နေထိုင်ချိန်အကန့်အသတ်မရှိ....

Vol. 54 Ch. 790

ရင်းမြစ်ကမ္ဘာ၏ အချိန်စီးဆင်းမှုက ဖရိုဖရဲဟင်းလင်းပြင်ထက် မနိမ့်ကျသည့်အပြင် ၎င်း၏ နိယာမလည်ပတ်မှု လမ်းကြောင်းများကလည်း ဖရိုဖရဲဟင်းလင်းပြင်နှင့် မတူညီပေ။ မတူညီသော လမ်းကြောင်းများရှိ နိယာမများက ကောင်းကင်ကိုဆန့်ကျင်သော လင်းယွမ်အတွက် ကြီးမားသော သက်ရောက်မှုရှိစေသည်။

" ဒါက အံ့ဩစရာပဲ။ ဒါက ရွှေနိယာမလား။ ထက်ရှမှုကို ကိုယ်စားပြုတာမဟုတ်ဘူးလား။ ရေနိယာမကလည်း ဒီလောက်ပြင်းထန်တဲ့ ဖျက်ဆီးခြင်းစွမ်းအားကို ပိုင်ဆိုင်တာလား။ "

လင်းယွမ်က အံ့ဩမှုများနှင့် ပြည့်နှက်နေသည်။ ရင်းမြစ်ကမ္ဘာတွင် နိယာမလည်ပတ်မှုလမ်းကြောင်းများက လုံးဝကွဲပြားသော လမ်းစဉ်ကို ကိုယ်စားပြုသည်။

၎င်းက တူညီသော သင်္ချာပုစ္ဆာတစ်ခုကို မတူညီသော ဖြေရှင်းနည်းများကို မြင်တွေ့ရသကဲ့သို့ဖြစ်ပြီး ၎င်း၏ အနှစ်သာရကို နားလည်ရာတွင် စိတ်ကူးမယဉ်နိုင်သော သက်ရောက်မှုရှိသည်။

နာမည် - ယုရန် (လင်းယွမ်)။

အဆင့်အတန်း - အနန္တကမ္ဘာများ၏ ဂိတ်တံခါး အရှင်သခင်။

စွမ်းရည် - ကောင်းကင်ကိုဆန့်ကျင်သော နားလည်နိုင်စွမ်း။

နတ်စွမ်းရည် - သွေးပြန်လည်မွေးဖွားခြင်း၊ တောင်ရွှေ့လျားခြင်း၊ အားဖြည့်ခြင်း၊ ဒြပ်စင်ခန္ဓာ၊ ကမ္ဘာ၊ ကောင်းကင်ဆုတ်ဖြဲခြင်း။

လက်ရှိအခြေအနေ - စိတ်အသိဆင်းသက်ခြင်း။

နေထိုင်ချိန် - မရှိ။

" နေထိုင်ချိန်အကန့်အသတ်မရှိဘူးလား။ ဒါဆို ငါက သေတဲ့အထိ ဒါမှမဟုတ် ပြန်သွားချင်တဲ့အချိန်ထိ နေလို့ရတယ်ပေါ့။ " လင်းယွမ်က တွေးလိုက်သည်။

" ပြီးတော့ ဒီဆင်းသက်မှုက ငါ့ရဲ့ စိတ်အသိ တစ်ဝက်နီးပါးကို ခွဲထုတ်ထားတော့ ဒီခန္ဓာကိုယ်ကို ကိုယ်ပွားတစ်ခုလို့ ပြောလို့မရတော့ဘူး။ " လင်းယွမ်က စိတ်ထဲမှ ခန့်မှန်းလိုက်သည်။

ကြီးမားသော စိတ်အသိကို ပိုင်ဆိုင်ထားသောကြောင့် ပင်မစကြာဝဠာမှ မူလခန္ဓာကိုယ် သေဆုံးသွားလျှင်တောင် သူက သေဆုံးမည်မဟုတ်ဘဲ မူလခန္ဓာကိုယ်ကဲ့သို့ ဖြစ်သွားပေလိမ့်မည်။

" ငါ့ရဲ့ ရှင်သန်နိုင်စွမ်းက အများကြီး တိုးတက်သွားပြီ။ " လင်းယွမ်က ခေါင်းညိမ့်လိုက်သည်။ " ငါ အခုလုပ်ရမှာက ရင်းမြစ်ကမ္ဘာရဲ့ နိယာမတွေနဲ့ သိုင်းတာအိုလမ်းစဉ်ကို ဆက်ပြီး ပြည့်စုံအောင်လုပ်ဖို့ပဲ။ " လင်းယွမ်က တွေးလိုက်သည်။

မတူညီသော ဒိုင်မန်းရှင်းကမ္ဘာများတွင် နိယာမများ၏ မတူညီသော ရှုထောင့်များကြောင့် သိုင်းတာအိုကလည်း အတိုင်းအတာတစ်ခုအထိ လိုက်လျောညီထွေ ဖြစ်အောင် လုပ်ရန် လိုအပ်သည်။

သိုင်းတာအိုက မည်သည့်ဒိုင်မန်းရှင်းကမ္ဘာတွင်မဆို စွမ်းအားအပြည့်အဝကို ထုတ်ဖော်နိုင်သည့်အဆင့်သို့ ရောက်ရှိသောအခါ လင်းယွမ်က ပြည့်စုံသော အချိန်သက်ရှိအဆင့်သို့ ဝင်ရောက်ပေလိမ့်မည်။

ပြည့်စုံသော အချိန်သက်ရှိများ၏ လမ်းစဉ်က မရေတွက်နိုင်သော ကမ္ဘာများနှင့် အဆုံးမဲ့ဒိုင်မန်းရှင်းများအားလုံးကို လွှမ်းခြုံနိုင်ပြီး လိုက်လျောညီထွေဖြစ်အောင် လုပ်ဆောင်ရန် မလိုအပ်တော့ဘဲ ပြည့်စုံအောင်လုပ်ရန်လည်း မလိုတော့ပေ။

" ဒီရုပ်ခန္ဓာက ဘယ်လိုနတ်စွမ်းရည်ကို နိုးထလာမလဲဆိုတာ သိချင်မိတယ်။ " လင်းယွမ်က မျှော်လင့်ချက်များနှင့် ရေရွတ်လိုက်သည်။

သွေးမျိုးဆက်၏ စွမ်းအားကို စုစည်းပြီး ရုပ်ခန္ဓာနတ်စွမ်းရည်ကို နိုးထခြင်းက သိုင်းတာအိုကျင့်ကြံခြင်းစနစ်၏ ထူးခြားသော အားသာချက်ဖြစ်သည်။ ရင်းမြစ်ကမ္ဘာတွင် နေထိုင်ချိန်ကန့်သတ်ထားခြင်းမရှိသောကြောင့် လင်းယွမ်က ရုပ်ခန္ဓာနတ်စွမ်းရည်ကို နားလည်ရန် အချိန်များစွာ ရသည်။

တုန်ယန်မိသားစု။

လှပသော မိန်းကလေးတစ်ယောက်က မတ်တပ်ရပ်နေပြီး သူမက တုန်ယန်မန်ပင်ဖြစ်သည်။

" ယုမိသားစုကကောင်လေးက တကယ်ကံကောင်းတာပဲ။ သူက ငါတို့ အမှောင်ဆင်းသက်ခြင်းစွမ်းအားကိုတောင် ခံနိုင်ရည်ရှိခဲ့တယ်။ " တုန်ယန်မိသားစုခေါင်းဆောင်က ပလ္လင်ပေါ်တွင် ထိုင်ပြီး မျက်မှောင်ကြုတ်နေသည်။

တုန်ယန်မန်က ယုရန်ကို သွေးဆောင်ပြီး ယုမိသားစု၏ အစွမ်းထက်သူများ သတိမထားမိစေရန် တုန်ယန်မိသားစုမှ အစွမ်းထက်သူများကို အသုံးမပြုခဲ့ပေ။ ထိုအစား တုန်ယန်မိသားစု၏ ဘိုးဘေးတစ်ယောက်ဖန်တီးခဲ့သော အမှောင်ဆင်းသက်ခြင်းစွမ်းအားဖြင့် ယုရန်ကို တိုက်ခိုက်ခဲ့သည်။

အမှောင်ဆင်းသက်ခြင်းစွမ်းအားက အဆုံးစွန်သော ဖျက်ဆီးခြင်းစွမ်းအားကို ပိုင်ဆိုင်ပြီး ယုရန်က ကာကွယ်မှုအမျိုးမျိုး ပြုလုပ်လျှင်တောင် ကြာကြာခုခံရန် မဖြစ်နိုင်ပေ။ သို့သော် ယုရန်က ယုမိသားစုထိရောက်အောင် အမှန်တကယ် တောင့်ခံနိုင်ခဲ့သည်။

" ဒါပေမယ့် သူအသက်ရှင်နေရင်တောင် ပြန်ကောင်းလာဖို့ နှစ်ပေါင်းများစွာ လိုအပ်တယ်။ လာမယ့် အရှင်ချင်းဖန်ရဲ့ တပည့်နေရာက ငါတို့ တုန်ယန်မိသားစုပဲ ပိုင်ဆိုင်လိမ့်မယ်။ " တုန်ယန်ခေါင်းဆောင်က ပြုံးလိုက်သည်။

တုန်ယန်မန်က အရှင်ချင်းဖန်၏ တပည့်ဖြစ်လာလျှင် တုန်ယန်မိသားစုက ကြီးမားစွာ တိုးတက်သွားပြီး ပထမတန်းစား မိသားစုတစ်ခုဖြစ်သွားပေလိမ့်မည်။ ထိုအချိန်တွင် ယုမိသားစုကလည်း တုန်ယန်မိသားစုကို ယှဉ်နိုင်စွမ်းရှိတော့မည်မဟုတ်ပေ။

" မန်အာ အဲ့ဒီယုမိသားစုက ကောင်လေးအတွက် နောင်တရနေစရာမလိုဘူး။ မင်းနဲ့သူနဲ့က အဆင့်မတူတော့ဘူး။ " တုန်ယန်ခေါင်းဆောင်က တုန်ယန်မန်ကို နှစ်သိမ့်ပြောဆိုလိုက်သည်။

" ကျွန်မ အရှင်ချင်းဖန်ရဲ့တပည့်ဖြစ်လာသရွေ့ ဘယ်လိုစွန့်လွှတ်မှုမျိုးကိုမဆို လက်ခံနိုင်ပါတယ်။ " တုန်ယန်မန်က တိုးညှင်းစွာ ပြောလိုက်သည်။

ရွှမ်ဟွမ်လျို့ဝှက်နယ်မြေတွင် လင်းယွမ်က လက်ခြောက်ဖက်နှင့် ပုံရိပ်ကို ခေါ်လိုက်သည်။

" သခင် " လက်ခြောက်ဖက်နှင့် ပုံရိပ်က လေးစားစွာ ပြောလိုက်သည်။

လင်းယွမ်က အလွှာဆယ့်နှစ်သို့ တက်လှမ်းချိန်တွင် ကြောက်စရာကောင်းသော စွမ်းအားကို ထုတ်ပြခဲ့ပြီး လက်ခြောက်ဖက်နှင့်ပုံရိပ်က သူ့ကို နောက်ထပ် ဧကရာဇ်ရွှမ်ဟွမ်အဖြစ် မှတ်ယူလာခဲ့သည်။

" ဒီစကြာဝဠာပျက်ဆီးရင် ရွှမ်ဟွမ်လျို့ဝှက်နယ်မြေက အသက်ဘယ်လောက်ကို ထိန်းထားနိုင်လဲ။ " လင်းယွမ်က မေးလိုက်သည်။

စကြာဝဠာပျက်ဆီးခြင်းကို ရင်ဆိုင်ရာတွင် ပြင်ဆင်မှုများစွာ လိုအပ်သည်။ လူသားမျိုးနွယ်၏ အလွှာဆယ့်နှစ် ကြီးမြတ်သူများက လူဦးရေအချို့ကို သယ်ဆောင်နိုင်ပြီး ရွှမ်ဟွမ်လျို့ဝှက်နယ်မြေကလည်း လူဦးရေတစ်စိတ်တစ်ပိုင်းကို ထိန်းထားနိုင်ပေလိမ့်မည်။

" အသက်ဘယ်လောက်လဲ..." လက်ခြောက်ဖက်နှင့် ပုံရိပ်က အနည်းငယ် တုန့်ဆိုင်းသွားသည်။ " တကယ်လို့ အလွှာဆယ့်နှစ်အောက် သက်ရှိတွေဆိုရင် အများဆုံး တစ်ရာဘီလီယံအထိ ထိန်းထားနိုင်ပါတယ်။ "

စကြာဝဠာပျက်ဆီးခြင်းနောက်ပိုင်းတွင် အရာအားလုံးက ဖရိုဖရဲ မူလအခြေအနေသို့ ပြန်သွားမည်ဖြစ်ပြီး ရွှမ်ဟွမ်လျို့ဝှက်နယ်မြေကလည်း လျင်မြန်စွာ ကျုံ့ဝင်ကာ အသက်တစ်ရာဘီလီယံက စွမ်းရည်ကန့်သတ်ချက်ဖြစ်သည်။

" အလွှာဆယ့်နှစ်ကရော..." လင်းယွမ်က ဆက်မေးလိုက်သည်။

" အလွှာဆယ့်နှစ်ကတော့ အများဆုံး ဆယ်ယောက်ပါပဲ။ " လက်ခြောက်ဖက်နှင့် ပုံရိပ်က ပြောလိုက်သည်။

အလွှာဆယ့်နှစ်များက စကြာဝဠာ၏ အဓိကစောင့်ကြည့်မှုအောက်တွင် ရှိပြီး အလွှာဆယ့်နှစ် သက်ရှိ ဆယ်ယောက်ထက်ပိုလျှင် ရွှမ်ဟွမ်လျို့ဝှက်နယ်မြေပင် စကြာဝဠာစိတ်အသိ၏ ပစ်မှတ်ထားခြင်းကို ခံရပေလိမ့်မည်။

" နားလည်ပြီ။ " လင်းယွမ်က ခေါင်းညိမ့်လိုက်သည်။

ရွှမ်ဟွမ်လျို့ဝှက်နယ်မြေကလည်း လူသားမျိုးနွယ်များ ဆုတ်ခွာရာတွင် အသုံးဝင်သည်။ အဆိုးဆုံးအခြေအနေတွင် လူသားမျိုးနွယ်က နောက်ထပ် စကြာဝဠာခေတ်တစ်ခုကို ရှင်သန်နိုင်ပြီး ဒုတိယကပ်ဘေးမျိုးနွယ်ဖြစ်လာရုံသာ ဖြစ်သည်။

လင်းယွမ်က လျို့ဝှက်နယ်မြေကို ထိန်းချုပ်ရန်နှင့် သူ၏ အသက်ကယ်နည်းလမ်းတစ်ခုအတွက် ရွှမ်ဟွမ်လျို့ဝှက်နယ်မြေတွင် ကိုယ်ပွားတစ်ခု ထားခဲ့မည်ဖြစ်သည်။ ရွှမ်ဟွမ်လျို့ဝှက်နယ်မြေက စကြာဝဠာ၏ အတွင်းရှိပြီး ကြောင်းကျိုးဆက်နွယ်မှုများကို ခွဲခြားနိုင်သောကြောင့် ၎င်း၏ ဘေးကင်းလုံခြုံမှုအဆင့်က ရင်းမြစ်ကမ္ဘာထက်အနည်းငယ် နိမ့်ကျရုံသာ ဖြစ်သည်။

" အော် နောက်ထပ် ကိစ္စတစ်ခု ရှိသေးတယ်။ " လင်းယွမ်က ရုတ်တရက် ပြောလိုက်သည်။

" ပြောပါ သခင်။ " လက်ခြောက်ဖက်နှင့် ပုံရိပ်က ချက်ချင်း တုန့်ပြန်လိုက်သည်။

" ဒီရွှေရောင်သေတ္တာကို မင်းသိလား။ " ရွှမ်ဟွမ်မျိုးနွယ်၏ အမှတ်အသားရှိသော ရွှေရောင်သေတ္တာ၏ ပုံရိပ်က လင်းယွမ်၏ ရှေ့တွင် ပေါ်လာသည်။

" ဒါက..." လက်ခြောက်ဖက်နှင့် ပုံရိပ်က ရွှေရောင်သေတ္တာကို ဂရုတစိုက် စစ်ဆေးနေပြီး သူ၏ အမူအရာက ပြောင်းလဲသွားသည်။ " အဲ့ဒါက ကျွန်တော်တို့ ရွှမ်ဟွမ်မျိုးနွယ်ရဲ့ ရတနာတစ်ခုပဲ။ ဒီသေတ္တာတွေကို ဧကရာဇ်ရွှမ်ဟွမ်ဖန်တီးထားပြီးတော့ တစ်ခုစီမှာ ရွှမ်ဟွမ်မျိုးနွယ်ရဲ့ အရေးပါတဲ့ အမွေအနှစ်တွေ ပါဝင်တယ်။ "

" ဧကရာဇ်ရွှမ်ဟွမ်ကိုယ်တိုင် ဖန်တီးခဲ့တာလား။ " လင်းယွမ်၏ အမူအရာက လေးနက်သွားသည်။

ထိုရွှေရောင်သေတ္တာက သူထင်ထားသည်ထက်ပင် ပိုမိုအရေးပါနေသည်။ ဧကရာဇ်ရွှမ်ဟွမ်ကိုယ်တိုင်ဖန်တီးထားသော အရာက သာမန်ရတနာတစ်ခု မဖြစ်နိုင်ပေ။

" ဘယ်လိုဖွင့်ရမှာလဲ။ " လင်းယွမ်က မေးလိုက်သည်။

" ကျွန်တော်သေချာမသိဘူး။ " လက်ခြောက်ဖက်နှင့်ပုံရိပ်က ခေါင်းခါလိုက်သည်။ " သခင် ရွှမ်ဟွမ်အမှတ်အသားရဲ့ အော်ရာနဲ့ စမ်းကြည့်ပါလား။ အဲ့ဒါ ပွင့်နိုင်လောက်တယ်။ "

လင်းယွမ်က ရွှမ်ဟွမ်လျို့ဝှက်နယ်မြေ၏ သခင်ဖြစ်ပြီး ရွှမ်ဟွမ်အမှတ်အသားကို ပိုင်ဆိုင်သောကြောင့် ဧကရာဇ်ရွှမ်ဟွမ်၏ ဆက်ခံသူအဖြစ် အတည်ပြုနိုင်သည်။

လက်ခြောက်ဖက်နှင့် ပုံရိပ်ထံမှ အဖြေကို ရရှိပြီးနောက် လင်းယွမ်က သူ၏ ကျင့်ကြံခြင်းနှင့် ဉာဏ်အလင်းပွင့်ခြင်းကို ဆက်လက်လုပ်ဆောင်ခဲ့သည်။ ရင်းမြစ်ကမ္ဘာတွင် မတူညီသော ရှုထောင့်များမှ လေ့လာနေသောကြောင့် လင်းယွမ်၏ စိတ်ထဲတွင် အသိအမြင်အသစ်များက အချိန်တိုင်းနီးပါး ထွက်ပေါ်လာခဲ့သည်။

" ဘူးသီးခြောက်..." လင်းယွမ်၏ အမူအရာက အနည်းငယ် ပြောင်းလဲသွားပြီး သူ၏ ညာလက်ကို ဆန့်ကာ လက်ဝါးအရွယ် ဘူးသီးခြောက်ကို ထုတ်လိုက်သည်။

လင်းယွမ်က အလွှာဆယ့်နှစ်သို့ တက်လှမ်းပြီးနောက် ဘူးသီးခြောက်ကလည်း အသွင်ပြောင်းလဲမှုကို စတင်ခဲ့ပြီး ယခုပြီးဆုံးလုနီးပါး ဖြစ်နေခဲ့သည်။ သူက ဘူးသီးခြောက်ကို ကိုင်လိုက်သည်နှင့် အချက်အလက်များစွာက သူ၏ စိတ်ထဲသို့ ဝင်ရောက်လာသည်။ ယခုအချိန်တွင် ဘူးသီးခြောက်၏ အရောင်က မီးခိုးရောင်မဟုတ်တော့ဘဲ သန့်စင်သော ကျောက်စိမ်းရောင်ဖြစ်နေခဲ့သည်။