ပြောင်းပြန်ဖြစ်နေသော အမှန်တရား

ခီလီယာနာက လှည့်စားခြင်း ချုပ်နှောင်မှုမှ နောက်ဆုံးတွင် လွတ်မြောက် သွားခဲ့သော်လည်း ရုပ်တု သုံးခုထံသို့ ပြေးဝင်လာသော ချန်လွေ့ကို တားဆီးရန် နောက်ကျသွားခဲ့ပြီ ဖြစ်သည်။ ထူးဆန်းသည်မှာ သူ လုံးဝ ထိတ်လန့်ဟန် မတူဘဲ စိတ်ဝင်စားစရာ ကောင်းသော အပြုံး တစ်ခုကို ပြသနေခဲ့သည်။

အပြင်းထန်ဆုံးသော စွမ်းအားကို လောင်ကျွမ်းစေသော ချန်လွေ့သည် အလင်းတန်းများ ထုတ်လွှတ်နေသော ရုပ်တုများထံ တိုးဝင်သွားခဲ့သည်။ သို့သော် ရုပ်တု သုံးခုထဲသို့ သူ ဝင်ရောက်သွားသည့် အခိုက်တွင် ရွှံ့နွံပင်လယ်ထဲ ကျသွားသလို သူ၏ အရှိန်မှာ နှေးကွေးသွားသည်ကို တွေ့လိုက်ရပြီး အံ့အားသင့်သွားခဲ့သည်။

လောင်ကျွမ်းနေသော ဝိညာဉ်နှင့် အသက် အပါအဝင် အရာအားလုံးသည် နှေးကွေး သွားခဲ့သည်။ ၎င်းမှာ အချိန်၏ ရိုးရှင်းသော ပြောင်းလဲမှုတစ်ခု မဟုတ်ဘဲ အချိန်၊ နေရာ၊ ပျက်စီးခြင်း နှင့် ဖန်တီးခြင်း ကဲ့သို့သော စည်းမျဉ်းအမျိုးမျိုး ပေါင်းစပ် ထားသော မလွန်ဆန်နိုင်သည့် စွမ်းအား တစ်ခုပင်။

အမြင်အာရုံ ခဏတာ ပုံပျက် ယိုယွင်းပြီးနောက် သူ၏ရှေ့မှ မြင်ကွင်း ပြောင်းလဲသွားခဲ့သည်။

ရုပ်တုများနှင့် အဆောက်အအုံများ ပျောက်ကွယ်သွားခဲ့သည်။ ၎င်းမှာ အဆုံးမဲ့ နေရာလွတ်တစ်ခု ဖြစ်နေ၏။

ကြီးမားသော စိန်ပုံစံ တစ်ခုကို သူ၏ အထက်တွင် ဝိုးတဝါး မြင်တွေ့နိုင်သည်။ အနားသတ်များက အဆုံး မရှိနေသော သွေးရောင်ကြယ်များဖြစ်ပြီး အကန့်အသတ်မရှိ တိုးချဲ့ကာ ပျံ့နှံ့နေ၏။ စိန်ပုံစံ၏ အလယ်ဗဟိုတွင် ပျက်စီးခြင်း နှင့် ဖန်တီးခြင်း အငွေ့အသက် ထုတ်လွှတ် နေသော ကြီးမားသော မီးတောက် အစုအဝေး နှစ်ခု ရှိသည်။ ၎င်းတို့သည် တောက်ပမှု အားလုံး၏ အရင်းအမြစ်ပင်။ ကြယ်များက လူသား မျက်နှာများနှင့် ဝိုးတဝါး တူနေသော နက္ခတ်တာရာ ကဲ့သို့သော ပုံရိပ် သုံးခု အဖြစ်သို့ စုစည်းသွားခဲ့သည်။ မျက်နှာ သုံးခုကြား အတော်လေး ကြီးမားသော အကွာအဝေး ရှိနေသည်။

ထို လူသားမျက်နှာ သုံးခုက ဝေးကွာ နေပုံ ရသော်လည်း လက်တစ်ကမ်းတွင် ရှိနေပုံရပြီး ထူးဆန်းသော အငွေ့အသက် ထုတ်လွှတ်နေသည်။ ချန်လွေ့၏စိတ် လှုပ်ရှားသွားခဲ့သည်။ သူ၏ စိတ်ထဲတွင် ပြုတ်ကျခြင်း ခံစားချက်က ပို၍ပို၍ ပြင်းထန်လာခဲ့သည်။ ထိုအတောအတွင်း ရှေ့မှ လမ်းက ဦးတည်ရာမရှိဘဲ အဆုံးမဲ့ နေပုံရသည်။ သူ၏ ဝိညာဉ်၊ ခန္ဓာကိုယ်နှင့် စွမ်းအားတို့က အဆက်မပြတ် ပြိုကွဲပြီး ပျောက်ကွယ်နေ၏။ အသိစိတ်ကလည်း တဖြည်းဖြည်း မှုန်ဝါးစပြုလာခဲ့သည်။

ချန်လွေ့ ရုတ်တရက် နိုးထလာခဲ့သည်။ သူ၏ လက်များသည် တောက်ပစွာ လင်းလက်နေခဲ့ပြီး လေဆင်နှာမောင်း ကဲ့သို့ မရေတွက်နိုင်သော ခရမ်းရောင် ကြယ်မှုန်များက သူ၏ ပတ်လည်တွင် ပျံ့လွင့်နေသည်။ ပြင်းထန်သော မုန်တိုင်းများက အရပ် လေးမျက်နှာသို့ ဖြာထွက်သွား၏။ ၎င်းမှာ လာလာရီယာ၏ ကောင်းကင်စွမ်းအား ပေါင်းစပ်ထားသော [ဓူဝံကြယ်ကြယ်မုန်တိုင်း] တိုက်ခိုက်မှုပင်။

သို့သော်လည်း လွှမ်းမိုးထားသော ကြယ်မုန်တိုင်း နစ်မြုပ်နေဆဲ ဖြစ်သည်။ ၎င်းက ထိုကျယ်ပြန့်သော နေရာလွတ်တွင် တိုက်ခတ်နေသော လေပြင်းတစ်ချက် မျှသာ ဖြစ်နေပုံရပြီး ခဏတာအတွင်း အစအနမကျန် ပျောက်သွားခဲ့သည်။

ထိုမြင်ကွင်းက ချန်လွေ့၏ စိတ်ကို တုန်လှုပ်သွားစေခဲ့သည်။ ကျယ်လောင်သော အော်သံနှင့် အတူ သက်တန့်အလင်းဖြင့် ပြည့်နှက်နေသော မီးသင့်နဂါး သုံးကောင် ကို ကြီးမားသော လူသားမျက်နှာ နက္ခတ်တာရာ သုံးခုထံသို့ ပစ်လွှတ်လိုက်၏။ သို့သော် သက်တန့် မီးသင့်နဂါးများ နှေးကွေးနေဆဲ ဖြစ်သည်။ သက်တန့် မီးသင့်နဂါးများသည် ပို၍ပို၍ ဝေးကွာ၍ သွားခဲ့သော်လည်း ပစ်မှတ်ကို မထိမှန်နိုင်သေးပေ။ သူတို့သည် လမ်းတစ်လျှောက်တွင် တဖြည်းဖြည်း ပျောက်ကွယ်သွားခဲ့သည်။

အရှေ့တည့်တည့်မှ နက္ခတ်တာရာတွင် ခီလီယာနာ ပေါ်ထွက်လာခဲ့သည်။ သူ ပြုံးလိုက်ပြီး နက္ခတ်တာရာ သုံးခု၏ ကြီးမားသော မျက်နှာများသည်လည်း သက်ဆိုင်ရာ အပြုံး တစ်ခုကို ပြသခဲ့သည်။

“မနေနိုင်တော့ဘူးလား။” ခီလီယာနာက သူ၏ လက်သည်းရှည်များ ပေါ်မှ သွေးတစ်စကို လျှာဖြင့်လျက်ပြီး သူ ပို၍ပင် ဆိုးသွမ်းစွာ ပြုံးလိုက်သည်။ “မင်း ပလ္လင်ကို မတိုက်ခိုက်ခင် ခဏလောက် စောင့်မယ်လို့ ထင်ခဲ့တာ။ မင်းအတွက် အသူရာချောက်နက် စိတ်ဆန္ဒကြောင့် ပြောင်းလဲသွားတဲ့ ဒီစကြာဝဠာထဲမှာ လွင့်ပါးနေတဲ့ ပြာမှုန့်အဖြစ် လုံးဝ လျှော့ချ ခံရတာက အတော်လေး စံပြဖြစ်ထိုက်တဲ့ ပန်းတိုင်တစ်ခုပဲ။”

“ဒါက စကြာဝဠာလား။ အလွန်ဆုံး အသေးစားလေး ကြယ်စင်စု တစ်ခုပဲ...” ချန်လွေ့ လှောင်ရယ်ပြီး မကောင်းသော နိမိတ်တစ်ခုကို အာရုံခံမိ လိုက်သည်။ မူလက ကျယ်ပြန့်သော ကြယ်ကောင်းကင် ထိုနေရာလွတ်တွင် နက္ခတ်တာရာများက သူတို့၏ စွမ်းအားကို မထုတ်ဖော်နိုင်ပေ။ သူ၏ ဝိညာဉ်နှင့် စွမ်းအားက အရှိန်မြန် သေဆုံးနေသည်။ အကယ်၍ သူ တစ်စုံတစ်ရာ ပြောင်းလဲရန် မကြိုးစားပါက ခီလီယာနာ မလှုပ်ရှား လျှင်ပင် နောက်ဆုံးလောင်ကျွမ်းသွားမည် ဖြစ်ပြီး အနှေးနှင့် အမြန်ပင် လုံးဝ ရှင်းလင်းခြင်းခံရလိမ့်မည်။

ခီလီယာနာ သူ့ကို လိုက်လျောညီထွေ ဖြစ်အောင် အချိန်အများကြီး မပေးခဲ့ပေ။ နက္ခတ်တာရာ သုံးခု၏ သွေးရောင်အလင်း တောက်ပလာပြီး စွမ်းအားဆုံးရှုံးမှု အရှိန် ရုတ်တရက် ဆယ်ဆ မြန်ဆန်လာခဲ့သည်။ ချန်လွေ့သည် နေနှင့် လကဲ့သို့ ဖြစ်သော ပျက်စီးခြင်းစာအုပ် နှင့် ဖန်တီးခြင်းစာအုပ် ကို မော့ကြည့်လိုက်၏။ သူ တိတ်တဆိတ် လက်သီးဆုပ်ပြီး နောက်ဆုံး ကျန်ရှိသော စွမ်းအားများကို စုစည်းလိုက်သည်။ တောက်ပသော မီးတောက်များ သူ၏ ခန္ဓာကိုယ် အနှံ့ လောင်ကျွမ်းသွားခဲ့သည်။ အနီးနားရှိ နေရာလွတ်မှ စည်းမျဉ်း စွမ်းအားသည် ထိန်းချုပ်၍ မရနိုင်သော ထူးဆန်းမှုမှ စနစ်တကျ ဖြစ်အောင် ပြန်လည်၍ စီစဉ်လိုက်ပုံရသည်။ ဖိအား ချက်ချင်းပင် သက်သာသွားပြီး သူ၏ စိတ်ဓာတ်များစွာ တက်ကြွလာခဲ့သည်။

ထိုအရာမှာ ဒေလီယာ၏ အမိန့် စွမ်းအားပင်။ ကံဆိုးစွာပင် ထိုအမိန့် စွမ်းအားက အကန့်အသတ် ရှိသည်။ ၎င်းသည် စွမ်းအား တစ်ခုလုံး၏ စည်းမျဉ်းများကို ပြောင်းလဲရန် ထိုအားကောင်းသော ကြယ်စင်စုတွင် မပျံ့နှံ့နိုင်သလို အချိန် အကြာကြီးလည်း မခံနိုင်ပေ။ ချန်လွေ့၏ ရည်ရွယ်ချက်မှာ စည်းမျဉ်း စွမ်းအားကို အသုံးချပြီး နေရာလွတ် တစ်ခုလုံးကို ပြောင်းလဲရန် မဟုတ်ဘဲ သူ့ကိုယ်သူ ကာကွယ်ရန်နှင့် နောက်ဆုံးနှင့် အကြီးမားဆုံးသော ထိုးနှက်မှုကို ပြီးမြောက်ရန် ဖြစ်သည်။ ပစ်မှတ်မှာ သူ၏ အထက်မှ ဖန်တီးခြင်း စာအုပ် နှင့် ပျက်စီးခြင်းစာအုပ်ပင်။

ပျက်စီးခြင်း နှင့် ဖန်တီးခြင်းတို့သည် မူလက လုံးဝ ဆန့်ကျင်ဘက် ဇစ်မြစ် အင်အားစုများ ဖြစ်ကြသည်။ လက်ရှိတွင် ဖန်တီးခြင်းစာအုပ် နှင့် ပျက်စီးခြင်းစာအုပ် တို့သည် လောက တစ်ခုလုံး၏ အပြောင်း အလဲများအတွက် အဓိက အင်အားစုများ ဖြစ်ကြသည်။ အဘယ်ကြောင့်ဆိုသော် အသူရာချောက်နက် စိတ်ဆန္ဒ၏ စွမ်းအားမှာ ပါးနပ်သော ဟန်ချက်ညီမှုကို ထိန်းသိမ်း ထားသောကြောင့်ပင်။ သူ လုပ်ချင်သည်မှာ ထိုဟန်ချက်ညီခြင်းကို ချိုးဖျက်ရန် ဆွဲဆောင်မှု တစ်ခုအဖြစ် သူ၏ ကိုယ်ပိုင် ဖန်တီးခြင်းဇစ်မြစ် နှင့် ပျက်စီးခြင်းဇစ်မြစ်ကို အသုံးပြုရန် ဖြစ်၏။ ၎င်းက ဖိုက်သွန် ယခင်တစ်ခေါက် ပြုလုပ်ခဲ့သလို ဖန်တီးခြင်းစာအုပ်နှင့် ပျက်စီးခြင်းစာအုပ်၏ တိုက်မိမှု ဖြစ်စေပြီး အလွန်အမင်း အားကောင်းလွန်းလှသော ပျက်စီးခြင်းစွမ်းအားကို ထုတ်လုပ်စေကာ အသူရာချောက်နက် စိတ်ဆန္ဒကို လုံးဝ ဖျက်ဆီးပစ်ပေလိမ့်မည်။

ချန်လွေ့၏ ရည်ရွယ်ချက်ကို ခီလီယာနာ တွေ့ရှိသောအခါ နှာခေါင်းရှုံ့ လိုက်သည်။ အနီးနားရှိ နေရာလွတ်၏ ဖိနှိပ်မှု စွမ်းအား နှစ်ဆတိုးလာသော်လည်း အမိန့်၏ ကာကွယ်မှုကို မဖောက်ထွင်း နိုင်သေးပေ။ သူက မျက်မှောင်ကြုတ် လိုက်ပြီး လက်ချောင်းကို နောက်တစ်ကြိမ် ညွှန်ပြလိုက်သည်။ မရေမတွက်နိုင်သော သွေးနီရောင် ဥက္ကာပျံများ ချန်လွေ့ထံသို့ တရွှီရွှီ မြည်ဟည်း၍ ရောက်ရှိလာပြီး ပိုမို မြန်ဆန်သော အရှိန်ဖြင့် ချန်လွေ့ကို အမီလိုက်နေသည်။

ချန်လွေ့ သွေးနီရောင် ဥက္ကာပျံမိုး၏ ထိမှန်ခြင်းကို ခံရတော့မည့် အချိန်တွင် သူ၏ပုံရိပ် လျှပ်တစ်ပြက် လှုပ်ရှားသွား၏။ ခရမ်းရောင် ကြယ်အလင်း ပျံ့နှံ့သွားပြီး ကြီးမားသော ပုံရိပ်ယောင် တစ်ခုအဖြစ်သို့ ပြောင်းလဲကာ ဥက္ကာပျံမိုးကို အရူးအမူး တိုက်ခိုက် လိုက်သည်... ပိုတိတိကျကျ ပြောရလျှင် ကိုက်လိုက်ခြင်း ဖြစ်သည်။ ထိုဥက္ကာပျံမိုးက မျက်စိတစ်မှိတ်အတွင်း ဝါးမျိုခံလိုက်ရ၏။

ခီလီယာနာ၏ ထူးဆန်းသော အကြည့် အောက်တွင် ပုံရိပ်ယောင်က ကြီးမားသော စိန်ပုံစံထဲ တည့်တည့် ပြေးဝင်သွားခဲ့သည်။

ထိုအခိုက်အတန့်တွင် ဖန်တီးခြင်း စာအုပ် နှင့် ပျက်စီးခြင်းစာအုပ် နှစ်ခုစလုံး ပျောက်ကွယ်သွားခဲ့လေသည်။ သူသည် ဖန်တီးခြင်း နှင့် ပျက်စီးခြင်း ဇစ်မြစ်၏ စွမ်းအား နေရာတိုင်းတွင် ပြည့်နှက်နေ သည်ကိုသာ ခံစားလိုက်ရသည်။ သူ၏ ခန္ဓာကိုယ်ထဲမှ ဇစ်မြစ်စွမ်းအား နှစ်ခုက ဟန်ချက်ညီမှုကို မချိုးဖျက်ရုံ သာမကဘဲ ခန္ဓာကိုယ်မှ စုပ်ယူခံရပြီး ပေါင်းစည်း၍ သွားခဲ့၏။ တစ်ချိန်တည်းပင် ချန်လွေ့က သူ၏ မျက်နှာထံသို့ တိုက်ခတ်လာသော ရှေးဆန်ကာ ကြီးမားသော အငွေ့အသက် ကို ခံစားလိုက်ရသည်။ ထာဝရ၊ ထာဝရ အသက်၊ မသေနိုင်ခြင်း စသည့် အတွေး အမျိုးမျိုး သူ၏ စိတ်ထဲတွင် အလိုလို ပေါ်လာခဲ့သည်။

ဒီခံစားချက်က... နည်းနည်း ရင်းနှီး နေသလိုပဲ။

ချန်လွေ့၏စိတ် လှုပ်ရှားသွားခဲ့သည်။ ငါ ဒီအငွေ့အသက်ကို ဘယ်နေရာမှာ အာရုံခံမိခဲ့တာလဲ ဆိုတာကို မှတ်မိပြီ။ လျှို့ဝှက်ဆန်းကြယ်နယ်မြေ အဆုံးမှာ။ ဖိုက်သွန်နဲ့ အခြားသူတွေ တားမြစ် နယ်မြေလို့ ခေါ်တဲ့ ဖရိုဖရဲဘုံ။

ဒီမှာ ဖရိုဖရဲဘုံ အငွေ့အသက် တကယ် ရှိနေတာလား။ နောက်တစ်စက္ကန့်တွင် ချန်လွေ့၏ မျက်ဆံများ ရုတ်တရက် ကျုံ့သွားသည်။ အဘယ်ကြောင့်ဆိုသော် ကြီးမားသော အလောင်းတစ်လောင်းက သူ၏ အရှေ့တွင် ပေါ်လာ၍ပင်။

အလောင်းက ဖော်ပြ၍ မရနိုင်သော အငွေ့အသက် ထုတ်လွှတ်နေသော်လည်း အနီးကပ် ကြည့်လိုက်သောအခါ ၎င်းမှာ မှိန်ဖျော့ပြီး ကြီးမားသော နေအဖွဲ့အစည်း ဖြစ်နေသည်။ ချန်လွေ့ လန့်သွားခဲ့သည်။ တကယ်ပဲ...

အဝေးတွင် အလောင်းများ ပို၍ပို၍ များလာသည်။

ချန်လွေ့သည် အလောင်းများက ပတ်ဝန်းကျင်မှ ဖန်တီးခြင်းနှင့် ပျက်စီးခြင်းဇစ်မြစ် စွမ်းအားကို စုပ်ယူနေပုံ ရသည်ကို ရှင်းလင်းစွာ အာရုံခံမိလိုက် ပြီးနောက် လူသားလောကတွင် မြင်တွေ့ ခဲ့သော အပြောင်းအလဲများကို ရုတ်တရက် သတိရလိုက်သည်။ ရုတ်တရက် သူက ရှင်းလင်းသွားခဲ့သည်။ အရင်တုန်းက အဲဒါ ကြောက်မက်ဖွယ်မိုးပျံနယ်မြေနဲ့ ထပ်နေတဲ့ နေရာလွတ်ပဲ။ အခုတော့ အဲဒါက ဖရိုဖရဲဘုံ ဖြစ်သွားပြီ။

ပထမဆုံး နတ်ဘုရားတွေရဲ့ တိုက်ပွဲ၊ အန္တိမကျိန်စာ၊ အမှောင်ထု နတ်ဘုရား ဘဝ။

ဒုတိယ နတ်ဘုရားတွေရဲ့ တိုက်ပွဲ၊ နတ်ဘုရားတွေရဲ့ ဆည်းဆာချိန်၊ နတ်ဘုရားတွေ ကျဆုံးသွားခဲ့တယ်။

ဒါဆိုရင် အသူရာချောက်နက် စိတ်ဆန္ဒ နောက်ဆုံး ရည်ရွယ်ချက်က...

ချန်လွေ့ လန့်သွားခဲ့သည်။ မှိုင်းညို့ပြီး သေဆုံးနေခဲ့သော နေအဖွဲ့အစည်းသည် အလင်းစက်များဖြင့် တောက်ပလာခဲ့၏။ ကြောက်မက်ဖွယ် ကောင်းသော ဖိနှိပ်မှု တစ်ခု ပျံ့နှံ့သွားသည်။ ထိုအရှိန်အဟုန်က ခီလီယာနာ၏ စွမ်းအားထက် အဆပေါင်း ထောင်နှင့်ချီ ပိုမို၍ အားကောင်းသည်။ ချန်လွေ့က သူ၏ဝိညာဉ် မကြုံစဖူး ဖိနှိပ် ခံထားရသည်ကိုသာ ခံစားလိုက်ရသည်။ သူ၏ စွမ်းအား အကုန်လုံး ထိန်းချုပ် ခံထားရပြီး လုံးဝနီးပါး ပြိုလဲသွားခဲ့သည်။

ထိုအခိုက်အတန့်တွင် သူ၏အမြင်အာရုံ နောက်တစ်ကြိမ် ပျက်ယွင်းသွားပြီး သူက သွေးရောင်ကြယ် နေရာလွတ်သို့ ပြန်လည် ရောက်လာခဲ့၏။ အထက်ကောင်းကင်၌ ကြီးမားသော စိန်ပုံစံရှိနေဆဲ ဖြစ်ပြီး ခုနက ပျောက်ကွယ်သွားခဲ့သော မျက်ဆံများ ဖြစ်ကြသည့် ဖန်တီးခြင်း စာအုပ်နှင့် ပျက်စီးခြင်းစာအုပ်တို့က အတွင်းထဲတွင် ရှိနေသည်။

ချန်လွေ့သည် ခုနက သေချာပေါက် ထင်ယောင်ထင်မှား မဟုတ်ကြောင်း ကောင်းစွာ သိလေသည်။ သူ၏ လက်ရှိ ခန္ဓာကိုယ်က ထိုကြောက်မက်ဖွယ် ဖိနှိပ်မှု အင်အားကို ထိန်းသိမ်းထားဆဲ ဖြစ်သည်။ သူ၏ ဝိညာဉ်နှင့် ခန္ဓာက အလွန်အမင်း အားနည်းသော အခြေအနေတွင် ရှိနေပြီး သူ၏ စွမ်းအားကို ခဏတာ မစီးဆင်း စေနိုင်ပေ။ အတုအယောင် အခွင့်အာဏာ စွမ်းအား ကျွမ်းကျင်မှုများစွာ ရှိလျှင်ပင် ထိုအကြွင်းမဲ့ ခွန်အားကို ရင်ဆိုင်ရာတွင် မခုခံနိုင်သေးပေ။ ၎င်းမှာ အရည်အသွေး ကွာဟချက်ပင်။

ခီလီယာနာ၏ ပုံရိပ်က အရှေ့မှ သွေးနီရောင်နက္ခတ်တာရာတွင် ပေါ်ထွက် လာခဲ့သည်။ သူ၏ ခန္ဓာကိုယ်က နောက်မှ နက္ခတ်တာရာ အထဲသို့ အနည်းငယ် ပေါင်းစပ်လာပြီး အခြား နက္ခတ်တာရာ နှစ်ခုသည်လည်း အပြောင်းအလဲ အချို့ ကြုံတွေ့နေရသည်။ အစွန်းမှ ကြယ်များ တဖြည်းဖြည်း ပေါင်းစပ်၍ သွားကြပြီး ကြီးမားသော စက်ဝိုင်းတစ်ခု ဖြစ်ပေါ် လာခဲ့သည်။

“မင်းရဲ့ ဆုံးဖြတ်ချက်နဲ့ ရွေးချယ်မှုက အရမ်းတိကျတယ်။ မင်း ဗျူဟာကလည်း အောင်မြင်တယ်။ ပြီးတော့ မင်းရဲ့သတ္တိက လုံလောက်တယ်။ ဒါပေမဲ့လည်း မင်းက အရေးကြီးဆုံး အချက်တစ်ချက် လိုအပ် နေတယ်။ အဲဒါက စွမ်းအားပဲ။ လောက တစ်ခုလုံးရဲ့ ဗဟိုချက်က အမှန်တကယ် ရှိတယ်။ တကယ်လို့ မင်းက ဒါကို အနိုင်ယူနိုင်ရင် ငါ့နဲ့ အသူရာချောက်နက် စိတ်ဆန္ဒ တစ်ခုလုံးကို လုံးဝ အနိုင်ယူပြီး မင်းရဲ့ လောကကို ကယ်တင်နိုင်တယ်။ ဒါပေမဲ့ လိုအပ်ချက် တစ်ခုတော့ ရှိတယ်။ အဲဒါက ကျော်လွန်ဖို့ စွမ်းအား ရှိဖို့ပဲ...”

“ခင်ဗျားက... သူတို့ကို ပြန်ပြီးတော့ အသက်သွင်းချင်တာလား။” ချန်လွေ့ ခုနက ဖြစ်ပျက်ခဲ့သည်ကို ပြန်ပြောင်း သတိရလိုက်ပြီး ယခုတွင် နားလည် သဘောပေါက်သွားပုံရသည်။ “မဟုတ်ဘူး ဒါက ပြန်လည်ရှင်သန်ခြင်း မဟုတ်ဘူး။ ကျိန်စာတိုက် ခံထားရတဲ့ အမှောင်ထု နတ်ဘုရားဘဝတွေ ဖြစ်တဲ့ ခင်ဗျားတို့က ပျက်စီးခြင်းစာအုပ် နဲ့ ဖန်တီးခြင်းစာအုပ် စွမ်းအားကို အသုံးပြုပြီး နတ်ဘုရားတွေရဲ့ ခန္ဓာကိုယ်တွေကို ပိုင်ဆိုင်ဖို့နဲ့ အသက် အသစ် ရရှိဖို့ ကြိုးစားနေကြတာပဲ...”

“ပိုင်ဆိုင်ဖို့ ဟုတ်လား။ မင်းက အရေးကြီးဆုံး အချက် တစ်ချက်ကို မှားသွားပြီ။” ခီလီယာနာ ရယ်လိုက်သည်။ ရယ်စရာ အကောင်းဆုံးသော အရာကို ကြားလိုက်ရ သကဲ့သို့ပင်။ သူ၏ ရယ်သံက ဖုံးကွယ် မထားသော သရော်မှုများဖြင့် ပြည့်နှက်နေ၏။ “သူတို့က သူတို့ရဲ့ ခန္ဓာကိုယ်တွေဆီ ပြန်သွားနေရုံပါ...”

“ခင်ဗျား ဆိုလိုတာက...” ချန်လွေ့က ခီလီယာနာ၏ ဆိုလိုရင်းကို နားလည် လိုက်ပြီး မယုံကြည်နိုင်သော အမူအရာကို ပြသခဲ့သည်။

ခီလီယာနာ လှောင်ရယ်လိုက်သည်။ “သနားစရာကောင်းတဲ့ကောင်။ ငါ မင်းကို အကြီးမားဆုံး အမှန်တရား ပြောပြမယ်။ မင်း ပြောနေတဲ့ အမှောင်ထု နတ်ဘုရား ဘဝနဲ့ အသူရာချောက်နက် စိတ်ဆန္ဒ ဆိုတာက တကယ်တမ်းမှာ သူတို့တွေ ကိုယ်တိုင်ပဲ...”

ချန်လွေ့ လန့်သွားခဲ့၏။ မိုက်ကယ်က နတ်ဘုရားများ၏ တိုက်ပွဲ အကြောင်း ပြောပြရန် အသက်ကို စတေးခဲ့ပြီး သူ၏ အသက်နှင့် ဝိညာဉ်က တားမြစ်ချက် အောက်တွင် ပျက်စီးသွားခဲ့သည်။ ယခု ခီလီယာနာက လုံးဝ ဆန့်ကျင်ဘက် အမှန်တရားကို အမှန်တကယ် ပြောပြ နေသည်။

သူက အသံမပြုဘဲ ထိုကြောက်စရာ အမှန်တရားကို ခီလီယာနာ ဆက်လက် ဖြေရှင်းမည်ကို စောင့်ဆိုင်း နေခဲ့သည်။ တစ်ချိန်တည်းမှာပင် သူက ကြောက်စရာ ဖိနှိပ်အားမှ လွတ်မြောက်ရန် စောင့်ဆိုင်း နေခဲ့သည်။

“လူစီဖာက နတ်ဘုရားတွေရဲ့ ဆည်းဆာချိန်ကို ဖြစ်စေဖို့ အန္တိမသော့ကို အသက်သွင်းပြီးတော့ သူတို့တွေက ကျဆုံးသွားခဲ့သင့်တယ်။ ပြောရမယ်ဆိုရင် အမှောင်ထု နတ်ဘုရားဘဝလည်း ပျက်စီး သွားသင့်တယ်။ ဒါပေမဲ့ အန္တိမကျိန်စာရဲ့ အန္တိမစွမ်းအား အချို့ကို အားကိုးပြီးတော့ သူတို့ရဲ့ စိတ်ဆန္ဒက နောက်တစ်ကြိမ် ပြန်လည် ရှင်သန်လာခဲ့တယ်။ ဒါပေမဲ့... မတူညီတဲ့ တည်ရှိမှု နည်းလမ်းတစ်ခုနဲ့...”

“အသူရာချောက်နက်...” ချန်လွေ့ နောက်ဆုံးတွင် သတိပြန်ဝင်လာခဲ့သည်။ နတ်ဘုရားများ ကျဆုံးပြီးနောက် သူတို့က အန္တိမနတ်ဘုရား၏ ကျိန်စာစွမ်းအားကို အားကိုးပြီး အသူရာချောက်နက် စိတ်ဆန္ဒ ပုံစံဖြင့် အသက်ရှင် ကျန်ရစ်ခဲ့ကြောင်း အဖြေပေါ်လာခဲ့သည်။

ပြောရမယ်ဆို အသူရာချောက်နက်ရဲ့ စိတ်ဆန္ဒက နတ်ဘုရားတွေရဲ့ စိတ်ဆန္ဒပဲ။

သက်ရှိ အားလုံးကို ဖျက်ဆီးချင်နေတဲ့ တကယ့် တရားခံက တကယ်တမ်းမှာ ဒီလောကရဲ့ သက်ရှိတွေ ကိုးကွယ်ပြီး ရိုသေလေးစားနေတဲ့ နတ်ဘုရားတွေပဲ။

ထိုအရာမှာ သူ၏ အသိကို လုံးဝ မှောက်လှန် ပစ်လိုက်သော အံ့ဩဖွယ်ရာ အမှန်တရားတစ်ခုပင်။