုင်းဆိုင်ရာလှုပ်ရှားမှုများသည် သဘာဝအလှတရားကို ထုတ်ဖော်ပြသခဲ့ပြီး ၎င်းတို့သည် ပင်ကိုသဘာဝအတိုင်း ရည်ရွယ်ထားသကဲ့သို့ လုံးဝသဟဇာတဖြစ်နေသည်။

"ငါ... ပင်ပန်းနေသလို ခံစားနေရတာလား။"

တစ်ကြိမ်တည်းမှာ တောက်ယင်နည်းပညာကို လေ့ကျင့်ပြီးနောက် စူးချန်ခုန်းက ရပ်တန့်လိုက်ပြီး အံ့အားသင့်သွားပုံရသည်။

သူ့ရဲ့လက်ရှိ ရုပ်ပိုင်းဆိုင်ရာ အခြေအနေအရ တောက်ယင်နည်းပညာကို လေ့ကျင့်ရာကနေ မောပန်းနွမ်းနယ်မှု တစ်စုံတစ်ရာ ခံစားနေရတာလား။ ဒါက သူ့ကို အံ့အားသင့်စေတာထက် စူးချန်ခုန်းကို ဝမ်းသာစေသည်။

ဒါဟာ တောက်ယင်နည်းပညာကို လေ့ကျင့်တာက စူးချန်ခုန်းအတွက် ထိရောက်မှုရှိတယ်ဆိုတဲ့ အဓိပ္ပာယ်ပင်။ ထိရောက်မှုရှိလို့ သူ မောပန်းနေတာဖြစ်သည်။

အရင်တုန်းက ထိုက်ချီ ကျန်းမာရေး ထိန်းသိမ်းသည့် လက်သီးပညာ၊ အသက်ရှည်မျောက်ဝံဖြူလက်သီးနဲ့ ချောင်ချွမ်းနည်းစနစ်လိုမျိုး ကိုယ်ခံပညာတွေနဲ့ စူးချန်ခုန်းဟာ မောပန်းနွမ်းနယ်မှု တစ်စုံတစ်ရာ မခံစားခဲ့ရ။

"တောက်ယင်နည်းပညာက ငါ့အတွက် တကယ်ကို အသုံးဝင်တယ်ဟ။"

စူးချန်ခုန်းရဲ့ မျက်လုံးတွေ အရောင်လဲ့လာလေ၏။ ရှေးအကျဆုံး ကျန်းမာရေး ထိန်းသိမ်းမှု နည်းပညာတွေထဲက တစ်ခုဖြစ်ပြီး လျှို့ဝှက်ဆန်းကြယ်တာ ဒါမှမဟုတ် နက်နဲတဲ့အရာတော့ မဟုတ်ပါ။

ဒါပေမယ့် သိုင်းပညာရှင် အများအပြားအတွက် စံနမူနာတစ်ခုအနေနဲ့ တောက်ယင်နည်းပညာမှာ ထူးခြားတဲ့ ရှုထောင့်တွေ ရှိမှာ သေချာပါသည်။ လူတိုင်းသိတဲ့၊ လူတိုင်း လုပ်နိုင်တဲ့ လှုပ်ရှားမှုတွေနဲ့ လေ့ကျင့်ခန်းတွေဖြစ်သည်။ ဒါပေမယ့် လူတိုင်း ပြီးပြည့်စုံအောင်တော့ မလုပ်နိုင်ကြပါ။

မောပန်းနွမ်းနယ်နေသော်လည်း စူးချန်ခုန်းသည် သံပူတုန်းထုသည့်အနေဖြင့် တောက်ယင်နည်းပညာကို ဆက်လက်လေ့ကျင့်ခဲ့သည်။

တစ်နေ့တည်းတွင် စူးချန်ခုန်းသည် စကျင့်ခါစ ဘာမှမသိသည့်အဆင့်မှ ပထမအဆင့်သို့ ရောက်ရှိသည်အထိ တောက်ယင်နည်းပညာကို လေ့ကျင့်ခဲ့သည်။

တောက်ယင်နည်းပညာကို လေ့ကျင့်ခြင်းဖြင့် စူးချန်ခုန်းသည် သူ့ခန္ဓာကိုယ်တွင် သိမ်မွေ့သောပြောင်းလဲမှုများကို ခံစားရပြီး သူ့စိတ်သည် ပိုမိုသွက်လက်လာပြီး သူ့ခြေလက်များ ပိုမိုပျော့ပျောင်းလာသည်။ ပြန်လည်သစ်လွင်လန်းဆန်းလာသည်ဟု မခေါ်ဆိုနိုင်သော်လည်း တဖြည်းဖြည်း တိုးတက်လာသည်မှာ သေချာပါသည်။

တောက်ယင်နည်းပညာ (တတိယအဆင့်၊ ပြီးပြည့်စုံသော နားလည်မှု ၁%)

ဆယ်ရက်အတွင်း စူးချန်ခုန်းသည် တောက်ယင်နည်းပညာကို တတိယအဆင့်သို့ လေ့ကျင့်ခဲ့ပြီး ယခုတစ်ကြိမ်တွင် ပြောင်းလဲမှုများရှိခဲ့သည်။

သက်တမ်း- ၁၈၇ နှစ်

စွမ်းရည်တန်ဖိုး- ၃၄ မှတ်

“သက်တမ်း… ငါ့သက်တမ်း နှစ်နှစ်တိုးလာတယ်။”

စူးချန်ခုန်းသည် သူ၏ပျော်ရွှင်မှုကို မထိန်းထားနိုင်ခဲ့။ သက်တမ်းနှစ်နှစ်တိုးလာခြင်းနှင့် စွမ်းရည်တန်ဖိုး တစ်မှတ်တိုးလာခြင်းသည် အကြာကြီး ရပ်တန့်နေခဲ့သော စူးချန်ခုန်းအတွက် အလွန်အံ့အားသင့်စရာဖြစ်သည်။

ကျန်းမာရေးထိန်းသိမ်းသည့် ကိုယ်ခံပညာတွေကို တစ်ခုနဲ့တစ်ခု ရောနှောသုံးလို့မရပေမယ့် လုံးဝကွဲပြားတဲ့ အမျိုးအစားတွေဆိုရင်တော့ တကယ်ကို ထိရောက်မှုရှိပါသည်။ ဝူချင်းရှီ၊ လိပ်အသက်ရှူနည်းပညာနဲ့ တောက်ယင်နည်းပညာတို့ဟာ ကျန်းမာရေးထိန်းသိမ်းတဲ့ နည်းလမ်းအမျိုးအစား အမျိုးမျိုးဖြစ်ပြီး အချင်းချင်း အနှောင့်အယှက်မဖြစ်စေပါ။ သူတို့ရဲ့ လေ့ကျင့်မှုလမ်းကြောင်းကတော့ ကွဲပြားပေမယ့် ရည်ရွယ်ချက်က ကျန်းမာရေးထိန်းသိမ်းဖို့နဲ့ အသက်ရှည်ဖို့ဖြစ်သည်။

“ကောင်းလိုက်တာ။ တောက်ယင်နည်းပညာကို ဂရုတစိုက်လေ့ကျင့်ပြီး ချီသွေးမီးပြင်းဖိုနယ်ပယ်ကို အဆင့်တက်ရာကနေ ရမယ့် အသက် ထပ်ပေါင်းလိုက်ရင် ငါ့ရဲ့ သက်တမ်းက နောက်တစ်ဆင့်ကို ခုန်တက်သွားမှာပဲ။ ငါ့ရဲ့ စွမ်းတန်ဖိုးကလည်း သေချာပေါက် သိသိသာသာ မြင့်တက်လာပြီး အခုထက်တောင် ပိုပြီး ကြောက်စရာကောင်းလာလိမ့်မယ်။ အဲဒီအချိန်ကျရင် ငါ ဘယ်အတိုင်းအတာအထိ ရောက်အောင် လုပ်နိုင်လိမ့်မလဲ။”

စူးချန်ခုန်းက စိတ်ခံစားချက်တွေကို ငြိမ်သက်အောင် အသက်ကို ပြင်းပြင်းရှူလိုက်သည်။

စူးချန်ခုန်းက ပိုသန်မာချင်ခဲ့တာဖြစ်သည်။ အနည်းဆုံးတော့ သူ့ကိုယ်သူ အနည်းဆုံးတော့ မော့ယင်ထက် ပိုအားကောင်းအောင် လုပ်ရမည်။

မော့ယင်နဲ့ ရင်ဆိုင်ခဲ့စဉ်က စူးချန်ခုန်း ကူကယ်ရာမဲ့နေခဲ့တာဖြစ်သည်။ သူ့ပြိုင်ဘက်က သူ့ရဲ့သိုင်းပညာကို တုပနိုင်ပြီး သူ့ရဲ့ဓားစွမ်းအင်ကိုတောင် အတုခိုးနိုင်ခဲ့သည်။ ဟုန်ကျန်းရှန့် ကြားဝင်ခဲ့တာကြောင့် တိုက်ပွဲက သရေကျခဲ့ပေမယ့် တိုက်ပွဲသာ ကြာရှည်ခဲ့ရင် အသွေးအသားရှိတဲ့သူ တစ်ယောက်အနေနဲ့ သူပဲ ရှုံးနိမ့်ရမယ်ဆိုတာ စူးချန်ခုန်း နားလည်ပါသည်။

အခန်း (၃၄၇) ချီသွေးအသွင်ပြောင်းခြင်းအဆင့်တစ်ဆယ် ချီသွေးမီးပြင်းဖိုအဆင့်။ ကောင်းကင်နှင့် မြေကြီးဓားစွမ်းအား။ (၂)

စူးချန်ခုန်းသည် ဒီလို စွမ်းအားမဲ့တဲ့ခံစားချက်ကို မုန်းတီးသည်။ သူက ရှုံးနိမ့်ချင်တာမဟုတ်ပါ။ အနိုင်ရချင်တာဖြစ်သည်။

“နဂါးသွေးဆေးရဲ့ ဆေးအစွမ်းကို ချေဖျက်ပြီးသွားပြီ။ ဖိုထိုးဖို့အတွက် ဆေးဖိုကို မီးမွှေးမယ်” ဟု စူးချန်ခုန်းက ပြောလိုက်သည်။

နှောင့်နှေးခြင်းမရှိဘဲ စူးချန်ခုန်းသည် ဖိုထိုးခြင်းကို စတင်လိုက်သည်။

လက်ရှိတွင် စူးချန်ခုန်းတွင် ရည်မှန်းချက်နှစ်ခုရှိသည်။ တစ်ခုမှာ ချီသွေးမီးပြင်းဖိုနယ်ပယ်သို့ရောက်ရှိရန်ဖြစ်သည်။ သူ့မှာ အရင်းအမြစ်များစွာရှိသောကြောင့် ချီသွေးမီးပြင်းဖိုနယ်ပယ်သို့ရောက်ရှိရန် သူ့အတွက် မခက်ခဲပါ။

ဒုတိယရည်မှန်းချက်ကတော့ သဘာဝအတိုင်း တောက်ယင်နည်းပညာကို ကျင့်ကြံပြီး ပိုမိုမြင့်မားတဲ့ နယ်ပယ်တွေဆီ မြှင့်တင်ပေးဖို့ဖြစ်ကာ သူ့ရဲ့သက်တမ်းနဲ့ စွမ်းရည်တန်ဖိုးကို မြှင့်တင်ပေးဖို့ပင်။

သူဟာ နှစ်ခုစလုံးကို တစ်ပြိုင်နက်တည်း တိုးတက်အောင် လုပ်ဆောင်နေသည်။

စူးချန်ခုန်းက သူ့ရဲ့ တိတ်ဆိတ်ငြိမ်သက်တဲ့ ကျင့်ကြံမှုကို စတင်ခဲ့သည်။

ပြည်နယ်အုပ်ချုပ်ရေးမှူးအိမ်တော်၌။

“မြောက်ဘက် ဖုန်းလင်ဂိုဏ်းမှာ အစုလိုက်အပြုံလိုက်သတ်ဖြတ်မှုတစ်ခု ဖြစ်ပွားခဲ့ပြီး လူတစ်ထောင်ကျော် သေဆုံးခဲ့ကာ မိစ္ဆာနတ်ဆိုးတွေရဲ့ လက်ချက်ဟု သံသယရှိသည်။”

ဖေယန်က သူ့လက်ထဲက အစီရင်ခံစာကို ကြည့်ရင်း မျက်မှောင်ကြုတ်လိုက်သည်။

နတ်ဆိုးတွေဟာ မကြာသေးခင်က ပို၍ ပျံ့နှံ့လာခဲ့သည်။ တစ်နှစ် ဒါမှမဟုတ် နှစ်နှစ်အတွင်းမှာပဲ တာ့ဖုန်းပြည်နယ်အတွင်း နတ်ဆိုးတွေနဲ့ ပတ်သက်တဲ့ ဖြစ်ရပ် ငါးခုထက်မနည်း ဖြစ်ပွားခဲ့သည်။

“သိပ်မဝေးပါဘူး၊ ကျန်းရှန့်ကို လူတွေကို ခေါ်ပြီး သွားကြည့်ခိုင်းလိုက်မယ်။” ဖေယန်က သူ့စိတ်ထဲမှာ ဆုံးဖြတ်လိုက်ပြီး ဒီကိစ္စကို ကိုင်တွယ်ဖြေရှင်းရန် ဟုန်ကျန်းရှန့်ကို စေလွှတ်ဖို့ ရွေးချယ်လိုက်သည်။

“ဟမ်..ပြီးတော့ ဟုန်လင်မြို့က ဒီအစီရင်ခံစာမှာ မကြာသေးခင်က လျှို့ဝှက်ဆန်းကြယ်တဲ့ ကျွမ်းကျင်ပညာရှင်တစ်ယောက်က ဟုန်းတာ့ရွှေဂိုဏ်းရဲ့ ဒုဂိုဏ်းခေါင်းဆောင် လောင်ဖေးကို သတ်ခဲ့တယ်လို့ ဆိုထားတယ်။”

ဖေယန်က နောက်ထပ် ထောက်လှမ်းရေးအချက်အလက်တစ်ခုကို ဖတ်လိုက်သည်။

“လျှို့ဝှက်ဆန်းကြယ်တဲ့ ပညာရှင်တစ်ယောက်။ စူးထိုက်လိုင်လား…”

စူးထိုက်လိုင်ဆိုတဲ့ နာမည်က ဖေယန်ရဲ့စိတ်ထဲမှာ ပေါ်လာသည်။

စူးထိုက်လိုင်ဟာ လျှို့ဝှက်ဆန်းကြယ်မှုတွေ ပြည့်နှက်နေပြီး ငယ်ရွယ်ပေမယ့် အံ့သြစရာကောင်းလောက်အောင် ပါရမီရှိသည့် သိုင်းပညာမှာ အလွန်ကျွမ်းကျင်ပြီး ချိုင်ကျန့်ကို သူ့ရဲ့ဓားနဲ့ခုတ်ပြီး ဝိညာဉ်လိုက်မြားကို သတ်နိုင်ခဲ့သည်။

ဟုန်ကျန်းရှန့်ရဲ့ စူးချန်ခုန်းအပေါ် အကဲဖြတ်ချက်အရ စူးချန်ခုန်းရဲ့အောင်မြင်မှုတွေဟာ သူ့အောင်မြင်မှုတွေထက် မနည်းဘူးလို့ သူထင်သည်။

“ဒီလို အလားအလာကောင်းတဲ့ ကျွမ်းကျင်ပညာရှင်နဲ့ ဆက်ဆံရေးကောင်းတာ မဆိုးပါဘူး” ဖေယန်က ခေါင်းခါပြီး အစီအရင်ခံစာတွေကို ဘေးဖယ်ထားလိုက်သည်။ ပါရမီရှိတဲ့ လူတွေကို အသိအမှတ်ပြုတာက သူ့ဘဝမှာ လုပ်ခဲ့တဲ့ အမှန်ကန်ဆုံးအရာဖြစ်သည်။

မူလက ဖေယန်ဟာ တာ့ဖုန်းပြည်နယ်ရဲ့ ပြည်နယ်အုပ်ချုပ်ရေးမှူး မဟုတ်ပေမယ့် ဟုန်ကျန်းရှန့်လို အလားအလာကောင်းတဲ့ သူတစ်ယောက်ကို ရှာတွေ့ခဲ့ပြီး သူ့ကို ပြုစုပျိုးထောင်ဖို့ သူတတ်နိုင်သမျှ ပေးဆပ်ခဲ့ဖြစ်သည်။ အပြန်အလှန်အားဖြင့် ဟုန်ကျန်းရှန့်က တောင်နဲ့ မြောက်တိုက်ပွဲတွေမှာ သူ့ကို သစ္စာရှိရှိ တာဝန်ထမ်းဆောင်ခဲ့လို့ ဖေယန်ရဲ့ ပြည်နယ်အုပ်ချုပ်ရေးမှူးရာထူးဟာ တည်ငြိမ်နေခဲ့သည်။

ထို့ကြောင့် စူးချန်ခုန်းက နဂါးသွေးဆေးပစ္စည်းများစွာ လိုအပ်ခဲ့စဉ်က ဤပစ္စည်းများသည် အလွန်တန်ဖိုးရှိသော်လည်း ဖေယန်သည် စူးချန်ခုန်း၏ တောင်းဆိုမှုများကို ဖြည့်ဆည်းရန် သူ၏ဆက်သွယ်မှုများကို အသုံးချခဲ့ကာ အရှုံးခံရလုနီးပါးပင်။

“ရန်စက်တဲ့ ဝံပုလွေမျိုးနွယ်စုက တာ့ဖုန်းပြည်နယ်မြို့ကို ထပ်ဝင်ဖို့ ကြိုးစားနေတာလား။”

နောက်ထပ်အစီရင်ခံစာတစ်ခုကို မြင်လိုက်ရသောအခါ ဖေယန်၏ မျက်ခုံးများ ချက်ချင်းတွန့်ချိုးသွားသည်။

ဆည်းဆာလွင်ပြင်ဖြင့် တာ့ဖုန်းပြည်နယ်မြို့နှင့် ခွဲထားသော ဝံပုလွေမျိုးနွယ်စုသည် ရဲတင်းပြီး ကျွမ်းကျင်သော စစ်သည်တော် မျိုးနွယ်စုတစ်ခုဖြစ်သည်။ သူတို့သည် သူတို့တောင်းဆိုသည့် အခြေအနေများကို သဘောတူပြီး အကျိုးကျေးဇူးများရရှိရန် မျှော်လင့်ချက်ဖြင့် တာ့ဖုန်းပြည်နယ်မြို့သို့ မကြာခဏ ကျူးကျော်ဝင်ရောက်ရန် ကြိုးစားခဲ့ကြသည်။

ရက်စက်သော ဝံပုလွေမျိုးနွယ်စု၏ လှုပ်ရှားမှုများ တိုးပွားလာသည်နှင့်အမျှ ဖေယန်သည် တစ်ဖက်က အကြီးအကျယ်လှုပ်ရှားမှုတစ်ခုကို စီစဉ်နေသည်ဟု သံသယဝင်ခဲ့သော်လည်း ဆယ်စုနှစ်တစ်ခုကျော်ကကဲ့သို့ပင် ရက်စက်သော ဝံပုလွေမျိုးနွယ်စုကို တစ်ကြိမ်တွန်းလှန်နိုင်ပါက ထပ်မံတွန်းလှန်နိုင်ကြောင်း သူသိသည်။

“ဆက်ပြီး ငြိမ်းချမ်းနေဖို့ မျှော်လင့်ရတာပဲ” ဖေယန်က သက်ပြင်းချလိုက်သည်။ မည်သူမဆို ငြိမ်းချမ်းသော ဖွံ့ဖြိုးတိုးတက်မှုမှလွဲ၍ အခြားဘာကိုမျှ မလိုလားကြပါ။

…

တောက်ယင်နည်းပညာ (စတုတ္ထအဆင့် ကျွမ်းကျင်အဆင့် ၁%)

သက်တမ်း- ၁၉၀ နှစ်

စွမ်းရည်တန်ဖိုး- ၃၅ မှတ်

"သက်တမ်းနဲ့ စွမ်းရည်တန်ဖိုး တက်လာပြန်ပြီ" စူးချန်ခုန်းက သူ့ရဲ့ အရည်အချင်းပြဘောင်ကွက်ပေါ်က အချက်အလက်တွေကို ကြည့်ရင်း ပြုံးရွှင်စွာ ပြောလိုက်သည်။ သူ့ရဲ့ ပျော်ရွှင်မှုကို ထိန်းမထားနိုင်ခဲ့။

သူက တောက်ယင်နည်းပညာကို တစ်လပဲ လေ့ကျင့်ရသေးပေမယ့် သူ့ရဲ့ အံ့မခန်း အရည်အချင်းနဲ့ စွမ်းရည်ကြောင့် သူ့ရဲ့ လေ့ကျင့်မှုကို စတုတ္ထအဆင့်ကို တွန်းပို့နိုင်ခဲ့သည်။ သူ့ရဲ့ သက်တမ်းကတော့ ငါးနှစ်တင်းတင်း တိုးလာပြီး သူ့ရဲ့ စွမ်းရည်တန်ဖိုးက ၂ မှတ် တက်လာခဲ့သည်။

စူးချန်ခုန်းက သူ့ရဲ့ ပြောင်းလဲမှုက တစ်နေ့တခြား ပိုပိုပြီး များပြားလာတယ်လို့ ခံစားရသည်။

တစ်ချိန်က သူ့ကို ခေါင်းခြောက်စေခဲ့တဲ့ သိုင်းပညာနယ်ပယ်တွေက အခုတော့ တဖြည်းဖြည်း အဓိပ္ပာယ်ရှိလာလေပြီ။

သူ့ရဲ့ချီနဲ့သွေးအတွက်ကတော့ စူးချန်ခုန်းဟာ သူ့ရဲ့ မြန်ဆန်တဲ့ စွမ်းရည်ကို အားကိုးပြီး နှစ်ရက် သုံးရက်တိုင်း နဂါးသွေးဆေးလုံးကို သန့်စင်နိုင်ခဲ့သည်။ သူ့ရဲ့ ချီနဲ့သွေးအစွမ်းက အဆက်မပြတ် မြင့်တက်လာပြီး ချီသွေးအသွင်ပြောင်းခြင်းအဆင့်တစ်ဆယ်ကို တဖြည်းဖြည်း ရွေ့လျားနေလေသည်။ သူ အောင်မြင်မှုတစ်ခု ရရှိဖို့ အချိန်အနည်းငယ်သာ လိုတော့သည်။

စူးချန်ခုန်းသည် ပြင်ပကိစ္စရပ်များနှင့် အနှောင့်အယှက်ကင်းသော်လည်း ဟုန်ကျန်းရှန့်သည် တာ့ဖုန်းပြည်နယ်အတွင်း ပေါ်လာသော နတ်ဆိုးများကို လိုက်လံရှာဖွေရန် လာခေါ်ခဲ့ဖူးသည်။ စူးချန်ခုန်းက ထိုကမ်းလှမ်းချက်ကို ငြင်းပယ်ခဲ့သည်။

ယခုအခါ သူသည် မည်သည့်အာရုံပျံ့လွင့်မှုများကိုမျှ မကိုင်တွယ်လိုဘဲ သူ၏အသွင်ပြောင်းလဲမှုကို အပြီးသတ်ပြီး အဆင့်တက်ဖို့သာ အာရုံစိုက်လိုသည်။

သူ၏လေ့ကျင့်မှုကာလအတွင်း အချိန်သည် မြန်ဆန်စွာ ကုန်ဆုံးသွားပြီး ဆောင်းရာသီရောက်လာသောအခါ ကောင်းကင်မှ နှင်းပွင့်များ ကြွေကျလာပြီး စူးချန်ခုန်း နေထိုင်သည့် စံအိမ်ကြီးကို နှင်းလွှာများဖြင့် ဖုံးလွှမ်းသွားခဲ့သည်။

ကျယ်ဝန်းလှသော ခြံဝင်းထဲတွင် ပါးလွှာသော အဝတ်အစားများ ဝတ်ဆင်ထားသော စူးချန်ခုန်းသည် တောက်ယင်နည်းပညာကို လေ့ကျင့်နေစဉ် လူတစ်ဦး၏ အသားအရေကို ခရမ်းရောင်သို့ ပြောင်းလဲစေနိုင်သော အအေးဒဏ်ကို လုံးဝ မကြောက်ပါ။ ကျွမ်းဘားနှင့်ဆင်တူသော သူ၏လေ့ကျင့်ခန်းများသည် မြင်တွေ့ရသူတိုင်းကို ဆွဲဆောင်နိုင်လောက်အောင် သဘာဝကျပြီး အားစိုက်ထုတ်စရာမလိုသော ကျက်သရေကို ပြသနေလေ၏။

ဝှစ် ဝှစ် ဝှစ်

သူ၏အသက်ရှူခြင်းနှင့် ကိုက်ညီသော သူ၏ခန္ဓာကိုယ်လှုပ်ရှားမှုများသည် သူ၏အာရုံစူးစိုက်ထားသော စိတ်ဖြင့် ညှိနှိုင်းထားသော ပြီးပြည့်စုံသော စက်ဝန်းတစ်ခုကို ရရှိခဲ့သည်။ စူးချန်ခုန်း ရှူသွင်းလိုက်တဲ့အခါ သူ့ဝမ်းဗိုက်ထဲကို ဝင်လာတဲ့ အေးစိမ့်စိမ့်လေဟာ ပူပြင်းတဲ့ စီးကြောင်းတစ်ခုအဖြစ် ပြောင်းလဲသွားပြီး အဖြူရောင် မီးခိုးတွေလို မြင့်တက်လာကာ ခြံထဲမှာ မြူခိုးတွေနဲ့ ပြည့်နှက်နေတဲ့ နိဗ္ဗာန်ဘုံတစ်ခုလို ထင်ယောင်ထင်မှား ဖြစ်စေသည်။

တောက်ယင်နည်းပညာမှာ ကျွမ်းကျင်တဲ့ သွေးမြူခိုးမျှော်စင်က သိုင်းပညာရှင်တစ်ယောက်ယောက်သာ ဒီမြင်ကွင်းကို မြင်တွေ့ခဲ့ရင် သူတို့ဟာ တောက်ယင်နည်းပညာကို ဒီလောက် စိတ်ကူးယဉ်ဆန်တဲ့ အတိုင်းအတာအထိ လေ့ကျင့်နိုင်လိမ့်မယ်ဆိုတာကို မယုံနိုင်လောက်အောင် အံ့အားသင့်သွားမှာပင်။

တောက်ယင်နည်းပညာ လေ့ကျင့်ခန်းတစ်ခု ပြီးသွားတဲ့အခါ စူးချန်ခုန်းဟာ ခဏနားပြီး ပုလင်းလေးတစ်လုံးကို ထုတ်ကာ သွေးရောင်မြူမှုန်တွေနဲ့ ဖုံးအုပ်ထားတဲ့ နဂါးသွေးဆေးတစ်လုံးကို ပါးစပ်ထဲ လောင်းထည့်လိုက်သည်။

“နောက်ထပ်တစ်နှစ် ကုန်သွားပြီတဲ့လား။ အချိန်တွေက တကယ်ကို ကုန်မြန်တာပဲ။”

ကောင်းကင်ကနေ ကျဆင်းနေတဲ့ နှင်းပွင့်တွေကို မော့ကြည့်ပြီး စူးချန်ခုန်းဟာ အလေးအနက်စဉ်းစားနေမိသည်။

နောက်ထပ်တစ်နှစ် ကုန်သွားပြီး စူးချန်ခုန်းဟာ အသက် ၂၁ နှစ် ပြည့်ခဲ့လေပြီ။

“ဆက်လေ့ကျင့်မယ်။"

သူ့ရဲ့ ခွန်အားကို ခဏတာ ပြန်လည်ရရှိပြီးနောက် စူးချန်ခုန်းဟာ တောက်ယင်နည်းပညာကို ပြန်လည်လေ့ကျင့်ခဲ့သည်။

အချိန်တွေ ကုန်ဆုံးသွားပြီး မျက်စိတစ်မှိတ်အတွင်းမှာပဲ ခုနစ်လ ရှစ်လလောက် ကုန်ဆုံးသွားခဲ့သည်။ စူးချန်ခုန်းက တောက်ယင်နည်းပညာကို ခြောက်လနီးပါး လေ့ကျင့်နေခဲ့သည်။

အခန်း (၃၄၈) ချီသွေးအသွင်ပြောင်းခြင်းအဆင့်တစ်ဆယ် ချီသွေးမီးပြင်းဖိုအဆင့်။ ကောင်းကင်နှင့် မြေကြီးဓားစွမ်းအား။ (၃)

ဆောင်းနှင်းများ အရည်ပျော်ပြီး နွေဦးရာသီရောက်ရှိလာသည်နှင့်အမျှ နွေရာသီ၏ အစွန်းသို့ နီးကပ်လာသည်။

တောက်ယင်နည်းပညာတစ်စုံကို ပြီးမြောက်ပြီးနောက် စူးချန်ခုန်းသည် သူ့ပတ်ဝန်းကျင်ရှိ လေစီးဆင်းမှုကို ခံစားနိုင်သကဲ့သို့ သူ၏ချွေးပေါက်များ ပွင့်လာပြီး အလွန်သက်တောင့်သက်သာရှိသော အဆင့်သို့ ပြေလျော့သွားသကဲ့သို့ ခံစားရသည်။ သူ ရေပူစမ်းတွင် စိမ်နေသကဲ့သို့ ခံစားရသည်။

"ငါ အဆင့်တက်သွားပြီ" စူးချန်ခုန်းသည် သူ၏တောက်ယင်နည်းပညာက အဆင့်သစ်တစ်ခုသို့ ရောက်ရှိသွားပြီဖြစ်ကြောင်း သိလိုက်သည်။

တောက်ယင်နည်းပညာ (သတ္တမအဆင့် နက်နဲသော ကျွမ်းကျင်မှု ၁%)

ခုနစ်လမှ ရှစ်လအတွင်း စူးချန်ခုန်းသည် သူ၏ စွမ်းအင်အများစုကို တောက်ယင်နည်းပညာအတွက် မြှုပ်နှံခဲ့ပြီး တောက်ယင်နည်းပညာအတွက် လေ့ကျင့်ခဲ့သည်။ သာမန်လူများသည် ရာစုနှစ်တစ်ခုနီးပါးဖြစ်သည့် ၆၀ နှစ်တာ စက်ဝန်းတွင်ပင် မရရှိနိုင်သော ကျွမ်းကျင်အဆင့်သို့ ရောက်ရှိသွားခဲ့သည်။

သက်တမ်း- ၂၀၀ နှစ်

စွမ်းရည်တန်ဖိုး- ၃၇ မှတ်

သူ၏ သက်တမ်းသည်လည်း ၂၀၀ နှစ်အထိ တိုးလာခဲ့ပြီး သူ၏ စွမ်းရည်တန်ဖိုးမှာ ၃၇ မှတ်အထိ မြင့်တက်လာခဲ့သည်။

ဤတိုးတက်မှုသည် အတော်လေး ကြီးမားလှသည်။ သက်တမ်းပိုရှည်လေ တစ်နှစ် သို့မဟုတ် နှစ်နှစ်အထိပင် တိုးချဲ့ရန် ပိုမိုခက်ခဲလေဖြစ်သည်။ ကန့်သတ်ချက်နှင့် နီးကပ်လေလေ အနည်းငယ်မျှ တိုးတက်ဖို့ပင် ပိုခက်ခဲလေဖြစ်သည်။

အသက်တစ်ရာအထိ နေထိုင်ရပါက အသက်ရှည်သူတစ်ဦးအဖြစ် သတ်မှတ်ခံရပြီးဖြစ်သည်။

နှစ် ၂၀၀ သက်တမ်းဆိုသည်မှာ ရာစုနှစ်နှစ်ခုကို ဖြတ်သန်းနေထိုင်ခြင်း ဖြစ်သည်။ ခေတ်များ၏ ပြောင်းလဲမှုများ၊ မင်းဆက်များ၏ မြင့်တက်မှုနှင့် ကျဆင်းမှုကို မျက်မြင်တွေ့ရှိခြင်းပင်။

“နောက်ရက်အနည်းငယ်အတွင်းမှာ ငါသွေးသန့်စင်ခြင်းကို အပြီးသတ်ပြီး ချီသွေးမီးပြင်းဖိုနယ်ပယ်ထဲကို ဝင်တော့မှာပဲ။”

ထို့အပြင် ဤခုနစ်လမှ ရှစ်လအတွင်း စူးချန်ခုန်းသည် နဂါးသွေးဆေးများကို နေ့စဉ်သောက်သုံးကာ စုပ်ယူခဲ့ပြီး သူ၏ ချီနှင့်သွေး၏အစွမ်းသတ္တိသည် အလျင်အမြန်ကြီးထွားလာကာ အတားအဆီးတစ်ခုအထိ ရောက်ရှိခဲ့သည်။ သူသည် ချီသွေးအသွင်ပြောင်းခြင်းကိုရရှိရန် တစ်ကြိမ်တည်းနှင့် အဆင့်တက်ရန် လိုအပ်သည်။

ကျယ်ဝန်းပြီး တိတ်ဆိတ်သော အခန်းတစ်ခုတွင် သူ၏အခြေအနေကို အမြင့်ဆုံးသို့ ချိန်ညှိပြီးနောက် စူးချန်ခုန်းသည် နဂါးသွေးဆေးကို ထပ်မံသောက်သုံးပြီး တိတ်ဆိတ်စွာ စုပ်ယူဖို့ ဆုံးဖြတ်ကာ ဤအတားအဆီးကို ဖောက်ထွက်ရန် ဆုံးဖြတ်ခဲ့သည်။

ချီနှင့်သွေးသည် စူးချန်ခုန်း ပတ်လည်တွင် စီးဆင်းလာပြီး သူ၏ချွေးပေါက်များမှ သွေးရောင် ချီမြူခိုးများ ထွက်ပေါ်လာသည်။ သူ့ခေါင်းပေါ်တွင် နဂါးအကြေးခွံ၊ နဂါးဦးခေါင်းနှင့် နဂါးခြေသည်းများကို အားလုံး ရှင်းရှင်းလင်းလင်း မြင်နိုင်ကာ ကြည်လင်ပြတ်သားပြီး အသက်ဝင်လာသည်။ တက်ကြွသော အကြည့်များ ခိုအောင်းနေသော မျက်လုံးများဖြင့် အလွန်တရာ သက်ဝင်တောက်ပသော နဂါးတစ်ကောင် ပေါ်လာသည်။

၎င်းသည် ကိုးခုသော အသွင်ပြောင်းမှုများ အထွတ်အထိပ်သို့ ရောက်ရှိခြင်း၏ လက္ခဏာတစ်ခုဖြစ်သည်။

ချီနှင့်သွေးတို့တက်လာသည်နှင့်အမျှ သွေးရောင်နဂါးသည် စက်ဝိုင်းပုံသဏ္ဍာန် ခွေကာ ၎င်း၏ခန္ဓာကိုယ်မှ ပြင်းထန်သော မီးလျှံတစ်ခု ထွက်ပေါ်လာသည်။ သွေးနီရောင်မီးလျှံများသည် နဂါး၏ခန္ဓာကိုယ်ကို လောင်ကျွမ်းစေပြီး အသွင်ပြောင်းရန်အတွက် သန့်စင်ပြီး စုဝေးနေသည်။

ပူလောင်လှသည်… ပူပြင်းလှသည်… ခန္ဓာကိုယ်သည် လောင်ကျွမ်းတော့မည့်ပုံပေါ်သည်အထိ ပူပြင်းလှသည်။

စူးချန်ခုန်းသည် မီးပြင်းဖိုထဲတွင် ရှိနေသကဲ့သို့ ခံစားရပြီး သူ့ခန္ဓာကိုယ်သည် ပြာဖြစ်သွားနိုင်လောက်အောင် ပူပြင်းလှသည်။ သူ၏ချွေးပေါက်များမှ ချွေးများစီးကျလာသည်နှင့် မြူခိုးများအဖြစ် လောင်ကျွမ်းသွားပြီး သူ့အသားအရေသည် အနီရောင်သို့ ပြောင်းလဲသွားသည်။ တစ်စုံတစ်ယောက်က ၎င်းကို ထိရဲပါက သူတို့၏အသားများသည် မီးသွေးအဖြစ် လောင်ကျွမ်းသွားနိုင်သည်။

အသံတစ်စက်မထွက်ဘဲ စူးချန်ခုန်းက မျက်လုံးများကို မှိတ်ကာ တိတ်တဆိတ် သည်းခံနေသည်။ ၎င်းသည် သူ၏ ချီနှင့်သွေးအသွင်ပြောင်းခြင်း၊ အတွင်းအား အသွင်ပြောင်းခြင်းအတွက် ခံနိုင်ရည်ရှိရန် မရှိမဖြစ်လိုအပ်သော အသွင်ပြောင်းမှုတစ်ခုဖြစ်ကြောင်း သူသိသည်။ ဤနာကျင်မှုကိုပင် သူမခံနိုင်ပါက သူဟာသိုင်းပညာရှင်တစ်ယောက်ဖြစ်ကြောင်း၊ အမတလမ်းစဉ်ကို လိုက်နေကြောင်း မည်သို့ပြောနိုင်တော့မည်နည်း။

အချိန်တွေကုန်ဆုံးသွားပြီး မရေမရာတဲ့ ကာလတစ်ခုအပြီးမှာ သူ့ခန္ဓာကိုယ်ကို လောင်ကျွမ်းသွားစေတော့မယ့် ပူလောင်တဲ့ခံစားချက်ဟာ တဖြည်းဖြည်း လျော့ပါးသွားလေ၏။ ဒါမှမဟုတ် စူးချန်ခုန်းရဲ့ခန္ဓာကိုယ်ဟာ အသွင်ပြောင်းသွားပြီး ဒီပူပြင်းတဲ့အပူဒဏ်ကို ကျင့်သားရသွားခဲ့တာဖြစ်မည်။

စူးချန်ခုန်းရဲ့ ဦးခေါင်းအထက်မှာ သွေးရောင်နဂါးကို ပြန်လည်သန့်စင်ပြီး တောက်လောင်နေတဲ့မီးပြင်းဖိုအဖြစ် ပြောင်းလဲသွားခဲ့သည်။ မျက်နှာပြင်မှာ နတ်နဂါးပုံစံထွင်းထုထားပြီး ခမ်းနားထည်ဝါကာ လျှို့ဝှက်ဆန်းကြယ်လှသည်။ မီးပြင်းဖိုထဲမှာ မီးတောက်တွေဟာ အဆက်မပြတ် တက်လာနေ၏။

“ဟမ်း… ငါအောင်မြင်သွားပြီ…”

စူးချန်ခုန်းသည် အသက်ပြင်းပြင်းရှူလိုက်ပြီး အတွင်းမှ ပူပြင်းသော ချီနှင့်သွေးများကို တဖြည်းဖြည်း အေးသွားစေလိုက်သည် သူ့မျက်လုံးများထဲတွင် အပြုံးတစ်ခု ပေါ်လာသည်။

မီးပြင်းဖိုအဆင့်သို့ သန့်စင်ခြင်း။ ချီသွေးမီးပြင်းဖိုနယ်ပယ်။

ချီသွေးမီးပြင်းဖိုနယ်ပယ်သည် ချီသွေးနယ်ပယ်လေးခု၏ အသွင်ပြောင်းမှု ဆယ့်နှစ်ခုတွင် စတုတ္ထနယ်ပယ်ကို ကိုယ်စားပြုသည်။

ချီသွေးနယ်ပယ်ရှိ သိုင်းပညာရှင်များထဲတွင် ချီသွေးမီးပြင်းဖိုသို့ ရောက်ရှိနိုင်သောသူကို တစ်ရာမှာ တစ်ယောက်သာ ရှားရှားပါးပါး တွေ့ရှိရရာ ထိုနယ်ပယ်၏ စွမ်းအားအထွတ်အထိပ်ကို ညွှန်ပြနေသည်။

ခန္ဓာကိုယ်သည် မီးပြင်းဖိုကဲ့သို့ သွေးသည် မီးတောက်အလားပင်။ အပြည့်အဝ စွမ်းအားကို ထုတ်လွှတ်ခြင်းသည် မီးဖိုကြီး ပေါက်ကွဲလာသလို ဆူပွက်နေသော မီးလျှံများနှင့် အံ့မခန်း စွမ်းအားများ ပါရှိသည်။

သူ့ခန္ဓာကိုယ်၏ ခွန်အား သို့မဟုတ် အမြန်နှုန်းနှင့် စွမ်းအား ဖြစ်စေ၊ အရာအားလုံးသည် အဆင့်ကိုး အသွင်ပြောင်းမှုများနှင့် နှိုင်းယှဉ်ပါက အဆင့်တစ်ခု မြှင့်တင်ထားပြီးဖြစ်သည်။

“ငါ့ရဲ့ သက်တမ်းနဲ့ စွမ်းရည်ကို ကြည့်ရအောင်။” စူးချန်ခုန်း အစိုးရိမ်ဆုံးအရာမှာ သူ၏ သက်တမ်းနှင့် စွမ်းရည် မည်မျှ မြင့်တက်လာသည်ဆိုသည့်အချက်ဖြစ်သည်။

ချီသွေးအသွင်ပြောင်းမှု ဆယ့်နှစ်ခုတွင် အသွင်ပြောင်းမှု သုံးခုစီသည် နယ်ပယ်တစ်ခု ဖွဲ့စည်းပြီး ခန္ဓာကိုယ်၏ အရည်အသွေးပြောင်းလဲမှုနှင့် အသွင်ပြောင်းမှုကို ဖြစ်ပေါ်စေခြင်းဖြင့် သက်တမ်းသည်လည်း အတိုင်းအတာတစ်ခုအထိ တိုးလာမည်ဖြစ်သောကြောင့် သိုင်းပညာရှင်များသည် သာမန်လူများထက် သိသိသာသာ အသက်ပိုရှည်လေ့ရှိသည်။

သက်တမ်း- ၂၁၅ နှစ်

စွမ်းရည်တန်ဖိုး- ၄၀ မှတ်

သက်တမ်းသည် ၁၅ နှစ်ပြည့် တိုးလာပြီး နှစ်၂၀၀ ၏ မှတ်တိုင်ကို ချိုးဖျက်ကာ စွမ်းရည်တန်ဖိုးသည် ၄၀ မှတ်အထိ မြင့်မားလာခဲ့သည်။

လက်ရှိ စူးချန်ခုန်းသည် လွန်ခဲ့သော ခြောက်လကထက် ၇ မှတ်သာ တိုးလာသည်ဟု ထင်ရသော်လည်း အမှန်တကယ်တွင် အရည်အသွေးပြောင်းလဲမှုတစ်ခု ဖြစ်ပေါ်ခဲ့သည်။

စူးချန်ခုန်း ရောက်ရှိခဲ့သော အဆင့်တွင် စွမ်းရည်တိုးတက်မှုတိုင်းသည် အလွန်ခက်ခဲပြီး အားကစားသမားနှင့် ကမ္ဘာ့ချန်ပီယံကြားက ကွာခြားချက်ကဲ့သို့ ကြီးမားသော ကွာဟချက်ကို ကိုယ်စားပြုသည်။ အချက်အလက်များအရ ကွာခြားချက်မှာ သေးငယ်ပုံရသော်လည်း အမှန်တကယ်ကွာဟချက်မှာ ကျွမ်းကျင်သူအဆင့်နှင့် ကမ္ဘာ့အဆင့်ကြားတွင် ဖြစ်သည်။

“ကမ္ဘာကြီးက… အခု ငါ့မျက်လုံးထဲမှာ ပိုရှင်းလင်းလာသလိုပဲ။ လေတွေ တိုက်လာတော့မယ်။”

လေ့ကျင့်ရေးခန်းထဲက ထွက်လာတဲ့အခါ စူချန်းခုန်းဟာ လေကို မှုတ်ထုတ်လိုက်ပြီး ကောင်းကင်ကို မော့ကြည့်ရင်း အသက်ကို ပြင်းပြင်းရှူလိုက်ပြီး တစ်ခုခုကို ခံစားမိကာ သူ့ဘာသာသူ တီးတိုးရေရွတ်လိုက်သည်။

ဝှူး

စူးချန်ခုန်း ခန့်မှန်းထားတဲ့အတိုင်း လေတစ်ချက် ဝှေ့လိုက်တဲ့အခါ စံအိမ်ထဲက ပန်းပင်တွေနဲ့ အပင်တွေ ယိမ်းနွဲ့သွားခဲ့သည်။

ဒီအာရုံခံနိုင်မှုက အံ့ဩဖွယ်ပင်။ သာမန်ကိစ္စတွေမှာတောင် စူးချန်ခုန်းဟာ ဉာဏ်အလင်းရသလို ထိုးထွင်းသိမြင်မှုတွေ ရနိုင်ပါသည်။

ဒါက စွမ်းရည်တန်ဖိုးတွေ တိုးလာလို့ ဖြစ်ပေါ်လာတဲ့ ပြောင်းလဲမှုဖြစ်သည်။ အစက စူးချန်ခုန်းဟာ သိုင်းပညာ ပါရမီရှင်တွေထဲမှာ ပါရမီရှင်တစ်ယောက်ဆိုရင် လက်ရှိသူကတော့ နတ်ဘုရားတစ်ပါးပါပဲ။ သူ့ရဲ့ သဘာဝပါရမီနဲ့ ထိုးထွင်းသိမြင်မှု နှစ်ခုစလုံးဟာ သိသိသာသာ ပြောင်းလဲသွားခဲ့သည်။

“ဒေါက် ဒေါက် ဒေါက်”

တံခါးခေါက်သံ ထွက်ပေါ်လာလေ၏။

“ဟုန်ကျန်းရှန့်ပဲ။”

ဝေးနေပေမယ့် စူးချန်ခုန်းဟာ အားပြင်းပြင်းနဲ့ လေးလံတဲ့ တံခါးခေါက်သံတွေကနေ ဟုန်ကျန်းရှန့် ဖြစ်မှန်း သိလိုက်သည်။