မူလစွမ်းအား

~“ဒါ ဘာစွမ်းအားလဲ”

စင်မြင့်တွင်းကြီး၏ အနက်ရှိုင်းဆုံးမှ ထွက်ပေါ်လာသော ကြောက်မက်ဖွယ် စွမ်းအားကို ခံစားလိုက်ရသဖြင့် 'ယီထျန်းချင်း' ၏ မျက်နှာမှာ ဖြူဖပ်ဖြူရော် ဖြစ်သွားသည်။

“ဘာတွေ ဖြစ်ကုန်တာလဲ။ 'ဖန်ရှောင်ယွင်' မှာ ဒီလောက် ကြောက်စရာကောင်းတဲ့ စွမ်းအားတွေ ကျန်နေသေးတာလား” 'ကောင်းကင်မီး တောင်ပေါ် စံအိမ်' ၏ စံအိမ်သခင်နှင့် အဆင့်မြင့် ပုဂ္ဂိုလ်များမှာ လုံးဝ တုန်လှုပ်သွားကြပြီး၊ သူတို့၏ မျက်နှာများပေါ်ရှိ ကျေနပ်အားရသော အပြုံးများမှာ ချက်ချင်း တောင့်ခဲသွားသည်။

“ကြောက်စရာကောင်းလိုက်တဲ့ စွမ်းအား။ 'ဖန်ရှောင်ယွင်' က ဒီလောက် ကြောက်စရာကောင်းတဲ့ အင်အားကို ဝှက်ထားသေးတာလား” 'ပိုင်မိ' သည် ထိတ်လန့်တကြား မတ်တပ်ရပ်လိုက်ပြီး၊ သူ၏ မျက်လုံးများမှာ အစွန်းရောက်အောင် ပြူးကျယ်သွားသည်။

ယဲ့ကူချန်၏ မျက်နှာပေါ်တွင်လည်း ကြောက်ရွံ့မှုများ အထင်းသား ပေါ်နေသည်။

“ဘယ်လိုလုပ် ဖြစ်နိုင်မှာလဲ...”

လျိုချင်းယန် လေအေးတစ်ချက် ရှူသွင်းလိုက်မိကာ၊

“အစ်ကိုဖုန်း ပြောတာ မှန်တယ်။ သူက တကယ်ပဲ ကြောက်မက်ဖွယ် စွမ်းအားတစ်ခုကို ဝှက်ထားသေးတာပဲဗျာ”

“ဆေးဧကရာဇ်။ ဒါ ဘာစွမ်းအားလဲ”ဟု 'ပေတိုယန်' ကလည်း ထိတ်လန့်တကြား မေးလိုက်သည်။ သူ၏ ကြောက်ရွံ့နေသော အကြည့်များက နက်ရှိုင်းသော တွင်းကြီးကို မျက်တောင်မခတ်တမ်း စူးစိုက်ကြည့်နေမိသည်။

ထိုအခိုက်အတန့်၌၊ တောက်ပသော ရွှေရောင် အလင်းတန်းများသည် အပျက်အစီးများကို ထိုးဖောက်ကာ တွင်းနက်ကြီးထဲမှ ပျံတက်လာပြီး၊ နောက်ဆုံးတွင် ကောင်းကင်ယံသို့ ထိုးတက်သွားသော ရွှေရောင် တိုင်လုံးကြီး တစ်ခုအသွင် ဖြစ်ပေါ်လာသည်။

“ဘုန်း”

နက်ရှိုင်းသော တွင်းကြီးသည် ရုတ်တရက် ပေါက်ကွဲသံကြီးနှင့်အတူ ပွင့်ထွက်သွားပြီး၊ ကျောက်တုံး အပိုင်းအစများမှာ ဖုန်မှုန့်အဖြစ် ပြောင်းလဲသွား၏။ တူညီသော အခိုက်အတန့်၌၊ ကြောက်မက်ဖွယ် အားလှိုင်းများ မုန်တိုင်းထန်သွားသဖြင့် လူတိုင်း မိမိတို့၏ မျက်လုံးများကို လက်များဖြင့် ပိတ်ကာ ကာကွယ်လိုက်ကြရသည်။

ကြောက်မက်ဖွယ် အားလှိုင်းများ ကွယ်ပျောက်သွားသောအခါ၊ လူတိုင်း၏ အကြည့်များက စင်မြင့်ထက်သို့ ချက်ချင်း ရောက်ရှိသွားကြသည်။

လူတိုင်း သိချင်နေကြသည်က မရှုမလှ ဒဏ်ရာရထားသော 'ဖန်ရှောင်ယွင်' ဘာဖြစ်သွားသလဲ ဆိုသည်ကိုပင်…။

ပြင်းထန်စွာ ဒဏ်ရာရထားသည့် အခြေအနေတွင် 'ဖန်ရှောင်ယွင်' က မည်သို့သော နည်းလမ်းဖြင့် ဤမျှ ကြောက်မက်ဖွယ်ကောင်းသော စွမ်းအားကို ထုတ်ဖော်နိုင်ခဲ့သနည်း။

မျက်စိကျိန်းလောက်အောင် တောက်ပနေသော ရွှေရောင် အလင်းတန်းများ မှေးမှိန်သွားသောအခါ၊ 'ဖန်ရှောင်ယွင်' ၏ ပုံရိပ်သည် နက်ရှိုင်းသော တွင်းကြီးထဲမှ ဖြည်းညင်းစွာ ပျံတက်လာသည်။ သူ၏ ခန္ဓာကိုယ်မှ အရိုင်းဆန်သော စွမ်းအားများ ထုတ်လွှတ်နေ၏။

'ယီထျန်းချင်း' သည် 'ဖန်ရှောင်ယွင်' ကို ဘီလူးသရဲ တစ်ကောင်ကို ကြည့်သကဲ့သို့ စိုက်ကြည့်နေမိသည်။ သူ၏ မျက်နှာထားမှာ ကြောင်ငေးနေပြီး၊ 'ဖန်ရှောင်ယွင်' က ပြန်လည် မတ်တပ်ရပ်နိုင်သေးသည်ကို သာမက၊ ဤမျှ ကြောက်မက်ဖွယ်ကောင်းသော စွမ်းအားကို ဝှက်ထားခဲ့သည်ကိုပါ သူ လုံးဝ မယုံကြည်နိုင် ဖြစ်နေသည်။

'ဖန်ရှောင်ယွင်' က 'ယီထျန်းချင်း' ကို အနည်းငယ် မော့ကြည့်လိုက်ပြီး အပြုံးလေးဖြင့် တစ်လုံးချင်း ပြောလိုက်သည်။

“'ယီထျန်းချင်း' မင်းရဲ့ အင်အားက ငါ့ကို အံ့အားသင့်စေခဲ့တာ အမှန်ပဲ။ ဒါပေမဲ့ နှမြောစရာ ကောင်းလိုက်တာ”

“မင်း... ဒါ ဘာစွမ်းအားလဲ” 'ယီထျန်းချင်း' က အံ့အားသင့်စွာ ထုတ်မေးလိုက်၏။

ထိုစကားကို ကြားသောအခါ 'ဖန်ရှောင်ယွင်' က မောက်မာစွာ ပြုံးလိုက်ပြီး

“ဒါက မူလ စွမ်းအားပဲ။ အဓိကအားဖြင့်တော့ ငါ့ရဲ့ ခန္ဓာကိုယ် ဖွဲ့စည်းပုံနဲ့ သက်ဆိုင်တယ်။ ဒီစွမ်းအားက ငါ 'ကောင်းကင်ဘုံ လူသား' ဘုံကို ရောက်မှ နိုးထလာတာ”

ခဏ ရပ်နားပြီးနောက် 'ဖန်ရှောင်ယွင်' က မောက်မာစွာ ဆက်ပြောသည်။

“မင်းက နှစ်နှစ်လောက် တံခါးပိတ် ကျင့်ကြံပြီး 'ကောင်းကင်ဘုံ လူသား' ဘုံကို ရောက်လာခဲ့တာ။ မင်းရဲ့ အင်အားက သာမန် မဟုတ်ဘူးလို့ ငါ ခန့်မှန်းခဲ့တယ်။ ငါ့ ခန့်မှန်းချက် မှန်ကန်ခဲ့တယ်။ မင်းရဲ့ အင်အားက တကယ်ပဲ သန်မာတယ်လို့ ပြောရမယ်။ ဒါပေမဲ့ ဝမ်းနည်းစရာ ကောင်းတာက... ငါ့ရဲ့ စွမ်းအားက ပိုပြီး ကြီးမားနေတာပဲ”

“မူလစွမ်းအား ဟုတ်လား” 'ယီထျန်းချင်း' မျက်မှောင် အကြီးအကျယ် ကြုတ်သွားသည်။ သူ၏ နက်မှောင်သော မျက်လုံးများထဲတွင် ကြောက်ရွံ့မှု အရိပ်အယောင် တစ်ခု ဖြတ်သန်းသွားသည်။

“မူလစွမ်းအား” လူအုပ်ကြီးမှာ တစ်ညီတညွတ်တည်း အံ့အားသင့်သွားကြသည်။

“'ဖန်ရှောင်ယွင်' က မွေးရာပါ ခန္ဓာကိုယ် ပိုင်ရှင်လား” 'ကောင်းကင်မီး တောင်ပေါ် စံအိမ်' ၏ စံအိမ်သခင်မှာ အံ့အားသင့်လွန်းသဖြင့် မျက်လုံးများ ပြူးကျယ်သွားပြီး သူ၏ မျက်နှာမှာ တောင့်ခဲသွားသည်။

အံ့အားသင့်နေသော 'ကောင်းကင်မီး တောင်ပေါ် စံအိမ်' ၏ စံအိမ်သခင်ကို တစ်ချက် ကြည့်လိုက်ပြီး၊ 'ထျန်းယွဲ့' ဂိုဏ်းချုပ်ကြီးက ကျေနပ်စွာ ရယ်မောလိုက်သည်။ “ဟားဟားဟား ၊ ဘယ်လိုလဲ။ စံအိမ်သခင်။ ငါ့သားရဲ့ စွမ်းအားက အထင်ကြီးစရာ မကောင်းဘူးလား”

“...”

'ကောင်းကင်မီး တောင်ပေါ် စံအိမ်' ၏ စံအိမ်သခင် မျက်နှာ မည်းမှောင်သွားပြီး လက်သီးကိုသာ တင်းကျပ်စွာ ဆုပ်ထားလိုက်သည်။

“ဒါ မဖြစ်နိုင်ဘူး။ မွေးရာပါ ခန္ဓာကိုယ် ဆိုတာ အယောက် တစ်သန်းမှာ တစ်ယောက်တောင် တွေ့ရခဲတာ။ 'ဖန်ရှောင်ယွင်' က ဘယ်လိုလုပ် မွေးရာပါ ခန္ဓာကိုယ် ပိုင်ရှင် ဖြစ်နိုင်မှာလဲ”

'ပိုင်' မိသားစု သခင်ကြီးက လုံးဝ အံ့အားသင့်စွာ ရေရွတ်လိုက်သည်။ သူသည်လည်း ဤအရာကို မယုံကြည်နိုင် ဖြစ်နေသည်။

လူအုပ်ကြီးမှာ ပါးစပ်အဟောင်းသား ဖြစ်သွားကြပြီး ကျောက်ရုပ်များသဖွယ် ငြိမ်သက်သွားကြသည်။

“အစ်ကိုဖုန်း။ ခင်ဗျား စောစောက ပြောတဲ့ စွမ်းအား ဆိုတာ 'ဖန်ရှောင်ယွင်' ရဲ့ မူလစွမ်းအားကို ပြောတာလား” လျိုချင်းယန်က အံ့အားသင့်စွာ မေးလိုက်သည်။

ဖုန်းဝူချန်က ခေါင်းညိတ်လိုက်ပြီး ပြုံးလျက် ဆိုသည်။ “မှန်တယ်။ 'ဖန်ရှောင်ယွင်' က ဒီစွမ်းအားကို အစကတည်းက ဝှက်ထားတာ။ ဒါကြောင့် ငါက သူဟာ 'ကောင်းကင်ဘုံ လူသား' ဘုံ တတိယအလွှာနဲ့ ယှဉ်နိုင်တယ်လို့ ပြောခဲ့တာ။ သူ အရင်က ဒီစွမ်းအားကို ထုတ်မသုံးခဲ့တာက 'ယီထျန်းချင်း' ရဲ့ အစွမ်းကုန် အင်အားကို မြင်ချင်လို့ပဲ”

ခဏ ရပ်ပြီးနောက် ဖုန်းဝူချန်က ဆက်ပြောသည်။ “မူလစွမ်းအား ဆိုတာကလည်း အစွမ်းထက်တဲ့ စွမ်းအား တစ်မျိုးပါပဲ။ အစစ်အမှန်ယွမ်စွမ်းအားထက် အဆများစွာ ပိုမို သန်မာတယ်။ ဒါပေမဲ့ ရှေးဟောင်း စွမ်းအားတော့ မဟုတ်ဘူး။ ချင်းချင်းရဲ့ 'အင်မော်တယ် ဝိညာဉ် စွမ်းအား' နဲ့ ယှဉ်လိုက်ရင်တော့... မူလစွမ်းအားက အများကြီး အားနည်းလွန်းတယ်”

“'အင်မော်တယ် ဝိညာဉ် စွမ်းအား' ဟုတ်လား” နန်းကုန်းကျန့်က မြောင်ချင်းချင်းကို အံ့အားသင့်စွာ ကြည့်လိုက်သည်။

'ပေတိုယန်' က ဖုန်းဝူချန်ကို ကြည့်ကာ “ဆေးဧကရာဇ်က အစကတည်းက သိနေတာလား”

ဟု တုန်လှုပ်စွာ မေးလိုက်တော့သည်။

'ပေတိုယန်' မှာ အကြီးအကျယ် တုန်လှုပ်သွားသည်။ 'ဖန်ရှောင်ယွင်' တွင် မူလစွမ်းအား ရှိသည်ကို ဖုန်းဝူချန်က တစ်ချက် ကြည့်လိုက်ရုံဖြင့် သိရှိနိုင်သည်တကား။ ဤသည်မှာ မည်သို့သော နတ်ဘုရား စွမ်းရည်များ ဖြစ်ပါသနည်း။

'ပေတိုယန်' သည် ဖုန်းဝူချန်၏ ကြောက်မက်ဖွယ် စွမ်းရည်ကြောင့် တိတ်တဆိတ် ထိတ်လန့်သွားမိသည်။

ဖုန်းဝူချန်က အပြုံးဖျော့ဖျော့လေး ပြုံးလိုက်သော်လည်း ဘာမှ ပြန်မပြောခဲ့ပေ။

လေထုထဲတွင် 'ဖန်ရှောင်ယွင်' က လက်ကို အနည်းငယ် ဝှေ့ယမ်းလိုက်ရာ သတ်ဖြတ်ခြင်း ဓား ပျံသန်း ရောက်ရှိလာသည်။ 'ဖန်ရှောင်ယွင်' ၏ အရှိန်အဝါမှာ နောက်တစ်ကြိမ် မြင့်တက်လာပြန်သည်။ ဓားသည် 'ဖန်ရှောင်ယွင်' ၏ ကြောက်မက်ဖွယ် စွမ်းအားကို အာရုံခံမိသကဲ့သို့ တုန်ခါ မြည်ဟီးနေပြီး အလွန် စိတ်လှုပ်ရှားနေပုံ ရသည်။

"ဝီ..."

သတ်ဖြတ်ခြင်း ဓားကို လက်ထဲတွင် ကိုင်ဆောင်လျက် 'ဖန်ရှောင်ယွင်' သည် လက်ကောက်ဝတ်ကို လှုပ်ရှားလိုက်ပြီး လေထုထဲသို့ ထောင့်ဖြတ် ချိန်ရွယ်လိုက်ရာ၊ ကြောက်မက်ဖွယ် ဓားချီ တစ်ခု အောက်သို့ ထိုးဆင်းသွားသည်။ ကျယ်လောင်သော ပေါက်ကွဲသံကြီးနှင့်အတူ အဝေးရှိ ခမ်းနားထည်ဝါသော တောင်တန်းကြီး တစ်ခုမှာ ပြိုကျပျက်စီးသွားပြီး မြေပြင်ကြီး တုန်ခါသွားတော့သည်။

“ရှူး...”

သတ်ဖြတ်ခြင်း ဓားကို ပေါ့ပေါ့ပါးပါး ဝှေ့ယမ်းလိုက်ရုံဖြင့် ဤမျှ ကြောက်မက်ဖွယ်ကောင်းသော ဓားချီ စွမ်းအားကို ထုတ်လွှတ်နိုင်သည်ကို မြင်သောအခါ၊ မရေမတွက်နိုင်သော ကျင့်ကြံသူများမှာ ကြောက်လန့်တကြား လေအေးများ ရှူသွင်းလိုက်မိကြပြီး 'ဖန်ရှောင်ယွင်' ကို ကြည့်ကာ တုန်ယင်နေကြသည်။

“သခင်လေးဖန်ရဲ့ စွမ်းအားက အရမ်း ကြောက်စရာ ကောင်းတာပဲ”

“သခင်လေးယီ နိုင်ပြီလို့ ထင်နေတာ။ သခင်လေးဖန်မှာ မူလစွမ်းအား ရှိလိမ့်မယ်လို့ လုံးဝ မထင်ထားဘူး”

“အရမ်း ကြောက်စရာ ကောင်းတယ်။ ပထမ နေရာက သခင်လေးဖန်ကလွဲပြီး ဘယ်သူမှ မဖြစ်နိုင်တော့ဘူး”

ကျင့်ကြံသူများမှာ အိပ်မက်မှ နိုးထလာသကဲ့သို့ ရုတ်ရုတ်သဲသဲ ဖြစ်ကုန်ကြသည်။ အာမေဋိတ်သံများမှာ ဒီလှိုင်းလုံးကြီး တစ်ခုအလား ပျံ့နှံ့သွားသည်။

ပြင်းထန်စွာ ဒဏ်ရာရထားသော 'ယီထျန်းချင်း' သည် သူ၏ အစစ်အမှန်ယွမ်စွမ်းအား အများအပြားကို ကုန်ဆုံးထားခဲ့ပြီး ဖြစ်ရာ၊ အနိုင်ရရန် အခွင့်အရေး မရှိတော့ပေ။

“ငါ့ရဲ့ ဒီစွမ်းအားက ဘယ်လောက် အစွမ်းထက်လဲ ဆိုတာ မြင်ချင်သေးလား” 'ဖန်ရှောင်ယွင်' က မောက်မာစွာ မေးလိုက်သည်။ သူ ပြင်းထန်စွာ ဒဏ်ရာ ရထားသော်လည်း၊ သူ ပိုင်ဆိုင်ထားသော ကြောက်မက်ဖွယ် စွမ်းအားကြောင့် ဒဏ်ရာများက သူ့ကို သိပ်ပြီး မထိခိုက်စေနိုင်တော့ပေ။

'ယီထျန်းချင်း' မျက်မှောင် အကြီးအကျယ် ကြုတ်လိုက်သည်။ သူသည် ဤတိုက်ပွဲတွင် အပြီးအပိုင် ရှုံးနိမ့်သွားပြီ ဖြစ်ကြောင်းနှင့် ပါရမီရှင် စာရင်း၏ ထိပ်ဆုံး နေရာကို မရယူနိုင်တော့ကြောင်း သိရှိလိုက်သည်။

“ဝှစ်”

"ဝီ..."

'ဖန်ရှောင်ယွင်' သည် သတ်ဖြတ်ခြင်း ဓားကို ဝှေ့ယမ်းလိုက်ရာ၊ အလွန်တရာ ရက်စက် ကြမ်းကြုတ်ပြီး ကြောက်မက်ဖွယ် ကောင်းသော ဓားအလင်းတန်း တစ်ခု လေထုကို ထိုးခွဲသွားသည်။ ၎င်း၏ အရှိန်အဝါမှာ လွှမ်းမိုးနိုင်စွမ်း ရှိပြီး၊ ဖြတ်သန်းသွားရာ နေရာတိုင်းတွင် လေထုမှာ ပြင်းထန်စွာ တုန်ခါပြီး လှိုင်းထနေကာ အချိန်မရွေး စုတ်ပြဲသွားနိုင်မည့် အခြေအနေမျိုး ဖြစ်ပေါ်နေသည်။

“ဂလု ဂလု...”

ဤကြောက်မက်ဖွယ် ဓားအလင်းတန်းကို မြင်သောအခါ၊ မရေမတွက်နိုင်သော ကျင့်ကြံသူများမှာ ကြောက်လန့်တကြား တံတွေးမြိုချလိုက်မိကြသည်။ သူတို့၏ မျက်နှာများမှာ စက္ကူကဲ့သို့ ဖြူဖပ်ဖြူရော် ဖြစ်နေကြသည်။

ပြင်းထန်စွာ ဒဏ်ရာ ရထားသော 'ယီထျန်းချင်း' ၏ မျက်နှာပေါ်တွင်လည်း ကြောက်ရွံ့မှု အရိပ်အယောင်များ ပေါ်လာသည်။ ဤမျှ ကြောက်မက်ဖွယ် ကောင်းသော ဓားအလင်းတန်းကို ရင်ဆိုင်ရသည့်အခါ၊ သူ့တွင် ခုခံနိုင်စွမ်း မရှိတော့ပေ။

“'ချင်း' လေး။ ရှောင်လိုက်” 'ကောင်းကင်မီး တောင်ပေါ် စံအိမ်' ၏ စံအိမ်သခင်က စိုးရိမ်တကြီး အော်ဟစ်လိုက်သည်။

“ဘုန်း”

“အ...”

'ယီထျန်းချင်း' မကြားလိုက်သလို၊ သို့မဟုတ် ပြင်းထန်သော ဓားချီကြောင့် ကြောင်အမ်းသွားသလိုပင်။ သူသည် မလှုပ်မယှက် ရပ်နေပြီး ဓားအလင်းတန်း၏ ရိုက်ခတ်မှုကို ခံယူလိုက်သည်။ ရက်စက်သော အင်အားကြောင့် 'ယီထျန်းချင်း' မှာ သွေးလတ်လတ်ဆတ်ဆတ်များ အန်ထွက်လာပြီး၊ သူ၏ ခန္ဓာကိုယ်မှာ အမြောက်ဆန်ကဲ့သို့ လွင့်စဉ်သွားတော့သည်။

“'ချင်း' လေး”

'ကောင်းကင်မီး တောင်ပေါ် စံအိမ်' ၏ စံအိမ်သခင်မှာ စိုးရိမ်လွန်းသဖြင့် ရူးသွပ်မတတ် ဖြစ်နေသည်။ ပြင်းထန်စွာ ဒဏ်ရာ ရထားသော 'ယီထျန်းချင်း' သည် ဤကြောက်မက်ဖွယ် ဓားအလင်းတန်းကို ခံနိုင်ရည် ရှိပါ့မလားဟု သူ ကြောက်ရွံ့နေမိသည်။

လွင့်စဉ်သွားသော 'ယီထျန်းချင်း' မှာ ပြင်းထန်စွာ ဒဏ်ရာ ရရှိသွားပြီး၊ ယခုအခါ သတိတစ်ဝက် လစ်နေပြီ ဖြစ်သည်။

'ဘာလို့လဲ။ ဘာလို့ ငါ ရှုံးနေရသေးတာလဲ။ ငါ 'ဖန်ရှောင်ယွင်' ကို အနိုင်ယူဖို့ နှစ်နှစ်လုံးလုံး အသည်းအသန် ကျင့်ကြံခဲ့တာ။ ဘာလို့ သူ့မှာ မူလစွမ်းအား ရှိနေရတာလဲ။ ငါ လက်မခံနိုင်ဘူး။ ငါ လက်မခံနိုင်ဘူး' 'ယီထျန်းချင်း' စိတ်ထဲတွင် မကျေမနပ် ရူးသွပ်စွာ အော်ဟစ်နေမိသည်။

နှစ်နှစ်တာ အသည်းအသန် ကျင့်ကြံမှုများ၊ ယခင် အရှက်ရမှုများကို ပြန်လည် ဆပ်နိုင်ရန် ကြိုးစားမှုများ... သို့သော် ဝမ်းနည်းစရာ ကောင်းသည်မှာ သူ့တွင် အခြေအနေကို ပြောင်းပြန်လှန်နိုင်မည့် စွမ်းအား မရှိခဲ့ပေ။

အရာအားလုံး ဆုံးဖြတ်ပြီးသွားပြီ။ 'ယီထျန်းချင်း' ရှုံးနိမ့်သွားခဲ့ချေပြီ။

'ယီထျန်းချင်း' သည် 'ဖန်ရှောင်ယွင်' ၏ လက်ချက်ဖြင့် နောက်တစ်ကြိမ် ရှုံးနိမ့်သွားခဲ့ပြန်တော့၏။

“'ယီထျန်းချင်း' 'ကောင်းကင်ဘုံ' နယ်မြေ ပါရမီရှင်တွေထဲမှာ မင်းတစ်ယောက်ပဲ ငါနဲ့ ယှဉ်ပြိုင်ဖို့ ထိုက်တန်တယ်။ ဒါပေမဲ့ နှမြောစရာ ကောင်းတာက မင်း ငါ့ရဲ့ မူလစွမ်းအားကို မကျော်ဖြတ်နိုင်ခဲ့ဘူး၊ဟားဟား…” 'ဖန်ရှောင်ယွင်' က မောက်မာစွာ ရယ်မောရင်း ပြောလိုက်သည်။ သူ၏ အမူအရာမှာ အထွတ်အထိပ် ရောက်နေသူ တစ်ဦးကဲ့သို့ပင်။

ရှိနေသော ပါရမီရှင်များကို မောက်မာစွာ တစ်ချက် ဝေ့ဝဲ ကြည့်လိုက်ပြီးနောက် 'ဖန်ရှောင်ယွင်' က ပြောလိုက်သည်။

“တက်လာပြီး စိန်ခေါ်ချင်တဲ့သူ ရှိသေးလား”