အခန်း (၂၀၇-၂၁၀)

အခန်း (၂၀၇)။

မက်မွန်နတ်ဘုရား ဒေါသမုန်တိုင်းသင်္ဘော၏ ကုန်းပတ်ပေါ်တွင် စစ်သည်များနှင့် သင်္ဘောသားများသည် တန်းစီနေကြသည်။ ပုံမှန်အားဖြင့် ခန့်ညားထည်ဝါသော ဤစစ်သည်များနှင့် သင်္ဘောသားများသည် ယခုအခါ မတ်မတ်ရပ်နေကြသော်လည်း၊ ၎င်းတို့သည် အပြင်ပန်းတွင်သာ သန်မာဟန်ဆောင်နေကြောင်း မျက်လုံးရှိသူတိုင်း မြင်နိုင်ပါသည်။ ၎င်းတို့၏ နက်ရှိုင်းသော မျက်လုံးများထဲတွင် ကြောက်ရွံ့မှုနှင့် စိုးရိမ်မှုများက ဖော်ကျူးပြသနေသည်။

စုစုပေါင်း စစ်သည်များနှင့် သင်္ဘောသားပေါင်း တစ်ထောင်နီးပါးသည် တန်းစီရပ်နေကြပြီး၊ ကုန်းပတ်အလယ်တွင် ပစ်ထားသော အဝါရောင် နဂါးအလံကို ထိတ်လန့်စွာ ကြည့်နေကြသည်။

ဤနဂါးအလံသည် အမြင့်ဆုံးအာဏာနှင့် ဂုဏ်သိက္ခာကို ကိုယ်စားပြုသော်လည်း၊ ယခုအခါ ၎င်းသည် အမှိုက်တစ်ခုကဲ့သို့ ကုန်းပတ်ပေါ်တွင် ညစ်ပတ်စွာ တွန့်လိမ်နေသည်။

“လူတိုင်းပဲ၊ မင်းတို့ကို ပုန်ကန်ဖို့ ငါ မတောင်းဆိုဘူး။ ဧကရာဇ်စေတမန်ကို လုပ်ကြံတာဟာ သေဒဏ်ပေးနိုင်တဲ့ ရာဇဝတ်မှုကြီး ဖြစ်ပေမယ့်၊ ဒီကျယ်ပြောလှတဲ့ ပင်လယ်ကြီးထဲမှာ ဘယ်သူမှ ဒီကိစ္စကို မသိဘူး။ မင်းတို့ဆီက သတင်းမပေါက်ကြားသရွေ့၊ ဘာမှ ဖြစ်လာမှာ မဟုတ်ဘူး။ ငါတို့အားလုံး ကြီးမားတဲ့ ကြွယ်ဝမူကြီးတစ်ခုကိုတောင် ရရှိနိုင်တယ်….။”

ဟုန်ယွိသည် ကုန်းပတ်ပေါ်ရှိ ထိုင်ခုံတစ်လုံးတွင် ထိုင်နေပြီး၊ သူ၏ ယုံကြည်စိတ်ချရသော လူယုံများက သူ့အနားတွင် ရပ်နေကြသည်။ သူ၏ အကြည့်များ ဖြတ်သန်းသွားသည့်နေရာတိုင်း၊ ၎င်းတို့၏ အကြည့်များသည် ခေါင်းငုံ့သွားကာ သူ့မျက်လုံးများကို ရင်ဆိုင်ရဲခြင်း မရှိပေ။

ဤအချိန်တွင် ဟုန်ယွိသည် အကြွင်းမဲ့အာဏာပိုင်ဆိုင်ထားပြီး၊ စစ်သည်များသည် ခုခံရန် မစွမ်းနိုင်ကြပေ။

လမ်းတစ်လျှောက်တွင် ဟုန်ယွိသည် ကမ္ဘာကြီးကို ထိတ်လန့်စေလောက်သည့် တာအိုမှော်ပညာများကို ပြသခဲ့ပြီး၊ ဤသင်္ဘောသားများသည် သူ့ကို တုနှိုင်းမဲ့ နတ်ဆိုးနတ်ဘုရားတစ်ပါးကဲ့သို့ ယူဆလာခဲ့သည်။ ခုခံလိုသည့်စိတ်ရှိသည့်တိုင် အင်အားစုစည်းနိုင်ခြင်း မရှိခဲ့ပေ။

အတိတ်ကာလတုန်းက ဟုန်ယွိသည် ရက်ရောသော ဆုလာဘ်များဖြင့် လူထု၏စိတ်နှလုံးကို ရယူနိုင်ခဲ့လျှင်၊ ယခုအခါ သူသည် သူ၏အကြွင်းမဲ့ အာဏာဖြင့် လက်အောက်ငယ်သားများကို ခြိမ်းခြောက်ကာ၊ ဆုလာဘ်နှင့် ပြစ်ဒစ်နှစ်မျိုးကို အသုံးပြုနေသည်။

ဟုန်ယွိ ဤသို့ပြောလိုက်သည်နှင့် စစ်သည်များနှင့် သင်္ဘောသားအားလုံး အနည်းငယ် စိတ်သက်သာရာရသွားသည်။

ယခုအခါ စစ်သည်များသည် ဟုန်ယွိက ပုန်ကန်မှုစတင်မည်ကို အများဆုံး စိုးရိမ်နေကြသည်။ တော်ဝင်ချန်တွင် သူတို့၏ ဇနီးမယားနှင့် သားသမီးများ ရှိနေကြသည်။ အကယ်၍ ဟုန်ယွိနှင့်အတူ ပုန်ကန်မှုတွင် ပါဝင်ခဲ့ပါက ၎င်းတို့၏ မိသားစုများအားလုံး ကွပ်မျက်ခံရမည် ဖြစ်သည်။ ယခုအခါ ပုန်ကန်ရန်မဟုတ်ဘဲ၊ ဖုံးကွယ်ရန်သာ လိုလားပါက၊ ၎င်းသည် သူတို့၏ မျှော်လင့်ချက်နှင့် ကိုက်ညီသည်။

ရာဇဝတ်မှု ကျူးလွန်သူအများစုသည် ဖုံးကွယ်ရန် ပထမဦးစွာ စဉ်းစားကြသည်။

ထို့ပြင်၊ ကြီးမားသော ငွေကြေးတစ်ခုကလည်း အလွန်ဆွဲဆောင်မှုရှိနေသည်။

“ဒါပေမယ့်,…၊ အခု ငါတို့အားလုံးက နဂါးအလံကို လွှင့်ထူထားတဲ့ ဧကရာဇ်စေတမန်ကို သတ်ဖြတ်ကာ ရတနာတွေကို သိမ်းယူခဲ့ပြီ။ ဒါ့အပြင်, လူများလေ ပါးစပ်များလေပဲ။ သူဌေးတစ်ဦး ဖြစ်လာရင်တောင် မလုံခြုံဘူး။ ဒီသတင်းပေါက်ကြားသွားရင်တောင်, ငါ့အနေနဲ့ တစ္ဆေအင်မော်တယ် တစ်ပါးအဖြစ် ကျင့်ကြံထားတာကြောင့် ပြန်လည်မွေးဖွားခြင်းစက်ဝန်းကနေ လွတ်မြောက်နိုင်ပြီ။ ဧကရာဇ်အာဏာဟာ ငါ့ကို ဘာမှမလုပ်နိုင်တော့ဘူး။ ဒါပေမယ့် ဒီမှာရှိတဲ့ လူတိုင်း ဒုက္ခရောက်ရလိမ့်မယ်….။”

ဟုန်ယွိ၏ မျက်လုံးများက ပတ်ဝန်းကျင်ကို လှည့်ပတ်ကြည့်လိုက်ပါသည်။

“သခင်လေး၊ ဒီကိစ္စက တောင်လိုပုံနေတဲ့ အလောင်းတွေ၊ သွေးပင်လယ်ဝေမယ့် အရေးနဲ့ သက်ဆိုင်နေတယ်။ ကျွန်တော်တို့ ပါးစပ်ပိတ်ထားမှာပါ။ ဘာကိုမှ ထုတ်ဖော်ပြောဆိုရဲမှာ မဟုတ်ပါဘူး။ ဘာကြောင့် ပြောပြမှာလဲ…။”

ဤအချိန်တွင် ဉာဏ်ရည်ထက်မြက်သည့် စစ်သည်အနည်းငယ်သည် အော်ဟစ်ပြောလိုက်ကြသည်။ ၎င်းတို့၏ စိတ်ထဲရှိ စိုးရိမ်မှုများကို ဖုံးကွယ်ရန် အတွက် ပြတ်ပြတ်သားသား ပြောဆိုနေခြင်းဖြစ်ကြောင်း ထင်ရှားသည်။

“ဒါဆို ကောင်းတယ်။ ငါတို့အားလုံး ဂုဏ်ကျက်သရေနဲ့ အရှက်ရမှုအားလုံးကို အတူတူခံစားခဲ့ပြီ။ ဒီနောက်ပိုင်း မင်းတို့အားလုံးဟာ ငါ့ရဲ့ ယုံကြည်စိတ်ချရတဲ့ လူယုံတွေပဲ။ ငါ မင်းတို့ကို ဘယ်တော့မှ ဆိုးဆိုးဝါးဝါး ဆက်ဆံမှာ မဟုတ်ဘူး။ ဒီနေ့ ငါတို့အားလုံး မိုးကောင်းကင်ကို ကျိန်ဆိုကြမယ်။ လျှို့ဝှက်ချက်တွေ ဘယ်တော့မှ ထုတ်ဖော်မပြောဆိုရဘူး။ မဟုတ်ရင် မိုးကြိုးပစ်ခံရပြီး ပြန်လည်မွေးဖွားနိုင်ခြင်း မရှိပါစေလို့။”

ဟုန်ယွိ၏ မျက်လုံးများက တောက်ပလာသည်။ သူသည် ကုန်းပတ်အလယ်ရှိ နဂါးအလံကို ညွှန်ပြပြီး ပြောသည်။ “လူတိုင်း၊ ကောင်းကင်ဘုံကို ကျိန်ဆိုဖို့ သက်သေတစ်ခု လိုအပ်တယ်။ ဒီနဂါးအလံက အားလုံးရဲ့ သက်သေပဲ။ အနီရောင်မှင်နီတွေ ယူလာပေးပါ။ ကျိန်ဆိုတဲ့သူတိုင်း နဂါးအလံပေါ်မှာ လက်ဗွေရာထားရမယ်။ လူတိုင်း နဂါးအလံပေါ်မှာ ဖိနှိပ်ရမယ်။ အဲဒီနောက်မှာ ငါတို့အားလုံး ညီအစ်ကိုတွေလို ဖြစ်သွားပြီ။ တစ်ယောက်နဲ့ တစ်ယောက် ရန်ငြိုးမထားရတော့ဘူး။ ဘယ်သူမှ ဘယ်သူ့ကိုမှ မပြောပြရတော့ဘူး။ ငါ နားဝင်ဆုံးတဲ့စကားတစ်ခွန်း အရင်ပြောထားမယ်။ ဒီစကားဟာ အလွန်အရေးကြီးတယ်၊ ပေါက်ကြားလို့မရဘူး။ တကယ်လို့, လက်ဗွေရာမထားတဲ့လူရှိ ရင်၊ အဲဒီလူက လူတိုင်းရဲ့ ရန်သူပဲ။ ငါ အဲဒီလူကို အောက်က ငါးမန်းတွေဆီ ပစ်ချရမှာပဲ…။”

ဤသို့ပြောပြီးနောက်၊ အနီရောင်မှင်သေတ္တာကြီးတစ်လုံး ယူလာသည်။

ဤခြေအနေအောက်တွင် စစ်သည်များနှင့် သင်္ဘောသားတစ်ထောင်သည် ဘာမှမလုပ်နိုင်ကြပေ။ ၎င်းတို့အားလုံး လက်များတုန်ရီလျက် ရှေ့သို့ ထွက်လာကာ နဂါးအလံပေါ်တွင် စေးကပ်သော လက်ဗွေရာများ ထားခဲ့ကြသည်။

ထူးဆန်းသည်မှာ၊ လက်ဗွေရာများ ထားနေစဉ် လူတိုင်းသည် ခေါင်းဖြတ်ခံရတော့မည့်အတိုင်း ကျုံ့ဝင်နေကြသည်။ သို့သော် လက်ဗွေရာ ထားပြီးနောက်၊ လူတိုင်းသည် သတိမထားမိဘဲ ရဲရင့်လာကြသည်။ ၎င်းတို့၏ အငွေ့အသက်များသည် ပြင်းထန်လာပြီး၊ မျက်လုံးများထဲတွင် သတ်ဖြတ်လိုစိတ်များဖြင့် ပြည့်နှက်လာသည်။ သူတို့သည် သူတို့၏ ဓားများနှင့် သံချပ်ကာများကို ဖိထားရင်း ကောင်းကင်ကို ထိုးဖောက်ချင်သည့်အလား ဖြစ်နေကြသည်။

“အံ့ဩစရာပဲ။ ညီအစ်ကိုဟုန်ရဲ့ နည်းလမ်းဟာ တကယ်ကို အံ့ဩစရာပဲ။ ငါ့နည်းလမ်းထက် အများကြီး သာတယ်။ ငါကတော့ ဒီစစ်သည်တွေကို နဂါးအလံပေါ်မှာ တံတွေးထွေးပြီး ဆီးသွားခိုင်းမလို့ပဲ။ ဒါကလည်း လူတွေရဲ့ စိတ်နှလုံးကို ထိန်းချုပ်တဲ့ နည်းလမ်းတစ်ခုပဲလေ၊ ဒါပေမယ့် ရိုင်းစိုင်းလွန်းတယ်။ ညီအစ်ကိုဟုန်ရဲ့ လက်ဗွေရာထားတဲ့ နည်းလမ်းလောက် မကောင်းဘူး။ လက်ဗွေရာထားပြီးတာနဲ့ လူတိုင်းဟာ သတိမထားမိဘဲ တစ်စိတ်တစ်ဝမ်းတည်း ဖြစ်သွားမယ်။ သူတို့ဟာ မျိုးဆက်ပေါင်းများစွာ သားယောက်ျားလေး မွေးဖွားပေးခဲ့တဲ့ ကျွန်တွေလို ဖြစ်သွားကြပြီ။ ဒီနောက်ပိုင်း သူတို့ဟာ ညီအစ်ကိုဟုန်ကိုပဲ သခင်အဖြစ် အသိအမှတ်ပြုတော့မှာ။”

ချီဇီယန်သည် ဟုန်ယွိကို လက်မထောင်ပြရင်း စိတ်ရင်းဖြင့် ချီးကျူးသည်။

“ဟုတ်ပြီ၊ အခု သင်္ဘောတွေ အနားကပ်လာပြီ။ သင်္ဘောပေါ်က လူတွေကို ဖမ်းဆီးပြီး ရတနာတွေ၊ လက်နက်တွေ၊ သံချပ်ကာတွေကို အကုန်ယူလာခဲ့။ ကုန်းပတ်ပေါ်မှာ ပုံထားပါ။ နောက်မှ ငါ ဆုလာဘ်တွေကို မျှတစွာ ခွဲဝေပေးမယ်။ ဒါ့အပြင်၊ စာရွက်စာတမ်းအားလုံးကို ငါ့ဆီကို ပေးပို့ရမယ်..”

လူသာဝက်ဝံအစောင့်တပ် စစ်သည်တစ်ရာသည် လက်ဗွေရာများကို အတင်းအကျပ် ထားခဲ့ရသည် ကို မြင်ပြီးနောက်၊ ဟုန်ယွိသည် သက်ပြင်းချလိုက်သည်။ ရှန်ထိုက်ဇူကို နဂါးအလံကို သိမ်းထားဖို့ အမိန့်ပေးပြီးနောက်၊ ရှာဖွေမှုစတင်ရန် အမိန့်ထုတ်လိုက်သည်။

ဂျိမ်း…။

ဟုန်ယွိ၏ သင်္ဘောကိုးစီးသည် ဖူဘိုရေတပ်၏ သင်္ဘောများဆီသို့ ချဉ်းကပ်လာသည်။ ထို့နောက် ကြီးကျယ်သော ရှာဖွေမှုကြီးတစ်ခု စတင်ခဲ့သည်။

သမိုင်းတစ်လျှောက်တွင်၊ ဧကရာဇ်စေတမန်များသည် အမြဲတမ်း အခြားသူများကိုသာ ရှာဖွေခဲ့ကြသည်။ ဧကရာဇ်စေတမန်တစ်ဦးကို ရှာဖွေရဲသူ မည်သူမှ မရှိခဲ့ပေ။ ယခုအခါ ဟုန်ယွိ၏ လက်အောက်ရှိ သင်္ဘောသားတစ်ထောင်သည် ဝံပုလွေနှင့် ကျားများကဲ့သို့ ခုန်ဝင်သွားကြပြီး၊ အားလုံးက စိတ်လှုပ်ရှားနေကြသည်။

ဤကြီးမားသော ရှာဖွေခြင်းနှင့် သိမ်းဆည်းခြင်းလုပ်ငန်းသည် နှစ်နာရီမကကြာပြီးမှ ပြီးစီးသွားခဲ့သည်။

သံချပ်ကာများ၊ လက်နက်များ၊ ရွှေနှင့်ရတနာများစွာသည် မက်မွန်နတ်ဘုရား ဒေါသမုန်တိုင်းသင်္ဘော၏ ကုန်းပတ်ပေါ်တွင် စုပုံထားသည်။ မဟူရာနတ်ဆိုးကျီးကန်း အစီအရင်ဖြင့် ဖိနှိပ်ခံထားရသော စစ်သည်များသည် ၎င်းတို့၏ သံချပ်ကာနှင့် အဝတ်အစားများ ချွတ်ခံထားရပြီး၊ ဖက်ထုပ်များကဲ့သို့ တင်းတင်းကျပ်ကျပ် ဖမ်းဆီးချည်နှောင်ပြီး အခြားသင်္ဘောများပေါ်သို့ ပစ်ပို့ထားကြသည်။

စစ်သင်္ဘောကြီးလေးစီးထဲက ပစ္စည်းအားလုံးကို သိမ်းယူခံရသည်။ ကျွန်များ၊ သင်္ဘောသားများ၊ ထမင်းချက်များ၊ အလုပ်သမားများ၊ အိမ်ဖော်များနှင့် အမူထမ်း မိန်းကလေးပေါင်း နှစ်ဆယ်ကျော်၊ အားလုံး ဖမ်းဆီးခံရသည်။

သို့သော် ဟုန်ယွိသည် သူ့လက်အောက်ငယ်သားများကို မကောင်းသည့်ကိစ္စ တစ်စုံတစ်ရာ လုပ်ဆောင်ခြင်းကို တင်းကြပ်စွာ တားမြစ်ထားသည်။ အိမ်ဖော်နှင့် အမူထမ်းမိန်းကလေးနှစ်ဆယ်ကျော်ကို ဟွာနွန်ယင်နှင့် ဟွာနွန်းယွီတို့၏ ငွေလအစောင့်ရှစ်ဖော်ထံ လွှဲပြောင်းပေးခဲ့သည်။

ဟုန်ယွိ၏ မဟူရာနတ်ဆိုးကျီးကန်း အစီအရင်သည် စစ်သည်တစ်စိတ်တစ်ပိုင်းကိုသာ ဖိနှိပ်ထားနိုင်သည်။ ဖိနှိပ်မခံရသေးသည့် စစ်သည်များလည်း ရှိသေးသည်။ သင်္ဘောများပေါ်သို့ ရှာဖွေရန် တက်သွားချိန်တွင် ခုခံမှုများ ကြုံတွေ့ခဲ့ရသော်လည်း၊ တစ်ကျော့တိုက်ခိုက်ပြီးနောက် ၎င်းတို့အားလုံး လက်နက်ချလိုက်ကြသည်။

“သင်္ဘောလေးစီးမှာ စစ်သည်ငါးရာ ရှိတယ်။ သင်္ဘောမောင်းတဲ့ သင်္ဘောသားခြောက်ရာ။ ထမင်းချက်သမားတွေ၊ ကျွန်တွေ၊ သင်္ဘောသားတွေ၊ အလုပ်သမားတွေ၊ အိမ်ဖော်တွေ၊ အမူထမ်းမိန်းကလေးတွေနဲ့ စုစုပေါင်း အယောက် ၁၃၅၀ တယ်…..။”

ရှာဖွေမှုပြီးစီးပြီးနောက်၊ စာရင်းကိုင်တစ်ဦးက ချက်ချင်း တက်လာပြီး အစီရင်ခံသည်။

“ရွှေဒင်္ဂါးသုံးသောင်း၊ ငွေဒင်္ဂါးငါးသိန်းလည်း ရှိသေးတယ်။ ငွေဒင်္ဂါးထဲမှာ ငွေစက္ကူတွေလည်းပါပြီး၊ ရွှေဒင်္ဂါးတွေကလည်း ပုံမှန်ရွှေပါပဲ။ နတ်ဘုရားလေနိုင်ငံက ငွေစက္ကူတချို့လည်း တွေ့ရတယ်။ ဒီရွှေနဲ့ငွေတွေဟာ ကောင်းကင်လေနိုင်ငံက လာတာလို့ ထင်တယ်။”

ရွှေပင့်ကူလည်း ခုန်ပေါက်ရင်း ထပ်လောင်း ပြောသည်။

“ဟုတ်တယ်။ ဘီအန်တပ်ဖွဲ့ရဲ့ ခေါင်းဆောင်ခုနစ်ဦးဟာ နတ်ဘုရားလေနိုင်ငံကို စီးပွားရေးလုပ်ဖို့ လာခဲ့တာ။” ဟုန်ယွိသည် ခေါင်းညိတ်သည်။

“ဒီလူတွေကို ဘယ်လိုလုပ်မလဲ။ လူပေါင်း ၁၃၅၀ ထဲ တစ်ယောက်မှ အသက်ရှင်ထားလို့မရဘူး။” ချန်ယင်းရှာက ဟုန်ယွိကို ကြည့်ရင်း ပြောသည်။ “ဒါပေမယ့် အားလုံးကို သတ်ဖြတ်ဖို့က မင်းရဲ့ စရိုက်နဲ့ မကိုက်ညီဘူး။ ဒါပေမယ့် သူတို့ကို ကျွန်အဖြစ် ရောင်းလို့လည်း မရဘူး။ ဒါကြောင့် ချန်ထားမလား လွှတ်ပေးမလားဆိုတာ ပြဿနာပဲ။”

ဖမ်းဆီးထားသော ဧကရာဇ်စေတမန်၏ စစ်သည်များနှင့် သင်္ဘောသားများကို ကျွန်အဖြစ် ရောင်းချလို့မရပေ။ သို့သော်, ၁၃၅၀ ကို အကုန်သတ်ဖြတ်ဖို့က သွေးထွက်သံယို များလွန်းသည်။ ဟုန်ယွိသည် သတ်ဖြတ်ခြင်းကို နှစ်သက်သူမဟုတ်ပေ။ သတ်ဖြတ်ခြင်းကို ရှောင်လွှဲနိုင်လျှင် သူသည် အကောင်းဆုံး ရှောင်လွှဲဖို့ ကြိုးစားလိမ့်မည်။ “ဒါက လွယ်ပါတယ်။

“ငါ သူတို့ကို ရောင်းလို့မရဘူး။ ငါကိုယ်တိုင် စီမံလိုက်မယ်။ အခုငါတို့မှာ သင်္ဘောလေးစီး ထပ်တိုးလာပြီ။ လူအင်အားပိုလိုအပ်တယ်။ သိုင်းသခင်တွေနဲ့ သိုင်းစစ်သည်တော်တွေကို ရွေးထုတ်ပြီး ကျန်တဲ့သူတွေကို ငါတို့လက်အောက်ငယ်သားတွေအတွက် ကျွန်နဲ့ အစေခံတွေအဖြစ် ပေးလိုက်မယ်။ ငါ့လက်အောက်က စစ်သည်တွေကိုတော့ ပင်လယ်ရပ်ခြားမှာ နေရာတစ်ခုရှာပြီး နေထိုင်ခိုင်းမယ်။ သုံးနှစ်ကနေ ငါးနှစ်လောက်ကြာပြီးနောက် ဒီအရေးကိစ္စ အေးဆေးဖြစ်သွားပြီ။ ငါရဲ့ကျင့်ကြံမူ အောင်မြင်ပြီး မိုးကြိုးကပ်ဘေးကို ကျော်ဖြတ်နိုင်တဲ့အခါ၊ ဘာမှဖြစ်လာမှာ မဟုတ်တော့ဘူး။ ဒါ့ပြင်၊ ငါ့ရဲ့ မူလရည်ရွယ်ချက်က လူသူမရှိတဲ့နေရာတစ်ခုမှာ ဆုတ်ခွာနိုင်တဲ့ လမ်းကြောင်းတစ်ခု ဖွင့်ထားဖို့ပဲ။” ဟုန်ယွိက ပြောသည်။

စစ်သည်များနှင့် စစ်အရာရှိများသည် ကျွန်များ ထားရှိခွင့်ရှိသည်။ ၎င်းသည် စည်းမျဉ်းတစ်ခုလည်း ဖြစ်သည်။ ဤစစ်သည်များကို ပင်လယ်ရပ်ခြားတွင် သုံးနှစ်မှ ငါးနှစ်အထိ နေထိုင်ခိုင်းပြီး၊ ကောင်းစွာလေ့ကျင့်ခိုင်းမည်။ ဤအရေးကိစ္စ အေးဆေးဖြစ်သွားသည့်အခါ ဘာမှ ဖြစ်လာမည် မဟုတ်ပေ။

“စစ်သင်္ဘောကြီးလေးစီးမှာ သံစည်းကြီးကိုးခု တွေ့တယ်။ ဘေးမှာ သေတ္တာကြီးတွေလည်း ရှိတယ်။ သေတ္တာတွေထဲမှာ ယမ်းမှုန့်တွေ သံမဏိအလုံးကြီးတွေ အပြည့်ရှိနေတယ်။ နောက်ထပ် သိုလှောင်ရုံတစ်ခုမှာလည်း ယမ်းမှုန့်အမြောက်အမြား တွေ့ရတယ်။ ဒီသံမဏိ အလုံးကြီးတွေ က ခန့်မှန်းခြေအားဖြင့် နှစ်ရာလောက်ရှိမယ်…..။”

ချီဇီယန်သည် သံမဏိအလုံးကြီးတစ်လုံးကို လက်ထဲတွင် ကိုင်ထားရင်း အလျင်အမြန် တက်လာသည်။

သံမဏိအလုံးကြီးသည် အပြင်ဘက်တွင် အနက်ရောင်နှင့် မာကျောသော်လည်း၊ အလွှာများက ခိုင်မာခြင်း ရှိမနေပေ။ ၎င်းသည် သန့်စင်သံမဏိဖြင့် ပြုလုပ်ထားပုံရသည်။

ထိုသံမဏိအလုံးများသည် ဖန်ရှင်းတာအိုဂိုဏ်း၏ သံမဏိချပ်ဝတ်နတ်ဘုရားမြောက် ဖြစ်သည်ကို ဟုန်ယွိ သိသည်။ ၎င်းကို မိုးကြိုးမီးလျှံသံမဏိမြောက်ဟုလည်း ခေါ်သည်။ ၎င်းသည် တော်ဝင်ချန် မီးလျှံလက်မောင်းတပ်ရင်း၏ ဆန်းကြယ်ဆုံး လျှို့ဝှက်လက်နက်ဖြစ်ပြီး၊ မြို့သိမ်းတိုက်ပွဲများတွင် ပြိုင်ဘက်ကင်း လက်နက် ဖြစ်သည်။

ဟုန်ယွိသည် ဤလက်နက်၏ စွမ်းအားကို မြင်ဖူးသည်။ လေးများနှင့်နှိုင်းယှဉ်ပါက ၎င်းသည် အဆပေါင်းထောင်ချီ ပိုမိုအားကောင်းသည်။

“တော်ဝင်ချန် မီးလျှံလက်မောင်းတပ်ရင်းမှာ ဘယ်လိုလျှို့ဝှက်လက်နက်မျိုးတွေ ရှိနေသေးလဲ မသိဘူး…..။” ဟုန်ယွိသည် သံမဏိချပ်ဝတ် နတ်ဘုရားမြောက်များကို ကြည့်ရင်း တွေးတောသည်။ ယခုအခါ တော်ဝင်ချန် ဧကရာဇ်တရားရုံး၏ စွမ်းအားသည် အလွန်သန်မာလွန်းကြောင်း သူ နားလည်လာသည်။ ၎င်းသည် အပေါ်ယံ မျက်နှာပြင်ပေါ်တွင် မြင်နေရသည်ထက် များစွာကျော်လွန်သည်။

အတိတ်ကာလက သူ၏ ဧကရာဇ်တရားရုံးနှင့်ပတ်သက်သော နားလည်မှုများသည် အလွန်ရိုးရှင်းလွန်းခဲ့သည်။

“သေချာသိမ်းဆည်းထားပြီး အချိန်ရရင် လေ့လာကြည့်ကြပါ။ ဒါက မြို့သိမ်းတိုက်ပွဲတွေနဲ့ ပင်လယ်ပြင် ရွက်လွှင့်ရာမှာ အသုံးပြုတဲ့ လက်နက်တွေပဲ။ စစ်ရေးအတွက်တော့ နတ်ဘုရားလက်နက်တစ်ခုပဲ။ ဧကရာဇ်တရားရုံးက ဒီလက်နက်တွေကို တပ်ဖွဲ့တိုင်းမှာ ဖြန့်ဝေမထားတာ မဆန်းတော့ဘူး။ ပစိဖိတ်ရေတပ်မှာ စစ်သည်တစ်သိန်းကျော်ရှိပေမယ့် ဒီလက်နက်မျိုး မရှိခဲ့ဘူး။” ဟုန်ယွိက အမိန့်ပေးသည်။

“သခင်လေး၊ ကျွန်မတို့, ရွှေတံဆိပ်ပြား၊ အမိန်းပေးဓား၊ ကျောက်စိမ်းသေတ္တာနဲ့ စာရွက်စာတမ်းတချို့ တွေ့ရပါတယ်…..။”

ဤအချိန်တွင် ဟွာနွန်ယင်နှင့် ဟွာနွန်းယွီတို့သည် ပစ္စည်းအနည်းငယ်ကို ယူလာကြသည်။

ရွှေတံဆိပ်ပြားတစ်ခုပေါ်တွင် လက်ရာမြောက်သော ခြေသည်းငါးချောင်းပါ နဂါးတစ်ကောင်ကို ထွင်းထားပြီး၊ ၎င်းပေါ်တွင် “ဧကရာဇ်ကိုယ်တိုင် ကြွရောက်လာသည့်နှယ်” ဟူသော စကားလုံးလေးလုံးပါရှိကာ၊ အမြင့်ဆုံးအာဏာကို ထုတ်ဖော်ပြသထားသည်။

ဓားနှင့်ပတ်သက်လျှင်၊ ၎င်းတွင် ကျောက်စိမ်းဓားရိုး၊ တောက်ပသော အဝါရောင်ပိုးထည်ကြိုး၊ ရွှေဖြင့်တန်ဆာဆင်ထားသော နီညိုရောင် သစ်သားဓားအိမ် ရှိသည်။ ဓားကို ဆွဲထုတ်လိုက်သောအခါ ဓားသွားသည် အလွန်ထက်မြက်ပြီး၊ ဓားသွားပေါ်တွင် ရေခဲသဖွယ် အက်ကွဲကြောင်းများ ရှိသော်လည်း၊ “ငါးမန်းသတ်ဓား” ထက် မနိမ့်သည့် နတ်ဘုရားလက်နက်တစ်ခုလည်း ဖြစ်သည်။

သို့သော် ဤမျှတင်မကာပေ။ ဤဓားသည် ရှန်ဖန်းဓား (ဧကရာဇ်ဓားဟု) လူသိများပြီး ကောင်းကင်သားတော်ကို ကိုယ်စားပြုသည်။

ဤဓားကို ပိုင်ဆိုင်ထားသော ဧကရာဇ်စေတမန်များသည် အဆင့်သုံးအောက်ရှိ အရာရှိများကို ပထမဦးစွာ ကွပ်မျက်ပြီး၊ နောက်မှ ဧကရာဇ်ထံ အစီရင်ခံခွင့် ရှိသည်။

ရွှေတံဆိပ်၊ ဓားနှင့် နဂါးအလံ။ ဤသုံးမျိုးက အစစ်မှန် ဧကရာဇ်စေတမန် တစ်ဦးဖြစ်ကြောင်း ညွှန်ပြနေသည်။

“ဒီပစ္စည်းတွေကို သိမ်းထားပြီး သေချာထိန်းသိမ်းထားပါ။ အနာဂတ်မှာ အသုံးဝင်လာနိုင်တယ်။” ဟုန်ယွိ၏ မျက်လုံးများက တောက်ပလာသည်။

စကားပြောရင်း ဟုန်ယွိသည် ကျောက်စိမ်းသေတ္တာကို ယူလိုက်သည်။

ကျောက်စိမ်းသေတ္တာသည် သန့်စင်ပြီး အဖြူရောင်ဖြစ်ကာ၊ ထွင်းဖောက်မြင်နိုင်သည်။ ကျောက်စိမ်းသေတ္တာကို အလွန်ကောင်းမွန်သော ကျောက်စိမ်းဖြင့် ပြုလုပ်ထားသည်။ ၎င်းပေါ်တွင် လက်ရာမြောက်သော ကျောက်စိမ်းသော့တစ်ချောင်း ရှိသည်။ သော့ကို ဖွင့်လိုက်သောအခါ အထဲတွင် အစီအရင်ခံ တင်ပြစာတမ်းတစ်ခု တိတ်တဆိတ် ရှိနေသည်။

ဟုန်ယွိသည် အစီအရင်ခံ တင်ပြစာတမ်းကို ကောက်ယူပြီး နဂါးတစ်ကောင် အမြီးယမ်းနေသည့်အလား ခမ်းနားထည်ဝါသည့် အငွေ့အသက်များပါရှိသော စာလုံးများကို မြင်လိုက်သည်။

“ဘယ်လောက်ကောင်းလိုက်တဲ့ လက်ရေးလဲ။ ဒီလောကထဲမှာ ဒီလို အစွမ်းထက်တဲ့ စာရေးနည်းစွမ်းရည်ရှိတဲ့သူ တကယ်ကို ရှိနေတာပါလား….။”

ဟုန်ယွိသည် ဤစာလုံးများကို မြင်သောအခါ, သူ့စိတ်နှလုံးက တုန်လှုပ်သွားခဲ့ရသည်။ ထိုစာလုံးများက ရေးသားသည့်လူကို ထင်ဟပ်နေသည်။ အာရုံခံစားမူအားကောင်းပြီး ဗဟုသုတကြွယ်ဝသော ပညာရှင်တစ်ဦးသည် အခြားသူများ၏ စာလုံးများကို ကြည့်ရုံဖြင့် ထိုလူတို့၏ စွမ်းရည်ကို အခြေခံအားဖြင့် ဆုံးဖြတ်နိုင်သည်။

ဟုန်ယွိသည် ဤမျှ အားကောင်းပြီး ပြင်းထန်သော လက်ရေးလှပုံစံမျိုးကို တစ်ခါမှ မမြင်ဖူးပေ။

စာရွက်ပေါ်ရှိ စာလုံးများ၏ စုတ်ချက်တစ်ခုချင်းစီသည် နဂါးနတ်ဘုရားတစ်ပါး၊ တောင်တန်းများနှင့် မြစ်များ၏ နဂါးသွေးကြောတစ်ခုကဲ့သို့ ဖြစ်နေသည်။ ၎င်းစုတ်ချက်အတွင်းပါရှိသော အနုပညာသဘောတရားသည် အလွန်တင့်တယ်လွန်းပြီး အသက်ရှူကျပ်စေသည်။

ဟုန်ယွိသည် စာလုံးများကို လက်ဖြင့် ထိတွေ့ကာ၊ စာလုံးတစ်လုံးစီ၏ စုတ်ချက်များအတွင်း ပါရှိသော နက်ရှိုင်းသော အနုပညာသဘောတရားကို သူ၏ ဝိညာဉ်ဖြင့် ခံစားကြည့်သည်။ စာလုံးများကို လက်ချောင်းများဖြင့် ထိတွေ့လိုက်သည်နှင့်၊ ကမ္ဘာကို အထက်စီးမှ ငုံ့ကြည့်နေသော ခမ်းနားထည်ဝါမူ မျိုးကို ခံစားရသည်။

“စာလုံးတွေထဲက အနုပညာသဘောတရားတစ်ခုတည်းက ငါ့ဝိညာဉ်ကို ဖိအားပေးနိုင်တယ်လား။ ဒီချန်ပီယံမြို့စားရဲ့ သိုင်းပညာဟာ ဘယ်လောက် ကြောက်စရာကောင်းလိုက်လဲ….” ဟုန်ယွိသည် အစီအရင်ခံ တင်ပြစာတမ်းပေါ်ရှိ စာလုံးများကို ကြည့်ရင်း၊ ၎င်းသည် ချန်ပီယံမြို့စားက ဧကရာဇ်ထံ ရေးသားတင်ပြထားသော စာတမ်းဖြစ်ကြောင်း သိရှိလိုက်သည်။

အစီအရင်ခံ တင်ပြစာတမ်း၏ အကြောင်းအရာမှာ စစ်ရေး၊ ရိက္ခာ၊ ပထဝီဝင်၊ ရန်သူအခြေအနေ စသည်တို့နှင့် ပတ်သက်နေသည်။ ထို့ပြင် ခွဲခြမ်းစိတ်ဖြာမှုများစွာလည်း ပါရှိသည်။ စကားလုံးများသည် အလွန်ရှင်းလင်းပြီး၊ တိုတောင်းကာ အဓိကအချက်ကို ထိမှန်သည်။

အစီအရင်ခံ တင်ပြစာတမ်း၏ အကြောင်းအရာကို ကြည့်ရသည်မှာ ရှင်းလင်းပြတ်သားသော ပုံတစ်ပုံကို ကြည့်ရူနေရသည်နှင့် တူသည်။

သူ၏ စာအရေးသား ကျွမ်းကျင်မူကို ရှင်းရှင်းလင်းလင်း မြင်တွေ့ရသည်။

“ဒီလူရဲ့ စာအရေးသား စွမ်းရည်နဲ့ဆိုရင် ထိပ်တန်းပညာရှင်တစ်ဦးဖြစ်လာဖို့ ဘာပြဿနာမရှိဘူး…။” ဟုန်ယွိသည် စိတ်ထဲတွင် တိတ်တဆိတ် အံ့ဩသွားသည်။

အစီအရင်ခံ တင်ပြစာတမ်းကို စကားလုံး ထောင်ပေါင်းများစွာဖြင့် ရေးသားထားပြီး၊ စစ်ရေးနှင့် လက်နက်များကိုလည်း ရှင်းလင်းစွာ မိတ်ဆက်ထား သည်။ အဆုံးသတ်တွင် အကြောင်းအရာ ပြောင်းလဲသွားပြီး၊ အရေးကြီးသော သတင်းအချက်အလက်များပါရှိသည့် စာပိုဒ်အနည်းငယ်က နောက်ဆုံးတွင် ပေါ်ထွက်လာသည်။ အကျဉ်းချုပ်အနေဖြင့်….။

“ဒိုင်ဇင်ဘုရားကျောင်းရဲ့ အဖိုးတန်ဆုံးရတနာဖြစ်တဲ့ စကြာဝဠာအိတ်ရဲ့ တည်နေရာကို ကျွန်တော်မျိုး သိရှိထားပြီးပါပြီ။ စကြာဝဠာအိတ်ဟာ တောင်ပိုင်းပင်လယ်ဒေသရှိ မဖွံ့ဖြိုးသေးတဲ့ တောရိုင်းဒေသမှာ ရှိနေပါတယ်။ စကြာဝဠာအိတ်ကို ဗောဓိသတ္တ ၁၀၈ ပါးထဲက တစ်ပါးဖြစ်တဲ့ နင်ဂျာဘုန်းတော်ကြီးတစ်ပါးက ခိုးယူသွားခဲ့တာပါ။ စကြာဝဠာအိတ်ထဲမှာ ဒိုင်ဇင်ဘုရားကျောင်းရဲ့ အမြင့်ဆုံး လျှို့ဝှက်ချက်ကျမ်းစာတွေ၊ နှစ်ထောင်ချီ စုဆောင်းထားတဲ့ ရွှေငွေရတနာတွေနဲ့ မရေမတွက်နိုင်တဲ့ နတ်ဘုရားလက်နက်တွေ ပါရှိနေတယ်။ ဒီစကြာဝဠာအိတ်ကို ပြန်လည်ရယူပြီး နိုင်ငံတော်ဘဏ္ဍာအဖြစ် သိမ်းဆည်းနိုင်မယ်ဆိုရင်၊ ကမ္ဘာကြီးကို ဆယ်နှစ်ကြာ အခွန်ကင်းလွတ်ခွင့် ပေးနိုင်ပါလိမ့်မယ်။ ဒီစကြာဝဠာအိတ်က ကျွန်တော်မျိုးတို့ တော်ဝင်ချန်နိုင်ငံကို ချမ်းသာကြွယ်ဝပြီး အင်အားကြီးထွားစေနိုင်ပါတယ်။ ကမ္ဘာကြီးကို တစ်ချက်တည်းနဲ့ စုစည်းနိုင်လိမ့်မယ်။ ယွန်မင်ဘုရင်လည်း ဒီသတင်းကို သိရှိထားပြီး၊ တောရိုင်းဒေသကို ကျွမ်းကျင်သူများစွာ လျှို့ဝှက် စေလွှတ်ထားပြီး၊ ရတနာကို ရှာဖွေနေတယ်လို့ ကျွန်တော်မျိုး သိရှိထားပါတယ်။ ချန်ဧကရာဇ်မင်းမြတ်အနေနဲ့ အမြန်ဆုံး ဖြတ်ချက်ချနိုင်ရန် မျှော်လင့်ပါတယ်….။”

“ဘာ…။ စကြာဝဠာအိတ်ဆိုတာ တကယ်ရှိတာလား…..။”

ဟုန်ယွိသည် အစီအရင်ခံ တင်ပြစာတမ်း၏ အကြောင်းအရာကို ဖတ်ပြီးနောက်၊ သူ့ဘဝတစ်သက်တာလုံးအတွက် အံ့ဩစရာများကို အကုန်လုံး သိရှိလိုက်ရသလို ခံစားရပါသည်။

စကြာဝဠာအိတ်ထဲတွင် ၎င်း၏ကိုယ်ပိုင်ကမ္ဘာတစ်ခု ရှိသည်။ အိတ်ငယ်တစ်လုံးသည် မရေမတွက်နိုင်သော ပစ္စည်းများကို သိမ်းဆည်းနိုင်သည်။ လူထုကြားတွင် ဒဏ္ဍာရီတစ်ခုပင် ရှိသေးသည်။ ထိုဒဏ္ဍာရီမှာ လွန်ခဲ့သော နှစ်တစ်ထောင်က တော်ဝင်ဟန်မင်းဆက် တည်ထောင်ချိန်တွင်၊ ဒိုင်ဇင်ဘုရားကျောင်းက လူများကို ကူညီရန် စေလွှတ်ခဲ့သည်။ စစ်သည်နှစ်သိန်းရှိသော တပ်ဖွဲ့ဝင်များ ရိက္ခာပြတ်လပ်နေချိန်တွင်၊ ဒိုင်ဇင်ဘုရားကျောင်းက စကြာဝဠာအိတ်ဖြင့် လူတစ်ဦးကို စေလွှတ်ခဲ့သည်။ နောက်ဆုံးတွင်၊ ထိုအိတ်ထဲမှ ရိက္ခာများသည် စစ်သည်နှစ်သိန်းကို ခြောက်လလုံး ကျွေးမွေးနိုင်ခဲ့သည်။

စစ်သည်နှစ်သိန်းအတွက် တစ်ရက်စာ ရိက္ခာသည် တောင်တစ်လုံးကဲ့သို့ စုပုံထားရသည်။ ဟုန်ယွိ၏ သင်္ဘောများကို အပြည့်ဖြည့်ထားလျှင်တောင်၊ ၎င်းသည် ဆယ်ပုံတစ်ပုံပင် မဖြည့်နိုင်ပေ။ ခြောက်လလုံး ကျွေးမွေးဖို့ဆိုသည်မှာ မည်သည့်အရာမျိုးဖြစ်မည်နည်း။

အတိတ်တုန်းက ဟုန်ယွိသည် တရားဝင်မဟုတ်သည့် သမိုင်းနှင့် ဒဏ္ဍာရီများကို ဖတ်ရှုခဲ့ဖူးသည်။ ထိုကဲ့သို့ ဒဏ္ဍာရီများသည် ဘုန်းတော်ကြီးများက သာမန်လူထုကို လှည့်စားရန် ဖန်တီးထားသည်ဟု သူ အမြဲထင်ခဲ့သည်။ လူထုကြားတွင် ပိုမိုပျံ့နှံ့လာသည်နှင့်အမျှ ၎င်းသည် ပို၍ အံ့ဩစရာ ဖြစ်လာသည်။ စစ်မှန်သော ပညာရှင်များသည် ၎င်းကို လုံးဝ မယုံကြည်ပေ။ သို့သော် ယခုအခါ၊ ဒဏ္ဍာရီများနှင့် ဒဏ္ဍာရီပုံပြင်များသည် အကြောင်းအရာမရှိဘဲ ဖြစ်ပေါ်လာခြင်း မဟုတ်ကြောင်း ထင်ရှားလာသည်။

နောက်တစ်ခုကတော့ ချန်ဧကရာဇ်၏ အမိန့်ပြန်စာတမ်း ဖြစ်သည်။

ချန်ဧကရာဇ်၏ အမိန့်ပြန်စာတမ်းသည် သွေးနီရောင် ဖြစ်သည်။ စာလုံးများသည် ဓားများ၊ ပုဆိန်များဖြင့် ထွင်းထားသည့်အလား ထက်ရှပြီး၊ ဧကရာဇ်၏ အမိန့်အာဏာကို ပြသထားသည်။

အမိန့်ပြန်စာတမ်းမှာ ဖော်ပြထားသည့် အကျဉ်းချုပ်အဓိပ္ပာယ်မှာ…. ပင်လယ်ပြင်ဒေသကနေ မိုင်တစ်သောင်းအကွာမှာရှိတဲ့ တောရိုင်းဒေသမှာ နတ်ဆိုးသားရဲတွေ လှည့်လည်သွားလာကျက်စားကြတယ်။ ဒါ့ပြင်, အောက်လမ်းပညာရပ်ကို ကျွမ်းကျင်တဲ့ မကောင်းဆိုးဝါးဂိုဏ်းတွေလည်း ရှိပြီး၊ သူတို့က ဌာနေတိုင်းရင်းသားတွေကို လှည့်စားနေကြတယ်။ ရတနာရှာဖွေဖို့ အဲဒီဒေသကို သွားတဲ့အခါ မင်း သတိထားရမည်။ ဒါပေမယ့်၊ ငါကိုယ်တော်မြတ် စီစဉ်ထားပြီးသား။ ဒီအမိန့်ပြန်စာတမ်းကို ရေတပ်က စစ်ဗိုလ်ချုပ်တွေ အားလုံးထံ ပေးပို့ပြီး အလှည့်ကျ ဖတ်ရှုပါစေ။ ပစိတ်ဖိတ်ရေတပ်က ယန်ကျန်းထံ ပေးပို့စရာမလိုဘူး။ ဒီလူက ဒီလိုလျှို့ဝှက်ကိစ္စကြီးတွေကို ထမ်းဆောင်ဖို့ စွမ်းရည်မရှိဘူး။ ဖူဘိုဗိုလ်ချုပ် ရှောင်ထျန်းယောင်၊ ဇန်ဟိုင်ဗိုလ်ချုပ် ယွဲ့ဒွမ်ဟန်၊ ဒင်ဟိုင်ဗိုလ်ချုပ် ကျီကျင်ယန်နဲ့ ဖျင်ဟိုင်ဗိုလ်ချုပ် လျူဂျွန်ဒေါင်တို့ကို မင်းရဲ့ ကွပ်ကဲမူအောက်မှာ ထားပြီး၊ သင့်လျော်သလို အမိန့်ပေး ခိုင်းစေနိုင်တယ်….။”

“ဒါဆို စကြာဝဠာအိတ်ဟာ တကယ်ပဲ တောရိုင်းဒေသမှာ ရှိနေတာပေါ့။ ချန်ဧကရာဇ်က ဒါကို သိထားပြီးသားပဲ။ ဒါကြောင့် ဖူဘိုရေတပ်ကို ပင်းလယ် ဓားပြတွေကို နှိမ်နင်းပြီး လမ်းရှင်းဖို့ စေလွှတ်ခဲ့တာ။ ဒါပေမယ့် ဒီအမိန့်ပြန်တမ်းစာအရ၊ ပစိဖိတ်ရေတပ်ရဲ့ ယန်ကျန်းဟာ ရေတပ်ဗိုလ်ချုပ်ငါးဦးထဲမှာ အားနည်းဆုံးပဲ။ ချန်ဧကရာဇ်က သူဟာ ဒီလျှို့ဝှက်ကိစ္စကြီးကို ထမ်းဆောင်ဖို့ အရည်ချင်းမရှိဘူးလို့ တိုက်ရိုက် ပြောထားတယ်……။”

ဟုန်ယွိသည် ခေါင်းမော့ကာ ဝေးလံသော ပင်လယ်ပြင်ကြီးကို ကြည့်လိုက်သည်။

“တောရိုင်းဒေသ…..။”

တောရိုင်းဒေသသည် ပင်လယ်ထဲရှိ ကြီးမားသော ကုန်းမြေတစ်ခု ဖြစ်သည်။ ထိုအမည်သည် မြုံနေသော နယ်မြေတစ်ခု၏ ယေဘုယျအမည်တစ်ခု ဖြစ်သည်။ ထိုနေရာတွင် နတ်ဆိုးသားရဲများ လှည့်လည်ကျက်စားသည်။ ထို့ပြင် လွန်ခဲ့သော နှစ်ပေါင်းများစွာက ဖယ်ရှားခံခဲ့ရသော မကောင်းဆိုးဝါး ဂိုဏ်း၏ နတ်ဆိုးလူများလည်း ရှိကြပြီး၊ ၎င်းတို့သည် ဌာနေတိုင်းရင်းသားများကို လှည့်စားနေကြသည်။ ထိုနေရာသည် ယဉ်ကျေးသော ကမ္ဘာနှင့် လုံးဝ ကွဲပြားသော နေရာတစ်ခု ဖြစ်သည်။

ယွန်မင်နိုင်ငံကဲ့သို့ ရိုင်းစိုင်းသော လူမျိုးများပင်လျှင် တောရိုင်းဒေသကို ရိုင်းစိုင်းသော နယ်မြေအဖြစ် မှတ်ယူကြသည်။ တောရိုင်းဒေသသည် မည်မျှ ကြီးမားကျယ်ဝန်းသည်ကို မည်သူမျှ မသိပေ။ ထိုနယ်မြေကို မည်သူမျှ စူးစမ်းလေ့လာခဲ့ခြင်း မရှိသလို၊ စာပေများတွင်လည်း မှတ်တမ်းတင်ထားခြင်း မရှိခဲ့ကြပေ။

ထိုအောက်လမ်းဂိုဏ်းသည် တစ်ချိန်က တာအိုဂိုဏ်းတစ်ခု ဖြစ်ခဲ့ဖူးသည်။ ၎င်းတို့သည် အဓိကအားဖြင့် သေလွန်သူများကို ယဇ်ပူဇော်ခြင်း၊ မကောင်းဆိုးဝါးများကို မွေးမြူခြင်း၊ သွေးယဇ်ပူဇော်ခြင်းဖြင့် နတ်ဆိုးများကို ပြုစုပျိုးထောင်ခြင်း၊ လူ့သွေးနှင့် အရိုးများကို စုပ်ယူခြင်းတို့ကို ပြုလုပ်ခဲ့သည်။ ဤတာအိုဂိုဏ်းသည် ကမ္ဘာကြီးကပင် သည်းမခံနိုင်သော ဂိုဏ်းတစ်ခု ဖြစ်သည်။ အသက်မဲ့တာအိုဂိုဏ်းနှင့် အစစ်မှန်လေဟာနယ် ဂိုဏ်းများကဲ့သို့သော မကောင်းဆိုးဝါးဂိုဏ်းများပင်လျှင် လူများကို လိမ်ညာလှည့်စားပြီး ကောင်းကင်ဘုံသို့ တက်လှမ်းရန်သာ လုပ်ဆောင်ကြပြီး၊ လူ့သွေးသားစုပ်ခြင်းကဲ့သို့ လုပ်ရပ်မျိုးကို မပြုလုပ်ပေ။ ထို့ကြောင့် ထိုအောက်လမ်းဂိုဏ်းသည် လွန်ခဲ့သော နှစ်ပေါင်းများစွာကတည်းက မျိုးသုဉ်းသွားခဲ့သည်။ သို့သော် ၎င်းတို့၏ အမွေအနှစ်ဆက်ခံသူအချို့သည် ကျန်ရှိနေသေးပြီး၊ ၎င်းတို့သည် ယဉ်ကျေးသော နိုင်ငံများတွင် နေထိုင်ခွင့် မရှိသောကြောင့်၊ တောရိုင်းဒေသရှိ မြုံနေသော နယ်မြေများသို့သာ သွားရောက်နေထိုင်ပြီး ဌာနေတိုင်းရင်းသားများကို လှည့်စားနေကြသည်။

“ဒီလိုဆိုရင် စကြာဝဠာအိတ်ရဲ့ တည်နေရာကို ကျွမ်းကျင်သူတွေ အများကြီး သိထားပြီပေါ့။ သူတို့လည်း တောရိုင်းဒေသကို ရတနာရှာဖွေဖို့ သွားကြမှာ မဟုတ်လား။ ငါလည်း သွားသင့်လား။ ဒါပေမယ့် တောရိုင်းဒေသဟာ ကောင်းကင်လိုကြီးမားကျယ်ပြန့်ပြီး အကန့်အသတ် မရှိဘူး။ အလွန်လည်း အန္တရာယ်များတယ်။ မိုင်တစ်သောင်းအကွာရှိ ပင်လယ်ပြင်ထဲမှာ ဘာတွေဖြစ်လာမလဲ ဘယ်သူမှ မသိနိုင်ဘူး။ ဒါ့ပြင်၊ အဲဒီကို ရောက်ဖို့ လပေါင်းများစွာ ကြာနိုင်တယ်။ နောက်နွေဦးရာသီပြီးရင် ငါ တော်ဝင်ချန်ကို ပြန်သွားရမယ်။” ဟုန်ယွိသည် စိတ်ထဲတွင် တွေးတောနေမိသည်။

“စကြာဝဠာအိတ်လား…။ ဒီလိုရတနာမျိုးကို ငါ မဖြစ်မနေ ရယူရမယ်။” ချန်ယင်းရှာသည်လည်း အစီအရင်ခံ စာတမ်းနှင့် ချန်ဧကရာဇ်၏ အမိန့်ပြန်စာတမ်းကို မြင်သောအခါ အံ့ဩသွားသည်။

“ဟုန်ယွိ၊ မင်းက အခုဆို တစ္ဆေအင်မော်တယ် ဖြစ်နေပြီ။ ငါတို့နှစ်ယောက် အတူလက်တွဲပြီး၊ ဒီလောက်များတဲ့ မှော်ရတနာတွေနဲ့ဆိုရင်၊ ရတနာကို သိမ်းယူဖို့ လုံလောက်တယ်။ ကောလာဟလအရဆို၊ စကြာဝဠာအိတ်ထဲမှာ ဒိုင်ဇင်ဘုရားကျောင်းရဲ့ အမြင့်မြတ်ဆုံး ကျမ်းသုံးစောင်ဖြစ်တဲ့ အတိတ် အမိတ္တဘကျမ်း၊ ပစ္စုပ္ပန်ဗုဒ္ဓကျမ်းစာနဲ့ အနာဂတ်အသက်မဲ့ကျမ်းစာတွေ ပါရှိတယ်တဲ့။ ပစ္စုပ္ပန်ဗုဒ္ဓကျမ်းစာနဲ့ အနာဂတ်အသက်မဲ့ကျမ်းစာကို မပြောနဲ့၊ အတိတ်အမိတ္တဘကျမ်းကတောင် စိတ်ဝိညာဉ်ကျင့်ကြံသူတွေအတွက် အမြင့်ဆုံးပညာတစ်ခုပဲ။ ဒီပညာရပ်ကို ကျင့်ကြံပြီးရင် စိတ်ဝိညာဉ်ဟာ မပျက်စီးတော့ဘူး။ ယန်နတ်ဘုရား ဖြစ်လာဖို့ အခွင့်အလမ်းဟာ ၇၀ ရာခိုင်နှုန်းအထိ တိုးလာလိမ့်မယ်။ ဒီကျမ်းစာကို ငါရလိုက်ရင်၊ နှစ်ရာစုနှစ် အနည်းငယ်အတွင်း ကမ္ဘာကြီးကို လွှမ်းမိုးနိုင်လိမ့်မယ်။ မိုနိုဂိုတာရီတောင်မှ ငါ့ကို ဘာမှ မလုပ်နိုင်ဘူး….။” (ပစ္စုပ္ပန်ကမ္ဘာရူလိုင်သုတ္တန်ကို ပစ္စုပ္ပန်ကမ္ဘာဗုဒ္ဓသုတ္တန်၊ ကျမ်းစာ၊ ကျမ်း အလျဉ်းသင့်သလို ပြန်ဆိုပါမည်)။

ချန်ယင်းရှာ၏ အသံက တုန်ရီနေပါသည်။

“အတိတ်အမိတ္တဘကျမ်းက စကြာဝဠာအိတ်ထဲမှာ ရှိနေတယ်။ ဒါပေမယ့် အတိတ်အမိတ္တဘကျမ်းက ငါ့လက်ထဲမှာ မဟုတ်ဘူးလား။” ဟုန်ယွိသည် စိတ်ထဲတွင် တွေးလိုက်သော်လည်း၊ အသံထွက်ပြီး မပြောခဲ့ပေ။

ကျောက်ဖေးရုန်နှင့် ယန်ကျင့်ကျုံးတို့သည် သူ့ထံတွင် အတိတ်အမိတ္တဘကျမ်း ရှိသည်ဟု ခန့်မှန်းခဲ့ကြပြီး၊ ထိုအကြောင်းကို သူ သိလိုက်ရသည့်အခါ ထိတ်လန့်ကြောက်ရွံ့ခဲ့ရသည်။ ယခုအခါ၊ ကမ္ဘာပေါ်တွင် သူ့ထံမှာ ဤကျမ်းစာရှိကြောင်း မည်သူမျှ မသိတော့ပေ။

ဤကျမ်းသည် အခြားသူများကို အလွယ်တကူ ပြသလို့မရသည့် စစ်မှန်သော ရတနာတစ်ခု ဖြစ်သည်။ ကောင်းကင်တုန်ခါလေး၊ အကန့်သတ်မဲ့မြှား၊ အမေနှင့်သားမီးလျှံဘီးမိုးကြိုးဓား၊ နတ်ဘုရားသစ်သားလက်စွပ်နှင့် အင်မော်တယ်ပစ္စည်း အဝါရောင်ကျောက်စိမ်းတို့သည် အဖိုးတန်သော်လည်း၊ ၎င်းတို့သည် အပြင်ပရတနာများသာ ဖြစ်သည်။ ၎င်းတို့ကို ချန်ယင်းရှာထံ ပေးလိုက်ခြင်းက အန္တရာယ်မရှိပေ။ သို့သော် အတိတ်အမိတ္တဘကျမ်းက ကွဲပြားပါသည်။

တစ်နေ့တွင် ဟုန်ယွိသည် သူ၏ကျင့်ကြံမူ အထွတ်အထိပ်သို့ ရောက်ရှိပြီး ပြိုင်ဘက်ကင်း ဖြစ်လာသောအခါ၊ သူသည် ထိုအကြောင်းကို ချန်ယင်းရှာ အား ပြောပြကောင်း ပြောပြပါလိမ့်မည်။ သို့သော် ယခုအချိန်တော့ မဟုတ်သေးပေ။

အခန်း (၂၀၈)။

“ဝမ်းသာခြင်း၊ အမျက်ဒေါသထွက်ခြင်း၊ ဝမ်းနည်းခြင်းနှင့် ပျော်ရွှင်ခြင်းတို့သည် အမူအရာကို ထုတ်ဖော်ပြသ၍ ရပြီး၊ ထိုခံစားချက်တို့ကို ထုတ်ဖော် ပြသသောအခါ, စည်းလုံးညီညွတ်ခြင်း၏ အစစ်မှန်အဓိပ္ပာယ်ဟု ခေါ်သည်...”

“လူ့စိတ်သည် အန္တရာယ်အတွင်းမှာ ရှိနေပြီး၊ တာအိုစိတ်နှလုံးသည် သေးငယ်၏။ အနှစ်သာရက တစ်ခုတည်းဖြစ်ပြီး၊ အလယ်တွင် ဇွဲလုံ့လရှိရမည်...။”

ဟုန်ယွိသည် စာအုပ်တစ်အုပ်ကို လက်ထဲတွင် ကိုင်ထားပြီး တိုးညင်းစွာ ဖတ်ရှုနေသည်။

မက်မွန်နတ်ဘုရားသင်္ဘော၏ ကုန်းပတ်ပေါ်တွင် မွှေးကြိုသော ရနံ့များဖြင့် သင်းပျံ့နေပြီး၊ နွေးထွေးသော နေရောင်ခြည်က ထွန်းလင်းတောက်ပနေပါသည်။ ပင်လယ်လေပြေညင်းသည် အနည်းငယ် အေးစိမ့်နေ၏။ ထိုအေးစိမ့်သော ပင်လယ်လေပြေညင်းမှတဆင့်၊ ဟုန်ယွိသည် မိုင်ထောင်ပေါင်းများစွာ ဝေးကွာသော တော်ဝင်ချန်နယ်မြေပေါ်တွင် အေးစက်သော လေပြင်းများ တိုက်နေပြီး ဆောင်းရာသီရောက်ရှိနေပြီဟု ခံစားမိပါသည်။

ပင်လယ်သည် တောင်ပိုင်းဒေသတွင် ရှိသော်လည်း၊ ဆောင်းရာသီက မအေးပေ။ သို့သော် ရံဖန်ရံခါ ကြီးမားသော အအေးလှိုင်းများ ဖြတ်သန်းသွားတတ်သည်။

ဟုန်ယွိသည် ကုန်းပတ်ပေါ်ရှိ မဟော်ဂနီသစ်သားဖြင့် ပြုလုပ်ထားသော ကုလားထိုင်တစ်လုံးပေါ်တွင် ထိုင်နေသည်။ သူ့ဘေးတွင် မကြာသေးမီက ဖျော်ထားသော ငါးရောင်ခြယ်တိမ်မြူခိုး လက်ဖက်ရည်သည် သင်းပျံ့သော မွေးရနံ့ကို ထုတ်လွှတ်နေသည်။ သူ့ဒူးပေါ်တွင် နှင်းဖြူရောင် စောင်တစ်ထည်ကို လွှမ်းခြုံထားပြီး၊ ထိုစောင်လေးက သူ့ကို နွေးထွေးစေသည့်ပုံပင်။

သင်္ဘောသည် တည်ငြိမ်စွာ ရွက်လွှင့်နေပြီး၊ စားပွဲပေါ်ရှိ လက်ဖက်ရည်ခွက်သည် လုံးဝ မလှုပ်ရှားပေ။

ဟုန်ယွိ၏ မျက်နှာသည် အနည်းငယ် ဖြူဖျော့နေ၏။ သူသည် ကုလားထိုင်ပေါ်တွင် ထိုင်နေရင်း၊ အားနည်းနေသည့်ပုံ ပေါ်နေပါသည်။ သူသည် စာအုပ်တစ်အုပ်ကို လက်ထဲတွင် ကိုင်ထားပြီး အသံထွက်ဖတ်နေသည်။ သူရွတ်ဖတ်နေသည့် စကားလုံးနှင့် ဝါကျတိုင်းသည် အားနည်းသော ပညာရှင်တစ်ဦး၏ ဟန်ပန်အမူအရာကို ပေးစွမ်းနေပါသည်။

ဤအားနည်းသော ပညာရှင်တစ်ဦး၏ပုံစံသည် သူ့ကို ရှင်တန်သိုင်းသခင်ကျွမ်းကျင်သူတစ်ဦး၊ သေခြင်းတရားကို ကျော်လွှားပြီးသော တစ္ဆေအင်မော်တယ်တစ်ဦးဆိုသည့် သူ့ကိုယ်ရေးအလက်ချက်နှင့် ဆက်စပ်မိရန် ခက်ခဲစေပါသည်။

သူ့ခန္ဓာကိုယ်က အားနည်းနေသော်လည်း၊ ဟုန်ယွိ၏ မျက်လုံးတွေက တောက်ပနေပြီး၊ သူ့စိတ်ဓာတ်က တက်ကြွနေတာကြောင့် စိတ်ပိုင်းဆိုင်ရာ ကြံ့ခိုင်မူကို ပြသနေပါသည်။ အထူးသဖြင့် သူ့စိတ်သည် အလွန်ရှင်းလင်းပြီး ကြည်လင်နေသည်။

“ဟုန်ယွိ၊ မင်း ဘာဖတ်နေတာလဲ…။ တာအိုစာအုပ် မဟုတ်သလို၊ သိုင်းပညာစာအုပ်လည်း မဟုတ်ဘူးနော်။”

ဟုန်ယွိသည် အခန်းတစ်ခန်းပြီးဆုံးပြီး စာအုပ်ကို ဒူးပေါ်တွင် တင်ထားကာ၊ ဝေးကွာလှသော ပင်လယ်ပြင်ကြီးကို အတွေးများနှင့်အတူ ငေးကြည့်နေစဉ်၊ ချန်ယင်းရှာသည် သင်္ဘောပေါ်ရှိ သူမအခန်းထဲမှ ထွက်လာခဲ့သည်။

“ငါ ကွန်ဖြူးရှပ်ပညာရှင်တွေရဲ့ စာအုပ်ကို ဖတ်နေတာ။” ဟုန်ယွိသည် ချန်ယင်းရှာ၏ ပေါ့ပါးသော ခြေလှမ်းများကို ကြည့်ရင်း၊ သူမတွင် သေမျိုး လောကီလူသားများကို ကျော်လွန်နေသည့် နတ်သမီးတစ်ပါး၏ ဆွဲဆောင်မှုမျိုး ရှိနေသည်ကို တွေ့လိုက်ရသည်။ သူ မပြုံးဘဲ မနေနိုင်ပေ။ သူ၏ ခန္ဓာကိုယ်ကို အနည်းငယ် လှုပ်ရှားလိုက်သည်။ “မင်း ဒီရက်ပိုင်းအတွင်း အင်မော်တယ်ပစ္စည်း အဝါရောင်ကျောက်စိမ်းကို လေ့လာနေတာ, ဘာတွေ သိမြင်လာလဲ….။”

“ငါက ကောင်းကင်နတ်ဘုရားမိုးကြိုး တာအိုပညာရပ်မှာ ကျွမ်းကျင်ပြီး၊ မိုးကြိုးလျှပ်စီးရဲ့ သဘောသဘာဝကို ရင်းနှီးတယ်။ အင်မော်တယ်ပစ္စည်း အဝါရောင်ကျောက်စိမ်း ထဲမှာ မိုးကြိုးလျှပ်စီးလုံးတစ်ခုကို အလုံပိတ်ထားတယ်။ ငါ့ရဲ့အတွေးတွေ ထည့်သွင်းပြီး စူးစမ်းကြည့်တဲ့အခါ၊ သဘာဝ အတိုင်း အကျိုးကျေးဇူးများစွာ ရရှိခဲ့တယ်။ မိုးကြိုးကပ်ဘေးကို ကျော်လွှားဖို့ ယုံကြည်မှု မရှိသေးပေမယ့်၊ ငါ့ရဲ့ ကောင်းကင်နတ်ဘုရားမိုးကြိုး တာအိုပညာဟာ နောက်တစ်ဆင့် တက်လှမ်းနိုင်ခဲ့ပြီ။”

ချန်ယင်းရှာသည် ဟုန်ယွိ၏ မျက်နှာအရောင်ကို စစ်ဆေးကြည့်ရင်း စိုးရိမ်စွာ ပြောသည်။ “မင်းရဲ့ ခန္ဓာကိုယ်နဲ့ အရိုးတွေက နည်းနည်း အားနည်းနေပုံရတယ်။ ဒါပေမယ့် ဒါက ပုံမှန်ပါပဲ။ တစ္ဆေအင်မော်တယ် ဖြစ်လာတဲ့အထိ ကျင့်ကြံကြတဲ့သူတွေဟာ ခန္ဓာကိုယ် အားနည်းတတ်ကြ တယ်။ သူတို့ရဲ့စိတ်ဝိညာဉ်ဟာ ခန္ဓာကိုယ်ရဲ့ အသက်စွမ်းအင်ကို များစွာကို သိမ်းယူသွားကြတယ်။ ဒါကြောင့်လည်း ပြန်လည်မွေးဖွားဖို့ ဒါမှမဟုတ် တခြားလူရဲ့ ခန္ဓာကိုယ်ကို သိမ်းပိုက်ပြီး ကျင့်ကြံနိုင်တာပေါ့။ ကံကောင်းတာက၊ မင်းရဲ့ခန္ဓာကိုယ်ဟာ အတွေးမဲ့ငြိမ်သက်ခြင်း အခြေအနေထဲ ဝင်ရောက်နိုင်ခဲ့ပြီး၊ သိုင်းလက်သီးဆန္ဒကို စုစည်းနိုင်ခဲ့တယ်။ ဒါကြောင့် မင်း တစ္ဆေအင်မော်တယ်တစ်ပါး ဖြစ်လာတဲ့အခါ ခန္ဓာကိုယ်က ပြိုလဲမသွားခဲ့ဘူး။ ဒါပေမယ့် ဒီအတိုင်း ဆက်သွားနေလို့ မဖြစ်ဘူး။ မင်းဟာ သိုင်းပညာကို ထိုးထွင်းသိမြင်အောင် ကြိုးစားပြီး ခန္ဓာကိုယ်ကို ဆက်လက် လေ့ကျင့်သင့်တယ်လို့ ငါထင်တယ်။ မင်း ဒီစာအုပ်တွေကို ဖတ်နေတော့ရော ဘာအကျိုးရှိမှာလဲ။ မင်းက တကယ်ပဲ ကျောက်စိမ်းမြို့တော် ကို ပြန်သွားပြီး ထိပ်တန်းပညာရှင်တစ်ဦး ဖြစ်ချင်တာလား…..။”

“အဲဒါတော့ မဟုတ်ဘူး။”

ဟုန်ယွိသည် စာအုပ်ကို စားပွဲပေါ်တွင် တင်ပြီး ပြောသည်။ “ငါ တစ္ဆေအင်မော်တယ် ဖြစ်လာပြီးနောက်၊ အရင်က ဖတ်ခဲ့တဲ့ စာအုပ်တွေအပေါ် နားလည်မူအသစ်တွေ ပိုပြီးရရှိလာတယ်။ အောင်မြင်မူအကြောင်း ဖွင့်ဆိုထားတဲ့ ဒီစကားလုံး ဆယ့်ခြောက်လုံးကို ကြည့်ပါ “လူ့စိတ်သည် အန္တရာယ် အတွင်းမှာရှိပြီး၊ တာအိုစိတ်နှလုံးက သေးငယ်၏။ အနှစ်သာရက တစ်ခုတည်းဖြစ်ပြီး၊ အလယ်တွင် ဇွဲလုံ့လရှိရမည်တဲ့...။” ဒါက လူ့စိတ်ဟာ အန္တရာယ် ရှိနေတယ်။ တာအိုစိတ်နှလုံးဟာ နူးညံ့သိမ်မွေ့တယ်။ အလယ်ကို ကာကွယ်ခြင်းကသာ အောင်မြင်မယ်ဆိုတဲ့ အဓိပ္ပာယ်ပဲ။ ဒါက ရှေးဟောင်းတာအိုစာအုပ်တွေထဲက ‘အလယ်တည့်တည့်ကို ကာကွယ်တာက စကားအများကြီး ပြောတာထက် ပိုကောင်းတယ်’ ဆိုတဲ့ နိယာမနဲ့ အတူတူပဲ။ မင်းလုပ်သမျှ အရာအားလုံးမှာ လူ့စိတ်ကို တွေးတောပြီး၊ တာအိုစိတ်နှလုံးက သိမ်မွေ့တယ်၊ အနှစ်သာရဟာ တစ်ခုတည်းဖြစ်ပြီး၊ အလယ်တည့်တည့်မှာ ရှိတယ်လို့ ယူဆပြီး၊ တာအိုပညာရပ်တွေထဲက တရားထိုင်ပြီး မေ့လျော့မှု အခြေအနေနဲ့ နှိုင်းယှဉ်ကြည့်ရင်၊ ပါးစပ်၊ မျက်လုံး၊ နား၊ နှာခေါင်းဆိုတဲ့ တံခါးပေါက် လေးခုကနေ ပြင်ပမကောင်းဆိုးဝါးတွေ မထိုးဖောက် မဝင်ရောက်နိုင်အောင် ကာကွယ်ပေးတဲ့ အဆင့်ထက် အများကြီး ပိုမြင့်တယ်။ ဒါပေမယ့် ယခုခေတ် ပညာရှင်တွေက ဒီရှေးဟောင်းစာအုပ်တွေကို နာမည်ဂုဏ်သတင်းနဲ့ ကြီးပွားဖို့အဆင့်တစ်ခုအနေနဲ့သာ အသုံးပြုကြတော့တယ်။ နာမည်ဂုဏ်သတင်းနဲ့ အင်မော်တယ်ဖြစ်မှုကို မရှာဖွေလိုဘဲ အသက်ရှည်ခြင်းကို ရှာဖွေလိုသူတွေကတော့ တာအို ဘုန်းကြီးတွေနဲ့ ဘုန်းတော်ကြီးတွေဆီ သွားကြပြီး အသက်ရှူလေ့ကျင့်ခန်း၊ ချီလမ်းပြခြင်းပညာရပ်၊ စိတ်ကူးပုံဖော်ခြင်းပညာရပ်နဲ့ အိပ်စက်ခြင်း ပညာတွေကို လေ့ကျင့်ကြတယ်။ ဒါပေမယ့် သူတို့ဖတ်တဲ့ စာအုပ်တွေထဲမှာ ကိုယ့်ကိုယ်ကို ကျင့်ကြံနိုင်တဲ့ နိယာမတွေ ပြည့်နှက်နေတာကို သူတို့ မသိကြဘူး။ ဒီနိယာမတွေအတိုင်း လိုက်နာကျင့်ကြံမယ်ဆိုရင်၊ အရာအားလုံးမှာ စိတ်ဝိညာဉ်ကို ပြုစုပျိုးထောင်နိုင်ကြပြီး၊ အနှစ်သာရကလည်း တစ်ခုတည်း ဖြစ်လာမယ်။ ဒါဟာ စိတ်ဝိညာဉ်ကို အခွံထဲကနေ ခွဲထုတ်ပြီး ကျင့်ကြံရတဲ့ တာအိုပညာရပ်တွေထက် အများကြီး သာလွန်တယ်။”

“ကွန်ဖြူးရှပ်ဝါဒရဲ့ ကိုယ့်ကိုယ်ကို ပြုစုပျိုးထောင်ခြင်း နည်းလမ်းဟာ ကျယ်ပြန့်ပြီး နက်နဲတယ်။ တကယ်ကို သိမ်မွေ့တယ်။ ဒါပေမယ့် ကွန်ဖြူးရှပ်ဝါဒဟာ တာအိုကိုသာ ကျင့်ကြံပြီး၊ ပညာရပ်တွေကို မကျင့်ကြံကြဘူး။ ဒါက အသုံးမဝင်ဘူး၊ ရှေးရိုးဆန်လွန်းတယ်။ ကွန်ဖြူးရှပ် မဟာပညာရှင်ကြီးတွေဟာ အတွင်းမှာ ပညာရှင်တွေ ဖြစ်ကြပြီး၊ အပြင်မှာဆို ရှင်ဘုရင်တွေ ဖြစ်ကောင်းဖြစ်မယ်။ မကောင်းဆိုးဝါး ဝိညာဉ်တွေ ကျူးကျော်ဝင်ရောက်နိုင်စွမ်းလည်း မရှိကြဘူး။ ဒါပေမယ့်, သူတို့ဟာ ကမ္ဘာကြီးကို ကယ်တင်ဖို့ ဒါမှမဟုတ် လူသားတွေကို ကယ်တင်ဖို့အတွက် နည်းလမ်းတွေ ပညာရပ်တွေကို အသုံးမပြုနိုင်ကြဘူး။ လက်နက်တွေ သူတို့ဆီ ကျရောက်လာတဲ့အခါ သူတို့အနေနဲ့ ပြန်လည် မတိုက်ခိုက်နိုင်ကြ ဘူး။ ဒါက သိုင်းတပည့်အဆင့် တစ်ယောက်လိုပဲ။ သူ့မှာ ခွန်အားရှိပေမယ့် နည်းလမ်းတွေ၊ ပညာရပ်တွေ မရှိဘူး။” ချန်ယင်းရှာသည် ခေါင်းခါပြီး ပြောသည်။ “ကွန်ဖြူးရှပ်ဝါဒဟာ တော်ဝင်တာအို အကြောင်းကိုသာ ပြောနေပြီး သေးငယ်တဲ့ နည်းလမ်းတွေ၊ မှော်ပညာတွေကို မထီမဲ့မြင်ပြုတယ်။ ဒါပေမယ့် ဒီကမ္ဘာမှာ နိယာမထောင်ပေါင်းများစွာ ရှိတယ်ဆိုတာ သူတို့ မသိကြဘူး။ တော်ဝင်တာအိုကို ထပ်ခါတလဲလဲ ကြားနေရပေမယ့်၊ သေးငယ်တဲ့ ပညာရပ်လေးတွေက ရှာဖွေတွေ့ရှိဖို့ ခက်ခဲတယ်။ သာမန်လူတွေတောင် နိယာမတချို့ကို သိကြတယ်။ ဒါပေမယ့် အခွံထဲကနေ ထွက်ခွာတာ၊ နေ့ဘက်ခရီးသွားတာ၊ ညဘက်ခရီးသွားတာလို သေးငယ်တဲ့ ပညာရပ်တွေကို ဘယ်သူ သိကြလို့လဲ။ တာအိုက အခြေခံအုတ်မြစ် ဖြစ်ပြီး၊ ပညာရပ်တွေက နည်းလမ်းတွေ ဖြစ်တယ်။ ဒီနှစ်ခုစလုံးမရှိလို့ မဖြစ်ဘူး။ တာအိုရှိပေမယ့် ပညာရပ်တွေမရှိရင်၊ ကုန်ကုန်ပြောရရင်, ကိုယ့်ကိုယ်ကို ခုခံကာကွယ်ဖို့ အသုံးမပြုနိုင်ဘူး။ နည်းလမ်းသာရှိပြီး တာအိုမရှိရင်လည်း ဒါက သိုင်းပညာရှင်တစ်ယောက်နဲ့ အတူတူပဲ။ အရင်ဆုံး ခွန်အားကို မလေ့ကျင့်ဘဲ၊ သတ်ဖြတ်နည်းလမ်းတွေကို အရင်သင်ယူရင်၊ အခြေခံအုတ်မြစ် မတည်မငြိမ်ဖြစ်ပြီး ဘာအောင်မြင်မူမှ ရရှိမှာမဟုတ်ဘူး။”

“အင်း၊ မဆိုးဘူး။ တာအို၊ တာအိုပညာ၊ တစ်ခုက အကြီး၊ တစ်ခုကသေး။ နှစ်ခုစလုံးကို သင်ယူရမယ်။ ဒါကြောင့် ငါက နှစ်ခုစလုံးကို လေ့ကျင့်ထားတယ်။ ဒါပေမယ့် ဒီနိယာမက မင်းရဲ့ ပုံမှန်အမြင်နဲ့ မတူဘူးနော်…..။”

ဟုန်ယွိသည် ချန်ယင်းရှာကို အံ့ဩစွာ ကြည့်လိုက်သည်။ ချန်ယင်းရှာသည် ယခုလို နိယာမတွေကို ပြောနိုင်လိမ့်မည်ဟု သူ မမျှော်လင့်ထားပေ။

“ဒါက ငါ့ဆရာက တစ်ချိန်တုန်းက ပြောပြခဲ့တာပဲ။”

ချန်ယင်းရှာက ပြုံးလိုက်ပြီး သူမ၏အမူအရာက လေးနက်လာသည်။ “မင်းရဲ့ ခန္ဓာကိုယ်က မြန်မြန် ပြန်ကြံ့ခိုင်လာမှ ဖြစ်မယ်။ မဟုတ်ရင် တောရိုင်းဒေသမှာ ရတနာရှာဖွေတဲ့အခါ ငါတို့အတွက် အဆင်မပြေ ဖြစ်နိုင်တယ်။ မင်းက တစ္ဆေအင်မော်တယ် ဖြစ်လာပြီဆိုတော့၊ မင်းရဲ့ စိတ်ဝိညာဉ်က အားကောင်းနေပြီ။ ငါတို့နှစ်ယောက် အတူတူလေ့ကျင့်ရင် ငါတို့ရဲ့ ခန္ဓာကိုယ်တွေ အဆင့်ဖြတ်ကျော် ပြီး အားကောင်လာစေနိုင်တယ်။ ကံမကောင်းစွာပဲ, ယွမ်ယန်ကောင်းကင်ပုလဲကို အားလုံး အသုံးပြုပြီးသွားပြီ။ ပြီးတော့ မင်းရဲ့ခန္ဓာကိုယ်က အားနည်းနေတယ်။ ရုပ်ခန္ဓာကိုယ်ကို ကြံ့ခိုင်အောင် လုပ်ဆောင်ပေးနိုင်တဲ့ တခြားမှော်ဆေးဝါးတွေလည်း မရှိတော့ဘူး။ အနှစ်သာရနတ်ဘုရားကျောင်း မှာ နတ်ဘုရား စိတ်ဝိညာဉ်ရဲ့စွမ်းအားကို အသုံးပြုပြီး ရုပ်ခန္ဓာကိုယ်ကို ကြံ့ခိုင်သန်စွမ်းစေပြီး ပြန်လည်ကုစားပေးနိုင်တဲ့ နတ်ဘုရားစိတ်ဝိညာဉ်ကုစားခြင်းဆိုတဲ့ပညာရပ်တစ်ခုရှိတယ်။ ဒါဟာ ခြင်ဆီထုတ်ယူပြီး စွမ်းအင်ပြောင်းလဲခြင်းပညာရပ်နဲ့ လုံးဝ ဆန့်ကျင်ဘက်ပဲ။ ဒီပညာရပ်ကို သင်ယူနိုင်ရင် ကောင်းမယ်။”

“အနှစ်သာရနတ်ဘုရားကျောင်းမှာ ဒီလိုအစွမ်းထက်တဲ့ နည်းလမ်းမျိုး ရှိသေးတာလား…..။”

ဟုန်ယွိသည် အံ့ဩသွားသော်လည်း၊ နောက်ပိုင်းတွင် ယင်နှင့်ယန်၊ ဝိညာဉ်တို့သည် ကြီးမားသော သံသရာစက်ဝိုင်းကြီးတစ်ခုကို ဖြစ်ပေါ်လာနိုင် ကြောင်း ပြန်အမှတ်ရသွားသည်။ ခန္ဓာကိုယ်၏ ချီနှင့်သွေးသည် နတ်ဘုရား စိတ်ဝိညာဉ်ကို အာဟာရဓာတ် ဖြည့်တင်းပေးနိုင်သလို၊ နတ်ဘုရား စိတ်ဝိညာဉ်ကိုလည်း သွေးနှင့်ချီကို အာဟာရဖြည့်တင်းပေးရန် အသုံးပြုနိုင်လိမ့်မည်။

ယင်နှင့်ယန်တို့၏ သံသရာစက်ဝိုင်းနှင့် ဝိညာဉ်၏ အပြန်အလှန်ခြင်းသည် မှန်ကန်သော နိယာမဖြစ်သည်။ မဟုတ်ရင် မပြည့်စုံသလို ဖြစ်နေလိမ့်မည်။

“ဒါနဲ့ပတ်သက်ပြီး၊ ငါ သမိုင်းစာပေတွေ, ပုံပြင်ဝတ္ထုတွေထဲမှာ ဖတ်ဖူးတယ်။ အတိတ်တုန်းက, ငါတို့ရဲ့အရင်စစ်တပ်ဟာ အနောက်ဘက်ဒေသ ဟွာလျိုနိုင်ငံရဲ့တပ်တွေနဲ့ ရင်ဆိုင်တိုက်ခိုက်ခဲ့တဲ့အခါ၊ သူတို့ရဲ့တပ်ထဲမှာ သမားတော်တစ်မျိုး ရှိခဲ့တယ်။ အဲဒီသမားတော်တွေဟာ စစ်မြေပြင်မှာ သူတို့လက်ကို တစ်ချက်ဝှေ့ယမ်းရုံနဲ့ သွေးထွက်တာကို ရပ်တန့်ပြီး ဒဏ်ရာတွေကို ကုသနိုင်ခဲ့တယ်။ ဒါကြောင့် အနောက်ဒေသရဲ့ တပ်တွေဟာ အင်အားနည်းပေမယ့်၊ အမြဲတမ်း ခုခံနိုင်ခဲ့တယ်။”

ဟုန်ယွိက ရုတ်တရက် ပြောလိုက်သည်။

“ဟုတ်တယ်၊ အဲဒါက နတ်ဘုရားစိတ်ဝိညာဉ်ကုစားနည်းပဲ။” ချန်ယင်းရှာက ခေါင်းညိတ်လိုက်သည်။ “ကံမကောင်းစွာပဲ၊ ဒီနည်းလမ်းဟာ လျှို့ဝှက်ချက်တစ်ခု ဖြစ်တယ်။ ငါ တစ်ချိန်က အနောက်ဒေသ ကို သွားပြီး၊ သမားတော်တချို့ကို ဖမ်းဆီးကာ၊ အဲဒီနည်းလမ်းကို ဖွင့်ပြောဖို့ အတင်းအကျပ် တွန်းအားပေးသေးတယ်။ ဒါပေမယ့် ဒီလူတွေဟာ အလွန်ခေါင်းမာကြတယ်။ အဲဒီနည်းလမ်းကို ဖွင့်ပြောမယ့်အစား သူတို့ရဲ့ ဝိညာဉ်တွေကို ကိုယ်တိုင်ဖျက်ဆီးပြီး အရူးဖြစ်မှာကို နှစ်သက်ကြတယ်။”

“မျှော်လင့်ထားသလိုပဲ။ တော်ဝင်တာအိုက ရယူဖို့လွယ်ကူပေမယ့်၊ သေးငယ်တဲ့ ပညာရပ်တွေကို ရယူဖို့က ခက်ခဲလွန်းတယ်။”

ဟုန်ယွိ၏ အနည်းငယ် ဖြူဖျော့နေသော မျက်နှာပေါ်တွင် နီရဲသောအရိပ်ယောင် ပေါ်ထွက်လာ သည်။ သူက ဒူးပေါ်မှာ ဖုံးလွှမ်းထားသော စောင်ကို ဖယ်ရှားပြီး ထရပ်လိုက်သည်။ “ဒါပေမယ့် ဒီရက်ပိုင်းမှာ သိုင်းပညာနှစ်ခုကို လေ့လာပြီး ပေါင်းစပ်ရင်း အရာများစွာကို သိမြင်လာခဲ့တယ်။ ငါ့ခန္ဓာကိုယ် ပြန်လည်သန်စွမ်းဖို့က အချိန်တစ်ခုပဲလိုတယ်…..။”

ဟုန်ယွိသည် ထရပ်လိုက်သည်နှင့်၊ သူ့ခန္ဓာကိုယ်က ရုတ်တရက် မယုံနိုင်လောက်အောင် အားကောင်းလာခဲ့သည်။

ချန်ယင်းရှာသည် ဟုန်ယွိက သူ၏သိုင်းလက်သီးဆန္ဒကို ထပ်မံစုစည်းနေပြီဟု ယောင်ဝါးဝါး ခံစားလာရသည်။

ဟုန်ယွိသည် အနည်းငယ် အသက်ရှူသွင်းကာ ထုတ်လွှတ်လိုက်ပြီး၊ ထို့နောက် သူ၏လက်သီးသည် လေထုကို ဖြတ်သန်းကာကာ၊ ဆက်လက် ထိုးသွင်းလိုက်သည်။ သူသည် အဆုံးမဲ့ အသက်စွမ်းအင်များ ပါဝင်နေသည့် လက်သီးပညာရပ်တစ်စုံကို လှုပ်ရှားစဉ် သူ၏လက်မောင်း၊ တံတောင်ဆစ်၊ ဒူးများသည် ဓားလှံများအလား ထင်မှတ်ရပြီး၊ သူ၏အကြောများသည် လေးညှို့နှင့်တူပြီး၊ သူ၏အရေပြားက ဗုံတစ်လုံးအတိုင်းပင်။

ချန်ယင်းရှာသည် ဟုန်ယွိ၏ လှုပ်ရှားမှုများက နဂါးဆင်တံဆိပ်နှင့် မိုရာနတ်ဘုရားတူကဲ့သို့ သိုင်းပညာရပ်များ၏ ကိုယ်နေဟန်များကို အခြေခံထား ကြောင်း မြင်တွေ့ရသည်။ သို့သော် သူ၏လှုပ်ရှားမှုများသည် မနှေးလွန်း မမြန်လွန်းလည်းပေ။ တိုက်ခိုက်မှုနှင့် ကာကွယ်မှုက ဟန်ချက်ညီလှသည်။ သူသည် မတူညီသော အရာများကို ပေါင်းစပ်ခြင်း နည်းလမ်းကို ဆုပ်ကိုင်ထားနိုင်ပုံရပြီး၊ တစ်ချိန်တည်းမှာပင် သိုင်းပညာ၏ မမြင်ရသော အခြေခံ အုတ်မြစ်တစ်ခုကို ဖမ်းဆုပ်မိပုံရသည်။

“ဒါဟာ သိုင်းပညာရပ်မှာဆို ရွှေရောင်တောက်တယ်လို့ (အောင်မြင်မူရတယ်) ဆိုလိုတာပဲ။ အနှစ်သာရက တစ်ခုတည်းဖြစ်ပြီး၊ ခန္ဓာကိုယ်ရဲ့ အရင်းအမြစ်နဲ့ အသက်စွမ်းအင်လည်း ဖြစ်တယ်။” ဟုန်ယွိသည် အကြိမ်အနည်းငယ် လှည့်ပတ်လိုက်ပြီး၊ သူ့ခန္ဓာကိုယ်၏ ဖြူဖျော့ဖျော့ အရောင်သည် အနည်းငယ် ပိုမိုသက်ဝင်လာသည်။ တဖြည်းဖြည်း၊ သူသည် အားကောင်းသော အငွေ့အသက်ကို ထုတ်လွှတ်လာသည်။

“ဟင်….။ မင်းရဲ့လှုပ်ရှားမှုတွေထဲမှာ၊ မင်းရဲ့ဝိညာဉ်နဲ့ နတ်ဘုရား စိတ်ဝိညာဉ်ကလည်း မင်းရဲ့ လှုပ်ရှားမှုတွေနဲ့အတူ တုန်ခါနေသလို ငါ ခံစားနေရ တယ်။ ဒီအထဲမှာ ဝိညာဉ်နဲ့စိတ်ဝိညာဉ်ရဲ့ ခန္ဓာကိုယ်ကို အာဟာရဖြည့်တင်းပေးမူရဲ့ အရိပ်အယောင်တစ်ခုခုများ ရှိနေသလားလို့….” ချန်ယင်းရှာက အံ့ဩစွာ ပြောသည်။

“ဘာမှမဟုတ်ပါဘူး။ ငါ စိတ်ဝိညာဉ်နဲ့ ခန္ဓာကိုယ် ပေါင်းစည်းမှုရဲ့ နိယာမကိုအချို့ကို အနည်းငယ် နားလည်လာရုံပါ။” ဟုန်ယွိက အနည်းငယ် ပြုံးလိုက်သည်။

ထိုလက်သီးသိုင်းတစ်စုံကို အပြီးသတ်ပြီးနောက် သူ့ခန္ဓာကိုယ်၏ ဖြူဖျော့ဖျော့အရောင်သည် လုံးဝ ပျောက်ကွယ်သွားပြီး၊ ကျန်းမာသောမျက်နှာနှင့်အတူ အနီရောင်သမ်းလာခဲ့သည်။

“သိုင်းပညာမှာ စိတ်ဝိညာဉ်နဲ့ ခန္ဓာကိုယ် ပေါင်းစည်းနိုင်မှုက ဝိညာဉ်နဲ့ စိတ်ဝိညာဉ်ကို အာဟာရ ဖြည့်တင်းပေးတာပဲ။ ငါက တစ္ဆေအင်မော်တယ် အဆင့်အထိ ကျင့်ကြံပြီးပြီဆိုတော့၊ စိတ်ဝိညာဉ်နဲ့ ခန္ဓာကိုယ်ကို အမှန်တကယ် ပေါင်းစည်းလို့ မရတော့ဘူး။ ဒါပေမယ့်၊ ဒီနိယာမကို အသုံးပြုပြီး လက်သီးပညာရပ်ကို လေ့ကျင့်နိုင်တယ်။ ငါက စိတ်ဝိညာဉ်ကို အသုံးပြုကာ၊ သွေးနဲ့ချီစွမ်းအင်ကို အာဟာရဖြည့်ပေးနိုင်ပြီး၊ ယင်နဲ့ယန်ရဲ့ အချင်ချင်း ပြန်လည် ဖြည့်စွက်ပေးခြင်းဆိုတဲ့ အကျိုးသက်ရောက်မှုတချို့ကိုလည်း ရရှိနိုင်တယ်။ ဒါပေမယ့် ဒါဟာ ရုပ်ခန္ဓာကိုယ်ကို အာဟာရဖြည့်ပေးရုံပါပဲ။ အနှစ်သာရနတ်ဘုရားကျောင်းရဲ့ နတ်ဘုရားစိတ်ဝိညာဉ်ကုစားခြင်းပညာရပ်နဲ့ နှိုင်းယှဉ်ရင်၊ အများကြီး နိမ့်ကျပါတယ်။”

“နားလည်ပြီ။” ချန်ယင်းရှာလည်း နားလည်သွားသည်။ “ဒါဆို ငါ စိတ်ချလက်ချ နားနေလို့ရပြီ။ မင်းရဲ့ သင်္ဘောအုပ်စုကို အရင်ဆုံး ယွန်နိုင်ငံကို မောင်းနှင်လိုက်ပါ။ အဲဒီမှာ ငါ မင်းအတွက် လူ ၂,၀၀၀ လောက် ထားနိုင်တဲ့ စံအိမ်ကြီးတစ်ခု စီစဉ်ပေးမယ်။ ဒီလူတွေကို အခြေချပြီးရင်၊ ငါတို့ တောရိုင်းဒေသကို ထွက်သွားပြီး စကြာဝဠာအိတ်ကို ရယူကြမယ်။ ဘီရှီဟွာနဲ့ သူ့အဖွဲ့လည်း အဲဒီကို သေချာပေါက် သွားမှာပဲ။ သူ့ကို သတ်ဖို့ အခွင့်အရေးရှာမယ်။ မင်းရဲ့ သင်္ဘောအုပ်စုကြီးနဲ့ တောရိုင်းဒေသကို သွားဖို့ဆို ပစ်မှတ်ကြီးက ထင်းလွန်းနေတယ်။”

“ဒါက သဘာဝပဲ။ ငါလည်း မင်းရဲ့အင်အားကို ငှားရမ်းပြီး ဒီဧကရာဇ်စေတမန်ရဲ့ သင်္ဘောတွေကို ပြုပြင်ပြောင်းလဲချင်နေတာ။ ဒါမှ ဘယ်သူမှ မမှတ်မိနိုင်မှာ။ မဟုတ်ရင် ပင်လယ်ပြင်မှာ တခြားရေတပ်ရဲ့ ဗိုလ်ချုပ်တွေနဲ့ ဆုံမိရင်၊ စကားပြောရခက်မယ်။” ဟုန်ယွိသည် ထိုကိစ္စကို ကြိုတင် စီစဉ်ထားပြီး ဖြစ်သည်။

မူလက နတ်ဘုရားလေနိုင်ငံမှာ စံအိမ်တစ်ခု ဝယ်ယူနိုင်ခဲ့သော်လည်း၊ နတ်ဘုရားလေနိုင်ငံသည် တော်ဝင်ချန်နှင့် အလွန်နီးကပ်လွန်းသည်။ ထို့ပြင် နတ်ဘုရားလေနိုင်ငံသည် တော်ဝင်ချန်၏ လက်အောက်ခံနိုင်ငံ ဖြစ်သည်။ တစ်စုံတစ်ရာ ဖြစ်ပေါ်လာပါက၊ သူတို့သည် စုံစမ်းစစ်ဆေးနိုင်သည်။ တော်ဝင်ချန်ဧကရာဇ်က အမိန့်ပေးလိုက်လျှင်, နတ်ဘုရားလေနိုင်ငံက ကူညီပေးလိမ့်မည်။

သို့သော်၊ ယွန်နိုင်ငံသည် ထူးခြားသည်။ ယွန်နိုင်ငံသည် တော်ဝင်ချန်နှင့် အလွန်ဝေးကွာသည်။ ထို့ပြင်၊ ၎င်းသည် လွတ်လပ်သောနိုင်ငံတစ်ခု ဖြစ်သည်။ တော်ဝင်ချန်သည် ၎င်းကို ထိန်းချုပ်၍ မရပေ။ ယွန်နိုင်ငံထက် အခြေချနေထိုင်ရန် ပိုမိုကောင်းမွန်သော နေရာတစ်ခု ရှိပါမည်လား။

မူလက ဟုန်ယွိသည် လူသူကင်းမဲ့သော ကျွန်းတစ်ကျွန်းကို ရှာဖွေပြီး၊ ထိုနေရာတွင် မြေလွတ်မြေရိုင်းများကို သိမ်းယူကာ ပြန်လည်ထူထောင်ရန် စီစဉ်ခဲ့သည်။ သူသည် လူ ၂,၀၀၀ ကို ဦးဆောင်ပြီး နိုင်ငံတစ်နိုင်ငံ တည်ထောင်လိုခဲ့သည်။ သို့သော်၊ တွက်ချက်ကြည့်ပြီးနောက်၊ လူသူကင်းမဲ့သော ကျွန်းပေါ်တွင် လူ ၂,၀၀၀ အတွက် အိမ်များ မရှိပေ။ ၎င်းတို့သည် လယ်ယာစိုက်ပျိုးရန်၊ တိရစ္ဆာန်မွေးမြူရန်၊ အိမ်များဆောက်လုပ်ရန်၊ အဝတ်အထည်များ ပြုလုပ်ရန်၊ ဆားဖုတ်ရန် စသည်ဖြင့် လုပ်ငန်းအများပြား လုပ်ဆောင်ကြရမည်။ ဘဝက မလွယ်ကူသလို၊ အရင်းအမြစ်များလည်း မလုံလောက်ပေ။ သူတို့သည် အသားစိမ်းစားပြီး သွေးသောက်ကာ နေထိုင်ကြရမည်။ နိုင်ငံတစ်နိုင်ငံ တည်ထောင်ရန် အချိန်မည်မျှကြာမည်ကို မည်သူ သိမည်နည်း…။

အကယ်၍ စကြာဝဠာအိတ်ကဲ့သို့သော အရာတစ်ခုရှိခဲ့ပါက၊ ထိုအထဲတွင် အမျိုးမျိုးသော အရင်းအမြစ်များကို ထည့်သွင်းနိုင်ပြီး၊ မြေလွတ်မြေရိုင်းများ ကို လျင်မြန်စွာ ပြန်လည်ထူထောင်နိုင်မည် ဖြစ်သည်။ မဟုတ်ပါက၊ ဤသင်္ဘောများတွင် သယ်ဆောင်လာသော အရင်းအမြစ်များဖြင့် တစ်လအထိ ရှင်သန်နိုင်ရင်တောင်၊ သိုင်းပညာကို လေ့ကျင့်ရန် အချိန်မရှိပေ။

ယခု သူသည် ချန်ယင်းရှာနှင့် ရင်းနှီးလာပြီ ဖြစ်သောကြောင့်၊ ယွန်နိုင်ငံတွင် အခြေချခြင်းသည် အကောင်းဆုံးရွေးချယ်မှု ဖြစ်သည်။

သူသည် နေ့စဉ်လူနေမှုဘဝအတွက် စိတ်ပူစရာမလိုပေ။ အရင်းအမြစ် အမျိုးမျိုးဖြင့်၊ သူသည် သူ၏အချိန်နှင့် စွမ်းအင်အားလုံးကို သိုင်းပညာ လေ့ကျင့်ရာမှာ အာရုံစိုက်နိုင်လိမ့်မည်။ သူ၏ လက်အောက်ငယ်သားများဖြစ်သော စစ်သားများသည်လည်း လျင်မြန်စွာ တိုးတက်လာနိုင်မည်။

အကြောင်းမှာ၊ နဂါးအလံပေါ်တွင် သူတို့၏လက်ဗွေရာကို နှိပ်ပြီးနောက်၊ သူ၏လက်အောက်ရှိ စစ်သားများသည် ဟုန်ယွိကိုသာ အသိအမှတ်ပြုပြီး၊ သူ၏အမိန့်များကိုသာ နာခံကြရတော့မည်။

ဟုန်ယွိသည် ဆုံးဖြတ်ချက်ချပြီးနောက်၊ ယွန်နိုင်ငံသို့ ချဉ်းကပ်ကာ ကမ်းဆင်းရန် ပြင်ဆင်နေချိန်မှာ……။ ကျယ်ပြန့်သော ပင်လယ်ပြင်ပေါ်တွင် သင်္ဘောအုပ်စုများစွာသည် လျင်မြန်စွာ ရွက်လွှင့်နေသည်။

ပင်လယ်ပြင်ပေါ်ရှိ အခြေအနေသည် မည်သူမျှ စိတ်မကူးနိုင်လောက်အောင် ရှုပ်ထွေးနေသည်။

ဤအချိန်တွင်၊ ယွန်နိုင်ငံမှ ၅၀၀ ကီလိုမီတာ အကွာအဝေးရှိ ပင်လယ်ပြင်တွင်၊ စစ်သင်္ဘော ၃၀ ကျော်ပါဝင်သော ကြီးမားသော သင်္ဘောအုပ်စုတစ်ခုသည် ပြင်းထန်စွာ ရှေ့သို့ ချီတက်လာနေသည်။

ရှေ့ဆုံးမှ သင်္ဘောကြီးသည် မက်မွန်နတ်ဘုရားသင်္ဘောထက်ပင် ပိုမိုကြီးမားသည်။ ၎င်း၏ သင်္ဘောကိုယ်ထည်တစ်ခုလုံးသည် ပြဒါးနီရောင်ဖြစ်ပြီး၊ သွေးစက်များကဲ့သို့ တောက်ပလျက်ရှိသည်။ သင်္ဘောပေါ်တွင် အလံတစ်စင်းက လေထဲတွင် တဖျပ်ဖျပ်ခတ်ကာ လွင့်မျောနေ၏။ အဝေးမှ ကြည့်လိုက်သောအခါ၊ သင်္ဘောအထက်တွင် ခြိမ်းခြောက်နိုင်သည့် သတ်ဖြတ်ခြင်း အငွေ့အသက်တစ်ခုက မျက်စိဖြင့် မမြင်နိုင်၊ ပုံသဏ္ဍာန် ကင်းမဲ့ သည့် အော်ရာကွင်းပြင်ကြီးတစ်ခုအဖြစ် စုစည်းနေပုံရသည်။ ထိုတဟုန်ထိုး ပျံ့နှံ့နေသော အော်ရာကွင်ပြင်ကြီးသည် ပင်လယ်ထဲရှိ အာရုံခံနိုင်စွမ်းရှိ သော ရက်စက်ကြမ်းကြုတ်သော သားရဲများ၊ မကောင်းဆိုးဝါးရေနဂါးများ၊ နာကျဉ်းဝိညာဉ်များနှင့် တစ္ဆေများကို ချဉ်းကပ်ရန် မဝံမရဲဖြစ်စေသည်။

ပုံမှန်အားဖြင့်၊ ချီအာရုံခံစားမူ ပညာရပ်ကို သိရှိထားသော တာအိုပညာရှင်တစ်ဦးသည် သင်္ဘောထိပ်တွင် ဤကဲ့သို့ ခြိမ်းခြောက်နိုင်စွမ်း ကြီးမားပြီး၊ ရက်စက်ကြမ်းကြုတ်သော အငွေ့အသက်ကို အာရုံခံမိပါက၊ ၎င်းသည် လက်ရွေးစင် စစ်တပ်တစ်ခုဖြစ်ကြောင်း သိရှိကြမည် ဖြစ်သည်။ ထိုကဲ့သို့ စစ်တပ်သည် တစ္ဆေများ၊ အင်မော်တယ်များ၊ ဗုဒ္ဓများပင်လျှင် ဆုတ်ခွာကြရမည်။ ထိုစစ်တပ်သည် ပြီးပြည့်စုံစွာ လေ့ကျင့်ထားပြီး၊ လူထောင်ပေါင်း များစွာ၏ စိတ်ဆန္ဒကို တစ်ခုတည်းအဖြစ် စုစည်းထားသည်။ ၎င်းတို့၏ အတွေးများသည် ရဲဝံ့စွာ ရှေ့သို့ ချီတက်နေပြီး၊ ၎င်းတို့၏ လှုပ်ရှားမှုများသည် လူတစ်ဦးတည်းကဲ့သို့ ဖြစ်နေသည်။

မက်မွန်နတ်ဘုရားသင်္ဘောထက် ပိုမိုကြီးမားသော ဤသင်္ဘောကြီးသည် စစ်သင်္ဘော ၃၀ ကျော်ကို ဦးဆောင်နေပြီး၊ စစ်ဦးစီးချုပ် အရာရှိတစ်ဦး၏ သင်္ဘောဖြစ်ကြောင်း ထင်ရှားသည်။ ၎င်းသည် တော်ဝင်ချန်ရေတပ်၏ ထူးခြားသော ချီလင်စစ်သင်္ဘောကြီး ဖြစ်သည်။ ၎င်းသည် မက်မွန်နတ်ဘုရား သင်္ဘောများကဲ့သို့ ခိုင်ခံ့မှုမရှိသလို၊ ကပ်ရောဂါများကိုလည်း ကာကွယ်နိုင်စွမ်း မရှိပေ။ ထို့အပြင်, ရေခုခံအားကို လျှော့ချနိုင်စွမ်း မရှိ၊ မီးဒဏ်ကိုပါ ခံနိုင်စွမ်းမရှိသော်လည်း၊ ၎င်း၏ သင်္ဘောကျောရိုးသည် ကြီးမားပြီး ခမ်းနားထည်ဝါလွန်းသည်။

သင်္ဘောပေါ်တွင် လွှင့်ထူထားသော အလံများစွာသည် အကြီးစား အနက်ရောင် ချီလင်ပုံများဖြင့် ပန်းထိုးထားသည်။ အလံများ လေထဲတွင် လွှင့်မျောနေစဉ်၊ အနက်ရောင် ချီလင်တစ်ကောင် အသက်ဝင်လာသည့်အလား ထင်မှတ်ရသည်။

ဤအလံကို မြင်ဖူးသည့် မည်သူမဆို၊ တော်ဝင်ချန်၏ စစ်တပ်များကို နားလည်သူဆိုပါက၊ ၎င်းသည် တော်ဝင်ချန်၏ အသက်အငယ်ဆုံး စစ်ဦးစီးအရာရှိဖြစ်သလို၊ အသက်အငယ်ဆုံးမြို့စားဖြစ်သည့် ချန်ပီယံမြို့စား၏ သင်္ဘောဖြစ်ကြောင်း သိရှိကြလိမ့်မည်။

ချန်ပီယံမြို့စား ဦးဆောင်သော စစ်တပ်၏အမည်မှာ ချီလင်စစ်တပ် ဖြစ်သည်။

ဤအချိန်တွင်၊ ချီလင်စစ်သင်္ဘော ပေါ်တွင်၊ အလံတစ်ခုချင်းစီ အောက်တွင် အနက်ရောင်သံမဏိ အကြီးစားသံချပ်ကာများကို ဝတ်ဆင်ထားသော စစ်သားတစ်ဦး ရပ်နေကြသည်။ ၎င်းတို့၏ခါးတွင် ဓားတစ်ချောင်းကို ချိတ်ဆွဲထားပြီး၊ ရုပ်သေးရုပ်များကဲ့သို့ မလှုပ်မယှက် ရပ်နေကြခြင်း ဖြစ်သည်။

သင်္ဘောပေါ်တွင် အနည်းဆုံး အလံ ၄၀၀ ကျော်ရှိပြီး၊ အလံများအောက်တွင် စစ်သား ၄၀၀ ကျော် ရှိသည်။ ဤစစ်သားများ၏ အသက်ရှူသံနှင့် နှလုံးခုန်သံများသည် အတူတူပင်ဖြစ်သည်။ အကယ်၍ တစ်စုံတစ်ယောက်သည် မျက်လုံးများကို မှိတ်ထားပြီး လူ ၄၀၀ ကျော်၏ အသက်ရှူသံနှင့် နှလုံးခုန်သံကို နားထောင်ပါက၊ ၎င်းတို့ရှေ့တွင် လူ ၄၀၀ ကျော် မဟုတ်ဘဲ၊ ဧရာမဘီလူးတစ်ကောင် ရှိသလို ခံစားရလိမ့်မည်။ အကြောင်းမှာ အသက်ရှူသံ ၄၀၀ ကျော်နှင့် နှလုံးခုန်သံ ၄၀၀ ကျော်သည် လုံးဝ တပြိုင်နက်တည်း ဖြစ်နေပြီး၊ တစ်ခုတည်းအဖြစ် ပေါင်းစည်းထားသည်။

စစ်ဦးစီးချုပ်အရာရှိ၏ သင်္ဘောတစ်စင်းတည်းသာ မဟုတ်ပေ။ စစ်သင်္ဘော ၃၀ ကျော်ပေါ်ရှိ လူများ၏ အသက်ရှူသံနှင့် နှလုံးခုန်သံများသည်လည်း အတိအကျ တူညီနေသည်။ စစ်သင်္ဘော ၃၀ သည် ပင်လယ်ပြင်ပေါ်တွင် အတူတကွ ရွေ့လျားနေသည့် ကောင်းကင်ဘီလူးကြီး ၃၀ ကျော်အလား ထင်မှတ်ရပါသည်။

အခန်း (၂၀၉)။

“အစ်ကိုရှောင်၊ ဒီချီလင်စစ်တပ်ဟာ သိုင်းတာအိုရဲ့ အထွတ်အထိပ်မှာ ရှိနေကြတယ်။ ဒီစစ်သည်တွေကို ကြည့်လိုက်ပါ။ သူတို့တစ်ဦးချင်းစီဟာ အားကောင်းပြီး တက်ကြွနေကြတယ်။ သူတို့ရဲ့စိတ်ဆန္ဒက ကောင်းစွာသန့်စင်ထားတဲ့ သံမဏိတုံးလိုပဲ။ ပိုပြီးအရေးကြီးတာက သူတို့ရဲ့ အသက်ရှူသံ နဲ့ နှလုံးခုန်သံတွေက အတိအကျ တူညီကြပြီး၊ လူထောင်ပေါင်းများစွာက လူတစ်ယောက်တည်းလိုပဲ။ ငါဟာ ကမ္ဘာတဝှမ်း ခရီးထွက်ခဲ့ဖူးပြီး ချာရာ၊ ယွန်မင်နဲ့ ယွမ်တူနိုင်ငံတွေက အထူးချွန်ဆုံး စစ်သည်တွေကို မြင်တွေ့ခဲ့ဖူးပေမယ့်၊ ချီလင်စစ်တပ်လို တစ်ခုမျှ မရှိခဲ့ဘူး….။”

စစ်သင်္ဘော ၃၀ ပေါ်တွင်၊ တာအိုဘုန်းကြီးဝတ်ရုံ ဝတ်ဆင်ထားသော တာအိုဘုန်းကြီးနှစ်ဦးသည် ကျောပေါ်တွင် ဓားရှည်တစ်ချောင်းကို လွယ်ထားပြီး၊ လက်ထဲတွင် အဖြူရောင် ကျောက်စိမ်းမြင်းမြီးတုတ်ချောင်းကို ကိုင်ထားကာ၊ ကျယ်ပြန့်သော ပင်လယ်ပြင်နှင့် သင်္ဘောပေါ်ရှိ အင်အားကြီးမားသော စစ်သည်များကို ကြည့်ရင်း သက်ပြင်းချကာ ညွှန်ပြနေသည်။

ဤတာအိုဘုန်းတော်ကြီး နှစ်ဦးသည် တော်ဝင်ချန်၏ တာအိုဂိုဏ်းများမှ ခေါင်းဆောင်နှစ်ဦး ဖြစ်ကြသည် သူတို့သည် ဖန်ရှင်းတာအိုဂိုဏ်း၏ ဂိုဏ်းချုပ် ရှောင်အန်ရန်နှင့် အမှန်တရားတာအိုဂိုဏ်း၏ အကြီးအကဲ ကျန်းဘိုဟန်တို့ ဖြစ်သည်။

“ဘိုဟန်ညီအစ်ကို၊ အတိတ်ကာလတုန်းက မြို့စားဝူဝမ် ဟုန်ရွှန်ကျိရဲ့ လက်အောက်က စစ်သည်တွေလည်း ဒီလိုပဲ အင်အားကြီးမားခဲ့တယ်။ ငါတို့ တော်ဝင်ချန်က ထူးချွန်သူတွေနဲ့ ပြည့်နှက်နေပြီး၊ ပါရမီရှင်တွေလည်း တစ်ဦးပြီးတစ်ဦး ပေါ်ထွက်လာနေတယ်။ ယွန်မင်၊ ယွမ်တူနဲ့ ဟွာလျှိုနိုင်ငံတွေ ကို လက်အောက်ခံအဖြစ် ပြောင်းလဲကာ ကမ္ဘာကြီးကို အမှန်တကယ် စုစည်းနိုင်ဖို့ မျှော်လင့်ချက်ရှိတယ်။ ဒီကမ္ဘာကြီးအောက်မှာ၊ ဘုရင်ပိုင်မဟုတ်တဲ့ နယ်မြေဆိုတာ မရှိတော့ဘူး။” (ဟွာလျှိုနဲ့ ချာရာနိုင်ငံတို့သည် အတူတူပင် ဖြစ်ပါသည်။)

ချန်ပီယံမြို့စား လက်အောက်ရှိ စစ်သင်္ဘော ၃၀ မှ စစ်သားများကို ကြည့်နေစဉ် ရှောင်အန်ရန်၏ မျက်နှာအမူအရာကို ဖတ်ရူ၍မရပေ။

တစ်ချိန်တည်းမှာပင်၊ သူ့မျက်လုံးများက ရှေ့ဆုံးရှိ အကြီးဆုံး ချီလင်စစ်သင်္ဘော၏ ထိပ်ဆုံးသို့ လှည့်ကြည့်လိုက်ပါသည်။ သူ၏ အာရုံခံနိုင်စွမ်း မြင့်မားသော စိတ်ဝိညာဉ်ဖြင့်၊ သူသည် ထိုနေရာတွင် သက်တံရောင်စုံအလင်းကဲ့သို့ ချီအနှစ်သာရတစ်ခု ရှိနေသည်ကို ‘မြင်’ နိုင်ခဲ့သည်။ ၎င်းသည် ကောင်းကင်ယံသို့ တည့်တည့်မတ်မတ် ထိုးတက်နေပြီး၊ ကောင်းကင်ယံတွင် ပြင်းထန်သော လေပြင်းများ တိုက်နေသော်လည်း ၎င်းကို မလွှင့်ထုတ်နိုင်ခဲ့ပေ။

ဤသက်တံရောင်စုံအလင်းကဲ့သို့ ချီအနှစ်သာရသည် ကောင်းကင်နှင့် မြေကြီးကြား ဖြတ်သန်းနေပြီး၊ ကမ္ဘာကြီးကို ထောက်ကူထားပေးသည့် အလား ဖြစ်နေသည်။

“လူတစ်ယောက်ရဲ့ ချီအနှစ်သာရဟာ အချက်ပြမီးခိုးတွေလို စုစည်းပြီး ကောင်းကင်ဘုံ ကိုးအဆင့်အထိ ထိုးတက်သွားခဲတယ်။ ဒါက သူတော်စင် တစ်ပါးရဲ့ အငွေ့အသက် ဖြစ်ပြီး၊ မကောင်းဆိုးဝါး အားလုံးကို တွန်းလှန်နိုင်ကာ၊ နတ်ဆိုးရာပေါင်းများစွာ ချဉ်းကပ်ဖို့ မဝံ့မရဲ ဖြစ်စေနိုင်တယ်။ ငါ့ဘဝတစ်လျှောက်လုံး၊ ဒီလိုချီအနှစ်သာရကို ပိုင်ဆိုင်ထားသူ လူအနည်းငယ်ပဲ တွေ့ဖူးသည်။ ဒီချန်ပီယံမြို့စားက တကယ်ကို နားမလည်နိုင် လောက်အောင် ထူးချွန်သူတစ်ဦးပဲ။”

ရှောင်အန်ရန် မြင်တွေ့ခဲ့သော ချီအနှစ်သာရသည် ချီလင်စစ်သင်္ဘောပေါ်ရှိ ချန်ပီယံမြို့စား ရှိနေသော သင်္ဘောခန်းအတွင်းမှ ဖြစ်သည်။

ဝံပုလွေချေးများဖြင့် လောင်ကျွမ်းထားသော အချက်ပြမီးခိုးများသည်မျဉ်းဖြောင့်တစ်ခုကဲ့သို့ ကောင်းကင်ဘုံကိုးဆင့်အထိ တည့်တည့်မတ်မတ် တိုးတက်သွားနိုင်သည်။ လေများ မည်မျှပင် ပြင်းထန်စွာ တိုက်ခတ်နေစေကာမူ၊ ၎င်းကို မလွှင့်ထုတ်နိုင်ပေ။ ထို့ကြောင့်၊ အချက်ပြမီးခိုးများကို စစ်ရေးသတင်းအချက်အလက်များတွင် အချက်ပြမီးခိုးအဖြစ် အသုံးပြုသည်။

လူတစ်ဦးတစ်ယောက်၏ ချီအနှစ်သာရကိုမူ၊ ချီအနှစ်သာရ လေ့လာထားသော တာအိုပညာရှင်များသည် ကြည့်ရူပြီး၊ အချက်ပြမီးခိုးနှင့်တူသော ချီအနှစ်သာရကို မြင်တွေ့နိုင်ကြသည်။ ၎င်းသည် ကောင်းကင်ဘုံကိုးဆင့်အထိ တည့်တည့် ထိုးတက်သွားပြီး၊ ဤလူသည် သူတော်စင်တစ်ဦး ချီဖြစ်ကြောင်း သိရှိနိုင်ကြသည်။ ၎င်းသည် နှစ်ငါးရာတွင် တစ်ကြိမ်သာ တွေ့မြင်ရသော ကြီးမြတ်သော ကွန်ဖြူးရှပ်ဝါဒီပညာရှင်တစ်ဦး မဟုတ်ပါက၊ သိုင်းပညာတွင် သူတော်စင်တစ်ဦး ဖြစ်လိမ့်မည်။

ပို၍အရေးကြီးသည်မှာ၊ ယခုလို အချက်ပြမီးခိုးကဲ့သို့ ကောင်းကင်နှင့် မြေကြီးကို ထိုးဖောက်သွားသော ချီအနှစ်သာရသည် သာမန် သိုင်းသူတော်စင် တစ်ဦးတွင် ရှိမည် မဟုတ်ပေ။ ဝူအိမ်တော်ထိန်းနှင့် ဟုန်ယွိ တိုက်ခိုက်ခဲ့စဉ်တုန်းက ဟုန်ယွိသည် ဤမျှပြင်းထန်သော အငွေ့အသက်မျိုးကို မခံစားခဲ့ရပေ။

ကမ္ဘာပေါ်တွင် ၎င်းတို့၏ အနှစ်သာရ၊ ချီနှင့် စိတ်ဝိညာဉ်ကို ဤမျှအတိုင်းအတာအထိ ကျင့်ကြံနိုင်ပြီး၊ တာအိုပညာရှင်များကို ဤမျှပြင်းထန်သော ချီအနှစ်သာရကို ခံစားရအောင် လုပ်ဆောင်နိုင်သူများသည် အလွန်ရှားပါးသည်။

ရှောင်အန်ရန်သည် ဤအရာကို မြင်တွေ့သောအခါ၊ တော်ဝင်ချန်မင်းဆက်၏ ပညာမီရှင်များ၏ စွမ်းရည်ကို သက်ပြင်းမချဘဲ မနေနိုင်တော့ပေ။

“ညီအစ်ကို ဘိုဟန်၊ ဒီအကြိမ်မှာ တော်ဝင်ချန်ဧကရာဇ်က ငါတို့ကို ချန်ပီယံမြို့စားနဲ့အတူ တောရိုင်းဒေသသို့ လိုက်ပါပြီး စကြာဝဠာအိတ်ရဲ့ သဲလွန်စကို ရှာဖွေဖို့ အမိန့်ပေးထားတယ်။ ဒီခရီးက အလွန်အန္တရာယ်များပြီး မမျှော်လင့်ထားတဲ့အရာတွေ ဖြစ်ပေါ်လာနိုင်တယ်။” ရှောင်အန်ရန် သည် ကောင်းကင်ယံသို့ တည့်တည့်ထိုးတက်နေသော ချီအနှစ်သာရကို ကြည့်ပြီး၊ သူ၏အကြည့်ကို ပြန်လည်ရုပ်သိမ်းကာ အခြားတာအိုဘုန်းတော်ကြီးတစ်ဦးကို ကြည့်လိုက်ပါသည်။

“အဲဒါက မသေချာပါဘူး။ တော်ဝင်ချန်ဧကရာဇ်က ရေတပ်ရဲ့ အထူးချွန်ဆုံး ကျွမ်းကျင်သူတွေ အားလုံးကို စေလွှတ်ထားပုံရတယ်။ ဖူဘိုရေတပ် ဗိုလ်ချုပ် ရှောင်ထျန်းယောင်၊ ဖျင်ဟိုင်ဗိုလ်ချုပ် လျူဂျွန်ဒေါင်၊ ဇန်ဟိုင်ဗိုလ်ချုပ် ယွဲ့ဒွမ်ဟန်နဲ့ ဒင်ဟိုင်ဗိုလ်ချုပ် ကျီကျင်ယန်တို့လည်း မတူညီတဲ့ ဒေသအသီးသီးဆီ စေလွှတ်ခံရတယ်။ တောရိုင်းဒေသအနီးက အဖြူရောင်ငှက်မွှေးကျွန်းပေါ်မှာ ငါတို့အားလုံး ဆုံတွေ့ဖို့ အမိန့်ပေးထားတယ်။ အဲဒီနေရာမှာ ကျွမ်းကျင်သူတွေ အများကြီးရှိပြီး၊ စကြာဝဠာနဂါးအစောင့်တပ်က ထိပ်တန်းကျွမ်းကျင်သူတွေလည်း ရှိတယ်လို့ ကြားဖူးတယ်။”

အမှန်တရားတာအိုဂိုဏ်း၏ အကြီးအကဲ ကျန်းဘိုဟန်သည် အဖြူရောင်ကျောက်စိမ်းသဖွယ် မျက်နှာကို ပိုင်ဆိုင်ထားပြီး၊ သူ၏မျက်လုံးများတွင် ခရမ်းရောင်အငွေ့အသက်တစ်ခု ရှိနေသည်။ သူ၏လှုပ်ရှားမှုတစ်ခုချင်းစီသည် ကျွမ်းကျင်သူတစ်ဦး၏ အငွေ့အသက်ကို ထုတ်လွှတ်နေသည်။

ကျန်းဘိုဟန်သည် အမှန်တရားတာအိုဂိုဏ်း၏ ဂိုဏ်းချုပ်မဟုတ်သော်လည်း၊ အမှန်တရားတာအိုဂိုဏ်း၏ နံပါတ်တစ်ကျွမ်းကျင်သူ ဖြစ်သည်။

“ဒီအကြိမ် ညီအစ်ကိုကျိ မလိုက်လာတာ နှမြောစရာပဲ။ သူသာ ငါတို့နဲ့အတူတူ ရှိနေခဲ့ရင်၊ ငါတို့ရဲ့ အောင်မြင်နိုင်မယ့် အခွင့်အလမ်းက အများကြီး မြင့်မားလာလိမ့်မယ်။” ရှောင်အန်ရန်က သက်ပြင်းချလိုက်သည်။

“ဟွန်း…..၊ ငါတို့ဂိုဏ်းချုပ်က သူ့ဘဝတစ်ဝက်လောက် တာအိုဘုန်းကြီးအဖြစ် နေလာခဲ့တာ။ သူက နေ့စဉ်သင်ကြားပို့ချရင်း အလုပ်များနေပြီး၊ အမှန်တရားတာအိုဂိုဏ်းရဲ့ စည်းမျဉ်းတွေကိုလည်း သစ္စာရှိမှု၊ ဝတ်ကြီးဝတ်ငယ်ပြုမူ၊ မိမိကိုယ်ကိုထိန်းချုပ်မူနဲ့ ကိုယ်ကျင့်သီလတို့ကို ပြုစုပျိုးထောင်ရာမှာ အာရုံစိုက်ဖို့ ပြောင်းလဲနေတယ်။ သူက ပညာရပ်တွေအကြောင်း မဟောပြောတော့ဘဲ တာအိုကိုပဲ ဟောပြောတော့တယ်။ ဒီအတိုင်းသာ ရှေ့ဆက်သွားပါက၊ အမှန်တရားတာအိုဂိုဏ်းဟာ ကွန်ဖြူးရှပ်ဝါဒတာအိုဂိုဏ်းရဲ့ အကိုင်းအခက်တစ်ခု ဖြစ်လာမှာတောင် စိုးရိမ်ရတယ်။ ငါတို့ရဲ့ပညာရပ်တွေလည်း အနာဂတ်မှာ တဖြည်းဖြည်း ကွယ်ပျောက်သွားနိုင်တယ်။”

ကျန်းဘိုဟန်က ဟွန်းကနဲအသံဖြင့် နှာခေါင်းရှုံ့ပြီး၊ အလွန်မကျေမနပ် ဖြစ်ပုံရသည်။

“တော်ဝင်ချန်ဧကရာဇ်က ညီအစ်ကိုကျိရဲ့ နည်းလမ်းများကို နှစ်သက်တယ်မဟုတ်လား….” ရှောင်အန်ရန်က အနည်းငယ် ပြုံးလိုက်သည်။ “တကယ်တော့၊ ညီအစ်ကိုကျိရဲ့ အမှန်တရားတာအိုဂိုဏ်း ပြုပြင်ပြောင်းလဲမှုက မှန်ကန်ပါတယ်။ အခု အမှန်တရားတာအိုဂိုဏ်းဟာ ငါတို့ ဖန်ရှင်းတာအိုဂိုဏ်းထက် ဧကရာဇ်ရဲ့နှစ်သက်မြတ်နိုးမူကို ပိုမိုခံယူရတယ် မဟုတ်လား။ နှစ်သစ်ကူးကာလတုန်းကဆို၊ အမှန်တရားတာအိုဂိုဏ်းရဲ့ အဖွဲ့ဝင် ၃၆ ဦးဟာ ငွေရောင်ဝတ်ရုံနဲ့ ကျောက်စိမ်းခါးပတ်တွေ ဆုချီးမြှင့်ခံရတယ်။ သူတို့အားလုံးဟာ တတိယအဆင့် မှူးမတ်တွေ ဖြစ်လာကြတယ်။ ဒီလိုဂုဏ်ပြုမှုနဲ့ အကျိုးကျေးဇူးတွေက ရှေးခေတ်ကတည်းက ရှားပါတယ်။”

အမှန်တရားတာအိုဂိုဏ်း၏ ဂိုဏ်းချုပ် ကျိချန်ယွဲ့သည် တော်ဝင်ချန်၏ ၃၀ နှစ်မြောက် အင်ပါယာစာမေးပွဲတွင် ထိပ်တန်းပညာရှင်တစ်ဦး ဖြစ်ခဲ့သည်။ သူသည် ဓလေ့ထုံးတမ်းစဉ်လာဝန်ကြီးဌာန၏ ဝန်ကြီးတစ်ဦး ဖြစ်လာခဲ့သော်လည်း၊ နောက်ပိုင်းတွင် နန်းတွင်းရုန်းကန်မှုများကြောင့် ရာထူးမှ နုတ်ထွက်ပြီး တာအိုဘုန်းကြီးတစ်ပါး ဖြစ်လာခဲ့သည်။ အမှန်တရားတာအိုဂိုဏ်း၏ ယခင်ဂိုဏ်းချုပ်က သူ့ကို အလွန်တန်ဖိုးထားပြီး အမှန်တရား တာအိုဂိုဏ်း၏ ဆက်ခံသူအဖြစ် ရွေးချယ်ခဲ့သည်။ နောက်ပိုင်းတွင် ယခင်ဂိုဏ်းချုပ်သည် မိုးကြိုးကပ်ဘေးကို ဖြတ်ကျော်ရင်း စိတ်ဝိညာဉ် ပျက်စီးသွားခဲ့ပြီး၊ ကျိချန်ယွဲ့သည် ဂိုဏ်းချုပ်ဖြစ်လာခဲ့သည်။

“မင်းရဲ့တူ ရှောင်ရှောနန်လည်း တတိယတန်းစား မှူးမတ်တစ်ဦးဖြစ်ပြီး၊ ငွေရောင်ဝတ်ရုံနှင့် ကျောက်စိမ်းခါးပတ် ရထားတယ် မဟုတ်လား။ တော်ဝင်ချန်ဧကရာဇ်က သူ့ကို ရှောင်ယန်တာအိုသခင်ဆိုတဲ့ ဘွဲ့နာမည်တောင် ချီးမြှင့်ခဲ့တယ်။ ဘယ်လောက် ဂုဏ်ယူစရာကောင်းလဲ။ တာအိုသခင်ဆိုတဲ့ဘွဲ့ဟာ တစ္ဆေအင်မော်တယ်အဆင့်ထိ ကျင့်ကြံပြီးသူတွေကိုပဲ ခေါ်ဆိုနိုင်တာ….။” (ရှေ့မှာတုန်းက ရှောင်ယန်ဝိညာဉ်သခင်ဆိုပြီး ပြန်ဆိုခဲ့သည်။ ပါသည့်အတိုင်း ပြန်ဆိုခြင်းဖြစ်ပါသည်။)

ကျန်းဘိုဟန်က ပြုံးလိုက်ပါသည်။

“ရှောနန်ရဲ့ ဘွဲ့နာမည်နဲ့ ဆုလာဘ်တွေဟာ ချန်ပီယံမြို့စားနဲ့အတူ ရန်သူကို သတ်ဖြတ်ပြီး ရရှိခဲ့တာပဲ။ သူ့ရဲ့ ပံ့ပိုးမှုအရ၊ တခြားသူတွေဆိုရင် မြို့စားဖြစ်ဖို့ လုံလောက်ပြီးသား။ ဒါပေမယ့် ဒီဘွဲ့က အမှန်တရားတာအိုဂိုဏ်းနဲ့ မတူဘူး။ အမှန်တရားတာအိုဂိုဏ်းရဲ့ ဘွဲ့တွေက စစ်ရေးအောင်မြင်မှု တွေ မပါဘူး။ ဒါပေမယ့် တာအိုဘုန်းတော်ကြီးတစ်ယောက်ဟာ ငြိမ်းချမ်းစွာ ကျင့်ကြံနိုင်ပြီး ကောင်းကင်တာအိုကို ထိုးထွင်းသိမြင်သင့်တယ်။ စစ်မြေပြင်မှာ ရန်သူကို သတ်ဖြတ်ဖို့ သွားတာက ကောင်းတဲ့လမ်းစဉ်မဟုတ်ဘူး။” ရှောင်အန်ရန်က သက်ပြင်းချလိုက်သည်။ “ငါ့ရဲ့ စီနီယာအစ်ကိုလည်း ဘာဖြစ်နေလဲ မသိဘူး။ သူက ရှောနန်ရဲ့ စိတ်ဆန္ဒအတိုင်း လိုက်လျောပေးနေခဲ့တယ်။”

“မင်းရဲ့တူက ဖူဘိုဗိုလ်ချုပ် ရှောင်ထျန်းယောင်ရဲ့ တပ်စခန်းကို အမှတ်တရ စာတစ်စောင် ပို့ခဲ့ပုံရတယ်။ နောက်ပိုင်းမှာ သူက ဖူဘိုရေတပ်ရဲ့ သင်္ဘောအုပ်စုနဲ့ ဆုံတွေ့မယ်ထင်တယ်။ သူ့မှာ မင်းရဲ့ဆရာ ရှောင်ချန်ဖန်ကိုယ်တိုင် သန့်စင်ထားတဲ့ အမေနှင့်သားမီးလျှံဘီးမိုးကြိုးဓား၊ နတ်ဘုရားသစ်သားလက်စွပ်နဲ့ ဖန်ရှင်းတာအိုဂိုဏ်းရဲ့ အကြီးမြတ်ဆုံး မှော်ရတနာ အင်မော်တယ်ပစ္စည်း အဝါရောင်ကျောက်စိမ်း ရှိတယ်။ ဒီမှော်ရတနာက သူတော်စင်ဘုရင်တွေ မိုးကြိုးနဲ့လျှပ်စီးကို ဝတ်ပြုရာမှာ အသုံးပြုတဲ့ နတ်ဘုရားလက်နက်တစ်ခုပဲ။ နတ်ဘုရားတွေနဲ့ ရင်ဆိုင်ရရင် နတ်ဘုရားတွေကို သတ်မယ်။ ဗုဒ္ဓနဲ့ရင်ဆိုင်ရရင် ဗုဒ္ဓကို သတ်မယ်။ ဒီမှော်ရတနာနဲ့ဆိုရင်၊ မင်းရဲ့တူဟာ ကမ္ဘာပေါ်က မဟာနတ်ဆိုးအင်မော်တယ်ရှစ်ပါးနဲ့ ဆုံရင်တောင် သူက သူတို့ကို တစ်ချက်တည်းနဲ့ သတ်ပစ်နိုင်တယ်။ မင်း ဘာကို စိုးရိမ်နေတာလဲ…..။”

ကျန်းဘိုဟန်က ရယ်မောလိုက်ပါသည်။

“ဒါက ငါ့ရဲ့ စီနီယာအစ်ကိုက ငါ့အပေါ့် အလွန်ချစ်ခင်လို့ပဲ။ ငါ့ရဲ့ စီနီယာအစ်ကိုက သူ့သားအတွက် အများကြီး စိတ်ပူနေတယ်လေ။ ဟင်း……” ရှောင်အန်ရန်က သက်ပြင်းချပြီးနောက်၊ ရယ်မောကာ ဆူပူလိုက်သည်။ “ကျန်းဘိုဟန်၊ မင်း ငါတို့ ဖန်ရှင်းတာအိုဂိုဏ်းရဲ့ မှော်ရတနာကို ဘယ်လိုလုပ် ဒီလောက်ရှင်းရှင်းလင်းလင်း သိနေရတာလဲ။ မင်းပုံစံက အင်မော်တယ်တစ်ယောက်နဲ့လည်း မတူပါဘူး။ ညီအစ်ကိုကျိနဲ့ နှိုင်းယှဉ်ရင်၊ မင်းက အများကြီး နိမ့်ကျသေးတယ်။ ပြီးခဲ့တဲ့တစ်ကြိမ် ညီအစ်ကိုကျိက ဖန်ရှင်းတာအိုဂိုဏ်းရဲ့ တာအိုယဇ်ပလ္လင်ကို လာပြီး၊ ပန်းချီသူတော်စင် ဝူဒေါင်ဇီနဲ့ စာရေးနည်းအကြောင်း ဆွေးနွေးခဲ့တယ်။ သူက ငါတို့ ဖန်ရှင်းတာအိုဂိုဏ်းရဲ့ ရတနာဖြစ်တဲ့ ယွမ်ယန်မှော်တောင်ဝှေးကို မြင်ပြီး၊ ဒါဟာ သေးငယ်တဲ့ ပညာရပ်တစ်ခုပဲ၊ အပြင်ပပစ္စည်းသက်သက်ပဲလို့ ဝေဖန်ပြောခဲ့တယ်။ မှော်ရတနာတွေကို အားကိုးပြီး ကျင့်ကြံမူမျိုး မလုပ်ဖို့တောင် အကြံပေးခဲ့သေး တယ်။”

“သူက ဒီကမ္ဘာကြီး ပညာရှင်တစ်ဦးလေ။ သူ့ရာထူးကနေ နုတ်ထွက်ချင်ရင်လည်း နုတ်ထွက်လိုက်ပေါ့။ အခုတော့ ဘာလို့ တာအိုဘုန်းကြီးတစ်ပါး ဖြစ်လာရတာလဲ….” ကျန်းဘိုဟန်က ထပ်မံ၍ နှားခေါင်းရှုံ့လိုက်သည်။

“မင်းဆက်တွေတစ်လျှောက်၊ နန်းတွင်းရေးရာမှာ ဆုတ်ယုတ်မူတွေ ကြုံတွေ့လာရတဲ့အခါ, မဟာပညာရှင်ကြီးတွေဟာ အနားယူပြီးနောက်၊ ဘုန်းတော်ကြီးတွေ၊ တာအိုဘုန်းကြီးတွေ ဖြစ်သွားကြတာပဲ။ သူတို့ဟာ နက်နဲတဲ့ အသိပညာကို ပိုင်ဆိုင်ကြပြီး၊ လောကီရေးရာတွေမှာ ကျွမ်းကျင်ကြ တယ်။ သူတို့ ကျင့်ကြံတဲ့အခါမှာလည်း အောင်မြင်မှုက သဘာဝအတိုင်း ဖြစ်ပေါ်လာတယ်။” နက်ရှိုင်းတဲ့ တာအိုကို အောင်မြင်ကြတဲ့လူတွေကလည်း များသောအားဖြင့် ဒီလိုလူမျိုးတွေပဲ။ ရှောင်အန်ရန်က အသက်ရှူထုတ်လိုက်သည်။ “ညီအစ်ကိုကျိရဲ့ တာအိုက ငါတို့ထက် အဆပေါင်းများစွာ နက်ရှိုင်းတယ်…။”

“အင်မော်တယ်သခင်နှစ်ပါး….၊ ကျွန်ုပ်တို့မြို့စားက အင်မော်တယ်သခင်နှစ်ပါးကို ဖိတ်ကြားလိုက်ပါတယ်….။”

ဤအချိန်တွင်၊ အနက်ရောင်သံမဏိပုဆိန် တစ်ချောင်းနှင့် အနည်းဆုံး ပေါင် ၄၀၀ မှ ၅၀၀ အလေးချိန်ရှိသော ဧရာမသံမဏိဒိုင်းတစ်ခုကို ကိုင်ဆောင်ထားသော စစ်သည်တစ်ဦးသည် ပေါ့ပါးစွာ လျှောက်လှမ်းလာသည်။

“အို့…..”

ရှောင်အန်ရန်နှင့် ကျန်းဘိုဟန်တို့သည် အချင်းချင်း အကြည့်ချင်း ဖလှယ်လိုက်ပြီး၊ ချီလင်စစ်သင်္ဘော ဆီသို့ လျှောက်သွားသည်။

ဟုန်ယွိ၏ သံချပ်ကာဝတ်သင်္ဘောပျံငါးစီး၊ မက်မွန်နတ်ဘုရားသင်္ဘော သုံးစင်းနှင့် လူ ၈၀၀ တင်ဆောင်နိုင်သော စစ်သင်္ဘောငါးစင်းတို့သည် ရွှေ၊ ငွေနှင့် အမျိုးမျိုးသော အဖိုးတန်ပစ္စည်း သန်းပေါင်းများစွာ တင်ဆောင်ထားသည်။ ရက်ပေါင်းများစွာ ရွက်လွှင့်ပြီးနောက်၊ ၎င်းတို့သည် နောက်ဆုံးတွင် ယွန်နိုင်ငံ၏ ဆိပ်ကမ်းသို့ ရောက်ရှိခဲ့သည်။

ယွန်နိုင်ငံ၏ တည်နေရာသည် တကယ်ကို ပင်လယ်ပြင်အလယ်တွင် နက်ရှိုင်းစွာ တည်ရှိနေသည်။

နတ်ဘုရားလေနိုင်ငံ၏ စည်ကားသော ပင်လယ်ရေကြောင်း ကုန်သွယ်မှုနှင့် နှိုင်းယှဉ်ပါက၊ ယွန်နိုင်ငံ၏ ဆိပ်ကမ်းသည် များစွာပို၍ တိတ်ဆိတ်လျက် ရှိသည်။

ပင်လယ်ရေပြင်ပေါ်တွင် ရွက်လှေငယ်များသာ အနည်းငယ်ရှိသည်။ မက်မွန်နတ်ဘုရားသင်္ဘော များနှင့် နှိုင်းယှဉ်ပါက၊ ၎င်းတို့သည် ပုစဉ်းနှင့် ကြက်ဖတစ်ကောင်အတိုင်းပင်။

“ဘာလို့ ကင်းလှည့်ရွက်လှေတွေ မရှိတာလဲ….။”

တိတ်ဆိတ်နေသော ဆိပ်ကမ်းကို ကြည့်ရင်း ချီဇီယန်က သိချင်စိတ်ဖြင့် မေးလိုက်သည်။

“ဒါက ဘာထူးဆန်းလို့လဲ။ ဒီပင်လယ်ဧရိယာမှာ ရက်စက်တဲ့ ငွေမန်းငါးတွေနဲ့ ပြည့်နှက်နေတာ။ ငါတို့ ဒီကိုလာတိုင်း ယွန်နိုင်ငံရဲ့ မက်မွန်နတ်ဘုရားနိုင်ငံကို အကာအကွယ်အတွက် အခကြေးငွေ ပေးရတာ။ ဒါမှပဲ ငါတို့ရဲ့သင်္ဘောတွေဟာ ဒီပင်လယ်ပြင်ဧရိယာကို ဖြတ်ကျော်နိုင်ခဲ့တာ။ အရက်စက်ဆုံး ပင်လယ်ဓားပြတွေတောင် ဒီနားကို မချဉ်းကပ်ရဲကြဘး….။”

ဟွာနွန်ယင်က ပြုံးလိုက်သည်။

ဟွာနွန်ယင်၏ စကားကို တုံ့ပြန်သည့်အလား၊ ရှူးခနဲအသံတစ်ခုနှင့်အတူ ငွေမန်းငါးများသည် ပင်လယ်ထဲမှ ခုန်ထွက်လာကသည်။ ဆင်တစ်ကောင်ထက် သုံးဆခန့်ကြီးမားသော ဧရာမငါးကြီးများသည် ပင်လယ်ပြင်မှ အနည်းဆုံး ပေ ၃၀ အမြင့်သို့ ခုန်ထွက်လာသည်။ လူတိုင်းသည် ဤငွေမန်းငါးများ၏ ချွန်ထက်သော အစွယ်များ၊ ရက်စက်သော မျက်နှာများနှင့် လူ့မျက်နှာအမူအရာနှင့်တူသော အမူအရာများကို ရှင်းလင်းစွာ မြင်တွေ့နိုင်သည်။

“ဟုန်ယွိ၊ ဆိပ်ကမ်းထဲ ဝင်ကြစို့။ ဆိပ်ကမ်းထဲ ဝင်ပြီးရင်၊ မြို့ထဲမှာ တစ်ရက်နားကြမယ်။ ငါ လူတွေကို စေလွှတ်ပြီး မင်းရဲ့ပစ္စည်းတွေနဲ့ လူတွေ အခြေချဖို့ စံအိမ်သုံးခု စီစဉ်ပေးမယ်။ ငါတို့ သုံးရက်လောက် အနားယူပြီး အင်မော်တယ်ပစ္စည်း အဝါရောင်ကျောက်စိမ်းကို အတူတူ လေ့လာကြမယ်။ အထဲမှာရှိတဲ့ မိုးကြိုးစွမ်းအားကို အသုံးပြုပြီး ယင်နဲ့ယန်ကို ပြောင်းလဲကာ၊ ငါတို့ရဲ့ တာအိုကို အဆင့်မြှင့်ကြမယ်။ အဲဒီနောက်၊ ငါတို့ တစ်ယောက်နဲ့တစ်ယောက် ကူညီပြီး တောရိုင်းဒေသကို ပျံသန်းသွားကြမယ်။ တောရိုင်းဒေသမှာ ရတနာရှာဖွေဖို့ကိစ္စက အလွန်အရေးကြီးတယ်။ ဘာအမှားယွင်းမှ ဖြစ်မခံနိုင်ဘး…။”

ချန်ယင်းရှာက ဟုန်ယွိကို ကြည့်ပြီး တည်ကြည်သော လေသံဖြင့် ပြောသည်။

“ယင်းရှာ၊ ဖန်ရှင်းတာအိုဂိုဏ်းနဲ့ တော်ဝင်နန်းတွင်းက ထိန်းချုပ်ထားတဲ့ အမှန်တရားတာအိုဂိုဏ်းမှာ ဘယ်လိုကျွမ်းကျင်သူတွေ ရှိမယ်ထင်သလဲ။ သူတို့မှာ ဘယ်လိုအစွမ်းထက်တဲ့ ရတနာတွေ ရှိနိုင်မလဲ။ ရှောင်ရှောနန် တစ်ယောက်တည်းမှာတောင် အင်မော်တယ်ပစ္စည်း အဝါရောင်ကျောက်စိမ်း လို ရတနာရှိပြီးသားပဲ။ သူတို့ရဲ့ ဂိုဏ်းချုပ် ရှောင်အန်ရန်ဆိုရင်ရော။ တော်ဝင်ချန် ဧကရာဇ်နန်းတွင်းဟာ စကြာဝဠာအိတ်ကို ရှာဖွေဖို့ အများကြီး စိုက်ထုတ်ထားမှာ သေချာတယ်။”

ဟုန်ယွိ၏မျက်နှာ အရောင်သည် ပါးလွှာသော အလင်းလွှာတစ်ခု ဖုံးလွှမ်းထားသည့် အလား ဤအချိန်တွင် အလွန်ကောင်းမွန်နေသည်။ ပြီးခဲ့သော ရက်အနည်းငယ်အတွင်း ကျင့်ကြံမှုကြောင့် သူ၏ကျင့်ကြံမှုသည် များစွာ တိုးတက်လာပုံရသည်။

အမှန်တကယ်လည်း ပြီးခဲ့သော ရက်အနည်းငယ်အတွင်း၊ ဟုန်ယွိသည် စိတ်ဝိညာဉ်နှင့် ခန္ဓာကိုယ် ပေါင်းစပ်ခြင်း၏ လျှို့ဝှက်ချက်များဖြစ်သည့် ဝိညာဉ်၏ ယင်နှင့်ယန်တာအိုကို နားလည်လာခဲ့သည်။ ချီအနှစ်သာရ တစ်ခုတည်းသာ အရေးကြီးဆုံးအရာ ဖြစ်သည်။ သူသည် တစ္ဆေအင်မော်တယ် ဖြစ်လာခဲ့ပြီး စိတ်ဝိညာဉ်နှင့် ခန္ဓာကိုယ်ကို အမှန်တကယ် ပေါင်းစည်းနိုင်ခြင်း မရှိသော်လည်း၊ သူ၏စိတ်ဝိညာဉ်ကို အသုံးပြု၍ ခန္ဓာကိုယ်ကို အာဟာရဖြည့်ပေးနိုင်ခဲ့သည်။

“ဖန်ရှင်းတာအိုဂိုဏ်းနဲ့ အမှန်တရားတာအိုဂိုဏ်းမှာ ဂိုဏ်းရဲ့ကျွမ်းကျင်တွေ ရှိတယ်။ ရှောင်အန်ရန် ဆိုတာ ဘာမဟုတ်ဘူး။ ဒါ့ပြင်၊ ဖန်ရှင်းတာအိုဂိုဏ်း ကျင့်ကြံတဲ့ တာအိုပညာရပ်တွေက အဓိကအားဖြင့် ယမ်းမှုန့်နဲ့ ခဲပြဒါးတွေ၊ ပြင်ပဆေးဝါးတွေကို သန့်စင်တာပဲ။ ဒါပေမယ့်၊ အမှန်တရားတာအိုဂိုဏ်းရဲ့ ဂိုဏ်းချုပ် ကျီချန်ယွဲ့က ဘယ်တုန်းကမှ မလှုပ်ရှားခဲ့ပေမယ့် ငါတို့ မဟာနတ်ဆိုးအင်မော်တယ်တွေတောင် သူ့ကို အလွန်ကြောက်ရွံ့ကြတယ်။ ငါ အရင်က သူ့ချီကို တစေ့တစောင်း ချောင်းကြည့်ခဲ့ဖူးတယ်။ သူ့ချီအနှစ်သာရက အချက်ပြမီးခိုးလို ကောင်းကင်ဘုံကိုးဆင့်အထိ တည့်တည့်မတ်မတ် ထိုးတက်နေပြီး၊ ရှင်းလင်းပြီး သန့်စင်တယ်။ သူ့ မှော်စွမ်းအားက စိတ်ကူးမယဉ်နိုင်လောက်အောင် နက်နဲတယ်။” ချန်ယင်းရှာက ပြောသည်။

“ကျီချန်ယွဲ့လား…။ ဒီလူက တော်ဝင်ချန်ရဲ့ နှစ် ၃၀ မြောက် အင်ပါယာစာမေးပွဲမှာ ထိပ်တန်းပညာရှင်တစ်ဦး ဖြစ်ခဲ့ဖူးသူပဲ။ သူက ဓလေ့ထုံးတမ်းစဉ်လာဝန်ကြီးအဖြစ် နှစ်အနည်းငယ် တာဝန်ထမ်းဆောင်ခဲ့တယ်။ နောက်ပိုင်းတွင်၊ ဝန်ကြီးချုပ် လီယန်နှင့် အဆင်မပြေ ဖြစ်ပြီး ဆုံးမခံခဲ့ရတယ်။ ဒီနောက် သူက ရာထူးကနေနုတ်ထွက်ကာ အနားယူခဲ့တယ်။ လီယန် သေဆုံးပြီးနောက်၊ သူက အမှန်တရားတာအိုဂိုဏ်းမှာ တာအိုဘုန်းကြီးတစ်ပါး ဖြစ်လာပြီး၊ အမှန်တရားတာအိုဂိုဏ်းရဲ့ ခေါင်းဆောင် ဖြစ်လာခဲ့တယ်။ သူက စာအုပ်တွေ ရေးသားကာ အမှန်တရားတာအို ဂိုဏ်းကို သစ္စာရှိမှု၊ ဝတ်ကြီးဝတ်ငယ်ပြုမူ၊ မိမိကိုယ်ကိုထိန်းချုပ်မူနဲ့ ကိုယ်ကျင့်သီလတို့ကို ပြုစုပျိုးထောင်ရန် လမ်းကြောင်းအဖြစ် ပြုပြင်ပြောင်းလဲခဲ့ သည်။ သူက အဆောင်အယောင် ဖယ်ရှားခြင်း၊ နတ်ဆိုးဖယ်ရှားခြင်း၊ ရွှေဆေးဝါးနဲ့ ခဲပြဒါးဖန်တီးခြင်းတို့လို သေးငယ်သော နည်းပညာရပ်တွေ အကြောင်း မဟောပြောဘဲ၊ သူ့တာအိုစိတ်နှလုံးကိုသာ ပြုစုပျိုးထောင်တယ်။ ဒီနှစ်တွေတစ်လျှောက်, သူက နေရာအနှံ့မှာ သင်ကြားပို့ချမှုတွေ ပြုလုပ်နေတယ်။ ငါ ငါးနှစ်သားအရွယ်မှာ ငါ့အမေက ငါ့ကို ကျောက်စိမ်းမြို့တော်ရှိ ကျောက်စိမ်းသမင်အကယ်ဒမီမှာ သူ့ရဲ့သင်ကြားပို့ချမှုတွေကို နားထောင်ဖို့ ခေါ်သွားခဲ့ဖူးတယ်။ ငါ သူ့စာအုပ်တွေကိုလည်း ဖတ်ဖူးတယ်။ ဒီလူက အလွန်ကျိုးကြောင်းဆီလျော်မူ ရှိသူပဲ။ ငါတို့က ဂိုဏ်းတူမဟုတ်ရင်တောင် သူရဲ့အချို့သီအိုရီတွေက အလွန်လေးစားဖွယ်ရာ ကောင်းတယ်။”

ဟုန်ယွိသည် မျက်လုံးများကို မှေးကျဉ်းလိုက်ပြီး၊ သူငယ်ရွယ်စဉ်က နားထောင်ခဲ့ဖူးသော သင်ကြားပို့ချမှုများကို ပြန်လည် အမှတ်ရလိုက်သည်။

“အဲဒီအချိန်တုန်းက ငါ့မှာ မှော်စွမ်းအား မရှိခဲ့တော့၊ သူ၏ ကျင့်ကြံမူအဆင့် ဘယ်လောက် မြင့်မားလဲဆိုတာ မခွဲခြားနိုင်ခဲ့ဘူး…။”

စကားပြောနေစဉ်၊ သင်္ဘောသည် ယွန်နိုင်ငံ၏ ဆိပ်ကမ်းသို့ ဝင်ရောက်ပြီး ရပ်တန့်သွားသည်။ ဆိပ်ကမ်းတွင် လူများစွာသည် ၎င်းတို့ကို ကြိုဆိုရန် စောင့်ဆိုင်းနေပြီ ဖြစ်သည်။ ၎င်းတို့သည် တော်ဝင်ချန်၏ ဝတ်စားဆင်ယင်မှုပုံစံဖြင့် ဝတ်ဆင်ထားပြီး၊ တော်ဝင်ချန်၏ ယဉ်ကျေးမှုသည် နိုင်ငံတဝှမ်း ပျံ့နှံ့လျက်ရှိကြောင်း ပြသသည်။

“မင်းသမီး….။”

ချန်ယင်းရှာသည် သင်္ဘောမှ ဆင်းလာသည်ကို မြင်သောအခါ၊ ငွေမန်းသံချပ်ကာ ဝတ်ဆင်ထားပြီး ကျောပေါ်တွင် ဧရာမအဖြူရောင် အရိုးဓားတစ်ချောင်းကို လွယ်ထားသော လူငယ်စစ်သည်တစ်ဦးက ဒူးတစ်ဖက်ထောက်လျက် အရိုသေ ပေးလိုက်သည်။ သူ့မျက်နှာက ပြတ်သားသော အမူအရာရှိသည်။

ထို့နောက်၊ လူအုပ်ကြီးသည် ဒူးတစ်ဖက်ထောက်ကာ အရိုသေ ပေးလိုက်ကြသည်။

ဟုန်ယွိသည် ဤလူငယ်စစ်သည်ကို ကြည့်လိုက်ရာ၊ သူသည် ရှင်တန်သိုင်းသခင်အဆင့်၏ ထိပ်တန်းကျွမ်းကျင်သူတစ်ဦး ဖြစ်ကြောင်း သဘောပေါက်လိုက်သည်။

“ထုံးတမ်းစဉ်လာတွေ ခဏထားလိုက်။ ငါ ဒီကို မလာခင်ကတည်းက ပျံသန်းအဆောင်တစ်ခုနဲ့ သတင်းပို့ခဲ့တယ်။ အသေးစိတ်တွေကို မင်းတို့အားလုံး သိပြီးသား ဖြစ်မှာပါ။ သွားပြီး စီစဉ်ပေးလိုက်ကြ။ နောက်ပြီး လူတွေလည်း ပိုပြီးပို့ပေးကြ။ ပြီးတော့ ငါ့အဖေကို ပြောလိုက်ဦး။ ငါ တောရိုင်းဒေသကို မသွားခင် တာအိုမိတ်ဆွေနဲ့ သုံးရက်လောက် ကျင့်ကြံမယ်လို့။”

ချန်ယင်းရှာက လက်ကို ဝှေ့ရမ်းပြီး၊ မင်းသမီးတစ်ပါး၏ အခွင့်အာဏာကို ထုတ်ဖော်ပြသရင်း ညွှန်ကြားလိုက်သည်။

ထို့နောက်၊ လူများစွာသည် သင်္ဘောပေါ်သို့ တက်လာပြီး သင်္ဘောကို ဆေးကြောသန့်စင်ကြသည်။ တစ်ချိန်တည်းမှာပင်၊ ၎င်းတို့သည် ကျွန်များကို တစ်ဦးချင်း ထိန်းသိမ်းကာ၊ ထွက်ပြေးမှု မဖြစ်ပေါ်စေရန် တင်းကျပ်စွာ စောင့်ကြပ်ထားသည်။

သခင်ကျိုး၊ ချီဇီယန်နှင့် အခြားသူများသည် အလွန်အလုပ်များနေသည်။

ဟုန်ယွိသည် ညွှန်ကြားချက်အနည်းငယ် ပေးပြီးနောက်၊ ချန်ယင်းရှာနှင့်အတူ လက်ရာမြောက်သော မြင်းလှည်းတစ်စီးထဲသို့ လိုက်ပါသွားပြီး ယွန်နိုင်ငံ၏ မြို့တော်သို့ ဦးတည်သွားသည်။

ယွန်နိုင်ငံ၏ လမ်းများသည် နတ်ဘုရားလေနိုင်ငံ၏ လမ်းများကဲ့သို့ တင့်တယ်မှုမရှိပေ။ ၎င်းတို့သည် ဖုန်ထူထပ်သော မြေလမ်းများ ဖြစ်ပြီး၊ လမ်းနှစ်ဖက်တွင် အုန်းပင်ရှည်များ စိုက်ပျိုးထားသည်။ မြင်းလှည်းသွားလာစဉ်၊ ဖုန်တထောင်းထောင်း ထနေသည်။

လမ်းနှစ်ဖက်တွင် စပါးစိုက်ခင်းများနှင့် ဟင်းသီးဟင်းရွက်ခင်းများ ရှိသည်။ မျက်နှာပေါ်တွင် မီးခိုးရောင်သမ်းနေပြီး၊ ချည်ထည် အဝတ်အစား ဝတ်ဆင်ထားသော လယ်သမားများသည် စိုက်ခင်းထဲတွင် အလုပ်များနေသည်။ လယ်သမားအချို့ကို ခြေချင်းဝတ်တွင် သံကြိုးများဖြင့် ချုပ်နှောင်ထားသည်။ စပါးခင်းများ၏ ဘေးနှစ်ဖက်တွင်၊ ပိုးထည်အဝတ်အစားဝတ်ဆင်ထားသော လူများသည် ဤလယ်သမားများကို စိုက်ပျိုးရန် ကြီးကြပ်နေသည်။

အဝေးရာ၊ သိပ်မမြင့်သော မြို့တစ်မြို့သည် တည်တံ့စွာ ရပ်တည်နေ၏။

ခေါင်ပြီး၊ ခေတ်နောက်ကျနေခြင်း၊ ပြီးတော့ လူဦးရေရှားပါးမှု။ ဤသည်မှာ ဟုန်ယွိသည် ယွန်နိုင်ငံသို့ ရောက်ရောက်ချင်း ထွက်ပေါ်လာသော ပထမဆုံး အထင်အမြင်ဖြစ်သည်။

နတ်ဘုရားလေနိုင်ငံနှင့် နှိုင်းယှဉ်ပါက၊ ယွန်နိုင်ငံသည် များစွာပို၍ ဆင်းရဲသည်။

“ယွန်နိုင်ငံက လူဦးရေရှားပါးတယ်။ မြို့ပေါင်း ၂၀ ရှိပြီး၊ လူဦးရေ ၈၀၀,၀၀၀ ကျော်ပဲ ရှိတယ်။ ဒါက တော်ဝင်ချန်ရဲ့ အလယ်အလတ်အဆင့် ပြည်နယ်တစ်ခုနဲ့ နှိုင်းယှဉ်နိုင်ရုံပဲ။” ချန်ယင်းရှာက ပြုံးလိုက်သည်။ “တော်ဝင်မိသားစုမှာ စစ်သည်တွေ အများကြီးမရှိသလို၊ ဘဏ္ဍာငွေလည်း မကြွယ်ဝဘူး။ နိုင်ငံရဲ့အင်အားက နတ်ဘုရားလေနိုင်ငံကို မယှဉ်နိုင်ဘူး။”

“နတ်ဘုရားလေနိုင်ငံကလွဲပြီး၊ ပင်လယ်ရပ်ခြား ကျွန်းနိုင်ငံတွေမှာ လူဦးရေ မများကြဘူး။ ဒါကြောင့် ကျွန်ကုန်သွယ်မှုလုပ်ငန်းက ဒီလောက် ကြီးပွားနေကြတာ။ လူ ၈၀၀,၀၀၀ … ၈၀၀,၀၀၀ ဆိုတာ အတော့်ကို များနေပါပြီ။ ပင်လယ်ရပ်ခြား ကျွန်းနိုင်ငံတွေထဲမှာ အနည်းဆုံး ထိပ်ငါးနိုင်ငံစာရင်းဝင် တယ်။” ဟုန်ယွိက ပြုံးလျက် ပြောသည်။

ကျွန်းနိုင်ငံတစ်ခုအတွက်၊ လူဦးရေ ၈၀၀,၀၀၀ သည် တကယ်ကို များပြားနေပါပြီ။

“သုံးရက်လောက် ကျင့်ကြံပြီးတာနဲ့ တောရိုင်းဒေသကို ထွက်ခွာကြမယ်။ တကယ်လို့, ငါတို့သာ စကြာဝဠာအိတ်ကို ရှာဖွေနိုင်ပြီး၊ ဌာနေတိုင်းရင်းသား ၁၀၀,၀၀၀ ကို ယူဆောင်လာနိုင်မယ်ဆိုရင်၊ ယွန်နိုင်ငံလည်း အများကြီး သက်ဝင်လာလိမ့်မယ်။ ငါက ယွန်နိုင်ငံရဲ့ မင်းသမီးတစ်ပါးဆိုတော့ ယွန်နိုင်ငံအတွက် စဉ်းစားပေးရမယ်။” ချန်ယင်းရှာက ပြောသည်။

အခန်း (၂၁၀)။

“စိတ်ဝိညာဉ်ဟာ ခန္ဓာကိုယ်ကနေ ၂၄ နာရီထက်ပိုပြီး ကြာရှည်စွာ ထွက်ခွာသွားပါက၊ စိတ်ဝိညာဉ်က အားနည်းလာမှာဖြစ်ပြီး၊ စွမ်းအားကလည်း တဖြည်းဖြည်း ကျဆင်းလာမယ်။ ယန်နတ်ဘုရားအဆင့်ထိ ရောက်ရှိပြီး မိုးကြိုးကပ်ဘေးကို ကိုးကြိမ် ဖြတ်ကျော်နိုင်မှပဲ ခန္ဓာကိုယ်ကို လုံးဝ စွန့်ခွာနိုင်မယ်။ ဒါ့ကြောင့်၊ ငါတို့အနေနဲ့ တောရိုင်းဒေသကို ရုပ်ခန္ဓာကိုယ်ကိုပါ ယူဆောင်သွားရမယ်။”

ဧရာမစံအိမ်ကြီးတစ်ခုအတွင်း၊ ဟုန်ယွိနှင့် ချန်ယင်းရှာတို့သည် လျှို့ဝှက်အခန်းတစ်ခုအတွင်းမှာ ငါးပေအကွာတွင် မျက်နှာချင်းဆိုင် ထိုင်နေကြ သည်။ သူတို့၏ အလယ်တွင် ရိုးရှင်းပြီး ဆန်းပြားမူမရှိသည့် အင်မော်တယ်ပစ္စည်း အဝါရောင်ကျောက်စိမ်းကို ချိတ်ဆွဲထားသည်။

ယွန်နိုင်ငံသို့ ရောက်ရှိပြီးနောက်၊ အရာအားလုံး တည်ငြိမ်သွားခဲ့ပြီ။

ဟုန်ယွိ၏ လူ ၂,၀၀၀ ကျော်သည် အိမ်များ၊ မြေနေရာများဖြင့် အခြေခံလိုအပ်မှန်သမျှ အရာအားလုံး ရှိနေသည့် စံအိမ်ကြီးတစ်ခုအတွင်း၌ အခြေချ နေထိုင်ကြပြီး၊ အနားယူပြီး၊ ကျင့်ကြံနိုင်သည့် ဘဝကို စတင်ခဲ့သည်။

ဖမ်းဆီးခံရသော ဖူဘိုရေတပ‌ေ၏ စစ်သည် ၁,၀၀၀ ကျော်သည်လည်း ကျွန်များအဖြစ် ရာထူးလျှော့ချခံရပြီး၊ တင်းကျပ်စွာ စောင့်ကြပ်ထားကြ သည်။

ဤလူအုပ်ကြီးသည် သူတို့၏ ဘဝတစ်လျှောက်လုံး တော်ဝင်ချန်သို့ ပြန်လည်ရောက်ရှိရန် မဖြစ်နိုင်ပေ။ ဟုန်ယွိသည် ရှန်ထိုက်ဇူ၊ မုကလေးနှင့် သခင်ကျိုးတို့ကို ညွှန်ကြားထားပြီး၊ တစ်လမှ နှစ်လအတွင်း ကျင့်ကြံပြီးနောက်၊ အကောင်းဆုံးနှင့် ယုံကြည်စိတ်ချရသူများကို ရွေးချယ်ကာ တော်ဝင်ချန်သို့ သူ့နောက်မှ ပြန်လည်ခေါ်ဆောင်နိုင်ရန် စီစဉ်ထားသည်။

သူသည် တော်ဝင်ချန်သို့ ပြန်လည်သွားရမည် ဖြစ်သည်။ သူ့မိခင်၏ သေဆုံးမှုအတွက် လက်စားမချေရသေးသလို၊ မင်းသားယုကိုလည်း ကူညီရဦး မည် ဖြစ်သည်။ ဟုန်ယွိသည် ယခုအခါ အကူညီတောင်းစရာ အများကြီး မရှိတော့သော်လည်း၊ မင်းသားယုသည် သူ့အား ကျေးဇူးပြုခဲ့ဖူးသည်။ ဟုန်ယွိသည် တာအိုပညာများကို ကျွမ်းကျင်ပြီးနောက် ကျောခိုင်းစွန့်ခွာသွားမည့် လူမျိုး မဟုတ်ပေ။

တော်ဝင်ချန်တွင် ဧကရာဇ်စေတမန်ကို လုပ်ကြံမှုသည် လျှို့ဝှက်စွာ ဆောင်ရွက်ခဲ့ခြင်းဖြစ်သော်လည်း၊ သတင်းပေါက်ကြားနိုင်သည့် အခွင့်အလမ်း ရှိသည်။ သို့သော်၊ ဤကိစ္စတွင် သက်သေမရှိပေ။ အကယ်၍ သူနှင့် မင်းသားယုတို့ တစ်သားတည်းဖြစ်ပြီး ဝန်မခံပါက၊ မည်သူမျှ သူ့ကို သတ်နိုင်မည် မဟုတ်ပေ။

ထို့ပြင်၊ သူ၏လက်ရှိခွန်အားက သန်မာနေပြီဟု ယူဆနိုင်ကြောင်း ဟုန်ယွိလည်း သိသည်။ အကယ်၍ သူ ပိုမိုသန်မာလာပါက၊ ဤကိစ္စ ပေါ်သွားလျှင် ပင်၊ ကြီးကြီးမားမား ဖြစ်မလာနိုင်တော့ပေ။

တိုင်ရှန်တာအိုဂိုဏ်းမှ မိုနိုဂိုတာရီသည် ထိုက်ကျုံးဧကရာဇ်နှင့် ကောင်းကျုံးဧကရာဇ်တို့ နှစ်ဦးကို ဆက်တိုက် လုပ်ကြံခဲ့သော်လည်း၊ သူသည် ဘာမှမဖြစ်ဘဲ အဆင်ပြေပြီး သာသာယာယာရှိနေဆဲ ဖြစ်သည်။ တော်ဝင်ချန် ဧကရာဇ်တရားရုံးသည် သူ့အား လေးလေးစားစား ဘွဲ့ဂုဏ်ထူးတံဆိပ်ပင် ပေးခဲ့ရသည်။

ဟုန်ယွိသည် လက်ရှိတွင် တိုင်ရှန်တာအိုဂိုဏ်းဂိုဏ်းမှ မိုနိုဂိုတာရီကဲ့သို့ မသန်မာသေးသော်လည်း၊ ချန်ယင်းရှာနှင့် ခိုင်မြဲစွာ မဟာမိတ်ဖွဲ့ထားသည်။ တစ္ဆေအင်မော်တယ်နှစ်ဦး၏ ပူးပေါင်းစွမ်းအားသည် အခြားသူများကို မဆင်မခြင် လှုပ်ရှားမှုတွေ မပြုလုပ်နိုင်ရန် ဟန့်တားနိုင်ပြီး၊ အားလုံးက ဟန်ဆောင် ယှဉ်ကျေးပျူငှာစွာ ဆက်ဆံရသည်အထိ ကာကွယ်ထားနိုင်ဆဲ ဖြစ်သည်။

ဟုန်ယွိ၏ လက်ရှိပန်းတိုင်သည် သူ့ခွန်အားကို တိုးမြှင့်ရန်၊ တော်ဝင်ချန်သို့ ပြန်လည်ရောက်ရှိရန်၊ မင်းသားယုကို ထီးနန်းရယူရာမှာ ကူညီပေးရန်၊ ထို့နောက် ကောင်းကင်အထွဋ်ထိပ်နယ်မြေကို မည်သူမျှ မကျန်ရစ်စေဘဲ အမြစ်ဖြတ်ရန်ဖြစ်ပြီး၊ တစ်ချိန်တည်းမှာပင်၊ ဟုန်ရွှန်ကျိ၏ ကျားဖြူအရေခွံ ကို ဖယ်ရှားပြီး၊ သူ့တွင် ဖြူစင်မှုနှင့် မည်သည့်ဂုဏ်သိက္ခာမှ မရှိအောင် လုပ်ဆောင်ရန် ဖြစ်သည်။

ချန်ယင်းရှာက သူ့ကို ကိုယ်ပိုင်စစ်တပ်တည်ထောင်ပြီး ပုန်ကန်ကာ ဧကရာဇ်ဖြစ်လာရန် လိုလားသော်လည်း၊ ၎င်းသည် မဖြစ်နိုင်ပေ။ အကြောင်းမှာ ယခုအချိန်သည် ငြိမ်းချမ်းသော ခေတ်ဖြစ်ပြီး၊ လူထုသည် ငြိမ်းချမ်းမှုကို တောင့်တကြသည်။ မည်သူမျှ စစ်ပွဲသို့ သွားရောက်လိုသူ မရှိပေ။ လူထု၏ ဆန္ဒသည် ကောင်းကင်ဘုံ၏ ဆန္ဒဖြစ်သည်။ အကယ်၍ ကောင်းကင်ဘုံ၏ ဆန္ဒက စစ်ပွဲကို မလိုလားပါက၊ ကမ္ဘာကြီးသည် ပရမ်းမတာ ဖြစ်မလာနိုင်ပေ။ မည်မျှအားကောင်းသည့် ပုဂ္ဂိုလ်ဖြစ်ပါစေ၊ ပုန်ကန်ထကြွရန် မဖြစ်နိုင်တော့ပေ။

သို့သော်၊ ဤအရာအားလုံးသည် နောက်နှစ်နွေဦးရာသီတွင် တော်ဝင်ချန်သို့ ပြန်လည်သွားရောက်မည့် အစီအစဉ်များ ဖြစ်သည်။ ယခုအချိန်တွင် အရေးကြီးဆုံးမှာ စကြာဝဠာအိတ်နှင့် အတွင်းရှိ အရင်းအမြစ်များကို ရယူရန်နှင့် အထွတ်အထိပ်အထိရောက်အောင် ကျင့်ကြံရန် ဖြစ်သည်။

လျှို့ဝှက်အခန်းအတွင်း၊ ဟုန်ယွိနှင့် ချန်ယင်းရှာတို့သည် သူတို့၏ အသက်ရှူသံများကို ထိန်းညှိပြီး စိတ်ဝိညာဉ်များကို အနားယူစေသည်။ ထို့နောက်၊ သူတို့သည် ကျင့်ကြံမှုကို စတင်ရန် ပြင်ဆင်မှုများ ပြုလုပ်ကြသည်။

“ဟုတ်တယ်။ တစ္ဆေအင်မော်တယ်အဆင့်အထိ ကျင့်ကြံနိုင်ခဲ့ပေမယ့် စိတ်ဝိညာဉ်ဟာ ခန္ဓာကိုယ်ကနေ ကြာရှည်စွာ ခွဲထွက်နေပါက၊ တဖြည်းဖြည်း အားနည်းလာလိမ့်မယ်။ ငါ့စိတ်ဝိညာဉ်ဟာ ငါ့ခန္ဓာကိုယ်ကနေ ထွက်ခွာပြီး ခုနစ်ရက်ကြာတာနဲ့၊ ငါ့ခန္ဓာကိုယ်လည်း ခြောက်သွေ့ပြီး သေဆုံးသွားမယ်။ ခန္ဓာကိုယ်ကို ဆုံးရှုံးရလိမ့်မယ်။ တကယ်လို့, ငါသာ ခန္ဓာကိုယ်တစ်ခုကို ပြန်လည်မသိမ်းပိုက်နိုင်ပါက၊ ငါ့စိတ်ဝိညာဉ်က အားနည်းလာပြီး၊ လပေါင်းများစွာအတွင်း အသက်ဓာတ် အနည်းငယ်ပဲ ကျန်ရစ်လိမ့်မယ်။”

ဟုန်ယွိသည် ချန်ယင်းရှာ၏ စကားကို နားထောင်ပြီး ခေါင်းညိတ် သဘောတူလိုက်သည်။

ဤတကြိမ် တောရိုင်းဒေသသို့ ခရီးစဉ်သည် အလွန်အန္တရာယ်များသည်။ အကယ်၍ စိတ်ဝိညာဉ်တစ်ခုတည်းဖြင့်သာ သွားနိုင်ပါက၊ ၎င်းသည် များစွာပို၍ အဆင်ပြေမည် ဖြစ်သည်။ စိတ်ဝိညာဉ်သည် ကောင်းကင်ယံတွင် ပျံသန်းနိုင်ပြီး မြေအောက်သို့ တိုးဝင်နိုင်ကာ၊ သွားလာရာ၌လည်း သဲလွန်စ မကျန်ခဲ့ပေ။ သို့သော်၊ မည်သည့်ကျင့်ကြံသူဖြစ်စေ၊ ၎င်းတို့၏ စိတ်ဝိညာဉ်သည် ကာလကြာရှည်စွာ ခရီးသွားနိုင်မည် မဟုတ်ပေ။

အကြောင်းမှာ စိတ်ဝိညာဉ်သည် ခန္ဓာကိုယ်မှ ကြာရှည်စွာ ခွဲထွက်နေပါက၊ ခန္ဓာကိုယ်သည် အိမ်ရှင်မရှိတော့ဘဲ၊ ရက်အနည်းငယ်အတွင်း ၎င်း၏ အသက်ရှင်စွမ်းအားများသည် များစွာ လျော့နည်းသွားမည် ဖြစ်သည်။ နောက်ဆုံးတွင်၊ ခန္ဓာကိုယ်သည် ခြောက်သွေ့သွားပြီး၊ စိတ်ဝိညာဉ်သည်လည်း တဖြည်းဖြည်း အားနည်းသွားမည် ဖြစ်သည်။

စိတ်ဝိညာဉ်နှင့် ခန္ဓာကိုယ်သည် ကာလကြာရှည်စွာ ခွဲထွက်နေ၍ မရပေ။ ဤသည်မှာ သံမဏိစည်းမျဉ်း ဖြစ်ပြီး၊ မည်သည့်ကျင့်ကြံသူမျှ ၎င်းကို ဆန့်ကျင်၍ မရပေ။

ထို့ပြင်၊ ဤတကြိမ် တောရိုင်းဒေသသို့ ခရီးစဉ်သည် အနည်းဆုံး တစ်လလောက်ကြာမည် ဖြစ်သည်။ ဤတစ်လအကြာတွင်၊ ချန်ယင်းရှာသည် သိုင်းသူတော်စင် ခန္ဓာကိုယ်ကို ပြီးမြောက်အောင်မြင်ခဲ့လျှင်ပင်, သူမအနေဖြင့် သေဆုံးသွားဖွယ် ရှိသည်။

“ဒီရက်အနည်းငယ်အတွင်း၊ ငါ ကောင်းကင်နတ်ဘုရား မိုးကြိုးတာအိုပညာရပ်ကို အသုံးပြုပြီး၊ အင်မော်တယ်ပစ္စည်း အဝါရောင်ကျောက်စိမ်းကို လေ့လာခဲ့တယ်။ နောက်ဆုံးမှာ၊ ဒီပစ္စည်းနဲ့ပတ်သက်ပြီး နက်ရှိုင်းတဲ့ အသိဉာဏ်အချို့ကို ဖမ်းဆုပ်နိုင်ခဲ့တယ်။ ငါ အထဲမှာရှိတဲ့ မိုးကြိုးစွမ်းအားရဲ့ ၁၀ ရာခိုင်နှုန်းကို ထုတ်လွှတ်နိုင်ပြီ။ ငါတို့နှစ်ဦးစလုံး အဲဒီမိုးကြိုးစွမ်းအားကို အသုံးပြုပြီး၊ ငါတို့စိတ်ဝိညာဉ်တွေကို ယန်စိတ်ဝိညာဉ် အဖြစ်သို့ ပြောင်းလဲနိုင်လိမ့်မယ်။”

ချန်ယင်းရှာသည် ဟုန်ယွိကို တည်ကြည်သော မျက်နှာအမူအရာဖြင့် ကြည့်လိုက်သည်။ ထို့နောက်၊ သူမသည် လက်ညှိုးကို ဆန့်ထုတ်ပြီး၊ သူမ၏ အတွေးများကို လှုံ့ဆော်ကာ၊ အင်မော်တယ်ပစ္စည်း အဝါရောင်ကျောက်စိမ်းကို ရုတ်တရက် ညွှန်လိုက်ပါသည်။

ထို့နောက်၊ မိုးကြိုးလျှပ်စီးပုံစံ လေလှိုင်းသေးသေးလေး တစ်ခုသည် အင်မော်တယ်ပစ္စည်း အဝါရောင်ကျောက်စိမ်းကို ထိမှန်သည်။

ဘုန်း။

အင်မော်တယ်ပစ္စည်း အဝါရောင်ကျောက်စိမ်း တစ်ခုလုံး တုန်ခါသွားပြီး၊ ယခင်က မမြင်ဖူးသော ပြင်းထန်သော လျှပ်စီးအလင်းတစ်ခု ပေါက်ကွဲထွက်လာသည်။

ဤလျှပ်စီးအလင်းသည် အလွန်ပြင်းထန်လွန်းသဖြင့်၊ ဟုန်ယွိသည် မျက်လုံးများကို မှိတ်ထားသော်လည်း၊ ထိုလျှပ်စီးအလင်းသည် သူ့မျက်ခွံများကို ဖြတ်ကျော်ပြီး၊ မျက်လုံးများကို နာကျင်စေကာ မျက်ရည်များပင် စီးကျလာစေသည်။

ထို့နောက် ဟုန်ယွိ၏ ခန္ဓာကိုယ်တစ်ခုလုံးသည် လျှပ်စီးအလင်းဖြင့် ထွန်းလင်းလာသည့်အလား လင်းလက်သွားခဲ့သည်။ ဤအခိုက်အတန့်တွင်၊ သူသည် သူ့ခန္ဓာကိုယ်တစ်ခုလုံး ကြည်လင်သော သလင်းကျောက်ကဲ့သို့ ဖြစ်နေပြီး၊ ကြွက်သားနှင့် အရိုးတစ်ခုစီတိုင်းသည် တောက်ပစွာ ထွန်းလင်းနေသည်ဟု ခံစားရသည်။

တစ်ချိန်တည်းမှာပင်၊ လျှပ်စီးအလင်းသည် သူ့ခန္ဓာကိုယ်ပေါ်သို့ ထွန်းလင်းလာသည်နှင့်အမျှ၊ ဟုန်ယွိ၏ ခန္ဓာကိုယ်တစ်ခုလုံး ထုံကျင်သွားပြီး၊ ဆံပင်အားလုံးသည် ဆူကောင်ကဲ့သို့ ထောင်ထလာသည်။

“အမြန်လှုပ်ရှားပြီး မင်းရဲ့စိတ်ဝိညာဉ်ကို အပြင်ထုတ်လိုက်၊ ပြီးရင် လျှပ်စီးအလင်းကို ပိတ်ဆို့လိုက်ပါ။ မဟုတ်ရင် မင်းရဲ့ခန္ဓာကိုယ်က မိုးကြိုးလျှပ်စီးနဲ့ သန့်စင်ခံရလိမ့်မယ်။”

ချန်ယင်းရှာ၏ အလောတကြီး အသံက သူ့နားထဲတွင် ထွက်ပေါ်လာသည်။

ဟုန်ယွိသည် ဤအရာကို ကောင်းစွာ နားလည်သဘောပေါက်သည်။ ချန်ယင်းရှာပင် ပြောစရာမလိုဘဲ၊ သူ၏စိတ်ဝိညာဉ်သည် ခန္ဓာကိုယ်မှ လုံးဝ ထွက်ခွာသွားပြီး၊ မည်သည့်အရာကိုမှ ထိန်းချန်ထားခြင်း မရှိတော့ပေ။

အားကောင်းသော အတွေးမျှင်များသည် သူ့ခန္ဓာကိုယ်တဝိုက်တွင် လှည့်ပတ်ကာ၊ ထူးဆန်းသော လေပြင်းများစွာကို ဖြစ်ပေါ်စေပြီး၊ မိုးကြိုးလျှပ်စီးအလင်းကို လုံးဝ ပိတ်ဆို့ထားသည်။

သို့သော်၊ ဤအလွန်မင်း ထွန်းလင်းတောက်ပနေသော လျှပ်စီးအလင်းများသည် ဟုန်ယွိ၏ အတွေးမျှင်များကို ဆက်လက် ဖျက်ဆီးနေသည်။ ဟုန်ယွိသည် အတွေးမျှင်များ မည်မျှ ဖြစ်ပေါ်စေသည်ဖြစ်စေ၊ ထိုမိုးကြိုးလျှပ်စီးအလင်းများသည် ၎င်းတို့ကို ရက်စက်စွာ ဖျက်ဆီးနိုင်သည်။

ယင်းက ထူထဲသော နွားရေခွံတစ်ခုသည် ချွန်ထက်သော အပ်ဖြင့် ထိုးဖောက်မှုကို မခံနိုင်သလို ဖြစ်နေသည်။

ဟုန်ယွိသည် မိုးကြိုးလျှပ်စီး၏ စွမ်းအားကို အမှန်တကယ် ခံစားလိုက်ရ၏။ ၎င်းအတွင်းရှိ ယင်နှင့်ယန် ပေါက်ကွဲမူဆန္ဒသည် မည်မျှအားကောင်းသော စိတ်ဝိညာဉ်ကိုမဆို ဖျက်ဆီးနိုင်သည်။

မိုးကြိုးလျှပ်စီးသည် မည်မျှပင် သေးငယ်သည်ဖြစ်စေ၊ ၎င်းအတွင်းရှိ ဆန္ဒသည် အစွမ်းထက်သော အတွေးမြင်မှန်သမျှကို ဖျက်ဆီးပစ်နိုင်သည်။

ယင်းက သံမဏိချိန်ခွင်လျှာသည် မည်မျှ သေးငယ်သည်ဖြစ်စေ၊ ပေါင်ထောင်ချီ အလေးချိန်ကို ခံနိုင်ရည်ရှိသည့်အတိုင်းပင်။

လျှပ်စီးအလင်းသည် ဆက်လက် စီးဆင်းလာပြီး၊ ဟုန်ယွိ၏ အတွေးမျှင်များကို ဖျက်ဆီးနေသည်။ အခြားတဖက်တွင်, ဟုန်ယွိသည် သူ၏စိတ်ဝိညာဉ် စွမ်းအားကို အပြည့်အဝ လည်ပတ်ကာ၊ ထာဝရအတွေးများကို တစ်ခုပြီးတစ်ခု မွေးဖွားပေးနေသည်။

ဟုန်ယွိသည် အတိတ်အမိတ္တဘကျမ်းကို ကျင့်ကြံခဲ့ပြီး၊ သူ၏ အတွေးများသည် အတိတ်ကဲ့သို့ ထာဝရတည်မြဲပြီး မပြောင်းလဲပေ။ ၎င်းတို့ကို ဖျက်ဆီးရန် အလွန်ခက်ခဲသည်။ သို့သော်၊ မိုးကြိုးလျှပ်စီးအောက်တွင်၊ ထာဝရတည်မြဲပြီး မပြောင်းလဲသော အတွေးများသည်ပင် ဆပ်ပြာ ပူဖောင်းများကဲ့သို့ တစ်ခုပြီးတစ်ခု ပေါက်ကွဲထွက်နေခဲ့သည်။

“ဒါက မိုးကြိုးလျှပ်စီးရဲ့ စွမ်းအားလား….။ အထဲမှာရှိတဲ့ ယင်နဲ့ယန် ပေါက်ကွဲမှုဆန္ဒ၊ အဆုံးစွန် ဖန်တီးခြင်းနဲ့ ဖျက်ဆီးခြင်းရဲ့ အစွန်းနှစ်ဖက်လား….” ကံကောင်းထောက်မစွာ, ချန်ယင်းရှာသည် လျှပ်စီးအလင်းကို သိပ်မပြင်းထန်အောင် ကောင်းစွာ ထိန်းချုပ်ထားနိုင်သည်။ မဟုတ်ရင်၊ သူ၏ စိတ်ဝိညာဉ်သည် ကြာမြင့်စွာကတည်းက ဖျက်ဆီးခံရပြီးသား ဖြစ်မည်ဟု ဟုန်ယွိ သိသည်။

“ငါ နားလည်ပြီ၊ ငါ နားလည်ပြီ။ မိုးကြိုးကပ်ဘေးကို မဖြတ်ကျော်ဘဲနဲ့ မိုးကြိုးကပ်ဘေးရဲ့ ကြောက်မက်ဖွယ်ကောင်းပုံကို ဘယ်တော့မှ မသိနိုင်ဘူး။”

မုရုန်ယန်ထံမှ ဆန်းကြယ်ကောင်းကင်ဘုံခန်းမ၏ တာအိုပညာများကို ကြားဖူးပြီးနောက်၊ ဟုန်ယွိသည် မိုးကြိုးလျှပ်စီး၏စွမ်းအားကို နားလည်လာခဲ့သည်။ မိုးကြိုးလျှပ်စီးအတွင်းရှိ ဆန္ဒသည် ယင်နှင့်ယန် အစွန်းနှစ်ဖက်စလုံး ပါဝင်နေသည်။ ၎င်းတို့သည် တစ်ခုနှင့်တစ်ခု ထိပ်တိုက်ရင်ဆိုင်သောအခါ၊ အကန့်အသတ်မရှိသော စွမ်းအားကို ထုတ်လုပ်ပေးနိုင်သည်။

မိုးကြိုးလျှပ်စီးအတွင်းရှိ ဆန္ဒတွင်၊ ယန်သည် ဖန်တီးမှုကို ကိုယ်စားပြုပြီး၊ ယင်က ဖျက်ဆီးမှုကို ကိုယ်စားပြုသည်။ ယင်နှင့်ယန်တို့ ထိပ်တိုက်ရင်ဆိုင်သောအခါ၊ ၎င်းသည် စကြဝဠာ၏ ဆန္ဒကို ကိုယ်စားပြုသည်။

ရှင်သန်ခြင်းနှင့် ဖျက်ဆီးခြင်း၏ အစွန်းရောက် ထိပ်တိုက်တွေ့ဆုံမှု။

မိုးကြိုးလျှပ်စီးသည် အသက်ကို ဖန်တီးနိုင်သလို၊ ဖျက်ဆီးပစ်နိုင်သည်။

ဤဆန္ဒမျိုးသည် အခြားဆန္ဒများအားလုံးကို ဖျက်ဆီးပစ်နိုင်သည်။

ထို့ကြောင့်၊ ဤဆန္ဒသည် အနည်းငယ်မျှ ရှိနေလျှင်ပင် ၎င်းသည် သူ့ထက် ဆယ်ဆ သို့မဟုတ် အဆရာပေါင်းများစွာ ပိုမိုအားကောင်းသော အခြားစွမ်းအားကို ဖျက်ဆီးနိုင်ခြင်း ဖြစ်သည်။

ယခု ချန်ယင်းရှာက ထုတ်လွှတ်လိုက်သော အင်မော်တယ်ပစ္စည်း အဝါရောင်ကျောက်စိမ်း၏ စွမ်းအားသည် ၎င်း၏ စုစုပေါင်းစွမ်းအား၏ ၁၀ ရာခိုင်နှုန်းသာ ဖြစ်ပြီး၊ ၎င်းသည် ဟုန်ယွိ၏ စွမ်းအားထက်ပင် အားနည်းပါသည်။

သို့သော်၊ ဖန်တီးခြင်းနှင့် ဖျက်ဆီးခြင်း၏ ဆန္ဒပါဝင်သော ဤစွမ်းအားသည် ဟုန်ယွိ၏ စိတ်ဝိညာဉ်စွမ်းအားထက် သေးငယ်နေလျှင်ပင်, ဟုန်ယွိ၏ စိတ်ဝိညာဉ်ကို လုံးဝ ဖျက်ဆီးပစ်ဖို့ လုံလောက်ပါသည်။

ဤသည်မှာ စွမ်းအားအတွင်းရှိ ဆန္ဒများ၏ ကွဲပြားမှုကြောင့် ဖြစ်သည်။

“ဒီမိုးကြိုးလျှပ်စီးဟာ စွမ်းအားအပြည့်အဝထဲက ၁၀ ရာခိုင်နှုန်းလောက်ပဲ ရှိတယ်။ ငါရဲ့ အတိတ်ဆန္ဒက ခံနိုင်ရည်ရှိလောက်ပဲ။ တကယ်လို့, စွမ်းအား အပြည့်အဝသာ ဝင်ရောက်လာခဲ့ရင်, ငါ့မှာ အတိတ်အမိတ္တဘကျမ်းနဲ့တောင် သေဆုံးရလိမ့်မယ်။ ငါ တကယ့်မိုးကြိုးကပ်ဘေးတွေကို ကျော်ဖြတ်ဖို့အတွက် စွမ်းအင်ပိုမိုစုဆောင်းဖို့ လိုအပ်နေပုံပဲ။ ငါရဲ့အတိတ်ဆန္ဒက ဖန်တီးခြင်းနဲ့ ဖျက်ဆီးခြင်းဆန္ဒနှစ်ခုကို ကျော်လွှားဖို့ မလုံလောက်သေးဘူး။ ဒိုင်ဇင်ဘုရားကျောင်းရဲ့ ကျမ်းစာသုံးအုပ်က ဘာကြောင့် သေမျိုးကမ္ဘာကို ကျော်လွှားပြီး နိဗ္ဗာနနယ်ပယ်အထိ ရောက်ရှိနိုင်လဲဆိုတာ ငါ နောက်ဆုံး နားလည်သွားပြီ။ ဟုတ်တယ်၊ အတိတ်ဆန္ဒ၊ ပစ္စုပ္ပန်ဆန္ဒနဲ့ အနာဂတ်ဆန္ဒတို့ကပဲ ဖန်တီးခြင်းနဲ့ ဖျက်ဆီးခြင်းဆိုတဲ့ ဆန့်ကျင်ဘက်ဆန္ဒတွေကို ကျော်လွှားနိုင်ပြီး၊ စကြဝဠာရဲ့ဆန္ဒကို ကျော်လွှားနိုင်တယ်။”

ဖန်တီးခြင်းနှင့် ဖျက်ဆီးခြင်းဆန္ဒနှစ်ခုသည် စကြဝဠာ၏ ဆန္ဒများ ဖြစ်သည်။

အတိတ်၊ ပစ္စုပ္ပန်နှင့် အနာဂတ်ဆန္ဒများသည် တစ်ခုတည်းအဖြစ်သို့ ပေါင်းစည်းသွားသောအခါ၊ ၎င်းတို့သည် အသက်မဲ့အခြေအနေကို ရရှိသည်။ ၎င်းသည် လူတစ်ယောက်ဆန္ဒသည် စကြဝဠာ၏ ဆန္ဒကို ကျော်လွှားသွားသည့် အခြေအနေ ဖြစ်သည်။

“အတိတ်၊ ပစ္စုပ္ပန်နဲ့ အနာဂတ်ကျမ်းတွေကို ဖန်တီးခဲ့တဲ့လူက တကယ်ကို ထူးချွန်သူပဲ။ ဒါပေမယ့်၊ ဒီထူးချွန်သူကိုယ်တိုင်ကရော တကယ်ပဲ အဆုံးစွန်သောအဆင့်ထိ ရောက်ရှိခဲ့ရဲ့လား။”

စာအုပ်ရေးသားခြင်းသည် လူတစ်ဦး၏ အတွေးများကို ကိုယ်စားပြုသည်။ သို့သော် ထိုအတွေးများကို လက်တွေ့အကောင်အထည်ဖော်ခြင်းသည် နောက်ထပ်ကိစ္စတစ်ခု ဖြစ်သည်။

ရှေးခေတ်ပညာရှိများသည် အတိတ်၊ ပစ္စုပ္ပန်နှင့် အနာဂတ်ကျမ်းစာများကို ၎င်းတို့ကို တစ်ခုတည်းအဖြစ်သို့ ပေါင်းစည်းရန်၊ ၎င်းတို့၏ဆန္ဒဖြင့် ကောင်းကင်နှင့် မြေကြီး၏ ဆန္ဒကို ကျော်လွှားရန်နှင့် စကြဝဠာ၏ဆန္ဒကို ကျော်လွှားရန်အတွက် ဖန်တီးခဲ့ကြသည်။ သို့သော်၊ ၎င်းသည် အတွေးအကြံတစ်ခုသာ ဖြစ်သည်။ ဤကျမ်းစာသုံးအုပ်သည် ကောင်းကင်နှင့် မြေကြီး၏ ဆန္ဒကို ကျော်လွှားနိုင်ခြင်း ရှိမရှိဆိုသည်မှာ နောက်ထပ် သီအိုရီတစ်ခုသာ ဖြစ်သည်။

ရှေးခေတ်၌ ယန်နတ်ဘုရားအဆင့်သို့ ရောက်ရှိခဲ့သူများ များစွာရှိခဲ့သော်လည်း၊ နိဗ္ဗာနနယ်ပယ်ကို ကျော်လွှားပြီး အသက်မဲ့အခြေအနေသို့ အမှန်တကယ် ရောက်ရှိခဲ့သူ တစ်ဦးတစ်ယောက်မျှ မရှိခဲ့ပေ။

ဤအခိုက်အတန့်တွင်၊ ဟုန်ယွိသည် လူ၏ဆန္ဒသည် စကြဝဠာ၏ဆန္ဒကို ကျော်လွှားနိုင်မည်လားဟု မတွေးဘဲ မနေနိုင်ခဲ့ပေ။

“ဒီအဆင့်က ငါ့အတွက် အလွန်အလှမ်းဝေးကွာနေပါသေးတယ်လေ။ ငါ့ခြေဖဝါးကို မြေကြီးပေါ်မှာ ခိုင်ခိုင်မာမာ ရပ်တည်နိုင်အောင် ကျင့်ကြံရမယ်။ နောက်မှ တစ်လှမ်းချင်း လှမ်းရမယ်။ ဒီမိုးကြိုးလျှပ်စီးကို အသုံးပြုပြီး ၎င်းအတွင်းရှိမှာရှိတဲ့ ဆန္ဒကို နားလည်သဘောပေါက်ပြီး၊ ငါ့ စိတ်ဝိညာဉ်ကို သန့်စင်ရမယ်။”

ဟုန်ယွိ၏အတွေးများသည် ဆက်လက်လှုပ်ရှားနေပြီး သေဆုံးနေသည်။ သူသည် မိုးကြိုးလျှပ်စီးထဲမှ စကြဝဠာ၏ဆန္ဒဖြစ်သော ဖန်တီးခြင်းနှင့် ဖျက်ဆီးခြင်းဆန္ဒကို နားလည်သဘောပေါက်ရန် အာရုံစူးစိုက်ထားသည်။ သူ၏ အတွေးများသည် ပိုမိုခိုင်မာလာပြီး၊ သူ၏ စိတ်ဝိညာဉ်သည် တစတစ သန့်စင်လာသည်။

ဤအခိုက်အတန့်တွင်၊ ဟုန်ယွိ၏ အတွေးများသည် မိုးကြိုးလျှပ်စီး၏ တိုက်ခိုက်မှုကို အနည်းငယ် ခံနိုင်ရည်ရှိခဲ့သော်လည်း၊ မိုးကြိုးလျှပ်စီး အနည်းငယ်သည် သူ၏ခန္ဓာကိုယ်ထဲသို့ ထိုးဖောက်ဝင်ရောက်လာပြီး ထိမှန်သွားသည်။

သူ၏ ခန္ဓာကိုယ်တစ်ခုလုံး ထုံကျင်သွားသော်လည်း၊ ထုံကျင်မှုပြီးနောက် အလွန်သက်သာလာသည်။

“ဟုန်ယွိ……၊ တကယ်လို့, မင်းသာ ဒီမိုးကြိုးလျှပ်စီးရဲ့ စွမ်းအားကို ကောင်းစွာ ဆုပ်ကိုင်နိုင်ခဲ့ရင်၊ ဒီမိုးကြိုးလျှပ်စီးက မင်းရဲ့ခန္ဓာကိုယ်ကိုလည်း သန့်စင်ပေးနိုင်တယ်။ မိုးကြိုးနတ်ဘုရားတာအိုဂိုဏ်းမှာ အမြင့်မြတ်ဆုံး လျှို့ဝှက်ပညာရပ်တစ်ခုဖြစ်တဲ့ တောက်ပသောမိုးကြိုးကိုယ်ထည်ဆိုတဲ့ ရုပ်ခန္ဓာကိုယ် ကျင့်ကြံခြင်း ပညာရပ်တစ်ခု ရှိတယ်။ ဒီပညာရပ်ကို ရှေးခေတ် တာအိုဘုန်းတော်ကြီးတွေ ဖန်တီးထားခဲ့တာ။ ဒီပညာရပ်က ဝိညာဉ်ကို အသုံးပြုပြီး၊ မိုးကြိုးလျှပ်စီးကို ထိန်းချုပ်ကာ ခန္ဓာကိုယ်အတွင်းမှာရှိတဲ့ ခန္ဓာအချက်ပြ သွေးကြောတွေကို လှုံ့ဆော်ပေးပြီး ပြိုင်ဘက်ကင်း နတ်ဘုရား တစ်ပါး ဖြစ်လာရန် ကြိုးပမ်းဖို့ပဲ။ သူတို့ဟာ သိုင်းပညာနဲ့ တာအိုကို ပေါင်းစည်းပြီး နိဗ္ဗာနနယ်ပယ်ကို ကျော်လွှားဖို့ ကြိုးစားခဲ့ကြတယ်။ ဒါပေမယ့် ဒီပညာရပ် ငါ့လက်ထဲ ရောက်ရှိလာချိန်မှာ အများစုက ပျောက်ဆုံးနေပြီ။ ဒါပေမယ့်၊ ကျန်ရှိနေတဲ့ ပညာရပ်က မိုးကြိုးနတ်ဘုရားတာအိုဂိုဏ်းရဲ့ အစွမ်းထက်ဆုံး နတ်ဘုရားစွမ်းအင်အဖြစ် ရှိနေဆဲပဲ။ ဒီပညာရပ်က အခြားလူတွေထံ လွှဲပြောင်းပေးပို့လို့ မရတဲ့ လျှို့ဝှက်ပညာရပ်တစ်ခုဖြစ်တယ်။ ငါ့ဆရာ သေဆုံးခါနီးကျမှပဲ ဒီပညာရပ်ကို ငါ့ဆီ လွှဲပြောင်းပေးခဲ့တာ။ ဒီပညာက နဂိုကတည်းက ကျွမ်းကျင်ဖို့ အလွန်ခက်ခဲတယ်။ ငါ့ဆရာလည်း မိုးကြိုးကပ်ဘေးကို ဖြတ်ကျော်နေစဉ် မိုးကြိုးလျှပ်စီး အနည်းငယ်ကို ထိန်းချုပ်ပြီး သူ့ခန္ဓာကိုယ်ကို သန့်စင်ဖို့ ကြိုးစားခဲ့တယ်။ ဒါပေမယ့်၊ သူ၏ အတွေးတွေက သန့်စင်ဖို့ မလုံလောက်ခဲ့တာကြောင့် သူ့စိတ်ဝိညာဉ်ဟာ မိုးကြိုးဖြင့် ဖျက်ဆီးခံခဲ့ရတယ်။ အခု ငါတို့မှာ အင်မော်တယ်ပစ္စည်း အဝါရောင်ကျောက်စိမ်းလက်စွပ် ရှိနေပြီဆိုတော့ မိုးကြိုးလျှပ်စီးကို ထိန်းချုပ်ပြီး ဒီပညာရပ်ကို ကျင့်ကြံနိုင်ပြီ။ အခု၊ ငါ ဒီပညာရပ်ကို မင်းဆီ လွှဲပြောင်းပေးမယ်။ မင်းရဲ့ ခန္ဓာကိုယ်ကို မိုးကြိုးလျှပ်စီးနဲ့ သန့်စင်ပြီးတာနဲ့ သံမဏိလို မာကြောလာပြီး၊ အားနည်းချက်အားလုံး ပျောက်ကွယ်သွားလိမ့်မယ်။ မင်းရဲ့သိုင်းပညာလည်း အဆင့်သစ်တစ်ခုထိ မြင့်တက်သွားလိမ့်မယ်။.”

ချန်ယင်းရှာ၏ အသံက ရုတ်တရက် ထွက်ပေါ်လာပြီး၊ သူမသည် အချိန်အကြာကြီး တုံ့ဆိုင်းနေခဲ့ပြီးနောက် နောက်ဆုံးတွင် ဆုံးဖြတ်ချက်ချလိုက်ပုံ ရပါသည်။

“ဘာ….။ မိုးကြိုးလျှပ်စီးရဲ့ စွမ်းအားအနည်းငယ်ကို အသုံးပြုပြီး၊ ခန္ဓာကိုယ်အတွင်းရှိ ခန္ဓာအချက်ပြ သွးကြောတွေကို လှုံ့ဆော်ကာ၊ ကြွက်သားနဲ့ အရိုးတွေကို သန့်စင်ပြီး၊ အသက်စွမ်းအားကို နှိုးဆွနိုင်တယ်ပေါ့….။ ကမ္ဘာပေါ်တွင် ဒီလိုထူးခြားတဲ့ နည်းလမ်းတစ်ခု ရှိနေလိမ့်မယ်လို့ မထင်ထားခဲ့ဘူး။”

ချန်ယင်းရှာ၏ စကားကို ကြားပြီးနောက်၊ ဟုန်ယွိသည် အံ့အားသင့်သွားသည်။

ယခုလေးတင်၊ မိုးကြိုးလျှပ်စီး အနည်းငယ်သည် သူ၏ခန္ဓာကိုယ်ကို တုန်ခါစေခဲ့သည်။ ထုံကျင်ပြီး သက်သာမှုရှိခဲ့သော်လည်း၊ ဟုန်ယွိသည် တစ်ခုခု စိတ်ကူးရနေသည်။ မိုးကြိုးလျှပ်စီး၏ စွမ်းအားကို အသုံးပြု၍၊ သူ့ခန္ဓာကိုယ်ကို သန့်စင်နိုင်မည်လားဟု တွေးမိသည်။

သို့သော်၊ သူသည် ဤစိတ်ကူးကို ချက်ချင်း ပယ်ချလိုက်သည်။

မိုးကြိုးလျှပ်စီး၏ စွမ်းအားသည် သေးသိမ်သည်ဟု မယူဆသင့်ပေ။ လူ့ခန္ဓာကိုယ်သည်လည်း အလွန်နူးညံ့သိမ်မွေ့သည်။ မိုးကြိုးလျှပ်စီး၏ စွမ်းအားကို အသုံးပြု၍ ခန္ဓာကိုယ်ကို သန့်စင်ရန်ဆိုသည်မှာ အယောက်တစ်သန်းတစ်ခုတွင် တစ်ယောက်သာ ဖြစ်နိုင်သည့် အခွင့်အလမ်းဖြစ်သည်။

သို့သော်၊ သူ၏ စိတ်ကူးကို အခြားသူများက တွေးပြီးသားဖြစ်ပြီး၊ ထိုအတွက် နည်းလမ်းတစ်ခုကိုပင် ဖန်တီးထားသည်ဟု သူ မမျှော်လင့်ခဲ့ပေ။

“ဒီလိုနည်းလမ်းတစ်ခုကို ဖန်တီးဖို့၊ အသက်ပေါင်း မည်မျှ စတေးခဲ့ရမည်နည်း။ ရှင်ခြင်းသေခြင်းနဲ့ ရင်ဆိုင်ပြီး စီနီယာပညာရှင် ဘယ်လောက်များများ ကြိးစားခဲ့ရသနည်း” ဤကဲ့သို့ နည်းလမ်းတစ်ခုကို ဖန်တီးရန်အတွက် လူ့ခန္ဓာကိုယ်ကို ရှင်းလင်းစွာ နားလည်ရန် လိုအပ်သည်ကို ဟုန်ယွိ သိထားသည်။ ၎င်းသည် ထောင်ပေါင်းများစွာသော စမ်းသပ်မှုများနှင့် မရေမတွက်နိုင်သော အသက်များကို စတေးကြရလိမ့်မည်။

၎င်းသည် ဆေးပညာလောကတွင် အဆိပ်ကို ကိုယ်တိုင်စမ်းသပ်ပြီး ဖြေဆေးကို သုတေသန ပြုလုပ်ခြင်းနှင့် တူညီသည်။

“ဟုတ်တယ်။ ရှေးခေတ်ကတည်းက နတ်ဘုရား စိတ်ဝိညာဉ် ကျင့်ကြံသူတွေဟာ သန်မာတဲ့ ခန္ဓာကိုယ်ကို မပိုင်ဆိုင်ကြတဲ့အတွက် လူသားအင်မော်တယ်အဆင့်ကို လေ့ကျင့်နိုင်ခြင်း မရှိခဲ့ကြဘူး။ သူတို့က သိုင်းသူတော်စင်နယ်ပယ်ရဲ့ အထွတ်အထိပ်ဆင့်တောင် မရောက်ရှိနိုင်ခဲ့ကြဘူး။ သူတို့ရဲ့ ထူးချွန်တဲ့ စိတ်ကူးစိတ်သန်းတွေကြောင့်၊ သူတို့က ဒီကျင့်ကြံခြင်းပညာရပ်ကို ဖန်တီးခဲ့ကြတာ။ ဒီပညာရပ်ကို စူးစမ်းလေ့လာဖို့အတွက် မိုးကြိုးနတ်ဘုရားတာအိုဂိုဏ်းက ကျွမ်းကျင်သူများစွာ သေဆုံးခဲ့ရတယ်။ မိုးကြိုးကပ်ဘေး ငါးကြိမ် ဖြတ်ကျော်ပြီးတဲ့ ကျွမ်းကျင်သူတွေတောင် ပါဝင်တယ်။ သူတို့က မိုးကြိုးကပ်ဘေးကို ဖြတ်ကျော်နေစဉ်မှာ မိုးကြိုးလျှပ်စီး အနည်းငယ်ကို သူတို့ခန္ဓာကိုယ်ထဲမှာ ထိန်းချုပ်ပြီး သူတို့ရဲ့ ခန္ဓာအချက်ပြ သွေးကြောတွေကို လှုံ့ဆော်ဖို့ ကြိုးစားခဲ့ကြတာ။” ချန်ယင်းရှာ က သက်ပြင်းချလိုက်သည်။

ဤပညာရပ်၏ တန်ဖိုးသည် အတိတ်အမိတ္တဘကျမ်းထက် မနိမ့်ကျပေ။

ဟုန်ယွိသည် ချန်ယင်းရှာက မိုးကြိုးနတ်ဘုရားတာအိုဂိုဏ်း၏ အဆုံးစွန်သော နည်းလမ်းကို သူ့ထံ လွှဲပြောင်းပေးခြင်းဖြင့် သူမ၏ စိတ်ရင်းမှန်ကို ပြသလိုက်သည်ကို သိလိုက်ပါသည်။

သူမ၏ စိတ်ရင်းမှန်သည် သူတို့နှစ်ဦး တာအိုအဖော် ဖြစ်လာရန်အတွက် ဖြစ်သည်။

တာအိုပညာများကို ပြုစုပျိုးထောင်ရန်၊ စည်းစိမ်ဥစ္စာ၊ တာအိုအဖော်၊ ပညာရပ်နှင့် ငြိမ်းချမ်းသော နေရာတစ်ခု လိုအပ်သည်။

မဟာနတ်ဆိုးအင်မော်တယ် ရှစ်ပါးထဲမှ တစ်ဦးဖြစ်သော ကောင်းကင်မြွေဘုရင်သည် ဆန်းကြယ်ကောင်းကင်ဘုံခန်းမ၏ ခန်းမသခင်နှင့် တာအို အဖော် ဖြစ်လာခဲ့သည်။ သူတို့နှစ်ဦး ပူးပေါင်းလိုက်သောအခါ၊ ၎င်းတို့သည် ကမ္ဘာကို လွှမ်းမိုးခဲ့ပြီး၊ မိုနိုဂိုတာရီကိုပင် လိုက်လံဖမ်းဆီးရဲခဲ့သည်။

“တာအိုအဖော် ဖြစ်လာခြင်း…” ဟုန်ယွိ၏ နှလုံးသားသည် ရုတ်တရက် စိတ်လှုပ်ရှားမှုဖြင့် တဖျပ်ဖျပ် ခုန်လာသည်။

သူ စိတ်လှုပ်ရှားလာချိန်တွင်၊ ချန်ယင်းရှာက ထပ်မံ ပြောလိုက်သည်၊ “ဒီတောက်ပသောမိုးကြိုးကိုယ်ထည်ပညာရပ်မှာ ခန္ဓာအချက်ပြ အပ်စိုက် အမှတ်တွေလည်း ပါဝင်တယ်။ အရင်က ခန္ဓာအချက်ပြ အပ်စိုက်အမှတ်ငါးခုရှိခဲ့ပေမယ့်၊ အားလုံး ပျောက်ဆုံးကုန်ပြီ။ အခု တစ်ခုပဲ ကျန်တော့တယ်။ အဲဒီခန္ဓာအချက်ပြ အပ်စိုက်အမှတ်ကို စိုက်ပျိုးရေးနတ်ဘုရာမ၏ အပ်စိုက်မှတ်လို့ ခေါ်တယ်။”

စိုက်ပျိုးရေးနတ်ဘုရာမ၏ အပ်စိုက်မှတ်လား..။

စာစဉ် (၁၈) ပြီးပါပြီ။

ဘာသာပြန်သူ နေဇင်။