အလွှာဆယ့်နှစ် ကြီးမြတ်သူများကို လွှတ်ပေးခြင်း....

Vol. 54 Ch. 792

" ငါသာ ဒီစကြာဝဠာ နိယာမဖွဲ့စည်းပုံ ၃၃၃၃ခုကို နားလည်ပြီး အတွင်းစကြာဝဠာထဲ ပေါင်းစည်းနိုင်ရင် ငါ့ရဲ့ အတွင်းစကြာဝဠာက ဘယ်အဆင့်ကို ရောက်သွားမလဲ။ " လင်းယွမ်က ရေရွတ်လိုက်သည်။

" စကြာဝဠာနိယာမဖွဲ့စည်းပုံ ၃၃၃၃ခုကို နားလည်ဖို့လား။" အနီရောင်ဝတ်စုံနှင့် မိန်းကလေးက မျက်လုံးပြူးလိုက်သည်။ " နင်က စမလေ့လာသေးဘဲ နားလည်ပြီးသွားရင် ဘာဖြစ်မလဲ စဉ်းစားနေတာလား။ "

" ဒါပေမယ့် နင်တကယ်လုပ်နိုင်ခဲ့ရင် နင့်ရဲ့ အတွင်းစကြာဝဠာက သာမန်ဖရိုဖရဲအဆင့်ရဲ့ အတွင်းစကြာဝဠာနဲ့ နီးစပ်သွားလိမ့်မယ်ထင်တယ်။ " အနီရောင်ဝတ်စုံနှင့် မိန်းကလေးက ခဏစဉ်းစားပြီးနောက် ပြောလိုက်သည်။

သူမက လင်းယွမ်ကို စကြာဝဠာခေတ်တစ်ခုအတွင်း ရုန်းအားလုံးကို နားလည်ရန် မျှော်လင့်နေသည်။ ထိုအခါ သူမက ကျောက်စိမ်းဘူးသီးခြောက်အတွင်း စကြာဝဠာခေတ်များစွာ ပိတ်မိနေစရာမလိုဘဲ လွတ်လပ်မှုကို အတိုင်းအတာတစ်ခုထိ ရရှိပေလိမ့်မည်။

" သာမန်ဖရိုဖရဲအဆင့်ရဲ့ အတွင်းစကြာဝဠာ..." လင်းယွမ်က အသက်ပြင်းပြင်းရှူလိုက်သည်။

သာမန်ဖရိုဖရဲအဆင့် အတွင်းစကြာဝဠာသာ ရှိလျှင် လင်းယွမ်က စကြာဝဠာပျက်ဆီးခြင်းကို လွယ်ကူစွာ ခံနိုင်ပြီး လူသားမျိုးနွယ်အများစုကိုလည်း သူနှင့်အတူ သယ်ဆောင်နိုင်ပေလိမ့်မည်။

" နင် အခုထပ်မစဉ်းစားတော့ဘဲ စကြာဝဠာခေတ်တစ်ခုအတွင်း ရုန်းအားလုံးကို နားလည်ဖို့ ကြိုးစားသင့်တယ်။ " အနီရောင်ဝတ်စုံနှင့် မိန်းကလေးက လင်းယွမ်ကို သတိပေးလိုက်သည်။

" ပြဿနာမရှိဘူး။ " လင်းယွမ်က ခေါင်းညိမ့်လိုက်သည်။

ပင်မစကြာဝဠာတွင် လင်းယွမ်က ထိုင်နေပြီး သူ၏ ရှေ့တွင် သေးငယ်သော နန်းတော်တစ်ခု ပေါ်လာသည်။ ၎င်းက ယုမျိုးနွယ်၏ ကြီးမြတ်သူ အသက်သွင်းထားသော လမ်းစဉ်ခွဲထွက်ခြင်းအဆင့် အထွတ်အထိပ် ရတနာဖြစ်သည်။ အထဲတွင် ပင်မစကြာဝဠာမှ အလွှာဆယ့်နှစ် ကြီးမြတ်သူများကို ဖိနှိပ်ထားသည်။

" စကြာဝဠာပျက်ဆီးခြင်းက နီးကပ်လာပြီ။ ဒီအလွှာဆယ့်နှစ်တွေနဲ့ ကစားနေဖို့ မလိုတော့ဘူး။ "

မူလအစီအစဉ်အရ သူက ဖရိုဖရဲအဆင့်ကို ဝင်ရောက်ပြီး ဖရိုဖရဲမဟာသူတော်စင်ဖြစ်လာသည်အထိ နန်းတော်အတွင်းရှိ အလွှာဆယ့်နှစ် ကြီးမြတ်သူများကို ဆက်လက်ဖိနှိပ်ထားရန် ရည်ရွယ်ခဲ့သည်။

ထို့နောက် သူတို့အားလုံးကို တစ်ခါတည်း ရှင်းလင်းရန်ဖြစ်သည်။ သူ၏ ကျင့်ကြံမှုအရှိန်အရ စကြာဝဠာခေတ်မကုန်မီ ဖရိုဖရဲအဆင့်သို့ ရောက်ရန် မျှော်လင့်ထားသော်လည်း ဖရိုဖရဲမဟာသူတော်စင်ဖြစ်လာရန် အာမမခံရဲပေ။

သို့သော် ဖရိုဖရဲမဟာသူတော်စင်နှစ်ပါး၏ တိုက်ပွဲကြောင့် စကြာဝဠာပျက်ဆီးခြင်းက အချိန်မတိုင်မီ ရောက်ရှိလာပေလိမ့်မည်။ ထိုအခြေအနေတွင် လင်းယွမ်က နန်းတော်အတွင်းရှိ အလွှာဆယ့်နှစ်များအတွက် ရွေးချယ်စရာနှစ်ခုရှိသည်။

တစ်ခုမှာ စကြာဝဠာပျက်ဆီးခြင်းထိ စောင့်ပြီး နန်းတော်နှင့်အတူ ထိုအလွှာဆယ့်နှစ်ကြီးမြတ်သူများကို စကြာဝဠာ၏ အနက်ရှိုင်းဆုံးသို့ ပစ်ချပြီး ဖျက်ဆီးပစ်ရန် ဖြစ်သည်။ သို့သော် ၎င်းက လမ်းစဉ်ခွဲထွက်ခြင်းအဆင့် အထွတ်အထိပ်နန်းတော်နှင့် အလွှာဆယ့်နှစ် ကြီးမြတ်သူများ၏ ပိုင်ဆိုင်မှုများကို ဆုံးရှုံရပေလိမ့်မည်။

ဒုတိယရွေးချယ်မှုလည်း ရှိသည်။ ၎င်းက အလွှာဆယ့်နှစ် ကြီးမြတ်သူများ၏ လက်နက်များနှင့် ရတနာများအားလုံးကို ရယူပြီး သူတို့ကို လွှတ်ပေးရန် ဖြစ်သည်။ ထိုရွေးချယ်မှုက အကျိုးအမြတ်များ ရရှိပေလိမ့်မည်။ ထို့အပြင် သူတို့ကို လွှတ်ပေးလျှင်တောင် လင်းယွမ်၏ လက်ရှိခွန်အားနှင့် ခြိမ်းခြောက်မှုမရှိပေ။

လင်းယွမ်၏ အတွေးတစ်ခုဖြင့် နန်းတော်ပေါ်မှ ချိပ်ပိတ်ထားမှုက ပြေလျော့သွားသည်။

" ကြီးမြတ်သူနဂါးငွေ့တန်း ငါတို့ လက်နက်တွေနဲ့ ရတနာတွေရဲ့ ကိုးဆယ်ရာခိုင်းနှုန်းကို ပေးပါမယ်။ ငါတို့ကို လွှတ်ပေးဖို့ပဲ တောင်းဆိုပါတယ်။ "

" ဟုတ်ပါတယ် ကြီးမြတ်သူနဂါးငွေ့တန်း။ ငါတို့ကို လွှတ်ပေးသရွေ့ ဘယ်တောင်းဆိုမှုမျိုးကိုမဆို လက်ခံပါတယ်။ "

နန်းတော်ထဲမှ အလွှာဆယ့်နှစ် ကြီးမြတ်သူများက တောင်းပန်လိုက်ကြသည်။ လင်းယွမ်က စကြာဝဠာပျက်ဆီးချိန်တွင် သူတို့အား စကြာဝဠာနှင့်အတူ ပျက်ဆီးသွားစေမည်ကို စိုးရိမ်ခဲ့ကြသည်။ ထိုအခြေအနေတွင် အလွှာဆယ့်နှစ် ကြီးမြတ်သူတိုင်းက သေဆုံးရပေလိမ့်မည်။

" ထွက်ချင်လား။ ငါမင်းတို့ကို လွှတ်ပေးလို့ရတယ်။ " လင်းယွမ်က ပြောလိုက်သည်။

စကြာဝဠာ၏ ဖိနှိပ်မှုသာမရှိလျှင် လင်းယွမ်၏ စွမ်းအားကို လမ်းစဉ်ခွဲထွက်ခြင်းအဆင့် အထွတ်အထိပ် ရတနာက ခံနိုင်ရည်ရှိမည်မဟုတ်ပေ။

" ငါတို့ကို လွှတ်ပေးမှာလား။ " ထိုစကားများကြားသောအခါ အလွှာဆယ့်နှစ် ကြီးမြတ်သူများအားလုံး အနည်းငယ် ထိတ်လန့်သွားကြသည်။

" ဒါပေမယ့် မင်းတို့ အလွှာဆယ့်နှစ် လက်နက်နဲ့ ရတနာတွေအားလုံးကို လွှဲပြောင်းပေးရမယ်။ " လင်းယွမ်က ပြောလိုက်သည်။

" လက်ခံတယ်။ "

" ငါလည်း လက်ခံတယ်။ "

နန်းတော်အတွင်းရှိ အလွှာဆယ့်နှစ် ကြီးမြတ်သူများက တုန့်ဆိုင်းခြင်းမရှိ သဘောတူလိုက်ကြသည်။ အလွှာဆယ့်နှစ် လက်နက်နှင့် ရတနာများကို ပေးလိုက်ခြင်းက အလွှာဆယ့်နှစ် ကြီးမြတ်သူများအတွက် စကြာဝဠာပျက်ဆီးခြင်းတွင် အသက်ရှင်နိုင်ခြေကို သိသိသာသာ လျော့နည်းသွားပေလိမ့်မည်။

သို့သော် ၎င်းတို့ကို မလွှဲပြောင်းပေးလျှင် စကြာဝဠာပျက်ဆီးခြင်းကို ခုခံရန် အခွင့်အရေးပင် ရမည်မဟုတ်ပေ။ အလွှာဆယ့်နှစ် ကြီးမြတ်သူများ၏ စိတ်ထဲတွင် မည်သို့ရွေးချယ်ရမည်ကို သိကြသည်။ သူတို့က နန်းတော်ထဲတွင် ဖိနှိပ်ခံရချိန်တွင် အလွန်မကျေမနပ်ဖြစ်ခဲ့ကြသည်။

အကယ်၍ သူတို့က နဂါးငွေ့တန်းကြယ်သခင်၏ တောင်းဆိုချက်ကို ယခင်ကတည်းက သဘောတူခဲ့လျှင် အလွှာဆယ့်နှစ် လက်နက်များနှင့် ရတနာများ၏ ကိုးဆယ်ရာခိုင်နှုန်းသာ လွှဲပြောင်းပေးခဲ့လျှင် အရာအားလုံး အဆင်ပြေပေလိမ့်မည်။ ယခု လင်းယွမ်၏ စည်းမျဉ်းအသစ်များနှင့် ရင်ဆိုင်ရသောအခါ သူတို့အားလုံးက တုန့်ဆိုင်းခြင်းမရှိကြတော့ပေ။

" အရင်ဆုံးလွှဲပြောင်းပေးလိုက်ပါ။ " လင်းယွမ်က ပြောလိုက်သည်။

စကြာဝဠာပျက်ဆီးခြင်း ရောက်ရှိလာလျှင် လင်းယွမ်က နန်းတော်နှင့်အတူ ထွက်သွားခဲ့ပါက စကြာဝဠာစိတ်အသိ၏ ပြင်းထန်သော တိုက်ခိုက်မှုကို ခံရပေလိမ့်မည်။ ၎င်းက အလွှာဆယ့်နှစ် ကြီးမြတ်သူများကို ကယ်တင်ခြင်းနှင့်လည်း တူပေလိမ့်မည်။

" အရင်ဆုံး လွှဲပြောင်းပေးရမှာလား။ " နန်းတော်ထဲရှိ အလွှာဆယ့်နှစ် ကြီးမြတ်သူများက အနည်းငယ် တုန့်ဆိုင်းသွားကြသည်။ ရတနာများကို လွှဲပြောင်းပေးပြီးနောက် လင်းယွမ်က စကားမတည်ခဲ့လျှင် ဘယ်လိုလုပ်မလဲ။

" ငါ ကြီးမြတ်သူနဂါးငွေ့တန်းကို ယုံကြည်တယ်။ " ကြယ်စကြာဝဠာမဟာမိတ်မှ ကြီးမြတ်သူက ခဏစဉ်းစားပြီးနောက် ရတနာများကို ထုတ်ယူလိုက်သည်။

ယခု သူတို့က လင်းယွမ်နှင့် ဆွေးနွေးနိုင်စွမ်းမရှိဘဲ လွတ်မြောက်ရန် အခွင့်အရေးပေးသည်ကိုပင် ကျေးဇူးတင်ရပေလိမ့်မည်။

" မင်းထွက်သွားလို့ရပြီ။ " လင်းယွမ်က ရတနာများကို သိမ်းဆည်းပြီး ကြယ်စကြာဝဠာမဟာမိတ်မှ ကြီးမြတ်သူကို လွှတ်ပေးလိုက်သည်။

" ကျေးဇူးတင်ပါတယ်။ " ကြယ်စကြာဝဠာမဟာမိတ်မှ ကြီးမြတ်သူက ကျေးဇူးတင်စကားပြောပြီးနောက် ထွက်ခွာသွားသည်။

နန်းတော်အတွင်းရှိ အလွှာဆယ့်နှစ် ကြီးမြတ်သူများက လက်နက်များနှင့် ရတနာများကို ချက်ချင်း ပေးပြီးနောက် အပြင်သို့ ရောက်လာကြသည်။

" မှတ်ထားပါ။ စကြာဝဠာက လူသားမျိုးနွယ်ရဲ့ နယ်မြေပဲ။ " လင်းယွမ်က သတိပေးလိုက်သည်။

" စိတ်ချပါ ကြီးမြတ်သူနဂါးငွေ့တန်း။ ကျုပ်တို့ လူသားမျိုးနွယ်ရဲ့ စည်းကမ်းတွေကို လုံးဝ မချိုးဖောက်ပါဘူး။ " အလွှာဆယ့်နှစ် ကြီးမြတ်သူများက လျင်မြန်စွာ ပြောလိုက်ကြသည်။

အလွှာဆယ့်နှစ် ကြီးမြတ်သူများ ထွက်ခွာသွားသည်ကို လင်းယွမ်က တည်ငြိမ်စွာ ကြည့်နေသည်။ သူတို့က အလွှာဆယ့်နှစ် လက်နက်များနှင့် ရတနာများကို ဆုံးရှုံးလိုက်ရသောကြောင့် စကြာဝဠာပျက်ဆီးခြင်းမှ အသက်ရှင်နိုင်ခြေ နှစ်ဆယ်ရာခိုင်နှုန်းမှ သုံးဆယ်ရာခိုင်နှုန်းသာ ရှိပေလိမ့်မည်။

" လက်နက်တွေနဲ့ ရတနာတွေ " လင်းယွမ်က အလွှာဆယ့်နှစ် ကြီးမြတ်သူများ ပေးအပ်ထားသော ပစ္စည်းများကို ကြည့်ပြီး ခေါင်းညိမ့်လိုက်သည်။

လက်နက်များနှင့် ရတနာများအားလုံး၏ တန်ဖိုးက စုစုပေါင်း ဖရိုဖရဲသလင်းကျောက် တစ်သိန်းနီးပါး ရှိနေသည်။

" ဖရိုဖရဲဟင်းလင်းပြင်...." လင်းယွမ်၏ အမူအရာက လေးနက်နေသည်။

စကြာဝဠာပျက်ဆီးပြီးနောက်တွင် လူသားမျိုးနွယ်က ဖရိုဖရဲဟင်းလင်းပြင်တွင် နယ်မြေအသစ်တစ်ခုကို အမြန်ဆုံးရှာဖွေပြီး ထိုနေရာတွင် အမြန်ဆုံး ဖွံ့ဖြိုးတိုးတက်ရန်ဖြစ်သည်။

" လူသားမျိုးနွယ်ရဲ့ လက်ရှိ အခြေခံအုတ်မြစ်အရဆို ကုမင်ဖရိုဖရဲကုန်းမြေရဲ့ ဘေးက ကုန်းမြေအပိုင်းတစ်ခုကို ဝယ်ယူဖို့ ပြဿနာမရှိလောက်ဘူး။ " လင်းယွမ်က တွေးလိုက်သည်။

လူသားမျိုးနွယ်၏ နယ်မြေအသစ်က ဘေးကင်းလုံခြုံမှုကို အလေးထားပြီး ကုမင်ဖရိုဖရဲကုန်းမြေက သဘာဝအတိုင်း အလုံခြုံဆုံးဖြစ်သည်။ ကုမင်ဖရိုဖရဲကုန်းမြေက စကြာဝဠာဆယ်ခုကျော်နှင့် ညီမျှပြီး ၎င်းကို ဝန်းရံထားသော ကုန်းမြေအပိုင်းအချို့လည်း ရှိနေသည်။

VR ကမ္ဘာတွင် လင်းချောင်ချန်နှင့် လုချုံးတို့နှစ်ယောက်က စိုးရိမ်စွာဖြင့် လင်းယွမ်၏ ဘေးတွင် ရပ်နေကြသည်။

" ရှောင်ယွမ် အခုဘာတွေဖြစ်နေတာလဲ။ ကန်လန်ကြယ်က နိုင်ငံသားတွေက ဘာလို့ရွှေ့ပြောင်းနေကြတာလဲ။ " လုချုံးက မေးလိုက်သည်။

" ဟုတ်တယ်။ ဘယ်ကို ပြောင်းရွှေ့နေကြတာလဲ။ " လင်းချောင်ချန်ကလည်း မေးလိုက်သည်။

ကြီးမြတ်သူရွှမ်ယွမ်နှင့် အခြားကြီးမြတ်သူများ၏ အစီအစဉ်အရ လူသားမျိုးနွယ်၏ တစ်ရာခိုင်နှုန်းသာ ကယ်တင်နိုင်မည်ဖြစ်သည်။ ကန်လန်ကြယ်က လင်းယွမ်ကြောင့် နိုင်ငံသားအားလုံး ပြောင်းရွှေ့ခွင့်ရရှိခဲ့ကြသည်။

" အခြားစကြာဝဠာကို ပြောင်းရွှေ့နေကြတာ။ " လင်းယွမ်က ရိုးရှင်းစွာ ပြောလိုက်သည်။

နိုင်ငံသားများ အလွန်အကျွံစိုးရိမ်မှုမှ ကာကွယ်ရန်အတွက် ကြီးမြတ်သူကိုးယောက်က ပြောင်းရွှေ့ရသည့် အကြောင်းရင်းကို ထုတ်မပြောခဲ့ကြပေ။ အကြောင်းမှာ စကြာဝဠာပျက်ဆီးခြင်းက အလွန်ကြောက်စရာကောင်းသောကြောင့် ဖြစ်သည်။

" ဘာလို့ အခြားစကြာဝဠာကို ပြောင်းကြတာလဲ။ " လုချုံးက နားမလည်ပေ။

" ဒီကိစ္စကို အပြင်မှာ မပြောပါနဲ့။ " လင်းယွမ်က သူ၏ မိဘများကို ကြည့်လိုက်သည်။

သူ၏ ကာကွယ်မှုအောက်တွင် သူ၏ မိဘများက ရှင်သန်နိုင်သည်မှာ သေချာသည်။ သူ၏ မိဘများ၊ ဆွေးမျိုးများနှင့် ချီခွန်ကြယ်နယ်မြေတစ်ခုလုံးက လင်းယွမ်၏ လွှမ်းမိုးမှုကြောင့် ရှင်သန်နိုင်မည့် အခွင့်အရေးကို ရရှိခဲ့ကြသည်။