ဝိညာဉ်သန္ဓေသားအဆင့် စိတ်ဝိညာဉ်ပစ္စည်းကို ရရှိခြင်း(၃)။

"ယောက်ျား... ဝိညာဉ်သန္ဓေသား ဖွဲ့စည်းဖို့အတွက်လည်း စမ်းသပ်မှု သုံးခု ဖြတ်ကျော်ဖို့ လိုအပ်တယ်…"

"ပထမတစ်ခုက အမြုတေကို ဖြိုခွဲပြီး ဝိညာဉ်ဖွဲ့စည်းဖို့ပဲ…"

"ဒါပေမဲ့ ဒီစမ်းသပ်မှုကို အောင်မြင်ဖို့အတွက်.. ရွှေအမြုတေကျင့်ကြံသူရဲ့ မှော်စွမ်းအားက အရမ်း သန့်စင်နေရမယ်… အညစ်အကြေး နည်းနည်းလေး ရှိရင်တောင်... ဝိညာဉ်သန္ဓေသား ဖွဲ့စည်းမှုကို ကျရှုံးစေနိုင်တယ်…"

"ပြဿနာက ရွှေအမြုတေကျင့်ကြံသူ ၉၉% ကျော်ရဲ့ မှော်စွမ်းအားထဲမှာ အညစ်အကြေး အမျိုးမျိုး ရှိနေတတ်တာပဲ…"

" ရွှေအမြုတေကျင့်ကြံသူအများစုမှာ သူတို့ရဲ့ ကျင့်ကြံခြင်း နည်းစနစ်တွေနဲ့ ပတ်သက်ပြီး ပြဿနာတွေ ရှိနေတာအပြင်… အကြီးမားဆုံး အကြောင်းရင်းက ဆေးလုံးတွေကြောင့်ပဲ…"

"ဆေးတိုင်းမှာ အဆိပ်ရှိတယ်… ဆေးလုံးတွေလည်း ခြွင်းချက် မဟုတ်ဘူး…"

"သူတို့ရဲ့ မှော်စွမ်းအားကို မြှင့်တင်ဖို့… ရွှေအမြုတေကျင့်ကြံသူတွေက ဆေးလုံး အများကြီး သောက်သုံးကြရတယ်…"

"ဒါပေမဲ့ ဒါက ရွှေအမြုတေကျင့်ကြံသူတစ်ယောက်ရဲ့ ခန္ဓာကိုယ်ထဲမှာ ဆေးအဆိပ်တွေ ပါဝင်တဲ့ အညစ်အကြေး အများအပြားကို ဖြစ်စေတယ်…"

"ဒီအချိန်မှာ.. ဆေးအဆိပ်တွေကို ဖယ်ရှားဖို့နဲ့ ငါတို့ရဲ့ မှော်စွမ်းအားထဲက အညစ်အကြေးတွေကို သန့်စင်ဖို့ ကူညီပေးနိုင်မယ့် အထူး စိတ်ဝိညာဉ်ပစ္စည်းတချို့ကို ငါတို့ လိုအပ်တယ်…"

"ဒါကို လုပ်ဆောင်ပေးနိုင်တဲ့ ဘယ်အရာကိုမဆို ဝိညာဉ်သန္ဓေသားအဆင့် စိတ်ဝိညာဉ်ပစ္စည်းလို့ ခေါ်တယ်…"

လင်းယာကျူက ရှင်းပြလိုက်သည်။

ထို့အပြင်၊ ရွှေအမြုတေကျင့်ကြံသူများတွင် သူတို့၏ မှော်စွမ်းအားကို မြှင့်တင်ရန် ဆေးလုံးများ သောက်သုံးခြင်းမှလွဲ၍ အခြား ရွေးချယ်စရာ မရှိပေ။

ကျင့်ကြံသူတိုင်းသည် ကောင်းကင်ဘုံနှင့် ယှဉ်ပြိုင်ရမည် ဖြစ်သည်။

သူတို့၏ ကိုယ်ပိုင် ကြိုးစားအားထုတ်မှုအပေါ်တွင်သာ အားကိုးနေပါက၊ အိုမင်းပြီး သက်တမ်းကုန်သွားသည့်တိုင်အောင်၊ ရွှေအမြုတေ ပြီးပြည့်စုံမှုအဆင့်သို့ တက်လှမ်းနိုင်ချင်မှ တက်လှမ်းနိုင်ပေမည်။

ထို့ကြောင့် ရွှေအမြုတေကျင့်ကြံသူများသည် ကျင့်ကြံမှုနှင့် မှော်စွမ်းအားကို မြှင့်တင်ရန် ဆေးလုံး အမြောက်အမြား သောက်သုံးရန် လိုအပ်သည်။

ဤသည်မှာ လက်တွေ့ကျကျ ရှောင်လွှဲ၍ မရနိုင်သော ကိစ္စသာ ဖြစ်၏။

ကောင်းကင်အဆင့် စိတ်ဝိညာဉ်အမြစ်ရှိသော ကျင့်ကြံသူများမှလွဲ၍၊ ထိပ်တန်း စိတ်ဝိညာဉ်အမြစ် ပါရမီရှိသူများပင်လျှင် သက်တမ်းတစ်ခုလုံး ကုန်ဆုံးသည်အထိ ပြင်းထန်စွာ ကျင့်ကြံရုံဖြင့် ရွှေအမြုတေ ပြီးပြည့်စုံမှုအဆင့်သို့ ရောက်ရှိရန် မဖြစ်နိုင်ဟု ပြောနိုင်သည်။

ထို့ကြောင့် မှော်စွမ်းအား မြှင့်တင်ရန် ဆေးလုံးများ အသုံးပြုခြင်းသည် ရှောင်လွှဲမရပေ။

သို့သော် ၎င်းသည် ဝိညာဉ်သန္ဓေသားအဆင့်သို့ ကူးပြောင်းရာတွင် အခက်အခဲများကို ဖန်တီးပေးသည်။

"နှစ်တစ်ထောင်လရောင်မြက်မှာ မှော်စွမ်းအား ကို သန့်စင်ပေးတဲ့ အာနိသင် ရှိတာလား"

ကျိုးစွေ့သည် လင်းယာကျူ၏ ဆိုလိုချက်ကို ချက်ချင်း နားလည်သွားသည်။

"အတိအကျပဲ…"

"လောကကြီးမှာ မှော်စွမ်းအားကို သန့်စင်ပေးနိုင်တဲ့ စိတ်ဝိညာဉ်ဆေးဝါးတွေ အများကြီး ရှိပါတယ်.."

"ဒါပေမဲ့ ရွှေအမြုတေနယ်ပယ်ကို ရောက်ပြီးနောက်မှာ.. ရွှေအမြုတေကျင့်ကြံသူတစ်ယောက်ရဲ့ မှော်စွမ်းအားကို သန့်စင်ပေးနိုင်တဲ့ စိတ်ဝိညာဉ်ဆေးဝါးကတော့ အရမ်း ရှားပါးတယ်…"

"နှစ်တစ်ထောင်လရောင်မြက်က အဲ့ဒီထဲက တစ်ခုပဲ…"

"သူက လရဲ့ အနှစ်သာရကို စုပ်ယူပြီး သူ့အတွင်းထဲမှာ လရောင်စွမ်းအားကို ဖွဲ့စည်းတယ်.. နှစ်တစ်ထောင်ကြာ ကြီးထွားပြီးနောက်မှသာ စိတ်ဝိညာဉ်ဆေးဝါး ဖြစ်လာတာ…"

"တစ်ခါ သောက်သုံးလိုက်တာနဲ့… သူ့ရဲ့ ကြွယ်ဝတဲ့ လရောင်စွမ်းအားက ရွှေအမြုတေကျင့်ကြံသူတစ်ယောက်ကို မှော်စွမ်းအားထဲက အညစ်အကြေးတွေကို ဖယ်ရှားပေးပြီး.. ခန္ဓာကိုယ်ထဲက ဆေးအဆိပ်တွေကို ဖယ်ရှားဖို့ ရိုးတွင်းခြင်းဆီနဲ့ သွေးကြောတွေကို သန့်စင်ပေးနိုင်တယ်.. သူ့ရဲ့ အသုံးဝင်ပုံတွေက အဆုံးမရှိဘူး…"

"ဒါပေမဲ့.. ဒီလို စိတ်ဝိညာဉ်ဆေးဝါးမျိုးက အရမ်းအဖိုးတန်တယ်… မဖြစ်ပေါ်လာခင် အနည်းဆုံး နှစ်တစ်ထောင်လောက် ကြီးထွားဖို့ လိုအပ်တယ်.. ပြီးတော့ သာမန်ကျင့်ကြံသူတွေက သူတို့ရဲ့ သက်တမ်း ကုန်ဆုံးသွားရင်တောင်မှ ရင့်ကျက်လာမယ့်အချိန်ထိ မစောင့်နိုင်ကြဘူး…"

"တစ်ချိန်တည်းမှာပဲ.. ဒီလို စိတ်ဝိညာဉ်ဆေးဝါးမျိုးကို စိုက်ပျိုးဖို့က တော်တော် ခက်ခဲတယ်.. ကြီးထွားနိုင်မယ့် ပတ်ဝန်းကျင်ကလည်း အရမ်းကန့်သတ်ချက်များတယ်…"

"ဒါကြောင့် နှစ်တစ်ထောင်လရောင်မြက်က အရမ်းရှားပါးပြီး တန်ဖိုးကြီးတာပေါ့.."

လင်းယာကျူ သက်ပြင်းချလိုက်သည်။

ထို့ကြောင့်ပင် သူမသည် ဤတစ်ကြိမ်တွင် မယုံနိုင်လောက်အောင် ကံကောင်းသည်ဟု ခံစားရခြင်း ဖြစ်သည်။ ရွှေအမြုတေကျင့်ကြံသူတစ်ဦး၏ သိုလှောင်အိတ်ထဲတွင် ဝိညာဉ်သန္ဓေသားအဆင့် စိတ်ဝိညာဉ်ပစ္စည်း တစ်ခုကို အမှန်တကယ် တွေ့ရှိခဲ့ရသည်။ ယင်းသည် ကောင်းကင်ပေါ်မှ မုန့်ကျလာသကဲ့သို့ ဖြစ်သည်။

"ဒါပေမဲ့ ဒါက ပထမ အတားအဆီးကို ဖြတ်ကျော်ရုံပဲ ရှိသေးတာ… နောက်ထပ် နှစ်ခုက ကျော်ဖြတ်ဖို့ အဲ့ဒီလောက် မလွယ်ကူလောက်ဘူး.."

ကျိုးစွေ့က သူမကို သတိပေးလိုက်သည်။

"ဒါက တော်တော် ကောင်းနေပါပြီ.. ဝိညာဉ်သန္ဓေသား ဖွဲ့စည်းနိုင်ခြေကို ၁၀% တိုးစေတာလေ…"

"ရွှေအမြုတေကျင့်ကြံသူ ဘယ်နှယောက်လောက်က ဒါကို ရယူဖို့ အသည်းအသန် ဖြစ်နေကြလဲဆိုတာ ဘယ်သူမှ မသိနိုင်ဘူး… ဒါပေမဲ့ သူတို့အားလုံး မရနိုင်ခဲ့ဘူး.."

"ရွှေအမြုတေကျင့်ကြံသူ အများစုက ပထမ အတားအဆီးကိုတောင် မကျော်ဖြတ်နိုင်ကြဘူး… ဒုတိယ တတိယကို မျှော်လင့်ဖို့ ဆိုတာ ဝေးရော.."

"ဒါပေါ့… ဒုတိယ စိတ်မိစ္ဆာကပ်ဘေးကို ဖြတ်ကျော်ရာမှာ ကူညီပေးနိုင်တဲ့ စိတ်ဝိညာဉ်ဆေးဝါး ရှိရင်.. အဲ့ဒါကိုလည်း ဝိညာဉ်သန္ဓေသားအဆင့် စိတ်ဝိညာဉ်ပစ္စည်းလို့ ခေါ်နိုင်တယ်…"

"ဒါပေမဲ့ အဲ့ဒီလို ဝိညာဉ်သန္ဓေသားအဆင့် စိတ်ဝိညာဉ်ပစ္စည်းက ပိုပြီးတော့တောင် ရှားပါးပြီး တန်ဖိုးကြီးတယ်…"

"တတိယအတားအဆီး ကောင်းကင်မိုးကြိုးကပ်ဘေးအတွက်ကတော့… ငါ့မှာ မိုးကြိုးကပ်ဘေးတွေရဲ့ စွမ်းအားကို သိသိသာသာ ဖယ်ရှားပေးနိုင်တဲ့ ထိပ်တန်းရတနာ ရွှေမိုးကြိုးဝါး ရှိတယ်…"

"ငါသာ ပထမ အတားအဆီး နှစ်ခုကို အောင်အောင်မြင်မြင် ဖြတ်ကျော်နိုင်ရင်… တတိယ အတားအဆီးကို သေချာပေါက် ကျော်ဖြတ်နိုင်မှာပဲ…"

လင်းယာကျူ၏ မျက်လုံးများသည် စိတ်လှုပ်ရှားမှုဖြင့် အရောက်တောက်သွားသည်။

အချိန်အတော်ကြာ စောင့်ဆိုင်းပြီးနောက်၊ သူမ မျှော်လင့်ချက် ရောင်ခြည်တစ်ခုကို နောက်ဆုံးတွင် မြင်တွေ့လိုက်ရပြီဟု ခံစားလိုက်ရသည်။

"စိတ်မိစ္ဆာကပ်ဘေး ဟုတ်လား…"

ဤစကားကို ကြားလိုက်ရသောအခါ ကျိုးစွေ့မျက်လုံးများ ကျဉ်းမြောင်းသွားပြီး၊ စူးရှသော အလင်းရောင်တစ်ခု ပေါ်လာကာ၊ သူ လင်းယာကျူကို ဤအတားအဆီး ကျော်ဖြတ်ရာတွင် ကူညီပေးနိုင်မည်ဟု သူခံစားလိုက်ရသည်။

သူ၏ မိစ္ဆာနှလုံးသားဆင့်ခေါ်ခြင်း ကျင့်စဉ် ကျင့်ကြံမှုသည် စိတ်မိစ္ဆာအပေါ် ကြီးမားသော တားမြစ်မှုအကျိုး သက်ရောက်မှု ရှိပုံရသည်။

အကယ်၍ သူသာ ဤကျင့်ကြံခြင်း နည်းစနစ်ကို အသုံးချနိုင်ပါက၊ သူသည် စိတ်မိစ္ဆာကို ဝါးမျိုနိုင်ပေသည်။

တစ်ချိန်တည်းမှာပင်၊ သူသည် စိတ်မိစ္ဆာကို ချေဖျက်ရာတွင် ကူညီရန် ‘အိပ်မက်ဝိညာဉ်ကူ’၏ စွမ်းအားကို အသုံးပြုနိုင်သည်။

အောင်မြင်ပါက၊ လင်းယာကျူ၏ ဝိညာဉ်သန္ဓေသားဖွဲ့စည်းမှု အောင်မြင်နှုန်းသည် ၈၀% အထက်သို့ တိုးတက်လာနိုင်သည်။

သို့သော် လောလောဆယ် ထိုအကြောင်းကို သူထုတ်မပြောခဲ့ပေ။

မည်သို့ပင်ဆိုစေကာမူ၊ သူ၏ ကျင့်ကြံမှုသည် လောလောဆယ် အားနည်းနေသေးပြီး၊ အခြေတည်အဆင့် နှောင်းပိုင်းတွင်သာ ရှိနေသေးသည်။

ထိုကဲ့သို့သော ကျင့်ကြံမှုအဆင့်ဖြင့် မိစ္ဆာနှလုံးသားဆင့်ခေါ်ခြင်း ကျင့်စဉ်ကို အသုံးပြုခြင်းသည် များစွာ အသုံးဝင်နိုင်မည် မဟုတ်ပေ။

သို့သော်၊ အကယ်၍ သူ ရွှေအမြုတေနယ်ပယ်သို့ တက်လှမ်းနိုင်ပါက၊ အရာအားလုံး ကွာခြားသွားပေလိမ့်မည်။

ထို့ကြောင့် ယခု သူ၏ အဓိကရည်မှန်းချက်မှာ ကျင့်ကြံမှုကို မြှင့်တင်ရန်နှင့် ရွှေအမြုတေနယ်ပယ်သို့ တတ်နိုင်သမျှ အမြန်ဆုံး တက်လှမ်းရန် ဖြစ်သည်။

သို့သော် ၎င်းသည် တစ်ညတည်းဖြင့် ပြီးမြောက်နိုင်သော အရာမဟုတ်ပေ။

ကံကောင်းစွာဖြင့်၊ သူနှင့် လင်းယာကျူတို့တွင် အလွန်ရှည်လျားသော သက်တမ်း ရှိကြသဖြင့်၊ လောလောဆယ် အလျင်လိုစရာ မလိုပေ။

…

ဤအချိန်တွင်၊ ယုမိသားစုကျွန်းပေါ်၌။

ယုမိသားစုခေါင်းဆောင် ယုမင်သည် ယခုအခါ ဖြူဖျော့နေပြီး၊ မိသားစုဘိုးဘေးခန်းမဆောင် အတွင်းရှိ ကွဲအက်နေသော အသက်ကမ္ဗည်းပြား လေးခုကို ကြည့်နေသည်။

ဤအရာက ယုမိသားစု၏ ရွှေအမြုတေ ဆရာသခင်လေးဦးစလုံး သေဆုံးသွားပြီ ဖြစ်ကြောင်း ညွှန်ပြနေသည်။

သူသည် ဘိုးဘေးခန်းမဆောင် အတွင်း၌ တစ်ညလုံး ရှိနေခဲ့ပြီး၊ ညတွင်းချင်း အိုစာသွားကာ ထွက်ခွာရန် မဝံ့ရဲခဲ့ပေ။

အဘယ်ကြောင့်ဆိုသော် ဤကိစ္စသာ ပေါက်ကြားသွားပါက၊ ဖြစ်လာမည့် ကြောက်မက်ဖွယ် အကျိုးဆက်များကို သူ နားလည်သောကြောင့် ဖြစ်သည်။

ထိုအခါ ယု မိသားစုသည် ယုမိသားစုကျွန်းကို ထိန်းသိမ်းထားနိုင်တော့မည် မဟုတ်ပေ။

ယုမိသားစု၏ ရန်သူများပင်လျှင် ယုမိသားစုကို တိုက်ခိုက်ရန် အခွင့်အရေး ယူလာနိုင်သည်။

အချိန်တိုအတွင်းမှာပင် ယုမိသားစုသည် သုတ်သင်ရှင်းလင်းခံရပြီး၊ လုံးဝ မျိုးသုဉ်းသွားနိုင်သည်။

ထိုအခါ သူသည် ယုမိသားစု၏ အပြစ်သား ဖြစ်လာပေလိမ့်မည်။

"ဘယ်လိုလုပ် ဒီလို ဖြစ်သွားရတာလဲ…"

"ဒီစစ်ဆင်ရေးက လုံးဝ စိတ်ချရတယ်လို့ ပြောခဲ့ကြတယ် မဟုတ်ဘူးလား…"

"ဘာလို့ အကြီးအကဲ ခေါင်းဆောင်တွေ အကုန်လုံး ဒီတစ်ခေါက် သေကုန်ကြတာလဲ… တကယ်တမ်း ဘာဖြစ်ခဲ့တာလဲ.."

"အင်မော်တယ်ရှား မြို့တော်က အန္တရာယ်များတဲ့ ကျားလှောင်အိမ်တစ်ခုများလား…"

ခေါင်းဆောင်ယုမင်၏ မျက်နှာ လွန်စွာအရုပ်ဆိုးနေသည်။

ယခုအခါ သူ အလွန်အမင်း နောင်တရနေပြီး၊ အူများ စိမ်းဖန့်သွားသည်အထိ ခံစားနေရသည်။

အင်မော်တယ်ရှား မြို့တော်တွင် ဤမျှ ကြီးမားပြီး ခန့်မှန်းရခက်သော အစွမ်းသတ္တိ ရှိနေကြောင်း သိခဲ့လျှင်၊ သူ ဘယ်နည်းနဲ့မှ ၎င်းတို့အား ရန်စဝံ့မည် မဟုတ်ပေ။

သို့သော်၊ ယခုတွင်မူ အရာအားလုံး နောက်ကျသွားချေပြီ။ အတိတ်ကအမှားများအား ပြန်ပြင်ဆင်နိုင်ရန် မဖြစ်နိုင်ပေ။

မြင့်မြတ်အကြီးအကဲနှင့် အခြားသူများအာ ပြန်လည်အသက်သွင်းရန် မဖြစ်နိုင်ချေ။

ဒီး…။

ထိုခဏတွင်၊ သူ့ကိုယ်ပေါ်ရှိ ဆက်သွယ်ရေးအဆောင် ရုတ်တရက် မြည်လာသည်။ သူ့မျက်နှာ အရောင်ပြောင်းသွားပြီး၊ မည်သူ ဖြစ်နိုင်သည်ကို သူ ချက်ချင်း သိလိုက်သည်။ ကောင်းကင်မိစ္ဆာဂိုဏ်းမှ ဆက်သွယ်ချက်ပင် ဖြစ်သည်။

သူသည် ကောင်းကင်မိစ္ဆာဂိုဏ်းသို့ ဝင်ရောက်ခဲ့သည်မှာ ကြာမြင့်ပြီ ဖြစ်သည်။

ယုမိသားစု၏ အဓိကပုဂ္ဂိုလ် အများစုသည် ကောင်းကင်မိစ္ဆာဂိုဏ်း အဖွဲ့ဝင်များ ဖြစ်ကြသည်။

သူတို့သည် ဝူကျိမဟာမိတ်အဖွဲ့၏ အစိတ်အပိုင်း ဖြစ်ခဲ့သည်မှာ နှစ်ရာပေါင်းများစွာ ကြာမြင့်ပြီ ဖြစ်ပြီး၊ အခြေခံအားဖြင့် ကောင်းကင်မိစ္ဆာဂိုဏ်းအတွက် သူလျှိုများ ဖြစ်ကြကာ ဝူကျိမဟာမိတ်အဖွဲ့၏ သတင်းအချက်အလက်များကို ကောင်းကင်မိစ္ဆာဂိုဏ်းထံ ပေးပို့နေကြသည်။

ဤကြီးမားသော အင်အားစုကြီးနှစ်ခုထံမှ ရရှိသော အရင်းအမြစ်များကို မှီခိုအားထားလျက် ယုမိသားစုသည် အလွန် လျင်မြန်စွာ ဖွံ့ဖြိုးတိုးတက်လာခဲ့သည်။

"သခင်.."

ခေါင်းဆောင်ယုမင် နောက်ထပ် တွန့်ဆုတ်မနေတော့ဘဲ ဆက်သွယ်ရေးအဆောင်ကို ချက်ချင်း အသက်သွင်းလိုက်သည်။ အဆောင်၏ အခြားတစ်ဖက်မှ နှလုံးသားကို အရည်ပျော်သွားနိုင်စေမည့် ဆွဲဆောင်မှုရှိသော အသံတစ်သံ ထွက်ပေါ်လာသည်။

"ပြောစမ်း… တကယ်တမ်း ဘာဖြစ်ခဲ့တာလဲ… ရှင်တို့ ယုမိသားစုက ရွှေအမြုတေကျင့်ကြံသူ လေးယောက် ဘာလို့ သေသွားရတာလဲ… ရှင် ဘာတွေ လုပ်ခဲ့တာလဲ…"

စကားပြောလိုက်သူမှာ ကောင်းကင်မိစ္ဆာဂိုဏ်းမှ ရွှေအမြုတေ အမျိုးသမီး ကျင့်ကြံသူတစ်ဦး ဖြစ်ချေသည်။