ကပ်ဘေးဓားနည်းစနစ်၊ သတ်ဖြတ်ခြင်းဓားနည်းစနစ်- မဟာကပ်ဘေး

ရှန်းချန်ကော ဖြည်းညှင်းစွာ ထိုနေရာမှ ထွက်ခွာလာခဲ့သည်။

ယခုလေးတင်...

အမှောင်နတ်ဘုရားကျောက်တိုင် မှ အလင်းတန်းတစ်ခု ဆင်းသက်လာပြီး သူ၏ဦးနှောက်ထဲသို့ ဝင်ရောက်သွားသည်။

၎င်းသည် အလွန်ကျယ်ပြန့်သော အချက်အလက်များ ဖြစ်သည်။

ရှန်းချန်ကော စုပ်ယူပြီးနောက်၊ ၎င်းသည် ဓားသိုင်းကျင့်စဉ်တစ်ခုဖြစ်ကြောင်း သဘောပေါက်လိုက်သည်။

ထိုအချက်အလက်များကို ခံစားရုံမျှဖြင့် ရှေးဟောင်းအငွေ့အသက်ကိုသိရှိနိုင်သော ဓားသိုင်းကျင့်စဉ်ပင်။

သတ်ဖြတ်ခြင်းဓားနည်းစနစ်-မဟာကပ်ဘေး

၎င်း၏အဆင့်မှာ...

ကပ်ဘေးဓားနည်းစနစ် အဆင့်ပင်

ရှန်းချန်ကောပင်လျှင် နှလုံးသားထဲတွင်အနည်းငယ် တုန်လှုပ်သွားခဲ့သည်။

ဓားနည်းစနစ်များတွင် မူလပြန်လည်ခြင်းအဆင့် အထက်တွင် ကပ်ဘေးအဆင့် ရှိသည်။

မူလပြန်လည်ခြင်းအဆင့်၏ သတ်ဖြတ်ခြင်းဓားနည်းနစ်များသည်ပင် အလွန်ကြောက်မက်ဖွယ် ကောင်းလှသည်။

အနည်းဆုံးတော့ ရှန်းချန်ကောနှင့်ပက်သက်သော ကောင်းကင်ဘုံဓားဂိုဏ်းကဲ့သို့ ဓားဂိုဏ်းများတွင် တစ်ချိန်က အထင်ကရဖြစ်ခဲ့ဖူးသော်လည်း ၎င်းတို့ ပိုင်ဆိုင်ခဲ့သည့် မူလပြန်လည်ခြင်းအဆင့် ဓားသိုင်းများသည် အခြေခံအဆင့်သာမက အပျက်အစီးများသာ ရှိတော့သည်။

ဥပမာ - သူရိယဓားဂိုဏ်း ၏ 'နေမင်းကြွေဆင်းခြင်း'သည် မူလပြန်လည်ခြင်းအဆင့် သတ်ဖြတ်ခြင်းဓားနည်းစနစ်တစ်ခု ဖြစ်သော်လည်း ဂိုဏ်းခေါင်းဆောင်ပိုင်ဆိုင်ထားသည့်အရာကပင် အလွန်ပျက်စီးနေပြီး ရှန်းချန်ကော ချက်အင်လုပ်ပြီး ပထမဆုံးနေ့တွင်ထုတ်ဖော်ခဲ့သော နေမင်းကြွေဆင်းခြင်း ကပင် ထိုသူ၏ဓားနည်းစနစ်ထက် ပိုမို အစွမ်းထက်နေခဲ့သည်။

ယခုမှာတော့...

သူသည် ထိုထက် အဆင့်တစ်ဆင့် မြင့်သော ကပ်ဘေးအဆင့် သတ်ဖြတ်ခြင်းဓားနည်းစနစ်ကို တိုက်ရိုက် ရရှိခဲ့သည်။

ထို့ပြင် ဤဓားနည်းစနစ်သည် အလွန်ရှေးကျပုံရပြီး စွမ်းအားပိုင်းတွင်လည်း ရှန်းချန်ကောအား အံ့အားသင့်စေမည်ဟု ထင်ရသည်။

ပျက်သုဉ်းခြင်းကမ္ဘာသည် တကယ်ကိုပင်ဆန်းကြယ်သည်ဟု ဆိုရပေမည်။

ပြောရမည်ဆိုလျှင် ရှန်းချန်ကောသည် ဤပျက်သုဉ်းခြင်းကမ္ဘာသို့ ရောက်လာခဲ့ခြင်းသည် အမှန်တကယ်ပင် အကျိုးအမြတ်များစွာ ရရှိခဲ့သည်။

"အရေးကြီးဆုံးကတော့ မင်းအတွက် အိမ်တစ်လုံးရှာပေးနိုင်ခဲ့တာပဲ။" ရှန်းချန်ကောသည် သူ၏ မျက်ခုံးမွှေးများကို သက်သာရာရစွာ ပွတ်သပ်လိုက်သည်။

ထိုနေရာတွင် ထူးဆန်းနက်နဲသော မျက်လုံးတစ်လုံးသည် မည်သည့်အချိန်မဆို ပွင့်လာနိုင်သကဲ့သို့ ဖြစ်နေသည်။

ထိုအချိန်တွင် သူ၏ဦးနှောက်ထဲ၌ အလွန်လေးနက်ပြင်းထန်သောရှေးဟောင်းကျိန်ဆဲသံများ ထွက်ပေါ်လာခဲ့သည်။

ဂုဏ်သိက္ခာရှိပြီးထည်ဝါသော အသံပိုင်ရှင်သည် ရှန်းချန်ကော၏ဘိုးဘွားများကို ယဉ်ကျေးပျူငှာစွာ နှုတ်ဆက်နေပုံရသည်။

သို့သော် ရှန်းချန်ကောကဲ့သို့ စိတ်ထားတည်ငြိမ်သူသည် ထိုအရာနှင့် စကားများနေမည် မဟုတ်ဘဲ ၎င်း၏အသံကို ချက်ချင်း ပိတ်ဆို့လိုက်သည်။

ဤအခိုက်အတန့်၌...

ရှန်းချန်ကောသည် ဤထူးဆန်းသော နေရာကို ကြည့်ပြီး အနည်းငယ် ပြုံးလိုက်မိသည်။

"ချက်အင်ဝင်မယ်။"

"ချက်အင်ဝင်ခြင်း အောင်မြင်သည် +၁"

"ရရှိသောဆုလာဘ် - ရှေးဟောင်းဝိညာဉ်နတ်ဆိုးပျိုးထောင်ခြင်းကျမ်း"

၎င်းသည် နတ်ဆိုးများကို ပျိုးထောင်ရန်အတွက် ကျင့်စဉ်တစ်ခုဖြစ်သည်။

အမှန်ပင် အမှောင်နတ်ဘုရားကျောက်တိုင် သည် လူများကို နတ်ဆိုးများ လျင်မြန်စွာဖွဲ့စည်းရန်နှင့် ထိန်းချုပ်ရန် ကူညီပေးနိုင်ခဲ့သည်။

ထို့ကြောင့် ရှန်းချန်ကော ဤနေရာတွင် ချက်အင်လုပ်လိုက်သောအခါ နတ်ဆိုးပျိုးထောင်ခြင်းနှင့် သက်ဆိုင်သော ကျမ်းတစ်ခုကို တကယ်တမ်းရရှိခဲ့ခြင်း ဖြစ်သည်။

'ကျမ်း' ဟူသော အမည်ဖြင့် ခေါ်ဝေါ်ထားသည်ကို ကြည့်ခြင်းဖြင့် ၎င်းသည် အလွန်နက်နဲသည့် အရာတစ်ခု ဖြစ်မည်မှာ သေချာပါသည်။

"မင်း ငမိုက်သား၊မကောင်းဆိုးဝါး၊ ဘိုးဘွားစဉ်ဆက်ကျွန်မျိုးတွေ၊ မင်းအပြစ်တွေကို ခွင့်လွှတ်လို့မရဘူး၊ အစိတ်စိတ်အမွှာမွှာဖြစ်သွားရင်တောင် ခွင့်မလွတ်ဘူး၊ဒီနေ့ အချုပ်နှောင်ထဲမှာ ပိတ်မိနေပေမဲ့ မနက်ဖြန် မင်းဆွေစဉ်မျိုးဆက်ကိုးမျိုးလုံး သတ်ပစ်မယ်..." ရှန်းချန်ကော မျက်လုံးကိုပိတ်ဆို့ထားရာ ဖွင့်လိုက်သည်နှင့် ချက်ချင်းဆိုသလို စိတ်မချမ်းမသာ ဖြစ်သွားရသည်။

' ရှန်းချန်ကောက သူ့ကိုအချိန်ပိုပေးလိုက်ပါက ထိုမျက်လုံးသည် 'ထောင်မှထွက်ခွာမည့် လျှောက်လွှာ' ကို ရေးနိုင်လိမ့်မည်ဟု တွေးလိုက်မိသည်။

ရှန်းချန်ကောသည် အကျဉ်းထောင်သို့ သွားရောက်လည်ပတ်သူကဲ့သို့ သူ၏ဦးခေါင်းခွံကို ခေါက်လိုက်သည်။

"တော်ပြီ တော်ပြီ၊ အော်မနေနဲ့တော့၊ မင်းရဲ့ အစာ ရောက်လာပြီ။" '

မျက်လုံး "..."

"မင်းတို့လို နိမ့်ကျသူတွေက ငါ့ကိုနတ်ဘုရားလို ကိုးကွယ်သင့်တယ်။ ဒီနေ့ ခံစားရတဲ့ ဒုက္ခက ငါ့ရဲ့ ရှေးဟောင်းနတ်ဘုရားနှလုံးသားကို ကျရှုံးစေနိုင်မှာ မဟုတ်ဘူး။ ကြယ်တာရာစကြာဝဠာ၊ အရာရာဟာ တိုးတက်ပြောင်းလဲနေတယ်..."

ရှန်းချန်ကောသည် ထိုမျက်လုံးကို ချက်ချင်း ထပ်မံ ပိတ်ဆို့လိုက်သည်။

အရမ်း ဆူညံနေတာပဲ။

ထိုအချိန်တွင်...

ရှန်းချန်ကောသည် တဖြည်းဖြည်း မှောင်မည်းလာသော ကောင်းကင်ကို ကြည့်လိုက်သည်။

"ကျိဘက အမှောင်နတ်ဘုရားကျောက်တိုင် နယ်မြေ ပွင့်ချိန်က တစ်ရက်ကို (၁၂) နာရီပဲ ရှိတယ်လို့ ပြောခဲ့တယ်။ ပြီးရင် ငါ မူလနေရာကို ပြန်သွားရမယ်။နယ်မြေကနေ ခဏတာ ထွက်ခွာရမယ်။ နောက်နေ့ အချိန်တူမှာ အမှောင်နတ်ဘုရားကျောက်တိုင်က ပြန်ဆင့်ခေါ်မှ ငါ ပြန်ရောက်လာမယ်..."

"စိတ်ဝင်စားစရာပဲ။" ရှန်းချန်ကောသည် အမှောင်နတ်ဘုရားကျောက်တိုင်နယ်မြေ၏တည်ရှိမှုသည် အလွန်စိတ်ဝင်စားဖွယ် ကောင်းသည်ဟု ထင်မြင်မိသည်။

ဤရှေးဟောင်းပစ္စည်းသည် လောကတစ်ခုကို မွေးဖွားပေးနိုင်ပြီး အချိန်နှင့်တည်နေရာ၏စည်းမျဉ်းများကိုလိုက်နာကာ လူငယ်များကို အဆက်မပြတ် ဆင့်ခေါ်ပြီး စက်ဝိုင်းပုံစံလည်ပတ်နေသည်။

၎င်းအတွင်း၌ လျှို့ဝှက်ချက်များစွာ ပါဝင်နေသည်။

မှင်ရောင်ကောင်းကင်သည် တဖြည်းဖြည်း မှောင်မိုက်လာသည်။

မည်းနက်သော မှင်ရောင်မှ လုံးဝ အဖြူရောင်သို့ ပြောင်းသွားသည်။

မှင်ဆေးပန်းချီကားတစ်ချပ်ကို ရေလောင်းချလိုက်သကဲ့သို့ပင်။

ရှန်းချန်ကော၏အသိစိတ်သည် ဖြည်းညှင်းစွာ နစ်မြုပ်သွားတော့သည်။

ဤအခိုက်အတန့်တွင်...

အပြင်ဘက်ခြမ်း ကောင်းကင်ဘုံဓားဂိုဏ်း အတွင်း၌

ကျန်းစန်းကျန့်သည် ရှန်းချန်ကော၏အရှိန်အဝါသည် အချိန်ကြာလာသည်နှင့်အမျှ ပိုမို ကြောက်မက်ဖွယ် ကောင်းလာသည်ကို ခံစားလိုက်ရပြီး စိတ်အေးသွားသည်။

ဤညတစ်ညလုံး...

ကျိဘသည် အမှောင်နတ်ဘုရားကျောက်တိုင် အကြောင်းကို လူအနည်းငယ်အား ပြောပြနေသည်။

နားထောင်သူများသည် စိတ်အားထက်သန်နေကြသလို ပြောပြသူသည်လည်း စိတ်လှုပ်ရှားမှုနှင့် မျှော်လင့်ချက်များ ပြည့်နေသည်။

အချိန်ကို ခန့်မှန်းကြည့်လျှင် ရှန်းချန်ကော နိုးထတော့မည် ဖြစ်သည်။

ထိုအချိန်တွင် ကျန်းစန်းကျန့်သည် ဂိုဏ်းအကြီးအကဲများ အစည်းအဝေးကို ခေါ်ယူခဲ့သည်။

အကြီးအကဲများ အုပ်စုဖွဲ့ ထိုင်နေကြသည်။

ဤရက်ပိုင်းအတွင်း အကြီးအကဲအချို့ ပြန်လာကြပြီး ယခုအခါတွင် အကြီးအကဲ ကိုးဦးရှိကာ အများစုမှာ လွတ်မြောက်ခြင်းအဆင့် နှောင်းပိုင်း ကျင့်ကြံသူများ ဖြစ်သည်။

၎င်းတို့သည် ကျန်းစန်းကျန့်၏နောက်တွင် ဝိုင်းရံထိုင်နေကြသည်။

ဤအစည်းအဝေး၏အကြောင်းအရာကို သူတို့အားလုံး ခန့်မှန်းနိုင်ကြသည်။

နတ်ဆိုးများကို သတ်ဖြတ်ရန်နှင့် ကောင်းကင်ဘုံဓားဂိုဏ်း၏မူလနေရာကို ပြန်လည်ရယူရန်ပင်။

ဤအရာသည် အကြီးအကဲများ အပြင်မထွက်မီကတည်းက သတ်မှတ်ထားသည့် အရာဖြစ်သည်။

အကြီးအကဲအများစု ပြန်လာသည်နှင့် ချက်ချင်းဆိုသလို ကောင်းကင်ဘုံဓားဂိုဏ်း၏ စာကြည့်တိုက်ကို ပြန်လည်သိမ်းယူမည်။

အတွင်းရှိ နတ်ဆိုးများကို ရှင်းလင်းမည်။

စာကြည့်တိုက်မှအမှောင်မြူခိုးများကို ဖယ်ရှားမည်။

နောက်ဆုံးတော့ ထိုအရစတင်တော့မည်လော။

သို့သော် ထိုအချိန်တွင် ကျန်းစန်းကျန့်သည် လျှို့ဝှက်ဆန်းကြယ်စွာ ပြောလိုက်သည်။

"အမှောင်မြူခိုးတွေက ငါတို့ ကောင်းကင်ဘုံဓားဂိုဏ်းရဲ့နေရာအတော်များများကို ဖုံးလွှမ်းထားပြီး ငါတို့တပည့်တွေရဲ့အင်အားက အပြည့်အဝ မတိုးတက်နိုင်ဘူး။အဆင့်တူက ကျင့်ကြံသူတွေနဲ့ ယှဉ်ရင် ငါတို့က အများကြီး နောက်ကျကျန်နေတယ်။သတ်ဖြတ်ခြင်းဓားနည်းစနစ် မရှိဘူး၊ သတ်ဖြတ်ခြင်းဓား မရှိဘူး၊ ဓားစွမ်းအင်၊ ဓားရည်ရွယ်ချက်၊ဒါမှမဟုတ် ဓားအကာအကွယ်တွေကိုတောင် လေ့ကျင့်လို့ မရဘူး။ အခု ငါတို့က အမှောင်မြူခိုးတွေအကြောင်း အနည်းငယ်သိလာပြီး ငါတို့ထဲက အများစုက လွတ်မြောက်ခြင်းအဆင့် နှောင်းပိုင်းကို ရောက်နေပြီ။ ငါတို့လို အဘိုးကြီးတွေက တပည့်တွေအတွက် တစ်ခုခုတော့ လုပ်သင့်ပြီ..."

အကြီးအကဲများသည် မုန်တိုင်းများကို ဖြတ်သန်းဖူးသူများ ဖြစ်သော်လည်း အမှောင်မြူခိုးများကြားတွင် စိတ်လှုပ်ရှားမှုများ ဖုံးကွယ်မထားနိုင်ပေ။

"ဒါဆိုရင် ငါတို့ သိမ်းပိုက်ဖို့ ရွေးချယ်မယ်..."

"ဓားစွမ်းအင်တောင် ကိုပဲ။"

အကြီးအကဲများသည် ပြုံးလိုက်ကြသော်လည်း ရုတ်တရက်မျက်နှာအမူအရာများ ပြောင်းလဲသွားပြီး ကျန်းစန်းကျန့်ကို မယုံသင်္ကာဖြင့် စူးစိုက်ကြည့်ကာ သူ မှားပြောမိသည်လားဟု မေးလိုက်ကြသည်။

"ဓားစွမ်းအင်တောင် စာကြည့်တိုက် မဟုတ်ဘူးလား"

သူတို့သည် မူလကစာကြည့်တိုက်အား ပြန်လည်သိမ်းပိုက်ရန် သတ်မှတ်ထားခြင်းဖြစ်လေသည်။

ဓားစွမ်းအင်တောင်

သူတို့သည် တပည့်များကို လျှို့ဝှက်စွာ စုံစမ်းထောက်လှမ်းခိုင်းခဲ့ဖူးသည်။

ထိုစဉ်က အဝေးမှခံစားခဲ့ရသော အလွန်ထက်ရှသော စွမ်းအင်အရှိန်အဝါကြောင့် တပည့်များက ရှေ့ဆက်မတိုးဝံ့ခဲ့ပေ။

သို့သော်လည်း ထိုအရှိန်အဝါကိုကြည့်ကာ အတိအကျဆုံးဖြတ်နိုင်ခဲ့ကြသည်။

ထိုအရာမှာ နတ်တံတားအဆင့် အထွတ်အထိပ်ရှိ မဟာနတ်ဆိုးကြီးတစ်ကောင်ပင်။

ရူးနေပြီလား

ကျန်းစန်းကျန့် ရူးသွပ်နေတာလား

ကျန်းစန်းကျန့်သည် နတ်တံတားအဆင့် အစောပိုင်းသာ ရှိသေးသည်။

ထိုအပြင် လွန်ခဲ့သော ရက်အနည်းငယ်ကမှ ဒဏ်ရာရထားသောကြောင့် နတ်တံတားအဆင့် အစောပိုင်းစွမ်းအားကို ထုတ်ဖော်နိုင်ဦးမည်လားပင် မသေချာသေးပေ။

သူသည် နတ်တံတားအဆင့် အထွတ်အထိပ် မဟာနတ်ဆိုးကြီးအား ရှင်းလင်းရန်သွားမည်လော။

အိပ်မက်မက်နေတာလား

သို့သော် ထိုအချိန်တွင် ကျန်းစန်းကျန့်သည် လျှို့ဝှက်ဆန်းကြယ်စွာ ပြုံးလိုက်သည်။

"ကိစ္စက ဒီအတိုင်းပဲဆုံးဖြတ်လိုက်ပြီ။ ငါ ဒီလိုပြောပြီဆိုကတည်းက ငါ့မှာ ကိုယ်ပိုင်အစီအစဉ် ရှိတယ်"

အစည်းအဝေးကို ကျန်းစန်းကျန့်က ချက်ချင်းဆိုသလို ရပ်တန့်ပစ်လိုက်သည်။

အကြီးအကဲများအားလုံး ရေထဲနစ်မြုပ်သွားသကဲ့သို့ ခံစားနေရသည်။

သူ ဘာကို အားကိုးတာလဲ

သူ ဘယ်လိုလုပ်သတ္တိတွေရလာတာလဲ

သူ့ရဲ့အစီအစဉ်က ဘာလဲ

နတ်တံတားအဆင့် အထွတ်အထိပ် မဟာနတ်ဆိုးကြီးကို ဖျက်ဆီးပစ်နိုင်တဲ့ အစီအစဉ်လား။

တကယ်လို့ သူသာ အဲဒီလိုအစွမ်းအထက်တဲ့ အရာတစ်ခုပိုင်ဆိုင်ထားတယ်ဆိုရင် စာကြည့်တိုက်က မဟာနတ်ဆိုးကြီးရဲ့လက်ချက်နဲ့ လမ်းလျှောက်နေတဲ့သွေးအိတ်လို ဘာလို့အရိုက်ခံခဲ့ရမှာလဲ။